INBUMNA LEH LEMCHANNA _Part-1_Chapter-1

[April Hmar Liverpool]

Inbumna Leh Lemchanna_Part-1

By, Laltanpuia

Bung khatna

"Sualna leh pawikhawihna thleng thin hian chhan tha tak a nei thin a, pawikhawih tu leh thil ti sual tu chu a tu a te pawh lo ni se, dan ang a an chung a hremna lek kawh a ni thin, nimahsela heti anih rual hian pawikhawihtu tam tak chu man chhuah loh leh hriat chhuah loh an awm ve fo a, heng thil avang hian dan hnuaiah ngei pawh hian misual thenkhat hi chu zalen takin an awm thin a ni.

"Chhungkaw veng him tur leh uap tu tur ni a ngaih pa thenkhat hi chu an chhungte tan mangchhia an ni ringawt mai thin a, hetia han ngaih mai pawh a thil thleng thei ni a kan ngaih loh leh kan beisei ngai loh chu a thleng thin zawng anih hi maw, a pawi ngawt mai.

"Chhungkaw kehchhiat chhan te, hmangaih te inkar a innghirnghona thleng thin te hian a nghawng that loh zia chu kan hria a, mahse chu thilah chuan tunge dem tur ni ang tih hi mi tam tak zawhna hmasa ber erawh a ni thin a ni. Pa ber leh nu ber in an zir miau lohna chhungkua ah chuan thlamuanna leh himna a awm tak tak thei lova, an fate tan an nu leh pa te chu an in hualhimna nilovin mangchhia an ni ringawt mai thin si a"

Inspector thusawi uluk taka an ngaihthlak dauh dauh reng lai chuan joela chuan lo pawtchat in "sir, kb thanga chu a tlanbo tihna em ni a? A ahan ti a, inspector chuan "aw, ni ang chu maw le, hei fir in a tarlan danah hi chuan pi lalsiami kum 28 mi kb thanga nupui chu anmahni thlamah a fanu nen hliam na tak tuar a hmuh an ni a, a fanu kum 4 mi hi a chalah hliam hmuh niin amah pi lalsiami taksa a hliam hi hmanraw hriam tak hmanga beih ni a a lan thu ni a tarlan a ni bawk a, a pasal kb thanga hi hemi lai hian a tlanbo daih mai a ni awm a, a awmna chin hriat anih loh avang in he thil hi ama tih ngei niin a lang a, tichuan case chu register ani ta anih chu, hliam tuar te nufa hi damdawi in lamah tlan pui nghal an ni a ni awm e"

Case thar buaipui tur an neih leh tak avang chuan joela chu a phur hle mai a, misual han veh vel hrim hrim hi anmahni lam hming thatna anih mai piah lamah, a nuam tih zawng anih hranpa hrim hrim avang a police hna pawh thawk a ni reng a.

"Tichuan sir, kb thanga chu man ila ani tawh mai alawm? Khawiah nge a awm a, khawiah nge a tlanbo, a chin hriat chu kan tihtur ani deuh mai tawh alawm" joela chuan a han ti a, inspector chuan "imm ni mai e, mahse chuti mai a misual chu man theih erawh a ni mai lo deuh ang. Hun kan mamawh ngei dawn niin a lang" a han ti a, joela vek chuan "ni e sir, lengte khawtlang hruaitu te nen pawh chuan inbia ila, tin an chhungte nen pawh a inbiak a tha ka ti khawp mai. Kb thanga chin han ngaihven zui theihna atan an ni chu an tangkai in ka ring tlat ani" a han ti leh a, inspector chuan "ni e, chanchin kan inhrilh ve zel dawn alawm. Tunah rih chuan a awmna chin hre hnuhnung tu an pawimawh dawn niin a lang, kb thanga an hmuh hnuhnun berna kan hriat a pawimawh dawn ani" Alo ti ve bawk a.

