INBUMNA LEH LEMCHANNA _Part-2_Chapter-1

[April Hmar Liverpool]

Inbumna Leh Lemchanna Part-2

Laltanpuia



Bung Khatna

#A chang chuan kan thatna te, kan felna te hi mi thenkhat Chuan remchangah la in keimahni min bum nan leh thil sual tih nan an hmang let hlauh thin. Kan mi hriat chian ngei ngei te pawhin min ti na in min bum fo thin si a chu lai a hmelhriat ngai loh phei chu tumah hi ring a an thusawi te awih sak mai mai lo Turin kan fimkhur hi a tha ani. Khawchhak lam mi khupa leh Aizawl tlangval fel leh mi pangngai tak pc zaithanpuia te inkar a INBUMNA LEH LEMCHANNA thawnthu chu#



A hming chu vankhupliana ani a, a mizo hming ang deuh zawng a a hming hi siam rem sak ani. he lai mizoram ah Kum sawm dawn chu a awm ve tawh ani, khi lamah chhung leh khat, u leh nau, nu leh pa a nei tawh lo a, a chhung te hian an boral San deuh vek tawh ani, he lai ah inhlawh fa tura lo kal ani a,





a awmna pu nilawma te hian a chanchin leh a vanduaina te chu lo hria in hlawh fa atan mai nilo awm pui nghet atan an neih deuh ta chawt a, hun te kal zel in amah khupa lah mize zawi awi chi leh mize ngainatawm tak mai nei, tawng duh ve pangngai tak alo nih mai bakah a taima in naupang te thleng hian ngainat a hlawh a,





pu nilawma te pawh hian an tangkai pui em em mai si a, Tichuan le pu nilawma chuan khawngaihin a fa ang hialah a nei chho ta ani. Kum sarih dawn a awm hnuah India khua leh tui nihna te thlengin a nei chho ta a, pu nilawma te chhungkaw member ah chhiar tel ani chho a, voter Id Chen in a nei chho ve zel a, awm pui tlangval ni tawh lovin pu nilawma te fapa alo ni ta ani.





A tu a te mai pawh chuan khupa chu an ngaina a, a taimakna leh a puitlin na chu tumah in an hmuh hmaih lo. Naupang te te te chuan an ngaina a, a ni pawhin naupang te lawm zawng han tih sak leh thil han lei sak leh mai thin chu a ching hle a, an mahni chhungkua chauh nilo, kohhran leh khawtlang thleng pawhin mizo pa, tlangval tlawmmngai tak ang mai niin mi mit a tlung hle ani.





Anmahni khua Burma lamah pawh a zin chho ngai meuh tawh lova, a nu leh a pa pu nilawma te nupa thu a awih in a chawimawi thiam si a, mi zawng zawng chuan pu nilawma'n fapa atan a khupa a la chu alo tisual lo tawp ani tih an hmu Chiang deuh deuh zel ani.





Nimahsela tumkhat chu chutiang a chhungkua hlim tak leh lungrual taka an awm mek lai chuan naupang te leh pu nilawma te chhungkaw tan a thu duhawm lo tak mai leh pawm harsa tur tak mai thil a thleng ta tlat mai le, khupa chuan tukthuan an Kil na ah chuan a pa pu nilawma leh a nu pi vanhlupuii te chu en in "ka nu, ka pa, thil pawimawh tak mai hrilh duh che u ka nei ani" a han ti a, chutia an fapa tlangval in thu pawimawh tak mai hrilh tur a han neih takah chuan pu nilawma te nupa chuan an ngaihven hle mai a, naupang te pawh chuan ka hau chung chuan an u khupa thu hrilh tur chu an lo ngaichang ve thap reng bawk a.





