LEHKHA THEM_Chapter-3

[April Hmar Liverpool]

LEHKHATHEM

Ziaktu, Laltanpuia

Chapter _3

Arema chuan mak ti zet a amah kil bial taih tute hnenah chuan, "ni e, a dik alawm, Johny-a kha ka haw takzet, amah avangin rilru buaiin ka awm a, kan In bulah te hian rawn kalin tawngkam chhe tak tak leh bawlhhlawh tak tak hmangin min rawn tawng fo thin a, ka thinrim insum thei lo chuan a let leh ka hmuh tir ve fo a ni.

"Kei kha mi bawlhhlawh hmuhin min hmu a, mi tenawm treat in min treat a, hmun tin ah kei chu min tih mualpho tumin hma an la ngar ngar a, mi zawng zawngin an tawngkam chhe tleuh nan leh bawlhhlawh vawm khawm nan keimah kha min hmang a ni. Chu chu Johny-a leh a thian te vang vek a ni. Ka hriat ve reng lai pawhin ka pawi sawi an hreh hauh lo. Ka ning lutuk thin chuan ka thinrim ka insum hman thin lo a, a chang phei chuan lung te ka la a ka tawng fo mai. Min tih dan ang chiahin ka ti let ve fo. Mahse, kha kha rilru buai leh ngaihtuahna mai mai niin midang chuan min sawi sak tlat a, ka nu leh pa, ka chhung te ngei pawhin ka rilru buai vang ah an puh tlat a ni"

Arema pa Rinliana chu lo inrawlh vatin "mama, i ngaihtuahna mai mai kan tih kha, i rilru kal buai avang mai mai a ni kan tih kha, i thil hriat zawng zawng, nangmah an ti che emaw i tih zawng zawng kha i natna vang a ni. Ka sawi nawn leh ang, chutiang in mi tu mahin an treat ngailo che asin, mahse nang chuan dawt kan hrilh che ah i ngai tlat a, i ngaihtuahna leh i rilru danglam tak avang vek kan tih kha.

"A va pawi tak em! lo thlithlai in lo ngaihven ngun deuh che ila tha tur hi a nia, kan lo inthlahdah mah mah a ni, bawiha min ngaidam ang che, i thinlung a phuba lak chakna hi lo hria ni ila chu aw he thil hi a thleng lo tur" tiin alo indawm kun ngawih ngawih mai a, Ruati pawh chuan "ka pu, mama hi hetiang ang thil rapthlak ti duh mi hi a ni ngailo hrim hrim, a rilru buai leh ngaihtuahna vang vek a ni. Ka pu ngaidam hram teh u, zuali, nang ni chhungkua ah pawh kan va inthlahrung in hreawm kan va ti kumkhua dawn em ve maw le aw, a pawi lutuk"

Inspector chuan "imm, thil thlen dan chu han sawi zel teh Arem" tiin Arema chu alo melh ngar a, Arema pawh chuan a mittui han hruk hlawp hlawp pah chuan "sir, Johny-a khan thih kha a phu a ni. Mi nun ti chhia in mi ang lo ang hialah thenkhatin min ngaih phah a, ni e, i sawi dan zawng zawng kha a ni mai ka chet dan chu, Johny-a kha a shawl bah khan ka rek hlum a ni, Johny-a khan shawl a ngaina tih ka hria a, a shawl rawn bat turin ka hrilh a, tichuan tawngtaina tlangah tawngtai turin kei leh midang, kan thian te nen kan lo nghak reng tawh tih ka hrilh a ni"

"Tichuan, a shawl hmang chuan i rek hlum a, i hnuk ta chiam a, thing kakah nangmah tanpuitu nen chuan in khai kang ta a" Johny-a nu zuali chuan alo ti vat a, "aw ni e, Keima thah ngei a ni pi zual, min hrethiam rawh, Johny-a phone kha ka la a, kan inbiakna chu ka thai bo vek a, tichuan kal kawng pangngai nilo, hmun hran atang chuan In lam ka pan leh ta a ni"

"Chuan, nangmah puitu chu tunge le?" Inspector chuan alo ti leh a, Arema chuan lungchhe fe hian "sir, ka hre lo, tunge anih ka hre lo, kei kha ka rui em a, tunge anih ka hre tawh lo a ni"

"Nichin khan ramhuai i ti si a? Amah chu pa lian lam leh thahrui ngah tak a ni ngei ang" Inspector bawk chuan alo ti leh thuai a, Chuveleh Rinliana chuan "ka pu, khawngaih in ka fapa hi hriatthiam a ngai a ni. A natna a chhuak leh palh mai ang. A rilru i ti phawklek vek alawm, ama tih nilo pui pawh hi ama tih anga ngaihbel palh vaih chuan ama tih a maw a ti vek zel"

