THINLUNG DIK NEITU_Chapter-1

[April Hmar Liverpool]

Thinlung Dik Neitu

Laltanpuia

Bung Khat
#chhungkua a sualna leh bawlhhlawhna in bu a khuar tawh chuan chhungkua chu hremhmun ani ringawt tawh mai thin. Bawlhhlawhna leh sual chuan a tawpah thihna a thlen ta nge nge a. Fate leh nu leh pa te inkar hi a pawimawh khawp mai a, inlaichinna tha leh dik hi a pawimawh lehzual awm e#


Zing lam dar ruk a ni a, ni lum aiin pu lalthanhawla thanhawla chuan in chungah hun a hmang mek a, a rilru ah chuan ngaihtuahna tam tak a vakvel ruai reng a, an hma lawk a a fapa nupui nei tawh mai tur chungchang te ngaihtuahin chumi pah chuan an thenawm te, a fapa nupui la ni mai tur pensy-i te in lam chu a thlek leh vang vang thin bawk.





Kawngpuiah chuan mi veivak an kat nuk tawh a, tuk thuan ei a hun chho mai dawn nen, a rilru ngaihtuahna vakvel kar a hma hun a ruahmanna a neih te chu chhui dauh dauh reng in chutah tukthuan ngaihven turin in hnuai lam pan tur chuan a thutna atang chuan a tho chhuak ta a.





Chumi lai tak chuan hmeichhe te thawt ri hi a hria a, a ding nghal chawt mai. Hmeichhe te thawm chu tap thawm in a zui ta nghal a, ngun leh zual zawk chuan thawm lo chhuahna lam chu a han ngaichang a, chutah an thenawm te, a fapa nupui la ni mai tur pensy-i te in atang ngeiin a ni tih a hre ta a,





chuveleh pensy-i nu pi lalrindiki aw ngei mai chuan mangang leh lungchhe van kai hian "mama pa, harh teh, harh rawh, eng kan ti ta nge ni le aw, a va rapthlak tak em! Mama, mami, lo kal teh u, hei i pa hi a thaw tawh lo a nia" tiin a tap rawih rawih reng mai a.





Chuveleh thanhawla chuan a awmna in chung zawl atang chuan an thenawm te in lam chu a han thlek leh ngial a, an thenawm nu pi rindiki chu an motor dahna garage ah a awm ani tih a hre ta a, chuveleh thil thlen dan chu a pangngai lo ani tih a hrethiam nghal a, chumi rual chiah chuan an in atang chuan pi rindiki fate, francisa leh pensy-i te pawh chu hmanhmawh tak hian an nu awmna garage lam pan chuan an rawn tek chhuak nghal thuai a.





Thanhawla pawh chu a inngaihtuah harh thuai a, chutah pensy-i te chu enge thil awmzia a awmna atang a zawh tum a han auh mai chu tumin mahse a inngaihtuah chiang deuh a, chutah hmanhmawh tak hian in hnuai lam chu a pan ta zawk a.





In chhung a luh veleh chuan a fapa mike-a chu a au nghal vat a, "mike, mike, lokal vat teh" a fapa chuan a pa kohna chu alo chhawn nghal thuai a, "aw enge ni ta ka pa, enge ni? a pa awmdan chu a phawk lek hmel em avang leh a hmanhmawh hmel em avang chuan mike-a chu a hrilh a hai hle mai a,





"ka pa enge ni ta a? Thanhawla chuan "Mama, saw pi diki te sawn buaina na men lo an tawk mek ani ngei ang, kal teh khawnge i nu hi? Mike-a chuan "aa, ka nu chu zingkar khan bazarah a kal in ka hria" Chuveleh thanhawla chuan "imm, i nu chuan nakinah a la hre ve mai ang, kal rawh diki te in lamah chuan i va tleh phei ve vat teh ang, pu edena a thi a ni maithei, kal vat teh" tiin a kawr lum chu a ha nghal sawk sawk a, chutah hmanhmawh fe hian an thenawm te in lam pan chuan a chhuak ta nghal a, a fapa pawh chuan hrilhhai zet chung chuan a pa chu a zui ve ta vat a.





Thenawm dang te pawh chu an rawn pung khawm lat lat reng a, chumi karah chuan thanhawla chuan hmanhmawh leh phawk fe a miin an lo bawr laih laih na ah chuan va in hai lut ve rawih in, thanhawla chu a thil va hmuh avang chuan a meng zau kawk a, rapthlak tih hmel fe hian a then sak mai. Pi lalrindiki chu a pasal nunna nei tawh lo ani tih hriat tak leh hmel dang bal mai, a hmai thisen khar in a bual khah vek tawh chu lainat taka lo kuah vawng vawng chung chuan alo tap rawih rawih reng a.





