PSYCHIC VOLUME III _Chapter-6

[April Hmar Liverpool]

PSYCHIC Volume -3

Bung rukna



"Drew bawiha, i pu ngaihawma khan sailova leh tetei te inzui kha a ngaithei lo alawm, sailova kha a mi duhzawng anilo va, a mi ngainat zawng anilo, an inthen kha a duh dan zawk ani. Tin, i pu ngaihawma kha a chhungrilah tihbuai tu a nei ani, amah ngaihtuah a ngaihven em em tu kha min ngaithei lova ani, amah ka ngaihtuahna leh ka hmangaihna te chu khatia mi ang lo leh rilru buai ang mai a min chhuah letna te kha min chhan let duh dan ani.



"ka na in ka hliam tak meuh meuh asin, i pu ngaihawma khan thinlung a nei tawh lo, ama mihring nihna kha a hlauh zo tawh ani, a thluak erawh a tha si a, midang chauh nilo, a fate ngei pawhin a thusawi te leh a ngaihdan te kha an tawm pui thei tlat asin,



"keimah, a nupui khan ka rilru lamah harsatna ka nei ani tih thu kha midang a rin tir thei tlat si ani, Khang te kha min ti na zual tu an ni a, beidawng a min Siam tu chu an ni, i pu ngaihawma kha ramhuai in a tibuai a, a dawi a zo tawh anih kha ka ring hmiah tawh ani,



"engmah tih theih ka nei tawh lo, kha ramhuai hnathawh kha ka titawp thei dawn chuang lo tih ka hria, tanpui tu a mamawh asin i pu khan, mahse khawnge tanpui tu chu? Tumah an awm lo, i pu khan a bum mek zel zawk ani. Tunah ngei pawh hian a bumna thang ah in tang mek zawk ani. i pu ngaihawma khan sailova a huatna kha a ruihchilh nasa lutuk asin, hmangaihna kha a hua ani. Chu vang chu a nia dawi anih thu leh ramhuai tihbuai anih thu ka sawi nachhan chu ni"



andrewa chuan "mahse chu chuan ka pu ngaihawma thihna ah chuan enge awmzia a neih? A mi huat em em Sailova thah chu ani i tihna em ni? mahse thah anilo i ti tho bawk si a, dawi hlum ang in i sawi a, ramhuai tihbuai ang in i chhuah si a? Pi vanhmingi chuan "engmah awmzia a neilo, thil atthlak mai ani, a zavai hian"



Inspector chuan an thil ngaihthlak mek chu titawp tur chuan a han ti a, "rina, ti tawp lawk ta che, engvangin nge pi vanhmingi hmuh dan hi ka hmuh dan nen a in an tlat mai le? Tiin a khabe chu a dawm vang vang a, rinpuia chuan "andrew, in inbiakna hi i record a ni tih a hre lo tak tak a maw? a han ti a, andrewa chuan "ka pu, a hre lo hrim hrim" alo ti a, inspector chuan "awle han play leh tawh teh" alo ti a.



Rinpuia chuan voice recorder chu a han play leh ta a, pi vanhmingi aw bawk chuan "sailova hian tual a that lo. Thil hriat sual an nei ani, i pu ngaihawma hian sailova a huatna hi a ruihchilh ani ka tih kha i hria em?



Inspector bawk chuan "rina, khami lai ah tak khan titawp leh lawk teh, aw le, khami lai pi vanhmingi thusawi awmzia kha enge ni ta ang? Rinpuia chuan "sir, pi vanhmingi sawi awmzia kha chu sailova hi a huat em avangin pu ngaihawma hian a thih dawn a a thusawi 'engvang nge hetiang thil hi i tih saite' ti a misual chu sailova ni a a lan theihna lai tur a kha a rawn sawifiahna chiah ah ka ngai" alo ti a.



