PSYCHIC VOLUME III_Chapter-1

[April Hmar Liverpool]

PSYCHIC Volume-3

Laltanpuia

Bung Khatna


#He thawnthu a thil thleng hi awih har tak tur leh pawm har tak tur ani. Pastor k.lalngaihawma chu thah niin a lang a, a bul hnai a awm vanlalsailova chu tualthattu nia lang ani. Hun in lum leh kual dan atang te, pastor leh vanlalsailova inkar chungchang atang te, vanlalsailovan hun an hman dun dan a sawi dan atang te leh evidence an hmuh atang te chuan phat rual loh in vanlalsailova chu misual ni ngei in a lang. Tin hetih lai hian mi pa thum pastor thla hmu ni a insawi an rawn lang bawk. Chung te chuan awmzia a nei a ngem ti a inspector leh a nau ten hma an lak mek zel lai chuan a tawpah erawh rin loh lamah a hmawr bawk a tul ta thung#




Inspector remruata chu amah rawn kan tu te hmel alo hmuh veleh chuan alo thaw hawk a, chutah a lam pan a a nu leh a pa, amah ngaihtuah hmel taka lokal mek te chu lo chhawn nghal thuai in,



"Ka pa, ka nu, in lo kal a ni maw? alo ti a, a pa frederick rindika chuan a fapa chu ngun tak chuan a han en a, "mama, ilo tha zel ang chu maw? a nu pi mapuii pawh chuan "bawiha, nangmah ngaihtuah hian mutmu pawh kan tuah tha meuh lo asin, hma lo sawn zel la ava duhawm dawn em! alo ti ve bawk a.



Remruata chuan a en ngai chu a en reng a, chutah muangchang a a nu leh pa te chu han en leh in "ka pa, ka nu, ka tha tawh viau ania, min ngaihtuah lutuk duh a nih kha, ka zia chho zel alawm, ka dam that veleh ka lo chhuak ve leh tawh mai dawn a, hei kar khat bak a ngai tawh hleinem" a han ti a,



a pa chuan "ruata, heti khawp a rilru lam a harsatna ilo nei reng tawh chung a kei leh i nu te hian engmah kan lo hrethiam ngailo kha chu a pawi ka ti takzet a ni, i hna te hian a tuar zel lovang chu maw? a han ti a, "ka pa, chu lam zawng i ngaihtuah rih lovang u, tunah zawng hei min han en ula in fapa hi ka tha tawh khawp ania, enge mami chu a an tawh? A nu chuan "mami pawh a tha chho zel e, a ke ruh a tliak lo hlauh a, a tlukna lamah a lu a sawh na deuh a, thisen a hlauh nual nen a chau deuh mai alawm, tunah chuan a tha tawh lutuk ania"



Remruata chuan van lam chu en in "ka va lawm em! Ka nau chu lo dam tha zel teh se" a nu chuan "ni e, kha amah su tu motor neitu pu auva lah khan hei tun thleng hian a khat tawk hian min rawn tlawh awl lova, mami dinhmun a that leh a that loh thu te a rawn ngaihven reng a, a inthiam thei meuh lo mai a, a driver pawh a ban hial thu te a sawi a"



Remruata chuan a hun tawn mek chu a ngaihtuah dauh dauh reng a, a nu leh a pa te pawh chuan an fapa chu thlamuang tak leh hahdam taka awm tura chah in an tinsan veleh ta a.



Nakin deuhah chuan nancy-i leh rinpuia, freddya te chu an rawn lang veleh ta bawk a, rinpuia chuan enge maw ni hi a rawn khai bawr taih mai. Inspector a han hmuh veleh chuan "kha sir chu, lung te pawh a leng duh hle dawn ani maw? ilo tha zel ang chu maw? tiin a rawn nuih sang a, remruata chuan rinpuia leh nancy-i, freddya te alo hmuh veleh chuan "e khai, nang ni ve teh khiah chu, mi te in rawn tlawh ve vang vang a, in va ti lawmawm ve" alo ti a.