Mike-a pawh chuan thil awmzia a han hmuh ve takah chuan rapthlak a ti ve kher mai. Pi rindiki fate kiangah chuan a tawlh hnai thuai a, pi rindiki fapa francisa hnenah chuan thil awmzia chu a han zawt a, francisa chuan mittui parawl teuh chung chuan a pa chu a thih tawh thu alo hrilh a, chanchin kimchang deuh zawk chu han zawh leh a duh viau na a a insum ta zawk a,





chuveleh francisa u pensy-i, nakin lawk a a nupui ni tawh mai tur chuan mike-a chu lo kai hrang thuai in, chutah hlauhthawn hmel tak leh mangan hmel tak hian "mike, a rapthlak ka va han ti tak, hetiang thil kan chhungkaw chung a alo theng ta thut mai hi tawrh thiam a har ka ti takzet a ni" tiin a insut nghal hlawp hlawp mai a, mike-a chuan pensy-i chu a ban a han vuan in "pensy, hlauthawng reng reng suh, i bulah ka awm zel dawn alawm, engtia thleng nge tih te, thil awmzia hi i hre ve em? A han ti a,





pensy-i chuan "mike, ka nu chuan mi thah anih a ring a, police hnenah thlen a duh a", a han ti a, mike-a chuan mak tih hmel zet hian "e khai aw, chu a va serious hmel ve aw, pensy, i pa chu misual in an that tihna a niang maw? a han ti deuh ha a, pensy-i chuan "ka hre tawh bik lo, ka nu tih dan ang ang ani tawh mai. Mike ka pa chu ka va han lainat tak em! A na ka ti em mai" tiin a inhnit zui leh hlawp hlawp a.





Thanhawla hi yma hruai tu te zing a mi anih a vangin thil thlen dan leh chanchin kimchang te chu pi rindiki hnenah chuan alo zawt ve luam a, pi rindiki pawh chuan in ngaihtuah harh in yma hruaitu te hnenah chuan a pasal chu misual kut tuar a boral anih a rin thu chu a han sawi ve ta a, thanhawla pawh chuan mak tih hmel fe hian "ngawi teh pi rindik, misual thil tih anih i ring a maw? ngaihtuahna fim tak kan put tlan a tul hle a nia" a han ti a, pi rindiki chuan a thenawm pa, nakin mai a a fanu pasal a pa la ni mai tur chu han en in "pu than, ka pasal hi hetiang a he lai a chesual a thi mai thei dinhmun a ding turin taksa lam hriselna ah pawh in sawiselna a nei lo ani tih ka chiang, khawngaih in police kan hriattir vat a tul a ni" a han ti a,





yma president chu alo inrawlh ve vat a "ni e, engpawhnise he lai maiah misual a rawn ngampa viau anih chuan hma kan lak vat a tul anih chu pi dik, i tawrhna leh i hlauhthawnna chu ngaihthah mai chi a ni hauh lo mai" alo ti ve bawk a, thanhawla chuan ngun taka ngaihtuah in "ngawi teh u pu muanzo, rilru fim tak kan put tlan a tul ani, police lam chu nakin lamah pawh ala hriattir theih tho va, tin misual kuttuar emaw alo ni lo ve thei a, mi kan ti phawklek lutuk zawk a nge, tin ka tawng huatthusuh ah police lam hriattir ngawt mah ila eng vak an ti thei bik chuang in ka ring lo, tunah rih chuan pu edena ruang hi kan buaipui vat a tul ani, hetia he laia a ruang hlawm loh a a awm reng hi a tha lo ani" a han ti a,





Chuveleh rindiki chuan "nilo pu than" tiin zingkar a a pasal ruang ava hmuh dan chu kimchang takin a han hrilhfiah a, rindiki vek chuan "nilo, heti ringawt chuan misual hi kan chhuah tur a nilo, police lam chu hriattir vat ila ka duh a ni".





yma president pawh chuan thanhawla ngaihdan chu lo tawmpui ve in "imm pi dik, police lam chu keiman ka lo hriattir vat dawn nia, tunah rih chuan pu edena ruang hi kan hlawm a tul ani. Hetia he lai a a ruang hlawm loh a a awm reng hi a dik lo e" tiin tlangval thenkhat te nen chuan pu edena ruang chu in chhung lamah chuan an zawn lut ta a.





