HMANGAIHNA VANDUAI _Chapter-2

[April Hmar Liverpool]

HMANGAIHNA VANDUAI
Ziaktu, Laltanpuia


Chapter _2


Ni hnih a liam a, mitthi ruang posmortem result chu a chhuak ta a, doctor taksa ah chuan damdawi hmuhchhuah a ni a, chu damdawi chu mutthilh na damdawi thawk na tak chu a ni. A lu ah chuan hliam na tak a awm a, a khabe ruh dinglam chu a auh ani tih hmuhchhuah a ni bawk. Chumi rual chiah chuan doctor fapa chuan an chenna In bulah chuan a pa zungbun ni ngei tura ngaih chu a chharchhuak ta hlauh bawk a.




Inspector chu a hmel ah chuan a phur a ni tih a lang reng. Saidingi te chhungkua han buaipui vel hrim hrim chu dan pangngai piah deuhah nuam a ti tel tlat a ni. Freddy-a chu ni dang zawng aiin a hmel a ngui a, phurna reng reng hmuh tur a awm lo. A mitmeng chu a dul riau bawk a, a pa thihna chungchangah thil hmuhchhuah thar a awm tak zel avang a phur viau tur anih laiin beidawng hmel a pu lek lek zawk mai.




A ngaihtuahna chu a kal thui hle ani tih lah chu a hriat reng mai a, inspector chuan uluk fe hian Freddy-a hnenah chuan zungbun chu engtia hmuchhuak nge anih chu a han zawt ta a, Freddy-a chuan an awmpui nula in a pa room awmna lam dep tui chhe luankawr bula a hmuh anih thu a han hrilh a, chumi rual chiah chuan inspector chuan chu lai hmun chu enfiah a duh thu a han hrilh nghal thuai a.




zungbun lo awmna tuichhe luan kawr atang chuan doctor room chu a han hmuh theih a, doctor room awmna hi chhawng thumna a awm niin room tukverh pawh chu hmuh theih a ni. mi san tha pangngai tan chuan chu lai tuichhe luankawr atang a doctor room a han inban kai mai pawh chu thil harsa tur a nilo lah tak a.




Inspector chu a han insang phek hmasa te te a, boruak chu han hip lut hrâwk hrâwk in a thawchhuak leh ham ham thin a, rinpuia chuan mak tih hmel zet hian "sir, i tha maw?" alo ti thuai a, Chutah inspector chuan phur hmel fe hian "rina, ka lawn dawn, doctor room ah khian" rinpuia chuan inspector khawsa zia chu hrethiam in "awle sir, fimkhur rawh aw"




inspector chu bangah chuan a lawn zai zai a, hnuai lam atang chuan fimkhur turin an lo chah reng bawk. Mahse hnuai lam a mite chuan an sawi zo hman awrh tihah chuan inspector chuan a thil rah lai chu a rap pelh palh ta hlauh mai, Chiang zet hian a hnuaia hnim zingah chuan a hlawm tla nghal nawlh mai a, hnim chu a delh eng thla ûar mai, hmeichhe te ri that an hre zui a, saidingi alo ni.




Chuveleh hmanhmawh zet hian rinpuia leh Freddy-a te chuan inspector chu an han kaitho nghal thuai a, inspector erawh a na lo hlauh, saidingi'n amah ngaihtuah hmel taka an lam a rawn pan a hmuh chuan inspector chu zah avangin a sen tan tan mai a, rinpuia erawh a nuih a za ru ngang mai. Nimahsela mi luhlul ngang inspector chuan tlawm ngai zet hian bangah chuan lawn that leh ngat chu a han tum a, saidingi'n lo khap mahse inspector erawh saipui kal lai an sawi ang maiin dan beh theih erawh a ni hauh lo.




Inspector chuan tukverh awmna a han thlen chhoh chuan tukverh chu ngun takin a en fiah a, tukverh an siam dan chu an uluk hle mai a, misual han luh ruk mai mai theihna atan chuan a awm khauhin a rinawm mah mah ani.




Thingpui no dawm pah chuan inspector ruata chuan Freddy-a hnenah chuan zungbun chu a han dil a, Freddy-a pawh chuan zungbun chu alo pe ve mai bawk a, Chuveleh inspector chuan saidingi chu a fala hmuh lawk a duh thu a han hrilh leh a, rinpuia chuan inspector in saidingi bawk a han lam leh thin chu buaithlak alo ti ru leh viau tawh.




Mahse ngun takin a han ngaihtuah a, zungbun bo chu doctor te nupa inneih zungbun a ni a, tuichhe luankawrah hmuhchhuah a ni a, chumi chungchangah chuan chhan tha tak neiin saidingi chu inspector chuan a mamawh ngei chu a ring ta zawk a, a hma atang tawh a saidingi a ti fo te, inneih zungbun a han bo dan te a han ngaihruat chuan inspector ruata ngaihtuahna ri rûang ni a lang chu hrethiam in a in ngai ta zawk a ni.




