THINLUNG KEHCHHIA PHUBA _Chapter-2

[April Hmar Liverpool]

THINLUNG KEHCHHIA PHUBA

Ziaktu, Laltanpuia


Chapter _2




A hma a mi, a mitmeng fim ral mai leh a hmai hriam hrak mai kara a hmel thutak zet mai lo lang chu en in, "pu inspector, he video rapthlak tak a darh tak chiam hnu khan police lamah bawk kan fanu bo chungchang chu kan tharthawh leh a, an ni pawhin min lo bengkhawn sak viau, an ni min lo hrilh danah chuan nangni hnenah thlen turin min lo rawn a, tichuan keini lam pawh i hnena kan fanu bo chungchang hi thlen tura kan lo inbuatsaih lai mek a ni, mahse nangni lamin kan fanu bo chungchang ah min rawn ko hmasa ta zawk a"




Inspector chuan a hma a nu valai tak, a hmai a duk awm avang a hriselna lama harsatna nei mek a ni tih haitheih hauh loh tur chu en in "ka pi, video hi uluk takin en rawh, hlau miah loin en rawh, i fanu a ni em? A pumrua leh rûang am a landanah hian i fanu a ni em?" Chu pitar chuan dim dai chung chuan video chu a han en a, rapthlak a ti kher mai.




inspector chuan "ka pi, uluk deuh khan en ang che. A ban leh a ke, a taksa landan te kha i fanu ngei niin i hria em?" Chu pitar chu a thaw hawk a, harsa tih hmel zet hian video chu a han en vang vang a, Chutah duhtawk tih hriat zet hian "nilo nilo, pu inspector, ka fanu ngei niin ka hria. Jessica ngei ani" tiin a tap dawn ta mai a. "Hei, en mah rawh, a kiu kual lai a khuavang awm hi i hmu em? Tin, a nghawngah hian khuavang leh ser a awm bawk" Inspector chuan "imm ka pi, tawrhchhel a tul dawn a nia, i fanu bo ni kha han sawi teh le"




Pitar chuan a rumol a a mittui han hruk mawlh mawlh pah chuan "pu inspector, Jessica kha September ni 6 Pathian ni atang khan in ah a awm tawh lo a ni" Chutah Inspector chuan, "awle ka pi, sawi zel rawh" Pitar chuan "Sawi nuam a ni hauh lova, ka fanu hi pasal then tawh niin a pasal nen hian fa erawh an nei lo a, mami hi hmeichhe nunchang thalo ti a han sawi tur hi a ni ve hrim hrim a, Pathian ni ang ah phei hi chuan in ah hian a rawn haw ngai meuh lo a ni.




"Keini chuan ngai ah kan neih fo tawh zawk a, mahse khami tum khan a tuk leh thawhtan ni thleng khan amah biak tlang theih loh in a awm a, kan ngaih erawh ala tha lo Chuang lo. Mahse thawhleh ni alo thlen takah chuan kei chu ka ngaih a tha ta lo a, tichuan mami bo buai chuan kan buai chho ta a ni.




"A thian te lahin a chanchin engmah an hre lova, a bo ni Pathian ni ah pawh khan an inhmuh loh thu a tu a te mai pawh chuan an sawi vek mai a, a thian thenkhat chuan pasal a um anih an ring hial a ni. Ngaihzawng a nei a ni awm a, mahse keini lam chuan chu pawh chu kan lo hriatpui ve lem lo thung. Mahse a ngaihzawng ni a an sawi pawh chuan a hmuh loh thu leh an inbiak loh thu te, an inngaihzawn lohna a rei tawh thu te alo sawi ve leh zel a, Hei, kar khat dawn chu alo ni ta reng mai"




Inspector chuan video leh thlalak a a ni leh thla te chu a han en vat a, September thla ve ve chu alo ni. Mahse, a ni erawh a in ang lo thung a, video leh thlalak a a ni in tarlanna erawh Jessica bo ni Pathianni atanga chhut in ni nga ni a thlalak leh video chu siam ani tih an hre thei ta a.




Inspector chuan "awle ka pi, i fanu hi Pathian ni September ni 6 ah a bo tan a, he thlalak leh video hi ni 10 a siam ani thung. I fanu bo ni atang a chhiar in a ni lina ah tihna anih chu. Chu mi tuk a ni 11 ni zirtawp ni ah chuan cellphone chu security guard in a chhar ta a ni. Chuan ka pi, i fanu thlalak leh i fanu pasal hlui hming chu min hrilh thei a ngem? Tin, a ngaizawng a thian ten an tih chu tunge anih? Tin, a pasal hlui chu khawiah nge tunah a awm?




