THINLUNG KEHCHHIA PHUBA _Chapter-3

[April Hmar Liverpool]

THINLUNG KEHCHHIA PHUBA

Ziaktu, Laltanpuia


Chapter _3




Inspector remruata chuan ngun zet hian cellphone a account hrang hrang a hming te chu a han en a, Google account a mipa hming zamlova tih leh hmeichhe hming lucy tih hming tawp a word dang awm leh chu mak a ti rilru hle mai a, mipa zamlova tih hming tawpah chuan dur tih a awm a, hmeichhe hming tawpah chuan character c tih hi a awm ve thung,




Facebook ah chuan a han lut leh a, account chu pathum alo awm ngei mai. Rinpuia'n a hrilh tak ang in account pangngai ber ni a lang post comment pawh awmna account hming lalrinsiama hming bulah chuan chuan word mal zem tih hi a awm a, bracket chhungah s tih character mal in a awm tel bawk. chu erawh a hnam hming emaw a sap hming emaw anih chu a han ring ve mai bawk a,




account dang pahnih erawh an hming tawpah word in ang ram tih a awm ve ve a, tin a mipa zawk hming lalfakzuala hming ah chuan bracket chhungah hian d tih hi a awm tel a, a hmeichhia zawk ngurlawmi account ah chuan bracket thovin m tih a awm tel ve bawk. Mahsela rinpuia sawi ang ngei in account siamchawp satliah ve mai mai an nih hmel a, tin misual hian hnuchhuitu te a chawhbuai tumna mai mai pawh a ni thei bawk. post a awm lova, profile picture pawh a awm lem lo. Tin post comment tu pahnih chu ramsa hming savawm tih leh sakei tih an ni a, an ni chuan tawng mak tak hian an comment ve ve bawk. An comment na post chu pangpar dum lem niin a background colour chu black and white a ni.




Chumi lai tak chuan a phone chu a rawn ri a, a han en chuan number hlang alo ni. Uluk zet hian a han la a, Chutah lehlam atang chuan aw thum lam leh aw lian lam hian "inspector, two wheeler taxi neitu chu tunge anih ka hre tawh e, i duh chuan kawn pui veng lamah i tek chhuak nghal thei ang, nangmah ngeiin thu han zawhfiah ve pawh i duh maithei a, mahse kei chuan he tualthattu hi tunge anih ka hre thei tep e, amaherawhchu kha cellphone kha ka mamawh dawn a ni. Keimah ngei hian enfiah ve ka duh a ni" A rawn ti a,




inspector chuan mak ti zet hian "tunge i nih?" A han ti a, lehlam atang chuan "inspector, kei hi detective sama ka ni e, inspector zorama khan a hrilh tawh ngei che in ka ring. Hei, he lamah rawn lang phei ve phawt mai rawh, Jessicai nu leh pa te nen pawh hian inbiakna lo nei teh u, he thil, Jessicai bona chungchang leh kha cellphone a video rapthalak tak te khan inzawmna an nei ngei niin a lang a, kan thawh ho theih ngei ka beisei" a rawn ti leh a. Inspector chu a lawm lo ru kher mai. "Imm, takzet chuan" tiin a aw chu a han thian kharh kharh a.




"tichuan, taxi neitu chu i chhuichhuak tihna a niang maw?" Inspector chuan a han ti a, lehlam atang chuan "imm, thil harsa a ni hleinem, kha pa kha thu ka zawt fiah ve leh a, mibo hmu tu ni a in sawi kha, two wheeler a a Chuang lai hmu tu kha, tin dawr neitu te kha ka zawt bawk a, an ni hnenah chuan chu taxi neitu chu an hre ngai em tih te, an vengchhung mi a ni em tih te leh thil dang dang, hmeichhia, Jessicai ni ngei a lang pawh chu an hmuh dan leh a landan te chu ka zawt thlap a ni, an ni dawr neitu te sawi dan leh taxi a a chuang lai hmu tu sawi dan pawh a inrem thlap bawk a ni. chu ta tang chuan ka hre thei ta a ni" Inspector chuan "imm, i ti tha hle mai. Chhui ka lo tum mek a" a han ti a, inspector vek chuan "imm, nang nen pawh chanchinthar zawk nen kan inhmuh thuai ka beisei" tiin an inbiakna chu an titawp ta a.




