CHALRANG TUALTHAHNA _Chapter-2

[April Hmar Liverpool]

Chalrang Tualthahna

By, Laltanpuia


Bung Hnihna


Pc sanghluna chin ngaihven a thang chhuak ta tlangval tlawmngai te chuan police te hnenah chuan heti hian thu an rawn thlen ta tlat mai, pc sanghluna riahna hmun ni a an ngaih an thlam awmna an va thlen chuan thawm alo reh thiap mai a, chutah thlam chhung an han lut chu mut bu tharlam tak hi chhuat laiah chuan alo awm ngei a, a la in tel thlap nghe nghe, tin kawngkhar alo inkhar loh danah pc sanghluna chu ram riak turin chu lai thlamah chuan a kal ngei anih chu a rinawm a, nimahsela amah ber hmuh tur alo awm lo va, a thawm ngaichang a hun engemaw ti chhung an han tap khaw muan hnu pawh chuan pc sanghluna hmel reng reng hmuh tur a awm hauh lo a ni. Tichuan hun a liam zel si a, tlangval ho chu in lamah an rawn let leh ta ngawt mai a ni.




Police ten tualthattu ni a rinhlelh PC sanghluna chin engmah an hriat tak lohah chuan ngaihdan hrang hrang a piang nasa hle mai a, chalrang Vcp chuan inspector ruata hnenah chuan pc sanghluna chu ram riak turin a inpu lut ngei a ni tih chu a Chiang viau ni a a hriat thu leh, chutia thlam a a hmel hmuh tur alo awm loh chhanah chuan ram vak a hmun dang a alo thang bo lai tak an va nang niin a ngai a, tin a mut bu Ken luh pawh chhuat a dah fel loh a alo awm danah a thlen hlim hlawtah ramvak turin a petek bo leh nghal anih a rinthu te chu a hrilh ve luam a, inspector chuan "imm, he pa hi a chet dan leh a khawsak danah hian kei chuan mi a tak chu a niin ka hre lo. Engemaw ruahmanna chu a nei niin a lang, tin thlam a alo awm loh danah chuan in thawm alo hriat vang pawh a ni thei a, inthawm hria in alo bi bo mai mai pawh a ni ang.




"Chhan tha tak neiin PC sanghluna hian ruatmawia hi phone call hmangin a ko chhuak tih a lang reng a, tin a cellphone chu tunah khawiah nge a awm tih tuman kan hre lo bawk. A cellphone chu amah ngeiin a kawl a ni ngei ang. Mahse phone call a la duh lo a, he lai a call a ring ral tir kher na chhan hi chu keini lam hian tualthattu ngei ani tih kan la finfiah lo a ni tih hi a hrethiam tih a lang reng a, a tir atangin PC sanghluna hian thil awmzia chu a man thiam vek a ni. Amah hi rinhlelh a ni ngei ngei dawn tih a hre vek bawk ang a"




Rinpuia chuan lo pawtchat in "mahse sir, he pa hi a thil tih sual in pawm a police kut a in pek mai awm tak a ni a, chumi a ngam lo anih pawhin tlan bo dan a dap mai tur ni awm tak a ni a, mahse a hnu chhui zui theih turin a khawsa lawi a, tin phone call han lak duh loh te, a ramriah tur thu a chhung te hnena han hrilh te, a chet dan zawng zawng hi a bul atang a han chhui dawn chuan i sawi tak ang in engemaw tak ruahman na hi chu a nei ni ngei in a lang, mahse a khawsak dan mawlh hi ruatmawia a that a, in lamah haw in a chhungte hnenah a riah tur thu a hrilh a, a inpu chhuak nghal a, tichuan police te chuan a hnu an chhui zui ngei a ring ang a, tlangval ho thawm alo hriat khan alo bi bo ta a, emaw ramvak turin alo thang bo pawh a ni a nga, ka ngaihdan chuan kei ni lam hian chet kan la fuh zan lo deuh niin ka hria, pc sanghluna hi man thei ila chu thil engkim hi a fel nghal mai in ka ring a ni"




