LEHKHA THEM_Chapter-1

[April Hmar Liverpool]

LEHKHATHEM
Ziaktu, Laltanpuia


#Tlangval pakhat chu inawkhlum a hmuh a ni a, a kutah chuan lehkha them alo keng bawk. Mahse a nu chuan a fapa chu mahni intihlum duh tur mi niin a hre lo a, a thih na chu a ringhlel ta tlat mai a. Inspector chuan tlangval thihna chu a han chhui Chiang Ta a, enge a thih chhan? Engtia thi nge? Mahni intihlum chu alo ni reng em? Lehkha them chu enge a pawimawhna?

Chapter _1

Remsanga, Arema ti a an koh chuan johnny-a te inkhawm bang chu lo changin text message hmang chuan an inhmuhna tur hmun a alo nghah reng tawh thu a hrilh a, Johnny-a chuan a thian hlui Arema message chu chhang let thuaiin rei lo te hnuah an lo nghahna hmun tawngtai tlang a rawn pan thuai dawn thu a han hrilh ve nghal thuai a, Johnny-a chu a putea te In-ah rei vak lo han tawi khawmuang lehin Arema leh a thian te lo nghahna lam tawngtai tlang awmna chu amah chauh chuan a pan ta a ni. Arema chuan Johny-a chu a hrechiang a, puan lum nghawng awrh chi a ngaina hle tih a hria a, Johny-a hnenah chuan khua a vawh thu hrilhin puan lum bat turin a hrilh nghe nghe bawk.


Johny-a chuan tawngtai tlang chu a va thleng ta ngei a, mahse tumah awm an lo awm lo. Thla chu a eng angreng viau mai a, khawhmuh pawh a fiah angreng phian mai. Chutah, lungawi lo fe chung chuan Johny-a chuan "Arema mai mai chu aw, min tihder a maw ni le, khaw vawh lai lai a" tiin In lam pan a let leh mai chu a han tum a, Chuveleh piah deuha thingkung awmna thim chin atang chuan "Johny" a rawn ti a, Johny-a chu a phu deuh zawk nghe nghe. Chuveleh chu lam chu thlek nghal vat in Arema alo ni.


Hrilhhai zet chung chuan Johny-a chuan "nang hi, tun ang khaw vawh lai laiin intihder chi pawh a ni a maw ni le aw, khawnge mi dang chu an awm a? Buai nak alaiin, Khatiang a intih phut zuk chi pawh a ni hleinem maw le" a han ti vin deuh hlar a, Arema chuan hmel ngainatawm lo zet a nui var var chung chuan Johny-a lam chu a rawn pan ta a, Johny-a chu an thian midang te hmuh mai inbeisei chung chuan a han hawi kual ruai a, mahse tumah a hmu lo. Thawm chu a reh viau bawk.


Chutah, Arema chuan Johny-a hnenah chuan "Johny, tunge i zawn a? He laiah mi tumah an awm hleinem, keimah hi ka ni mai" lungawi lo tih hriat tak mai hian Johny-a chuan "arem, i ti awm ang lo thin e mai. Zan in chu hei boruak te a vawt ropui si a, chu lai kara hetia intihder mai mai chi pawh a ni lo asin, ka shawl ken lah chu hmanhmawh avangin a puan pan zawk ka bat ta ringawt leh nghal"


Arema hmel chu muangchangin a inthlak riai riai a, hmuh nuam lo khawpin a dur viau mai. Chutah, a chhungrilah chuan lungawi lohna lian tak nei tih hriat tak chuan Arema chuan "Johny, kan hun kal tawh te kha i ngaihtuah let ve ngai em? Kei chuan ka la theihnghilh miah lo asin, sum te chu mi tu pawhin an duh vek alawm, kei ni kan nih a mai vang a intih mualpho tum te, hreawm taka midang siam te hi thil tha a ni bik hauh lo asin, kha leh chen kha rilru thlamuang lo reng reng in kan awm a"


Chuveleh, pawi tih hmel zet hian Johny-a chuan "ngawi teh arem, i hre sual a ni. Khang hun kal tawh avang khan tun hun thlenga hetia mimal nun ram thleng thleng a in tihbuai chhunzawm zel hi a tha lo asin, nilo e arem, in thil tih kha a dik lo alawm, mahse tu hnenah mah i thuruk te kha ka puang mai mai lo asin, a thuhrimah khang hun kal tawh te kha chu theihnghilh daih ang, tunah sawi chhuah pawh a tul tawh kher lo. A pawi tur chu a pawi zo vek tawh tho"


"Johny"


Arema chuan Johny-a lam chu a pan phei hrut hrut a, a chezia leh a hmel awm dan chu a ngainatawm lo kher asin le. "Arem, ka tihpalh lutuk, ka duh vang rengin i thuruk te kha hria ka ni bik lo asin"


Teu zet hian Arema chuan "aw ni e, i duh vang reng chu a nilo ang, mahse mi thuruk kan hriat hian ngawih bopui ve mai tur hi kan ni a, mahse nang chuan pressure min pe reng a, hlauthawng leh hreawm ti reng reng in min awm tir reng a, 'midangin an hria a ngem' tiin rilru khingbai zet in kan awm a, nang hi awm lo la chu khang hun zawng zawng, hreawm ti a kan hman ral tak zawng zawng te kha tangkai takin kan hmang a nga, ka nunah pawh hmasawnna tam tak a awm zawk ngei ang"


