PSYCHIC VOLUME III _Chapter-7

[April Hmar Liverpool]

PSYCHIC Volume _3

Bung Sarihna



Inspector chuan, "awle i ti tha leh ang, khaw maw joel i mobilephone kha han phawrh teh, pi vanhmingi khan a pasal kha sailova huatna in a khat a ti a, a ruihchilh kha a ti a, chu pawh ramhuai tihbuai vang a ti a, kha kha thudik a nih chuan sailova, he lai a thlen thlak hma khan pastor khan ruahmanna engkim alo siam vek tawh zawk ani.



"Chumi awmzia chu lehkha a thuziak kha alo ziak lawk daih tawh tihna ani a, a nghawngah khan hrui a veh ani daih tawh tihna a ni, tin voice recorder kha vawikhat hmeh a in on nghal mai thei turin a dah diam tawh tihna ani. Mahse he ka thil tih tur avang hian Pathian chuan min ngaidam lul rawh se, Tichuan le, sailova, a mi huat em em mai, a ruihchilh mek a chu a lo thleng ta a,



"Tichuan minute sawmhnih dawn chu an titi leh a, an hnial thinrim zui a, tichuan pawnah sailova chu a chhuak tau ta a, chutah chiah chuan pastor thihdan diktak chu kan hre thei ta ani" tiin inspector chu lawm avang chuan a thutna atang chuan a zuang tho lo chauh mai a, mak tih avang leh a ngaihna hriat loh avang chuan midang ho chuan inspector chu an en reng ringawt mai.



Chuveleh inspector chuan "awle rinpui, hun kha lo vawng leh rawh le, minute hnih chiah chiah aw" a han ti a, chuveleh Rinpuia pawh chuan "aw le sir, le, ka tan aw" a han ti a, chuveleh inspector chuan a hnar chu bang charah chuan a han tauh ngheng mai a, midang chu an lo phu suau mai, chutah rumol hmang chuan na zet hian a nghawng chu a rek leh ta ngawt ngawt mai a, Chuveleh rumol hmang chuan chemte chu a han hum leh sauh sauh a, chutah a thin zawnah tak mai chuan a thawlh leh siah mai.



chuveleh thei leh thei lo chung chuan bag a mi phone a voice recorder chu a han on a, chuveleh rinpuia chuan "le, minute hnih a ral chiah e" alo ti a, chuveleh inspector chuan midang pawh nghak zo lo chuan mangan hmel fe hian "lalpa leh! pu ngaihawm, enge thil awmzia? eng thil nge thleng ta mai hi? tu tih nge? pu ngaih i tha em? a han ti vak vak a, chutah amah vek chuan zawi sap hian "engvang nge saite? engvang a hetiang thil hi ti nge i nih? Tiin chhuat atang chuan muang chang chuan a thochhuak ta a.



Inspector leh a nau te, chu lai hotel, pastor k.lalngaihawma thihna hmun a chutia an chetna leh enchhinna maksak tak tak an neih te chu kar lovah a darh chak ta em em mai a, mi thenkhat chuan inspector remruata chu a rilru a buai anih an ring a, pastor meuh chutia mahni intihlum ang a a han chhuah duh ta mai chu a rilru nat thlak an tiin a ma hmingthat na leh a hna ngei pawh chuan a tuar ngeiin an ring ani.



Pastor chu ramhuai tihbuaina avangin thinurna leh huatna in a khat a, chu a mi huat em em mai chu ama fanu ngaizawng tu Vanlalsailova ani. Tichuan pastor chu a buai telh telh a, a tawpah phei chuan ramhuai chuan thunun in pastor chu a mihring nihna chu a hlauh tir zo ta ani,



pastor chuan vanlalsailova nun chu tihchhiat a tum ta a, chumi atan a tha ber ni a a hriat ang chuan chet ala ta ani, vanlalsailova chu tualthattu ang a lantir a a damchhung tan in a hman tir a duh ta a, tichuan amah leh amah chu a in ti na a, a nghawng a rehna hnuhma chuan a thihna chu tualthahna niin a lantir dawn ani, tin a hnar ruh chu bang charah chuan a tauh tliak bawk a, chu pawh a thihna chu tualthahna ngei ni a a Lanna tur evidence dang leh bawk ani.



