BOSS AMANDA - 1 & 2 BY Toni DA Ralte Ahmangaihi

[Ngaia]

BOSS AMANDA - 1

(Hmana Detective story ang tho kha nia, Boss hming hi kan phuah tawh a..heh..chuan hetianga episode anga tih hi a awlsam. Awmzia chu Boss Amanda 2 –ah chuan Story dang a ni tawh ang, Episode khatah case pakhat zel khung kan tum dawn nia)

“Sam, I lo thleng tawh maw? tirawh I lut nghal ang” Boss chu thawhphan neih loh hmel zet hian ameng fim kak a. zing dar 3 bawr vel ani a, tun ang hunah chuan blanket hnuaiah “Mangpui” nen ka la chhing suk suk zel kha ania. Mahse, kan hna avang hrep hian thawhphan pawh awm lova chet chhuah a ngai fo si! Boss in min lo call angin, Civil Hospital lam panin ka inkhalh chhuak nghal a, November thla tawp lam ani a, a vawt kher mai.

ICU roomah min luhpui nghal a. Hmeichhia kum 28 awm vel, a hnara oxygen pipe vuaha lo mu , a lu an tuam var luk chu kan hmachhawn a. Boruak chu a vawtin a hnawng chuap hian ka hria. A nu leh pa niawm tak hi a khum bulah chuan an lo thu a. An mangan hmel kher mai.

“Tunah hian Kan nula damlo-I nau tleirawl ruang chu post mortem mek a nia” ka tiril a rawn khur a. Nula damlo pawh chuan a daihrei vak hmel loh. Ka thaw ippik lutuk chu angaihna tak pawh ka hrelo a. Boss in zawi deuh sapa nula nu leh pa te a biak lai pawh chu ka hre mumal lo. Pawna kan chhuah hnuah a rang arangin cigarette ka tan nghal a.

“Sam, a khirh hmel viau! Kan nula-I kha a damrei a rinawm loh, thu zawhfiah hman anih ka ring lo”

“Engtia chetlak nge I tum?”

“Thil thlen dan chu hetiang hi a ni a, nula damlo kha a hming chu Lawmsangpuii ania, anau thi ta kha Rinpuii a ni thung. Lawmsangi kha karleh nilainia pasal nei mai tur a ni a; nizan dar 10 thleng khan a pasal tur Hmingliana pawh a leng a, dar 11 leh a chanve bawr velah Rinpuii committee bang a lo haw a. Mahse, dar 12 –a a nu zun zung chuan Rinpuii (natna benvawn nei ani a, a nu zung tur hian a va en fo thin) chuan a khumah a mu hauh lo tih a va hmu ta a. A mangang chuan a chhungte a kaitho a. An buai ta nuaih mai.

An han phone ngial paw’n a tlang thei silo ! zawng turin an chhuak ta ngawt a. A bialpa te in an en hmasaber a, a ,lo awm chuang lo. Mak deuh chu abialpa chu a zin lai a lo ni tlat bawk! A thiante in an en a, a awm bawk silo. Lawmsangi erawh Rinpuii thiante veng danga awmte in enturin scooty in a kal a. Dar 2 bawr vela ina an va hawn chuan, Lawmsangi hliam tuar let reng leh anau ruang chu an va hmu ta ngawt anih chu! “

Ka mutchhuak chiai chiai avang chuan ka thluak chu a fim hlawl lo.Thil thlen dan chu mak ka ti viau bawk. Boss inlamah kan kal a, coffee sa ver vawr min siam sak ka in hnu chuan ka harh tha ta khawp mai.Amanda (Boss) chu a vei leh sek a.

“Amanda (Boss tia koh ka chak viau naa, a thinrim ka hlau sia) keichu rinhlelh tur reng ka hre lo. An unau inhmuthiamlo hian an inthat a nih ka ring” ka ti thawr a.

Na zetin min rawn melh a, “Thil awmthei chu a ni. MAhse, a chhan erawh kan hriat a tul hle si a” a ti sap a.

Nilengin tlangval pakhat bo thu-ah ka buai a, boss erawh tualthihna case a khel thung a. Zanriah kan kil laiin, min lo call a.

“Sam, Lwmsangi a harh, rawn phei nghal rawh” a rawn ti a. Chaw pawh ka eipuar leh hman ta lo.

“Ummm..min khawih suh..anaaa..kalbo rawh, ka hua che; bumhmang I ni.” ti tiah tiahtu Lawmsangi chu a meng diar diar a. A damchhuah ka rinloh nen, kan thuhretu ber a lo harhchhuah tak avang chuan ka lawm hle mai. Mahse, thu chiang zawhfiah theih ala nilo a; Doctor in a phal chiah lo bawk nen. A harhchian hun nghakin Hospital thlanga Coffee dawrah kan thu a.Boss chuan a sam a thlah hnap a, a rimtui kher mai.

“Lawmsangi hi a harh chuan kan chingfel tihna ani mai lawm tiraw” ka ti puat a.
“Maithei; mahse, engemaw felhlel a awm tlata hriatna ka neih hi hriatchian ka chak hle a ni” a lo ti khauh a.

Ka mitko ka san ak a, tawng tuma ka ka ka an zuau lai chuan, hmanhmawh zeta Lawmsangi pa lo tlan thla chu ka va hmu a. Thaw hluam hluam leh thlabar hmel zeta Boss melh chungin, “Ka fanu chu a thi tawh” a ti tuak a. A aw chu lungchhiatna leh thinrimna hian a khat a. A mittui tling pam karah amit sen ram pawh ka hmuh hmaih lo.

Lawmsangi chu Doctorin ngun takin a han en vel a, a taksaah hliam dang a hmaa ahliam tihloh chu hmuh tur a awm lo. Tui taka muhil hmel a pu a, a hmai dang bai chu Boss chuan a melh tlawk tlawk a; Ka thinrim bakah hlauhthawnna ka nei. A chhan chu Lawmsangi kha kan kalsan lai chuan a tha a, a la biaktlak loh tih mai chauh a ni.Thil thlen dan rang lutuk chuan min tihlau ni berin ka hria. Thil diklo chu a awm chiang a ni.

“Doctor, Lukham hi..” Boss aw zawi raih chuan a rawn ti sap a. Khum ban bula lukham lo let hlawm reng chu tuman kan lo hrechang lo pek a ni. Boss chuan a lekkang a, a hnim vang vang a. Rang zetin khum chu a dap kual a, ruang singsa tu Nurse chuan maktih hmel zetin a lo en a. Samzai sei zet a rawn lekkang a, ngun em emin khum khuhna puan chuan a bih leh ta a. A duhang thil a hmuh loh vang nge a ner sak a; lawmsangi kut a la chhuak a, a kuttin chu hnai fahranah a bih leh ta a. A nui ta sak a.

Lawmsangi Pasal ni mai tur Hmingliana chu tlangval cher lam, tarmit vuah a ni a, a hmelchhe lem lo naa, thinchhiat hmel lek lek erawh a ni. Kum 32 bawr vel niin a lang a, Computer Operator niin, Lawmsangi te veng thenawm lawka awm an ni a. Chhungaw awmthei leh induhtawk ve tak an niawm e. Hminga hian sawn a lo thlak tawh a, chu a sawn thlakna nu chu Lawmsangi te thenawm hnai mai a ni lehnghal a! Hminga hian nupui atan a nei duh lo niin an sawi. A fa erawh a ngaihven ve viau! A nupui ni mai tur thichhawnga a lum reng lai pawh khan, a bulah a tap ve chawt a; a bialnu chunga thil thleng chu hriatthiam harsa a tih thu a sawi ve fo a ni.

“Lawmsangi leh anau chunga thil thleng hi nangpawn mak I tih ve tho chu ka ring a, I bialnu hian hmelma a neih awm I hria em? Emaw in inneih dawn avanga buai mihring an awm em?” Boss chuan a mitah a melh kal mai a.

“Aaa..chutiang an awm pawh ka hre lo. Sangteii hi a fel a, tupawn an ngaina in ka hria; ka fa neihna Ruati ngei pawh hian a nelin, an inkawm thei fu a sin..a tir kha chuan ka fa neihna Ruati hi ka ringhlel deuh a, mahse, hetiang thil ti ngam tur niin ka hrelo; nakina min zawh tho ka rin vangin ka sawi anih chu..Sangteii ngaizawng ve thintu Puia pawh hi mitha tak ania, hmelma ang chuan min en loh bakah thil thlengah hian a inhnamhnawih ka ring lo” a ti a. A aw chu a chher lek lek.