Yma hruaitu te leh thanhawla chuan pi rindiki fate chu thil thlen dan te an han zawt ve luam a, thanhawla chuan an pa chu damlohna emaw, taksa lam chak lohna emaw a neih leh neih loh te zawt in, tin garage pawh chu uluk tak a enfiah a duh thu te chu a han hrilh a, rindiki fate pawh chuan an thenawpa ni bawk, an pa ang mai a an en leh an ngainat em em, pensy-i pasal hual mike-a pa thanhawla ngaihdan chu tawmpui in garage hmunhma te chu an han en thlithlai pui a, thanhawla chuan pu edena'n a lu a tauh theihna lai tur te chu uluk takin a han en fiah a, tin a monu la ni mai tur pi rindiki fa, pensy-i te chu a theih ang tawk chuan a han tawng thlamuan ve bawk a.





Pensy-i nau Francisa chuan "pa than, ka pa chu taksa lam chak lohna neiin lu haiin a tlu a nih i ring tihna em ni? a han ti a, thanhawla pawh chuan "imm ring e, zep loh chuan, a chhan chu he laiah misual emaw rukru han chetna hnuhma engmah hmuh leh hriat tur a awm lo ani awm si a" a lo ti a, francisa u pensy-i chuan "pa than, i ngaihdan chu a awm ang viau a, in ah pawh misual chu alo lut lem lo ani ngei ang a, mahse ka nu rindan pawh kha hnualsuat ngawt chi chu a nilo in ka hria, lirthei ruk tum ka pa in a va man pawh ani maithei asin, chu chu misual chuan lo hmu in ka pa chu kut alo thlak ang a, a tlan chhe zui ta pawh a ni thei asin" alo ti thung a, "ni e, a dik thei tho mai, mahse i pa khan misual emaw rukru emaw hmu chu nise a au thawm emaw hriat tur a awm ngei in ka ring tlat ani" thanhawla chuan alo ti thung a.





Inspector remruata chu a thut hmunah chuan hun kal tawh chhui kir in a mit a chhing vang vang reng a, kum kal ta mai kha ala ni, mahse khami ni ang reng reng a a chhungril a mal leh khawharna a a khah liam tak ang kha ala hre ngai lo, nancy-i pasal neih ni a ni a, Nancy-i chu a hmel a hlim in a zangkhai vah mai a, mahse a ni tan erawh Nancy-i kha a lawmpui lo ni hauh silo khan a hmel zangkhai tak leh hlim hmel tak kha hmuh a hreawm ru tlat a, a ruk in mal leh khawhar ta riau a inhriatna a nei lo thei lo ani.





A pasal tur kha a mi hriatchian leh amah remruata nen ngei pawh a nunhlui lo nei ve tawh thin an ni a, a diktak chuan remruata ngaih a thalo ru tlat a ni, Nancy-i pasal mukesha chu mizo ni chiah lo mahse a khawsa thei in a hausa a, tin a hming a tha in thil pawh a ti thei a, mi tam tak ngaihdan ah chu inneihna chu hnam dang nen a inlaichinna chungchang anih tel tlat avang in boruak pawh kha an nei lian ru hle reng a.





Engvangin nge a thinlung mil pui leh a mize mil pui ni thin, a tan a khuanu ruat ni ngei a alo ngaih thin, engtik lai pawh a amah tawiawm a hrethiam ber thin tu Nancy-i khan hnam dang tawnah khiang a awih san theih mai zawk le aw, pasal neih alo duh ru thin hle anih pawhin vai kher kher chu thlang tur ani lo asin maw le, tin he pa mukesha, sumdawng hausa leh amah remruata te hian nunhlui duhawm lo tak mai an lo nei tawh nghe nghe a, khang thil thleng te avang pawh khan Nancy-i chu a dem ru lo thei lo ani.





Rinpuia chuan za lo zet a han khuh khak khak pah chuan lunglen hmel fe a inspector in Nancy-i nen a an thlalak alo en vawng vawng lai chu a rawn tibuai a, "hello sir, a va leng awm vawng vawng bawk ve maw le" inspector chu inngaihtuah harh thuai in "e rina, nang i ni maw? aa, nia hei sulhnu te ka lo chhuikir mai mai. Lo thu la" alo ti thuai a,





rinpuia chuan a pu chu ngaihtuah hmel zet a han en vang vang chung chuan "sir, Nancy-i te chu nunhlui an chang tawh alawm, tunah chuan midang ta ani tawh, midang kan zawn ve a hun tawh zawk lo em ni? A han ti a, inspector chuan nui sak pah chuan "rinpui, Nancy-i kha ka lo ngaihthah mah mah niin ka inhria, lehlamah chuan hna ah ka buai thin si a, a ruk in alo khawhar in alo mal thin ngawt in a nia ka rin hnuhnawh ni. A pasal min neih san tak berkher a lah hi" tiin Nancy-i thlalak chu uluk fe hian a han en leh vang vang a, rinpuia chuan "sir, mukesha te chu a hausa em alawm" alo ti a,





