Luiral Ngaw pui _ziaktu, Laltanpuia _Chapter-8 Last

[April Hmar Liverpool]

Luiral Ngaw pui_ziaktu, Laltanpuia

Last Chapter

Inspector chuan a sawi chhunzawm zel a, "kawngpui peng pakhat, khawchhak lam pana tlang lamah chuan a mit a len ruai tih ka hmu ran. Kawng peng awmna lai leh hnuhma ni awm tak te, kawng kam te chu a thlek uluk viau mai, enge a chhan ni ang? E le, ka zawhna chhanna kha chu lai kawng pui dang a tlangna lai chu a ni, luiral ngaw ah khan an kal hauh lo a niha dawt phuahchawp vek anih si chuan khawiah nge an kal tak ang tih kha a ni a, chu zawhna chu chu kawngpui peng pakhat awmna lam chu a ni.

"Tichuan chumi chungchang chu rinpuia hnenah, khaw chhung a mite, tu emaw ber thil sawichhuak mai mai lo tur hnena lo zawt chiang turin ka ti a, a ni chuan lo zawt chiangin chu kawngpui peng chu thlanvawng panna ani tih ka hre ta a, thlanvawng chu huan thlai neihna hmun niin thlam te a awm thu ka hre ta a, tuikhhuah te a awm a, ramriak pawh an awm zauh zauh thin thu te chu ka hre ta zel a, tichuan thlanvawng mual lam chu ka thuruk a ni ta a ni. Engtikah emaw ka la luhchhuah ngei a tul dawn tih ka hria, Mahse chu erawh a tawp lam ah ka khek ta rih a ni.

"Luiral ngaw nilo a thlanvawng mual lam pana chet thawh chung si khan mipui te hnenah luiral ngaw a ramvak angin an insawi a ni. Thlanvawngah chuan eng thil nge an tih tak ang? chu chuan phurna nasa tak min pe a, thlanvawng mual chu ka thlithlai chak tawh takzet.

"Ka mi rinhlelh te chu ka bawhzui zel a, ruatdika thianpa jery-a chu ka kawm ve leh duh avangin zu in tur ka mamawh thu sawiin ruatdika chu min ngaihtuah sak tura a thian jery-a chu ti turin ka ti a, tichuan ruatdika chuan Jery-a chu ka zu in tur min lo ngaihtuah sak tur chuan alo hrilh a. Hetiang a ka tih nachhan hi chu hlauthawng lo leh ngaihngam takin awm se, ka rinhlel ani tih kha hre lo se ka duh vang ani.

"Tichuan, he laiah ni thum riaka hun hman ka duh thu kan hotu te hnenah ka thlen ta a, tichuan Vcp nunthara te chenna in chu kan innghahna a ni ta a, Vcp te chhungkua hi ka hriatchian duh bawk avang in rinhlelh awm loh turin tlangnel taka awm ka duh a, ka theihtawp chhuahin fiamthu nen titi ho te te vawrh in chhungkaw member tin chu inpawh taka khawsak ho pui pawh ka tum ve hle.

"Naupang te chu an awmdanah pawh, thil thleng chanchin a titi lengvel ah puitling hriatchin chu an hre ve vek tih ka hmuthiam a. Vcp nunthara te chhungkua inrêlbawlna dan leh an mahni mimal tin, an thil tih, an khawsa zia leh nunphung ka thlithlai reng a, chu tah chuan Vcp hian thutkhawmna pindan a thing a siam thingrem lian tak atang chuan thil pawimawh a dahna almirah chabi a lachhuak lai hi ka hmu fuh ta hlauh mai. Chu chu ka tan hriat a pawimawh a ni, a chhan chu Vcp hian ruihhlo engemaw tak, damdawi chak tak a kawl ruk hi ka ring tlat a ni.

"Chumi anih theih chhan chu a hma lam a a khawsak dan leh a chezia mi â ang mai a a awm te, ruih nei ni awm taka a inhiat seuh seuh thin te kha ka la hrereng, chumi ang chiah chuan ruatdika pawh a awm anih kha, an ni ka rinhlelh ho hi an khawsak dan leh a chezia, mi â ang mai a an awm thin leh ruih nei ni awm taka an inhiat hauh hauh reng thin khan damdawi chak tak engemaw chu min ngaihtuah chhuah tir a, chu damdawi chu an rui thin ni ngeiin ka ngai, ruihhlo chu Vcp hian khawiah emaw tak a kawl that ka ring bawk.