“Ruati nen chuan tunhnaiah in inbe ngai em?’
“Ngai vak lo, ka fanu chungchangah kan inbe zauh zauh tih loh chu..”

“Puia address chu sawi ve hrim hrim rawh aw”

Lawmsangi nu Pi Hmuaki mitmeng bui lak chu hmuh a nuam lem lo. A fanute pahnih, a rual deuhthawin a chan a, hlima nui ver ver tur chu a nilo reng bawk a ni. Thu pawh zawh theih a ni lawk lo a; tunah a remchan lai chuhin an nupa pindanah kan thu ho mek a ni.

“Damdawiinah khan I fanu kha I kalsan miah lo a maw?” Boss aw chu ani ang lusun hlim tan chuan a nem lo mah mah.

“Aw..aaa..ih ka buai nuaih mai. Ka kalsan lo k’n ti tak naa, zun zunga ka chhuahsan chu a awm a, ee…chuan, Canteenah eitur ka va chah bawk e”

“Minute engzah vel nge I thang ang? Chutihlai chuan Lawmsangi chu a harh em?”
“Harh lo, a tawngvai bial bial reng a, a rei berah 3 minute vel ka thang ang ka ring; awmpuitu dang ka nei silo a, awww..mambawih, min ngaidam rawh aw, a va pawi tak em..” a’n tap leh rih a. Lawmsangi pa chuan a lo kuah vat a. Boss thuzawh dan chu ka lo ning deuh a, Lawmsangi kha chu a natna vanga thi niin ka ngai, lukham tih vel avang kha chuan ka buai peih lo.

“Anih chuan, ka pi, room I pan laiin tuemaw tawh I nei em?”

“Nurse pahnih chu ka tawk” a maimichhing a, a ngaihtuah let niin a lang.

“Thildang daih, Lawmsangi kha a rai mek tih in hria em?”

Phawk zeta amah melhtu te chu a nuih lui sak a. Keipawn mak ka ti kher mai.

“I hresual a nilo maw? karleh maiah Dan khatnaa inneih an tum a sin; rai nise Mami pawn min hrilh hreh ka ring lo” Apa chuan a ti a, a lungawi hmel vak loh.

“Doctor Lianzuala min hrilh a ni e, thla 3 vel aniawm e, chu chu a pawimawhber a nilo e”

“Awih a va har ve aww”

“In chhungkaw chanchin hi tlem azawng min hrilh thei angem?”

“Fa hi pathum kan nei a, Sangteii hi a upa ber ania, Rinpui’n a dawta, kan teber mipa erawh Pune-ah a awm a, nichin mai khan a lo thleng a; chuan, Sangteii putea hi kan awmpui bawk a, Dawrpuiah sawn puanthan dawr kan nei ve a, kei hian huan chhete ka nei ve bawk a, kan khawsak chu a chuti lua lo naa..kan awm thei ve naw naw a. Sangteii hi a graduate hnuah dawr a nghak zui nghal a, Rinpuii erawh tunah hian B.Sc Final a zir mek thung a. Chuti zawng chu a ni mai e’

“Hmelma in neih hmel silo a ..”

“Neilo, tu pawimah kan sawi ka hre lo” a confi khawp mai.

“In makpa ni mai tur Hmingliana chhungte hian Sangteii hi an duh vak lo niin ka lo hria a’

“I hresual anih chu! An duh lutuk a lawm, Hminga fa neihna nu Ruati kamtam vang mai mai alawm”

“Ni tak..Ruati chungchang saw min hrilh theih in nei em?’

“A nu leh pate saw chu mi tha tak an ni. Amah Ruati saw a lo leng ve fo a! Sangteii hian nuamlo a ti thin; Hmingliana beisei lo ang deuha awm si hian, a rukin kaw hreuh a lo tum reng tho a. Hminga chhungte hnenah dawt a lo sawi thul! A fanu hmanga Hminga kherh beh pawh a tum nasa alawm, mahse, Hminga hian a hawi ta lo e mai a..An innei dawn tih a chian tak hnuah kha chuan a rawn leng lut tawh ngai lo” Pi Hmuaki chuan a ti a.

Ngawi rengin car a khalh mawp mawp a. A hmel chu a tur ngan mai a, kamtu nei hmel a pu a, ka be ngam lo. Keipawh ka buai! Ruati kha ka ringhlel ta ber mai. Mahse, a lo ni leh miah lo thei. Ka rinhlelh ve te hi an lo ni ngai mang silo a, ka buai vak duh tawh lo. Boss thluak hmangin misual chu kan man chhuah leh mai ka ring ve tawp. Ka phone a rawn ri a, Ka ex Lucy a lo nia..

“Sam, zanin chu min chhuahpui hman angem? Ka thiante nen kan party dawn a, hruai tur ka nei ve silo a” a rawn ti bawih hnap a..he nu hi chu aww..hmeichhe easy tak chu nilose..a itawmin a hmeltha chiang lawm..ka inngaihtuah hma hmain “ Va kal rawh” a rawn ti roh a! ka phone volume ka down vat..

“Sam, hmeichhe taksa hi mipate infiamna tualzawl ania, hnehna an chan veleh an playground chu an chhuahsan leh mai thin em ni?” a aw chang rat leh a mitmeng chu a inhmeh hle.

“Keimahah chuan a nilo”

“Ka beisei..heh” a awmdan danglam thut chuan min tihamhaih vek alawm..henu hi chu a..

“Tuna kan game khelh laiah pawh hian sex hi a laimu ani leh dawnin ka hria” a ti vawt raih a.

“Engtin?” ka lo ti vat a.

“Sam, amak tiraw? Nula fel leh kohhrana inhmang em em, p0rn film en pawh hremhmuna tlakna tur ang hiala ngai khawpa pawnlama nula thianghlim nisi ten tuma hmuh loha khumpui kai an awlsam si zia te hi..an hmangaih miah loh te nena nawmchen pawh thlangtu te chuan an thih hnuah pawh an nu leh pate an tizak fo reng a ni..ka sawi awmzia I man leh leu luau na nge?”

Ka hawi a hau chu min rawn nuih a. A thusawi awmzia kha ka man lawk lo alawm..eng nge kual taka a sawi tehchai!? Lawmsangi chungchang ani ngei ang..

“Mahse, an innei dawn tho alawm”
“Tu nen?”

“I nghal “ ka lo ti hlur a.
“Hmingliana I ti em ni? an inneih tak tak pawh ka ring lo”
“Nei dawn lo chu anih hi..a thi daih alawm”

“Thi lo pawh nise”ka tawng leh hmain, a ding dawt a. “Chhhuk rawh” a ti bung nghat a. Ka tah a chhuak, a awm dan hi…mahse, kan inkawt kan lo thleng reng tawh alawm..

Party nuam tak ani. Lucy chuan min intineitu takin ka kut a vuan reng a, chicks melh hman pawh ka ni lo. Beer duhkhawp lovin, a awm remchangber Royal stag chu no 2 k’n khiat ve ngawt a! ka phur dawn chauh emaw tih laiin ka vir muai muai mai. Ka in lohna a rei ve ta deuh a. A chhan bul tak erawh no 2 chiah ka in emaw ka tih kha..ka kai theilo emaw tiin hriat loh hlanin ka lo in vei pap pap a lo ni..Lucy nen khumah kan inbawh run a..rilru kilkhatah chuan “henu hi a easy si..natna thalo te vei ta se..khaw nge ka wallet? Ka condom kha ka hman angai” a lo tiru ve reng a..rilru lehlam lah chu a hmanhmawh hle bawk si..” A nih nih ni mai teh se’ tih pahin k’n che leh thawr a! ceiling ka hmu tam zawk mah awm e..che tha thei hek lo le..

“Sam, nizan ang kha chuan ruih tawh loh a tha ang” Beer vawt raih min pek pah chuan min kiai sak a. Engkim hi a hre vek zel amawni le..