inspector chuan a mit ko chu han san ak in "chu, Nancy-i chu hmangaihna aia rosum thlangah i puh deuh tihna a niang maw? a han ti a, "nilove sir, vai ho hi an duhna lamah hi chuan chet lak an sam lam thin viau a nia, an thil duh an hmuh fuh tawh hi chuan" a han ti a, inspector chuan "haha, chu, vai pa chu kei aiin a zei zawk i tihna nge ni a Nancy-i lakah kei hi ka tling tawk lo i tihna? a han ti a, rinpuia chuan "ni lah love sir, hetia kutsuih meuh a pumkhat a an han insiam tak rum rum ah chuan thil engemaw tak hi chu a awm tur ni ah han ngai phawt mai ila" a han ti a, inspector chuan "imm, ka hrethiam tawh bik love, hmeichhia ho hmangaihna ve hi zawng mipa te hriatthiam mai mai theih pawh a ni ngut lo ani a nge" tiin thlalak bawk chu a thlek leh vang vang a.





"Rina, mukesha nen hian chanchin duhawm lo tak kan lo nei ve tawh asin" rinpuia chuan inspector chu han thut hnaih sauhin "engtin maw sir, mukesha nen i ti e law? a han ti a, inspector chuan "ni ang chu maw le, mukesha hi sumdawng hausa tak ani tih chu kan hria a, mahse he mi phenah hian mi hlauhawm tak leh mi tenawm tak a ni asin"





Rinpuia chuan a beng chu han dawh hnai deuh ha in "a ai a chiang zawkin sir" a han ti a, inspector chuan "haha, ni e, keimah te riau riau hi min dem leh hnuhnawh si a nge a" a han ti a, rinpuia chuan "a engvang ngawt chuan maw sir, mukesha chu mi hlauhawm a ni tak tak em? inspector chuan a aw ki chu a ai a zawi mah chuan a han hniam a, chutah thutak hmel fe hian "ni e, hun kal tawh chu a ni ngei mai, tumkhat chu kan duty laiin report kan dawng a, chu chu dan phal loh bungrua ramri ah inhlanchhawn chungchang a ni a, chu ta a bul tum tu ber chu he pa Nancy-i pasal duhtak mukesha hi a ni asin,





"kha tih lai khan kan rank kha ala hniam a, pu te thu awih kha kan tih tur a ni mai a, mahse kei chuan mukesha kha kha ti mai a chhuah zalen kha ka remti ve hauh lo, tichuan mukesha nen chuan buaina kan nei chho ta zeuh zeuh reng a, keimah nen khan kan intawng fuh thei riau lehnghal, a ni kha dan phal loh thil ah a inhnamhnawih nasa tih ka hrethiam chho zel a, chu mai ala nilo, tumkhat tualthihna nen a inkaihnawih thil ah mukesha hming chu a ri tel ve tlat mai, chu thihna pawh chu dan phal loh thil avang a buaina chhuak a thleng ani.





"Tichuan chumi buaipui chuan keini department lam kha kan buai hle mai a, mukesha chu kan rek fuh thei meuh lo, mahse a tih dan tur leh mukesha kha a thil tih dik loh man a hnungkhirh tur khan kei khan ruahmanna ka siam thei tlat lova, a chhan chu sawi tak angin ka rank a la hniam a, pu te thu awih kha ka tih tur anih mai si avang khan ani,





"Tichuan mukesha chu a mimal takin ka chhui ru ta a, dan phal loh thil an kawl chungchang te, ruihhlo ah pawh inhnamhnawihna an neih thu te thleng chuan ka hre ta a, tin tualthihna ah pawh khan a bul tum tu anih ngei chu ka ring tlat bawk ani, tichuan tumkhat chu mukesha chu ka bia a, a thil tih engkim leh a sumdawnna tenawm ru tak pawh chu ka hriat vek tawh thu leh man theih anih thu te chu ka hrilh a,





"chuta tang chiah chuan mukesha chuan kei chu min chhinchhiah bik ta riau hian ka hria ani. Ni e, heti hian ka ngaihtuah a, ka hmangaih ber min laksak tak danah thleng hian kei chuan rindan leh zeldin eng eng emaw chu ka nei lo thei lo ani. Ka lak a a phuba ah ka ngai anih pawhin thil awm lo ani hauh lovang"