Chuveleh fiak thak hian Johny-a nu zuali chuan "pu rinlian, lo ngawi ang u. Kei a tan hlei hlei hian asin na ni. Hriatthiam hi ka ngai zawk. Amah leh amah a inpuan vek tawh kha, atir atangin dawt nen in tang char char a, thu in sawi kual in sawi kual a, atawp ah tualthattu anih thu amah ngeiin a inpuang ta a, chu bak bak thil dang beisei leh tur a awm chuang em ni?" Chuveleh inspector chuan rinpuia chu a kut chuan a hui zauh a, pawn lamah chuan an inzui chhuak leh ta a.

"Rina, thil pawimawh bik kha ilo chhinchhiah zel em?"

"Aw sir, ka chhinchhiah zel e" inspector chuan "rina, thil hi a kal dan a buar chuar deuh nuai rih niin ka hria, Arema hi tualthattu ngei nia lang chu a ni a, mahse a thusawi hi a ho riau, a chungchang thu a nu leh pa sawi kha ka pawmpui riau mai. A hlauhthawn lutuk avang leh mahni inrintawkna a neih loh avang pawh a ni thei, chumi lovah ruihhlo alo khawih ve leh zel a, amah leh amah hi a inringhlel ni berin ka hria, a tira a awmdan leh a hawi her reng mai kha hlauthawng hma chi leh chi ai hma chi, a nu leh pa sawi dan takin a natna avang a ama tih ni miah lo pawh amah nena ngaihbel anih chuan ama tih ni a ngai ta mai, mahni inrintawkna nei miah lo leh rilru fim lo tak niin ka hria, a tir a a dawt sawi chu thuhran ni se"

"Ni e sir, i ngaihdan chu a dikna chen a awm ngei ang, mahse a hma khan a hriat theih tawh loh chin chu hrechhuak leh ngei tura nawr a ngaih thu kha kan sawi a, tunah ganja leh damdawi a ruih hnu a engmah a hriat zui tak loh hnu a thil thleng leh a tualthah dan chu a inpuang fai leh kelh ang lawi a, mahse a hma ang thovin a thurual pui chu tunge anih a hrechhuak zolo niin a insawi leh a, he pa, a thurual pui hi hre turin amah Arema hi han nawr leh deuh ila a hrechhuak leh mai lo maw? Tichuan case chu chinfel a ni tawh mai dawn a"

"Rina, a thurual pui chu ramhuai a nih thu a sawi ve bawk kha, ka nuih a ti za lek lek thei hial mai. Tualthattu ka hriat tawhah ala danglam ber mai awm ma nge"

"sir, ka ngaihdan chuan a inzep mai mai niin ka hria, han dawp deuh ila a sawichhuak em em ang"

"Ni e rina, a thurual pui hi tunge anih hriat chu tuna kan hmabak ni ta chu ani mai a, ti rawh i han dawp dawn chhin teh ang"

"Arem, i thurualpui chu tunge tha takin sawi la engtin mah i awm lovang, jail ah pawh i tang lovang" chutah chhunzawm lehin "Arem, tunah chuan engkim i inpuang vek ta sa sa, i thurualpui chu tunge anih sawi law law rawh, engtin mah kan tilo ang a ni pawh, tha deuhin sawi la, kan pu te hnenah kan lo sawi ang a, an ngaidam thei hrim hrim ang che"

Arema pawh chuan a thurualpuui chu tunge anih hriattum ni awm tak hian a han ngaihtuah vang vang a, chutah hrechhuak ta ni awm tak hian "awle ka pu, ka thurual pui chu kan veng a mi, saw lai deuhah sawn an In chu a awm, a hming chu samuela a ni e" "awle a tha e, rinpui, samuela chu a rang a rang in va hnukchhuak nghal ru"

"aw le sir"

"Kal mai mai rawh, eng kim hriat a ni vek tawh, engmah sawi buai lo khan tha takin kal mai mai rawh" Rinpuia te chuan samuela chu an rawn chhawm phei hnak hnak reng a, Samuela chhungte pawh chuan thil awmzia hriat tumin an rawn zui ve bawk a.

"Enge thil awmzia hi inspector, thil hriat sual a awm a ni"

"Nilo ve ka pi, samuela leh Arema te inthurual hian Johny-a an that a, inawkhlum ang a lan tirin an suahsual rawng an bawl a ni, mahse tunah chuan engkim Arema hian a puang vek tawh, engmah sawi buai tur a awm tawh lo.

