LEHKHA THEM_Chapter-4

[April Hmar Liverpool]

LEHKHATHEM

Ziaktu, Laltanpuia


Chapter _4




Danny-a chuan a inleng te chu alo dawngsawng tha viau mai, inspector hmuh dan chuan Danny-a chu mi lu zo leh mi hawihhhawm tak, ama tawka mi fel pangngai tak a ni a, "ka pu helam ah aw, lo thu ru, hei ka u zuali hian min lo hrilh tawh a" inspector chuan Danny-a chu uluk taka en in a khawsa zia leh a tawngkam hman dan te, a hawiher hrim hrim ah chuan Johny-a thihna a han inhnamhnawi chi a nih a ring thei lo.




Chutah, Danny-a hnenah chuan "Danny, i nau Johny-a nen hian in inzui nasa ve thin hle tih ka lo hria a, a dik em?"


"Aw sir, a dik alawm, a putea ka nih avang hian kawng tam takah kan inzui in kan intawiawm tawn ve thin a" inspector chuan a lu bu nghat nghat in "awle a tha e, i nau chungchang a sawi tur i neih te min han hrilh ta che"




Danny-a chuan inringtawk tih hriat tak hian "sir, ka nau hetia a han boral mai hi awih har ka tiin ka tuar takzet a ni tih hi a hmasa in min hriat sak ula, tin amah hi hetia mahni nunna han la duh tur khawp a beidawnna nei niin ka hre lo"




"A kum te a la nau a, mahni nunna em han la duh tur chu a nilo, mi hlim thei tak leh fiamthu duh ve thin tak a ni a, thian ngaina mi a ni a, engemaw chang a lungngaihna leh rilru hahna alo neih ve chang pawh hian min hrilh ve thlap thin, kei chuan ka theihtawp in ka tanpui ve thin a ni"




Inspector chuan uluk tak hian Danny-a thusawi chu alo ngai thla a, chutah Danny-a chu ngun taka en in "Danny, he lehkhathem hi ngun takin han en la, i kutziak ngei a ni tih i pawm a ngem le?" A han ti ta a, Lehkhathem chu a pe a,


Danny-a pawh chuan lehkhathem a thuziak chu ngun zet hian a han en a, mak a ti in ama kutziak ngei chu ni chuan a hria, Chutah inspector chuan lehkhapuan leh pen chu pe in "Danny, hei hi ka sawi ang a ilo ziak chhawng dawn nia" tiin lehkhathem a thuziak chu a han chhiar a, Danny-a pawh chuan inspector sawi ang zel chuan alo ziak ve a, Chuveleh Danny-a kutziak leh lehkhathem a thuziak chu uluk fe a han khaikhin in Danny-a kutziak leh lehkhathem a kutziak kal hmang chu a lo in ang ta chiah mai reng a.




Character mal 'L' an ziah dan leh 'Ng' an ziah dan te, ziah zawm tur an ziah zawm dan te, a kar awl an dah dan thlengin alo in ang ta chiah reng a, Chutah meuh zawng Danny-a lakah chuan midang mit chu a fu ta thap mai. Danny-a ngei pawh chuan mak a tih hmel in han sawi mai tur chu a haihchham hle a.




Engemaw chen chu thawm a reh vang vang a, chutah inspector chuan a aw chu han thian kharh kharh in "pu te u, Danny-a hi Arema dinhmun ang chiahah a ding mek a ni. Mahse, kei hian thil tihsual nawn tawh loh ka duh a ni. Danny, Johny-a kha i thah em ni?" Thawm chu a reh kher mai. Danny-a chuan ngun zet a in ngaihtuah in, chutah a aw chu a han thian a, "aih, ka thah a ni lo tih hi Pathian hming chhal in ka sawi ngam" Chuveleh inspector chuan "i sawi dik, Pathian hming chhal kher lo mah la thudik a ni, Johny-a i that reng reng lo"




Zuali chu alo thaw huai a, inspector hnenah chuan "ka pu, engtia hmalak zel chi nge ni ta ang? Danny-a kutziak ngei chu ka fapa thattu chuan a nei thei tihna ani ta mai a, engtia nei thei nge anih tak ang?" Inspector chuan a mit chu chhing vang vang in boruak chu a hip lut vang vang a, chutah chang zet hian "imm, he tualthattu hi mi fing kherkhiap tak a ni. Heng zawng zawng hi a ruahmanna vek a ni. Mahse, he misualpa hian kei hi min tibuai lo tawp ang, he a ruahmanna kherkhiap tak hi ka hlip a nga lung In ah ka khung khawp ang, Danny, hetiang lam hawi thu leh hla ah hian kutziak dahthat i nei em? He lehkhathem a thuziak ang chi poetry lam hawi thuziak dahthat i nei em?"