Nancy-i chuan remruata chu a ngaihtuah hmel hle mai a, rinpuia ngei pawh chuan a pu chu a lainat ru ve hle ani tih a hmel ah chuan a lang reng si a, "ruata a hreawm em? Nancy-i lam chu en thuai in "aih, hreawm lo, thian mak sak tak tak leh danglam tak tak te an awm a, ka awmna tur chi tak alo nih zawk hi" tiin remruata chu a han nui lui sang a, chumi rual chuan "nancy, i chhungte an tha zel em? Enge kan an? a han ti a, nancy-i chuan "mukesha chu a hna lamah a buai hle rih a, bawihtea chu in ah a pu leh pi te nen an awm. He laiah han hruai na chi niin ka hre lova"



Freddya chuan "thian kan inhmu sakhi mai dawn alawm, a pawi ka ti ruata, ka thusawi awmzia kha i hrethiam lo ani, i nau chungchang lam ai mah chuan ruahman lawk thil leh tih luih thil ang a i ngai kha ka hriatthiam loh vang zawk a nia" alo ti ve thuai a, remruata chuan "a ho lutuk i theihnghilh daih ang, i chungah hian ka lawm zawk Freddy, harsatna ka neih lai ka bul a awm reng thin i ni a" rinpuia chuan "sir, kan case buaipui lai chu a hmawr bawk a ni tawh asin" alo ti a.



Remruata chuan "imm, ka ring lawk sa reng ani. Misual, tualthattu chu kha pa vanlalsailova kha ani ti raw? Rinpuia chuan "imm ni e, case buaipui tu khan voice recorded kha evidence atan a tling tawkah a ngai a ni ang? Tin, a behbawm a vanlalsailova rinhlelh theihna tur awm zawng zawng kha evidence atan a hmang bawk a ni awm e, chanchin chipchiar ka hre lem lova, mahse vanlalsailova chu man anih thu erawh Chiang taka ka hriat ani"



Inspector chuan lei lam chu a han bih vang vang a, chutah nancy-i lam chu en in, "nancy, pawi ka ti takzet ani" Nancy-i chuan lo hrethiam in "imm, hrereng duh chuang suh, mukesha pawh a rilru a dam thlap tawh alawm, a theihnghilh leh daih tawh zawk hial ang" Alo ti a.



"Ka inthiam lo takzet ani. Khatia mukesha hming ka han hmuh rual khan rinhlelhna nen ka buai zo ta alawm maw le" nancy-i chuan "imm, a ho lutuk, i dam tha leh vat dawn alawm". Alo ti a,



Eng eng emaw ti ti na hun te han nei in rilru lam a harsatna tawk mek inspector remruata chu a thian te pawh chuan a rilru tih hlim a kawm hlim tumin fiamthu nen te chuan an han ri dar dar a, chawhnu her te alo anih takah chuan nancy-i leh rinpuia, freddya te pawh chuan inspector ruata chu an tin san veleh ta ani.



Remruata chu a mut hmunah chuan a ngaihtuahna a kal bing hle mai a, chuti taka rilru lam harsatna nei te enkawlna hmun a a han awm tak na chhan leh buaina a tawh zui tak dan te, a case buaipui chungchang te chu chhuikir in a mit chu a chhing ta vang vang a.



A office a a naute nen Pastor k.lalngaihawma thihna chungchang sawi a hun an hman mek lai ani a, rinpuia chuan a thusawi lai mek chu a sawi chipchiar in a thusawi danah chuan a uluk in tihsual leh tih hmaih palh a awm ang tih a hlau hle mai a.