Tichuan voice recorder on mai theih Turin a dah a, lehkha te pawh a hnutchhiah a, chung te chu evidence a siamchawp vek an ni, ruahmanna leh remruatna uluk tak a nei a, chu chu a hunah chiah zel a tih a ngai ta ani.



A target ber vanlalsailova chu rinhlelh ti zual turin a inhnial thinrim pui ta Chiam Mai bawk a, pawna sailova a chhuah chhung lek khan voice recorder chu a on a a thin zawnah chuan amah leh amah chu a invit ta ani. Sailova chu alo kir leh thuai dawn ani tih pawh kha a hre reng.



Tichuan sailova chu alo kir leh ta ngei a, voice recorder ah chuan thu inpersan tak mai hriat tur alo awm ta ani. Mahse kha erawh evidence tling tawk tak turah pastor khan a ngai a ni ngei ang. Tin, heng thil zawng zawng hi pastor thil tih vek a ni ngei ani tih lam ai mah chuan, pastor nupui pi vanhmingi sawi ang in ramhuai hnathawh vek zawk pawh alo ni reng thei ani tih chu rindan ani ta chauh thung.



Chutiang deuh chu inspector remruata'n a hnuchhui a hmawr a bawk dan chu ani ta ani. Mahse hetih lai hian inspector hian pastor chu amah leh amah a intihhlumna evidence Chiang leh zual ala beisei tho va, ramhuai tihbuai tih te, dawi tih te chu miin an ring kher lovang tih a hre tho ani. Mahse huaisen takin thudik tak ni a a hmuh chu a tarlang mai zawk ani. Tin pastor thihna chungchang ah ama nupui pi vanhmingi ngei pawhin inspector ngaihdan chu a ngaihdan chiah alo ni tawh thin reng bawk a.



Pastor k.lalngaihawma chhungte atang chuan inspector hnuchhuina leh a thutlukna chungchangah chuan thuchhuah emaw ngaihdan an neih awm hriattur a awm hauh lova, mi thenkhat sawi dan leh tlangkam atang a hriattur awm ang ang chu thuthar lakhawm tute hnen atang pawh a hriattur awm chu a ni deuh ta mai ani. Pastor chhungte, a nupui leh a fate chu an reh hmak mai a, pawn lamah an hmel hmuh tur pawh a awm tam lo hle ani.



Inspector remruata chuan tibuaitu a nei zui ta nghe nghe a, tunge anih a hriat loh facebook profile pakhat hian friend request a rawn thawn nawlh mai a, a tan tirah chuan tum dang ang thovin friend request pangngai ni mai turah alo ngai ani. Mahse chu account atang chuan private message a dawng ta nawlh mai a.



A message dawn chu hetiang deuh hi ani. "To, pu inspector, ka message hi ilo hmuh veleh min lo chhang let vat dawn nia, chuti lo chu i nunna hi hremhmunah a liam dawn ani" tih hi alo ni a, inspector chuan a bengkhawn tehchiam lo. mahse a thian thar chuan message a rawn thawn zui tak tluk tluk rengah chuan a ngaih a tha lo chho tan ta ani.



Zan khat chu chu pa hnen atang bawk chuan message a dawng leh a, tin thlalak pakhat a dawng tel bawk, chu thlalak chu a rapthlak takzet, zawhte pakhat hi a lu tan bun niin an kawt ah a dah thu a rawn hrilh a, mahse chu thil chu tu thil tih mah anih loh thu a sawi tlat thung. inspector pawh chuan a va en nghal vat a, zawhte khawngaihthlak tak mai ruang chu a va hmu ta ani. Chutah zet zawng chu mihring, amah um zui tu nge ni a chhui ru tu tih pawh a hriat loh lakah chuan fimkhur a chhuah a tul ta takzet ani tih a hrethiam ta ani.