Danny-a chuan ngun taka a ngaihtuah na hmang in "aw sir, poetry hi ka tui ve thin alawm, hetiang lam hawi thuziak chu ka kawl ve nual mai" "Awle Danny, chung i kutziak dahthat ho chu han la ta che"


"Awle sir, ka han la a nge" tiin Danny-a chuan pindan lam chu a pan thuai a.




Zuali chuan "ka pu, he lehkhathem a thuziak awmzia atang kha chuan arema kha a awm ang berin a lang a" alo ti a, inspector chuan "imm, i sawi chu a dik alawm pi zual, mahse he thuziak awmzia ah hian arema chauh nilo midang awm an awm ani, A hun kal tawh a a inchhir thu te, a hun kal tawh a mi pawi alo sawi tawh thu te a ni a, tu emaw, a pawi alo sawi tawh thin a ngei chuan he thuziak awmze nei tak hi a hmang tangkai a ni.


"Danny-a ringhlel dawn chhin ta ila, Danny-a lak ah hian mawi lo tak leh a pawisawi zawngin Johny-a chu alo awm ve tawh thin a, chuvang chuan Danny-a chuan Johny-a thu hnuhnung tur chu ziak in a that ta a, lehkha chu a ken tir ta ni a ngaih theih a ni ang. Chu chu tuna thil awmdan chu a ni. Hei danny-a kutziak ngei chu alo ni ta si a, Mahse, Danny-a ber chu tualthattu alo nilo leh a, danny-a hi tal awh tir an tum tihna ani maithei, Danny-a hrechiang tu, a kutziak thenkhat pawh a duh chuan la ru thei tu, tu emaw tak thil tih a ni tihna a ni mai, Danny-a kutziak chu a hmang tangkai ta hlauh tihna anih chu"




"Tualthattu pa hun kal tawhah chuan Johny a'n tualthattu pa pawi chu alo khawihin a tana hnawk sak in alo khawsa ve tawh thin a, tichuan tualthattu pa chuan phuba lak a tum ta a, hun rei tak liam tawhah daih khan ruahmanna a siam vek tawh a ni, tichuan Danny-a kutziak pakhat chu a hmu fuh hlauh a kei pawh in hmanni a Danny a'n kohhran thil buaipuia eng eng emaw alo ziak mawlh mawlh lai ka lo hmu fuh ang khan he tualthattu pa pawh hian Danny-a kutziak hi alo hmu fuh pawh a ni mah na, tichuan remchang a zawng ta a, Danny-a kutziak chu eng tin tin emaw la in tunah Johny-a a thah hnu hian Danny-a kutziak a ruk chhuah chu Johny-a rûang bulah a hnutchhiah ta a ni, tin kei niin kutziak chu danny-a kutziak anih miau avangin danny-a chu Kan ringhlel dawn ta ani"




"Lehkhathem a thuziak awmzia leh misualpa phuba hi alo inrem em em mai bawk nen. Tin, arema leh johnnya tun hma nun te pawh a hre vek a, arema ngei pawh hi johnnya thihna ah hian rinhlelhawm ani thei dawn tih pawh a hre vek, amaherawhchu tualthattu hian a lang sar chinah erawh johnnya thihna hi mahni intihhlumna ang a lan tir hmasak ber a tum thung. Chumi kal zelah chuan midang dang a kan Kai tir leh ta a, arema a ni a, tunah danny-a ani leh a.




Zuali leh chu lai hmun a awm te chuan inspector thusawi lai chu ngaihnawm ti tak hian an lo ngaithla thap reng a.




"Sir, heng ho hi ka thuziak ka dah that ho chu an nih hi, in enfiah duh em? Danny-a chuan a rawn ti a.


"Imm, ka lo enfiah a nge, rina min lo pui ta che, lehkhapuan phek tin ah khan pawhthlakna hnu a awm leh awm loh i han en chiang dawn teh ang"




Danny-a kutziak dahthat ho chu uluk tak chuan inspector leh rinpuia te chuan an han keu malh malh a, rinpuia chuan "imm, hetah chuan pawh thlakna hnu hma engmah a awm lo" inspector chuan "a dang pawh kha en zel ang" alo ti thuai a.