Inspector remruata chuan saii hnenah chuan "pi Sai, hei hi in inneih zungbun a ni ngei em?" Tiin zungbun chu saii hnenah chuan a han pe a, saidingi chuan ngun zet hian zungbun chu a han en fiah a, chutah dam thliam hian "aw pu inspector, kan inneih zungbun ngei a ni alawm" Chutah, inspector chuan saidingi kut tang a zungbun chu ngun zet hian alo thlek dauh dauh a, saidingi kut zung u a zungbun leh tui chhe luankawr a zungbun an hmuh chhuah chu a in ang lo tih a hrethiam a,




Chutah, inspector chuan "khawngaihin pi Sai, i zungbun kha kalo enfiah ve leh ang chu" tiin saidingi zungbun ve thung chu a dil a, saidingi chuan phawk fe hian "pu inspector, ka zungbun hi chu kan inneih zungbun a ni lo a" alo ti thuai a, inspector chuan zungbun chu ngun zeta en in, Chutah inspector hmel a zawhna lo lang chu hrethiamin saidingi chuan,




"Tlem lai deuh khan kan inneih zungbun hi ka ti bo a, ka pasal pawh a lungawi lo viau nghe nghe a, kan chhungkua in ka zungbun bo zawng chuan kan buai viau nghe nghe. Kha mi hnu khan kan hmu zo lo a a dang ka siam tir leh ta ngawt mai a ni" Chutah inspector chuan "imm, chuti chu i fapa sawi kha a ni ang maw? Mahse pi sai, i zungbun siam tir leh chu in inneih zungbun nen a in ang silo a, i pasal chu a lungawi viau lo tawp ang le" A han ti a, chuveleh saidingi chuan "mama chuan ka zungbun bo thu a sawi em ni? Ni e, ka zungbun siam tir leh chu a in ang pahnih ka siam tir a lawm" alo ti leh thuai a, inspector chuan "a dang pakhat zawk chu khawiah nge a awm?" Alo ti vat a.




Saidingi chuan "ka pasal khan ka siam tir leh kha a bun duh tlat lo a, a hlui zawk kha a duh tlat a, chuvang chuan pakhat zawk chu ka dahtha ta a, mahse tunah chuan khawiah nge a awmna chin ka hrechhuak zo tawh lo a ni. Chuan pu inspector, ka fapa chuan ka zungbun tih bo chungchang chu a sawi em ni?"




"Aih sawi lo. I pasal zungbun tih bo thu erawh a sawi, mahse in hmuh leh thu a sawi a, chu chu tun a thih ni thleng a a bun tak reng thu a sawi a ni. Mahse a thih lai khan i pasal zungbun chu a bo ta kha a ni a, mahse hei tui chhe luankawrah kan han hmuchhuak leh ta chu a ni a" Chuveleh saidingi chuan "inspector, he zungbun bo kan hmuh chhuah leh tak hi keima tihbo zawk pawh kha alo ni reng zawk maithei asin" inspector chuan "aih ni love, hei zawng, in inneih zungbun ngei a ni tih i hrechiang a, mahse a hmel en hian a bo na ala rei lo tih a hriat a, i zungbun tihbo chu ni se a hmel hmuh tlak a awm meuh tawh lo ngei ang"


"Ni e inspector, i sawi chu a dik zawk a nge"




Rinpuia hnenah chuan inspector chuan "rina, kan pi-i hi a hmel en ai daih a nu zuam awm loh tak a ni ngat mai ka ti" a han ti a, rinpuia chuan a hmela zawhna lang chhuak chung chuan "sir, eng chungchang nge in han sawi a?" alo ti vat a, "rina, kan pi-i thusawi leh a fapa thusawi dan a inkalh tlat a ni. Inneih zungbun chu pakhat zawk a bo a, kan han hmuchhuak ta cheng a, kan pi ta zawk pakhat chu a bo na a rei tawh thu kan pi-i chuan min hrilh leh tlat mai"




Chuveleh rinpuia chuan "sir, Freddy-a kha chuan a pa in tumkhat a tihbo tawh thu a sawi tak kha, pi saii tihbo a sawi tumna zawk ani thei a ngem?"


