PSYCHIC _Volume II_Chapter-1

[April Hmar Liverpool]

PSYCHIC_Volume-2

Ziaktu, Laltanpuia


Chapter _1
#Doctor Pahnih leh an damlo enkawl pakhat chungchang a thil mak chhuina#


Kum zabi sawmhnihna herliam tur chu khawvel mipuiin a thlir a, hma lawk a lo hmuak tu kum zabi sawmhnih leh pakhatna hun lo intanna tur chuan eng thil tak rawn pawchhuak ang maw tih chu tuma hriat lawk va ni suh, hetih lai hian Mizoram ah mizo society a thil thleng ve atan a kan duh ngai hauh loh tur chanchin duhawm lo tak mai thil thleng a awm ve mek a.




Mahni Mihring puite taksa peng pawimawh hmanga sum hmuh duh avanga thil thleng rapthlak tak tak chanchin te chu mizo mipui te tan a chanchin hriatreng tur leh, tun thleng pawha sawi zui la hlawh reng tur a ni zui ang tih reng tumah in an hre lawk bik hauh lovang le, hmun hrang hrang ah mihring taksa peng hmang a sumdawng thin an awm tih thuthang a awm chiam anih kha, mitthi rûang chhar a awm fo a, chung mitthi te taksa peng chu a kim lo fo mai bawk. Mipui chi ai leh mangang mek karah mi thenkhat phei chuan naupangte him zawk nan leh naupang tap thlem nan nawngsawhnawh tih tawngkam te pawh an hmang lar hle a nih kha.




Hun hlui leh chanchin hlui an liam a, Kum 2009 herliam mai tawh tur pawh chu ui tak chungin ka thlir ve mek zel, mihring te hi chuan kan hun tawn hlimawm lai leh kan nun a kan hriat reng tawh tur hun lai bik a hi kan nei theuh va, thlasik a ni chho mai dawn si nen, lunglenna leh sulhnu hlui ngaihna thlarau chuan chhungrilah min tham er er reng mai a ni.




Ka tan chuan he kum chhinchhiah tlak tak mai leh ka hriatrengna a bopil hlen mai mai tawh lo tur kum 2009 kum hi a pawimawh in hriatreng tlak a ni ve a, chutia min han herliam san leh mai tur pawh chu thlakhlelh vang ni hauh lovin ka ui in hriatthiam mai harsa ka ti ve rih hle a ni.




Tum danga ka tih thin dang ang thovin chumi tum pawh chuan doctor hmu turin Aizawl lam pan ka ni a, taksa lama bawrhsawmna in hun engemaw ti chhung chu min tlakbuak hnuah hun engemaw ti chhung bawk chu rilru lam harsatna nei zuiin ka han buai zui leh ta a ni a, Amaherawhchu hetia ka harsatna avanga ka buaina karah hian tun thleng pawha ka rilru a la cham reng thin chanchin mak danglam tak mai leh duhawm lo tak mai pakhat chu ka vawn that theih phah ta hlauh zawk a ni.




Mi hrisel lo ka nih avangin tun hma atang tawha doctor pan fo thin ka ni a, tun a Ka doctor pan thin hi private clinic nei niin keini ang rilru lama harsatna nei te buaipui thin tu a ni a, taksa lam bawrhsawmna chen in a ni tluka doctor thiam leh rawn tlak hi kei ngei pawh hian ka hmu tam lo viau reng a ni.




Kawt ah chuan kan intlar pat reng a, khua chu a lum in ni em chu a tang phian lehnghal a, chulai hmuna awm te chu an hmel leh pumrua han en mai pawha mi pangngai tak tak tur leh mi rintlak hmel tak tak niin doctor hmu tur an ni tih hre lo tan a doctor hmu tur an ni tih han hriat rual a phut zawk na tham tur an tling fur hlawm in ka ring.




Kan zingah chuan thingtlang lam mi ni ngeia lang, kum 50 ralkai hmel leh a pumrua pawh han en mai a upat lam pan mek ani tih hai theih hauh loh tur hi a awm ve bawk a, mitin mai chu mahni buaina theuhah an buai a, chutia in entir tura kawt kai a kan han in tlar ta put mai pawh chu mak tih a hnekin ngaia an neih fo thin ani tih a lang reng mai.




