LEHKHA THEM_Chapter-5 Last

[April Hmar Liverpool]

LEHKHATHEM

Ziaktu, Laltanpuia


Last Chapter




Inspector chuan Rinpuia hnenah chuan, "tichuan le, nichin a Johny-a nu zuali nen in inbiak na ah khan he pa, 'note la tu chu johny-a ngei' anih thu sawichhuak tu pa hming hi a hrilh che em?"


"Aih min hrilh lo sir, chutiang engmah a sawi lo"


"Awle keimah ngei hian ka han zawt chiang a nge"




Inspector chuan phone call hmang chuan Johny-a nu zuali chu a han bia a, zuali chuan "pu inspector, nichin a ka sawi tak ang khan tu mah in lehkha chu an pawtthla lo. ka fapa boral ta Johny-a ngei khan a la a ni. Midang tumah han puh mawh tur an awm lo. Johny-a leh Danny-a te hi pu tu an ni a, sawi tawh angin an inkawm ngeih a an inzui nasa a an in nel viau bawk.


"Chuvang chuan mama hian a putea note a lehkhapuan phek bo ta pawh hi ama lak ngei a ni ang. Midang tumah han pawtthla tu tur kan hrechhuak zo silo a, chuvang chuan a hma a ngaihdan kan lo siam hmaih, mama lak ngei hi a nih ka ring ta ani. I sawi ang zel khan engkim chu kan kalpui alawm, Danny-a note la bo tu chu tunge ni ang tiin kan phek buai nasa viau a ni, mahse a tawp ah note bu a lehkhapuan phek la bo tu chu mama ngei hi alo ni ang a tih ngaihdan kan lo neih ngai loh chu pu siamliana hnen atangin kan han hre ta a, pu siamliana chuan ka fapa johny-a bak han la bo tu tur midang an awm a rin loh thu min hrilhfiah ta hlauh mai a, chuvang chuan keini lam pawh in mama thihna hi mahni intihlumna ni ngei in kan ngai ta a ni"




Inspector chuan uluk fe hian rinpuia hnenah chuan "chu rina, ilo hria em? siamliana a tih chu, chu pa ngei chu tualthattu chu a ni"


"Sir, a finfiahna i nei em ni?"


"Rina, amah leh amah a inpuang dawn alawm"


"Engtin?"


"Rina, he pa, siamliana hian kei hian he tualthahna hi ka la chhui mek a ni tih a hre lo tawp a ni. Ka sawi lawk vek kha, case tihtawp ang in thuchhuah ka siam der a, a rawn ngam pa sawt chu anih hi. hmanhmawh takin a rang thei ang berin chet kan lak a tul dawn a ni"




"Mahse sir, engtin nge kan tih ang? Arema ang khan kan dawp dawn tihna em ni?"


"Rina, hei bak bak a thil lang chiang hi a awm lo tawp ang. Ka thusawi te kha ilo theihnghilh leh tawh pawh a ni mah na, hei hi ka nin em em thil chu a ni, thil awmzia sawifiah nawn fo hi, mahse a tul bawk si a"




"pi zual, hei hi min tih sak thei a ngem?" lehlam atang chuan "aw, enge ni ta? eng thil nge? ka theih zawng anih phawt chuan ka ti em em ang"


"Pi zual, i fapa thattu chu i hre reng tawh asin" Zuali chuan mak ti zet hian, "ka pu, ka rilru hi a inthlak hlawk niin ka hria, thah anih chu ila ring ta fan tihna em ni? engmah finfiah tur kan hmu zo silo va"




"Lungngai mah ta che, thu kan zawt fiah dawn alawm, a insawi awk em em ang, chu mi anih loh vek chuan a finfiahna lem kan ruahman ve mai a tul ang. Pu siamliana i tih kha, kha ngei kha i fapa thattu chu a ni" Zuali chuan mak a ti kher mai. Sawi mai tur pawh a hre lawk lo.




"Ni e, i fapa chu dawt hmang leh phuahchawp hmangin mahni intihlum anga lantir a ni, mahse mahni intihlum a nilo, pi zual, ka sawi ang in awm ang che, engvang in nge keini pawh in a finfiahna chu kan phuahchawp bik loh teh lul ang ni. A finfiahna lem kan siam chawp ve mai tur a ni"




"Ni e ka pu, mahse chu thil chu engtin nge kan tih tak ang? Tin pu siamliana chu engtin nge tualthattu anih theih? Kan thil hmuh hmaih min kawhhmuh tu ani si a"




"Chu tak chu alawm, I fapa hi engvang a puan hmang a thingzar a lo inkhai kha nge anih? A chhan chu mahni intihlum ang a lantir duh vang ani. Pi zual ka sawi awmzia i hrethiam em?


