THINLUNG KEHCHHIA PHUBA _Chapter-1

[April Hmar Liverpool]

THINLUNG KEHCHHIA PHUBA

Ziaktu, Laltanpuia


Chapter _1

#Hmangaihna hi huatna a a chan chuan thil hlauhawm tak alo ni, hmeichhe pahnih rukbo an nih a thah zui an nih dan leh misual hnu chhuina#


Vantlang hmunah leh sawrkar pisa hmun a mite titi tui ber leh thuthang duhawm lo tak inmung mek chu tihtawp vat anih loh chuan nakin zel ah pawh, naupang te leh thalai te rilru la hruaikawi thei thil anih avang leh mipui him nan a thil pawimawh tak anih bawk avang chuan sawrkar uisathiam rual ho demna leh sawichhiatna darh mek zel chu mizo pa rilru ah chuan ngaimawhawm tak a tling ngei ang.




Naupang ten police te chu mi laktlak loh tak leh an hmuh khawloh theihna atang a an mualphona leh hmingchhiatna hliahkhuh sak thei tu tur thil a thlen ngei chu a tul niin a lang. Chu tualthahtu nunrawng leh pawisak neilo a chu an manchhuah vat loh zawngin thuthang duhawm lo tak leh demna an hla chu chuti mai a tun tut tut a han hmeh mih ngawt theih lah a ni hauh dawn lo niin a lang si a.




Tunlai in social media a chak nasa tawh mai si a, kan thil lo hmuh leh hriat ang ang chu kar lovah Ram pumah a darh nghal zel mai chu a ni si, thil ti sualtu leh pawikhawihtu demna ai mah chuan mipui te venghim tur leh mipuite thlamuang a awm tir tu tur ni a ngaih police lam duhkhawp lohna leh demna thuthang tam tak hriat tur chu a tam na ngiang mai si a ni, he thil lo irh chhuahna bul chu thil tihbo chhar atang in a intan a ni awm e.




He thil hi hmun finrial leh khaw daifem a intan lah chu a ni hauh silo. Mipui punkhawmna lunlai leh vantlang hmun pawimawh lai ber tih ngam atanga intan niin he mobile phone chhar tu hi security guard a ni a, a thil chhar hi tu ta nge ti a a han en fiahna lama phone chhung a a thil hmuh rapthlak tak leh phat rual loh a pawikhawihna leh tualthahna a ni tih hai theih hauh loh thil chuan a rang a rang a police station hnai ber a thlen tir ta a ni a.




hemi hma, police lama thlen anih hma hauh hian he video leh thlalak te hi a darh nghal avang in thil chhar avang a pawikhawihna rapthlak tak thleng chuan mipui mimir pungkhawm zingah boruak a nei nghal hat tawh reng a, chu mobile phone, tu ta nge tih hriat loha rawng taka hmeichhe pakhat chunga chetna video leh thlalak te chuan chuti taka thuthang duhawm lo leh boruak inlum leh chhoh dan vel a pawh chu enge a chhan tih leh enge a awmzia chu a hrilhfiah chiang mai awm e.




Police lam in an bawhzui nghal thuai a, mahse chu mobile phone ah chuan sim card a awm lova, tin mobile phone chu a hlui tawh a ni tih hriat tak hian a rawng te chu a khawk deuh that tawh a, a hmai te chu a khi deuh that tawh nghe nghe a ni. Chu mobile phone an chhar chhung a video leh thlalak rapthlak tak tak te avang chuan mipui thinlung a na in pawikhawihtu leh thil ti sualtu chu hriatchhuah a a phu tawk hremna pek ngei an duh a, nimahsela a lehlamah police lam chuan han bawhzui vak ngaihna an hriat zui loh avang te hlei hlei chuan police lam demna leh sawichhiatna te, thuthang duhawm lo tak tak hriat tur te chu in mung chho ta pawh a ni reng a ni.




Chutiang taka mihring nunrawng leh chetdan rapthlak chu mizoram a thil thleng ve atan chuan mumang ang mai a ni a, suangtuahna leh ngaihruatna ah ringawt pawh a thil thleng atan a tuma duh ngai loh tur te zing a pakhat chu a ni ngei awm e.




He thil thleng rapthlak tak mai hi a ngial a ngan a han tarlan ringawt pawh a inthlahrunawm hial ta ve ang, a ruh lang lutuk lo deuh zawng a sawi mawi mai loh chuan han sawi vak dan tur pawh a vang hle nghe nghe a ni.




