THINLUNG KEHCHHIA PHUBA _Chapter-4

[April Hmar Liverpool]

THINLUNG KEHCHHIA PHUBA

Ziaktu, Laltanpuia


Chapter _4




Police siren ri chu lengpui airport panna kawngpui zau takah chuan a hma a mi car dum um chuan a ri ruai ruai reng a, police ho chuan hmanhmawh tak in lalrinsiama kum 33 mi Jessica vanlalhriatpuii thattu ni ngei a an ngaih imphal a zin tura airport pan mek tu chu tlan pel thuai in motor chu an tiding nghal thuai a, a revolver nena car dum lam chu pan in si ramnghaka chuan heti hian a han ti a, "lalrinsiam, motor atang khan i ban phar in rawn chhuak nghal rawh"




motor chhung a mi tualthattu ni a ngaih rinsiama chu hrilhhai fe chung leh a ngaihna hriat loh hmel fe hian a chuanna car atang chuan a ban phar in a rawn Kun chhuak da da a, Chuveleh si ramnghaka chuan rinsiama chu a pistol a tin ran chung chuan a pan hnai nghal thuai a, rinsiama chu a hnung khirh in "buaina siam tum hauh Suh ang che" tiin kawl chu a bun tir nghal a, Chuveleh car atang chuan rinsiama pa ni ngei tur chu rawn chhuak in a hrilhhai hmel kher mai.




"Ka pu, enge ni ta ngai? Kei hi a pa ka ni e, eng thil nge ni ta ngai? ka fapa hian eng thil nge a tih? A mangang in a ngaihna a hre lo tak zet, si ramnghaka chuan "ka pu, i fapa hi Jessica vanlalhriatpuii kawn pui veng a mi kidnap a a thah zui avangin man a ni" Chu pa chuan mangang zet hian "nilo, a ni thei lo. Ka va hrethiam lo em! mama hi a ni thei lo. Sir, thil hriatsual a awm a ni. Ka fapa hi misual a nilo asin"


"Ngawi teh pu a, chu zawng he laiah engmah sawi buai a ngai lo, nakin ah ila sawi zawk dawn nia, tunah chuan i fapa hi kan lak a ngai a ni" tiin rinsiama chu motor ah chuan an nem lut nghal rawk rawk a, Chutah hmanhmawh tak leh hlawhthling in ti tak chung chuan ramnghaka leh a nau te chuan station lam chu an pan leh nghal thuai a.




Detective sam chu a hmel leh landan a han hmuhchian ve tak meuhah chuan inspector ruata chuan alo beisei ruk ang ngeiin pa lian lam leh vun ngo suah mai, a dar chu a hlai tha phek phawk viau, a sam chu a buang thang a, thahrui a ngah hmel in pa rorum tak a ni ngei ang. A tawngkam a dam thluam a, nimahsela a tawngkam erawh tawngkam bung deuh nghut nghut mai leh mahni tawk a thu duh ve tak erawh a ni ngei ang.




Inspector chuan detective thusawi lai chu uluk fe hian a ngaithla dauh dauh reng a, "inspector, zorama kut a he case hi dah anih khan ka lo ngaihven ru ve viau mai a, mahse nangma kutah zawk dah a han ni leh ta a, mahse he thil thleng hi a ngaihven awm riau a, a danglam in mipui in an bengkhawn zawng tak ani tih ka hria, tichuan inspector zorama kha ka be ta anih kha"




Cellphone ka chhui hma khan mibo report a awm hnaivai em tih ka ngaichang a, mibo chu an lo awm ngei a ni. Chung zing a hmeichhia pahnih chu hmuh an la nih loh avang in an chanchin chu ka chhui zui a, mahse inspector zorama khan nang leh i nau ten in hmalakna min hrilh tak avang in nang ni puih che u kha ka duh ta a ni. Keima hnuchhuina ang a lantir ka duh lo a, nang ni hma lo lak tawhna zul zuiin chet ka la a ni, tichuan cellphone chu ka mamawh a ni tih ka hria, mahse chumi hma chuan mibo record atang khan mit a hmu tu an awm thu te ka lo hria a, ka bawhzui nghal vat a, two wheeler taxi neitu chu ka zawngchhuak ta vat a ni. Tichuan ka rawn hrilh nghe nghe che kha"




Inspector remruata chuan uluk fe hian "chuan detective, cellphone atang a misual hi chhuichhuak i nih si chuan cellphone i chhui dan chu min han hrilh teh, keini lam pawh khan kan theihtawp chuan cellphone kha kan chhui ve a, mahse sim card a awm lova a chhung in set up dan lah hriatthiam a har viau"




Detective sam chuan "imm, cellphone ah khan thil hmuhchhuah ka neih ngei ka inring tlat a, tin alo pawimawh reng bawk a, cellphone a gmail account a hming tawp lamah khan pakhat zawk, mipa hming tawpah khan word mal dur tih a awm anih kha, hmeichhia erawh word niloin character c tih a awm thung anih kha. kha thil kha thil pawimawh tak a ni. A awmzia hriat tum in chumi chu a ni thei a ngem tih ka ngaihtuah kual nasa viau mai.




