PSYCHIC VOLUME III_Chapter-5

[April Hmar Liverpool]

PSYCHIC Volume _3

Bung Ngana


An ruahmanna te thawhchhuah pui tura andrewa an han tih takah chuan an ni police lam pawh chuan sailova chu station lamah chuan an han ko veleh ta a. Inspector chuan sailova chu a en ngun kher mai, minute khat dawn chu engmah sawi lovin uluk tak hian sailova mit ah tak mai chuan a han en reng a, sailova pawh chu a zam kher mai, a hrilhhai in a mangang hle ani tih a hriat theih.



Inspector pawh chuan a mit chu la la sawn chuang reng reng lo chung chuan "sailo, thil pakhat min tih sak tur in ka duh che ani". A han ti a, sailova chuan phawk fe hian "eng, eng thil maw sir? alo ti a, inspector chuan "thil ho te mai mawle, pi vanhmingi ka call ang a, pi vanhmingi hnenah chuan thil engkim police ten an hriatchhuah tawh thu hi i hrilh ang, tichuan a ruahmanna zawng zawng te pawh an hrechhuak vek tawh ani tih i hrilh ang" a han ti a.



sailova chuan phawk fe hian "eng ruahmanna maw sir? a han ti a, inspector chuan chang zet hian "thu tuitam vak a tul lo, ka sawi ang in ti la a ni mai, a bak chu engkim a tha vek tawh ang" a han ti a, chumi rual chuan inspector chuan lehkha phek a thu inziak tlar duah chu han phawrh in sailova hnenah chuan "hei hi i thusawi tur chu ani, pi vanhmingi'n phone alo pick up veleh ah he thu hi i sawi tan nghal ang. A tha em?



sailova chuan "sir, enge thil awmzia hi? a han ti a, inspector chuan "kha, ngun takin chhiar rawh, i hrethiam mai ang" alo ti a, sailova chuan ngun tak chuan lehkha a thuziak chu a han chhiar a, mak tiin a meng kaw kaw thei hial mai. Chumi lai chu inspector pawh chuan uluk tak chuan alo en ve ran reng a.



Sailoa chuan "mahse sir, hei hi chu, hei hi i phuahchawp tihna ami? a han ti a, thuziak ah chuan sailova chu tualthattu anih thu te alo inziak a, sailova vek chuan "sir, kei hi tualthattu ka nih thu te, tin pi vanhmingi mi rawih ang te a min ngai mai leh min chhuah mai duh hi enge a awmzia? a han ti a, chutah uluk fe a sailova en chung chuan "sailo, heng hi ka phuahchawp i ti a maw? Inspector ngaihtuahna chu a buai lek lek thei hial mai. chutah uluk tak hian a han inngaihtuah a, sailova fin khalh chu tha in a hre ta a "Imm, a tha e,ka phuahchawp pawh chu lo nise, tualthattu i ni tak tak lo anih pawhin enge buaina tur awm? min tanpui dawn ani mai a.



"Sailo, pi vanhmingi hnen atang hian eng thil emaw hriat duh kan nei ani, hetiang a thu kan phuah hi a ngai, tichuan kan hriat duh tak chu kan hria ang, misual i nih loh phawt a hnu, keini min tanpui nan a lem i han chang tur chu a pawi viau dawn em ni? Sailova chuan "mahse sir, pi vanhmingi hi alo hrilhhaiin alo mangang dawn lutuk asin, chu chu enge in tan hlawkna? a han ti a, a lungawi lo kher mai.



inspector chuan "imm, thu tui tam vak in awmzia a neilo ka tih kha, khai le, ka call dawn a nia, khawngaihin i theihtawp min chhuah sak rawh" tiin sailova chu ngen ngawl deuh chuan a han en a, sailova pawh chuan a ngaihna hriat loh hmel tak chung chuan "awle ka ti ang, police ten ti tura min duh tlat si chuan" a han ti a, chuveleh inspector chuan pi vanhmingi chu a han call ta a, lehlam atang chuan "hello" a rawn ti a, inspector chuan sailova chu en in a lu chu a han bu nghat a, chuveleh sailova chuan a aw chu a han thian kharh kharh a.



