PSYCHIC Volume II_Chapter-4 Last

Hnuchhuina lampang chi ho
April Hmar Liverpool
Posts: 45
Joined: January 14th, 2024, 5:03 pm

PSYCHIC Volume II_Chapter-4 Last

Unread post by April Hmar Liverpool » February 11th, 2024, 4:24 pm

PSYCHIC_Volume-2

Ziaktu, Laltanpuia


Chapter _4 last


Inspector remruata chuan rinpuia hnenah chuan "rina, he pa lianzuala hi chu a hmawr bawk nan kan hmang ang. Tunah chuan kan doctor thian dun te pahnih thil zep ruk leh doctor hriatpuia tualthahna chungchang hi ka bawhzui dawn ani" Tiin a thutna atang chuan a thochhuak nghal vut a, chumi pah chuan Freddy-a chu a call nghal a.




"Freddy, kan inthian thatna chu dah tha ila, tun tum zet zawng he thil thleng atthlak tak avang a kan tih tur te tifel turin i hnen ka rawn pan dawn a, ni e nizan hmasa lamah ramhuai pa chuan a rawn ti buai leh che pawh chu lo ni fahmiang, kha zawng lemchanna ngai bawk a ni e. Ka rawn thleng tep e min lo ngaichang ang che" tiin phone chu a dah nghal a.




Freddy-a chuan tape recorded a amah leh lianzuala inbiakna zawng zawng chu Chiang angreng taka a han ngaihthlak zawh tak kelh ah chuan hrilhhai leh lungawi lo tih hriat tak hian, "ruata, he ti khawp hian kei hi min lo chhui ru tih rin ngaihna reng ka hre lo asin" a han ti a, remruata chuan "imm, ka sawi lawk vek kha, kan in thian thatna chu dah tha in thudik tak nen tun tum na na na chu i han in kawm teh ang doctor" tiin Freddy-a chu a en ran mai a.




Remruata bawk chuan, "imm, hetiang taka ka enthlak zuina chhan che hi i hre chak ngei ang chu tiraw?" A han ti a, Freddy-a pawh chuan "imm hre chak tehreng mai" a lo ti ve bawk a.




Inspector remruata chuan Freddy-a chu en vang vang in "Freddy, kha thu, ramhuai ang mai a thil tihbaiawm tak in a tihbuai hmasak ber tum che a i thu min hrilh lai khan nangmah ah hian zep ruk engmah ka la hmu lo, i thil hmuh leh hriat te chu i hmuh sual a ni emaw a nilo emaw thuhran nise, i thil tawn ang ang chu engmah dawt tel miah lovin min hrilh a ni.




"Mahse, ni hnih dawn chu kan inbe hauh lova, mahse khami hnu kan inbiak leh hmasak ber tum khan nang chuan i thusawi duhdan atang leh ka laka i rilru puthmang atangin ka lakah zep ruk duh i nei tan ani tih ka hrethiam ta ani. Chu thil chu doctor hriatpuia chungchang a ni tih doctor hriatpuia chungchang i sawi dan atangin ka man thiam bawk. A hma kha chuan doctor hriatpuia chungchang ah engmah zep i nei lova, i thil hriat ang ang min hrilh a ni.




"Mahse khami ni atang khan doctor hriatpuia thuruk chu zep pui loh theih loh thil a ni chek a nga, chu thuruk doctor hriatpuia i zep pui tak tlat chu doctor nupui pi lucy-i tualthihna chungchang hi ani ta ani" Freddy-a chu a meng zau kawk kawk mai. Mak ti fahran hian inspector thusawi chu a melh vawng vawng thei hial a.




Inspector vek chuan "ni e, doctor hriatpuia chungchang min hrilh hmasak ber tum khan a nupui in a boral san thu i sawi tel anih kha, kha thu i sawi lai khan kei chuan pi lucy-i thihna chuan thil pawimawh tak a pawchhuak ngei a rinna ka nei nghal a, a chhan chu ka nau te zinga mi rinpuia'n pitar pakhat in a thil tawn rapthlak tak mai a hrilh thu ka hnena min hrilh chhawn leh tak vang a ni. Tin, chu pitar chu kan doctor hriatpuia nupui hman ni lawk a boral ta pi lucy-i ngei chu alo ni lehzel si a, tin thil thleng rapthlak leh mak tak phen a thihna lo inzep tel ve chuan ka ngaihtuahna a lak pen loh theih loh vang ani pakhat bawk awm e.




