HMANGAIHNA VANDUAI_Chapter-1

[April Hmar Liverpool]

HMANGAIHNA VANDUAI

Ziaktu, Laltanpuia


Chapter _1

#Doctor Muansanga leh a nupui inkarah enge awm?midang tla zep ve an awm em ni? Doctor thih dan mawlh chu enge a awmzia? Misual thil tih ani em?#


He lai bial, police veng huam chhungah na na na hi chuan an ni ang a mi neinung leh khawsak sang hi chu an awm ve anih pawhin kut tang thliah tham lek an ni ngei ang. Chumi tifiah tur chuan amah hi doctor anih mai piah lamah an chhungkaw sumdawnna atang a an sum hui luh ringawt pawh hian an ni chhungkua hi chu chhungkaw vantlang chunglam an nih zia leh mi khawsak sang an nih zia chu a tarlang Chiang Mai awm e.




Vantlang hmuh theihah leh mite hriat phakah pawha mi challang leh sum nei ngang an ni a, an chhungkaw hausakna pawh hi mite chuan a ruk a rala an lo chhut pui fo thin a ni reng a, tin doctor nupui saidingi chu nu a ni tawh na vang vang a nu hmeltha leh pian to ken la fuh zet mai, mipa mit la tawk tur chauh a a pumrua leh hmel inchhawih a ni a, a vanglai na na na chuan nula vantlang chunglam a leng ni ngei tura pian nalh leh hmeltha tawp thang a ni.




An chhungkaw chanchin leh an nunphung te reng mai chu mite ngaihven leh mite chung en an nih tawh sa nak alai a chutia chhungkaw pa ber doctor muansanga chunga thil thleng rapthlak tak mai avanga police veng huam chhung puma an chhungkaw chanchin miten a sawi tui bera an neih mek pawh chu thil awm lo a ni hauh lo.




Doctor muangsanga chu a chenna In ngeiah thi a hmuh a ni tlat ani, a thih chhan hi lungphu chawl ni a ngaih a ni. Nimahsela doctor muangsanga rûang hmu tu a fapa Freddy-a sawi dan avanga doctor thih dana ngaihdan hrang hrang a pian chhuah tak avangin police lamah thlen a ni ta hial a,




Freddy-a chuan a pa chhuat a thisen nena inchiah piah nuai chunga lo thi khawng reng ava hmuh chuan rang takin ava bawihsawm nghal thuai a, mahse Freddy-a chu a pa rûang awm dan mak danglam tak mai chuan a rilru a hruai thui sak kher asin le, doctor chu phawk fe hian a meng kalh ru mai a, a hmel atang chuan hlauh lutuk avang leh Mangan lutuk avang ani tih chu mi pangngai tan pawh a hriatthiam theih tur a ni tlat si a ni.




A thih hma chuan thil hlauhawm tak leh rapthlak tak a tawng ani ngei ang. Chu thil chuan Freddy-a ngaih chu a ti tha thei mawlh lo. doctor lu atang chuan thisen a mak a maka tam a luangchhuak ngei nguai mai a, a thih hun hi zan lam a thil thleng ani na chungin a inthuamna erawh hnathawk tura intintuah ang hlauh a ni lawi si. khum bulah chuan dawhkan pakhat awmin chu dawhkanah chuan a lu chu tauhin a hnuk a chat zui ta ni ngeiin a lang.




Doctor thihna chuan veng pum a tuam chhuak nghal a, doctor lar leh chhungkaw langsar tak chunga thihna rapthlak tak mai thleng chuan titi a ti tam takzet. Doctor hi a thih hma ni hian a nupui saidingi nen hian thu inhmu lovin an in bakkaih ve deuh a ni awm a, an thu inhnialna thu hla erawh hna chungchang leh chhungkaw kaihhnawih thil a nih avangin mipui hriatah puanzar chiam a rem lo thung.




Nimahsela chu thil, a nupui nena an inbakkaih na thu hla chu mite chuan an ngaihven in hriatchian an chak tlat a, doctor thih dan chungchang ngaihven tute chu phung velh an sawi ang maiin an pung lut lut reng mai si a ni.




