LEHKHA THEM_Chapter-2

[April Hmar Liverpool]

LEHKHATHEM
Ziaktu, Laltanpuia

Chapter _2


Zan a ni a, inspector remruata'n a mi koh te, khami zan Johny-a thih zan a Johny-a'n phone call leh text message hmanga a biak zawng zawng te chu koh khawm niin thu zawhfiah an ni ta hlawm a.




"Sir, khami zan khan Johny-a chu a inkhawm ngei mai, mahse inkhawm ban hnu khan a chin engmah ka hre zui bik lo, kan inkhawm laia kan thian dangte awmdan leh nuihzatthlak tak tak chungchang te kan inhrilh a, ka va biak lai phei hi chuan kei chu ka mu tawh nghe nghe. Muttui aw' tiin ka thlah a, a bak chu ka be leh tawh lova a chin ka hre zui lo ani"




"Dar engzatah nge i mut?"

"ka mut hun kha kalo chhinchhiah thlip thlep hran lo. Zan dang aiin khami zan kha chu ka mu hma ngei mai, a chhan chu a tuk thawhtan ni a ni a, hnathawh tur intan ni a ni a, ka meng rei duh lo a ni"




"Awle a tha e, nakin ah in mamawh thut a la awm thei a biakpawh theih in i awm hnaivai reng dawn nia" inspector chuan lehkhapuan phek leh pen chu han pe in "hetah hian ka sawi ang in ilo ziak zel dawn nia" a han ti a, chu pa muana inti pawh chuan thu awih tak chuan "awle sir, ka lo ziak a nge" alo ti ve bawk a.




Inspector chuan mitthi ta Johny-a kut a lehkhathem lo awm a thuziak chu a han chhiar a, chu pa muana chuan inspector sawi ang zel chuan alo ziak ve ta bawk a, chutah inspector chuan muana kutziak chu uluk fe hian a han en dik leh a, Johny-a lehkhathem ken a thuziak nen chuan a in ang lo hle. "Awle muana, a tha e, i kal thei tawh e"


"awle sir, ka lawm e"


"imm, midang kha"




"Sir, khami zan khan inkhel en puiah min rawn sawm a, mahse ka hman loh thu ka lo hrilh a, a bak chu kan inbe lo hrim hrim, chuan khawiah mah ka vak chhuak hek lo, min hriatpui tu pawh an awm vek, i zawh duh chuan"


"Imm, a ngailo ve chu zawng, hetia thu kan inzawhfiah chhan chu kan tih dan kalphung a ni a, in hriatthiam a ngai ang"


"awle sir"


"chuan, i hming kha hlimpuia maw ni kha?"


"aw, ni e sir"


"awle hlimpui, i kal thei e, midang leh"




Inspector chuan mi panga ngawt mai chu ngun tak leh uluk taka thu a zawhfiah hnu chuan a duh ang tak chhanna a hmu lo tih hriat tak mai hian thuthleng ah chuan a lu dawm vang vang chungin a chhing vang vang reng a. Chutah, muangchang a a thutna atang a thochhuakin rinpuia hnenah chuan "rina, Johny-a nu kha han bia la, hei hi i hrilh dawn nia, Johny-a chuan mi pahnih chu lenchhuah puiah a sawm ngei mai a, mahse an ni chuan an lo hnar a ni tih thu hi"


"aw le sir, ka han hrilh nghal a nge"




Johny-a nu zuali chu a thu hriat avang chuan mak a ti kher mai "engtin maw sir, chutiang in ka fapa in mi len chhuah puiah a sawm lo vang" a han ti deuh hluai a, chuveleh rinpuia chuan "ka pi, i rilru a hah a nih kha, rilru fim tak i put a tul a ni. I fapa zawk hian khami zana a biak te zing a pahnih chu inkhel en puiah a sawm ngei a ni. Chu chu phone call hmang in a ni. Text message a abiak te erawh kha chu han chhuizui tur emaw, han rinhlelh tur emaw engmah a awm lo thung, an kutziak pawh lehkhathem a kutziak nen in an na an nei lo, an fihlim vek niin a lang" a han ti a, zuali pawh chuan insum tih hriat tak chuan "imm, ni e ka pu, i sawi chu ka awih zawk a nge, an mahni ngeiin lenchhuah puiah min sawm' an tih si chuan han awih sak loh ngawt pawh chu a dik bik lo e, mahse an ni chuan an hman loh thu an lo hrilh a tichuan engtin zel?" a han ti deuh ha a.




Rinpuia chuan inringtawk zet hian "ka pi, chu zawng kan pu ho in kan thlithlai mek zel e. Rinhlelh awm an ni lova thudik tak an sawi ngei e, i fapa in lenchhuah puia a sawm te pahnih chu pawn ah an chhuak lo tih hriatpui tu pawh an awm thlap e" A han ti leh a. "Awle, awle, ka hrethiam e, ka chau ve deuh a ni, i sawi dik ang rilru tihfim ka mamawh a ni" tiin beidawng zet hian zuali chu a thu kun deuh lap reng a.