"Sir, pu k.lalngaihawma chu a ruang hlawm ani tawh a, postmortem ani ang" a han ti a, inspector chuan uluk fe hian rinpuia thusawi te chu alo ngaithla a, chutah rinpuia hnenah chuan "tichuan rinpui, pu k. Lalngaihawma thihna chu tualthahna ngei ani tihna a niang maw? alo ti a,



rinpuia chuan "aw sir, anih ngei hmel e, room chhungah chuan ruang hmuh a ni a, ruang chu a thin zawnah hian chemte a bur ngur mai a, tin a nghawngah chuan na taka rehna hnu hma a awm bawk ani. A hnar chu na tak a kut thlakna tih hriat tak hian a ruh a tliak a, thisen a chhuak bawk. A ruang chu a saisir zawngin alo mu ani. Hei, crime scene chu han en ve mah teh" tiin thlalak te chu a han hmuh a, inspector chuan thlalak te chu uluk tak chuan a han en a, "tichuan room chhungah hian evidence han rintlak deuh tur emaw misual ni a han ngaih bel theih tur emaw thil dang a awm em?



Rinpuia chuan "aw sir, tualthattu ni ngei a lang mi pakhat a awm, chu pa chu ruang hmu hmasa ber tu a hming chu vanlalasailova ani. He pa leh mitthi ta pastor k.lalngaihawma te hian eng inlaichinna emaw tak an neih ngei pawh a rinawm ani, amah vanalalsailova thu kan zawhfiah na atang in chu chu a hriat theih ani"



Inspector chuan "imm, chu tualthattu a ni ngei ani tih evidence a awm chuang lo tihna nge? Rinhlelh a Kai ringawt tihna em ni?



"Aa sir, chumi laiah chuan rinhlelh anih na chhan hmasa ber chu ama sawi danin, pu.k lalngaihawma chuan amah chu a rawn bia a ni awm a, tin phone atang chuan thu inhmu lova an han inhnial thinrim ve deuh thu pawh a sawi ani, chumi avang a rinhlelh chu ani pakhat awm e, midang chutiang a k.lalngaihawma han that duh mai awm tur midang an awm hnai vai mai lo bawk nen"



Inspector chuan "awle tichuan Kan pastor ve thung kha? Rinpuia chuan "aw sir pastor ni lai mek ani, nupui fanau nei lai ani bawk e" Inspector chuan "imm aw le a tha e, tualthahna hmun ah chuan thil dang hmuh in nei em? Entirnan mitthi ta thawmhnaw emaw, a cellphone emaw, a wallet a ni emaw a thil neih eng ang chi pawh hmuh tur a awm em?



Rinpuia chuan "aw sir, pastor ho in an ak fo thin, ip te bible leh lehkhabu vel dahna ang chi kha a awm a, dawhkan chungah pu.K lalngaihawma tarmit ni ngei tur a awm bawk a, chhuatah chuan rumol pakhat hmuh tur a awm bawk a, chumi bak chu thil dang hmuh tur a awm lo a ni, tin a cellphone pawh a bag ah chuan a awm bawk.



Mahse sir, thil dang zawng aia thil mak leh hriatthiam har tak pakhat ala awm, Bag ah chuan lehkhathem a awm tel bawk a, chung thil te chu uluk tak a kan han chhui dawnin a ruang hmu hmasa ber tu leh police lama thlen tu vanlalasailova chu rinhlelh a ni lehzual hle mai a. Mahse chung kan hmanraw khawnkhawm te chu uluk taka zirchian erawh ala tul niin ka hria. Lehkhathemah chuan he thu hi a inziak a" tiin lahkhathem a thu inziak chu a han hmuh a.



lehkhathemah chuan heti hian alo inziak a, 'he thil hi ka tih ngei a tul ani, ka nunna hi a ralmuang lovin a mangang ani. Ka inven a tul a, keimah min ti na duh tu lakah hian rorelna dik tak a thlen ngei theih nan he thil hi ka tih a ngai ani' tih hi alo inziak a.