Khupa chuan "nu, pa, aizawlah inhlawhna tur tha deuh mai ka hmu a, hna chu thawk tan nghal turin naktip mai hian kal ka duh nghal tawh ani" a han ti a, pu nilawma chuan "khupa, chu i va sawi lang ngai lo ve" a han ti deuh ha a, naupang te pawh chuan "u, aizawlah maw? min kalsan deih dawn ani maw? Hrilhhai tak chuan an lo ti ve ha mai bawk.





Nu ber chuan "khupa, eng lam hna nge ni a? Chu a va pawimawh awm ve, hlawh te a tha em ni? Alo ti ve bawk a, khupa chuan "nu, hlawh tha tak ani dawn, ka thianpa nen pawh kan sawi fel diam tawh a, naktip hian ka hna chu ka join nghal a tul tawh ani. Awmna hmun tur, ei leh in, ka mamawh engkim, a pawimawh ber hlawh tur chenin a tha dawn lutuk. Ka vannei ka inti khawp asin" a han ti a,



Chutia an fapa khupa berin thutlukna alo siam diam tawh avang chuan he lamah hna chu tul viau dawn mahse hlawh te alo tha dawn bawk nen, tin Kum naupang an ni tawh bik lova, puitlin lam an pan zel nan pawh a that pui zawk beisei in khupa hnathawh tur chu an remtih pui ve ta a. Chutihrual chuan he lamah erawh an buai phah in khupa hmunruak chu a zau dawn hle niin an hria ani.





A hming chu pc zaithanpuia ani a, tlangval senior ani tawh, Kum 35 na a hmang mek tawh ani. Amah hi chhungkaw khawsak pangngai tak atang a seilian ani a, kohhran lam ah pawh a that lai zawng zawng a hmang ral a tih theih a, midang tan a luan chhuah nuam ti mi leh mi te tan a malsawmna nih chu a nuam tih zawng leh rawngbawlna pengkhat ni a ngai tlat mi ani.





Facebook group pakhat, hna zawnna group atang a a hmelhriat ani a, a chanchin leh hna thawh tur a mamawh Zia te, nu leh pa, u leh nau te pawh a neih tawh loh thu te, mahse Pathian in a khawngaih a, nu leh pa thar tha tak leh u leh nau amah khawngaih tu mi thanem tak a pek leh tak thu te, Chutihrual chuan ama hmalam hun a thlir tel lo thei bik silo a, thingtlang ang ah chuan hna tha thawh tur a vang si a, khawpui lamah hna tha zawk leh hlawh tha zawk beisei anih ve thu te, a chanchin leh a mizia lainatawm tak mai te alo hmuh a alo hriatin alo khawngaih ta hle mai a.





engemaw mak tak mai hian amah ah chuan hna rawn thawk in chu pa group kaltlang a hna thawh tur rawn zawng khupa inti chu engtin emaw tal lo tanpui theih chu a inbeisei ta ani. Pathian in a hnenah a rawn tirh ni ngei chuan a hria a,





Tichuan, PC zaithanpuia chuan khupa post chu alo comment ta a, Tichuan chanchin Chiang zawk a inhrilh tha an tih tak avang chuan an number te chu an in pe a, PC zaithanpuia chuan a theih ang tawk a hna tha alo zawn sak chu a tiam ta ani. Khupa background te chuan pc zaithanpuaia hmuk chu a ti ulh hle mai a, Chutihrual chuan amah hmangaih leh khawngaih a an fa atan a la tu pu nilawma te nupa pawh chu chhuan awm a ti hle mai bawk.





Hun te a kal zel a, pc zaithanpuia chuan khupa hna thawh tur chu alo hmuh sak ta a, aizawl veng pakhat a chhungkaw pakhat, pa ber hming chu pu David c vansanga a ni a, ani chu officer niin a nupui pi Rebecca lallawmsangi erawh sumdawng niin an fate school kal tur thlah tur leh an private driver tur an mamawh thu hrilhin hlawh pawh a tha hle a, driver chu chhungkaw member ang mai a an hnena awm nghal thei tur leh room pawh a hran pa thlap a an pek theih tur thu te chu inhrilh in, pc zaithanpuia pawh chuan pu david c vansanga te driver tur chuan khupa chu alo tihfel sak ta ani.





