PSYCHIC Volume II Chapter -2

[April Hmar Liverpool]

PSYCHIC_Volume-2

Ziaktu, Laltanpuia


Chapter _2




Rinpuia chuan a rilru kap reng tu chu inspector remruata hnenah chuan a hrilh mawlh mawlh reng a, inspector pawh chuan rinpuia thu hrilh te chu uluk tak hian a ngaithla dauh dauh reng bawk a, Chutah inspector chuan rinpuia thusawi lai chu lo pawt chat in,




"chu, pi lucy-i chuan ramsa a ti e law?" a han ti a, rinpuia chuan "sir, ka pi min hrilh dan kha chuan ramsa a zawng a ramsa tihbaiawm ber a ni hial ngei ang. Tum thum zet chu a ni zawn zatin chu ramsa tihbaiawm zet chungchang chu min rawn hrilh thin alawm, mahse kei kha thil dangah kan buai thin si a, ka lo ngaihven chiam lo ani.




"tin, ka pi chuan chu ramsa chu 'mihring a ni' a ti tlat lawi bawk si a, tin chu ramsa chet dan a sawi hmang kha a danglam riau mai a, kei khan a thil hmuh sual mai mai anih ringin ka ngaihven teh chiam lova, tin chu ramsa mihring chu kawt laiah bawkvak a a kal thu te, tin ramsa chuan kan pi chu tawngkam rapthlak tak in a bia a ni bawk awm e"




inspector chuan "imm, chu thil chet dan hmang chu a rapthlak hle tak anih chu, mahse rinpui, amah kan pi lucy-i chu engtin mah a awm lem lo ani phawt a nga"




Rinpuia chuan rilru hah tih hriat tak mai hian a chal sam chu a han hui pawk a, chutah thawk halh pah chuan "ka lo ngaihven vat lo kha ka inthiam lo hnuhnawh reng a ni. Tunah chuan ka pi chuan chanchin engmah min rawn hrilh tawh ngai lo, a reh ta vang vang mai a ni. Kha tia zan lai a an bawlhhlawh bawm hai a ramsa hlauhawm tak mai in thawm alo chhuah a han hriat khan a enfiah nghal vat a ni a, a beisei loh lutuk thil ava hmuh tak maiah chuan a hlau hle mai a, kha thil mak tak khan an bawlhhlawh bawm chu lo haiin a ka te chu a sen huam mai a ni awm a,




"Chutah ka pi chuan a hmeh en ken hmang chuan chu thil chu Chiang zet hian a han chhun ta a, chu ta a thil va hmuh avang chuan ni khaw hre lovin a tluk tir thelh nghe nghe a ni. Chu ramsa chuan mihring thin leh khawchhung ni ngei tur chu lo ei in thisen te chu bawlhhlawh bawm kiangah chuan an pherh nei nuai mai a ni awm a, mahse a inrin hman hma hauh in kha ramsa khan ka pi chu a rawn hmu thuai a, tichuan chu ramsa chuan tawngkam mak sak pui pui leh rapthlak tak tak hmanga kan pi chu an khum zui bawrh bawrh in a hma ai zawnga ramsa hlauhawm ang mai chuan a insiam danglam ta chiam mai a ni awm e,




"lungawi lo fe chungin a kalsawn ta a, tichuan kan pi hmuh lai reng chuan a awmna hmun atang chuan kawt Kai lamah chuan a ing elh kual phei ta ngawt ngawt mai a, bawkvak a la ing elh nawk nawk reng chung chuan rapthlak zet in a rum nghut nghut mai a ni awm e"




Inspector chuan "chuti chuan zan hnih chu ramsa chu a che tihna a ni maw?"


"Imm sir, ka pi min hrilh dan kha chu a ni ngei alawm. A zan hnih naah phei chuan chu ramsa hlauhawm chuan amah ka pi chu a thin leh a khawchhung a ei zawh vek tur thu a hrilh a ni awm e"




Inspector chuan mak tih hmel fe hian "chutiang ramsa mihring ang ni bawk si chu engtiang a awm thei nge anih reng reng le?" A han ti a, rinpuia chuan a ngaihna hriat loh hmel zet hian "a lan danah reng pawh chuan mihring pangngai chu ani thei lo tawp ang le" alo ti ve bawk a.




