THE ADVENTURES OF SHERLOCK HOLMES (Completed)

Hnuchhuina lampang chi ho
Rozami pachuau
Posts: 305
Joined: March 17th, 2018, 7:40 pm

THE ADVENTURES OF SHERLOCK HOLMES (Completed)

Unread post by Rozami pachuau » April 2nd, 2018, 8:57 pm

SHERLOCK HOLMES - A SCANDAL IN BOHEMIA
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

kha nu kha zawng, Sherlock Holmes-a tan chuan kha hmeichhia kha tih mai tur a ni chatuan tawh ang. Kha hmeichhia kha tih bak chuan he hmeichhia hi a la sawi ri ngai lova, mahse a fiah tawk em em tho. Holmes-a mitah chuan hmeichhia zawng zawng tuam mawitu leh an chunga roreltu, hmeichhia azawnga hmeichhe chungchuang a ni a. Nimahsela chutia ka tih avang chuan Irene Adler chu SherlockHolmes chuan a ngaizawng a ni ka tihna a ni reng reng lo. Hmangaihna mitin Holmes-an Irene Adler chu a en lo reng reng. Ngaihtuahna min rukbosak thei chi-aw nem mawi leh sam sei, mittui leh lungchhiatna, thinrim avanga khaw hmuhlohna ang chi hi chuan Holmes chu a bawhbuai ve ngai lova; mahse pa alaia pa thil hrethiam zau ber mai a ni tlat a ni.

Lawmna te, phurna te, lungchhiatna te hian Holmes hi a bawhbuai ngai lova, hmangaihna phei hi chuan a mitmeng pawh a la bawhbuai ngai eih lo. Keima ngaihdan mai mai chuan Sherlock Holmes chu pa thluak ţha elhkhen, khawlthluak nei duhawm tak, mahse hmangaihna tuipuiah chuan cheng ve thiam miah lo a ni. Hmangaihna chungthu a han sawi ve chang pawh hian nuihsawh titih leh deusawh hmelpu chung hian a sawi ziah a. A hnaah chuan hei hi a pawimawh em em reng a ni. Mihring rilru a hriatthiam zung zung theih phah a. Hmangaihna leh mittui hi zawng lo pawm duhâm deuh se chuan a enlenna darthlalang keh aiin a tan chuan a buaithlak ngei ang. Mahse Holmes-a rilruah hian hmeichhe thi thei ngai lo pakhat chiah a awm tlat a, chu chu Irene Adler, tuna thlân khawhar nghak ta hi a ni.

Tunlai tak hi chuan Holmes chu ka hmu khât khawp mai. Nupui ka neih achinah hi chuan kan inkawm ta meuh lova. Mahni In luma awm a, nupuite ţâng bela hlim taka ka khawsak lai chuan Holmes chu Baker Street a ama pindanah lehkhabu hlui pui pui chhiarin a tawm reng a. Bohemian mi a nih vang nge ka hre lo, ţhian inpawlhona lam chi reng reng hi chu a mausam vek ringawt mai hian ka hria a. Damdawi chi khatin chawlhkar khat a inchiu rui a, a kar lehpekah chi dangin, chuti reng reng chuan a khawsa a. Sualna bul râwt tur a awm phawt chuan thatho takin a tawmkuk aţang chuan a lo zuang chhuak ti ila, a thluak chawl hahdam veng veng mai chu phur em emin a lo nung leh ţhin a ni zawk e.

Police lamin tihngaihna an hriat tawh loh hnute hi a tuipui em em a, rang tak takin a chingfel zung zung ţhin a. Chanchinbu lam aţangin a chetdan ţhenkhat chu ka hre ve riai ruai ţhin : Trepoff tualthahna chungchanga Odessa an koh thute; Trincomalee a Atkinson-a te unau an thahdan mak tak mai chinfel thute; Holland ram awptute chhungkaw thubuai a chinfelsak tak thliam thute ka lo hre ve zeuh zeuh a. A bak chu ka hre tam lo kher mai.

Zan khat chu kum 1888 March thla khan damlo kana ka chhuak vak chu Baker Street lamah ka haw a. Holmes-a nena kan chenna hmun hlui chu ka va thleng a, kan pindan luah ţhin luhna kawngkharte chu ka’n hmu a, Study in Scarlet tih ang reng vel kan buaipui laia a-chhun azana ka lo tek luh vena anih avangin ka lung a leng thar thut a, Holmes chu hmuh ka châk ta em em mai a. Tukverh lam chu ka’n hawi chhova, Holmes chu pindanah chuan vawihnih lai a vei ka’n hmu a. A lu a kun tlat a, a kut chu a hnungah a suih bawk a, eng thil emaw a ngaihtuah a ni tih ka hre mai. Kum tam kan lo inzui tawh avangin a chetdan chu ka hrechiang em em a, damdawi chiah ruihna aţangin a lo harh chhuak leh ta tih chu tu khaw hrilh ka ngai lo. Kawngkhar dar chu ka’n hmet ri a, tunhmaa ka pindan lo ni ve tawh ţhinah chuan min hruai lut leh ta a.

Holmes a awmna pindan, kan pindan inţawm hluia ka va luh chuan Holmes chuan min lo melh zawk chauh a. Holmes-a hian englai mahin phur thar riauna hi hetiang kawngah hian a neih âwm pawh ka hre lo. Mahse tun ţuma ka va lut hi chu min lo lawm riauvin ka hre mai. Tawng lovin ţhu turin zaizirin min han hrilh a, a mitmeng chu a lawm mitmeng riauva. A meizial bawm chu a rawn theh phei a, a ţanna tur mi kawhhmuh nghal bawk a. Amah chu thuk kawngkaah chuan a’n ding a, mitmeng danglam deuh tak hian mi’n melh a, “Inneihna zungbun kual chhungah chuan i tawm nghet hle mai maw Watson, a inhmeh pawh i inhmeh khawp mai. Ka hmuh hnuhnun ber ţum che ai kha chuan pound sarih (Kg thum vel) laiin i rit tawh zawk ang a,” a han ti a. Kei chuan, “Pound ruk zawk maw le!” ka lo ti a.

Holmes chuan, “Ka tisual tam vak love, Watson. Kha i damdawi hna lam pawh i thawk leh tawh a ni maw? Damdawi hna lam khawih leh i tum thu min hrilh miah lova,” a han ti a. Kei chuan, “Chuti si engtinnge i hriat theih?” ka ti a. Ani chuan, “Ka hmu a, ka chhût chhuak mai maw le. Engtinnge hmanni lawk khan ruah i do vak tih ka hriat? I chhiahhlawh nu chu nula chhaw tak a ni tih engtinnge ka hriat?” a ti leh ta zel a. Kei chuan, “My dear Holmes, hei zawng a ni em em lo. Tunhma deuha lo piang chu ni la ramhuai zawlah an puh ang che a; an hal hlum ngei ang che. Ningani a ka leng chhuak kha ruahpuiin min nan a, mahse ka inthlak leh vek tawh si a, engtinnge i hriat theih chu le? Mary Jane zawng, a zirtir theih loh a ni. Ka nupui chuan fimkhur turin a hrilh tawh a.... mahse engtinnge i hriat theih mai?” ka ti ta zawk a.

Holmes chu a chek tlak tlak a, “Amah leh amah a inhrilhfiah sa nghal der alawm. I pheikhawk veilam chhunglam, mei êngin a chhun phakah khan a thlur zawnga inrin, hmun ruk vel laiah a awm a. Chuti a nih chuan tu’n emaw a kara chirhdiak awm kher chhuah tumin fimkhur lo takin a thai vel tihna a ni a. Chumi chuan thil pahnih min hrilh nghal der a ni. Khawchhe hnuaiah i kal nek tih a lang a, i pheikhawk thiantu chu London khawpui chhunga mi fimkhur lo ber berte zinga chhiar tel tlak a ni tihna a ni leh bawk. I hnathawh chungchang kha zawng thil hote mai maw le. Natna hrik thahna hlo rim i nam a, i kutzungchal dinglamah khan damdawi chi khat a kai bawk a, mihring taksa ngaihthlakna i dahna ţhin, i lukhum chhip dinglam kha a puar ţalh bawk a, chumi hmu reng chung si a damdawi hna lam i tharthawh leh ta tih ka hriat theih loh ngat chuan pa nikhua lo tak ka ni ngei ang,” a ti ta a.

Chutia a han sawifiah takah chuan ho hi ka ti lutuk a, ka nuih a za tlat mai. “Thil awm thei lo niawm hiala thil mak hi i han sawifiah hian a ho ta ţhin em mai a, keimah pawhina lo hmuh ve mai awm hi niin ka hre ţhin. Mahse i sawifiah hma hi chuan engmah hi ka hre chhuak ve ngai si lova. Eng pawh ni se, i mit hi chu ka mit tluka fiah a ni ve chauh bawkin ka hria,” ka ti ta ngawt a. Ani chuan mei ţan pahin, “A dik ngawt mai, mahse i hmuh hi i hre lo a ni. Chu chu a pawimawh hle a ni. Pindan zau aţanga he pindan chhohna kailawnah hian vawi engzatnge i lawn tawh?” mi han ti a. Kei chuan, “Ka lawn zing lutuk tlat,” ka ti a. Ani chuan, “Vawi eng zat vel nge i lawn tawh ang?” a ti ta zel a. Kei chuan, “Vawi za tam a ni tawh ang chu,” ka ti mai a. Ani chuan, “Chuti a nih chuan kailawn rahbi engzatnge awm?” a ti ta a.

Kei chuan, “Engzatnge awm a? Ka hre hlei nem,” ka ti a. Holmes chuan, “A ni reng ang! I hmuh kha hriat i tum lo reng reng a ni,” a ti ta a. Rei fe a ngawih hnu chuan, “Ni e, chu chiah chu a ni sawi ka tum. Kei chuan ka thil hmuh hi ka hriat ţhin avangin kailawn rahbi hi sawmpahnih a ni tih ka hria a ni. Kan thudanga lai chuan hetiang thil tê tham mai mai pawh hi i tuipui theih zel avang leh ka thiltih chhuanawm loh te te hi a ziahte hial pawh i ziah chhawn peih ţhin avangin he thil pawh hi i tuipui thei mai thei a ni,” tih pahin lehkha pakhat, chhah ang reng tak, dawhkan chunga lo inkeu sa reng chu a rawn theh phei a. “Dak lo thleng hnuhnung bera lo kal a ni a. Han chhiar ri teh le,” a ti ta a. Chu lehkhaah chuan tu hming mah a inziak lova, a ni zat pawh a inziak hek lo.

“Zanin dar sarih leh minit sawmli pangaah an rawn hmu dawn che. A hmu duhtu che chuan thil pawimawh takah a hmu duh che a ni. Europe ram lal chhungkaw thubuai, hmanni lawka i chinfel takte han thlir khan thil pawimawh lutuk mai, a aia pawimawh leh chuang awm thei tawh lo turah pawh rinngam i ni ang tih a lang a ni. He thil hi hmuntin kiltin kan dap hnuah kan hrechiang hle a ni. A hunah chuan i pindanah lo awm la, i inleng chuan hmaikawr a rawn vuah a nih pawhin lo ngaithiam lo duh suh ang che.”

Kei chuan, “Hei hi chu thil mak angreng tak, hriatthiam mai phak loh a nih hi maw le. Engnge a awmzia ni awma i rin?” ka’n ti a. Ani chuan, “Han chhuizui theihna tur hmanrua ka la nei tlat lo mai. Chhuizui theihna tur awm lova ngaihdan lo siam ngawt hi chetsualna bul a ni. Pa fingvar lo chuan an ngaihdan rem turin thil awmdan an kaiher a, thil awmdan rem turin ngaihdan an siam ngai lo. Mahse kha lehkha aţang khan engnge hriat theih i neih?” a han ti a. Kei chuan chu lehkha chu ngun deuh maiin ka’n en a. Holmes-a chetdan niawm tak hian, “He lehkha ziaktu hi chu pa neinung thawkhat tak a ni ngei ang, hetiang lehkhapuan hi chu a to riau a ni, a chhah ţhain a khauh ţha bik tlat,” ka ti a.

Holmes chuan, “Ni e, ‘bik’ tih tak mai khan a hrilhfiah a ni. English lehkhapuan a nih loh kha, êng thlârah khan han lek chhuak teh,” a ti ta a. Chutia ka‘n lek chhuah chuan hawrawp lianpuia “E” ziah leh “g” te tak te, “P” pui leh “G” lianpui leh “t” te tak te hi lehkhaah chuan ziahruk hian a lo inziak a. Holmes chuan, “Khata ţang khan engnge i hriat theih?” a han ti a. Kei chuan, “A siamtute chhinchhiahna emaw, an hming tihna a ni mai ’lawm,” ka lo ti a. Holmes chuan, “A teuh lo mai. ‘G’ pui leh ‘t’ tê kha chu ‘Gesellschaft,’ tihna a ni a. German ţawng a, ‘Company’ tihna a ni. Keini’n a, ‘Company’ tih aia, ‘Co.’ kan tih ang hian. ‘P’ kha chu ‘Papier’ tihna a nih kha. Khawi nge, ‘Eg’ ve thung kha. Kan lehkhabu, Continental Gazetteer’ hi i han bih teh ang,” a ti ta a.

Lehkhabu chhuar aţang chuan lehkhabu kawm buang lianpui mai hi a rawn la thla a, “Eglow, Eglonitz–hei le, Egria. Bohemia a German ţawng hmang mihring awmna hmun, Carlsbad aţanga hla lote a awm a nih hi. ‘Wellenstein-a thihna hmun a nih avang leh darthlalang leh lehkhapuan siamna hmun hmingthang tak a nih avangin a lar hle’ an ti nghe nghe. Engnge i hriat chhuah theih le?” a han ti a. A meizuk chu a pak khu luih luih a. Kei chuan, “He lehkhapuan hi Bohemia rama siam a ni,” ka ti a. Holmes chuan, “A dik chiah. Kha lehkha ziaktu kha chu German mi a ni. A thu chheh pakhat, ‘He thil hi hmuntin kiltin kan dap hnuah kan hre chiang a ni,’ a tih kha i lo hmu em? Kha lehkha kha French mi emaw, Russian mi emaw ziah a ni thei lo. German mi lo chu khati takin an ţawng tlahawlh lovang. Kan hriat duh chu— he German mi hian engnge a duh? tih hi a ni ta. Ka tisual a nih loh chuan chu amah pawh a lo kal e,” a han ti a.