Inspector chuan "imm, rina a awm ang viau mai, mahse pi vanhmingi berin a ringhlel lo Mai niloin sailova thil tih a nilo a ti tlat thung lawi si a, awle ti khan pu ngaihawma thusawi voice recorder a mi kha han play leh chiah teh le, pu ngaihawma aw bik kha aw" Rinpuia chuan pu ngaihawma thih dawn a a thuswi chu a han play leh ta a, 'engvang nge? engvang nge hetiang thil hi i tih saite, engvang nge ka chungah hetiang thil hi i tih?



Thawm chu a reh thiap mai, rinpuia chuan "sir, amah thattu hi midang an ni a, mahse pu ngaihawma hian sailova a huatna hi ala ruihchilh em avangin amah thattu chu sailova emaw a ti tihna a niang maw? A han ti a, inspector chuan "imm, thil awmzia ni a lang chu a ni tlat si ani. A thihna hi sailova tih nilovin sailova hi a thihna thlen tu ah a ngai tihna anih chu. Ka sawi tawh kha 'sailo, engvang in nge min vih? engvangin nge min nghaisak? engvang a min thah tum nge i nih? Chutiang chuan ti se chu sailova hi chhui buai vak ngailo in kan man thei ni mai tur a ni a, mahse engvang nge hetiang hi i tih? ka chungah engvang nge hetiang hi i tih? chumi ringawt chuan sailova thil tih kha a sawifiah zo tlat lo ani.



"Sailova a huatna hi a ruih chilh si a, sailova'n a fanu a ngaizawng kha a run em avangin engvang a ka chungah hetiang thil ti nge i nih? Engvang a ka fanu hi ngaizawng kher kher nge i nih a tihna zawk pawh alo ni reng thei anih chu. Amah vih a nih thu leh a hliam te kha hre chang lo tur khawp in sailova a huatna chu ala ruihchilh tluang zel anih chu, tihbuai a ni a, amah hi a buai miau a, thil awm lo a ni lo thei ve tlat ani.



"Tin, pu ngaihawma hian sailova hi huatna chhan tha tak a nei pawh ani thei, an chhungkaw hmelma kumhlun fapa anih vang pawh ani thei, mahse ama nupui pi vanhmingi kha chuan a pasal chu tihbuai tu mihring pangngai lo deuh a awm ni khan a sawi a, tin hmangaihna hrim hrim chu a pasal hian a hua niin a sawi thung. Tin, thil pawimawh ber, a thih chhan kha chu kan hre tawhah ngai ang, dawi lam leh ramhuai tihbuai anih kha a awm ang ber ani. Ama nupui ngei in a sawi hi i pawm ve phawt mai ang.



"A pawimawh ber chu a thihdan mawlh kha a ni ta ani" Rinpuia chuan "mahse sir, a thihdan a kan luh hma in a thih chhan chu kei chuan pawm mai a har ka la ti ani, court lam hian an pawm ve dawn em ni, a finfiahna a tha silo, ama nupui rilru lam a harsatna nei lehnghalin a sawi dan a ni mai si a" Alo ti ha a,



rinpuia vek chuan "aa nia, pi vanhmingi'n a ngaihdan a sawina a ni ve mai a, keini pawhin ngaihdan hrang hrang chu kan nei a, a finfiahna Chiang zawk lai a hi ani" a han ti leh a, inspector chuan "ngaihtuah teh rina, kha kan han ngaihthlak zawh tak kelh ang deuh khan ama nupui ngei, pi vanhmingi nen a an inkar hi a tha lutuk bik lo pawh alo ni maithei, kan pastor chuan a nupui in amah a ngaihtuahna te, a chung a thil thalo a thlen alo hlauh pui na te chu engvak ah a ngailo a, ama nupui ngei pawh chu a ngaih that loh hma em avang te, ngaihdan maksak deuh, a ril rem zawng ni ve lem lo alo neih thin avang te chuan rilru lam harsatna nei ang hialah a chhuah ta a.