Pi zuali chuan "ka pu, pu siamliana ber kher chu rin harsa ka va ti em! A han ti leh hram a.


"Pi zual, siamliana chu anih na dik tak i hriat duh chuan ka thusawi tur hi ngun tak in ngaithla rawh. Nangmah chauhin he kan ruahmanna hi in veng a pa tawng tam lo leh mi rintlak tak tur hnenah i hrilh ang, a ni chu thu hretu ang in a derin kan tan a ding dawn a ni. Tichuan thu hretu mi rintlak tak kan nei phawt. Khami zan, i fapa an thah zana thil thleng zawng zawng kha a chipchiarin a sawi dawn a ni. Pen leh lehkhapuan i inchhawp em? Han inchhawp vat teh, a thusawi dan tur leh thil thleng a hmuh dan ka lo sawi ang a, chu chu alo chhinchhiah thlap ang a, tichuan thudik tak chu a lang dawn a ni. Mi sualpa chu a hnung kan khirh thei tawh ang, min ring rawh, I fapa tan hian rorelna dik nge I duh bum a awm?"


Zuali pawh chuan rilru siam thiam har a ti hle mai a, police an nih vang hrim hrim chuan inspector thusawi chu ngaihthah loh tha in a hre ta a, inspector thusawi ang chuan "awle inspector, i tih ang chuan ni rawh se, ka inring e, han sawi ta che, kalo ziak a nge"




Inspector chuan thu hretu in a a sawi dan tur zawng zawng chu a han sawi a, zuali pawh chuan inspector sawi ang zel chuan ziak in alo chhinchhiah thlap a, chutah inspector chuan zuali hnenah chuan "tuna i thil ziah i chhinchhiah tak kha in venga pa tawng tam lo leh mi rintlak tak hnenah i pe ang a, a ni chu kan tan thu hretu ang in a awm ang, tichuan a ni chuan i lehkha pek a a thusawi dan tur ka hrilh che kha a lo chhinchhiah thlap ang a, a hun ka tih ah a sawi chhuak ang, a bu ang thlap a inrintawkna nen a theihtawp a chhuah a tul ang, chumi tur chuan a rilru lo hmin phawt mai rawh. Hei ka nau te nen kan rawn thang thuai dawn e" tiin an inbiakna chu an titawp ta a.




Rinpuia chuan ngaih that loh hmel deuh chung chuan "sir, thil a kal sual em lovang chu maw" a han ti a, inspector chuan "rina, i hlauthawng hma mah mah thin a ni. Kha pa siamliana ngei kha tualthattu a ni tih hi pawm ngam rawh. Chu thil chuan inrintawkna a pe em em ang che" alo ti liam mai a.


"Awle sir, a dik ngei ang, mahse ama ka ngei atang a a sawi chhuah hma chu rin mai harsa ka ti tawh takzet a ni. Arema atang tawh khan thil a kalsual leh hi ka hlauthawng a ni" "Ni e rina, i sawi chu a dik alawm, mahse Arema kha chu rilru leh thluak lam buai mai ani tih kan hrethiam leh vek tawh a, tihsual chu tihsual in kal se, mahse tun tum erawh tihsual a awm thei lo, chuti mai chuan a inpuang duh hauh lovang, Mahse thu hretu kan nei a, he thil zet hi chuan he tualthattu fing kherkhiap tak hi a vel dawn a ni" "Awle sir, beiseina nen hma lam chu kan pan zel a niang chu"




Chawhnu her a ni a, Inspector remruata leh a nau te chu Johny-a pute Danny-a te In ah chuan dawhkan kil bial taih in an ngaihtuahna teuh kawm chung chuan hun an hmang mek a, nakin deuhah chuan kawngkhar atang hian mi pakhat, han en mai a pumrua lian lo tak, kum 50 ralkai awm vel, sam sei lek lek mai, a hnar ngul chu a sang in a mit meng chu a thip viau bawk, kuhva ei nasa tih hriat tak hian a kam chu a sen pherh deuh luai a, a hawiher leh a chezia reng mai atang pawh chuan mahni tawka mi chapo leh inla vei tak a nih ngei a rinawm.


A rawn luh rual a titi nghal phar phar in In chhungah chuan a vei thauh thauh mai a, chutah inspector chuan chu pa chu ei lo tih hriat tak hian rinpuia hnenah chuan "rina, ilo hmu em? kan misuala chu a zak lo in a zam lo kher mai, a mi thah tak Johny-a chhung te hi a hnuaichhiah in a hmusit takzet tih a awmdan leh hawiher ah khian a lang vek. Mahse, keini police te meuh hmaah hi chuan dawl zawrin a zawr dawn a ni"




Chhung kaw pa ber Danny-a chuan chu pa chu lo dawngsawng thuai in "pu siamlian, lokal rawh, he lamah, sitting room lamah hian, hei kan inspector pawhin alo nghak reng tawh che a nia" inspector tih tawngkam a hriat rual rual chuan chu pa siamliana an tih chu a nuih a zat hmel kher mai. Nui hak hak chung chuan inspector remruata hmachhawn zawng chuan a han ding vang a, Chuveleh inspector chuan siamliana chu thu turin a han ti a.