Inspector chuan "chu, ramsa chuan thawm tihbaiawm tak a nei hmasa fo a ni awm a, tichuan bawlhhlawh bawm a mihring kawchhung an paih chu a ei ta thin tihna a nih ber chu a?" A han ti a, rinpuia chuan "ni e sir, ka pi khan a thil tawn dan leh a thil hmuh te min hrilh thin a, kei khan Chiang zawka thu zawtfiah lem lovin kalo ngaithla liam mai thin a, mahse hetia ka pi a han reh tak vang vangah chuan ka pi chu ka ngaihtuah ru ta hle mai a ni. Ka rilru a kap reng a, amah lah chu ka han biak dawn lahin biak pawh theih a ni ta hauh lo mai a ni"




Inspector chuan "rina, mihring kaw chhung leh taksa peng te chu engvang a bawlhhlawh bawmah chuan awm ngawt nge anih? Kan pi te chhungkua chuan an paih thin tihna maw? Mihring kaw chung nilovin ran khaw chhung leh ar puahna hnuhma te emaw a ni zawk mai lo maw? Heng ui leh zawh te ho pawh hian bawlhhlawh bawm a ar puahna hnuhma kan paih thin te pawh hi an hai ve fo thin a nia, tin, a thil hmuh pawh chu khaw lai ui tang laktlak loh pakhat ve mai te pawh an lo ni reng thei asin"




rinpuia chuan boruak chu a han hip lut vang vang a, chutah uluk fe a ngaihtuah in "sir, chu tak chu a ni, a tir a ka bengkhawn duh lem loh na chhan tak chu, amah ka pi khan thil a hmu sual anih ka ring a ni. Tin, ka pi kha rilru lam buaina emaw taksa lam dam that tawk lohna emaw a nei anih ka ring hial asin"




Inspector chuan "imm, chu chu thil awm thei tak a ni reng a ni. Mahse hetih mek lai hian keipawh hian chanchin mak danglam tak hrilh tur che ka nei ve bawk tak asin"




Rinpuia chuan a pu thutak hmel lutuk mai leh aw ki hniam lutuk avang chuan han sawi mai tur a hre lo viau mai. Chutah inspector vek chuan "rinpui, ka thian pa Freddy-a kha ila hria em? A ni khan a chung a thil thleng rapthlak lutuk mai chanchin chu rilru mumal lo zet chung in min hrilh asin, i hria a nga doctor a ni a, a ni ang doctor meuh in a fiamthu hauh lova a sawi chu han awih loh sak ngawt chi a ni silo" tiin Freddy-a nen a an inkawmna leh Freddy-a thil hrilh zawng zawng te chu inspector chuan rinpuia pawh chu a han hrilh ve malh malh reng a. A tlangkawm nan Inspector chuan Freddy a'n a hrilh tak ramhuai ang maia amah tibuai tu chungchang leh chu ramsa tihbaiawm tak pitar hmuh chanchin pahnih chuan eng inzawmna emaw tak chu an neih a rin thu te chu a hrilh malh malh reng a.




inspector vek chuan, "rinpui, Freddya'n min hrilh tak, kha ramhuai che rang leh tihbaiawm tak mai kha i sawi tak kan pi hmuh ramsa tihbaiawm tak kha alo ni reng maithei asin. Han ngaihtuah mah rawh, a hmu tu ten an sawi dan atang chuan mihring pangngai tih theih loh tawp tur leh mihring nunphung ang lo tak in chet ala a ni a, Freddy-a pawh kha kha thil doctor hriatpuia'n a kawl tir luruh ro avang khan he ramhuai pa hian a hnu a chhui tihna a ni mai a,




"A hmasa lamah i sawi tak pitar hmuh tur khan kha lamah khan chet alo la tawh tihna a ni mai a. Tin, kan pi chu a reh tak vang vang chhanah pawh chuan chu ramsa chu a thawm hriat tur a awm zui tak loh avang leh a hmuh zui zel tak loh avang chu ani thei bawk awm e.




"A hmasa in doctor hriatpuia hi ka kawm hmasa ngei ngei teh ang. A ni hian thil awmzia bulthut chu a hre ngei tur a ni. Tin, lianzuala kha a dawt leh a mi tur a ni bawk. Doctor hriatpuia khan ka thianpa Freddy-a chu kha thil, hring ei pa in a hnu a chhui zui chat theihna tur khan luruh ro, dawi thil leh puithuna nen a inzawm tlat thil kha a pe a ni si a, tichuan hriatpuia hrilh lawk ang ngeiin ramsa chuan Freddy-a chu a chhui zui ta ngei a, he thil thleng hi kan tihtawp vat loh zawngin Freddy-a ngei pawh hian a at phah lo anih vek pawhin a nunna atan thleng hian a pawi thei dawn tlat niin a lang.




