PSYCHIC VOLUME _Cahapter-4

[April Hmar Liverpool]

PSYCHIC Volume _3

Bung Lina





Inspector chuan "chu lamah zawng midang min ngaihdan tur kan dawn thui lutuk ani. Keimahni ah chiang ngam ila, midangin i hmuhsual ani ang emaw a dik ngei ang emaw an lo tih chu ngaipawimawh duh lo mai ila thutlukna siam pawh a awlsam zawk mai awm asin" a han ti a. Rinpuia chuan "sir, ka hmuh dan che chuan he case ah hian ila buai deuh niin ka hria, thutlukna mumal tak ila siam thei tlat lo ani tiraw? a han ti leh hram a.



inspector chuan "rina, ka sawi tak ang khan thutlukna ka la siam mai theih lohna chhan chu zau zawk a thil kan thlur hi a la tul vang ani" Rinpuia chuan "sir, theihnghilh daih ang, a ninawm. Kan buai leh tak ngial dawn" a han ti a, inspector chuan "ka sawi awmzia chu khami tum christinai thihna kan buaipui tum khan victora kha thiam loh chantir a nilova, tin amah ber kha alo thi tawh si nen keimahni lam hnuchhuina kha pawm tlak ah ruat a ni ta lova, christinai kha a pasal khan lo that tak tak ta se, amah a inawkhlum kha lo nilo tak tak ta se thudik chu kawtthlerah a tlu reng dawn tihna ani asin, tin a hnu leh a a rawn inlan dan atang khan ama nupui chu a that ngei a, mahse tihluih nilo in a tihpalh liau liau ni a keini lam in kan lo rin thiam theih turin thil awmzia chu a rawn pharh nawn leh niin a lan bawk tak kha"



"tunah pawh hei pu lalngaihawma thattu hi sailova hi lo nilo ta se, pawikhawihtu nilo chu man a ni dawn tihna asin" Rinpuia chuan "sir, pawikhawitu anih thu hi a la inpuang em em ang. Ka sawi tak ang khan court in thiam loh a chan tir anih chuan a luhlul a chhuah tawh lovang, ka tiam a che sir, sailova hi a inpuang em em ang"



Inspector chuan "pawikhawitu ni hauh lo, an thil tih ang a inpuang ta mai hi an awm ve bawk asin, nasa taka nghaisak an tawh avang te, rilru leh taksa lam a hreawm nasa tak an tawrh avang te a pawikhawihtu ang a inpuang hi an awm asin. Tin hetiang a a thil tih nilo leh a beisei loh daih thil in a tlakbuak tak avang hian a rilru lam thleng pawh in a nghawng pawi thei a, a thil tih ni a a inpuan hun ah meuh chuan mi pangngai lo leh a beidawn thil tih mai mai te pawh an ni tawh thei asin"



Rinpuia chuan "aa, ngun tak leh zau tak a thil kan ngaihtuah kual tam poh leh kan buai khaw tlai mai mai dawn sir" rinpuia chu a nuih te chu a za lek lek tawh mai. Inspector chuan "rina, ram dang, ram ropui zawk a criminal case tam tak hi kan lo hria in kan lo hmu ve fo tawh thin ngei ang. Kei ngei pawh hian ram ropui zawk a pawikhawihna thleng thin chanchin te hi ka chhiar thin in ka ngaithla ve thin asin" A han ti a.



Rinpuia chuan nin hmel fe hian "sir, ram dang a nih loh hi, enge i sawi tum ber ni a? a han ti a, inspector chuan "crime lam chanchin hi i ngaithla in i chhiar ngai meuh lo aniang maw? ngaihthla teh rinpui, hei hi hrereng rawh, dawhtheihna leh taimakna, tumruhna kan neih a tul asin, dawhthei takin kan bei fan fan ang, crime chanchin ka ngaithlak tam tak hi chu a kum a kum tel, kum sawm hnu lam daih a misual an manchhuah theih te hi ani nawk hlawm mai, a tlem berah tla hnih thum tal hi chu hnuchhui tu te hian hun an duh thin ania, chu pawh case hnawk lo ber leh a awlsam ber ah a ni ang chu" a han ti a.



Rinpuia chuan "sir, ka hria e, hre lo tawp chu ka bik love, tichuan i thutlukna chu enge ni ta? Ka khaikhawmna chu tha i ti em? Enge i ngaihdan? A han ti a, inspector chuan "ka ngaihdan chu i hrethiam reng alawm" alo ti a, rinpuia chuan "imm, chuti anih chuan kan chhui zel mai dawn tihna aniang maw? a han ti a, inspector chuan nui sang chung chuan "a bul kan la tan ve laih laih chauh anih hi" tiin rinpuia chu a chhuahsan nghal thuai a.