"Aw, pi vanhming, keimah ka nia saitea", thawm chu a reh diak reng a, sailova vek chuan "pi vanhming, kan thil tih zawng zawng an hre vek tawh, i ruahmanna zawng zawng nen lam, kei hi i pasal that tur a min rawih thu te, tin midang pathum chu thu hretu lem a i hman thu te, i pasal thih danah evidence lem kan siam thu te, i pasal thihna chu dawi leh thlarau kaihhawih thil ni a lantir i tum thu te engkim hriatchhuah ani tawh, chuan pi vanhming, hei hi thudik a ni em? i ruahmanna pakhat zawk a hlawhtlin loh chuan kei hi min tal awh tir i tum ani tih hi?



"police te hnenah chuan a kaw tawpah kan tang tih hria in kei ngei pawh ka inpuang vek tawh ani, i pasal chu dawhkanah a hnar ka tauh tir thu te" sailova chu a han then deuh chak chak a, a thu sawi leh zel tur chu harsa a ti takzet.



"tichuan a nghawngah chuan puanin ka rek leh a, tichuan a thin zawnah chemte a ka vih leh thu te, voice recorder chu ka on a, tichuan kei chuan i ruahman dan ang zelin mangang tak a tu thil tih nge ti a i pasal hnena ka zawh thu te, tichuan i pasal min chhanna nen chuan kan thusawi chu a inpersan thu te, chu thil chuan police te lu a tih hai thu te, engkim a lang vek tawh, ka puang ta vek mai ani.



"Ka tihpalh lutuk, i rilru lam a harsatna nei ang a i landan chungchang te thlengin, tin hei hi ka hrilh duh bawk che ani, i fate leh i chhungkua thleng pawh khan police te chuan an ringhlel zel tawh ani. I fate pawhin an tuar mai ang, chuvang chuan i fate erawh kha chu eng thilah mah an inhnamhnawih velo ani tih hi police te i hrilh ngei a tul ani, chuti lo zawng police ho hian i chhungkua zawng zawng nen lam an khawrh ruak vek duh mai dawn"



chuveleh inspector chuan vin zet hian "a tawk! a rawn ti tuarh a, chumi pah chuan sailova kut ata phone chu a phih tlak sak lawp mai a, phone call chu dah in chuveleh inspector chu a han nui sang a, "awle, i ti tha lutuk e, sailo ka lawm lutuk e" a han ti a, sailova chu a tah a chhuah hmel takzet, "ka pu, eng in ti zo ta nge? in a zo ta em ni? A han ti a.



inspector chuan rum zet hian "misual chu tunge? a han ti a, sailova chuan "sir" sailova aw chu a ring kher mai "inspector, i thil tih hi a atthlak lutuk, pi vanhmingi leh kei hi dawt in min puh a ni, fiamthu na chi pawh a nilo" a han ti a, inspector chuan nui sang chung chuan "sailo, ka thu ang in i awm tawh ang, chuti anih loh chuan nang hi tualthah avangin lung in ah ka khung khawp ang che" a ti ta mai a.



sailova chuan hriatthiam loh hmel zet hian "engtin maw sir? i a ta mai em ni? Enge kha kha a awmzia? chuan pi vanhmingi hnen atang a chhanna engemaw i beisei ruk chu i hre duh leh chuang silo tihna em ni? Engtin mah min rawn chhan let ve hma hauhin khati khan" a lu chu a han dawm vang vang a, "sir, nang ni hian min bum em ni?



Chuveleh inspector chuan "imm, ka bum lo che, thudik ka zawng mai ani" A han ti a, chutah inspector vek chuan "tun a tan chuan i kal thei ang, hei hi tun atangin kan thuruk ni rawh se, hetiang ang a thuruk pawimawh hi hmun dangah alo put ru anih vaih chuan hnuchhuina ah hian buaina a thlen thei ani tih kha hre reng la, police te i puih avang erawh chuan thil tha tak i ti ani, i kal thei tawh ang, in ngaihtuah buai lo la, pangngai takin awm ang che" a han ti a.