"Ni e, chu chu alawm a tir kha chuan kan pi saii hi zungbun bo latu anih theih mai kha ka han ring dawn dawn a, mahse tunah kan han hmuchhuak leh ta chu a ni a, alo awmna han chhui dawn chuan enge ka rilru ah awm tih chu khatia bang a ka lawn tak chiam dan atang khan i hrethiam mai ang. Mahse tukverh chu rukru han luh ruk theihna mai mai tur atan a siam a ni hauh silo. Hemi anih loh vek pawhin zungbun la tu hi hemi In chhung a mi tu emaw tak hi a ni ngei ang. Zungbun bo buai a kan han buai tak hnuah khan a hlauthawng in kha lai tui chhe luankawrah khan a dah pawh a ni maithei, tin misual han lawnkai a tukverh a han lut ru ni a han ngaih mai theih tur khan tui chhe luankawr awmna lai leh kan doctor thihna room awmna lai chu alo in inkah pup chaw chho ve zut mai bawk nen"




Chutah rinpuia chuan "sir, zungbun bo kha awmpui nula hmuhchhuah anih tak kha maw le" alo ti khauh a, inspector chuan "imm, a tha e, awmpui nula chu chiang zawkin thu lo zawt ang che, rinhlelh awm anih hlauh chuan kan indim vak loh mai pawh a tul ang" "Awle, sir"




Inspector chuan Freddy-a hnenah chuan "Freddy, i pa hian damdawi a khawih ngai em? Entirnan, mutthilhna damdawi ang chi te" Freddy-a chuan "ka pu, chu chu ka lo sawi tum tak a ni a, nia postmortem result ah khan ka pa chu a khabe ruh dingkam a auh tih pawh hmuhchhuah tel a nih kha, kha pawh kha ngaih tih that lohna tham niin ka hria"




inspector chuan "imm, kha zawng, a tluk zawng a a insawhna pawh a ni thei, khati khawp khan a lu pawh a sawh na a ni si a" alo ti a, Freddy-a chuan "ni e, a ni thei na meuh mai, mahse ka pa thihdanah hian thil felhlel deuh chu a awm ngei ani inspector, zungbun bo kan han hmuhchhuah leh dan atang ringawt pawh khan" inspector chuan Freddy-a rilru tur chu hriatthiam pui tak mai hian "imm, i ring sual lo ang, i pa hlau thlabar hmel ringawt pawh khan nang amah hrechiang em em tu ngaih chu a ti tha tawh lo hrim hrim a ni a, chulovah a zungbun engtik lai mai pawh a a bun reng thin chu a bo a, a room awmna tukverh atang a han hawi thlak a tuichhe luankawr hmuh mai theihah alo awm lehzel si a, damdawi chu a ei ngai em?"




Freddy-a chuan "ka pu, ka pa hi khatia thla thum liam ta atang a a hriselna a han tlak hniam tak hnu atang kha chuan zan mut pawh a harsat thin ngeiin ka ring, mahse mutthilhna damdawi a ei ngai awm erawh ka hre hauh lo" Inspector chuan "i pa taksa ah hian damdawi thahnem tak hmuh a ni a, damdawi chu a ei a nih ngat chuan a mamawh tam viau tihna a ni ang, tin he damdawi hi a thawk na chi ani lehzel a, chumi anih loh vek chuan thil felhlel deuh chu a awm tihna ani mai"




Chutah inspector bawk chuan chik zawk chuan "Freddy, khami zan, i pa thih zan khan nangmah hi ava hmu hmasa ber tu i ni a, room tukverh kha a inkalh ngei ani tih i chiang a maw?" Freddy-a chuan "aw ka pu, nangma chanah han indah chhin la, ka pa room ah chuan lut in chhuat lai a ka pa thisen nen a lo inchiah piah nuai chu i han hmu ta mai a, amah bawihsawm tura chet la nghal in mahse ka pa hmel rapthlak tak mai, hlau thlabar leh mangang hmel avang chuan i ngaih a tha lo ngei ang, Chutah i ngaih a that loh chuan room chhung emaw room tukverh emaw lam chu i rilru ah alo lang hmasa ber lo thei lovang, khati em em a ka pa hmel a hlauhna leh Manganna lo lang ka hmuh khan ka rilru ah 'misual' tih alo lang nghal a, tukverh ka han belchiang a, mahse tukverh chu a inkalh tha thlap lawi si a ni. ka hrethiam lo takzet a ni. Tichuan ka pa hmel awmdan ngaihthat thlak loh tak mai chuan ka rilru zawng zawng ala peng lo thei ta lo a"




Inspector chuan "chhunglam ah tukverh chu a inkalh tlat a, chu chuan awmzia pakhat a nei thei, misual chuan i pa damlo leh chak vak lo tak mai chu a nam thlu a i pa chu thi chhawng a a leh der hnu chuan i pa zungbun chu ala a, tichuan tukverh atang chuan a put chhuak leh ta a, chu mi awmzia chu chhung lam mi in misual chu a tanpui tihna anih chu, misual tanpui tu nen a an remruat vek ani thei tlat ani. Ti chuan misual a chhuah hnu chuan amah tanpui tu chuan tukverh chu a kalh tha thlap a, mahse misual chuan a hmanhmawh em avang leh a hlauhthawn em avang chuan a zungbun lak chu tui chhe luankawrah chuan a thlauh palh ta a ni ngei ang"