inspector chuan "tichuan" a han ti a, rinpuia chuan "kha lehkhathem a thu inziak atang Khan mi pakhat, a nunna a tan pawh a mi hlauhawm tak a awm ni ngeiin a lang ta ani. Tichuan kha lehkha kha a hnutchhiah ta ani. Chuan sir, he thil hi ani a mak ka tih leh hriatthiam har ka tih tak ber chu ni, ngaihruatna leh zeldin thil mai lo chuan hmuh fiah thiam pawh a har" tiin cellphone a mi voice recorded chu a han ngaihthlak tir leh a,



mi pakhat, mangang tak leh hlauhthawn hmel tak mai aw hian "nilo, nilo, pu ngaihawm, engti zia nge ni ta ngai? Eng thil nge thleng ta mai? tu thil tih nge? a ti a, a aw atang chuan tualthattu a rinhlelh vanlalsailova aw ani. chutah chau tih hriat tak leh a theih tawp a chuah ani tih hriat tak mai aw hian "engvang nge? engvang nge saite? hetiang thil hi engtin nge i tih theih zawk saite? engvang nge? tih hi a ni veleh a, chu aw ve thung chu mitthi ta pastor k.lalngaihawma aw ani ve thung.



inspector chuan "imm, he pa vanlalsailova hi tualthattu chu ani tihna aniang maw? rinpuia chuan "aw sir, hlauthawng tak leh mangan hmel tak a eng thil nge a awm zia, tu thil tih nge ti a zawt tu kha vanlalsailova hi a ni tihna a nih chu, mahse pu k.lalngaihawma khan 'engvang nge saite? tiin kha thil titu, pu k.lalngaihawma vit tu kha sailova hi ani tih erawh a sawifiah veleh tlat bawk si a, an in chhan dan leh an zawhna thu kha a inpersan hmel ta hle tihna anih chu. Chu lai tak chu kan la hrethiam mai rih lo ani"



Inspector chuan "sailova chu a inpuang em? a ma tih ngei ani tih a sawi em? He voice recorded hi in ngaihthlak tir em? Rinpuia chuan "sir, thil awmzia ni a lang ta chu pu k.lalngaihawm hian a thi dawn ani tih hi a hre lawk a ang ani. A chhan chu he lehkha hi a hnutchhiah a, tin he thil hi ka tih ngei a tul a ni a tih awmzia kha chu voice recorded kha a sawina anih a rinawm. Tichuan voice recorder chu a kam ru ta a. Tichuan vanalalsailova hian a that zui ta mai niin a lang. Mahse, rin ang ngeiin amah vanalalsailova chuan a thil tih anih loh thu a pha tlat thung a"



"vanlalsailova hian khatia ama tih nilo ang mai a, engvang nge? enge a awmzia? tu thil tih nge? ti a k.lalngaihawma thil awmzia leh thil thlen dan te a zawt daih thung kha enge a awmzia ni ta ang?, mahse pu k.lalngaihawma ber khan amah vanlalasailova chu engvang nge hetiang thil hi i tih saite? tiin misual chu amah vanlalasailova ani tih a nemnghet tlap leh ang lawi si a.



Inspector chuan "ruih an nei a nilo maw? damdawi hnuhma emaw ruihhlo dang pawh an rui em tih te in hria em? Rinpuia chuan "sir, he lai a hetia thil awmzia sawi ringawt dawn hi chuan thil a funkim lo tlat ani, ruihhlo hnuhma kan hmu lova, tin an pahnih ve ve hian an rui lo tih a chiang thawkhat viau bawk. nangmah ngeiin vanlalsailova te pawh chu thu han zawt fiah ve la, a dawp dan hmang pawh i hre zawk ngeiin ka ring ani" Inspector chu a thutna atang chuan a tho chhuak ta a, chutah "imm hei hi chu keima kutah awm rawh se, vanlalsailova chu ka va buaipui a nge" a ti ve ta a.



"Sailo" sailova chu ngun tak hian a en ran a, sailova chuan "aw ka pu, thil awmzia leh thil thlen dan kim chang chu ka sawi vek tawh ani lawm ni? engvanga keimah hi tualthattu ang a min ngai tlat mai nge maw in nih le? Inspector chuan "a chhan chu hei vang hi ani ngei ang" tiin voice recorded chu a han ngaithak tir ve ta a.