Rinpuia chuan "mahse sir, hei tunah chuan nangma duhdan leh ruahmanna ang ngei in thil thalo i chinglet thei tawh a, mukesha pawh chu a thil chin thalo te alo la sim lo anih vaih chuan Nancy-i hma a mualpho leh zak ngawih ngawih tur khawp a siam turin right i nei tawh alawm" a han ti a, inspector chuan "nilo rinpui, he pa mukesha hi a fing in a phakar lutuk tlat, tin sum alo nei bawk a"





Rinpuia chuan "chu, i cho loh val in i hmangaih a chhuhsak che tihna a niang maw? alo ti a, inspector chu a han rum nghat a, "ngawi teh, tunah zawng Nancy-i chu ka tan a awm ve tawh chuang hleinem, han chan leh tur chuang ka nei tawh em ni? ka chan zo vek tawh tho va"





Rinpuia chuan "sir, i chhungte ila nei a, keimah pawh ka la awm hi, chutin i rilru siam mai lo teh" a lo ti a, a nui var var bawk a, inspector chuan "ni e, khaw nge keimah ber hi in thin harh ka ngai ani. Nunhlui avang mai mai chuan buai reng ka duh bik hleinem, ni e a tul te anih chuan he pa mukesha thil chin thalo hian ka hnen alo la thleng ve leh mial mahna le, chumi hun chu alo thleng anih ngai chuan chu mi hun atan chuan ni zawk teh se, tunah rih chuan hei, case buaipui tur kan neih kha" tiin dawhkan a file chu a han keu malh malh a.





Police te an rawn thleng a, yma president chuan pi rindiki hnenah chuan "pi dik, a ni hi police inspector ka hriat tawhah chuan a tha ber te zing a mi anih hi" tiin inspector remruata chu a han hmelhriat tir a, pi rindiki pawh chuan inspector hmel a han hmuh takah chuan hahdam huai hian a inhria a, chutah han thawk huai pah chuan inspector hnenah chuan "ka pu, thil thlen dan chu hetiang hi ani" Tiin a pasal garage a thi a a va hmuh dan chu a han hrilh ta malh malh a,





inspector chuan rinpuia hnenah chuan "rina, garage leh a chhehvel chu lo enfiah teh u" a han ti a, inspector vek chuan "pi dik, ka lo pawtchat lawk ang che, i pasal ruang i va hmuh chuan eng ang hmel hmang nge alo put? ka sawi awmzia chu a landanah a thihna a rei tawh nge ni a a thihna ala rei lo? a thisen chhuak dan atang te, a hmel hmai landan te leh a taksa khawng leh khawng loh danah te chu chu i hrethiam mai ang a", a han ti a,





pi diki chuan "ka pu, ka pasal kha zing lam darruk bawr velah a nia ka va hmuh ni, kan fapa francisa hi hmun dangah hna thawkin a awm a, nizan khan alo haw dawn a, mahse a rawn haw tlai deuh avangin keini ka fanu pensy-i leh ka pasal te nen khan kan lo mutsan tawh ani"





"Chu, in fapa chu alo haw lai in hre lo tihna nge? inspector chuan alo ti vat a, rindiki chuan "aw, kei kha chuan francisa lo haw lai ka hre hauh lo. Ka lo muhil tawh ani ngei ang, tichuan zingkar ah hma takah ka tho va, eirawngbawl tur te ka buatsaih hnu chuan nizan lamah mama chu a rawn haw leh haw loh chu ka ngaihtuah a, tichuan kawngkhar inkalh lova kan dah kha alo inkalh avang in alo haw ngei tih ka hria a, tichuan pawn ah chhuak in garage lam ka pan a, mama lirthei pawh alo awm ngei, mahse le motor kiangah chuan ka pasal chu a hmel hmai lang thei chin dang vek leh a lu a thisen chhuak nuai chung a lo thi khawng reng chu ka va hmu ta mai ani. Ka te thawt a, ka mangang lutuk leh ka hlau thawng lutuk chu ka tap nghal hawm hawm a, ka fate ka au nghal bawk ani"





Inspector chuan "tichuan i pasal chu zan lama thi tihna a niang maw? alo ti a, rindiki chuan lungchhiat hmel taka han inhnit hlap hlap pah chuan "aw ka pu, chu chu thil ni thei niin ka hria, a chhan chu a taksa kha alo khawng vek tawh a, thisen pawh kha a khar vek tawh a, garage ah pawh thisen khar tam tak hmuh tur ala awm bawk, chuvang chuan a thihna a rei tawh anih ka ring, zan lama thi anih ka ring ani"