Tualthahna leh pawikhawihna lo thleng tawh thin nen a in ang tlat lo a, mipat hmeichhiatna lama rapthlak tak leh bawlhhlawh taka chetna te nen lama a inzawm tel tlat avang te chuan mobile phone a video leh thlalak a thil awmdan han sawi pawh chu puitling leh puitling pangngai tak inkar ah chauh lo chuan thil harsa tak a nih avang leh mipat hmeichhiatna lama chin dan bawlhhlawh tak tak a hrinchhuah ve theih bawk avang te chuan a ngial a ngan chuan kan tarlang dawn lo a ni.




Case buaipui anih atanga ni hnih a liam hnuah chuan police inspector remruata chu a zinnna hmun atangin a hna zawm turin alo kir ve leh tawh a, a office ah chuan chu thil thleng, mipui te titi tui ber ni mek chu eng thil chiah nge anih tih chu alo ngaiven ru ve ran reng mai.




Chu mobile phone, security guard pakhat in a chhar tak chhunga video leh thlalak rapthlak pui pui te chu chhui Chiang turin police inspector zorama ruat a ni a, nimahsela a chet lak a muan avang leh mi sawisel leh duhkhawp lohna a nasat tak em avang chuan a case buaipui lai chu inspector remruata kut a hlan chhawn a ni ta ani.




Inspector remruata chuan rinpuia'n a zin hlan a thil thleng chungchang a sawi chu a ngaithla uluk dauh dauh hle mai a, rinpuia chuan inspector zorama leh a nau ten hma an lo lak tawhna te leh thuthang lengvel chungchang te, police lam chu demna a tam thu te leh chu video leh thlalak a pawikhawihtu chet dan nunrawng tak mai te, a chet dan te chu sawi ringawt pawh thil harsa tak anih thu te chu a hrilh malh malh reng a.




"Sir, tharum hmanga nunrawng taka chetna a ni mai lo a, mipat hmeichhiatna bawlhhlawh tak nen a chetna nunrawng tak a nih avang in he video leh thlalak te hi i en dawn anih pawh in i rilru i siam fel hmasak zet a ngai ngei ang" a han ti a. A ni inspector remruata pawh chuan chu thil chu mipui mimir atang leh rinpuia han hrilh tak atang reng mai pawh chuan tualthahna leh pawikhawihna alo hriat tawh a zawng a la rapthlak ber mai anih ngei pawh chu a ringhlel hauh lo reng a ni.




Inspector chuan a aw chu a han thian kharh kharh a chutah rinpuia hnenah chuan "rina, a hmasa in he cellphone chhar anih khan fingerprint test ni thei se a duhawm hle mai" A han ti a, rinpuia chuan "sir, security guard pa fingerprint bak hmuh a nilo a ni awm e" Chutah inspector chuan Rinpuia hnenah chuan fiamthu ti tak deuh hian "rinpui, Hindi film pakhat ah chuan police inspector rothap zet mai Singhama hi a awm a, chu pa chan te pawh chu ka inchan dawn dawn mai" tiin a han nui sak a,




rinpuia chuan "aw ni e sir, kha pa kha aw ka hria alawm, a film pawh a hmuhnawm hle tak kha maw le. a thil tih leh a thawhrimna te kha a ropui in a role kha chu a hneh sawh viau kha maw le" alo ti ve vat a, inspector chuan "ni e, mizo singhama ka ni ve mai. Amaherawhchu kan hnuchhui tur erawh a dan a dang deuh e tih thil a nia" tiin a mobile phone chu a han lekchhuak a,




"imm, tun lai mite hian social media kan hman dan hi a ngaimawhawm ta khawp mai. A bikin hetiang thilah hian" tiin Facebook group pakhat a security guard pakhat in cellphone a chhar chungchang in post chu a han hmuh a, chumi rual chuan "hei chauh hi a nilo, heti lam zawng a kan technology hmanrua te kan hman erawh hi chuan kan hna chauh nilo, kan nitin nunphung atan a thil tangkai tak leh hriatna leh finna tam tak min pe tu erawh a ni leh lawi bawk a" tiin a cellphone Chu a han hmet malh malh reng a,