Sailova chuan mak tih hmel zet hian "lalpa leh! Keima thil tih anilo sir, pu ngaihawma hi huatna pawh ka nei hleinem, a chung a hetiang thil em han tih duhna chhan tur ka nei lo hrim hrim. Tichuan kha voice recorded kha khawi a mi nge? Inspector chuan "i mi thah tak pu ngaihawma'n a ruk a a kam ruk anih hi, kha lai tualthahna hmunah khan a dah ru alawm, chu chu nang ma hriat lohin a ni"



Sailova chuan "sir, ka han sawi ange, khami zan khan a tul bik thil avangin ka hnathawhna hmun atangin ka haw tlai hle a, tichuan pu ngaihawma khan min rawn bia a, mahse pu ngaihawma kha a thinur hmel in a lungawi loh hmel kher mai"



Inspector chuan "engvang a lungawi lo nge anih? Alo ti a, sailova chuan "sir, pu ngaihawma nen hian inlaichinna hran tak chu kan nei lem lo, mahse a fanu nen hian kan inzui ve thin a, mahse harsatna leh buaina kan neih avangin kan inthen zui leh mai ani. Khami hnu atang khan pu ngaihawma hian kei hi a khat tawk hian mi rawn be ta fo mai a, ka lakah a lungawi lovin a thinrim thin hle ani. mahse amah han huat let emaw ka tum ngai lo hrim hrim"



inspector chuan "tichuan khami zan ah khan a rawn be leh che a, a lungawi lovin i lakah pawh a la thinrim reng a"



"aw sir, a aw ki atang khan chu chu a chiang lehzual awm e, a ti mai mai lo a, han palzam mai mai chi niin ka hre lo bawk ani, a pawimawh in ngaihven ngei tha in ka hria ani, tichuan min kohna hmunah chuan ka va kal ta ani"



Inspector chuan "chumi lai, a rawn biak lai che chuan dar engzat nge? Sailova chuan "dar kua leh minute sawm li leh panga vel ni ta in ka hria"



"Chu, zan dar kua leh minute sawm li lah panga velah a rawn bia che a, tichuan pu ngaihawma lo nghahna hmun che chu engtikah nge, dar engzatah nge i va thlen?



"Aw sir, dar sawm bawr chu ani tawh ang" Inspector chuan rinpuia chu han ko in rinpuia hnenah chuan "rina, he tualthihna hi dar engzat bawr vel a thleng nge? Sailova hian a rawn report hian dar engzat nge ni tawh? Rinpuia chuan "zan dar sawm leh a chanve ah ani e sir", inspector chuan "imm, chuti anih chuan zan dar sawm bawr vel ah sailova chuan pu ngaihawma lo nghahna hmun chu a thleng a, tichuan pu k.lalngaihawma nen chuan eng eng emaw an sawi dun ngei ang a, inhnial thinrim zelin chutah sailova chuan a that zui ta mai tihna a ni maw? Mahse voice recorder kha, enge a awmzia tih lai a chu ani ta ber mai ani maw?



"kha recorder atang a a lan dan kha chuan recorder in thil a record kha chuan pu lalngaihawma hi vih tawh ani a, a nghawngah reh a ni a, kutthlak a tuar tawh ani tihna ani a,a chhan chu voice recorder a mi pahnih inbiak na kha chu pu ngaihawma vih a nih veleh a in record tan niin a lang si ani.



"Pu k.lalngaihawma record ni ta se engtin nge a tih theih ang? Na tuar chung leh a thin zawn a chemte bur vu chung chuan recorder chu a set up thei lo maithei, tin a lehlam zawkah pawh pawikhawih tu hian pu ngaihawma voice record tum a chet a la chu a hmu reng tihna a ni dawn bawk a, mahse engmah a ti lem lo ani phawt ang a, voice recorder a mangang tak a pu ngaihawma chung a thil thleng chu tu tih nge tih te, enge thil thleng chu a awmzia tih te kha thil intan dan a ni si a, khami hma daih a record tawh chu nise thil chiang lehzualin kan hre thei tur hi a ni a"



Rinpuia chuan harhchhuak thut ni awm hian "chu zawng sir, he pa hi mi phakar leh fing kherek tak niin a ngaih theih ang. He voice record pawh hi ama thil tih vek zawk pawh ani thei asin" Chutah rinpuia chuan uluk tak chuan a han ngaihtuah pah bawk a "tin lehkha a thuziak pawh kha, a landan in pu ngaihawma hian thah ani dawn ani tih hi a hre lawk a ang riau bawk a, kha pawh kha misual pa siamchawp a ni thei ani"