Nakin deuhah chuan Johny-a nu zuali chuan rinpuia hnenah chuan "ka pu, hei hi a tangkai a ngem phei chu ka hre lo a, ka nau chiah Danny-a hi thu zawhfiah ve te pawh in duh lo a mi? A ni hian a tupa chungchang hi chu a hre viau asin, ka fapa hi mahni intihlum a nih ngawt hi kei chuan kala ring thei chuang lo a ni. A putea nen hian an inzui ve nasa a a hrechiang khawp ang,


"mi pawisawi chi anilo tih te, ruihhlo phei chu a khawih ngai loh zia te, kohhran lamah hian an pu tu hian an inhmang a an inzui ve nasa a, mama te rawlthar chhuah hun lai atang tawh a inzui an ni a, engemaw mama chungchang a thil hriat belh tur engemaw tak te hi a awm maithei asin" a han ti a, Chutah rinpuia chuan aw ka dam zet hian "aw le ka pi, Danny-a pawh chu ala tangkai ang, nang in a i hriat pui loh, i fapa in a ruk a ral a lo inbakkaih pui te pawh alo nei reng thei a, chumi anih loh chuan tunah rih hi chuan kan bang bo angreng viau mai"




"Ni e ka pu, Danny-a ka han sawi hmawr hmuh duh nachhan che u chu kei a nu ngei pawh hian mama thuruk tam tak hriat loh ka lo nei ve mial maithei a, hrechiang viau emaw kalo intih lai reng pawh hian ka hriat loh lamah engemaw thil tangkai tak tur te pawh a lo awm thei a, an rawlthar chhuah phat atanga inzui an ni a, ruihhlo te pawh an lo khawih ve thei a kan hriat lohin"


Rinpuia chuan "ni e i sawi dik alawm ka pi, kan pu hnenah ka lo sawi dawn a nia.




"ni e, mama hian mi pawi a sawi chu hre hauh lo mah ila, beidawn nan hrim hrim pawh a tha reng reng e, mama han hua a a chunga thil thalo tak pawh han ti duh mai tur awm ang alo hre hlauh anih chuan in tan pawh kawng a awlsam ang a a tha a nge"




"Awle ka pi, nia kan theih veleh Johny-a putea chu kawm turin kan rawn inruahman ang. Hei zan te a rei mai dawn, keipawh ka tinsan phawt ang che u"




Rinpuia chuan dawhkan han bawh pah chuan inspector hnenah chuan "sir, kei chu he thil thleng hi mahni intihhlumna mai niin ka hre tlat. I ngaihdan chu a nilo mai thei a, chuan Johny-a nu ber pawhin a fapa chungchang a a ngaihdan hi a sawh sawn ve hret hret niin ka hria. A hma kha chuan a fapa chu hetiang ti duh ngailo tur hrim hrim ah khan a ruat a, mahse tunah chuan mahni intihlum a ni thei tih hi a hmuthiam chho tan niin ka ngai"


Inspector chaun meizial chu han hip vang vang in "rina, keipawh a tira ka ngaihdan chiah alawm i ngaihdan chu, mahse tunah chaun Johny-a hi mahni intihlum a nih hi ka ring tawh lo thung, tualthahna ngei anih hi ka ring tlat tawh zawk a ni"




"Tun a pawimawh ber chu rinhlelh awm apiang kan bawhzui zel rih hi a ngai ani. Khami zan a mitthi ta johny a'n a biak te kha pawnah an lengchhuak lova In ah an awm vek a ni tih tifiah turin thu hretu an nei thlap vek a, chumai a nilo, an kutziak kha mitthi ta Johny-a kut a thuziak awm nen khan in an na reng an neilo. Khang ho kha chu han rinhlelh zui na chhan tur thil dang a vang viau mai. Mahse hna chu hna a ni miau a, rinhlelh awm apiang kan finfiah ve zel rih a ngai a ni"




"Ni e sir, a dik alawm, mahse rinhlelh zawng zawng dawp a finfiah vek tur chuan kawng a kual thui mai mai lo maw? i tih thin dan in thlarau biakna lam te hi i theng thawngah a la thawk vak rih lo zawk em ni?" Nui var var chuang chuan rinpuia chuan a pu chu a han fiam a. Chuveleh phur lo fe chung chuan inspector chuan "rina awmze nei lo leh phur thut thil tih a ni reng reng hleinem thlarau biak hi. Ka tih thin dan a thil ka kalpui dawn anih chuan a chhan tha tak ka nei tur a ni, mahse tunah rih mai chuan Johny-a thlarau han biak nachhan tur ka la nei rih tlat lo a ni, nakin deuhah a tul anih chuan Johny-a thlarau chu ka biak pawh a la tul maithei asin" inspector pawh chu a nui ve var var mai.




Zing a ni a, khua chu a nuam lo hle mai. Rinpuia zing tho chu a tho fuh meuh lo a ang riau a, a hmel chu a bawrchhawrin hmuh a nuam viau lo. Inspector chuan rinpuia lam rawn pan pah chuan thingpui no hnih hi a rawn chawi phei la la a, rinpuia bul a thlen phei chuan "rina, kha i thingpui tur" Chutah rinpuia chuan chutia a pu in a thingpui tur alo siamsak tih a han hriat chuan lawm tih hriat tak hian "e khai a, sir i va ti zahthlak ve, Keima tihtur zawk a ni asin"


"la mai mai rawh rina, a ho lutuk heng te chu, kan In ah pawh ka tih ngai loh thil a ni bik lova, In lamah chuan chhungkaw chhehchhawl ve tho alawm ka nih" tiin inspector chu a hmel a zangkhai phian mai. Chutah, rinpuia pawh chuan a pu rilru tur chu hrethiam in "awle sir, anih ka lawm e" tiin tui ti tak chung chuan a pu thingpui pek chu a lem ta khalh khalh a.