"Tin, midang pawh doctor hriatpuia leh lianzuala te ngei pawh kha, mahse an ni chu ramhuai pa chuan a kalsan tawh a nih ngei hi ka han ring ringawt a, a kalsan tak apiang te chuan chu ramsa leh ramhuai ni bawkin a kalsan na turin midang tawktarh tur an zawng te pawh a ang dawn dawn mai. Lianzuala ani phawt a, chutah Doctor hriatpuia ani leh a, Freddya ani leh a, tin i sawi tak pi Lucyi pawh khan alo tawng fuh ve ani ngei ang. Mahse Tunah chuan, lianzuala, doctor hriatpuia leh pi Lucyi te chu ramhuai pa chuan a kalsan tawh ani ngei ang, Tunah rih chuan Freddy-a hian venhimna a mamawh hmasa ber rih ani, ramsa bitum lai mek a ni si a, tichuan nangni lam in Freddy-a chu in lo ngaihven ru deuh dawn nia, keiin doctor hriatpuia leh lianzuala te chu ka lo belchiang dawn a ni, tin pi Lucyi pawh chu Kan ngaihven tel dawn nia"




Rinpuia chuan "sir, thil pawi a thleng em lo turah ngai ila, ka pi pawh chu ka be thei hauh lo chu a ni si a, enge a chanchin ni zel ang tih lah chu Chiang a ni hauh rih silo"




Inspector chuan "imm rina, a ni pawh chu a ngaihtuahawm viau mai. Mahse he ramsa hian a tibuai tawh lo a ni tih hi ka rindan erawh a ni, mahse i sawi tak angin nungdam in ala awm reng em tih laia chu ngaihven hrim hrim erawh a tul khawp mai"




"Sir, ka hriatthiam loh lai a chu engvanga biakpawh theih loha awm kher nge anih tak tih lai a hi a ni. A chungah chuan eng thil pawh lo thleng ni se, a mobile number a han biak tlang theih loh tawp ta mai hi ka hrethiam lo takzet a ni"




"Imm rinpui, chu zawng a la rawn langchhuak ngei turah ngai ang. A chhung te lam an pawimawh dawn niin a lang chumi lamah chuan"




Ni hnih dang a liam leh hnu chuan Inspector remruata chuan Freddy-a hnenah chuan chanchin a han zawt a, Freddy-a chuan engmah thil thleng a awm tawh loh thu leh ramhuai pa pawhin a rawn tihbuai zui loh thu alo hrilh a, inspector chuan mak a tiin a hrilhhai viau mai. chu ramhuai pa chuan Freddy-a chu chhum lo chat lova a tihbuai zui zel chu alo rindan a ni si a, inspector chuan Freddy hnenah chuan,




"Freddy, ramhuai pa chuan ala rawn tibuai leh miah lo che a maw?" Hrilhhai hmel tak chuan a han ti a, Freddy-a pawh chuan "imm ruata, khami zan khat bak kha chu min rawn tibuai ta hauh lo mai. Tin, min tibuai chhunzawm hauh lo hi ka tan chuan thil lawmawm tak a ni. Doctor hriatpuia ang maia min tihbuai ve hi ka duh lo takzet a ni"




Inspector chuan a ngaihtuahna chu a hmang uluk kher mai Chutah Freddy-a hnenah chuan "thianpa, vawikhat leh chauh chu chu ramhuai pa chu rawn in lan leh se ka va ti em!" A han ti a, Freddy-a chuan teu zet hian "engtin a ni? Engvang a chutia a rawn in lan leh chu beisei ngam nge maw i nih reng reng le, ruata he thil hi mihring a ni hleinem, mihring a nilo. Chutia man mai mai theih lah a ni hauh lovang. Tawngtaina nen uluk takin mahni inveng ran in ka awm a, min tibuai zui ngam ta lo a ni ngei ang. Ka thaw hi a veng huai thei hial zawk asin"




Inspector chuan Freddy-a hnenah chuan "ngawi teh freddy, i thianpa doctor hriatpuia leh lianzuala te pawh chu enge an chanchin zel tih te pawh hriat ava tha ve, an chanchin hi i ngaihven ngai em?" Chutah Freddy-a chu han inseh ruh ul ul chung chuan "imm ruata, doctor hriatpuia leh lianzuala te kha an mahni chunga anchhia chu kei in ka lo tuar ve zel hi ka duh tawh lo. Ka chunga a tlak ve zel hi ka duh lo. Tunah chuan kei chu ka him tawh niin ka hria, tin abikin hriatpuia hian tihbuai hrim hrim hi a ngaithei tawh lo bawk. Ngaihtuah emaw nghaihven emaw hrim hrim hi a haw hle a ni ringawt tawh. Chuvang chuan keipawhin ka tibuai duh tawh lo. Lianzuala erawh ka hnenah in entir tura a rawn kal leh a nih chuan kawm chian erawh ka la duh khawp a"




inspector chuan "e khai, Chutiang a tih mai mai tur a ni hleinem, i thian te chu puih an tul takzet asin. Hriatpuia chuan thil tangkai tur hriat a nei nualin ka ring. Chuan enge a chhan ni ta ang? Ramhuai chuan a tihbuai zui tawh loh na chhan che chu enge ni ta ang? Kha thil, hriatpuia pek che kha, luruh ro kha i paih bo ta tihna em ni?