Inspector chuan "rina, ka rilru ah tak pawh hian thil lo lang chu, he pa awmna hi kan hre fuh thei meuh angem tih lai zawk hi a ni. Ram a riak lut a, a ram riahna hmun pawh kan hre ngei ni chuan a lang, amah ber lo chan a lo hnungkhirh nghal mai pawh chu thil awlsam tak ni pawhin a lang, mahse amah ber hian keini lam hi min bik bo san dan tur ngawt a dap a nih erawh chuan kan beisei lo takin hna hautak tak pawh min siam ve thei tlat a ni"




Vcp chu alo inrawlh ve vat a, "ee pu te u, kan khaw tual ah ngei thihna rapthlak tak a thleng a, hei tualthattu ni a rinhlelh an awm a, man chhuah vat a tul anih chuan keini khawtlang pawh hian theihtawp kan chhuah ang, amaherawhchu in han sawi tak dan ah ruahmanna engemaw tak te hi alo nei ve thei a, chetsual palh leh vanduai palh thil thleng thei erawh a ni.




"Chumi ah chuan nang ni lam in ruahmanna leh remruatna tha zawk te han nei thei ula duhthusam chu a ni" alo ti ve bawk a, inspector chuan "imm ka pu, lungngai lo phawt ang, zan in lam hian a chin te han ngaichang leh phawt mai ila, Chuta ala rawn in lan lo fo anih chuan keini lam in kan bawhzui tawh mai dawn nia" a han ti a, Vcp pawh chuan "ni e, in tih dan dan ni rawh se, misual man ngai an awm a khawtlang mipui te chi ai in an awm a man vat ni teh se khai. Mitthi ta chhung te pawh an tawrhna leh lusunna te pawh a zia deuh mahna" tiin pc sanghluna chin ngaichang chuan chumi zan chu hun an hmang tlang ta a, police lam erawh station lam pan in chet an la ta thung a ni.




Zan khua in pc sanghluna chin engmah hriat tur a awm lova, khua a var chawp ve mai bawk nen chalrang khua hruaitu te tan tak pawh chuan chet han lak mai ngaihna a vang ru ve viau mai. Chumi tuk chuan pc sanghluna pa chuan thil Chiang zawk a hriat inbeisei ru tak chung leh an fapa chu thil tisual tu ni a la beisei lo ru tak chung chuan an thlam awmna hmun, an fapa in ram riah a tumna hmun lam pan a chet la tur chuan a inruahman ta ngawt mai a, phone call lah chu a ngai te bawk in an fapa chuan a la thei silo nen.




Mitthi postmortem result pawh chu a chhuak ta bawk a, postmortem buaipui tu medical examiner te pawh chuan ruatmawia chu chem te hmang a vih hlum ngei ani tih an rawn confirm ta a, a vihna chem chuan a chuap a ti chhia a, a chuap a thisen tling leh boruak tlachham avang a thi anih thu chu police te hnenah chuan an hrilh ta a,




Chawhnu her anih chuan inspector ruata chuan chanchin duhawm lo tak mai a hre leh ta bawk, chalrang khua atangin VC secretary hnen atangin a ni a, pc sanghluna ngaihven tura thangchhuak ta PC sanghluna pa pasena chu chin hriat a ni ta tlat lo a ni awm a, a case buaipui lai alo ni nen chumi ngaihven tur chuan a rang a rangin chalrang khaw lam pan chuan a nau te nen chuan an tleh chhuak ve leh ta nghal a,




Inspector alo hmuh rual rual chuan Vcp chuan "pu inspector, hei pu pasena pawh a reh zui ta vang vang mai, zing lam dar ruk a a fapa ramriak ngaihven tura thangchhuak ta kha a ni a, nizan lamah sanghluna chin engmah kan hre ta silo nen, khaw lamah a rawn haw awm engmah kan hre ta silo a, ama pa ngeiin ngaihven turin a thangchhuak ta kha a ni a"




Inspector chuan "chu, midang tumah in an kalpui lo a ni maw?" Alo ti thuai a, Vcp chuan "aw, kal pui hran lo, keini lam tak phei hi chuan a kalchhuak dawn tih reng kan lo hre miah lova, a chhung te a hrilh ang a a duhtawk mai anih ka ring, tin pu pasena hian a fapa hi thil tisual thei hian a ring tlat lo mai a, ruatmawia thihna pawh hi a fapa thil tih anih hi a ring thei lo a ni, midang pawh hrilh hre hran lovin ngaihtha takin ramchhuak dan pangngai ang in a thangchhuak ta mai anih hi ka ring a ni"