"Tichuan le, ka laka zep ruk nei ni awm taka i awm tak tlat ah chuan ramhuai pa chungchang chu hriat tum in doctor hriatpuia ngei chu ka va hmu ta a, mahse hriatpuia khan nang meuh pawh in a thakhur zawih zawih khawp a ilo Mangan pui ramhuai pa chungchang chu hmuh sual leh hriatsual thil anih thu leh khaw lai ui tang vak raw lai mai mai anih thu min lo hrilh ta then si a, Chutah kei chuan nang meuhin hriatpuia chungchang i zep ruk pui tur awm ang chu ka han chhuidawn ta a, a tir a ka rilru kuai peng tu pitar thihna chu a ni ta a ni,




"a nupui chungchang ka han zawh khan a nupui chu rilru leh taksa lam hrisel lo mi niin a sawi a, a thil hmuh leh hriat te pawh chu khaw lai ui tang pakhat chetna angah a puh ta zel si a, nang in a ramhuai pa chungchang min hrilh dan chu doctor hriatpuia tan erawh hmuh sual leh hriatsual thu hla mai an ni tihna a nih tak ber chu. Tin, ka thu hriat te nangma hnen atang a hre chhawng leh ang a ka insawi khan doctor hriatpuia kha a lungawi lovin i sawi loh turah i ka i an tam thu te sawiin a lungawi viau lo tih a lang reng a,




"nang chu a haw tak zet che a ni tih ka hria, a nupui chungchang ka hnen a nang in min hrilh thu te ka han hrilh khan a thin a ur takzet a, kei chuan a nupui pi lucy-i chu eng tin emaw tak a chesual emaw thah emaw anih kha ka ring ru tlat ani. Lungphu chawl a thi anih kha ka ring ve thei lo. Mahse chu erawh ka ringsual ang tih erawh ka hlau viau tho.




"Ka chhuidawn zel danah, lianzuala ang chauh a doctor hriatpuia a awm ve tak dan atang te, doctor hriatpuia ang chauh a nangpawh i awm ve mek dan te, ka han ngaihruat khan hri in Kai chhawn thil ni a ngaihtheih deuh ani. Tichuan in awm dan a in an zel danah lianzuala in tih ngei pawh chuan a nupui chu a chan tawh ngeiin ka ring ta a, a chhan chu amah ang a doctor hriatpuia a awm ve tak khan doctor khan a nupui kha a chan a, chu chu lianzuala hri niin a lang, lianzualan a nupui a chan dan ang chiah chuan doctor hriatpuia pawh khan a nupui a chan ve tihna anih chu.




"mahse doctor hriatpuia khan lianzuala'n nupui a neih loh thu kha min hrilh hmasak dan a ni tlat, chuvang chuan doctor hriatpuia khan a nupui lucy-i thihna chungchang nen a inkungkaih thil kha sawi zui vak a duh lo tawp tih a hriat a, zep ruk engemaw a awm vang a ni.




"Tichuan le, kei ngei pawh chuan thutlukna Chiang tak ka la hmuh mai bik loh avang chuan nangmah bawk chu ka bengkhawn lo thei lo che a, mahse nang chuan thu i kuai danglam zel anih kha, thlarau tihbaiawm leh ramhuai chanchin atangin rangkachak chungchang ah thu i her danglam ta daih a, kei ngei pawh ka lungawi lo viau anih kha.




"Mahse kei hi chuan ka buaipui laklawh tawh hi chu ka pamtul mai mai thei tawh tlat thin lo. I hnen a in entir tura ka hming ka ziah lai atang khan ka ruahmanna chu tan a ni daih tawh a ni. Nang chu i thusawi a dik reng em tih fiah ka duh vang anih kha, khami tum khan lianzuala nen a in inbiakna thu hla ka hriat duh avangin he tape recorder hi room chhungah khan ka kam ru ta a ni.




"Ka rin ang ngeiin nang leh lianzuala inbiakna thu hla chu rangkachak chungchang a ni hauh lo reng a, kan ngaihthlak tak ang khan lianzuala buaina hlir mai leh amah avang a doctor hriatpuia meuh pawh in a nupui laka a tum lawk reng ni hauh lova pawi a khawih tak mai thu te, chu thil chuan doctor hriatpuia nun zawng zawng chu a tihchhiat tak vek thu te leh a clinic pawh a khar tak hial thu te chu in titi a ni ta tlat mai. Doctor hriatpuia chuan a nupui a that e' ti a thusawi nei chiah lo mah ula, doctor hriatpuia chuan a nupui laka a pawi khawih chu engdang nge ni leh tawh chuang ang?




"A nupui chu a tum loh deuhin a that a, chumi thu chu nang in ilo hriat ve takah chuan ka lakah ngei pawh thu dik sawi tha duh lovin doctor hriatpuia ngei pawh chu hnaih lo turin min duh lehling hial ta ve ang chu tiraw?" Freddy-a chu alo bu nghat nghat a, inspector thusawi lai chu ngaihnawm ti zet hian alo ngaithla ngun kher mai.