Doctor leh a nupui saidingi te inkarah hian boruak duhawm lo ti a han sawi tur erawh thenawm khawveng te chuan tun hma atang tawhin an hre ngai meuh lo a ni awm a, chutia a thih hma ni a an nupa an han inbakkaih thu hla avang ringawt chuan ngaih han tih that loh kher pawh chu a tul hran awm lo ve.




nimahsela doctor hi nupui te ngam lo ti a han sawi tur chi erawh a ni ve hrim hrim thin roh a, a nupui saidingi lah a nulat lai atang tawha nula lu zo leh hmeichhe hlim thei tak, mipa te tan a rilru han kuai peng veng veng thei tur khawp a vengkhat nula zei hawih leh pian thiam, tawngkam ngaihno bei nei mi alo ni ve vei bawk nen, a pasal tan meuh pawh hian thaibawih han nih rawk rawkna tham tur khawpa hmeichhe ngainatawm leh mipa thlung lu thawi dam thiam ngang alo ni leh zel si a, doctor pawh chu lamah chuan han dem ngawt theih a ni bik tlat lo a tin a ni.




Tin, doctor chu tun hma pawhin taksa lamah bawrhsawmna a nei ngailo a ni awm a, mi hrisel pangngai tak leh smart tak niin a hna pawh chu a tlin zar zar thin viau a ni. Pa tawngtam a ni lova, pa uanthuang lah a ni hauh lo. Chutihrual chuan then rual han kawm vel erawh a thiamin mite ngainat pawh a hlawh viau thin a, a damlo enkawl te ngei pawh in a an fak leh an ngaihsan em em thin a ni.




Fa pahnih nei tawh in mipa leh hmeichhia an ni a, an chhungkaw nun awhawm tak leh zahawm tak avang a mite chung en leh thenawm khawveng te pawh in a an ngainat an ni. Mahsela chutiang a nih lai chuan thla thum liam ta atang khan doctor chu a mizia a inthlak hlawk alo ni awm a, a hmel a bawrchhawr in a lang upa sawt viau mai alo ni awm e. A hmel chu hmuh theih in a tla deuh deuh zel a, a cher in a dawldang hle a, a hma ai zawngin a tawngtam lo va, a thin a chhia in dawhtheihna a tlachham sawt viau niin a lang.




A taksa chu a uluk lo chho viau bawk bawk nen, a hnathawhna lamah lah ni se a nun zia chu midang ang hlauh a ni ta a ni. Nimahsela a mizia a bet tel tlat a nupui leh fanau te a hmangaihna leh a ngaihtuahna chu ala thlak danglam chuang hauh lova, a chhung te pawh hian pa ber awm dan chu ngaih tha lovin a hriselna lam ngaipawimawh turin an hrilh ta fo mai reng a,




Nimahsela doctor chuan amah an ngaihtuahna te chu a beng a rawngah a khung duh lem lova, ama ngaihdan leh duhdan in a awm mai thin a ni. Chutia hmuh theih a a hmel leh taksa a tlak hniam tak zelah chuan hai theih ni hek lo le, tumkhat chu ni khaw hre lo in a hnathawhna hmun ah a tlu ta hial a ni awm a, chumi hnu chuan amah ngei pawh chuan a chhung te thurawn la in a hriselna chu a han in enfiah ve ta poh a, chutah chuan lung lam thalo a nei chho tan a ni tih hmuhchhuah a ni ta ani.




Nimahsela doctor fapa Freddy-a rilru ah chuan a pa hlau hmel leh mangang hmel chu a cham reng a, khati tak maia doctor hmel a hlauhna leh manganna langchhuak kha Freddy-a tan chuan thil mak han tih loh rual a ni tlat lo. chuti tak mai a lungphu chawl a thi tur meuha awm tir tur chuan eng thil rapthlak leh hlauhawm chu lo tawng ni maw.