"Zana ka muttheih thin loh chang hian mutthilhna damdawi hi ka ei thin a, ka kawl reng thin, chu chu ei turah dah in zanah chuan Vcp te nupa chu ka ei tir a, duhsak taka ei tur ka pek kha an ei lo thei lo, tichuan an ni nupa chu tui ti tak in an muhil ta a, kei chuan fimkhur takin Vcp chabi dahna thingrem chu hawngin almirah chu ka check ta a, ka rin ang ngeiin safe chhungah chuan Vcp chuan heroin hawng khat hi alo kawl a, chu chu la in almirah chu ka khar tha leh a, chabi erawh doormat hnuaiah ka dah a, naupang te khan ka thawm vel kha an lo hria a ni mai thei, a hnu ah khan ramhuai in thil bo chu a lak bo anih an rin thu te an rawn sawi nghe nghe anih kha, mahse hemi erawh hi chu a hmawr ka bawk dawn hnaia thil thleng anih avangin a hma lamah khan let leh lawk ila.

"Chutia zu in tura ka chhuak ta chu ka tawngkam thiamna hmang tangkaiin ruatdika chu ka ruahman ang in ka thunun thei zel a, ka duh ang ngeiin hmun fianrialah a thianpa Jery-a nen, ruatdika a nen chuan kan pathum in zu chu in in ka thil hriat duh ang zawng zawng thlithlai nan hun kan hmang ho ta a ni.

"Kei chu an ni tan a kawm nuam thei tur ang berin ka awm a, an mahni chu ka hrethiam em em fo a, a kar lakah thu ka zawt zauh zauh a, Jery-a kha ruatdika ang lo takin a tawng tam lutuk lo, mahse a mizia awm ang ka hriatchian khan mi fing tak a ni a, a inveng in a thil sawi turah a fimkhur hle, chuvang chuan ruatdika bawk chu a tawng duh a ni si a, ka tan a pawimawh leh ta, ruatdika a insawi awk dawn anga a lan chang apiang chuan Jery-a chu alo inrawlh vat thin a, kha kha ruatdika khan a hrethiam lek lek thin.

"khami zan kan inkawm khawmna atang khan an ni thianza leh ka rinhlelh Vcp tiamin an awm dan leh an thusawi duhdan kalhmang te, thak nei ni awm taka an inhiat seuh seuh thin te, an thusawi inkalh zauh zauh te, an thian chungchang an sawi a piang a mi bo ta duhsaka leh duhsanga te an sawi lang ve ngailo te, an sawi chhunah pawh an awmdan leh hmel landan, an tawngkam thlenga a danglam thin te leh mi bo ta te chungchang an sawi duh dan te khan ruatdika te thian za leh Vcp te hian mi bo ta te kha an ngaina lem lo tawp tih a lang reng tawh ani, chutah an ni tang khawm chuan duhsaka leh duhsanga te kha ruahmanna felfai tak nen a bum chhuakin engtin emaw tak an ti ni ah ka ngai tawh a, chu chu Chiang taka thil awmzia chu ani tih lah ka hrethiam tawh ani. Tin, an that ngeiin ka ring bawk.

"Duhsaka leh duhsanga an thah lai khan damdawi chu an rui ngei bawk ang. mahse dawhthei taka chipchiar zawk a thil ka chhhui a la ngai. Vcp awmdan, ruatdika awmdan leh jery-a awmdan atang ringawt pawh khan inzawmna an nei tlang tih ka hrethiam a, a tira ka rinhlelh ruatdika khan a thian te a sawi fo a, kha kha ngaihven zuiin amah ruatdika mai nilo midangah a kangkai ta anih kha, tichuan Vcp awmdan mak tak leh mize mak tak chu ruatdika te awmdan mak tak nen a in ang em avang khan Vcp hi an thurualpui anih ka ring tihna anih chu, tichuan damdawi an khawih thin chu ka ring a, ka rinhlelh chu a lo dik a, Vcp hnen atang ngeiin ka man ka tih kha, an ni tangrual chuan ruahmanna siam in mipuite bum in duhsaka leh duhsanga te chu luiral ngaw a bopil ta ang a lantir an tum a nih tak ber chu.

"Mahse, chu chu a finfiahna tha leh zual ka mamawh, damdawi ringawt kha a tawk zo lo, a tawp thlengin ka chin leh a tul a ni. tichuan luiral ngaw lam nilova thlanvawng mual lam a chet la tur chuan ruahmanna ka siam leh ta a ni.

"Kei chu khatia Vcp chabi dahna atanga chabi a bo hnu leh a heroin dahthat a han bo hnu khan rinhlelh awm anga inlan in hmun hran a in bawk hran ka duh thu te chu ka sawi a, nuam lo ti awm takin ka lang a, chabi bo hmu tu kha keimah ka ni a, heroin bo thu Vcp khan a hre zui leh si a, kei kha rinhlelh awm ka nilo thei lo, mahse kha kha ka duhdan zawk a ni.