Chutah inspector vek chuan "tichuan he thil, ramhuai tihbaiawm tak chungchang pawh hi a nihna diktak chu hei hi ani. Lianzuala ramhuai in a tihbuai dan ang chuan doctor hriatpuia chungah a thleng ve leh ta a, chutah nang ngei pawh in i han tawng veleh a ni a, a hmasa in doctor hriatpuia khan lianzuala chunga thil thleng kha a awih sak lo phawt a, Chutah nang pawhin doctor hriatpuia chunga thil thleng pawh chu i awih sak lo ve leh phawt mai, a awih sak lo tu apiang te chu tih thaih an ni ta zel tihna anih chu, chumi awmzia chu doctor hriatpuia chung a thil thleng kha thu tak hla tak a i lak sak duh loh avang khan doctor khan khati khan ramhuai ang in lem a rawn chang ta ani.




"Khatih lai khan nang chuan hriatpuia thuruk, a nupui a thah thu kha ila hre hauh lo. A natna leh a harsatna te chu nang in ilo chaw tak khuk pui lutuk a, a nupui a thah chungchang kha i hrechhuak mai ang tih kha a hlauthawng ani.




"Tichuan hriatpuia khan lianzuala ramhuai hmuh thin chungchang hmang chuan dawt a hrilh ta che a, a nupui thihna chungchang a thudik hriatchhuah anih mai loh nan a rilru la peng tur thil Kha a ngai ani. Tichuan ruhro te chu a pe che a, dawi lam leh puithuna chungchang te a hrilh che a, ramhuai in a tihbuai nasat thin Zia te chu a sawi a i awih lem lo a, a tak ngei a finfiah tura ruhro a phuahchawp sak hnu ah che khan amah ngei chuan lem a rawn chang chhunzawm ta ani. Kha thil rapthlak, ramhuai tihbaiawm tak i tukverh a lo uai thla kha doctor hriatpuia ngei hi a ni. Chu chu thudik a ni tih i hre tawh tiraw?"




Freddy-a chuan alu chu lo bu nghat in "a dik e" alo ti a, Chutah inspector chuan "imm, chu thil chu ka rindan mai a ni. Mahse keimah ngeiin chu ramhuaipa ang a chet lak chu mihring pangngai tan thil theih a ni reng em tih ka fiah duh ta a ni, zan hmasa a ramhuai i hnena lo inlar leh i tawn kha keimah ka nih kha" Freddy-a chu a phu zawk thei hial mai. A lung chu a awi fahran lo tih a hriat theih a, Chutah inspector vek chuan "ni e, khami zan khan ka ngaihtuahna ka hmang nasa kher asin, khati taka chet ka lak theih nan khan.




"Tichuan le, ka rinhlelhna ti kim tur in nang chuan hriatpuia te pafa bawk an nih chu i han ring leh ta a, a hmasa a ramhuai pa ni a ilo hriat kha hriatpuia te chetna vek a ni tih i hriat tawh avangin, tichuan ka naute zinga mi joela chuan in atanga i chhuak ta chu a zui ru nghal vat che a, doctor hriatpuia te in kawt a in thusawi zawng zawng, thinrim taka chet la tawh lo tur leh uang tawh lo tura i hrilh na te kha alo hre pha vek a ni. Kei chu min rawn hrilh nghal thuai a ni. Tichuan le, engvanga doctor chuan a nupui chu that mai nge anih? Engvanga nang a pawh chuan zep pui ta mai nge maw i nih chiah ni, tin lianzuala intih hi tu chiah nge anih reng reng ni tih hi ka hriat a ngai ta a ni. Doctor hriatpuia ka ngei atang a hriat ka duh ani.




Freddy-a chu a ngawi reng a, Chutah inspector chu muangchang a han en in zuai zet hian, "ka thian duhtak ruata, heng zawng zawng, thil awmzia leh nihna diktak i hriatchhuah danah hian i thawkrimin ka fak ngawt mai che. Ni e, hriatpuia khan mangang leh thlabar reng reng in ka hnenah khan thawm rapthlak tak leh ramsa ang mai a tihbaiawm tak in a tihbuai thin thu hi min hrilh thin a, kei khan ka awih ngailo a, a damlo enkawl zinga mi lianzuala ang chauh a nih tawh thu te min hrilh thin a, a hnu a min hrilh leh danah khatia a thil tawn duhawm lo tak mai ka awih sak duh loh avanga a lungawi lo leh thinrim chuan ramhuai pa chungchang te chu min hrilh ta thin a,




"chu ramhuai pa chuan mi hring kawchhung leh thin a ei thin thu min hrilh lai te chuan ka awih sak ngai lem lo. Chutah ka hnenah chuan min tihthaih a min tih thlabar dan tur chu a ngaihtuah ta a, a thil siamchawp te chu min pe in 'hei hi kawl la ka tawn ang chu a tak ngei in i tawng ve mai ang' tiin a phuahchawp dan ang chuan min hrilh a, kei khan rilru pe lo zet in a tihdan ang chuan a thil min pek chu ka la ta a ni.