Freddy chuan "imm, ka paih bo ta mai anih kha, khaw pawnah hmawm paih na ah ka paih daih alawm"




"Chu thu chu hriatpuia'n a hria em?" Freddy chuan "aw hria e, ka hrilh alawm, ka thil kawl chu ka paih thu ka hrilh a" inspector chuan "tichuan tihbuai chhunzawm i ni ta lo tihna a ni a nga? mahse i thian te pahnih ve thung chu enge an chanchin ni zui ta zel tih lai a chu ka ngaihven riau mai"




Freddy-a hmelah leh awmdanah chuan inspector ruata hriatthiam theih loh tur thil tam tak a hmuh theih a, Freddy-a chuan chu thil amah tibuai tu leh a thian pa doctor hriatpuia buaina chungchang pawh chu a ngaihven duh tawh lo takzet a ni tih a rin thiam theih thung. Mahse inspector chuan a thianpa ber chutia chu buaina lak atanga inhnamhnawih lo leh buai zui duh ta lo ang mai a a han awm a hmuh chuan a duh hauh lo thung a. Chu thil chu eng chiah nge anih finfiah chu ala tum ru viau tho a ni.




Inspector chuan Freddy-a hnenah chuan doctor hriatpuia phone number chu a han dil a, Freddy-a chuan phawk fe hian "eng atan nge i tih?" A han ti a, inspector chuan Freddy-a hmela ngaihthat lohna chu ngaipawimawh duh lovin "hriatpuia chu ka kawm dawn"


"Nilo ruata, hriatpuia chu engmah sawi pui tlak a awm tawh lo. Mi â pakhat ve ang lek chauh a ni tawh. Tin, amah i ngaihven a a chinchang i buaipui hian kawng ro a su hauh lo bawk. Hun khawhralna mai mai a ni"




Inspector remruata chuan luhlul chhuahin "Nilove Freddy, tanpui ngai an awm a, kan tanpui tur a ni. Hetia han pamtul leh mai mai atan hi zawng ka ui laklawh ve riau pakhat bawk a ni"




A thianpa inspector in chu buaina chu a hriatchian chak tlat avang chuan Freddy-a pawh chuan thil awmzia diktak chu a hrilh ve ta a. Freddy-a chuan doctor hriatpuia leh lianzuala chunga buaina thleng mek chu hmanlai ata tawha dawithiam ho anchhia a nih a rin thu hrilhin vai puithiam ho pawh hriatpuia chuan a rawn tawh thu te a han hrilh fiah ta a, mahse chu vai puithiam thurawn ang a chet a lakna chuan a damchhung a a inchhirna tur thil a thlen tir ta zawk a ni.




Inspector chuan chik zet hian "chu, vai puithiam chuan engtin nge hma alo laksak a?" Freddy-a chuan "ruata, kei ngei pawh hian thil Chiang ka hre bik lo. Hriatpuia chuan ka chung a thil pawi a thlen hma ngeiin ramhuai chu bei let hauh lo tur leh mahni a mal tawrh tawp mai turin min hrilh a ni. Mahse kei chuan ka thei ve lo.




Inspector chuan "imm, chutia buaina i tawh chhunzawm lem loh chuan a tha ah ngai ang. Mahse hei ka nau rinpuia te hian i him zel zawk nan an thlithlai dawn che a, i hrethiam ang chu maw"




Freddy-a chuan "e khai, chu em em zawng a inthlahrun awm alawm, in tan hun a hek mai mai zawk ang"




Inspector chuan "kei in he thil, ramhuai nge ni a ramsa zawk ni he thil hi a chetna ka chhui zui dawn a ni. Tin nangni lam pawhin a rawn che thar leh emaw a chanchin in hria anih chuan min hrilh vat dawn nia. Tin lianzuala pawh chu ala rawn lang leh ta mai lo chu a ni si a, a ni pawh chu mamawhna a sang hle mai"




Inspector chuan doctor hriatpuia chhung te chu bia in doctor chu hmuh a duh thu a hrilh a, doctor chhungte chuan amah doctor ber in mi tumah hmuh a duh loh thu an lo hrilh a, mahse inspector chuan police lam atang anih thu te hrilhin a hmuh ngei a tul thu a han hrilh takah chuan doctor chhung te pawh chuan an lo remti ve ta a, inspector pawh chuan doctor hriatpuia hmu tur chuan doctor chenna In lam chu a pan ta a.