Inspector hmalakna chuan hnuchhui hna chu an thawk ta zel a, misual chu tunge anih tih chu hriatchhuah ala nilo tihna ani. Inspector chuan pu ngaihawma thlarau hmu tu ni a insawi andrewa chu thu zawtfiah leh tur chuan a han ko leh a, a ni hi pu ngaihawma thlalak pawh nei thlap tu kha a ni.



Inspector chuan andrewa hnenah chuan "andrew, kha thil i tawn zan khan enge maw thil tulah i chhuah lawk thu i sawi a tiraw? a han ti a, andrewa chuan "aw sir" alo ti a, inspector chuan "anih leh engvang a pu ngaihawma ni ngei a lang kha hmu nge i nih? A zawhna awmzia chu a hrethiam chiah lo niin a lang "aa sir, ka tum reng vang a hmu ka nilo" a han ti a, inspector chuan "chu tak chu ani, andrew dawt hi chu thuhruk rei theih a ni tak tak ngailo asin" a han ti a.



andrewa chuan "sir, dawt ka sawi i tihna em ni? A han ti a, "imm, dawt ni a ngaih theih tur emaw thu thup nei ni a ngaih theih tur che in i thil tawn dan chungchang min hrilh tlat ani" Andrew chuan "enge dawt anihna lai a chu? a han ti a, inspector chuan "dawt anihna lai a chu thlarau ni a ngaihtheih tur a i sawi kha ani, a chhan chu thlarau a ni silo atin ni" a ti ta tlat mai le.



andrewa chu a meng zau kawk mai, "chu sir, khami zan a pu ngaihawma ka hmuh kha thlarau a nilo i ti e law? Chuti chu mitthi ta kha tunge anih tak ang a? a han ti a, inspector chuan "imm thlarau nilo ve, heng thil mak leh thlarau lam chungchang ringawt hi chu awih a harsat ang bawk hian thudik tawk lo an ni tlat ani" a han ti leh a, andrew chuan "dawt a nihna lai chu i finfiah thei em ni? Thlarau anih siloh chuan enge ni ta ang? A han ti ve leh ta khauh mai.



Inspector chuan "khami zan khan zan tir lamah pu ngaihawma chu i hmu ngei mai, a thla te pawh i la a, mahse pu ngaihawma a thih lai kha chuan khati lai, pu ngaihawma i hmuhna hmunah kha chuan i awm tawh lo hrim hrim, tin zan dar sawm leh minute sawm thum inkar a hmu ni a i insawi mai kha dawt ka tih lai a chu ani, tin i tum vang reng a hmu kha i nih hi ka ring ta tlat mai" a ti ta piap piap mai a. Andrewa chuan mak tih hmel zet hian "chu chu i finfiah thei em ni? A han ti leh hram a, inspector chuan "aw thei e" a ti ve leh ta zel mai.



Rinpuia pawh chuan a thuthmun chu han siam rem sauh sauhin inspector thusawi leh tur chu a beng dawh ha chung chuan alo ngaithla a, inspector chuan "imm, ka han finfiah nghal a nge aw" a han ti a, andrewa chuan "imm han finfiah poh teh" alo ti a, andrewa hmelah chuan zam na a hmuh tel theih ta tlat mai a, Chuveleh inspector chuan "ka ngaihdan zawng zawng hi min tawmpui ve kher turin ka phut lo che, mahse dawt erawh a tlo ngai lo.



"khami zan, pu ngaihawma i hmuh hun ni a i sawi kha zan dar sawm leh minute sawm thum bawr ani anih chuan pu ngaihawma chu hotel pakhatah a thi mek tihna a ni thei tiraw? a han ti a, andrewa chuan "aw, chu tak chu alawm mak ka tih ni, a thlarau a nih theihna chhan chu" a lo ti vat a, inspector chuan "chuti anih si chuan khatia pu ngaihawma a ruang chhar ani tih thu kha amah pu ngaihawma thlarau i hmuh zawh rual a i hre zui nghal mai thei kha thil theih a ni tlat lo ani.