"Chutah ngaihdan ka siam ta a, chu cellphone a gmail account a hming pahnih chu tute nge an nih tih Facebook ah chuan chumi hming ang chu ka zawng ta a, an lo awm nual mai, ka search na atang a lo lang zawng zawng chu ka inbox vek a, thil pawimawh a nih thu hrilh in an awmna veng ka zawt theuh bawk, tichuan an zavai chuan min chhang let hauh lo, mahse min chhang let tu te zing ah mipa zawk hming zamlova kha ka han belchiang a, a awmna hmun a sawi chu Durtlang leitan a ni.




"Kha, han en let ve mah teh inspector, gmail account a mipa hming zawk kha zamlova tih anih kha, a hming tawpah khan word pakhat dur tih a awm bawk a nih kha, kan inbiakna atangin Durtlang leitan a awm anih thu a sawi anih chu aw, chuti anih chuan he account a hming tawp a dur tih awm hi Durtlang sawina a ni tih kan hre ta a ni. Tin, he pa hi hman ni a cellphone tibo ni a insawi johnnya kha alo ni reng bawk. Johnnya tih kha chu a sap hming mai a ni, chhui zui turin nang niin min ti a, chu ta tang a johnny zamlova a ni tih hre ta chu ka ni, tin zamlova tih hi cellphone gmail account a mipa zawk hming kha alo ni chiah reng bawk a.




"Tun hnaiah thil tihbo a neih leh neih loh te ka han zawt bawk a, ani chuan cellphone a tih bo thu min hrilh nghe nghe a ni. Nang ni lam in cellphone bo a thlalak nen a in post chu lo hmu in ama tihbo anih thu te a rawn sawi anih kha, nang ni lam chuan in ringhlel zui ta a, keimah chu chhui zui turin min ti ta nghe nghe a, tichuan johnny zamlova hi cellphone neitu ber leh cellphone set up tu hi a ni tih ka hmuchhuak ta anih chu,




"a search list ah khan misual hriatchhuah theihna chungchang leh manchhuah anih theihna lam hawi a zawnna a awm a, kha kha chuan heng zawng zawng ruahman tu hi amah hi ani tih a lantir duh vang mai a ni. a ni hian hriatthiam theih turin misual zawnchhuah dan chu he cellphone ah hian a remkhawm ta a. Tin Misual hi a mi hriatchian tak ani tih a lang reng a, a thil tihsual chu heti zawng hian a puanzar sak ta a ni. Video te pawh a nei thei a ni si a, Tichuan a set up dan chu han chhui leh dawn teh ang.




"Facebook account pathum zingah khan pakhat kha post te pawh a awm ve anih kha, a dang pahnih erawh kha chu post an nei lo va a hming lek a siam ve mai mai an ni. Khang account pathum zing a a pangngai ve deuh ber ni a lang kha ka han chhui zui a, a post comment tute pahnih chu mihring hming an nilova, savawm tih leh sakei tih te an ni, awmzia a awm lem lo ni a a lanna phenah chu thil chuan tharum lam emaw a entir a ni.




"Tin, a thil post kha pangpar dum a ni a, a background pawh black and white anih kha, chu chuan lungngaihna emaw thil thalo lam a entir niin a ngaih theih, Tin, an comment dan mawlh mai kha enge a awmzia han en chiang teh inspector, rache tih thumal hi enge a awmzia i hria em?




Inspector chuan "imm, heng hi chu rinpuia khan min hrilh hnu vek a ni, keini pawh khan heng account a hming te hi Jessicai pasal hlui hming nen in ang a awm em? a bialpa hlui hming nen in ang a awm em? tih te, post te leh comment te hian awmzia a nei em tih te kha kan en ve bawk alawm"




detective chuan "mahse enge a awmzia in hre silo a" alo ti vat a, inspector chuan "imm, a awmzia chu kan hre mai lo, mahse mak erawh tih deuh ka nei, nichin a i sawi tak he cellphone a account awm ho an hming tawp lam a word mal awm vek mai hi mak ka ti rilru hle, mahse chhui nawn leh turin ka indaih lo a ni, kawng hrang hrang atang a hmalak kawp vek a tul si a, nang i rawn lang kha ka tangkai pui viau che pawh khan ka ring nghe nghe asin"