Tin, khupa hi lirthei vuan thang alo ni a, license pawh a nei thlap a, chumi lamah chuan harsatna a awm lem lo bawk a, tin a tawngkam a fel fai in a puitling viau in a lang bawk a, zuk leh hmuam a ti meuh lo lehzel a, ruihhlo dang pawh a khawih lo lehzel nen pu David c vansanga te nupa duh ang tak chu ani reng bawk a.





Tichuan le, khupa chuan a nu leh pa, a unau te Pahnih chu a hna thar tur Lama liamsan tawh tur chuan a inbuatsaih ta a, a nu leh a pa nilawma leh pi vanhlupuii, naupang te chuan a kal liam tur chu rawn thlah in an ngai dawn hle mai. An khua a har lawk in an hnuk te chu a ulh ru teuh mai. "Engtikah nge ilo Hawn ang? a nu chuan a han ti a, khupa chuan "ka nu, ka pa, ka hnathawhna ten Hawn min phal sak hun hunah ka lo haw ve leh mai dawn alawm, a khat tawkin ka rawn tlawh thin ang che u. Chuan mami leh mama pawh fel deuhin lo awm ru aw, a u hian alo haw hunah thil tha deuh alo Hawn dawn che u a nia" tiin lungchhe ru tak chung chuan an inthlahliam ta ani.





Facebook atang a in hmelhriat thian tha tak ang mai a inpawh leh rilru in hawng taka ti ti dun a thil sawi dun thin an lo nih sa tawh avang chuan chutia a tak ngei a an han in hmu ta pawh chu mak an ti lem lo, an lo in beisei lawk ang ve ve an ni ani ngei ang. An han in chibai lawp lawp a, a hnathawhna tur pu David c vansanga te chhungkaw chanchin tlem a zawng te han inhrilhin a hna kalhmang tur te chu an han inhrilh pah mawlh mawlh bawk a, Tichuan tlai lam dar li ah chuan, pu David c vansanga te chenna in lamah chuan an inkhalh chhuak ve leh ta ani.





An driver thar tur an lo hmuh chuan uluk tak hian an lo en a, an ni chhuangkua hi chungkaw khawsa thei tak an ni a, an in vawng fel faiin an inrelbawlna lam pawh a tha a, chuvang chuan driver tur atan pawh chuan an duhtui in an duh uluk hle reng ani.





Khupa leh pu Davida te chu an han inkawm hmasa luam a, chutia an chanchin te, an mizia tur awm ang te an han inbelhchian takah chuan khupa mizia inngaitlawm tak leh puitling ru tak mai te, a tawngkam felfai thlarh mai leh hna a inpek zawh hmel tak mai te chuan officer meuh pu David c vansanga lung pawh chu a dum ve ta a ni ngei ang, an in ah chuan awm ve nghal tur chuan an inti ta a, room pawh a hran a a neih nghal tur thu te, tin a tuk leh atang a an driver anih tawh tur thu te inhrilh in inthlahrung lo leh zalen tak a mahni in ang a awm tur chuan an han in ti ta a.





Pc zaithanpuia pawh chuan khupa hnenah chuan duhsakna te han hlan in a mamawh hun a piang ah leh thil hriatthiam loh a neih chuan amah chu rawn be mai thin tur a chah in a tinsan ve ta ani.





Ni te a han liam a, hun a kal ve zel a, khupa pawh chuan a hna chu nuam a ti ve hle mai a, pu David c vansanga te chhungkua chu a lakah pawh an fel in an zau hle mai a, tin a ni khupa lah a taima in a zam alo tha si a, naupang te pawh chuan kar lovah an ngaina ta thuai mai reng a, a mizia a nelawm in a nun chu a tlawm phian lehnghal a, pu David c vansanga te chhungkua pawh chuan an kut leh ke berah an la nei chho thuai dawn ani tih chu a Chiang reng si a.