"A chhan chu pu ngaihawma thlarau i hmu a, hun rei a inrial hma in pu ngaihawma ruang chhar anih thu i hre zui mai a, chu chu engtin nge a theih? engtin nge i hriat theih? khawi lai news ah mah i hre lo. Hriatna dang i nei, news ah ruang chhar anih thu tarlan hman ngaihna a awm lo hrim hrim, ruang chharna bul maiah i awm silo a, tu chanchinbu phek mah in ruang chhar anih thu an chhuah hman lo hrim hrim, tin pu ngaihawma hi i mi hriat zawng a nilo a, a laina hnai emaw i ni hek lo, mahse khati khan rang tak in a ruang chhar anih thu i hre nghal thei tlat si ani"



andrewa chu engemaw sawi tum chuan a han ang hman zuau a, chutah rinpuia chuan "kha chu sir, kha lai ruang chharna hmun a lo awm ve midang tu emaw ten an post emaw alo hmuh vang a ni maithei asin" alo ti a, inspector chuan "nilo, he pa hian chutiang a hmu lo. Rang taka pu ngaihawma ruang chhar anih thu a hriat nghal theihna awm chhun chu hei chauh hi a ni, pu ngaihawma nen hian an inhre ngailo a nilo a, an inhre hnai vai tihna ani mai, chhung te tawhsual tawk chu kan hre har bik lo tawp ang" a ti ta tlat mai a.



Inspector vek chuan "ni e, pu ngaihawma tawhsual tawh chungchang hre hmasa ber tur te chu tudang an nilo, a chhungte an ni tur ani, pu ngaihawma chhung te zing a mi chu i ni tiraw? Andrewa chuan "sir" a han ti a, inspector vek chuan "i sawi dan atang kha chuan pu ngaihawma hi i hre ngailo tihna a ni a, news pakhat atang a ilo hriat ve chauh thu i sawi a" a han ti leh a.



chutah Andrewa chuan "aw le sir, pu ngaihawma thih thu ka hriat na chu ka han sawi a nge" a ti ta nge nge a, inspector chuan "dawt sawi tum reng reng suh ang che, kan chhui zui nghal zel dawn a, kan finfiah nghal zel dawn a nia, tin i mobile phone kha khaw maw lo la teh" a han ti leh ta mai a, andrewa chuan "sir" alo ti a, rinpuia chuan "inspector thusawi chu i hria em? alo ti vin thawt mai.



Inspector chuan "nilo rina, he pa hi misual alo ni reng thei na chungin kan la finfiah tlat lo, tin misual nen a inthurual an lo ni thei bawk, tin thuruk min hrilh duh loh a hria a ni thei bawk" Andrewa chuan "sir, ka sawi vek ang, thudik tak chu hei hi ani, pu ngaihawma fate nen hian kan inkawm ve thin ngei alawm, mahse kan inkawm tam lo thung, pu ngaihawma ngei pawh hi ka hria alawm, mahse khatia a chanchin ka hriat nghal mai theih dan kha chu thil dang deuh ani, ni e, news emaw whatapp group emaw facebook vel atang a hria chu ka nilo ngei mai, pu ngaihawma fanu status atang a hria ka ni.



"Ka sawi tak ang khan an ni chhungkua nen hian kan la intlawhpawh ve tho a, an chhungkua mimal tin number te pawh ka la nei vek ani" Inspector chuan chik zet hian "imm, thil inthup lai ala awm anih chu, chu pawh chu sawi nghal rawh" a han ti leh a, "sir, eng thil mah thup ka neilo asin" inspector chuan "chuti si engatinge khatia pu ngaihawma, kha lai kawngpui kiang a i hmuh a a thla te nen lam i lak hnu a hmelhriat ngailoh ang mai a i ngaihven zui loh?



"I thiante pa chu i hmu a, a thlalak te pawh kha tihpalh thil niloin i tum lui hrim hrim zawk pawh a ni ang, tin i thlalak chu tun thleng a ila kawl danah delete leh mai atan chuan ila lo tihna ani mai a, tin i thlalak te chu i han en a, pu ngaihawma chu i bul maiah alo awm ve reng ani tih chu i han hre ta a, mahse i ngaihven zui miah lo, hmelhriat ngailoh ang maiin i en liam mai nge, chutia thian te pa han hmuh fuh chuan tute pawh hian an ko ding emaw tawngkam hnih khat tal chuan an be ngei ngei ang, nge ni a in inbe luam zawk a nga, mahse thlarau ni a lantir phet i tumna lamah i hmelhriat loh chhuah ta mai zawk ni? Rinpuia chuan "intih lar i tumna mai mai alo ni maw mawla, i thiante pa ani asin" alo ti a.



Inspector chuan "khami zan a thil thlen dan kha kimchang takin dawt tel miah loin min hrilh rawh" a ti leh a, andrewa chuan a heh chu a han pet fan fan a, "awle sir, ka sawi hreh viau mai. Pu ngaihawma te chhungkua nen hian kan inhnim hnai viau tawh lo ani. Mahse a fate nen chuan kan la inkawm ve zauh zauh tho, mahse khatia pu ngaihawma ka han hmuh khan a thla te chu ka la lui ngei alawm, ka tihpalh a nilo ngei e.