Ruati chu kan hmaah a thu a, Lawmsangi aia a hmelthat lohna ka hre hauh lo. Nuthlawi ani bawk a, a zuna uai ana ngawtin ka ring..”Sam, I ngaihtuahna hrisello zet kha chu I khum lamah chhunzawm mai la..umm” Boss chuan a rawn ti leh sur sura, a va ngeiawm thei tak..a fiamthu thawh ve dante lah hi..nuihpui a har thei si.

“Hmingliana kha midang ta ni tur chuan I phal lo a, chutah inthenawm hnai lawk ami nen an innei dawn zui! I tan chuan khatianga chet kha a awl ngawt ang, ka hethiam che”

“I sawi awmzia ka hrelo, Sangteii te tualthihnaah hian inhnamhnawihna ka nei ve lo”

“Ka ring chiah lo”

“Pathianin a hria, nia, a dik, ka rilru chu a ana ve alawm, ka fa pa ania; ka hmangaih bawk. MAhse, min nei duh lo a, kan thenawm nula a rawn hel a. Ka tana anat tur zia chu inhriat ka ring, mahse, ka that lo. That turin ka huaisen tawk lo bawk “ Thudik a sawi in ka hria.

“Mahse, Hmingliana chhungte bulah I hek a..a dik em?”

“Ka hek thlawt lo; Hmingliana ka khawngaih vang zawk ania; Sangteii mize diktak an hrelo alawm, a sum bak a duh lo; khanu khan..” sawi zawm ta lo chuan a ngawi daih a.

“Sawi zawm rawh, I thil hriat zawng zawng”

“Sangteii sum duh zia chu kan hre vek, a bialpa hmasa pawh a hna atanga a ban avang maiin a then asin. Puia kha akhawngaihthlak asin. Hminga pawh hi a pawisa vang chauha ngaizawng a ni. A rukin a lerh tho; a inthup thei em alawm. Kan thiannu pakhat , khawlai mi ve deuh hian a hrechiang khawp mai, party tih vela kal te hi a hrat lutuk”

Ruati chu Boss pawn a ringhlel zui ta lo anih hmel. Tunah chuan Puia hmel kan hmu ve ta thung. Tlangval sa tha nelh nawlh, hmel fai ving veng, ngainatawm zet a ni a.

“Lawmsangi kha I hmangaih a, mahse, a then che a, Hmingliana neih a tum a, I rilru na mangang tal vel chuan em ni I thah tak ngawt?” Boss hi chu a chaltlai thei..

“Ka that phal teuh lo mai. Ani khan ka fa apai asin” a ti ta mai le! chhei..!!

Boss hmel chu a hlim deuh sawt a, “Chu chu man a hrilh che em ni?”

“Aih, aputea ‘n min hrilh alawm, amah chu ka zawh pawhin, “U hminga fa alawm” a ti tlat a”

“Chuan, I fa pai chunga Hmingliana a neih chu I phal thei thlawt lova; I that ta a! Rinpuii kha engvanga that ve kher nge I nih?”

“Ka nunna chhalin ka sawi e, ka that lo, tumah ka that lo; Rannung thah pawh duh ngailo ka nih hi..nunna hlut zia ka hria asin. Thudik k’n sawi ange..khami zan khan keipawh ka leng ve a, mahse, Hmingliana nen an hlim dun em vangin ka haw hma a, ka rilru na chu ka inhrosa a, ka fa chuan pahrawn a hrawn hauh lovang tiin. Anau Rinpuii kha engkim hrilh vek ka tum ta a. An committee avangin an ban hun ka nghak a; mahse, damdawi ei angaih avangin inah a haw leh phawt a. A chhungte mut tawh hnuah a lo chhuak ta a. Phone a sawi kha ka duh tlat silo a, Bakh Rinpuii hi chuan min ngaina a, min tan zawk bawk. Hminga hi a duhpui lo tih ka hria.

Tichuan, engkim ka hrilh ta vek a. A thinrim hle nghe nghe, Rinpuii hi chu a u anga awlsam a ni ve lo a, pa thengthawng, frank tak, thudik duh mi ani. “Ka u nen chuan in innei ngei ngei ang” a ti a..Tichuan min hawsan a, a chhungten an zawng tih pawh kan hre lo. Ka thlah haw thlap. Ina a lut lai pawh ka thlir liam vek..an zawng tih hria ila chuan, Sangteii ka call ngei ang. Tichuan, chanchin duhawmlo tak kha ka hre chawp chilh ve nghal a, keipawh hian mak ka ti khawp asin”

“Rinpuii nen in inkarah engemaw a awm zawk ani lo maw” talh talh thin hian awww.

“Keichuan farnu ang maiin ka en thin. Sangteii kha ka hmangaih a, nupui atan pawh ka duh, nula sihhnip ve tak ani tih pawh ka hria. Kan inthen hnuah pawh ka la mutpui fo theih danah.Mahse, ka hmangaih a, ka hnualsuat phallo; ka hausa ve lo a, eizawnna mumal tak ka neih loh vangin min hnawl tih ka hria, theihtawp chhuahin eizawnna kawng pawh ka dap ve asin..mahse, hetiang hi a ni ta sia”

Puia chhuah hnu chuan a vei leh sek a.
“Lawmsangi mizia kha engtin nge I lo hriat vek theih bik?” ka ti hlawl a. Mak ka ti em alawm..

“ Pasal a neih dawn thleng pawha Puia’n a la beisei ngam leh a rai tih a pasal tur laka a zep tlat danah khan, nula fel tak ANG..fel ziktluak lo a nih ka ring ngawt pek alawm, ka ring dik phian”

“Hmingliana chuan a rai tih a hrelo a maw”?

“Hre lo, chuvang alawm, a nute bulah khan a rai thu kha a pawimawhlo ka tih ngawt! Hmingliana an zawt ang tih ka hlau zek zek a tin ni..a buai vek dawn sia..Tunah chuan Hmingliana hi kan rehchhuah a hun ta in ka hria” a ti chang rat a.

“I fa ni miah lo a pai tih I hrechhuak a, I thinrim a, phuba lak nan I nupui hual leh anaupai chu I that ta a”

“Eng a?! I sawi awmzia pakhatmah ka hrelo, Lawmsangi a rai amaw? Ti nge ka hriat ve loh?” a ti tuar tuar a. A hamhaih zia chu tider niin alang tlat lo. Tui a in khawlh khawlh a, a thisen zam a pawng talh tlah mai.

“Rinpuii khan khamizan khan a rawn hrilh che ani lawm ni?a dik em?” Boss aw pawh a nem bik lo.

“Rinpuii khan min rawn bia alawm, mahse, a tawng hmain a tawp daih a, ka call back a, a off tlat tawh alawm..” Rinpuii contact list kan check khan, Hmingliana number hi a call hnuhnunber ani reng a.

“Engmah I hrelo tak tak nge? I hriat vang zawka lemchang I ni tih chu ka finfiah ang”

“Amanda (bawl bawla) min ngaihdan ang kha ni ta pawhnisse, engvangin nge Rinpuii kha ka thah ve kher ang? Chupawh Lawmsangi ka thah hmain maw? awmzia a awm lo”

“Ni lo e, Rinpuii kha a dula vih ani a, Lawmsangi khan a mualpho thup nan anau nunna lak kha a pawitih ka ring miah lo. Mahse, anau chuan lo beilet ve in, hliam a tuar ve ta a, nang lahin thudik I lo hriat hman tawh si avangin, Lawmsangi chu I hua a, a damchhuah kha I duh lo a, a pumchhunga naute nen khan..”

“A tawk..a tawk..ka that lo..ka that lo” a au a ni ber mai. A thinrim lutuk chu a khur hlawk hlawk thei hial!

“Hmingliana chu a thinrim em em danah khan thudik a sawi anih ka ring” ka ti a.

“Keipawn..a thu hriat khan a shock ve bawk a nih kha” a lo ti dam dap a. Chair-ah a thu a, pen in dawhkan chu a chhu kauh kauh a, a ngaihtuahna chu khawilaiah tak awm leh ang maw..

Lawmsangi te in kan thlen chuan dar 8 a ri tep tawh a, inleng pawh an tam tawh lo a. Lawmsangi roomah kan lut a, a putea (Pu Sawma ) kan kawm a. A chhan chu Lawmsangi a rai tih hretu tlemte zinga mi ani tlat a!