Chutia hun engemaw ti chen lehkhapuan an han enfiah malh malh hnu chuan rinpuia chuan "awle hei le! ka hmu ta e, sir hei en teh, a lai tak a mi phek pakhat chu ka hmu ta e" Chuveleh inspector chuan rang fe hian rinpuia kawhhmuh lai chu a han en thuai a, chu lehkhapuan phek leh lam leh lam, a inthenna lai tak a mi phek khat chu pawh thlakna hnu tih hriat tak hian a awm lova, Chuveleh chu lai hmun a awm te chu mak tiin an lo phawk kher mai.




Chutah, inspector chuan rinpuia hnenah Chuan "awle rina, a chhung thu kha han chhiar ta che, uluk tak in kei leh midang ho hian kan lo ngaithla a nge" a han ti a, chuveleh rinpuia pawh chuan thuziak chu a han chhiar dan dan a, a dawt leh chiah a a chhiar leh tur chu a kim lo lai kha niin inspector chuan lehkhathem a thuziak chu a han chhiar chhunzawm ve nghal zat a, lehkhapuan a rinpuia chhiar lai leh lehkhathem a thuziak inspector in alo chhiar zawm chu thu inla lawn tak leh inrem thlap alo ni ta chiah reng a, Chutah meuh zawng phat rual lohin Johny-a kut a lehkhathem lo awm chu Danny-a note bu a mi pawhthlak ngei a ni tih chu a chiang ta.




Chulai hmuna awm te chu an ngaihtuahna a vak thui tawh kher mai, zuali pasal chuan rilru nat hmel fe hian "e khai aw, a va pawi tak em! tu chu nge ni ang kan chhungkua a buaina thlen tu hi? Danny, i inleng te zingah tu emaw han rihlelh tur i hre lo em ni?" Chuveleh inspector chuan "chu chiah, he lehkhathem, Danny-a note bu atanga ru chhuak tu hi tunge anih tih lai a chu kan hmabak a ni, arema kha han rinhlel leh talh dawn ta ila, alo kal ngai em? Engtin nge i lehkha phek hi a neih theih ang? Thil theih ani em?"




Inspector thusawi chu ngaihven lo tih hriat tak hian Danny-a, zuali, an ni chhungkhat kual chu inrinhlelhna in an khat zo ta, a tu a te mai pawh chu an inhmuh dan a danglam nghal tih a hriat reng mai a.




Inspector chuan "Danny, in leng chuangkai i nei ngai em?" Danny chuan "sir, han rinhlelh mai tur ka va hre lo em, hetia kan unau te leh kan chhung khat kual lo chuang kai te hi an ni deuh mai a, a hranpa a in leng hi kan nei meuh lo, kan chhungkua hi kan chhhang chhe ve angreng a, in leng kan neih te pawh hi ka lo hrechiang vek bik tawh lo a ni"




"Naupang te hi an ni thei mai lo maw?" Danny chuan "ni e sir, chu pawh chu a ni ve thei tho, kan chhang chhia in kan buai ve thin hle a, ka lehkha pawimawh te pawh hi naupang ho hian an lo la chhuak ve fo mai, kan han dahtha leh mai thin bawk a, kei hi hetiang ang poetry kaihhnawih thuziak hi tun hnai hian ka ti meuh ta lo va, heng ka la dahthat te pawh hi ka ziahna an rei ve leh tawh, Ka bih lohna chin pawh ka hre tawh lo"




"Imm, chumi vang chu anih chiah dawn chu, naupang ten anlo la chuak ang a, chumi lai chuan in leng in nei a nga, in in leng pa chuan chhuat a note bu lo tla hnawk nuai chu en in phek khat a pawtthla ta a, tichuan chu in leng pa chuan ruahmanna neiin hun engemaw chen a liam leh hnu ah Johny-a chu a that ta a, i note bu a lehkha phek a pawhthlak chu Johny-a kutah Johny-a thu hnuhnung ang a lang turin a hnutchhiah ta a ni"




Rinpuia chuan beisei sang fe chung chuan "Mahse sir, engtin nge chu pa chu kan hriatchhuah ang a?" alo ti thuai a, inspector chuan "rina, dawhtheihna hi kan mamawh a nia" tiin thil enge maw ngaihtuah nei ni awm tak chuan a mit chu a chhing vang vang a, a kut chu a hum ngat ngat bawk. A changin harhchhuak thut ni awm tak chuan a han meu zau leh kawk thin a, a chang chuan a lu dawm in a han thaw halh halh a, dawhkan a tui inchhawp chu a lem leh pawp pawp thin bawk, chutia mi â ang mai a inspector a han awm takah chuan chu lai hmun a awm te pawh chuan a ngaihna an hriat loh hmel kher mai.