Inspector chuan "chu, amah biak pawh theihin a awm hrim hrim em? alo ti a, Vcp chuan "aa, hei kan han tum ngial chu a ni a, dar kaw bawr chho ah kha chuan amah ngei pawh kan be tlang thei reng mai"




Inspector chuan "chu, in inbiak dan chu han sawi teh" Vcp chuan "inspector a hmasa in a fapa sanghluna ramriah tumna hi khua atang a km 6 dawn ke a kal ngai a ni a, amah nen a kan inbiak lai kha chuan a hmun a la thlen loh thu min hrilh a, mahse khami hnu a biak kan han tum leh kha kan be tlang thei ta lo a ni. Hei nang ni lam rawn lan hun kan lo ngaichang hmasa phawt a, hetiang ang thil, tualthahna lam leh hnuchhui ngai ang chi thil hi chu mahni thu a lo bawhzui ve ngawt kan duh rih lo a ni"




Inspector chuan "chu, in han call leh pawh in a ring ral zel tihna nge a call tlang theih loh tawp?" A han ti leh a, Vcp chuan "call chu a tlang thei ngei mai, kha tunah pawh hian nangmah ngeiin han call ve leh chhin mah teh, ala thei ta tlat lo alawm maw le" tiin inspector pawh chuan pasena chu a han call ve ta a, call chu a ring thei a, nimahsela Vcp hrilh ang in phone call ala thei tlat lo. Tum hnih tum thum lai a han call nawn leh hnu pawh chuan pasena chuan phone call chu a la thei chuang hauh lo mai a,




"Pc sanghluna zawk kha in han call nawn leh chhin tawh em?" Inspector chuan a han ti a, Vcp pawh chuan "aa, nizan lama biak pawh kan han tum bak kha chu vawiin lamah chuan kan la phone leh chhin hauh lo mai" alo ti thuai a, inspector chuan "amah pc sanghluna kha han call leh chhin teh" a han ti a, Vcp pawh chuan phone chu a han lek kang a, pc sanghluna chu a han call leh ta a, mahse pc sanghluna pawh chuan phone call chu ala thei chuang tlat lo.




Inspector chuan thawk chu han la in "imm, pu siamlian, ram chin hre deuh mi thenkhat nen chu lai ram chu kan pan ang, ke a kal ngai kha i ti em ni kha? Vcp chuan "aa, ke a kal ngai han tih ah khan khaw chhung atang hi chuan motor kawng chu thui vak lo chu a tlang ve e" alo ti a inspector chuan rinpuia hnenah chhan "motor kha lo buatsaih rawh rina, mi thenkhat in min zui bawk se, fimkhur thu hla ah silai nei chuan keng bawk ula" a han ti a, chet la tur chuan an inpuahchah ta nghal a.




Chalrang khua chu a buai ngei mai, police lam in pc sanghluna hnu an chhui zui dawn takah leh pasena chin ngaihven tur a an han in puahchah tak rum rumah chuan mipui lam pawh an chi ai in an phawklek ve hle mai a. Tualthihna rapthlak tak leh thil thleng khat tak kara boruak inlum let vel mek hnuaiah chuan Police te leh khawtual mi thenkhat te chuan nghalchang ram an tih lam pan chuan chet an la ta a.




Ni sen sa hnuaiah Kawng thui zawk ke a an kal avangin an chau tlang ve hle a, chhun pachang ah nghalchang ram an tih hmun chu thlengin pc sanghluna te thlam awmna hmun chu kar lovah an thleng thuai a, thlam chu thingtlang pa thlam tih takah a chung rangva niin a bang chu thingzai phel a bel a ni a, a kiangah chuan pangpar buk tha zet zet hi an ding khup mai bawk a, verandah chu an han lawnkai a, thlam chu alo inkalh hauh lo mai, Chutah inspector chuan ngaih that lohna nei hauh lo chung chuan thlam chu a han nam hawng a, chuveleh thlam chhungah chuan a lut nghal a,




mutna ni awm takah chuan pawnthuah hi hrui ah hian alo in bang hnup hlawm a, thawmhnaw tlem a zawng a awm tel bawk. Tapchhak a mei chu an chhemna ala rei lo ani tih hriat tak hian alo la lum thar thar mai bawk. Chhuar a chini bawm chu chhuatah chuan a lo tla darh nuaih mai a, thingpui bel bul a thingpui no lo awm chu hmu in inspector chuan a han en chiang a, thingpui la lum vat vat hi no chanve vel lai hi alo la awm a,




