INBUMNA LEH LEMCHANNA _Part-2_Last Chaper

[April Hmar Liverpool]

Inbumna Leh Lemchanna Part-2



Bung Lina





"Sir, sir khupa ka hmu, a la dam" a ti vak vak a. Inspector in chu thu a han hre zet chu a mutna atang chuan a tho kang nghal awk thei hial mai. "Engtin a ni? Joel, eng tin maw i tih? "Sir, khupa kha ka hmu, a la dam.





Inspector chuan "lalpa leh! hnaisai lo pa, i hmuh sual a niang chu maw le" joela chuan "sir, hei hi ka kut zungpui ani tih ka hriatchian tluk zet hian kha pa kha khupa ngei ani tih hi ka Chiang, ka hmu sual lo" Inspector chuan "hei ha, tichuan engtin zel?





A tuk khua a var a, inspector chuan champhai lam chu hmanhmawh takin a pan ve ta nghal a. Kalkawngah chuan thil tam tak a ngaihtuah a, khupa chu alo ni tak tak anih chuan Khang zawng zawng, pc zaithanpuia emaw an lo tih kha khupa vek zawk hi alo ni tihna em ni ang? Nge ni a, ruang kha chu midang Zawk an ni ang a, khupa leh PC zaithanpuia te hian lem an chang ta zawk ni ang?





An mi thah avang chuan tlanbona an dap ang a, police te bum kual an lo tum reng zawk em ni ang? Mahse ruang kha chu khupa ngei chu anih si kha maw le. Inspector chu a harh kawk a, "nilo, a ni theilo, ruang kha khupa a nilo, ruang kha hmuh anih kha chuan a lo tawih tan tawh a, a hmai vun a inhik vek anih kha, mahse a thawmhnaw te, a passport size thlalak atang te kha chuan khupa ngei ani tih kha ama chhungte ngei pawhin an pawm thlap ani awm si a. A ngaihtuahna chu a vak thui kher mai.





Joela te lo innghahna hotel chu a va thlen chuan hmel chi ai zet chung leh a ngaihna hriat loh hmel fe hian hruaia leh rinawma te chuan inspector chu an lo hmuak a, "sir, sir, khupa kha a la dam. A la thi lo" Inspector chuan "khawnge joela" a han ti a, hruaia chuan "sir, kha pa kha, khupa kha a hnu a chhui zui zel alawm, he laiah lo awm turin min ti tlat a, a ruk thei ang berin a hnu a chhui zui ta anih kha, engmah chanchin erawh ala rawn sawi lo"





Inspector chuan "imm, kan khupa mai mai chu, min lo va bum rei ve maw le" tiin a han rum nghat a.





Nakin deuhah chuan joela chuan a rawn call ta tlang tlang mai. Chuveleh inspector chuan a phone chu a han la thuai a, "aw joel, khawiah nge i awm? a han ti a, lehlam atang chuan "sir, khupa awmna chu ka hre thei e, nizan a ka han hmuh thut khan ka hamhaih lutuk a, chet lak mai nachang ka hre lova, khupa khan mak tih hmel deuhin min en a, hmanhmawh takin a kal bo ta nghal ani,





"mahse kei chu ka inthingharh thuai a, khupa kalna lam chu ka tin zawn ve ta ngat ngat mai ani. Vanneihthlak deuhin thim tham zing a mi pahnih nen an lo inbe mawlh mawlh lai hi ka va hmu a, khupa ngei kha anih ka ring nghal a, Tichuan ka zui ru ta zel a, khupa ngei chu alo ni.





"Mahse sir, khupa hian a awmna hriat chhuah a hlau hle ni tur ani, tin khatia kei nen a kan han innang ching ta thut mai leh ka mak ti hmel te, ka te thawt ri te avang khan a ngaih a thalo anih ka ring ta ani. Kawng kual deuh deuh ah te kan inzui ta ngat ngat mai a, a chang leh a ding lam leh hnunglam a rawn hawi let a, chutah a kalna ngaih bawk kan kal leh a, mahse ka zui zel tho ani.





