Luiral Ngaw pui_ziaktu, Laltanpuia Chapter -7

[April Hmar Liverpool]

Luiral Ngawpui_ziaktu, Laltanpuia

Bung Sarihna

Inspector remruata chuan duhsaka leh duhsanga te thah an nih thu a hriat dan leh misual te chu a chhuichhuah dan hetiang hian a han sawifiah ta a.

"Awle, kei hi ka a ta emaw in lo ti hman maithei, mahse thil awmzia chu hetiang deuh hi ani. a hmasa berah chuan lallen khua ah mi bo an awm thu ka lo hriat rual khan an sawi dan leh tlangkam kalo hriat dan atangin ngun takin ka ngaihven nghal a, Chutah sawi dan tlanglawn berah chuan thil thlen dan chu a mak thu leh hnu chhui zui ngaihna reng reng a awm loh thu a ni, chin hriat lohin mi an bo bil hmiah ringawt mai a, boruak a thamral ang mai an ni, khawmu chawi bo a nih rindan te chu mi bo chungchanga thu hriattur tlanglawn an ni.

"khawtlang an beidawng a, hmun hrang hrang ah mibo te chanchin theh darh a ni a, mahse chu thil thleng chu a mak zia leh a hrilhhaithlak zia sawifiah nan lungtum bia ila chu nen thuhmun a ni ang.

"Chu thil chuan kei chu ngaihdan pahnih min neih tir ta a, pakhatna ah chuan mi bo chu a duhthu rengin a tlan bo a ni. Pahnihna ah chuan thah a ni. Option pakhatna ka bawhzui a, ka nau ten mi bo chhung te lam hnena thu an zawhfiahna atangin option pakhatna chu thil ni thei niin ka hre ta lo, mahni thu a tlan bo ngawt turin chhan leh vang ka hmu zo lo a ni.

Chuvang chuan option pahnihna thah a nih chu ka han ring chhin leh a, boruak awm dan leh mipui sukthlek han thlirin tualthahna anih chu rin a harsa in chulam a ngaihdan han neih ringawt pawh chu a inthlahrun awm lek lek ta ve ang, mahse chu chu police investigation kalphung ve reng a ni si.

Tichuan thah lo ni ta se, a pawimawh hmasa ber chu tu thah nge? tunge tualthattu chu? tih laia kha a ni. Chu ta rinhlelh awm ber ni a lang ta chu mi bo bul hnaiha chetla hnuhnung ber a chu a ni ta a, chu chu ruatdika hi a ni tih kan hria,

"tichuan he lai ka rawn thlen hlim khan thil mak tak tak ka tawng nghal mawlh mawlh mai ani tih reng kha in hrethiam phak hauh lo ang. Ka mit la deuh tu mi pakhat ka tawng nghal a, chu chu tudang an ni lo, kan Vcp ngei hi a ni. A ni nen chuan kan inkawm nghal a, mak tak tak in a khawsa ngun hle, hawihawm takin thil thlen dan chungchang te chu chipchiar takin min lo hrilh thlap a, mahse a awmdan leh a hawiher reng mai kha kei rinhlelh na mitmeng a meng ta na fam chuan mak ka tiin rinhlelh min ti chak zual ta sawt mai a ni. Enge maw tak, mi bo te chungchangah hriat ruk a neih kha ka ring tlat mai a.

"Tichuan, ka rinlawk ang ang ngeiin Vcp chu a khawsa Zia awm hle hle thei lo te, a khat tawk a a phawk leh hra thin te, enge maw chhungril lam a ti chi ai tu, hlauhthawnna engemaw tak a nei ani.

"Tichuan Vcp chuan tui bottle chu in tuma a chhin a han herhhawng te reng mai chu a che pawlawh in a hnuhma a pawr hle mai a, ngaihthat loh rukna a neih ngei chu ka ring ta tlat ani.