"Ni e, khami zan khan an pafa chu ka chen na in ah an lokal a, hriatpuia te pafa chu in chungah lawn in hrui hmangin bangah khan an rawn uai thla a, thawm tihbaiawm thei tur ber chu rawn chhuahin ka mutna tukverh zawn chu lo thleng thla in kei in ka lo hmuh chiah khan theih tawp a rang leh chak chuan in chung zawl ah chuan a inban kai chho leh tihna anih chu.




"tichuan kei kha ka hrilhhai mangang leh hlau thlabar a ka awm avang Khan anmahni ka han hmuh hma hauhin an lo inthiar fihlim hman daih tawh tihna anih chu. Ramhuai emaw ka tih kha an ni pafa inthurual lek an lo ni a, Tichuan a ni chuan biak pawh a duh tawh ngailo a, ngaiven a duh lo a, ngaihsak hrim hrim kha a duh tawh lo bur mai ani. Mahse a hnuah min rawn bia a, an chet dan zawng zawng te chu i laka zep nei tan ni a min ngaih tum khan min hrilh leh vek a ni. Tin a thuruk ti mai ila, a nun ram pawt chhia a rilru natna leh a chhungril a hreawmna tuhsak a a clinic pawh enkawl chhunzawm thei lova a khar tak chung chung nachhan diktak chu min hrilh ta a ni.




"A nupui chu a tum reng vang ni hauh lovin a that a ni tih min hrilh ta mai a, kei chuan ka hrethiam lovin ka hrilh a ti hai takzet. Chu thu chu ka thawk tawp ni thleng a zep pui tlat turin thu min tiam tir ta nghe nghe a, chumi vang chu a ni i lakah pawh ka inlak hran a thudik pawh ka hrilh that duh tak loh che ni. He thil thleng chungchang ah hrim hrim hian buai zui kan duh tawh lo ve ve a, thil thleng tawh chu theihnghilh a zep tlat chu kan tum ta bur mai a ni. Mahse nang khan thil awmzia i ngaihven reng mai si a, kan talbuai ta anih hi" Tiin Freddy-a chu a indâwm kun hnap reng a.




Inspector chuan Freddy-a thusawi chu ngun tak leh uluk tak hian alo ngaithla dauh dauh reng a, Chutah inspector chuan a hriatthiam loh te chu han zawt leh in, "mahse Freddy, engvanga doctor hriatpuia chuan a nupui chu that nge anih ang? A tihpalh pawh chu lo nise, engtia thleng nge ni ta ang? Tin, a fapa pawh chuan a pa thil tihsual chu a hriat pui ve tho tihna nge a hriat pui lem lo?




Chuveleh Freddy-a chuan "chu zawng engmah ka ngaihven zui tawh lo hrim hrim. Enge a chhan leh vang? A tobul diktak chu kei chuan ka hriatthiam phak bak a ni ta ve ang, a nupui a thah thu leh ka in a ramhuai ang mai a chet la tu te chu anmahni ngei an nih thu a hnua min hrilh leh bak engmah thil dang Chiang a hriat ka nei ve tawh lo, tin ka in a ramhuai ang a chet an lak nachhan pawh i hre tawh e" alo ti thung a.




Freddy-a vek chuan "amah hriatpuia ber chu a pawimawh ta anih tak ber chu, thudik tak a tobul diktak chu amah ngeiin a sawi loh chuan kei zawng hnuchhui lam ti mi ka ni ve silo, ka hrethiam ve ta hauh lo mai" a han ti chhunzawm leh a.




Inspector chuan, "lianzuala kha ka hrechiang duh ani, Lianzuala leh ka nau te inbiakna record sa thlap ka nei a, ka han chinglet leh a nga, chumi a zirin hma ka la leh ang. Doctor hriatpuia erawh a thil tihsual lian tak avang a rilru natna leh tawngkhawngna nasa tak ata lo zalen phawt mai se, chumi hnu chuan a chung thu chu kan la ngaihtuah leh dawn nia" tiin inspector remruata chuan Freddy-a chu a tinsan ta a.