Kei chu ka thlen tlai deuh avang leh hming ka ziah tlai deuh avangin a hnuhnung lamah ka awm a, mahse mi pakhat inentir chhung erawh hun rei a ni lo thung, a awmdan mak danglam tak leh a khawsa zia pangngai lo tak mai avang chuan ka hma chiah a mi thingtlang lam mi ve tho ni a ka hriat khan ka mit chu a la thuai ta mai reng a, chu putar chu a zang a kul tan ani tih a hriattheih a, ni sa do thang tih hriat tak mai hian a kut leh hmai chu a thim tlat bawk. A kut leh ke chu a khur ngawt ngawt reng a, hnuai lam a bih tlat a, a awmdanah chuan doctor hmuh chu a huphurh a ni tih a hriat theih mai, doctor in hming a han lam rik a hriat apiang te chuan phawk fe hian a hawichhuak vat zel a, chumi pah chuan tlanchhe thut tur awm ziazang hian a tawlhsawn leh darh thin.




Chu pa awmdan chu ka lo en uluk hle a, ka tum lawk hauh lovin ka nui ta nghe nghe. 'Ni e, rilru lama harsatna neih hi zawng a buaithlak duhin a pawi thin takzet zawng anih hi' tiin chu pa lainat ru tak chung chuan ka hun nghak chuan thutna awmah chuan ka han thu a.




Inspector remruata hi mi lu zo veh vawh tak leh mawng zang tak, mi zam tha tak ti a han sawi tur a ni ngai hauh lova, pa lian lam, thluak hmang nasa leh mi tawng tam lo tak, a tawng chhunah pawh tawngkam khak nalh bik fahran lo hi a ni ve a, nimahsela a pumrua leh a hmel han en mai chuan tlangval in fit leh lawh tak leh zam tha fahran a han ngaih palh mai pawh thil awl tak tur erawh ni si a ni, mahse a hun leh a hmunah chuan pa te tuan rang an sawi ang mai a a hma a thil awm chu peh hel tum miah lova um ngat ngat peih mi erawh a ni a. Pa inkhaithli zaih mai, a hmel chu a mize phu lova chang far mai a ni, a chezia leh hawiher te reng mai chu a patling in a kum a tlem zawk zawk tawh bik hauh lo a ni tih a hriat theih mai awm e.




Inspector hian ngaihzawng a neih awm sawi tur a awm ngailo a, a rawlthar chhuah atanga a thian tha em em mai Nancy-i chauh chu pangngai taka hmeichhia a biak awmchhun leh a kawm thin chu a ni chauh awm asin. Mahse chu erawh nunhlui an chang zo ta a, tuna inspector chantawk ni ta erawh 'thamral lo mitthla an' tih ang chauh a ni ta mai awm e.




Rinpuia chuan a rilru a thil kap tu awm avang chuan inspector chu biak ngei tha in a hria a, chutihrual chuan a rilru kap tu chu thil awmze nei lo leh hmuh sual thil mak mai emaw, taksa lam hrisel lohna thil avang a hriat sual leh ngaihtuahna mai mai a ni ang tih erawh a hlau hle thung. Nimahsela Inspector chu hriattir ve ngei chu a duh si a, Chutah inthlahrung duh lovin hmanhmawh tak leh helhhawlh ru tak chung chuan a pu awmna lam pan tur chuan a insiam ta mawlh mawlh a.




Inspector remruata leh Freddy-a te chu hun rei tak in hmu tawh lo an nih avang chuan titi pawh nuam an ti a, Freddya'n mi pakhat chanchin danglam tak mai a hrilh te leh amah leh doctor hriatpuia te ngei pawhin an buai phah nek thu a hrilh te chuan a thianpa ngaihtuahna chu a vah thui tir tak meuh meuh.




"Chu, pu lianzuala chuan nangmah chu a rawn pan veleh ta che tihna a niang maw?" Freddy-a en ha chung chuan Inspector chuan a han ti a, Freddy-a chhungril a hlauh rukna inmung mek chu hmuh hmaih theih a ni hauh lo. Chutah hlauhthawn hmel fe chung chuan Freddy-a chuan "ee khai, ruata i ti duh. Nizan hmasa pawh khan thil rapthlak tak leh tun thlenga ka ngaih ti thalo zui tu thil chu ka tawng fel der tawh zawk maw le! Zan hnih chu ka mu tawh lo. Ka thauah te hian min la man a, pu lianzuala chauh a ni lo, doctor hriatpuia meuh pawh in a at phah lo chauh tawh chu anih hi maw, he thil hi anchhia a nih loh nak chuan in thlarau sual hnathawh emaw thlarau vakvai hnathawh emaw a ni ngei ngei ang"




Inspector remruata chuan a thianpa mangang hmel leh hlauhthawnna chu a hriatthiam pui hle mai a, Freddy-a hi a mi hriat tawhah chuan mi pangngai leh kawm nuam tak, hawihhawmna nei mi leh pa inngaitlawm zet mai hi a ni a, tin doctor a hriat tawhah chuan a ni aia thiamna lam a han hmachhuan tur hi midang a hre bik hauh lo. Mahse a thianpa hmel leh awmdan te reng mai chu mi pangngai awmdan tur a ni tlat silo a ni. Tun hma a a mi hriat thin kha chu ala ni ngei mai, mahse Freddy-a chu tibuai tu leh ti thlabar tu an awm a ni tih chu amah hrechiang em em tu remruata chuan a hmuh thelh lo nasa mai si a.