Hetih lai reng pawh hian inspector remruata'n pastor k.lalngaihawma thihdan a chhuina chanchin chuan boruak a nei lian hle reng mai a, mi thenkhat phei chuan tualthattu hum tum ang ah inspector chu an puh hial reng ani. vanlalsailova chu tualthattu ni ngei a ngai an awm a, heng ho hi hnuchhui dan chipchiar deuh a hre tu te an ni, mi thenkhat hnuchhui anih dan hre chipchiar lem lo te erawh in pastor chu mahni intihlum anih an ringhlel hran lova,



Inspector remruata pawh chuan a hnuchhuina chungchang a ngaihdan hrang hrang awm te chu a haider lui thei bik lo. mahni intihlum ngei ani tih evidence tha tawk tak chu a zawn belh leh tulin a hre ve bawk a. Nimahsela pastor chu mahni intihlum anih theih dan te chu mi tam tak chuan an hrethiam thovin a ring a. Amaherawhchu mitthi ta pastor atang ngei khan evidence dang ala duh bel cheu ani. Search warren chu court ah chuan a han dil hmasa leh te te a, chung a chet lak leh tur te hlei hlei chuan boruak a nei lian chho kher mai. Tichuan le, pi vanhmingi te in dap phalna a han neih tak ah chuan a nau te nen chuan pi vanhmingi te in chu dap turin chet an han la leh ta rup rup mai a.



Inspector rindan chuan mi tu emaw in ruahmanna a siam reng reng hian uluk tak leh felfai zawk a thil a kal theih nan a ruahmanna te chu ziak in emaw dahthat ani thin a, thlalak tam tak bang a intar tlep tuar te, map ni awm tak tak in tlar dul te, enge maw lai chhinchhiah bik awm te, tihfel tawh chhinchhiah lai bik te, hma bak la awm chhinchhiah bik te, heng zawng zawng hi ruahmanna neitu in a kawl that ngei tur thil a ni a, chu thil chu pastor pawh hian khawilaiah emaw tak chuan a dahtha ngeiin a ring tlat ani.



Tin, Ama nupui pi vanhmingi ngei hian alo kawl reng maithei bawk. Pastorin vanlalsailova a thihna a tal awh tir a a dam chhung lung in a tantir a a nun tihchhiat vek a tum dan leh amah leh amah a i tihhlum dan tur zawng zawng te, a ruahmanna engkim chu a nupui pi vanhmingi khan a hre vek tihna a ni.



Pi vanhmingi khan a pasal kha dan a tum thin a, mahse a pasal fin chu a khalh thei lo. A kawng dal tum, a nupui chu rilru lam harsatna nei ang ah a chhuah let ta daih a, a fate leh mi zawng zawngin pi vanhmingi chu a rilru ah harsatna a nei ni ah an ngai ta ani.



Pi vanhmingi chuan kawng hrang hrang in a pasal ruahmanna atthlak tak mai chu dan a tum zel a, mahse a fin khalh thei lo. Tichuan a beidawng zo ta a, tih theih a nei lo ni ah inngai in a pasal ruahmanna chu dan theih nilo ramhuai hnathawh ah a ngai ta ngawt mai ani. Rilru na tak chungin a pasal thih hun chu a nghak ta ani. Mahse pi vanhmingi chu ala beidawng duh bik Chuang lo a, a pasal thihna chu ramhuai hnathawh leh dawi hnathawh ani tih lantir ve a tum ta ngawt mai ani. A pasal in a remruatna leh a ruahmanna a vawn thatna note bu chu pi vanhmingi khan a haichhuah vek tawh avang in a pasal in a intihhlum zan tur a chhinchhiah te chu a hre daih tawh ani.



pastor khan khatia vanlalsailova tualthattu ni a rinhlelh anih theih nan khan a chet lak dan tur te, evidence a siamchawp dan tur te, a awm ang thei tur ber a sailova tal awh tir a tum dan te leh a intihhlum dan tur ziak thlap a a chhinchhiah ho a dahthat te chu inspector pawh chuan zawnchhuah ngei a tum ta tihna ani. A beisei ang chhanna a va hmu zo ta lo anih erawh chuan a hmingchhiat phah in a case a solve tawh sa ah pawh chuan harsatna a nei leh lovang tih a sawi lawk theih hauh loh reng a.