Police lam chuan uluk takin doctor room chhung leh a chhehvel te chu an han en fiah ve bawk a. Nimahsela doctor thihna a thil tangkai tur awm ang engmah an hmuchhuak lem lo. Nakin deuhah chuan inspector remruata pawh chu a rawn thleng ve ta a. Freddy-a pawh chuan inspector chu alo ngaihven nghal thuai a, thil thlen dan leh chanchin kimchang chu alo hrilhfiah nghal zung zung bawk a.




Inspector remruata chuan Freddy-a hnenah chuan a pa rûang a va hmuh laia a hmuh dan kimchang chu zawtin Freddya pawh chuan a ngaithat lohna te, a pa hmel a mak tihna leh manganna lo langchhuak te kha mak a tih thu a han hrilh ve a, inspector pawh chuan doctor thih zan a, in leng an neih leh neih loh te chu zawtin doctor phone chu enfiah a duh thu a hrilh bawk a,




mahsela Freddy-a chuan inspector hnenah chuan a tir a a pa thih danah a ngaih a that loh avangin tualthahna a nih theihna laia rinhlelh tur awm thil zawng zawng chu a belhchian vek thu a hrilh thung a, a pa phone pawh chu en in engmah han rinhlelh tur awm a hmuhchhuah loh thu a hrilh bawk a, Chutah meuh zawng inspector pawh chu chuti taka doctor in thil rapthlak tak hmu ang mai a mangang tak leh hlau thlabar hmel pu meuh a a chahthlak pui tak thil chuan a rilru a hruai thui sak ve ta hle mai a ni.


Inspector chuan doctor thihna hmunhma vel chu uluk takin a thlithlai a, khum bula dawhkan, doctorin a lu a sawhna ni awm tak pawh chu uluk takin an enfiah a. Tukverh lam leh room chhung hmun tin te pawh chu uluk takin an en kual vek bawk ani.




Inspector chuan doctor muangsanga nupui saidingi chu thu a zawt uluk in a ngaihven viau mai a, nimahsela hnuchhuina atana han tangkai tur thil ah erawh nilovin chu nu valai, a bula awm nuam tak mai leh a titi ngaihthlak nuam tak, a kum ngaihtuah a hmel tha tak leh a pian to ken te pawh la nalh tak mai kianga hun han khawhral ve hrim hrim chu senior lam pan mek inspector ruata chuan a thlahlel a ni tih a hmel leh awmdan rengah pawh chuan rinpuia chuan alo hai hauh lo thung.




A pu, inspector remruata, kum naupang zawk zawk tawh bik lo leh nupui mamawh ve tawh tak mai chuan a awmdan leh saidingi a han chhawnchhaih vel danah te reng mai pawh chuan a pasal sun zo hlim hlawt, hmeithai duhawm tak leh hmeltha eltiang saidingi chu a beisei ru hauh lovang tih pawh chu rinhlelh awm rum rumin a hre nghe nghe. Saidingi'n a pasal sun a hmeithai chan a han chang ta mai tur chu inspector hian remchangah alo la pawh a ni mahna le.




rinpuia chuan a pu khawsa zia lerh ruk hmel zet chu tun hma in ala hmu ngai hauh lo. Saidingi hmaah chuan inspector remruata chu a lai in a khawr ru deuh tlat tih a lang reng mai a, chutia nu valai leh pasal sun hlim hlawt laka inspector a han che lai kual ta vel mai pawh chu rinpuia chuan alo ngaimawh kher mai.




Saidingi duhthawh hmel tak leh ngaihzawn hmel tak maia inspector a han awm kawisawi kual vel te reng mai chu rinpuia chuan alo ten ru hluah hluah a, Inspector awmdanah chuan doctor thihna chu a theng a thawng ah a lut mawlh lo ani tih a hriat reng mai si, chuti tak mai a thawklehkhata inspector meuh hmeichhe pakhat laka a han che ze gunda kual vel ta mai chu rinpuia tan chuan nuihzatthlak a tling hial ani.