Chuveleh thinur hmel fe hian Freddy-a chuan "imm, alo ni maw, tu tak chu ni ang maw? kan In chhung atang ngei a misual tanpuina nen a ka pa chu thah alo nih chuan a tu chu nge anih tak ang le? ka hriatchhuah hunah chuan ka zuah hauh lovang" tiin a inseh ruh nghal ul ul mai a, Chutah Freddy-a vek chuan "mahse inspector, chhunglam atanga misual han tanpui duh tur chu tu chu nge ni ta ang?" Inspector chuan "i nu thusawi dan leh i thusawi dan a in ang tlat lo lai hi enge awmzia?" Tiin a han zawt let a, Phawk fe hian Freddy-a chuan "ka pu, eng chungchang nge i sawi? Ka nu i ti e law" A han ti deuh ha a.




Inspector chuan "tlem lai deuh a i pa in an inneih zungbun a tihbo chungchang i sawi kha i nu zungbun zawk a ni tih i hria em?" Freddy-a chuan "ka pu, khami tum a ka pa zungbun tih bo chungchang kha maw? Anih nilo, ka nu zungbun a nilo, ka nu zungbun zawk a ni thei lo hrim hrim, ka nu te chu ka pa zungbun bo zawng in a buai buai ah a tang a lawm"




"imm a tha e, i nu nen hian in inhrechiang viau lo tawp a niang maw?"


"Ka pu ka hrechiang, ka nu in ama zungbun zawk bo ang a a sawi mai chu a mak ka ti hle mai"


"Awle a tha e, i nu nen chuan in lo sawi dun ngei a tul anih chu" tiin inspector leh rinpuia te chuan Freddy-a te chu an tinsan ta a.




Kalkawngah chuan rinpuia chuan Freddy-a te awmpui nula chuan zungbun chungchang engmah a hriat loh thu te, khatia ava hmuh chhuah mai theihna chhan pawh tuichhe luankawr bula pangpar buk chu thenfai a ngaih thu leh chumi paha zungbun chu hmuchhuak ta anih thu te chu a sawi luam a, inspector pawh chuan chulaiah chuan han rinhlelh awm thil a awm loh thu chu sawiin saidingi ngei chu an thlithlai tur anih thu chu rinpuia hnenah chuan a han hrilhfiah ta a.




Inspector chuan Saidingi leh a fapa in zungbun bo chungchang an sawi dan in ang lo chungchangah pawh chuan Freddy-a thusawi zawk chu a rin thu te a han sawi a. Tin saidingi'n an inneih zungbun nilo zungbun hran alo bun thu te leh chumi chungchang a sawifiahna erawh a fapa thusawi dan nen a inkalh a nih si thu te, Tin inspector chuan saidingi te nufa pawh chu lo inkawm chiang tura a tih thu te hrilh in a ringsual viau anih loh chuan doctor thih hma ni a doctor leh saidingi an inbakkaih chiam ang deuh khan tun tumah pawh chuan saiding i te nufa chu an inbakkaih a rin thu a han sawi tel luam bawk a.




Chutah, rinpuia chuan hlauthawng fe hian doctor chan ang kha Freddy-a pawh chuan a chan a ni zui mai ang tih a hlauhthawn awm thu chu inspector hnenah chuan a han hrilh vat a, inspector erawh chuan nui chung in saidingi chu mi hlauhawm anih a rin loh thu leh saidingi chungchang leh a hmuh dan chu office lamah chiang leh chipchiar zawk a a hrilhfiah tur thu chu a han hrilh a.




Freddy-a pawh chuan a theih tawp chhuahin thil awmzia chu alo ngaihven ve reng a, a pa taksa a an hmuh damdawi chungchang pawh kha ngaihven in, amaherawhchu a pa taksa a damdawi an hmuh chu a pa damdawi bawmah a hmu a, phat rual loh va a pa taksa a damdawi an hmuh chu a pa ngeiin a kawl thu chu inspector hnenah chuan a hrilh nghal vat a, tin chu damdawi chu ngaih han tih that lohna em em tham a ni lem lo ta bawk a, bawhzui tlakah an ruat ta rih lo.