Engemaw chang chuan khupa leh PC zaithanpuia te pawh chu thian tha ang in an inhmu in an inkawm ve fo thin tho a, tin khupa hian a khaw mi lo ni sa ta na na na chu thil kalhmang leh zeizia te alo hria a, a mamawh thilah hi chuan a thianpa pc zaithanpuia chu ava bel deuh chawt mai thin ani.





An han inhrechiang chho ve zel a, khupa pawh chuan Facebook a an inbiakna atang leh amah PC zaithanpuia a insawi dan atang ngei pawh in a thusawi te chu a dik ngei ani tih a hmu thiam chho ve zel a, pc zaithanpuia hi mi rilru tha tak ani hrim hrim a, chu chu thudang nise, ama tawk a in chhuang thiam ve tak mai leh chapo nisilo a han insawi theih hi a hrat ve riau mai bawk.





An chhungkua an lo khawsa thei a, sum leh pai lamah pawh an hmuingil viau mai ani awm e, tin kohhran lamah lah a hming alo tha a, hmingchhiatna leh hming hliauna ti a han sawi tur hi a nei khat hle a, chumi te pawh chu engemaw chang hi chuan a han chhuan pui in a chapo pui ve thin hle ani.





Khupa pawh chuan pc zaithanpua han insawi theihna te pawh chu a ngaithla liam ve mai zel a, a dik a dik chuan kawng engkim a amah tanpui tu leh tun dinhmun a hruai thleng tu hi a ni a, a ni tan hi chuan a thianpa chu a pawimawh in a zahawm ru thin hle ani. Amaherawhchu khupa hian a hriat miah loh thil pakhat ala awm.





Tumkhat chu pc zaithanpuia chuan khupa chu a rawn bia a, khupa hnenah chuan a hman leh a hman loh a rawn zawt a, khupa pawh chuan a hman thu in alo chhang ve mai bawk a, Tichuan le, pc zaithanpuia chuan khupa hnenah chuan khawi hmunah emaw kalpui ah a rawn sawm a, len khawthawn pah anih tur thu te a rawn hrilh ani. Khupa pawh chuan a pu in a mimal thil a a chhuah vah duh hun a a hman tur lirthei a kawl tir hmang chuan a thianpa lo nghahna hmun chu pan tur chuan a inkhalh chhuak ve ta thuai a.





Chumi tum chuan khupa leh PC zaithanpuia te thian dun chuan thian ho a leng khawthawn pahin tiin beraw tlang lamah chuan an kal ve a, pc zaithanpuia lo ruahman thil vek ani. Khupa chuan mak tih deuh a nei ta, a thianpa Kristian tha em em mai ni a alo ngaih pc zaithanpuia chuan zu a in lai a hmu ve ta tlat mai le, amah khupa ngei pawh chu in ve turin a nawr nasa ta hle mai a, mahse khupa chuan a pu in a hriatchhuah a hlauh em avang chuan a in ve duh ta ngang lo ani. Pc zaithanpuia pawh chuan khawiah mah sawi chhuak Chuang lo tur chuan a ti a, a in ngai bik loh thu te hrilh in a vawikhatna a nih ve tho thu te chu a hrilh pah mawlh mawlh reng a.





Chumi tum a a thianpa pc zaithanpuia awmdan leh mizia te chu mak a ti hle mai a, alo hriat thin dan nen chuan a inpersan tan ta hle mai ani. Mahse a mah a insawi dan ang in a vawikhatna alo nih ve tho chuan ala zia e, mahse nakin zelah pawh chuan thil thalo tak tak ala tawng chho mai ang tih a hlau hle mai a, an khaw lam a a nu leh pa pu nilawma te nupa pawh in an hrilh ngun ber leh an chah ngun ber kha ani reng a, thian thalo a kawp palh hlauh mai ang tih kha an hlauh ber ani.