"Mahse kei hi mi inla leh mahni tawk a mi induh chi hi ka ni ve a, ka be hauh lo tih erawh ka chiang" Inspector chuan "thlarau ang ah chuan chhuah chu ila tum talh tihna a ni maw? alo ti a, mangang zet hian andrewa chuan "nilo sir, ka sawi zel dawn, thudik i duh ani lawm ni? a han ti ha a, inspector chuan rum zet hian "imm" alo ti nghut a, andrewa chuan "nia, kan inbe lo, amah pawh khan min hre ngei chuan ka ring, mahse kan inbe lo hrim hrim, motor bulah alo ding a, a bulah chuan hmeichhe pakhat a awm bawk, thlalak ah pawh a lan kha, mahse a hmeichhe hmel kha a lang chiang lo, a landanah kha chuan hmeichhia kha a thurualpui emaw a thian emaw a ni thei lo, midang kha lai a lo awm remchang ve mai niin a lang"



Rinpuia chuan "chu lamah zawng thil ni ngei ani em tih fiah a nilo, mahse kei chuan a partner anih ka ring khawp mai, a chhan chu hmun hran a amah lo hmu tu ni a insawi midang pawh khan a bulah chuan midang awm an awm ngei ni a an hriat thu kha an sawi ve tho ani. Mahse an ni kha chuan chiang takin a bul ami chu an hmu lo a, tin thlalak nen lam an nei ve lem lo bawk, amaherawhchu nangmah bikah hian engkim hi a chiang bik riau zel a, a bul a midang awm ve pawh chu midang hmu tu in an hriatchian theih loh laiin nang erawh chuan i hmu mai nilo in a thlalak nen lam i nei tel thei lehzel a" alo ti a.



Inspector chuan "imm, chu lam chu i duhtawk ang, han sawi zel teh" alo ti a, andrewa chuan "tichuan thla te chu ka la a ka haw zui nghal mai ani" Inspector chuan "mahse a ruang chhar thu chu in a i haw tawh hnu darkar engemaw zat a liam leh hnuah chauh a fate status atangin i hre ve leh zawk ani tiraw? alo ti a, andrewa chuan mak tih hmel fe hian "aw, engtin nge i hriat? a han ti a, inspector chuan "dawt sawi miau hek che, pu ngaihawma i hmuh lai kha chuan zan tir lam emaw zan dar riat emaw vel ani tihna anih chu" andrewa chuan "aw, chu chu a dik, mahse ka pu engtin nge chu chu a tirah khan in hriat loh theih zawk? A han ti a, inspector chuan han rum nghut pah chuan "khaw maw, i cellphone chu" a han ti a, andrewa pawh chuan cellphone chu a en tir lo ngam ta bik lo, inspector chuan andrewa cellphone chu a han check sak ta a, Andrewa chuan thudik a sawi ngei ani tih a hre ta bawk.



Mahse inspector chuan zawhna dang a nei leh ta tlat mai "andrew, hei i chat listah hian i mi biak te hi han en teh, hei hi pu ngaihawma nupui pi vanhmingi a ni tiraw? a han ti a, andrewa chuan "aw sir" alo ti zuai raih a, inspector chuan "imm, mahse engatinge in inbiakna hi i clear kher a? A han ti a, andrewa chuan "sir, pi vanhmingi khan thu mak deuh mai min rawn hrilh a" a han ti a, inspector chuan uluk fe hian a han ngaihtuah dauh dauh a, chutah buk nghat pah chuan "imm, keimah min rawn hrilh ang chiah kha ani maw? a han ti a, andrewa chuan "sir, enge a hrilh ve che chu ka hre lo" a han ti a, inspector chuan "nangmah a hrilh ang chiah che kha ani mai" alo ti sam mai a.



andrewa chuan mak a ti kher mai, chutah Andrewa vek chuan "awle, enge min hrilh chu in hre duh a maw? A han ti a, inspector chuan "pi vanhmingi chuan a pasal thihna chu dawi leh thlarau hnathawh thil ani tih a hrilh che ani" a han ti ta mai a, andrewa chuan phawk fe hian "ka pu" a han ti a, inspector chuan "chuvang chu ani maw i delete a? A thusawi te rintlak loh leh awmze neilo ni a i ngaih avangin" A han tih zawm zat a, andrewa chuan "sir, ka tihpalh, mak ka lo ti deuh a ni" tiin a mit chu a han chhing vang vang a.