Inspectorin inla zei fahran mai a saidingi a han be sawm kual vel te mawlh mai chuan rinpuia mit chu a ti kham in a beng te chu inspector tawng no tak leh tawngkam thlum tak tak te avang chuan a hup phui lo chauh a ni. Chumi atang ringawt pawh chuan doctor nupui saidingi hmelthat tur zia leh duhawm tur zia chu a hriat theih mai awm e.




Rinpuia chuan dawhkana file han thehthlak pah chuan inspector hnenah chuan "sir, pi saii kha a vanglai hmang mek chu la ni ngat se zawng mahni tawka nula to leh hmeichhe nalh tak tur niin ka hria" awmze nei fe hian a han ti a.




Inspector chuan rinpuia thusawi awmzia chu ngaihven lo fe hian "i sawi dik. Hmeichhe nelawm tak zawng a ni ngei e" Alo ti bung deuh nghut ringawt. Rinpuia chuan "sir, hei i kum pawh a tam chho ve tan chu a ni mai si a, enge i thiannu nen a in inkar te kha, inla tha zel chiah a maw?" Inspector chuan file en mawlh mawlh pah chuan a han rum deuh nghut a, chutah bung zet hian "a teuh lo mai. Nancy-i te chuan pasal a nei daih dawn alawm" a han ti liam puat a.




Chutah rinpuia vek chuan tifuh inti zet hian "chu vang chu a nih chiah dawn chu, sir lungngai reng reng suh, nimahsela kum upa lam lakah hian i rilru te hi alo tuiral palh hlauh a nge" awmze nei zet chuan a han ti leh a. inspector pawh chuan rinpuia en meuh chung chuan "rina, hmangaihna chungchang hi sawi lawk theih a ni hauh lo a nia, kan tum leh kan duh vang ni hauh lo hian kan phu tawk a ni emaw kan phu hauh loh pawh ni se, kan tan a ruat hi chu an awm ve mai" tiin file bawk chu a bih san leh mai a.




Rinpuia chu a insum thei ta ngang lo, "sir, tun tum zet zawng doctor muansanga thihna chungchang hian nangmahah pawh nghawng thuk tak a neih ngei hi ka ringhlel lo ve, tum dang zawng aiin i ngaihven ru riau in ka hria, chhan tha tak a awm a ni tiraw?" Inspector chuan "rina, mihring te hi chuan thinlung hi kan nei vek alawm, i hriat ang in keipawh hian ramsa mawl ngaihtuahna leh thinlung ang chauh ka pu bik lo asin. Hmel duh zawng leh ngainat zawng awm hi chu chung lamin min duan dan a ni ngai e" tiin rinpuia thusawi awmzia chu a hrethiam reng a ni tih a tilang reng a.




rinpuia pawh chuan nui lek lek ner deuh sang chung chuan "sir, doctor thihna hi engtin nge ni ta ang?" A han ti daih a, Chuveleh inspector chuan "doctor chu postmortem a ni a, result a zirin a thih chhan diktak a hriat mai ang" Alo ti liam leh puat ringawt a. Chutah rinpuia bawk chuan la duhkhawp lo tih hriat tak mai hian "anih chuan sir, doctor fapa Freddy-a ngaih ti thalo tu kha engtin nge ni ve leh ta ang? FIR a thehluh chhan ber kha a ni si a" A han ti leh a, inspector chuan "kha zawng, doctor kha lungphu thalo nei a ni a, a thih dawn khan a chhia leh tha hriatna a fim tih a lang reng, han thih dawn meuh te chuan tu fa in nge maw han hlau lo vang a han rap lo tehlul ang ni, chumi a nih loh vek chuan thlarau tihbaiawm tak a hmu te pawh a ni mah na le"




"aw ni e sir, chu zawng thil ni thei a ni ngei mai. Thlarau chungchang erawh ngaihdan ka nei ve lem lo. Ka ngaihdan chuan khami zanah khan misual tu emaw In ah khan alo lut ru a ni ngei ang. Tichuan chu misual chuan doctor room kha a thleng chho a nga, doctor lungphu thalo ta chuan misual a lo hmuh ve leh chuan hlau mangang thlabarin a thih phah ta a ni ngei ang"