Samuela chu pumraw lian lem lo tak, sam buk zet mai leh hnar zum rat mai, taksa ria cher lam hi a ni a, a hrilh a haiin a ngaihna a hre lo takzet. Police te chuan eng khaw sawi set set lovin tualthattu Arema leh samuela te chu tan in ah chuan an khung ta nghal a. Mitthi ta chhung te thinlung erawh a na tlang takzet, chutihrual chuan tualthattu Arema leh samuela chhungte pawh chuan hreawm ti tak chung chuan thupha an lo chawi ve malh malh reng bawk a.

Inspector remruata chu a office a dawhkan bawh chung chuan a ngaihtuahna chu a kal bing hle mai a, chutia tualthattu an han man chhuak thei ta chu lawmawm a ti hle mai a. A ngaihtuahna atanga harhchhuakin kawngkhar a a lam pan a rawn faifuk phei hlarh hlarh pah a thingpui no rawn chawi phei la la tu rinpuia lam ngaihven chuan a hawi chhuak thuai a, rinpuia chuan ngaihsam hmel zet hian, "kha le sir, i thingpui tur, i chau viau in ka ring, thingpui hi in la i zang hawk mai ang" inspector hmel rit zet mai leh hmuh nuam lo tak mai en ran chung chuan a han ti a.

"Rina ka lawm e, tunah chuan hei kum alo upa chho ve hret hret zel a, nang hi ka rinrawl ber ila ni dawn chauh niin a lang. Kei aiin i ngaihtuahna hi a chak zawkin thil i hmu fuh thiam ta zawk mah mai ka ti" nui var var chung chuan inspector chuan a han ti a, rinpuia chuan "a khai, chu zawng ni lul love sir, kei ve hi zawng i thil hmuhchhuah sa ring a lo invai vung ve mai chauh ka ni, min fak lutuk chuan min fak ar ek riau riau a nge" tiin a han nui ve var var a.

Rinpuia chuan "sir, tun tum chu i thil chhui dan chipchiar takin ka hriat ah ngei i pholang ve vek a, a hmawr bawkna a i hnuchhui dan i han sawifiah leh thin pawh kha a ngaihnawm in beng a fah thin viau asin, mahse hetia i hnu chhui dan i tarlang nghal zel erawh kei atan tak pawh a hrilhhai thlak loh in awm pawh a nuam deuh e, a hmawr bawkna han sawifiah leh thin kha chu engmah thil kalphung hre ve lem lo tan kha chuan a luhai thlakin a hrilhhaithlak duh thin khawp asin"

"Tunah chuan mitthi thlarau biakpawh rum rum a ngai lo hlauh zawk mai pawh a" tiin rinpuia chuan a thingpui in mek chu a han lem leh khalh khalh a. "Rina, heti zawng a thil kimchang ka hrilh fiah nghal vek duh nachhan che chu i hrilhhai hmel leh i mak ti hmel hmuh fo pawh hi kei atan tak pawh a nuam bik hauh lo a ni"

"Awle sir, ka hrethiam che alawm, tun hma a i ruahmanna pawh min hrilh ve ngai loh hun lai atang tawh khan hriatthiam mai che hi ka tan a tha tih ka hria alawm" tiin rinpuia chuan ngaihsan hmel tak chuan a pu chu a en vang vang a.

Inspector chuan thil tam tak a ngaihtuah a ni. A mit chu a chhing vang vang reng a, a khat tawk chuan thawk chu a la leh halh thin bawk. Chutah, mitthi ta Johny-a kuta lehkhathem chu uluk leh chik zet hian a han bih nawn leh ta ngat ngat a. Chutah, rinpuia chuan inspector ruata chu lo tibuai in "sir, ka kal dawn, tunkar chhung chu ka chawl thei ang maw?"

"Aw rina, i duh phawt chuan i chawl thei, tun kar chhung na na na chu hahdam takin i chhung te kiangah hun i hmang dawn nia, nuam deuh in aw" a pu thusawi avanga lawm tih hriat tak chuan rinpuia chuan a ke chu a kheng auh a "aw le sir, ka lawm lutuk e, ka kal a nia" tiin inspector office chu a chhuahsan ta a.