Chutah inspector vek chuan "rinpui, singham kha kan han sawi hluai a, he cellphone chhar chhunga video leh thlalak rapthalak tak tak te pawh hian chanchin pakhat chu min hriatchhuah tir dawn dawn mai, kha enge ni ta kha, September ni 11 kum 2017 kum a an hriatchhuah tak kha, cellphone pakhat chu construction lama hna thawk ten an chhar nawlh mai a, tichuan chu cellphone chu an han bihchiang ta a, a chhung a an thil hmuh rapthlak tak mai leh tihbaiawm tak mai avang khan hring ei an tih tak mai, kha mi te nupa kha an pawikhawihna leh an tualthahna rapthalak tak tak chu an chhuichhuah theih phah a nih tak kha"




Chuveleh rinpuia chuan "ka hria e sir, Russia Rama thil thleng kha a niang maw? sir, i han sawi takah chuan mak ka ti ta hle mai, khami kum a rusian nupa an hming kha ka sawi thei ta mai lo, khami te chet lak dan kha tun a kan case buaipui tur nen hian alo in ang hle tak mai a, hei tunah security guard pakhat chuan cellphone a han chhar ve chu a ni a, tichuan cellphone chung a thlalak leh video rapthalak tak tak te avang chuan hnuchhui hna chu kan han buaipui dawn chu a ni a"




inspector chuan a phone chu la bih ngat ngat pah chuan "aw hei, a hming chu Dimitri baksheev a nih hi, an chet dan a rapthlak kher mai" Tiin a phone chu dawhkan ah chuan a han dah a.




Inspector vek chuan "mahse rinpui, he misual hian a chetdanah hi chuan dimitir baksheev a chet dan nena a in anna tur laiah tihdanglam a nei zauh zauh tih erawh video leh thlalak ah te khan a lang a, hriatchhuah mai mai nih a duh lo nasa tih a lang reng. Thlalak leh video te kha ka han en ve a, misual han chhuizui theihna tur awm engmah hriat leh hmuh tur a awm tlat lo a ni. Uluk deuhin han en nawn ve mah rawh, kha hmeichhia khawngaihthlak tak leh rapthlak taka sawisak kha a hmai tuam phui sak vek a ni a, a sawisa tu hi a lang chiang thei hauh lo bawk.




"Tin, a hmunhma vel atang ringawt pawh khan hriatthiam a har hle a, kha in atang khan engmah hriat zui theih tur a awm lo tihna anih tak ber chu, a bang rawng var vek a hnawih a ni a, thingzai niin bungraw dang leh hmanraw dang hmuh tur a awm lo, chu mi hmun ah chuan hmeichhe pakhat chu ui cho ang leka nghaisak leh tenawm leh bawlhhlawh taka mipat hmeichhiatna hmang a nghaisak a ni a, chu zawng chu a ni mai, an hmel a hriat theih loh a, han chhuizui theih leh bawhzui theih awmchhun chu hmeichhia a ni tih chauh kha a ni a,




"tin a nghaisa tu kha mipa ngei ani tih a aw ah khan a hriat a, mi hur nu tih te, zahpuiawm nu' tih te, i chantawk anih kha tih te leh i hur man anih hi tih te chu mipa tawng kan hriat theih awmchhun chu a ni mai bawk a, a aw thum dan atangin palian lam emaw mize ti zawk zawk lo ani ang tih a hriat theih a, tin kha nu a tawngkhum dan atang khan mipa kha kha nu pasal emaw a ngaihzawng emaw eng inzawmna emaw tak an nei ani tih Chiang takin kan hre thei bawk awm e"




inspector chuan video leh thlalak te chu ngun zet hian a han en leh a, rapthlak a tih avang chuan a chek tlak tlak thei hial a ni. Chutah zawi sap hian "rina, he nu leh mipa inkarah hian inzawmna thuk tak a awm anih loh vek chuan he pa hian he nu hi heti taka a nghaisak nachhan tur hian chhan tha tawk tak a awm ngei tur a ni"




Rinpuia pawh chuan "ni e sir, he cellphone ah hian sim card a awm lo hlauh mai a, sim card atang a han chhui zui theih a ni ta lo tihna anih chu. Tin fingerprint chungchangah pawh chuan security guard pa fingerprint bak hmuh a ni silo a" alo ti vat a.