"Pitar chuan "aw hei pu inspector, ka fanu chu hei hi anih hi" tiin a mobile phone a a fanu thlalak chu a han hmuh tir a, Jessica an tih chu pumraw te chhe lo tak mai leh sam kir lek lek, a hmel a tung in a hnar ngul a nalh vah mai bawk. A mitmeng a fiah kal reuh a, a pumrua leh a landanah chuan video a hmeichhia nen khan in an na an nei tam lo viau mai. Mahse thawmhnaw hak lai taksa landan leh saruak lai landan chu chhuidawn thiam tur chuan amah hrechiang em em tu an nih ngei a tul ang. Inspector pawh chuan ama nu ngeiin a fanu anih a rin thu a kiu leh nghawng a chinchhiahna awm avang in a sawi si a, chuvang chuan video a hmeichhia chu Jessica ngei anih chu a ring ve ta zawk a ni.




Pitar hnenah chuan biak pawh reng theih a awm tur leh a tul dan ang a thuthar a awm leh awm loh inhrilh tawn zel tura chah in a fanu pasal hlui chungchang leh a thian ten a bialpa an tih chungchang chu a han zawt leh a.




Jessicai nu chuan, "pu inspector, kan makpa hi a hming chu richarda a ni a, makpa fel leh mi tha tak a ni. Tunah hian kan awmna bul maiah hian ala khawsa ve a, i duh chuan thu pawh chu i zawt fiah dawn nia"


"Awle ka pi, tunah hian i makpa chu thu zawhfiah nghal mai ka duh hle mai, keimah zawk hian nangmah ni thlah pah che u in i makpa chu ka kawm teh ang" tiin chet an la ta nghal a.




Richarda chu a hmel han en mai chuan kum 35 bawr vel ni a ngaih theih tur niin pa te lam leh sa pan lam a ni a, a hmel a felfaiin a sam a zuah ve lek lek a, a mitmeng a fiah in a hawiher ah mi thothang tha leh zam tha pangngai tak a nih ngei a rinawm.




Inspector chuan richara hnenah chuan "hei, i nupui hlui Jessicai chungchang hi kan buaipui mek a, hetia a chin hriat loh a a han bopil danah hian ngaihdan emaw rindan emaw te i nei em? tiin richarda rin loh tak chuan a ngaihdan a zawt hmasa ta khauh a. Richarda chuan a kut chu han suih in ngil at hian a thuthmun chu a han rem a, chutah inspector en ran chung chuan "ka pu, Jessica kha pawn lam ngaina tak mai mi a ni a, thian pawh a ngaina viau, khawi khawi hmunah emaw mi tu tu te emaw nen a han theuleu kual vel kha a nuam tih zawng tak a ni. Heng vang hi a ni reng a kei nen pawh a kan inneih rei theih loh na chhan chu ni.




"Fa hi kan nei hman lova, ka rindan chuan a thian thenkhat te sawi dan ang thovin a ngaihzawng nei hi khawi hmunah emaw a rawl bo anih ka ring a ni. Mahse hei hun a liam zel a, tin kei hi Jessica nen hian innei tawh lo mah ila a nu leh pa te hian min la thlahthlam mai bik lova, an makpa ang mai in min la ngai a, an in ah pawh ka va la chuangkai ve fo mai.




"Kan in en hran phah em em Chuang lova, Amaherawhchu han innei leh tur chuan keimah ngei pawh hian harsa ka ti ve tawh hle thung. Tun tum, a chin hriat loh a a han bopil tak ah pawh hian a chanchin ka ngaihven in ka ngaichang ve reng tho a, thu thar hriat tur a awm leh awm loh chungchangah pawh engkim hi ka hre ve leh zel a ni. Pasal a um anih kha ka ring ve tho a, chumi anih loh chuan han rinzawn thiam mai dan tur ka haihchham riau a ni"




"Imm, pasal a um anih chu in ring deuh thum mai tihna a niang maw? Richarda chuan "imm ka pu, chu chu a dik alawm, ama nu leh pa te ngei pawh hian an rindan a ni a, an fanu hi an ngaihven hranpa em em lo anih pawhin thil awm tak niin ka hria, a chhan chu ka sawi tak angin kei nen a kan inneih lai reng pawh a ngaihzawng neih mai hreh lo ang chi kha a ni ve reng reng a, tin pawn lam nun hi a ngaina em em bawk"




Inspector chuan a thuthmun chu han siam rem in "chu, a ngaihzawng neih te chu engtin nge kan hriat theih tak ang? Tun hnai a a ngaihzawng, pasal atan a a um tak ni a an han ngaihbel ber a chu tu ber nge ni ang?