"Awle pu inspector" a thuthmun han rem pah chuan "kei hi min mamawhna te in han nei ve ta tihna a niang maw? chutia he lai lai a min han koh kal tak rum rum ni, case tihtawp a ni inti in ka lo hre si a?" Chuveleh inspector chuan awmze nei zet hian "chu, case tih tawp anih thu chuan a ti zangkhai huai che a niang maw?" Siamliana nui var var lai chu a tawp chiang kher mai. Inspector chuan nuih zat hmel fe hian "pu siamlian, i hlim hmel kher mai. Mahse keini ang bulah hi chuan hlimna tur hi a awm tam lo khawp a nia" nui var var chung chuan a han tih chhunzawm ve zat a, Chuveleh siamliana chuan nui lui tih hriat tak mai hian "e khai, pu a, hlim lohna chhan tur a awm reng reng hleinem" tiin ala nui lui var var zel a.




Chuveleh inspector chuan "pu siam, ka zawt nawn leh ang che, hlimna chhan tur tha deuh te hi i nei ani lo maw?" a han ti a, siamliana pawh chuan la nui lui var var chung chuan "aa, pu te u, in hnuchhui lai hi in chhui lut hleithei silo va, Danny-a note bu a lehkha phek pawtthla tu chungchang ringawt mai buai khan in buai a, thil ho te hmuh thelh kha in nei tlat a" a nuih chu ala zat hmel kher mai.


Inspector chu a hmuhsit hmel takzet. Chutah, inspector chuan "he tualthattu hi tunge anih ka hre reng tawh asin" a han ti dam thluam a, Chuveleh siamliana chuan rang fe hian "e he chu tualthattu maw? In finfiah tawh em? In man tawh em?" Alo ti vat mai.


Inspector chu a han ngawi deuh ren rawn a, Chuveleh siamliana bawk chuan enghelh neih loh hmel zet hian "pu inspector, kha lehkha pawtthla tu kha tumah an ni hleinem, amah Johny-a ngei kha a ni' tih lai te a kha in hmu thei tlat lo a, tualthahna lam ringawt in buaipui a" elsen hmel zet hian a han ti a,


siamliana vek chuan "pu inspector, mahni intihlum na na na chu tualthattu zawng in in phek buai chiam chiam a, thil nuihzatthlak tak a ni" tiin a nui hak hak reng mai. Rinpuia thin chu alo ur takzet, siamliana hnenah chuan 'tualthat tu chu nangmah kha i ni, thu hre tu, mit ngei a hmu tu che pawh kan nei vek' han tih nghal phiar phiar mai chu alo duh takzet, mahse a insum hram hram a.




A ngawi tlang mai dawn emaw tih tawh hnu ah chuan inspector ruata chuan muang ban charh hian "pu siamlian, enghelh i nei lovin nuam i ti hle mai maw" Chuveleh siamliana chuan rang fe hian "aw ti e, nuam ka ti takzet, enghelh neih loh hi alawm mihring te damchhan" a nui zui leh hak hak mai.


inspector chuan awih lo zet hian "chuti maw pu siamlian, mahse kei chuan he tualthattu pa hi tunge a nih ka hre daih tawh asin, mahse ka mit chuan ka la hmu hauh lo thung, tunah erawh ka mit ngeiin ka hmu tawh a ka beng ngei hian a thusawi ka ngaithla tawh e, ka thisen ngei hian chu tualthattu pa zamchhe mek lai chu a hre thei a ni" inspector aw chu a nelawm lohin a vawt raih mai.




Chuveleh siamliana chuan phawk fe hian "aww, tualthattu lam bawk chu, tunge pu inspector? i hriat chuan sawi mai la, a finfiahna i nei em tih lai a kha theihnghilh mai lo bawk la aw" siamliama chu a nui leh hak hak a, chutih pah chuan kuhva chu ei turin a han siam malh malh bawk a, chutah inspector chuan "a finfiahna lo nei ta ila" a han ti ve khauh a, chuveleh siamliana chu za mangkheng hian a nui leh ta hak hak mai.