Detective chu lawm tih hriat tak a han nui sak in "awle ka sawi zel dawn alawm inspector, uluk deuh in lo ngaithla rawh, kha comment thumal kha kei ngei pawhin enge a awmzia ka hre hauh lo, mahse Google lamah ka han zawng ta a, English a revenge tihna mai alo ni. German tawng anih kha, kan tawng chuan phuba tihna anih chu. Tichuan Facebook account dang pahnih chu ka han belchiang leh a, an hming tawpah chuan word in ang ram tih a awm ve ve ta bik a ni.




"GMail account a mi te kha chu an hming tawp a word awm kha dur tih leh pakhat zawkah character c tih anih daih kha, Facebook account pathum zing a pahnih hi ram ve ve an ni a, a dang pakhat chu zem tih a ni thung, mahse Gmail account ang lo takin Facebook account a hming te erawh hi chuan heng word mal bulah hian bracket in character mal a in kualkhung hrang leh zel a, Gmail account nen chuan a dang bik ta tlat mai a ni"




"Tichuan le, Facebook account a a pangngai ber ni a lang, a hming lalrinsiama kha ka phone atang in a hming ang chu ka zawng leh ta a, chung te chu inbox atang vek chuan an awmna veng hming ka zawt leh vek bawk, tichuan a hming tawp a zem awm kha zemabawk a ni tih an zing a pakhat zemabawk a awm ni a insawi atang chuan ka hre leh ta ani.




"Lalrinsiama zemabawk chu a profile ka chek a, tin account dang pahnih pawh kha an hming ang chiah in Facebook ah ka zawng leh a, mahse rinsiama post comment tu te zingah chuan account dang pahnih ka zawn lai mek te khan an comment na ka hmu fuh ta tlat mai. Facebook account dang pahnih kha han en la, mipa leh hmeichhia lalfakzuala leh ngurlawmi te an nih kha, a awmzia ni ta chu cellphone chhar a mi account zawng zawng hi a lem vek an ni a, a tak a anmahni account a an hming indah dan ang a kha cellphone a awmze nei taka remkhawm mai kha an ni tihna anih tak ber chu.




"tichuan fakzuala leh ngurlawmi chuan lalrinsiama post an lo comment dan atang te, a birthday an wish na a an tawngkam hman atang te chuan rinsiama chu an fapa ani tih ka hre thei ta a ni. Tin, an hming tawp a bracket chhung a m leh d awm kha enge a awmzia tih kan hre leh ta chiah bawk, d kha daddy tihna a ni a, m kha mom tihna mai a nih kha, tin s kha son tihna aw, mahse bracket chhunga mi nilo word awm kha ram ve ve an ni thung, ram tih hmang a veng hming bul intannna chu ka chhui a, a tam viau mai, mahse ramhlun tihna a ni tih ka hriat theihna nachhan chu an post leh comment vel atangin a ni ta ani.




"Mahse, an fapa chu zemabawk ah a awm a ni ngei ang. A ni kha chu zem tih anih bik kha, Tichuan Facebook account pathum te chu nu leh pa leh an fapa fakzuala ramhlun South, ngurlawmi ramhlun South leh rinsiama zemabawk a awm mek te an lo ni reng tihna anih chu.




"Tichuan rinsiama chu a post comment na a German thumal rache tih awm avang a mi sual pa ber ni a rinna ka nei ta a, rache tih chu phuba tihna ka tih kha, he cellphone a thil awm te hian inzawmna awmze nei tak nei vek in thudik chu min kawhhmuh a ni. Amaherawhchu a nu leh pa te hian an fapa pawikhawihna chungchang hi an hriat pui em tih erawh ka la hre bik lo"




Inspector chuan "chuan, Gmail account ve thung kha" alo ti a, detective chuan "imm, kha pawh kha ka sawi tak ang khan mipa zawk hming kha zamlova niin a awmna pawh a hming tawp a word mal dur tih awm khan Durtlang ani tih a lantir ka tih kha, tin a ni kha chu heng zawng zawng cellphone set up tu a nih avang in thudik hre ru tu a ni a, a awmzia chu a duh thal a misual hriatchhuah theihna tura cellphone a set up hnuah kha lai, millenium centre kawtah khan he cellphone hi a dah ta a, misualpa pa chetna rapthlak tak leh tenawm tak chu kan hriat phah ta anih hi.