Tumkhat chu pc zaithanpuia chuan engemaw thil pawimawh a awm avangin a thianpa khupa hnenah chuan chhuahpui lawk turin a va sawm leh a. Khupa pawh chuan a thianpa sawmna chu alo hnar bik lo. Tichuan le, khupa leh PC zaithanpuia te thian dun chu thil pawimawh ah an chhuak dun leh ta ani.





Tlai hun te alo ni a, zan hun a inher chho mai tawh dawn. Pu david c vansanga chuan a nupui hnenah chuan "mami nu, khawnge khupa hi a awm a, ka la hmu lo reng reng mai, khawiah nge mawn le a kal le? a han ti a, an nu pi Rebecca lallawmsangi pawh chuan khupa kalna chin chu alo hre bik hauh lo mai. "Khaw maw, han phone teh, keipawh in khawiah emaw tirh lawk ka duh asin" alo ti ve bawk a, pa ber chuan "ka phone call ala thei lo, switch off a inti zel alawm" alo ti a.





Chutia an driver khupa a reh tak vang vang hnuah chuan pu david c vansanga te nupa chuan an ngawih bo pui reng thei ta lo. Khupa chhungte lam chu biak pawh an han tum ta a, mahse khupa chhungte han biakpawh dan tur chu an hre mai silo. Nu ber chuan "an khaw lamah hian alo haw daih nge ni ang? nge ni a a ni hi hrehawm te hi alo ti ru viau tawh zawk ni? alo inthlahrung leh a lungleng hi alo haw ta mai ani lo maw? a han ti a,





chutah, pa ber chuan "imm, ni e i sawi dik maithei a zakzum chi leh inthlahrung chi kha ani roh si a, engpawhnise han nghak leh deuh ila, tin amah rawn buaipui tu tlangval hnenah te pawh khan alo va riak ta mai pawh ani thei bawk, engmah min la rawn hrilh lo anih chuan kan ngaihven leh dawn nia" an ti ta ngawt mai ani.





A tuk khua a var a, khupa chu a reh hian ala reh tlawk tlawk reng mai si a. Chutah zet zawng pu david c vansanga ngaih chu a tha tawh lo. "Haw duh te chu nise Kan hnenah pawh sawi mai awm hi a ni a" tiin khupa room te chu a han enfiah a, mahse khupa thawmhnaw leh bungrua te chu alo la kim barh mai si a, "khawiah tak chuan kal ang maw? tiin a ngaihna chu a hre lo kher mai.





Chawhnu lamah chuan pu david c vansanga ngaih chu ala that theih loh avang chuan nu ber chuan "police hnenah thlen mai ila, a chhungte lah chu biakpawh mai dan kan hre silo" a han ti a, pa ber chuan "ngawi lawk rih ang, a thianpa kha ka han bia a nge, a number kha ka la nei em aw" tiin pc zaithanpuia chu a han call ta ngawt mai a.





"aw hello, pc zaia maw, aw hetah vansanga kha ka nia, hei khupa hi nimin atang khan tun thleng in ala rawn haw lo a, kha lamah a rawn tla phei te hi anilo maw? a chanchin ilo hria em? A han ti a, lehlam atang chuan "ee ani maw, chutiang engmah ka va hriatpui lo ve, nimin kha chuan kan inbe ngei mai ah, chhuah dun pawh kan tum nghe nghe a, mahse kan thulh leh ta ani. A bak chu ka va hre mai bik lo ve" a rawn ti a.