"Vcp khan min ringhlel ru viau tawh ngei ang. An in a awm te kha kan ni a, an chhungkua pawh an buai hle anih kha. Vcp khan ka laka a awmdan leh min chik ruk dan atang khan thil ka hrechhuak zel ani tih a hmuthiam chho tan a, tin amah kha ka chhui ru a ka ringhlel ru ani tih kha a hmuthiam chho tan bawk. A hlauthawng ru takzet tih ka hrethiam.

Naupang ten an pa thil bo chungchangah ramhuai lakbo anih te kha an ring a, duhsanga leh duhsaka pawh ramhuaiin a lak thu te an sawi a, tichuan duhsanga kha a bo veleh hma tlai khan thil ti bo anga an sawi titi lengvak ka hre bawk a, duhsanga khan eng chu nge a tihbo ang, thil bo chungchang chu ka ngaihven thar ta riau mai, naupang in ramhuai thil lak bo chungchang a sawi chu hmanrua ah hman ka duh ta a, ramhuai leh puithuna, khawmu chawi tih te chu remchangah lak ka duh ta ani.

"tichuan duhsanga nu rinmawii hnena a fapa bo hma tlai a a thil tihbo chungchang chu ka va zawt fiah ta a, duhsanga chuan a thil tih bo chu 'thil' tih ringawta a nu hnena a sawi thu te, a nu ngei pawh chuan a fapa thil bo chu a hnu lam a a zawn chiam thu te, mahse thil mak leh danglam engmah a hmuh loh thu te chu min lo hrilh a.

"Chu chu remchangah ka hmang zel a, naupang in 'ramhuaiin a la bo' tih tawngkam a hman kha ka chhawm chho ve ta zel a, ramhuai lak bo puithuna lam chu ka han ring der ve ta chhin a, tichuan duhsanga te in leh a chhehvel chu ramhuai thil lak bo zawng chuan kan han dap ta a, tin khatih lai khan puithuna leh ramhuai tih te, khawmu chawi tih te kha mipui rilru sukthlek a ni tawh hrim hrim a, mi bo ta te chhungte ngei pawh in a an ngaihdan leh an rindan a ni tawh. Kha kha ka tan chuan nuihzatthlak viau mahse remchangah ka hmang duh a ni.

"Khatia Vcp te in chhung ngei a thil bo chungchang avang khan hmun hranah kei leh ka nau te chu kan insuan chhuak ka tih tawh kha, khatia chet ka la ta mai pawh kha mipui lam chuan tha an ti lo hle a, an inthlahrung letin nuam lo an ti hle tih ka hria, amaherawhchu chabi la tu kha keimah ngei ka ni a, heroin kha ka lak ani bawk, ramhuai lak a ni hauh lo. Tin, Vcp nunthara khan kei kha ka lakah that chhuah der viau mahse, in atang khan inpu chhuak mai lo tur te khan mi kha han chelh tum ve viau mahse, min ringhlel tawh ni mai lovin thil awmzia a hmuthiam tawh ka tih kha.

"Keimah avangin a ngaihtuahna a seng hnem viau ta ve ang, kei in hma lam pan zel ka duh si a, Vcp khan hmun leh hmun ah min thlithlai ruk theih chuan ka ruahmanna a hrethiam mai ang tih ka hlau tel ve bawk a ni. mahse min ringhlel a thil awmzia ka hre vek tawh tih a hria kha ka duhdan a ni zawk. mahse ka ruahmanna erawh a hre zui tur a nilo.

"Tichuan kei chuan puithuna atthlak, mipui sukthlek lam chu ka ringhlel bik lo a, khawmu chawi tih leh ngaw huai tih te chu ka ring ve tho a ni tih awihawm takin ka lantir dawn a ni.

"Mi bo ta te thlarau chu be pawp in thil ka zawt chiang dawn a ni, chu thu mipui lam leh ka nau te ngei pawhin an lo hriat khan kei chu mi â ang leh rilru buai ang thaw thangah min ngai ta mai a, keimah ngei pawh kha ka buai lek lek mai. Khatia ka thil tih tum avanga kei chu ka â zo ta ang mai a mipui lam in ngaihdan an lo siam kha mak ka ti ru viau a, a chhan chu puithuna thil a ni a, ka rindan chuan ka thil tih tum kha an lo hriat chuan min thlawp tha viauin ka ring a ni, mahse alo atthlak in alo mawi lo a ni ngei ang.

"Mahse, ka ruahmanna dik tak erawh thuruk a ni si, khatia ka chhuak ta kha min ringhlel tu Vcp khan min zui ru ngeiin ka ring a ni, amah Vcp anih loh vek pawhin ruatdika te thian za a atu emaw ber an nih ka ring, min zui ru tu awm ngei a ka rin lawk avangin ka fimkhur a, ka duh ang tak pawhin chet ka la thei lo, tukkhum lama mit nei ang a awm a tul a a buaithlak tak zet.