"Mahse, hmeichhia zawk hming kha Facebook ah bawk ka han zawng ve leh a, hming in ang pawh an tam khawp mai, a mal te te in an thil post leh comment vel atang in tunge an nih hriat tum in ka chhui hlawm a, inbox ah bawk ka be hlawm a ni, mahse min chhang let tu te zingah hian an awmna veng hming bula c tih intanna hi an awm tlat lo, kha zawng he misual pa rinsiama hi kan zawt tawh mai a niang chu, emaw johny zamlova, he cellphone neitu hian a hre ngei ang. A hming tawp ah hian word a awm ve lova, character c tih ringawt a awm bik a, hei erawh hriatchhuah thuai ala ni ang, a hming hi Lucy tih ringawt a ni a, c tih awmzia chu hriat ka lo tum leh dawn nia"




Inspector chuan "chu zawng, a awmna hmun hre tur chuan Johny zamlova ngei chu a pawimawh ang, a chhan chu Facebook account pathum te hi inzawmna nei vek an lo ni a, chutiang bawkin Gmail account a hming pahnih pawh hi inzawmna nei an ni tihna a ni mai, johnny zamlova hian hmeichhia Lucy hi a hre ngei ngei ang" alo ti thuai a, inspector vek chuan "mahse sam, i thil chhui chhuah te chu alo ni reng em tih a finfiahna lam hi a la beitham deuh lo maw aw" a han ti a,




detective chuan "inspector hei, Facebook account pathum te chu nu leh pa leh an fapa te an lo ni reng tih chu kan hriat hi maw, tin an awmna hmun te nen lam a dik thlap vek anih hi maw"


inspector chuan uluk fe a ngaihtuah chung chuan "anih si chuan zamlova chu keimah ngei hian thu zawhfiah ka duh kher mai, he hmeichhe hming kan la hriat loh lucy chungchang pawh hi alo hre mial maithei a" chumi pah chuan "detective, amah johnnya chu han call teh" a han ti a,




Zamlova chu police station lamah an ko nghal thuai a, inspector chuan thu zawhfiah a duh vang a ni.




Inspector remruata leh detective in thil awmzia an hriat vek tawh thu leh misual pawh an kawl tawh thu an han hrilh tak vek ah chuan cellphone tibo ang a insawi johnny zamlova chuan mak ti tak chung leh hrilhhai tak chung chuan "sir, in thil sawi chu a awmzia ka man phak ve hauh lo mai" A han ti a,




inspector chuan "johnny, zamlova tih hi i mizo hming a ni si a, ka sawi tak ang khan nang hian misual chu tunge anih? a nu leh pa pawh i hre vek a, a thil tihsualna video pawh i nei a, tichuan nang chuan ruahmanna i siam ta a, cellphone chu sim card la in Gmail account pahnih i siam ta a, pakhat chu nangmah i ni, i awmna veng kan hriat theih nan hming tawpah dur tih i dah a, Mahse cellphone tibo ang a kan hnena i insawi kha chuan i sap hming zawk johnny tiin i insawi thung a, thudik a ni em? GMail account ah hi chuan i mizo hming zawk zamlova tiin i dah thung"




Johnnya chu a ngawi vang vang a, Chutah hriatthiam loh hmel tak chung chuan "sir, chutiang thil ka ti lo hrim hrim" a han ti a, inspector chuan "imm, ka sawi zel ang, tichuan Gmail account pakhat zawk chu lucy tih ringawt a ni thung, he nu hi i hre ngei tur a ni" Johny-a chuan a han ngaihtuah vang vang a, Chutah "imm sir, a hming chu ka cousin hming ang chiah chiah a ni" A han ti a, Chuveleh inspector chuan "imm sam, kan rindan chiah a ni, Gmail account pahnih te hi in chhungkhat an nih ngei kha ka ring reng a ni. Facebook account pathum te kha nu leh pa leh fapa an ni kha"




chuveleh detective chuan "tichuan a hming tawp a character mal c tih awm kha cousin tihna alo ni maw?" alo ti vat a, Chuveleh johnnya chu a meng phar awn awn mai. "Sir" a han ti ringawt a, inspector chuan "tichuan i cousin alo ni reng a, a ni chu he thilah hian inhnamhnawihna a nei ve i tihna nge nangmah puitu che tihna? A han ti leh a, johnnya chu a hmel ah chuan lungngaihna leh lungchhiatna a hmuh theih a, Chutah pawi tih hmel zet hian,