pu david c vansanga chuan "chu, khawiah emaw chhuah chu a tum ngei tihna a ni maw? a chhuah tumna a sawi em? Lehlam atang chuan "aa, nilo ve keimah zawk hian min chhuahpui lawk tawh ka ti a, mahse a ngai leh ta silo a chu mi zawk chu a nia" pu david c vansanga a chuan "imm awle, hei ka han biak dawn lah in switch off a inti zel mai si a, tawhsual te hi alo tawk anih ka han ring dawn dawn alawm maw le, awle a chanchin i hriat chuan min rawn hrilh vat dawn nia aw, tin an khaw lam a a chhungte biakpawh dan i hriat chuan lo han be ta che, an mahni khaw lamah te hian alo han han haw chho mai anih te pawh ka han ring deuh a" lehlam atang chuan "awle awle, lo biakpawh dan ka lo dap dawn nia, chanchin chu ka lo hrilh leh ang che" tiin an inbiak na chu an titawp ta a.





Chutia khupa a reh tak vang vang atang a ni hnih lai mai a han liam leh takah chuan pu david c vansanga te nupa chuan khupa bo thu chu police hnen a thlen an tum ta a. Pc zaithanpuia lah khan an kaw lam a a chhungte pawhin a haw chhoh loh thu an rawn hrilh ni khan a rawn hrilh leh thlap si a, Chumi lai mek chuan chanchintharah hian zemabawk khaw dai a hnawm paihna bula kham feet sawm nga vel a sangah ramvak pakhat in ruang a hmuh thu hi a rawn puang ve mek bawk a, chu chu lo hmu in pu david c vansanga chuan a nupui chu a hrilh ve nghal thuai a.





ruang chu tunge anih hriat chian theih ani lova, mahse a landan ah mi kut tuar a thi anih hmel, tualthattu hian ruang hi hmuhchhuah anih mai loh nan hian khamah hian a paih ni in a lang a, tin a hmai vun chu a in hik vek bawk. A dulah chuan Chem a vihna hnu hma hmun thumah a awm a, a kut hnung khirh sak ani a, a lu ruh chu a dup vek mai bawk.





Ruang bulah chuan eng thil dang mah hmuh tur a awm lo ani. Nimahsela tualthattu hian hriat hmaih pakhat a nei ani ngei ang, ruang chuan a kekawr ip te ah hian passport size thlalak Pahnih hi khawr zet hian alo ak tel hlauh mai a, chu password size thlalak a mi chu chanchintharah chuan alo hmu ten tunge anih an lo hriat theih nan an tarlang tel ta ani.





Pu david c vansanga te nupa in chanchinthar a thlalak an rawn tarlan an lo hmuh veleh chuan an meng zau nghal kawk kawk mai a, an dang nghal sawp sawp thei hial ani.





A landan ni ta chu zemabawk dai a ruang an chhar chu an driver khupa, ni thum chhung zet mai a chin an hriat tawh loh ngei chu ani ta ani.





Chuveleh hmanhmawh tak chuan police station lam chu an be pawp ta nghal thuai a. Ruang an chhar chu an hriat thu leh an driver ni thum chung a chin an hriat tawh loh khupa ngei anih thu chu an han thlen ta a. An ni pawh chu police te chuan an ko ta nghal a.





Inspector remruata chuan ruang, thisen khar in a bawh nuai mai leh hmai vun hik vek mai chu ngun zet hian a en vang vang a, "imm, hei chu nasa taka nghaisak hmasak zet ani a, tunge anih kan hriat loh nan a hmai vun an hik a, tin he lai daiah, mi tu vak mah in an tlawhpawh loh na hmun khamah hian an lum thlak tir leh a", tiin a thuthmun atang chuan a han dingchhuak a.





Ruang hmu tu ramvak hnenah chuan "awle ka pu, ruang i hmuh dan hi min han hrilh ta che" chu pa, Kum sawm li chho ve tur chuan heti hian ruang a hmuh dan chu a han sawi ta a.





"Hemi khua, zemabawk a khawsa hi ka ni a, kan khaw dai ah hian ramvak pah hian chawhmeh te hi ka zawng thin a, tumbu te hi ka vai thin a, rawtuai te hi ka kheh thin ani. Nimahsela ruang ka hmuhna lai hi chu mi tu vak mah in kan tlawhpawh ngai lem loh hmun ani a, a hmun hma a rual rem lo a a khawkrawk avang hian ani.