Arema chuan Johny-a chu chiang zet hian a han en a, Chutah thinur avang a mit meng sen ram chung chuan "Johny, mihring zingah hian nang ni ang a midang tan a hnawk sak leh midang tan a awm nuam lo rawih rawih tura chimawm leh ngeiawm tak hi in lo awm ve leh khauh thin avang hi a nia he laiah pawh ka han koh nachhan che ni"


"Mahse, nang hi zawng ka lo rinlawk ang lo takin mi dawihzep tak erawh ilo ni e" leiah chan a chil chu a chhak thawt thawt a, a kut chu a hum ruh sauh sauh mai. Chutah zet zawng Johny-a ngaih chu a tha ta mawlh lo. Rilru mangang ru tak chung chuan "Arem,ka tihpalh lutuk, min ngaidam rawh,keimah avang a hreawm tam tak ilo tawrhna zawng zawng te leh keimah avang a harsatna tam tak ilo hmachhawn tawh zawng zawngah i ngaihdamna ka ngen duh che a ni"


"Arem, heti zawng lo deuh hian i sawi fel zawk teh ang. Hei tawngtaina hmun te a nisi a, In lamah haw ila nang chauh nilo i chhungte hnenah ngei pawh ngaihdam dil ka duh a ni" tiin Johny-a chuan a mobile phone chu a han chuh vat a, Chuveleh vin zet hian Arema chuan "dah rawh, i phone kha dah rawh. Tumah be suh ang che, dawihzep pa" a han ti a, chuveleh Johny-a chuan mangang zet hian "arem, enge i awmzia hi? Min hua em ni? Ka tihpalh ka tih chu"


"Nilo ve,Johny zahpuiawm pa,i dawizep lutuk, kei hi i mi ngaih ang mai mai kha ka lo ni silo tih i han hrechiang tan dawn chauh a tanpuitu tur i vai nghal ruai leh si em ni?" tiin Arema chu a nui hak hak a, a chil chu a chhak thawt thawt reng mai. "Johny" tiin Arema chuan Johny-a chu a pan hnai zel a, rum zet hian Johny-a chu han melh rawm rawm in, "dawihzep pa, I duh chu phone ta che, i hlau a ni ti raw?" Johny-a chu a khur deuh hlak hlak tawh.


"Arem, i awmdan hi ka duh miah lo a nia, Khatiang in awm lo teh. In ah i sawi fel zawk ang" Johny aw ah chuan a zam tak zet tih a lang a, Chutah Arema chuan a aw ki chu han thlakin dam dap mai hian "awle,i tih ang chu ni rawh se, i duh chuan phone chu i hmang thei ang, i duh chu han be poh ta che" tiin Johny-a chu a en ran mai a, Chutah Johny-a pawh chuan ngaih tih that tum lui tih hriat taka thawk han lak halh pah chuan "arem, ka nu kan be lawk a nge" tiin a phone chu a han hmet malh malh a.


Chutah le, Johny-a phone hmet malh malh lai chu Arema chuan rang zet hian a ke chuan Johny-a kap karah tak mai chuan a han pet ta thut mai a le, Johny-a chu a kap dawm vawng vawng chung chuan leiah a tlu sawp nghal rawp rawp mai. A hmai ah te chuan thisen zam chu an bawl nghal tuk tuk a, a duk nghal vek bawk. Arema chuan Johny-a, lei a vial ngawng ngawng chu dim lo zet hian a han chhir zui nghal dawt dawt a, Johny-a dul nem lai leh a nak ah te chuan a pet pawp pawp a, a lu ah te chuan a tlawh chiam chiam mai. Johny-a chu che tur a awm ta lo.


Arema chuan Johny-a chu thinrim avanga sehchilh deuh nawk nawk chung chuan "zawnga! zawng chhe pa! zahpuiawm, mi tenawm pa!" tiin a an khum bawrh bawrh reng bawk a, hah avanga thaw hlawi hlawi chung chuan Johny-a na ti a vial ngawt ngawt leh chil phuan tla deuh nguah nguah chu a nghawng a a shawl bah hmang chuan a nghawngah chuan a han vet a, chutah na zet hian Johny-a chu a han rek leh ta ngawt ngawt mai a, Johny-a chu a tal aih aih reng a, mahse rei a tlin ta lo. Johny-a chuan nikhua hre lo zuiin a chatthla zui ta a ni.


Arema chu a fimkhur hle mai a, kutkawr pawh a bun thlap nghe nghe. Chutah, hmanhmawh fe hian Johny-a rûang chu tawngtaina tlang atang chuan an thlang kawr ruam awmna lam pan chuan a hnuk thla nghal buan buan a, kawr awmna a zuk thlen thlak chuan thingkung ding pakhat bulah hian mi pakhat thawmhnaw dum veka inthuam hi alo awm a, chuveleh chu pa, thingkung ding bula lo awm chuan Arema hnenah chuan "arem, thingkungah khan lawn rawh, keiin Johny-a rûang hi ka rawn pawm kang ang a, puan hmawr leh lam hi thing kak ah khan ilo vet dawn nia" a han ti a, chuveleh arema pawh chu thu awih tak chung chuan thingkungah chuan a lawn nghal thuai a, a hmanhmawh em avang chuan Arema chuan thing kak zar ro mawih tawh lam chu a rap tliak nghe nghe.


