HMANGAIHNA VANDUAI _Chapter-3 Last

[April Hmar Liverpool]

HMANGAIHNA VANDUAI

Ziaktu, Laltanpuia


Chapter _3 last

# Doctor Muansanga thih dan mak tak phen a Hmangaihna vanduai leh duhawm lo tak chhuina#


Inspector chuan saidingi rûang rapthlak zet mai chu en in a chek tlak tlak mai, saidingi hmai chu hmun hnihah a thler duai a, a hrawk chu a ang hung mai bawk. thisen khar chuan a hmai chu a bawhphui vek a, a hmel hmuh tlak a awm meuh lo. A nu rûang kiangah chuan Freddy-a chu rilru na tih hriat tak mai hian a indâwm kun tlawk tlawk mai bawk a.




Tlai lam anih tawh avangin rûang buaipuitu te leh police lam pawh chuan rûang chu khaw chhung lam an pan pui ta thuai a, tap thawm nen mipui lam chu an zi mur mur reng mai a ni. Freddy-a chu police te chuan an hreng nghal thuai a, Freddy-a erawh engmah sawi lovin a ngawi reng a, a hmel leh awmdan ah chuan lungngaihna vawrtawp tak meuh meuh in a chim mek a ni tih hai rual a nilo.




Freddy a'n inspector hmel alo hmuh veleh chuan a inngaihtuah harh thuai a, Chutah harsa tih hmel zet hian inspector hnenah chuan "ka pu, ka nu kha ka thah a nilo asin" a han ti a, inspector chuan Freddy-a chu a en uluk hle mai a, Chutah Freddy-a vek chuan "ka pu, ka nu khan he thu hi min hrilh asin. Ka nu chuan a almirah a a thil dahthatna bawmah lehkha a hnutchhiah thu hi. Ka pu, khatia ka nu in kan huan a kal tur a min rawn hrilh khan amah nen kan in nghirngho zo chauh a ni a, a ni nen chuan ka pa chungchangah kan inhnial hrep mai a, kan thin pawh a ur dun hle a ni"




"Kei chu ka thiante In ah ka kal a, ka nu chuan min rawn call a, hmanhmawh taka kan huan a thlama kal turin min rawn ti a, kei chuan ka nu thu chu ka awih a ngem? tiin ka innghaihtuah ren rawn a, Chutah nu te nge nge chu an thu awih chu tha in ka hre ta a ni"




Freddy-a chuan chhunzawmin "ni e, Khatiang thil rapthlak kha ka nu khan a tih duh ka ring ngailo a ni. Thlam ka zu thlen thlak chuan ka nu chu rui tih hriat tak leh chau tih hriat tak mai hian thut thlengah alo thu a, kei chuan mak ka ti in ka haw hle. Tichuan ka nu chuan ka pa chu tun thleng a ala hmangaih thu te min lo hrilh a, inspector, ka pa ka tih hi doctor muansanga niloin ka pa diktak zawk lalropuia a ni"




Inspector chu a meng zau kawk a, "imm, chutiang thil te pawh chu a nih deuh nuai ka ringhlel hran lo ve" alo ti thuai a, Chutah Freddy-a chuan "ka pu, ka nu in ngaihzawng a nei anih kha ka ringhlel a, chumi avang a inbakkaih Chiam pawh chu Kan ni, mahse ngaihzawng alo ni satliah lo, min hringtu ka pa ngei a ni tlat si ani"




"Hun rei tak liam tawh, a chanchin hmasa lam a tang daih tawha in tan alo ni zawk" Chutah Freddy-a bawk chuan "ni e, ka nu thuruk hi ka hriatchhuah khan kei chu chhun ang mai in ka na a ni. Ka nu chuan ka pa diktak zawk chu doctor muansanga a nih loh thu min hrilh a, khatia ka nu nen a kan inhnial buai chiam tum khan ka nu chuan thudik tak min hrilh ta vek a ni. Kei chu pasal a neih hma a a ngaihzawng ropuia fa a pai ka nih thu min hrilh a, tichuan ka pa diktak zawk chu hmun hranah awm in damlohna nasa tak a nei chho a, a awmna hmunah chuan a boral zui ta mai ani"




"chumi lai chuan amah ngaizawng a hel fo thin tu doctor muansanga chu pasal atan ka nu chuan a nei zui ta a. Kei chu ka pa diktak nilo bulah chuan ka lo seilian reng alo ni a, tichuan ka pa diktak zawk ropuia chu alo la thi hauh lo chu niin tun hnaiah he laiah a rawn inlan leh alo ni a, min hringtu ka pa zawk chuan vanduaina nasa tak a tawk a, a hmel chu rapthlak zawk khawp hian a chhia a, hmel hmuh tlak a lawi pawh a nei lo"




"Tichuan khatia zungbun chungchang kan chhui lai a ka nu rinhlelh awm anih thu ka han hriat khan min thawng hle a nih kha, tichuan kan in nghirngho zui ta a, ngaihzawng a neih te chu ka ringhlel zel tihna anih chu, Tichuan thil awmzia engkim chu ka nu chuan min hrilh ta anih chu"