Zing kar boruak nem tak mai leh ni chhuak dam zet mai karah chuan lengte khua a khaw mite chuan chumi ni atan a an hna thawhna lam a an inbuatsaih lai te niin, thenkhat chuan tukthuan an kil mek a, a then hnathawk turin an chhuak tawh a, a then chuan thingpui te an in mek a, chutia boruak muanawm tak mai kara hun an hman mek lai chuan information atang chuan an khua a tang a kilometre khat mai a hla a awm, pi lalsiami te thlamah chuan a neitu pi lalsiami leh a fanu chu thi chhawng a an leh reng thu an rawn puang ta thut mai a,

khaw mipui ten chutiang thu dengkhawng tak mai an han hriat thutah chuan an chi ai in chu thu chuan a thawng hle mai a, tichuan khaw mipui tlawmngai te chu pung khawm nghal thuai in hliam tuar mek te tanpui tur chuan thlam awmna lam chu an pan ta nghal vat a. Pi lalsiami chu hriam hrei hmang a beih a ni tih hriat tak hian a taksa hmun hrang hrangah chuan hliam na tak a tuar a, a fanu pawh chuan a chalah hliam neiin hmanrua a vuakna emaw khawn na hnu ni ngeiin a lang. Police lam pawh chuan an theih ang tawk chuan kb thanga hnu chu chhui chuan chet an la ve nghal thuai a.

Khaw chhung lam a Kb thanga hmu hnuhnung ber tu in a sawi dan chuan chumi ni hma ni ah chuan thlam a riak tur a a inpuahchah thu leh amah chauh a riak tur anih thu sawiin chumi chin bak chu khaw chhungah amah hmuh tur a awm lo zui a ni awm a, tichuan a tuk mai ah chuan kb thanga nupui leh a fanu te chu an thlamah chuan thi chhawng a an leh reng thu hriat zui a ni ta ani. A lan danah Kb thanga hian he thil hi a tum lawk reng thil ani em tih amah chauh a riak tura a insawi dan atang chuan ngaihdan a awm thei a, a lehlamah thenawm te leh chhungkhat te sawi danah pi lalsiami chuan ram an riah tur thu te pawh alo sawi ve bawk a ni awm e,

Tichuan an thlam bul mai a ram riak tur a in pu lut ve zahminga chuan a riah luh ni zan chuan lalsiami te thlam ah chuan leng turin a kal a, chumi zan chuan lalsiami pasal kb thanga pawh alo awm ve ngei thu sawiin an inkawm luam a ni awm e, tichuan a tuk zingah chuan kb thanga te thlam lamah bawk chuan a han chuang kai leh tur chuan thlam chhung a pi lalsiami leh a fanu thi chhawng a lo let reng mai chu a han hmu ta ani, khaw chhung lam a be pawp nghal thuai a, rang tak a damdawi in lam a hliam tuar te tlan pui nghal an ni ta ani.

Inspector chuan zahminga hnenah chuan "chu, pi lalsiami te nen hian in inpawh tha hle tihna a niang maw? nge ni a i ram riak khawhar in i han leng chho mai mai zawk? a han ti a, zahminga chuan "ka pu, khami zan ah khan ni e, kei kha keimah chauh a riak lut ka nih avangin ka khua chu a har ngei mai, tichuan an ni thenawm lawkah an lo riak ve hlauh mai nen ka han chuangkai mai mai a lawm maw le" zahminga hmel chu a ngui in pawi a tih hmel takzet.

"chu zahming, i han len chhoh zan ah chuan eng chungchang nge in sawi? an ni nupa karah chuan han inhmuh thiam lohna emaw an hmelah pawh han ngaih that lohna tur emaw hmuh i nei lem lo a mi?

"Ka pu, lalsiami nen hian kan inkawm ngeih ve hle mai a, kan nulat tlangval lai pawha thian tha tak kan ni ve thin ani, pasal te nei a fate a han neih tak hnu pawh hian kan la inkawm ngeih ve em em mai a, a chang hi chuan a pasal pawh hian mi hi min fiam thin nghe nghe a, unau ang mai in ni ti a min han fiam chang te pawh hi a nei ve thin alawm, ni e a sawi dik lah tak a, unau kan nih hi mi thenkhat, unau kan nilo tih hre chiah lo te pawh hian an ring hmasa chawk thin reng a ni, mahse sawi tak angin thian mai chauh kan ni"

"Ram i riah luh hma chuan an ni chhungkua chu an riak lut dawn ani tih i hre lawk nge i hre lawk lem lo?"