"Chu, zan hmasa lamah chuan eng thil chiah nge i tawn reng reng a?" Inspector remruata chuan a han ti leh a. Freddy-a chuan a thusawi tur chu midangin an hre ve ang tih hlau ni awm fahran chuan inspector chu a han thut hnaih sauh sauh a, Chutah zawi sap hian a thianpa beng bul ah chuan,




"Ruata, kha mi zan a ka thil hmuh ang kha ka pian a hnu lama ka thil la hmuh ngailoh a ni" a thut hmun chu han her rem leh sauh sauh chung chuan, "ruata, khami zan khan doctor hriatpuia leh pu lianzuala te thil tawn chungchang chu ngaihtuah in ka muhil thei lova, ka mut hmun ah chuan ka inlet tawn sek reng mai a ni.


"Dar sawm leh pahnih a pel tihah chuan thawm mak danglam tak mai ka hre ve ta a, chu thawm chu pu lianzuala leh doctor hriatpuia te thawm hriat thin ngei chu a ni tih ka hrethiam. Naupang lianpui tawh aw ka ang berin ka hria, ka hriat tan dan chu ka mutna zawn bang hrul atang chuan zai ri ka hria a, a hla sak chu khawhâr hla niin ka mutna zawn a rawn thlen chuan a khawhâr hla sak tihbaiawm zet mai, a aw ngaihno bei lo zet mai leh nung lo zet a a zai hlarh hlarh ri chu zan reh tawh lamah chuan a fiah duh kher asin.




"Ka hlau lutuk chu ka khur zawih zawih thei hial reng a, ka puan sin lai chuan ka inlu khup a ka mit chu ka chhing tlat bawk. Mahse ruata a mak lutuk, ka tukverh chu a rawn ri ret ret a, amah chuan a in hawng thei tak ngial dawn a ka hriat avang chuan ka puan sin chu ka theh hlim nghal thuai a, Chutah Chiang zet hian tukverh lam chu ka va en ta a, thlahrang nge ni a misual zawk ni ang tih ka hriatthiam theih hauh loh tur mi pakhat hian ka tukverh darthlalang atang chuan kei chu min lo nuih vur vur mai anih tehreng chu, mak tak a ni mak tak.




"Chuveleh rang fe hian ka inperh tho nghal thuai a, hmanrua ka chuh nghal vat a, chuveleh chuan chu thil chu a mak a mak rang leh awih awm loh khawpa chak chuan In chung lamah a thlawh hian a thlawk chho nghal fua ni mai hian ka hria. Thla erawh a neih awm ka hre der silo. Mak ka ti lutuk leh ka hamhaih luatah che lo chang lo lekin ka dinna ngaiah chuan ka ding khawng reng ringawt a, ka harhchhuah meuh chuan a tlai zo tawh.




"Ka huaisenna zawng zawng sawm khawmin hmanhmawh fe hian In chung zawl lam chu fimkhur tak chungin ka pan ta a, ruata, tunah leh nakin thleng pawhin a mak hi ka ti bang leh tawh lo tawp ang. In chung zawlah chuan tumah reng reng ka hmu ta hauh lo mai anih chu, In chung lam kha chu a pan ngei si a, nge ni a van boruak ah chuan a thamral zui ta mai zawk.




Tin keimah kha ka Chiang lo deuh ruai a, mumang ram a cheng te pawh ka inchan dawn dawn mai. Chutah inven nana ka hmanraw ken chu ka han en chian nak chuan hmawlh emaw ka tih kha alo ni awzawng lo mai a, doctor hriatpuian kawl tura min pek ka khum bula dawhkan a ka dah mitthi tawh luruh ro lek zawk chu lo niin, ka han hmu chiang chu ka phu Chiang kher mai. Invenna tura hmanrua ka la emaw ka intih kha hriatpuian kawl tura min pek mihring luruh ro zawk kha alo ni a, ka â ve ta mai em ni? Nge ni a chu thil chuan min mawlh ang a luruh ro chu ka lo keng ta mai zawk?