An thil chhinchhiah tak te chu ngun taka han chhui dawn in inspector chuan a ngaihtuahna chhungril ber chu a kawm malh malh reng a, Chutah kawngkhar a khar rual a inspector thutna lam rawn pan mek rinpuia chuan saidingi chungchang inspector in a hrilh hlan nghakhlel tih hriat tak hian inspector ngaihtuahna lo hmang mek pawh chu pawisa lovin "sir, pi saii chu eng ang taka hmeichhe inthuk ru thiam leh ngaihven awm chu ni maw?" A han ti ta nge nge a, inspector pawh chu muang chuang hian a han hawi chhuak a,




rinpuia lam han awn da pah chuan "rinpui, kan pi saii chu hmeichhe hmeltha tawp thang anih thu chu sawi loh a leng a ni a, mahse ama tawk a hmeichhe zei hawih tak anih thu pawh hi ka hrechiang hman viau asin" rinpuia chuan nghakhlel tak hian "sir, pi saii lakah khan i tuiral ta emaw ka ti hman thaw thang asin, ka ngaih alo tha lo hman viau a"




"ni lul love rinpui, chutia pasal sun hlim hlawt laka han inlak vai tingtang ngawt thu awm suh, nimahsela min lo hmuh dan zawng zawng te kha i hmu sual love, mahse ka lemchanna mai an nih kha, Amaherawhchu he hmeichhe ngainatawm tak mai hi zawng ka haw hauh lo tih erawh i hriat kha, nu hmeltha leh duhawm zet mai hi i rin ang a ni hauh lo vang. Kei inspector meuh pawh in a theihtawp chhuah tak meuh meuh chunga a lak a tlaktlum viau ka tum chung pawhin a mit mei vawikhat lek chauh pawh mi zu han hmuh duh ma lek lova, hmeichhe leplerh zawng a ni lul lo mai. hei hi han sawifiah teh rina, pi saidingi i hmuh dan hi mi han hrilh ve reng reng teh"




Rinpuia chuan "sir, pi saidingi chu ilo chhai satliah awzwng lo tihna a niang maw? A leplerh leh lerh lo lama finfiah i tumna lek chu lo niin" tiin rinpuia chu a han nui deuh hak a, Chutah rinpuia vek chuan "ni e sir, zungbun bo chungchang khan ngaihdan fahrah te te chu min neih tir ve e, inneih zungbun silver kual satliah a han bo pil ngawt danah khan ngaihdan chu ka lo nei hman ngei mai, he thilah hian hmangaihna chhuanawm loh tak chungchang chu a tel ngeiin ka ring a ni. Mahse engtia chu hmangaihna duhawm lo tak chu han zeldin tur nge tihah erawh ngaihdan ka siam thiam mai lo a ni. Ka rindan chuan zungbun bo la tu tan khan zungbun kha a hlu hle a ni phawt a nga, rukru satliah a ni dawn lo a ni. Chumi bakah chuan han zeldin dan mai tur ka haihchham viau lawi si a ni"




Inspector chuan "ni e, sawi tawh ang in pi saidingi leh doctor te nupa hi kum inthlau tak an ni a, pi saidingi lah nu hmeltha elhkhen a ni si a, doctor erawh a hmel chu sawi loh, a kum a upa in hmeichhe tan a lung han ti leng vawng vawng thei turin a taksa mawina ah eng teh ual a ni hauh si lo nen. Mahse sum nei ngang a ni a, thil pawh a ti thei thawkhat dawn a ni tih a chiang reng. Tichuan le kan doctor pui roh hi hmangaihna ngah mi leh a thikthu pawh pe chhe ve tak a nih ngei pawh hi ka ring tel tlat bawk a ni"




Rinpuia chuan "chu sir, pi saii hian a pasal chu a lerhsan i ring tihna em ni?"


Inspector chuan "Imm, ring ve tho mai" rinpuia chuan "ni e, a awm ang ve viau reng a ni, doctor thih hma ni khan doctor leh a nupui kha an inbakkaih chiam tak kha maw le, chu te pawh chu thil ni thei tak a ni leh zel, mahse zungbun bo khan enge chu thil ah chuan inkungkaihna a neih tak ang. Pi saidingi ngaihzawng chuan doctor chu that in zungbun chu a la ta tihna a niang maw? Mahse sir, zungbun mai mai zawng pi saii ngaihzawng tana thil tangkai a nihna awm reng ka hmu phak ve ta hauh lo mai"




Inspector chu han rum nghat in "kha zawng, rukru hi mi fing tak leh hriatna zau tak nei mi a ni lem lo tih a hriat. Saidingi pasal kuta inneih zungbun awm kha a hmuhin thikthu chhia doctor rilru ang chauh chu a pu ve ta pawh a ni thei. Tin, he pa mawl mang ve tak mai hian zungbun chu thil hlu tak, man tam tak a hralh theih a inbeisei vang pawh a ni mah na, tin he rukru pa tan hian zungbun hi pi saii te inneih zungbun ni daih mahse, doctor in a hlut a a roh tluk zet khan eng kawng ah emaw tak a hlu vet vet hle tihna ani ngei ang" rinpuia chuan hriatthiam loh hmel tak chung chuan "sir, thil i chhui chip chiar mah mah ni in ka hria, thil awm dan hi ala inkaw kalh nuai ni berin kei chuan ka hria. Tun mai a han hrilhfiah mai tur atan chuan ala hma deuh in i hre lo maw?"