"A tawp a tawpah a tlai tawh khawp mai, ka ke te hi a na zo vek thei hial ani, a innghahna hmun ni ngei tur chu ka hre thei ta ani. Mahse a innghahna hmunah pawh chuan a awm rei lo, a rawn chhuak leh thin a, khawi hmunah emaw a va kal a, a lokir leh a, a innghahna hmun ah te chuan hlauhthawn hmel deuh te hian a lut a, a lo chhuak leh thin a, chuti reng reng chuan zan hun chu ka hmang ral ani ber mai. Tunah chuan hei midang dang a awmna hmunah hian an rawn chuangkai zel a, a hmelhriat te nge ka hre bik lo hmeichhe in penparh tak tak an ni nawk hlawm mai.





Inspector chuan "tenawm hian, ks ho a khawi a niang chu, sum lah chu pc zaithanpuia account a mi zawng zawng a khawih fai leuh tawh a, a ngah nasa mai dawn si a, chuan tunah engkim a tha zel maw? i awmna hmun chu han sawi teh, kan lo kal nghal ang"





Joela chuan "sir, amah tak chu hei a la rawn lang miah lo. A awmna in bul a thingkung bulah ka ding mek, ka bihthla mek zel e" Inspector chuan "joel, in hnung lam atang te khan alo relh bo leh daih tawh zawk a nia nge aw, i awmna chu sawi vat teh" joela chuan "sir, mi lut chhuak chu an la awm ve reng a, ka rindan chuan a hmelhriat ho an nih ka ring, sum a ngah dawn bawk a, eng eng emaw chu an ti a ni ngei ang" Inspector chuan "imm, a tun hma nun thil ah lawmthu han sawina tur a nei thahnem deuh pawh ani mahna le"





Joela awmna hmun chu an va thleng thuai a, joela chu a mit alo phelh phang mai, zan lam a khupa a thlithlai na lamah a hah ve hle ani tih chu a chiang reng Mai. "Sir, saw, saw mi lai in pakhat, in hring ah sawn aw" alo ti vat a.





Inspector chuan "imm, i ti tha lutuk joel, ruahmanna kan siam erawh a tul dawn ani. Chutia mi an in luh chhuah chhawk zut reng mai si anih chuan enge an neih? ralthuam leh hmanrua pawh an lo nei reng thei. Kan fimkhur a ngai ani. ti khan lo awm ru, min lo ngaichang dawn nia" tiin inspector chuan in atang a lo chhuak leh mek hmeichhe pakhat lam chu a pan ta nghal a.





"Aa, ka pi, ka lo tihbuai lawk mai che, he laiah hian khupa tih hming pu i hre ngai em? Chu nu chuan a ngaihna hriat loh hmel fe hian "khupa maw? "Aw"





"Khupa chu ka va hre ngai lo ve" inspector chuan a ngaihna a han hre lo ren rawn dawn a, chutah "anih leh pc zaithanpuia i hre ngai em? Chuveleh chu nu chuan "aw hei, he lai ah hian a awm, engatinge? Inspector chuan "aa eng lo ania, ka hmelhriat ania, a awmna hmun min hrilh lai hi ka hrechiang lo deuh alawm maw le"





"imm, anih tak chu, pc zaithanpuia aw, hei hi aw, keipawh min lo dawr alawm, han in dawr vel pawh a zei narawh e i thianpa chu" tiin chu nu chu a han nui seih a. "awle awle, ka lawm e"





Inspector chuan joela te chu a han hui zauh a, chutah joela te pawh chuan rang zet hian a pu awmna lam chu an pan ve ta tham tham mai le.





"Joel, nangin kawngkhar ah hian lo chang ang che, chuan nang hruaia in hnung lam atang in aw, khupa hi a hlauhawm hran lo ang, ks ho mai an niin ka hria" hruaia chu in hnung lamah chuan a kal nghal thuai a, "rinawm, nang in min lo zui rawh le"





Kawngkhar chu a intheh hawng thuai a, nelawm loh fe a nui tha chung chuan inspector chuan "khai le! pi leh pu te u. Khawnge khupa hi a awm? A han ti a, chuveleh in chhung a lo awm te chu an lo phawk nghal hra mai.





"Khawnge pc zaithanpuia hi a awm? Chutah le! pindan atang chuan mi pakhat, a thi tawh emaw an lo tih, a thih chhan an lo chhui mek a ngei mai chu a rawn penchhuak ta tham tham mai. "Tunge khupa chu? a rawn ti a, a sawi zo hman lo teuh kher mai, police uniform ha lo mahse an awmdan leh an lan dan atang reng mai pawh a police an ni tih hai theih hauh loh tur mi pahnih a tum loh deuh a a han hmuh thut takah chuan a ding chawt a, a ngawi chiang ngang mai.