Chutah, thlam nam thlak lam chu han en in namthlak ah chuan vaihlo bawm ni ngei a lang Sarang lian tha tak mai hi alo inthet darh mek bawk a, Chuveleh inspector chu a ngaihtuahna atang a harh thut in thlam namthlak lam ah chuan a phe thla nghal vut mai a, mak ti tak leh a ngaihna hriat loh hmel taka amah lo en reng tu rinpuia leh midang te hnenah chuan "rina, a then khan thlam chhung hi uluk takin lo en ang che u, mobile phone a ni emaw, thil dang pawh hmuh leh hriat tur in lo dap dawn nia, chuan a thenin min lo zui ula" a han ti a, chumi pah chuan thlam namthlak a Sarang a vaihlo awm chu a han en a,




chumi pah chuan "imm, kan thawm hria in an lo insa seng leh hman pek anih dawn hi" tiin tapchhak lam chu a han thlek ha a, rinpuia hnenah chuan "kan misual a te pafa hian eng thil chiah nge maw an ruahman ni dawn ni, hei kan thawm hria in an lo bibo hman anih dawn hi, khalai a chini bawm let reng leh thingpui no in zawh hman loh tih hriat tak la lum vat vat te, tap chhak a mei lo la lum vat vat te, he lai a vaihlo sawngbawl lai mek tih hriat taka lo awm te atang hian kan pu a te pafa chu an lo laklawh lai tak kan va nang ching anih dawn hi" A han ti a,




rinpuia chuan mak ti zet chung hian "sir, he thilah hian pc sanghluna chauh hi a inrawlh lo i tih na em ni? Alo ti nghal vat a, inspector chuan "imm, chu chu a dik ngei niin a lang, khalaiah khan pakhat zawk chuan thingpui a in mek a ni tih thingpui no a chhung a thingpui lo la awm atang khan a chiang reng a, tin he laiah namthlak ah hian pakhat zawk chuan vaihlo hi pho tur in emaw zuk turin emaw a sawngbwl mek a ni tih he vaihlo awmdan atang hian a hriat bawk a ni.




"Kawngkhar kha chu an khar sa hrim hrim tihna te pawh a ni ang, tichuan kan thawm hria in thingpui in tu zawk chuan bik bo tum in a rang a rangin chet ala nghal a ni tih a thingpui in zawh hman tak loh danah khan a hriat mai a, a hmanhmawh hle ani tih chini bawm a tih tlak danah khan a chiang mai bawk awm e, tichuan hmanhmawh tak in he lai namthlak ah hian an zuang thla nghal a, khawiah nge an kal tih chu an hnu atangin kan zui dawn a ni, khawiah nge an awm tih erawh an hnu an hnutchhiah dan a zir leh thlam chhung a an thil hnutchhiah azirin kan hre thei turah in ngai ang. Uluk takin thlam chhung hi lo dap ang che u" tih leh namthlak a zuan thlak a rual a,




Inspector chuan uisathiam tha mi ang mai hian lei chu uluk fe hian hmai si dawn dawnin a bih ta nget nget mai a, Chuveleh phur tih hriat zet a rawn hawi chhuakin "khuanu kan lamah a tang a ni ngat mai" tiin a nau te zinga pakhat hnenah chuan "khaw maw tlangval, i phone camera kha han hmet chhuak vat teh, hei en rawh, ngun deuhin" tiin lei a ke hniak lo awm chu a han kawk a,




chutah rang zet hian "a thla kha la rawh le" tiin ke hniak dang lo awm te chu uisathiam ang mai chuan bawkkhup dawn dawn hian a bih phei leh ta nget nget mai a, chumi pah chuan hriatthiam loh hmel erawh pu chungin an awmna vel chu a han thlek kual leh ang ha thin bawk a, lei chu inspector sawi ang in khuanu an lamah a tang ni mai a han ngaihbel theih tur chuan ke hniak hmuh awlsam tur in a phut deuh surh lah tak a, chumi avang a ke hniak pawh chu fiah taka lang a nih tak ni.