Inspector chuan "anih chuan doctor muansanga thihna chungchang ah khan i nu a inrawlh em?" Alo ti thuai a, Freddy-a chuan "aw, a inrawlh ngei thu a sawi. Chu bak chu engmah a sawi lo. Mahse ka pa doctor muansanga kha thah a nilo a ti a, a lungphu thalo chu tuar lovin a boral zui ta a ni awm e" inspector chuan "chu, a inrawlh ang in a insawi si a, mahse thah a nih siloh chuan enge thil awmzia ni ngai?" Freddy-a chuan "ka pu, ka nu chuan ka pa doctor muangsanga thih laia thil thlen dan engkim ka hriat duh chuan a lehkha dahthat ah chuan thil awmzia a chuan vek thu min hrilh ani"




Inspector chuan "awle Freddy, a pawi ka ti hle mai. Tichuan i nu chu engtia thi nge anih ve tak le?"


"Ka pu, khatia thlam ka zuk thlen thlak khan ka nu chu a rui takzet a, a ruih chu a bul a damdawi bawm lo let ngat avang chuan damdawi a ni tih ka hrethiam thuai a, ka thinrim chuan na tak in ka hau nghe nghe, mahse ka pu, ka nu kha kha ti khan thawklehkhat ah amah leh amah chu a inzai ta mai a ni. A hmai chu a chemte luzum ken chuan a han rin kak hrâwk hrawk ta mai a, thisen chu a mak a mak a tam a rawn luangchhuak nghal nguah nguah a, Chutah kut khur ngawt ngawt chungin a hrawkah chuan a han zai leh ta ani. Kei chu ka vai ruai ringawt a, hrilhhaina avang leh rapthlak ka tih em avang chuan chet zai pawh ka rel hman meuh lo. Chutah ka harhchhuak thut a, chhuat a thisen nen a inchiah piah nuai a tlu ka nu chu ka va bawihsawm nghal thuai a, mahse ka nu chu a tal ngawt ngawt a muang changin a hnuk chu a chat zui ta mai ani"




Inspector chuan Freddy-a hnenah chuan "Freddy, lungngai lo la, i nu in a lehkha hnutchhiah a dah thatah chuan eng thu chiah nge chuang tih chu tun ah chuan kan hriat a tul a nih chu" A han ti a, Freddy-a pawh chu a thil tawn rapthlak tak mai avang chuan a la vai deuh ruai reng a, "awle ka pu, ka nu thu hnuhnung chu kei ngei pawh hian ka hre chak takzet asin" inspector chuan "aw le rinpui, motor kha lo buatsaih ula, Freddy-a te In lam kan pan nghal ang" tiin rinpuia chu a han hrilh nghal vat a.




In ah chuan mi an tam nangiang mai. Chutia nu ber rapthlak tak mai a a han boral zui leh takah chuan mipui te chuan an thinlunga zawhna tam tak in chhekkhawl mek chu a chhanna hmuh an chak kher mai. Freddy-a chu tualthattu ni a ngaih a ni a, a pa thattu pawh kha amah ngei hi anih chu mi te rindan a ni. A pa a thah hnuah a nu pawh chu rapthlak takin a that zui leh ta ni ah an ngai a ni.




Chutia Freddy-a ber a rawn lan leh tak ah chuan In a lo awm te pawh chuan an thil hriatthiam loh chu a chhanna hriat an nghakhlel tlang hle a. Inspector pawh chuan Freddy-a chu tualthattu a nilo tih a han hrilhfiah hlawm a, amah Freddy-a ngei pawh chuan thil thlen dan diktak chu a han sawi ve ta a.




Saidingi hmangaih hmasa chu tunge ni ta ang? Chu pa chu inspector leh rinpuia'n an um tak chiam a kha a ni thei mai a ngem? mahse thil engmah chiang ala awm loh avang chuan saidingi lehkha hnuhnung a thu inziak chu nghakhlel takin mipui te chuan an chang thap reng a. Freddy-a chuan a nu in a hrilh, a lehkha hnuhnung a hnutchhiah chu la in a chhung a thu inziak chu a chhiar ta a ni.




Lehkha a thu inziak chu,


"Kei zawng, nu vanduai tak pakhat ve mai ka lo ni. Ka hmangaih ber tan pawh inserh thei lovin ka hmangaih loh tawp tang chu ka bel ta si a, mahse khuanu hian ka tan hian vanduaina chu a ruat bik em ni ang? Ka fa, ka pum chhunga naute ka pai mek nen a ka hmangaih ber lokir leh hun nghak a hun leh ni ka chhiar lai mek chuan an sawi khuarel vanduaina chuan ka chungah thla a rawn zar ta mai si"




"Ka hmangaih ber chu vanduaithlak takin a boral ta hlauh mai a, kei, hmeichhe awmnem leh mi khawngaihthak pakhat ve mai hi chu thihna chuan mi va han ti na in mi va han thawng tak em!? rilru na tak a ka awm lai chuan doctor muansanga nen hian kan intawng ta a, doctor muansanga chu a fel in a bula awm a nuam em em mai a min khawngaihin min hmangaih hial ni in ka hria,




"kei pawh chu ka pum chhung a naute alo than len hma ngei a ka mualpho lutuk loh nan doctor muansanga rilru put hmang ang pu ve mai tur chuan ka rilru ka siam fel ve ta rawih mai a. Doctor nen chuan kar loah kan innei ta mai reng a, ka fapa Freddy-a alo pian chhuah lai te khan aw, ka hmangaih famta vanduaina mawlh mai khan ka thinlung chu vawi tam tak ala chhun tliak fo thin si.