Inspector chuan doctor hriatpuia chu a en uluk ngat ngat viau mai a, doctor chu thahrui neilo tih hriat tak hian a kut leh ke chu a khur dar dar reng a, a sam a thur hle a, tarmit fim vuahin a zang chu a kul deuh khan mai bawk. Mut kawr ha in chapal vawthlep a bun a, a ban veilam a a rangkachak sana bun chu a nalh takzet. A kut zung u ah chuan rangkachak zungbun pahnih a bun a, chuveleh inspector chuan a nupui a boral tawh tih Freddy-a hrilh kha hria in heti hian a han ti a,




inspector chuan a thuthmun chu han siam rem sauh sauh in, "ka pu, i nupui hi hman ni maiah a boral tih ka lo hria a" doctor chuan chu thu a hriat veleh chuan inspector chu a melh deuh hra mai, "engtin nge chu chu i hriat?" Inspector chuan chu thu hrilhtu Freddy-a chungchang chu zep a han tum zet a, mahse doctor hnenah chuan Freddya'n a hrilh thu chu a hrilh leh ta zawk a,




Chuveleh lungawi lo tih hriat fe hian doctor chuan "imm, Freddy-a mai mai chu, a ka a an lohna turah a ka a ang hnem dawn tlat. He thil thlengah hian engmah sawi sawi a tul tawh lo. Anih tur ang chu a ni vek tawh" Chumi lai chuan kawngkhar ah chuan tlangval ni ngei tur pumraw lian lam leh a ban puam leh a nghawng te chu insawi zawi thang tih hriat tak a sek phiar deuh tul mai hian an titi lai chu ngaihven tih hriat fe hian a rawn thlek leh ha thin a, inspector chuan chu chu lo hrethiam in "saw saw i fapa a ni maw?" A han ti a,




doctor chuan "aw ni e, ka fapa a nih saw" Alo ti ve mai bawk a, inspector vek chuan "ka pu, Freddy-a min hrilh dan chuan i nupui chu vanduaithlak takin In chung atang a chesual in a boral thu min hrilh a" a han ti leh a, doctor chu lungawi lo tih hriat tak hian a han rum nghat a, chutah doctor chuan "imm, Freddy-a chuan zirlai a la zirchhuak kim lo a ni maw, tun a chinah engmah a ngaihven in a buaipui zui tawh loh tawp hi ka lo ring a nia, mahse Freddy-a chu a ngaihtuah loh tur a ngaihtuah nasa mah mah ani" tiin a bu nghat nghat reng a,




Chutah pindan atang chuan mi pakhat hi rawn chhuak in hlauthawng leh mangang zet hian inspector hnenah chuan "a pu, ramhuai khan a pi chu a ei zo vek. Ramhuai kha bangah alo kal a, ramhuai chuan a pi leh a pu chu ei a tum alawm" tiin a kut chu awmze nei fe hian a phar kak vak vak mai bawk a, inspector chuan chu pa thusawi chu uluk fe hian alo ngaithla a, Chuveleh thinrim avanga teu zet chung chuan doctor chuan "ngawi hmak rawh lalduhzual, engmah lo sawi ve suh" Alo ti vin thawt mai a,




inspector chuan thil hriat belh chak tak chung chuan "ngawi lawk ka pu, in nau hian ramhuai chet dan chu a hmu a ni ngei mai, tlangval han sawi zel teh, engtin zel nge ramhuai chu a awm?" A han ti a, chu pa duhzuala an tih chuan a lu chu a thing nar nar a, nin hmel zeta a awmhmun a han zuang deuh tar tar chung chuan "aih, aih, a pu ka sawi duh lo. A pi khan a hlau lutuk a, a hmu vek keimah kha min hrilh vek,




Chuveleh doctor fapa pa sek deuh khan thinrim hmel fe hian mi ang lo ruatdika chu rawn pan hnai in ruatdika banah chuan na zet hian a han hmer a, chumi pah chuan vin zet hian "ngawi hmak rawh. Engmah i hre lo, dawt dawt lo sawi ve suh, va muhil rawh. Room ah lut rawh, mai mai" a han ti tun tun a, inspector chuan doctor chu uluk zet hian "doctor, i nupui chu engtia boral nge anih?" A han ti a, doctor chuan nelawm loh fe hian "Freddy-a khan dawt a hrilh kual mai mai che anih kha, ka nupui hi lungphu thalo nei a ni a, kha thil a han hmuh khan a lungphu thalo chu a thih pui ta mai a ni.