"Ka sawi awmzia chu i hrethiam em? Kha dawithiam leh ramhuai pa khan ka thil kawl chu lo chhui zelin mi chhuhsak ngei alo tum tihna anih tak ber chu. Ni e, doctor hriatpuia ka be nghal chung chung a, hriatpuia hnenah chuan chu thil anchhedawng zet chu ka kawl duh tawh loh thu ka hrilh nghal sawk sawk a, Chutah, hriatpuia chuan rilru buai tih hriat tak mai a tawng vai deuh nawk nawk chung chuan chu ramhuai pa chu ka hmu leh anih pawhin tharum nena bei tawh hauh lo tur chuan min chah nghal mawlh mawlh mai a, a duh chu pe mai tur chuan min hrilh bawk. enge a chhan erawh ka hrethiam hauh lo.




"Chu ramhuai pa chuan luruh ro ka kawl chu a duh a ni ngei ang. Kei chuan 'a teuh lo, a teuh lo mai hriatpui, tharum hmanga han beih mai mai chi ziazang a ni lo. A thlawk thei hial asin. A che rang in a tuan a tha lutuk tlat, bangah a vak chho zawt zawt mai asin' tiin mangan lutuk avanga tap deuh pur chung chuan doctor chu ka hrâwk hrep hrep ani ber awm e.




Ruh ro min kawl tir nachhan diktak chu ka hrechiang ta viau mai a ni. Ramhuai chuan ka thil kawl chu a hria a min chhui ta zel tihna a nih tak ber chu, kha luruh ro kha dawi hmanrua emaw anchhia keng ani ngei ang, doctor hriatpuia khan Khatiang thil kha alo tawng fo tawh thin a ni ngei ang"




Inspector remruata chuan a thianpa thusawi chu uluk tak chuan alo ngaithla reng a, Chutah Freddy-a thusawi lai chu lo pawt chat in, "freddy, chutia chu pa in chung lama a thlawk chho ta ang maia rang fahrana a inthiar fihlim lai chuan nangmah lam i harh fim in i hriatna pawh chu a pangngai chiah a maw? I mumang pawh chu alo ni reng thei asin" Freddy-a chuan a thianpa in a thusawi chu a awih fahran lo ani tih a han hriat chuan a thin chu a ur lek lek thei hial mai.




"Mai mai a, chutin sawi reng reng suh. Anihna takah chuan kha pa lianzuala ang mai kha kan chan a ni chho ve mai ang tih mah ka hlauh nak a lai a. Doctor hriatpuia ngei pawh hei tunah chuan mi â ang hlauh a nih der tawh hi. A nupui lah chuan lungphu chawlin a thih san ve leh zel si nen. Tin, Hriatpuia thu min chah ngun em em mai chu chu ramhuai pa chu a rawn inlar leh hunah reng reng engtin mah tilo tur leh mal tawrh tawp turin min ti a ni"




Inspector chuan "chu, a nupui in a thihsan i ti e law?


"aw, a nupui chu hman ni deuh mai khan lungphu chawlin a boral alawm. Ka lainat tak tak a ni. Kha ruhro kha i duh anih chuan han kawl ve chhin mah rawh, engthil nge ka tawn chu i hre mai dawn alawm, hetia han ngaih mai hi chuan puithuna lam thil emaw ramhuai hnena inthawina lam rawngkai te hi awm ang dawn dawn in ka hria,




keipawhin a tirah chuan ka awih lova, ka thianpa hriatpuia thu min rawn berkher chu atthlak ka ti viau alawm, mahse a thil tawn ang chu a tak ngeia tawng ve turin min duh si a, keiin a thusawi te ka awih theih nan a a tih a ni. Tichuan ruhro chu min pe ta a, heti hian min hrilh nghe nghe, 'hei hi kawl phawt la, eng thil chiah nge i chungah lo thleng tih kan hre mai dawn alawm' a ti nghe nghe.




"Kha ruhro nen a inzawm ramsa emaw ramhuai riltam tihbaiawm tak a ni ngei ngei ang. keipawh chuan hriatpuia chu a thluak a buai vang leh a rilru buai vangah ngaiin a nupui a sun zo chauh si a, a â tawh ni ah ka ngai a awih lo rilru tak chung leh amah hriatpuia leh lianzuala te zawk chu ngaihtuah ru tak chungin In lamah ka hawsan ta kha a ni a.