"Kum tam tak chhung chu ka hmangaih hmasa ngaiin ka kur fo thin thin a, doctor muansanga ka lo nei ta mai pawh chu keimah leh keimah ka indem in ka inthiam lo thin kher asin. Tu ma hriatpui ve ngailoh tur thinlung hliam ka pai reng a, ka natna chu kum in ala chaldelh ve mai ringin beiseina sang tak nen hmalam chauh thlir ka tum hram hram thin. Mahse le, khuanu rorel dan hi keini mihring te mai hi chuan kan hrethiam phak mawlh silo.




"Tumkhat chu nunphung pangngai taka ka awm laiin ka ngaihtuahna leh ka mang ram thleng pawh a ka la tawn nagiloh tur thil rapthlak tak mai chu ka tawng leh ta ani. Hman a ka hmangaih hmasa thi tawh a kan ngaih Freddy-a pa ngei mai kha a hring a hranin ka hmu leh ta hlawl mai anih chu mawle! ka chan chu rapthlak ka va han ti ngai em!




"Ropuia chu a hmai a sawi vek tawh a, a ha chung lam chu rapthlak zet hian a lawrchhuak vu mai bawk. Chuti taka a hmel leh pianphung a danglam tak nachhan chu rilru na tak chungin a natna vang a nih thu min hrilh a, Min ngaih zia leh min thlakhlelh thin zia te chu hahip in min hrilh a ni, kha leh chen kha a thi tawhah ngaiin hun ka lo chhiar liam thin a, mahse tunah, tunah mai chuan amah ngei chu ka hmaah hmel rapthlak leh tihbaiawm zet pu chungin a ding mek chu ani si. Ka mang chu a ang takzet, engtia hma han lak tur nge ka hrethiam mai tawh bik lova, a hmel ka hmuh zawng ringawt pawhin ka tha chu a khur thei hial a ni.




"Mahse ropuia chuan ka awmdan tur chu hrethiam in rilru na tak leh mahni insit tak chung chuan min kalsan ta a, mahse ropuia chuan kei chu min theihnghilh mai thei bik hauh lo. Tumkhat chu kan inhmuhna ngaiah bawk chuan kan inhmu leh ta a, kan fa pai chungchang te leh tunah chuan mi ta ka nih tawh thu te, kan fapa pawh tlangval duhawm tak ni a a seilen tawh thu te chu ka han hrilh a, chuta ka thil hmuh chuan ka thinlung hi a chhun tlang chiang kher asin, ropuia hmel rapthlak tak karah chuan mittui chu a rawn hnam chhuak ngiai ngiai a, kei chuan lawmna leh lungchhiatna mittui a inpawlh ani tih ka hre chiang hle. Kan nunhlui te ka chhui kir a, ropuia chu han kuah vawng vawng mai hi ka duh a, mahse a landan rapthlak lutuk mai chu ka thisen in a ngam hlawl lo a ni ber awm asin.




"Ropuia chuan kei chu a duhsakna tha ber min hlan a, ka chhungkua nen a hlim tlang taka awm turin min chah nghe nghe. Mahse ropuia khan kha thu min hrilh kha ka tan chauh a ni. Ka pasal tan erawh a ni ve hauh lo thung tih a hnuah ka hrechhuak leh ta ani.




"Tum khat chu ka pasal doctor muansanga chu hmanhmawh tak leh hlauthawng zet hian a rawn haw a, ni dang zawng aiin a hmel chu a danglam in natna rapthlak tak a tawngbaw ta ang mai hian a hmel chu a awm a ni. Ka hnenah chuan engmah a sawi lem lova, mahse khami ni atang khan ka nunphung leh khawsa zia chu min chik in min thlithlai ngun takzet tih ka hria a. Ka tan a ninawm tur khawp chuan ka chungah a thu vuakthlak duh dan pawh a khauhin kei kha ka chhuah hlek pawh kha min khap sak bur mai ani.




"Enge chutiang a thawklehkhata a zia a rawn danglam thut nachhan chu ni ang ti a ka ngaihtuah lai chuan, zan khat chu tu emaw nen a an inbe lai hi ka hre fuh ta hlauh mai a, Chuta ka thu hriat chuan min barakhaih chiang teh asin. Ka pasal chuan a mi biak hnenah chuan ngaihdam a dil mawlh mawlh reng a, sum thahnem tak nen a thlem lungawi a tum a ni.