Inspector chu rinpuia nen chuan detective sam inti in a hrilhna hmun taxi neitu chenna hmunah chuan an kal nghal thuai a.




Taxi neitu chu samuela a ni a, inspector in khami ni a thil thlen dan chu a zawt ta a, samuela chuan inspector hnenah chuan "ka pu, kha mi ni kha Sunday a ni a, inkhawm ka lo tum ve nghe nghe a ni, mahse phone call ka dawng a, emergency thil a hman min rawn dil a, tichuan kei chuan inkhawm ka duh thu ka lo hrilh a, mahse a pawimawh em avang leh a hmanhmawhthlak em avang chuan ka khawngaihna pawh min dil nghe nghe a ni"




Inspector chuan "rawn be tu che chu i mi phurh tak hmeichhia kha a ni ngei ani tih i chiang em?" Alo ti vat a, chu pa chuan "aih ka pu, mipa ani min rawn be hmasa tu kha chu. Mipa Khan hmeichhe tan khan a rawn biak sak a ni" Chuveleh inspector chuan "mipa i ti e law? chu pa chuan a hria che tihna a ni maw? Nang in i hre ngai em?" Alo ti leh vat a, Samuela chuan "aa, ka hriat zawng chu a nilo, amah khan min lo hria pawh chu a ni mah na, mahse engtin nge ka number a neih ngawt chhan ka hre lo a ni"




Uluk zet hian a han inngaihtuah vang vang a chutah "e, ka hre leh si e, kei hian Facebook group velah post ka siam thin a, emergency thil ang ah pawh ka hman theih thu post siam in ka contact number ka dah tel thin, kha ta tang a min hria a ni ngei ang" Inspector chuan "imm, chu a number chu ila nei anga tiraw?" a han ti a, samuela chuan "aw, ka la delete lo ang, kan en chhin a nge" inspector chuan "han en vat teh khai. A number atang chuan kan chhui thei em em ang, tin hmeichhia i phurh tak number pawh chu aw" a han ti a,




Samuela chuan "awle ka pu hei, in la chhawng duh em?" A han ti a, "imm, a pahnih khan rina han copy teh" rinpuia chuan phone number pahnih chu copy in inspector hnenah chuan "sir, Jessicai nu hnenah ka han thawn a nge, a fanu number chu a hre ngei ang" a han ti a.




Jessicai nu hnen atang chuan number chu a fanu number hman lai ngei anih thu an han dawng ve leh ta bawk a, chuveleh inspector "awle ka pi, he mi bo hi in fanu ngei ani tih kan hre ta a, mahse number pakhat zawk, amah kidnap tu ni ngei a lang hi a neitu kan hriatchhuah leh phawt a tul dawn a ni" A han ti leh a, inspector vek chuan "thlamuang takin awm ang che, hlauthawng lo la, i fanu ru bo tu hi i fanu hmelhriat ngei a ni tih a Chiang reng tawh a, mipa a ni a, taxi neitu hnenah hian i fanu hman atan hian a biaksak phawt a ni" tiin thil awmzia chu a han hrilh thlap a,




Chutah inspector bawk chuan "chuan ka pi, uluk deuhin lo ngaihtuah ang che, i fanu rubo duh tur ni a ngaih theih tur i fanu hrechiang tu tu emaw tak chu an awm ngei tur a ni" "Awle pu inspector, ka theihtawp ka lo chhuah ve a nge" tiin an inbiakna chu an titawp ta a, chumi rual chiah chuan inspector chuan taxi neitu hnenah chuan "Samuel, mipa rawn be tu che khan eng ang aw nge a neih? ka sawi awmzia chu a aw a thum lam nge a te lam" a han ti a, samuela chuan "ka pu, kha pa aw kha aw lian lam leh aw thum lam niin ka hria" a han ti a, Chuveleh inspector chuan rang zet hian a phone a video chu a han play nghal vat a, a tir lam chu cut in a tawp lam a mipa aw chu a han ngaihthlak tir a.