Chutia a sawi lai tak chuan sakawr tawlailir tlan thawm a lo ri a, chutah kawngkhar hmehrik chu an rawn hmet ri ta nghal a. Holmes chuan, “Sakawr pahnih a hmang a va nih awm ve,” tih pahin tukverh aţang chuan a’n bih a. “A nih chiah khu. A sakawr lah chu a ţha em em mai lehnghal; khutiang sakawr ţha khu chu cheng tam man a ni ngei ang. Watson, he thil hian thil dang keng tel lo mahse pawisa zawng a keng tel ngei dawn e,” a han ti a. Kei chuan, “Holmes, kei chu kal mai ila a ţha ang a,” ka ti a. Ani chuan, “Doctor, a teuh lo mai, i ţhuthmunah khan ţhu tlat rawh. I tel lo chuan ka famkim tlat ţhin lo. Chubakah he thil hi a ngaihnawm dawn nasa ania. I hriat ve loh chuan a ţha nang,” a ti ta tlat a.

Kei chuan, “Mahse i inleng tur hian... ” ka ti hman chauhva. Holmes chuan, “Ani zawng lo ngaihtuah buai ve duh suh. I puihna ka mamawh mai thei a, ani pawhin a mamawh mai thei bawk a, hei a lo thleng tawh alawm. Kha ţhutthlengah khan ţhu la, thil awmdan hi lo hre ve vek teh ang che,” mi ti ta tlat a. Kailawnah chuan muangchang taka pen ri hi a lo chho chhat chhat a, chutah kawngkhar chu a rawn kik a. A kawngkhar kik ri chuan beng a verh bik zak mai. Holmes chuan, “Lo lut rawh,” a lo ti a.

Pa pakhat, fit ruk leh inches ruk tling ngei tur hmel pu, awm pharh ţha deuh mai, fuke sek ţha em em, Greek mi chak hmingthang, Hercules-a ni mai awm hi a lo lut ta a. A incheina chu a hautak hle a, mahse chutiang incheina chu England ram angah te hi chuan a hnamchawm mah mahin a lang thei a. A kawrbanah leh a kawrhma lamah chuan kelhmul cheimawi ang chi hi a ţhuibet a. Puan lianpui mai a bât hnuang a, a puan bah pawh chu a kokia a thehhlimna zâwnah chuan pin mawi chi hian a kilh bet leh chiah bawk a. A pheikhawk rawng lah chu a sang em em mai a, a malte thleng thuak hi a ni mai a, a tlangah chuan sahmul a invuah lehnghal a. A pheikhawk leh a incheina han en mai chuan pa tawrawt pui mai hmel hi a pu hliah hliah a. Lukhum parh hlai tak mai hi a kut lehlam chuan a keng a, a hmai khuhna, a khabe pawh khuh phak lo chu a siamţha hlim hlawl a ni tih hriat theih tak mai hian a lo luh pah chuan a kut dinglam chu a la lek chho reng a. A hmuihmai hnuailam chin han en chuan pa ti mai mai lo tak a ni ang tih a rin theih a ni.

German awphawi tih hriat tak mai hian, “Ka lehkha kha i lo hmu maw? Ka lo kal ang ka tih kha,” tih pahin a tu zawk chu nge Holmes tih hre lo niawm tak hian min han thlek tawn vel a. Holmes chuan, “Khawngaih takin ţhu rawh. Hei hi ka ţhian, ka thawhpui, Dr Watson a nih hi, a hman chang chuan min pui ţhin a, ka ţangkaipui em em a ni. Tunge ka biak hi aw?” a’n ti a. Chu pa chuan, “Count Von Kramm, Bohemian mi challang zing ami ka ni. Hei i ţhian hi pa rintlak tawk leh zahawm tawk, thil pawimawh tawpkhawkah pawh rin ngam tur mi a ni ang tih ka ring. Chuti a nih loh chuan a fala biak che ka thlang zawk ang a,” a han ti a. Chutah chuan thawh tumin ka han inbengkang a. Holmes chuan ka banrekah chuan min man a, min nem ţhu leh a, “Kan pahnihin nge min hrilh ang a, tu mah mah hi min hrilh lo zawk ang tih thu-hla a ni tawp mai. Ka hnena i sawi duh ang ang chu he pa hnenah hian i sawi thiang a ni,” a ti ta a.

Count chuan a dar hlaipui mai chu a thing nuk a, “Chuti a nih chuan ka’n sawi ţan nghal mai ang e. Kum hnih chhung chu engmah in sawi chhuak tur a ni lo. Kum hnih hnuah erawh chuan he thurûk zêp hian awmzia a nei tawh chuang vak lovang. Tunah rih chuan Europe ram chanchin tidanglam tham hial khawpa thu pawimawh a la ni rih tlat,” a han ti a. Holmes chuan, “Ka zêp tlat ang,” a lo ti a. Kei chuan, “Kei pawh,” ka lo ti ve a. Kan inleng pa chuan, “Ka hmaikhuhna hi chu ngai pawimawh duh lo mai rawh u. Min ruaitu, mi pawimawh tak mai chuan a mi chhawr hi in hnena puanzar a duh lo tlat a ni. Ka nihna niawm anga ka han sawi tak kha keima nihna tak a ni lo tih ka hrilh duh bawk che u a ni,” a han ti a. Holmes chuan, “Ka lo ring deuh reng a ni,” a han ti a.

Chu pa chuan, “Europe ram awptute chhungkaw thuruk hi puakchhuakin thil mawihnai lo tak a puakchhuak ang tih hi a hlauhawm em mai a, fimkhur ang tluk a awm thei lo reng reng a ni. A dik a dik chuan Bohemia ram lal chenna, House of Ormstein thlengin he thil hian zung a kaih a ni,” a ti ta a. Holmes chuan, “Chu pawh chu ka lo ring sa deuh reng a ni,” a ti leh ta zel a. A maimitchhing diar diar a. Kan inlengpa chuan Holmes chu a han melh vang vang a, Holmes chuan a mit chu muangchangin a rawn meng ţiah ţiah a, “Lalber hian a chungchang thu chu sawi tawh mai sela a ţha zawk ang,” a rawn ti chhuak ta a.

Kan inleng pa chu a ţhutna aţang chuan a tho zawk a, pindan chhuatah chuan vawihnih vawithum lai a’n vei a. Chutah a hmaikhuhna chu a han paihthla a, “I ti dik a ni. Lalber chu ka ni alawm. Eng aiah nge ka han inthup harsat duh kher ang ni?” a ti ta a. Holmes chuan zawi sap hian, “Chuti maw ni a? Lalber hian Wilhelm Gottsreich Sigismond von Ormstein, Grand Duke of Cassel-Felstein, Bohemia ram lalber hnenah thu ka sawi tih ka inhriat hma chuan chutiang chuan a ngaih loh kha,” a la ti ta cheu a. Kan inlengpa chuan, “A harsat dan chu in hriatthiam ve mai ka ring. Hetiang hi keima mimalin han buaipui hi ka duh lova, mahse midang ka rawih si chuan ka mi rawih thuhnuaiah ka awm dawn tihna a ni lo thei lova. Chuvangin Prague aţangin nihna inthup tlatin nangmah râwn tur che hian ka lo kal ngar ngar a ni,” a ti ta a.

Holmes chuan, “Han sawi zawm zel teh le,” a ti leh ta a, a maimitchhing leh nghal hmiah a. Kan inleng pa chuan, “Thil awmdan chu hetiang hi a ni : Kum nga vel kaltaah khan Warsaw-ah rei tawk tak chhung ka va zin a. Chutah chuan hmeichhe pakhat, Irene Adler an tih chu ka va tawng a. A lar hle mai lehnghal a, a hming phei chu in hriat fo tawh ka ring,” a ti a. Meng chuang lo chuan Holmes chuan, “Doctor, ka thil chhinchhiahna lehkhabu kha han keu teh,” a ti a. Holmes hian kum tam tak chhung thil chi hrang hrang, mihring leh thil thleng mak bik chanchin hi a lo khawnkhawm tawh a. Chuvangin thil engemaw chungchangah hi chuan engemaw hi hriat a lo nei ve deuh ziah a. Tun ţumah pawh hian ka thil duh chu Hebrai zirtirtu leh lawng sipai lal tak pakhatin tuipuia sangha chanchin an ziah inkarah chuan Irene Adler-i chanchin chu ka zuk hai chhuak ta mai a.

Holmes chuan, “Khawinge, mi han entir teh le! Hm, New Jersey-ah kum 1858 khan a piang. Aw puam mawi tak, hm! La Scala zaipawl zingah pawh a tel tawh, hm! Imperial Opera Warsaw zaipawl zingah pawh mipuite lawm ber ţhin. Hm! Zai lam a chawlhsan tawh—a ni dawn tak e! London khawpuiah a cheng mek—a ni âwm teh bawk e! Ka hrethiam e, ka pu he nu nen hian in lo inkawp tawh ţhin a, eng lehkha kha emaw te pawh i lo thawn ve tawh ţhin a, chung i lehkhathawnte chu lakkir leh i duh ta a ni maw?” a han ti a. Lalber chuan, “Dik chiah. Mahse engtin—” a ti hman chauh a Holmes chuan, “A rukin in innei em ni?” a han ti leh a. Lalber chuan, “A teuh lo,” a lo ti a. Holmes chuan, “Dan anga inphuar theihna lam chi reng reng engmah a awm lo maw?” a han ti a. Lalber chuan, “Engmah a awm lo,” a ti tlat a.

Holmes chuan, “Chuti a nih chuan ka pu i thusawi ka hrethiam ta hauh lo mai. He nu hian nangmah tihhmingchhiat theihna tur che lehkha a nei a nih pawhin lehkha rintlak tawk a nih theihna tur âwm reng reng a awm chuang hlei nem,” a ti ta a. Kan inleng chuan, “Ka kutziak a awm alawm,” a han ti a. Holmes chuan, “Ho mai mai, kutziakte chu a tak ang chiahin a siamchawp theih,” a lo ti a. Ani chuan, “Keima lehkhathawn ziakna bik lehkhapuana ziah ngat lehnghal,” a ti a. Holmes chuan, “Chu pawh a ruk chhuah theih,” a lo ti lehzel a. Kan inlengpa chuan, “Ka hming nemna ‘seal’ a chhut ngei,” a han ti leh a. Holmes chuan, “Chu pawh a chher chawp theih tho,” a ti ve zel a. Ani chuan, “Ka thlalak a nei bawk,” a han ti a. Holmes chuan, “Chu lah chu a lei theih alawm,” a ti a.

Kan inlengpa chuan, “Thlalakah chuan kan pahnihin kan lang dun tlat alawm,” a ti ta a. Holmes pawh chuan, “Chu zawng, a buai zo ta. Lalber hian thil âtthlak tak a lo ti ta a nih pek chu,” a han ti a. Kan inlengpa chuan, “Khatih lai kha chuan ka â alawm. Ka rilru a kim tlat lo,” a lo ti mai a. Holmes chuan, “Hei i inhnuk hnawk vek tawh a nih hi,” a han ti zui a. Kan inlengpa chuan, “Chutihlai chuan Lalber Fapa mai ka ni a, ka la naupang si a, ka thisen a lum deuh a ni ta ve ang. Mahse tunah chuan kum sawmthuma upa ka ni ve ta a, ka thluak pawh a dai deuh tawh e,” a lo ti a. Holmes chuan, “Lak kir leh ngei tur a nih chu,” a han ti a. Kan inlengpa chuan, “Kan tum a, kan thei lo chu a ni zo tawh alawm,” a ti a. Holmes chuan, “A leiin lei mai rawh. A man ang ang chu i pe tawp mai tur a ni,” a ti ta a.

Kan inlengpa chuan, “A hralh duh tlat lo,” a ti ve zel a. Holmes chuan, “Chuti a nih leh a rukin ru chhuak mai rawh u,” a ti ve ta a. Kan inlengpa chuan, “Vawi nga zet chu ruk chhuah kan tum tawh a, mahse engmah kan la ang thei lo a ni. Vawihnih chu a bungrua kan chinglet vek tawh a, engmah kan hmu lo va. Vawikhat dang leh pawh amah chu kan dap vek a kan hmu lova, kan bei nawn leh a, engmah a sawt chuang lo a ni,” a ti a. Holmes chuan, “Thlalak chu in hmu miah lova maw?” a han ti a. Kan inlengpa chuan, “A lem pawh kan hmu lo,” a lo ti a. Nui chungin Holmes chuan, “Thil hote, khirhkhan angreng tak a nih chu maw le,” a ti ve ta a.

Lalber chuan lungawi lo hmelpu lek lek hian, “Ka tan chuan thil ho te a ni miah lo,” a lo ti a. Holmes chuan, “A ni ngawt mai. Mahse chu thlalak chu engtia hman nge a tum?” a han ti a. Kan inlengpa chuan, “Min tihchhiat nana hman a tum a ni,” a lo ti a. Holmes chuan, “Engti kawng zawngin?” a han ti leh a. Kan inlengpa chuan, “Nupui neih ka tum tawh deuhva,” ti ngawtin a lo chhang a. Holmes chuan, “Ka lo hre thawi deuh reng a ni,” a ti ve mai a. Kan inlengpa chuan, “Scandinavia lal fanu upa ber dawttu, Clotilde Lothman von Saxe Meningen nen inneih kan tum a. An chhungkua lah chu an khirh nasa mai si a, a buaithlak hle a ni. Ka nupui tur pawh hi thianghlim tuihnai tawk tak mai a ni a, min rinhlelhna a neih vaih chuan kan inkar thil hi a tawp nghal ţhuai mai dawn a ni,” a ti ta a.