Inspector bawk chuan,

"Kan naupan lai khan kan thian zing a pakhat hian school ah hian Burma thil siam Sarang a pack kha cheng sawm in pack ruk lai mai a lei thin thu min hrilh a, mahse a man diktak ah chuan cheng sawm chuan pathum chauh a lei theih a ni. Kei ni chuan chu pa thil tih dan chu hriat kan chak ve ta em em mai a, tichuan tumkhat chu dawrah chuan thil lei turin kan kal ho ta nghe nghe a,




"thil Kan lei zo dawr atang a kan han chhuak ta chu chu pa chuan Burma thil siam pack ruk ngawt mai chu a rawn khai uai leh ta thuah mai a, keini chuan mak kan ti tlang kher asin, Kan lei rual reng a, pawisa pawh kan hman zat a in ang reng. Keini in cheng sawm a pack thum Kan lei laiin a ni chuan a let thawk a lei ta bik tihna anih chu, chu lai ah chuan engtin nge a tih bik han ring chhin teh" tiin rinpuia chu a han thlek ha a,




rinpuia chuan "imm, a ho e, chu zawng a thil lei lai khan in hriat loh laiin pack thum a la a, dawr nghaktu hmuh lai a pack thum la leh in a lak hmasak ho kha a kawr ip ah a dah hmasa tihna a ni mai alawm" alo ti sam et a, inspector chuan han nui hak pah chuan "ngawi teh, i han sawi hmang atang chuan a awlsam hmel viau mai, mahse chuti lutuk a thil awmlsam a ni bik reng reng lo, engtin nge atih hriat kan duh avang tak reng chuan alawm a thil lei lai pawh kan en thlak reng ni.




"dawr nghaktu hnenah khan kan thil lak te kha kan hmun leh thlap zel nghe nghe bawk asin" a han ti leh a, rinpuia chuan "sir, chu zawng, ka hrethiam ta hauh lo mai" alo ti ta nge nge a, Chutah inspector chuan "thil ho te mai maw le, a thil lei tur kha pack ruk a la a, a lai takah a ulh thlep a, a lehlam pathum kha dawr nghaktu hnenah khan hmuh in cheng sawm a pe mai a ni. Keini pawh in kan lo hmu reng, dawrnghaktu pawh in a hmuh sak thlap mai. Keini hmuhah chuan pack thum ngei chu a ni alawm, mahse a lehlam, a hnunglamah khan pathum dang chu a ulh thleh hnan mai mai alo ni.




"Mahse keini in tih chhin kan han tum ve chu kan che buai in kan thiam ve tlat lova, thil awlsam te a lang kha kan ti thiam ve tlat lo ani. Mitdawihvaih thil kan tih te pawh hi thil ho te ni a lang an ni a, mahse a mi na zawng hian a tihdan kan hre na in kan thiam ve leh der silo. Ka sawi awmzia chu heng tualthahna te, pawikhawihna te hi a ti tu a zir hian hnuchhui tu tan a awlsam in a harsa hle thin a, pawikhawihna thleng na zawng hi chu chhuichhuah harsa a ni hauh lo, mahse ruahmanna leh tawnhriatna a tan rual a, remruatna fel fai tak nen a thil tih a nih tawh chinah hi chuan police tam tak pawh an hawi hil fo thin reng zawng anih hi maw" tiin a ai a awhsak tak inspector zorama chungchang chu a sawi zui luam a.




Rinpuia pawh chuan a pu sawi awmzia te chu man thiam in a pu ngaihdan chu a tawmpui viau mai, an case buaipui tur chu ruahmanna felfai tak nen a thil tih anih ngei chu a ring tlat a ni.




"Awle rinpui, chet kan lak nghal mai pawh a tul ang, inspector zorama chan ang chauh kan chan anih ve hma ngei hian" tiin a han nui hak a, Chutah rinpuia chuan "sir, engtia hma chu han lak tur nge ni ta ang?" alo ti thuai a, inspector chuan "he pawikhawihtu atang a bul kan tan chuan thil a hnawk chho tual tual dawn a rinna ka nei tlat, a tuar tu, he hmeichhia atang ngei hian bul kan tan hmasa tur a ni, henu hi tunge anih kan hre hmasa phawt ang.




"police station hrang hrang be pawp ula, tun hnai a ni emaw hun kal hlek tawh a mi a ni emaw, mibo record an neih ang ang chu lo khawm rih phawt mai ru, heng mibo report atang te hian he nu hi kan chhui dawn a ni.