"Tin kha thil kha engmah a nilo. Ramhuai lah a ni hek lo. Ui tang pakhat ve mai a ni. Kha damlo lianzuala thu min hrilh te kha ka ngai thutak duh lo a, finfiah ve reng reng turin min tur ngun si a, ka han finfiah sak ta a, ramhuai a tih chu ui mai mai a ni"




Inspector chuan "bawlhhlawh bawm a ran kawchhung i dah chu alo hai a, chu chu i nupui in alo hmu a, a hlauh em avang chuan lungphu tha lo in a thih phah ta i tihna em ni?" A lo ti vat a, doctor chuan inthiam loh hmel tak chung chuan "imm, inspector, ka nupui khan alo tawng fuh palh em a ni.




Zan lai a ni si a, lianzuala sawi dan chuan ramhuai chuan mihring kawchhung ei tur a zawn thin thu min hrilh a, chu chu ka awih loh chuan finfiah turin min ti a, kei chuan ran kawchhung chu bawlhhlawh bawmah chuan ka dah ta a, kha kha ka nupui khan alo tawng fuh ta a ni. zan lai thim thamah chuan thil hmuhsual a awl dawn em bawk a tin ni. Thisen leh ran kawchhung inpawlh sawp nuai chu mi pangngai tan pawh thil hmuh nuam tak zawng a ni hauh lovang le"




Chutah inspector chuan hriatthiam loh hmel tak chuan, "mahse doctor, mak ka tih deuh chu engvang a i damlo enkawl zinga pakhat lianzuala chunga thil thleng chu he lai daihah nang in ilo tawn ve ngawt nachhan tur lai a kha ka hrethiam lo a ni. Lianzuala thil tawn chu a tak ngei pawh lo ni se, he lai daihah nang in ilo tawn ve daih nachhan tur lai a kha ka hrethiam ta lo a ni"




Doctor chuan a lu chu han hiat nauh nauhin inspector chuan a dil chhut a tih hmel kher mai, nin hmel zet hian, "aa, kha zawng amah lianzuala min hrilh dan a ni a, ti tura min tih dan ang in ka ti a, mahse eng ramsa emaw ramhuai mah hmuh leh hriattur a awm lova chu zawng chu a ni mai e,




"mahse hei erawh thudik Chiang taka lang chu a ni, lianzuala hmuh sual leh rilru chian loh vang mai mai a ni tih chu keini pawh in kan han hre fiah ta a, ui tang pakhat vak rawlai mai mai niin eng thil rapthlak leh tihbaiawm vak mah a awm lem lo a ni e, Amaherawhchu lung lam tha lo nei ka nupui vanduaina ni nen alo innang fuh hlauh erawh ka tuar in a pawi ka ti takzet a ni"




Inspector chuan a lu chu han hiat nauh nauh in "i nupui hming chu min hrilh thei a ngem?" Doctor chuan "Lucy lianhmingi a ni e inspector" Alo ti thuai a. "Pi lucy-i chuan i thil lo hmuh fo thin, ti thlabar em em tu che leh rilru buai thaw thang a siam tu che ramsa chet dan tihbaiawm tak chu a han tawng ve ta a" inspector chuan a han ti leh hram a, chutah doctor chuan nin hmel fe hian "pu a, ka sawi tawh kha, kha thil kha eng mah a nilo, ui tang vak rawlai pakhat ve mai a ni e, ka damlo te zing a mi lianzuala thil tawn chanchin a ni a, ka han finfiah khan eng thil danglam tehchiam a ni lem lo tih ka hmuchhuak ta anih chu. Mahse ka nupui lungphu tha lo neiin a tuar phah erawh keimah ngei pawh hi ka inthiam thei lo a nih hi" a han ti leh a.




Inspector chuan "imm, i sawi chu a awm ang viau mai, mahse i doctor pui, i thianpa ngawih ngawih Freddy-a ngei pawhin he thil rapthlak tak mai hi a tawng ve tho asin. Nangmah ngei hian i thusawi a awih loh avang a atak ngei a han tawng ve chhin turin ruahmanna i siamsak a ni lawm ni. Tunah hian rilru buai leh mangang in a awm phah mek asin" A han ti chang ta fak mai a, doctor chu a thutna atang chuan tho hluai in lungawi lo fe hian "pu a, Freddy-a kha mi â tak a ni. He ramhuai pa hi a finfiah fo dawn chuan a nunna ngei pawh hian a tuar mai ang tih ka hlauh pui takzet ani" tiin a chal chu a dawm ta vawng vawng mai.