Holmes chuan, “Anih leh Irene Adler chuan eng anga tih chiah nge a tum che?” a ti a. Kan inlengpa chuan, “Ka nupui tur hnenah chuan kan thlalak chu thawn a tum a ni. A thawn ngei bawk ang, ka hrechiang a ni. Khawvel hmeichhe hmelţha ber pawl sawn khawvela rilru paukhau ber a pai tel tlat. Midang ka neih theih lohna tur a nih phawt chuan tih duh loh a nei miah lovang,” a ti a. Holmes chuan, “Thlalak chu a la thawn lo tih i hrechiang em ni?” a han ti leh a. Kan inlengpa chuan, “Hrechiang e,” a lo ti ve mai a. Holmes chuan, “Engtinnge i hriat chian theih?” a han ti a. Kan inlengpa chuan, “Kan inneih tur thu kan puan ni chiahin a thawn ang tih min hrilh tlat alawm. Thawhţanni lo thleng tur hian kan inneih tur thu chu kan puang chhuak dawn a,” a ti a.

Holmes chuan hâm bai bai chungin, “Chuti a nih chuan ni thum zên zâwn kan la nei a, a tihzia viau e. Tunah chuan thil pahnih khat, pawimawh angreng tak tak en fel tur ka la nei a, London-ah hian i cham ve rih ang chu maw?” a han ti a. Lalber chuan, “Langham-ah Count Von Kramm hmingin min rawn zawng ula min hmu thei ngei ngei ang,” a ti ta a. Holmes chuan, “Chuti a nih chuan kan chetdan i hriat ve theihnan thil awmdan chu ţawngkam hnih khat lekin ka la rawn hrilh ve ţhin ang che,” a ti a. Lalpa chuan, “A lawmawm ngawt ang; ka awm reng reng a nuam thei tawh lo,” a ti ta a. Holmes chuan, “Chuti chu lo ni ta se, a pawisa lam engtinnge ni dawn?” a han ti a.

Lalber chuan, “Sawrkar hnen aţanga i duh zah zah i lak chhuah theihna turin ka pawisa lakchhuahna ‘cheque’-ah ka hming ka ziak lâwk ang a, i lak chhuah zat tur erawh chu nangma’n i duh ang zat i ziak mai anga a ni mai,” a ti a. Holmes chuan, “Takzet maw,” a han ti leh kher a. Lalber chuan, “Ka hrilh mai ang che, kha thlalak kha ka neih kir leh dawn phawt chuan ka ram chanve lai pawh chân mah ila ka pawiti thei tawh lo a ni,” a lo ti mai a. Holmes chuan, “Anih leh tuna kan lo hman chawp tur hi?” a ti leh ta zel a. Lalber chuan a kawrfual lianpui hak hnuai aţang chuan savun ip rit tawk tak mai hi a rawn phawrh a, dawhkanah chuan a’n nghat hnawk mai a. “Khatah khan rangkachak pawisa pound zathum leh lehkha pawisa pound zasarih a awm,” a han ti a.

Holmes chuan lehkha phek khatah hian chu pawisa a dawnna ‘receipt’ chu a han ziak a. Lalber hnenah chuan a pe a. “Anih leh kan Biangnovi awmna hmun chu?” a han ti leh a. Lalber chuan, “Briony Lodge, Serpentine Avenue, St.John’s Wood,” a lo ti a. Chu pawh chu Holmes chuan a ziak chhawng leh ta a. Chutah, “Thil dang pakhat leh, thlalak chu lianpui em ni?” a han ti leh a. Lalber chuan, “Ni e,” a lo ti a. Holmes chuan, “Chuti anih zawngin Lalpa mangţha le. Chanchin lawmawm tak hrilh tur che ka nei thei thuai ang tih ka ring tlat a ni,” a han ti a. Lalpa chu a chhuak a, a tawlailir a tlanliam lai vel mek chuan, “Watson, nang pawh mangţha mai le. Naktuk tlai dar thum velah lo kal la he thil hi kan sawidun leh dawn nia,” a ti ta a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » April 3rd, 2018, 10:51 am

SHERLOCK HOLMES - A SCANDAL IN BOHEMIA
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last)
(Rozami Pachuau)

A tuk tlai dar thumah chiah chuan Baker Street a Holmes a chenna hmunah chuan ka va kal a, mahse Holmes chu a chhuak vak a lo la haw lova. Holmes-a In luahna nu chuan zing dar riat vela Holmes-a a kal chhuah thu leh lehkha a hnutchhiah thu a sawi a. Chuti a nih chuan eng ang pawhin va thang rei se ka lo nghak chhuak reng reng teh ang tih rilru puin thuk mei bulah chuan ka ţhuthmun ka rem ta sauh sauh a. He thil hi ka tuipui ve riau tawh mai; a hmaa tualthah thu pahnih ka lo chhinchhiah ve sa nen khan inkaihhnawihna nei lem lo mahse Holmes-a ruaitupa nihna leh dinhmun hian he thil hi a ti maksak ve reng reng a ni.

He thil hi ngaihnawm dawn leh phurthlak dawn riauva ka rinna bakah thubuai-hlabuai chinfel chungchanga Holmes-a han chetdan hi hmuhnawm ka tiin ngaihnawm ka ti ve hranpa a. Thil awm thei lo tawp ni awm anga lang pawh hneh deuh maia a’n chingfel zung zung mai ţhin hi lo chhuipui ve a nuam em a ni. A hlawhtling zing ta lutukin a hlawhchham hi ka hre khat ta lutuk a, hlawhchham thei pawhin ka ring tawh lo hial ţhin. Tlai dar li rik dawn ţep chuan pindanah chuan sakawr enkawltu incheina inbel, zu ruih hmel deuh mai, biang hmul chher chhur, ţawp hmel tak mai, hmai sen hlur mai, thuamhnaw chhe tak ha hi a lo lut ta a. Ka ţhianpa’n inchei danglam a thiamzia chu ka hriat chian em avangin vawithum lai ka han thlek nawn ngat a, Holmes-a ngei a ni tih ka hre thei ţâwk a ni.

Ka lamah chuan a lu a’n bu zauhva, mutna pindan lamah chuan a lut phei a. Tuibur hmuamda pawh tling lovah chuan ama inthuamna pangngai nen chuan a lo pên chhuak leh ta a. Thuk kawngkaah chuan a’n ţhu a, a kekawr ipte a’n zen te te a, za deuh maiin a nui ta hawk hawk a. A tawpah chuan, “Riap riap mai a!” a’n ti a, chau âwm deuh mai chuan a ţhutthlengah chuan a’n ţhu hnawk a. Kei chuan, “Engnge ni?” ka lo ti a. Ani chuan, “A nuihzatthlak chiang kher mai. Zing lama ka buai phili dan leh tlai lama thil lo thleng ta kha i suangtuah phâk ngai lovang,” a han ti a. Kei chuan, “Ka bo hle mai. Ka rindan chuan Miss Irene Adler-i chetdan hunbi leh a In hmun hma vel i va enthla a nih ka ring,” ka ti a. Ani chuan, “Dik chiah. Mahse a hnua thil awmdan zel chu mak danglam ang reng tak a ni. Ka’n sawi ang e aw.

“Zing dar riat hnu lawk khan he In aţang hian sakawr enkawltu, hnathawh tur nei lo incheia incheiin ka chhuak a. Sakawr ngaina mi hian khawngaihna an ngah tih ka hre tlat a ni, i fiah duh leh sakawr enkawl mi-ho zingah han che ve la i hre mai ang. Reiloteah Briony Lodge chu ka va zawng chhuak mai a. In tê fel ren rawn, fal nelh nawlh hi a ni a. In hnung lamah chuan huan a awm a, a hmalamah chuan kawng a awm a. A In pawh chu chhawng hnih a ni nghe nghe. A kawngkhar kalhna pawh rinawm tak, ‘Chubb lock’ an tih ang chi ngat hi a ni. A In dinglamah chuan ţhutkhawmna pindan a awm a, a zau viau lehnghal a, a chei pawh an cheimawi viau. A tukverh pawh sei tak, chhuat thleng dawn dawna hawn a ni a, a kalhna pawh hawn awlsam chi, naupang chumchiap pawhin an hawn theih tur a ni.

“In hnunglam chu eng vak mah a ni lo. Mahse sakawr sawizawitu awmna In chung a\ang chuan tukverh chu a han ban phak tih mai a ni. Vawi tam ka kalhel a, engmah ka hmu lo. Chutah In hma lama kawngah chuan ka kal chhuk a, huan hungna bang bulah chuan sakawr enkawltu chenna In chu ka zuk hmu a. Sakawr enkawltu chu reilote ka han pui zawk a. Chumi avang chuan vaihlo beng hnih, zu no hnih ka hlawh a. Chubakah Miss Adler-i chanchin chu ka duh ang tawk ka hre bawk. Chubakah pawh an ţhenawm, mi sawmpahnih vel zet tur chanchin chu ka hre bawk. Mahse an ţhenawmte chanchin chu ka duh reng vanga hria pawh ka ni lo, a sawitupain a sawi avang leh a thusawi chu ngaithla lo thei lo dinhmuna ka din vang mai a ni,” a han ti a.

Kei chuan, “Anih leh Irene Adler-i chanchin chu?” ka lo ti a. Ani chuan, “Mipa thluak chawkbuaitu atana chhawr nahawm lutuk ringawt a ni. He lei chung van hnuaiah hian a aia nu tuihnai reng reng an awm lovang, a tia lawm sakawr enkawltupa chuan. Adler-i chu nu nun zawi tak a ni a, intihhlimna hmunah a zai a, tlai dar sarihah zanriah ei turin a lo kir leh zat zat zel a ni. Mipa pakhat chauhin a rawn kan ţhin a, mahse chu pa chu a lo kal zing awm khawp mai. Amah chu pa hang lam deuh hmel ţha tak, hmel thar sar mai a ni a. Nikhatah vawikhat chu Irene Adler-i chu a tlawh ziah. Achang chuan vawihnihte pawh a tlawh ţhin. Amah chu Mr Godfrey Norton, Inner Temple ami a ni. A changtunu chu a zai dawn loh chuan a chhuak vâk ngai meuh lo. A changtunu In aţang chuan a changtupa chu tawlailirin a thlah haw fo.

“Sakawr enkawltu emaw, sakawr tawlailir pu emaw biak ţhat a hlawk bikzia chu i hre mai lo’m ni? Thil hi an hre famkim duh teh ania. A duhtawka thu min fah hnu chuan Briony Lodge bulah chuan vawikhat chu han kaltlang leh hram ka duh a ni. He thil hi a buaithlak ve riauvin ka hria. Godfrey Norton hi engkhaw lawi lovah a rawn inrawlh ve ngawt chuan ka hre thei lo reng reng a. Amah hi ukil a ni a, chuti ni se he nu hi eng vangin nge a tlawh chhen nachhan ni ang le? He nu hian a ruai nge ni a, a ţhian nge ni a, nge a ngaihzawng zawk? He nu hian Godfrey Norton hi ruai ni ta sela chuan thlalak pawh chu Norton-a kutah a dah ngei ang, chuvangin a ruai a ni lo phawt mai. A ţhian anih lah chu a rinawm chiah loh lehnghal.

“He nu hian Norton-a hi a ruai a nih emaw, a ngaihzawng a nih emaw vaih chuan ka hnathawhna hmun pawh a dang ve daih dawn a, Norton-a chenna In nge pan ngai ang Briony Lodge aţanga thil chhui tur tih pawh ka hre thei lo a ni. Ngawiteh ka sawi chipchiar ta deuh a, i tan a ngaihthlak a ninawm hle ta ve ang. Mahse thil awmdan hi i hriat ve dawn chuan ka buaina tê tham ber ber thlenga i hriat ve vek hi a ţul tlat a ni,” a han ti a. Kei chuan, “Ka la hrethiam hle zel e,” ka lo ti a.

Holmes chuan, “Inrawihna thil nge ni a hmangaihna thil tih angreng ka ngaihtuah lai tak chuan kawtah chuan tawlailir pakhat hi a lo ding chawt a. A chhung aţang chuan pa hmelţha deuh mai, hang lam lek lek, hmuihmul zuah chhar mai hi a lo chhuak a, Godfrey Norton a ni ang tih chu hrilh ngai lovin ka hre ve nghal mai a. Chu pa chuan hmanhmawh deuh maiin chhiahhlawh chu a nam per a, inchhungah a tlan lut a. Inchhungah chuan darkar chanve vel a va thang a. A thang chhung chuan tukverh darthlalang phenah chuan a veivel thla leh a kut han vai vel thla chu ka hmu thei bawk a, mahse a hmeichhia erawh chu ka hmu thei miah thung lo.

“Darkar chanve a ral ta ang tih âwm velah chuan a lo chhuak leh thut a, a hma aia hmanhmawh zawk mah hmel chuan tawlailirah chuan a lawnkai a. A lawn pah chuan a sana chu a’n phawrh a, tawlailir khalhtu hnenah chuan, “Khalh thlawk rawh le, Gross & Hankey, Regent Street lamah kal phawt la, chutah Church of St.Monica, Edgeware Road lam i pan dawn nia. Minit sawmhnih chhunga i tlan thlen hman phawt chuan tangka sawmnga ka pe ang che,” a ti ta mai a. Rang deuhin an inkhalh liam ta a. Engtinnge ka zui ve ang aw, ti a ka lo inngaihtuah lai tak chuan kawngah chuan tawlailir te tak te, fel thlarh mai hi a lo kal a. Chu tawlailir khalhtu chuan a kawrkilh pawh a kilh kim lova, a nghawngawrh pawh a bat ţha hman hek lo. A sakawr hrenbehna savun hmawr lah chu bilh luh hman loh tih hriat tak mai hian a ther huang mai a.