"Tin, mibo report petu an chhung te chu thu kan zawt kual bawk ang" tiin a thutna atanga chuan a tho nghal vut a, Chutah rinpuia hnenah chuan "He cellphone hi a gmail account, he mi cellphone a application hrang hrang a account awm zawng zawng hi chhui zui vek ni rawh se. A hming indah dan atangin he cellphone neitu hi chu a hriat theih mai ang a, mahse rina, he misual hian a chetsual palh thu hla avang a he cellphone hi tibo a nih hi ka ring tlat pek lova, a tum luih reng avang a he cellphone hi khalai hmun a dah kha anih hi ka ring tlat a ni.




"A Google account a hming a dah anih pawh in ama hming tak chu a ni hauh lo thei bawk ka tihna anih chu" tiin office chu a chuahsan nghal thuai a.




Security guard pakhat in vantlang hmun laili lai a cellphone pakhat a chhar chhunga video leh thlalak awm chu hetiang hi a ni a. Video ah chuan hmeichhe pakhat, saruak vek a awm hi mangang leh hlau thlabar zet hian chhuat ah hian a tlu sawp niai reng a, mahse chu nu chu a hmai tuam phui vek niin a hmel hmuh theih a nilo. A awmna hmun chu a bang thingzai niin a chhuat erawh cement a ni a, bang chu rawng var in a inhnawih chhuak vek a, bungrua leh hmanrua thil dang hmuh tur a awm lo, hmeichhia chu mipa pakhat, a thla latu chuan tawngkam chhe tak tak in a an khum reng a, mahse mipa chu tunge anih hriat theih turin camera hmaah chuan a lang chiang ve thei hauh lo thung.




Mipa chuan hmeichhia chu rapthlak tak leh tihbaiawm zet zet chuan a nghaisa a, chu mai nilovin mipat hmeichhiatna hman pui silovin mipat hmeichhiatna bawlhhlawh tak leh a sawi ringawt pawh harsa tur thil chuan a sawngbawl zui vel a ni. Tichuan a duhthal a hmeichhia a nghaisak hnu chuan hmeichhia chu a that ta ani. A thah dan tak pawh hi a rapthlak em avang leh hriat a nawm loh em avangin sawi lan a rem lo ni mai se.




Chumai chu ala duhtawk lo, hmeichhia taksa bung hrang hrang te chu a hriamhrei ken hmang chuan a hlep a, chu pa chuan a ei ni ngei tur a ni, mahse camera hnungchhang zawng a a awm tlat avangin a ei ngei em tih erawh hriat theih a nilo. an innghaisakna hmun hma awmdan leh a landan atang chuan in hnuai ni ngeiin a lang a, a chhuat cement anih vang chu a ni.




Tin, a bang thing anih avang chuan concrete building anih a rinawm lova, Assam type anih ngei a rinawm a ni. Chutiang ang in hnuai neitu chu tunge anih in report tur chuan inspector zorama Khan hma a la mek a ni a, mahse chutiang ang in hnuai neitu chu an awm lo a ni chek a nga, mi tumah in report an awm ta lo a ni.




Inspector zorama hmalakna chu a tha in kawngro pawh a su ngei mai, mahse a hnu leh a chet lak leh dan tur ah a tangkhang rei ta deuh a, inspector ruata chuan a ai a awh ta ani ber awm e. Inspector remruata ve thung chuan tualthattu remruatna leh ruahman lawk sa vek anih a rin avangin chuti mai a a hmun hma atanga chhuichhuak nghal buan buan tur chuan ngaihtuahna sen ngun a tul hle in a ring tlat thung a.




Inspector zorama leh inspector remruata te ngei pawh chu an inbe ve zauh zauh reng tho va, mahse zorama chhuan inspector ruata ngei pawh chu ani hmalakna bak a awmze nei zawk a chet han la tur chuan a ring zo vak bik Chuang lo.




Inspector remruata chuan cellphone chhartu security guard kiangah chuan a thuthmun chu a han rem ve ta a, Chutah dam zet hian "tlangval, tunge i hming? cellphone chhartu kha i ni ang maw? A han ti a, security guard chuan polite tak chung chuan "ee sir, ka hming chu Jasona a ni e, ni e keimah hi cellphone chhartu kha ka ni e" alo ti nghal thuai a,




inspector chuan "joson, cellphone i chhar ni kha ni sawm leh pakhat, zirtawp ni a ni maw kha?"