A mobilephone a a voice record chu han hmuh in "kha le rinpui, evidence tha lutuk mai chu" a han ti a, rinpuia chuan "eng, eng evidence maw? alo ti a, inspector chuan "aw, tualthattu ni a rinhlelh sailova in puanna chu maw le" a han ti a, rinpuia chuan "sir" alo ti ringawt a,sailova leh pi vanhmingi inbiakna a ruk a alo record chu a han ngaihthlak tir a, rinpuia chuan mak tih hmel zet hian "sir, nang hi, hei hi i ruahmanna chu a ni maw? a han ti a.



inspector chuan "imm, ruahmanna em em ani hran pa lo, sailova hi a inpuang duh lo ti khan i buai i buai bawk si nen hei a inpuanna tha tak chu anih hi" a han ti a, rinpuia pawh chu a lawm ru hle mai a.



"Chuan sir, pi vanhmingi chuan engtin nge a rawn chhan let dan, hei hetah hi chuan engmah a chhan letna a awm silo a" a han ti a, inspector chuan "kei zawng, ka fimkhur alawm, khatia pi vanhmingi be tura ka tih lai khan sailova hmelah leh awmdanah khan thil danglam ka hmu tel ta tlat ani, chuvang chuan pi vanhmingi tak tak biak tir chu tha in ka hre leh ta lova, pi vanhmingi nilo midang ka ruahman lawk sa vek alawm"



"Aw le, awle, a tha e, a tha lutuk sir, i ti tha takzet ani" rinpuia chuan a han ti a.



Andrewa chuan hun remchang hmasa ber ni a ngaih pi vanhmingi titi pui tur chuan pi vanhmingi te awmna lam pan tur chuan a insiam ta nghal a.



Chutia hun rei tak chhung a hmel an hmuh tawh loh, an chhungkaw thian ang hial a an lo ngaih Andrewa hmel a rawn lan ve tak hlawlah chuan pi vanhmingi fapa isaka chuan alo lawm thiam hle mai a,



"kha, nang chu ve teh hlawl che chuan, in hmuh ava khat bawk ve maw le" alo ti sawk sawk a, andrewa chuan pi vanhmingi hmu tura an in a a kal tawh thu chu rinpuia hnenah a hrilh tawh avangin a thil tih tur chauh chuan a rilru a kap ani, "andrew, enge i tih tak zel? a ngaiah tho em ni ila thawh? Chumi lai chuan isaka farnu tetei pawh chu choka lamah chuan a rawn lang ve ta bawk a.



andrewa a han hmu chiah chu a meng zau kawk a, chutah "e khai aw! drew nang ni reng che chuan, i va rawn lang khat ve" a rawn ti ve nghal thuai a, andrewa chuan "aa hei, ka pi vanhmingi ka rawn kan e ka ti a, khawiah nge amah hi? a han ti a, in chhung chu a thlek kual dan dan a, isaka chuan "khawiah nge a awm ni? In chung lamah emaw room lamah emaw a awm a ni ang, tetei nen hian an inbuai pui deuh chawt a" alo ti a. tetei chuan "i va ti lawmawm thin tak, ka nu chu a zia lai tak ani e, i fel thin nang hi chu" alo ti ve vat bawk a, "khawiah nge a awm a tete? tetei chuan "in chung zawlah a awm, ni lum a ai a" a ti a.



"imm tete, chuti chu ka pi awmna ah chuan ka han chho ve teh ang" isaka chuan "engtin maw? enge i hriat a? kan inkawm ang chu" alo ti ta tlat mai. Andrewa chuan "aa, isak, i nu chu ka hmu khat tawh si a, ka hmu duh deuh maw le" a han ti a, tetei chuan "imm chung te chu nakinah ani mai lawm, rei pawh a awm peih kher lovang, ka han hruai thla leh mai dawn alawm, hetah in chhung lamah hian" alo ti ve ta tlat mai bawk a.