"Aww, pu inspector, Johny-a hi tu thah mah a nilo ka tih chu" Chuveleh inspector chuan "mahse, lehkhathem kha" alo ti vat a, siamliama chuan ram zet hian "kha kha maw? ka sawi tawh sawi hnu tu mahin an la lo. Danny-a hi Johny-a putea a ni a, an in nel a, an intlawhpawh fo, chuvang chuan lehkha kha chu Johny-a lak tihna a ni mai" Chuveleh inspector chuan "anih leh chu chu a finfiahna i nei em?" A han ti ve ta khauh mai.


Siamliana chu a ngawi chiang kher mai. Chuveleh inspector bawk chuan "pu siamlian, i eng thawl in i hlim bawk a, tin, a finfiahna lam i ngaina riau bawk a" tiin inthlahdah zet hian inspector chu a han thu awn riai riai a, kuhva chu a han siam ve malh malh a, a ke chu duhdah zet a dah pah chuan "pu siamlian, Johny-a chuan Danny-a note bu chu keuin lehkha phek chu a pawtthla ngei a ni tih i finfiah thei a ngem?" Rinpuia leh midang ho chuan an aw chu an lo thian kharh kharh hlawm mai, inspector chuan kuhva han hmawm pah chuan "kuhva hi ka ei lohna chin pawh ka hre tawh lo ania, mahse kan pu siamliana avang hian ei lo thei dinhmunah ka ding lo ani" a han tih zawm zat bawk a, a nui hak hak bawk.




Siamliana chuan ngun fe hian a ngaihtuahna chu a han hmang a, chuveleh inspector chuan "pu siamlian, tualthattu chu tunge anih ka han hrilh ang che aw" tiin siamliana chu a melh ngar mai, Chuveleh siamliana chuan harsa tih hmel fe hian alu chu alo bu nghat a, Chuveleh inspector chuan "tualthattu chu case tihtawp a ni tih puanzar a nih hnu khan a hlim hle a, a zangkhai hle ani, tin Danny-a lehkhapuan pawtthla a ru chhuak tu ah mitthi ta Johny-a puh tu ngei kha a ni bawk" Chu lai a awm ho chu an lo thum hak mai. Chuveleh siamliana chuan "tunge chu pa chu?" tiin a mit chu a len kual ruai a, Chuveleh Johny-a nu zuali chu mak tiin alo mengphar awn awn mai.




Siamliana vek chuan "inspector, case tihtawp anih rual a hlim em em leh zangkhai em em chu tu maw? Johny-a chu lehkhapuan pawthla tu ani ti a puh tu chu tu maw?" a han ti a, a hmel chu a nelawm loh ngang mai.


Chutihlai tak chuan zuali chuan "amah a ni reng si a, amah avangin mama pawh lehkha phek pawtthla tu ni a ngaiin a intihlum ni ah kan lo ngai hman asin, mahse engemaw kan pu siamliana hian a hriat tak mai le, amah leh amah a inhai ta mai em ni?" alo ti chhuak sap a.




Siamliana chuan zuali thusawi chu lo hria in thinrim zet hian "pu a, kei hi min ringhlel a ni tiraw? Engvanga min ringhlel ringawt nge i nih?" Chutah, inspector chuan muang ban charh hian "he tualthahna hi felfai taka hun rei tak chhung ruahman a ni" Chuveleh siamliana chuan thinrim zet hian "pu a, ka zawhna chu i chhang thei na nge? engvang a min rinhlel nge i nih?" inspector chuan siamliana zawhna chu a ngaihpawimawh hmel loh kher mai.




"Case tih tawp thu ka hriat rual a ka lawm avang leh Johny-a chu lehkhapuan phek pawtthla tu ni a ka rin thu ka sawi avang mai chuan maw min rinhlelh" Chuveleh inspector chuan "pu siamlian, tunah meuh zawng i eng a thawl tawh hauh lo tih a hriat e, nuih pawh a sak talh tawh mai a ni maw?" Nui tha chung chuan a han ti a, Chutah zet zawng siamliana thinrim insum hman lo chu a thuthmun atang chuan a tho ta hluai mai, chumi pah chuan dawhkana bottle a tui chu a kut chuan a vai kiang nghal thuai bawk a, Chuveleh inspector nau te chuan siamliana chu an lo khap nghal thuai a, chutah inspector chuan a nau te chu lo inrawlh lo tur chuan a han ti a. Chutah ngeiawm zet a siamliana melh ngar chung chuan,