Hemi lai hian facebook a a thian thar khan a rawn warning ve reng a, a thil chhui lai chu anchhia leh ramhuai hnathawh nen a inzawm thil anih avangin tawp san a eng evidence mah zawng tawh lo tur chuan a rawn hrilh a, a thu hrilh chu a ngaipawimawh duh lo anih chuan a chungah ngei pawh chuan anchhia thleng thei anih thu te chu a rawn hrilh a. Mahse he a thian thar hian a tawngkam hman dan atang te, a vauna tawngkam atang te, a thil hrilh dan leh a thil duh a sawina tawngkam atang te chuan mi pakhat, mi tu emaw a hriatchhuah tir tlat mai a, chu chu tudang an nilo, a thih chhan a chhui zawh tak pastor nupui pi vanhmingi ngei ni tlat a hriatna a nei ani.



Inspector chuan chu vau na tawngkam chu ngaipawimawh duh lovin Pi vanhmingi te in chu police te chuan an dap ta ngei a, pa ber boral ta pastor k.lalngaihawma leh a nupui, an nupa room te chu uluk tak a an dap te zing a mi ani. Amaherawhchu police te chuan eng thil mah hmuhchhuah an neih loh thu sawiin thuchhuah an Siam ta daih thung a, chumi rual chiah chuan anmahni lo ngaichang tu mi thenkhat Chuan inspector remruata chu a rilru a buai zo ta em ni tih zawhna te, inspector chuan eng thil nge a tih tak mai tih te, pi vanhmingi, rilru lam a harsatna nei laka a chet lak duh dan te chuan dem a hlawh zui em em mai a, mi tam takin khawhar chhungte an lainat a, police ho chet lak dan chu an dem takzet zet ani.



Tum khat chu, inspector remruata chuan message duhawm lo zet mai hi a dawng leh ta a, a farnu thlalak chu rawn thawn in heti hian a rawn ti a, "pu inspector, hei hi i farnu a ni tiraw? ka thusawi te, ka warning na te i ngaipawimawh duh lova, a man chu i hmu dawn ta e, ka thu kha awih lang chuan i farnu duhtak chungah hian hetiang chhiatna rapthlak leh vanduaina hi a thleng lo tur, amaherawhchu he thil hi tu thil tih mah a nilo tih hria ang che, i luhlul avang leh ka warning na che i ngaihpawimawh loh avang a thleng ani e" tih hi alo ni a.



Inspector remruata chu thinrim avang chuan a inseh ruh nghal awl awl thei hial mai, "mai mai, zawng phiangsen! tu nge maw i nih le? Pi vanhming, nangmah ngei ini tih ka hria" tiin thinrim avang chuan a te thawt thawt mai a, a thaw nghal hlawi hlawi mai. Chutiang a a unau pa lo phun ri bul bul leh te thawt thawt ri te a hriat chuan a farnu pawh chuan a u awmdan chu a rawn ngaihven thuai a, thil awmzia te han zawt in a u rilru chu a buai deuh tak tak ni ah a ngai hman teuh hle.



A nu bulah leh a pa bulah chuan a unaupa awmdan ngaihthat thlak loh tak chungchang te chu a hrilh ve ta a. A nu leh a pate pawh chuan "mama, tunlai chu i hmel hi hmuh a hreawm khawp mai, in uluk deuh teh, i rilru lam te hi a hah lutuk anilo maw? i thawkrim lutuk ani, hahchawlh i mamawh ve tawh ani. Hmun dangah te han hawi khawthawng ve la, han in tiharh ve deuh teh khai" tiin an fapa nungchang danglam chho ta em em mai chu an ngaihtuah ru ta hle mai a.



Inspector remruata lah chuan chutia a rilru leh taksa nen lam hahchawl hman anilo na chunga a chhungten chutia a chung a ngaihdan fahrah te te an lo siam ve reng mai pawh chu hahthlak a ti thin kher mai. "Ka nu, ka pa, ka tha, engtin mah ka awm hleinem, ka dam tha alawm" a ti mai thin ani.