"Tichuan, kei chu thlarau be tura zan a thangchhuak ta chu ka ni a, luiral ngaw awmna lam a kal tum ni awm takin chumi lamah chuan ka kal a, thui vak loah ka light ken chu ti eng chung chuan lung chungah ka dah a, ka chawl khawmuang ni a ka lan theih nan, thim zingah chuan thlanvawng peng lam chu pan in ka let leh a, thui tak ke a ka kal hnu chuan min zui ru tu an awm leh awm loh chu ka han ngaichang leh a, Chutah kawng thlang lama thlam lo ding chu ka hmu a, ka han hawi kual a thlam dang ka hmu mai lo.

"Thlam chu ka pan a, uluk takin thlam chhung chu ka dap nghal, engmah ka hmu lo, ka zawn ber chu bawngtuthlawh leh suahdur a ni. chutah thlang deuhah chuan thlam dang ka hmu leh a, chu lam pan chuan hmanhmawh takin ka kal leh nghal. Chutah, uluk tak in thlam chu ka dap leh a, mahse thil rinhlelh awm ka la hmu chuang lo, thlam dang ka thlek kual a, ka torchlight ken chu a eng tha a, hmuh pawh ka hmu zau thei viau.

"Thlam dang ka hmuh tak lovah chuan ka beidawng lek lek hman a, chutah 'ka tum nge ruh saruh' tiin ramhnuai chu fan kual leh hram chu ka tum a, mahsela khuanu in ka chungah that a chhuah a ni ngei ang, thlam hnunglam ban bul ka thlen phei chuan hnim kar a hmawlh pakhat lo lawr tat chu ka hmu a, ka en liam puat a mahse 'hnim han vai kiang nan' tiin ka han ban a, chutah le! ka torhlight a ka han chhun chian nak chuan bawngtuthlawh fawng alo ni.

"ka phur lutuk chu ka te chhuak thelh nghe nghe, tichuan a kiangah chuan suahdur alo let ngat bawk, uluk takin ka hmanraw hmuh leh a vel chu ka bih kual dan dan a, chutah bawngtuthlawh fawng a thil engemaw kai ka hmuh chu ka han bih ngun deuh a thisen khar a ang takzet, Chuveleh ka kut chu ka chemte luzun ken chuan ka han pir kak a, thisen chu bawngtuthlawh fawng ah chuan ka han theh that that a, rei vak lo ka nghah hnu chuan bawngtuthlawh fawng a thil kai chu thisen khar ngei ani tih ka hre ta. Mi bo ta duhsaka leh duhsanga te thisen a ni.

"Chutah, uluk leh zual zawk chuan rûang awmna chu ka han thlithlai leh a, mahse kan thian te hi an fing khawp mai, hnuhma hnutchhiah an nei chinah hnu a tawp zel a, lei laihna hnuhma a awm silo, Chutah ka awmna hmun atanga hmun hla zawk ah rûang chu dahthat anih ka ring ta a, chet la turin ka inruahman mek, Chutihlai tak chuan chhak deuha thawm lo awm chuan min ti phu chiang kher mai, min zuiru tu te an ni ngei ang, rang zet hian ka light ka off thuai a, hnim karah chuan ka bawk nghal a, thawm lo chhuahna lam chu ka ngaichang ran.

"Rei tawk fang thawm chu ka ngaihchan leh hnuah thil thleng engmah ka hriat zui tak lohah chuan ka sana chu ka han en a alo tlai phian tawh, Chutah haw mai chu tha in ka hria a, tin ruang an phum rukna hmun chu chuti mai a zawn hmuh chu ka inring ta lo a ni, tum dangah tha thara chet lak leh chu ka rilruk ta zawk a, keimah mai ai chuan kan Vcp leh kan ramvak mi te nen ngei hian rûang chu zawn hna kan thawk tawh dawn a ni.

"An ni chuan rûang awmna ah min hruai tur a ni, hmanhmawh thei ang ber in in lam ka pan a, luiral ngaw kawnga ka phone light tih en sa a ka dah kha a ngai ngaiin alo la awm a, ka la a hmanhmawh takin ka haw ta nghal a, ka phone ka en chuan Miss call alo tam mai, Chutah message hmangin ka haw mek thu ka hrilh ta vat a, khaw chhung ka luh dawn chuan hmanhmawh taka tlan in Vcp te in lam ka pan a, chau tak leh hah tak, hlauhthawn hmel tak anga ka lanna turin"

Inspector ruata chuan dawhkana tui inchhawp chu la in a han lem khawlh khawlh a, chutah Vcp nunthara hnenah chuan "pu vcp, khami zan khan min zui ru turin i nau te i tir chiah em?" a han ti a, Chutah Vcp Chuan "aw inspector, i thusawi zawng zawng kha a dik vek e, kei khan nang kha ka ringhlel ngei che a, min hrechhuak tak ngial dawnin ka hria a, ka mangang chuan khatia thlarau be tur a i chhuuak ta kha zui ru tur che in danmawia ka message a, that lo tur che erawhin ka ti, a tul anih chuan that tur che a ruahmanna ka siam leh tur thu ka hrilh ani.