“Chu tawlailir chu kawngkhar bulah a ding fel chiah tih chuan Inchhung aţang chuan nula chu hmanhmawh elhkhen hian a lo chhuak a. A hmanhmawh em avang chuan a hmuh pawh ka lo hmu mumal hman lova, mahse ka han melh zawk pawh chuan nu hmelţha tak mai, lum hluma hlawh tlak an tih ang chi hi a ni tih ka hre mai a ni. Tawlailir khalhtu hnenah chuan, ‘John, Church of St.Monica-ah tlan rawh le. Minit sawmhnih chhunga i thlen hman chuan tangka sawmruk ka pe ang che,’ a ti ve ta mai a. Chutah zawng ka tel lova chulai hmuna inkhawmpui an va neih mai chu fel dawnin ka hre lova, tawlailir lo kal pakhat khalhtu hnenah chuan, ‘Church of St.Monica-ah rang takin. Minit sawmhnih chhunga i thlen hman chuan tangka sawmruk ka pe ang che,’ ka ti ve ta a.

“Chutihlai chuan chhun dar sawmpahnih rik nan minit sawmhnih panga a la awm a. Ka chuanna tawlailir khalhtupa chuan a bei chak kher mai. Kha aia chak kha chuan ka la tlan ngai lo hialin ka hria. Mahse ka thlen hma chuan ka hma amite chu an la thleng hman ta cheu a ni. Biak-In tualah chuan ka zuang thla a, Biak-Inah chuan ka tei lut ve ta ngawt mai a. Biak-Inah chuan tumah an la awm lova, ka mi umte pahnih leh puithiam pakhat chauh chu an lo awm a, a ruak huai mai. An pathum chuan maicham hmaah chuan an lo ding a, kei pawh chu tihtur nei lo, hmuhnawm hmuh duha vak vel mai mai niawm takin maicham lam pan chuan ka phei ve ta a. Chutihlai tak chuan an pathum chuan an lo hawilet a. Godfrey Norton chu a theihtawpa chakin ka lamah chuan a lo tlan phei ta nghal a.

“Godfrey Norton chuan, ‘A va’n tihzia teh hlauh em. I hman theih dawn hi. Tirawh! Lo kal rawh le!’ a ti ta vut vut mai a. Kei chuan, ‘Engmaw?’ ka lo ti a. Ani chuan, ‘Minit thum chhung chauh alawm. Chuti a nih loh chuan dan bawhchhia kan ni mai,’ a ti a. Maicham lamah chuan a hnuh hian mi hnuk phei hi a ni ta ber mai. Engnge ka tih tih pawh in hre mang hlei lo chuan sawi tura min tih ang chu ka sawi chhawng ve ta zel mai a. Irene Adler, hmeithai leh Godfrey Norton, tlangval chu an inneihnaah engemaw ti zawngin ka ţanpui ve a ni tih chauh chu ka hriat chhun ni maiin ka hria. Chutah kan zo ta thuai a. Lehlamah tlangval hmelţha tak maiin lawmthu min hrilh mawlh mawlh a, ka lehlamah nula hmelţha tak maiin lawmthu min hrilh ve mawlh mawlh mai bawk a. Ka hmaah chuan puithiam chu a ding bawk a. Ka chan san lai tak a ni ta âwmin ka hria.

“Ka han ngaihdan mai mai chuan an inneihna tur lehkha kha a fel tawk lovang a, puithiam khan hretu awm lo chuan a inneihtir duh lo emaw a ni ang a. Kei kha chu va kal hlauh lo ila chuan mopa khan kawtthlerah hriatpuitu a zawn a ţul dawn ngei niin ka ngai a ni. Mopa chuan tangka za min pe asin,” a han ti a. Kei chuan, “A va’n mak ta mai mai ţhin em. Engtinnge ni ta zel?” ka lo ti a. Homes chuan, “Ka lo tumdan nen a inpersan lutuk a, ka lawm vak lo. Biak-In aţanga kan han chhuak chu mopa chu ama In, Temple lamah a kal a, monu erawh chu ama In lamah a tlan liam ve thung a. A kal dawn chuan monu chuan, ‘Dan pangngai angin tlai dar ngaah ka tawlailirin ka leng chhuak ang,’ a tih hi ka’n hria a. Inbuatsaih ve a ţul avangin ka phe ve ta vat mai a ni,” a ti a.

Kei chuan, “Engtinnge i inbuatsaih tak a?” ka lo ti a. Holmes chuan, “Bawngsa ka ei a, zufang ka in bawk. Ka buai luat avangin ei leh in lam ka lo ngaihtuah chang lova, mahse vawiin tlai hian ka la buai deuh deuh dawn a. I mi ţanpuina ka mamawh ang,” a han ti a. Kei chuan, “Ka châk zawng tak alawm,” ka lo ti mai a. Holmes chuan, “Dan bawhchhiat pawh pawi i ti lo maw?” a han ti leh kher a. Kei chuan, “Ti uk suh ei,” ka lo ti mai a. Holmes chuan, “Man pawh i inhuam ang maw?” a han ti leh a. Kei chuan, “A chhan a ţhat tawk phawt chuan huam lutuk mai,” ka ti ve zel a. Holmes chuan, “A chhan chu a ţha tawk tehreng mai le,” a ti a. Kei chuan, “Chuti chu i chhiahhlawh rinawm takah ka ţang thei zu ni maia le,” ka ti a.

Holmes chuan, “Rinchhan tlak i awm ang tih ka hre sa reng a ni,” a ti a. Kei chuan, “A enga pawh chu lo ni ta se enge maw i tumdan ni reng reng le?” tiin ka’n zawt a. Holmes chuan, “Mrs Turner hian chaw min lak phawt sela ka la hrilh ang che, chaw ei laia ka sawi loh chuan ka sawi hman lo. Tunah hian dar nga a ni a, tun aţanga darkar hnih, dar sarihah hian Nula emaw ni, Pi emaw ni, Irene-i chu a Inah a haw dawn a, chumi hun chuan Briony Lodge a kan awm a ngai a ni,” a ti ta a. Mrs Turner chuan chaw a rawn la a, Holmes chuan a ei ta bawrh bawrh mai a. Kei chuan, “Engtin maw ni a?” tiin ka lo zawt ve ta nghal a.

Holmes chuan, “Chulam chu lo ngaihven ve vak duh suh. Thil lo thlen dan tur chu ka ruahhman fel vek tawh a. I chet vena tur chu thil pakhat chauh a ni. Engpawh lo thleng sela i tihtur bak chu i ti hlek tur a ni lo. I hria maw?” a’n ti a. Kei chuan, “Ka lo mi tlaw din ve mai mai ringawt dawn a mi?” ka’n ti a. Holmes chuan, “Engmah i tih ve a ţul lo. A nuamhnai vak lo mai thei, mahse lo inrawlh ve suh. Inchhunga ka luh theih phahna tur a ni mai ang. Minit li, minit nga hnuah ţhutkhawmna pindan chu a inhawng ang a, chu tukverh inhawng bul hnaiah chuan i lo awm ringawt tur a ni,” a han ti a. Kei chuan, “Ka hrethiam e,” ka lo ti a. Holmes chuan, “I hmuh theih tura ka awm dawn avangin min lo thlir reng ang che,” a han ti leh tawp a. Kei chuan, “Aw,” ka ti ve leh mai a.

Holmes chuan, “Ka kut ka phar chhuah veleh vawm tura ka thil pek che chu tukverhah i vawm lut ang a, i vawm luh rual rualin kangmei a chhuah thu i tlangaupui nghal tur a ni. I hrethiam chiang chiah em?” a han ti a. Kei chuan, “Tehreng mai,” ka lo ti mai a. Holmes chuan, “Thil huphurhawm tak zawng a ni lova,” tih pahin a ipte aţangin meizial anga engemawni inzial hi a han phawrh chhuak a. “Eng ilo châr phuitu hovina an hman ţhin, meikhu awmna bawm mai a ni a, amaha a alh theih nan a hmawr tawn tawnah hian a chhîn an dah a ni. Chu zawng chu i tihtur a ni. Kangmei a chhuak ti a i au zawh chuan mi an lo pungkhawm ang a, kawtthler tawp lamah i phei ang a, minit sawm chhungin ka lo thleng phei ve nghal mai ang. I hria em?” a’n ti a.

Kei chuan, “Kei chu mi tlaw awma awm mai mai a, tukverh bula awm a, vawm tura min vai veleha vawm mai a, kangmei chhuak aua au a, kawtthler tawpa lo nghak mai tur che ka ni,” ka han ti a. Ani chuan, “Chu chiah chu a ni,” a lo ti a. Kei chuan, “Chuti anih chuan ka tihtur chin chu ţha takin ka ti ang tih ring tlat ang che,” ka han ti a. Holmes chuan, “A ţha lutuk. Ka lem chan tura chang thei turin ka inchei a hun tain ka hria,” tih pahin a mut pindanah chuan a lut a. Reiloteah chuan puithiam chi khat ‘Nonconformist’ an tih ang chi incheina inbel hian a lo chhuak leh a. A mawl hmelin pa ţha pui hmel hi a pu a.

Holmes-a han inchei danglam tak tak chu a danglam hneh ngei mai. A lukhum parh dum khum te, a kekawr ţawp angreng tak te, a nghawngawrh var awrh te, a nuihmel, khawngaihna ngah hmel tak mai te, a mitmeng danglam tak maite nena han en chuan Sherlock Holmes, misual hnu chhuitu hi a ni ang tih rin ngaihna reng reng a awm lova. Lemchan lama tui mite hian thil ropui tak an chân ni berin ka hre mai, mahse ‘science’ lam zir mite pawhin ‘scientist’ thiam tak mai tur an chân ve thova, misual hnuchhuina khawvelah erawh chuan titi ngaihnawm leh chanchin ngaihnawm a tam phah ve thung a ni.

Baker Street kan chhuahsan lai chuan dar ruk leh minit sawmpanga a ni a, Serpentine Avenue kan va thlen chuan dar sarih rikna turin minit sawm a la awm a. Chutih lai chuan khua a thim chhilh chhelh tawh a, khawnvar pawh an chhi ţan thliah thliah a. Briony Lodge chu Holmes-a sawi aţanga ka rindan deuh chiah a ni mai, mahse a awmna ualau ang huin a lûn tlat lo ti ila, a fianrial ka tihna mai a nia. A bul lawk chu a lûn ve khawp mai a, mi ţhenkhat hi mei zu chungin an lo nui bâwk bâwk hlawm a. Mi pahnih hian nurse hmeichhe pakhat hi an lo chhaih vel zar zar bawk a. Mi inchei fai ve angreng fe fe pawh hmuh tur an awm nawk mai.

Holmes chuan, “Tunah chuan ka thil duh, thlalak kha chu a letin a hlu lehzual tawh a ni— a tan chuan. Min ruaitupain kha thlalak kha a neih palh a hlauh tluk zetin Godfrey Norton-an kha thlalak kha a neih a hlau tawh dawn a. A thukru fimkhur em em tawh dawn a ni. Chuti ni se engtinnge kan hmuhchhuah tak ang?” a han ti a. Kei chuan, “A ni ngawt mai, engtinnge kan hmuhchhuah tak ang?” ka lo ti a. Holmes chuan, “A kalna apiangah a keng zel lovang tih chu a rin theih nghal mai a. A chhan chu kha thlalak kha a lian viau tlat a ni. Chubakah Lal mi rawihte’n an lambun mai thei ang tih a hriatsa reng bawk a, chuvangin a kalnaah a keng emaw, a taksa khawilai emaw, a thuamhnawah emaw chuan a thukru lo angah kan ngai nghal phawt thei ang,” a han ti a.

Kei chuan, “Chu chu lo ni ta sela khawiahnge a dah tak ang?” ka lo ti a. Holmes chuan, “A pawisa vawngtu emaw, a ukil rawihin emaw a kawl mai thei a ni. A eng zawk zawk emaw chu a ni thei bawk. Mahse kei chuan a engamah chu ka ring lo. Hmeichhia reng reng chuan an thuruk hi zep duhdan kawng zawng riau an nei ve a, thuruk zêp ţeng ţeng tur hi an ngah bik riau bawk a ni. Eng vangin nge mi dang hnenah chu thlalak chu a dah kher ang ni? Amah pawhin thlalak chu a venghim thei tawk ang tih a inring ang tih hi rin tlat tur a ni a, chubakah chu thlalak chu miin an hmansak thei tlat bawk a ni. Chubakah leh bawk, ni reilote hnua hman a tum bawk a. Chuti a nih chuan a ban phak hnaivai, ama Inah emaw a ni ang,” a han ti a.

Kei chuan, “Mahse, a In chu vawihnih lai an hai lepse tawh kha,” ka lo ti a. Holmes chuan, “A zawnna hmun tur an hre lo tihna a ni mai ’lawm,” a lo ti a. Kei chuan, “Anih nangin engtinnge a zawnna hmun tur chu i hriat ang?” ka’n ti a. Ani chuan, “Ka zawng dawn hlei nem,” a lo ti mai a. Kei chuan, “Chuti a nihin engtinnge ni ta ang?” ka ti a. Holmes chuan, “Min kawhhmuh turin ka tir mai ang maw le,” a ti sam leh mai a. Kei chuan, “A duh teuh lo em mai,” ka’n ti a. Holmes chuan, “Duh lo thei a ni na’ng aw. Mahse chu a tawlailir thâwm a va ang ta mai em. Ka sawi ang chiah khan i lo ti dawn nia,” a ti ta nghal a.

Briony Lodge-ah chuan tawlailir te tak te, fel vang mai hi a rawn tlan thleng a. Chu tawlailir kawngkhar hawnsak inchuh chuan mi pahnih hi an han insual ţhelh a, mahse an insual tak tak hmain an ţhelh hman ta hlauh a. An ţhelh hman han ti ila, an indan buai chhung chuan tawlailir kawngkhar chu a rawn inhawng a, a chhung aţang chuan nula chu, ti ila, Pi-i chu a ni zawk mah awm e, a lo chhuak a. Chutihlai chuan kawngkhar hawnsak inchuhte chu an inhnek chawrh chawrh mai a. Holmes chuan chungho lak aţang chuan Hmelţha-i chu va venhim a tum a, mahse a bul a thlen veleh chuan a ţê ţhawt a, a tlu hnawk a, a biangah chuan thisen a lo luang ta ngiai ngiai mai a.