Rinpuia phone chu a rawn ri rat rat a, chuveleh rinpuia chuan rang fe hian phone chu a han en nghal thuai a, Johny-a nu zuali alo ni. "Aw hello" lehlam atang chuan "ka pu, hei ka nau te In ah kan awm a, mama putea, Danny-a kha ila hria em? kha mi te In ah khan kan awm mek a, thil pawimawh tak hrilh tur che u ka nei a ni, a rang lam in he lamah in rawn tleh phei hman a ngem?"


Chutah rinpuia chuan "chu, pi zual, thu thar hriat tur a awm hnai tihna a ni ang maw?" A han ti thuai a, lehlam atang chuan "aw lo phei phawt ru, inspector hnenah khan hrilh duh ka nei a ni. Kha lehkhathem awmzia kha ka hria in ka hria, hun kal tawh a mi chu a ni ngei mai a, mahse mama thihna nen a inzawm tlat thil ni ngeiin ka hria"


"awle awle pi zual, chutiang a thil pawimawh tak hriattur a awm chuan kan rawn phei nghal ang e" tiin an inbiakna chu an ti tawp nghal thuai a.




"Sir, Johny-a nu in min rawn bia a, a rang lama keini lam kan tleh phei vat a tul dawn a ni" Inspector chuan a chanchinbu chhiar lai chu muangchanga dawhkana dah in "imm, rina engtia chanchin thar nge maw ni reng reng le?" alo ti thuai a, "sir pi zuali chuan Johny-a kut a lehkhathem a thuziak awmzia kha a hria niin a inngai a, hun kal tawh thil te a sawi"


"ee a ni maw, chuti anih chuan i phei vat teh ang, he laiah hun kan khawhral ta mah mah a ni" tiin inspector chu a han insiam nghal mawlh mawlh a.




Danny-a te In chu kawngpui ân a awm niin in lian ve tawk tak, a hmel thar sur mai avanga an sak zawhna a la rei lo tawp ang tih hriat em em mai leh a hmun hma vel pawh nuam pangngai tak tur hi a ni a. Kawngkhar dar chu an han ti ri va va a, chuveleh In chhung lam atang chuan nu pakhat, hmai tung lam deuh leh sam sei tha zet mai, mit meng fiah kal mai hian kawngkhar chu a rawn hawng ta a.




In chhungah chuan chhungkhat laina hnai tih hriat tak tak te hi an lo tap khawm taih hlawm a, eng eng emaw sawiin an lo phun malh malh hlawm a. Sitting room lam atang chuan Johny-a nu zuali chuan "ka pu, he lamah aw, he lamah lo phei ru, Ngaihi, thingpui kha lo buatsaih rawh aw" tiin inspector leh rinpuia chu alo hui nghal thuai a.




Thutkhawmna pindan lamah chuan a hmel han en mai pawh a kum la naupang tak tih hriat, a inthuamna atang reng pawha mi hawiher zau chi leh lu zo veh vawh tak, a thil tih lai a rilru pe taka lehkha a thil lo ziak mawlh mawlh mi pakhat hi an va hmu a, a bula sofa ah chuan Johny-a nu zuali leh a pasal ni ngei tur hi an lo thu ve bawk.


Inspector chuan dawhkan bawh a thil lo ziak mawlh mawlh chu uluk fe hian a han thlek vang vang a, chuveleh a aw chu han thian kharh kharh in "e khai a, kha nang chu i va buai awm ve" a han ti a, chu pa pawh chuan rang zet a amah betu lam chu en thuaiin "e khai, pu inspector, lo thu ru lo thu ru, hei nia tukin chu ka buai ve deuh alawm mawle" alo ti nghal sawk sawk a.




Inspector chuan ngaihven zet hian "kha, eng lam pang nge ni ngai a?" han ti a, chu pa chuan "aa, kohhran thil a nia, a hming a kohhran a inhman ve takah chuan secretary te kan lo ni ve a, eng eng emaw han phuah khawm neuh neuh tur hi a awm ve chawk a ni" tiin a nui sang mai.




Johny-a nu zuali pawh chuan a thutna atanga rawn thochhuak hluaiin "pu inspector, kha lo thu ru, a ni kha Danny-a, mama putea ka tih kha a ni a, a ni hi ka pasal" tiin inspector chu a han hmelhriat tir nghal zung zung a, "e khai aw, a In neitu pa ber ka han hai nghal thawr ringawt che a" tiin inthiam loh hmel tak chuan inspector chuan Danny-a hnenah chuan thupha a han chawi vat a, a kut chu a pharchhuak nghal vat bawk, rang zet hian Danny-a pawh chuan inspector kut chu lo vuan in an han in chibai nghal thuai a.




"Ka pu, he thu ka hrilh dawn che u avang hian pawi ka tiin nuam lo ka ti lawk takzet. Hun kal daih tawh a mi chu a ni ngei mai. Mahse, rinhlelhna mit leh beng chhi a ngaihtuahna hmang ka nih avang hian Arema te chhung pawhin min hriatthiam ngei ka beisei a ni.


"Tlem lai deuh khan vengsang lamah khian a hming chu Arema hi a awm a, kohhran harhtharna avangin kan veng pawh harhna rau in min tuam nasa em em mai a, Arema te rualkhat ho, ka fapa Johny-a tiam in an ni kha hlimna chang sang pawl an ni thin a, an inkawm han ti dawn ila, thian inkawm ang chuan an inkawm chiah lo, mahse kohhran lamah a kultai ah an tang nasa a, saw mi tawngtaina tlang pawh saw mama leh Arema te, an ni mi hlim ho in a an siam ani nghe nghe.