samuela chuan ngun zet hian mipa aw chu ngaithla in chutah "ka pu, he pa aw ngei hi a ni" tiin a meng phawk kher mai. Chutah inspector chuan "imm, he video a hmeichhia rapthlak taka sawi sak tak hi Jessicai ngei tih a Chiang zel e, tunah chuan a ruang awmna kan chhui zui leh dawn a ni. Samuel, khatia in han inphur ta kha khawi lai hmunah nge in in drop? tin, Jessicai khan he pa, amah rawn biak sak tu che hi a be lai emaw i hria em? a phone a hmang lai i hre hrim hrim em?"




Samuela chuan "Aw ka pu, kha nula khan phone chu a hmang ngei mai, tichuan heti hian a ti a, nula khan alo nghahna hmun tur chu a han zawt a, lehlam atang khan a rawn hrilh a ni ngei ang, nula khan a hrechiang lo nge ni, huanah maw? tu huan ah? huan i ti ringawt a, ka hre hleinem' a ti a, Chuveleh nula bawk chuan 'awle ka lo kal mek e, hun ka nei vak lo a nia' tiin kal a rawt ta a ni.




"Tichuan, he mi veng, kawn pui thlanmual lam a kawngah kan kal ta a, a kalna hmun tur a sawi khan keiin ka lo hrechiang lo a, kha lai hmun kha a hla ve phian mai. Tichuan aizawl khaw pawn ah daih niin milian ho huan emaw, thlam emaw, lodge awmna hmun emaw, park vel anih ka ring ber a, khaw pawnah, kawngpuiah in lokal zel a nga' a ti ringawt a tiin min hrilh a, keiin beraw tlang vel anih ring in chu lam pan chuan kan inkhalchuak ta a ni.




"Tichuan, ka dahna hmun tur kan va thlen chuan beraw tlang bul lawk niin beraw tlang panna peng bulah kan ding ta a, mahse phone bawk chu a hmang leh a, Chutah chuan nin hmel zet hian nula khan a buaithlak a tih thu te, mipa in a sawina hmun chu hla a tih thu te, a thian te awmna ah inhmuh mai a duh zawk thu te, chumi anih loh pawh in park velah inhmuh mai a awlsam a tih thu te, hmun hnih hmun thum vel lai kha a sawi kual a, mahse kei kha let leh vat ka duh si a, ka kalsan ta ani. A khawiah ber nge an inhmuh tak ang aw' tiin ka nui ru deuh tat tat nghe nghe. An inkhuang rual vak bik lo ni ah ka ngai mai a ni"




Inspector chuan a ngaihtuahna chu a hmang uluk kher mai, chumi lai tak chuan a mobile phone chu a rawn ri thut a, a han en chuan detective sam alo ni a, "aw hello" lehlam atang chuan "inspector, cellphone chu tunah ka mamawh, ka chhui nghal duh a ni" a rawn ti a, inspector chuan "imm sam, nangmah ber a pawh chu hmaichhanah ngei hmuh te pawh i chakawm alawm maw le, hei kan rawn let thei tep e" a han ti a, lehlam atang chuan "inspector, keimah zawk in ka rawn pan zawk mai ang che u, tun a in awmna kawnpui veng a biak in bula bawlhhlawh bawmah khan cellphone chu ilo dah mai dawn nia" tiin phone chu a dah nghal daih mai a.




inspector chu za lo zet hian a han nui hak a, "imm rina, hei cellphone hi biak in bula bawlhhlawh bawmah sawn lo va dah ta che, chuan i nghak deuh dawn nia, khawi laiah emaw biru la, kan detective hi eng ang hmel pu nge anih? Eng ang pianphung nei nge anih tih te pawh hriat ve a chakawm alawm maw le" a han ti a.