Inspector chuan "awle andrew, heti hian i kai tawi ang, he thilah hian inhnamhnawihna i nei em? Kan lakah hian thil thup dang ila nei em? A han ti a, andrewa chuan "sir, pi vanhmingi hian ka tanpuina min ngen a ni. Sum thahnem tak min pek a tiam a ni" Rapthlak ti zet hian rinpuia chu alo meng rang kaw kaw mai. "Eng a ni? alo ti vin thawt mai a, inspector chuan "chu, inhnamhawihna i nei i tihna em ni? A han ti a, andrewa chuan "nilo, aih nilo, a atthlak in ti maithei, kei ngei pawh khan atthlak ka ti asin, a pasal chu zui ru reng tur leh en thla reng turin min ti ani"



Inspector chuan a ngaihna hriat loh hmel fe hian "ngaihzawng chungchang em ni? rinpuia chuan "hmeichhia kha chu a thian emaw a kawppui a nih i ring silo a", alo ti ve vat bawk a. andrewa chuan "kha hmeichhia kha chu a ngaihzawng a ni thei lo. Motora a luh a a tlan liam leh thleng khan ka enthla reng alawm, hmeichhia kha a chuang ve lo, pu ngaiha chauh kha a chuang ani" Inspector chuan "mahse engvang a a pasal pastor meuh nisi chu enthlak duh tlat nge anih tak ang?



"Sir, pi vanhmingi kha rilru lam harsatna nei ani a, a tirah chuan ka hnena min ngen na te pawh kha atthlak ka tiin a rilru buai vang mai maiah ka ngai ani, mahse maw sir, kan pi i hian thu rapthlak tak mai min hrilh ta tlat mai ani. A pasal chu a thih thuai tur thu min hrilh ani. Chu thu zet chu han ngaihthah mai mai kha ka thei tawh tlat lo, tin pi vanhmingi chuan a ruahman ang a ka awm anih chuan sum thahnem tak chu min offer reng bawk si a.



"chutah le, pi vanhmingi leh a pasal inkar chu eng chiah nge anih hriat tum chuan pi vanhmingi thu chu ka awih ta ani. Pi vanhmingi chu zawhna tam tak ka zawt a, mahse a ni chuan zawhna min zawt lo turin min ti a, a duh ang zel a ka awm chuan sum thahnem tak min tiam a, tin hlauhthawn tur emaw manganna tur emaw a awm loh thu min hrilh bawk a.



"chutah chiah chuan he thu hi min hrilh leh ta ani, a pasal chu dawi at a ni a, a thi thuai dawn ani tih min hrilh a, thlarau lam kaihnawih thil te dawi chungchang thu te min hrilh leh ta mai a, kei chuan awih har ka ti leh zo ta, a ni hi a rilru buai vang mai mai ani ka ti leh a, mahse sum chu ka duh nghal anih chuan a half a min pek nghal tur thu min hrilh leh a, a thusawi te ka awih loh avang chuan a thusawi te a dik ngei ani tih fiah nan sum chu min pek nghal a duh ani.



"kei pawh chu uluk takin ka inngaihtuah a, sum ka lo mamawh lai tak alo ni nen ka fiah ve hrim hrim duh ta a, tichuan sum thahnem tak mai chu pek ka ni zui ta nghal mai ani. A ruahman ang chuan ka awm ta a, a thusawi te chu awih chiah lo mah ila sum ber ka hmu tawh si a, a duh ang a ka awm mai chu a tul tawh ani, tichuan a sawi dan ang zelin a pasal chu ka zui ru ta ani.



"Khami zan khan ka hmu anih chuan a hmel chiang taka a lan theihna turin a thla la turin min duh a, a sawi dan ang zel a chet la mai chauh kha ka ni. Tichuan a pasal thlalak ka thawn hnu chuan kan inbiak na zawng zawng chu delete turin min ti leh a, ka delete leh ta a, tichuan in lam a haw turin min ti a, chanchin ngaichang reng turin min ti ta ani, a thusawi dikna chu chumi zan chuan a thleng dawn niin min hrilh bawk ani"



Rinpuia chuan "chumi awmzia chu a pasal chu chumi zan chuan a thi dawn tih a hre lawk tihna a ni maw? alo ti a, andrewa chuan "aw, kha thil kha ka beisei hauh lo, mahse a sawi ang zelin eng chungchang nge anih ka hriat loh chanchin ngaichang chuan ka awm ta a, a fanu status chu ka han en a, zan dar sawm leh a chanve a pel awrh chauh ani, a pa ruang chu hotel pakhatah chhar anih thu leh a pa chuan a kalsan ta mai chu a tuar thu te, mak a tih thu leh a thawn thu te, rapthlak atih thu te chu ka hmu ta ani"