"Ka pu, kha lamah kha chuan a thian te hian an hrechiang berin ka ring? Tin, police lam khan a bo tirh khan a thiante leh a bo hma ni a a mi biak zawng zawng te kha thu an zawtfiah nual hlawm a, kha ta tang khan pasal um anih rinna kha lo awm tan kha a ni reng a, mahse hei amah biakpawh theih a ni lo zui ta zel chu a ni a, a thian ten a bialpa ni awm a han ngaih theih tur ho an han be kual hlawm a, mahse an ni pawh chuan a chanchin an hriat zui bik loh thu leh an awm dun loh thu an lo hrilh ve leh zel a, tawhsual a tawk anih loh vek chuan phai lamah vai ram ah te hian a rukin a kal bo anih te hi ka han ring thla rawk a, a ngaihzawng tu emaw ber, a thian te ngei pawh in an hriat pui lem loh nen an tlan dun anih ka han ring deuh bawk"




Inspector chuan "imm, chumi laiah chuan police te chuan tawhsual a tawk anih rin theihna laiah chuan hmalakna an nei em?"




"Imm, khami chungchang kha an han bawhzui ve ren rawn dawn a, mahse a nu leh pa te lam khan an buaipui zui ta lova, an reh tak tlat avang khan police lam pawh khan an pamtul leh ta niin ka hria"




"Engvang a a chhungte chuan ngaihven zui lo nge an nih ang? Richarda chuan "chu zawng, sawi tak ang in a ni hi alo rawl bo mai mai anih te kha an han ringhlel hnuhnawh leh ni ngei tur a ni" Inspector chuan "a bo thu an report vek tawh a, engvanga a rawl bo mai mai han ring leh hnuhnawh nge an nih ang?


"Ka pu, a chhung te hi an buai ve thin a tin a ni, Jessicai lah kha Khatiang a awm kha a tih than thil alo ni si nen, tum dangah pawh a rawl bo fo thin si a"




"Awle, engpawhnise he mi kaihhnawih thu hla avang hian nang ngei pawh hi nakin zelah thu zawhfiah leh te pawh ila tul maithei a, tin i nupui hlui chanchin te pawh chu i theih ang angin lo ngaihven ve la a tha a nge" Tiin inspector chuan richarda chu a tinsan ta a.




Inspector chuan rinpuia chu a han call a, lehlam tang chuan "hello sir, enge ni ta?" a rawn ti nghal var a, inspector chuan "rinpui, Jessicai hi a Facebook profile lo zawng ula, a thlalak a tang khan amah chu in hre thei mai ang a, chuta tang chuan post comments awm zawng awng uluk takin lo chhui ang che u, he thil hi kha tualthahna leh pawikhawihna video nen a inkaihhnawih a ngaih ni rawh se, ringhlelh awm ni a ngaih theih tur kha in lo chhui dawn nia"


"Awle sir kan lo en nghal ang e"




Inspector chuan a mobile phone lo ri rat rat chu han en in "aw hello" a han ti leh a, lehlam tang chuan "hello, inspector remruata i ni ang maw? He tah, kawn veng police station atang in inspector vansanga ka ni e" a rawn ti a, chuveleh remruata chuan uluk zet hian "aw a ni maw, eng thil nge ni ta? A han ti vat a, lehlam atang chuan "inspector, hei hman ni deuh tawhah khan mi bo report kan nei a, chu chu tunah amah mibo hmu tu ni a insawi mi pakhat an rawn awm tlat mai. Hei, mi bo hi Jessica vanlalhriatpuii a ni a, kawn veng a mi an ni. A chhung te pawh kan hrilh nghal a, i hman chuan he lamah i rawn tleh phei dawn em ni? Tunah cellphone pakhat security guard in a chhar a video leh thlalak vel chungchang kha i chhui mek ani tih ka hria a, i hnuchhui lai mek atan a thil tangkai tak tur pawh a ni tel ngei in ka ring" a rawn ti leh a, remruata chuan "imm, ka nau te ka rawn tir dawn nia, hei mi thu zawhfiah tur ka nei mek si a" tiin an inbiakna chu an ti tawp ta a.




Remruata chuan a naute hnenah chuan kawngpui police station lamah Jessica chungchang a amah hmu tu ni a insawi chu lo va ngaihven nghal vat turin a han hrilh nghal a, ani pawh chuan Jessicai bialpa ni a Jessicai thian te sawi tetea an tih awmna lam pan chuan chet ala nghal thuai a.