Inspector chuan "rinpui, thil te tham ber thleng a kan bihchian hi a tul thin reng a ni, pawnlam lang thei chin chauh kan hmuh len chuan chhungril lam a a zung pawimawh lai ber a kha kan hmaih mai thin reng ang chu. Pi saidingi pawh hi a landan ang ngawt hi a nilo tih i hriatthiam tawh ngei ka ring" Rinpuia chuan "sir, ilo belchiang ve nel nual ta a, kei a ngaihdan ngawt ai chuan i ngaihdan chu a rintlak zawk fe ngei ang le. Chuan engtia hma han lak zel tur nge ni ta ang?" A ti ve ta zawk a, chumi rual chiah chuan inspector chuan "e khai rina, kan pi saidingi leh a fapa Freddy-a te chu engemaw thu hla ah an inbakkaih chiam tawh ngei ang le, ti teh, enge an thu hla hriat i va tum leh phawt zawk teh ang, thil tha zawk beisei bawk ila" tiin a thutna atang chuan a thochhuak ta hluai a.




Inspector hmel chu a thutak hle a, a ngaihtuahna chu a hmang ngun hle ani tih a hriat, hmanhmawh hmel deuh hian saidingi te In ah chuan a tek lut nghal vut a, saidingi te awm pui nula a hmuh rual rual chuan "khawnge pi saidingi leh Freddy-a te hi?" a han ti nghal vat a, awmpui nula chuan "ka pu, tun mai khan ka pi chu a chhuak a"


Inspector chuan "khawiah nge a kal?" "Ka pu, ka lo zawt hauh lo mai. Amah lah chuan 'ka chhuak lawk dawn' a ti a ni chauh si a, a kalna tur a sawi hauh lo mai"




"Awle a lawmawm e, Freddy-a leh i pi chu engemaw thu hla ah an in hau thawm i hria em?" Inspector chuan a han ti leh hram a, awmpui nula chuan "aw ka pu, chawhma lam khan ka pi leh a fapa chu an inbakkaih chiam mai maw le!" inspector chuan "eng chungchang nge an sawi?"


Nula chuan "An thu hla kha ka hre chiang thei lo a, ngaihzawng chungchang te an sawi in ka hria, Freddy-a ngaihzawng chungchang an sawina ni maiah ka ngai a, inspector tun maiah tak Tak khan ka pi chu a chhuak alawm, a la hmuh hman hial lo maw" tiin pawn lam chu a han thlek ha a.




"Awle a lawmawm e" hmanhmawh fe hian motor awmna lam chu a pan leh nghal thuai a, rinpuia hnenah chuan "rinpui, pi saii chu a chhuak chiah anih chu, ka rinlawk ang ngeiin a fapa nen chuan ngaihzawng thu hla ah an inbakkaih chiam a ni awm e" tiin kawngpui lama motor in tlan thelh sap sap lamah chuan a mit chu a len nghal ruai a, rinpuia chuan "sir, pi saii chu a awm lo i ti e law?" chumi rual chiah chuan dawr pakhat atang a saidingi rawn chhuak lai chu hmu in "awle saw ta saw, rinpui, pi saii saw zui ang le" rinpuia pawh chuan i he lovin inspector sawi ang chuan saidingi inkhalh chhuak mek chu a zui ve nghal thuai a.




Saidingi chu an zui zel a, khaw pawn lam panin saidingi chu a tlan zel a, rinpuia chuan "sir, ka rinloh lam daiah min hruai tlat mai, pi saii chuan a ngaihzawng hmu turin a ngaihzawng awmna ah min hruai ka ring a nia" a han ti a. inspector chuan "ni teh suh e rina, he kan pi-i leh a ngaihzawng inkar ah hian eng ang in hmangaihna chiah nge awm tih chu thuhran ni rawh se, hmeichhe lepchiah anih avang a hetia awm hi a nilo ang, chhan dang vang zawk ani. Tin tunah rih chuan a pasal thihna hlimchhawn mai ala ni nen, hmeichhe lepchiah ang mai in a khawsa duh hauh lovang le"




khaw pawn lamah chuan an inzui zel a, thui fe an tlan hnu chuan saidingi chu a ding ta a, saidingi chuan hmanhmawh loh hmel fe hian a phone chu a han lekchhuak a, chutah tu emaw chu a han bia a, rei vak lo kawngpuia a awm hnu chuan kawng tlang lamah chuan a chhuk thla ta a, inspector chuan hmanhmawh fe hian "ti rawh le, i zui ang le, motor hi hmun biru deuh laiah khan han dah la aw" tiin motor atang chuan a chhuk nghal thuai a.