"keini ngei pawh hian rilru lam a harsatna nei ang ah kan lo ngaih phah ve ta hial chu anih hi maw, mahse hei andrewa te leh midang pahnih pastor thla hmu ang a insawi te kan han hmelhriat chho ta zel a, rilru lam a harsatna nei ni a kan lo ngaih pi vanhmingi chu a thluak alo fim zia leh remruatna te leh ruahmanna te pawh alo siam thiam si zia kan han hailang chho ta zel a, heti anih hi chuan pi vanhmingi hi a rilru a buai lo tawp a, a fim ru hle zawk tih a chiang ta reng mai.



"Misual ber ang leh a pasal thihna ah a bultum tu ber ang thawthangah kan ngai chho ta mai reng a. Chuti anih chuan a bultum tu ber in tumah venthawn tur nei lova, a duhtawk a inpuan na a neih tluk a hnuchhui tu te tan a thil pawimawh leh tangkai chu a awm kher dawn em ni? Hei kan mi rinhlelh ber chuan inpuanna a nei a ni a, mahse a inpuanna zawng zawng chu kan han hre fai ta kelh a, kan lung ala awi thei chuang lo fo ani maw? Kan awihsak thei Chuang lo fo dawn em ni? Police hnena inpuang a nilo a, tin a inpuanna hi record ruk ani tih a hre lo bawk. Dawt a la sawi hram hram tihna a ni dawn a, engtin zel nge kan tih tak ang?



"Nge ni a mi rilru buai alo nilo nasa a, chuvang a voice recorder Kam ruk kan tum te pawh chu alo hre ru lehzel zawk ni, dawt ala sawi ta cheu ah kan ngai zawk dawn a niang maw? kan ngai fing in kan ngai ropui mah mah lo maw? Rinpuia chuan "aa, ni e sir, andrewa ber zawk hian pi vanhmingi hnenah kan plan zang zawng hi alo hrilh ve thei tlat ani tih thil zawk a nia" a han ti a,



inspector chuan "imm chuti anih a hnu engah nge keimah ni ngei in a tirah khan kan tih mai loh, andrewa lakah hian rinna kan nghat a ni lawm ni? Keimah ni hi indem tur kan ni ang"



"Nilo sir, keimahni kan nih chuan pi vanhmingi hian thudik a sawi duh ngailo ang" Inspector chuan "imm awle, chak zawk mai rawh rina, mahse hma lam pan aiin kan then na ngaiah kan la then kan la then rih dawn tihna ani mai" a han ti let ve kauh a. "Ni e, a ninawm" tiin a mit chu a han tuai nawk nawk a.



Rinpuia chuan "sir, amah vanlalsailova ngei hi tunah rih chuan kan hman tangkai a hun tawh ani. Heti hian ti ang, pi vanhmingi ngei pawh hian a mi rin zawng tak leh a mi ngainat zawng tak alo ni ngei em tih fiahna te pawh a ni nghal mai a, a hnenah chuan i tir leh phawt mai teh ang, voice recorder kan kam leh ang a, mahse sailova hian keini min bum let loh nan sailova ngei pawh hi kan fin khalh erawh a tul ang"



Inspector chuan a mit chu a chhing siar siar a, "rinpui, hun khawh ralna mai ani dawn ani tih hi ka chiang" alo ti a, inspector vek chuan 'mahse i ruahmanna ang chuan kan kal poh a niang chu" tiin rinpuia ruahmanna ang a kal chu a remti ve ta nge nge a.



A tuk leh ni ah chuan rinpuia ruahmanna ang chuan chet la turin vanlalsailova hruai chuan pi vanhmingi awmna lam panin chet an la ve leh ta a. In an va thlen chuan dan ngai bawkin isaka te unau chuan an inleng te chu an lo dawngsawng tha leh viau mai.