Inspector chuan "imm, kawngkhar lah chu chhunglamah a inkalh thlap bawk si a, i fapa rawn haw hma in kawngkhar chu kalh lovin in dah a, tichuan i fapa rawn haw chuan a lirthei chu garage ah a dah a, tichuan kawngkhar chu a kalh thlap a, mahse chumi lai bawr velah chuan thil thleng a awm tur ani. Pa ber chu garage ah tawhsual tawkin a let reng a, chu chu i fapa chuan a hmu lo palh hlauh tihna a niang maw? awmze awm tak chuan inspector chuan a han ti a,





Rindiki chu a harh kawk mai, mahse inspector thusawi chuan a thawng in a deng na ru hle thung ani tih a hmelah chuan a lang reng a, "mahse pu inspector, misual emaw rukru thil tih niin ka hria" rindiki chuan a han ti tham tiak a, inspector chuan "rukru chu i hmu em ni? In ah alo lut em ni? Nge ni a rukru chet na hnuhma emaw sulhnu emaw hmuh leh hriat tur a awm em ni? Inspector vek chuan "ka pi, i pasal chu i bulah a mu ve reng awm si a, a tho lai emaw pawn lam a a chhuak lai emaw engmah hriat i nei lo tihna em ni? Rindiki chuan "aa, pu inspector, ka pasal nen hian kan mu dun hleinem, thil sawi nuam tak phei zawng ani hauh lo, mahse kar liam ta atang khan room hran ve ve ah kan mu hrang alawm"





Inspector chuan "chu zawng, in nupa kar thu hla lam anih hmel a, a pawimawh anih erawh chuan kan la in zawt leh zawk dawn nia, i fapa hmun dang a hnathawk a awm nizan a in lam a lo haw chu thu zawhfiah ka duh a ni"





In chhungah chuan rinpuia chu alo lut a, inspector hnenah chuan "sir, he lamah, thil pawimawh tak mai hmuh tur a awm e" a rawn ti a, chuveleh inspector chuan "ka pi, i fapa chu han ko ta che" tiin pawn lamah chuan a va chhuak ve ta a, rinpuia chuan garage thlang a tuichhe luankawr awmna lamah chuan inspector chu lo hui in "sir, he lamah" alo ti a, rinpuia chuan tuichhe luankawr a mi thing bung pakhat thisen khar kai nuan mai hi a rawn lek kang va va a, chutah rinpuia chuan "sir, tualthahna ngei chu niin a lang" a rawn ti a.





Inspector chuan "rina, hmun dang dang kha han dap kual zel teh u" tiin garage chhung a thisen kai nuan awmna lai vel chu ngun zet hian a han thlek vang vang a, garage atang a in awmna lam ah chuan leiah hian thisen far na hnu ni ngei tur chu a hmu tel bawk. chutih mek lai chuan a lam pan hian pi rindiki leh a fapa ni ngei tur chu an rawn inchhawm phei hnak hnak a, inspector chuan pi diki hnenah chuan "hei hi i fapa chu em ni? A han ti a, pi diki chuan "aw, a hming chu francisa a ni e pu inspector" a lo ti a,





inspector chuan francisa chu han melh vang vang in "francis, hei hi i bike a niang ti raw? nizan a ilo haw na kha" tiin garage a bike chu a han kawk a, francisa chuan "aw ni e ka pu" alo ti a, inspector chuan "aw le francis, nizan khan helaiah i bike i dah lut lai vel khan i pa nen in in hmu em?





Francisa chu a phawk kher mai "ai aih, hmu lo ka pu, ka pa ka hmu lo hrim hrim" alo ti bah nawk mai. Inspector chuan "dar engzatah nge in ilo thlen?" a han ti a, francisa chuan "ka chiang lo, dar zat en na chang ka lo hre lo a"





inspector chuan "awle hei hi thil awmdan ni a lang chu ani, ka pi i pasal hi in mut hnu ah khan a mutna atangin a tho leh a, mahse i fapa lo haw hma in a ni, i fapa hi lo haw tawh in a mut tawh hnu a i pasal chu pawn a chhuak ni ta se chu zingkarah khan kawngkhar chu alo inkalh lo ngei ang. Mahse kawngkhar alo inkalh that thlap danah i fapa alo la haw hma in i pasal chu pawnah a chhuak a, i fapa chu alo haw a, chumi lai hun ah chuan i pasal chu garage ah hian a thi tawh niin a lang, i fapa hian kawngkhar a kalh thlap si a, chuvang chuan i fapa hi thil engemaw tal hre tur a rin theih a ni ang.