Chuveleh inspector chuan "han sawi teh danmawi, khami zan a min thlithlai dan kha min han hrilh teh" tiin danmawia hnuai lam bih ngat chu a han en a, chutah danmawia chuan inspector lam chu en in "inspector, ka zui ruk lai che khan thawm mak tak hi ka hria a, chu thawm chu duhsaka leh duhsanga te thlarau an nih ka ring a, ka hlauhthawng tak zet a ni, nang kha ka duh ang in ka hnaih tha ngam silo che a, hla deuh atanga i light chhun en vel lo thlithlai kha ka ni, rûang kha i hmuh ka ring lo a, a chhan chu nang chuan i eng kha i tithim ta vek a, engemaw chen chu i reh vang vang, ka zui ru che tih i hria em maw ni aw' ka ti hman a, mahse nang chu i chet dan pangngaiin chet i la leh ta a.

"mahse ka rin ai a hma in i rawn let leh ta tlat mai, rûang hmu tur chuan kha ai a rei tawk fang kha hun i mamawh a ni tih ka hria, ka bul hnaih i rawn thlen chhoh lai pawh khan ka lo en reng che a, mahse nang chu i hmanhmawh hle a, i tlan lo chauh a ni, i hmanhmawh em em danah rûang chu i hmu anih ka han ring leh hnuhnawh a, i hnunglam atanga kah hlum nghal mai che kha ka duh a, duhsaka te kan phumna ah ka phum che a nga, mipui te hnenah chuan nang chu ka hmuh zawh loh thu che ka sawi ang ka ti hman.

"Mahse, kan Vcp thusawi kha ka tawmpui leh ta zawk a ni. Ka zui zel tho che a, luiral ngaw kawnga min tihbuai nana i phone light eng sa a i dah kha i la leh a, hmanhmawh takin in lam i pan ta a ni. Chutah kei chuan muangmarin in lam ka pan ve ta bawk"

Inspector ruata chuan nui hak hak pah hian "ni e, khatia hmanhmawh bakleng a in lam pan a ka tlan tak chiam chhan kha chu ka lemchanna mai mai anih kha. Nangni lam lahin min lo ngaihtuah tawh si nen, rinpuia hnenah khan nang ni thian za awmna chin ngaihven nghal turin ka ti a, ka rin ang ngeiin Rinpuia chuan nang chu in ah i awm loh thu min rawn hrilh ta ani. Mahse khatia kan chetna zawng zawng kha nang ni lam chuan in hrethiam hauh lo.

"Khami zan khan ka thil tih avanga lungawi lo pu zamliana khan kei kha min tim nek mai a, tin Vcp khan ka rilru buaina leh ka atna kha remchangah chuhin kei kha min dahthat a duh a ni tih a tawngkam hman dan atang khan ka hrethiam ta bawk, chu chu ka lo ruahman dan ang chiah a ni bawk.

"Vcp hnenah pawh ka ruahmanna engtin nge a hriat tih te ka zawt nghe nghe a nih kha, ka ruahman dan chuan a tuk leh zan ah Vcp leh a naute ho nen chuan a tawp nan tiin luiral ngaw lam pan a duhsaka te hnuhma va thlithlai leh chu a ni, mahse kei chuan a tawpna tur a ni tawh bawk a tiin ka nau te ruatpuia leh joela te chu min zui ru tur leh ka hnung dawl turin ka hrilh ta a, an ni pawh chuan mak ti viau mahse thudik an hmuh duh chuan min zui ru a a tul thut a chet la nghal thei tura inruahman tur chuan ka hrilh bawk.

"Tichuan kei chuan Vcp leh kan pasaltha te hi an rûang thuhruk awmna lam thlanvawng lamah ka hruai dawn a ni, an ni chuan tihluih ngai hauh lovin an rûang thuhruk chu min kawhhmuh dawn a ni. Mahse khami tum khan ka ruahmanna, luiral ngaw a ramchhuah leh chungchang ka sawi chhuah hma hauh khan Vcp khan chumi ang chiah chu a rawn sawi chhuak ta a, kei chu rilru buai anga min chhuah a mi â leh thluak kim lo ni a min chhuah a, a hma a chet an lo lak dan ang bawk a min dah bo veleh chu an tum a ni. Chu chu a dik tiraw?" tiin Vcp nunthara chu a han thlek ha a.