Arema leh mama te thian ho chu tawngtaina tlangah te Bethel in kohhran pawn lam thlengin an inzui nasa ve hman a, 'mihlim' tiin mite chhuan an sawi mai thin. Harhna rau in a kentel a nih avang khan keini lam pawh khan khatia an awm kha kan khap sak lem lo"




"Mahse, hun te a kal zel a, Arema chu rilru lam buaina neiin a khawsa chho ta a, a nu leh a pa, a chhungte meuh pawh an beidawngin an hrilhhai ve thin hle, Arema chu a ngaihtuahna leh a rilru in a tibuai a, a mihlim puite pawh chu a pawl hleithei meuh tawh lo. Amah chuan a tla hrang ta deuh chawt a, kohhran lam pawh a thlah fel chu a ni der mai.


Mahse, mama te erawh kohhran lamah an in hmang chhunzawm zel thung, mahse hun a liam zel a, Arema chu a rilru buai avangin maksak tak takin a khawsa chho ta a, a chhungte beidawng chuan rilru lam doctor te hial an pan ta fo mai. Tichuan doctor enkawlna hnuaiah Arema pawh chu a rawn pangngai chho ve leh mai thin bawk. Mahse a rilru buai a chhuah apiang chuan mi tu tu te emaw hi a hau vak vak thin a, tumkhat phei chu khawlaia mi vei vak ho lung in alo tawng chiam tawh a ni awm e"




"Mahse, rilru buai anih avangin mi tu mah pawh chuan khin en ah an en ngailo. Mahse a rilru buai a chhuah apiang chuan ka fapa Johny-a leh a thian te chungah ngei pawh chuan a tuan leh ta zel a, Arema chuan Johny-a chu abik takin a haw ta em em mai a, phatsân tu' ti te in a an khum chiam chiam thin a, tawng Kam chhe tak tak leh bawlhhlawh tak tak hmangin ka fapa leh a thian te chu a tawng fo thin a ni"




"Keini lam chuan chutia arema'n Johny-a te alo tawng ve thin ani tih chu kan lo hre lawk lo nghe nghe a, mahse Arema chhungte mangang chuan kan bulah ngei enge thil awmzia min rawn zawt ve ta hial mai, an mahni lamin mak an ti a an hrilhhai ang bawk chuan keini lam pawh in Arema awmdan chu mak kan ti in kan hrilh a hai viau mai a, tichuan Arema chuan Johny-a leh a thian te chu alo tawng fo thin reng em tiin kan han thlithlai ve ta a, alo tawng ngei ani tih chu kan hre ta ani. Johny-a hnenah chuan ngawi mai mai tur leh engtin mah khing let lo tur chuan kan fuih sauh sauh reng a"




inspector chuan zuali thusawi lai chu lo pawt chat in "chuti anih chuan engvanga Arema chuan Johny-a te chu lo tawng ngawt nge anih tak ang?"


"ka pu, chu zawng ka hrethiam mai bik lo. Kei ngei pawh chuan Johny-a te hnenah chuan 'Arema pawi in sawi em ni? Arema tan a hnawksakin in khawsa thin em ni? in thianpa tho ani a, thlauhthlak bik kher tur a ni Chuang hleinem, thahnem ngai takin a rilru buaina te khi a kiam theih nan in tanpui tur zawk a ni' tiin ka hrilh fo mai, mahse ka fapa chuan heti hian min chhang a ni"




"ka nu, Arema chungchangah engmah inrawlhna kan nei lo, hetia keimahni min haw ta ngawt mai pawh hi a rilru leh ngaihtuahna buai vang mai mai niin ka hria, a tan a hnawksakin kan khawsa ngailo hrim hrim, hetiang a rilru buai hial a a han awm ta mai hi pawi kan ti asin, kan thian zingah, kan tawngtai rualna ah min rawn tel pui theih ve tak loh avang hian amah leh amah khi a intihreawm mai mai niin ka hria, engah mah kan ngai duh hleinem, keini lam kan hlim ngaiin kan hlim reng si a, kan tih thin dan pangngai in Bethel tur te, zai khawmna nei tur te leh kohhran lamah pawh a kultai ah kan la tang reng si a, heng te hi a ngaithei lo niin ka hria, chumi avanga min tawng ta thin niin ka hria, hun a kal deuh a nga ala reh ve mai ang' tiin min hrilh thin a ni"




"Inspector, ka sawi awmzia chu i man em? Mama'n lehkhathem alo ken kha Arema ziah khi a ni thei mai a ngem? Ka fapa ziah ang a lantirin, ka fapa chu inchhirna leh inthiam lohna a khat in a intihlum ta ni a ngaihtheih anih nan, nuam lo ka tiin hreawm pawh ka ti viau mai.