Rinpuia chuan thui ala kal hma chuan joela chu a tawk a, chuveleh inti thei fe hian joela hnenah chuan "joel, mangtha rih phawt u" tiin joela chu a nuih var var a, joela chuan "nang hi, enge maw i hriat le! i va hlim hmel ve"

"joel, hlimna chhan tur tha tak ka nei alawm. Engvang teh lul in nge kei hi ka hlim loh ang ni" Joela chuan rinpuia thusawi awmzia chu man thiam in "nang hi, sir in chawlh a pe bik che a ni maw? I hlim em em danah hian, i hmelah a langchhuak vek alawm"

"Chu chiah joel, thil han chhui vel pawh i ti mi dawn riau mai. Sir hnenah khan keimah min thik thu kam khat pawh sawi reng reng suh aw" "nang a pawh chu ka rilru hria ni awm hrim a, tak tak in a rina, nuam deuh in le" tiin joela chuan rinpuia chu chibai a han buk a.

"Nilo"

Mangang tak mai aw ani. Rinpuia chu a ding chawt a, rang fe hian a kalsan tak inspector ruata office lam chu a leh hawi nghal thuai a, Chuveleh rinpuia chuan joela hnenah chuan "chu, eng thawm nge joel, ilo hria em?" Joela chuan a lu chu alo bu nghat a, "inspector office atangin a niin ka hria" alo ti thuai a.

"Nilo, a ni thei lo, rina, rinpui" Chuveleh rinpuia chuan hmanhmawh fe hian inspector awmna lam chu a pan nghal thuai a. Inspector ruata chu a office chhungah chuan alo vei tawn sek reng mai a, a khat tawk chuan "nilo, ka ring lo reng a ni. A nu leh pate thusawi kha a dik ngei ang" tiin a lu chu a han tuai leh puat puat thin a.

"Sir enge ni ta?" Hmanhmawh zet hian rinpuia chu inspector office ah chuan a rawn tleh lut nghal rawk rawk mai, "sir enge ni ta?" Inspector chuan thutak fe hian "rina, Arema kha tualthattu a nilo, tualthattu chu Arema a ni thei lo" a ngaihna hre lo zet hian rinpuia chuan "sir, eng thu nge i sawi tak mai le!"

"A rang a rangin Arema leh samuela te kha ka hnenah han hruai vat teh u" Rinpuia chuan thu tui tam vak a sawt dawn lo tih hria in "awle sir, ka rawn hruai nghal ang"

Inspector chuan a hma a tualthattu ni a an lo ngaih mi pahnih chu uluk fe a en vang vang in, chutah dawhkan a tui chu a han lem pawp pawp a, Chutah rinpuia hnenah chuan "rina, lehkhapuan leh pen kha Samuela hi han pe teh"

"aw le sir" rinpuia chuan lehkhapuan leh pen chu samuela chu a han pe thuai a, chutah inspector chuan "khai le, Samuel ka sawi ang in ilo ziak zel ang" Samuela chuan aw ka dam diai hian "awle ka pu"

Inspector chuan mithhi ta Johny-a lehkhathem ken a thu inziak chu a han chhiar a, Samuela chuan alo ziak zel a, Chutah inspector chuan Samuela kutziak chu mitthi ta Johny-a kut a lehkhathem nen chuan a han bih tawn ta ngat ngat mai a, Chutah muang chang a hawi chhuak in samuela hnenah chuan "Samuel, he lehkha hi i kutziak a ni em?" Samuel chuan lehkha a thu inziak chu en in "aih, nilo sir, hetiang in ka kutziak a awm ngailo" Inspector chuan "chu chiah, rina, he lehkhathem a thuziak tu hi tunge anih i hre duh em?" A han tih zawm zat a.

Rinpuia chuan "sir, a ziaktu chu Arema hi ani lawm ni?, han en mai pawh khan Arema kutziak nen hian in an na lai tam tak a nei a ni lawm ni?

"Rina, in an na lai neih ringawt chu alo tawk hauh lo. Uluk tak leh chik taka kan khaikhin phawt a tul a ni. He lehkhathem a thuziak tu chu tu dang an nilo, Danny-a ni. Kha, Johny-a putea, Johny-a nu zuali nau Danny-a ngei kha a ni" Rinpuia leh midang chu mak tiin an meng kawk kawk a, Chutah inspector bawk chuan a lu chu han tuai nawk nawk in "engtin nge khatih lai khan ka lo hriatchhuah theih loh le, rina, i pu thluak leh hriat theihna hian hniam lam a pan mek zel chu anih hi"

Rinpuia chuan hrilhhai fe chung chuan "sir, Danny-a kutziak a ni tih chu engtin nge i finfiah ang?" alo ti a, Chuveleh inspector chuan "rina, chu zawng nakinah le, tunah chuan kan thian te pahnih Arema leh samuela te hi thil zawh lawk ka duh a ni. Arem, Johny-a i thah lai hian lu hai avangin i tlu thelh nghe nghe ani tiraw?" Chuveleh rinpuia chuan inspector awmdan avang chuan mak alo ti hle mai a, Arema chu tualthattu anilo tih a sawi zo chauh si a, chutia tualthattu ang mai a thil a han zawt leh vel chu a ngaihna a hrethiam lo kher mai.