Mahse hriatpuia chu a â tak tak tawh. Hriatpuia hnenah chuan ka thil hriatthiam loh leh chu thil thlen dan mak lutuk mai te chu enge a awmzia han zawh chian a thu tak hla tak mai a tawk lo, chaw tak khuk a khuk pui tak meuh meuh a tul a ni tih han hrilh chu ka duh tak takzet a ni, mahse biak tlak a awm tawh si lo"




Remruata chuan "a ni maw, doctor hriatpuia chu tunah enge a dinhmun ni chiah? A damlo enkawl thin te ang chauh in a khawsa ta mai tihna a niang maw?" A han ti a, Freddy-a pawh chuan a lu chu thing nar nar in "aa, a tul tawh kher lo, tuna han thar thawh leh pawh hi. Kha thil kha khami zan khan lo kawl duh lo tawp ila tha tur hi a nia, keima at vang vek hi alawm, hriatpuia thusawi te kha ka awih lo lutuk a, kha kha ka tihsual lian tak a ni. chuvang chuan he thil mak danglam tak leh thlarau sual, ramhuai ni ngei a lang nen a inhnamhanawihna thil hi keimah mai chuan ka mal tawrh ngawt thei lo a ni, hetia i bula ka thil tawn te ka han hriattir ve duh nachhan che pawh hi a ngaihna ilo hriat tak mial in tih thilah a ni"




Inspector chu a ngawi reng a, a ngaihtuahna chu a hmang ngun takzet. Chutah Freddy-a chuan inspector ngawi reng chu ngai thei lovin "ruata, lianzuala pawh khan he thil rapthlak hi alo tawn tawh vang ani chek a nga, amah lianzuala ber kha tunah chuan thil awmzia zawh chian ka duh ber mai. Ka hnena a lo kal leh hunah Chiang zawkin thu ka zawt fiah ang. Doctor hriatpuia damlo enkawl lai a ni a, mahse hriatpuia ber chu lianzuala ang hlauh ani ta mai si a,




"he thil hi rilru leh ngaihtuahna, thluak buai vang mai mai chu a ni lo tawp tih lah chu kei ngei pawh hian ka Chiang tawh si. Hriatpuia lah pek chuan a khat tawkin fimkhur tur leh ramhuai pa chu beilet hauh lo turin min chah reng a, a bak chu mi â biak tlak loh ang in a awm tlat si a. Eng ber nge tih tur ni ang tih hi ka hrethiam mai lova, lianzuala ber mai chu a rang a rang a thil awmzia zawh chian vat chu ka duh ber rih a ni"




Inspector chuan dam zet hian a thianpa dara han ben thak thak pah chuan, "ngawi teh Freddy, i sawi tak ang in lianzuala ber pawh chu hriatpuia ai mah in a biak tlak loh zawk daih ang. Tuna hriatpuia chan hi lianzuala lo tawn tawh hnu a ni tih a lang a, mahse lianzuala lah chuan amah mai a mal tawrh ngawt tur chuan a tuar chhuak zo in a inring bik lo ani chek a nga, doctor hriatpuia chu a pan tluk tluk mai anih si chuan maw,




tunah lah nangmah ah a kangkai leh tan mek ani tih lah chu a chiang angreng phian mai si a, nilo ve, he thil hi nangmah mai chuan mal tawrh bik mai love, remruatna te pawh ka lo siam ve dawn nia, mahse doctor hriatpuia thu hrilh tak ang che khan ramhuai pa chu a rawn inlan leh ta anih pawhin lo bei let hauh lo la, ilo thlir liam mai mai rih dawn nia"




Freddy-a chuan teu zet hian "engtin a ni?" A thianpa chu a thlek ang he haw a, chutah chang zet hian "ruata, ka tuar thei mai mai hleinem, a zan khatna mah tih nak lai a chutia min rawn thawn leh a tum anih ngat chuan silai ka inchhawp dawn khawp, ka kap hreh reng reng lo" A ti phiar phiar mai a.




Inspector chuan "ngawi teh ngawi teh Freddy, chuti rum rum a chet i lak mai zawngin miin i â ta emaw an ti thuai ang che, tin chet lak i tum dan chu a him lo riau bawk. Mak i ti ve tak tak lo em ni? Kei chuan mak ka ti tak tak tlat mai. Engvang a hriatpuia chuan a nupui chu chan ta mai nge maw a nih reng reng ang le?