chu lai hmun chu mi hausa te huan lo ram a ni tih hriat tak mai hian kuhva kung lian tha tak tak an ding thelh sung a, thlang deuhah chuan thlam nalh tak lo ding in a velah chuan tuikhuah lian tak tak alo awm thluah bawk a, chhak deuh lai a mual pawng pakhat awmna ah chuan inspector leh rinpuia chu thingkung phenah dingin thlang lam a saidingi chhuk thla mek chu an thlir ran mai.




Saidingi chu thlam ah chuan a lut a, Chuveleh rinpuia chuan "ti rawh sir, an thawm i zu ngaithla ang" alo ti vat a, inspector chuan "ni rih love rina, he lai atang hian a mipa zawk chu kan lo nghak leh phawt ang. A mipa zawk lo thlen hma chu chet kan la thei rih lo a ni" Alo ti thuai a.




Saidingi chu thlam atang chuan a rawn chhuak leh a, phone bawk chu a han hmang leh a, chumi pah chuan chhak lam chu a thlek chho dauh dauh thin bawk. Chutah le, inspector chuan a phone chu a han lachhuak a, saidingi ngei mai chu biak a han tum ta a, rinpuia pawh chuan "sir, Freddy-a hrilh hriat ve chi a ni lo maw? nichin khan an inbakkaih chungchang kha i sawi a, a nu ngaihzawng neih chungchang hi a hrechhuak tawh a ni ngei ang"




Inspector chuan rum nghut chung chuan "ala duh lo vel a ni maw kan pii chuan" a han ti a, a hmel ah chuan a lawm lo hle tih a lang a, rinpuia chuan inspector hnenah chuan "sir, a ngaihzawng alo thlen veleh kan rek nghal mai dawn em ni? Kan dawp a nga kan inpuan tir tawh mai dawn alawm" alo ti zung zung a, a phur tawh lutuk tlat.




Saidingi chu thlam chhungah chuan a lut leh ta daih mai a, chumi rual chiah chuan chhak lam kawngpui atang chuan mipa pakhat hi thlam awmna lam pan chuan a rawn chhuk thla ta hnak hnak mai. Chutah le, chu pa an han hmu chiah mai chu inspector leh rinpuia chu barakhaih ang mai hian an phu rual dun chiang kher asin le!




"Lalpa leh! Saw te chu Freddy-a ani lawm ni?" Phawk zet hian rinpuia chuan alo ti a, inspector lu chu a hai takzet, a ngaihtuahna chu a buai nghal mup mup mai a, Chuveleh inspector chuan "imm, a nih ngei saw" alo ti zuai raih mai. Rinpuia chuan mak tih hmel fe hian "kan pi saii ngaihzawng chu a fapa Freddy-a maw?" Inspector chu inngaihtuah harh thuai in "rina, dawhthei takin i nghak rih phawt mai teh ang. Ni e, a ngaihzawng em chu a ni lul lova nge, kan lo rin dan ang lo takin thil a kal zawk mai a ni"




"Sir, Freddy-a hian a nu nen hian engemaw tak he laiah hian tih tur an nei a ni mai lo maw?" Inspector chuan "rina, eng chu nge an tih dun ngawt ang ni?" Rinpuia chuan "nufa inngaizawng maw?" Ala ti hram a, inspector chuan "rinpui, ngaihtuah loh loh chu ngaihtuah lo teh, Freddy-a kha han phone vat teh"


"Awle sir"




Freddy-a chu thlamah chuan a lut mek a, a phone lo ri chu han en in a dah leh mai a, "hrep hlawm tak chuan! nang a pawh chu 'phone ka la duh lo e' te i ti vel a ni maw! in chhungkaw thuruk hi a langchhuak tep tawh ani freddy" tiin rinpuia chu a rum hak a, inspector chuan "rinpui, phone leh rawh, i phone call a lak hma chu ti nawn tluk tluk rawh"




rinpuia chuan teu zet hian "sir, enge he laiah kan la tih reng ni? engah nge thlam ah khuan zu kalin kan zu bihthlak mai loh ang ni" "Nilove rinpui, in ngaihtuah fim rawh. An thlam khu chu ti mai mai a han bihthlak na chi ziazang anih loh khu, khutiang ang thlam changtlung takah khu chuan chutin kan bihthla mai mai thei lo tawp ang"