Station lam atang chuan inspector chu an rawn bia a, phone tibo tu ni a insawi a hming chu johnnya a ni a, inspector pawh chuan thu lo zawt chiang turin a nau te chu a han ti a, a tihbo ni leh a tihbona hmun te, a phone Gmail account a a indah dan te lo zawtchiang tur a han ti in amah pawh chu a let leh mek thu te a hrilh nghal bawk a.




Rinpuia pawh chuan bawlhhlawh bawmah chuan cellphone chu dah in piah deuha bang phenah chuan biru in detective sama alo thlen hun chu a nghak ran a, hun rei inrial lovin detective ni ngei tur chuan bawlhhlawh bawm awmna lam chu a rawn pan mek lai chu a hmu thuai a. A inthuam dan chu lukhum khum in mask a vuah a, jacket dum ha in kekawr dum a ha bawk a, bawlhhlawh bawm a cellphone chu la in hmanhmawh tak chuan a kal sawn leh nghal thuai a.




Inspector chuan cellphone tibo ni a insawi hnen a thu an zawhfiah chungchang chu a nau te hnenah chuan a han zawt a, a nau te pawh chuan cellphone tibo ni a insawi chu johnnya niin September ni 10 ni ah a cellphone chu a tihbo thu sawi in a tihbo na lai tak a hriat mai bik loh thu a sawi a, mahsela security guard pakhat in cellphone a chharna bul hnaiah chuan a kal ngei thu sawiin mahse chu lai hmunah chuan a cellphone chu a tihbo a rin loh thu leh security guard chhar tak kha chu ama ta anih a rin loh thu erawh a sawi thung.




mahse police te chuan chu pa thusawi dan chu an ngaihven riau mai a, thu pawh an zawt uluk kher mai. Chu lai hmunah chuan a kal ngei a cellphone a tibo lehzel si nen. Security guard in chu lai hmun a cellphone alo chhar tak chu chu pa ta ngei chu anih hmel ta viau mai a ni. Mahse johnnya chuan chu lai hmun, security guard in a chharna hmunah chuan a tibo in a ring tlat lo thung a.




Inspector chuan "chu, millenium centre ah a kal leh a kal loh thu in zawt tihna a niang maw?" A naute zinga pakhat chuan "sir, johnnya hian a cellphone a tihbo thu a rawn thlen khan kha mi ni, September ni 11 ah khan millenium centre ah a kal leh kal loh thu kan lo zawt nghal vat a, a ni chuan a kal thu a sawi tlat mai. Tichuan cellphone kha millenium centre kawt ah security guard in a chhar anih kha September ni 11 ah, tichuan a cellphone chu engvanga rawn ngaihven vat lo nge anih kan lo zawt a, a ni chuan a buai deuh vang anih thu in min chhang a ni. Ka rindan chuan he pa johnnya hi a rinhlelh awm riau in ka hria,




"phone tih bo post kan han siam khan ama ta ngei niin a hria a, mahse a chhung in set up dan erawh a sawi dan nen a in ang lo thung. A zep mai mai pawh a ni thei a ni. Tin, keini phone tihbo post tute kha police kan lo nih takah chuan a hlauthawng anih ka ring,a tirah hlauhthawnna a nei lem lo ani ngei a nga, mahse thil thlen dan, cellphone a video a leak out chiam thu te, police lam in kan chhui zui thu te kha a han hrechiang ve a nga, ama ta anih a rin thu alo insawi laklawh tawh si a, a rawn lang ngam ta lo niin ka hria, mahse keini lam in kan va biak tak ah chuan kan chhui zui mai hlau in a rawn inlan ta ni ah ka ngai"




Inspector chuan "imm, he thil thleng, cellphone security guard in a chhar a, video leh thlak rapthlak tak tak te a lar zui tak chungchang leh police lam pawhin kan chhui mek ani tih chungchang a hi a hriat leh hriat loh thu chu a ngial a nganin in zawt hranpa lem lo hrim hrim tihna a niang maw?"