Thawmhnaw dum veka inthuam pa chuan hneh sawh zet hian Johny-a rûang chu a han pawm kang lawp mai a, Chutah Arema chuan a duh thal a Johny-a nghawnga puan hmawr lehlam chu thing zarah chuan han suih in thingkung atang chuan a chhuk thla leh nghal thuai a, Chuveleh Arema chuan hmanhmawh zet hian Johny-a phone a amah leh Johny-a in biakna zawng zawng chu a thai bo nghal vek a, Chutah phone chu Johny-a kawr ip ah chuan a dah leh nghal a, Chutah lehkhathem hi a kekawr ip atanga la chhuak in Johny-a kutah chuan a hum tir ta a.


Arema chu a mutna atang chuan thaw hlawp hlawp chung hian a thochhuak a, chutah a damdawi a khum bula mi chu la in damdawi mum thahnem zet chu a bar hian a bar ani ber mai. Tui chu in leh khawlh khawlh in a thin phu dut dut reng mai chu a kut chuan a han dawm vang vang a.


Inspector remruata chuan lehkhathem chu uluk fe hian a han thlek vang vang a, Chutah a mit chu chhing siar siar in a bu nghat mai, Chuveleh mitthi ta Johny-a nu zuali hnenah chuan "ka pi, i fapa hi mahni a inawkhlum a nih hi i ring lo tak tak a maw?" a han ti a, zuali chuan a mittui chu han hruk mawlh mawlh pah chuan "aw, pu inspector ka fapa hi ka hrechiang, hetiang thil hi a ti ngai lo ang, he thil thleng phenah hian thil inphum ru a awm ngei a ni"


"Tun thleng hian ka fapa boral thu hi awih har ka la ti reng mai. A hreawm e mai. Pu inspector, ka fapa thihna phena thil awm hi khawngaihin zawngchhuak mawlh ang che" A inhnit zui nghal hlap hlap a. "Awle pi zual, rilru fim put hram hram erawh a tul ang. I fapa bo zan kha Pathian ni zan i ti em ni kha?"


"aw ni e inspector, nizan a thil thleng mai a ni e, kan inkhawm bang kha ka nau te In ah kan lut kawi a, chuvang chuan mama awmna chin pawh lo ngaihven em em hran lo kha ka ni a"


"ka nau hi a hming chu Danny-a a ni a, Danny-a te In ah kei leh midang inkhawm bang te kha kan lut kawi a, mama pawh a tel ve in ka hria, Mahse ka lo ngaihven reng bik lo nen, tin hetiang thil hi mama chungah a thleng ang tih ka hre lawk bik lo nen, haw tura kan han inpuahchah meuh kha chuan mama hmel reng reng hmuh tur a awm lo, mahse kan hriat loh hlanin a thian te In lamah a leng kawi a nih ka ring mai a, tichuan kan In lamah ka pasal nen hian kan haw thla ta a ni"


"mahse khami zan kha ka muhil thei tlat lo, ka mut a chhuak tlat lo a ni. Chutah, ka mu thei lo chu zung turin ka tho a, kawngkhar alo la inkalh lo ani tih ka hriat chuan mama room lam ka pan thuai a, mahse mama chu alo la haw hauh lo. Dar zah ka en a, a tlai tawh hle mai a, chutiang ang zan zan ah chuan haw lohna chi ani tawh lo a ni"


"Ka ngaih chu a tha chiah lo a, chutah mama chu phone call hmang a biak ka han tum a, mahse a in ring ral zel mai a, kan chhung leh khat kual te ka han be kual dan dan a, mama thian te pawh ka bia, mahse mama chu inkhawm ban atang a a chinchang engmah an hriat zui bik loh thu in min chhang vek mai si"


Inspector chuan zuali thusawi lai chu lo pawt chat in "ka pi, chutiang ang chuan zan dangah emaw tum dangah emaw in fapa chu a awm tawh ngai hrim hrim em?" Zuali chuan ngun zeta han ngaihtuah vang vangin "aih, awm lo, mama hi mi pangngai tak a ni. Ka fapa a nih avanga a thlavang hauh ka ni lova, mama hi thian ngaina tak mai a ni a, then leh rual zingah hian a tal tam viau, mahse chutiang ang a a thangna chin leh a awmna chin a nu leh pate min hrilh lova rawl bo mai mai mi a ni ngailo hrim hrim, khami zan a a awmdan kha a mak ka ti a ni"


"Kohhran lamah pawh in hmang a ni a, rual a pawl nasa a, mi hlim thei tak niin ruihhlo phei chu a khawih ngailo hrim hrim" Inspector chuan "imm, chutiang ang mi mi tha leh mi fel tak, mi pangngai tak, ruihhlo pawh khawih lo, kohhran a in hmang, mahsela in lo hriatpui hauh loh leh in hmuh phak hauh lohah a chhungril chu lo chau in alo beidawng ru ve viau thin pawh a ni maithei, mahse amah hring tu nu ngeiin hetiang thil a tih duh i ring tlat silo a"


"inspector, ka sawi chu i awih emaw awih lo emaw ka pawisa lo, mahse mama hian hetiang a mahni nunna lak duhna chhan tur leh nun beidawnna chhan tur thil engmah a nei lo tih hi ka sawi duh a ni. Ni e, i sawi chu dikna chen chu a awm ang, kan hmuh leh hriatpui vek sen an ni bik lo ang, mahse kan fapa neihchhun a ni a, kan duat ve a, a sual a nih chuan na tak pawhin kan hrem duh mai ang, chuti khawp a a nun hi puitling zawk a chhuah tum a bei ve thin kan ni"


"Mahse, hetia mahni intihhlum ngawt nachhan tur hi kei chuan a mah atang chuan ka hre lo a ni" Inspector chaun a chal chu han dawm vang vangin "anih leh ka pi, i fapa chuan ngaihzawng emaw te a nei em?"