Arema chuan chiang lo ruai hian "aa, sir, chu chu engtin nge i hriat theih? Johny-a ka thah lai khan ka lu kha chu a hai in a na khawp mai" Chuveleh inspector chuan a lu chu a bu nghauh nghauh a, "Arem, dawt ka hrilh che anih kha, Johny-a i that reng reng lo, chuan i lu pawh a hai reng reng lo"

Inspector awmdan avang chuan rinpuia chuan a ngaihna a hre lo takzet.

Chutah, inspector vek chuan "Johny-a rûang in sawngbawl lai khan in bulah mi tu emaw lo awm reng ta se, chuan i chet lak dan leh i khawsak dan i sawi zawng zawng kha dawt vek lo ni ta se" Chuveleh Arema chuan harhchhuak thut ni awm fahran hian "sir, ka tih a nilo, Johny-a hi ka that lo, chutiang in ka awm lo hrim hrim, khami zan khan ka rui takzet a ni. Kan kawmthlang a In ruak pakhatah khan ganja leh damdawi kha ka rui ngei mai, mahse a hnu leh a thil thleng engmah ka hrechhuak zo tawh lo a ni"

"Awle Arem, Johny-a chu a ngawngah a shawl bah in i rek ka tih kha dawt vek a ni, Johny-a rek tu chu midang an ni. kawr ruam lam panin i hnuk thla ka tih pawh kha dawt vek a ni. Johny-a rûang kawr ruam lama hnuk thla tu chu mi dang an ni"

"Nang chuan Ka thusawi zul zuiin i tih ah i pawm mai chauh zawk a ni. Ka sawi dan ang apiangin i tih anih thu i sawi chhawng mai mai ani. Khami zan a i awmdan dik tak kha uluk takin han ngaihtuah kir leh la hriatchhuah han tum teh le"

Arema chuan uluk fe hian a han ngaihtuah let leh dauh dauh a, chutah muang chang hian "sir, kan In thlang a In ruak pakhat a ganja leh damdawi ka ruih hnu khan engmah ka hre zui lo a, mahse mak tak maiin ka mi huat em em thin johnnya chu ka lo that ani. Mahse ka harhchhuak zawk a, ka mutna ngaiah ka lo la mu a, ka rui kha ka lo muhil ani ngei ang. Johnnya kha ka lo that tak Tak nge ni a ka mumang mai zawk tih kha ka Chiang ngam ta lo ani.

"Ka thah ani emaw nilo emaw, Johny-a ka huatna leh ka ngeina hi chu ala ngai reng. A thi erawh a chhungte leh thenrual te tan a pawi, mahse sir, he tualthihna hi keima tih ngei ni a inhriatna hi ka nei tlat a ni. Keima thil tih ngei a nilo anih chuan a pawi takzet zawk ang"

"A tha e, i thusawi chu a dik. Amaherawhchu, Johny-a tualthihna ah hian inhnamhnawihna i neih ka ring lo. A maw i intih vang vek a ni. I ruih vang pawh chu ani ngei ang, rilru leh thluak lam harsatna i neih vang pawh chu ani ang"

Rinpuia chuan chang zet hian "mahse sir, rilru lam doctor kan nih loh hi, hemi te lo tu dang nge ni chuang ang? an inpuang vek tawh a, chu bak bak"

"Rina, dawhthei tak in le" tiin phone chu a chuh nghal thuai a, "aw hello, Freddy keimah remruata ka ni e, i hman chuan helamah, station lam ah kan va mamawh che ve. Rawn lang phei lawk teh" lehlam atang chuan "e khai aw! Chu, ka thianpa meuh in min mamawh anih chuan ka thawhchhuah nghal ngei a ngai anih chu, awle, awle, nang ni meuh in min mamawh te chuan ka rawn tek phei nghal thuai ang e"

"awle a lawmawm viau ang" phone chu a dah a, lehkhathem bawk chu a han bih leh ngat ngat a, a ngaihdan chu a dik ngei ani tih hriatthiam theih tur chuan a lu chu a bu nghat nghat reng a.

