PSYCHIC VOLUME III_Chapter-2

[April Hmar Liverpool]

PSYCHIC Volume_3

Bung Hnihna



Rinpuia chuan misual chu phat rual lohin sailova ngei anih chu a rinhlel hran lova, chutia sailova a nih loh theih dan ringawt buai a han buai zui chiam mai pawh chu tul lo a ti ru tawh hle a, chung evidence te avang chuan tualthattu chu sailova ngei hi anih a ringnghet tlap ani. mahse a pu chuan sailova nilo midang tu emaw hmuhchhuah ngei a tum niin a lang leh ta tlat si a.



Chutah rinpuia chuan "sir, case chu chai zui vak ngailo in a fel nghal a ni mai alawm" a han ti a, inspector chuan "rina hei chauh, he pa hi misual ngei ni a a lanna phenah hian thil dang a awm ngei tur ani" A han ti a, rinpuia chuan "nilo sir, thil dang a awm anih chuan sailova hian a sawi mai tawh tur ani tawh zawk, pu ngaihawma fanu nen an inngaizawng thin a, mahse an inthen a, pu ngaihawma chuan chu mi avang chuan sailova hi huatna leh thinurna in a khat ta niin a lang a, tichuan amah sailova ngei pawh hi a be fo a, a thinrimna leh lungawilohna pawh a lantir fo ani.



"Tichuan sailova pawh chuan a laka huatna leh thinurna pai reng mai a ngaihzawng hlui pa chu a ngaithei bik tawh hauh lovang, pu ngaihawma hi a lak atang a dahthat dan tur a dap ta pawh a ni thei. Chumi anih loh pawh in chhan tha tak engemaw chu a awm ngei tur a ni, hetiang a tualthah duh hial khawp tur thil chu thil namai lo tak ani ngei ang, tichuan le, kan pastor kohna chu ngaihpawimawh loh theih loh tur thil ni ngeiin a lang a, a chhan chu amah sailova ngei pawhin a sawi kha, mahse khatih lai khan sailova hian a bengkhawn duh lo hmasa zet anih ka ring tlat ani, tichuan a koh kal ngei theih nan pu ngaiha chuan a koh kal ngei ngei na tur in tawngkam a chhep tihna a ni mai, tichuan le rin lawk ang ngeiin boruak chu a sang hle a, thinur tak leh thinrim takin an inhnial a, sailova chuan pu ngaiha chu kut a thlak zui ta mai a, a hnar ruh chu a hnek tliak nghe nghe a, a nghawngah chuan na takin a rek bawk a, mahse sailova chu a inngaihtuah fim thuai a, pawn ah a chhuak ta zawk a,



"boruak te hip in thawk te chu a han la a, mahse pu ngaihawma khan sailova chu alo kir leh ngei dawn ani tih kha a hrethiam tlat tawh, a chungah chuan eng thil pawh thleng thei ani tih a hria ani. Tichuan lehkha ah chuan hmanhmawh takin a nunna a derthawn thu chu a ziak ta a, tin voice recorder chu a on a, mahse sawi tak ang in a voice recorder khan hna a thawk lawk ta silo a, chutah sailova chu a rawn lut thut a, chemte chuan a vit ta mai a, chuveleh pu ngaiha chuan engvang nge saite hetiang thil hi i tih? a ti a,



"Chuveleh tualthattu dang ang lo takin sailova chuan 'nilo, nilo, pu ngaih, engti zia nge? eng thil nge thleng ta mai? tu tih nge? a ti ta daih mai a, a tih elna leh a ngeiawm thei ang bera khawsak duhna avang zawk ani, chumi lai chuan voice recorder kha a rawn process ve chiah bawk a, tichuan kan hriat dan chu khatiang teh nuai kha alo ni ta ani"



Inspector chuan a kut chu a han beng a, "ropui lutuk, khatiang tak a nalh leh awihawm kha chuan midang pawhin an phuah thiam kher lo maithei, a nih duh hmel in a awih awm takzet ani. Mahse rina, evidence kha a chian tluk zet hian he pa sailova pawh hian in pha tlat lovin inpuang ve mai ta se chu case chu solve a ni tawh mai tur hi a ni a" a han ti a.