Inspector chu mi â ang mai a mak sak tak tak leh hriatthiam har tak tak a a khawsak hnu chuan mit meng fim zet hian a rawn pangngai chho tan ta a. Chutah aw ka dam thluam chung chuan, "imm, tunah meuh zawng ruahmanna tha tawk tak ka siam a tul a ni. He tualthattu hi a fing in mi hruai kawi dan a hnehsawh viau mai, mi fing kherkhiap leh fimkhur tak a ni ngat mai ka ti. A ruahmanna mai mai a ni. Engpawhnise, tun atan chuan duh tawk phawt rih ang, kan station lamah kan let leh vat a tul a ni. Misual chu tunge ni ang ti a kan buai chhung in misual Chuan a hnu thup bo dan alo dap ve zel ang, chuvang chuan ruahmanna ka siam a ngai ani, misual chu amah leh amah a rawn inlan dawn ani.


"Chuan Johny-a nu pi zuali kha a fal in titi pui che ka duh dawn a, kan station lam pan a chet kan thawh hma in engemaw sawi dun tur kan nei a ni. Midang zawng kha chuan min lo chhuahsan rih phawt ru, pi zuali, kei leh rinpuia, Danny-a te nen titi hona kan neih lawk a tul tlat mai" tiin a mit chu a chhing leh nghal vang vang a, Chuveleh midang ho pawh chuan inspector thusawi chu awih in inspector leh zuali te chu an tin san ta tliar tliar a.




Inspector chuan zuali chu ngun zet a melh vang vang in "ka pi, ka ruahmanna chu in hnenah hian ka sawi dawn a ni. He tualthattu fing kherkhiap tak mai hi reh fuh kan duh anih si chuan ka thusawi tur hi uluk takin chhinchhiah ula, i nau nen hian ka sawi ang chiah chiah in he lai ah hma in lo la dawn a ni, hemi bak hi chu tualthattu kan man chhuak tawh ngei ang"




"Awle inspector, enge i ruahmanna chu han sawi ta che"


"Danny, pi zual, ngun deuhin ngaithla ru, he laiah case hi tihtawp a ni tawh ang in thu in thehdarh ang, mipui lam in case tihtawp a ni tih thu hi an hre tur ani, in kalna apiangah, in awmna hmun apiang ah chu chu mi te hriat turin in sawi thin dawn nia, police ten misual chu an manchhuah theih loh thu hi in tlang au pui dawn ani.


"mahse a tak takah chuan case hi tihtawp ala nilo thung. Tin, case tihtawp ani tih in hrilh darh mek lai leh police te hlawhchhamna thu in au pui mek zel lai pawh chuan Danny-a lehkhaphek bo chungchang leh lehkhathem ru chhuak tu chungchang chu in vei in in enghelh em em reng tur a ni ang, engtik lai pawhin in chhungkhat kual mai nilo, in then leh rual te nen lam Danny-a note bu a lehkhapuan phek pawtthla tu chung chang chu sawi tui berah in nei tur a ni, police te beidawng mahse, lehkhapuan phek pawtthla tu chu tunge anih hriatchhuah ngei ngei chu in duh Zia in lantir reng ang, a rutu chu in thlithlai reng dawn tihna anih chu, thahnem ngai tak leh phur takin hma in la char char tur a ni"




"Awle ka pu, chu chu thil pawimawh ber pawh a ni reng a ni"


"Imm, pi zual, a tha lutuk tlat, nasa takin, thahnem ngai takin rukru pa chu zawn chhuah ngei in tum hle dawn nia, kei ni lam pawh biak pawh reng theihin kan awm a nga, chanchin thar hriattur a awm veleh kan inhrilh dawn nia"




"tehreng mai inspector"

"chuan ka pi, case tihtawp a ni tih kha mi zawng zawng in hria se ka duh aw, mahse case chu tihtawp tak tak erawh ala nilo tih an hre tel tur a nilo, hei hi ka ruahmanna chu ani. Case tihtawp a ni tak tak lo tih hria an awm vaih chuan kan misualpa chu kan man chhuak mai mai lo tawp ang. Tualthattu pa hi thlamuang tak leh engthawl taka kan awm tir a tul a ni, mahse nangmah ni lamin theihtawp chhuahin, mahni inbengvar ang a langin Danny-a note a lehkhapuan pawtthla tu erawh hmuhchhuah ngei in tum thung ang. A Chiang em?"