Inspector remruata chu a phone alo ri leh a, a han la a, rinpuia alo ni a, "sir, cellphone chungchang thuchhuah ka siam ah khan hei mi pakhat in tlem lai deuha a mobile phone tihbo nen a in an thu min rawn hrilh tlat mai. A phone awmdan leh a chhung in set up dan chen in ka zawt vek a, Amaherawhchu a chhung in set up dan chu a phone tihbo nen a in an loh thu a sawi thung.




"Mahse a hmel leh a pawn lam landanah ngawr ngawr chuan a phone tihbo a hmuh zawh tak loh nen in ang a ti thlu ngang a niang" a rawn ti a, chuveleh inspector chuan "imm rina, chu pa mobile phone ngei chu alo ni anih chuan misual chu amah in a rawn inbarh dawn tihna a va nih mai hmel ve, engpawhnise amah ngei chuan rawn enfiah phawt se ava tha ve, police investigation thil ah a pawimawh thu hrilh la a rang a rang in amah chuan rawn ngaihven vat teh se khai" a han ti a, lehlam tang chuan "awle sir, amah chu ka hrilh a, a rawn ngaihven thuai turah ngai ang" tiin an inbiakna chu an ti tawp leh thuai a.




Tetea chu amah chauhin in ah alo awm a, inspector remruata alo hmuh rual rual chuan alo ngaihven nghal vat a, Chutah inspector pawh chuan tetea chu uluk fe a han thlek vang vang chung chuan "imm, tetea i ni tiraw? A han ti a, tetea pawh chuan "aw ka pu ka ni alawm, enge ni ta? Jessicai chungchang bawk a niang maw? Alo ti nghal vat a.




Inspector chuan "tete, hei i bialnu hi tun thlengin a chin hriat zui ala ni hauh lo mai a, kha mi ni September ni 6, Pathian ni khan amah Jessicai nen hian in in hmu em? Inspector in chutia Chiang angreng taka thu a han zawh tak ah chuan tetea pawh chuan uluk tak hian a han ngaihtuah let dauh dauh a, chutah inspector hnenah chuan "ka pu, Jessicai nen hian kan inngaihzawnna hi a rei ve leh tawh, kei hi a thian te pawhin police lam an rawn kawhhmuh teh chawk mai a, mahse hei hi ka sawi duh. Jessicai kha mi pa pakhat chauh ah a rinawm ngai lo.




"Kei nen ngei a kan inkawp lai pawh khan mi dang hi awm an awm hrim hrim ang tih hi ka Chiang a ni. Kan inthen hnu atang kha chuan kan inbe khat tawh khawp mai. Khami tum, a bo ni khan kei chu ka inkhawm a, ka lengchhuak hla lo hrim hrim. Kohhran thil enge maw neuh neuh ah ka buai ni leng a ni ber awm e, min hriat pui turin ka thian te pawh an awm thlap a ni" A han ti nghal mawlh mawlh a, inspector chuan,




"tete, hlauthawng lo la, Jessicai hi theuleu nuam ti chi a ni hrim hrim niin a ngaih theih a, hetia a han bo pil ngawt danah hian rindan emaw ngaihdan emaw i nei reng reng em? A han ti leh a, tetea chuan "ka pu, ka ngaihdan chuan Jessicai hi mipa kawp kual tam ve chi hi a ni a, chuvang chuan a bialpa te emaw a thian te emaw nen hian lengchhuak turin an thangchhuak a nih ka ring a ni.




"A thian te nen an nih loh vek chuan amah chauhin khawilaiah emaw a kal ang a, tawhsual emaw tawkin a chin hriatzui a nilo pawh ani maithei asin" inspector chuan "chumi anih loh pawh in pasal a um a ni thei mai lo maw? alo ti a, tetea chuan "chu zawng ka pu, ka hriatpui hauh lo mai. Kan inbe ngai silo a, hei ka phone te pawh hi i duh chuan i check vek thei alawm, a hma pawhin police te hnenah pawh ka inlep se hneh viau asin.




"A thian te lah hian kei hi an rawn kawhhmuh teh chawk a, kan inngaizawng tawh lo nasa mai si a, a dik a dik chuan a thian te ngei pawh hian amah Jessicai hi an hrechiang vak lo a ni chek a nga, kei in ka hriat ruk pawh hi an hre hauh lo tihna a ni mai, ngaihzawng kawp a ching a, kei nilo hi midang an awm hrim hrim, tin amah Jessicai thian te ho ngei hi thu zawhfiah an tha in ka hria" tiin a hmelah chuan a lungawi zan lo ani tih chu a lang reng a.