Chutia vanlalsailova hmel ngei an lo hmuh tel ve takah chuan mak pawh an lo ti a, an hrilh a hai in a ngaihna an hriat loh hmel kher mai, inspector chuan pi vanhmingi biak an duh thu te chu a han hrilh a, isaka te unau hmelah chuan chutia rilru lam a harsatna nei an nu police ten titi pui an duh ani tih chu mak an ti ani tih haitheih ani lo. Inspector dilna ang chuan rem an lo tih pui ve mai a, in chung zawl lamah bawk chuan rinpuia leh sailova te chu an inzui chho leh ta a, inspector erawh in hnuai lamah isaka te unau kawm tur chuan alo awm ve leh ta bawk.



Rinpuia chuan pi vanhmingi chu ava pawh ve lo va, an bul maiah chuan an inbiakna te chu alo ngaithla ang a, alo bihthla dawn ani. Sailova chuan pi vanhmingi chu a titi pui ve thung ang. Hetiang a an tih kherna chhan hi chu rinpuia hian sailova hi a ring zo lo a, chuvang chuan an inbiak dan leh an awmdan, an che zia engkim lo zirchian a duh pakhat bawk vang ani.



A duhtawk a sailova leh pi vanhmingi te inkawm lai alo ngaihthlak a alo zirchian hnuah chuan an hmun lam pan a let leh tur chuan an inbuatsaih ta a.



Kawng lakah chuan inspector chuan rinpuia hnenah chuan a duh ang chhanna a hmuh leh a hmuh loh te chu a han zawt ve a, rinpuia chuan a duh ang tak chhanna a nih ngei a beisei thu alo hrilh a, inspector chuan "chu, rinpui i va chiang lo teh nuai ve, i beisei ringawt dawn a maw? a han ti a, rinpuia pawh chuan "sir, ka hmuh dan chuan pi vanhmingi hi a rilru a damlo tak tak ani" a ti ta tlat mai a.



Rinpuia vek chuan "mahse sir, a damlo ka tih avang khan ka beisei loh char char chhanna erawh ka hmu bik lo, i rindan leh i beisei ang chhanna an ni zawk mah awm e" A ti ta a.



Sailova te inbiakna voice record chu a han ngaihthlak tir ve a, inspector pawh chuan alo beisei ang ngei a ni tih chu hria in "imm ni e rinpui, hun khawhralna mai ani ang ka tih kha maw, a dik a dik chuan maw keini pahnih ngei pawh hi rilru buai leh harsatna nei kan nih lohna chhan tur bik hi a awm hauh lo asin, keiin thlarau ka bia a, nang in boruak a a thamral lai i hmu bawk a" Tiin a nui ta var var a.



Vanlalsailova chuan a theihtawp in pi vanhmingi chu a ruahmanna chungchang te, lem chang tur a mi a rawih thu te, amah ngei pawh chu police ho in man tur a an vehthlem mek thu te chu a hrilh a, mahse pi vanhmingi chuan a pasal thihna chu tualthahna niloin dawi leh thlarau sual hnathawh anih thu te, tin a pasal chuan a thusawi a ngaihpawimawh duh ngai loh thu te bawk chu alo hrilh leh a, chumi bak hnuchhuina atan a thil tangkai engmah sawi a nei Chuang lo ani.



Inspector bawk chuan dawhkan a file awm chu uluk hmanhmawh rilru tak chuan a han bih thuak thuak hlawm a, chutah a mit chu han chhing leh vang vang in "imm, tunah chuan a hmawr bawk a hnai ta kuar e, tun a kan tih leh tur awm chhun chu kan hnu kan thual let leh ang, he case a inhnamhnawih zawng zawng sailova, andrewa, leh mi dang pahnih, tin pi vanhmingi pawh. An ni hi an thusawi tak te kha an sawi dik ngei ani tih hi kan fiah let vek dawn ani.



Rinpuia chuan "aw le sir, a hmawr hi kan bawk fuh em ang chu maw" alo ti a, inspector chuan "fuh dawn tehreng e a, plan ang a thil a kal lo va a khaw baw zo ta anih erawh chuan he case hi ho lam tak pawhin a tawp mai thei ve tlat ani" tiin file chu a bih pah malh malh reng a.