"Aih neilo, ngaihzawng ngaihsak chi a ni lo. A kum a la nau a, ngaihzawng a nei thin anih pawhin tunah tak hi chuan ngaihzawng nei khawsa in a khawsa lo a ni"


"Tun hma te chuan alo nei anih pawhin kan hre ve vek zel. Mahse, tun ah chuan ngaihzawng a nei lo a, tin mahni intihhlum ngawt nachhan tur engmah a awm lo hrim hrim"


"Anih chuan ka pi, i fapa hi mi ze zangkhai tak leh mi hlim thei tak, thian ngaina tak niin i sawi a, a mizia tur awm ang atanga han chhui dawn chuan he lehkhathem, a kuta mi hian amah nen a inzawmna an neilo tihna a ni ang"


"I fapa hi thuziak lam emaw hla han phuah vel te, poetry lam han ziah te, zai lam thleng in a ti ngai em?" Zuali chu a ngawi vang vang a, chutah lehkha chu ngun tak a han bih in "nilo inspector, hei hi mama kutziak a nilo ang, hetiang ang hla thu han ziak chi a nilo, a zai ngailo a, hla thu pawh a ziak ngai hek lo. Thu leh hla han ziak kur ngei nguai chi a nilo. Hetiang lamah a tui awm ka hre ngailo. Ka sawi tak ang khan then leh rual ngaina mi a ni a, In lamah pawh a awm tam lo"


"Hla te han phuah a thu han ziak kur ngei nguai tur chuan ka fapa mizia nen a inpersan hle" Chutah inspector chuan "mahse i fapa hian thu leh hla, poetry lam hawi thuziak chu a thih dawn darkarah hian a ngaina thut a nga, chu chu a thu hnuhnung atan a hmang ta tihna a va ni mai awm ve" zuali bawk chuan "sir, he lehkha leh ka fapa hian eng inzawmna mah an nei lo hrim hrim. He lehkha hi ama ziah ngei a ni em tih hi finfiah thei ila ka duh khawp mai. Mama hian kutziak dahthat a neih awm ka hre ngai lo a, mama kutziak ngei a ni em tih hre turin amah mama ber chu a thi tawh si" Zuali chu a insut deuh hlap hlap reng a.


Inspector chuan a mit chu han chhing vang vang in, chutah harhchhuak thut ni awm hian a han thaw chhuak deuh hluai a, Chutah "awle a tha e, tun atan chuan i fapa chungchang hi hrilhfiah mai a harsa rih niin a lang, he lehkha ringawt hi chuan i fapa chungchang engmah hriat thar tur min hrilh rih lo a ni.


"Engpawhnise, rinpui, Johny-a bo zan, Pathian ni zana Johny-a'n phone hmanga a biak zawng zawng te kha lo list chhuak vek la, an ni chu thu zawhfiah atan an tha ang. Chuan ka pi nangpawh, hei hetia han en mai hi chuan i fapa lehkhathem ken ah hian a hun kal tawh a a inchhir thu te, mi pawi alo sawi tawhna zawng zawng te, midang tan a hnawksak leh mi dang tan a ninawm a alo awm tawhna zawng zawng te, amah a inthiam lohna lam hlir a ni a, chuvang chuan mi tu emaw lak a mawi lo taka alo khawsak tawhna emaw amah han haw zui tura midang tana han ninhlei deuhna emaw i fapa nen a lo innghir ngho ve tawh an awm niin a lang a chu chu lo hriat han tum la"


Chuveleh zuali chuan "pu inspector, ka sawi tak ang khan ka fapa kutziak emaw ka fapa in hetiang a mi tu emaw laka han inchhir a han inthiam lohna chhan tur hi a nei in ka hre lo. Chu tak chu mak ka tihna a ni. A thuziak atang hi chuan mi pawi sawi ching leh nun uluk lo ve tak ni mai awm a ngaih theih tur a ni a, mahse chutiang mi a nilo hrim hrim, mi hlim thei tak leh rual pawl nuam ti mi tak a ni a, hetiang a han inchhirna tur thil ti chi a niin ka hre lo. Mahse he thuziak hi ama kutziak a nilo tih hi ka hrechiang si a, he thu ziaktu hian mama hi mi pawi sawi hrat leh mi sual tak angah a chhuah a ni ber alawm"


"Imm aw le, i sawi tak ang chuan i fapa chu mi tha pangngai leh rilru tluang tlam tak a ni ngei ang. Mahse mi nun tluang leh mi pawi sawi ngailo, mi pangngai tak chu engvanga thah anih a mahni intihlum anga lan tir anih tak mai le? kawng lehlam ah chuan nang ni nu leh pa te pawh in a in hriat pui loh lamah hian in fate hian thuruk tam tak hi an nei ve chawk a nia"