Inspector chuan "imm, a thian te ngei pawh chuan a chin engmah an hriat bik loh thu an sawi fur hlawm si a, a ngaihzawng ni a an han hriat ber a i ni mai si a, midang nangmah lo, a ngaihzawng ni a han rinhlelh tur awm ang han sawi mai tur te i hre mial zawk lo maw? Tetea chuan a han ngaihtuah leh vang vang a, "imm Jessicai kha a kawp lawr ve angreng tih a khawsa zia ah pawh khan mi pangngai tan pawh a hriatthiam theih a ni. Mahse kei khan a ngaihzawng dang ni a ka rinhlelh te kha ka ngaihven zui lem lo, ka buaina tur a nilo in ka hria a ni. Kan inthen a ka duhtawk, mizia te kan han inhriatchian tak deuh hnu kha chuan kawp reng chi niin ka hre ta lo a ni"




Inspector chuan a ngaihtuah uluk kher mai, Chutah a phone chu a han la chhuak a, chutih pah chuan "tete, video kha ilo en ve tawh reng em? a han ti a, tetea chuan "ka pu, security guard chhar kha maw? alo ti thuai a, inspector chuan "aw ni ang chu maw le, kha, a darh ta chiam mai a ni awm a, a zia lo tak tak ani. Khatiang thil kha chu thup bo hram hram zawk tur hi a ni a" a han ti a, tetea chuan "en lo, hetiang lam video viral hi chu a tam thin si a, ka en ngai lem lo a ni. A chhung ten a bo thu an report tih kha ka hria a, police ho in min rawn koh tak avang khan, mahse kei chuan a chin engmah ka hre zui bik silo a tin ni" A han ti leh a.




inspector chuan a phone a video chu han en tirin "kha, han en teh, uluk deuh khan en la, hmuh erawh a hreawm deuh ang, hei ngei hi anih hi heti taka police lam leh mipui lam in he video leh thlalak a thil thleng an ngaihven a police lam pawh an dem rawn tak chiam chiam nachhan ni" a han ti a, tetea chuan uluk tak chuan video chu a han en a, hmuh hreawm a ti ve kher mai. Chutah inspector chuan "uluk deuh khan en rawh" alo ti leh a.




video a en zawh meuh chuan tetea ngei pawh chu mak tihna leh hrilhhaina in a khat tak meuh meuh mai. Hriatthiam loh hmel fe hian "ka pu, kha video kha enge a awmzia? Jessicai tihna em ni?" A han ti a, inspector chuan "imm, tunge anih i hre thei bik meuh na nge? a han ti a, awmze nei zet hian a nui deuh suk bawk.




Chutah inspector vek chuan "video kha i en chiang meuh lo a ni maw? tiin a han en tir leh a, Chutah chang zet hian "tete, uluk deuh in en rawh en, liam mai lo la, a bawp invuah dan, a ke awm dan, a ban leh a taksa landan zawng zawng kha tunge anih i hria em?" Tetea chu a thaw leh hawk thin a, Chutah harsa tih hmel zet hian "imm ka pu, i thusawi awmzia ka man e, he nu hi Jessicai ngei chu anih si hi maw le! A han ti a, chauh hmel zet hian a thaw zui hak hak bawk a.




Inspector chuan "i Chiang a maw? Jessicai kha i ngaihzawng a ni thin a, tin tum engemaw zat a taksa pumrua leh landan hre thei turin in lo chesual ve tawh thin ngei ang, chu chu a dik a ni maw?


"Aw ka pu a dik lawm, kan chesual ve zauh zauh mai, mahse chuti tak in a landan lamah ka rilru ka lo pe ngai hauh lo mai. Mahse Jessicai ngei chu anih duh hmel takzet. A hmai lah kha a intuam phui tlat mai si a, inspector chuan "a kiu a khuavang leh a nghawng a ser te atang hian i Chiang thei a ngem?" a han ti leh hram a, tete a chuan a han en nawn leh vang vang a, "ka pu, amah ngei chu a ni. Kan inkawp rei lutuk lova, a nghawng a ser a awm leh awm loh emaw khuavang a neih leh neih loh emaw ka lo hre ngailo hrim hrim"




Inspector chuan "imm, Jessicai chu lo ni ta se, mipa aw kha tunge anih i hre thei a ngem? I hriat zawng a ni em? Tetea chuan "aih ka pu, Khatiang mipa aw ka hre ngai lo. Ka vawikhat hriatna a ni hial awm e" inspector chuan "awle a tha e, kan la in mamawh leh maithei a, biak pawh theih turin i awm dawn nia" tiin inspector chuan tetea chu a tinsan ve leh ta a.