“I u fanu rai I hria kha mak ka tilo a, Puia fa ani tih kha engtin nge I hriat tih ka hre duh a ni”

“Ni e, a dik alawm, thla 3 liam ta khan Mambawihi leh Puia mudun lai hi vawi 2 lai ka phawk tawh a, a roomah ngei hian. Sawi zahthlak nimahse, sawi a tul si anih hi..ka zilh in, a pa te hriat lohin ka hau ve nasa, Hmingliana nen an innkawp reng tho bawk si nen..Puia pawh vawi hnih lai ka hrilhfiah tawh (heihi Puia khan a lo sawi tawh a) thu pawh a awih viau, mahse, a ruak lo ta tlat si! tumah a hrilh ngam lova, nikhat chu a rooma a tap lai ka phawk leh a, nasa takin ka zawt a, ka dawp bawk a, engkim min hrilh ta vek a. Mahse, buaina kan nei; Hmingliana nen khan an chesual lo tih min hrilh si a, innei mai tur an ni tawh si..hmanah te chuan min hrilh nise, a ruka paih dante pawh a awm tur ania. Paihtir tuma kan va kal khan Sangteii rilru hah, engmah eitha thei silo khan thisen a neilo em em a, Doctor khan a khawih ngam tlat lo, chutih a hnekin thisen pek angai a, a BP a hniam lutuk zawk ani.

Fair taka thiltih ka duh avangin Puia ka hrilh a, Inneih thulh se, Puia nen chuan mualpho maise ka ti tawh ani. Hmingliana bum kha a risk a sang ka ti em atin ni..”

Boss chu a rilru a buai hmel khawp mai. Pu sawma chu sawipui vak tur a awm tawh lo bawk a, kan hawnsan ta a.

“Sam, a tawp kan thleng tep aw” ka chhuk dawna a tihri chu ka bengah a ri ring viau mai..keichuan angaihna ka hrelo.

Ni 3 lai chu Boss ka hmu lo a. Mahse, “Sam, ka thianpa te farm house-ah ka chawl hahdam dawn” a tih vangin a chawlh hmang chu a hahdam ka beiseipui. Lucy nen kan inbe leh tan ta bawk nen, kan case pawh ka ngaihven vak lo. Zankhat Lucy nen Dinner kan eichhuak a, kan titi mawlh mawlh laiin, Pu Sawma kha a rawn lang thut a! mangan hmel deuhin min en a..” Puia kha motorin a su a, a serious khawp mai, I boss kha lo hrilh ve la, engemaw hriatchhuah turte a awm takin” a ti a. Boss ka call nghal a.

“Amanda, puia kha..”
“Ka hria, a bulah ka awm, lo phei nghal rawh”

Puia chu ngaihtuahawm lutuk chu a lo nilo a, amah sutu motor number lah chu tuman an lo hre silo.

“Puia sutu hi tudang nilovin kan tualthattu bawk kha anih hmel”

“Mahse, chu tualthattu chu tu nge ani tih kan hre silo a”
“Ka hre tawh alwm” a nui mawi zet chu hmuh fo ka duh a ni.

“Puia ka kawm hmasakber atang khan I hming hi ka bengah a ri ring viau tawh a, mahse, ka la hrual mum hleitheilo mai pawh a! mahse, I hmel ka hmuh khan rinhlelhna chhete mah ka nei tawh lo a, Puia suthlum I tum zan khan finfiahna ka hmu ta niin ka ngai bawk” a hmaa thu chu chiang zetin a melh a. A hmel chu a hahdam hmel hle thung. Maktia ka lo menphar lai chuan, min rawn kiai sak a. Hepa ber kher hi chu…a theih loh hul hual..

“I va zaktheilo ve, kei hian an unau khan ka that ang maw? ka fate an ni a sin”

“Mahse, I fate an ni hleinem, I u fate alawm an nih? PU Sawm, “

A mitmeng chu a rumin a hlauhawm kher mai. Boss chu hnek duh mai hmel apu a. A kut a humruh a..a heh a liak zauh zauh bawk..Pu Sawma ber kher chu keipawn rin harsa ka ti..mahse..

“Lo ngaithla ve la mawle..i biang veilamah khan engvanga Band-aid bel nge I nih a?”

“Hman zana ka intauhna anih hi”
“Ka ringlo, I fanu Lawmsangi hamna che anih ka ring; Lawmsangi kuttinah khan khang I hmai vun them kha a tang alawm..lukhama I uphlum laia a tal velna lamah a ham che anih kha..K’n sawi zel ange, Ni 2 liam taa I hnena Puia rawn tirtu kha keimah ka nih kha..Puia kawrhma iptea a pen kha pen satliah a nilo a, camera anih kha..i thusawi lai te, mangang taka I meng tal velte kha hahdam takin ka lo thlir reng mawle..Puia thusawite kha dawt vek ani tih I hrelo hlauh kha avanneihthlak viau! Ka rind an leh beisei ang ngeiin Puia chu thah I tum leh a, mahse, a lo inring lawksa vek a, I duh angin hliam na a tuar ta lo hlauh..

Lawmsangi leh Puia mudun I phawk tih ka hriat khan, I fa ang tak takin en chu nila, a nu leh pate kha I hrilh ngei ang. Mahse, I tilo, a chhan chu blackmail I duh tlat alawm..i nupui fabik mutpui I tum vanga I nupuiin a then che tih ka hriat atang kha chuan, I u fanu, nula nalh leh itawm tak kha I thlah zalen mai mai lovang tih ka ring a lawm..engtin nge I chanchinte chu ka hriat lo ngaihtuah buai duh suh. Ka hna ania..

Tunah chuan, unau pawisawilote I thah dan ka hre duh”

A thlanfim bawl tawk tawk chu khur chungin a huikiang a. Keipawh hian Pu Sawma’n a bianga Band-aid a bel vu kha engtin nge ka lo enliam mai mai theih le? Boss khan, Lawmsangi kuttina vun them tang a awm thu min hrilh zauh tawh si a..ka mawl vang vek..

“Awle, sawilo thei ka ni lo bawk a. K’n sawi ange. Khatia Lawmsangi leh Puia mudun lai ka hmuh khan ngaihtuahna thalo tak ka nei a; Lawmsangi chu mutpui ve ngei ka tum ta bur mai ani. Tichuan ka vau tan ta a, a chhungte leh Hmingliana hrilhah ka vau a,mualpho hlau reng enga khawsa ani bawk a, a khirh vak lo. Ka mutpui ta fo a! puia nen erawh an mutdun ka hre ngailo. Nupa ang chiahin kan khawsa tawh a; ani pawn a hreh tawh lem lo. Nau apai takah khan kan mangang dun em em a, a rai tih kha a inhriat har avangin, thla 3 lai a ni tawh ani..paih chu duh hle mahila, a nunna atan a hlauhawm si a, bakah mitmei ven tur a tam bawk si. Puia puh turin ka nawr a, Hminga nen khan an chesual ve tlat silo a!

Puia puh chu a duh ta tlat lova, Hmingliana talawh tumin, chetsualpui turin ka ti leh a, mahse, Hmingliana kha fa nei tawh mahnise, a lo fair riau a! dan khatna a innei tawh tur, chetsual kha a duh tlat lo. Ka mualpho ka hlau tawh si a, Puia kha ka hrilh ta ngawt mai ani. Ani ang tlangval rilru tha leh tluang chuan an chetsual hun nen a lo chhut thlip thlep tawh lova; alo pawm ve ta mai a. Ka ngaihdan chuan Puia nen khan loh theih loha an inneih ka ring a, anih loh pawhin, Sangteii khan Puia nei duhlo in sawn pawm a thlang anga, kan thil chin thalo tak pawh kan la tih zel theih ka ring bawk.

Mahse, Sangteii khan Puia hnar nan Hmnga fa angin a lo sawi leh ta si..Puia khan Rinpuii a hrilh ta chiah a..khamizan khan sex kan hmang lo rei tawh a, kei ka lo rui deuh nen, ka chak thar thut a, Rinpuii zawnga kan chhuah hnuah Sangteii kha ka call a, ina lo kal turin. A lo haw ve mai a, kan mudun leh a, mahse, Rinpuii khan min rawn manchhuak ta a ni!! Rinpuii hamhaih khan Hmingliana a call ta mai a! kan chhiat vek ai chuan tiin, chemte ka la a, ka vit ta mai anih kha..Sangteii khan anau chhan in min rawn bawh a, min chum vak vak a, au a tum a, ka chi-ai vek tawh. Ka che ta buan buan ringawt a; an thi ve ve emaw ka ti a. Tichuan ka chhuak leh a, ka ute hawn tawh hnu awm velah ka haw leh ta chauh ani.