"Rina, Johny-a nu kha phone la, Arema nu leh a pa phone bawk la, Samuela chhungte phone bawk rawh, a rang lamin he lamah rawn tleh khawm hlawm teh se"

"Aw le sir, ka phone nghal a nge"

Inspector office ah chuan mi pakhat, vun ngo lam deuh, ama tawkah pumraw lian leh taksa inphut mawi tak mai, kum 40 atanga kum 45 inkar tur hi a rawn pen lut ta thauh thauh mai. Chuveleh inspector chuan "e khai, Freddy, a hun takah i rawn thleng a ni. Rinpui, Arem, Samuel, Freddy-a hi ka thian tha tak a ni a, rilru lam a mithiam a nih hi. Rina, hei kan inleng doctor Freddy-a hian Arema hi han kawmin a damdawi hmanrua velin a han enfiah dawn a, hemi ka office ep a room ah sawn va hruai ta che, Freddy-a leh Arema te hi an inkawm dawn a ni"

"Awle sir, kal ru doctor, Arem, min rawn zui ru"

Hun engemaw ti chen a liam hnu chuan Johny-a nu zuali leh Arema nu leh pa, samuela chhung te nen chuan inspector office chu an rawn thleng khawm ta a, inspector chuan ding meuhin a inleng te chu alo chhawn nghal thuai a, inspector chuan inthiam lo fe chung chuan "pi leh pu duh tak te u, thil hriat sual lian tak a awm a ni. Chumi avanga hetia han ko khawm nghal chung chung che u hi ka ni a, a hmasa in thil hriatsualah in mi hriatthiamna leh in mi ngaihdamna ka dil hmasa duh che u a ni"

"Arema leh samuela te hi tualthattu an nilo tih hi ka sawi duh a ni. A chhan chu Arema hi rilru lam natna nei a nih vang a ni. Kawng engkimah amah a inngaihbel a, amah a inpuh a, a thil tih ni ngeiin a hria a, a inpuang ta mai chauh zawk a ni. Ni e, a inpuanna kha kan hre vek ang a, amah kan dawpna lamah kei chuan Johny-a chu a shawl a a reh hlum dan te, kawr ruam a a hnuh thlak dan te, amah lo puitu nen a thing zar a Johny-a rûang chu an khai tak dan te leh phone a an inbiakna zawng zawng an thai bo zui thu te ka sawi anih kha,

"khami ka sawi dan zul zuiin Arema chuan a thil tih anih thu a sawi mai ani, tin amah ngeiin a sawi danin a mumangah johnnya chu alo that niin a sawi a, chumi avang a ama thil tih ni a ngai mai ani.

"Tin, pressure pek a dawl lo a, dawp a dawl lo. Ka sawi zul zuiin a tih a nih thu a sawi ta mai mai a, kei chuan a thurualpui chu tunge anih ka hre hauh lo a, ka sawi lang lo bawk a, amah ngei chu sawi turin kan tur a, pressure kan pe leh chiah a, chutah samuela anih thu a sawi ve leh mai bawk a, mahse kan dawp vang leh pressure kan pek vang mai ani. Mahse, Samuela hi pumraw lian alo ni hauh lo tih hi tun hnu hian ka hrechhuak leh hnuhnawh a, thahrui han nei viau turah ruat chi lah a ni lo. Mahse Johny-a thattu te zinga pakhat zawk hi chu pumraw lian leh thahrui ngah tak erawh a ni ngei ani tih hi ka dinna erawh ala ni zel tho"

"Tin, Arema natna hi rilru leh ngaihtuahna lam thil ani a, chumi bakah ruihhlo alo khawih lehzel si nen, thu chiang tak leh thu bulbal nei lovin ama thil tih angah a inngai ka ti dawn nge keimahni zawkin ama thil tihah kan ngaih tir ka ti zawk dawn ni. A nu leh pa, pu Rinliana leh pi Ruati te thusawi kha a dik a ni"

"Arema hi a ngaihtuahna leh a rilru hi a dam lo takzet a ni. A thusawi reng reng hi rin tlak a awm lo. Tin, amah rinhlelhna dang leh chu lehkhathem a thuziak leh Arema kutziak in ang lai a kha a ni a, hei ngun tak in han khaikhin dun mah teh u, Johny a'n a kut a lehkhathem a ken a 'L' a ziah dan leh Arema kutziak a 'L' hi uluk deuh a en chuan a in ang lo, Arema hi chuan a kutziak hi a uluk lo hle, hawrawppui hmanna tur leh kar awl dahna tur ah kar awl a dah lo fo a, mahse pakhat zawkah erawh hi chuan uluk taka kutziak a ni tih hriat theihna turin panctuation ah a fimkhur em em a, tih dik lohna lai a awm lo"