Inspector chuan sailova hnenah chuan "sailo, min hrilh teh, khami zan khan pu ngaihawma khan voice recorder hi a kam lai pawh i hmu reng ti raw? Vanalalsailova chuan "nilo pu inspector,keimah ka nilo, pu ngaihawma nen khan kan inhnial ngei mai, mahse kei khan ka rilru tihfim tum in pawn ah ka chhuahsan thuai a, tichuan ka va luh leh chuan khatia rapthlak taka alo awm lai kha ka va hmu ta mai zawk ani, mangang takin ka au a, tu thil tih nge tih ka zawt a, ka chhuah bo lawk hlan khan tu emaw chuan kha thil kha a ti ani, mahse ka hrilh ti hai em em tu leh min ti na em em tu chu"



Inspector chuan "pu nagiha'n nangmah emaw alo ti che kha tiraw? Alo ti a, sailova chuan "aw ka pu, pu ngaihawma khan khatia ka va bawihsawm kha engvang nge hetiang thil hi i tih? min lo ti ta mai ani. Kei chuan ka hrethiam loin ka hrilhhai lutuk a, thil dang engmah pawh ka sawi thei tawh lo, ka ngawi reng a, pu ngaiha kha ka en tlawk tlawk ringawt mai ani. Ka awm loh hlan khan hmai tuam tu emaw thil tih a ni ngei ang, keimah ka va lan leh khan keima thil tih emaw alo ti ta mai a ni ang. Mahse ka thil tih a ni ngailo hrim hrim ang"



Inspector chuan rinpuia hnenah "rina, misual ni a rinhlelh tur midang kan ngaihtuah a tul ani. He thil thlen dan hi a chiri ru riau mai, a chiang lo in a fiah fel fai lo tlat ani. Inspector vek chuan "tin thil pakhat, chhuat a rumol kha tu ta nge? tin kha khan enge awmzia a neih? kan hre thei a ngem? Rinpuia chuan "kha zawng enge a awmzia a chiang reng alawm, tualthattu pa hian chemte ah khan a fingerprint hnutchhiah a duh lo tihna a ni mai a, ngun tak leh uluk tak a han en chian chuan rumol kha a khawr a, a tawm dan atang te, a chuar dan atang te khan chemte chu hum hnan niin fingerprint hnutchhiah anih loh nan a hmang ani tih a hriat theih ani.



"Mahse a hmanhmawh na lamah emaw a chi ai ve deuh na lamah chhuatah khan a theihnghilh tihna a ni thei" Inspector chuan "chuti anih chuan sailova hi misual a ni thei dawn em ni? engvang in nge chhuatah chuan rumol chu a theihnghilh theih ang? tin khatiang a police hnen a a rawn thlen nghal vat anih chuan tualthattu chu lo ni ta se, remruatna leh ruahmanna a nei tih na a ni ngei ang a, chhan leh vang tha tak awm lovin tualthattu in police te a call lo tawp ang, a tlanchhe nghal ngei in ka ring ani, tin a hnu thup a tum ngei bawk ang a"



Rinpuia chuan "sir, thil chu a chiang viau niin a lang si a, he voice recorded atang ngei hian misual chu tunge anih kan hre thei ani, vanlalsailova hian dawt a phuahchawp zel lovang tih lah chu sawi theih a ni silo.