"i sawi chu a dik alawm inspector, a ruk a ral a hetiang a mi pawi lo sawi palh pawh a ni thei ngei mai, mahse thil pawi em em chu a sawi lo a ni ang, engmah kan hre ngai silo, mi pawi lo sawi chu ni se keini a nu leh pa te ngei pawh hian kan hre em em ang"


"Awle awle a tha e, i fapa chu i ringtawk viau a a dik ngei pawh ka ring. Nimahsela, hei hi lo ngaihtuah la ka duh, i fapa thihna hi tualthahna ni a kan rinhlelh dawn chuan he lehkhathem a thuziak awmzia, tu pawi chiah nge alo khawih? Tu tan nge hnawk sak leh ninhlei zawng a alo khawsak tawh tih hi kan hriat a tul si a, han rinhlelh tur an awm a tul dawn tihna a ni. mahse nang berin rinhlelh tur i hre silo a, pawisawi ngailo leh beram no ang mai a kut thiamhlim nei mi ang mai in i sawi si a, tin lehkha hi i fapa kutziak a niin i ring lo bawk a" Chutah zuali chuan "ni e inspector, chu lai tak chu mak ka tihna a ni reng a ni"


inspector chuan "awle, chuti anih si chuan he lehkhathem ringawt hi chuan kawng min kawhhmuh thui viau rih lo niin a lang, Khami zana i fapa in a biak zawng zawng, a thian te thu kan zawhfiah an ngai ang a, tin he lehkhathem atang a a landan chuan tu chu nge i fapa in inthiam lohna emaw inchhirna emaw ngaihdan dil ngai khawp a sulhnu alo hnutchhiah tawhna chu, chu mi ngei chu tunge anih kan hriat a tul dawn a ni, nang in chutiang mi a nih thu hre lo mah la, he lehkhathem awmzia hi Kan bawhzui a tul tlat si ani. A inthiam lohna tur leh a inchhirna tur, mi pawi alo sawi thin na te chu Kan hriatchian a ngai a, a pawi alo sawi a chu tunge anih kan hriat a ngai alawm, tichuan thil awmzia chu a lang mai ang"


"I fapa nen a lo inbakkaih ve tawh thin i hriat theih ang ang lo ngaihtuah chhuah han tum phawt mai la, tin hei hi thudik pawh a ni thei bawk. He lehkhathem a thuziak hi I fapa ziak ngei niin nang ni lamin in hriatpui hauh loh lamah i fapa chu a hun kal tawhah mi tu emaw lakah mawi lo tak in alo khawsa ve fo tawh a nga, mi pawi te pawh alo sawi ve thin tawh a nga, tichuan i fapa nun beidawng intihhlum tum chuan lehkha hnuhnung hnutchhiahin a hun kal tawha mi pawi alo sawi tawhna zawng zangah a inchhir zia chu ziak a dahin a thu hnuhnung atan a hnutchhiah pawh a ni thei. Chu chu thil thlen dan ni a lang a pawh chu a ni, mahse mahni intihlum duh mi anih i ring lo va, mi pawi a sawi awm i hre ngai lova, lehkhathem kha ama kutziak anih i ring lo bawk"


"Ni e inspector, mahni intih hlumna chhan tur kei chuan ka hre lova, midang hnena thupha han chawi nachhan tur ka hre hek lo. Mak ka tih awm chhun chu ka fapa in awkhlum ang a lang ta mai leh he lehkhathem hi a ni e, ka fapa kha a inawhhlum ka ring thei lo a, tichuan he lehkha pawh hi amah nen inzawmna a neih ka ring hek lo" Zuali hmel chu a pawr viau mai a, hmuh a hreawm lek lek thei hial.


"Awle pi zual, i fapa thihna ah hian investigation chu kan tan ang. Mahse i fapa hi postmortem a ngai thung ang"


"Nilo, nilo, ni lul love, chutiang ka phal teuh lo, inspector, khawngaih in ka ngen a che, ka fapa rûang hi chu postmortem lul lo ve, a thihna phen a thil inthuk ru hi hriat ka duh a, he thil thleng hi engvang nge tih leh thil thlen dan diktak hi ka hre duh mai chauh a ni"


"Awle pi zual, i rilru tur chu ka hriatthiam pui lutuk che, mahse i fapa hi postmortem anih chuan mahni intihlum nge ni a tualthahna zawk tih lai a chu a fiah kuar mai dawn alawm"


"nilo nilo sir, ngaithla teh, ka fapa hi khatia thi chunga kan han hmuh khan a taksa hmun hrang hrang pawh uluk takin kan en fiah ve bawk alawm, mahse" zuali chu a ngawi leh vang vang phawt a, chutah inspector chuan zawi sap hian, "mahse, hliam engmah in hmu silo tihna a ni maw?" alo ti thuai a.