Chutia Holmes-a a’n tluk takah chuan midang pawh an rawn inrawlh ve a, an buaina bul ber hmeichhia leh Holmes chu an rawn ngaihven ta a. Irene Adler-i chu a In lamah chuan a tlan ta thuai a, mahse kawngkhar a thleng hman chauh tihin a lo hawi lêt a, “Ka pu kha a na em?” a rawn ti ta a. Mi tam tawk hian, “A thi der mai,” an ti sap sap a. Pakhat chuan, “Teuh lo, a thi lo, a la nung! Mahse damdawi-In thlen hmain a thi hman tho thovang,” a lo ti ve ta tlat a. Hmeichhe pakhat hian “Mi huaisen tak a ni, ani chu awm lo sela chuan ka pi pawisa ip kha an laksak ngei ang. Misual rual an nih kha. An duh rum hle mai. Mahse hei a rawn thaw chhuak e,” a han ti a.

Mi pakhat hian, “Hetia kawtthlera tluk reng ringawt te zawng a zia lo deuh e. Ka pi, i Inah khan zâwn lut mai ila a rem lo’m ni?” a han ti a. Irene-i chuan, “Rem tehreng mai. Ţhutkhawmna pindanah khan muttir rawh u, ţhutthleng dûp pawh a awm kha. Ni lo, helamah zawk hian a nia a kawng chu,” a han ti a. Muangchang leh puithu ang reng tak hian Briony Lodge-ah chuan Holmes chu an zâwn lut ta a. Chutihlai chuan tukverh bula ka dinna hmunah chuan ka lo ding ran a. Khua a tlai tawh deuh avangin khawnvar an chhi tawh a, mahse tukverh puanzar chu an la zar loh avangin Holmes pawh chu chiang takin ka hmu thei a.

Khatia Holmes-a han tlu ta mai kha engtizia chu ni dawn maw, a inthiam lo lutuk a che buai ta mai em ni ti tein ka ngaihtuah neuh neuh a. Mahse kan phiarruk nu ber chu ka va en a, a hmela khawngaihna leh a taksa mawi duhawmziate chu ka va hmu a, ka zak tlawk tlawk mai. Mahse ka tihtura Holmes-an min tuk chu ka tih loh leh si vaih chuan ka tan a zahthlak ngawt ang. Chuvangin ka iptea meikhu awmna bawm ka ah chu ka’n pawrh chhuak ta vang mai a. Ka rilru chuan, ‘A hmeichhia kan tina dawn pawh ni hlei lo, ama’n midang a tina tur kan veng mai zawk dawn lek alawm,’ ka ti a. Holmes chu ţhutthlengah chuan a rawn ţhu chhuak a, boruak thianghlim duhthawh ni awm tak hian a ban a’n vai a, chhiahhlawh nula pakhat hian tukverh chu a rawn hawng ta a.

Chutia tukverh a hawn rual rual chuan Holmes chuan a kut chu chunglamah a lek chho nghal a. A kut a lek chhoh veleh chuan ka meikhu bawm ken chu tukverhah ka vawm lut a, “Kangmei a chhuak e,” tiin ka au nghal chiam bawk a. Ka aw ri an hriat chuan misual leh mi ţha sawi lovin an lo pungkhawm ţuk ţuk a. Tukverhte leh pindan chhungahte chuan meikhu chu a zâm khat luih luih tawh mai bawk a. Mahse Holmes chuan inchhung aţang chuan dâwt mai mai a nih thu leh thu vuvuk mai mai a nih thu chu a rawn sawi a, reiloteah a reh leh ta duak a. Chutia a reh fel hnu chuan kei pawh chu kawtthler tawp lam pan chuan ka phei ta a.

Reilote chauh ka la ding hman tih chuan Holmes chu a lo kal a, Edgeware Road lam panin kan kal dun a. Holmes chuan, “Doctor, i ti ţha kher mai, kha baka nalh kha chuan tuma’n an ti thei lovang,” a han ti a. Kei chuan, “Thlalak chu i nei tawh em?” tiin ka’n zawt a. Ani chuan, “A awmna ka hre tawh,” ti chauhvin min lo chhang a. Kei chuan, “Engtinnge i hriat theih?” tiin ka zawt leh ta a. Ani chuan, “Ka sawi ang khan amahin min hrilh mai maw le,” a lo ti mai a. Kei chuan, “Ka va’n hrethiam lo em,” ka’n ti a. Holmes chuan, “Thil mak danglam engmah a awm lo. I hmuh angin kawtthlera lo awmte kha chu ka thurualpuite mai mai an nih kha. Vawiin tlai atana ka mi rawihte an ni,” a han ti a. Kei chuan, “Ka ring deuh reng a ni,” ka lo ti a.

Holmes chuan, “An han intihbuai deuh hlek khan ka va tlan phei a, ka kutphaha rawng sen ka tah sa chu ka chalah ka bel a, ka tlu ta mai a ni. Bumna hlui ve tak zawng a ni,” a ti a. Kei chuan, “Kha pawh kha ka la hrethiam,” ka lo ti a. Holmes chuan, “Chutah min zâwn lut ta a nih kha. A Ina zawn luh mai loh kha chu hmabak ka nei lo, ani pawhin min hnial ngaihna a hre lo a nih kha. Chutah ţhutkhawmna pindan lo kha chu min dahna tur dang a awm leh lova. Kha pindan kher kher kha ka lo rinhlelh rilruk chu a ni a. Ţhutkhawmna pindana ka awm hnu khan boruak thianghlim ka mamawh thu ka sawi leh a, tukverh kha an hawn mai a ţul leh ta zel a ni. Khatia tukverh an han hawn khan nangin i tihtur tih theihna hun remchang i neih phah leh ta a,” a’n ti duah a.

Kei chuan, “Chu chu engnge a ţangkaina?” ka lo ti a. Holmes chuan, “Tuna ka han sawi takte kha thil pawimawh tak tak vek a ni. A In chu a kang ni a a hriat phawt chuan hmeichhia chuan a neih hlu ber ni a a hriat chu a dap hmasa ber ngei ngei ringawt a ni. Hetiang thil hian vawi tam min pui tawh nghe nghe. Darlington thubuai te, Arnsworth Castle thubuai te pawh kha hetiang thil ka hriat tlat avanga ka chinfel theih chauh hi an ni a. Nu, fa nei tawh chuan a naute a chuh a, nula chuan a lunghlu dahna thingrem a chuh a nih kha. Tuna kan thu khel laiah pawh hian kan Pi-i hian he thlalak aia a hlut zawk hi engmah a awm lovang tih ka hrechiang a, chuvangin venhim tumin a bei ngei ang tih ka hria a ni.

“Kangmei chhuah thu kha nalh lutuk maiin i rawn puang ta si a, meikhu leh mipui thâwm vel avang khan nu rilru sak ber tan pawh han muanchanna chi tur a ni si lova, a tihtur dik tak chu a ti ta a ni. Thlalak chu bang bul khuar lai, dar pawhrikna dinglam, thingphel tawlh theia khuh hnuaiah a awm a ni. Engmah dang a tih hmain chulai chu a dap vat a, a chanve zet chu a phawt chhuak tawh nghe nghe a. Thu vuvuk mai mai a nih thu ka sawi a hriat aţang leh meikhu bawm a hmuh aţang khan a dah lêt leh ta a ni. Pindan aţang chuan a chhuak nghal daih a, ka hmu leh ta reng reng lo.

"A chhuah hnu chuan thlalak chu neih tuma phawrh chhuah ve nghal mai tur emaw ka ti deuh rum rum a, mahse an sakawr enkawltu kha a lo lut ta tlat a. Min melh ngun nasa mai si a, han nghah leh hlek hi a dikin ka hre leh ta zawk a ni. Kan vir pilh ang tih pawh ka hlau hlel lo,” a han ti a. Kei chuan, “Tichuan tunah hian engtinnge ni dawn ta zel?” tiin ka lo zawt a. Holmes chuan, “Kan thil chhui chu kan zo ta a ni. Naktuk hian Lalpa chu ka va sawm ang a, i duh chuan i lo kal ve dawn nia. Kan Pi-i pindanah kan lo ţhu ang a, a lo luh chuan thlalak awmna lam hlir pawh chu kan duh leh kan lo melh mai ta lawng. Mahse thlalak leh kan hmel chu a hmuh hman loh ka ring rum rum mai. A kutzal ngeia han phawrh chhuah hi Lalpa hian a châk viauvin ka ring tlat a ni,” a ti ta a.

Kei chuan, “Engtikahnge Lalpa chu i va sawm ang?” tiin ka lo zawt a. Ani chuan, “Zinglam dar riatah. Kan chet deuh vat vat loh chuan a ţha lo mai ang tih pawh a la hlauhthawnawm thei fo a ni. Chubakah zing deuh hleka kan kal chuan a la tho hman lo ang a, ţhutnate pawh kan lo inrem fel hman ang chu mawle,” a han ti a. Chutihlai chuan Baker Street kan lo thleng tawh a. Holmes chuan a pindan chabi a zawn buai lai chuan mi kal vel nuk nuk kar aţang chuan mi pakhat hian, “Mister Sherlock Holmes, mangţha le,” a rawn ti ta zauh mai a. Chutia rawn titu chu tleirawl ria lam deuh hlek, kawrfual lianpui ha hi ni maiin a lang a. Holmes chuan, “Chu aw chu ka hre tawh ţhin ngat mai. A tu lêk chu han ni ang maw,” a ti nuah nuah a.

Chumi zan chuan Baker Street-ah ka riak ve ta a. Zing thingpui kan in lai chuan Bohemia Lalpa chu a lo lut a. Holmes chu a rawn vuan a, “I nei tawh em? I nei tawh ang maw?” a han ti nghal tawp mai a. Holmes chuan, “La nei lo deuh,” a lo ti ve mai a. Lalpa chuan, “Mahse beiseina chu i la nei a ni lo’m ni?” tiin a’n zawt a. Holmes chuan, “Beiseina chu nei tehreng mai,” a lo ti a. Lalpa chuan, “Chuti anih chuan tirawh le. I kal teh ang; ka nghakhlel tawh teh mai ania,” a ti ta a. Holmes chuan, “Tawlailir kan ngaihtuah phawt a ţul ang,” a lo ti leh a. Lalpa chuan, “Ka mimal tawlailir a awm alawm,” a lo ti leh ta zel a. Holmes chuan, “Chuti anih chuan a ţhat nasat chu,” a lo ti mai a. Briony Lodge lam pan chuan kan tlan chhuak leh ta a.

Holmes chuan, “Irene Adler-i chuan pasal a nei,” a han ti tawl ringawt a. Lalpa chuan, “Engtikah?” a lo ti vat a. Holmes chuan, “Nimin khan,” a lo ti mai a. Lalpa bawk chuan, “Tu maw a neih?” a’n ti leh a. Holmes chuan, “Ukil pakhat, English mi, Nortorn-a,” a ti a. Lalpa chuan, “A hmangaih vang a ni lo reng reng ang,” a han ti leh a. Holmes chuan, “A hmangaih vang a nih hram ka beisei,” a han ti ve ngat a. Lalpa chuan, “Eng vangin maw i beisei?” a lo ti a. Holmes chuan, “A chhan chu, Lalpa tana hnawksak lo thei anga a awm theihna tur a nih ka rin avangin. Kan pi-i chuan a pasal chu a hmangaih phawt chuan Lalpa hi a hmangaih lo tihna a ni a. Chuti a nih chuan Lalpa remruat chawhbuai hi a duh nachhan tur a awm lo tlat a ni,” a ti ta a.

Lalpa chuan, “A dik ngawt mai. Mahse.. A.. ka zawlpui tawk lo ni hlauh se ka ti ngawt mai. Lalnu atan chuan a duhawm em asin !” a ti ta thlawt mai a. Serpentine kan thlen hma loh chuan Lalpa chu a ţawng chhuak leh tawh reng reng lo. Briony Lodge kan va thlen chuan a lo inhawng huai a, hmeichhe upa tawh tak hi kailawnah chuan a lo ding a, kan tawlailir aţanga kan chhuk lai chu min lo melh ran ran a. Chu hmeichhia chuan, “Mr Sherlock Holmes a ni ang maw?” a lo ti a. Holmes chuan makti hmel deuh tak hian, “Kei hi Mr Sherlock Holmes chu ka ni e,” a han ti a. Chu nu chuan, “A nih tak chu maw le. Ka pi chuan i rawn kal a rin thu hi a sawi asin. Tukin dar nga leh minit sawmpanga khan Charing Cross aţangin an chhuak ta,” a han ti a.

Holmes chu makti lutukin a petek nawk hian ka hria a, a hmel chu a dâng nghal sauh hian ka hre bawk a, “Eng maw? England ram hi a chhuahsan i ti elo?” a’n ti a. Chu nu chuan, “Lo kir leh ngai tawh lo turin,” ti ngawtin a lo chhang a. Lalpa chuan, “Anih leh a lehkha pawimawh te? A bo vek em ni?” a lo ti thâm ve ţuak bawk a. Holmes chuan, “Kan hre mai dawn alawm,” a ti a. Chhiahhlawhnu chu a kalpel a, ţhutkhawmna pindanah chuan a lut phei a, Lalpa nen chuan kan zui ve zel a. Pindan chhunga bungrua chu a lo let nasa hle mai a. Pawhdawh leh ‘almirah’ te chu a inhawng hiai huai mai a.

Holmes chuan dar pawh rikna bul a pan nghal a, thingphel tawlh thei chu a nam tawlh a, a chhung chu a zuk zen ta ngawr ngawr a. Thlalak pakhat leh lehkha pakhat hi a rawn phawrh ta nawlh mai a. Chu thlalaka mi chuang chu Irene Adler-i tlailam incheinaa a inchei thla a ni. Lehkha chu “Sherlock Holmes, Esq. A rawn lam huna pek tur” hi a lo ni a. Holmes chuan lehkha chu a hawng a, kan pathum chuan kan chhiar ta a. A hma zan zanlaia a ziah chu a lo ni a.