Rinpuia chuan "sir, hlap deuh zawt zawt ila, han chhir deuh zawt zawt ila a inpuang em em ang" alo ti a, inspector chu a ngawi reng a, chutah "nilo rina, he pa hmel ah hian thil tisual hmel ka hmu ve tlat lo atin ni" A han ti a, rinpuia chuan han thawk halh pah chuan "hei ham, lie detector te hi awm ve se tha tur, hei vang hi alawm ram changkang zawk pawh in lie detector te hial an siamchhuah tak ni. Misual te hi inpuang awlsam tak an awm lai hian a tawp thleng pawh a inpuang duh hauh lo hi an awm ve bawk asin, tin mitthi dna sample emaw, kuttin kar a vun them emaw, sam zai ang chi te pawh, engemaw thil dang hmuh tur han awm tal se tha tur hi nia" a han ti a.



inspector chuan "chutiang a han innawr buai a han inbakkaih chiam an nilo tihna ani mai alawm" alo ti a, rinpuia chuan "ni e, mahse sailova hi misual anih lohna reng reng hmuh tur leh hriattur a awm silo lai a hi ani. Engti kawng zawng pawhin evidence te hian a kawk vek si ani" Inspector chuan "kha evidence, voice record ah ringawt kha chuan kan innghat thei lovang, courtah hruai a ni ang a, a sawi dan pangngaiin an inhnial thinrim thu leh pawnah a chhuah thu a sawi ang a, a va lut leh chuan pu ngaiha hliam tuar mek chu va hmu thutin, mangang tak leh hrilhhai takin tu tih nge tih te, engvang nge tih te, voice recorder a a landan ang khan thil awmzia a sawi ang a, tan chhan tur an dap thei ve tlat ani, ka ngaihdanah chuan pu ngaiha zawk hi a chiang lo deuh zawk ni in ka hria"



"sailova hi chuan tu tih nge? Enge thil awmzia tih te hi a thusawi a ni a, pu ngaiha erawh in chiang takin sailova thil tih ngei ani tih a sawi lang ve tlat lo ani" Rinpuia chuan "sir enge i sawi awmzia? Inspector chuan "engvang in nge hetiang thil hi i tih? tih ringawt chuan sailova thil tih kha eng tak a fiah nge anih tih a tarlang zo lo tlat lo ani. 'Sailo, engvanga min thah tum nge i nih? emaw ti tal se chu sailova hi a him zo lo ngei ang. Mahse tan chhan tur tha an nei ve thei tlat ani"



Rinpuia chuan "sir, chuti anih si chuan a tu a chu nge maw tualthattu chu ni ta ang le? A ngaihna hriat loh hmel tak chuan a han ti a, inspector chuan "court hma ah hnehna kan chang zo leh silo anih chuan tih thil a nia, evidence hi a chian hmel viau a, mahse suspect ber hian a pha tlat a, a tang tlat a, evidence hi a fiah tawk lo ani ti zawng a a tan tlat duh chuan kawng hmu ve thei ani tih thil anih chu.



"Tin, pu ngaiha ber khan a thih tur thu te, a nunna a derthawng ani tih te kha a hre lawk anih tak tak a, misual chu sailova ngei anih si chuan hei aia chiang lehzual evidence hi a awm ngei tur ani, a hnutchhiah ngei ngei tur ani. Engpawhnise, naktuk hian kan hnu pawr lai a awm leh awm loh kan thual nawn leh dawn nia" tiin rinpuia chu a chhuahsan ta a.