"sir, lucy kha thla hnih liam ta atang khan a bo daih alawm, tun thlengin a chin kan la hre lo. Mahse a nu leh pa te chuan phai lamah awm ang in an ngai thung" Chuveleh hmanhmawh fe hian inspector chuan a file chu a han keu nghal vat a, Chutah teu zet hian "he nu hi a ni maw?" Tiin hman ni mai a mibo report zing a hmeichhe pakhat zawk lucy remsangpuii ngei kha alo ni reng mai a, Chuveleh inspector bawk chuan "kha nu, hmeichhia pakhat Jessicai nilo zawk kha alo ni reng tihna a ni maw? ka hriat tawh hnu ang ka ti reng a ni" A han ti a,




johnnya chuan "aw sir, an mahni hi kawnpui ah sawn an awm a, kei ni hi chu Durtlang ah kan awm a ni"




"Imm, hei kawn pui police station a mibo report te hi mi pahnih an ni a, pakhat hi Jessica vanlalhriatpuii a ni a, pakhat dang leh hi he Gmail account a hmeichhe hming tunge anih kan hriat loh luly remsangpuii ngei hi alo ni tihna a nih chu"




Thawm chu a reh diak reng a, Chutah detective chuan "johnny, i cousin bona ah hian han ringhlelh emaw te in nei em?" A lo ti vat a, johnnya chuan a hmel a mak tihna leh hrilhhaina langchhuak chung chuan "chu tak chu mak ka ti reng a ni. Sir, kan farnu bona chungchangah hian mi pakhat, a ngaihzawng lo ni ve tawh thin rinhlelh kan nei ngei mai, mahse han rinhlelh zui zelna tur kan hmuh loh avang in kan ringlel zui duh ta lo a ni a, hming chu lalrinsiama a ni a, tun a tualthattu ni a in ngaih tak, a nu leh pa pawh lalfakzuala leh ngurlawmi te ramhlun South a mi ngei hi a ni".




Thawm chu a reh leh thiap a, Chutah inspector chuan "imm, Jessicai that tu rinsiama hi Lucy remsangpuii bona chungchangah pawh in lo ringhlel tawh thin tihna a niang maw?"


"Aw sir ni e, kei ngei pawh hian mak ka tiin rinsiama hi Jessicai that tu hi alo ni tak tak anih chuan ka cousin bona chungchangah pawh khan kan lo rinhlel kha kan lo tisual lo tawp tihna a ni ngei ang, thudik a puang ngei tur a ni, amah ngei hi ka ringhlel thar leh ta riau mai"




Detective chuan "mm, chuti anih si chuan he cellphone awmze nei tak a set up a kha lai millenium centre kawt a dah tu kha nangmah ngei hi i ni tihna a ni mai alawm" alo ti leh a, johnnya chuan "sir, chu chu a ni ka hriatthiam loh chu. Keima thil tih a ni lo, mahse ka tih ngei chu a awm ang ve viau bawk si a"




detective chuan "nang hian i cousin bona chungchangah rinhlelh i nei a, tichuan i chhui ru ta tihna a ni mai alawm, a ni chuan mi pakhat mai alo duhtawk hauh lova, Jessica vanlalhriatpuii chu i farnu a tihdan ang chiah in a kidnap leh a, video rapthlak tak a siam ta a, a video te chu nei thei turin nang hian i chhui zui hle tihna a ni mai, chumi anih loh pawhin he tualthahna ah hian ilo inhnamhnawih ve reng tihna a ni mai, tin awmze nei takin mi hriat theih tur leh police zawnchhuah turin cellphone awmze nei tak a remkhawm chungin rem i ruat ta a, cellphone hmang chuan nang chuan he thil hi min hrilh ta a ni.




"Gmail account pahnih atang in cellphone neitu leh he thil ruahman tu chu nangmah i ni tih i mizo hming atangin i lan tir a, i awmna veng Durtlang a ni tih hriatthiam theih turin i dah tel bawk a, tichuan i cousin bo ta chungchang chu zep tel i duh avang in account pakhat zawkah i cousin hming chu lucy tih ringawt in i dah a, a tawp ah c i dah tel avangin i cousin tihna a ni ta a,




"Facebook lamah misual i chhui ruk thin chu a hming leh a nu leh a pa hming an awmna veng leh an inlaichinna s chuan son tih te, m chuan mom tih te, d chuan dad tih te chu i dah tel bawk a, tin post comment chu German tawng in i dah tel a, kha thumal khan he thil hi phuba vang a ni tih i lantir bawk a ni.