"Ni e rina, chu zawng alo la langchhuak zel dawn alawm le, nimahsela misual hnu hma awm ang engmah kan hmu silo zawng anih kha maw, engpawhnise kan thiannu saii kha ka ngaihtuah takzet a ni. A ngaihtuah awm riau" rinpuia chuan nui tha chung chuan "sir, pi saii chu a ngaihtuah awm viau i ti e law? eng chungchangah nge" a han ti leh hram a, chutah inspector chuan "hmeichhia te hi chu an hlauthawng hma a, rilru leh taksa lama boruak danglam deuh an han tawn hi chuan an ngaihtuahawm riau zel a ni" A han ti dam leh thluam a, rinpuia chu a ngaihna hriat loh hmel fe chuan a then tha reng ringawt a.




Ni e, inspector chuan 'kan thiannu' te a ti vel a nih chu, hetiang ang hian inspector hian midang tu mah ala ti ngailo, 'pi' han hman pawh chu a hreh awm hle mai maw, Ni e, inspector tan chuan nu hmeltha leh pian ken fuh zet mai, a kum phu lova tituai la nalh saidingi chu 'pi' ti a han koh phal mai mai chi ziazang a ni hauh lo a nia nge.




Rinpuia chuan thingpui in tur rawn chawi luh la la pah chuan inspector hnenah chuan "sir hei, thingpui chu aw" tiin inspector thingpui tur chu dawhkan ah chuan a han dah a, inspector pawh chuan lawm thu lo hrilh luamin file bawk chu bih in alo la buai viau mai. Rinpuia chuan chhhuahsan leh mai a han tum a inspector chuan "rina, pi saii chungchangah i rilru tur awm ang ka hmu thiam ve reng a nia" chhuahchhal aw tak chuan alo ti vat a, inspector vek chuan "ni e, pi saii hi chu a vanglai chuan a to lehlawh viau tak ang. Mahse i ngaihdan ang kha engmah a awm lo a nia" tiin file bawk chu ala bih mawlh mawlh reng a.




rinpuia chuan a pu chu a ringhlel laklawh tlat tawh, hun rei tak chhung chu an lo inzui ve tawh a ni a, Khatiang ang reng reng a a pu khawsa zia danglam leh hmeichhe hma a a lai chhia inlak zei tum kual vel ta mai kha ala hmu ngai tlat lo ani.




Inspector chu a aw ka te chenin saidingi hma ah kha chuan a dik thei mawlh tlat lo a ni. A thiannu Nancy-i nen an inkar ah khichat alo awm vang a ni pakhat ngei ang, Nancy-i lah chuan pasal neih te alo tum anih tak tak phei chuan a pu chu a lainat ru lehling angreng hle zawk a.




nimahsela saidingi laka a pu han insawi fihlim tumna thu hla erawh rinpuia chuan a awih lo laklawh tlat. rinpuia chuan thutna ah chuan thuthmun han remin "sir, engemaw doctor thih dan chungchangah khan han danglam tih deuh emaw mak han tih deuh emaw te i nei em?" tiin a han zawt leh a, inspector chuan "rina, doctor fapa in a rindan kha a dik ngeiin ka ring. Dawhkanah khan doctor tlu tur chuan a lu sawhin a thi zui mai anih ka ring, tin amah doctor kha lungphu thalo nei ani tih kha theihnghilh lo bawk ila" a han ti a, rinpuia pawh chuan "ni e a dik ngei ang, postmortem result te chu han chhuak se, doctor taksa ah engemaw thil danglam an hmu anih ngawt loh chuan chu chu a thih chhan a ni ngei ang le, mahse a fapa ngaih that lohna mawlh mai kha a ni"




Inspector chu a thut hmun atanga rawn tho chhuak in "rina, chu lam zawng nakinah ala fiah chho tual tual mai dawn alawm, hei ka chhuak lawk dawn a, ka rei lovang" tiin chhuak tur chuan a insiam nghal mawlh mawlh a.