Voice recorder a a landan atang a thil thlen dan chiang lo teh nuai avang chuan inspector leh rinpuia te chuan an ngaihtuahna an hman nasat phah kher mai. Rinpuia bawk chuan chutia a pu, uluk tak leh ngun taka a ngaihtuahna lo kawm mektu chu en in "sir, ka ngaihtuah ngial pawh hian sailova lo hi chu misual ni a han rin zawn tur dang ka hre lo ani" a han ti chhuak leh phawng mai a, sailova misual anih a rinhlelhna chu ngawih bo pui a thei ngang lo a ni ngei ang.



inspector chuan "han sawifiah deuh teh rina" a lo ti thuai a, rinpuia chuan "khami zan khan sailova leh pu ngaihawma te chauh kha laiah khan an awm a, sailova, pawn a a chhuah chhung a midang lo inrawlh hman na tur lah kha a awm lo hrim hrim tih pawh kan chiang tawh a, amah lah chuan minute hnih khat lek hnuah a let leh nghal mai niin a sawi si a, mahse khami chhung lek khan pu ngaihawma chu chem a vih a ni si a, a mak ka ti tulh tulh mai. sailova hi anih loh chuan tunge ni ta ang? A rang mah mah ani thil thlen dan kha. Voice recorder khan sailova hi thil tisual tu ngei ani tih tichiang lo mahse, thil thlen dan vel han chhui dawn chuan Sailova lo hi chu midang an awm thei niin a lang silo ani"



Inspector chuan "imm postmortem result kha han ngaichang leh phawt ila, a tah tawl te te in hma kan la zel zawk dawn nia" alo ti a.



Sailova pawh chu an chhuah leh ta rih a, tin postmortem result pawh chu a lo chhuak zui ve thuai bawk a, amaherawhchu postmortem titu te thusawi chuan inspector chu a thawng chiang hle mai. Doctor te sawi dan chuan pu ngaihawma nghawng a rehna hnuhma ni a lang chu mihring kut a rehna ani tih an finfiah thei lova, mahse hrui emaw puan emaw hmang a rehna a ang zawk mah niin an sawi tlat mai. Tin a hnar ruh a kutthlakna hnuhma pawh mihring kut ngei a kutthlakna emaw hnekna hnuhma ani tih chu finfiah theih ani chiah lo a, mahse a hnar ruk tliah dan leh hliam awm dan atang chuan thil sakhat, thir emaw, thing emaw na tak a a tauhna avang a tliak anih ngei chu an ring zawk tlat mai.



Inspector chuan ngun tak chuan a han ngaihtuah a, pu ngaihawma chuan ama hnar ruh chu bang ah chuan a tauh tihna maw? tin a nghawng pawh chu hrui emaw puan in emaw a rehna hnuhma a ang zawk mah anih si chuan" a han ti a, rinpuia chu alo inrawlh vat a "sir, a chiang reng alawm, pu ngaiha chu kut a hnek nilo mahse, na taka dawhkanah emaw bangah emaw intauh tir ani tihna ani mai alawm, tin a nghawng pawh chu kut a rehna a nih loh chuan hrui emaw puan in emaw an rek tihna ani mai, nghaisak a tuar hmasa zet tihna anih chu" alo ti a. Inspector chuan "imm, amah leh amah a inti na tihna pawh a ni maithei, mahse a thin zawn a chemte vittu chu amah lehzel ani tihna em ni ang?



Rinpuia chuan "sir, thil ni thei vek chu ani alawm, fingerprint engmah hnutchhiah a ni silo a, chemte ah lehzel pawh, tin rumol chhuat a mi kha a nghawng a rehna leh chemte tuamna chu ani thei bawk, alo nilo anih pawhin tualthattu hian a fingerprint thupna chu a paih bo tihna ani ang. Amah leh amah in tihnat chungchang kha chu a awih awm loh deuhin ka hria, mahni intihnat duh tur chi niin a lang lo, rilru lam harsatna a neih awm a awm lova, a rui lo bawk, tin pastor ani tih kha theihnghilh lo bawk ila, tin lehkha te pawh a hnutchhiah bawk kha"



inspector chuan "rina, ka han zeldin thil mai mai a nia, ti teh chu mi lamah ringawt lo deuh chuan chang dang kan kan a tul ani, sailova hi thu zawhfiah leh ka duh ani, a insawi awk theihna tur leh a thu inkalh a awm leh awm loh ka hrechiang lehzual duh ani. Misual anih chuan thu inkalh a thusawi hun ala nei em em ang"