Inspector chu a awmhmun ah chuan han ding khawmuang det in hriatthiam loh hmel tak chuan a lu chu a hiat nauh nauh a, Chuveleh hmanhmawh fe hian thlam chu a kal hual leh ta vut vut mai a, thlam chhung lam atang chuan rinpuia chuan "sir, cellphone chu kan hmu e" a rawn ti a, chuveleh inspector chu a ding chawt a, phur hmel taka namthlak awmna lam pan chung chuan "engzat nge? a han ti a, rinpuia chuan "sir, torchlight pakhat, Sangha man na ni awm tak dianamo battery leh speaker pakhat, sakawrbakcheh leh chemte, tin cellphone pakhat nen chung chu kan thil hmuh te chu an ni e" inspector chuan "cellphone pakhat chauh maw?" a han ti a, "aw sir, kan han check Chiang chhin a nge"




Inspector chuan a lu han hiat nauh nauh chung chuan "imm, ke hniak leh hnuhma atang hi chuan thlamah hian mi pakhat chauh a awm tlat mai" A han ti a, Chuveleh an zing a pakhat chuan "ni e sir, hei ke hniak atang a a landanah hi chuan mi pakhat ke hniak niin a lang a ni. Pheikhawk inkhing hniak chauh a awm si a, thlam atang hian mi pakhat chu hmanhmawh takin namthlak ah hian a zuangthla a ni tih erawh a chiang viau" Alo ti ve bawk a.




Chutah inspector chuan "mahse engtin nge anih theih? Thlam chhung lam atang a a landanah kha chuan mi pahnih chetna hnuhma ni ngei khan a lang si a" a han ti a, an zing a pakhat chuan "sir, kha zawng mi pahnih chet tlatna nilovin mi pakhat sulhnu, a hmanhmawh em avang a mi pahnih sulhnu ni a lang ta niin ka hria" alo ti vat a, inspector pawh chuan "im chu chu thil ni thei a ni, tin vaihlo kha chu ni sa a pho tura ruahman lawk sa pawh alo ni thei a, he laiah mi pahnih pasena te pafa biak pawh theih loh va thang bo mek an nih avang te pawh a ni ang mi pahnih sulhnu kha rilru chuan a chhui dawn lo thei lo ve pakhat bawk a ni" a han ti a, a nui deuh hak nghe nghe a.




Chutah rinpuia pawh chuan "sir, cellphone hi a battery a low a ni ngei ang a on theih loh" a lo ti ve mek bawk a, Chuveleh inspector chuan "imm chu zawng thil hriat harsa a ni tawp nang, cellphone thla kha la la ke hniak thla nen khan in lam a pasena leh pc sanghluna te, an chhung te thawn rawh u, an ni chuan an fapa pheikhawk bun len zawng chu an hre ngei ang a, an pa pheikhawk bun len zawng pawh an hre ngei ang a, chumi a zir chuan he lai a ke hniak kan hmuh hi a tu zawk nge an nih tih chu kan hre mai ang, cellphone pawh kha a tu zawk ta nge tih chu kan hre mai ang" a han ti leh a.




Rinpuia pawh chuan a pu sawi ang tak chuan in lam a mi te hnenah chuan pheikhawk thla leh cellphone thlalak chu thawn in tu ta zawk nge anih? Tu pheikhawk hniak zawk nge anih chu a han zawt nghal thuai a.




Chutih lai chuan inspector leh midang te pawh chuan ke hniak chu an lo chhui ve zel a, nimahsela chutia ke hniak an chhui lai mek chu chhui zui harsa tak in ngaw chhung chin ah chiah chuan a tawp ta tlat mai. Chutah, inspector chuan a vel chu a han thlek kual thuak thuak a, Chutah hmanhmawh fe hian chhak deuh a hnim kar a hunter pheikhawk lo awm chu han hmu fuh in a phur lutuk chuan a bawh hian a han bawh nghal ruak ruak a ni ber mai awm e.