Sangteii kha a thih ve loh avangin enkawl ani a; a rawn harhchhuak an tih khan ka mangang em em a, ka thuruk chu puanzar ani ngei dawn tih ka hria..tichuan ka u canteen kal lawk hlan khan lukhamin ka va uphlum ta a. Ka u lo phei ka hmuh avangin, Room lehlamah ka lut ta hmiah a, mahse, room ka hai thu ka sawi a, an lo hrethiam ve mai..engkim a fel vek tawh emaw ka tih laiin..Puia kha ka hnenah lo kalin “ Rinpuii khan Sangteii nen in mudun lai a hmuh thu min hrilh a ni” a rawn ti leh ta a..Puia dahbo dan kha ka ngaihtuah leh ta char char ani..”

“Hremna chu a nep hauh lovang le” Boss chuan a lo ti vawt raih a…

“Sam, tun weekend chu Farm House-ah khan zuk hmang tak tak ang hmiang” a in peng kan thlen lai chuan a ti a.

“kan pahnih chauhin maw?!”

“Ni e, min hlau em ni?” a ti sap a. A mitmeng lian leh zahawm zet chuan min tihlau tak tak..

“Hlau lo” ka ti thung a!
“Naktuk chawhnuah aw” a mawngbawr vawng lah, che lawih lawih khawpin stepah chuan a pen chho pawk pawk a..stearing hmer pahin..” Anih chuan, Pu Sawma anga inthunun theilo I hmachhawn paw’n min man ve suh aw” ka ti rilru a..

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

[Ngaia]

BOSS AMANDA – 2
A coffee in lai chu dawhkanah hungin, a phone ri ral ral chu a va ban a. Hello a tih rual chuan, an pu ber aw chu a hre chhunzawm nghal a. A ner sak a; a hahdam ve hun chhung reiloh zia a ngaihtuah ani mahna. Tunah tualthahna leh bawk maw?! a hne ve takzet a ni. A asst Sama a call nghal a. Coffee pawh in zo ta lo chuan, a inthlak sawk sawk a, a sam hnawk niah chu a tawn khawm tawp a. Camera leh motor chabi kengin a in chu a chhuahsan ta nghal a.
Nula kum 21 vel bawr tur, sam tawi mat mai leh hmeltha tak, a kap atanga thisen rawn chhuak avanga thisen nena inchiahpiah nuaih mai chu uluk zetin a thlir a. Thisen rim rawn thang huk chu a ngaihvenlo lui hram hram a. A hmeichhiatpui bawkin thihna rapthlak tak a tawk leh ta chuan a thin a tirim hlur tawh a. Tualthattu chu tupawhnise, ana thei ang bera hremna pek a duh a ni. Sama lam ava hawi phei chuan, thlabar hmel zetin nula ruang chu a lo thlek ve a. Sama hi a hmuh hmasakber naah kha chuan a ngaina lem lo. Hmeichhe ena en duh tur chi Asst neih chu tul a ti lo a; mahse, an han inzui rei a, a ngaih ang vek kha a lo ni bik lo a. Sama chuan angaisangin a zahthiam em em tih a hria, anaupang zawk ani bawk a, thiantha tak leh unaupa ang maiin tunah chuan a en tawh a. Engpawh hmachhawn dawn se , Sama chu tel ve zel se a duh tawh a ni.
“Lalawmpuii a ni a, Saiha atanga heta lehkha rawn zir a ni; M.A (Eng) a ni e” Sama chuan a ti a. MZU , Vice Chancellor quarter lam panin an tlan mek a ni. V.Chancellor chuan MZU Campusa thil thleng atan chuan duhawmlo a tih thu leh thudik haichhuak ngei tura a duh thu a lo hrilh a. Puih pawh a inhuam hle niin a lang. Lalawmpuii kha sawi tawh angin, Saiha khua niin, MZU-ah lehkha zirin, Hostel-ah a awm a. Single room a luah nghe nghe; Nula zawiawi leh chimlim tak, tawng tam lem lo, nelawm vak lo tih chu Hostela awmte sawi dan tlanglawn a ni. Single room a luah ngat danah chu chu dawt a nih a rinawm loh bawk. Mahse, tu pawimah a sawi an rinloh thu leh kawm chian chuan a fel viau niin an sawi bawk si. Tu nge he hmeichhe hmelma chu nita ang?
“Amanda, mipakhatin a hmu duh che a”
“Lo luhtir rawh”
Chu ‘mipakhat’ chu tlangval satha leh sang lutuk lo, hmel chhe lem lo tak, ngaihnobeina riau nei hi a ni a. A mitkhur chu a tla deuh dak a, a heh ro hmel zet chu liak kualin, Thu rawh tih hun pawh nghak zoloin chair-ah chuan a thu hnawk a. Helhkam nei tih hriat zet hian a thaw hawk a!
“Puih theihna che ka nei em?” a lo ti var a. A ruk tak chuan, case chinfel loh a neih laia thil dangin an bawhbuai hi a duh viau lo. Awmpuii thih atanga ni 3 –na chiah a ni a. Thil danglam leh chhinchhiahthlak em em thleng a la awm lo a. Awmpuii thiante a be kual nual a, hriatbelh vak a neilo. Bialpa a nei tih chauh lo chu. Awmpuii ruang postmortem result-a alandan chuan, Awmpuii khan nau thla 2 mi vel a pai a, paih a tumna lamah amah pawhin a thihpui niin alang. A damdawi (?) ei khan ani taksa chak vaklo chu fan chhuakin, a thihpui nia nemngheh a ni a. Khatiang thu a hriat rual khan, case hi bansan a tum deuh a. A chhan chu tumah inrawlh ve an awm lo nia a hriat vang a ni. Tichuan, vawinnah hian Case dang (naupang rukbo chungchang) ennawn a tum leh mek laiin hepa hi a rawn lut ta a ni.
.