"Lungphu thalo a thi ta pawh nise hriatpuia nupui thihdan chungchangah chuan thil hriat tur pawimawh tak a awm ngeiin ka ring tlat. A rilru leh a thluak a buai lai vel a a nupui chu chan a ni lehzel lai te chuan fiah vak lo mahse thil awmzia chu min pharhchhuah sak lek lek niin ka hria, lianzual ngei pawh chu hriatpuia ang tho vin a nupui in a boral san tawh ngeiin ka ring tlat a ni.




lianzuala leh hriatpuia te ang chauh chu i ni ve hlauh dah a nge, i hmangaih i chan ve palh hlauh a nge, chuvang chuan hriatpuia thurawn che chu zawm hram hram phawt mai rawh. Kei chu ka ngaih a tha hauh lo mai. Tin, Lianzuala leh hriatpuia te chu i sawi tak ang in tunah meuh chuan an rilru leh thluak chu a buai tak tak tawh hi ka ringhlel hauh lo bawk"




Freddy-a leh a thianpa inspector remruata te pawh chu an intin san ve ta a, Freddy a'n a harsatna tawn mek a thianpa a hrilh hriat ve tak pawh chu engtiang a han bawhzui chi nge ni ta ang? Chu thil thleng tihbaiawm zet mai chu engvang a lo awm ngawt nge anih? Engtia han tih tawp tur nge ni ang? Inspector remruata ngaihtuahna ah chuan zawhna tam tak a inchhekkhawl mek si a, chu thil thleng mek chu an tihtawp vat loh a a chhan leh a vang an hriatchhuah vat loh chuan a thianpa Freddy-a ngei pawh chuan ala tuar ve ngei dawn niin a lang si a.




Ka kiang a thu ve, a hmel han en mai pawh a engemaw chian lohna tak a nei a ni tih hai theih hauh lo tur leh hlauhthawnna leh manganna thuk tak nei ni ngei a lang, chu pa hmel chu uluk deuhin ka han en chiang a, Chutah, a thu min hrilh chu awih lo ru tak chung chuan heti hian ka han ti a.




"chu ka pu, puithuna atthlak nen chuan i chunga vanduaina thleng mek chu i han ngaihruat chhin ta tihna a niang maw" ka han ti a, Chutah chu pa chuan lawi zet hian "vala, he thlarau vakvai hi tunge anih ka hriat avang tak chuan alawm kei hi min tihbuai chhunzawm tak reng ni. Kha thil kha ka lo kawl tha reng reng mai pawh a, ka lak loh tawp tur thil ka la alo ni" a han ti a, chu pa bawk chuan a hrawk bawk lian tha nelh nawlh tak mai kalh rawlh khawp a a chil chu han lem khal in "e khai, vala, he thlarau vakvai hian chawlhna a hmuh hma chu a tawp dawn lo tih hi ka hrechiang tawh a ni.




"Nitin mai hian ka thih hun tur nghak in hun ka hmang reng a, engtikah nge ka thih ang tiin hun inher dan te chu ka chhut ka chhut mai thin maw le, mihring te thlarau hian chawlhna an hmuh hi chuan an chawl hahdam tawh mai thin, mahse he pa ve thung hi chuan a chawlhna siamsak tu tur chu ala tawng lo ani chek a nga, kei hi min bitum ta ngat ngat mai reng anih hi maw. Kha thil, building hlui tawh taka ka chhar kha he pa hian min dil chamchi reng mai dawn zawng anih hi maw, ka thih hma chu a duhtawk dawn silo, a thlarau chawlhna siamsak thei tu tur mi tu emaw tak an awm a tul a ni, kei hi chuan ka chawlh hahdam tir thiam lo a ni a nge"




Kei chuan chu putar vun vuai tawh tak chu lainat fe a thlek vang vangin "ka pu, thlarau pa thil chu i pe let leh mai lo anih chu maw le aw" ka lo ti a, a ni chuan dam dap hian "ee! pek let leh theih chu ni ngat se zawng ka dam lai a ka thil puitlin chak ber a ni ve ta ngei ang. Pek let leh tluk a duh engdang mah ka nei lo" Hnuai lam chu a bih leh ngat a, a melh ngai chu a melh tlawk tlawk a ni ber e, kei chuan chu pa chu Chiang taka en chung chuan chu "ngatinge i pek let leh mai loh?"




Chu putar chuan a hmui chu a han tuai pawk a, kut khur dar dar chung chuan "e khai tlangval, thil i hrethiam lo tawp a nih dawn hi. He thlarau vak vai hi a damlai in dawithiam a ni ngei ngei ang. Ka mutna bul maiah te chuan zan tin deuh thaw hian a rawn kal thin a, tawng mak pui pui te hian a rak bul bul thin a, dawi hla chhamphual ni awm tak tak te hi a phun pui mawlh mawlh mai thin asin. Ka hnenah chuan a riltam thu te min rawn hrilh thin a, mihring kawchhung a ei thin thu te a sawi a, mihring thin la lum vat vat lai ngei mai han ei a chak thu te chu min hrilh chamchi reng mai maw le!