"Lalpa leh! rinawma chuan a ti chhuak sap a, "khupa, i lemchanna chu a tawp ta e, tunah chuan pc zaithanpuia that a ama identity hmang a lem i chan kual avang leh pc zaithanpuia bank account a pawisa awm zawng zawng i ruk chhuah a tlanbo i tum avangin man i ni e" Chumi rual chiah chuan inspector chuan kawl chu a kawng atang chuan a han phawrh chhuak nghal zal zal a.





Mahse le, khupa chu thawklehkhatah a tlan thut a, tukverh lo awm hnaivai berah chuan a inkhawhchhuak nghal zawk mai. "Chhe phak le! tih thawt pah chuan inspector chuan "joel" a ti tuarh a, joela chuan "sir, ka kap mai dawn" a rawn ti a, chuveleh inspector chu rang tak leh nalh fahran mai hian khupa inkhawh chhuahna tukverhah chuan a han per chhuak ve nghal zat mai. In chhung a awm te chu an te nghal teng tung mai a. Police te leh khupa chu an in um ta zak zak reng mai.





Hruaia erawh inspector hrilh angin khupa innghahna inah chuan alo awm ve thung a, khupa bungrua te chu alo enfiah malh malh a, khupa bag ah chuan pawisa chu a in tel chhah ul mai. "Imm, hrep tak chuan, kan hmela mai mai chu le"





"kha, lo man ru, lo man ru, misual anih kha" tiin khupa chu police te chuan an um lauh lauh reng a, alo hmu apiang te chuan an lo en liam vel mai mai a. "Hrep hlawm chuan, mi mawl ho" tiin inspector chu a te thawt thawt reng mai. nakin deuhah chuan chutia chawhmeh zawrhna bazar lian ve pangngai angreng taka an in um mek zel lai chuan inspector te au thawm chu lo hria in pa pakhat, chawhmeh zawrh lai lo en mek tu, pumraw lian lam leh sa tha nelh nawlh tak mai hian khupa tlanchhe mek lai chu a kawr awmah alo tham lawk a, hnehsawh zet hian leiah chuan alo keuh thlu ta ngheng mai a, chumirual chiah chuan a khup hmang chuan khupa chu a a chhuk do nghal ran mai bawk. Khupa chet han lak tum leh chu chu pa chuan na zet hian a lu chu lei charah chuan a han tauh tir leh ta nghek mai a, khupa chu che leh tur a awm ta lo.





Hah avang a thaw hlawi hlawi chung chuan inspector chuan "khupa, man i ni e" tiin khupa chu kawl a hren tir ta a.





Khupa chuan inpuanna a nei ta a. A inpuanna chu hetiang deuh hi ani. Khatia pc zaithanpuia nen a an han inhmelhriat chhoh tak zelah khan pc zaithanpuia khan sum a nei in an khawsak pawh a tha pangnagi hle ani tih te kha a han hrechiang chho ta zel a, tin pc zaithanpuia khan a hma lam hun atan a ruahmanna a neih thu te, phai lamah hna thawk a awm a tum thu te, a plan chu a nu leh pa te pawh a kal dawn hnaihah chauh la hrilh ve a tum thu te, tin nupui neih a tum thu te chu a hrilh ve thin a,





tin sum khawl sa a nei tho bawk a, engtin tin emaw a in manage chhoh ve zel mai chu a ring ani, amah leh amah chu intun chhoh ve a tum ani. Tin pc zaithanpuia khan a rin loh tak maiin zu te kha alo in ve ta mai si a, tin a nu leh pa an chhungkua hrim hrim pawh kha an langtlang hle a, ama duhthu leh ama tal tal a tal thang ani tih te chu a han hrechiang chho zel a, a ruk chuan a zuam ru ta hle mai ani.





Pc zaithanpuia chuan phai lam a a chhukthlak dan tur te, a hun leh ni te, a ruahmanna te chu a hrilh ve zel a, Tichuan tumkhat chu pc zaithanpuia chuan phai lama a chhuk thlak hma ngei a a bank account a mi pawisa chu a zah ve pawisa fai a lakchhuah a duh thu te a hrilh veleh ta zel a, chu erawh enge a chhan a hre bik lo.