"Mahse hetia evidence tha tak pu ngaihawma'n min lo hnutchhiah nachang a hriat danah hian a thih hi a ring lawk a, khatia sailova pawn a ava chhuah hlan khan a thih ngei hi a ring tawh tihna a ni mai, pawn a sailova a chhuah hma khan nasa takin an inhnial si a, thah ngei a tum thu pawh a hrilh a ni maithei asin,



"Chuveleh hmanhmawh takin sailova awm loh hlan chu chuh in lehkha hnuhnung a ziak ta a, thil awmzia chu chiang takin a tarlang ta ani. Voice recorder chu a kam ru ta a, mahse heng evidence te hi a peih fel hman awrh chauh anih ka ring, sailova hi a rawn lang leh ta nghal mai si a, pu ngaihawma chu a vit zui ta tihna a ni mai, tin a nghawngah na takin a rek bawk a, kut a thlak zui a, mahse a nghawng a a rehna leh a hnar a a hnekna hi chu pawn a a chhuah hma a a thil tih pawh a ni tawh zawk maithei bawk,



"tichuan a nghawng a a reh hnu leh a hnar a hnek hnu ah chuan pawnah a chhuak ta pawh ani thei anih chu, voice recorder a a lan dan kha chuan vih a nih hnu ah tawngkam inpersan takin zawhna inzawt in ngaithlak tur a awm tan a, a bak chu thawm a reh vang vang a, hrawk a rek thawm emaw hnar a kutthlak thawm emaw hriat tur a awm lo thung, tichuan thawm awm zui tak zel danah khan sailova hian police lam a call nghal a, tichuan a thil tih sual chu hre lo ang maiin lem a chang kual ta vel ani.



"Voice record chungchang bawk kha ka sawifiah leh hret duh, khatia voice recorder a on chiah khan phone lam problem emaw phone lag te avang hian phone hi a function nghal lo ve thei a, recorder in hna a thawh theih veleh khan sailova lemchanna tawngkam atang chiah khan vanduaithlak takin a intan palh ta hlauh tihna a ni ang"



inspector chuan "mahse rinpui, Engvang a amah pu ngaihawma lak a lemchang kher nge anih ang? A that duh anih chuam tawngkam tenawm tak leh a huatna tawngkam, a thinrimna tawngkam te chhahchhuah zawk awm tak ani a, mahse engvang a khatia a vih lai reng pawh a khatiang ang tawngkam kha hmang tlat nge anih ang?



Rinpuia chuan "sir, chu zawng tih elna emaw runluihna emaw pawh a ni thei asin, tualthattu te hi an in ang vek silo. Tin, a tir lam a kan han zeldin tak ang khan voice recorder a on lai kha a hmu ve reng ang a, tichuan amah pu ngaihawma tih el nan khan khati khan recorder a a lan theihna atan khan a tawng el khum ta vel pawh ani thei, tin evidence chu tihchhiat kher kha tulin a hre lo pawh ani maithei bawk, tin ama siamchawp vek hi ala ni thei cheu bawk a"



Inspector chuan "tin, amah sailova sawi kha thudik zawk pawh ani maithei asin, khatiang a pawn lam a a chhuah bo hlan khan mi tu emaw thil tih a ni ang a, sailova a va lan leh khan amah vittu hmaituam chu sailova emaw alo ti pawh ani maithei, amah vittu hmaituam khan a hnarah khan a hnek a, a nghawngah khan a rek bawk a, tichuan a vit zui bawk a, sailova emaw alo tih nachhan kha chu an inhau thinrim zo chauh a, sailova pawh lungawi lo tak in a chhuak ani si a"



Rinpuia chuan "imm, chuti anih chuan sailova kha pawn a a chhuah lawk chhung kha engtia rei nge? engtiang a rei nge pawnah khan hun a hman? A hmai a tuam chhung kha hun rei chu a nilo ngei ang a, tin hmaikawr te chu khawiah nge a awm ang?



inspector chuan "rina, misual pa zawk hian sailova hi tal awh tir a tumna mai pawh a ni thei asin, khatia a vih hnu khan voice recorder kha a on a, chemte a hum hnan na rumol kha chhuatah a dah a, a tlanbo zui ta a ni maithei, tichuan sailova khan mangang tak leh thlabar tak khan enge thil awmzia? enge thleng ta mai? tu thil tih nge kha a ti ta chiah reng a"



Rinpuia chuan "mahse sir, sailova anih siloh chuan a tu a chu nge ni ta ang? Inspector chuan sailova chu biak leh tha in a hre ta a.