Andrewa chu a mang a ang ru hle a, a fal a pi vanhmingi chu a biak theih chu a ring ta hauh lo mai. Chutah hreh ru tak chung chuan andrew chuan "eng lo ania tete, isak, pi vanhmingi chu enge maw sawi pui ka duh vang a nia" a han ti a, tetei te unau chuan mak ti hmel an pu lek lek mai, chu chu hrethiam in "aa, eng lo, thil pawimawh ve tak mai a ni a, ka sawi pui ngei a tul ani" a han ti leh a.



tetei chuan "thuruk a ni maw? alo ti a, andrewa chu a phu zuk thei hial mai, isaka chuan nui huk pah chuan "eng thuruk chungchang nge ni a drew? chutia ka nu nen teh daih thuruk sawi tur te in lo neih ni" a han ti a,



andrewa chuan a fate awmdan atang chuan pi vanhmingi thil tih zawng zawng chu an hriat pui vek lo anih chu a ring ru ta deuh a. "Aa, tete, isak, ka han chho ve lawk mai a nge, thuruk han tihah pawh khan a ho lutuk, hei engemaw a tan tihsak ve te ka duh a" tiin a mobilephone chu a han lek kang ngawt pek a, chuveleh mak tih hmel zet hian isaka chuan "kha kha eng maw? alo ti hu mai, tetei chuan a ngaihna hriat loh hmel tak chung chuan "phone kha engtin? alo ti ve bawk a, chumi lai tak chuan inspector remruata leh rinpuia te chu an rawn lang ve ta hlawl mai. Andrewa'n inspector te pahnih alo hmuh veleh chuan a lo thaw huai thei hial a.



Chutia an pa thihna chungchang a police ten thu zawhfiah an han duh takah chuan tetei te unau pawh chuan "awle ka pu, eng thu nge min han zawt ta che u" tiin thu zawhfiah tur chuan an thut hmun chu an han siam rem ve ta poh a, andrewa chuan chumi lai chu remchangah chuh in "tete, ka lo han, i nu chu ka lo han kawm hlim a nge" alo ti vat a, tetei pawh chuan "awle, awle" alo ti ve ta bawk a.



In chung zawlah chuan pi vanhmingi chu lunglen hmel tak mai leh khawhar hmel tak mai hian ral lehlam thlir hian alo thu a, andrewa chuan a aw chu han thian kharh kharh in inspector thu hrilh kha a hre ran mai, chutia voice recorder nen lam a pi vanhmingi a han vehthlem vel tur chu a huphurh ru takzet a, a ni hnen atang hian sum thahnem tak alo dawng tawh a, tunah erawh a ruk a ralin a veh let thung dawn ta si a.



Inspector chuan tetei te unau chu ngun tak chuan a han en a, chutah muangchang a a rumol a a hnar han hruk pah chuan "imm tetei maw i nih? a han ti a, tetei chuan "aw ka pu, hei hi ka nau isaka" alo ti a, isaka pawh chuan "sir, ka pa thihna hi in chhui zui zel thei a ngem? Tualthattu hi man ngei a a phu tawk hremna pek ngei kan duh ani" alo ti ve bawk a.



In chung lamah chuan pi vanhmingi chuan "Drewa, ka thusawi chu awih mai rawh, pawisa pawh kha ka pek vek tawh che kha", pi vanhmingi hmel ah chuan thuruk a awm ni a ngaih theih tur thil reng hmuh tur a awm lo, "pi vanhming, engvang a khatiang nilo, engvang in nge hetiang thil hi i tih? Pi vanhmingi'n engmah a sawi tha duh dawn lo anih chuan thil engkim hriatchhuah anih tawh thu hrilh tur a inspector in a chah kha a hrereng a,



pi vanhmingi chuan "drew bawiha, i pu ngaihawma kha thah a ni i tihna em ni? Alo ti ta daih mai a, andrewa chu a hamhaih lek lek hman a, "ka pi vanhming, hetiang a game play kual reng hi i duhtawk tawh ang, thil engkim hriatchhuah vek ani tawh, kei ngei pawh hian police te hnenah i ruahmanna zawng zawng leh i pasal thla hmu ang a min ngaih theihna tura ka chet lak dan zawng zawng te kha ka puang vek tawh asin"



Pi vanhmingi chu ngun tak in a en a, pi vanhmingi chuan "drew bawiha, thil awmzia hi i la man thiam dawn lo cheu tihna ani maw? chu ka ruahmanna zawng zawng te, chet ka lak tir dan zawng zawng che kha i sawichhuak vek mai a maw? Ka ruahmanna te khan chhan a nei asin" Pi vanhmingi hmelah chuan lungawi lohna a hmuh theih a.