"aw ni e sir, ka duty lai a ni a, hei i hmuh ang hian kei chu chhun lama duty ka ni a, he lai kan duty hmun hi chu i hriat ang in vantlang hmun laili lai leh mipui mimir pawhin kan bawh lai a ni a, mipui tam tak kara khatia cellphone ka han chhar khan tu ta nge tih hriat tumin ka han en a, password an dah lo hlauh mai a, tichuan ka han en chiang ta a, phone gallery ah chuan lutin ka beisei loh lutuk thil ka hmuchhuak ta ani"




"Imm, tichuan mangang tak leh thlabar takin police hnenah i thlen ta ngawt mai a niang maw?"


"aa sir, khatia video rapthlak tak ka han hmuh khan ka hlauthawng hle mai a, ka thian te chu ka hmuh tir ve nghal vat a, tin khalai hmun a lo awm ve midang te pawh khan an lo hre ve ta zel a, tichuan mak ti tak chung leh rapthlak ti tak chung chuan video leh thlalak te chu kan en kual ta zel a, tichuan thenkhat chuan video leh thlalak te chu min dil ta hlawm a, an post darh ta chiam mai alawm maw le, kei chuan chutia thil tih ringawt chu thil tha ber niin ka hre ta lova, police station hnai berah chuan ka thlen ta ringawt mai a ni"




Inspector chuan "Jason, cellphone i chhar dan chu min han hrilh teh" a han ti leh a, security guard chuan "sir, hei, he lai kan awmna hmun hi kan post a ni deuh mai a, he lai hi kan chhuahsan khat viau mai, mahse khami tum khan pawn lamah sawn ka chhuak a, saw, saw lai gate bula step awm ah sawn, step sir lam ah alo awm a ni, ka hmuh veleh khan ka la a, tu ta nge tiin ka bul a mite chu ka zawt a, tumah in an rawn ngaihven lem lo. Tichuan post lamah ka let leh ta a ka en chiang ta ani"




"Awle Jason, nang mai nilo, i duty pui midang te hnenah pawh he lai a mi rawn vei vak thin te zingah han rinhlelh awm deuh emaw, thil bo zawng emaw an awm ni a i hriat chuan ilo ko peng vat ang a, a hmel leh landan ilo chhinchhiah dawn nia, tin min rawn hrilh vat bawk dawn nia" "awle awle sir, ka lo thlithlai reng dawn nia"




"Sir, cellphone neitu hming chu kan hre tawh e, mahse account pakhat chauh a awm lo, gmail account pahnih a awm tlat mai. Tin he cellphone a application hrang hrang a account hming te hi a in ang lo vek mai a, i rin ang ngeiin he mi sual pa hi inpuan mai mai a tum lo a ni ngei ang"




"Awle rinpui, hming hrang hrang te chu lo list la, Facebook, Instagram, WhatsApp leh app dang dang te kha a hman kual dan lo zirchiang leh ru, mi post a comment na te, a post miin an comment na te, khang atang te khan han rinhlelh tur emaw, he phone neitu nen a inzawmna nei thei tur a han rinzawn tur te kha lo chhui zel ru"




rinpuia chuan "sir, kan chhui zel dan atang chuan he cellphone a facebook account hi pathum a awm a, mipa pahnih leh hmeichhia pakhat niin pakhat hi chu account pangngai ve tak niin post pawh a awm nual, a dang pahnih erawh a hming a siam ve mai mai niin a lang. Whatapp erawh a khawih lo a ni ngei ang, account a in hawng lo tlat mai"




Inspector chuan "Facebook post ho chu comment a awm em?" Alo ti vat a, rinpuia chuan "aw sir, pahnih comment chu a awm, mahse hming lem an ni, mihring hming nilo savawm tih leh sakei tih an ni. Tin, thlalak an dah lo, tute nge an nih kan hre thei lo, an profile kan chek a milem pahnih khat vel bak post an nei lo. Comment pawh a awm lo, post an lo comment dan pawh chu tawng mak tak a ni. Rache tih thumal pakhat ringawtin an comment ani, An za vai hian account lem vek an nih a rinawm bawk"