Chu pa chu tudang an nilo, thi tawh a kalo ngaih, a hmel hmai zawng zawng chhe vek khawp a vanduaina tawk a lokir leh ta ka hmangaih hmasa ropuia ngei kha alo ni a, chu thu ka hriat chuan ngaihtuahna hman mai dan tur pawh ka hrethiam lo hle. Engvang a doctor chuan ropuia chu ngaihdam dil nge a nih tak ang tiin ka buai ta hle mai a. Khati tak mai a sum thahnem tham tak nen a han thlem lungawi a tum ta mai pawh kha thil pangngai a ni tlat lo a ni. Tichuan a rukin ropuia chu ka va hmu leh ta a, thil awmzia engkim chu ka hriat vek tawh thu ka hrilh a, Chutah chuan ropuia chuan ka ngaihruatna hmang ringawt pawh a kalo ngaihruat chhin ngai loh tur thil min hrilh ta ani"




Freddy-a chu a hnuk a ulh hle mai a, a thu chhiar leh zel tur chuan a nu saidingi a lainat zia chu a hmelah chuan a lantir tih a lang chiang hle. Lehkha chu a han chhiar chhunzawm leh a, "Ka pasal pawmlai doctor muansang a, min hmangaih em em tu leh ka chhiat ber lai pawh a min dawm tlat thin tu ni a ka lo ngaih chuan ropuia chungah chuan thil rapthlak tak mai a ti alo ni a, chu thil chu a rapthlak ka tih em avang leh ropuia chu ka lainat em avang chuan ka insum hman lo, ropuia chu duat deuh hian ka pawm ta vawng vawng mai a ni. Ropuia chu khatia hmun danga hna thawk tura a awm bo hma deuh khan a hriselna in enfiah tur in damdawi In lam a pan a, Chutah chuan doctor muansanga hian ropuia hriselna chu lo en in damdawi alo pe a.




"Tichuan ropuia chu ngaih tha takin hmun dang a hnatawk tur chuan a awm bo ta a, mahse hun rei a inrial hma in ropuia chuan natna rapthlak hrep mai a vei tan ta a ni. A vun chu rapthlak tak mai hian pan chhia in a bawh khat ta luk mai a, a hmai te chu rapthlak zet hian a insiam danglam ta vek mai a, doctor te chuan natna hlauhawm tak virus chi khat avang a chutia awm chu ani tih an lo hrilh a, ropuia chuan a damkhaw chhuah leh theih reng a inring tawh lo.




A chanchin chu a chhungte tak ngial pawh a hrilh ngam lova, mahse doctor te chuan chu natna lo intan dan chu an hmuchhuak ta hlauh mai a, a taksa, a thisen ah chuan virus hlauhawm tak a awm thu an hrilh ta a, chu virus chu engtia vei thei nge tih te zawt in virus Kai theih dan an hrilh dan atang te chuan doctor muansanga hnena a damdawi lak kha a hrechhuak ta a, chu thil doctor te a han hrilh chuan doctor te chuan chu damdawi hnathawh ngei chu a ni tih an finfiah ta mai reng a.




"Doctor muansanga hi a hma atang tawh a ka laka mitmei lo nei fo tawh thin alo ni reng mai a, kei khan ka lo hrethiam ngai lo a ni. Tichuan ka ngaihzawng ropuia chu rapthlak takin damdawi hmang chuan a nghaisa ta tihna alo ni reng mai. Ka thu hriat avang chuan mittui tla in ka tap hawm hawm mai a, chuta tang chiah chuan ka thinlung a hmangaihna leh huatna inlumlet but but reng chu dan har ka va ti tak em! Chumi tum la la chuan ka pasal hnenah chuan thudik emkim ka hriat vek tawh thu leh inthen nghal ka duh thu chu hrilh nghal chung chung mai ka duh takzet, mahse ka fa te ka ngaihtuah a, kan chhungkaw chunga thil thleng rapthlak tak mai avanga ka fate nun in a chhiat phah chu ka duh silo a ni.




"Mahse, ka pasal chu a nun a danglam chho tial tial a, tumkhat phei chu a hnathawhna hmunah nikhaw hre lovin a tluk thu kan hre zui ta nghe nghe a ni, a hriselna chu ei tu awm ang mai hian a tla dawk dawk zel a, putar hrisel lo tak ang chauh a ni tawh. Kei chu thinlung a rum ru vawng vawng chung in nunphung pangngai zawh hram hram ka tum ni tin thin a, ka pasal pawh chu nikhaw hre lova a awm hnu khan a ngaih tha lo chu a in entir ta a, lung lam thalo ani tih hmuhchhuah a ni ve ta a ni.




"Khati tak mai a ka pasal in thawklehkhat a a nunphung a hlauh tak thut nachhan kha Ropuia lokir leh vang chu ani tih ka hrethiam reng a, Ropuia pawh chuan nitin deuh thaw chuan min rawn be fo thin a, kan nunhlui te chu a sawichhuak ve fo mai, kan fapa Freddy-a chungchang te chu sawi tui berah kan nei thin a, kei chuan ka rilru puthmang diktak chu ropuia hnenah chuan ka hrilh vek a, kan fate chu an nun tihchhiat sak lo hram tur leh phuba la lo turin ka ngen fo thin a ni.




"Ni e, ropuia min hmangaihna kha alo va nasa tak em! Khati khawp a natna leh vanduaina in a tlakbuak hnu pawh khan rilru hrisel tak chu ka lakah ala pu reng tho a ni. Mahse, ka pasal erawh a hriselna a tlahniam zual zel thung a, a thin a chhia in a thikthu chu a chhe kher mai. Kei chu thil ho te te ah min vau beh tum in min rum khum fo thin a, mahse kei chuan hriatthiamna nen ka pasal chu ka dawm hram hram thin a ni.