Isaka chuan a kut chu a han hum ruh ngat ngat a, chutah thawk hak pah chuan "pu inspector, ka pa thihna ah hian plan a awm i ti em ni? A han ti a, inspector chuan "aw, ruahman lawk vek thil niin a lang, sailova hi i hmelhriat a ni em?



Isaka chuan "ni tehreng mai, ka nau nen hian an in" chuveleh tetei chuan "a tawk isak, duh tawk ang, sailova chungchang sawi ka duh tawh lo" alo ti a, chuveleh rinpuia chuan "ee, ni mai love thianu, i pa thattu hi he pa i bialpa hlui sailova hi a ni maithei asin, a rinhlelawm ber ani" alo ti a, tetei chuan "ka pu, sailova hi tualthat duh tur chi a nilo, ka hrechiang, misual a ni hranpa em em lem lo asin"



Pi vanhmingi chuan "andrew, i thusawi awmzia chu ka pasal hi dawi anih thu leh thlarau sual hnathawh anih ka rin thu hi a darh vek tawh i tihna em ni? Andrewa chuan "ka pi vanhming, uluk deuhin ngaithla rawh, inspector khan engkim a hrechhuak vek tawh. Ka inpuang mai bik lo asin, mahse inspector khan thil awmzia a hmu tlang vek si ani. Khatih lai khan ka bul ah alo awm ve reng a mawn chu tih mai tur hian ka awmdan zawng zawng leh ka chet lak dan zawng zawng te, tin ka dawt sawi leh ka thil phuahchawp te thlengin engkim a hria"



Inspector chuan tetei hnenah chuan "chu, i bialpa hlui chu misual a nih i ring lo a ni maw? Tetei chuan "sir, sailova hi misual anih karing lo mai nilovin misual anilo tih hi ka chiang ani. A thil tih a ni thei lovang". Rinpuia chuan "chu chu a finfiahna i nei em? Alo ti a, isaka chu alo in rawlh ve vat bawk, "ka pu, ka nau hi ka hrechiang, police te hma ah a pa thihna chungchang ah lehnghal dawt emaw a rin thu mai emaw chu a sawi lo tawp ang" alo ti a, a thusawi ah chuan a inrintawk hmel cherh chawrh viau mai bawk. inspector chuan "mahse thiante u, misual hi tunge anih kan hriatchhuah hunah meuh hi chuan kan lo rin loh lam daih a mi te hi an lo ni duh chawk a nia" a han ti ve bawk a.



Pi vanhmingi chuan uluk tak chuan thil awmzia chu a han ngaihtuah a, chutah thawk hak pah chuan "khai leh, i sawi awmzia chu kei hi, keimah hi misual ka nih min ringhlel tihna maw? Khatiang a nang ka rawih avang che leh inspector ngei pawh kha ka pasal thihna hi dawi anih thu kha ka hrilh ngei mai a, mahse keimah zawk hi min ringhlel let tih ka hrethiam ta mai" a han ti a, andrewa pawh chuan a rilru chuan 'imm, tum loh dan in thil a kal dawn tlat mai. Ti rilru nauh nauh chung chuan "pi vanhming, i pasal thihna hi dawi anih leh thlarau sual hnathawh anih i ring hi i fiamthu hauh lo tihna a ni maw? chuan" a ngawi leh vat a, pi vanhmingi chuan "chuan" alo ti a, andrew chu a en kal mai.



Tetei chuan "ka pu, sailova nen a kan inkar hi chiang zawk a in hriat ve a tul niin ka hria" a han ti ve ta a, inspector leh rinpuia te pawh chuan teteti thusawi tur chu an lo bengkhawn ngang mai.



Pi vanhmingi vek chuan "drew bawiha, ka fanu leh sailova te inkar chungchang hi chiang zawk a i hriat ve phawt a tul in ka hria" a lo ti ve mek bawk a, andrewa chuan "ka pi vanhming, chung te chu ka hria alawm" alo ti a.



Rinpuia chuan "tete, sailova nen in inkar chungchang te chu kan hria alawm" alo ti a, inspector chuan "sailova nen in inkar emaw sailova chungchang hrim hrim sawi lan kha i duh tawh lo ni khan ka hre zo zauh si a" alo ti ve bawk a.