"Arema han rinhlelh ringawt pawh chu awm lo viau in a lang, mahse ka pu, Arema khi enge maw thu han zawhfiah ve hrim hrim te pawh ka duh takzet a ni. Arema leh Johny-a inkar kha he lehkhathem nen a inzawmna emaw a awmzia emaw ni thei a ka rin awmchhun chu a ni deuh ta mai, Arema nilo midang, ka fapa nena han inbakkaih deuh emaw han in hmu sakhi tur awm ang midang hmehbel tur ka hre zo lo a ni. Arema hi ka fapa thihna ah hian a inhnamhnawih ngei e ka ti lo a, mahse hun kal tawh thlir kir hian Arema lo chu ka fapa thihna ah hian han hmeh bel tur hi an vang em a ni"




"Awle pi zual, i thusawi awmzia ka man e, i fapa lehkhathem ken ah khan amah a inthiam loh na thu te, mi dang tan a hnawksak a alo awm thin avanga a inchhir thu te, mi pawi alo sawi thin avang a hreawm a tih thu te kan hmu a, khami han ngaihbel tur kha chuan Arema chu a lo langsar lo thei ta lo i ti mai ang aw ni"


"Aw ni e ka pu, chu chu ka hmuh dan chiah a ni, thil ala chiang lo nachungin Arema chungah ngei pawh chuan ka inthlahrung viau mai. Mahse kum khat dawn chu a liam ve tawh a, Arema ngei pawh tunah chuan a rilru buaina leh a ngaihtuahna buai te kha a reh tawh ni ngeiin ka hria, tun hma kha chuan a khat tawkin a buai reng a, Johny-a te thian chu a haw em em thin a, keini lam chuan ngaiah neiin kan en liam mai zel, mahse a han reh chho ta vang vang a, hun kal tawh engkim chu kan lo mangnghilh zo tawh a ni.


A tan tirah pawh khan Arema han ngaihbel kha ka rilru ah a lang lo hrim hrim, mahse thui zawk hun kal tawh ka chhui kir a, Arema chu ka rilru a lang lian ber a ni ta a ni. Mahse ka sawi tawh ang in Arema han rinhlelh ringawt pawh hi hreawm ka ti a nuam lo ka tiin a inthlahrunawm takzet a ni"




Inspector chuan dam dap hian "e khai, hreawm ti reng reng suh. Arema chu a awmdan rengah pawh han ngaihbel loh theih loh chu a nih ve bawk chu maw le, tun hma zawngin Johny-a te thian za a tawng reng thin a, tun ah erawh thehhmeh ang maiin a reh ta vang vang a, amah Arema tan chuan a mi huat ber mai Johny-a a han awm tawh lo ringawt pawh chu a thawven thlak huai thei hial ang, mahse i sawi ang in thil hriat sual kan nei anih chuan thupha kan la chawi leh zawk dawn nia, tunah chuan Arema an tih chu thu zawhfiah tura kan lak phawt a tul a ni" tiin a tiang ken chu a han zut hauh hauh a.




Ruati, Arema nu chuan kawngkhar dar ri va va chu lo hria in kawngkhar lam chu a pan nghal thuai a, kawngkhar a han hawng chu a phu deuh zawk nghe nghe. Hrilhhai zet chung chuan "e khai aw, zuali, police te nen lam enge ni ta ngai?" alo ti nghal thuai a, zuali'n In neitu nu Ruati zawhna a chhan hma chuan inspector chuan alo tawng khalh thuai a, "ka pi, Arema hi a awm em?


Ruati chuan "Aw, awm e, enge ni ta ka pu, Arema chu thu zawhfiah in duh tihna em ni?" Zuali lam chu hawiin "zuali, a pawi tak tak a ni, Johny-a chu engtia mahni han intihlum duh mai nge maw a nih reng reng le?" hrilhhai zet chuan a han ti a, zuali pawh chuan "pi ruat, i fapa Arema hi police te hian thu zawhfiah lawk an duh mai chauh a nia, ni e a pawi takzet a ni. Ka fapa thih dan hi ka lung a awi thei lo a ni. Inspector leh a nau te chungah hian ka innghat tawp a, ka fapa thihdan diktak hre turin theihtawp ka chhuah mek anih hi" Zuali hmel chu a ngui hle a, hmuh a nuam lo hle. "Awle, awle, ka hrethiam e, mama chu ka va ko a nge"




"Ee khai, ka pu te chu enge in duh ve teh mial a?" kawngkapui awmna lam chu an hawi rual thawt hlawm a, Chuveleh zuali chuan "pu rin, eng duh hran lo ve, i hria a nga, ka fapa thihdan ah hian ka lung a dam thei ngang lo a ni. Chuvang chu a nia" mak ti zet a police te leh zuali en ha chung chuan "imm, a nih tak chu maw le, Johny-a chu engtia mahni nun na han la ngawt duh mai nge maw anih reng reng le? a zialo tak zet, a pawi ka ti lutuk zuali. Thingpui te a awm asin, khawnge mama nu kha" tiin a inlengte chu thutna a kawhhmuh nghal sawk sawk a.




Inspector chuan "A ngailo ve ka pu, i fapa Arema hi thu zawh fiah kan duh mai chauh a ni. A lan dan ah chuan Johny-a hi mahni intihlum ni in a lang a, mahse hemi phenah hian thuruk a awm a ni, chu chu kan chhui mek a kan hlat tawh vak loin ka hria" tiin Arema leh a nu Ruati an lam pan a rawn inchhawm phei hnak hnak lam chu a hawi nghal thuai a.




Chuveleh inspector chuan "awle, Arema i ni ang maw?" Tiin Arema lam chu a han pan hnai a, Chuveleh Arema chuan hlauhthawn hmel fe hian, "sir, enge ni ta?" tiin a sam chu a han nuai pah sauh sauh a, Arema chu a lu a buk hle mai a, hmui hmul zuahin a hmel chu a bawrchhawr hle, muhil zo hlim hmel a pu lek lek bawk.