Pawisa chu a lachhuak ta ngei ani ang khupa pawh chuan alo hrethiam ta mai reng a. Pc zaithanpuia sum mawlh mai chuan a mit chu a tidel ta ani. duhamna leh sum itna bawihah chuan a tang chho tan ta a, Tichuan le ruahmanna a siam ta a, anihna takah chuan khupa hian a rilru chhungril tak tak hi tumah a hriat tir ngailo a, Burma lam a a nu leh pa a chung te chungchang a sawi zawng zawng pawh kha dawt vek alo ni. A nu leh pa te chu an la thi reng reng lo a, tin he lai pu nilawma te in a a rawn awm hma daih pawh hian champhai lamah leh zokhawthar lamah hian alo tal ve nual hman tawh bawk ani. Mahse sawi tak angin a nihna diktak hi a tilang ngai meuh lova, mi hnenah chuan khawngaihthla la awm deuh leh lainatawm deuh ang in a awm thiam thin hle ani.





Tichuan le, a ruahmanna ang chu puitlin turin sum itna chuan a zar buai chho ta zel a, amah duhsak em em tu leh ngaihtuah em em tu, a thian tha em em mai ni bawk pc zaithanpuia chu a bum ta ani. A tan tirah chuan Pc zaithanpuia chu thah a duh bik lova, mahse uluk lehzual a a han ngaihtuah chuan a thah ngei chu a tul tlat si ani. A thah mai loh chuan a identity chu a ruk sak thei in a ring silo. Tichuan le, khami ni ni 18 inrinni khan pc zaithanpuia chu a bum chhuak ta a. a tu a te ve ve pawh chuan lirthei an keng chhuak thiang lo. Tichuan, pc zaithanpuia zawk chu misual ni a rinhlelh theih turin pc zaithanpuia chu taxi a biak tir ta a, amah chuan alo nghah thu a hrilh ani.





pc zaithanpuia nen chuan zemabawk daiah khan an chuk ta a, driver chu an haw tir leh mai a, Tichuan pc zaithanpuia chu a tawng bum thiam em avangin thlang lam a ramngaw hnuaiah chuan a hruai thla thei zel mai a, pc zaithanpuia chuan 'eng thil tak ni ang maw min surprise a tumna chu' ti a lungmuang tak leh nghakhlel ru taka a awm lai chuan khupa chuan "pc, a pawi ka ti lutuk, i dinhmun awhawm tak mai leh i sum thahnem tham tak mai te hi nang chuan i phulo ani. Heng hi chu keima chanpual ani" tiin a bag atang a chemte lachuakin a vit ta thut mai ani.





Pc zaithanpuia chu hmun thumah chuan a vit a, pc zaithanpuia chu che zui tur a awm talo. Tichuan le, khupa chuan a remruatna ang zel chuan chet a la leh ta ani, pc zaithanpuia hmai vun chu a hik vek a, chu chu Sarang a tuam in hnim karah chuan a dah ta ani. Pc zaithanpuia wallet chu a la a, a thawmhnaw chu a phelh vek a ama thawmhnaw chu a hak tir leh ta a.





Tichuan pc zaithanpuia ruang chu an lo zawng hmu palh hlauh anih chuan tiin a kekawr ipah chuan ama passport size thlalak pahnih chu hmet hrual nawk nawkin a hnawh lut leh ta ani. Pc zaithanpuia wallet ah chuan a mamawh a awm kim deuh vek tih a hria a, Id card, atma card leh document pawimawh dang a awm vek ani, pawisa tlem azawng a awm bawk a.





Tin, pc zaithanpuia'n a hma deuh ni a a pawisa fai Cheng nuaihnih zet mai a lakchhuah tak kha a dahna hmun a hre ru khiau a, a ma room chhungah a almirah safe chhungah a dah tih a hria ani. Hemi hma hian pc zaithanpuia pawisa rukchhuah dan chu alo zir Chiang vek tawh a, inah chuan luh ruk dan a awm a ngem tih te, engtin nge pc zaithanpuia room chhungah chuan a luh theih ang tih te chu alo zirchiang vek tawh ani.





Chutah, pc zaithanpuia a han thah fel takah chuan Zan khaw thim hun thleng chu a han nghak hmasa leh te te a, Tichuan zan thim thamah chuan pc zaithanpua ruang chu khamah chuan a paih ta ani. Miin an hmuhchhuah mai mai kha a ring hauh lo. Mahse hmuhchhuah palh thut awm thei ni a a hriat avang a khatiang a chet la kha ani. A hmai vun te kha a hik a passport thlalak te leh thawmhnaw thlakthleng te kha.