PU DUHTAK SHERLOCK HOLMES:

I dek nalh hle mai. Min dawi hneh chiang hle a ni. Kangmei chhuah thu a reh hma kha chuan rinhlelhna chhete pawh ka rilruin a nei lo che. Mahse ka chetdan kha ka’n chhui kir a, buichhia laih lohvin ka inpuang ni berin ka hria a, ka ngaihtuahna a buai tan ta a ni. I laka fimkhur tur hian thla tam kalta atanga khan hrilhlawkna ka dawng tawh a. Lalpa hian mi a rawih chuan nang ngei hi a ruai ang che tiin miin min hrilh a ni. I awmna hmun pawh min hrilh nghal vek. Mahse, chuti chung pawh chuan i hriat duh chu ka lak atang ngeiin i hre ta tho a nih hi. Rinhlelh nachang ka hriat hnu che pawhin khatiang puithiam ngilnei hmel lutuk mai kha khati khawpa sakhaw mi lo i ni ang tih rin harsa ka ti.

"Mahse kei pawh hi lemchan lamah hian ka lo inhmang tawh thin asin. Mipa thuamhnaw han hawh lawk hi ka tan tih ngai loh a ni reng reng lo. Mipa lema han chan hian thil tam tak ka tih theih phah thin. Sakawr enkawltu, John-a kha enthla tur chein ka chah ta a, pindan chungsang lamah ka tlan chhova, ka lenvah kawr, ka tih mai thin chu ka ha a, i chhuah rual khan ka rawn chhuak thla ve hman chiah a ni. Awle, i kawngkhar thlengin ka zui ta che a. Mi hmingthang, Sherlock Holmes-a benglut zawng tak thu ka sawi ta a nih kha. Ka mangtha zawh hnu che khan Temple lamah ka pasal hmu turin ka kal ta a ni.

"Khatiang khawpa khingpui huphurhawm kha kan neih si chuan tlanbo mai lo chu a him tawkin kan hre ta lova; chuvangin naktuka i lo kal hunah pawh i sava bu huh tum chu a lo ram tawh ang. Thlalak chungchangah kha chuan a ruaitu che chu lungmuang takin a awm thei ang. Amah aia tha zawk kha ka hmangaihin ani pawhin min hmangaih e. Lalpa chuan a duh ang ang chu tibuaitu awm hlek lovin a ti thei tawh ang— a tibuaitu tur chu dik lo taka a lo chinleh tawh hnu pawh ni mahse. Tunhnu zela ka sahim nan thlalak hi chu ka lo kawl ve mai mai ang e. Thlalak pakhat ka hnutchhiah a, chu chu a kawl duh mai thei a ni; aw le, Pu duhtak Sherlock Holmes,

I rintlak ngawih ngawih,
Irene Norton, nee Adler.

Lalpa chuan, “A va’n ropui tak em!! Hmeichhe ropui chungchuang chu a va’n ni tak em. A ţuan a ţhain a tum a ruh in ti lo maw? Lalnu han ni tehreng sela a va’n inhmeh dawn tak em! Ka zawlpui tawk a lo ni lo hlauh hi chu a vanduaithlak ngawt mai tirawh u?” a’n ti a. Nelawm loh fe hian Holmes chuan, “Lalpa, ka hmuhdanin he nu hi i zawlpui tawk a ni lo takzetin ka hria. He thil hi hei aia lungawithlak zawk hian ka titawp thei ta lova, pawi ka ti em em a ni,” a han ti a. Lalpa chuan, “Ni lo, pu duhtak, kha aia lungawithlak kha a awm leh tawh chuang lovang. A thusawi tawh chu a bawhchhe lo reng reng ang tih ka hre chiang,” a han ti a.

Holmes chuan, “Chuti a nih chuan thlalak chu meipuia rawh ral tak daih ang a ni tihna a ni mai a. Chutia i ngaih theih chuan ka lawm khawp ang,” a lo ti a. Lalpa chuan a kut zungţanga lunghlu zungbun, rul lem anga siam chu a phawi a, a kutphahah chuan a’n dah a, “I lei ka ba nasa hle mai a. Engti zawngin nge ka rulh theih ang che. He zungbun hi...” a tih lai chuan Holmes chuan, “Lalpa chuan kha aia ka hlut zawk tur thil kha a nei,” a han ti a. Lalpa chuan, “Thu chauh sawi la a tawk mai,” a lo ti a. Holmes chuan, “He thlalak hi,” a lo ti ta khauh mai a. Lalpa chuan mak ti zet hian a’n en a, “Irene-i thlalak hi maw? I duh athu a ni mai,” a ti ta a. Holmes chuan, “Chuti anih chuan ka lawm e. He thil hi a tawp fel ta,” a han ti a. Lalpa chu a chhuak ta a.

Nia, chuti chuan a tawp ta a. Irene Adler-i, hmeichhia chuan Holmes chu a lo lehkhalh ta a ang hle mai. Han sawi chhuah nikhua pawh hian Holmes chuan, “Kha nu kha” a ti mai zel a. Irene Adler-i tihna a ni tih ka hre tho ţhin.

THE END.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » April 3rd, 2018, 7:54 pm

SHERLOCK HOLMES - THE RED-HEADED LEAGUE
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Nikum favang lai khan ni khat chu ka ţhianpa Sherlock Holmes ka va tlawh a; pa sa ţha deuh, hmai sen tal mai nen hian mûk deuhvin an lo titi a. Ka va bawhbuai avanga ngaihdam dil chungin chhuah leh mai ka’n tum a, mahse Holmes chuan min pawt lut a, kawng a khar ta nghal bawk a. Nêlawm fê hian, “My dear Watson, tun aia lo kal hun ţha zawk hi a thlan pawhin thlang dawn la i thlang fuh kher lovang,” a ti a. Kei chuan, “In laklawh emaw ka ti alawm maw le,” ka ti mai a. Ani chuan, “Kan laklawh tehmeuh mai le,” a ti ve mai a. Kei chuan, “Chuti pindan lamah ka lo va nghak ang che u,” ka’n tih chuan Holmes chuan, “Teuh lo mai, Mr Wilson, hei kan ţhianpa hi ka hnathawhna tam taka min puitu leh min hlawhtlinpui tawh ţhintu a ni a, tun ţumah pawh hian a ţangkai leh khawpin ka ring,” a han ti a.

Kan inleng pa sa ţha nelh nawlh chu chibai min bukin a’n bu zawk a. Holmes chuan thawnthu a ngaithla dawn tih inhriain a kutzungţang zawng zawng chu a’n insiktir ţhat a, a ţhu awn diai a, “Thutthleng dûpah khan ţhu rawh. My dear Watson, keimah ang bawkin nitin khawsak relna piah lama thil lo thleng leh maksak ang chi reng reng chi hi chu i tuipui ve tih ka hria. I tui tih chu i thil chhe te te min ziah chhuahsak ţhin avang hian sawi kher lo mahla a hriat mai,” a ti a. Kei chuan, “I chetdan hi keia tan chuan thu ngaihnawm ber a tling tlat alawm,” ka lo ti a. Holmes chuan, “Miss Mary Sutherland-in kan hmaa a harsatna rawn chhawpchuah ţum khan thil mak leh intu lo kan duh anih phawt chuan hringnun hi a tawngin kan tawng baw tur a ni, a suangtuaha suangtuah neuh neuh lovin, tia ka sawi kha i la hrerengin ka ring,” a ti a. Kei chuan, “Nia ka lo ringhlel kual vel a nih kha,” ka lo ti a.

Holmes chuan, “Nia, Doctor, i khati anih kha. Mahse ka thlirna tlang chuanin ka hmuh ang hmuh tum ve vat la a ţha ang, chuti lo chu i hmaah thudik ngat si, mak leh intu lo pui pui ka rawn chhawp ka rawn chhawp ang a, a tawpah ka ngaihdan chu a dik tih i pawm ve leh tho si ang. Mahse tunah zawng hei, Mr Jabez Wilson-a hian min rawn tlawh a, thil mak deuh mai a sawi pawh ka lo ngaithla tuk pum asin. Tunhmain thil lian tham leh ropui takah hian thil mak leh danglam a inphum chuang lova, thil tenau ber ber, suangsualna hnu-hma te tak te te inphumna hi a mak duh phian zawk tih ka sawi i lo hre tawh ngei ang a. A chang phei chuan suahsualna vung chhuah mang lo te hi a mak hlei hlei a ni duh khawp.

“Tuna ka han ngaihthlak chinah hi chuan suahsualna a inphûm telna awm reng reng ka la hre lova, a inphûm tel lo ti lahin ţawngkam khat pawh ka cheh ngam hek lo, mahse ka thu hriat tawhah chuan a mak pawl zawng a la ni ta ve ang. Mr Wilson, i ngilneihna han fawmkhawm la, i thusawi kha khawngaih takin han sawi nawn leh teh. Ka ţhianpa Dr Watson-an thil awm ţan dan a la hriat ve loh vang mai ni lovin a mak danglam em avangin thil awmdan kipkawi kha chiang taka hriat ka duh ve reng reng a ni. Ka tih ve dan phung pangaiah chuan thil awmdan tlangpui ka’n hriat ruak hian tunhmaa a anpui thil lo thleng tawh aţangin thil kaldan tur ka suangtuah thiam mai a, ngaihdan ka nei zui ţhin. Mahse tun ţum thil hi zawng, anpui nei âwm pawhin ka hre lo,” a ti a.

Kan inleng chuan inti pawimawh âwm fein a âwm a’n poh a, a kawrfual ropui tak mai ipte aţang chuan chanchinbu bal-chuar-chhe-zet hi a rawn phawrh a. A khup chunga chanchinbu zut pharh a, ngun tak maia eng ilo an tlangzarhna phek a’n bih lai chuan ka ţhianpa tih thîkin a incheina leh a landan aţang chuan eng ang mihring nge ni ang tih ka lo chhui ru ve neuh neuhva. Mahse chutia ka’n ti ta chuan hriat chhuah theih ka nei tam lo kher mai. Kan inlengpa chu Kumpinu khua leh tui mihring mi pangai tak ni maiin ka hre tlat pek a. Sumdawng, pa thau, pa che muang deuh ni berin ka hre mai!

Kekawr suk zin loh ngaithei hmel tak mai a ha a, a kawrfual dum lah tukţhuan hmeha han siam tel mai atana tin chhin chi loh tawpa tuihnai lutuk lo a ni bawk a, a kawrfual ropui tak mai hak lai chu a hmalam a kilh loh avangin chumi hnuaia a chakai khawrh kawr lo langa dar khaidiat, ‘Albert’ an tih ang chi lo lang leh a incheina atana a kawrhma thir tlem khaite chu a lang chiang hle a. A bul lawka ţhuthlengah chuan lukhum leh ruahhliap kawr a dah bawk a. A ruahhliap kawrnghawng pawh chu chuar ve nik nek tak a ni. Ka’n thlir neuh neuh pawhin a sam a sen hle a, a ngui hmelin a lungawi loh hmel hle tih bak chu engmah ka hre chhuak zo lo.

Sherlock Holmes-a mitmeng ţuanţha tak mai chuan ka mitmeng chhuiin ka rilru chu a lo man a, nui chungin a lu a’n thing a, “Han en thuaka hmuh mai theih chin, engemaw hun laia kut hna a thawh fe tawh thu te, sahdah a hmuam tih te Freemason (intihhlim nana mi vantlang chinin pawl an siam, mi lian leh lawk deuh chin tel ngai mang lohna-Pll) pawlah a tel tih te, China-ah a kal tawh tihte leh tunhnai deuh khan lehkha a ziak nasa hle tih te mai bak chu engmah ka chhût chhuak thei bik lo,” a ti ta mai a. A lehkha chiar lai hmet bet chungin ka ţhianpa chu kan inleng chuan a’n melh a, “Mr Holmes, chung thil chu engtinnge i hriat mai theih chu le? Engtinnge kut hna ka thawk tih kha i hriat theih chu le? Thlarau thianghlim thusawi ang maia dik lah ni, ka hna bul ţanna chu lawnga an bungsiam nih hna a ni,” a ti a.

Holmes chuan, “Ka pu, i kut kha maw le. I kut dinglam kha i veilam ai chuan a lian zawk fe a. I kut dinglam kha i hman rim ţhin avangin i veilam aiin a lian ta zawk a ni,” a lo ti a. Kan inleng chuan, “Anih leh sahdah ka hmuam thu leh Freemason a ka tel thu chu?” a’n ti leh a. Holmes chuan, “Khai chutiang lehzel ka sawi zawngin, ‘Min hmusit ţha duh lo,’ ti tein i thin a rim dah ang e. Mahse i kawrhma a i thir vuah mawi kha a kual kawi chi i hmang tih lo hre ve mai mai teh,” a ti mai a. Kan inleng chuan, “Ani tak, a inchuktuah dan hi a nalh zat lo a ni. Mahse lehkha ka ziah thu ve thung chu?” a’n ti leh a. Holmes chuan, “I kawrban hmawr dinglam kha a bel ţha tlet tlawt hle a, i kawrban veilam erawhchu a kiu bul, dawhkan i rinchhanna zawnah a bel ve daih thung a, chuti anih chuan thildang engnge i tih ang?” a ti leh ta mai a.

Kan inleng chuan, “A ni tak. Anih leh China ram ve kha?” a ti ta zel a. Holmes chuan, “I banrek dinglam chung chiaha sangha lem inchhu kha China ram kutchhuak a ni ngei ang. Hetianga taksaa thil chhut chungchang hi ka buaipui fe tawh a, eng eng emaw pawh ka ziak nual ve tawh bawk. Dal deuh reih rawiha sangha lem chhut ngat hi chu China lam kut chhuak a ni deuh ziah. Chubakah i sana ahna khaidiat aţanga China pawisa i khai ka’n hmuh kha chuan ka nih sual mai ni lovin ka tih sual thlengin ngaihdam a ni ta tih ka hre mai,” a ti a. Mr Jabez Wilson chu za deuh maiin a nui hawk hawk a, “Khai aw! A tirah kha chuan thil finthlak tak emaw i tih ka ti hman a, han hriat chuan thil danglam engmah a awm hlei nem,” a ti ta hlawl mai a.