Inspector chuan "tichuan" alo ti a, andrewa chuan "pi vanhmingi bawk chuan min rawn be leh a, kei chuan mangang zet hian eng thil nge i tih tak mai, i pasal nunna chu i la ta mai em ni? Ka lo ti a, mahse pi vanhmingi chuan a thil tih anih loh thu min hrilh leh tlat ang lawi a, a sawi lawk ang ngeiin a pasal chu thlarau sualin a tibuai a, a pasal thihna chu dawithiam thil tih a nih a rin thu te chu min rawn hrilh leh a.



chutah zet zawng pi vanhmingi chu a fiamthu lo ani tih ka hrethiam ta, mahse a rilru erawh a buai deuh ni ah ka la ngai fan ani. Dawi leh thlarau sual tih lai tak a chu ka pawm hleithei meuh lo, mahse a thi dawn ani tih a hre lawk kher erawh mak ka tiin ka ngaih a thalo takzet ani.



Inspector chuan "tichuan nang chuan a thu i la awih zel a tul si a ni maw? alo ti a, andrewa chuan "sir, engtin nge chu chu i hriat ka hre lo, aw ka la awih zel, pi vanhmingi chuan ka tih tur min tuk sak leh thlap mai pek a, a tukah chuan police hnena kal turin min ti a, a pasal chu zan hmasa lamah ka hmuh thu leh ka hmuh hun darkar chu a pasal thih hun dar sawm leh minute sawm thum inkar vel anih thu te, Khang zawng zawng, pastor thlarau ni a ngaihbel theih tur thil ka tawn dan te, a thlalak nen lam a ka neih thu te, in hnen a ka lokal lai a ka

thusawi dan ang zawng zawng khan felfai tak leh uluk takin rem min ruat sak ani, ka sawi tur chin leh ka sawi dan tur te, khang zawng zawng kha pi vanhmingi min phuahchawp sak vek ani" a ti ta a



Inspector leh rinpuia te chuan uluk tak chuan thil awmzia ni a lang ta chu an han ngaihruat leh dauh dauh a, chutah inspector chuan "imm, ka ring lawk ve deuh tho mai. A landan ni ta ah chuan pi vanhmingi chuan a pasal thi tur chu a hre lawk vek a, tichuan a pasal thih chhan leh a thih dan chu mak tak mai a lantir a tum ta a, a pasal thih hun tur a hriat lawk miau avangin a ni tan chuan dawi leh thlarau sual hnathawh ni a ngaih bel theih tur khan ruahmanna siam a harsa ta lo ani.



"Nang chuan a pasal thih lai a a pasal chu hmun hranah i hmu a a thlalak pawh i neih theihna turin ruahmanna a siam ta a, a zui ruk tir ta che a, tichuan a thih zan ngei a mi a pasal thlalak chu i nei ta a, tichuan police hnenah a tir leh che a, tichuan heti hian phuahchawp in thil awmdan niin a lantir ta a, a pasal thlarau chu a thih lai chuan a chhuak a, a thlarau chu a thla te hial ilo la fuh ta a, dar zat in ang kha chu dawt alo ni ta a, mahse engvang in nge a tirah khan kha thlalak kha zan tir lam a lak ani tih kan hriatchhuah loh theih zawk ni, tin a hma ni ah a pasal thihna chhuitu ka hnenah chuan a pasal thihna chu dawi leh thlarau lam thil anih thu min rawn hrilh bawk a.



"Plan a nei ani tih chu chiang tak in a lang ani, thil pakhatah chauh plan a neilo a, heng zawng zawng hi dawi leh thlarau sual hnathawh ani tih hi min hmuh tir a, min rin tir a, tarlan hi a thil ruahman chu niin a lang ta ani. Thu hre tu dang a nei leh zel a, nang chauh nilo a pasal thla hmu tu ni a insawi mi pahnih dang pawh kha nangmah ang chiah tho hian sum hmangin thu hretu derah a hmang tihna ani mai. An ni pawh kha thu dik tak an sawi hma loh chu kan en liam mai mai dawn lo" a han ti khur khur a, rinpuia chuan "chuti anih chuan pi vanhmingi hi tualthattu ni a rinhlelh theih turin chance a tha ta viau mai, a pasal chu that in dawi ani tih min rin tir a tum chu a ni a, a ti mak ve ngawt mai" alo ti a.