Tumkhat chu ka pasal chuan ropuia nen a kan inbiakna chu alo hmu fuh ta hlauh mai a, chumi tum chuan tawngkam bawlhhlawh tak takin min an khum hrep mai a, 'mi hur nu' tih te, 'zahpuiawm nu' tih te, ngaihzawng nei angah te chuan min chhuah a, kei pawh chuan ropuia chunga thil tenawm tak a tih avang a amah huatna leh lung ten na nen chuan ka pasal chu ka an khum ve piap piap reng a, ka insum theihna in a tlin ta bik lo a ni.




"Tichuan, ropuia hnenah chuan kan nupa inkar a khik thu leh kan in rikrap chiam thu te chu ka hrilh ve a ka thawl ve huai thei hial. Ropuia chuan min ngaihtuah em avang chuan chumi zan chuan ka pasal chu hmuh a duh thu min hrilh ta nghe nghe a, mahse kei chuan chu thil chu engtikah mah a thleng tur a nilo tiin ka hnial lui tlat thung,




mahse zanah chuan kha thil kha a thleng ta tho a ni. Ropuia chuan kan In kawtah a awm thu min rawn hrilh ta mai a, kei chu ka phawklek hman viau, mahse ropuia chuan doctor muansanga chu tha taka biak a duh thu leh a chunga thil tenawm tak a tih tak pawh chu Pathian hming a a ngaihdam thu hrilh a duh vang alo ni a, Chuveleh kei pawh chu ka rilru a hmin ta viau mai reng a,




"Chutah le, kei chuan engtia chet han lak chi nge ni ang tih ropuia chu ka han zawt a, kan fapa hmuh lai ngei a thil tih chu tha in ka hre silo, Freddy-a khan engkim kha a hriat ve mai chuan thil a khawbaw zo mai ang tih ka hlau a ni. Engtik ah mah doctor muansanga kha a ngaidam ngailo ang. Chuvang chuan Freddy-a hriat loha thil tihdan tur chu kan ruahman ta a.




"Ropuia chuan ka pasal chu In ah a awm leh awm loh min zawt a, a awm thu ka hrilh a, kan nupa room ah a awm thu ka hrilh a ni. Ka pasal kha mut a la tum hauh lova, chhuahvahna tur ala nei niin a insawi nghe nghe a ni. Ropuia chuan doctor chu a nan hman loh a hlauh avangin hmanhmawh tak a ka pasal awmna room lama kal turin min ti a, tukverh chu hawng turin min ti bawk. Kei chuan tukverh chu ka hawng a, doctor chuan mak a ti hle, min en duh viau mai a, a hmelah chuan zawhna tam tak a hmuh theih.




"Chutah le, kei chuan ngawi rengin thil awmzia a hriat duh chuan tukverh lam chu en turin ka han ti a, tukverh atanga thla eng in a chhun hlimthla lo lang chu hmel rapthlak tak mai leh tihbaiawm zet mai a ni a, ropuia chu tukverhah chuan a rawn dak lut a, ka pasal chu thlahrang hmu ang maiin a ding khawng reng ringawt. Ropuia hmel chu rapthlak a ti takzet. Ropuia chuan room chhung chu rawn lut in doctor chu a han din hnaih a, chutih lai chuan hlau thlabar mangang leh rapthlak tih hmel zet hian doctor chuan ropuia hmel chu a en tlawk tlawk ringawt mai a ni.




"Ropuia chuan 'chibai le doctor, kei hi min la hria ang tiraw? i damdawi min pek avanga hetia phung piangsual ang mai a awm ta ropuia ngei kha ka ni e, ka la thi lo tih chu tunah chuan i mit ngeiin i hmu ta alawm' tiin a han then tha a, a nuih zawng te chuan zawng sih sual piansual theih pa tawp a piangsual ni mai awm a mawi a ni.




"Chutah le, kan rin loh takin thil a kal ta, doctor chu a hlauh lutuk avang leh a mangan lutuk avang chuan a ding khur ngawt ngawt mai a, a kut chu lek chhuakin 'ramhuai! ramhuai!' tiin a thin chu a dawm nghal vawng vawng a, Chutah khur ngawt ngawt chung chuan dawhkana a lu vaw chawrh khawp chuan a tlu khawng ta awt mai a, la khur ngawt ngawt reng chung chuan a chatthla zui ta mai a ni. Keini chu kan mangang in kan chi ai takzet.




"Chet han lak mai dan tur kan hrethiam lo hle mai a, Chutah ropuia rilru chu inthlak thutin ka hnenah chuan amah chu zui ve nghal mai turin min ti ta a, ani chuan kei min hmangaihna chu ala pangngai reng thu min hrilh in a hnenah chuan ka hlim reng tur thu te chu min han tiam nghe nghe a, mahse kei chuan chu chu lo hnial in ngaihtuahna thar ka nei ta a,




ropuia hnenah chuan tlanbo mai turin ka ti a, ka pasal rûang chu a tih dan dan ka lo ngaihtuah tur thu chu ka han hrilh a, Chuveleh ropuia chuan beidawn hmel zet hian hnuai lam chu a melh ran a, chutah a mit atang a mittui tla zawih zawih chung chuan kei chu min hmuh tawpna ber tur a nih thu min hrilh in a kal bo leh a nih chuan a ni chu khawvelah hian ka hmuh leh tawh ngai loh tur thu leh a lokir leh tawh loh tur thu chu min hrilh ta ani.