"Tin, i thil post kha pangpar dum a ni a, a background pawh black and white a ni, lungngaihna leh tawrhna lam i lantir duh vang a ni. Tin, Google account a nangma hming atang a search history ah khan misual manchhuah dan chungchang zawnna a awm bawk. Chu chuan misual man chhuah i duh tih leh a thil tih puanzar sak I duh tih chu i lantir ta bawk ani"




"Tichuan le, tunah chuan he thil thlen dan, engvang a Jessicai leh lucy remsiangpuii te chu thah nge an nih? Nang hi ilo inhnamhnawih ve reng em? I inchhir in he ti zawng hian inpuanna i nei ta mai zawk tihna a ni lo maw?




Johnnya chu a ngaihtuahna a bing mup mup thei hial mai. Chutah detective vek chuan "tichuan, cellphone kha September ni 11 ah millenium centre kawt ah chhar a ni a, nang chu kha mi ni khan kha ti lai hmunah khan i kal ngei a ni tih nangma ka ngei atangin hriat a ni tawh bawk a, tichuan he cellphone hi tihbo a ni tih post siam a nih khan nang chuan nangma ta ngei a nih thu i rawn sawi bawk a.




"Nang hian ruahmanna felfai tak leh remruatna tah tak i nei a ni. Mahse tuanah chuan engkim hriatchhuah a ni tawh a, a pawimawh ber zawk chu he tualthahna ah hian i inhnamhnawih ve reng em? Nge ni a i cousin bona ah rinsiama hi i ringhlel a i chhui rukna atang in thudik chu i hrechhuak ta zawk?




"Inspector chuan "video leh thlalak ho kha engtia nei nge i nih? Alo ti thuai bawk a, johnnya chu a buai ngei mai. "Sir, kei hian eng thil mah ka tilo, misual hnu ka chhui lo hrim hrim, tin heng cellphone chungchang pawh hi ka hre lo, ka tibo ngei mai, tin ka tihbo nen khan a in ang hle bawk, mahse heng zawng zawng hi ka tih a nilo, ka inhnamhnawih lo hrim hrim, tualthah te ngat phei chu a ngaihtuah ringawt pawh ka la ngaihtuah chhin ngai lo".




Inspector chuan "mahse, he cellphone a thil inrem dan kan han chhui chhuah te hi thudik vek a ni si a" alo ti a, johnnya chuan hrilhhai tih hriat tak chuan "ni e, sir, engmah hi ka hrethiam lo reng a nih hi, ka hrilhhai in ka buai tak meuh meuh zawk a ni, ka va han hrethiam lo tak em aww" tiin a chal chu a dawm vang vang mai.




Detective chuan cellphone chu han en tir in "kha le, han en ta che, i ta ngei a ni reng em tih chu i hrechiang ber ang chu" a han ti a, johnnya pawh chuan uluk fe hian cellphone chu a han en a, a hmel khem dan atang te, a a cover atang te chuan ama ta ngei ani tih chu inspector leh detective te pawh chuan an lo hrethiam a, Chutah detective bawk chuan "imm, a finfiahna hi a Chiang lo riau mai, ti teh johnny, nangma ta ngei a ni em tih finfiah nan i cellphone tihbo tak a dahna bawm ila nei em? a detail engkim awmna ila nei em? Johnny chuan "aw sir, ka la kawl tha ang" detective bawk chuan "ti khan in lama i chhung te phone mai la, i cellphone bawm awmna chu hrilh la, a thlalak rawn thawn mai rawh se" alo ti leh thuai a, johnnya pawh chuan detective sawi ang chuan in lam a a chhung te chu a han be nghal thuai a.




Johny-a cellphone tihbo detail a a landan atang chuan chu cellphone security guard in a chhar tak chu johnnya cellphone ngei ani tih inspector leh detective te pawh chuan an mit ngei chuan an hmu in an hrethiam ta. Amaherawhchu amah Johny-a ber chuan engmah inrawlhna a neih loh thu leh thil awmzia a hriat bik loh thu sawiin a tang ve tlat bawk si a, mahse a finfiahna te chu a Chiang thawkhat viau a a lan tak avang chuan Johny-a pawh chu police lam chuan an hreng ta rih a ni. Tualthattu video leh thlalak te a neih theih danah chuan detective sam chuan hma a la leh mek a ni.




Thla khat dang a liam leh hnu chuan Jessica vallalhriatpuii kum 28, rawng taka thah anih chungchangah Additional district and session judge two Aizawl chuan thutlukna a siam mai thei tlat lo, Jessica vanlalhriatpuii ngaizawng hlui lalrinsiama kum 33 chu damchhung lung in tang tur a finfiahna tha tawk tak a phut a ni, pawikhawih tu, thu hretu te leh police evidence te avang a thil hnawk leh buai ru tak la awm avang chuan trial la neih leh phawt a tul a court thutlukna ala awm thei lo a ni.