Rinpuia chuan dawhkana file han theh thlak pah chuan "sir, hei aw" a han ti a, inspector chuan file chu a han en a.




rinpuia chuan hriatthiam loh hmel tak chung chuan "sir, pi lucy-i khan kha thil, ka hnena min hrilh, a thil tawn rapthlak tak mai kha a pasal sawi ang in a thil hmuh sual leh hriatsual mai mai lo niin a rilru leh ngaihtuahna, a taksa lam bawrhsawm na avang pawh chu lo ni tehreng se, engvanga nunna chan ta mai nge anih ang? Khami lai, thil rapthlak a hmuh lai vel kha a pasal in lianzuala thil hrilh dan ang a thil a enchhin lai tihna a ni mai a, chumi hnu chuan a nupui chu doctor chuan a that tihna a ni ta a, chulai vel inlum leh dan vel tak a chu hriatchian ka chak takzet a ni, engvang nge ni ang? Pi Lucyi thih chhan lai tak a kha" A han ti a.




Inspector chuan a file en mek chu dah in "ngawi teh rinpui, i thusawi chu kei ngei pawh in a ka ngaihtuahna ka hman nasat na lai tak a ni reng a ni. Doctor hriatpuia ber lah chuan a nupui a thah chungchang hi hriatchhuah a hlauh em vang a ni chek a nga, keini police lam pawh tharum nen lam a min rikrap rum rum mai pawh duh hmel a pu roh si a, keini lah in thil awmzia Chiang takin kan hre si a, joela te han ko phawt mai teh tunah rih chuan, lianzuala thu an zawhfiahna tape recorded chu han ngaithla ve phawt mai ila, lianzuala atanga he anchhia hi lo intan chu a ni chiah reng em tih lai a chu han hreching phawt mai ila thu a funkim deuh zawk mahna, pi lucy-i thihna hi lianzuala atanga intan alo nih vaih chuan lianzuala ngei hi kan bitum tur a ni ang"




"Mahse sir, he pa lianzuala an tih hi rilru buai leh thluak lam fellohna nei mai a ni si a, thu zawhfiah tlak pawh a ni meuh a nge maw?" Inspector chu a ingngaihtuah uluk kher mai. Chutah rinpuia chu han en vang vang in, "Doctor hriatpuia berin engmah min hrilh tha duh der silo a, keimah ni ngei hian a nupui a thah dan leh a thah chhan, a tum lawk reng a ni em? a tihpalh liau liau pawh chu a ni thei bawk. Lianzuala'n ramhuai thil chu finfiah tura a hrilh avanga doctor in ramhuai thil chu finfiah a tumna lam a a nupui chu tihpalh thil thu a that ta pawh alo ni thei a, vanduaina leh aikaih thil emaw, puithuna nen a inzawm in a hrinchhuah thil a ni thei bawk.




"Chu thil, lianzuala ngaihtuahna leh rilru buai thil sawi chu a tak ngei a puithuna leh thlarau nen a inkungkaihna nei thil alo ni anih ngat chuan chu thil, doctor in a han buaipui ve tak chiahah khan anchhia leh vanduaina chu a tawngbaw ve ta tihna pawh a nih ber dawn chu. Lianzuala ber lah chu biak tlak anih siloh chuan han tih vak ngaihna a vang viau dawn niin a lang a,




"tin vanduaina tawk ve ta doctor ber pawh chu a hriatna la fim tho mahse, a nupui a thah avang a inchhirna leh inthiamlohna a khat in depression nasa tak nen a hun a hmang mek chu a ni si a, engmah a sawi tha duh ta lo tihna a ni ber awm a, chuvang chuan kawng dang hi a vang viau dawn ni a a lan chuan keimah ngei hian ka finfiah ve leh mai pawh a tul dawn niin a lang. He thil hi ramhuai leh thlarau vakvai nena inzawm thil alo ni tak tak anih chuan lianzuala atang ngeia a finfiah dan tur diktak ka hmuh a ka tih ve mai a tul dawn niin a lang a ni"




"Lianzuala chu a nupui in a boral San tawh a, doctor hriatpuia a ni ve leh a, Freddya erawh a him tawh turah ngai ila, tin, lianzualan doctor hriatpuia a thusawi a awih sak loh avangin ramhuai chu finfiah Turin a ti a, doctor hriatpuia chuan lianzuala tih dan ang chiah in Freddya chu a thusawi a awih theih nan ramhuai finfiah Turin a ti a, Tichuan ramhuai ang chuan lem a chang zui bawk a"




"Ngawi lawk sir, chuti anih chuan lianzuala hian a thusawi te a awih sak theih nan ramhuai ang in doctor hriatpuia lakah hian lem alo chang hmasa tawh tihna a ni mai lo maw? Chutiang a ramhuai ang a lem a va channa lamah chuan doctor hriatpuia chuan misual emaw lo tiin a nupui zawk a ti na palh ta tihna ani thei mai a ngem? Rinpuia chuan alo ti a.