"pu a, i thin a rim mai a ni maw, Khatiang te chuan tualthah mai pawh i hreh tawp nang ti raw?" Siamliana thinrim lutuk chuan "naupang! i va chimawm thiam ve maw le, tualthattu ka ni ngei ani tih finfiahna chu min han hmuh ta che" Chutah inspector chuan muang ban charh chuan "a tir te atanga tun hun thleng hian tualthattu ruahmanna zawng zawng hi ka hre vek, he tualthattu hian thurualpui a nei a, chu pa chu pumrua ah pawh pumraw lian lam leh thahrui ngah tak a ni nghe nghe" chuveleh siamliana chuan zawi sap hian "ngaihzuala maw?! Chutah le, inspector chuan rinpuia chu han hui zauhin "rina, ngaihzuala chu a awmna chin han ngaihven vat teh u, tlanbo te kha alo tum mai mai a nge"


"Awle sir, kan han zawng nghal thuai a nge"




"Pu a, i kal thui mah mah lo maw?" siamliana chuan inspector chu huat hmel zet hian a mit meng sen ram chuan a melh vawng vawng mai a.




Chutah, inspector chuan a thuthmun chu han siam rem pah chuan "engvang a Johny-a kha that nge i nih le pu siamlian? a han ti a, chu lai hmun a awm te chu an lo ri hak hak tawh. siamliana pawh chuan hlauhthawn hmel tak hian "pu inspector, a finfiahna i neih loh chuan tualthattu ah min puh mai mai suh, ka thianpa pawh chu chutiangin i man ngawt thei lo tih hre ta che" a han ti a, chuveleh inspector chuan "thu hretu ka nei alawm" a han ti chang fak a, Chuveleh siamliana chuan "thu hretu maw?"


"Aw, thu hretu ka nei. Hnuchhui kan tan lai khan thu hretu hian engkim kha min lo hrilh hma chu ni se pawi sawi lo Arema pawhin a hmingchhiat phah lo tawp ang. Nizan hmasa khan he thu hretu hian kan hnenah thudik min hrilh ve chauh a ni" Siamliana chu a ngawi reng a, hnuai lam chu a bih ngat mai.




"Pu a, enge maw sawi duh te i nei em?" inspector chuan a han ti leh a, chuveleh siamliana chuan "imm, thu hretu chu han ko phawt teh u" alo ti a, chuveleh inspector chuan zuali hnenah chuan "pi zual, kan thu hretu kha han ko vat teh u khai, hei kan misualpa hian a thil sual tih hi han puang vat vat teh se, a khamawm zo zai ta e" tiin siamliana lam chu hawiin, siamliana awmdan leh khawsa zia chu chik fe hian a melh ngat ngat reng a. Siamliana chu en hlum thak a tum ta a maw ni chu tih mai awl tak tur a ni.




Nakin deuhah chuan thu hretu chu an rawn hruai ta a, a hmel chu a patling hle mai a, kum 50 chho vel anih a rinawm, a hmel thutak zet karah chuan a tih tawh chu a ti mai mai lo tawp ang tih a hmuh tel theih a, chutihrual chuan pa tawng tam lo tak leh rilru tlang tak, mize nghet cherh chawrh tak nei anih ngei chu a rinawm viau a ni.




"Hei le, pu siamlian, thu hretu chu alo thleng ta e, tunge anih i hmelhriat zawng te a ni e maw chu?" inspector in a han tih takah chuan siamliana pawh chu a ngaihtuahna atang a harhchhuak zawkin "hruaia" a han ti a, siamliana chu a phawk in a chi ai takzet.




Pawn lam atang chuan rinpuia ho chuan an rawn ri nak nak a, siamliana thurualpui ngaihzuala pawh chu In chhung ah chuan an rawn chhawm lut ta hnak hnak mai. Ngaihzuala chu pumraw lian pangngai tak niin a khabe hmul chu a zuah buk viau mai a, sam sei lam niin a dar hlai tha tak leh a kut hrawl tak mai chu hmuh hmai chi a ni hauh lo ang. A hmel chu a phawk in a chi ai viau nghe nghe a.




"Awle pu te u, a tawp lam i hnaih dawn ang aw ni. Le, pu hruai kha mi zan Johny-a thih zan a i thil tawn kha he lai a kalkhawm te hma ah hian han sawi tawh ta che, Johny-a, mahni intihlum ni a lang chu alo ni chiah reng em? Johny-a thihna phena thudik tak chu hriat a hun ta e" tiin thu hretu hruaia chu a han mit sir zauh a.




Hruaia chuan Johny-a thih zan a thil thleng a mit ngei a a hmuh thu chu a han sawi tan ta a.