Inspector remruata leh a naute mi engemaw zat chu pastor k.lalngaihawma thihna hotel ah chuan awm in inspector thu pek chu an ngaichang thap reng a, chutah inspector chuan a nau te chu han thlek kual dan dan pah chuan "awle, tunah chuan thudik chu a tih a tih hmang ngeiin kan lantir dawn ani, amaherawhchu harsatna dang emaw thil pangngai lo thleng a awm anih erawh chuan kan inhriattir vat dawn nia" a han ti a.



Inspector vek chuan "awle hei hi pastor mobilephone a ni a, khami zan a a hman kha ani, tunah hian zan dar sawm bawr vel ang lo ni ta se", tiin an record bu a an thil lo chhinchhiah tawh te chu a han keu let pah zel a, "kei, he laiah ka awm ang" tiin a phone chu a han la chhuak a, "awle joel, nang i awmna hmun turah i awm em?" Tiin durtlang leitan a awm mek joela chu a han bia a, Lehlam atang chuan "aw sir, durtlang leitanah ka awm mek e"



chumi lai chuan an bulah chuan rinpuia chuan hun an hman ral dan chu alo chhinchhiah zel a, inspector chuan "rina minute engzat nge ti khan" a han ti a, rinpuia chuan "aw le sir, ti khan minut thum chiah" "awle a tawk e joel, ti khan i awmna atang khan kan awmna hotel hi rawn pan tawh rawh le" lehlam atang chuan "aw le sir"



Khami zan a thil thlen dan ang khan an awm ani, inspector chu pastor kha a ni a, joela chu sailova kha ani, minute leh darkar lo chhinchhiah turin Rinpuia chu a awm bawk a,



"ti chuan le, pastor in khami zan a a mi biak te list leh a mobilephone a hman dan atang a a lan dan chuan he lai, a awmna hmun hotel a sailova alo nghah chhung hian mi pathum a bia a, mahse thil pawimawh em em an ni lo niin a rinawm, amaherawhchu hmun dangah a kal chhuak lo niin a lang a"



nakin deuhah chuan joela chuan amah lo nghak tute awmna hotel chu a rawn thleng thla ta a, Chuveleh rinpuia chuan joela hun rawn hman zat chu alo chhinchhiah tlap a, sailova'n a sawi dan nen khan a inren em tih an han en let leh a, joela'n durtlang leitan atang a an lo nghahna hotel a rawn thlen thlak nan chuan minute sawm leh pali a hmang ani tih an hre thei ta, durtlang leitan atang a a chhuah hun dar kua leh minute sawm li leh panga atang a chhutin hotel a thlen hun chu dar sawm vel chiah chiah a ni ta ani, chu chu sailova'n hotel a thlen thlak a dar zat a sawi nen khan thuhmun chiah a ni ta ani.



Tin, sailova khan hmun dangah a peng kawi miah lo khan a sawi a, joela pawh chuan hmun dang a peng loin hotel chu a rawn pan ding chat reng ani, Sailova chuan dawt a sawi lo ta phawt mai. Tichuan le, sailova sawi dan zul zui zel chuan khami zan a thil thlen dan ang khan chet chu an han la ta zel a, joela chuan room chhung, inspector awmna chu a ban tlang nghal a, tichuan inspector awmna a va thlen chuan joela leh inspector chu eng em em sawi lovin Sana chu an han ngaichang leh rih a,



chutihrual chuan boruak erawh a rit ru hle mai.