Facebook a mi bawk khan heti hian a rawn ti leh a, "aw le pu inspector, naktuk chiah hi hun i nei ta, zanin hian ka sawi ang leh ka ruahmanna ang a ka thu i la awih duh lo fo dawn anih chuan i chan tur chu i hriat kha, i chungah hian engkim chung a thu neitu chuan zah a ngai dawn lo ani. Kei hi i hma lam hun hmu lawk thei ka ni asin, i hma hun a i vanduaina tur lo hmuak tu che chu pumpelh I duh chuan i hnuchhui hi bansan rawh. ka thuchhuak reng reng i ngaihthah tawh tur a nilo, tunah khan mu mai mai lovin thochhuak tan ta che" a rawn ti a.



remruata chu a phu chiang kher mai, "engtin a ni? engtin nge ka mu ani tih i hriat? tunge i nih? Lehlam atang chuan "inspector, ilo mu tak tak ani maw? Ka ring chhin mai mai anih kha, tunge ka nih chu ka hrilh tawh che kha, kei hi hma hun a thil thalo awm hmu thin tu ka nih hi, dar sarihah ka tih kha, i hun minute khat lek pawh a i bawhpelh vaih zawngin i chan tur a namai lo viau dawn a nia"



remruata chuan "nilo, ka chungah hian nang profile lem ve mai mai khan eng thil mah i ti lul lovang" a han ti a, a thinrim in a lungawi lo bawk a, a tum reng vang nilo chuan alo phun ri leh bul bul thin a, a unaunu chuan a unau pa awm dan leh a phun ri leh mawlh mawlh thin te chu mak a ti a, a ngaih a tha thei mawlh lo. a nu leh a pa te ngei pawh chu a hrilh ve ta zel a, a nu leh a pa te pawh chuan an fapa awmdan leh a nungchang te chu an thlithlai ru chho ta hle mai a, amah a a phun ri mawlh mawlh thin te, a thinrim ang ri bawrh bawrh thin te chuan an ngaih a ti thalo chho zual ta zel ani.



Inrinni zan a ni a, remruata chuan alo beisei ruk ang ngei chuan message chu a dawng leh ta ngei a, a nin tawh em avang leh chu mihring chu tunge anih mit ngei a hmuh chian a chak ve tak deuh avang chuan message pawh chu rang takin a han chhang let ve thuai a, lehlam atang chuan zan dar sarih ah a sawi dan ang a a awm loh a a luhlul ala chhuah tluang zel dawn anih chuan a chungah chuan thil thalo tak a thlen tawh tur thu a rawn hrilh leh a, chu chu a last warning anih tawh tur thu chu a rawn hrilh leh a.



Remruata chuan a han chhang let a, "last warning a ni? ka chungah hian eng thil mah a thleng dawn reng reng lo, engmah hriat i nei lo, min tibuai reng lo la ani mai, ran chungah i kut bawlhhlawh tak kha lek tawh ngai lo bawk la" a han ti a, nui emoji chu tih el nan a dah tel bawk a,



chutah le, lehlam atang chuan a farnu thalak bawk chu rawn thawn lehin "i chungah eng thil mah a thleng dawn hleinem, i farnu chungah hian thil thalo a thleng thung ang, mahse tu thil tih mah a nilo tih kha hria ang che" a rawn ti leh zet chu thinrim avang chuan a tho thut a, a phone chu chhuatah chuan a vawm hman teuh kher mai, "hrep tak chuan! tu phiangsen nge maw i nih le! Pi vanhmingi mi rawih mi tu emaw anih te chu a han ring a, zawhte ruang khatiang a nghaisa duh tu kha chu mi nunrawng tak ani ngei ang. a nu leh a pate pawh chuan chutia thinrim chung a a te ri thawt ri chu an lo hria a, "a ngai te bawk maw" tiin an awm chu a nuam lo leh viau tawh mai.



Chutah remruata chuan runluih fe chung chuan "hmel phak! tu nge i nih ka hria che a nia, nang hian min rawn bawl tawh suh, ka nau thlalak i neih theih dan te, hetia i identity i dah lang duh lo te, keimah kher hetia min rawn fiam ngam thin te hi ka hriatthiam loh i ring reng reng em ni? ka hre reng che alawm, min bawl lovang" tiin tunge anih hriat Chuan tum chuan a han chhimbu dawi ve a, nui emoji bawk chu dah tlep tuarin a mut san zui ta daih a.



A tuk khua a var a, hna lamah an chawlh lai alo ni nen, in lamah tih tur em em neiloin a awm a, pastor thihna case chungchang te chu alo en let leh mek a, a duhthusam ang takin a hmawr bawk a tum mek ani. kha mi tum, pi vanhmingi te in an dap tum khan note bu chhah tha pangngai tak pakhat hi a hmu fuh a, chu thil chu a thil zawn leh a duh tak evidence a chu ani reng a, chu chu a rukin a kawl tha ta kha a ni a, chumi chu pastor k.lalngaihawma note ni ngeiin a lang ani.