Rinpuia chuan "sir, a thu sawi inkalh zia chu kan hriat kha, pawn a a chhuah hlan khan misual hmaituam in pu ngaihawma chu alo that anih a ring a, mahse ama sawi dan zelah pawnah khan minute hnih khat bak a awm silo a, midang lo inrawlh hman ngaihna a awm lo tih kan hriat kha, khami atang reng pawh khan he pa hian dawt a sawi ani tih a lang sa reng tawh ani" Inspector chuan "khaih khaih, kha zawng a rin dan leh a zeldin thu mai chauh anih kha, keini pawh in kawng hrang hrang hmangin zeldin leh chhui dawn na kan neih ve bawk hi" alo ti a.



"Mahse sir, keini zeldin leh chhuidawn dan te hi chu thil inkalh a awm ve hleinem, a inhne rem thlap zel alawm, sailova khan dar sawm vel bawrah pu ngaihawma lo nghahna hmun kha a thleng ni khan a sawi a, tin tualthihna a thlen thu a rawn report khan dar sawm leh a chanve ani a, ngun taka ngaihtuah chuan khami darkar chanve chhung kha tualthahna hun atan chuan thil awm ang tak ani, an inhnial hmasa zet bawk anih kha, tin pu ngaihawma kut a thlak hmasa zet bawk a, thil inhne rem thlap zel ani. Dar sawm ah vek emaw khan rawn report ni se chu ngaihdan pawh a dang deuh mahna, mahse he pa hian dawt sawi a thiam lutuk lo a, a insawi awk na zel niin ka ngai ani"



Inspector chuan "imm, in bengdai teh khai rina, engpawhnise ti teh, thingpui te i han in phawt teh ang, ril te pawh a tam mai dawn, chet kan la leh zawk dawn nia" tiin thingpui in tur chuan chet an la ta zawk a.



Zan a ni a, inspector remruata chuan a mobile phone lo ri chu a han en a, number hlang alo ni. A han pick up a, "hello" lehlam atang chuan hmeichhe pakhat hian vawt raih hian "pu inspector, ka pasal thihna hi dawithiam thil tih ani" a rawn ti tlawng mai a, inspector chuan han sawi mai tur chu a haihchham lek lek mai.



chutah a ngaihna hre lo zet chung chuan "engtin a ni? A han ti a, lehlam atang chuan "ngaihawma nupui ka ni aw, ka pasal thihna hi dawi a ni ka ti anih chu" a rawn ti leh a, inspector chuan "pi vanhmingi maw? a han ti a, lehlam atang chuan "aw, a thihdan i chhui mek pastor k.lalngaihawma nupui vanhmingi ka ni e" a rawn ti leh a.



inspector chuan "ka pi, i pasal chu thah a nilo i tihna em ni? Lehlam atang chuan "inspector, thah anih leh anih loh chungchang ka sawi lo. Dawithiam thil tih ani ka tihna mai chauh ani" Inspector chuan uluk tak chuan a han ngaihtuah a,



"imm, evidence a chian loh chungchangah kan buai a, kan rinhlelh ber in a thil tih anih loh thu a pha tlat a, dawt pawh a sawi loh hmel viauin kei phei chuan ka hre nghe nghe, mahse kawng lehlam a ngaihtuah chuan pu ngaiha nen an in mil vak loh dan te, pu ngaiha'n amah hmu tura a koh thu te, an inhnial thinrim chiam thu te kan han hrechiang a, tin voice recorder a awm bawk a, sailova thil tih ni ngei a a lan theih dan a awm bawk. Mahse kan fimkhur em avang leh kan uluk em avangin thutlukna kan la siam lo ani mai a, mahse chutia pu ngaiha nupui ber in dawi anih thu i han sawi tak mai danah chuan engtia dawi ani tih thu chu sawi mai thei nge maw i nih le?