"I pasal pawn a a chhuah chhanah chuan chhan engemaw tak vang anih loh vek pawh in awmzia thui tak a nei thei tlat bawk ani, engvang a a mut tawh hnu a tho leh nge anih? chu chuan chhan hrang hrang a nei thei a nga, chung zing a ngaihbel theih ber tur ni a lang chu a fapa hmun dang a awm chu alo haw dawn vang a ni thei ang, a fapa thawm chu a hriat vang a ngaihven tura tho pawh a ni thei"





Rindiki leh francisa te chu an ngawi reng a, inspector bawk chuan "tichuan misual chuan pawn a chhuak i pasal chu he thing bung hmang hian a khawng tlu ta a, tichuan thlang lam a tuichhe luankawrah khuan thingbung chu a paih ta a, he laiah hian thisen farna hnu ni ngei a lang hnuhma a awm bawk a" tiin inspector chuan chik leh uluk zet hian lei a thisen farna hnuhma chu a chhui zui nghal vut vut a, chutih pah chuan "rina, thil dang hmuh in nei em? thisen far emaw thisen kaina hnuhma puan emaw thawmhnaw emaw" tiin Rinpuia te chu a han au pah bawk a.





rinpuia chuan "sir, uluk takin in leh a vel hi kan en chhuak dap tawh, thil dang engmah kan hmu lo" alo ti a, chutah inspector chuan lei a thisen farna hnuhma chhui zui tur awm lova a tawp tak ah chuan uluk fe hian in leh a vel chu a han thlek kual dauh dauh a, chutah hmanhmawh zet hian bawlhhlawh bawm awmna lam chu a pan ding nghal vut a, bawlhhlawh bawm chu a va hawng rawk rawk a, chutah inspector chuan bawlhhlawh bawm atang chuan sweater thisen kai nuan mai hi a rawn khaichhuak ta va va mai.





Rindiki leh midang chuan inspector in bawlhhlawh bawm atang a thisen kaina kawr a rawn khaichhuak ta mai an lo hmuh veleh chuan mak tiin an meng zau kawk kawk hlawm a, chutah rindiki chuan rapthlak ti fe hian "lalpa leh! ka duhthei lo, mama i kawr a ni lawm ni? Lalpa leh! ava rapthlak em! mama eng thil nge i tih tak mai le? pu inspector, kha thil kha engtin nge kha laiah khan a awm tih i hriat theih?





Inspector chuan rum mangkheng hian francisa chu a han din hnaih a, "francis, hei hi tu kawr nge? Francisa chu mak tiin a mengphar awn awn thei hial mai, "sir, kha chu keima kawr anih kha" inspector chuan "ni e, khatih lai khan i pa chu nangma lam panin garage ah a rawn kal a, nang nen chuan enge in inkar engmah ka hre lo, mahse chhan leh vang tha tak avang a khatia i pa kha thing bung hmang a a lu a vaw ta kha i ni ngei ang" inspector aw chuan ngaihno a bei lo kher mai.





"Sir" francisa chu a thaw hawk a, mak tih avang leh hrilhhaina avang chuan lu hai in a tlu thelh nghe nghe a, "nilo, a nilo, keima thah a ni thei lo, engvang in nge ka pa, min duat tu leh min duhsak em em tu, min hmangaih tu ka pa ngei chu ka kut ngei a ka thah theih tehlul ang ni, ka va hrethiam lo em aw" a chal chu a dawm vawng vawng mai a, a en ngai chu a melh tlawk tlawk ringawt mai.





Inspector chuan "i pa a lu a i vuak hnu khan i pa hrilhhai lutuk leh mangang lutuk khan nangmah kha a rawn bawh rawk rawk che a, i pa hmelah chuan engvang nge tih a hmuh theih hial ang, tichuan nang chuan i pa chahthlak hnu chuan i kawr a thisen kai nuan mai chu thuhrukna i dap ta nghal a, mahse ka rin loh daihah bawlhhlawh bawmah i thukru ta ani. A chiang em?





Rindiki chuan a fapa chu en vawng vawng in "mama, hetiang em em a chiang hi ka la hre ngailo" Francisa chu a tap lo chauh tawh "nilo ka nu, u pensy, inspector hi han hrilhfiah teh u, keimah ka ni thei lo, engvang in nge ka pa chu ka thah theih ang ni, ka pa te chuan min duat zia leh min hmangaih zia te chu in hre ve reng ani lawm ni? Engvang in nge ka thah theih ang?





Inspector chuan "imm, francis lo kal rawh le, rinpui, kawl kha han bun tir ru le, lock up lamah kan in hrual deuh chu a ngai dawn ani" Francisa chuan mangang fe a a nu leh a unau nu chu en in "nu, ka u, keimah ka nilo a nia aw, kei leh ka pa inkar chu in hriat ve vek kha, engtik lai mah in ka pa hi thah duhna rilru ka pu ngailo ang, ka tiam a che u Pathian hming in, ka thah a nilo" a aw chu a khur hlawk hlawk thei hial a, thinurna leh hrilhhaina a hriat tel theih.