"Aa ka pu, an riah luh tur kha ka hre lawk ngei mai, tin kei lah hna lam ah hian ka lo tul chho ve nen, an ni an riak lut dawn ani tih kha ka han hriat khan keipawh mahni chauhin ka ni bik dawn lo ve, a khawharthlak lutuk bik dawn love ka ti a ni. Mahse kei khan enge maw avangin ka ram riah tum kha ka thulh leh ta zawk a, mahse ka sawi tak ang in hna ka tul tawh si a, ka thulh tawh hnu chu ka tum tha ve leh bawk a, tin an ni pu kb thanga te chhungkua pawh chu an lo riak lut ve bawk nen a khawharthlak ta lutuk lo a ni, mahse a tuk khan ka beisei ngai loh thil ka tawng ta mai si a"

Inspector chuan "im, chuti anih chuan kb thanga hian a riah luh hma hian a thian pakhat hnenah ram a riah tur thu a hrilh ngei mai a, mahse a mah chauh a a riah tur thu a hrilh a, mahse an chhungkua in an riak lut leh ta zawk a, chu chuan awmzia a nei thei a ngem? Awmzia a neih hi ka ring tlat a ni. Nang in ram riah i tum a, mahse i ram riak tur chu chhan enge maw avangin i thulh leh a, tichuan i riak lut leh ta zawk a, mahse i beisei loh tak thil i tawng ta si a"

Inspector chuan joela hnenah chuan "joel, kan thianpa zahminga hi he thil thlen chhan hi anih ka ring tlat mai" a han ti a, joela chuan hriatthiam loh hmel zet hian "sir, eng tin maw? he thil thlengah hian a inhnamhnawih ve i tihna em ni?

"Aih nilo ve joel, chuti zawng chuan nilo ve, kb thanga hian he ti tak mai a a nupui leh fanau chunga kut a han thlak duh ta mai hian chhan a nei ngei tur a ni. Thik thu vang emaw thil dang vang anih ngei hi ka ring tlat, zahminga hian pi lalsiami nen hian an inkawm ngeih thu leh an inngainat thu a sawi kha i hria em? kha thil kha inngainatna satliah mai mai lo deuh em ni aw ka ti a ni.

"Ram riak tur a intintuah kha a ni a, mahse chhan engemaw tha tak mai avangin a thulh leh a, a thian nu a kawm ngeih em em mai lalsiami chu in lamah a pasal telloin a awm dawn ani tih te pawh a hria a ni chek a nga, a free dawn em asin, tichuan ram riah a tum chu a thulh leh ta a, mahse khatiang a in lam a a nupui leh a mi rinhlelh ber mai zahminga ten chance an lo zawng kual vel tur kha a han hriat khan kb thanga ngaihdan chu a ni ta lova, a nupui leh a fa chu ramriahna ah a hruai tel ve ta zawk a,

"chuveleh chuan zahminga pawh chuan hna lamah alo tul ve tho bawk si nen a ram riah thulh chhan ber in ram lamah a han riah luh san veleh daih mai tur thu a han hriat khan a inpu lut veleh ta zawk a ni ngei ang. A hma atang tawhin kb thanga hian a nupui leh a thianpa hi alo ringhlel ru tawh thin tihna a ni ngei ngei ang, chumi anih loh vek pawh in chhan dang a awm hrim hrim ang. Chutia chhungkaw hualhim tu tur leh chhungkaw uap tu ber tur pa berin a a nupui fanau chunga kut a thlak duh ta mai chu chhan tha tak a awm loh chuan thil thleng pangngai a ni tlat lo a ni"

Joela pawh chuan "ni e sir, i han sawi en na a zarah keipawh zahminga kha a awmdan leh a thusawi duh dan vel atang khan thil felhlel deuh chu a awm a ni. An ni pahnih zahminga leh lalsiami te inkar thu hla hi chiang deuh zawk a hriat a tul tlat in ka hria, misual awmna chu khawiah pawh lo nise" a han ti a.

Inspector chuan "joel, an chhung te leh thenawm khawveng te hian thu chiang zawk an hre ngei ang. Lo ngaihven deuh la, a tha a nge" a han ti a, joela pawh chuan "aw le sir, kalo ngaihven dawn nia" alo ti ve bawk a.

Ni hnih dang a liam leh a, kb thanga awmna chin hre tur chuan inspector chuan kb thanga thlalak, a hmel leh landan, a kum zat leh misual anih thu te chu thuchhuah a siam tir ta a, amah lo hmu leh a chin hria apiang chuan rang taka police te hnen a hriattir nghal vat turin a ti a. Tin, amah ngei pawh chuan thlam awmna hmun atang chuan kb thanga tlanbona ni thei tur te chu chhuidawn in chung a thil chhuidawn atang a a hmuhchhuah ni ta chu, chumi khua atang a thenawm khaw hnai ber ah chuan a kal ngei a ring ta a. Chu khua ah chuan in lo awm hnaivai a mi te leh an khua a chu mi ni lalsiami leh a fanu a nghaisak ni chhun dar 10 vel a mi pakhat, a hmel leh landan a kb thanga ni thei tur an lo hmuh leh an lo hmuh loh thu te chu a zawt kual hlawm a.