"Aw inspector, kut thlakna hnu engmah kan hmu lo. Thisen emaw pem emaw duk emaw engmah kan hmu lo" inspector chuan "Awle ka pi, ka nau te hi enge chanchin ka han zawt ve lawk a nge" Chuveleh inspector chuan a nau te zinga mi rinpuia han bekbawr tur chuan pawn lam chu a pan ta thuai a.


inspector chuan rinpuia hnenah chuan "rina, enge result? Johny-a rûang chu in han enfiah ve leh reng reng em? a han ti a. "aw sir, rûang chu kan theih tawk chuan kan enfiah tawh e, a nghawng ah hian duk kan hmu a, chu chu puan a a inkhaina hnuhma kha a ni, tichuan a taksa hmun dangah erawh engmah hmuh kan nei lo" Chuveleh inspector chuan "ni e, pawn lam lang theiah chuan engmah hmuh tur a awm tawp reng nang, hei hi tualthahna anih ngai chuan he tualthattu hi mi â a ni hauh lovang, a chhan chu he lehkhathem, ngaihtuahna hruai kawi thei thil hi a hnutchhiah tihna a ni dawn a, tualthattu fing var lutuk lo chu ni se, he lehkha hi a hnutchhiah kher lovang, Mahse Johny-a taksa ah hian hliam leh hnuhma a hnutchhiah thung ang"


"Mahse, he tualthattu hian fel fai takin rem a ruat lawk sa vek a ni, Johny-a chu mahni intihlum ang a a lan theih nan a taksa ah hnuhma a hnutchhiah duh lo tawp tihna a ni. mahse, tualthattu fing tak te tih thin dan ang thovin lehkha erawh a hnutchhiah thung. Ka rindan chuan he tualthattu hian kutkawr nen lam a bun thlap in a nia ka rin ni. A fimkhur viau ang"


"Awle sir, i thusawi awmzia ka man e, tualthahna anih nang pawhin i ring ve tho a ni maw?


"awle rina, Johny-a nu ber hian mahni intihlum a nih a ring thei lo chu anih ber hi maw, engpawhnise, investigation kan tan mai a tul ang"


Inspector chuan "Ka pi, he puan, i fapa lo inawhhlumna puan hi tu ta nge i hre thei em? i fapa ta a ni em? "Aw ni e, mama hian shawl a bat fo thin a, zan lam boruak angah phei hi chuan shawl hi a bat ngei ngei thin, shawl a bah loh lai hi chu chhinchhiah tham lek a ni ang"


"Awle rina, kan pi i chuan a fapa inawhhlumna puan pawh chu a fapa ta ngei a ni tih a sawi leh zel mai. Tualthattu chuan Johny-a chu a hrechiang viau niin a lang. A chhan chu Johny-a hi shawl bah ngaina tak mi a ni a, chu chu remchangah chuhin inawkhlum ang a a lan theih nan a shawl bah chu hmanrua atan a hmang ta hlauh ani. Hmanraw dang a hmang duh lo, amah johnnya puan ngei chu a hmang tlat ani.


"engpawhnise pi zuali hi chuan thil awmzia hi hrethiam deuh roh siin han sawifiah fak dan tur erawh a haihchham deuh niin ka hria. Tualthahna ni ngeiin a hria a, mahse han rinhlelh tur emaw, a fapa chu miin an thah sakna chhan tur emaw han sawi mai tur a hre silo niin a lang. Engpawhnise Johny-a inawhhlumna hmun hma te chu i va thlithlai ve phawt mai teh ang. Johny-a bo zan a a phone call history leh chat list a mi zawng zawng te kha thu kan zawt fiah ve leh dawn a nia" "Awle sir, i thu ang zelin le"


Inspector leh a naute chuan Johny-a inawhhlumna hmun chu an va thleng thuai a, motor kawngpui kual lai takah chuan chhak lamah hian kawng peng alo awm a, chu lai kawng peng ah chuan ke a kalna a awm a, an mahni hruai tu Yma president zarliana chuan "hei hi a nih hi inspector, he laiah hian kan chho ang a khi mi lai lang thei chin a veng deuh uar lai khi tawngtaina tlang kan tih chu a ni a, chumi thlang lamah chuan kawr ruam a lo awm ang a, chutah chuan a ni Johny-a chu thing a alo inkhai lai kan han hmuhchhuah tak ni" tiin inspector chu a han hrilhfiah zung zung a,


inspector ruata pawh chuan "awle pu zar, a hmasa in tawngtaina tlang chu han pawh chho vat teh ang" tiin tawngtaina tlang lam chu an pan zel a. Inspector chuan an kalna hnuhma chu uluk tak hian a thlek chho dauh dauh reng bawk.


"Awle, helai hi a ni tawh e, hei hi tawngtaina tlang kan tih chu a ni a" tiin zarliana chuan thing hmang a an siam thing kawkalh ding bula hnim to te chu a kut chuan a han pawt fai pah mawlh mawlh a, Chutah, zarliana vek chuan "sir, khalam ah khan, aw kha, kha mi thing ding bula fai thla lai kha aw, kawr ruam pan thlakna chu a nih kha"


"Awle awle, pu zar a lawmawm e" tiin inspector chuan chu lai hmun hma te chu a han thlir kual dauh dauh reng a, rinpuia hnenah chuan "rina, ti teh, Johny-a inawhhlumna hmun lam chu i zu pan teh ang" tiin kawng te reuh te hnim angreng tak karah chuan an chhuk thla leh nghal thuai a.