Vcp pawh chuan "a dik alawm, khami tum khan danmawia khan min rawn text a, nang chu in ila rawn thleng lo. Kan lo nghah thap lai che a ni, i khawsak dan danglam tak leh rûang awmna hmuchhhuak ngei ni a i lan thu te, thah mai a tum thu che leh a tih leh tak loh thu te, ruahmanna siam vat tura kei chu min hrilhin chet kan lak vat loh chuan nang chuan kei ni thuruk chu i hriatchhuah vat tur thu te chu min hrilh a, Chutah nang chu i rawn thleng chawpchilh ve leh bawk, khatia pu zama'n thinrim taka a han tawngkhum takah che khan kei chuan ruahmanna ka lo nei ta a ni.

"Nang chu mipuite leh kan hruaitu te pawhin i â zo tawh niin an ngai che tih ka hria a, i rilru a buai zo tawh niin an hria a ni, chu lai tak chu keini tan remchang chuhna hun tha ber ani tih ka hria a, tichuan inspector chu a rilru tih thawven pui paha luiral ngaw ah chuan ramchhuahpui chu ka duh thu ka han sawi ta a, inspector beiseina la awm chu han tihhlawhtlin pui ngei a that thu te, i lam tang ang tak a thu han kuai herin midang tana ngaihthatna tur ni si khan ramchhuah chu ka han rawt ta kha a ni a, ka ruahman danah chuan nang chu i rilru te a buaiin i â zo tawh a, duhsanga leh duhsaka te ang in bopil ve leh ta pawh ni la, khawmu chawi i ni veleh mai dawn a ni.

"Miin an dem mah zawk ang che, a chhan chu mipui lam leh upa zawk te thurawn awih duh loh avanga bo pil ve ta anga ngaih theih tur che khan hun kha a inhawng remchang ve bawk a tin ni.

"Tichuan a hma a ramchhuak te tho kha ni leh thei ila ka duh thu te ka han sawi kha, miin min rinhlelh loh nan nang leh kei mi thar kan awm dawn bawk nen ngun takin han ngaihtuah mah ula, keini lam chu han rinhlelh ngawt nachhan tur kha a awm lo hrim hrim,

"inspector berin ka ruahmanna ang chiah kha a ruahmanna alo nih ve thu te, luiral ngaw chu a tawpna atan han thlithlai leh a duh thu te leh a hma a ramchhuak ngai bawk ruatdika leh a thian te nen bawk ni thei se a duh thu te chu a han sawi ve ta zel mai a, kei khan mak ka ti hauh lo, ka rilru chuan 'pu a, i huntawp a inher mek a ni, ka ai kaih mek che a ni. I fing in thil i chhuichhuak nual tawh ang chu ka ti asin, mahse hei hi hre rawh, duhsaka leh duhsanga te hremhmun a thawn liam tu te chuan ramhnuai hmun reh tak hnuaiah i chungah an thinrimna an lantir dawn a ni tih hi'.

"Ni e, ka rilru kha hre ngat ta la chu i hlau viau ta ve ang"

Inspector ruata bawk chuan uluk taka Vcp thusawi chu lo ngaithla in "pu vcp, ruahmanna chu kan nei ru ve ve, mahse kei khan tharum lam ringawt kha ka thupui a nilo, ka hnungah puakruk nen ka nau te pahnih chuan min veng reng asin" a han ti a, Vcp pawh chuan "ni e, i sawi dik, khatih lai khan nang chuan kan lakah i lu i zuar anih hi' ka ti hman hial mai. ka ruahmanna mi rawn pawmpui lutuk te kha mawlh tu che a awm a, keini khan kan ai kaih che ni ngei a ngaiin rapthlak ka inti ru in ka inchhuang ru tak zet"

Vcp nunthara hmel chu a dur hle mai a, hnuai lam chu a bih deuh ngat reng. Chutah inspector chuan tui chu han lem khawlh khawlh in "imm, hei khua a var chu a ni chho mai a, hun a hek zel loh nan a hmawr ka bawk dan leh misual kan hnungkhirh dan chu i han sawi leh dawn teh ang.

"Chutia kan ruahmanna ve ve hmanga a tawp khar tuma a dingchang zawk nih kan tum ve ve takah chuan chet chu kan la ta a, kei chuan engmah ka sawi lo, ka ngawi reng a, Vcp leh a naute erawh ka tan a thlamuanthlak thei tur awm ber chuan an khawsa zia ah an hmanhmawh lo takzet.