"Aw sir, kan zawt lem lo, a tihbo ni leh a tihbo lai a a awmna hmun vel kan zawt a, tin millenium centre ah a kal leh kal loh kan zawt bawk a, a ni chu alo kal ngei a, September ni 11 he cellphone chhar ni ah ngei khan, chu thil chuan khang ka han hrilh tak che kha min zeldin tir ta a ni"




Inspector chuan "he pa hian cellphone hi ama ta ngei chu ni se a rawn ngaihven zui duh hauh lovang le, tunah hetia a rawn inlan a a rawn ngaihven zui ta mai hi hriatthiam a har letling hle mai. Amah leh amah a rawn inpe a ni ber awm asin" tiin a bu nghat nghat a, hriatthiam loh a nei tih erawh a hmelah chuan a lang thung.




Inspector bawk chuan "ngawi teh u, nau te u, he pa johnnya hi he misual pa hi a ni tihna maw? A va mak letling zawk ve. Nge ni a in han sawi tak ang khan boruak awmdan hi a tirin engmah a hre lo tihna zawk ni ang. Chuti anih si chuan he cellphone neitu hian ruahmanna leh remruatna nen he cellphone hi kha laiah khan a dah ani thei tawh lo hrim hrim. A tibo tak tak ani ngei ang.




"Tichuan a cellphone a a pawikhawihna video tenawm tak chu a darh ta si a, chu mi pawh chu engmah a hre lo ani phawt a nga, tichuan rinpuia'n cellphone tihbo anih thu post a siam kha alo hmu a, a cellphone tih bo ngei ani tih hria in post siam tu chu a han chhang let thuai a, mahse boruak inlumleh dan vel chu a han hrechiang chho ta a, post siam tu pawh police a ni tih te thleng chuan a han hre chiang ta a, a ngaihven lawk duh ta lo a, a pawikhawihna video darh mek zel avang chuan fimkhur namen lohin a fimkhur tawh ngei ang"




"Tin, he pa jonnya in ti hian a cellphone a tihbo ni hi a sawi em? An pu thusawi lai chu an lo ngaithla uluk dauh dauh hlawm kher mai. Chutah an zinga pakhat chuan "aw sir, a sawi ngei tak kha, ka han en let lawk a nge, aw hei, mahse September ni 10 a ti tlat mai. Cellphone chhar ni kha chu ni 11 a ni si a" inspector chuan "chuti anih chuan ava inmil silo ve, ama tihbo chu alo nilo thei ve tho tihna a nih chu. Amah ngeiin he cellphone chhar hi chu a tihbo ani lo tih a sawi anih si chuan, mahse engatinge post anih khan ama ta ngei ni a a sawi tho si. Imm" tiin inspector chu a inngaihtuah uluk takzet.




An zinga pakhat chuan "sir, police lam kan ni tih leh a video a darh chiam tawh a ni tih a han hriat tak hnu khan a fin kherek a chhuah zui ta mai mai niin a lang, Ni 11 ah chuan a tibo ngei in ka ring tlat, mahse ni 10 a tibo ang in a insawi ta mai zawk tihna a ni mai lo maw? Hriatchhuah mai chu ala duh bik hauh lo tih a lang reng alawm. Phat kual dan tur a zawng tihna anih tak ber chu"




Inspector chuan "tin, a chhung in set up dan a sawi kha kha cellphone chhung awmdan nen khan a in ang lo tlat bawk" A han ti leh a, Chuveleh an zinga pakhat chuan "kha kha chu sir, keini lam hian kan tisual der a ni. A cellphone tihbo in set up dan kan lo zawt kher a ni.