"Engemaw ka hriat ni, mi la tlawpawh ngailoh hmun kham hnuai a mual khu ka tlawh chak tlat mai pek a, Tichuan, kei ngei pawh ka la kal ngailoh na hmunah chuan ka vak lut chho ta rawih mai ani, khu han en la sir, kham hi chutia kham sang tak phei chu nilo, mahse tlak palh chuan lum hlum theihna ngei tur chu ani. A hmun hma te khu a rual rem lo ani tih he lai atang pawhin a hriat theih khu, khu mi a mawng lam mual atang khuan rem leh rem lo chungin ka lut chho ta ani.





"Chutia ka luh chhoh tak zelah chuan khawnge kham mawng a bulthut lai te pawh han pawh chhoh law law a chakawm alawm maw le tiin ka chho ta zel a, hemi lai atang a han thlir pawh a lang ruak thei, a mawng zawl phei ve lek lek lai khu ka sawina anih chu. Tichuan le, ka tum ram ka han pawh chho chu rim mak deuh mai hi ka hria a, khu mi lang thei chin kawr ruam thuk vak lo awm khu khumi kawr khu ka zawh chho ani.





"Tichuan le, ramsa thi tawih rim nge ni ang ti a ka hnar ka len vat vat lai chuan ramsa thi ni ngei tur chu ka va hmu ta ani. Kawr ruam piah chiah a thing ding thelh thup karah khuan ka va hmu ta ani. Ka va belchiang a, mahse ramsa thi tawih reng reng alo nilo, mihring ani tih ka han hriat chuan khaw chhung lam ka be pawp ta nghal vat ani.





"Awle ka pu a lawmawm e, he pa hi tunge anih kan hre thuai turah in ngai ila, passport size thlalak te pawh kha an theh darh nghal dawn kha, awle i haw thei tawh e, he lam chu keini lam in kan lo buaipui tawh ang.





Ruang chu postmortem turin hospital lamah phurh phei ani ta a. Ruang chu tunge anih hretu ni a insawi pu david c vansanga te nupa pawh chu police te chuan thu lo zawtfiah in khupa ngei anih leh nih loh chian tur chuan ruang awmna lamah chuan an rawn hruai ve ta bawk a.





Pu david c vansanga te nupa in ruang an han hmu chu rapthlak ti zet hian an meng phar awn awn thei hial a. "Nilo, nilo ka pu, amah ngei ani, khupa ngei ani, kan driver khupa ngei ani e ka pu" joela chuan "ka pu, i hrechiang a maw? A hmai atang hi chuan tunge anih a hriat theih silo a, tin a ruang hi a tawih chhe tan bawk sia" alo ti a.





"nilo ka pu, chu lam anilo, a thawmhnaw hak hi ani. Khupa thawmhnaw ngei ani tih hi ka Chiang, a thawmhnaw ang midang in an lo nei ve anih pawhin kha thlalak passport size thlalak kha a kekawr ip atang a in hmuhchhuah ani lawm ni?





Joela chuan "aw ni e, a thlalak atang khan in driver khupa ngei ani tih chu in Chiang a maw? "Aw sir kan Chiang e, ni thum liam ta atang khan a chin kan hre tawh hleinem" tiin khupa chu an driver anih thu te, an inhmelhriat chhoh dan te, amah pawh a fel in a hawihawm thu te, mi inngaitlawm mi leh taima tak anih thu te, ruihhlo a khawih awm an hriat loh thu te, thian pawh a kawm tam lem loh thu te an han hrilhfiah ta a. Police te pawh chuan chutia an ruang chhar chu tunge anih Chiang taka an han hriat takah chuan investigation tan tur chuan an inbuatsaih ta nghal a.