A taksa ria tak chu amah en ruala hmuh hmaih hauh loh turin a langsar viau a, a kawr hak leh a kekawr hak chu a taksa ria tak nena inrem lo tak niin a fual in a lian hle thung. "Arem,kan hmun lamah thu zawhfiah lawk che kan duh a, min rawn zui ta che aw" Arema chu a awmdan rengah pawh chuan enge maw hlauh nei ni awm hrim hian a meng phawk viau mai a, a chhungrilah enge maw tak tham tu awm ni mai awm hian a sam leh a ban chu a zut hauh hauh reng bawk. Mahni inringtawk lo tih hriat tak hian a khat tawk chuan a kut chu a kuang kuah deuh sek bawk.




Inspector chuan a kawr ban chu han thlep chho in Arema hnenah chuan "Awle arem, khami zan, i thian hlui Johny-a thih zan khan khawiah nge i awm?"


"Sir" Arema chu a han ngawi vang vang phawt a, a hmel chu hmuh a nuam loin a phawk deuh hra reng a, "sir, khami zan khan In ah ka awm"


"Chu, pawnah i chhuak miah lo i tihna a ni maw?"


"Sir, ka lengchhuak lo, In ah ka awm ngei e" inspector chuan Arema nu leh pa lam chu hawi in "khami zan khan in fapa hi In ah a awm ngei tih a fiahna tur in nei em?" Chutah le, Arema nu leh pa te chuan phat rual lohin an fapa chu Johny-a thihna ah chuan rinhlelh mek a ni tih chu an man tan ta.




Chuveleh Arema pa Rinliana chuan "ka pu, kei hi khami zan khan ka inkhawm daih mai a, kan fapa hi In ah chuan a awm ngei in ka hria, mama hi zan lamah phei chuan a vak chhuak tam lo khawp a"


"awle a tha e, chuan ka pi, nang ve thung le, Arema hi In ah a awm em?" Arema nu Ruati chuan a mit chu han khap sawk in a han thaw hak a, chutah Ruati chuan "ka pu, kan fapa hi In ah a awm ngei e, Pathian ni zan ni mahse khami zan ah kha chuan kei kha chu ka inkhawm lova In ah mama nen hian kan awm a ni"




"Awle Arem, khawmaw i mobile phone han phawrh teh" Chuveleh Arema chuan "sir, ka phone a thil awm te hi ka delete vek zel a, engmah hmuh tur a awm lovang" hlauhthawn hmel fe hian alo ti thuai a, chuveleh inspector chuan rinhlelh hmel fe hian "engtin maw i sawi? A eng a chu maw i deleted a? I phone call history leh chat list i delete vek i tihna em ni?" a han ti a, Arema chuan "sir, aw ka delete vek zel alawm"


"Engvang a call history leh chat list te chu delete nge i nih?" Chuveleh Ruati chu lo inrawlh vat in "ka pu, mama hian phone hi a khawih nasa a, thil tangkai lo chu a delete vek zel a ni"


"awle ka pi, i fapa hi mi fel tak anih ngei ka ring, chuan Arem, khami zan khan Johny-a i bia em?"


"Sir Johny-a te chu" a ngawi vang vang a, chutah a hmel chu muang chang a rawn inthlakin "sir, ka tih a nilo hrim hrim, Johny-a nen kan inbe lo"


Chutah inspector chuan a aia chik zawk a en in "engatinge i biak ngai loh a, thian in ni tih kalo hria a" "a chhan chu sir, kan inkawm lohna a rei ve leh tawh a ni"


"Awle Arem, anih chuan lehkhapuan ah hian ka sawi ang zelin ilo ziak dawn nia" Arema chu a phawk kher mai. Hlauhthawnna enge maw tak hian a tham mek a ni tih hai rual a nilo. "Awle awle sir ka lo ziak a nge"




inspector chuan mitthi ta Johny-a lehkhathem ken a thu inziak chu a han sawi a, Arema pawh chuan inspector sawi ang zel chuan lehkhapuan ah chuan kut khur dar dar chung hian alo ziak ve zel a,


inspector chuan alo chik kher mai. "awle Arem, a tawk e, khaw maw ka lo en chhin" tiin Arema kutziak chu inspector chuan uluk fe hian a han thlek vang vang a, Arema chuan lehkhathem a kutziak leh a kutziak chu a in ang lo thei tur bera ziah danglam a tum ni a ngaiin lehkhathem a kutziak nena a in theihna lai chauh chu inspector chuan a han chhui dawn vang vang a, Chutah inspector chuan Arema kutziak leh lehkhathem a kutziak chu in ang a ti ta kher mai. Chutah, muangchanga Arema lam en pah chuan "Arem, dawt i sawilo tih i chiang a maw? He lehkhathem a kutziak leh i kutziak hi a in ang viau a ni" a han ti a, Arema chu a zam takzet.




"Aw sir, dawt chu ka sawi lo in ka inhria, kha kutziak kha ka kutziak nen a in ang thei lo hrim hrim" Chuveleh inspector chuan "engtin maw? dawt i sawi leh sawi loh i chiang lo a maw? Enge thil awmzia? eng chungchangah nge dawt chu i sawi loh ngawt ang a,dawt i sawi lohna chhan tur tha tak chu han sawi teh,tin he kutziak hi ngun takin en rawh, hawrawp a inziah awn dan leh hawrawp inziak len zawng a in an danah hian i kutziak nen hian kutziak thuhmun ni ngei in a lang si a, han sawifiah teh, dawt i sawi leh sawi loh pawh i Chiang lo a nia, i thil tih i pha ngam ta lo tihna a ni mai lo maw?"