Chung a mi zawh zing a pakhat chuan inspector sawi ang hmel hmai pu leh landan mi pakhat chu chhun dar 10 vel bawrah chuan an khua a a rawn lut lai alo hmuh thu a lo hrilh ta hlauh mai a, bag ak in zin veivak zinga mi anih chu alo ring ve mai ani awm e, chuveleh inspector chuan chu nu thu hrilh chu bawhzuiin chu mi khua a taxi driver te, sumo driver te ho chu chumi ni a mi pakhat kb thanga ni ngei a lang passenger an neih leh neih loh thu te a han zawt kual leh hlawm a, an zinga pakhat chuan inspector sawi ang mi pakhat chu passenger alo nei ngei a, inspector chuan khawi lamah nge a phurh tih te, chu pa chu khawi laiah nge a chhuk tih te chu a han zawt chiang leh vat bawk a.

Chu sumo driver chuan inspector hnenah chuan "ka pu, khami ni ni 12 ni khan aizawl lamah kal kan tum a, passenger pawh ka nei ve nual mai. Ka thian midang service ve te kha zing dar ruk ah an chhuak vek si a, keimah deuh chiah kha ka chhuah tlai dawn avangin passenger pawh kha Ka ngah angreng viau a ni. Tichuan mi pakhat, kan khaw mi pawh a ni hauh lo, a ni chuan ka sumo a chuan ve chu min rawn dil a, tunge anih ka hriat ngai awm ka hre hauh lo, kei pawh chuan a len theih nan chuan tiin pasenger lamah thahnem ka lo ngai ve bawk nen ka chuan tir ve ta a, kan tawt angreng viau nghe nghe mai.

"Tichuan dar 10 a pel tih chuan aizawl lam pan tur chuan kan chhuak ta a ni. Mahse ka pu, kha pa kha chu kawng lakah a chhuk daih mai a, kawng lak ka tih awmzia chu phaisen kan thlen hian thingpui in turin kan chawl lawk a, chutah chuan a chhuk ka tihna anih chu, khawiah nge a kal dawn tih ka lo zawt hauh lo mai a, a chin ka hre zui zel ta lo a ni"

Inspector chu a han rum nghat a, "imm, chuti anih chuan phaisen ah chuan a hnu ka chhui leh a tul dawn ani maw, phaisen ah chuan ala awm em? nge ni a chuta tang chuan hmun dangah a kal leh zawk ni ang? tiin a lu dawm chuan a inngaihtuah vang vang mai a. Kb thanga hnu chhui chu a hautak hrep dawn ani tih chu a hrethiam mai a, chumi hma chuan kb thanga chhung te leh a nupui chhung te lam chu kawm chian leh phawt a, an ni thu hla atang a awlsam zawk a kawng dap mai chu tha in a hre ta deuh nghe nghe a.

"Sir, zahminga leh lalsiami te inkarah hian kan lo rinlawk ang ngeiin engemaw neuh neuh chu alo awm ve tawh thin ngei e, hei mi thenkhat sawi hmang leh an chhung te han sawi hmang pawhin an ni nupa inkarah pawh inhauhna leh innghirnghona pawh alo awm phah ve fo tawh thin a ni awm e"

Inspector chuan "joel, i ti tha lutuk, chuan engtin zel?" a han ti a, joela chuan "mahse sir, hei erawh sawi lan vak an hreh ve hle ani tih a hriat a, sawi pawh an sawi hreh ve khawp mai, zahminga ngei pawh kha chiang zawkin thu te ka zawt veleh bawk a, ani ngei pawh khan zep lovin lalsiami nen chuan an ingaihzawn thin thu a sawi ta ani, mahse chu erawh nulat tlangval lai daih a mi a ni tawh a ni awm e, tun hnuah erawh an inkarah eng thil diklo mah a awm loh thu a sawi thung a, thian inkawm ngeih tak an nih thu leh in ngaina satliah ve mai an nih thu erawh a sawi tlat thung"