"Mahse, hetia han bih thuak hi chuan hawrawp an ziah awn dan leh hawrawp mal an ziah len dan in ang tak avang hi chuan kutziak thuhmun ni a han rin mai pawh thil awl tak a ni. Kei ngei pawh hian ka lo chik famkim lo a ni. Ka tihpalh liau liau a ni"

"Tin, Johny a'n lehkhathem a kut a a ken a thuziak hi khami zan, Pathianni zan mai a kutziak kha a ni thei lo, a hlui tawhin a ziahna pawh a rei tawh a ni tih lehkhapuan awmdanah hian a hriat"

"Ka pu, eng ber nge thil awmzia chu ni ta a? Arema leh samuela te an nih tak silohah chuan tunge ni ta ang?" Hrilhhai zet chung chuan Zuali chuan alo ti a.

Chuveleh inspector chuan awlsam fe hian "Ka pi, chu zawng hriat sa ani tawh ah ngai ang. He lehkhathem a thuziak hi Danny-a, Johny-a putea ziah ani"

Chu laia awm te chu an thum hak a, mak tiin an meng bial kaw kaw hlawm a. Zuali chuan hrilhhai fe hian "ka pu, ka nau Danny-a chu ka fapa thihna ah hian a inhnamhnawih i tihna em ni?" Inspector chuan "chu zawng pi zual, kan la hria ang chu, alo inhnamhnawih reng em tih chu a lang thuai dawn a ni"

Doctor Freddy-a leh Arema te chu joela chuan a rawn chhawm lut ta hnak hnak a, chu lai hmun a mite chu mak tiin a ngaihna an hrethiam mai lo, chu chu hria in inspector chuan "pi leh pu te u, a ni hi ka thian tha tak Freddy-a anih hi, a ni hi rilru lam doctor a ni a, Arema nihna, a awmdan leh a khawsa zia te chu ani hian min hrilhfiah sak dawn a ni. Awle Freddy, Arema chu tunge anih min han hrilhfiah sak ta che"

Freddy-a chuan a kâwr hma chu han siam rem in a aw chu a han thian kharh kharh a, chutah amah en thap tu te lam chu hawiin "Arema natna ang chi hi chu rilru leh thluak buaina chi khat a ni a, a medical term ang zawng chuan, stress, anxiety, depression, heng trauma kan tih ang chi pawh hi a tel nawk mai, hetiang natna hi natna tlanglawn tak a ni mek a ni, mahse enkawlna tha an hmuh loh chuan nunna hial pawhin a tuar ve thei a ni"

Inspector chu alo bu nghat nghat a, doctor chuan chhunzawmin, "hetiang natna nei te hi a tlangpuiin hmeichhia hi an ni duh chawk a, mahse mipa ah hian za a 70 zet in a thawk na tlangpui. Arema pawh hi hetia pangngai tak ang a a lanna phenah hian a buai ru tak zet a ni, enkawlna tha a dawng lo tih a hriat a, he natna hi a lanchhuah tawh hi chuan mahni insitna, inhmuhhniamna, mahni inhuatna, kawng engkim a mahni tling lova inhriatna, thinurna leh huatna an pai a, rilru leh ngaihtuahna buai niin hmuh theih leh hriat theihin a langchhuak thin a ni"

Chu lai hmun a awm te chu an thaw huai thei hial mai. Rinliana chuan doctor hnenah chuan "anih chuan doctor, tunah hian ka fapa hi tualthattu a rinhlelh a ni si a, engtin nge chu chu a dik lo tih kan finfiah theih ang. Ama tih ni miah lo pawh a tih ang in a sawi mai si a, a tih a nilo tih lai a chu finfiah ka duh tak zet a ni"

Doctor chuan Rinliana hnenah chuan "ka pu, i fapa hriselna hi uluk taka enkawl hmasak a ngai a ni. A natna hian zia awm lam a pan emaw a dam thei hlauh anih phei chuan mi pangngai rilru leh ngaihtuahna a nei let leh a nga, a ruih lai a a thil tih te pawh a hrechhuak leh a nga, a thil theihnghilh te pawh a hrechhuak leh a nga, mangchhia in a tihbuai lo bawk ang"