Pastor thuruk te chu eng chiah nge tih en a tum mek lai chuan a mobilephone chu alo ri a, a han en a, a nu alo ni. mangang fe a insut hlawp hlawp chung chuan "mama, ruata, khawiah nge i awm? hei i nau hi!" remruata chuan "nu, ka nu, eng thil nge thleng a? Min han hrilh teh" lehlam atang chuan "mama, ruata, i nau hian accident a tawk a nia, damdawi in ah kan kal nghal a ngai ang, biak pawh a biak theih loh" a rawn ti ta mai a. Chumi rual chiah chuan Facebook a mi khan message a rawn thawn a, i luhlul man chu i hnu ta nge nge a ni maw? A rawn ti a, remruata thinrim leh inthunun hman lo chuan a mobilephone chu chhuatah chuan a vawm ri nghal bur mai a.



"Ka nu, ka nau su tu chu a number in chhinchhiah hman lo a mi a? a nu chuan "mama, a number chu chhinchhiah tulin kan hre lo, zuia khan kha motor kha a um zui ve nghal alawm, hei tun thleng chuan chanchin min la rawn hrilh lo chu a ni a, ka han phone chhin dawn em ni? A nu chuan a fanu su tu motor um zui tu zuia chu a han call ta nghal a.



"Ka pa, thil pawimawh tak mai hrilh tur che ka nei a ni. Hetiang thil ti tu hi ka hria in ka hria, kei hi min dan a tum ani" a pa chuan mak tih hmel fe hian "eng chungchang nge i sawi ruata, tu in maw dan tum che?" a hmelah chuan a ngaihna a hriat loh hmel takzet.



"Ka pa, he thil titu hi ka man ngei dawn ani, a thil tih man chu ka pe ngei dawn a ni, ka laka chhan enge maw avang a lungawi lo ani maithei" a pa chuan "ruata, i thusawi te chu thudik anih ngai chuan ngaihthah mai mai chi a nilo anih chu"



Inspector remruata chuan amah rawn be thin tu hnenah chuan "enge i duh? engvang in nge ka nau chungah khatiang thil tenawm kha i tih? ka man dawn khawp che alawm, tunge i nih i insawi ngam dawn lo em ni? hmai chhanah ngei kei hi min hmachhawn ngam dawn lo em ni? tiin message chu a han thawn a.



a thin chu a ur in a lunghnur kher mai. Lehlam atang chuan "ka thil tih a ni hleinem inspector, kei hi tu mah ka nilo, i hma ngai tu mai ka ni, anchhia in a um zui hma ngei che in i thil buaipui kha tawpsan ang che. Tin, i tawp san ngei ani tih lan tir nan zan in ah dar sarih ah, ka ruahman ang khan awm mai mai rawh, ka message ilo ngaichang leh dawn a nia" tih hi a rawn thawn let a.



"Nilove, tunge i nih ka hria che alawm, i pasal thihna ka chhuichhuak ta chu lawm a hnekin engvang nge? I pasal note bu ka lak bo avang hi a ni em? i pasal note bu ka kawl vang hi em ni? Hei te chu nang a ngaihdan leh ka ngaihdan a dik ngei ani tih nemnghehna tur ani zawk alawm. He evidence ka tlangzarh hi I duh lo a maw? Engvang a min dan tum nge i nih?



"nang pawhin i sawi kha, i pasal hian keini ho hi min bum mek ani tih thu pawh i sawi kha, he note bu hi i hmuhchhuahna a lo rei tawh hle ani tiraw? Engkim ilo hre vek a, I pasal thih hun tur i hre lawk vek mai te kha alo mak hran love, I pasal hian a note bu a a ruahmanna a ziah chhuah ah hian a intihhlum zan tur te, dar zat thlengin, mi tal awh tir a tum dan te, a ruahmanna engkim a ziak lawk vek a, a chhinchhiah vek ani. Mahse engatinge hetia ka lak a chet i lak tak mai"