Rinpuia chuan a pu kalliam tur chu a en zui vang vang reng a, Nancy-i nen an inkar chungchang alo la hre ve hauh lo mai chu a indem angreng viau mai a, a pu chu a lainat ru hle mai a ni.




Chhun ni tlangsan vanglai a ni a, rinpuia chuan phone call a dawng hlawl mai. A han enchian nak chuan doctor muansanga fapa Freddy-a alo ni reng a, Freddy-a chuan a pa thihna chungchangah inspector hnenah thu hrilh duh a nei alo ni. Rinpuia chuan inspector chu a buai deuh rih thu alo hrilh thuai a, nakinah alo hrilh mai tur thu a chahin an inbiakna chu a ti tawp zui a.




Chawhnu her anih meuh chuan inspector pawh chu a rawn let leh tawh a, inspector hmelah chuan hriatthiam mai theih loh zawhna tam tak a hmuh theih a ni. Inspector chuan zawhna hlir a khat mitmeng nen chuan rinpuia chu a thlek ha reng a, rinpuia lo rinlawk loh ang takin inspector erawh chuan rinpuia hnenah chuan "rina, kan thiannu saii chu kan rin ang ngei alo ni" A han chawl deuh vang vang a, chutah rinpuia insum hman ta lo pek chuan "chu, saii chungchang bawk chu i va ngaihven a ni maw? Ni e, chhungkaw hausa ngang an ni a, an lar in mite ngaihven an ni a, tin chhungkaw pa ber heti hian a han boral zui leh ta mai bawk nen, titi lengvak ah pawh anni chhungkua in a chhiat an tawh chungchang hi mite thupui ber a ni lo thei lo a ni. A hlimchhawn te ala ni nen" rinpuia chuan alo ti thuai a,




inspector chuan "kan thiannu saii chu kan lo rinlawk ang ngeiin a vanglai pawha nula duhawm chungchuang leh mipa tam tak mit la tu ni pha ve ngat a ni a, kum naupang te in pasal a nei a ni awm e, tunah pawh nalh tak leh duhawm taka a la lan theihna chhan pawh hi ala upa hauh lo tihna anih chu, kan doctor famta muansanga erawh a nupui saii phu lova kum upa leh mi khawsa thei ngang an ni thung. Engtia chutia tlangval senior teh hrep in a tleirawl duhawm chungchuang leh hmeltha tawp thang chu nupui atan a han chhai thlu thei mai nge maw anih chiah chu le? mahse, sawi tak angin doctor hi pa neinung chhungkua an ni a, an khawsak a sangin an mit pawh a sang tih a nupui hmelthat em em danah hian a lang reng a, an rilru put hmang pawh a namai lo viau ngei ang le"




Chuveleh rinpuia chuan nuih za insum tih hriat tak hian "chu sir, a fuh chho dawn hle tak anih chu maw le, mipa thenkhat mit pawh ala la nasa mai awm si a, ama tawkah nula tam tak tluk loh ala ni pha ngei ngei dawn si" inspector chuan phur hmel fe hian "ni e, i ti dik chiah, ka sawi sual loh chuan tun atang reng pawh hian alak a tlaktlum tum mi engemaw zat chu an kat nuk tawh sa rengin a nia ka rin ni" Nui suk chung chuan a han ti leh a, Chuveleh rinpuia chuan "sir, nang pawh hi ilo ngaihtuah em em dan ah leh i ngaihven em em danah hian thil awmzia chu ka hrethiam reng a nia aw" tiin a han then tha a,




inspector chuan thutak fe hian "nilo rina, i mi ngaih ang ngawt kha chu ka ni bik lo a nia, mahse zep thu a cheng lo, a mize ngainat awm tak mai leh a tawngkam nelawm tak mai avang te erawh chuan ka huat phal chi chu a ni hauh lo alawm" tiin a melh ngai chu a melh vang vang a, rinpuia pawh chuan inspector chu lainat hmel taka han en in "sir, Nancy-i nen in inkar avangin a pawi ka ti lutuk" A han ti ve a,