Inspector chuan "imm, chuti anih a hnu, keimah ngei hian ka finfiah dawn ani" a han ti a.

Rinpuia pawh chuan a pu ruahmanna chu tha tih pui lo viau mahse a tih tawh chu ti tlur mai mi inspector remruata chu dan pangngai thovin a dang leh thei dawn Chuang lo tih a hria a, lungawi taka a pu ruahmanna chu an bawhzui mai a tul dawn ni chuan a lang.




inspector remruata chuan Freddy-a hnenah chuan lianzuala'n a hnen a treatment a rawn lak leh hun tur zawt in Freddy-a pawh chuan alo hrilh ve mai a. Chutah inspector pawh chuan a ruahmanna ang taka chet la tur chuan a inpeih thawkhat ta viau chuan a inhria, a hmawr an bawkna a hnai tih chu a nau te hnenah pawh chuan han hrilh ve in a chanchin chu lo ngaichang ve deuh tur chuan a han hrilh bawk a.




Inspector remruata chuan doctor hriatpuia te chenna in lam chu a pan mek zel a, chutih pah chuan doctor hriatpuia te thenawm hnai vai a cheng te chu doctor nupui pi lucy-i chungchang a thu zawhfiahna a nei pah zel bawk a. Inspector chuan pi lucy-i hrechiang tur deuh a ngaih an thenawm te hnenah chuan pi lucy-i chu rilru leh taksa lama hrisel lohna nei a ni chiah em tih te, pi lucy-i an hmuh dan leh eng ang mize nei nge ni a an hriat tih te chu a zawt hlawm a. Tin, pi Lucyi chu engtia thi nge tih te chu a zawt hlawm a, thenawm te pawh chuan doctor hriatpuia sawi ang thovin pi Lucyi chu lungphu chawl a boral anih thu chu an lo hrilh ve bawk a, Chumi pah chuan doctor hriatpuia te chenna in kiangah chuan uluk leh ngun fe hian doctor hriatpuia te chenna in chu a thlaithlai pah dauh dauh reng bawk a. Doctor hriatpuia te nupa awmna room chu a bik taka a thlithlai a ni.




Ni thum dang a liam leh a, Freddy-a pawh chu nunphung pangngai nen hun a chhiar liam ve mek bawk. Doctor hriatpuia pawh chuti bawk, a hna pangngai ah let leh tawhin a rilru leh taksa lam hriselna pawh a pangngai chho leh viau tawh a, a nitin hna ah chuan a rilru zawng zawng pe in a hun pum chu doctor a nihna ang tak chuan a hmang chho ve leh mek tawh a ni.




Pathianni zan zan lai a ni a, doctor hriatpuia mutui lai chu thawm ri rak chuan ti harh in a mutna atang chuan a intung tho nghal thuai a, Chutah thawm lo chhuahna lam ah chuan a beng chu han chhi in thawm lo chhuahna chu a hma zawn mai a a tukverh awmna lai chu a ni tih a hrethiam nghal a, hlauthawng fe chung chuan a mutna atang chuan a thochhuak nghal thuai a, Chutah thawm dim tak chung chuan a mobile phone chu a chuh nghal vat a.




Tukverh chu a rawn ri leh that that thin a, chuveleh doctor chuan tukverh lam chu pan in tukverh parda chu a han keu dek dek a engmah a hmu lo, chuveleh thaw huai chung chuan parda chu a han hawng zau ta a, tukverh te chu hawngin pawn lam boruak chu a han hip vang vang a, chumi rual chiah chuan in hnuai lam a thawm ring zet chuan doctor chu a ti phu Chiang kher mai. hmanhmawh fe hian in hnuai lam chu a pan nghal thuai a, inhnuai luhka chu a inkalh tlat avangin a bul a tukverh pahnih chu alo inhawng huau a ni tih a hmuh chuan a ngaih chu a tha chiah lo hle, Chuveleh a mobile phone bawk chu han lek kang in a a fapa chu a han call a.




Doctor chuan thawm dim tak chung chuan tukverh in hawng lam chu a veh phei dan dan a, light chu a on loh avang chuan a thim angreng phian mai bawk. Chutah tukverh ah chuan dak chhuak in hnuai lam chu a han thlek dauh dauh a engmah a hmu lo, Chutah le, a lu chung zawn atang a vaivut nawi lo tla seng seng chuan a lu chu a rawn tlak a, chuveleh rang zet hian chung lam chu a han thlek nghal vat a, chuta a thil han hmuh avang chuan doctor chu a meng zau kawk kawk a, hlauthawng leh mangang fe hian chu pa bang hrul a lo inban kai chho zai zai lai chu en chung chuan "misual! misual!" a han ti a, chuveleh chu pa, bang a lo inban kai mek pa chuan pindan chung zawk a ventilation chu nam hawng in in chhung lamah chuan a lut ta daih mai a.