Pheikhawk chang alo ni lo, thawmhnaw zai thler ni awm tak, thisen khar in a bawh luk mai hi pheikhawk bul maiah chuan alo awm tel bawk a, Chuveleh puan leh pheikhawk chu an thla la in Sarang chuan uluk takin a han tuam ta a, a naute zing a pakhat chu pe in bag ah chuan an dah ta a.




Chutah inspector vek chuan thaw han lak halh pah chuan "imm, ke hniak kan chhui tawp na atang khuan kan tan tha leh ang" tiin chumi lam pan chuan an chhuk leh a, inspector leh a nau te chuan ke hniak tawpna atang chuan misual chu khawiah ber nge a kal tak ang ti a an mit an len ruai lai chuan rinpuia chuan thlam atang chuan a rawn au a,




"sir, ke hniak kha a landan atangin PC sanghluna zawk a nih hmel, a pheikhawk bun size hi ke hniak a mi nen khan a in ang chiah chiah e, tin cellphone kha pc sanghluna cellphone a ni bawk e" a rawn ti a, chuveleh inspector chuan a pheikhawk chhar chu a number a han en a, ke hniak a number nen khan a lo in ang hauh lo mai a, a rilru chu a buai ru takzet.




"Heti anih si chuan pc sanghluna hian a tlanchhiatna lamah a pheikhawk phelhin he laiah hian a thukru a ni thei ta hauh lo mai, heng pheikhawk leh puan a thisen kai te hi chu PC sanghluna an nilo, pu pasena zawk an ni ngei ang" A han ti a, chuveleh rinpuia hnenah chuan "rinpui, in lam a mi te kha han zawt leh la, chhungkaw pa ber pasena pheikhawk bun number min han hrilh vat teh se khai" a han ti leh a, rinpuia pawh chuan a pu sawi ang chuan in lam a mi te chu a han zawt veleh ta a,




Rinpuia chuan "sir, pu pasena chuan pheikhawk number 39 a bun a nih chu" a han ti a, Chuveleh inspector chu a thaw huai a, "imm he pheikhawk hi pu pasena pheikhawk zawk a nih hi. Thisen leh puan te pawh kha pu pasena thisen vek an ni tihna a ni" A han ti a, Chutah Chiang zawk a hnahthel ro leh vaivut inpawlh chu han bih leh in, chutah rang fe hian a tho chhuak vut a, ram ngaw lam pan chuan a bur phei leh ta nget nget mai a,




a hnung ah chuan a nau te pawh chuan hmanhmawh tak chuan an rawn zui ve dat dat reng bawk a, Chutah inspector chu a ding thut a, a inher leh vut a, an kalna ngaiah chuan let leh in thlam awmna lam bawk chu an pan leh ta a,




eng khaw sawi set set lovin inspector chuan thlam hnuai lam chu bih in chutah rang zet hian thlam ban bul a hnim chu a pawng tawng hai ta chiam chiam mai a, Chuveleh a naute pawh chuan hnim chu an lo hai pui ve nghal vat a, Chutah an zing a pakhat chuan suardur leh thir tiang hi a hai chhuak ta nawlh mai a, Chuveleh inspector chu a hrilh nghal vat a, inspector chuan thlam hnuai a thing tlawm sei tak tak awm te chu pawn lamah chuan a han thehchhuak nghal zung zung a, chutia thing tlawm sei tak tak a han dah sawn takah chuan lei chu alo phut deuh dup mai chu niin.




Chutah lei chu suahdur chuan a han hai nghal buan buan a, Chuveleh thil thang rim na tak avang chuan inspector chu hrâwk dawm vawng vawng chung hian a khuh nghal bawrh bawrh mai a, mahse a hmai chu a rumol chuan a han tuam vat a, Chutah lei chu a hai chhunzawm leh nghal mawlh mawlh mai, Chutah le chutia lei suahdur a a hai mawlh mawlh lai chuan mihring ban hi a hai fuh ta nawlh mai a, inspector leh a nau te chu an te ring teh asin le.