Inspector chu a thutna atang chuan a tho hluai a, "rina, saii te awmna lamah kan tleh phei vat a tul a ni" A han ti hluai a, Chuveleh rinpuia pawh chuan "aw ni e sir, Freddy-a khan min rawn be tak asin, a pa thihna chungchangah thil hriatchhuah a nei a ni ngei ang" Alo ti vat a, chutihrual chuan inspector in saii chungchang ngawt mai a ngaihtuah erawh tha a tih pui lo hle thung. "Sir, pi saii chungchang kha chu dah tha ila, nakinah kawng te ala awm zawk ang, khuanu samsuih an tih ang te pawh hi thil thleng thei lo a ni bik tawp nang" awmze nei tak chuan a han ti leh a, Chutah inspector chuan "imm, chu Freddy-a chuan min bia i ti e law? a hun tawh reng a ni. Kal tawh i va tleh phei vat teh ang"




Doctor muangsanga chu mi tam tak in an ui a, chuti teh thut a a han boral ta mai chu an ngaithiam lo hle a ni. A fapa Freddy-a ngaihthat loh rukna pawh chu awm ang an tih pui viau mai a, police lam pawh chu han che chak deuh se, doctor boral chhan diktak chu hriat an nghakhlel tlang takzet a ni. Amah doctor han hmelmak a a chunga kut te hial han thlak mai duh tur chu tu tak ni ang maw? Nge ni a Freddy-a ngaihthat loh rukna chu thil awmze neilo zawk, doctor chu lungphu chawl a thi a niin a thih na ah chuan midang inhnamhnawih an awm lem lo ni zawk ang. Doctor fapa Freddy-a berin FIR a thehlut mauh mai si a, chu thil chuan chanchin danglam tak a pawchhuak lovang tih lah chu thil chiang engmah hriat ala ni rih silo.




Freddy-a chuan inspector hnenah chuan a thil hriatchhuah ang ang chu a han hrilh mawlh mawlh reng a, inspector pawh chuan uluk tak hian alo ngaithla dauh dauh reng a, inspector chuan "chu, i pa chuan zungbun a bun lo i ti e law?" Freddy-a chuan "aw ka pu, ka pa zungbun kha engtiang taka hlu nge anih ang kei chuan ka chhut thiam hauh lo, ka nu nen a an inneih zungbun silver kual satliah ve mai niin ka hria, mahse keini tan a a hlutna erawh ka nu nen a an inneih zungbun anih avangin ro thil a ni a, a hlu takzet a ni"




Inspector chuan "anih chuan engvanga i pa chuan zungbun chu bun lo nge anih tak ang?"


"ka pu, ka pa hian ka nu nen a an inneih zungbun hi a roh hle a, engtik lai pawhin a bun reng thin. Tumkhat, zungbun a tibo palh hlauh mai a, kan chhung a kan buai zia kha, khami atang reng pawh khan ka pa khan a zungbun kha a roh hle ani tih a chiang mai awm e, mahse khami zan, a thih zan khan zungbun chu a bun hauh lo mai a, ka rindan chuan a mu turin a phelh a nga dahthat tuma a buai vel laiin a lu chu a hai thut ang a tichuan nikhaw hreloin a tlu zui ta mai anih ka ring a, mahse khawiah nge zungbun ber chu a awm tak ang? Ka pa room chhungah zungbun hmel reng ka hmu silo a"




inspector chuan "chuti anih chuan zungbun chu ruk bo anih i ring tihna em ni?"


"Ka pu, chumi ah tak chuan ngaihdan ka siam thiam mai lo a ni. Room tukverh zawng zawng ka check vek a, mahse tukverh in hawng a awm silo. Kan In a luhruk theihna lai ni a ka hriat chu ka enfiah vek a, nangni ngei pawhin in enfiah kha"




inspector chuan "imm, i pa room chhungah hian CCTV camera emaw te chu lo dah ni ula chuan khami zan a i pa chunga thil thlen dan kimchang chu kan hre thei ngei ang" alo ti bauh a, a ngaihna hriat loh hmel tak chuan Freddy-a chuan "ka pa zungbun bo hi khawiah nge a awm tak ang? tin engvanga thil man tam tak tur pawh nilo chu engtia han bo ngawt mai nge anih lai a chu ka hrethiam ta lo a ni" A han ti a, inspector chuan "imm, i pa zungbun bo chu zawng turin min duh tihna a niang maw?" A han ti ve ta a,