Office ah chuan rinpuia leh midang pathum te nen chuan inspector remruata thu hla ngaichang in an beng chu an chhi uluk tlang hle a, inspector chuan a nau te hnenah chuan Jessicai Facebook profile chungchang te chu zawt in rinhlelh awm an awm leh awm loh chungchang te, kawnpui police station lama an thuthar hriat ah te chuan han bawhzui tur a awm leh awm loh te a han zawt bawk a.




A naute pawh chuan mi bo mit a hmu tu ni a insawi chu veng thenawm a mi a hming chu ngaihzuala anih thu te, pa valai niin a inkhawm kal tur chuan mi bo nen a an landan in ang tak hmeichhe pakhat chu two wheeler taxi a a Chuang lai a hmuh thu leh dawrah pawh hun rei vak lo a luh kawi thu te sawiin, a hmel that reuh em avang leh a chezia reng mai chu a hmanhmawh hmel em avang chuan alo en duh deuh thu te a sawi a ni awm a, chumi hnu chuan an veng thlanmual lam panna kawngah an tlanliam tak thu leh mahse chumi kawng chuan an veng thenawm a paltlang theih thu a sawi chungchang te chu an han hrilh ve luam a,




inspector chuan uluk zet hian "chu, two wheeler taxi chu emergency thilah a hmang ni ngei in a lang a, tichuan thlanmual panna lamah an kal leh a, chu lam chu thlithlai vat a tul anih chu. Tin, amah phur tu two wheeler taxi khalhtu chu tunge anih kan hriat vat a tul ang" a han ti a, rinpuia pawh chuan a pu thusawi te chu lo chhinchhiah zel in Jessicai Facebook profile an chhui chungchang te chu a han hrilh ve leh bawk a.




Rinpuia chuan "sir" tiin a phone a Facebook profile pakhat chu a han hmuh a, "hei hi Jessicai chu a ni a, hei, a thlalak, ama nu ngeiin min pek a mi hi a ni" Rinpuia vek chuan "sir, han en chiang la, he mi tih loh hi chu Jessicai hian account dang a nei lo a ni ngei ang, he mi account atang a a thil post reng reng mai hi comment section lamah leh like thleng in uluk tak a kan en chian hnuah mi pakhat leh hmeichhe pakhat like tu leh comment ziah tu an awm a,




"an comment dan en in a tlangpuiin a thil post a zir a tawngkam hmang mai erawh an niin a lang, engtin emaw tawngkam kalkhat deuh a han comment deuh chawt ang chi kha a vang viau mai a ni. A thil post hi thil ho lam deuh a nih chuan a comment pawh kha khami zul zuiin tawngkam ho lam takin an comment mai a, tin a dang leh ah thil nuihzatthlak lam a post chuan an comment duhdan pawh a nuihzatthlak lam a ni ve leh mai zel bawk.




"Mahse an ni pahnih hi a post zawng zawng tih theih deuh thaw ah an comment in an like ngei ngei a ni. Tin, amah Jessicai ve thung hi chuan heng amah comments tu leh like tu te thil post ah hian a comment in a like ve khat hle thung a, he ta tang a a lan danah hi chuan Jessicai hian Facebook hi a lut ngai meuh lo niin a lang a, a luh chhunah erawh post a siam thin tihna a ni mai a, chumi anih loh vek pawhin heng a thil post comments leh like fo thin tu hmeichhia leh mipa hi a hmel hriat hlui te niin a mi ngaihpawimawh tak erawh an ni lem lo te pawh a ni maithei bawk"




Inspector chuan "chu zawng rina, a finfiah nghal mai theih ang. eng ang hmel pu an nih? tute nge an hming" alo ti a, rinpuia chuan "sir, kha han en ve mah teh, an landanah mai hi chuan kum uaithla lam an ni tawh niin a lang, pakhat zawk hi chu pathlawi a ni ngei in a lang, a profile kan han chek a, mahse pakhat zawk hmeichhia hi chu pasal nei lai a ni thung, an hming chu rinmawii leh biakthanga te an ni" a han ti a, inspector chuan uluk deuh hian alo en ve a, "imm, an ni pahnih chungchang hi in lo bawhzui leh dawn nia, an chanchin kimchang hriat in lo tum ang" A han ti a.