"Awle inspector, i remruatna ang zelin le"




Inspector remruata chu a office a thutna chair ah chuan rilru tih thawven tum tak leh ngaihsam hmel fe hian a thu awn diai a, a ke chu a phut dat dat reng bawk. Rinpuia chuan chutia a pu a nungchang inthlak ta deuh thut chu mak a ti ru hle a, a hma kha chuan thil engemaw ngaihtuah vung tak a neih loh vek pawh in mize thutak zet nen a inhmuam up hle thin kha a ni a, tunah meuh zawng mi dang ang hlauh a ni.




Chutah rinpuia chuan inspector kiang a thuthmun han rem ve in "sir, misual chu engtia han manchhuah chi nge ni dawn ni" a ti a, inspector chhanna erawh a hmu lo, amah rinpuia vek chuan "ka ngaihdan chuan Danny-a kha lo dawp ve chhin hrim hrim ila tha tur hi nia, Arema kan han dawp ang deuh khan" Chutah inspector chu za em em mai hian a nui chhuak ta hawk hawk mai a, inspector chuan, "i ti duh rina, Arema kha mi danglam tak zawng a ni, ka khawngaih ngawt zawk asin" a ti a, rinpuia chuan "ni e, nuih te pawh a nuihzatthlak zawk za mah mai, mi damlo kha tia kan lo dawp vak mai leh kan lo ti chi ai chiam mai kha chu a fuh chiah lo deuh a ni"




"Chu chiah rina, i ngaihdan chu ka tawm pui lutuk che, zah te pawh a zahthlak alawm le, ngaihtuah chet chet phei hi chuan nuih te hi a za lo thei lo" tiin inspector chu a nui var var reng mai. Rinpuia chuan "sir, kan chesual nawn tawh tur a nilo" Chuveleh inspector chuan "chu vang tak reng a, Danny-a pawh kha rinhlelh awm viau mahse ka nawr lui duh ta lo anih kha, tin Pathian hming meuh a chhhal ngam kha a ni a"




Rinpuia chuan ner deuh sawk chung chuan "sir, khawvelah hian engmah pawisak neilo hi an thahnem takzet asin, Danny-a kha a rinhlelhawm hle mai a, a finfiahna pawh kha a tha thawkhat in a rintlak thawkhat viauin ka hria, lehkhathem kha a note bu ngei a mi alo ni si a"




"chumi bakah he tualthattu hian Danny-a ang tho a Pathian hming a chhal mai hreh hi ka ring hauh lo, a himna tur anih dawn phawt chuan Pathian hming pawh a chhal mai hreh lo tawp ang, tual ber a that hreh lo ani si a"




"Chu zawng rina, thudik lo tawp anih chu, Danny-a hian inhnamhnawihna a neilo, rina thil awmzia hi ka man telh telh a ka nuih hi a za telh telh reng mai. A lo va han nikhua loh theih ngai ve le! A tirah khan thil awmzia chu man chhuak daih tawh tur ka ni asin maw le" inspector chu a nuih a za hle tih a hriat réng mai.


"Sir, enge i sawi awmzia? Eng chu nge i sawi tum ber ni a? Arema chungchang em ni?"




"Nilove rina, nia Arema pui roh pawh kha thil a ti khawlh kham zo vek, a inpuang kher kher khan keini chu zak takin min siam a ni, mahse dam lo a ni tih kan han chian tak hnu ah erawh thil awmzia kan han hre ta kha a ni a"




"Chuan engtin zel" rinpuia chuan alo ti vat a, chutah nuih kar kar pah chuan inspector chuan "engtin nge he thil hi ka lo hmuhchhuah vat loh ni aw a tir khan" a han ti a, "eng chungchang maw i sawi?" tiin rinpuia chuan inspector nui reng mai chu a melh ngar mai. "Rina, phone call alo thleng tep tawhin ka ring, pi zuali a ni ang aw, nang in ilo chhang mai dawn nia, misual pa hming pawh kei aiin hre hmasa zawk mai rawh" inspector chu ala nui kar kar reng a.