"Mahse, mi thenkhat sawi danah erawh a pasal kb thanga hian a nupui hi alo ringhlel ve fo tawh thin a ni awm e, tin an fanu remsiami pawh hi ama fa anih a ring lo ani awm e, zahminga hming hi chu a ri chiah lo na in kb thanga hian a nupui hi a ringhlel fo thin a ni tihna anih tak ber chu"

Inspector chuan "imm, chuti anih chuan kb thanga chuan a fanu nilo a a hriat lalsiami fanu chu kut pawh a thlak hreh ta hauh lo mai reng a ni maw? a hma zawngin kut thlak zawng emaw in a khawsa tawh ngai em? Joela chuan "sir, sawi tak angin tun hma pawhin an nupa chu thik thu chungchang leh in rinhlelhna thu hla ah an innghirngho fo thin a nih chu"

Inspector chuan "nilo joel, a fanu remsiami zawk chu kb thanga chuan kut a thlak tawh thin em tih lai a zawk chu ka hrechiang duh hle mai" a han ti a, joela chuan "chu zawng, ka lo zawt hauh lo mai sir, mahse hetia han ngaih mai hi chuan a ma nupui mai nilo a fanu ngei pawh a fanu anih a ring lo anih chuan a chungah that a chhhuah viau in ka ring tlat lo. Kut em a thlak ngailo anih pawhin tun ah a chhungrila thinrimna inmung chu thunun zolo in na takin kut a thlak ta tihna a ni mai a"

Inspector chuan "imm, zahminga vang vek hi anih ka ring tlat mai. He thil thlen chhan hi. He pa zahminga pawh hian mi nu alo ngaina lutuk mai leh alo kawm ngeih mah mah hi a harhchhuak tlai hret a ni, an inkarah eng thil mah awm lem lo mahse a pasal in a thik a ni tih te, a ringhlel a ni tih te chu hriatthiam ve tur hi a ni a, tin an nupa in kar a inrinhlelhna avang leh thik thu avang a innghirnghona awm thin te pawh chu hriatthiam ve tur hi a ni a.

"A thu hrimah mi nupui te lo thlakhlelh ve em em mai chu thil finthlak a nilo hrim hrim a ni. A zahthlak pawh a tilo e maw ni? A awmdanah leh a sawi hmang atang reng pawh khan zahminga hian lalsiami hi a ngaina in kawm nuam a ti hle anih kha, chuvang chuan he pa fimkhur loh lutuk leh a mawl vang vek a hetia nupa inkar a thil thalo thleng ta hi a ni ber e" tiin inspector chuan a chal chu a han dawm vang vang a.

Lalsiami leh a fanu dinhmun chu a thalo hle mai a, anmahni lah chu biak theih an la ni lova, a nu zawk lalsiami chu harh tha tawh mahse eng thil mah sawi pui chi ala ni silo a, a fanu remsiami erawh a hliam tawrh chu alo pawi deuh hlek mai a, a daih rei tawhin a rinawm ta silo, a tla hniam zel a, a lu a a hliam avang chuan a thluakah thi a tling nasa hle a, doctor te chuan an zai ngam lova, phai lamah an lo reffer a, mahse chumi an nghah chhung chuan remsiami nunna chuan a tuar chhuak zo dawn silo. Kawng lakah an inhlauh tho tho dawn ani. Vanduaina an tawh ni atang a ni thumna ni ah chuan lalsiami fanu chu a boral ta nge nge a, a chhungte leh lengte khawtlang chuan ui tak chung leh pawi ti tak chung chuan an thlah liam ta a ni.

Kb thanga chungchang a thuthar in a rawn zui ve leh ta bawwk a, thu pakhat an dawn na atangin kb thanga ni ngei tur a lang chu phaisen atang chuan dulte ah sumo pakhat ah a chuan thu dawn ani leh ta a. Chuveleh inspector chuan ngaihtuah na thar a nei thut a, kb thanga chhungte hnenah chuan a hriat duh ang thil te chu a han zawt chiang leh ta a.

Kb thanga nu nilawmi hnenah chuan "ka pi, i fapa hian phaisenah emaw dulte ah chuan hmelhriat emaw chhungte emaw a nei em? A han ti a, nilawmi chuan "ee ka pu, dulte ah chuan chhungte chu kan nei ngei mai, a hming chu vanhminga a ni a, mahming kan ti mai thin, kan in chhungkhatna erawh a hla tawh deuh, an ni chu biakpawh dan ka han dap dawn em ni? ka fapa chanchin leh a chin te pawh an lo hre maithei asin"

inspector chuan "han be nghal vat teh khai, tin hemi thu rawn report tu a sumo chuanna driver hi thil ka zawt chiang duh bawk ani, a ni hian i fapa motor atanga a chhukna emaw, a kalna chin emaw tlem te tal chu a hre tur a ni" tiin kb thanga phur tu sumo driver chu a han call nghal thuai a.