Chumi rual chiah chuan in chung lam atang chuan mipa te that ri hi a hre zui nghal bawk a, Chuveleh hmanhmawh fe hian in chunglam chu pan leh nghal in thaw hlawi hlawi khawp chuan in chung lam room kawngkhar chu a nam hawng nghal rawk a, Chuveleh room chhung a a thil hmuh avang chuan mak ti leh hlauthawng zet hian a te nghal chul mai, chhuat laiah chuan a fapa chuan misual chu a nghawng a kuah chung leh bawhbeh ngei tum hian misual nen chuan an lo inchai tiah tiah mai a, Chuveleh doctor chuan a hmanraw hmuh ang ang chu chuh nghal in a fapa chu alo tanpui ve nghal vat bawk a.




Mahse chutia misual, an pafa a an han chai tak thial thial maiah chuan misual chuan teu zet hian "duhtawk rawh u doctor, misual ka ni reng reng lo. Keimah, keimah inspector remruata" Chuveleh doctor in chu pa hmel a han hmuh chian nak chuan hrilhhai fe hian a te that a, a tawlh hnung nghal darh mai. A fapa muanpuia pawh chu hah avang a thaw hlai hlai chung chuan a inthiarfihlim ve ta thuai a.




Inspector remruata chuan a nghawng a muanpuia rehna chu han dawm vang vang in "nang, nang ni pafa hian i nupui lucy-i in thah dan chu tun a mi ang deuh khan a ni" tiin a han khuh zui bawrh bawrh a, Chutah inspector vek chuan hlauthawng leh mangang taka a mah en vawng vawng tute chu rum zet a han en chung chuan "doctor hriatpui, pi lucy-i kha misual emaw ramhuai vakvai emaw tiin thim thamah nangmah nilo i fapa zawk hian a lu ah a khawng thlu ta mai a ni. Chu chu thudik a ni tiraw?"




Thawm chu a reh tlawk tlawk a, chutah inspector vek chuan "imm, ka han sawifiah a nge, khatih lai lianzuala'n thlarau tihbaiawm tak chu finfiah tur a a tih lai che khan i nupui khan thawm engemaw alo hria pawh a ni maithei, lianzuala khan a thusawi te i awih sak theih nan ramhuai lem rawn chan a tum ani tiraw? Tichuan i nupui chuan ramhuai lem rawn chang lianzuala thawm rawn chhuahna lam chu pan in chet a la ta a, tin i fapa pawh hian thawm chu hria in chet ala ve mek bawk. Chumi lai chuan nang chu tui ti takin i muhil a ni ngei ang. Chutah i fapa chuan thim tham a i nupui lucy-i misual emaw ti a a han hmuh tak thutah chuan a hmawlh ken hmang chuan a khawng tlu ta mai a ni.




"Kei ngei pawh kha tlem a tlem ah min khawng tlu hman thelh a ni. I fapa hi a bengvar in a harhvang hle ani. Mahse a khawn thluk tak kha ama nu ngei a ni tih a han hriat tak meuh ah chuan a tlai zo tawh si. Zawnga tuar ai chu ngauin a tuar ta zawk a ni"




Doctor hriatpuia chu a thingthi hnawk a, mittui tla zawih zawih chung chuan a tap nghal zaih zaih mai. Pawi ti tak chung chuan "inspector, nangmah ngei hian ka fapa pawikhawihna runthlak tak mai leh ka nupui vanduai leh khawngaihthlak tak mai thihdan diktak chu i hrechhuak ta anih hi. A va pawi tak em! Kha pa lianzuala kha a bul chu ani.




"Mahse, ka nupui in ka en chhinna, ran kaw chhung leh ui tang alo hmuh chungchang vel kha chu thudik tak ani. Kei pawh in kha thil kha chu ka hmu ve reng alawm, ka nupui hi kan fapa rilru lam a rualban lo duhzuala ang deuh kha a ni a, khatia zan lai a ran kawchhung ui tang pakhat in a han sawngbawl vel alo hmuh khan 'ramhuai ramhuai' tiin min hrilh nghe nghe asin.




"Mahse zan dang leh ah kei chu kalo muhil tui hle a, ka fapa muana hian hlauthawng leh mangang zet in ka mutui lai chu min rawn kai tho a, chutah chuan a nu tihpalh thil thu a a tihhlum thu min rawn hrilh ta mai ani, kha pa, lianzuala vang vek kha ani. Khami zan khan ka fapa hian mi pakhat a hmu tel a, chu pa chu ka damlo enkawl te zing a mi lianzuala ngei ani tih a hria, thil awmzia chu ka hrethiam chho ta ani, lianzuala khan enge kan in ah khan rawn tih a tum? Ka fapa thawm hriat pawh kha lianzuala lem rawn chan tumna thawm mai mai anih ngei pawh chu ka ringhlel ta love" Tiin lungchhe tak chung chuan a inhnit hlawp hlawp mai a.