Arema pa Rinliana chu lo inrawlh vatin "ka pu, Arema hi mi hrisel lo tak mai a ni a, tun hnai chho ah phei hi chuan a rilru lam buai hi a langchhuak leh zauh zauh thin a, mahse bawiha hi he thil ah hian a inhnam hnawih lo tih ka chiang, khami zan ah pawh khan Johny-a bo thu information a an rawn puan lai pawh khan Arema hi khawsik in a awm a, a damdawi tur pawh ka ngaihtuah sak nghe nghe asin"




Inspector chu meng zau kawkin "pu a, enge i sawi awmzia chu ni a? Khami zan i tih chu Johnya bo zan kha i tihna em ni?"


"Aw ni e ka pu, mama hi ka vil deuh chawt thin a, a natna hi a zual viau lehnghal a tun hnai chho hian, chuvang chuan bawiha thusawi hi mumal lo deuhte hi a awm chawk thin a nia, inhriatthiam a ngai ang" Chutah inspector chuan lungawi lo fe chung hian "pu a, thu lawi lo sawi tu zawk chu nangmah hi i nih dawn hi, khami zan khan inkhawm angin i insawi zo chauh a, tunah i fapa dam lo chu buaipui in a damdawi tur pawh ngaihtuah sak ang in i insawi leh lawi si a, a khawi zawk nge thudik?" inspector hmel chu a rum ngang mai.




Chuveleh nu ber Ruati chu alo inrawlh vat a, "ngawi ru, thudik tak sawi law law ang. Khami zan khan mama pa hi chu a inkhawm ngei alawm, tin keipawh In lamah ka awm ngei e, mahse mama chu a lengchhuak a ni. In ah a awm lo" Chuveleh inspector chuan zawldawh zet hian "imm, ka pi, ka pu, in fapa hi chhan awm lovin ka man ngawt dawn lo, a tir ah khan thudik sawi mai tur hi a nia, khatia dawt nen a in fapa humhim in tum kha chu thil dik a ni thei lo. Chuan Arem, khawiah nge i len? Tute In ah nge i len han sawi teh" Arema pa Rinliana chu a hmel a ngui hle mai a, lainat hmel tak hian a fapa phawklek tak chu a en ran mai.




"Sir, ka u te In ah ka leng alawm, ka leng rei lo, ka haw leh nghal alawm"


"awle awle, a tha e, i u hming chu tunge a?"


"Sir, ka u chu remdiki a nia, diki tiin kan ko thin"


"Awle rinpui, pi zual, remdiki chu han ko nghal vat teh u" Chuveleh rinpuia leh Johny-a nu zuali te chu Arema unau nu remdiki ko tur chuan chet an thawh nghal thuai a.




"Arem, thudik tak zel i sawi a ngai ang. Chumi anih loh chuan pressure ka pe hreh hauh lo che a nia, a tawpah thudik tak tho a lang zel ang"

"Sir, khami zan a thil thleng kha ka hrechiang thei tawh lo a ni" Inspector chuan rang zet hian "eng thil thleng maw?"


"Sir" Arema chuan hnuai lam chu bih ngat in "sir, khami zan a ka awm dan zawng zawng kha ka hrethiam lo, ka buai niin ka inhria" Rinliana vek chu lo inrawlh leh vat in "ka pu, kan fapa hi rilru lam buaina nei thin a ni a, a ngaihtuahna te hi a kawm nasa a, keini lam pawh hian kan mangan pui nasa alawm. Thil tha lo han ti duh tur khawp chuan kan fapa hian huaisenna a nei hauh lo ang le"




Ruati pawh chuan "ni e ka pu, kan fapa hi mi khawngaihthlak tak ani zawk asin, tin a mah hian khatia thu han zawhfiah vel kha a zo lo niin ka hria, a awmdan thin a ni a, a natna hi a zual zel phei chuan ama tih nilo te hi amah a maw a inti tlat zel alawm. Rilru lam doctor chen in kan rawn nasa, damdawi an chawh hi a ei thin a, a zia ve leh deuh thin, amah ti ralkhel thei thil engah mah hian inrawlh chi a nilo, a hlau zo a, a dawihzep zo a, a inringtawk lo zo a, a tal buai zo vek zel alawm"




"Awle awle, ka pi ka hria e, hei Johny-a nu zuali pawh hian in fapa tunhma nun leh Johny-a te nen pawh a an lo inzui tawh dan chanchin te pawh min hrilh a ka lo hria e, mahse kan tih dan pangngai a ni a, khami zan a In a a awm tak si loh ah chuan dawhthei takin kan zawhna te hi min lo dawngsawng zel rih turin ka ngen duh che u a nia"




Arema u remdik chu alo thleng a, Chuveleh inspector chuan "kha, ka pi chu, kan kohna te ngaipawimawh a i rawn lan avangin kan lawm teh a nia, hetah ka hmaah hian lo thu rawh" tiin remdiki chu thutna tur alo kawhhmuh nghal thuai a.


"Awle ka pu, eng thil chungchang ah nge kei chu min han koh ve tak ni" tiin a aw ka chu a dam phian mai a, a hmel erawh a pawr deuh fap thung. Inspector chuan "Ka pi, khami zan Johny-a thih zan khan i nau Arema hi in In-ah alo kal em? Zan tir, dar ruk bawr vel atanga zan dar sawm thleng pawhin han ngaihtuah let leh la, i nau hi alo kal em?" Remdiki chuan ngun zet hian a han ngaihtuah a, chutah zawi muang a Arema leh a pa Rinliana te lam chu en in "aih, khami zan khan Arema hi alo kal miah lo. Kan In a alo kal awm ka hre miah lo"




Chulai hmun a awm te chu mak tiin an thum hak mai. Johny-a nu zuali pawh chuan lungchhe tak leh hrilhhai zet hian Arema chu alo en ran a, "Arem leh" tiin a phunchhuak sap mai.