"Mahse kei chu hmanhmawh tak anga langin Vcp leh a nau te chu ka tur deuh vut vut reng a, Vcp hnenah chuan chiang zet zet hian thil nihna dik tak, a tir te atanga a mi bo te an bodan ah chuan tualthahna anih thu te, an rûang awmna te chu ka hriat vek thu ka sawi mawlh mawlh a, chutia tlang taka thil awmzia an bula ka han sawi tak mawlh mawlh rengah chuan Vcp leh a nau te awmdan chu a danglam chho hret hret.

"Hmanhmawh takin ka che deuh vut vut reng a, chutah luiral leh thlanvawng in daidanna kawng peng kan thlen chuan Vcp leh a nau te chu an han tawi deuh hrat a, mahse kei chuan an ruahmanna chu ka hriatchian em avang chuan 'helam ah aw' tiin an mahni ngaichang lo zet chungin thlanvawng panna lam ah chuan ka tlang nghal mawp mawp, an ni chu ka hnung lamah chuan eng eng emaw inhrilh ru in ka awmdanah chuan an ngaih chu a tha chiah lo tih ka hria, an awmdanah chuan kei chu min dahthat nghal mai pawh chu pawi an ti tawh lo tih a lang reng.

"Chutah le, kei chuan ka mobile chu ka en a, rinpuia message ka hmu lo tlat, chak fe a kal in ka phone chu ka type nghal zung zung a, chuveleh rinpuia chuan ka message chu alo en nghal thuai a, kan hnung lawkah an awm thu a ni, kei chuan min hnaih chilh tawh tur leh chet lak inring ran a awm tawh tur chuan ka ti a, ka phone chu ka ak nghal. Vcp te chu an ngaih a tha chiah lo, nelawm loh fe hian Vcp chuan, "inspector, tunge i biak? a rawn ti ta mai a, ka hlauh ang ngei a ni.

"Midang ka bia tih kha hre lo se ka duh avangin chak tak a kal a phone type kha ka ni a, mahse min rawn hmu hman tlat, mahse a pawi lo ka ti a, an mahni lam chu ngaihven in thlam kiangah chuan ka lo nghak a, remruatna an nei a ni ngei ang. Chutah le, ka phone recorder chu ka on a ka ak nghal, Vcp hnenah chuan, "pu nunthar, duhsaka leh duhsanga te rûang chu he lai atanga hmun hla vak loah an awm a ni" tiin Vcp chu ngun zet hian ka en a, Chuveleh Vcp chuan thlam awmna hnunglam chu melh zauhin a ngaihna a hriat loh hmel hle.

"Chuveleh kei chuan thlam hnung lam a hnim kara bawngtuthlawh awmna chu ka va hai thuai a, bawngtuthlawh leh suahdur kha alo awm tawh lo, zan hmasa lam a min zui ru tu chuan a dah bo a ni ngei mai, Chutah, rinhlelhna mitmeng nen an mahni lam chu ka en ran a, ka mitmengah chuan thil awmzia ka hrethiam vek tih Vcp chuan a hria.

"Chutah, dam dap hian 'rûang awmna chu' ka han ti a, mahse kan Vcp leh a naute hi an lo luhlul nek mai, Vcp chuan 'enge i sawi awmzia? a han ti a, chuveleh kei chuan "pu nunthar, he laiah hian rûang chu phum a ni, thahnem ngai takin kan zawng ang, duhsaka leh duhsanga te rûang chu he lai hmunah emaw ram ngaw chhung khawi lai hmunah emaw dahthat in an awm a ni" Ka han ti a, mahse Vcp leh a naute chu an ngawi reng ringawt.

"Chutah, kei chuan an awmdan phakar tak leh hrilhhai hmel tak avang chuan an ruahmanna an thlak tih ka hrethiam ta a, kei min dahthat an tum chu thulh in thil hriatthiam loh hmel tak chuan an awm ta tlat mai, Chutah ka rin ang ngeiin Vcp chuan "inspector, i rilru hi a buai zo tawh a ni, i haw mai ang u" a ti ta tlat mai a, a chhan chu phone a midang ka bia tih kha an hriat vang a ni ngei ang.

"Mahse, kei chuan heti hian ka ti ve nghal zat a, "pu nunthar, a tawp nan chauh he laiah hian rûang a awm ngei a ni" ka han ti a, an nuih a za lui ta tlat mai, Chutah le, ka thinur chuan ka ip te a heroin ka ah that chu lachhuakin "pu nunthar, hei hi i thil bo kha a ni lovem ni? ka han ti ta a, Chutah zet zawng an zavai mai chuan mak tiin an phu suau thei hial.