Rinpuia chuan "sir, i thusawi awmzia chu, pi zuali chuan misual an hriatchhuah tawh thu min rawn hrilh ang a, tichuan keiin ka lo hriat veleh nang aiin ka hre hmasa ta tihna ani dawn a niang maw?


Inspector chuan "He mihring hi a takah ngei ka hmachhawn hun chu a chak lo viau ang maw le, misual fing kherkhiap tak zawng a ni. Kei ni police te hi min hmusit ru viauin a nia ka rin ni" inspector chu a nui tawp hleithei meuh lo. "Sir, eng thil nge i hriat bik le aw" rinpuia chuan a ti a, inspector chuan nui var var pah chuan "engatinge a tir khan ka lo hriat loh theih le?" a han ti leh a, a nui zui hawk hawk reng mai.




Chutah, rinpuia hnenah chuan "rina, pi zuali'n alo call a nga ilo pick up dawn nia, engkim i hrethiam vek mai ang" Chumi rual chiah chuan dawhkan a phone chu a rawn ri ta ral ral mai. Chuveleh, rinpuia chuan uluk fe a phone chu la in "hello" inspector chu alo la nui var var reng mai. "Aw, awle, engtin maw? E khai aw, nia a ni thei reng tak a lawm maw le! A hma khan chutiang zawng chuan ngaihtuahna sen na chang kan lo hre lo a ni, aw pi zual, a pawi ka tih pui lutuk che, ni e, awle sir hi ka han hrilh hre ve nghal vat a nge" Phone chu a dah a, Chutah inspector hnenah chuan "sir, pi zuali chuan misual chungchang reng reng a sawi hauh lo"




Inspector chuan ngaihsam hmel zet chuan "rina, pi zuali chuan a fapa chu mahni intihlum ngei a nih a ring ve ta tihna a ni maw? chuan Danny-a lehkha phek pawtthla tu pawh kha tudang nilo in amah mitthi ta Johny-a ngei kha a ni tih thu vel a rawn hrilh che anih hmel" alo tih khalh zung zung a, rinpuia mak ti hmel chu a inthlak mai thei lo "sir, engtin nge chu thu chu pi zuali'n min hrilh dawn tih i hriat? Pi zuali thu min hrilh, ka hrilhchhawn hma hauh che in a chhanna i nei sa vek a maw? eng tia, engtin nge i hriat lawk vek theih?"


"Rinpui, thil awmzia ni a lang ta chu Kha lehkhathem, Danny-a note bu a mi kha midang pawtthla tu tu mah an awm lo, Danny-a kha Johny-a putea a nih kha ila hria a nga, amah ngei mitthi ta Johny-a ngei mai chu a putea te In ah a leng a, naupang ho in a pute Danny-a note bu an phawrhchhuah chu hmu in a la a, a phek lai tak a mi chu a pawtthla ta a, tichuan a intihhlum hma a a thu hnutchhiah a tan a hmang ta a ni. Johny-a chu thah a ni reng reng hleinem, mahni intihlum ngei a ni, a taksa ah hliam emaw kutthlakna hnu hma hmuh tur a awm hauh lo a, a hliam hmuh tur awm chhun chu a nghawng ah chauh a ni. Chu chu a inawhhlumna kha ani. An fapa chu thah niloin amah a inawkhlum ngei alo nih thu an rawn hrilh che anih ka ring"


Rinpuia chuan mak ti zet hian "sir, pi zuali tawng kha ilo hre phak ve hial zawk a nilo maw?




Inspector chuan "Ni e, a nu leh pate hriatpui hauh loh, a pute Danny-a ngei pawh in a a hriatpui hauh loh beidawnna nasa tak alo nei ru reng tawh a ni" thawm chu a reh vawng vawng mai, "mahse rina, chu chu thudik a nilo, misual pa lantir tum dan zawk ani.




Rinpuia chuan mak tih hmel zet hian "ehh, engtin maw sir"

Inspector chuan "A hmasa in Arema, pawi sawi lo chungah ka che nawi tawh a, tunah lah lehkhathem ru tu chungchangah kan buai leh a, mahse lehkhathem rutu chu tudang niloin mitthi ta Johny-a ngei niin a lang leh ta zel a, kawng hrang hrang atanga tualthahna a nih rinhlelhna zawng zawng chu a bo zo ta tihna anih chu, misual pa hian a thil tum hi a Chiang hle ani. Mahni intihlum ang a lantir hi puitlin tho tho a tum tih a ruahmanna ah hian a lang vek si a.