Johny-a inawhhlumna hmun chu an thleng a, chutah inspector chuan thingkung pakhat chu uluk fe a thlek vang vang in "hei hi a ni em Johny-a in awhhlumna thing chu?" a han ti a, zarliana pawh chuan "aw ni e inspector, kha thing ah khan Johny-a chu kan va hmu a ni" Chutah, uluk fe hian inspector chuan thing kung chu a han chhoh thlek vang vang a, Chutah thingkung din na hmun hma chu a han bih kual leh ngat ngat a, Chutihlai chuan rinpuia chuan zarliana hnenah chuan "pu zar, Johny-a hi kum engzat nge ni ang?" a han ti a, zarliana chuan "kum 25 ni ta in ka hria, an la naupang si a, a pawi tak tak a ni" alo ve mai bawk a.


Chutah rinpuia vek chuan inspector lam chu hawiin "sir, an ni ang rual hi hetiang ti duh awm tawk vel lek hi an ni alawm, an ni ang rual hi mahni intihlum sawi tur an tam asin, mizoram ang ah phei chuan an ni ang rual deuh hlir hi an ni ang mahni intihlum hi" a han ti a, rinpuia rilru ah chuan Johny-a chu mahni intihlum a nih ngei a ring tih a hriat.


Chuveleh inspector chuan "rina, lokal teh, thingkungah hian han lawn teh" Chuveleh rinpuia chuan "sir, enge maw i hriat tak mai le" a han ti deuh ha a, "rina, ka sawi ang chuan ti mai rawh, Johny-a thih zan khan ka sawi sual viau loh chuan he laiah mi pahnih an awm a ni" a han ti zui leh zat mai, Chuveleh mak tih avang a meng zau kawk chung chuan rinpuia chuan "sir, khami zan khan he laiah mi pahnih an awm i ti e law? engtin nge i hriat theih chu chu?" a han ti deuh ha a, "rina, thingkung hi han belchiang la i hrethiam mai ang. Rûang hi mi pakhat in a han buaipui tur chuan thing kak awmna khi a sang mah mah a ni. Johny-a chu mi pahnih in an that a, mahni a in awkhlum ang a a lan theih nan he lai a thing kung zar lo awm remchang hi hmanrua ah an hmang ta mai a ni"


"Mi pakhat, pumrua ah pawh pa lian lam leh tharum nei tak a ni ngei ang, Johny-a rûang chu hnehsawh zetin a han pawm kang a, tichuan pakhat zawk chu thingkungah khan a lawn a, khimi thingkung zar rawn dawk phei ah khian puan hmawr lehlam chu a han suih ta a ni"


Chuveleh phur zet hian rinpuia chu thingkungah chuan a han lawn kai ta thuai a, rinpuia chuan a lawn zawng chuan thing kung zar hniam zawk, a ro tawh em avang leh a mawih deuh avanga tliak then tawh chu a han rap a, a rap bal ta nghe nghe a, chuveleh inspector chuan "kha maw, ka tih reng kha, rina tuna i thing zar rah bal tak kha nang ai a raptliak hma sa an awm a ni.


"Chuan hei a rahtliah tak a zar bung chu" tiin leia thing ro mawih tawh tak chu a han lek kang va va a, Chutah inspector vek chuan "rina, tuna i lawn dan ang chiah khan kan misualpa chu a in pakai ve ngei ang. Tichuan zan thim hnuai te alo ni nen thing zar ro i rahtliah tak kha a raptliak a, a tla thelh nghe nghe in ka ring. Mahse, a rahtliah bang tlem la lawr chu nangin tunah i han rap bal ve leh ta a, tichuan he lai ah hian he tualthahna hi a intan hauh lo bawk. Khimi, mi thahnem ngai te leh thlarau lama piangthar ten an siam tawngtaina tlang atang khian a bul chu a intan daih a ni. He lai hi chu a hmawr an bawk na mai a ni"


Mak ti zet a inspector thusawi ngaithla tu rinpuia leh zarliana te chuan rang zet hian "tichuan engtin zel?" an lo ti rual thawt mai a. Chutah rinpuia chuan "awle sir, chuti anih chuan ka rawn chhuk dawn" a han ti a, inspector chuan "imm, i chhuk thei tawh e, Johny-a rûang chu mi pakhat sawngbawl mai atan leh kha lai thingzar a puan hmawr lehlam han suih tur chuan a hautak mah mah ang. Mi pahnih an ni tihna anih chu.


"Awle rina, lo chhuk la he lai atang hian hnu hma kan chhui let leh ang" tiin thingkung dinna piah deuh a hnah thel ro thahnem tak awmna lam chu a pan leh nghal a, leiah chuan hnahthel ro a tla nasa hle mai a, inspector chuan "rina, he lai a hnahthel ro pe deuh hun hi i hmu em? hei hi engvang a hetia pe deuh hun bik hi nge a nih i hria em?"


"Aa, sir, kha te chu a awmdan ve tur reng a ni zawk lo maw?" Chuveleh inspector chuan "nilo ve rina, he tia hnahthel ro pe deuh hun hi Johny-a rûang an hmuhna hnu hma a ni zawk" tiin inspector chuan hnu chu a han chhui nghal vut vut a, "imm, a dik ngei e, he laiah hian an hnuk a ni ngei mai" Chuveleh rinpuia chuan "sir, Khatiang ang a hnahthel pe deuh hun chu hmun dangah pawh a awm ve bawk ang chu maw le, khami chauh lo pawh kha a awm ngei ang, chumi loah thisen emaw hmuh tur a awm siloh chuan chutia Johny-a ruang an hnuhna hnu hma ti a han puh ngawt chu thil dik a ni thei dawn em ni?"