Driver chuan inspector hnenah chuan a mi phurh chu dulteah a chhuk ngei thu leh a kalna chin erawh a hriat mai bik loh thu alo hrilh a, inspector pawh chuan an in drop na lai chu a han zawt a, driver chuan kawn a bazar shed awmna lai a stand ah a chhuk thu alo hrilh ve bawk a. Chuveleh inspector chuan driver hnenah chuan chu lai bazar shed bulah chuan mi an awm leh awm loh te a han zawt leh a, driver chuan chumi lai ah chuan mi pawh an awm nual thu te hrilh in a kalna chin hria emaw lo mitmei tu emaw tal an awm beisei in chu lai hmun a chumi tum a lo awm ve te chu zawnchhuah a, an ni chu thil thlen dan leh kb thanga ni awm a lang an hmuh leh an hmuh loh te, khawi lam pan in nge a kal tih te chu inspector hnenah chuan chhui zui vat chi anih thu te a han hrilh ve mawlh mawlh bawk a. Inspector pawh chuan "imm, chhui zui vat a ni ang" tiin an inbiakna chu an titawp ta a.

Inspector chuan kb thanga kalna hnu te, a kual kawi dan kal hmang te chu han chhui dawn rauh rauhin a kal lehna tur ni a han ngaih theih tur chuan chumi khua thenawm phulmawi khua ah chuan thuchhuah chu siam tha in a hre ta a. Mahse dulte ah zawk pawh chuan kb thanga chu a innghat tawh maithei bawk. Chumi hrechiang tur chuan dulte ah pawh chuan information pek chhuah chu tha in a hre ta bawk a. Mahse rang taka chet a lak vat loh chuan kb thanga hnu chu a hlauh mai dawn in a hria a, tin kawng a kual thui lutuk chuan a hnu hlauh chu sawi loh a hautak mai bakah hun a duh rei dawn in a hre bawk ani.

Inspector chuan kb thanga nu nilawmi hnenah chuan enge chanchin tih ngaichang tur chuan nilawmi chu a han bia a, nilawmi chuan a fapa chu dulte a a chhungte chuan an lo hmuh loh thu leh a chin an lo hriat miah loh thu hrilhin nilawmi ngei pawh chuan a fapa pawikhawih chungchang te, an chhungkua a thil thleng chungchang te chu dulte a a hmelhriat te hnenah pawh chuan a han hrilh ve ta bawk a.

Inspector chuan "ka pi, heti hian i ti ang, i fapa chu dulte ah chuan ala cham khaw muang reng em? Tih hre tur chuan an khawtlang hruaitu te biakpawh theihna tur number kan mamawh a ni. I chhungte leh hmelhriat te chuan chu chu min kawhhmuh thei a ngem? a han ti a, nilawmi pawh chuan "aw ka pu, ka han hrilh a nge, mahminga hennah ka han sawi a nge, a ni chuan an khawtlang hruaitu te biakpawh theihna tur chu a hre ngei ang" tiin dulte lam chu a han be leh nghal vat a.

Dulte lama nilawmi chhungte hnen atang chuan dulte khawtlang hruaitu te biakpawhna number chu an rawn hrilh thei ta a. Inspector chuan rang tak chuan dulte khawtlang hruaitu te chu be nghal in thil awmzia chu a han sawifiah zung zung a, misual an um mek chu an khuaah chuan a awm a rin thu leh a hmel landan te, a san zawng leh a kum zat te sawi a misual anih thu te lo tlangzarh turin a han hriattir a, mahse a ruk deuh hlek a information chu pe turin a han ti a, amah misual ber hian fimkhur nan a alo hman mai loh nan a ruk deuh a amah misual chu an hriat theih nan leh police lam hnena an report vat theih nan information kalpui tur chuan a han ti a, khawtlang hruaitu te pawh chuan misual chu an lo thlithlai nghal thuai tur thu leh a tlanbo hma ngei a an lo man thuai tur thu hrilh in an inbiakna chu an titawp ta a.