" A ni tualthattu tan kha chuan a thuruk awmna, a cellphone in set up dan kha chu a sawi a sawi chi ziazang a ni mai awm silo a, mahse sir, a Chiang reng in ka hria, a cellphone tihbo ngei a ni tih a han hriat khan a chhar tu ten a chhung an chek sak a ring lo te pawh a ni ve thei a, a han ngaihven ngam danah hian, mahse keini police kan lo ni si a, tin he pa hian password a dah lo tih hi a tir ah khan a theihnghilh vang te pawh a ni ve thei tho bawk,




"police in an duhtawk in a cellphone chu an check sak vek tawh tih a han hrethiam chho ta zel a, imm a Chiang reng tawh mai alawm. He pa hian phat kual dan a dap mai mai a ni. He pa hi a tlanbo hma ngei a kan man vat a ngai a ni sir" inspector chuan a naute chu han en kual dan dan in a nau te hmel ah leh awmdanah reng mai pawh chuan misual chu man an chak et et tawh a ni tih a lang reng si a.




Inspector chuan uluk taka a ngaihtuahna hmangin heti hian a han ti a, "ngawi rih phawt ang u, Johny-a hi tu emaw in a enthlak deuh rih a tul dawn a ni. A mimal nun leh midang nen a an inlaichinna, tin Jessicai nen inlaichinna an nei reng em tih te, a bik taka chhui zui tu tur an awm a tul a ni, kan detective sama khan chhui zui se a tha ang" Tiin a phone chu a han chuh nghal vat a.




"Hello Sam, hmuh lawk che ka duh hle mai" Lehlam atang chuan "inspector, ka buai viau asin, hei cellphone kha ka belchiang mek a ni. Thil hmuhchhuah thar pawh ka nei nual mai. Mahse, hmanhmawh vut vut theih erawh a nilo" inspector chuan "imm, a va tha ve chu, mahse thu pawimawh lutuk hrilh che ka duh a, misual pa chu kan hnaih viau tawhin kan inhria a ni, evidence chiah kan mamawh tawh, i puihna kan mamawh a ni" lehlam atang chuan "e khai aw, a va ropui awm ve, chu tunge anih a?" Inspector chuan "Sam, chuvang tak reng chu a ni biak che ka duh ni"




Detective sama chu a han ngawi deuh ren rawn a, Chutah a aw chu han thian kharh kharh in "ngawi teh inspector, ziak in emaw message hmangin i thu min hrilh duh chu min rawn thawn mai rawh" A ti ta tlat mai a. Inspector chuan teu zet hian "Nilove detective, a pawimawh takzet asin. Mi sual ni ngei a ngaih leh cellphone neitu ni ngei a ngaih a awm a, chumi chhui zui tur chuan nang ni ang detective tih atan a pawimawh takzet a ni. Evidence kan la mamawh, chu zawng chu a ni tawh mai"




Detective chu a han ngawi leh vang vang a, chutah a aw chu han thian hrâwk hrawk in "awle inspector, ka theih tawp ka chhuah ang. Chu pa chu tunge anih, a hming leh a awmna min hrilh ta che" inspector remruata chuan detective aw chhang deuh ruai chu hria in "Hui ham, i nuam Sam meuh lo a niang maw? awle awle, ka han sawi a nge, lo chhiah rawh, a hming chu johnnya a ni e" tiin johnnya address kimchang leh a mobile phone number te chu a thawn nghal thuai a.




Inspector remruata leh a nau te chuan taxi khalh tu in a hrilh tak ang khan Jessicai bo ni a a kalna chin ni a han ngaihbel theih tur beraw tlang lam ah te, khaw pawn lam a park ah te, tin mi lian ho huan awm hnai vai a an thlam te chu an theih ang tawk chuan an dap ve mek zel a, mahse thil hmuhchhuah emaw hnuchhuina atan a tangkai tur engmah hriatchhuah erawh an nei lem lo ni tur a ni.




Video a hmeichhia nghaisak anihna hmunhma nen a han ngaihbel theih tur hmun te, khaw pawn lam a hmun hrang hrang te chu an dap kual dap mai, tin mi thahnem tak chu Jessicai ni tura ngaih theih tur hmeichhia an hmuh leh hmuh loh thu te, mipa nen emaw a an hmuh leh hmuh loh te zawt in Jessicai hnu chu an chhui zel a, mahsela amah ni tur a han ngaihbel theih tur tumah in an hmuh loh thu an hrilh zel si, hmun hrang hrang an dapna ah rûang emaw, Jessicai nen a inkaihhnawih thil engmah an hmuchhuak zo silo a, chu mi lamah chuan an bei chu a dawng ru viau tawh a ni, cellphone tibo ni a insawi johnnya kha an beiseina neih chhun a ni deuh tawh mai. Mahse mi luhlul leh beidawng tha duh hauh lo inspector remruata erawh ala phur dawn chauh emaw tih mai tur hi a ni a.