"Tichuan bottle chhin chu chhuatah chuan a han thlauh a, kut khur dar darin a han chhar a, a aw te chu a tham deuh tuak a, a hmel a dang in a phawk leh deuh hra hra thin bawk,

"ka rilru chuan heti zawng hian a ngaihtuah a, kan Vcp chu mibo chungchangah ah chuan inhnamhanawihna a nei anih loh vek pawhin engemaw hriat ruk a neih duh hmel viau chuan ka hria a ni, a hlauhthawng hmel leh a chebuai lai te chuan ka mit a la ru hle ani.

"Mahse, kan Vcp hi fing tak erawh a ni chiang a, a chet buai deuh chang a ka hmaia mak ti hmel a han hmuh veleh khan a thup mawina tur a hre thei em em mai a, ka mak ti hmel a han hmuh a a han chet buai deuh khan a chauh ve thu te, khawtlanga an hah zia thu te khan a han delhkilh nghal zat zel a, mahse kha kha thuruk hria ni a ka rinhlelhna ti zual tu a ni zawk.

"Tichuan, Vcp chu a nunchang ka chik ran reng a, a che chu a buai phalh reng mai, Chutah Vcp chuan a chhungril a Mangan rukna leh chi ai rukna awm chu a thup thei lo tual tual a, a changin a hawi sawn leh ruai thin a, a chang chuan ngun takin a inngaihtuah leh vang vang a, a chang chuan kuhva chu a ei a, mahse a kuhva ei chu rei a inrial hma in a chhak leh thin a.

"Vcp chuan keini lam chu min tih beidawn a tum hrim hrim a maw ni chu tihtheih turin a beidawnthlak zia leh a hrilhhai thlak zia te, a makna lai ngawt mai chu min hrilh a, kei chuan uluk zawk a zawhna ka han zawh pawh chuan a beidawnthlak thu ringawt in min chhang a ni, ka zawhna tak pawh min chhang hauh lo.

"Tichuan kei chuan a tana thu lawmawm loh tak turin phur hmel tak leh beiseina neih hmel tak chuan theihtawp chhuah tlan a tul thu leh an puihna pawh kan mamawh reng tur thu te chu ka han hrilh a, tualthattu emaw thuruk inthup hre tu tan chuan mibo chungchang chu reh hmak tawh se a ti ngei ang. police lam pawh chu ninawm an tling lo thei lo a ni. Tichuan, kei chuan ka chhinna chu ka rin ang ngeiin a chhanna ka hmu ta a, a kuhva a hmawm chauh emaw tih kha a chhak nghal thuai a.

"Beiseina nei zawnga thu ka khak a piang khan a nin hmel in a ngaithei lo hle tih a hriat reng mai a, an ni tan chuan alo ninawm ru in a lo chauh thlak tawh viau vang pawh a ni thei ve bawk, mahse chu zawng ka rindan nen a inmil ve leh tlat lo a ni.

"A aw te chu a thian hrâwk hrawk a, a awmdan rengah pawh ka thusawi chu a ei viau lo tih a hriat reng, Chutah thawhhona tha leh inlungrualna chungchang ka sawi chu ngaihnep hmel tak hian beiseina chauh an neih thu leh a dang tih theih a vang thu bawk chu a han sawi tha leh thin a, tin a chezia chu a danglam zung zung mai bawk.

"kei chu min ning tih hriat tak in min bengkhawn lutuk lo tih a lang chho zel a, sahdah te chu a hmuam a, tin mak tih deuh pakhat ka nei, chu chu a kut leh taksa thak tih hmel taka a han hiat leh seuh seuh thin chu ani, chu thil chuan eng thil nge min hrilh tiin ka ngaihtuah a, thingtlang mi an ni a, kut hnathawk an ni a, thak sep sep leh pem enge maw neuh neuh chu an nei tur alawm' tiin ngaihdam ka han tum zet a, mahse midang chu ka han thlithlai kual a, tumah Chutiang taka han inhiat leh chezia thlak chhen reng chu midang an awm ve lo. A khawsa Zia leh a awmdan chu mak ka ti tlat ani. Chutiang ang taka a awmna chhan chu ka hre duh ta hle mai a, chhinchhiah bikah ka nei lo thei ta lo a ni.