Chutah Freddy-a pawh chuan "inspector, ka duh chu i hria e, ka pa zungbun bo hi a awmna chin ka hria anih ngat chuan chu chu thil pawimawh tak a ni ngei ang"




"Imm, thil man tam tak tur pawh ni lo chu a bo a, Nimahsela inneih zungbun erawh a ni thung. chu thil chuan eng thil nge min hrilh rinpui?" tiin rinpuia lam chu inspector chuan a han thlek a, rinpuia chuan "sir, inneih zungbun silver kual satliah ah chuan rukru tan a thil pawimawh tur pakhat chiah a awm, chu chu" inspector chuan "chu chu chhungril lama inlaichinna thil a ni" Alo ti thuai a, rinpuia chuan "sir, hmangaihna chungchang a ang ber in ka hria, hmangaihna runthlak tak nen he thil hian inzawmna a nei a ni thei mai lo maw" alo ti ve bawk a. Atthlak erawh a tih hmel hle.




Freddy-a chuan hriatthiam loh hmel zet hian "pu inspector, enge chu chu a awmzia? Zungbun chu ruk lo ni ta ang se, a rutu tan chuan zungbun chu ka pa in a roh tluk zet khan a hlu hle tihna a niang maw?"


Inspector chuan "I sawi dik chiah, chuan i pa room chhung khawi lai ah emaw, i pa khumah emaw, chhuatah pawh ni se, zungbun bawm, zungbun han dahthat mai theihna tur awm ang chi hmuh i nei em?" Freddy chuan "aih, chutiang thil engmah ka hmu hauh lo mai"




Inspector chuan "chuti anih chuan i pa hian a zungbun hi a phelh hauh lovang, a thih hma ni hmasa lamah emaw a tibo palh emaw a dahtha pawh a ni thei a, chu chu nangni hriatpui loh pawh a ni maithei asin"




"Sir, ka pa hian a zungbun hi a bun reng mai ka tih kha, ni e tumkhat chu a zungbun kha a tibo ngei mai, khami ni, zungbun a tih bo tum atang khan ka pa in a zungbun a roh zia leh a ngaihhlut zia hi ka hrechiang tawh hle a, ka tum reng vang pawh ni bik hauh lovin ka pa kut tang hi ka lo en leh palh fo thin nghe nghe asin, khami hnu ah kha chuan a zungbun hi ala tibo leh lo hrim hrim, mahse khatia ka pa rûang buaipui a kan han buai tak chiam lai khan ka pa in zungbun a bun lo tih reng reng kha ka lo hre tawh lo a. Ka va hmuh a a hmel lo awmdan rapthlak tak leh hmuh hreawm tak avang khan ka ngaihtuahna a kal thui hle a, kha khan ka rilru zawng zawng a hruai kawi a ni ber mai" a han ti leh a. Chutah inspector chuan "imm, chuti chu i pa zungbun chu hmuh hmasak phawt a ngai anih chu, khawnge I nu hi a awm?




"Aa, ka nu chu choka lamah a awm ang"


Inspector chuan saii bula awm chu nuam a ti tih a awmdanah chuan a lang reng mai a, inspector hmel chu a nung sar a, saii chu mit tla dawn dawn hian a thlek uluk in hmuh nuam a ti hle ani tih a hai theih mawlh loh, a ni lah tak a, chu nu ngainat awm tak mai leh hmeltha tak mai chu mipa tan chuan en liam puat chu thil har tur tak a ni reng a ni.




Saidingi chu nula la ni ngat se zawng, tlangval senior leh kum uaithla lam tawh kan inspector ngei pawh chu a siruk lain a thawkchhuak nghal rum rum lovang tih a sawi theih hauh tlat loh a ni.