Rinpuia chuan "awle sir, ti khan a tawk e, minute nga dawn ani tawh a, ti khan pastor leh sailova chuan an pahnih inkar chungchang chu an sawi chho tan tawh ani. Minute nga dang leh bawk chutiang bawr vel chu ani ang" Tiin minute nga dang leh chu an han nghak leh ta ren rawn a,



tichuan le, dar sawm atang chuan room chhung a an hun hman zat ni ta chu minute sawm dawn ani ta. Chuveleh Rinpuia chuan "awle, ti khan sir, minute nga emaw a ai a tam emaw dawn chu an inhnial chho ta a, an innghirngho chho tan ta ani" a han ti leh a, inspector pawh chuan dawhthei tak chuan "awle i nghak leh zel ang" a han ti a,



inspector chu pastor thutna chair ah te chuan thu in uluk tak leh ngun tak mai chuan khami zan a pastor awmdan tur ni a a ngaih ang chuan han awm in a rilru leh ngaihtuahna chu a luhkhung tluk tluk reng mai. Dar sawm atang a chhutin minute sawm leh pasarih dawn chu hun an hman tak hnuah chuan Rinpuia bawk chuan "aw le, ti khan sailova chu a thinur chu pawnah a chhuak ta ani"



Chuveleh inspector chuan "joel pawnah chhuak rawh le, hmanhmawh takin, a timing kha kan hlauh thui lutuk palh a nge aw" a han ti a, joela'n pawn ava chhuah chuan Rinpuia chuan "aw joel, khalai ah khan awm rawh, thinrimna, insum tum tak a rilru tih thawl tumin thawk te kha han la la, tichuan khatia pawn a hun i hman lai khan midang, pastor thattu ni thei tur an lo kal em tih chu i hre ta lo a ni, mahse in bul hnai ah midang hmuh erawh i nei ta lo a"



Chuveleh inspector chuan "hruaia, nang kha lo lut teh" chuveleh hruaia chu hmanhmawh tak hian a hmai tuam chungin inspector awmna ah chuan a tlan lut a, Chuveleh inspector thutthleng a lo thu chu kut ava thlak ta nghal a, Chuveleh inspector chuan "ngawi lawk ru, ka ngaihdanah chuan khami zan khan pastor khan misual hmai tuam kha lo hmu ngat se zawng, a aw rawl a chhuah ngeiin ka ring tlat mai" A ti ta nge nge a. An thil tih chu a chauhthubarawh thlak tawh viau in an hria a.



Chutia a fiah fai zawk beisei a thil awmzia zirchiang a chet an la mek zel lai chu tualthattu a ngaih vanlalsailova pawh chuan uluk takin alo thlir ve ran reng a, tin hetia vanlalsailova an hruai tel ve a an chet lak dan engkim mit ngei a hmuh tir an duh nachhan hi chu sailova hian mak ti hmel a pu em? Hlauhthawnna a nei em? A rinhlelhawm zual em tih te hriat an duh vang a ni pakhat a, amah sailova mar deh nan a ti an ni pakhat bawk. Mahse sailova chu hlauthawng ang in a awm lova, a hmel a chi ai lova, a inrintawk hmel em em thung a.



rinpuia chuan "chuti anih chuan sir, misual hmai tuam an awm lo tihna ani maw? alo ti a, inspector chuan "aw awm lo, mahse pastor khan a rawl a chhuah lo a ni mai, kan kal ngaiin kal zel ang" a han ti a,



inspector chu hruaia chuan a kut a thlak a, a thin zawn a chemte a vih hnu chuan hmanhmawh takin insa seng leh nghal mai chu a han tum a, chutah pawn lamah chuan rinpuia chuan "awle minute thum lai chu a ni leh ta, i phei leh thei chiah e joel" alo ti ve leh mek bawk a, joela, room chhung a a lut tur leh hruaia, hmai tuam chunga a chhuak leh tur chiah chu an in nang fuh hman mai niloin hruaia, a insaseng hma hauh chuan joela chuan hruaia'n inspector a nak a chem te a a vih hnu a rumol chhuat a a dah leh lai chiah chu a va hmu hman ta tlat mai.