Rinpuia vek chuan "Tin, Google account hi pahnih a awm bawk a, mipa hming leh hmeichhe hming a siam a ni tlat bawk. Mahse a hming mai a account siam an ni tih a hriat a, pakhat zawk, mipa hming a siam zawkah erawh a search history ah misual chungchang chhui zuina leh tualthattu hriatchhuahna lam hawi zawn a ni. He misual hian in venna tur leh hriatchhuahna anih theihna lak atang a fimkhur a tum hle niin a ngaih theih. Chumi tih loh chu thil dangah chuan engmah hmuhchhuah tur a awm lo"




Inspector chuan "Facebook lam a Messenger lamah inbiakna tih angreng a awm lo tihna a ni maw? A han ti a, rinpuia chuan "sir, engmah a awm lo. He tualthattu pa hian he cellphone hi kha laiah khan a dah lui anih ngai chuan a duhthal a a ruahmanna nen he cellphone hi a set up sa vek thei tlat a ni"




"Imm, alo ni maw, engpawhnise, video leh thlalak te kha a ni leh thla kum chen khan i chhinchhiah vek em?


"Aw sir, kha kha chu kan chhinchhiah thlap e" rinpuia chuan file chu han la in "sir, veng hrang hrang police station kan biakpawh na atang in mibo record hi pali a awm a, heng mibo report petu an chhung te kan biakpawh na atang in mibo pakhat hi chu rilru lam a harsatna nei niin mipa a ni a, an hmu leh tawh a ni awm e, a dang pakhat leh hi mipa bawk a ni a, a ni erawh Kan chhui zui ta lo.




"Tin, a dang pahnih hi hmeichhia niin hmuh an la nilo ve ve bawk. Mahse sir, heng hmeichhia pahnih mibo te hi police hnena report tu te hian an ngaihven zui lo ni a thudawn a ni a, a tirah police lam in an report dawn chu an bawhzui ve ngei a ni awm e, mahse mibo chhungte ber an reh tak ah chuan mibo chu an hmu leh tawh ah ngaiin police lam pawh chuan han bawhzui tlakah an ruat ta lo a ni ber awm e. Tin mibo te hi kum 30 hnuai lam vek an ni a, video a mi kha chu a pian phung leh a landanah kha chuan kum naupang chu ani tawh hauh lo ang tih lah a rinthiam theih bawk si a"




Inspector chuan "imm, chung mibo report te chu an chhung te thu zawhfiah leh an ni ang. Tin, min hrilh teh, hmeichhe pahnih mibo report te chu an hming leh kha cellphone a hmeichhe hming a siam account zing a khawi emaw ber nen khan hming in ang a awm em?




"Sir mibo hmeichhia pahnih te hi Lucy remsangpuii leh jessica vanlalhriatpuii te niin Lucy remsangpuii zawk hi kha cellphone a hming pakhat nen kha chuan a in ang teuh ve viau, GMail account a hmeichhia kha lucy tih ringawt a ni a, mi thuhmun an ni a ngem tih erawh ka hre bik lo"




"imm, anih chuan mipa hming ve thung kha le, cellphone a hming pakhat tal nen khan mibo an la hmuh loh chu an hming in ang a awm em?"


"Sir, mipa lam chu tumah hming in ang an awm tlat lo a ni"


"Awle rina, in ti tha lutuk e, engpawhnise mi bo chhungte chu naktuk hian thu zawhfiah turin kan la nghal ang"


"Awle sir"




Inspector chuan rinpuia hnenah chuan, "rina, he cellphone hi a thla lo la la, a hma zawng leh a hnung zawngin, a sir zawng in la ang che, tichuan he cellphone hi an hmuh hnu a ni em? An hriat hnu a ni em? Tiin i post darh bawk dawn nia, a hmel en hi chuan secondhand zawrh lai an lei te pawh awm ang dawn dawn in a lang, cellphone secondhand zuar thin te khan lo ngaihven thei deuh bawk se,




"an hmuh hnu emaw an hriat hnu emaw a ni em tih lai a kha hriatchhuah vat ilo tum dawn nia, a tan tirah khan security guard khan a chhung a video leh thlalak te hi lo ti darh mai loin cellphone bo ang in thu chhuah siam zawk ta ang ila, a neitu alo lan leh alo lan loh dan a zirin tihbo nge anih tum reng vang a kha lai a dah kha anih tih hi kan hre fiah leh zual ngei ang" A han ti a.