Andrewa chuan "ka pi vanhming, sailova leh tetei te inkar chungchang chu sawichhuah duh lo tu ber i ni thin si a" alo ti a, andrewa vek chuan "mahse nangmah ang lo takin pu ngaihawma kha chuan tetei te inkar chungchang hi a ngaihven tlat a, a buaipui tlat thung" a han ti a, pi vanhmingi chuan "drew bawiha, kei hi ka rilru hi a dam lo tak tak in i ring em? Andrewa chuan "aw ring e" alo ti a.



pi vanhmingi chuan "drew bawiha, i pu ngaihawma kha ka beidawn san tawh ani, a ni lakah khan ka beidawng tawh ani. Dawi in a tibuai a, ramhuai in a zar buai ani, ka thu leh hla a ngaipawimawh duh lo a, kei khan ka ngaihtuah in ka mangan pui thin takzet asin, mahse maw drew bawiha, keimah ngei pawh hian na ka ti, ka ngaihdan atthlak tak leh ka hlauhthawnna atthlak tak tak te chu nuihzat in kei chu rilru buai ang hial ah min chhuah ta zawk asin.



"Ni e, he tia rilru lam a damlohna nei ni ang a ka lan tak nachhan pawh hi i pu ngaihawma vang kha a ni asin, mahse a hre lo, a chunga thlarau sual hnathawh leh dawi hnathawh kha a hmu thei tlat lo, mahse kei chuan ka hmu tlat si ani.



"Tichuan ka beidawn thlengin i pu ngaihawma kha ka buaipui a, mahse a ni chuan min bengkhawn duh lem lo. Tichuan kha mi ni ka rawn biak ni che hma deuh khan ka pasal hi a thi thuai dawn a ni tih hi ka hria ani. Ka hriat theihna chhan pawh" Tiin pi vanhmingi chu a ngawi leh vat a, chutah pi vanhmingi bawk chuan "Mahse ka tlawm tawh, ka beidawng tawh, kei in engmah tih theih ka nei tawh lo, ka pasal thih hun tur chu ka nghak tawp ta mai ani.



"Kha dawi leh thlarau hnathawh kha dan theih a nilo ani. Tichuan nang kha i tanpuina ka rawn dil ta che anih kha, ka pasal hi ramhuai tihbuai ngei ani tih a lanna turin, a tirah kha chuan ka pasal nunna kha chhan theih ka la beisei fan a, mahse ka pasal khan ka warning na te chu a hre duh reng reng lo ani tih ka hria, tichuan khami zan khan a thi ta ngei a, nangmah kha ka pasal thihna a ka ngaihdan hi a dik ngei ani tih lantirna atan a ka hmanrua atan ka hmang ta che anih kha.



"Tin, nangmah chauh nilo, midang pawh ka pasal thihna chu dawi thil leh thlarau sual hnathawh ngei ani tih lantirna atan hian lemchang tur in ka ruai bawk alawm, nang ni khan ka ruahman dan ang a lem in chan khan ka pasal chu dawi leh thlarau sual hnathawh avang a thi ni ngei a ngaih theih tur khan ngaihruatna alo piang dawn ani. Mahse chumi bak eng thil dang mah a awm lo. Ka pasal hi tu thah mah a nilo. Dawi leh thlarau sual tihbuai avang a thi a ni"



Andrewa chuan "ka pi vanhming, enge i thusawi awmzia chu ni ngai? sailova chungchang te pawh an hre vek asin, tin nang chauh nilo i fate thleng hian i pasal thihna ah hian an inhnamhnawih ni ah ngaiin police ho chuan hmalak zel an tum asin, chuan sailova ngei pawh kha a inpuang vek tawh alawm" tiin pi vanhmingi mar chu a han dek leh hram a,



pi vanhmingi chuan "nilo drew bawiha, sailova leh tetei chungchang hi sawi chhuah ka duh viau lo, mahse in hrechiang tawk lo ani, an inhmangaihin an inthlahlel em em zawk asin, pawn lam a an landan ang ngawt kha an ni hleinem, tin i pu ngaihawma thihna hi ramhuai tihbuai leh thlarau sual hnathawh ani ngei ani tih hi ka Chiang a, ka hresual theilo bawk"