Rindiki chuan "ngawi lawk teh u pu inspector, mama thusawi te kha thudik tak a ni asin, mama leh a pa inkar hi midang zawng aiin a tha asin, an pafa hian an in ngaina a an in nel in an in pawh em em asin, Mama, Pathian hming meuh i chhal ngam si a maw? Hriatthiam loh hmel tak chuan a fapa chu a en a, a unau nu pensy-i chuan beidawn hmel zet hian "mama, i thil tih a nilo tak tak a maw? alo ti ve bawk a,





inspector chuan nin hmel zet hian "aw le a tawk e, rinpui thing bung leh thawmhnaw kha evidence atan la ang che u, hun in lum leh kual dan vel nen pawh a han chhui dawn in i fapa francisa hi chiang taka tualthattu ni ngei a lang chu ani. Francis, tha takin thil awmzia min hrilh vat mai rawh, chuti anih loh zawngin police te hian mi dawp dan an thiam a nia" tiin francisa chu a han vau khur khur a, francisa chuan lungawi loh hmel fe hian "pu a, in thil tih hi in hre lo ani, keimah ka ni reng reng hleinem" tiin a rum hawk hawk mai a.





Inspector chuan "imm, sawi tam vak a tul lo, kal ru kan kal thei e" tiin francisa chu kawl a han bun tir ta a, francisa chuan lungawi lo fe chung chuan "thudik chu in la hre leh dawn tho tho alawm" tiin a hawi tau nghat nghat mai, inspector chuan dim lo zet hian francisa chu motorah chuan a nam lut nghal rawk rawk a, chutah rinpuia hnenah chuan "kal ru le" a han ti a, chumi pah chuan rindiki hnenah chuan "ka pi, thil awmzia chu in duh chuan saw lamah in rawn ngaihven thei ang" tiin station lam pan chuan an in khalh chhuak ta a.





Rindiki chuan a ngaihtuahna buai mup mup reng chu hahthlak a ti kher mai, a tu pa pensy-i fapa kum 1 lek a upa bena chu han pawm in "mami, bawihtea hi chaw i pe tawh em? a ril te hi a tam tawh a nge" a han ti a, pensy-i pawh chu thil thlen dan avang chuan a ngaihtuahna a buai ve takzet, mak tihna leh hrilhhaina in a khat ani. "Nu, khawi ka lo pe ang, a ril a tam tawh ngawt ang" alo ti ve vat bawk a.





An thenawm te pafa chuan rindiki te chhungkua chu rawn fin ve thuai in thanhawla chuan "imm, ka rin loh lam daihin thil a kal tlat mai, diki, francisa chungah hian eng thil nge thleng ta hi? enge a awmzia ka va hrethiam lo ve maw le aw" a han ti a, rindiki chuan "pu than, kha, thil awmzia chu kan hmuh vek kha, mama lo chu han rinhlelh tur midang an awm lo ani" Alo ti a, thanhawla chuan "chu tak chu a ni mak ka tih ni, an ni pafa te chu an induat thin hle ani si a"





"ni e pu than, thil zawng zawng hi kan hriat vek chi loh pawh a awm a ni a nge" thanhawla pawh chuan hriatthiam hmel tak chuan "imm, a pawi hle mai, khaw nge kan tu pa pawh chu a nu hian chaw a pe em ni? Ka va hmu lo ve, bawihtea ka hmu duh riau mai" a han ti a,





rindiki chuan thanhawla fapa mike-a hnenah chuan "kha, a nu nen chaw an in pe anih kha, mike, choka lamah sawn an awm ang" a han ti a, mike-a pawh chuan "aw le nu dik, ka va phei ve a nge" tiin choka lam pan chuan a phei ve ta thuai a.





Rindiki pawh chu pasal sun hlawt e tilo chuan hmanhmawh tak in a fapa awmna lam pan tur chuan a insiam nghal mawlh mawlh a. Thanhawla chuan "kalo zui ve ang che" alo ti vat a, rindiki chuan "nilove pu than, he lamah nang ni in in leng te hi lo kawm ru, in pafa hian kan chhungkua hi min lo uap mai ru,

kei hi mama ngaihven turin ka tek chhuak a nge, a na hi ka ti em ani, mama hian hetiang thil a tih na chhan diktak hi ka hre vat duh ani" tiin kalchhuak tur chuan a insiam pah mawlh mawlh a.