An chhuizuina atang a a landan ni ta chu hmeichhe pakhat, September ni 6 atang a mibo ni a report, Jessica vanlalhriatpuii chu September ni 11 a security guard pakhat in millenium centre kawt a cellphone a chhar a nunrawng tak leh tenawm taka nghaisak na video leh thlalak a mi chu ni ngei in a lang ta a, Jessicai nu ngeiin video a mi chu a kiu leh nghawng a khuavang leh ser awm avang chuan a fanu ngei niin a hria a ni.




tin, taxi khalh thin Samuela sawi dan in a hmeichhe phurh chu mi bo ta Jessicai ngei niin a lang bawk a, Jessicai tan chuan mipa pakhat in taxi chu a biak sak a, mipa aw chu video a mi mipa aw nen a in ang hle bawk. Chu thil chuan Jessicai chu bumna hmang a kidnap niin rapthlak tak leh tenawm taka nghaisak ani ta a, a video siam sak a ni a, thah zui ani ta tih a ti lang chiang ta hle a ni, a tuar tu victim chu tunge anih tih police te chuan an hrechhuak ta a. Mahse chuti anih laiin misual chu tunge anih ve tak ang?




Misual ni a rinhlelh theih tur in Jessicai nen a inlaichinna nei a thian te leh a ngaihzawng te thu zawhfiah an ni a, mahse han rinhlelh zui tur an awm silo, tichuan cellphone neitu ni a insawi mi pakhat a rawn lang hlawl a, chu pa chuan tualthattu a ni tih chu a rawn inpuang ta tihna a ni thei mai a ngem? Nge ni a, he pa johnnya vanduaina hi a kaltluang rih mai ni zawk ang? A cellphone tihbo leh police te chhui zui mek cellphone chu alo in ang hlauh mai si a, Amaherawhchu hemi chungchang bikah hian thil Chiang tak ala awm lova, johnnya hi rinhlelh loh theih loh chu a ni ta ngei mai, mahse pawikhawihtu ngei ani tih finfiahna tur leh ama aw ka ngei a a inpuanna a awm hma chu he misual manchhuak tur hian police te chuan hun an la mamawh ni ngei in a lang ta a ni.




Inspector chu a inngaihtuah uluk hle mai a, detective sama chuan johnnya tu chiah nge anih tih chu a hriatchian theih vat a ring a, he detective hi inspector zorama sawi ang khan a hmantlak viau dawn niin a lang, taxi neitu pawh kha a hrechhuak mai a, amah inspector a chet hma hauhin alo hre fel der tawh anih kha,




tin, chu cellphone chungchang ah chuan detective in thil hriatchhuah emaw kawng a awlsam dan tur a hmuchhuak lehzel anih phei chuan thu lawmawm tak a ni ngei ang. Mahse an ni police lam pawhin video chauh nilo, chu cellphone chu uluk tak in an zirchiang ve tawh anih kha, mahse inspector chuan mak tih deuh pakhat a nei a, cellphone a gmail account a hming pahnih, an hming tawp lam a word zem tih leh character c tih awm te kha a mak danglam riauin a hria ani, kha khan awmzia a nei thei a ngem?




Tin, facebook a account lem te khan chhuizui theihna tur in awmzia a nei a ngem? Mahse, detective sam khan a han enfiah ve leh ta kha ani a, amah sama ngei pawh khan thil hmuhchhuah thar nei ni khan a insawi a, eng tak chu ni ang maw? a lehlamah chuan inspector chuan detective chu a tangkai puiin viau in a ring, mahse inhmuh a duh hauh lo mai leh a chet dan vel te chu inspector chuan mak erawh a ti ru viau thung a. Tin a aw ki danglam a, a aw chhang ta tuau mawlh mai chuan a ngaihtuahna a ti thui ru viau bawk a ni.