"Lehkhathem hmang hian min chawk buai nasa in tun thleng pawh a kan chai ho ber a ni a, arema a ni a, danny-a ani leh a, lehkhathem kan chhui tawpna pawh chu amah Johny-a tho a nih lehzel tak si ah chuan he case hi mahni intihhlumna ni ngei a lang in tihtawp mai hi a tul dawn ta ani . Mahse, heng zawng zawng hi misual pa awm ngaihna hriat loh lutuk vang mai mai ka tih kha, a ruahmanna vek, tin a tihsual pawi tak mai chu he lehkhathem hmang a min chawh buai a tum hi ani tih hi ka lan tir let dawn ani"




Rinpuia pawh chuan a pu chu hrehawm tihpui hmel zet hian "sir, kei a ngaihdanah chuan mahni intihlum ngei a ni tih a chiang thawkhat viau niin ka hria, thil dang han puh mawh leh tur chuang a awm ta lo niin ka hria, mahse nang chuan tualthahna ngei niin ila ngai tho tihna a ni maw? Tin, misual pa ruahmanna chungchang i sawi te chu a awmzia pawh ka man ve ta lo ve"


"Sir, i sawi awmzia ka man ve ta hauh lo" Rinpuia chuan inspector ruata chuan a ze ngai a chhuah leh tan tawh tih chu a man thiam vek. Inspector luhlul leh fing tak mai chu a thusawi awih sak loh ngawt a duh lo. "Sir, enge i sawi awmzia ni a? Tualthahna a ni tho i tihna em ni?"




"Aw ni e rina, hei hi tualthahna a ni. Engkim kha a kal dik vek. Misualpa ruahmanna char char a ni. Keini khan misualpa ruahmanna zel kha kan zawh famkim mai zawk a ni. Min chhaih kual hmasa te te phawt a ni. Tichuan a tawp a tawpah Johny-a chu mahni intihlum ngei ani tih min rin tir turin lehkhathem la tu chu amah Johny-a ngei a ni tih thu hi min hriattir leh mek a nih hi, tichuan a thil tih sual chu khuh bo a ni tawh ang. Mahse, mahse, hei hi thil awmzia ni a lang tam tak zing a thil nihna dik tak awm chhun chu a ni"




"Tualthattu pa chuan Johny-a chu hun rei tak chhung alo thlithlai tawh a, thah a tum ani. tichuan ama thil tihah chuan midang buaina turin plan a siam ta a, arema chu johnnya nen an nun hlui avangin johnnya that tu ani thei ani tih lan nan kha lehkhathem kha a hmang ta a, mahni inthiam lohna leh inchhirna lam hawi thu kha a hmang ta a, tu pawi nge alo sawi ang ti a kan ngaihtuahna min hruai pen sak hnuah arema chu a langsar ber dawn ta ani. Mahse chu mai chu ala nilo,


"Lehkhathem a kutziak kha arema kutziak a nilo tih hriatchhuah a ni maithei a, tu kutziak nge anih tih hriatchhuah hun a awm maithei, chumi hunah chuan kutziak mai nilo lehkhathem chu danny-a lehkhaphek atang a pawhthlak ani tih hriatchhuah ani leh dawn ani. Danny-a a buai veleh phawt.


"Mahse lehkhathem chu danny-a chuan Pathian hming chhal meuhin a hnutchhiah anih loh thu a sawi ngam si a, mahse ama lehkhaphek atang ngei a pawhthlak erawh ani tih a pha bik lo ang,


"Tu chu nge johnnya that a, danny-a lehkhathem chu pawtthla a johnnya'n a thu hnuhnung hnutchhiah ang a lantir tum tu chu ni ta ang, arema leh danny-a min rinhlelh tir hmasa zet a, a thil tih man chu a hmu ve tawh tur ani Tiin lehkha pawtthla tu chu chhui ani dawn ta a. Mahse lehkha pawtthla tu chu tu dang niloin amah inawkhlum ta johnnya ngei chu ani ang a tih ngaihdan chu a lo piang leh ta a, chuti anih si chuan a tan tir a a landan, mahni intihlum ni a lang kha alo dik ngei anih dawn hi tiin johnnya chu mahni intihlum ang in a lang dawn tho tho tlat ani. Johnnya khan a pute danny-a lehkha phek a mi kha a pawtthla a, a thu hnuhnung atan a hmang ta tihna anih tak ber chu. Chuti anih chuan Misual chet na reng reng a awm leh ta lo.