"Rina, thisen chungchang kha chu sawi suh, a ruang en dik hmasa tu te ngei pawhin hliam leh hnu hma, thisen tih vel engmah an hmuh loh thu an sawi kha, tin he tualthattu hi a fing ka tih tawh kha, mahsela a fim famkim lo deuh chu anih dawn hi" tiin hnu chu a chhui chho zel a, a hnung lamah chuan zarliana leh rinpuia pawh chuan inspector chu an rawn zui ve zel bawk a.


Tawngtaina tlang bawkah chuan an han chuangkai leh ta. Chuveleh lawm tih hriat tak mai hian inspector chuan "khai le, tualthahna chu he laia thleng hi a ni. Pute u, ka sawi sual loh chuan Johny-a thattu hian Johny-a hi a hrechiang hle a ni, Johny-a chu kohhran a inhmang a ni tih a nu zuali hnen atangin kan hre tawh a, tichuan a chhuanlam atan Johny-a thattu chuan he lai hmun tawngtaina tlang a Bethel puiah hian a sawmchhuak a ni ngei ang"


"Tichuan, tualthattu chuan ruahmanna a siam lawk vek avangin Johny-a ngainat em em a shawl puan bawk chu remchangah a hmang zui bawk a, Johny-a chu khua a vawh thu hrilhin shawl puan bat lum turin a hrilh a nga, tichuan Johny-a chu a shawl puan ngei chuan a rek hlum tihna anih chu, hmanraw dang a hmang anih chuan thah anih rin na tur a awm dawn a, tin puan dang a hmang anih chuan johnnya puan a nilo tih hriat ani ang a, tu puan nge tih laiah chuan buaina a awm thei dawn si a,


"han enchiang ve mah teh u, hei nasa tak a tal bel na hnu ngei a ni" Tiin an piah a thing ding bula vaivut bel deuh hun chu a han kawk a, chutah inspector vek chuan "Johny-a chu helai ah hian mi pahnih in an bawhbet a, pakhat chuan a nghawngah puan chuan alo vet a, reh hlum ngei tumin tan a khawh nasa viau ngei ang"


"Chutah, Johny-a lah talchhuah ngei tum in tan alo khawh ve ngei ang a, mahsela mi pahnih na na na chu Johny-a chuan a hneh lo tawp ang, tichuan an duhthal johnnya an reh hlum hnu chuan Johny-a chu kha lai an hnuhthlakna ka tih hnahthel bel thla hunah khan an hnuk thla ta a, tichuan alo in khaina hmun thing kungah khan tualthattu te chuan Johny-a rûang chu mahni intihlum ang a lantirin an khai kang ta ani. Tichuan tualthattu te chu rinhlelh an nih loh nan emaw miin an lo hmuh loh nan kalkawng pangngai ah pawh let duh lovin hmun hran atangin hmun dangah an kal bo ta ani, mitthi taksa ah hliam leh kutthlakna hnu hma engmah an hnutchhiah duh lo a, mahni a inawkhlum ngei anih rin na turin"


Rinpuia chuan thawk han lak halh pah chuan "sir chung zawng zawng chu engtin nge huai takin i sawi mai theih zawk le, i sawi awlsam mah mah lo maw?" a han ti a, chuveleh inspector chuan "tichuan, tualthattu te chuan Johny-a mobile phone chu kutkawr bun thlapin an han check sak ta a, Johny-a an kohchhuah dawn a an inbiakna zawng zawng te chu an delete vek a, tichuan sualna nei lo beram no duhawm tak ang maiin pangngai tak in an awm ve leh mai bawk a, mahse Johny-a phone chu kan check Chiang tho ang, kha mi zana a biak zawng zawng te kha thu kan zawt fiah leh tho ang"


"Sir, i thusawi zawng zawng te chu a dik lo ka ti hauh lo, a awih awm in a dik hmel phian mai, mahse a finfiahna lam hi engtin nge tih lai a kha ani" rinpuia bawk chuan alo ti leh khauh a.


"Rinpui, ka hnuchhui dan hi a kimchang in ka hrilh ngai lo che a, a hmawr bawk hunah chiah ka hrilhfiah leh thin che, chu chu ka tih dan thin ani tih pawh i hriat kha, mahse tunah chuan engkim hi i hriat ve zel hi a pawimawh tawh a ni. A tawp a a hmawr kan bawk dan chu i hriat vek kha, chuan zawhna dang ila nei em?" Rinpuia chuan ngun zet hian tawngtaina tlang hmun hma vel chu a han thlek kual dauh dauh a, chutah inspector hnenah chuan "sir, i thusawi chu ka pawm a nge, mahse tualthattu chu mi pahnih an ni i ti a, engtiang a han man chhuah vat tur nge ni ta ang le?"


"Chu zawng rina, i hmanhmawh mah

mah anih chu, a bul kan tan ve laih laih chauh ala nih hi, dawhthei tak zel in le" tiin inspector ho chuan chu lai hmun chu an tinsan ta a.