Sailova chu a hmel a ngui hle mai a, a lungngai in a hrilhhai hle ani tih a hmuh theih. "Sir, misual ka ni lo asin, kha voice recorder kha engvang a khatia kam kha nge anih ang? Engmah hi ka hrethiam lo ani.



Inspector chuan "khatia pawn a i chhuah tak hnu khan pawnah khan engtia rei nge hun i hman? Sailova chuan "sir, ka awm rei lo, minute hnih khat bak pawnah khan ka awm lo, ka thinrim in ka lungawi lo ve hle mai a, thawk te la in boruak te chu ka hip lut hrawih hrawih a, tichuan ka let leh nghal mai ani"



Inspector chuan ngun fe hian "sailo, a pawimawh dawn a nia i tawngkam tin hi, i hrechiang chiah a maw?



Sailova chuan "sir, ka hrechiang"



Chuveleh rinpuia chuan "imm, chuti anih chuan i awm bo hlan a misual lo chet hman ngaihna a awm lo tihna anih chu. Minute hnih khat chhung lek chuan misual chu i va nang ching hman lo anih pawhin kawngkharah tal chuan in intawk hman ngei ngei ang. Tin, khatih lai khan midang awm ve emaw hmuh emaw i nei bawk silo lehzel a?



Sailova chuan "aw, mi tumah ka hmu lo, midang thawm pawh ka hre lo, mak ka ti ani" Inspector chuan rum zet hian "sailo, i thusawi te a inkalh a ni tih hi i hrethiam miah lo ani maw? Pawnah minute hnih khat chauh i awm a, i let leh nghal a, mahse nang chuan i awm bo lawk hlan chuan misual hmaituam in pu ngaiha chu lo that ni ah i puh a, misual che rang tak leh tuan tha tak tan pawh tual han thah hman ngaihna a awm lo reng reng ani, tin midang tumah i hmu bawk silo lehzel a, i thusawi inkalh te avang ringawt pawh hian rinhlelh i ni thei ani tih i hria ani tiraw?



"Sir, ni e keima ngaihdan leh ka han chhui dawn dan thil mai a nia, a chhan chu keima thah ani miau silo a, a ngaihna ka hrethiam bik lo ani"



"Awle a tha e, he thil voice recorder atang a a landan leh, amah nen a inhmelhriatna in neih dan atang te, tin i lakah a thinur in a lungawi lo thin ani tih atang te, tin khami zanah pawh khan a rawn bia che a in inhnial thinrim a, chutah lungawi lo takin pawnah i chhuak tau a, chung zawng zawng atang chuan misual chu nangmah ngei hi i ni tih chiang takin a lang tlat si ani. He evidence pawimawh tak mai leh chiang em em mai voice recorder hian tualthattu i nih rinhlelhna chu a rawn ti famkim ta bawk niin a lang tlat ani"



"Tin thil Chiang em em ni a lang ta bawk chu, pawnah minute hnih khat hun hmangin I chhuak a, chumi chhung lek chuan pu ngaihawma chu nghaisak alo ni a, vih alo ni hman a, chu chu thil awihawm lo tak ani, nangma tih nilo tu tih nge ni thei ang"



Sailova chuan "ka pu, keima thil tih ngei ani tih chungchang ah chuan thil dik tawk lo a awm ani. Engvang a voice recorded kha ring em em nge in nih? Inspector chuan "a chhan chu evidence chiang ber pakhat anih avang in a ni, tin dawt hi i sawi niin a lang tlat bawk" alo ti a, sailova chuan tah aw tuau chung chuan "ka pu, thudik tak chu zawng chhuak lul rawh. Keimah ngei hi ka ni anih si chuan engvang a hetiang ang a evidence tha lutuk a awm reng chung pawh a inpuang duh silo nge ka nih ang? Engvangin nge ka thil tih anih loh thu chu ka la phat tlat si ang ni? Ngun tak chuan sailova chu a han en a, sailova hmelah chuan lemchanna emaw dawt sawi hmel reng a hmu silo. Inspector pawh chu a ngaihtuahna a buai ru takzet.