"Chuan sir, two wheeler taxi neitu chu engtin nge?" rinpuia chuan alo ti leh a, inspector chuan "keiman ka bawhzui ve thung ang" A han ti a, chumi rual chiah chuan a ai a awhsak tak inspector zorama khan remruata chu a rawn call a, inspector chuan phone chu la in "hello" a han ti dam thlap a, lehlam atang chuan "aw keimah zorama, ruata hei in thil chhui lai atan a tangkai tak tur ka hmelhriat pakhat hi ka han hmelhriat tir teh ang che u, a ni hi private investigator a ni a, a rintlak in thil han chhui vel pawh a thiam narawh a nia" a rawn ti a,




inspector in chu thu a han hriat chuan teu zet hian "eng a ni? Private detective I ti e law? A han ti deuh hlar a, lehlam atang chuan "aw private detective ni e, a ni nen hian han inhmelhriat ula ka duh khawp mai, thil han sut kuak mai dan tur hi a hre phian a nia, a phone number ka rawn pe ang che, a hming chu sama a ni a, ilo be ngei ngei dawn nia,




remruata chuan "imm, private detective a lam lam, awle ka lo nghaihven a nge, min ngaihtuah a ka lawm e" a han ti a, lehlam atang chuan nui hak hak chung chuan "enge kan chanchin? hmasawnna a awm em?" a rawn ti leh a, remruata chuan "e khai pu zo, hmanhmawh leh chak taka chet han lak nghal rum rum takah chuan hmasawnna te chu awm teh meuh mai, mahse thil hi a kual thui lo thei lo a, thil kal zel dan tur han chhui dawn chuan a bul kan tan chauh a tih theih ang chu" a han a, lehlam atang chuan "imm, hma lo sawn zel ru, kha a number chu ka rawn thawn a nia, lo be ngei ngei teh khai" tiin an inbiakna chu an titawp ta a.




Rinpuia chuan beiseina nei ru tak chung chuan "sir, eng chungchang nge ni? Alo ti thuai a, inspector chuan a melh ngai chu melh vang vang in "rinpui, private detective hi i hre ngai em? A han ti a, rinpuia chuan "aa sir, chu lam zawng kan ram ang ah hi chuan an la awm meuh lo awm mang e a" alo ti a, inspector chuan "imm, private detective a lam lam, ka beidawng anih ngawt loh chuan" a han ti sap a, Chutah a nau te hnenah chuan "awle rina, liante, faka, tharpui, engpawhnise hma kan lak chhunzawm zel ang, kei in Jessicai phur tu ni ngei a lang two wheeler taxi neitu chu ka lo zawngchhuak a nga, nang ni in ka sawi tak ang khan hma in lo la dawn a nia" tiin thingpui in tur chuan office chu an tinsan ta sap sap hlawm a.




Uluk taka Jessicai Facebook post lo comment ziah thin tu mi pa leh hmeichhia an han chhui zui leh hnu chuan rinpuia chuan a result hrilh turin a pu awmna lam chu a pan leh a.




Inspector in rinpuia alo hmuh chuan Jessica i Facebook post a comment ziah thin tute pahnih hmeichhia leh mipa chungchang chu lo zawtin, tute nge an nih? an hrechiang thei ta em tih alo zawt thuai a, rinpuia pawh chuan "sir, kha mi te pahnih kha an awmna group pakhat ah an mahni mention in ka ko chhuak a, inbox lamah thu ka zawt fiah zui a, a hmeichhe hming kha rinmawii a ni a, a mipa hming kha biakthanga a nih kha, kum naupang zawk zawk tawh lo an ni tih kan hriat kha,




"Sir, an ni chuan post an comment ziah nachhan leh an like ziah nachhan chu a in ang chiah in min chhang a ni. An friend list a mi thil post an hmuh tawh chu like leh comment an pek ziah thin thu min hrilh hmasa te te a, Chutah a hmeichhia zawk rinmawii chuan Jessicai chu a thiannu fanu anih thu a sawi a, a mipa zawk erawh chuan tun hma a veng khat a an awm ho thin thu sawiin tunah erawh hmun dangah a awm tak thu a sawi a ni.