Lehlam atang chuan "he thilah hian dawi leh ramhuai thil a tel ani" a rawn ti leh a, inspector chuan "nilo pi vanhming, i hresual a ni ngei ang, i pasal ani asin" a han ti a, lehlam atang chuan "pu inspector, chiang takin ka hria ani, keimah ah hian chiang taka hriatna a awm ani" tiin phone chu a dah nghal daih a, inspector chu a han nui hak a, "haha, eng kan ti zo ta nge ni le? tiin a mobilephone chu a melh vang vang ringawt mai.



A tuk alo nih chuan mitthi ta pu k.lalngaihawma chhung te kawm tur chuan rinpuia leh joela te chu an thangchhuak ta a, inspector chu office a a awm lai a ni a, chumi lai tak chuan phonecall hi a dawng a, number hlang bawk alo ni.



Chutah le, inspector chuan a phone chu a han la a, lehlam atang chuan "hello, inspector remruata a ni em? A rawn ti a, inspector chuan "aw ni e, tunge ni ta? eng thil nge ni ta a? A han ti a, lehlam atang chuan tlangval aw ni ngei tur chuan "ka pu, thil pawimawh tak mai hrilh duh che ka nei, eng lo a nia, nizan hmasa thawhlehni zan ah khan zarkawt phei a kawngpui bula dawr pakhat bulah, kawngpui kamah mi pakhat ka hmu a, chu pa chu tudang a nilo, khami zan thawhlehni zan vek a hotel pakhat a mitthi ruang an chhar tak a kha ani a"



inspector chuan "engtin maw? Tlangval, i thusawi awmzia ka man hauh lo mai" a han ti a, lehlam atang chuan "aw le sir, police station ah ka rawn kal vat a tul ani, ka thusawi tur hi a pawimawh takzet ani" a rawn ti leh a, inspector chuan "imm, awle lokal vat teh khai" alo ti ve bawk a.



Hmel tung lam deuh, sam sei lek lek, a hmel a mak tihna leh hrilhhaina hmuh hmaih theih hauh loh a lo lang chhuak chu en in "tichuan tlangval, eng thil chiah maw thawhlehni zanah chuan i tawn a? A han ti a, chu tlangval chuan "sir, ka hming chu andrew a ni e, khami zan thawhlehni zan khan thil engemaw tul thilah ka chhuak a, kawngpui kiang a footpath ah ka kal a, ka camera chuan thla te ka la kual vel a, thlalak hi ka uar ve hrim hrim bawk a, tichuan khatih lai khan zan dar sawm leh minute sawmhnih inkar chho vel bawr ani tih ka chiang. Tichuan ka haw tur chu news hrang hrangah hian hotel pakhatah mitthi ruang chhar anih thu ka hre ta a, tichuan chu mitthi chu tunge anih tih te ka hre ve ta zel a, amah pawh pastor ani nghe nghe ani awm e"



"Tun mai, dar sawm atang a dar sawm leh a chanve inkar a thil thleng niin report thenkhat chuan an tarlang nghe nghe, chumi awmzia chu kha lai, kawngpui a ka kal mek lai leh in lam pan a ka kal mek lai vel bawr a thil thleng tihna anih chu, tichuan ruang an chhar chu a thlalak te ka lo hmu ve ta zel a, mahse sir, mak ka tiin ka hrilhhai kher asin, hei, han en ve mah teh" tiin thlalak chu a han hmuh a, amah andrewa nilo midang pahnih chu a bulah chuan an lang ve a, chumi te pahnih zinga mipa zawk hmel a han hmu chiah mai chu inspector chu a phu teuh kher mai "e heu! hei chuh! a han ti a.