Inspector chuan doctor leh a fapa indâwm kun vawng vawng lai chu han en melh tawn vat vat in "imm, lianzuala chu ka hmuh vat a ngai ani, doctor hriatpui, he thu hi min hrilh kha a ni a, lianzuala chuan nupui neiin a nupui chu a boral tawh tih thu hi min hrilh anih kha, hei hi a dik reng em?"




Doctor chuan lawi zet hian "aw inspector, ama min hrilh dan a ni a, kha thu min hrilh lai te khan lo hrethiam ila tha tur hi a ni a, ka nupui duhtak chu ka chan ve phah ta anih hi maw, he pa lianzuala hian anchhia min rawn thlen ani, Freddya pawh khan kei ni kha keimahni Kan ni tih a hriat hma khan misual emaw tiin silai nen hial inchhawp a tum thu min hrilh nghe nghe asin, ka fapa ang chiah in a chhungte a tipalh ve lo vang tih a sawi theih hauh loh, mahse kei ni khan Kan tibuai chhunzawm duh ta lova, keimahni ngei kan nih thu pawh kha kan hrilhfiah leh ta zawk a, he thil hian infiamna leh intihderna thil mai ni a a lan na phenah hian eng anchhia emaw tak chu Ken tel a nei ani" tiin pawi ti zet chuan a indawm Kun tlawk tlawk reng mai a.




Inspector remruata chuan a rilru kap ber tu thil pakhat la awm chu bawhzui nghal vat chu a duh ta a. Chu Chu Lianzuala ngei mai chu a ni. Chutah lianzuala chungchang thuthar hriat nghakhlel tak chung chuan a naute zinga mi rinpuia, lianzuala en thlithlai tur a a tirh chu phur ru tak chung chuan a han call ta a, lehlam atang chuan,




"aw hello sir" a rawn ti a, inspector chuan hmanhmawh fe hian "rina, enge chanchin? lianzuala chu i zui zel em?" A han ti a, rinpuia chuan hrilhhai tih hriat tak leh a ngaihna hriat loh hmel fe hian "sir, lianzuala chu ka mit hmuh lai ngei in boruakah a thamral daih mai" A rawn ti a,




Chuveleh inspector chuan teu zet hian "engtin a ni? Rinpui, i harhfim em? Zu i va rui mai mai ani lo maw? Tunah khan i rui em?" A han ti vin that that a, lehlam atang chuan beidawng tih hriat zet hian "sir, i sawi ang khan lianzuala chu an khaw dai thlengin ka zui zel alawm, mahse an khaw dai kan thlen chuan motor atang chuan a chhuk thla a, midang pawh an chhuk ve bawk, zun ram thiar tur an ni a ni awm e, tichuan ka en ve reng lai chuan lianzuala chu hahdam tih hriat tak leh thlamuan hmel tak mai hian boruakah chuan a thamral ta mai a ni. Kei chuan a chuan pui midang ho chu thu ka zawt fiah nghal vat a, chutiang mi awm ang an chuan pui loh thu min hrilh teh tlat pek a"




"Rinpui, phiangsen chuan! i hmu ngei si a maw?"


"Aw sir, chuan chanchin hlui sawi tur kan nei dawn niin a lang, he pa lianzuala an tih hi a hming diktak ani hauh lo. An khua ah chuan lut in mi te chu thu ka zawtfiah kual ta zel a, lianzuala tih hming atang chuan ka mi duh tak chanchin chu min lo hrilh thei mai lo, mahse a pumrua awmdan te, a landan leh a hmai awmdan te leh a chanchin te ka han sawi tak zelah chuan ka mi duh tak chu tunge anih an hre thei ta chauh a ni. Amah chu Kum tam tak liam ta a a hnu kan lo chhui zui hrep tawh victor vanlalpianga, ama nupui ngei thattu kha alo ni reng mai anih chu"




Inspector chu a pian a hnu lama chumi tum ang reng reng a mak ti leh hrilhhhai a awm ngai chu tuma hriat a ni hauh lo ang le, a mit chu a meng kawk kawk a, a thaw hawk hawk a, chutah a chil chu han lem khalh khalh in,




"imm rina, i thusawi te a dik ngei a nih si chuan victor vanlalpianga khan a duh vang reng ni hauh lovin a nupui Christina-i kha tihpalh thil liau liau in a that a ni ngei ang a?" A ti ta ngawt mai a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)