Chuveleh, Arema nu Ruati chuan a fapa chu hrilhhai zet a en chung chuang "mama, Arem, khawiah nge i awm khami zan khan, khawiah nge i awm? In ah i awm silo a" Arema chuan hnuai lam ala bih ngat reng a, Chutah hreawm tih hmel zet hian "sir, khami zan khan kan kawmthlang a In ruak pakhat ah kal in ganja ka zu a, damdawi thahnem tawk tak ka ei bawk, chumi chin bak chu ka hre zui tawh lo" Thawm chu a reh diak a,


Chutah Ruati bawk chuan "mama, ganja te i zuk tak mai le aw, damdawi nen lam maw? Chuan i awm zui zel dan engmah i hre chhuak tawh lo chu a nia. Engati nge bawiha hetiang a i awm tak mai le aw" Inspector chu a thutna atanga thochhuak in rinpuia chu a han hui zauh a, pawn lamah chuan an inzui chhuak ta a.




"Rina, Arema thil tih ni thei in i hria em?"


"Sir, a thusawi te a dik anih chuan ama tih ngei hi ani thei asin. Engmah hre zui tawh lo ang in a insawi mawi mai mai pawh a ni thei a, a tir atanga a tawp thleng khan a rinhlelh awm tluan parh a ni. A nu leh pate khan dawt nen an lo tanpui ve tum hrang bawk nen"




Rinpuia vek Chuan "sir, amah ni lo han rinhlelh tur dang hi an awm chuang lo, tun a a tana tha ber ni a ka hriatpui a thusawi te a dik anih chuan engmah a hriat zui tak loh lai a a awmdan, a thil tih kha kan hriatchhuah a ngai niin ka hria, a hrechhuak leh ngei ngei tur a ni. A tul a nih chuan lock up lamah pawh indawp mai chi niin ka hria"


"awle Rina, ngaihdan tha tak mai i neih avang in ka lawm e, hetiang ang a thurawn tha tak hi ka mamawh thin reng a ni. Hma pawh i sawn viau ta in ka hria, keimah lam hi ka tar tan mai dawn"


"Arem, kha mi zan a i thil tih leh i awmdan engmah i hriat zui tak loh kha ka hria asin" Arema chu a hlauthawng takzet tih a mit meng leh awmdanah chuan a hriat a, Chuveleh Arema ngei pawh chuan dawih aw chhuahin "sir, ka hrechhuak leh si e, khatia ganja ka zuk khan khaw laiah ka leng kual a tichuan"


"duhtawk rawh Arem" inspector aw chu a vin lek lek. Thawm chu a reh diak a, Chutah inspector chuan Arema chu en ran in "Arem, dawt ka ngaina lo tih i hriat kha, khami zan khan ganja leh damdawi chu i ruih pawlh ngei mai, chutah hun rei tak chhung i hmelma, amah avanga nun hreawm reng reng a ilo awm tawh thin na leh amah leh a thiante laka hel ru a an khawlai leng pawh lo tâwng fo thin kha i ni a, amah avang a hahdam tak leh thlamuang taka i awm theih ngai lohna kha, kha pa i thian hlui Johny-a ngei kha an inkhawm bang chu phone call emaw text message emaw hmangin tawngtaina tlanga Bethel tura insawiin i ko chhuak a ni ti raw? Tichuan Johny-a chuan shawl puan a bat fo thin tih i hria a"




Chulai hmun a awm te chu mak tiin an meng rang kawk kawk hlawm a, inspector ruata vek chuan "i remruat lawk vek a ni. Khami zan khan i buai reng reng lo, i fim mah mah zawk a ni. Kutkawr pawh i bum thlap a, tichuan Johny-a chu ama shawl puan hmang ngei chuan i rek hlum a, a rûang chu hmanhmawh takin a thlang kawr ruamah i hnuk thla a, tichuan mi pakhat tanpuina nen Johny-a rûang chu thing kak ah inawmkhlum ang a a lan theih nan in khai kang ta ani. Tichuan, Johny-a nen in inbiakna zawng zawng chu i thaibo vek a, lehkha kha i hnutchhiah bawk a, tichuan rinhlelhawm a in awm loh nan kalkawng pangngai a let lovin hmun hran atangin in let leh ta a ni. A Chiang em?"




Thawm chu a reh tlawk tlawk ringawt mai. Chu lai hmun a awm te chu mak tihna leh hrilhhaina in an khat a, Rinliana leh Ruati pawh sawi tur reng hre lovin an fapa lam chu an thlek ngat ngat ringawt mai ani.




Nakin deuhah chuan Arema chuan chi ai zet chung chuan "aw ka pu, i sawi te kha a dik vek e, kei hi ka buai zo ta a ni. Johny-a kha ka thah ngei a ni. Kei leh min tanpui tu ramhuai nen khan"


"Engtin maw Arem? Ramhuai i ti e law?" Mak ti zet leh rapthlak ti zet hian zuali chuan alo ti a, "aw, kha ramhuai pa nen khan Johny-a kha kan thah a ni" Arema chu a insum lo kher mai. "Thudik tak in hre duh a ni lawm ni?" Arema mit atang chuan mittui a rawn hnam chhuak nghal tiam tiam a, a thin zawn chu dawm in a thaw kawk kawk a, chauh hmel zet hian a indâwm kun nghal tlawk tlawk a.