inspector chuan "imm, i sawi awmzia chu ka man e rina, mahse tunah rih chuan a tawp lam atangin kan let leh zawk tur ani, kha lai pastor thihna hmun a thil then dan te, evidence te leh vanlalsailova chungchang kha chu nakin atan ni zawk rawh se, tunah chuan pastor thla hmu tu midang pahnih te kha kan hma leh phawt ang" A ti ta a,



rinpuia chuan "sir, vanlalsailova kha, kha pa ngei kha tualthattu chu ani, a bul thut ber erawh pi vanhmingi hi ani tihna a ni mai alawm, a ni remruat ang zel hian heng a mi rawih ho hian chet an la kual ta vel tihna ani mai alawm, mahse heng ho hian pi vanhmingi thil tum hi an hriatpui ve vek kher lo maithei, sum an hmu a an duhtawk mai a niang, tin he thil a ruahman atthlak zet mai leh awih awm loh zet mai, dawi anih chungchang a plan hi alo hlawhtling ta lo anih chuan vanlalsailova hi a dawt leh a a tal awh tir tum chu alo ni reng zawk maithei asin,



"plan hi pahnih a rualin a nei ani, vanlalsailova hi a bum anih hi, heng ho hian pi vanhmingi hi an hrechiang lo tawp ani, vanlalsailova hi thiam takin a rilru a hmin ani ngei ang, tun thleng pawh a ala inpuan duh miah loh ni" alo ti a, inspector chuan "khang evidence, voice recorder pawh kha sailova'n pi vanhmingi hrilh dan angin a siam chawp i tihna em ni? Alo ti a, rinpuia chuan "aw chu chiah chu ni e, kha voice recorder a thu inpersan lutuk mai pawh kha pi vanhmingi ruahmanna mai ani, a makna lam leh hnuchhui tu te min ti hrilhhai tur zawng ringawt a chet lak hi a thil tum leh a duhdan ni ngeiin a Lang anih hi maw" alo ti a,



Inspector pawh chuan thawk chu han lak halh halh pah chuan "imm, thudik tak chu a lan belh zel e" a han ti a, rinpuia chuan "tichuan sir, sailova chu misual anih ila ring lo ta cheu em? A han ti a, inspector chuan han rum nghat pah chuan "chu zawng, amah hi kawm leh phawt ka la duh ani" a ti ta a.



Pu lalngaihawma thla hmu tu ni a insawi mi pahnih pawh chu thu zawhfiah veleh an ni ta a, inspector chuan a beisei ang chhanna a hmuh tak mai loh ah chuan an mobilephone chu check sak a duh ta a, tichuan an ni pawh chu an mobilephone atang a a lan dan chuan pi vanhmingi hnen atangin sum tha hnem tak an hmu ve ve tih chu an hre leh ta zel a, chutia pi vanhmingi ruahmanna te hriatchhuah a han nih takah chuan pu ngaihawma thla hmu tu ni a insawi mi pahnih pawh chuan khami zan a thil thlen dan chu an han sawi ve ta a.



pakhat zawk chuan khami zan khan eng thil danglam mah a thlen loh thu sawiin pi vanhmingi hnen atang a message a dawn thu a sawi a, tichuan andrewa ang bawk khan pi vanhmingi chuan pawisa pe in pu ngaihawma thla hmu ang in a insawi ta a, a hmuh hun darkar te, a hmuhna hmun te, tin pu ngaihawma bulah chuan mi tu emaw midang an awm ngei ni a ngaih theih turin midang awm ve ni a an hriat thu te chu a phuahchawp tir ta alo ni.



Police hnenah bawk chuan a thlen tir leh a, tin midang leh pawh chu chutiang deuh a thil thlen dan phuahchawp tir lehin sum pawh a inseng hnem viau ani. Tin, heng pi vanhmingi'n a mi rawih te hian anmahni chauh chu pi vanhmingi hnen atang a sum hmu a lem chang kual ta ang ah an lo in ngai vek mai alo ni a, anmahni ang tho va lem chang tura rawih midang an awm ve tih reng an lo hre der lo tihna ani. Sum an hmu a, pi vanhmingi call hun an nghak tawp mai a, pi vanhmingi hrilh angin chet an la ta mai alo ni.



Inspector chuan pi vanhmingi ngei chu thu zawhfiah a duh ta a, amah ngei chuan hmachhawn a duh ta ani. Chumi hma chuan inspector chuan ruahmanna a nei a, a ruahmanna ah chuan pi vanhmingi'n a mi rawih te zing a mi andrewa ngei kha hman let ve a tum ta a.