Andrewa chuan "imm sir, keimah ang thovin mak i ti ve tho a ni maw? Inspector chuan "kha ai Chiang khan han sawifiah teh" andrewa chuan "kha tia thla ka lak vel pah khan ka bul a mi pahnih kha chiang takin ka camera ah khan an lo lang ve ani. Mipa zawk hi chanchinthar ka hriat zawh chauh a mitthi ruang an chhar tak a kha ani tih ka han hria chu ka mangang teh asin, pastor anih thu te, tin a thlalak nen lam an thehdarh nghal a, kha thlalak ka lo hmuh veleh khan nichin mai a kawng pui kiang a ka thlalak a mipa zawk lo lang ve kha ka hrechhuak zawk mai a, tichuan pastor ruang an chhar tak a chu a ruang an chhar hun lai vel bawrah chuan ka bul maiah alo awm ve reng tihna anih tak ber chu"



Inspector chuan uluk tak chuan andrewa chu a han en a, "chuan" a han ti a, chutah Andrewa chuan "sir, enge thil awmzia ni ta ang? Ka hrethiam ta lo ani. Ka chhung te pawh ka hrilh a, ka thian te pawh ka hrilh a, mahse an lo ngaihven tehchiam lo, police ho hriattir turin min rawn a" a han ti leh a, inspector chuan "imm, a thih lai vel a a thlarau vak vel chu ilo tawng fuh tihna a nih Tak ber chu" a han ti a, a ngaih chu a thalo ru takzet.



Andrew chuan "sir, thil mak ve tak chu ani. Han hriattir ve hrim hrim che u ka duh a, ka rawn hrilh ta che anih hi, pastor ngaihawma thihna case hi i chhui mek ani tih ka lo hria a" inspector chuan "andrew, i thusawi takah chuan i chiang a maw? I rui te a nilo maw? a han ti a, andrewa chuan "teuh lo lutuk, engtin nge ka ruih ang ni, ka hmuhsual pawh a ni thei lo hrim hrim ani tih he thlalak hian chiang takin a lantir ani" a han ti a, inspector pawh chuan a ngaihtuah uluk ve kher mai. Chutah andrewa hnenah chuan biak pawh a tul chuan biakpawh theih a awm tura tiin chumi awmzia chu alo chhui zui tur thu te chu a hrilh ta a, andrewa pawh chu a tin ve ta a.



Rinpuia'n a pu thu hrilh awihawm loh zet mai a han hriat rual chuan ner nang chung chuan "sir, a thlalak nen lam a nei thlap si a maw? A han ti a, a aw ki ah chuan tih elna a tel lek lek mai, inspector chuan "imm, nei thlap e, pu ngaihawma thlarau anih theih mai te pawh chu i ringhlel ve lo em ni? Rinpuia chuan "awih har ka ti" alo ti a, inspector chuan "chu chiah, mahse kha tlangval lah khan a hmuh chian hmel si a, tin thlalak a mi kha pu ngaiha ngei anih hmel bawk si a" a han ti a, rinpuia chuan "a mak tih mai loh chu engtia ngaihdan han siam chi nge tih pawh ka hrethiam ve lo" alo ti a.



Inspector chuan "imm, pu ngaihawma hian phir pui emaw amah ang tak unau a nei ani thei bawk, chuan in va thangna chanchin te chu enge? a han ti a, rinpuia chuan "sir, kha pa sailova thusawi te kha thudik tak vek an ni e, pu ngaiha fanu nen hian an inngaizawng thin ngei a, mahse an inthen fel tawh ani. Amaherawhchu pu ngaiha leh sailova te inkar a inhuatna awm leh innghirngho chungchang thu hla erawh an hriatpui tehchiam lo niin an insawi thung,



"pu nagiha'n a biak fo thin thu te, sailova lakah huatna leh lungawilohna lian tak a nei tih te chu an hre thui viau lo tihna anih chu, tin khami zan a midang han inrawlh theihna turin pu ngaiha'n a mi biak te leh sailova mi biak te thlengin kan chhui zui zel a, tu mah in khami zan khan pu ngaiha hmu tur emaw sailova hmu tur emaw in khalai hotelah khan an kal loh thu an sawi vek bawk ani"