Jessica vallalhriatpuii kidnap a tenawm tak leh rapthlak taka nghaisa a that zui tu ni a rinhlelh lalrinsiama chu hetiang hian court chuan thu a zawhfiah a,




"Jessica vanlalhriatpuii nen hian in hriatna in nei em?" Rinsiama chuan "aw ka pu, kan inngaizawng ve thin alawm"


"chuti anih chuan kha mi ni, Jessicai bo ni September ni 6 ah khan khawiah nge i awm?


"Khami ni khan eng thil ber nge ka tih ka hrechiang ta chiah lo, alo rei ve leh tawh a, mahse hei erawh ka Chiang, Jessicai nen khan kan innngaizawng tawh lova, kan inbe ngai meuh tawh lo a ni, a ni nen khan kan awmdun lo tih hi ka chiang a ni"




"I nitin hun hman dan kimchang dahthatna diary i nei em?


"Aih neilo ka pu"


"anih si chuan he cellphone a facebook account atang hian police te chuan tualthattu chu nangmah ngei hi i ni tih an chhui chhuak si a" rinsiama chuan "kha zawng ka hrethiam ve hauh lo, engtia Khatiang a awm thei nge tih ka hrethiam lo"




"Chutiang chuan sawi mah la, hemi hma, Jessica vanlalhriatpuii bo hma pawh hian kawnpui veng a mi tho lucy remsangpuii chu a bo tawh a, hemi ah pawh hian nangmah hi Lucy remsangpuii te chhung kua pawhin an rinhlelh ber ilo tawh a, lucy remsangpuii nen khan eng inzawmna nge in neih?"




"Aa ka pu, lucy kha ka hmelhriat chu a ni ngei mai"


"ngawi lawk teh rinsiam, lucy remsangpuii chhung te ngei hian an fanu bona chungchangah hian nang hi an rinhlelh ber i ni tih an sawi tlat mai, a hma a an rinhlelh ruk i ni a, nimahsela hun a kal a, nang chu han rinhlelh zui zelna chhan tur che an inhre lo niin an hre leh a, mahse tun tumah Jessica vanlalhriatpuii thihna chungchangah nang hi rinhlelh ber i han nih leh tak ah chuan Lucy remsangpuii chhung te pawh hian an fanu bona ah hian nang mah ngei hi an tinzawn leh ta lo thei lo che a ni. I hmelhriat satliah ringawt lo deuh chu a nilo maw?"




"Aw, an pahnih hian ka ngaihzawng hlui te ve ve te an ni e, mahse an ni chungah hian eng thil sual mah ka tilo hrim hrim"




"Eng thil mah i tilo a ni tih chu i finfiah thei dawn em ni? Khami ni, Jessica vanlalhriatpuii bo ni khan i awmna pawh i hrechiang lo chu a ni si a" Rinsiama ukil chu alo inrawlh vat a, "ka pu, thil hriat sual a awm a ni. Police lam pawh hian thil tisual tu ngei ani tih hi a finfiahna tha tawk tak an nei lo ve bawk a ni. Kha video a pawikhawihtu kha rinsiama ngei hi ani tih evidence Chiang zawk kan duh a ni, Tin amah rinsiama hi Jessica vanlalhriatpuii bo ni khan Jessicai nen an inhmu lo ani tih hi thudik ngei a ni tih fiah nan amah hriatpui tu pawh an awm ngei ang. An ni chu koh min phal sak rawh. Judge chuan "thu hretu chu koh phalsak in ni e"




rinsiama nu leh pa te chu ukil chuan a han ko chhuak ta a, rinsiama nu leh pa lalfakzuala leh ngurlawmi te chuan mak an ti in an lo inring lawk hauh lo tih chu an awmdan atang chuan a Chiang reng mai. "Khami ni, Jessica vanlalhriatpuii Boni September ni 6 ni khan in fapa hi khawiah nge a awm?"




"ka pu, kan fapa hi khami ni khan a inkhawm a ni. Keini chauh nilo midang hriatpui tu pawh an awm ngei ang"




Judge chuan "Mahse in fapa ber hian a inkhawm ani tih pawh chu a theihnghilh ta tihna a ni maw?" Mipui lam chu an lo thum hak mai. Chutah rinsiama chuan "ka pu, ka hlauhthawn em avang leh he thil thlen dan hian min thawn em avang a ni. Ka nu leh pa te thusawi kha thudik a ni e, midang min hriatpui tute pawh an awm e"




Thu hretu dang chu an han ko leh a, rinsiama chu a inkhawm ngei thu an sawi ta zel mai. kur tuar tu te lam atang chuan thu hretu koh an phut ve nghal vat bawk a, "Awle thu hretu chu lo chhuak rawh se" johnny zamlova chu a rawn penchhuak ta a,




"johny, nang hi he cellphone nei tu hi i ni tiraw?"