tichuan doctor muansanga kut a kan inneih zungbun chu la in 'hei hi kan zungbun kha a ni em? A ti a, kei chuan 'aw, kan pahnih zungbun ngei kha a ni alawm, kan inneih huna kan bun tur a kan tih kha a ni, inthiam lo tak chungin 'ropui, min ngaidam rawh, doctor in he zungbun hi alo hmuh khan nalh a ti hle a, kan inneih zungbun atan a hman a duh ta tlat alawm maw le, tiin ka kut a ka zungbun bun chu ka phelh a ka entir vat a,




"Ropuia chuan 'khawi, lo la rawh, heng zungbun anchhedawng zet hi zawng chatuan in an boral tawh tur a ni. Hei hi la rawh, hei hi keimah min hriat reng nan ilo bun reng thin dawn nia, tiin a kawr ip atang chuan zungbun dang pahnih hi a rawn phawrh chhuak a, pakhat chu min pe a, kei chuan 'awle, kalo kawl tha reng dawn nia ka ti a ka bun nghal a, tichuan hmanhmawh takin tukverh lam chu a pan ta a ni.




"Ropuia chu mittui tla teuh chung leh lainat tak chung chuan ka thlir reng a, ka va han lainat tak em! Chutah kei chu inthing harh in tukverh chu ka khar leh nghal thuai a, choka lam chu pan in pangngai taka awm chu harsa ka va han ti kher em ve le, kum te alo tam tawh a, fate hial kan nei tawh a, chu chu nilo ngat se zawng khami zan a ka awmdan tur kha ka sawi thei hauh lo a ni.




Freddy-a chuan mittui tla zawih zawih chung chuan lehkha chu a chhiar zel a, chu lai hmun a awm te chu an ngaihtuahna a kal thui takzet. Nu hlim thei tak leh nu harhvang tak ni a an lo hriat thin saidingi hringnun chu alo va harsa ngai si em!




Freddy-a chuan a chhiar zel a, "khatia ropuia a kal bo tak hnu khan ka nun chu a khawhâr ngawih ngawih a a ruak nghal vek bawk. Inthiam lohna leh in huatna in ka khat a, ka nun kha ka thlahlel tawh mawlh lo. Ropuia chu ka la hmangaih reng a, mahse ka fate chu ka thuruk vanduai tak avang a an nun a chhiat ka phal silo, Freddy-a leh a nau in an pa doctor muansanga'n ka hmangaih ropuia chunga a chet dan tenawm tak te mawlh chu an hria ang tih ka va hlau tak em!




"Ropuia hringnun rethei tak leh lainatawm tak chu ka ngaihtuah a, ka inthiam thei mawlh lo, phatsân tu ah ka in ngai tlat a, a hmelma pa chu pasal atan ka la nei zui. Mahse maw, khuanu rorel dan pawh hian mi va han run tak em! Doctor muansanga ngei pawh chu kumpui linglet teh meuh mai ka kawppui alo ni tawh a, a ni lakah ngei pawh chuan ka rilru hi alo lut thuk hman viau tawh a ni tih hi hai theih a ni mawlh bik silo, an sawi hmangaihna vanduai hi a awm anih ngai chuan ka tan a khuanu ruat ngei a ni mah na le! Mahse, mahse, he hmeichhe khawngaihthlak tak leh nun riangvai rethei tak mai chanchin hi zawng ka fate chuan an hre ve tur a ni hauh lo, ka thih ni thlengin ka vawng reng tur a ni' tiin chhia ka chham ta a ni"




Freddy-a chuan lehkha chu kuah in a inhnit hlawp hlawp mai a, "ka nu, a van pawi tak, kei khan i chanchin diktak ka hriat thu leh ngaihzawng i neih thu ka hrilh che khan hetiang thil rapthlak tak mai hi i ti duh ang tih reng ka ring phak mawlh lo asin. Min va ti hrilhhhai tak em!"




Inspector chuan dam zet hian "Freddy, i nu chu natna leh beidawnna nasa takin a tuam a ni ngei ang, ropuia avanga a inthiam lohna leh ropuia a hmangaih avang a nangni leh zel in thil duhawm lo tak in han hmachhawn chho tur a ngaihtuahin a rilru a buai takzet a ni tih a hriat a, chutihrual chuan a pasal doctor muansanga ngei pawh alo hmangaih hman tawh hle ani tih a lang reng bawk.


"Imm, pi saidingi chanchin lungchhiatthlak tak mai hi hmangaihna vanduai tak chanchin zawng a ni ngei mai. Khatia ropuia a kal bo tak hnu khan i nu in a duh ber, a faten a thuruk chu hrechhuak lo se a tih chu hriatchhuah a ni chho ta si a, nang ber in engkim i hriat thu i han hrilh ta mai khan pi saidingi chu a thawng khawp ang le, a intihhlum dawn a a chet dan mawlh mai te khan pi saidingi chhungril hreawm tur zia leh keini hriatthiam pui phak bak anih tur zia chu a va tar lang chiang si em!