“Ka hming chu Rammuana a ni a, hmannia thi Awmpuii bialpa kha ka ni. Ka lo kal chhan chu Awmpuii kha nau tihtlak vanga thi nia sawi nimahse, kei chuan tihtirtu an awm ka ring nghet tlat a ni. A chhan chu a thih hma zanah khan ngaihthatthlak loh deuhin a awm a..ka..,”
“Ka lo pawtchat lawk che, Awmpuii naupaina pa hi I ni ngei ang tiraw?” A lo bu nghat a. “Chutichu han sawi zawm teh le , muangchang khan” nelawm zetin a ti a. Tuisik chu a bun chhuahsak nghal a.
“Khamizan khan a thei eitura ka leisak pe turin ka kal a, Lounge -ah kan thu dun a, a cool em em a, a mizia hi zawiawisa nitho mahse, ka bulah chuan a harhvang ve riau zel a! mahse, khamizan kha chuan a tawng tha duh bawk silo; ka hrilhhai hle nghe nghe. Ka haw dawn chuan gate thleng min thlah a. ‘Engpawh thleng se inenkawltha ang che’ tiin min mangtha a, khatiang thu kha a sawi ngailo reng reng. Ka ngaih a tha lo lutuk a, Kan hostel ka thlen veleh ka call nghal a, a ring quit thak a. Ka try leh char char a, a la thei silo. Ka lakah lungawilohna a nei han ti dawn ila, a chhan ka hre bawk silo, bakah tha takin min mangtha ve tho bawk si. Ka roommate bulah ka sawi a, biak kan tum ve chhin ange a tia, a call ta a.
A pick up thei chuang silo, ka mangang tawh si, ka roommate chuan min hrethiam a, a bike in an hostelah chuan min va tlanpui a. Gate an khar tawh vangin Security hnenah luh kan dil a. Security chu a room no ka hrilh a, ka kohtir ta ngawt a. Rei vaklo hnuah a lo chhuak ve mai a. A mit chu a sen rum a, a tap nasa hle niin ka hria..ka lo kuah nghal ngawt a! min namkiang vat a, huat hmel deuh hian min melh a, “ Kal bo rawh, min ngaihtuah suh” a ti tuarh a. mak ka tih zia chu I hriatthiam ka ring. Ka roommate Henry chu a melh a, “I thianpa hi hmeichhe tha deuh I lo zawn hmuhsak dawn nia” a ti a. Henry pawh a hawihai kher mai, ka zak bawk si.
Eng nge thil awmzia hi tia ka zawh chuan, “ kan pahnih tan a ni, ka tih ngei a ngai, ka tih loh chuan..engkim a chhe vek dawn” a ti ringawt a. Vawi tamtak ka zawt a, ka vau a,ka ankhum thul. Luhlul takin a ngawi ngul mai si. Mahse, a hnu deuhah chuan, “Muana, lemchan ka thiam ve tho em? Ka tihder vek che anih kha..engtiang chiahin nge kei leh I fa hi I ngaihtuah tih ka hre duh a..ka hmangaih che, min hmangaih tih ka hriat hian ka thlamuang, tun kum hi ral vat vat se ka ti” a ti leh hnuhnawh a, min pawm a, Henry awmlai reng chuan min fawp a! a tih ngailoh thil te avang chuan ka hamhaih vek tawp! A tukah test a neih dawn vangin luh min dil a, tlema ka ngaih athat tak deuh avangin ka hnial lo a, keini pawh kan haw ve nghal a. MAhse, ka ngaih hi a tha chiang thei miah lo. Zingah khan ka hlauhthawn ang ngeiin, a thih thu khan min rawn deng ta si..!!”
A mittui parawl kuang chu Amanda chuan hmuh hehawm a ti a, mipa paukhauh tak ten thinlung hliam nasa leh thuk tak an tawn hian rilru a deh dan a dang bik tlat a lawm!
“I titha e, thu tlem zawh che ka duh a. Awmpuii a rai tih hrereng chunga I la neih mail oh chhan chu in zirlai vang em ni?”
“Aih.! Kei chuan englaipawhin nupuia neih ka duh a lawm..mahse, a chhungte leh kan chhungte inhal tlat avang hian kan zirlai zawh phawta anih nih nitura Mizoram chhuahsana, bultan kan tum ve a..mahse..” a hrawk chu hnawhtu awm ang mai a ni.
“Ka bengverh zawng tak a ni, in chhungte ve ve chu engvanga inhal nge an nih ?”
“Thil zahthlak lutuk…Kohhran vang mai mai mawle.Lalawmi chhungte chuan an kohhrana ka luh an phut tlat a! ka pa hian a phallo bur bawk si! keipawn ka duh biklo, lalawmi pawhin kan kohhrana lawi chu a hreh miah lo a nia”
“Zialo hle mai. In chhungte tihloh midang lak atangin buaina in tawk tawh em?”
“Tawk lo, MZU-a kan luh tirh phat atanga inngaizawng nghal kan ni a, kan department leh an Department-ah chuan kan ni tih hrelo pawh an awm tawh lo. Hostelah pawh kan inlenpawh tawn reng thin”
“Engpawhnise, Lalawmi thununtu nia rinhlelh chu I nei chuanglo tihna mi? chuan engvangin nge a thih ni te khan min hrilh nghal mai loh?”
“Umm..ka nei silo hi ka buaina a ni. MAhse, ka vei ngut ngut sia; nangmah bak min pui theitur ka hrelo a ni. Ka hmangaihber Lalawmi khan rorelna dik chu a phu ve in ka hria. Ka hrilh vat loh chhan che chu , a thih ni khan damdawiina ka luh nghal vang a nia, a vui naah pawh ka kal theilo ..na tak a ni, mahse, tunah chuan ka hmagaihber thattu zawngchhuak turin ka inpeih tawh e” a mitmenga tumruhna lo langchhuak chu, Amanda duhzawng tak a ni. A lo bu nghat a. “Tha tharin kan tan leh dawn nia” a ti sap a.
Lalawmi room hailet turin a vawithum nan a inkhalhthla leh a, mahse, room chu a lo ruak tawh a, beidawng zetin a haw leh ta ngawt a. Muana kha tlawh a duh viau naa, Muana tan harsatna a siamsak palh ang tih a hlau deuh a. Sama chaw ei turin a sawm a. Eirawng an bawl dun a, an ngaihtuahna an kawm melh melh niin alang. An ngawih reng danah.
“Amanda, kei chu Muana kha ka khawngaih ee” naupangchhia zetin a rawn ti a.
“Keipawn..Lalawmi chhungte hian a chungah harsatna an siam sak ang tih ka hlauhpui viau ! Kohhran thuhmun loh vanga hmangaihber te pawh neih theihloh hi a na duh ngawt ang. An fate inhmangaih em em, pawhthen hi Kohhran inkaihhruaina ah chuan a lo awm kiau pawh animahna..Pathian erawh chuan rem a tih ka ring lo. Kohhran ni ve si..mahni kohhranpui nilo, an Christian pui ni tho si , neih han phal loh hi a…” a ner sak a. Chumizan chuan Amanda chu mawlhtu awm ang mai hian a khumah chuan a let tawn chhen a.
Zan lama a mut tlem vangin, a mit chu a sen deuh ram a. A ha a nawh laiin a phone a rawn ri a.A hmela pawitihna langchhuak avang chuan a dang bal a..Sama a call nghal a..
“Sam, ka hlauh ang ngeiin maw..Muana ruang an hmuh leh tawh chu!! Thuai vat, I kal ang” Sama rawn tawng hmain a hmet hlum leh daih. Hmanhmawh zetin a inthlak ta sawk sawk a.
Rammuana chu tui taka muhil ang mai a ni. Amanda chuan a lainat kher mai. A hmangaih Lalawmi nen khan intawng tak ang maw? A roommate Henry thusawi hi lo bihchiang ta ila..”Nizanah chuan chaw eikham atangin a vawiina test tur a zir nghal tluk tluk a. Keipawh movie enin ka tawm ve reng a, mahse, dar 9 velah khan kan thianpa Lda’n minlo call a, Zu an neih thu leh uisa sehhmeh tur a awm thu min rawn hrilh a, kan thianpa ti ila, heta hnathawk, Quarter-a awm inah an awm thu a sawi a. Keilah tlaia ka inkhelhna ka rawl bawk si, ka hnar phal lo a, Muana pawh ka sawm tho a, mahse, ani hi chu zu a in vak lo a, a lo hnar reng bawk a. Tichuan, kan thiante bulah chuan ka zuk chhuk a , hmeichhe pathum lai an lo awm ve bawk a, chumite phei chu MZU Student pawh an ni lem lo.
Kan inkawm a, zu kan in pah reng bawk nen..ka in khat deuh tawh a, ka zolo deuh aniang, ka chatthla daih a! ka harh chuan UHriata (In neitu) khumah kan lo mu a, Tluanga leh nula pakhat inkarah ka lo mu kuk a! class kal ngei ngei ka ngai sia, ka tho a, kan hostel ka pan nghal a. Kan room chu a lo inkalh lo a. Ka luh chuan, Muana chu a la muhilah ka ngai. Ka inphihfai hnuah pawh a la thawh loh vangin kaihthawh ka tum a. mahse, tihian thi in a lo awm tawh a ni..”
A hamhaih zia leh chi-ai zia chu mi mawl ber tan pawh haider luih sak chi pawh niin a lang lo. Muana ruang a hmuh veleh mangang zetin a au tuar tuar a, an thiante an rawn lutkhawm a, thawk tir leh tuma nasa taka an beih pawhin awmzia a nei ta lo a ni. Muana chu “Muhlum” tih mai tur anga alan laiin, a ruang chu an han en ngun lehzual a, a nghawng a, hrui thla, lang kulh leh duk ruih chuan “Thah” ani tih a rawn nemnghet chiang ta hle. A roommate Henry-a chu rinhlelhawm hmasa ber tur nimahse, a thusawi kha a dik bakah, hriatpuitu an awm nual bawk si.
.
“Henry hi UHriata quarter- a akal dawn khan a rawn lut kawi zuai a, min sawm ve nghe nghe a, mahse, ka lo hnar a. A chhuah hnuah Muana note hawh turin ka va kal a, a lo zir nasa khawp mai. A note chu hawh lovin, Henry khumah ka chhiar a, a awmdanah danglam engmah ka hmu lo. Lehkha a zir lai chuan tihbuai a ngaithei lo a, biak lumlam vak pawh ka tum chuang lo, a hnuah a movie ka laksak a, kan roomah ka phei a, ka chhuak tawh lo, ka movie enlai ka lo mutsan daih nghe nghe” Hruaia, an room dawt chiah ami thusawi ani. A roommate Zaia erawh an khaw lama a haw lai a ni thung.
Sama nen chuan ngawi rengin carah chuan an thu dun ngawt ngawt a. Muana chu an khua Darlawn lamah an hawn phei tawh a. Muana nu tah hla kha Amanda bengah chuan a rawn ri nawn leh a, “Bawiha, kan thiamloh vek a ni. I hmangaihber in a kalsan hnuah che pawh kan ngaihsak lo che a, min ngai thin awm sia tiraw? Bawiha, I nu hi min ngaidam rawh aw, ka fapa, I hmangaihber nen chuan hlim takin inhmu rawh u aw..Lalawm, Rammuana a lo kal e aw, lo duat ang che aww..” a tih lawm lawm khan a hmeichhe rilru no a kaichhuak a, tawng zai pawh arel thei lo.
“Muana thattu leh Awmpuii thattu hi mi thuhmun an nih I ring em?”
“Aw” a lo ti tawi tak a. Sama chuan a be zui ngam tawh lo.
A mumangah chuan Muana , khawhar hmel taka lo thu hi a hmu a, va pana va hnaih a tum lai chuan, abanah hian tuemaw hian a rawn hmer sawk a; a hawilet chuan ala hmuh ngailoh mipakhat hi a lo ni a..a kut chu thinthlak tumin a han vai a, a harh phah ta a. A mumang chuan awmzia neise a tiru kher mai. A tuk atang chuan Muana leh Awmpuii case chu a buaipui char char a, Hostelah zuk kalin, mi hrang hrag a kawm kual a, a beidawngru kher mai.
Ni 4 lai aliam leh tawh a. Ni 2 liamta khan Saiha lamah a han zin a, Lalawmi nu leh pate a han hmu a. Anu chuan tap teuh chungin an fanu chanchin a lo hrilh a. A pa erawh intipa takin a ngawi ngal a, mahse, a dam biklo tih chu a hriat theih. Lalawmi nut ate pahnih pawhin an farnu thihna chu an tawrh nat hmel kher mai.
“Diktak chuan ka pate hi lawm..Umuana kha keichuan fel ka tia, makpa atan pawh ka iai lo. Mahse, kan kohhran dan avangin inneih kha a rem tlat silo a, ka pa chuan neih luihtir kha angaingam ngang lo ani. Bakah ka u (an upaber) hian ka pa hi a fuihpawrh reng a, ka nu nen pawh achang chuan kan ngei thei lutuk” Lalawmi nau chiah tlangval ve tan chuan a ti niah niah a. Lalawmi u mipa leh apa an khirh zual bik vanga Muana nen innei theilo niin a lang. Lalawmi u mipa erawh a farnu thih atanga ni 3 liam hnu maiah , a zirna avangin phailamah a chhuk leh nghal a. Pathian thu zir ani nghe nghe a, mahse,Amanda rilruah erawh Pathian thu zir meuh si, chutiang khawpa afarnu neihchhun laka a khirh viau chu angainep ru viau! Lalawmi pa bulah chuan, “Ka pu, in fanu kha mahni intihlum anilo, thah ani tih a bialpa khan a ring nghet tlat a, chu a rinna avang chuan ama nunna ngei pawhin a tuar phah leh ta niin a lang, enmgpawhnise, infanu leh a bialpa hian rorelna dik chu an hmu ngei tur a ni” a ti sap a. Lalawmi pa chuan mittui kar atangin ngenngawl takin a fanu dikna chanvo zawngchhuak ngei turin a rawn ngen ni hian a hria..a rilru pawh a tipaukhauh lehzual a..
.