Engemaw chen chu an han ngaichang leh rih a, nakin deuhah chuan inspector chuan rinpuia hnenah chuan phone leh tur chuan a han ti a, rinpuia pawh chuan a han call leh ta a, mahse ala la thei chuang lo. Rinpuia chu a awmdanah chuan a insum hram hram tih a lang reng mai. "Sir, pi saii zawk hi ka han be leh dawn chhin a nge" saidingi chu a han call leh a, mahse engmah chhanna a awm chuang hauh lo. Rinpuia chuan "sir, a ni em em tawh lo, hei kan nghak rei tawh lutuk, enge thil awmzia hre turin i zu fin rawih mai teh ang"




Inspector chuan ngun zet hian a ngaihtuahna chu a hmang a, rinpuia thusawi chu dik viauin a hria, chutah phawk fe a an piah lam chu en in "rina, he thilah hian keini chauh hi bihthlak tum tu te kan ni bik hauh lo mai, ka rin dan hi a dik anih ngai chuan pi saii kan lo ringhlel kha kan tihsual der a ni"




Rinpuia chuan "sir, enge i sawi awmzia ni ngai?" Rinpuia chu a mangang tawh takzet a ni. "Rinpui, saw, en ta che, kan piah lawk a saw mi pakhat in min lo thlir reng a nia" rinpuia chu a harh zawk a, "lalpa leh! tih pah chuan chu pa, an mahni lo en reng tu lam chu a hawi phei nghal thuai a, chuveleh chu pa chu hlauhthawn hmel tak mai hian a pil bo nghal thuai a, chutah le, inspector chu rang zet hian a inperh tho nghal zawk mai a, chak fe hian chu pa awmna lam pan chuan a tlan ta chiam mai.




Rinpuia chuan hrilhhai mangang zet chung chuan inspector chu a zui nghal dawr dawr a. Kawngpui awmna lamah chuan chak zet zet hian an in um fua fua hlawm a, inspector chuan ring fe hian "ding rawh, ding nghal rawh" a pistol chu lekkang in "ding nghal rawh ka tih chu, i din loh chuan ka kap dawn che ania" chu pa chu a ding chawt a, Chutah a ban chu phar chhuak in muang chang hian inspector chu a rawn leh hawi ta a, khai leh! A hmel chu a rapthlak takzet, a hmai chu a sawi vek a, a ha chunglam chu a lawrchhuak vu mai bawk. A hmai chu a dawldangin a cher hle mai a, a mit mawlh mai chu a ni, a mit veilam chu a pual ru mai a, chutiang khawp a hmel rapthlak leh tihbaiawm chu ala hmu ngai lo,




Chutah chu pa chuan rapthlak zet a inspector chu rawn nuih in rang fe hian kawngthlang lamah chuan a liam thla nghal puat a, rang tak a ni. Inspector chuan hmanhmawh zetin chu pa liam thlakna lam chu a pan ve nghal thuai a, mahse chu pa chu ngaw karah chuan hmuh tur reng reng alo awm tawh lo. Hrilhhai zet in inspector chu a thaw hlawp hlawp a, kawng sirah chuan a thu hnawk a, rinpuia, amah au a a lam pan a rawn tlan lauh lauh lam chu a lo thlir vang vang a.




Rinpuia chuan hah avang a thaw hlawi hlawi chung chuan "sir, khawiah nge? Khawiah nge kha pa kha?" Inspector chuan hnual zet chung chuan "rina, Freddy-a kha han call leh vat mai teh"


"Mahse Sir" inspector chuan "ti vat mai rawh" alo ti vin hlur mai. Chuveleh rinpuia chuan phone chu a han chuh nghal thuai a. Freddy-a pawh chuan rinpuia phone call chu alo la ve ta hlauh bawk a.




Rinpuia chuan la thaw deuh hlai hlai chung chuan "Freddy, khawiah nge i awm?" A han ti nghal tawng a, Chutah lehlam atang chuan Freddy-a chuan tap zo hlim tih hriat tak mai a aw tham tuak chung chuan "ka pu, kan huanah ka kal a, enge ni ta?" Rinpuia chuan chang zet hian "Freddy, enge i tih?"




Freddy-a chuan "ka pu, min lo nghak rawh u, ka rawn haw hunah thil engkim chu ka hrilh ang che u. He kan buaina zawng zawng hi a kip a kawi in ka sawifiah vek ang" Chuveleh inspector chuan "rinpui, a nu chungchang kha han zawt lawk teh" chuveleh rinpuia chuan "Freddy, i nu hi a awmna chin i hria em?" Lehlam atang chuan "ka pu, ka nu chu a

awm ve tawh hleinem" a rawn ti a, Chuveleh rinpuia chuan "engtin maw? Enge i sawi awmzia?" Lehlam atang chuan lungchhe taka inhnit hlap hlap chung chuan "ka pu, ka nu chu a thi tawh" a rawn ti ta a.