"Khami zan khan inkhawm ban hnu ah dai ah zawbuang chang turin ka tei chhuak mai mai a, saw mi tawngtaina tlang bul hnaiah sawn niin kah ngei pawh ka tum a a phur pawh ka phur hle, veng lu atang in tawngtaina tlang lam pan ka ni a, engemaw chen zawbuang thawm chu ngai chang a ka thut hnu ah mihring tawng ang tak ri hi tawngtaina tlang bulah ka hria a, a tirah chuan tawngtai tur an nih ka ring mai a, nula leh tlangval tawm tur pawh an ni thei tiin kal sawn mai ka tum a, mahse chutia ka awmna hmun atanga insawn ka tum chiah tih chuan mipa aw tih hriat em em hian 'Johny' tia hming a lam chu ka han hre fuh leh ta a, Chutah an thawm chu ngaithla Chiang deuhin an aw atang chuan pu siamliana leh Johny-a aw ni ngeiin ka hria"




"mi pakhat tawng ri pawh ka hre tel nghe nghe a, tichuan ka han ngaithla Chiang deuh a engemaw thilah an inhnial ni ngei in ka hria, Chutah engah mah ngai lova ka awm hmun chu sawn mai ka han tum leh chu ka aw hriat lo chhuahna lam atang bawk chuan thinrim avang a inhnial ni ngeiin ka hria, ka ngaih a tha ta lo deuh a, 'an ni hi an intibuai a nga thil thalo te hi a thleng palh a nge' tiin an awmna tawngtai tlang lam chu ka pan hnai ta a, chumi lai chuan zawbuang thawm chu ka hre chawpchilh zui bawk. Thawm chu ka dim viau a, pu siamliana te chu ka zuk pawh dawn nge zawbuang chu ka veh hmasa dawn' tiin ka rilru chu a inkhap deuh ren rawn a, mahse tawngtai tlang lam chu ka pan ta zawk a ni"




"Thingkung lian tha tak phenah chuan thawm chu ka han ngaichang leh rih a, Chuveleh an tawng ri ka hriat leh tak avang chuan uluk takin ka han bihthla chhin a, ka thil hmuh chu a rapthlak kher mai. Pu siamliana leh mi pakhat hian Johny-a chu an lo bawhbet a, a nghawngah chuan an lo rek ngawt ngawt mai anih chu mawle! Johny-a chu a tal aih aih ani tih ka hmu reng a, kei chuan chet chhuah zai reng ka rel thei tlat lo, ka ka a chhih tlat a, engemaw min mawlh tu hi awm tlat ni hian ka hria, chet zai reng ka rel thei lo a ni"




"Tichuan, pu siamliana ten Johny-a an thah hnu chuan Johny-a chu kawr ruam lamah chuan an hnuk thla nghal a, Chuveleh kei chuan theihtawp chhuahin ka zui ve ta a, thawm pawh dim a ngai kher mai. Pu siamliana chu thingkungah chuan lawn in a thianpa chuan Johny-a rûang chu hnehsawh zet hian a han pawm kang a, tichuan thing kak ah chuan Johny-a rûang chu an khai ta a ni. Eng eng emaw la tiin kei pawh chu chet zai reng ka rel thei lo"




"Nakin deuhah chuan pu siamliana te chu fimkhur takin kalkawng pangngai nilo atang chuan an pil bo ta a ni. Ka thil tawn chu a rapthlak em avang chuan ka ngaihtuahna te chu a bo vek thei hial a, tichuan inthingharh in ka awm zel dan tur chu ka ngaihtuah ta a, In ah haw vat a police lam hriattir chu ka duh viau, mahse ka huaisenna in a ngam hlawl lo a ni. Tichuan, ngawih bo ah ka tlak ta ngawt mai a, a hreawm ka tiin keimah hi min nghawng takzet a ni. Tichuan inspector leh a nau te hian Johny-a chu mahni intihlum a nih an ring lo a ni chek a nga, hnuchhui lam hna chu an thawk reng tih ka hria, tichuan keipawh chu hreawm ti reng reng a awm reng chu ka duh ta bik lo a, thil thlen dan engkim chu ka hriat vek thu inspector hnenah chuan a rukin ka thlen ta a ni"




Thawm chu a reh tlawk tlawk mai. Chutah inspector chuan muang ban charh hian "pu a, i thil tih sual chu a man i pek ngei a ngai dawn ta a ni" tiin siamliana chu a melh vang vang a, chutah siamliana pawh chuan harsa tih hmel fe chhuan "imm, inspector, ka thil tih sual chu ka pawm e, mahse chhan nei lova he thil hi ti kan ni ngawt bik lo asin" a ti ve ta nge nge a, a thianpa ngaihzuala chu han en in, chutah siamliana vek chuan "inspector, ka thianpa ngaiha nen hian nunhlui duhawm lo tak mai kan nei a, ka thianpa ngaiha hian champhai lamah ngaihzawng neiin a khat tawkin a ngaihzawng hmu tur chuan champhai lam a pan fo thin a, tin kei hian ruihhlo hmanga sumdawnna ka buaipui thin avang in thianpa ngaiha puihna hi ka dil ve fo bawk"