"A chang phei chuan mihring kawchhung leh mihring thin ei tur te chu min dil tlut tlut ta mai thin a, 'min pek loh chuan nangma thin kha ka ei ang' ti tein min vau khur khur thin maw le, Khatiang a thawm a rawn neih tawh hi chuan ka hlau zo va, ka mangang zo va, ka chhia leh tha hriatna te ngei pawh hi lakkian ang hlauh an ni tawh thin.




"A chang chuan hriatthiam mai har tak, mahse anchhia a ni tih hriattheih theih tur si hian tawngkam dengkhawng tak tak leh thu rapthlak tak tak hmang te hian anchhia min lawh mawlh mawlh thin a, dawi hla chhamphual ang ang tak tak a ni, 'thi rawh' tih te, 'i Pathian khan a hawisan tawh che' tih te, 'tunah chuan ka ta i nih kha' tih te, 'ka thu ang zelin i awm tawh ang' tih te, a lehlamah ve thung chuan chutia hlauthawng leh mangang a min awm tir avanga a inthiam loh thu te, hreawm a tih thu te, a ro zinga thil pakhat ka kawl chu lak let leh a duh mai chauh thu te leh a riltam avang a ei tur min dil anih thu te min hrilh a, kei chuan chung zawng zawng ka mutna bul a ka hnena a thu sawi zawng zawng te chu zankhaw tairek thleng thleng chuan hlauthawng tak leh mangang tak chungin ka ngaithla tlaivar zak thin a ni.




"A chang phei chuan tualthat mai tur ten min fuih thin a, tual ka thah phawt chuan a thlarau vakvai chawlhna hmu zolo chu a chawlh hahdam ve theih tawh tur thu te min hrilh a, tin a thil ka kawl sak tak chu ka pe kir leh thei lo anih chuan alak atanga ka zalen theihna awm chhun chu a thlarau tan a tual ka thah sak mai chu kawng awmchhun anih tur thu te chu min hrilh nghe nghe bawk a ni. Mahse kei chuan tualthah chu sawi loh, chu thlarau vakvai pa min nghaisakna avang ringawt pawh chuan ka chau zo va, ka rilru leh ngaihtuahna a mang zo va, rilru buai leh thluak buai ang chauh ka ni zo ta zawk a, doctor rawn ngai hialin ka awm phah ta anih hi"




Kei chuan chik fe hian "ni e ka pu, a thil ilo kawlsak chu pe mai ta reng che, a thlarau a chawl tawh a nga, buaina chu awlsam te in i pum pelh thei ni mai tur hi a nia" ka han ti a, Chutah ka thusawi avanga chu pa hmel inthlak danglam mek chu ka han hmuh chian nak chuan ka va phu teuh kher em ve le! kei chu chumi tum la la chuan min thah mai pawh hreh loh hmel zet hian rum namen lo hian mi han melh ta khui khui mai a, ka hrilh a hai in ka chi ai hman thelh nghe nghe.




ka mangang deuh chuan kan bula mi te hnenah chuan tanpuina han dil nghal rum rum mai pawh chu ka duh hman hial reng a, mahse ka pu chuan ka mangang a ni tih hria in "ngawi teh tlangval, i thusawi ang a thil tih awlsam chu nise zawng a thil duh chu ka pe mai reng ang chu, mahse chu thil, building hlui tawh taka ka chhar kha ka dahna hmunah ka hmu zo tawh tlat silo a tin ni.




"Mahse thlarau vakvai chuan a thil duh chu ka nupui in a lak bo thu min hrilh nghe nghe a, kei chuan ka nupui hnenah chuan ka han zawt ta a, ka nupui in ala hriat ve ngailoh thil chungchang ka han zawh tak rawih ah chuan lungawi lo tak chung leh ngaihtha lo takin ka thil zawh chungchang chu min zawt let chamchi ta mai a, mahse kei chuan chu ramhuai pa in a lokal leh hun a ka kawchhung leh ka thin chu min ei sak mai ka hlauh tawh em avang chuan ka nupui thusawi pawh chu ka awih duh lo.




"Ka nupui chuan ka thil dahthat chu ala bo ni ah ka ngai tlat tawh ani, ka thin chu a ur in ka lungawi lo ta hle mai a, kan inhnial thinrim chho zel a, tichuan kei chuan ka thinur chu insum hman lo in" chu putar chu a chawl dawt a, Chutah "ngawi teh tlangval, i duhtawk teh ang, hei kan ni pawh kan hlat tawh love, doctor hriatpuia hnenah hian engkim chu ka hrilh vek thin a, mahse kei chu ka rilru ngaihtuahna vakvel mai mai ni ah min ngaih sak tlat pek anih chu maw le!