Chuveleh inspector chuan "a tawk e, rinpui, hun kha ilo vawng dik zel em? a han ti a, rinpuia chuan "aw sir, joela kha pawnah khan minute thum lai ka awm tir zawk, minute khat ka belh zawk tihna anih chu" a rawn ti a, chuveleh inspector chuan "imm, sailo, i sawi dan kha chuan pawnah minute hnih vel hun i hmang ang khan i insawi a" a han ti a, sailova chuan "ni e, mahse heti anih hi chuan misual chu ka va man hman ngei tur niin a lang si a" tiin vanlalsailova ngei pawh chu a hrilh a hai in a ngaihna a hriat loh hmel kher mai.



Chutah, Sailova vek chuan "kha tia ka va lut leh in pu ngaihawma hliam pui tuar ka va hmu ta thut mai kha, ka rilru chuan misual ka ti a, enge thil awmzia tih te tu thil tih nge tih te ka zawt nghal a, khatih lai khan pu ngaihawma nen Kan inhnial Chiam a, ka thinrim leh lungawi lo kha rilru fim pawh ka pu meuh lo,



"mahse ka va luh leh khan ka rilru chu a inthlak hlawk a, thinrim rilru chu manganna leh pu ngaihawma ngaihtuah avang khan a inthlak thleng hlawk ani? Mahse pu ngaihawma ber khan 'engvang nge saite hetiang hi i tih? Min lo ti a, mahse ka rilru a fim hnuah police ka call nghal thuai a, ni e hetiang a tun hnu a thil awmzia ngun tak a ka han ngaihtuah let leh hnu hian kha zan a thil thleng kha a mak tih mai loh chu a ngaihna ka hrethiam ta bik lo ani. Ka thil tih ni ngei a lang mahse ka thil tih a nilo tih hre tur khawp a rilru fim pu lo erawh ka ni bik silo.



"Pu inspector, a tir atang khan dawt ka sawi lo tih i hrethiam ani tiraw? Chuan tualthattu ka nih hi i ring lo ani tih pawh kha ka hrethiam reng. Ka thusawi te i ring a, misual ka nilo tih kha i ring tiraw? Ni e, dawt eng mah ka sawi lo, tual ka that hek lo. Mahse kutkawl ka bun a tul anih chuan ka in pe thlap e, amaherawhchu he thil thlen dan diktak leh a awmzia diktak erawh hi chu hrechhuak ngei ang che u. Heti tak mai a Chiang a ka tal awk mai thei hi kei ngei pawh hian mak ka tiin ka hrethiam bik lo, ka tal awhna tur a tu emaw ruahmanna a nih ngawt loh chuan dawi leh thlarau hnathawh pawh chu alo ni zawk maithei ani. Mahse ka tal awh nan a tu emaw remruat chu nise, heti em em a Chiang hi chuan tumah in ruahmanna a siam thei lo hrim hrim" tiin beidawn hmel tak chuan a indawm Kun ngaih mai a.



A ngaihna an hre lo tlang kher mai. Engtia chet han lak leh tur nge tih chu an hre mai lo, sailova lo chu midang han rin tur an awm lo Mai niloin, sailova ngei chu ani tih a Chiang tulh tulh zawk a ang tlat si ani, pawn a minute hnih khat a va chhuah chhung chauh a thil thleng chu a nih si chuan vanlalsailova lo chu pastor thattu tur midang an awm lo ni mai lovin an zawng hmu zo lo ani ber awm e.



Chutah inspector remruata chu a thutna atang chuan muang chang hian a rawn thochhuak a "imm, i sawi dik khawp mai sailo, nangmah i nih loh theihna lai reng reng hmuh tur leh hriat tur a awm lova, i tan chhan neih ve chhun tur ber chu voice recorder a mi kha ani mai awm e, mahse, mahse, hetia Chiang taka i tal awh na atan a ruahmanna duhthusam siam thei tu tur chu mi pakhat chu a awm, amah chauh chu ani hetiang ang ruahmanna duhthusam siam thei tu tur chu ni" a rawn ti ta a.