"kan buaina ve ve ah chuan kan intawiawm tawn thin a ni. Ngaiha hi nupui fanau nei lai a ni a, keipawh nupui fanau nei lai ka ni. Mahse, kan thuruk zawng zawng chu Johny-a khan engkim alo hre ve vek tih kan han hrechhuak ta a, engtia lo hre thei nge anih kan hre bik lo. Tichuan keini pahnih chuan Johny-a chu thurual puiah kan sawm a, engmah sawichhuak lo turin kan ti bawk. A hlawkna kan hmuh pawh kan pek ve zel tur thu kan hrilh ani"




"Mahse, Johny-a kha kohhran a inhmang tak a ni a, kan sawmna chu a lo duh hauh lo. Hun a kal zel a keini pahnih chu Johny-a chuan min vau ta fo zawk mai a, sawichhuah ah te min vau a, police hnena report ah te min vau thin a, kan thil tih thin chu bansan turin min vau thin a ni. Mahse keini tan chuan kan thuruk chu a pawimawh in kan sum lu ber a ni miau si a, Johny-a khan lo hria pawh ni se ngawih bo pui ve mai mai tur hi a ni a, mahse ngawih chu sawi loh a khat tawk chuan mi zingah awmze nei tak tak in a thuruk hriat te chu keimahni hming hmer chiah silo hian a sawi a sawi lang ta fo mai a, kei ni mangang leh thin ur chuan Johny-a chung a phuba lak chu kan tum ta a ni, Kan thuruk min puan hma ngei in thil chinfel kha kan duh ta ani"




"Hun rei tak chhung chu kan nghak a, tumkhat chu Johny-a putea, Danny-a te In ah ka leng lut a, chhuat a note bu lo thla hnawk nuai mai chu ka hmu a, tichuan note bu chu ka han keu a, a phek lai tak a mi thu inziak chu johny-a thu hnutchhiah atan a inhmeh dawn riau a ka hriat avangin ka pawtthla ta a, tichuan note bu chu a awmna ngaiah ka dah leh ta ani"




"Hun engemaw chen chu chet kan la duh lawk rih lo. Kan nghak rei ve pangngai khawp mai. Tichuan hman zan Pathianni zan khan kan ruahmanna chu tihpuitlin kan tum ta a, kan phuba chu lak kan tum ta a ni. Johny-a chu a inkhawm ngei dawn tih kan hria a, inkhawm ban ah kan lo chang a ni. Text message hmang chuan tawngtai tlangah kan awm thu hrilh in kan thil tih thalo leh kan nunhlui te chu tlansan a kan nun kan thlak tawh thu kan hrilh a, tawngtaina nei tur ang in kan insawi bawk. Amah chu min tâwiâwm tur chuan kan sawmchhuak a ni. Tawngtaina tlang a rawn thlen khan Johny-a chu a hmel a hlim hle mai a, hmuh a nuam takzet, mahse keini lam rilru puthmang erawh han hre ngat se zawng khatiang a amah chauh a tawngtaina tlang lam a rawn pan ta mai pawh kha a inchhir ngei ang le"




"Tichuan kei leh ngaiha chuan Johny-a chu vau in kan man bet a, a nghawngah chuan a puan bah hmang chuan rekin a chahthlak thleng kan beih rawn ta a ni. Hmanhmawh takin kawr ruam lamah kan hnuk thla a, inawkhlum ang a a lan theih nan thing ah chuan kan khai ta ani. Fimkhur thu hla ah kutkawr pawh kan bun thlap nghe nghe. kan inbiakna zawng zawng chu kan thai bo a, Danny-a note bu a lehkha ka pawhthlak chu a thu hnuhnung hnutchhiah ang a a lan theih nan a kutah chuan kan hum tir bawk. Lehkha kan hnutchhiah kher nachhan kha chu Johny-a hi mize zangkhai tak leh mi hlim thei tak, thenrual ngaina tak a ni a, tin kohhran lam a in hmang ani bawk si a, chutia thawklehkhata mahni a han intihlum ngawt mai chu amah hrechiang tute chuan an pawm mai kan ring lo va, a chhung ten a thih chhan chu chhui turin police hnenah an thlen ngei pawh kan ring ani"




"Chu vang chuan police lam in an lo chhui palh hlauh anih pawhin' tiin ama lam hnaih tu emaw ber chu rinhlelh awm a siam kan tum vang leh inhnamhnawih anga lantir kan tum vang a ni. Tin, arema leh johnnya te khan nunhlui an lo nei tawh a, kha pawh kha police ho tihbuai Nan leh tih khawtlai Nan a Kan ruahman ani.