Holmes chuan, “Watson, ka ti sual der niin ka hre ta. Hrilhfiah lo ila chu, ‘Hriat ve lohna hian a tiropui,’ tih hlate pawh hlim takin ka la sa thei tur. Hetia ka rinawm tluangtlam zel chuan ka hming chhete hi ka tithangtlawm khawlo zo vek ang tih ka hlau ta khawp mai. Mr Wilson, an thu tlangzarh chu i hmu ta lo em ni?” a ti ta a. An thu chhuah ziahna phek hmehbel pahin kan inleng chuan, “Ka hmu ta e. Hei hi alawm a bul ţanna chu. Ka pu, nangmahni’n chhiar ve mai teh u,” a ti a. Chanchinbu chu ka laksak a, ka’n chhiar ta a:

SAM-SEN PAWL HNENAH:

Lebanon, Pennsylvania, U.S.A a awm, Ezekiah Hopkins-a ngenna avangin tunah hian Pawla tel te tan chuan a hming chauh tak taka hna thawkin chawlhkar khatah ‘pound’ li a hlawh chhuah theih ta. Sam Sen, rilru leh taksaa mi hrisel, kum sawmhnih leh pakhat chunglam chuan an dil thei vek ang. Mahni ngei inlanin Thawhţan zing dar sawmpakhatah Pawl pisa a thawk, Duncan Ross-a hnenah dil tur a ni a, a dilna hmun chu 7 Pope’s Court, Fleet Street a ni.

Chu thu chhuah mak tak mai chu ţumhnih lai ka chhiar chhuak a, makti tak maiin, “Hei engnge a awmzia ni ta hê hû mai?” ka’n ti a. Khawvel thlarau a chan sân ve changa a awmdan pangngaiin Holmes chu a chek tlak tlak a, a ţhuthmunah a’n inher vel a, “Kha chuan feh kawng tluang pangngai a zui ve hlek lo mai tiraw? Khai le, Mr Wilson, i chanchin te, in chhungkaw chanchin te, he thu chhuahin a khawih danglam dante chu min han hrilh teh le. Doctor, a hmasain kha chanchinbu kha eng chanchinbu nge tih leh a chhuah ni han hre phawt teh aw,” a ti a. Kei chuan, “April ni 27, 1890 a chhuak, The Morning Chronicle a ni. Thla hnih kalta vel kha a nih chu,” ka lo ti a. Holmes chuan, “A ţha e. Khai le, Mr Wilson,” a’n ti a.

Jabez Wilson-a chuan a chal nuai pahin, “Mr Sherlock Holmes, ka hrilh ang che kha a ni mai. Khawpui bula Coburg Square-ah eng ilo zakhamna hmun (pawnbroker’s shop) ka nei a. Sumdawnna pui tham lo tak mai a niin tunhnai deuh phei hi chuan eikhawp ka hlawh chhuak ve chauh chauh a ni mai a. Tunhma chuan min puitu pahnih ka nei ţhin a, tunah chuan pakhat chauh ka nei tawh a. Ka mi rawih pakhat hlawh pe tur pawh hian hnadang thawh a ţul lo chauh a ni mai, mahse han zir ve a duh avangin hlawh chanve pawhin a thawk duh ve tho mai,” a ti a. Sherlock Holmes chuan, “He i mi chhawr hming hi engnge ni chu le?” a’n ti a.

Jabez Wilson chuan, “Vincent Spaulding a ni a, a naupang tawh tehchiam lo. A kum zah rin thiam har ve tak a ni a; Mr Holmes, a aia puitu ţha chu ka beisei lo tawp mai. Ka hnenah thawk lovin hmun dangah chuan thawk se ka pek theih zat lêt a hlawh chhuak thei lutuk ang tih ka hrechiang khawp mai. Mahse a hnaah chuan a lungawi ve tlat si a, eng aiah nge a lunghnualna tura ka hnar kher ang?” a ti a. Holmes chuan, “Uai, chu a va mak ve! Chutianga puitu ţha, vanram chhiahhlawh atan pawha iaiawm lo tur i’n nei chu i vannei takzet anih chu. Chutiang chu tun ang hun, khawvel bawlhhlawh lamah chuan hmuh tur an awm tawh hlei nem. I mi rawih chu i thu rawn keu chhuah aia a mak loh bikna pawh ka la hre rih lo,” a ti ta deuh ngat a.

Mr Wilson chuan, “Fel tawk lohna chu a nei ve tho mai. He mihring aia thlalak ngaina hi an awm kher lovang. A hna leh thildang ngaihtuah a ţul em em laite hian thlalakna lamah a intlakral zova, a thlalak siam turin pindan chhung-hnuai-khar-khipah a lut reng mai a ni. Hei hi a fel tawk lohna ber a ni a, mahse hna thawktu ţha tak zawng a ni ve tho mai. A ţhat tawk lohna han sawi tur a awm dang lo,” a ti a. Holmes chuan, “I hnenah a la thawk reng ang maw?” a lo ti a. Mr Wilson-a chuan, “Thawk e. Chhungkaw dang nei lova parawl ka ni ţhin a, hmeichhe pakhat kum sawmpali a upa, chaw chhum leh In tihfel vel buaipuitu leh Vincent Spaulding-a mai chu ka awmpui. Eng kan ni tham lova, kan khawsa ve chet chet a ni ber mai. Ba kan nei lova, ruah sur changa min hliaptu leh ni sa min do daihsaktu In chung kan nei ve a ni chauh mai.

"Min tibuaitu hmasaber chu kha an thu tlangzarh kha a ni. Ka hnena chawlhkar riat a thawhna tur ni chiahah Spaulding-a chu ka pisaah an thu chhuah keng hian a lo kal a, ‘Mr Wilson, ka sam a lo sen ve lo kher kher chu pawi ka ti mang e,’ a rawn ti a. Kei chuan, ‘Engati maw?’ tiin ka lo zawt a. Ani chuan, ‘Heta hi Sam-sen ţan Pawl-ah hna dang a awm leh ta anih hi. He hna hmutu tan hi chuan vanneihna tham a tling ngei ang, chubakah mihring daih bak hna thawh tur a awm ngeiin ka ring a, a buaipuitute pawhin pawisa thehthangna hre lovin lu an hiat buai ngei ang tih ka hria. Ka sam rawng hian lo zir ve hlauh se chu vanneihna huang chhungah ka pen lut thei ve mai tur,’ a ti ta zel a. Kei chuan, ‘Eng thil nge ni ta?’ tiin ka zawt ve ta zel a ni.

"Mr Holmes, ka hna chu awmhmuna thawh chi a ni a, hna thawh tur pan lovin ka hna chuan min rawn pan zawk ţhin a ni. Hemi avang hian chawlhkar engemaw zat chhungte hi kan kawngkapui kân lovin ka awm ţhin a. Chuvangin khawvel lehlamah hian engnge awm tih hre mang lovin ka awm ţhin a, thu thar han hriatte hi lawmawm ka ti thei em em ţhin a ni. Min melh reng chung hian, ‘Sam-Sen Pawl’ an tih hi i la hre ve ngai na nge?' min han ti a. Kei chuan, ‘Hre ngai lo tawp mai’ ka ti a. Ani chuan, ‘A va mak ve. A dil theitu zing ami i ni si a,’ a ti ta zel a. Kei chuan, ‘Anih leh hna hi lo hmu ta ila eng angin nge ka ţhatpui ang?’ ka’n ti a. Ani chuan, “Kum khatah ‘pound’ zahnih khat chu i neih belh ang a, midang nena inhnuh hnawk a ngai tampui tehchiam lovang,’ a ti a.

"Ka sumdawnna chu a fuh vak loh avangin pawisa han neih belh leh mai chu ka chak ta em em a, ka beng ka chhi ngun lehzual ta a. ‘Thil awmdan min han hrilh chiang teh,’ ka ti ta a ni. Ani chuan an thu tlangzarh min han entir pah chuan, ‘Hei an thu chhuah hi han en la, hna ruak a awm a, a dilna hmun tur pawh a inziah hi. Ka hriat phak ve chinah chuan he Pawl hi Ezekiah Hopkins-a din a ni a, ani hi American mi hausa tawntaw, pa ti kher kher tak mai a ni. Amah pawh sam sen a ni a, sam sen reng reng chu a lainat vek. A thih dawn pawhin a sum chu midang hnenah hlanin a sam rawng ang pu mite hmakhaw ngaia an ţhatna tur tih nâna hmang zui turin a chah fel vek a. Ka hriat ve phak chinah chuan he an hna tlangzarh hi tlemte thawh a, tam tak hlawhna tur chi a ni,’ a ti ta a.

"Kei chuan, “Mahse sam-sen zinga he hna diltu hi a chhiar sen loh têl an awm ngei ang,’ ka ti a.
Spaulding-a chuan, 'I ngaih ang em ema tam chuan an dil kher lovang. London a cheng, puitling chin chauhvin an dil thei a ni. He American pa hian London-ah bul a ţan a, chuvangin London khawpui mite hi engemaw han tihsak a châk ve ta tlat a ni. Chubakah i sam hi a sen da deuh emaw, a sen duk deuh emaw lo ni se chu i dil buai vak a ngai lovang. Mahse i sam hi a sen lâr ber chi a nih avang chauhvin i dil thei a ni. Mr Wilson, i dil duh phawt chuan va inlan ve tawp mai la i hlawhchham hauh lovang; mahse ‘pound’ zahnih khat lek lakluh belhnan i intihhah peih loh chuan thudang le,’ a ti ta zel a.

“Hei in hmuh angin ka sam chu a sen nasat thu-hlaah chuan sawisel bova sen chiang ve a ni a, midang nena sam sen zâwnga inel râlah chuan tumah huphurh ka nei bik lova ni. Chuvangin Vincent Spaulding-a chu dawr khara min zui ve turin ka hrilh a, ani lah chu chawlh a hmuh theih dawn avangin a lo lawm ve tumhrang a, a hmun min kawhhmuhna lam chu kan pan ta a ni. Mr Holmes, chumi ţuma ka thil hmuh ang chu ka hmuh leh pawh ka ring tawh lo. Chhak, thlang, chhim leh hmara sam sen pu mihring awm zawng zawng mai chu an rawn inhâwr khawm a, Fleet Street te chu sam sen lu hlir hian a khahin a khat tlat a, serthlum zawrhna hmunte pawh min hriat chhuahtir rum rum mai.

"Sam sen chi hrang hrang pawh a tam ngei mai, buhpawl sena sen, serthûr rawng, serthlum rawng, leirawhchan rawng, nau-ek sena sen, bawng thin sena sen, tlak lei sena sen, a....sen chitin mai a ni. Mahse Spaulding-a sawi angin ka sam anga sen lâr ţha chu a tam tehchiam lo. Chuti taka mihring an tam avang chuan va inrawlh buai ve loh mai chu ka’n tum deuhva, mahse Spaulding-a ngaihdan a ni ve hauh lo mai a. Theih ang anga mipui nêkin pisa bul hnai min thlenpui a. Pisa kailawn bulah chuan tlar hnihin an lo inzui a. Tlar khat chu beiseina nena pisa lut turte an ni a, tlar khat leh chu hlawhchhama pisa rawn chhuahsantute an ni thung,” a’n ti a.

Sahdah hmuama kan inlengpa a’n chawlh lailawk zawk chhung chuan Holmes chuan, “I thil tawn chu thil danglam tak leh ngaihthlak nawm tak a nih chu le. I thu sawi ngaihnawm tak chu han sawi zawm zel teh le,” a lo ti a. Kan inlengpa chuan, “Pisa chhungah chuan eng thil vak mah awm lovin thing ţhutthleng vawnban nei leh dawhkan mawi tak a awm a, chumi bulah chuan pa te reuh te pakhat kei aia sam sen ţha zawk mah tur hi a lo ţhu a. Hna diltu lo kal apiang mai chu tawitein a lo bia a, an tlin tawk lohna sawi tur hi a lo hre ziah mai lehnghal a, hna chu chuti maia awlsama hmuh theih niin a lang lo.

“Mahse ka inlan ve hun a lo thlen chuan chu pa te takte chuan min duhsak hle niin ka hria. Kan inbiak fel theihnan kawngka a khar a. Ka hnuaia thawkin, ‘Hei hi Mr Jabez Wilson a ni a, Pawla hna ruak hi luah a duh a ni,’ a’n ti a. Chu pa te takte chuan, ‘A tlin khawp ang chu,’ a lo ti a. Chutah, ‘Kan duh ang chiah a nih hi, hetiang hi kan hmu phak ngai ang tih ka lo beisei pha lo reng reng,’ a ti ta mai a. Ka sam chu min tizak tham rawiha rei a’n thlêk a. Chutah ka kut thingin chibai min bûk ta lâwp lâwp a. Ka hnenah chuan, ‘Muanchan chu thil fel a ni lovang. Mahse fimkhur tluk a awm lo tih min lo hriatthiampui ang che,’ tih pahin a kut khinghnihin ka sam chu a’n pawt ta chiam mai a, a dim tak miah loh avangin na tiin ka ţe ta chûl a.

"Chutah, ‘Kha i mittui pawh a tling alawm. A khati ang tih chu ka hre tho nain fimkhur theih tluk a awm lo a ni. Sam lem rawn vuahin samah rawng an rawn hnawih a, ţum hnih ngawt min rawn bum tawh tlat. Ţhenkhat chuan pheikhawk siamin rawngsen an hmante hi an rawn inchulh vel thul nen, mihring khawsak hi a herh tenawm ţhin asin,’ a ti a. Tukverhah a va dak a, a râwl tâwp hian hnaruak hnawhkhah a nih tawh thu a va aupui a. Sam sen pungkhawm pawh chu an ţin ta dûl dûl a, a tawpah chuan kan pahnih chauh chuan kan awm ta a. Ka hnenah chuan, ‘Ka hming chu Duncan Ross a ni a; rosum min hnutchhiahtu chawmhlawm zinga pakhat ka ni. Mr Wilson, nupui i nei tawh em? Chhungkuain em ni i khawsak?’ min han ti a.