"Awle Freddy, he lam min rawn buai pui a ka lawm e, chuan Arema ngei pawh hi amah enkawl turin ka thian pa Freddy-a ngei hi ni thei se ka duh pui khawp mai che u" Rinliana pawh chuan aw ka dam thluam hian "pu inspector, i thusawi zawng zawng te leh doctor thusawi zawng zawng, kan fapa awmdan tur zawng zawng te kha thil thlen dan dik tak vek an ni. Mama kan buaipui dan zawng zawng te leh tun hma atang tawh a mama harsatna a ni a, rilru lam doctor pawh kan rawn ngun viau, damdawi an lo chawh a, a ei lai chuan a zia ve viau thin, mama pawh ruihhlo i khawih tawh lovang"

"Ni e mama, i nu leh i pa thusawi hi uluk deuhin ngaihtuah rawh, kan thusawi i awih a ngai a nia" Arema chuan hnuai lam chu la bih ngat rengin "ka hria alawm ka nu, kei pawhin nghei ka duh lutuk alawm" "Awle a tha vek e, thil tihsual lian tak avangin thupha ka han chawi nawn leh ni se" inspector in a rawn tih tak ah chuan midang ho pawh chuan "e khai, he tualthattu hi man ngei teh u pu inspector, in chungah rinna kan nghat a nia, mama te pawh a tul anih chuan thu zawh fiah theih turin an la awm zel ang, he tiang tualthahna a inhnamhnawih ho hi chu lung in ah an dam chhung in khung an him a nia" samuela pa lianzuala pawh chuan alo ti ve a.

Nakin deuhah chuan mitthi ta Johny-a nu zuali chuan inspector hnenah chuan "ka pu, engtia hma han lak tur nge ni ta ang le? ka nau Danny-a chu thu zawhfiah tur tihna nge engtia han tih chi nge ni ang?" a han ti a, a hmelah chuan a phur tawh hlawl lo tih a lang. Inspector chuan "ka pi, lungngai reng reng suh, he lehkhathem hi a neitu diktak chu tunge anih kan hre tawh a, kawng pawh a hnim lutuk tawh love" chuveleh zuali chuan "ka pu, i ti tak tak em ni? Danny-a chu a ni ngei tih i chiang a maw?"

"Ka pi, i nau Danny-a kha he lehkhathem neitu diktak hi ani" Zuali chu mak tiin a meng zau kawk kawk a, "ka duh thei lo lalpa! Ava rapthlak em!

"Ka pi, engmah hlauhthawnna tur a awm lo. Khami ni, Arema chungchang a min biak in duh thu min rawn hrilh tum a i nau Danny-a te In a Arema chungchang sawi a hun kan hman tum khan In chhung ka rawn lut chiah kha thutkhawmna pindan lamah nang chuan min lo hui a nih kha"

"khami tum khan Danny-a khan kohhran thil ni a sawiin thil alo ziak mawlh mawlh anih kha, ngun tak leh uluk tak in Danny-a thil ziak kha ka en a kohhran lam thil ngei a ni tih pawh ka hria, hei hi ka sawi ta fo mai, ka hriatrengna leh ka mit fim tak thin hi tunah zawng engmah lo mai an ni chho dawn tan niin ka hria, Danny-a kutziak kha ka hmu chiang hle si a, engtin nge lehkhathem a thuziak nen a in ang tih ka lo hriat fuh loh theih zawk ni. Vawiin ni chawhma lam khan ka hrechhuak chauh a ni, lehkhathem neitu diktak chu Danny-a hi a ni tih hi. Chuvang chu a nia he lai a rawn tleh phei vat tur a ka rawn hrilh tak che u ni"

"Tichuan Arema leh samuela chungchang ka ngaihtuah a, thu pawh ka zawt nawn leh thlap, mahse chutah chiah chuan ka hriatna hi thlit fim in a rawn awm leh tan ta a ni. Arema leh samuela chu tualthattu an ni lo tih ka hrethiam zel a, tualthattu thurualpui kha chu pumraw lian leh tharum ngah tak a ni, tin arema lah hi chutiang a pumraw Lian alo ni bik lo lehzel a. Tun a kan tan a pawimawh ber zawk chu Danny-a chu a ni phawt"

Chuveleh zuali pawh chuan "lalpa leh! Thil mak tak a ni"

"Awle ka pi, in duh chuan in tin thei tawh ang, Arema leh samuela te pawh chhuah leh nghal an ni e, a bik in Arema phei kha chu enkawlna uluk tak leh tha tak a mamawh a nia"

"Awle inspector, kan fapa chuan enkawlna tha ber a dawng ngei ang, a damchhuah hunah engkim a hre leh a nga, khami zan a a hun hman dan zawng zawng a sawi leh thei ngei ang"

"Awle awle, ka pi, naktuk lam hian Danny-a chu in awmna lamah ngei thu zawtfiah turin kan rawn thang leh dawn a nia"