"Doctor thihna pawh kha a sun takzet ani tih a hriat a, mahse ama nun na hlu tak khatia a han la ta mai erawh keini hriatthiam pui phak bak a ni ta ve ngei ang. Tin, thil dang zawng aia ropui ka tih leh vanduaithlak ka tih bawk si chu ropuia nun lainat awm tak leh pi saidingi tan a a rinawmna leh a hmangaihna lungchhiatthlak zet mai chu a ni" Tiin inspector chuan Freddy-a darah chuan a han dawm vang vang a.




Doctor muansanga leh a nupui saidingi te nupa inkara an nunhlui duhawm lo tak chanchin chuan mi te a barakhaih chiang hle mai a, mi tam takin doctor muansanga chu an dem hle a, chumi rual chuan ropuia ngei pawh chu chutia bopil mai lova a tir te a chet ala nghal mai lo leh tun hnu a a rawn kir leh lawi si lai a te chu hriatthiam har an ti a,




Nimahsela ropuia hun tawn ngaihtuahin mahni insitna nasa tak leh rilru lam thleng pawh a a pianphung inthlak danglam ta in a a nghawng thuk tur zia te chu an ngaihtuah in ropuia chan tur chu a lungawithlak mawlh lo. Chutihrual chuan saidingi intih hlum dan rapthlak tak mai te, engvanga a hmaiah khan hmun hnih a zai thler kher nge anih? A hrawk ah khan a zai thler bawk a, tin engvanga khatia a hmel hmai ti chhe zawng a chet la ta mai nge anih? kha thil ringawt pawh khan ngaihtuahna thui tak a paw chhuak thei hial a ni.




Rinpuia chuan file zahzeh tat chung chuan inspector kawngkhar chu a kik dat dat a, inspector chuan lo chhawn thuai in alo ngaihven nghal thuai a, "sir, ropuia chu a awmna chin kan hre tawh e, engtia hma lak zui zel chi nge ni ang?" Inspector chuan a mit chu a han nuai nawk nawk a, "rinpui, remchang hmasa berah chet kan la nghal mai a niang chu, ropuia thu hla te pawh kan hre ve leh ang chu maw le, khaw maw file chu ka lo en a nge" tiin rinpuia file ken chu a han ban a.




Pathian ni tuk a ni a, inspector chuan a dawhkan a a mobile phone lo ri chu han en in rinpuia alo ni. "Aw hello, rina enge chanchin?" Lehlam atang chuan Rinpuia chuan "sir, ropuia chu ka be pawp thei tawh e, tunah a rang lamin in hmuh a duh thu min hrilh a, inhmuhna hmun tur nen lam sawiin min lo nghah reng tawh thu min hrilh a ni" Inspector chuan "chu, a awm hnai vai tihna a ni maw? Freddy tel ve thei se a va tha dawn em, a pa nen pawh chuan han inhmu se nun pangngai an zawh leh theih nan keini lam pawhin kan pui tur a ni"




Rinpuia chuan "sir, chu zawng thil duhawm tak a ni ngei mai, Freddy-a pawh chu ka han hrilh ve dawn em ni ang?"


"Aw lo hrilh ve vat teh. Kan pathum in he mi khawngaihthlak tak leh vanduai tak mai ropuia hmu tur hian i va thawk chhuak vat teh ang u khai"


"Awle sir, ka han hrilh nghal a nge"




Freddy-a pawh chu a thu hriat avang a chuan phur ru tak chung leh helhhawlh ru tak chung chuan inspector te lo nghahna lam pan tur chuan a tek chhuak nghal thuai a. Inspector leh rinpuia lo nghahna hmun ava thlen chuan an ni pathum chu an phur tlang in an helh hawlh tlang hle mai a, ropuia lo nghahna hmun lam pan tur chuan an inkhalh chhuak leh nghal thuai a.




Pathian ni anih avangin motor vei vak a tam lem lova, chutihrual chuan vai truk lian bungraw phur erawh a khat tawk chuan an vei reng thung. Khaw dai a chawlhbuk awmna pakhat a kham kosang tak mai kiang a lung toh lawt pakhat kiangah chuan puan dum a intuam tlat mai mi pakhat hi a thu ngawi reng a, lunglen hmel tak leh khawhar hmel tak mai hian ral leh lam a romei paw chiai lam chu a thlir leh vang vang thin, a thawmhnaw hak chu han en mai pawh a thawmhnaw hlui leh pawr fap mai a ni a, a puan inkhuhna lah chu a hlui hmel in a rawng da lam tawh a ni tih a lang reng mai.




Chu pa kiang a kawngpui sir ah chuan motor pakhat hi a rawn ding a, motor atang chuan inspector remruata leh mi dang pahnih hi an rawn lang nghal. Chuveleh vai truk lian bungraw phur chu piah deuhah chuan a rawn thum phei vut vut mai bawk a, kham ko bula lung toh lawt a thu a ral lehlam thlir mek tu chuan muang chang hian inspector te lam chu a rawn en a, Chutah a puan inkhuhna chu a han lakiang a, a hmel chu duhtawk a milem chei chhiat chawp ang mai hian a sawi tlat a, a mit lehlam chu a var vek a, a ha chung lam chu a pir voh mai bawk. Chu pa hmel chu ramhuai nen a han tehkhin loh rual lohva hmel anchhedawng a ni a, inspector te alo nuih sak hmel pawh chu mi hrisel lo deuh tan chuan damlo a khum han beh rawk rawkna tham a tling hial ta ve ang.