A hmel chu a phawk kher mai, chutihrual chuan doctor hriatpuia ngaihdan avang chuan a lungawi lovin a lunghnur takzet tih a hriat theih a. "Tlangval, ka mimal chanchin ka hrilh hnem ta mah mah che a ni" A han ti leh a, Kei chuan "chu, doctor chuan engtin nge a tih tak zel che a"


"Ee khai tlangval, ka chanchin tam tak chu i hre ve ta chu a ni a, i hriat tam lutuk chuan nangma tan ngei pawh hian a pawi lutuk palh a nge, he thlarau vakvai hring ei pa hian a tibuai ve palh hlauh ang che"




Kei chuan luhlul chhuahin "ka pu, doctor puihna chu i mamawh anih ngei chu. I rilru leh ngaihtuahna vakvel mai mai pawh alo ni thei asin" Ka han ti ve salh a, Chuveleh thinrim avanga meng awm awm chung chuan "nauva leh, i tawngkam chu i duh tui lo kher mai maw. Doctor chu a thil awih loh leh ka thusawi men ah min tlaksak duh loh avang hrim hrim in zirtirna ka pe ve reng reng dawn a ni. Lo ngai mah rawh. Doctor chuan beng a hriatna mai niloin a mit ngeiin he thlarau vakvai hi ala hmu dawn a ni" tiin a inseh ruh nasa ta mai a. Kei tak pawh chuan a ngaihna ka hre lo takzet.




Ka aw chu ka han thian kharh kharh a chutah putar hnenah chuan "ka pu, chu thlarau vakvai i tih chu i finfiah tawh hrim hrim em?" Ka han ti leh hram a, chu pa chuan "mai mai a, tum tam tak ka finfiah ngailo in amah zawk chuan mi rawn finfiah fo thin zawk maw le! A rawn inlan dan chu rapthlak tih hian a hrilhfiah zo kher lovang, thi hlir a khat mihring kawchhung leh thin te chu ka hmuh lai ngeiin a ei thin alawm"




kei chuan duhthawh zet hian "ka pu, thlarau chu chawlh tir dan ngaihtuah vat a tul anih chu, chumi anih loh vek pawhin hnawh bo dan ngaihtuah a ngai anih chu" ka han ti leh hram a, chu pa pawh chu tlem chuan a thinur pawh a dai ta deuh, Chutah lawi zet hian "imm, keipawh hian chu chu ka duh ber a ni alawm, mahse a tihdan tur ka hrethiam silo a, he thlarau vakvai hi a fing em em mai bawk si a, ka beidawng tih ngaihna hre lovin mi thiam zawk doctor hnenah hian ka chanchin leh ka chunga anchhia thleng mek chungchang chu ka hrilh ta reng a ni.




"Mahse a laka ka beiseina neih ber in mi â ang chauhah min ngai si a, he thlarau lah hian a lak atang a talchhuah dan ka dap a ni tih te thlengin alo hre ve leh zel si anih phei chuan ka tan chuan ka thih hun nghah hi a ni deuh mai tawh awm e, nitin in ka thih hun tur hi khur zawih zawih chungin ka ngaichang ta deuh chawt a ni ber mai. Ka ngaihtuahna chhungril ber thleng te hian he thlarau hian min thunun vek tawh a, ka tih tur leh tih loh tur te chen in a thuhnuai a awm ang chauh ka ni mai e.




"Mahse beiseina tih beidawn nan tal pawh tiin doctor chuan he thlarau hi hnawh bo dan tur leh ka dam leh theihna turin hma lak min tiam ta hlauh a ni. Chu chu tunah hian ka ngaichang mek chu anih hi maw, doctor chuan ka thil tawn ang chu a tawng ve reng em? Engtia hma chu han lak chi nge ni ta ang' tih laia chu ka beiseina awmchhun an ni e"




Kei chuan chu putar khawngaihthlak tak mai chu en in "ee ka pu,lungngai reng reng suh. Tawngtaina lamah theihtawp ka lo chhuah pui ve dawn che nia" tiin a dar a han vawn pah chuan "ka pu, tunge i hming ni reng reng a?" ka han ti a, chu putar chuan chau aw tih

hriat tak hian "ka hming chu lianzuala a ni e vala" a ti ta a. Chumi rual chiah chuan doctor hriatpuia pawh chuan pu lianzuala hming chu a rawn lam ve mek bawk a.