Lehlam atang chuan "inspector, i ngaihtuahna ramah i cheng nasa lutuk anih kha, zan inah dar sarih ah ka thusawi ang zel a i awm anih loh chuan chhiatna dang zelin a lo hmuak zel ang che, i chungah hian anchhia a awm mek ani, thlarau sual hnathawh ani. I hrethiam lo anih kha, ka thusawi chu awih mai la, i tan pawh a tha ani mai"



"Tu phiangsen mai mai nge maw i nih le? Pi vanhming? i thusawi dan atang te chuan pi vanhmingi ngei chu i nisi, imm, a tha e, khaw nge, keimah ngei hian pi vanhmingi chu ka han thlithlai a nge" tiin a mobile phone a hmai a vawm khik thawt tawh chu a thlek vang vang mai a.



Chumi tum la la chuan in lamah haw in pi vanhmingi thlithlai tur chuan chet a la ta nghal a, chumi lai chuan a mobilephone chu lo riin a han en a, a nu phonecall alo ni, "aw ka nu, kan tha zel em? lehlam atang chuan "aw ruata, i nau pawh ngaihtuah awm lutuk ani tawh lo ve, hei zuia'n min rawn bia a, i nau su tu motor chu a zui zel a, a awmna a hre tawh e, mahse motor chu kawngpui sirah an lo dah a, a bulah chuan mi tumah an awm lo, tu motor nge anih hriatchian tumin hma a la mek zel e"



remruata chuan "ka nu nilo, chutiang in amah chauhin um zui zel lo se ka va ti em, thil thalo a tawng ve palh hlauh a nge, ka nu tha deuhin hrilh rawh, a number te chu chhinchhiah se, motor chu a thla te la se in lamah rawn haw vat se ka va ti ve, a chungah thil tha lo a thleng ve palh hlauh a nge" lehlam atang chuan "mama, thil pawi em a thleng lo turah ngai ang, ka lo hrilh dawn nia"



Inspector remruata chu a thin a ur laklawh bawk a, pi vanhmingi te in lam pan chuan hmanhmawh tak chuan a tleh phei nghal thuai a, pi vanhmingi te in ava thlen chuan alo reh thiap mai a, kawngkhar chu a han kik dat dat a, chumi rual chuan ring zet zet hian "pi vanhming, lo hawng teh u, lo hawng vat teh u" tiin a han au zui nghal bawk a.



Kawngkhar chu a hawn in hawng a, isaka alo ni, isaka chuan "e he, pu inspector, enge ni ta? alo ti thuai a, inspector chuan eng khaw sawi set set lo chuan "khawiah nge i nu hi isak? a han ti nghal tawng a, isaka chuan a ngaihna hriat loh hmel tak chuan "ka nu maw? a room lamah a awm ang, enge ni ta? i hmu duh em ni? Inspector chuan "aw tunah" a han ti a, isaka chuan "lo kal rawh sir, ka hruai ang che" tiin inspector chu a nu awmna lanah chuan a hruai ta a.



Pi vanhmingi chu a hmel a lo tla tawhin hmuh a nuam lo hle mai a, a pasal a sunna avang te pawh chu a ni ngei ang, inspector alo hmuh chuan mak alo tih hmel hle mai a, inspector chuan eng khaw sawi set set lo chuan "pi vanhming, i duh chu i hmu ta e, engvang nge? engvang a khatiang thil kha ti nge i nih?



Pi vanhmingi chuan "inspector, eng chungchang nge i sawi? alo ti a, remruata chuan "pi vanhming, i thil tih ngei pawh i haider lui zel dawn a ni maw? a va mak ve, hetiang mihring hi ilo ni a ni maw, tunge i rawih leh tak? Min hrilh vat rawh" a han ti khur khur a.



Chuveleh isaka chuan "khai aw, enge thil awmzia hi ni ta ngai ka pu, ka nu hian eng thil maw a tih a? alo ti ve vat bawk a, remruata chuan "i nu thil tih hi i hre duh anih chuan a mobilephone hi check sak rawh" alo ti a, chuveleh isaka chuan "khai leh! eng thil nge ni a ka nu? i mobilephone chu enge awmzia?