Inspector leh a thian te chuan chu pa, ramhuai ang mai a anchhedawng pa lam chu an han pan hnai a, chu pa chu a thutna ngaiah chuan la thu in thlamuan hmel deuh hian ral leh lam bawk chu a han thlir leh vang vang thin a, Chutah a thinlung su dup dup reng mai chu dang zo lovin Freddy-a chuan "ka pa" a han ti a, chu pa chu muangchang a Freddy-a lam rawn hawi in a han nui sak a, a fapa Freddy-a meuh pawh chu chu pa hmel a han hmuh chian meuh chuan a tim ru er er thei hial a ni.








Chu pa chu a thutna atang chuan a han dingchhuak a, a bul mai chu kham ko sang tak a ni tih reng a hrelo ni ngei tur a ni, kham ko lam pan chuan a tawlh hrut hrut a, Chuveleh teu zet hian inspector chuan, "ropui, rilru fim pu hram teh khai, kum tam tak chhung chu i hmangaih te hmu lovin hun i hmang a ni lawm ni? Hei, i fapa hian nangmah kuangkuah tur che in alo nghak reng che asin" ngen ngawl aw zet hian a han ti a.




Chuveleh Freddy-a pawh chuan "ka pa, ka nu chuan min kalsan tawh asin, nang lehzel chu chan che hi ka duh tawh lo a ni" Alo ti ve thuai a, Chutah chu pa, a hringnun a vanduaina leh mangchhia in dim malek lova a nghaisak hnu chuan heti hian a fapa chu a han chhang let ve a,




"ka fapa, thil engkim chu ka hria alawm, mahse i nu tello nun khawhâr hi kum tam tak chhung chu ka lo sual ve ngat ngat tawh thin a, engtik ni ah emaw chuan ka hmangaih nen kan la intawng leh ngei a nga, kan duhthusam thin chu kan la sualchhuak ve ngei ang' tiin beiseina chau tak nen hun ka hmang thin asin. Mahse tunah zawng, ka nun hi a rawp ral zo ta, i nu chu ka tan a awm tawh lova, kan duhthusam thin pawh thawnthu mai an chang ta si. I nu hnenah khan ka hmel a hmuh leh ngai tawh loh tur thu ka hrilh a, hei a thih ni thlengin min hmu leh ta lo chu anih hi.




"Kan thawnthu chu a thamral ta anih rau rau chuan a tawpna chu hei hi ni rawh se" tiin kham lamah chuan a tawlh zel a, Chuveleh inspector chuan ropuia thusawi chu pawm lo zet hian, "i fapa nen hian nun thar in zawh leh tur a ni asin" tiin a pistol chu a lekchhuak nghal vat a, ropuia chu a tin nghal a, inspector vek chuan "nilove ropui, i ti lovang, ka kap hreh hauh lo che a nia" a han ti a, ropuia chuan thlamuan hmel zet hian "ti ta che inspector, he nun anchhedawng leh mangchhia a khat nun ngei a ta hi min han zalen tir vat teh khai" tiin silai mu dawng tur chuan a in ring ngang mai.




Inspector tak pawh chuan beidawng tih hriat fe hian, "i nun atang hian la tlawm mai suh, ala hma lutuk" a han ti leh hram a, inspector vek chuan "heti khawp hian i hmel leh taksa a chhe zo tawh a, a aia chhiat belh leh tur chuan inphal hauh suh" Ropuia chuan "ni e inspector, heti khawp hian mihring thinlung sual leh ngaihtuahna tenawm tak avangin ka chhiat phah zo ta a ni a, mahse han chhiat belh leh tur chuang ka awm tawh em ni?" a han ti zuai ve raih mai a.




"Nilove, ka tanpui ang che, doctor thiam ber ber te nen theihtawp kan chhuah ang" inspector bawk chuan a han ti leh a, a pistol ken chu a dahthla ta bawk a, chumi lai chuan kawngpui ah chuan vai truk lian chu an lam pan hian a rawn rum phei leh vut vut tawh a, Chuveleh ropuia chuan "imm, ka rilru ka thlak ni rawh se, a ruh lang lutuk a chet ka lak mai zawngin in hrilh a hai lutuk palh a nge" tiin chak zet hian motor kawngpui lamah chuan a lim chho nghal puat a, vai truk lian rawn tlan mek hnuaiah chuan chiang zet hian a va inbarh lut nghal thawih mai. Chumi rual chiah chuan inspector leh Freddy-a chu an lo te nghal thawt a.




Inspector chuan pawi ti zet hian "ai ai ai! a pawi lutuk! a pawi lutuk! tiin ropuia rûang awmna lam chu a pan nghal chung chung a, motor atang chuan driver pawh chu

hlauthawng zet hian a rawn chhuk nghal thuai a. Ropuia rûang hneh sawh zet a truk lian in a rah sawp vek hnu chu kil bial thap in pawi tih avang chuan an chek tlawk tlawk ringawt mai a.