Chuveleh inspector chuan "doctor, thu dik tak min hrilh rawh, chuan i nupui thihdan diktak pawh kha ka hre duh a nia" a han ti leh a, inspector vek chuan "i nupui pi lucy-i phone number hi a biak tlang theih hauh loh mai a, a thih hnu khan tu kutah nge a awm? Engvang a biak tlang theih loh nge anih?" Doctor chu a han rum hak a, "pu a, he kan buaina ah hian inrawlh i tum dawn em ni? He thil thleng chanchin hi i hre duh tak tak ang a maw? I chungah ngei pawh hian a thleng ve ang tih hi ka hlauh pui khawp mai che" tiin doctor chuan a dam lo enkawl thin lianzuala chungchang chu a han hrilh ta malh malh a.




Lianzuala chu thingtlang lam mi niin kum 50 Vela upa a ni. Thlarau pakhat, mihring kawchhung ei thin in ti buai thinin zan tin mai hian an In bulah chu thlarau vakvai chu rawn kal in rapthlak tak leh tihbaiawm tak takin a rawn tibuai fo thin a, lianzuala chuan chu mitthi thlarau vakvai pa thil ngaihhlut em em mai chu kawlin tichuan thlarau chuan tum tam tak a hmuh lai ngeiah chuan rawn inlar in lianzuala chhia leh tha hriatna ngei pawh chu a buai chho tan ta a, a thil kawl chu laksak leh tumin a dil fo thin a ni awm e. Inspector chuan doctor thusawi lai chu lo pawt chat in,




"tichuan, lianzuala chuan nupui a nei em? Chuan a thil kawl sak thlarau vakvai meuhin a ngaihhlut em em mai chu eng thil chiah nge?" Alo ti khauh a, doctor chuan lianzuala'n nupui a neih loh thu chu a lo hrilh nghal thuai a, tin thlarau vakvai thil duh chu enge anih a hriat bik loh thu chu a hrilh bawk a. inspector chuan doctor thusawi chu a pawm hauh lo. "Nilove doctor, lianzuala hi nakinah ka la hmu leh dawn tho a, tunah Freddy-a hnenah treatment ala mek ani tih ka hria a, chuvang chuan dawt min hrilh chuan nangma tan leh midang tan hian a pawi thui zel ang tih a hlauhawm a ni" a han ti a,




Chutah doctor pawh chuan zuai zet a hnuai lam bih ngat chung chuan "imm, nupui chu a nei ngei mai, mahse a thi tawh a ni" A han ti a, Chuveleh inspector chu bu nghat in "imm, ka rindan chiah a ni" A han ti a, Chuveleh inspector bawk chuan "pu a, i thusawi tur chu ka hre vek tawh. Freddya'n engkim min hrilh vek tawh. I damlo te zing a mi lianzuala thil tawn chu i awih sak lova, rilru buai ang ah i ngai a, Tichuan a ni lungawi lo chuan ramhuai chu finfiah Turin a ti ta che a, Tichuan nang chuan ran kaw chhung chu ramhuai koh Nan Chuan tawktarh ah i hmang ta a, chu chu i nupui chuan alo hmuh chu ani ngei ang,




"mahse Freddya hnenah ramhuai rapthlak tak I hmuh thin thu I hrilh leh a, a tihbuai fo thin thu che i hrilh a, Freddya chuan alo awihsak lo che a, Tichuan nang chuan ramhuai koh Nan lu ruh ro chu Freddya i kawl tir ta a, Freddya pawh chuan ramhuai pa chetna chu a tawng veleh ta ani.




"Mahse Freddya chuan luruh ro chu a paih bo a, ramhuai pawh chu a reh zui ve mai a, chung thawnthu phuahchawp tak mai chu a nihna diktak min hrilh rawh. Ngaihthah mai mai chi a nilo tih ka hria, a chhan chu thil awihawm loh tak anihna phenah hian thil pawimawh tak a awm ani. Lianzuala nupui a thi a, i nupui pi Lucyi a thi bawk a, Freddya hian tu tak chan ve leh ang maw? Tin, lianzuala leh nangmah ngei pawh hi taksa leh rilru lamah nasa tak a harsatna tawk in ni tih a hriat a, in nunphung in hlauh a, ramhuai pa avang a buaina in tawh thin thu chu in buaina bul ni ah in sawi a, i nupui, lianzuala nupui an thih dan leh an thihna ah hian thuruk a awm ani.