"Amaherawhchu kan Vcp hi mi â a ni lo ka tih tawh kha, chutia awm hle hle thei lo ni awm ziazang a a chet sek reng pah chuan keini lamin hma kan han la tur te chu lawmawm a tih thu te chu a han sawi veleh luam a, a khat tawk chuan a inhiat leh seuh seuh thin bawk.

"A khawsa zia chu a mumal lo hle a, a chhungril chu engemaw tak hian a kap ru viau tih a hriat, a thaw leh hak thin a, awmze nei loin a kam chu a tuai leh thuak a, rilru vai ruai ang mai hian a khawsa a ni, thil chu a ngaihtuah leh ngut ngut thin bawk. A awmdan rengah pawh chuan thil engemaw tak a chhungril a pai ruk leh amah ngawng em em tu thil a awm a ni, Vcp a ni a chuti taka mi â ang mai a a han khawsa ka hmuh khan a chhungril chu a thlamuang lo a, amah chu a phawk hra a, a inveng ru viau bawk, chu lai chu ka chhinchhiah ru khiau.

"Vcp chu a chauh lutuk avang leh a rim lutukna chhan tur pahnih a awm thei a, pakhatna chu khawtlang hruaitu anihna ang a a inpekna ah chuan a ni, chu tiang chuan thil kal ta se amah chu Chutiangin mi â ang maiin a awm hauh lo ang, a lo chau ve deuh anih pawhin mahni inrintawkna leh thlamuanna a nei ngei tur a ni, chu chu patling awm dan tur a ni,

"a chhan dang leh ah chuan thil engemaw tak tualthihna chungchang nena inkungkaihna thil diklo leh pawi khawihna chuan kan Vcp chu Chutiang taka taksa leh rilru mumal lo leh buai ru tak chuan a awm tir a, thlamuang theilo leh chi ai ru reng rengin a awmtir a, mahse a inngaihtuah harh apiangin a awmdan chu a inhrechhuak fo a, chumi thup mawi nan chuan tawngkam nalh tak tak leh awm ang tur tak tak in a delhkilh nghal zel bawk.

"Kei chuan rinhlelh awm thei tur deuh leh chik lehzual a thil ka han zawh chang apiang chuan a rilru chu a fim in a fin kherek chu a lang zual sauh sauh zawk a, chutiang a han inchhimbu dawi kual a han indawp chhuak mai mai chi kan ni hauh lovang tih erawh ka man thian vek a ni. Chu ai chuan mak ti anga awm lovin thil hriatthiam hmel ang a awm lovin lang ila a fuh zawk ngei ang.

"Tichuan luiral ngaw chu a hmunhma te han thlithlai tur chuan kan thangchhuak dawn ta a, Vcp hnenah chuan min kalpui turin ka rinhlelh hmasak ber mi bo ta hnaivai a chetla hnuhnung ber ruatdika kha ka thlang ta a, ruatdika chu kan Vcp nen hian enge maw in an na tak an lo nei a, a tawng duh in a kam a kal a, thil thlen dan leh chinchang vel han sawi chu a awlsamin a sawi chipchiar thiam hle bawk. A mizia leh hawiher te chu Vcp ang deuh bawk kha a ni a, tui han lem leh khalh khalh chu a ching riau bawk, a phawk deuh hra reng a, mi lu zo leh mi bengvar tak anih chu ka han ring a, a dik ngei pawh ka ring, mahse amah han khaikhin tur in Vcp ka lo chhinchhiah tawh a.

"Ruatdika chu thil thleng chuan a thawngin hreawm a tih ve viau chu ka ring a, chumi avang chu ani ngei ang' ka han ti dawn zet a, mahse chu ngaihdan chu ka thlak leh thuai a, a chhan chu a inhiat deuh seuh seuh reng mai te, a chhungrila engemaw tak hlauthawn rukna emaw mangan rukna awm te chu hmuhhmaih theih an ni silo, thil chik zawk a mi bo ta chungchang ka han zawh ve leh khan nuam lo ti hmel ka hmu thei a, mi bo ta chungchang sawi leh zawhna inzawh leh khauh khauh thin chu hreawm a ti ru hle tih a hriat, chu chuan chhan tha tak a nei ngei ang.