"Aw ka pu keima ta ngei a ni e"


"kha cellphone i set dan kha han sawi teh le" Johny-a chuan harsa tih hmel fe hian "ka pu, he thil hi hriatthiam a har ka ti hle mai, keima cellphone ngei chu a ni a, mahse ka cellphone hi September ni 10 ni ah khan ka tibo a, a tuk September ni 11 ah millenium centre kawt ah chhar a ni a, chumi bak chu kei chuan engmah hriat ka nei lo a ni" Thawm chu a ri nghal hak mai. Mipui lam chu an phun nghal mur mur mai a, judge rokhuma chuan mipui chu ngawi tur chuan a han khap vat bawk a.




"Chuti si engvanga thu hretu a dintir nge i nih?" Tin, cellphone neitu i ni a, i phone set up tu chu midang an ni i tihna a niang maw?


"Aa, ka hrethiam lo ani ka pu, ka phone hi rutu an awm a ni, keimah nilo he tualthahna hre tu hi midang zawk an ni, keimah hi hmanrua ah min hmang mai a ni"




"Chuti anih chuan police te thil chhuichhuah danah hian thil dik tawk lo a awm i tihna em ni?"




"Aw ka pu, rinsiama hi ka unaunu lucy remsangpuii bona ah khan kan ringhlel ngei mai, mahse amah ngei hi a ni kei chuan ka ti thei hauh lo. Mahse police te thil chhui chhuah danah erawh rinsiama hi phat rual loh a pawikhawihtu ni ngei a lang erawh a ni si a. Kei chuan engmah hi ka hrethiam lo a ni. Tin he pawikhawihna chungchang hi kei chuan ka ngaihven ngailo hrim hrim bawk a ni"




"Chuti anih chuan i unaunu bona pawh chu i ngaihven ngailo tihna a ni maw?"


"A hlimchhawnah te chuan ngaihven e, mahse heng thilah hian inhnamhnawihna ka nei lo, misual ka nilo, thuruk ka hre hek lo, he thil hi engtia lo awm ngawt thei nge anih hi ka hrethiam lo takzet zet a ni"




"Awle tun tum atan chuan kan duhtawk ang, thu rintlak leh fun fe a awm lo, police lam evidence a Chiang viau a, chu mi nemnghet tur chuan thu hretu ber tur a ngaih hian thil a hriatthiam loh thu a sawi tlat thung, he case buaipui tu lam hian Chiang zawk a finfiahna an ngihtuah leh phawt a tul ang"




Inspector chuan detective phone call chu a nghahhlelh tawh kher mai. Misual pa ber chu a inpuang mai mai duh dawn der silo a. Detective in a finfiahna tha tawk tak a neih tawh ngei chu beisei ru tak chung chuan Detective sama lo call pawh chu nghak thei lovin amah zawk chuan sama chu a han call ta a ,




inspector in thil awmzia a han hrilhfiah tak ah chuan detective pawh chuan rinsiama cellphone chu check sak turin a ti a, Chutah chuan evidence tha tawk tak a awm ngei a rin thu a hrilh a, chumi anih loh chuan amah rinsiama chu inpuan tir mai a ngaih a rin thu a hrilh bawk a, inspector pawh chuan detective sawi ang chuan hma a la nghal thuai a, tin taxi neitu in mipa, amah be tu number a pek technical lamin tu sim card nge anih chhui tura a tih tak pawh kha chhui zui a ni a, mahse sim card an chhui zuina atang chuan kha mi ni, jessicai bo ni a taxi biak sak tu kha tunge anih tak an hrechhuak thei Chuang tlat lo.


Inspector remruata chuan a ngaihtuahna chu a hmang uluk dauh dauh thin kher mai. Rinsiama chu tualthattu ngei a ni tih a finfiahna an hmuhchhuah tak te kha court lamin an pawm pui viau a lan laiin rinsiama thu hretu te an awm a, Jessica vanlalhriatpuii bo ni khan rinsiama chu a inkhawm ngei ani tih an hriatpui tlat si a, tin police lam in an evidence neih te ruahman tu ni a an ngaih johny zamlova

ber chuan engmah a hrethiam tlat silo nen, tin an ni rinsiama te lam hian insawi fihlim ngei tumin tan khawhna tur an dap ve zel ngei ang a. Tin an ni lam pawh hian an thil chhui danah chuan tihsual an nei ve thei tlat bawk a ni.