"Kei chuan duhthawh leh zualin thudik an sawi reng em tih te chu ka zawt leh a, an ni chuan thudik an sawi thu an sawi ve tlat mai a ni. Tichuan a chung a thil thleng te chu ka hrilh a, tunah a bo mek thu te ka hrilh a, an ni chuan pawi an tiin zia lo an ti ve hle nghe nghe a ni"




Inspector chuan "awle rina, khaw maw an hming kha, Jessicai nu kha han call teh le" a han ti a, rinpuia chuan Jessicai nu chu a han call nghal thuai a, inspector chuan "hei hi zawt rawh le, he mi te pahnih hi a mi hriat zawng an ni em? Mipa zawk hi an vengah tun hma in a awm thin reng em? Han zawt teh" a han ti a,




rinpuia pawh chuan a pu hrilh ang chuan "aw hello ka pi, police lam atangin, heng mite pahnih hi i hmelhriat an ni em min lo chhang ang che aw, rinmawii veng hlui i hre ngai em? Lehlam tang chuan "aa ka pu, ka hriat hnu ava ang ve, venghlui ah chuan thiannnu ka nei ngei a, an hming pawh chu a in ang a ni"




"Rinpuia chuan "aw le, a chian leh zual zawk nan a thlalak vel kalo thawn ang che, ilo en dawn nia, chuan he pa hi i hre ngai em aw, biakthanga tun hma in vengkhatah in awm thin, tun hnuah erawh hmun dangah an awm tawh thung" a han ti leh a, chutih pah chuan thlalak te chu a han thawn nghal bawk a, lehlam atang chuan "aw hria e, biaka maw? kan in thenawm thin alawm, tunah chuan chhuahtlang ah an awm tawh ang" A rawn ti leh a, chumi rual chiah chuan rinpuia chuan "kha, ka rawn thawn aw an thlalak chu" a han ti a, lehlam tang chuan "aw ka hmu e, aw, an nih ngei hi, an ni hi chu ka hria alawm, rinmawii hi ka thiannu thin a nih hi veng hlui a mi, mipa pawh hi tun hma chuan kan inthenawm thin"


"awle awle, a lawmawm e"




Inspector chuan "rina, eng ang mizia pu nge an nih han zawt teh" alo ti leh hram a, rinpuia pawh chuan a pu lo hrilh ang chuan a han zawt leh a, lehlam tang chuan mize tha pangngai tak an nih thu leh kawm pawh an nawm pangngai viau thu a rawn hrilh leh mai a, chumi pah chuan ngaih thalo tih hriat tak hian "ka pu, an ni chungchang chu enga ti nge? in chhui zui tihna em ni?" A rawn ti deuh ha a, rinpuia chuan,




"aa ka pi, a pawimawh hran lo e, hei fimkhur thu hla ah tiin a facebook lam a comment thin tu te an ni a, kan han hrechiang duh deuh maw le"


"e, anih tak chu a, ni e, mami nen pawh khan an inhria alawm"


"awle kapi, in mamawhna a awm chuan kan inbe leh dawn nia" tiin phone chu a dah ta a.




Inspector chuan rinpuia chu alo en uluk kher mai, rinpuia chu a awmdanah chuan an case buaipui lai chuan a ti beidawng ru in a ti hrilhhai ru takzet tih a lang reng si a. Chutah, inspector chuan rinpuia hnenah chuan "rina, i chau ve deuh niin ka hria, Jessicai Facebook account atang ringawt chuan hriatthiam a har dawn hle mai. Instagram lam atang te pawh in chhui zui chi ani ang a" a han ti a.




"Sir, he lamah hi chuan tihtheih a vang angreng viauin ka hria, engpawhnise hei inspector zorama khan min rawn be leh a, private investigator sama hian thil tihdan tur a hriat ngei a rin thu a rawn sawi leh a, lo ngaipawimawh ngei ngei turin min rawn ti a ni"




Inspector chuan a ngaihtuahna chu a hmang uluk dauh dauh kher mai. "Imm, engpawhnise han in sang phek leh te te ila, kawng chu kan la hmu chho ve zel mai ang. Hei hma kan sawn zel chu anih hi. Tunah rih chuan two wheeler taxi neitu chu kan hriat a ngai a, a ni hnen atang chuan Chiang zawkin hnu kan chhui thei turah in ngai ang. Tin, he mi bo Jessicai hi video a mi ngei kha anih a rinawm ta bawk a, Chuan rina cellphone tibo ni a insawi kha, kha pa kha lo kawm ang che aw, he laiah a rang a rangin han nagihven vat turin hrilh ang che, misual ber hi anih a rinhlelhawm ber a, a cellphone alo ni ngei anih chuan, amaherawhchu misual nisi amah leh amah a rawn inlan ngam mai danah hian thil enge maw chu a awm ang"


"ni e sir, hei ala rawn ngaihven miah lo chu a ni a, ka han be leh chhin a nge" tiin rinpuia chuan a phone chu a chuh nghal thuai a.