Kan ruahman ang leh kan rinlawk ang ngei chuan police lam pawh chuan lehkhathem kan hnutchhiah chu an bawhzui nghal chat mai reng a, arema ah chhui luh ani a, a tawpah Johny-a pute Danny-a chu an hrechhuak leh ta nge nge bawk, mahse chumi maiah chuan thil ala tawp lo, arema leh Danny-a te chu engah mah an inhnamhnawih lo miau si a, tin, heti zawng hian kan ruahmanna kha kan kalpui hrim hrim bawk a, Johny-a ruang bulah chuan lehkhathem ni kher lo, chem te emaw hmanrawn dang pawh hnutchhiah mah ila kha hmanrua nei tu kha Johny-a chhungte an nih kha a pawimawh ani. Keimahni hmanrua emaw engmah kan hman kha a thiang lo ani, hmanrua leh puan, lehkhathem te kha a chhung te ta anih miau kha chuan kan hnu kha chhui mahse johnnya khan Khang hmanrua te kha a thih hma khan a hnutchhiah ani tih ngaihdan kha a awm dawn tho a, chu chuan tualthahna niloin mahni intihhlumna ang in a lantir dawn tho ani.


A chhungte pawh chu rinhlelh an ni ve ang a an han buai ve tur hrim hrim pawh kha keini tan a lawmna ani ve pakhat hrim hrim.


Thinur fe hian danny-a chuan siamliana hnenah chuan "khatih lai khan in nuih alo za in min lo hmusit hle dawn a ni maw? Alo ti a, siamliana chu a melh rum ngang mai.




Siamliana chuan dam zet hian "kan lo hlim takzet asin, min tihlim takzet, Tichuan Kan ruahmanna mahni intihlum ang a lang chu a fuh viau in Kan hria, mahse mi tumah in an hrethiam mai lo. Lehkha pawtthla tu ringawt buai khan an buai a, kan tan khan thil ninawm tak ani. Police ho an beidawng tawh a, case tihtawp ani tawh a, chu lai kar a kha tia johnnya chhungte misual zawng a an la buai reng mai kha a khamawm takzet. Keimah ngei chuan hrilhfiah ka duh ta a, mahse fimkhur thu hla ah engmah ka la sawi chhuak duh mai rih lo. Mahse khatiang a johnnya chhungte misual zawng a an buai reng kha chuan keini kha tihpalh thil ah min la rawn hrechhuak palh tak tak mai ang a tiin thil an hriatthiam loh chu hrilhfiah ka tum ta a, Danny-a note bu atanga lehkha phek la bo tu chu tudang niloin Johny-a ngei a ni tih chu Johny-a nu hnenah chuan ka han hrilhfiah ta ani, kan ruahmanna chu hlen ani ta ani"




"kan rinlawk ang ngeiin Johny-a chhungte pawh chuan an fapa chu lehkhathem latu ngei anih chu ringin mahni intihlum ngei a nih chu an pawm ve ta reng a. Keini tan chuan ruahmanna tha leh duhthusam a ni ringawt. Mahse, inspector in keimah thu zawtfiah tur a min rawn thurchhuak leh ta mai kha chu ka lo rin loh lam daih a ni.


"Tin, inspector hian kan thluak a lehkhalh hneh hle ani tih ka hrethiam ta, a hma daih atang tawh khan kan ruahmanna zawng zawng hi alo hmuthiam vek alo ni. Kei khan ka ka kha lo chip tlang hram hram ila chu min hrechhuak hauh lo maithei. Tin, kan hriat loh lamah thu hretu an lo awm lehzel si a, Johny-a kan that lai ngei mita min hmu tu an awm ang tih reng hi kan lo ngaihtuah ngai lo a ni" Siamliana chu a thu kun lap reng a, a hmel chu hmuh a nuam lo takzet.




Chutia tualthattu an han hriat chian tak ah chuan chu lai a awm te pawh chu an thin a ur in an rilru a na a, an ngaihtuahna a vak thui kher mai. Inspector chuan siamliana leh ngaihzualate chu station lama hruai turin kawl chu a han bun tir ta a.








Inspector remruata chuan a hnuchhuina chu ngun taka chhui let dauh dauh in meizial chu a pak khu talh talh reng a, Chutah dawhkan a a phone chu han ban in a thiannu message tur chu a han hmet malh malh a.








Rinpuia pawh chuan In lama a chhungte chu bia in kar thar lo awm tur a an pu ten chawlh an tiam thu chu han hrilh in a hlim hle

mai. Inspector remruata nen a an hnuchhui na chanchin te, inspector hnuchhui dan danglam tak chungchang te chu a chhung te hnenah chuan a han hrilh ve malh malh bawk a.