Pi vanhmingi chuan a fapa hrilhhai chu hrethiam in "isak, i nu hian eng thil mah ka tilo, ka taksa leh rilru lam hriselna hi a tla hniam zel zawk anih hi, he inspector hian thil a hre sual anih hi, a ngaihtuahna ramah a cheng nasa lutuk anih hi" remruata chu a insum thei lo, "takzet chuan! chuti chuan i ti maw ka pi, ka nau chu thi chhawngin damdawi inah a awm mek asin, hetiang thil hi engvang a ti nge i nih? A aw chu a ring tha kher mai.



chutia anmahni in chhung ngei a ama nu ngei inspector in a han rum khum tak chiam chiam ah chuan isaka chuan "awle ka nu, khaw maw i mobilephone chu, inspector ngaih that nan hian ka lo en ang chu, engmah i tisual lo ani tih a hmuh a ngai a ni" a han ti a, pi vanhmingi pawh chuan a mobilephone chu a fapa chu alo pe ve mai bawk a.



Inspector chu mak tiin a meng phar awn awn mai. isaka chuan "sir, ka nu hi misual ani hleinem, i thusawi te chu a awmzia pawh a hre lo hrim hrim ang, hei tunlai phei chu a hriselna hi a tlahniam zel zawk asin, duat tak leh keh thei dawm a kan dawm a ni ve asin. thil i hresual der a ni. ka nu cellphone ah hian eng chu nge hmu a i in beisei reng reng a? tiin a nu cellphone chu a han en tir a,



inspector pawh chuan a ngaihna hriat loh hmel fe hian "imm, nangmah i ni silo anih chuan tu chu nge ni ta ang? tiin cellphone chu uluk tak chuan a han en a, pi vanhmingi facebook ah chuan lut in amah rawn be tu account kha a hmuh mai kha a inring a ni a, mahse a hmu hauh lo, facebook profile chu pakhat chauh alo awm a, alo delete hman anih te chu a han ring dawn dawn a.



Chutah, WhatsApp lam a midang nen an inbiakna te chu a han en leh a, a ngaihna a hre lo tulh tulh zawk mai. Chutah isaka hnenah chuan "isak, i nu ni ngei a lang mi pakhat hian min rawn be thin a, a duh ang a ka awm lo anih leh i pa thihna case hi ka tawp san lo anih chuan ka chungah thil thalo tak a thlen tur thu te min rawn hrilh thin a ni, chu chu tun mai vawiin ni chawhma lam khan a thleng ta ani, ka nau chu tu tih hriat loh in motor in a su a, a tlan bo zui daih mai a, ka nau chu damdawi inah a awm mek ani"



Isaka pawh chuan inspector chu lainat hmel tak chuan "sir, a va pawi ve, ka nu ang a lem rawn chang tu chu tunge anih hriatchhuah ngei a ngai anih chu" alo ti ve vat bawk a. Inspector chuan "aa, i nu ang in lem a chang chu ka ti chiah thei lo, hei en rawh" tiin Facebook a tunge a hriat loh nen a an inbiakna te chu a han en tir a, isaka chuan "ngawi lawk sir, a profile kha ka lo en chiang lawk" a han ti a,



inspector chuan Facebook profile chu a han en chian tir a, chu facebook profile chu a in lock tlat avangin a profile picture chu hmuh tur awm ani mai a, mahse isaka chuan facebook profile picture leh a cover photo te chu uluk tak chuan a han en chiang a, a cover photo a mi ngun tak a han en a hming ni ngei tur chu a zu hmu fuh ta hlauh mai.



chuveleh isaka chuan "sir, han en chiang ve teh, a cover photo a mi zawk khu, khu pangpar lem chung a thuziak khu i hmu em? hming ani" a han ti a. inspector chuan chu thil a han en chian nak chuan a phu teuh kher mai, cover photo a hming chu mukesh tih hi alo ni a, a hawrawp chu lobster hawrawp a nih avangin ngun taka en loh chuan enge a awmzia tih hriat a har hle a, mahse ngun tak a an han en chian nak chuan chu hawrawp chu mukesh tih hi alo ni reng mai.



Nancy-i pasal mukesha a hrechhuak zawk a, Chuveleh thinrim avang a ha chang thial bawp bawp chung chuan "zawng phiangsen! nangmah vek maw lo ni" tiin isaka leh a nu chu a chhuahsan nghal thuai a, thinrim engphiar chuan mukesha te awmna lam pan chuan a in khalh chhuak leh ta nghal a.