“Henry, heta ka hmuh che hi ka ring reng a! I roommate thihna chu I hlimpui zawk a ang hle mai” Lam ri hulh hulh thawm bengchheng zet chu kawngkhar chuan a khar hnan hmiah a. Toilet lamah Henry chu a kai phei a. A ruih hmel kher mai. MZU atangin a zui chhuak a, helai hmunah hian an inhruaithleng ta chu a nia..
“Min thlah rawh, I sawi awmzia ka hre lo e” sehchilh deuh hian a ti a.
“Wow!! I hrelo amaw? I roommate thih hnu atang hian I thawveng riaua hriatna ka nei tlat!”
“I daw pherh anih chu..”
“Muana kha thah duhna chhan tha tak chu I nei ngei awm si a”
“Zawngi, I va zaklo ve, hetiang chuan min puh suh aw, ka that lo, diktak chuan ka ngai lutuk a sin, thianpa kha ka theihnghilh ngailo” a zurui lung a rawn puam ani ngei ang, a men puai a!
“Henry, ngaithla rawh..nang hian I that lo tih ka ring e, anihna takah chuan maw..tualthattu hi ka hrechhuak tawh a lawm..chuvang chuan nangpawh fimkhur ang che, I thian,in hostel amite pawh fimkhur turin hrilh rawh” a darah a beng thek thek a, a kalsan ta a.
“Muana thattu an hrechhuak tawh asin..khanu khan a sawi, nizanah” a tuka tukthuan an kil laiin ring leng lawngin a ti a. Amah chu an rawn en thup a.
“Tu nge?” chu zawhna chu a la chhang theilo.
“Amanda khan kan hostel hi fimkhur turin min chah a, nangni pawh infimkhur theuh dawn nia” thawm chu a reh nghal duk mai.
Class kal tura a insiam laiin, a phone arawn ri a.
“Hello,”
“Henry, keimah, Amanda, I thiante chu I hrilh tawh em?”
“Aw, ka hrilh zo chiah, tu nge anih min hrilh tawh rawh”
“Tunah chuan nilo e, ka sawi ang apiang hian awm ang che, I hrethiam em? I thianpa khan rorelna dik hmuse I duh takzet anih chuan..ka thusawi hi I zawm angai, nang hian min pui dawn a ni”
Reife an inbiak zawh hnuah phone chu a dah a. Khumah a thu hnawk a..a chauh hmel kher mai. A roommate mu t thinna khum ruak hiau chu a va melh a, mipa huaisen tak anga a hmachhawn angai a ni..a thianpa tan.
Tlai dar 5 vel a ni a. Henry te thianzaho chu Hriata inah bawk chuan, Ui talhin, eirawng an bawl mek a. Hmeichhe pa 4 an awm ve bawk a, Henry tih loh chu an hlim hmel kher mai. Henrya’n chaw eikhawm a rawt thut chu mak tihna chang pawh an hre lo a. Ama pawisaa ui a han lei ringawt te erawh achhan an zawt a. “Muana thih hnuah kan ngui bur hlawm a, mahse, Muana thattu an hrechhuak tawh a, chuvangin ka thianpa in rorelna dik a hmu tur hi ka lawm a, a tana ka tihsak theih tawk ka ti ve anih hi” a ti mai a. Tuman mak an ti zui lem lo. Chaw eihma chuan zu an in ho a.
“Bawiha, Amanda chuan tu nge tih a sawi miah lo amaw? Ka awihlo deuh ee” Bma chuan a ti a.
“Sawi miah lo, mahse, campus ah a awm a ti”
An mengphawk hru a! hmeichhe ho phei chuan hlauhthawn hmel deuhin an melh hlawm a.
“Chuvang ania fimkhur atha ka tih reng ni..Muana thiante kan nia, tualthattu hian minla bitum ve lovang tih pawh a sawi theih loh” a ti puat puat a. Chaw eikhamah chuan hmeichhe ho chu an va thlah a. Bma leh Mama te nen Hriata inah chuan an lutkhawm leh a.
“Amanda sawi dan chuan finfiahna tha tak a la neih loh vangin ala man theilo niin a sawi a, mahse, naktukah hian lo kal a tum a; Muana bungrua a enfelna lama a hmuhchhuah pakhat hmangin tualthattu nia a rinhlelh chu a rawn bitum dawn aniawm e..engmah chiangkuangin a sawi silo a”
“Muana bungrua atang chuan eng nge a hmuhchhuah a?”
“Dairy bu atanga pawhthlak , lehkha them ania, a pawimawh viau anih hmel”
.
“Va mak awm veleh” an ti sap sap hlawm a. Reivaklo hnuah an hostel lamah an chho ta dial a.
Dar 10 a ri tep tawh a, Henry room kawngka chu an rawn kik dawt dawt a. A la muhil miah lo bawk a, rang zetin a tho a, a va hawng a. Amanda lo ding reng a hmuh chuan, a kailut vat a. Thil awmdan chu a sawi nghal mawlh mawlh a. Amanda chu a lo bu nghauh nghauh a. Rei vaklo an nghah hnuah room chu chhuahsanin hostel thlang lam chu an pan ta nghal a.
Lehkhabu chu a keu a keu a, mangang zetin a dap rawk rawk a. Uluk zetin a bih a. A nui sak a. Chu lehkhabu teatakte chu lekkangin, a lighter chuan a hliau a…mahse…
“Lehkhabu kha dah thla rawh..che tawh lo bawk la” chu aw chu a fiak thak a, kawngka lam atanga lo chhuak a ni. A lehhawi vat a, mi pahnih lo ding reng te chu a melh tawn ta chhen a..
“U Hriat, nang ber kherin ka thianpa kha I thah ka ring lo a sin..mahse, tualthattu I lo ni si a!” Henry aw chu zawi hle mahse, a fiah kher mai.
“Le..ka sawi ngailo in I sawi mai dawn em ni ang? “ hahdam hmel zetin Amanda chuan a ti a.
“Muana Diary ka kawl vang ngawt khan ka that tihna anilo” Hriata aw chu a khur deuh a.
“Mahse, Muana Diary niloin Lalawmi diary a ni tlat! I kawl chhan kha I sawifiah angailo maw?”
A ngawih reng avang chuan nin hmel zetin, “ Awle, k’n sawi hmasa ange..Muana ka hnena a rawn kalni khan..ka rilru a buai a, Lalawmi kha a chhungte chuan an thah ka ring thei silo, Muana leh Lalawmi inkarah khan tuemaw an awm ngei ka ring a; mahse, muana khan an awmloh thu a sawi bawk si. Lalawmi room ka zuk en leh ni khan hmuh ka nei lo a, mahse, a room dawt chiah ami khan Diary a ziah thin thu a sawi zauh a. Ka bengverh zawng tak a ni. Mahse, hmuh tur a awm silo. A chhungte ka han zawt a, an kawl loh thuin minlo chhang a, Muana ka be leh a, Lalawmi a thi tih a hriat ruala a rooma a zuk luh khan, a dairy chu arukin a lo la a, a chhan pawh an inkar thu vel hlir anih dawn vangin, a mualphothlak dawna a hriat vang a ni. Chu chu min hrilh ngam lo a lo nia! Diary chu ala chhiar ngam loh thu a sawi bawk, lo chhiar hman se chuan, a nunna khan a tuar hman lo tur..
Khamizan khan ka thiannu thichhawnga damdawiina a leh reng vangin kalsawn chi ziazang ka nilo a. Diary pawh atuka lam ka tum nghe nghe. Mahse, Muana khan abialnu thattu zawngchhuak tura min rawn hmuh thu kha a lo sawi chhuak kher a! I beng hial a lo thleng ta anih kha..khamizan la la khan chetthawh I rilruk nghal a. A roommate chu a thiante hmanga ko chhuakin, a rukin Muana roomah I lut a, I that a, chumai duhtawk lovin, a lukham bula Lalawmi diary let reng chu I tan a pawi thei tih hriain I ru chhuak ta nghal a…”
Hriata chu tlangval upa lam, tarmit vuah, en mai chuan zaidam hmel leh rilru tha tak hmel a pu a..Amanda thusawi chuan a tizam hle tih a lang.
“Tunah chuan, chiang takin, Lalawmi I thah dan kha sawi tawh rawh le..”
.