"Tichuan, a ni pawh chu ka chhinchhiah chak zual zel a, amah chu ka zirchiang a ni ber mai, Vcp nen kawng tam takah in anna an nei a, an awmdan, an thil sawi dan, an khawsa zia, an inhiat leh seuh seuh reng thin te chuan engemaw inzawmna an neih ngei chu ka ring ta a ni. Mi bo ta te chungchang chik zawka ka zawh apiang khan an ngaihven loin thil dang daihah an rilru an pe daih zel a, kha khan mi bo ta te kha an ngaina loin an chanchin han inzawh chian chu an duh lo ru riau tih a hriat a ni, tichuan engvanga ngaina lo nge an nih? engvanga mi bo ta te chungchang zawhna chu sawi tha duh lo nge an nih? chu chuan chhan a nei ngei ang.

"Thian an niin ka hre si a, mahse ruatdika awmdanah kha chuan hmelhriat ngailoh ang mai an ni, tin mi bo ta te kha an mi ngainat an ni lem lo tih a hriat, a khat tawka an rilru en tuma mi bo ta te chungchang chik taka ka han zawh thut khan phur lo tak chung leh mi bo ta te chu dahsang lo tih hriat tak chung in a chungchang thalo lam in bul an tan hmasa zel a, zu ruih an chin ve thin thu te chu an sawi a, Vcp pawh kha a ni chiah a ni, mahse he pa pawh hi a â viau lo, a harhchhuah apiangin a tlip mawina tur a chhakchhuak chawpchilh ve nghal zel bawk a, mi bo ta te mize thalo leh an chungchang thalo an sawi zawh rualin an mizia that thu leh an fel thu chu an sawi veleh vat thin.

"chumi bakah ruatdika hian a thil sawi reng rengah hian a thian te chungchang leh a thian te hi a sawi tel zel mai a, a mimal taka a ma chanchin ka han zawh pawh khan a thian te a sawi tel zel mai a, ka han chik chiang deuh a, a thian te a sawi ngun em em danah a thiante chungchang chu ka ngaihven thar ta riau a, a chhan chu amah chauh nilo hian khami zan a ramchhuak te kha ka ringhlel kual ve ta zel a ni.

"Mahse ama insawi dan ngeiah pawh amah leh mi bo ta duhsaka te chu kal hrang an ni a, midang erawh hmun hranah an kal thung si, mahse a thusawi a piangah khan thiante kha a zep tel reng mai si, ama chungchang bil ai khan midang han saawi kai kha nuam a ti tih ka hria a, chuvang chuan amah maia tla fal chi leh amah mai a thil ti chi anih ka ring ta lo a ni, tichuan thian chungchang chu ka titi pui leh tan ta a.

"Thian ngaina mi a nih leh nih loh te ka zawt a, ka rin ang ngeiin thian ngaina tak anih thu chu a sawi ta reng a, kal hrang angin insawi mahse dawt a ni thei tih ka ring ta ani.

"Ruatdika chu Vcp ang mai khan thakhur a nei tih ka hmu fuh leh ta hlauh mai a, chu chuan Vcp nen a inzawmna engemaw tak an neih ka lo rinna chu a nemnghet zel a ni" tiin inspector chuan a thusawi ngaithla thap tute chu a han thlek kual dan dan a, chutah inspector vek chuan chhunzawm in,

"Hmunhma kan va thlen chuan zan dar 10 anih thu a sawi a, chutah chipchiar tak in mi bo ta duhsaka chuan headband a hren thu leh khiang leh thil ding thiang kunga thutna siam anih thu te chu min hrilh a, ka nau hruaia pawh chuan chumi an sa channa tur hmun an thlen hun dar 10 chu alo chhinchhiah ve thlap bawk, chu chu note bu ah hian en theih in a awm ani tih hi ka sawi duh a ni.