Inspector chuan chu chu ala duhtawk mai lo, dulte khaw thenawm zawng zawng ah chuan information chu thawn chhuak vek turin thuchhuah a siam tir bawk a, chu misual chu lo thlithlai ru deuh tur leh misual ni a ngaihbel theih tur an lo hmuh veleh a lo man tur chuan hriattir in police lam in an lo ngaihchan reng tur thu chu a han hrilh bawk a.

Lalsiami pawh chu biak theih in a rawn tha chho ve tawh a, thil thlen dan chu a hriat ang ang han sawiin a pasal kb thanga ngei chu chu thil titu chu anih thu a sawi ta a, a pasal chuan mipa dang a thik thin thu te, ama fanu ngei pawh chu a fanu anih a rin loh thu te, tin chumi lai ram riak tur a an inbuatsaih lai vel chuan a thian hlui zahminga chu in ah a rawn chuan kai zauh zauh thu te, a pasal chuan zahminga pawh chu a ngaitheih loh thu te leh a rinhlelh thu te chu a sawi ani awm e,

mahse lalsiami chuan a pasal thikthu te, a rinhlelhna te chu thu dik lo ani tih hrilh in an in hnial thinrim chiam mai a ni awm a, tin ram riak tura a pasal a inbuatsaih lai chuan riak lut ta mai lo chuan thinrim engphiar hian a rawn haw a, chutah a nupui hnenah chuan heti hian a ti a ni awm a, lalsiami hnenah chuan a riah bo hlan a a ngaihzawng nen a hun lo hman dun dan a dap anih vaih chuan a rawn haw hunah a chungah zahngaihna a lantir dawn loh thu te a hrilh ta mai a,

a ni lalsiami lah chuan a pasal thu hrilh avang chuan hrilhhai tak chungin a thusawi awmzia a hriatthiam loh thu te alo hrilh ve bawk a, chutah chutia a pasal in midang a thik tlat avang leh a rinhlelh tak tlak tlat avang chuan an chhungkua a ram chu riak tlang mai tur chuan thu a ti tlu ta rum rum mai a, a pasal pawh chuan rem alo ti ve mai bawk a, tichuan an chhungkua chuan ram chu an riak lut ta a ni.

Mahse, ramah khan zahminga chu alo riak veleh ta si a, zahminga ngei pawh hi a pasal hian tun hma atang tawh a alo thik ruk thin leh a nupui nen pawh a alo rinhlelh ruk thin alo ni reng mai a, a hma zawng kha chuan a nupui leh zahminga inkawm ngeih leh inngaina thin tak pawh chu unau ang mai ti te pawhin alo fiam ve tawh thin a, mahse kha kha alo ti tak tak lo, alo rinhlelh ruk vang leh alo thik ruk vang vek alo ni a, chu chu ram an riah tum chuan a pasal chuan a hrilh ta vek a ni.

Zanah lah khan zahminga kha alo han leng chho leh kher kher si nen, kha te kha a pasal chuan zahminga'n a nupui a beisei vang ah alo ngai a ni awm a, a tawngkam leh chezia ah erawh engmah a tilang ngailo, mahse ama fanu ngei pawh chu zahminga fanu anih te chu a rin thu a hrilh ta piap piap mai a, tun hma pawh a ama fanu ngei pawh alo rinhlelh tawh thu alo hrilh tawh thin avangin lalsiami rilru na leh thin ur chuan a pasal chu run luih nan tiin a pasal hnenah chuan a fanu remsiami chu ama fanu a nilo tih a han hrilh ve ta sak mai a, tin a thik em em zahminga ngei nen pawh chuan an inngaihzawn thu te chu hrilh in a run luih ve ta a ni. Mahse le, khatia lalsiamin a pasal a han run luih kha a tih loh tawp tur thil alo ni.

A pasal thin ur khaw hmu lo chuan a chempui chu a la lawk a, lalsiami chu a sat ta sawk sawk mai a, lalsiami hlauthawng leh mangang chu a theihtawp in alo inveng ve nghal vat a, mahse a pasal khaw hmu lo chuan dimna tel miah loin nikhua a hriat loh thlengin a sawisa ta a ni, a fanu ngei pawh chuan a nu chu lo puih ve tum in a pa chu alo dang ve a, mahse a fanu ngei pawh chu a lu ah chuan na takin a hliam a, nikhua an hriat loh thleng chuan a nghaisa ta alo ni a.