"Thil nihna diktak hi sawi tha mai rawh. Tin, Freddya hnenah ramhuai pa chu tharum nen a bei let hauh lo turin I hrilh thin bawk. Kha kha enge a chhan? Luruh ro leh ramhuai in enge in zawmna a neih? Tin, Freddya hi ka thian a ni a, doctor meuh in ni a, a thil tawn chanchin min hrilh kha a phuahchawp thil anih ka ring thei lo ani. Ramhuai tak Tak erawh a ni kher a ngem ka hre lo. Freddya hian nupui ala nei lova mahse nang leh lianzuala te ang bawk a tu emaw a hmangaih a chan hun hi alo thleng ve dawn tlat a hriatna ka nei tlat ani.




Doctor chuan "aw, i sawi dik chiah" Inspector vek chuan "awle doctor, tichuan tun hnuah chu thlarau vakvai chuan a rawn tibuai chhunzawm tawh lo che tihna em ni? "Aw inspector, kei ni tak hi chu tihbuai kan ni tawh lo a ni. Mahse inspector thudik ka hrilh thei tlat lo che ani. A pawi ka ti lutuk.




doctor hmelah chuan thinrimna a hmuh tel theih a. Chutah inspector chuan "imm. Mahse he thil hi a nihna diktak ka chhui chhuak ngei ang" tiin doctor chu a tinsan ta a, chumi rual chuan tukverh atang hian rilru lama harsatna nei duhzuala khan inspector chu rawn hui in "a pu, ramhuai pa chu a thinrim a nia aw, a eng phet phet thei. A nalh lutuk, a mawi lutuk, mahse a pu ta a ni tawh. Ramhuai pa pawh a pu ta ani tawh" tiin a rawn hui lauh lauh reng a, chumi rual chiah chuan thinrim avanga te ri that ri a hre zui bawk a. Doctor chuan duhzuala chu a vin that that reng a.




Freddy-a chuan uluk fe hian a ngaihtuahna chu a han kawm malh malh a, chutah a hmel a hriatthiam mai theih loh tur inthiam lohna lo langchhuak chung chuan "imm ruata, tunah chuan engkim i hriat a hun ta, ka lo tibuai kher kher che a a pawi ka ti takzet a ni.




"Doctor hriatpuia nen hian hei hi kan ruahmanna vek anih hi. Hei hi ngun deuhin ngaithla rawh. Tumkhat thingtlang a kan zin thawveng chu mi pakhat nen hian kan intawng hlawl mai a, a ni chuan building hlui tawh tak pakhat a rangkachak thuhruk anih chungchang min hrilh a, chu chu keini lam in kan ngaihven nghal vat a, chu thil chu a tak ngei hi alo ni a, tichuan building chhungah chuan rangkachak chu phum alo ni a, kan haichhuak ta tihna anih chu, tichuan kan hawn a, a tihral dan tur kan dap vel mek a ni.




"Mahse, kan rin loh tak maiin chu thil, rangkachak chungchang min hrilh hretu khan a hlawkna hmuh a rawn inbeisei ve ta tlat mai a, chu chu lianzuala hi a ni. Mahse keini lam chuan lianzuala hriat lohah chuan tihral dan kan dap ta a ni. Mahse lianzuala hian hlawkna lam ringawt chu alo buaipui ve ta si a, tichuan lem te a rawn chang chho ta a ni. A lem chan na zawng zawng chu i hriat tak ang khan ramsa tihbaiawm tak ang te, ramhuai che rang tak ang te, khang zawng zawng kha lianzuala lemchanna vek an ni. Amah ber chu tunah Kan hrechhuak tawh a, naktip hian ka hnenah keimah titi pui turin a lokal dawn a, chutah chuan inremna ka lo neihpui dawn a ni. Thudik ka hrilh loh che avangin min hrethiam ang che. Tin kan thuruk hi khawngaihin min zep pui hram hram dawn nia aw"




Thawm chu a reh vang vang mai. Inspector chuan a thianpa thusawi chu awih har a ti rilru kher mai, tun a taka thu a han kuai danglam leh ta mai chu hriatthiam har a ti viau mai a, tin chutia thu a han kawih danglam lai vel a Freddy-a hmel inthlak danglam dan leh inthiam lohna lo langchhuak alo hmuh te chuan inspector ngaihtuahna chu a chawk buai ru viau mai, he pa a thian tha emaw a tih, doctor Freddy-a ngei pawh hi a thusawi rin ngam harsa a ti tawh takzet.




Chutah inspector chuan "imm, a tha vek e, a tirah thawnthu danglam tak min hrilhin phurna min pe hmasa te te a, a hnu ah in ruahmanna mai mai anih thu min hrilh leh lawi si a, tul lovah hun ka khawral thlawn mai mai a ni" Tiin lungawi lo tih hriat tak chuan inspector chuan Freddy-a chu a chhuahsan ta hnak hnak a.