A hawi kual ruai a, a mit a khap sek bawk..kawng dang neita lo niin a inhria ani ngei ang..a aw a thian kharh kharh a..
“Ni e, a dik a lawm..lalawmi kha anaupanlai atanga ka hriat tawh ani a, a u nen khan kan inkawm thin vangin. Ka ngaizawng thei em em a. Ani chuan u angin min en thung. MZU –a ka thawh hnu thleng pawn ka ngaizawng a, a lo lut ve tih ka hriat te khan ka lawm em em a ni. Mahse, Muana nen an inkawp ta daih a! reitak ka lo ngaihzawn ruk tawh anih vangin ka tuarna kher mai. Engmah a hriat ve loh vangin, u te in tiin ka inah te khan an inhmudun fo a! ka thinrim pawisak nei tawh lo chuan, a u hnenah engkim ka hrilh a, a u hi kohhran atchilh bur leh khirh tak anih vangin, an inneih kha rem a tih ka ring lo a, ka ring dik chiah bawk.
Mahse, Lalawmi kha arai ta a! a rilru hah chu ka bulah a rawn inbunruak thin. Muana khan neih nghal mai a duh a,mahse, keiman an chhungkaw hnih boruak chhuanlamin an zir zawh hun nghak phawt turin ka ti a, ka tum dan chuan, Lalawmi chu a u in rawn la chhuak se, ka umzui nghal ang tiin. A u bulah a rai thu ka hrilh chuan, a thinrim hle a, sawisak hrep a duh thu te pawh a sawi a. ka tumdan thlakin, anau ka hmangaih zia leh midang fa pawm chung pawn ka duh tho thu ka hrilh a, rawn hruai haw lova ka kuta dah tur leh a zir zawh veleh innei nghal turin thu kan titlu dun ta a. Lalawmi nu leh pate phei chuan engmah an hre ve hauh lo! Tichuan, remchang hmasa berah lalawmi chu ka rilru zanwg zawng ka hrilh ta vek a. Mahse, min huat phah thung..
Ka beidawngin ka rilru ana em em a, lalawmi u ka bia a, A fa pai chu titla tura hrilh turin ka hrilh a. Tichuan, lalawmi chu a bia a, a fa pai chu a tihtlak loh chuan amah rawn kala a rawn sawisak tur thu a sawi a, khatak kha remchanga lo hman leh tumin, lalawmi ka bia a, a naupai chu a tihtlak phawt chuan, Muana nen an inneih theih nana theihtawp ka chhuah tur thu ka hrilh a. A lo awih teuh lo. Ka thinrim lutuk khawhmu tawh lo chuan, “I titla lo anih chuan, I bialpa Muana hi ka that anga, duh leh ka tang mai ang, pawi ka tilo..” ka ti a. Ani hmeichhe awmnem tak chu a buai ta em em a. Ka rilru diktak hre phei se chuan a a thei hial ang.
Ka rilru diktak chu “Ani hi ka neilo anih chuan tuman an nei bik lovang” tih a ni tawp. Muana hriat lohin nau tihtlak a duh thu chu a sawi ta a. Damdawi ka leisak a, ka pe ta a ni. Nau tihtlak vanga thi anga an ngaih vek theih nan..
Muana kha chu I sawi ang kha ani mai..”
Henry leh Sama chuan Hriata chu khawih hrep chak hmel an pu a. Amanda erawh ral hla tak a thlir a..a ngaihtuah na chu khawvel piahlam daihah a cheng ani ngei ang. Hriata chu a phutawk hremna pek a ni a. Lalawmi u in thudik a han hriat chuan, inchhirna mittui nen a farnu thlarau hnenah ngaihdam a dil a..mahse..Lalawmi leh Muana te chuan an hre phak tawh reng angem? Chimbuaitu awm tawh lovin..an hlim dun tawh angem le…
“Sam, Hmangaih ka nei ve anih ngai chuan, tumah hian ka ta liau liau anih theihna tur an dal ka remti ngai lovang” a aw chang rat chuan a tumruh zia a tarlang chiang hle..Sama’n maktih hmel deuha a melh chuan, a nuih sak a..” Hmamgaih chu ka la nei ve dawn alawm..” a ti leh sap a..motor a tinung a, khawilamah nge akal dawn tih sawi hauh lovin a inkhalhchhuak a…