Hun a liam a, security guard in cellphone a chhar ni atang a chawlh kar hnih dawn a liam leh hnu chuan police lam pawh chuan chanchinthar hriat tur neuh neuh an nei ve zel a, amaherawhchu misual chhui zuina atan leh jessicai rûang awmna han hriat theihna atan chuan a bei tham hlawm viau mai.




Chutiang anih mek lai chuan Detective sama erawh a phurin a helhhawlh tawh hle mai a, a cellphone chhui zuina atang a a thil hriatchhuah leh cellphone nei tu ni a insawi johnnya a chhui zuina atang a a thil hmuhchhuah te chu uluk taka han rem khawm in misual a hriat tawh thu hrilh tur chuan inspector remruata chu a han be ta a.




Inspector remruata pawh chuan taxi neitu in a pek tak Jessicai kidnap tu ni ngei a lang mipa khat number chu chhui Chiang tur chuan technical lam chu number chu a thawn ta a, information technology expert ten chu sim card chu Chiang zawk a an lo chhui zui hnuah chuan eng eng emaw chu hriatthar tur a awm ngeiin a ring a ni. Chumi anih rual chuan misual chu man mai erawh ala hla deuh in a hre thung a.




A phone lo ri chu han en in detective sam alo ni, "aw hello" lehlam atang chuan "inspector, tualthattu chu ka hre thei tawh e, lalrinsiama kum 33 zemabawk a cheng, lalfakzuala ramhlun South leh ngurlawmi ramhlun South te fapa house number c/23 a ni e"




Inspector chu mak ti zet hian a meng zau kawk a, "eng, engtin maw? Tualthattu maw?


Lehlam atang chuan "aw inspector, cellphone a facebook account zing a pakhat lalrinsiama inti kha, kha pa ngei kha misual chu a ni e, inspector, kha pa, cellphone neitu ni a insawi chhui zui tura min tih tak johnny kha"


Inspector chuan "aw, engtin?"


"kha pa kha chu tualthattu a nilo, he tualthahna hre tu leh a ruk thei ang ber a police te hnen a misual leh tualthattu chu min hriattir tu anih kha. A cellphone hmang khan tunge tualthattu chu tih leh misual chu tunge anih tih min hrilh a ni. Johnnya kha misual nilovin tualthattu min hrilh tu a ni tihna anih chu"




Inspector chuan han sawi mai tur chu a haihchham ve lek lek thei hial mai. "Ngawi teh detective, engtin nge chu chu i sawi mai theih? Detective sam chuan "inspector, zirna lamah hian BA ka pass awrh chauh a, Nimahsela ka naupan tet atang in hnuchhuina lam hi ka tuipui em em thin a, criminology ah bachelor degree la in private detective ni tur a course ngai zawng zawng chu ka hlen ve a ni,




"India ram a private investigator agency hmingthang tak trace point private limited a investigator ni lai ka ni. Ka nihna hi thup ka duh a, ka experience neih leh ka license neih hi ka inrintawkna a ni mai awm e, he lamah, ka chhung te nen hun hmang tur a ka rawn haw lai tak alo ni nen, he case nen hian kan in nang fuh em mai a, ka ram tan thil tha ka tih ve theihna turah ka ngai mai a ni e, tin misual chu in man nghal vat anih loh chuan tlan bo a tum mek ani ngei ang, in nang hman lo hlauh dah a nge. Phai lamah zin tur in a in ruahman mek a ni"




Thawm chu a reh vawng vawng a, Chutah inspector chuan "aw le, awle, ka nau te ka han hriattir nghal a nge, misual man tur chuan kan thawk chhuak nghal

vat a nge, chuan nang ve thung le, min rawn tâwiâwm ve dawn tihna em ni?" Lehlam atang chuan "kei chu he laiah ka awm sa reng tawh alawm" A rawn ti leh a.