"Tichuan, ruatdika chuan sawi zelin darhnih ah haw a rawt thu a sawi leh a, dar sawm a thleng chu dar hnihah haw a rawt anih chu, chumi lai tak chuan kei chuan dar zat chu ka zawt nawn leh deuh kher a, mahse ruatdika chuan dar zat chu a sawi chiang thei mang ta hauh lo mai a, zah zelah sana alo bun hauh loh thu chu a han sawi leh ta daih mai a, tifuh a inti viau ngei ang,

"mahse a thusawi hmasa lamah dar sawm a thleng ang in a insawi a, dar hniha haw rawt ang in a insawi zo chauh a nisi a, ka han zawh nawn leh tak hnu a hre leh tawh lo zahzela sana bun lo ang a a han insawi ta mai kha mak tiin alo chhinchhiahtu hruaia pawh ka va melh deuh kawk nghe nghe a, mahse hruaia khan ka va en kha a lo hre lo, mahse ruatdika khan a dawt phuahchawp kha kan hrethiam reng ani tih a hre mai lo, dawt sawi a sam zia chu ka man thiam tan, mahse he mihring fing kherek zet ruatdika hian ka mak ti hmel chu min lo hmu hman leh tlat pek a, a dawt phuahchawp thup mawi nan a thusawi hmasa lam chu a ngaihtuah let leh vang vang ni ngei tur a ni.

"Chutah, dar 2 vel a nih thu chu a han sawi tha leh a, sana bun lo ni mahse dar hnih vel anih ngei a rin thu chu sawiin a han tlip mawi leh ta a, a chian leh chian loh ka han zawh pawh khan a chiang ngam leh thlap si a, a tawlh thlukna ah chuan a thochhuak rem leh thei ta tlat mai.

"Mahse kei chuan ngun takin thil ka ngaihtuah a, chu lai a thil thleng a sawi te chu ka awih tawh lo laklawh tlat a ni, phuahchawp mai niin ka ngai tlat a ni, mahse a chian leh zual zawk nan tiin dawhtheihna nena thil chik hram hram chu a pawimawh si a, Chutah ruatdika chuan a thianpa a han auh a a auh eih zawh tak silohah chuan innghahkhawmna lam panin chet a lak vat thu min hrilh a, thian dang te nen chuan an thian bo ta duhsaka chu an han au a, mahse chin hriat zui a nilo, alo hawsan tawh anih ringin an tin ve tak thu chu min han hrilh zel a.

"Chutihlai chuan kei chuan nichin a darkar chungchangah khan ruatdika chu ka lo tibuai leh ta zauh a, ruatdika hnenah chuan chutia an thianpa an buaipui chhung chu engtia rei nge tih ka lo zawt thuai a, ruatdika chuan ka rindan bawkin awlsam fe hian darkar khat anih thu a sawi leh ta mai a, kei chuan dawt a phuahchawp kual mai mai a ni tih ka hrechiang ta, Chuveleh amah chhuahchhal aw tak chuan a chian leh chian loh te chu ka lo zawt a, sana a ken loh chungchang te chu ka han hrilh chawp leh bawk a, Chutah meuh zawng ruatdika chu a awk chiang takzet. Mahse, ruatdika chu a tang tlang ta tho a, sana keng lo mahse darkar khat vel anih a rin thu bawk sawiin a tang tlang ta tho a ni.

"Hei hi a ni han dawp vel chiam emaw thu han zawhfiah chiam vel kha ka duh hrih loh ni, mi fing kherek an ni a, Vcp nen an mizia a inpersan lo hle bawk, in sawi fihlim an hnehsawh leh tlat zel a, chu ai chuan ngawi renga chik taka han thlithlai kual zel phawt a kha ka duh a, finfiahna tha tak pakhat chauh a tawk lo tih ka hria a, dawhthei takin awm a tul tih ka hria a ni.