"Mahse Vcp thinur khawhmu lo ta chuan "nang hi ka ring reng che a, nang hian min chhui ru char char a ni" a han ti ta a, kei chuan ka recorder kha ka hrereng a, chutah Vcp hnenah chuan "i heroin hi ruatdika leh a thian te mai nilo, nangmah ngei pawhin i rui thin a ni ti raw? ka han ti a, min chhan hma chuan "kha mi zan, duhsaka leh duhsanga te thih zanah khan" awmze nei tak chuan ka ti zui nghal zat bawk.

Thinrim avanga meng awm awm chungin kei chu min rawn din hual ta mai a, chutah kei chuan "ngawi ru, thian te u, duhsaka emaw min ti em ni? ka han ti leh zet chu thinrim avanga sehchilh nawk nawk chung chuan Vcp chuan a bula thing bung chu la lawk in thinrim engphiar hian "aw, engkim kha a dik vek, keini ngei hi rûang dahtha tu te chu kan ni, pu a, nichin khan tunge i biak ka hre lo, mahse" Vcp chu a han inngaihtuah leh deuh a, Chutah "mahse, engkim i hrechhuak vek ta sa sa, ka heroin nen lam, tichuan nang pawh hi zanin hian kha mi te, mi laktlak loh duhsaka leh duhsanga te ang bawk khan i thi veleh dawn ani' a han ti ta khur khur mai a.

"Chutah, kei chuan "ngawi teh pu a, i thinur i insum lo mah mah, thil engkim ka hrechhuak mai nilovin rûang awmna chen hian ka hre vek maw le, rûang chu khawiah nge in dah?" ka han ti vin leh tuarh a, chuveleh ka lam ah chuan Vcp chuan a thing bung ken chu a rawn vai ta fua fua mai, ka lo thle sawn hman hlauh.

Chutia mi thah tum a chet an lak tak mai ah chuan kri chuan "rinpui" tiin ka te nghal thawt a. Mahse, Vcp thing bun ken khan ka lu em chu fuh lo mahse ka ban veilam erawh na zet hian a rawn su a, ka kut chu a na takzet a ni, chumi rual chuan ruatdika leh midangte pawh chuan min rawn bawh rawn nghal thuai a, ka vanneih ni chu nilo se Vcp thing bung Khan pialral lamah min tirliam ta ve ngei ang.

"Rinpuia leh joela te chuan an pistol ken chuan misual ho min thah tum mek tute chu an rawn khap dai thuai a, mahse heng ramsa hlauhawm ho hi an beng a ngawng nek mai, rinpuia chuan silai chu vanvadakin a hmeh puah a tul phah ta nghe nghe a ni, tichuan silai a tin chung chuan rûang an dahna hmun chu kan zawn tir ta a, ka thu kha awihin tha takin rûang awmna kha zawng hle hle mai se chu hun rei zawk pawh kan hmang ho thei ngei ang" tiin chau tih hriat tak chuan a mit chu a han chhing vang vang a, chutah a mobile phone chu han la chhuak in "hei hi ani, thil thlen dan kimchang voice recorded chu" a han ti a.

Lallen khua a thil thleng chungchang chuan Zoram mipui te a barakhaih chiang hle mai a, khaw mu chawi bo a ngaih lallen khaw tlangval pahnih te chu thah an lo ni tih thu te, tualthattu te chu lallen khua Vcp leh kuttuar ta te ramchhuah pui ngei an nih thu te, luiral ngaw huai chungchang leh luiral ngaw a mi bo chungchang sawi tui bera an lo neih thin chu thlanvawng mual a tualthahna ti a thu kawih danglam a tul ta si a,

hnu chhuitu inspector remruata chet dan sawi hlawh zui tak mai te leh inspector meuh pawh mi â ang leh rilru buai ang thaw thanga mipui lam in ngaihdan an lo siam hman thu te chuan boruak a nei lian tak zet. Chanchintharah chuan chanchinthar puangtu vanlalchhuangi chuan lallen khua a tualthahna chungchang chu a thupuiah 'LUIRAL NGAWPUI' ti a vuah in thil thlendan kimchang chu a puang malh malh reng a.

Inspector remruata chu a khum dup nuam tak maiah chuan hahdam zet hian a mu phek thlar reng mai a, a mobile phone a message lo thleng thar chu a han chhiar a, a naute zinga mi rinpuia message alo ni "sir, i ziaawm zel em? Tih alo ni. Chutah, inspector remruata chuan rinpuia message tur chu a han chhu a, "rina, ka tha tawh viau a nia, min ngaihtuah avangin ka lawm e" Chutah, nui var var chung chuan "rina, Kum hmasa lamah nangin i banah hliam pui i tuar a, keiin tunah" tiin nui emoji chu a han hmet a.