Inspector chuan "imm, mahse thil mak dang leh bawk ala awm cheu a nia" a han ti a, rinpuia chuan "eng thil nge ni a sir? alo ti a, inspector chuan "pu ngaiha nupui pi vanhmingi kha, a ni kha thu inzawt fiah ve em? a pasal chungchang te" rinpuia chuan "sir, kan lo rin loh lam takin pi vanhmingi chu rilru leh taksa lam a harsatna nei alo ni a, rual a ban chiah lo tihna anih chu"



inspector chuan a lu chu bu nghat in "imm, thil awm lo pawh va ni suh, nizan a min rawn biak ngawt dan leh a thu min hrilh pawm har tak avang khan ka hrilh kha a ti hai angreng viau reng ani" tiin zan lam a pu ngaihawma nupui pi vanhmingi'n a rawn biak thu leh a pasal thihna chungchang a ngaihdan mak tak a rawn neih thu te chu a han hrilh ve a.



rinpuia bawk chuan mak tih hmel zet hian "a va mak bawk ve sir, pi vanhmingi chuan a pasal thihna chu dawi anih a ring a maw? Thlarau leh ramhuai kaihhnawih thil a awm a ring a maw? Inspector chuan "i sawi tak ang khan rilru leh taksa lam a harsatna nei alo nih vang ani ngei ang" A han ti a, rinpuia chuan "ni e, rilru buai kan tih ang deuh hi anih thu a fate pawhin min lo hrilh a lawm, chuvang a nia eng thil mah kan han zawh a kan han kawm tehchiam duh lem loh ni"



Inspector chuan "imm, a pasal pu ngaihawma thih dan hi a chiang viau a a lanna phenah hian a chiang lo riau bawk. Tun hnu a ka han ngaihtuah that leh hian kha thil, evidence tha tak ni a lang voice recorder kha lo awm malek lo zawk se ka ti hnuhnawh ta khawp mai"



Rinpuia chuan "engati maw sir" alo ti a, inspector chuan "a chhan chu kha voice record kha awm lo se thil kal dan hi a felfaiin sailova pawh hi man mah ila a sual tam viau dawn lo ani. Kha voice record avang khan ngaihdan chiangkuang lo deuh a awm phah ta si a, sailova hi misual a ni a ngem, a nilo thei a ngem tih ah hian min la pawt thu rih tlat ani.



"Voice record kha awm lo zawk law law se sailova chungchangah pawh hian ngaihdan siam thiam a har lo zawk ngei ang ka tihna anih chu" Rinpuia chuan "mahse sir, a tang ve tlat tho si a, inpuan a tum mai hmel silo a" inspector chuan "ni e, chu tak chu ani, voice recorder kha awm lo law law se chu sailova hian inphat marna tur thil dang a neilo thei zawk ani. Pu ngaiha nen a an inmil loh thu te, an inkar thu hla te leh khami zan a hun an hman dan te avang khan tualthattu ni a rinhlelh Kai ber a ni tho tho dawn ani.



"Tin zawhna kan zawhna atang te, thil thlen dan a sawidan atang te in a inpuang awlsam zawk ngeiin ka ring tlat bawk. Mahse voice recorder a a tawngkam hman dan avang khan ngaihtuahna a buai ru ve tlat ta si a, pu ngaiha tawngkam nen khan a tawngkam kha a inpersan viau mai si a, ka sawi tak ang in tualthattu ngei ani tih kha a chiang chuang tlat silo ani, tualthattu nise engvang in nge khati khan a tih kher ang, tin sailova thil tih tak kha pu ngaih an engvang nge saite ti a a zawhna tawngkam khan a tifiah tlat lo bawk a"



Rinpuia chuan "sir, chu zawng hun ala duh deuh mai niin ka hria, a inpuang har tawh lo tawp ang, a mah hi chhui zui zel ila, evidence dang dang pawh kan hmuh belh zel mahna" Inspector chuan "engvang in nge khatia a tih kher? Pu ngaihawm enge thil awmzia? Tu thil tih nge? A awmzia hi a mak riau ani, a mi thah tum hnen a khatia han awm vel kher kha enge thil awmzia ni ang? Tunah rih zawng thil ala harsa ve tlat ani. Mahse man loh a a awm ta mai erawh ngaih a tha chuang hauh silo bawk a" a han ti a.