"Chutah, ruatdika chu dar engzatah nge in an thlen tih ka zawt leh a, a hma angin a sawi mai duh ta hauh lo thung, a fimkhur zual sawt tih ka hrethiam, tin a fin kherek bawk hi a buaithlak leh fo thin bawk, ruatdika chuan ka zawhna chu chhang ta mai lo chuan a chauh deuh thu te, thil thlengin a nghawng ve thu te, a rilru te chu a vai deuh ruai thu te, thil theihnghilh mai mai a hrat thu te chu a sawi leh ta tlat mai a, a hma a alo intawng awhna te kha a khuh bo leh ta tihna anih chu.

"Mahse, rui lo hai lo ta na na na chuan engmah ka awih sak duh lo, mahse tawngka chuan a thusawi pawmpui awm takin ka awm zel a, amah chu hriatthiam hmel takin ka awm zel bawk. Chutah le thil nihna chu Chiang takin a rawn lang ta zel, ngun tak leh uluk takin ruatdika chu a han inngaihtuah a, ram atanga in an thlen hun chu dar ruk anih thu a sawi ta a, keini lam pawhin note bu ah kan lo chhinchhiah zel, chulai darkar inleh kual dan vel chu a pawimawh hle tih ka hria a,

"ruatdika chuan in an thlen hun a sawi chu dar ruk anih chuan ram atanga haw a rawt hun kha dar hnih a ti a, ka han zawh nawn leh pawh khan a chian hmel viau, sana bun lo mahse ramvak thang chuan a hresual lo turah ngai ila, khatia an thianpa an buaipui chhung kha darkar khat bawr vel a ti bawk a, dar hnih atangin darkar khat chu han belh ila dar thum bawr vel ah in lam an pan tihna a nih tak chu, tichuan kawng lakah an pen kawi leh kawi loh ka zawt a, an chawlh khaw muan leh khaw muan loh ka zawt thlap bawk.

"Ruatdika chuan kawng lakah an pen kawi loh thu leh an chawlh khaw muan loh thu min hrilh a, in an bantlang tihna anih chu, chuti anih si chuan dar thum a haw kha dar rukah in an thleng tihna a ni ta a, kalkawngah darkar thum an thang tihna anih chu, chawl khaw muang miah loin luiral ngaw innghahkhawmna atanga khaw chhung inkar chu darkar thum vel ke a kal tihna anih tak chu, a hnu deuhah darkar thum kal chu ani reng em tih hriatchian ka duh a, mi thenkhat thu kan zawhfiahna ah innghahkhawmna chhek tlang an tih atanga in bantlang tur chuan thalai ramvakmi tan chuan darkar khat bawr vel anih thu an sawi ta tlat mai.

"chik zawk a ka han ngaihtuah chian hnu pawh chuan a tir atanga ka rinhlelhna leh ka zeldin thil te kha a dik ngei chu ka ring ta a ni. Dawt hlang vek ruatdika khan khalai sa channa hmunah khan min hrilh a ni, a phuahchawp mai mai a ni. Ni e, khawtlang mipui te hnenah thu an phuahchawp a ni. Khati khawpa hnu chhui zui tur awm loa thil a thlen theih chhan kha chu Luiral ngawah an kal hauh lo tihna a ni, chuti anih tak si ah chuan khawiah nge an kal tak ang' tih chu a pawimawh ta.

"Tichuan, haw kawngah chuan ruatdika thusawi zawng zawng te, a titi zawng zawng te kha kei chuan ka ngaihven ru in ka chik ru takzet a, a awmdan mawlh kha a ni, mahse a langah chuan thil dang daihah rilru pe angin ka awm a, ama lam hawi lovin ka mit sir erawh chuan ka thlithlai ru reng, tichuan le ka thlithlai rukna ah chuan ka phu zawk thelh nghe nghe" Tiin inspector chuan a ban vei lam chu dawmin a han thaw halh halh a.