Tetei chuan "ka pu, sailova nen khan kan inhmangaih em em zawk asin, engvang a inthen nge kan nih maw? kan inkarah hian do lung a awm reng a, kan inhmangaih a kan inzui kha duh lo tu an awm ani. Chu chu chiang takin ka hria, kan inthen chhan chu loh theih loh thil, kan hriatthiam theih bawk siloh thil in min karcheh tlat vang ani zawk asin" tiin mittui tla zawih zawih chung chuan a inhnit nghal hlawp hlawp a.



rinpuia chuan "sailova nen chuan in inhmangaih a, inthlahlel tak chung siin in inkawp a rem silo a ni maw? karah chuan eng thil tak chu tlazep ang maw? Inspector chuan ngun fe hian a han ngaihtuah a, "mahse tete, sailova ngei pawh in i pa kha a chungah a thinur in a lungawi lo thin hle niin a sawi a, a chhan ni a lang chu sailova hian nang hi a chhan awm lovin a ti na che a, a then che a, chumi avang chuan a fanu thlavang a hauhna lamah i pa khan sailova kha a haw hle niin a insawi asin"



"Nilo ka pu, sailova chuan chutiang chuan a sawi lovang, ka pa ah hian engemaw buai ru hi a awm ani zawk. Tlang taka sawi chuan ka pa hi kan inkar a tlazep chu niin ka hria, a tan tirah chuan ka hrethiam bik lo, mahse a rei telh telh a thil awmzia ka hrethiam chho telh telh ani, kan inthen kha a duh zawk a ni ka pa khan, mahse hmuh theih ah chuan kan inthen ta kha sailova lakah lungawi lo ang in a lang ta zawk pawh a ni ngei ang"



Rinpuia chuan "sir, thil inpersan deuh deuh hi a va tam ve maw le" alo ti a, inspector chuan "imm, thil inpersan, a awmzia chu in bumna thil a tam tihna ani. Ni a lang, lo ni leh silo, i hrethiam mai em rinpui, tin thil mak hi a tam riau bawk. kan hnuchhui dan zawng zawng kha han thlir let leh mah teh, voice recorder a pu ngaihawma leh sailova te tawngkam inpersan tak te kha"



"thil inmil thei lo tawp a ni, amaherawhchu pu ngaiha thlarau hmu ang a insawina kha chu dawt phuahchawp ani tih kan hre tawh a, a awmzia pawh kan hre tawh a, mahse thil pahnih a la awm, tunah tetei leh sailova inkar chungchang ani leh a, pu ngaihawma kha chuan a fanu sailova'n a ti na leh a then tak avang khan a lungawi lovin sailova kha a haw ta hle niin a lang a, chu chu keini lo hriat dan pawh ani, mahse tunah tetei ber chuan an inhmangaih thu leh an inthlakhlelh thu a sawi veleh tlat thung a, an inthen chhan pawh an inthen duh lo em em tu ni a kan lo ngaih pu ngaihawma ber chu niin tetein a sawi leh ta mai si a, engkim hi inbumna vek a ni" Tiin inspector hmel chu a dur hle mai a.



Rinpuia chuan "sir, engtia han tih zel chi nge ni ta ang le? A han ti a, inspector chuan "kawng hrang hrang atang a ngaihruatna ngai bawk, chu tiang chu a ni ang ti a ngaihtuahna zau tak kan hman leh a tul hmel tihna anih tak ber chu, victim fanu berin tualthattu ni a lang sailova chu a ringhlel phal mawlh silo a. Thil awmzia hi a inthuk ru dawn chauh emawn chu tih mai pawh a awl ta viau mai"



Andrewa chuan "pi vanhming, an ni inkar chungchang chuan pu ngaihawma thihna ah hian enge awmzia a neih tak ang? Pi vanhmingi chuan "drew bawiha, a chhan chu maw, i pu ngaihawma khan a fanu leh sailova inzui kha a ngaithei lo alawm, ama pawh then ngei hi anih ka ring nghe nghe ani. Chumi awmzia chu" Inspector chuan "chumi anih takah chuan thil awmzia ni a lang ta chu kan hnuchhuina huang hi ka zauh belh zel a tul dawn tihna a ni maw? A ti ta a.