"Mahse, Misualpa chuan a himna turin heng zawng zawng hi a ruahman na vek a ni ka tih kha.




"Awle sir, ka hrethiam e, tichuan engtin zel?"




"Rina, lehkha pawtthla tu chu tunge ni ang ti a kan buai lai khan lehkha pawtthla tu chu tudang niloin amah johnnya ngei hi ani ang tih ngaihdan kha lo piang hma ta se chu, kei ngei pawh hian ka pawm thlap hial ang. Mahse misual hian heng zawng zawng hi a hmuh lawk vek avang a nia, a chet lak dan zawng zawng pawh khati tak a a uluk ni. Mitthi taksa ah pawh hnuhma a hnutchhiah duh Miah loh ni. Mahni intihlum ang a lan tir hi a thil tum ber ani a, arema leh danny-a te kha han kang Kai ve mahse a duhthusam ber chu mahni intihlum ang a lan tir hi ani.




Mahse lehkha pawtthla tu chu amah johnnya ngei hi alo ni reng thei ani tih ngaihdan kha mi tumah in ngaihruat na chang kan la hriat hma ngei khan chet lak vat dan tur kha keiin ka ruahman kha a tul ta ani. Kha ka ruahmanna khan misual chu tunge anih tih chu a rawn pholang dawn ta ani. He laiah tak hian misual chu tunge anih tih ka hailan dan hi lo chhinchhiah ang che.




"case chu tihtawp a nih thu leh police te pawh lehkha pawtthla tu an hriat zawh loh thu te, misual chu an chhuichhuah theih loh thu te chu Johny-a chhungte chuan an au hla a han ni dawn ta a, an ni chuan a tam thei ang ber hnenah an hrilh darh dawn ani. Chutah chuan mi sualpa ngaih chu a tha lehzual ngei ang. A thla a muang sawt dawn ani, police an beidawng a, case tihtawp ani tawh si a.




"Mahse ka hrilh ang in police te beidawn hnuah leh case tihtawp anih hnu ah pawh chuan Johny-a chhungte chuan nasa leh ngawrh takin lehkha pawtthla tu chu tunge anih hriat ngei tumin hma an la zel tho a, mahse chu thil chu misualpa tan chuan ninawm a tling pha ngei tur ani, theihtawp chhuah a pi zuali leh a chhungte chuan lehkha pawtthla tu chu tunge anih tih hriat tum a hma an lak reng a tul dawn ani"




"Misualpa tan a ninawm tur khawp leh ngeiawm tur khawp chuan note latu chungchang ringawt maiah chuan mitthi chhungte chu an buai ta a. Misualpa chuan a ning viau maithei a ni, misualpa rilru ah chuan case tihtawp anih tawh hnu pawh a chutia note latu chungchang mai mai a mitthi chhung te an la buai an la buai mai chu tul tawh lo viau in a hre dawn a ni.


"Tichuan le, chutah tak chuan misualpa chuan tumah venthawn tur awm lovin inti hawihhawm tak leh inlak fin hmel takin mithi chhung te hnenah chuan note latu chu tudang niloin an fapa mitthi ta Johny-a ngei a nih thu chu a han hrilhfiah ta a, chuveleh Johny-a chhung te pawh chuan uluk takin an han ngaihtuah ang a dik an ti viau ngei ang, an lo buaina chu alo dik lo tawp tih an pawm a nga, a tawp a tawpah chuan Johny-a chu mahni intihlum ngei alo ni tih an pawm tlang tawh dawn ani"




"Chu thil chu tunah khan a thleng zo deuh chiah a ni. Pi zuali khan a rawn hrilh zo chiah che anih kha, tin kei in pi zuali rawn hrilh tur che ka lo hriat lawk vek theih na chhan pawh tunah khan ka ka atang a chhuak ngei i ngaithla zo ve leh chiah bawk. Mithi chhung te hnen a lehkha pawtthla tu chu Johny-a ngei ani ang ti a hrilh tu chu tunge anih? Chu pa ngei chu tualthattu misualpa chu a ni, hei hi ka thang Kam chu ani, amah leh amah a rawn tal awk a, a rawn inpuang ani" tiin inspector chu a nui sak a.




Rinpuia chuan, "sir, i han sawifiah a ka fiah kuar mai. Chuti anih chuan mithi chhungte chuan thil awmzia an hrethiam lo tawp ang. Chu pa chu kan hriat vat a tul a nih chu" a ti ta a.