Tichuan le, a hmel landan tihdanglam a la ngai, dawrah kal in sam lem leh hmuihmul lem te, tarmit dum te, thawmhnaw te chu a lei leh ta a, Tichuan a tuk Pathian ni zanah chuan pc zaithanpuaia pawisa dahthat chu ru turin a thawkchhuak leh ta a, an chhungkua hi a zuam ru riau tawh ani. Chhungkaw fimkhur leh che fel thlip thlep an ni lo tih a hria ani. Tin, zanah chuan an inkhawm deuh vekin a ring bawk a, Tin zanah pc zaithanpuia hian a tukverh darthlalang chu kalh lovin a inhhawng sa in a dah fo mai thin tih pawh a hria, mahse chumi zanah erawh alo inkalh ve thei tho mai.





Amaherawhchu a vanneihna a kaltluang tak zet zet zel a, tukverh chu zan dang ang thovin alo la inkalh hauh lo tih a hre ta. Tichuan tukverhah chuan a lawn kai ta a, pc zaithanpuia room ah chuan a lut thei ta. Almirah chu alo inkalh a, mahse pc zaithanpuia hi a hrechiang lutuk tawh tlat. A almirah chabi dah pawh chu a hmuchhuak har lo. Tichuan pawisa Cheng nuaihnih fai chu la in a put bo zui leh ta ani.





Tichuan le, a tuk thawhtan ni a champhai lam a relh bo zui nghal mai tum chu a ni a, mahse a kal tumna sumo ber chu remchang a awm thei ta tlat lo. Nilai ni 22 ni ah chiah chuan sumo chu a awm dawn ani.





A rem rem ah chuan a landan thlak danglam in a tap kual ta deuh chawt rih a, Tin a ma chhung te mai bakah pu david c vansanga te hnen atang chuan call a dawng leh ta zel nen, tin a ruang paih lah chu an hmuchhuak ta mai si a, amah pawh chu police lam chuan an rawn be ta nge nge a, pc zaithanpuia emaw an tih vang ani.





Nilai ni alo thlen chuan champhai lamah liamthla tawh tur chuan a inruahman ta vat a. Mahse, police te khan a hnu kha an rawn chhui hma ta riau a, tin amah kha pc zaithanpuia emaw ti mahse an ringhlel ani tih a hriatthiam avangin pc zaithanpuia phone pawh chu a switch off ta hmiah mai ani. khatiang a thil a han thlen tak hnuah kha chuan a inthup reng thei in a ring ta lo, tin khatia phone a an inbiak lai pawh khan a aw te kha pc zaithanpuia aw ka ang thei tur ber in a ti danglam ani, a lemchanna chuan a daih rei dawn lo tawp tih a hrethiam ani.





Tichuan le, a rang a rang chuan champhai lamah a liam thla ta a. Keifang a thlen khan khawiah mah a Peng lova, hotel ah a riak nghal ani, a tuk ni nga ni ah erawh hmun hran hranah a chhuak ve a, tin atm atang khan pc zaithanpuia pawisa la bang zawng chu lak zawh vek a duh ta bawk,





Tichuan, Keifangah chuan a riak leh ta phawt a, a tuk zirtawp ni chawhnu lam chuan champhai lam pan tur in a inpuahchah leh ta ani. champhai a han thlen khan a thian hlui te a han zawngchhuak nghal vat a, zokhawthar lam pan khan a kal lo hrim hrim ani.





A thian hlui nupa te hnenah chuan a hausak tawh thu te a hrilh a, sum a ngah thu te a hrilh vel a, tichuan khami lai alo innghahna hmun kha chu a thian hlui nupa te in chu alo ni, Khang in leng te kha amah hmu tura kal an lo nilo. Mahse a thian hlui te chauh chuan a lemchanna chu an hria a, midang hriatah chuan pc zaithanpuaia ang in ala insawi zel thung ani. Khupa kha midang kha chuan an hre ve lem lo ani. Tichuan Police te khan khupa kha ni 26, Pathian ni chhun dar 12 ah an man ta ani.





Chutia khupa'n a inpuanna te a han neih zawh tak kelhah chuan khupa chu dam chhung a lung in tang tur a tih ani ta a, tin pc zaithanpuia hmai vun leh a vih na chemte a thuhruk a sawi pawh kha police te chuan an va haichhuak ta ngei bawk a, Sarang a lo intuam in hmai vun erawh hmuh tlak alo awm tawh lo ani.