Chhun ni tlang san vanglai a ni a, police station lamah chuan call pawimawh tak mai an dawng leh ta tlat mai. Chuveleh police lam chuan anmahni rawn be tu chu sation lamah chuan rang takin an ko nghal vat a. anmahni rawn be tu chuan thil mak tak a tawn thu te, tin pastor ngaihawma thihna chungchang alo hriat ve dan te leh pastor ngaihawma chu a thih lai ni a sawi zan dar sawm leh minute sawmhnih inkar vel bawrah hmun dangah a hmuh thu te chu a sawi a ni awm a, inspector chuan hriatthiam loh hmel tak chung chuan "imm, thil mak dang leh bawk maw? Kan pastor thla chu a hrang nasa hle mai maw" tiin chu pa thu hretu ni a insawi thu zawtfiah tur chuan a inbuatsaih nghal thuai a.



Inspector chuan chu pa zorema inti chu ngun zet chuan a han thlek vang vang a, chu pa chuan mangan hmel tak leh hrilhhai hmel tak mai chuan "sir, thil awmzia chu hetiang deuh hi ani, khami zan ah khan ka khaw lai leng haw chu car pakhat hi kawngpui kiangah hian alo ding a, a chhung atang chuan mi pakhat hi a rawn chhuak a, a lo dinna hmun chu street light hnuaiah anih avangin chiang tak in an hmel a hmuh theih ani" Inspector chuan "an i tih chu mi pahnih i tihna em ni? Alo ti a, zorema chuan "aa, ka chiang chiah lo, mi pahnih an nih ngei chu ka ring a, pakhat zawk khan ka lam chu a rawn hawi a, chiang takin a hmel kha ka hmu ani.



"Tichuan kei chu inah haw in ka mu zui mai a, mahse a tuk zingah chuan mak tih deuh ka nei ta, hotel pakhat a mitthi ruang an chhar thu ka hria a, chu mitthi chu pastor a ni nghe nghe, tichuan chu mitthi ruang an chhar pa hmel te chu an post bawk a, chu pa hmel ka hmu chiah mai chu mak tiin ka meng zau kawk kawk mai a, chutah uluk deuh hian ka han ngaihtuah kir leh a, zan lam a ka mi hmuh pa ngei kha ani. Kawng pui kiang a motor bul a lo ding min lo en tu kha, kha pastor ruang an chhar zui tak ngei kha ani.



"Ni e, kha pastor kha a thih hma in tihpalh thilah ka lo tawng fuh ve anih ngei chu ka ring mai a, mahse thil mak ka tih em em ala awm, khatia kha pa kawngpui kianga min lo en tu ka hmuh hun lai kha zan dar sawm leh minute sawm thum inkar vel bawr ngei ani tih ka chiang, ka phone pawh ka khawih a, in lam pan a haw mek ka ni a, dar zat kha ka en ngei ani, mahse sir, kha pastor ruang an chhar hun lai ni a an tarlan kha zan dar sawm leh minute sawm thum inkar vel bawr tho alo ni ve si a, kha pastor kha a rualin hmun hnihah a awm tihna nge ni ta ang? a thlarau ka hmu tihna em ni? Mahse a chuanna car te kha a tak ngei a nisi a, ka mit ngeiin a hmu si a, tin a bul a mi dang awm ve te kha enge awmzia ka hrethiam talo ani. Tichuan ka thil tawn chu midang ka hrilh ve a, police hriattir turin min lo ti a, nang hi pastor thihdan chhui tu i nih thu ka hre ve ta a, ka rawn be ta tawp mai che u ani"



Tui in tur te chu han chhawp sakin inspector chuan "tlangval, chu i thil tawn chu i tawng ngei ani tih fiahna tur i nei a ngem? Entirnan chu pa thla te chu ilo la fuh mial lo em ni? Zorema chuan "aa, chu em em zawng a nachang ka lo hre lo hrim hrim, tin kha tia kawngpui kiang a ka hmuh lai khan pastor thi ta ruang an chhar chu ani ang tih ka hre lawk bik silo a" a ti a.