Rinpuia chuan a pu ruahmanna te chu a han ngaihtuah chiang a, chetsual palh awl dawn riau hian a hria a, tin an beisei ang chhanna an nei thei in a ring lo bawk ani. Mahse inspector chuan a ruahmanna chu a hlawhtlin ngei erawh a beisei tlat thung a.



Andrewa hnenah chuan inspector chuan "andrew, heti zawng hian min tanpui let ve tur ani. A hmasa in pi vanhmingi hnenah i kal ang" a han ti a, andrewa chuan "chuan engtin zel" alo ti a, inspector chuan "tichuan a hnenah chuan thil pawimawh tak sawi dun i duh thu i hrilh tur ani. Sawi dun loh theih loh tur khawp a i hmin thiam a tul ang, kan lak a i lemchan thiam ang bawk khan i theihtawp i chhuah tur ani" andrew chuan a lu chu lo bu nghat in "sir, a diktak chuan kei ngei pawh hian thudik tak hriat ka duh asin, pu ngaihawma hi a nupui hian a that reng em tih zawhna hi ka inzawt fo mai, rilru nuam in ka awm ngai lo hrim hrim ani"



Inspector chuan "imm, chuti anih a hnu kan tang ho thei anih chu, kan duh a in ang a, chhanna kan duh theuh ani. Pi vanhmingi hnen atang hian a pasal thih dan diktak chhanna kan duh ani. Aw le, heti hian i ti ang, a ni nen chuan titi dun na hun remchang i zawng ang a, hun remchang chu i hmuh veleh i phone a voice recorder kha i on ang, tichuan pi vanhmingi chu thiam takin i dawp dawn ani, thil thlen dan engkim chu a hrilh theih nan che i kar dawn ani.



"Keini police lam pawhin tualthattu chu tunge anih kan hriat tawh thu te i hrilh ang, mahse pi vanhmingi chuan eng thil mah a sawi tha duh lo anih chuan thil thlen dan engkim hriat anih tawh thu i sawi dawn ani, a ni chu a bul tum tu anih ngei thu te, sailova pawh a inpuan vek tawh thu te i hrilh ang, i hrethiam em? Mahse sailova pawh a inpuan vek tawh thu chu engmah a sawi that duh loh hunah chauh i hrilh dawn nia, a tan tirah chuan thil awmzia hrilh nghal mai lovin i veh thlem hmasa phawt dawn tihna anih chu?



Andrewa chuan "aw sir, ka hrethiam e, mahse pi vanhmingi hi rilru a harsatna nei a ni si a, a chhungte pawh hian an duat in an ngaihtuah em em a, keh thei dawm in an dawm asin, heti hian rilru lam a harsatna neite awmna hmun ah pawh dah duh lovin in lamah duat tak leh hmangaih takin an enkawl a ni si a, chutia a ruahmanna leh a thuruk zawng zawng inpuan tir tura kei in hma lak ka tumna chu lo hrethiam si se a buaithlak zo vek dawn asin" a han ti a.



inspector chuan "chutiang engmah a thleng dawn hleinem, pi vanhmingi hi rilru lam a dam lo anih tak tak hi i ring reng reng em ni? A fing in a ngaihtuahna a harhfim takzet zawk. A buai lo tawp tihna anih chu, mahse i hlauhthawn a i inhuam loh chuan nangmah ngei hi chhui zui i ni ang a, lung inah engtia rei nge i tan ang tih hriat ani hauh lo ania, tualthattu pui ang a ngaih i ni a, tualthahna a inhnamhnawih ang a ngaih theih i ni bawk ang"



Andrewa chuan hreh hmel zet chung chuan "sir, ka huphurh tih chu ka zep hauh lo, a chhan chu a fate lakah zawk hian lem ka chang thiam a ngem tih lai zawk hi ani, a fate nen hian kan inkawm ve fo si a, ka lemchanna chu kar lovah an hrethiam thuai in ka ring ani" Rinpuia chuan "i hlauthawng hma lutuk anih chu, thil harsa engmah a awm lovang, a fate chu tihbuai an tul anih pawhin keini in kan rawn cover dawn che alawm" alo ti a.



Inspector chuan "imm, engmah a buai lo ang, kan intawiawm tawn reng dawn alawm" Alo ti ve bawk a, chutah le Andrewa pawh chuan "aw le ka ti ang, mahse kei leh ka chhung te chungah eng thil thalo mah a thleng zui lovang tih min tiam ru" a han ti a, inspector chuan "chu zawng kan tiam thei lo che tih i hria e, mihring nun hi kum khua in a him reng thei hleinem, kan la thi vek dawn alawm" alo ti a.