"Kei chuan nupui ka neih loh thu ka lo hrilh a. Chu thu ka’n sawi chuan a hmel chu a ngui nghal rawihin ka hre mai. Ka hnenah chuan, ‘Pek hian aw! Thil pawi tham tak anih chu le! He pawisa hi sam sen chawmlen nan leh sam sen punna atana tih asin ni. Tlangval i lo la ni hlauh chu a vanduaithlak kher mai,’ a ti ta bawrh bawrh mai a. Mr Holmes, chumi thu ka’n hria chu ka hnual ve rawih mai a, hna ruak chu ka luah thei lo takngial dawn hian ka hre tawh a. Mahse reilote a’n inngaihtuah hnu chuan thil a fel vek mai ang tiin min hrilh zui ta mai a ni. Ka hnenah chuan, ‘Mi dang chu ni la chu hei hi thil pawi tham tak mai tur a ni a, mahse i sam rawng ang pu tan hi chuan duhsakna kan lantir ve pawh a thiang ta ve ang. I hna thar chu engtikahnge i thawh ţan theih ang?’ a ti a.

"Kei chuan, ‘A, a buaithlak ve riau a ni, sumdawnna enkawl lai ka lo nei ve khanglang vei nen,’ ka ti a. Vincent Spaulding-a chuan, ‘Mr Wilson, chu zawng ngaihtuah buai duh suh. Chulai chu ka lo tih felsak ang che,’ a ti a. Kei chuan, ‘Hna thawh hun chhung chu engtiang nge ni ang?’ tiin ka’n zawt a. Ani chuan, ‘Dar sawm aţanga dar hnih,’ tiin min chhang a. Keini ang, eng ilo zakhamna dawr neitute hi chu tlailama hnathawk kan ni deuh ber a (Tlailam - ka lo theihnghilh ţhin a, sapho tlailam hi chuan dan naranin zan dar kua te hi a huam thleng ţhin. Mizo ţawng chuan ‘zan rei hma’ tih nen hian a inlet teuh zawk ta ve ang. Pll) Ningani leh Zirtawp tlai te angte hi buai hun lai tak a ni.

“Chuti anih chuan puitu ka nei ţha bawk a, buai hun lai chuan hna ka thawk hman tho dawn a, ka thawh hman loh chhung chuan a lo tifel thei ang tih ka hre bawk a ni. Chuvangin, ‘Chuti anih chuan ka tan a remchang khawp ang chu. Hlawh lam te?’ ka’n ti nghal a. Ani chuan, ‘Chawlhkar khatah ‘pound’ li a ni ang,’ a ti a. Kei chuan, ‘Hna?’ ka’n ti leh a. Ani chuan, ‘A hming mai a ni,’ a lo ti sam mai a. Kei chuan, ‘A hming mai i tih chu engnge ni chu le?’ ka ti ve ta a. Ani chuan, ‘Pisa chhungah emaw, pindan chhungah emaw, i thawh hun chhung zawng chu awm a ţul ang. I chhuahsan vaih chuan i nihna i hloh nghal a ni mai. Hemi chungchang hi thurochhiah chuan a sawi chiang khawp a ni. Pisa In i chhuahsan chuan kan inrawihna thuthlung i bawhchhia tihna a ni ang,’ a ti a.

“Kei chuan, ‘Nikhatah darkar li chauh a ni bawk a, pisa huam chhung chu ka chhuahsan ka ring lo,’ tiin ka chhang a. Ani chuan, ‘Eng chhuanlam mah a ţha tawk thei lovang. I dam loh vang emaw, i hna chungchang emaw pawh chhuanlam a tling thei lovang. Pisa chhungah i awm ringawt mai emaw, i hna i kalsan tawp emaw, a eng zawk zawk emaw chu i thlan a ngai nghal ang,’ a’n ti leh a. Kei chuan, ‘Eng hna nge ka thawh ang?’ tiin ka zawt a. Mr Duncan Ross chuan, ‘Encyclopaedia Britannica i ziak chhawng ang. A ţhen khatna chu khalaiah khan a awm a. Lehkhatui, kawlawm leh nemhulna te chu i intum chawp a ngai ang a, mahse he ţhutthleng leh dawhkan hi chu kan tumsak ang che. Naktukah i inpeih thei ang em?’ a ti a. Kei chuan, ‘Thei lutuk ang,’ tiin ka lo chhang a. Ani chuan, ‘Anih leh Mr Jabez Wilson, mangţha rih le, vanneihna i tawn avangin ka’n lawmpui leh ang che,’ a ti ta a.

"Pindan aţang chuan chhuakin ka mi rawih nen chuan In lam kan pan a, ka lawm luat avangin sawi tur pawh ka hre meuh lo. Thil awmdan chu ka’n ngaihtuah zui a, inbumna thil emaw, fiamthu bawnra tak emaw anih ka ring rum rum mai. Mahse eng vangin nge min bum ngawt ang tih ka hrethiam phak si lo. Encyclopaedia Britannica ziak chhawnnan ringawt a sum tam tham hnutchhiah chu awihawm lo tak a ni. (Encyclopaedia Britannica - En-sai-khlaw-pi-dia Bri-ta-ni-ka - Hmasang aţanga mi hmingthang leh eng ilo dang, tunlai thleng pawha thil hmingthang hriata kan hriat tur chi bakah arsi leh sava chanchin thleng pawh an ziahna bu a ni. Aizawla Library hrang hrang pawhin an nei a, ngaihnawm tak leh chhiar manhla tak a ni. Pll)

“Vincent Spaulding chuan min chawh hlim tumin a theih ang ang chuan min ţawng thlamuan a, mahse ka ngaih a ngam thei zat lo. Mahse a tuk khua a lo var chuan eng thil nge ni tehreng tih hriat tumin kawlawm leh lehkhatui ka lei a, lehkhapuan ka lei bawk a, Pope’s Court (Pawps Kawt? Pll) lam ka pan ta a. Mahse thil engkim chu a nihdan tur ni awm takin a lo awm thlap a. Ka dawhkan tur a lo inhûng a, Mr Duncan Ross pawh chu hna ka thawh leh thawh loh en turin a lo awm bawk a. Hawrawp ‘A’ aţangin min ţantir a. (An lehkhabu hi A AW B indawta ziak a ni. Aihniara, Aivunga, Aizama tiin a phei ang a, chutah Bawkkuaia, Bengkhuaia, Chawngbawla, Chawngduma....tiin a kal zel ang. Pll)

“Chawhnu dar hnihah min hawtir a, ka thil ziah chu a ţhathnem tham avangin min fak ve nual nghe nghe a, ka haw hun chuan pisa kawngkhar pawh a khar ta nghal a ni. Chutiang chuan ka thawk nitin ta mai a. Chawlhkar khat a lo ral chuan ka hlawh tur ‘pound’ khat tlang pali min pe a. Chawlhkar dawt leh-ah pawh chuti bawk chu a ni chho ta zel a. Tuk tinin ka hnathawhna hmun chu dar sawmah ka thleng a, dar hnihah ka chhuahsan leh ziah bawk a. Nikhua a lo rei phei chuan Mr Duncan Ross chu zingah vawi khat a lo lang a, a bak chu a lo lang leh ta ngai lo reng reng a. Mahse ka ţhuthmun chu ka thawhsan ngam ngai chuang lo. A chhan pawh hlawh a ţha angreng si a, ka hna chu hloh ka phal ngang lo a ni.

“Chutiang chuan chawlhkar riat chhung ka thawk a, Abbots (Puithiam chi) te, Archery (Thlakah lam) te, Armour (Ar-mawr-Indona hmanrua) te, Architecture (Ar-khi-tek-char-In sak lama thiamna) te leh Attica (A-ti-ka-thil tha mi, ţawngah pawh dik leh mawi lawrkhawm) te ka ziak-chhawng ta vek a. Hawrawp ‘B’ ah ka kai thuaiin ka inring nghe nghe a. Lehkhapuan leinan pawh engemawzah ka sengin ka ziah sa pawh tihtham fe a ni. Chutah ka thil chu a lo tawp ta thut a,” a’n ti a. Holmes chuan, “A tawp a?” tiin a zawt a. Wilson-a chuan, “Ni e ka pu. Tukin zing khan a tawp ta a ni. Ka hnathawhna hmunah chuan dan pangngaiin ka va kal leh a, mahse a kawngka a lo inkhar a, a kawngkharah chuan lehkhakhawng a lo inkilh bet a. Han chhiar ve mah teh u,” tih pahin lehkhakhawng var a rawn lek chhuak a. Lehkhapuan pangngai tiat vel tura hlaiah hian :

SAM SEN PAWL
CHU
TIHTAWP A NI.
October ni 9, 1890

tiin a lo inziak a.

Chu thil chu Sherlock Holmes nen chuan kan thlir reng a, mahse a nuihzatthlakna kan man ta a ni tehchêk ang chu, za deuh maiin kan nui dun ta hawk hawk a. Kan inlengpa chuan, “A nuihzatthlak awm lai reng reng ka hre ve lo mai. Min nuihsawh chauh lo hi tih theih dang in nei lo anih chuan hmun dangah ka kal mai nang e,” a ti ta mai a. A tho uaih tawh nem ţhut leh pah chuan Holmes chuan, “Ni lo, ni love. I chungchang hi buaipui lo turin inthâwina suak hlanin phuahchawp rawngbawltute ţap chiam mahse ka buaipui lutuk ang che. A mak danglam em atin ni. Mahse, lo ngai haw lem lo la, a nuihzatthlak ve tlat alawm. He an lehkha târ i hmuh hnu chuan engnge i tih tak chu le?” a’n ti a.

Kan inlengpa chuan, “Tihngaihna vak ka hre lo. Pisa-ah mimal hnenah thil awmdan ka’n zawt vel a, tuma’n an hre lo. Chu In neitupa ngei pawh chu ka zâwt a, Sam Sen pawl a la hriat ngai loh thu min hrilh tlat a ni. Mr Duncan Ross lah chu a hriat ngai mi a ni lo lehnghal,” a ti ta a. Kan inlengpa thusawi chu kan lo ngaithla reng a. Ani chuan, “Chutia a hriat ngai mi a ni lo tih a’n sawi chuan kei chuan, ‘Pindan Number 4-na luahtu kha maw le,’ ka’n ti a.

"Ka mi biak chuan, ‘E, kha sam sen kha maw?’ tiin min zawt a. Kei chuan, ‘Ni e,’ tiin ka lo chhang a. Ani chuan, ‘A, a hming chu William Morris anih kha. Ukil a ni a, a In luah tur ilo vel a tihfel tak tak hmain a lo luah hawh ve mai mai anih kha. Nimin khan a chhuak tawh alawm,’ a ti ta mai a. Kei chuan, ‘Khawiahnge ka hmuh theih ang?’ tiin ka zawt zui ta zel a. Ani chuan, ‘A pisa luah tharah maw le. A pisa awmna hmun pawh min hrilh, St. Paul’s (Seint Pawls) bul, 17 King Edward Street-ah a awm,’ a ti ta a.

"Mr Holmes, chu lam chu ka pan a, mahse chumi hmun ka va thlen chuan thil siamna hmun a lo ni a, khup-dam (knee-cap-ni kap Pll) siam chhuahna hmun mai a lo ni. Tumah lah chuan Mr William Morris emaw, Mr Duncan Ross emaw an lo hre ngai miah lo lehnghal,” a ti a. Holmes chuan, “Tichuan engtinnge i tih tak?” a lo ti a. Kan inlengpa chuan, “Ka In awmna lam, Saxe-Coburg Square-ah ka haw a, ka mi rawihpa chu engtia tih tur nge ni ang tih ka zawt a, Ani pawh chuan tihngaihna a hre bik vak lo. Ka nghah deuh chuan dâkah thil awmdan hrilhfiahna ka dawng mai ang tih min hrilh a ni. Mahse Mr Holmes, chu zawng ka duhtawk tlat lo. Ka hna kha a ţha ve tawk em mai a, hloh mai ka tum lova, nang hian thurâwn ţha tak tak i theh chhuak thei ţhin tih hriain i hnen ka rawn pan ta a ni,” a ti ta a.

Holmes chuan, “I thil tihdan a fing khawp mai. He thil hi ka buaipui châk zawng tak a ni a, buaipui tlak tak a ni bawkin ka hria. A landan aia thil lungchhiatthlak zawk hi a inphum tel ang tih a rin theih hle a ni,” a ti a. Kan inlengpa chuan, “A lungchhiatthlak tawk takmeuh mai. Chawlhkar khatah ‘pound’ li zel ka hloh zar zar dawn a nih tak hi,” a lo ti a. Holmes chuan, “Nangma mimal thilah chuan he Pawl chunga lungawi lohna han nei tur i niin ka hre lo. Tih tak takah phei chuan ‘pound’ sawmthum velin i hlawkpui a, chubakah thil hming, ‘A’ a inţan chi engemawzah chu a awmzia i hriat belh bawk a. Engmah i hloh hlei nem,” a ti ta tlat a.

Kan inlengpa chuan, “Chuti lam a ni lo ka pu. He an fiamthu thawhna hmanruaah hian min hmang a, eng vanga hetia ka chunga fiamthu thawh nge an nih hriat ka duh tlat a ni. An fiamthu hi an tan chuan ‘pound’ sawmthum leh pahnih man zeta to a ni tih pawh ka hria,” a ti sauh sauhva. Holmes chuan, “Mr Wilson, he thil hi chinfel kan tum ang chu. A hmasain zawhna pahnih khat – He i mi rawih, an thu tlangzarh kawhhmuhtu che hi, eng chen nge i hnenah a thawh tawh?” a’n ti a. Mr Wilson chuan, “Min kawhhmuh vel lai chuan thlakhat a thawk tawh ang,” a lo ti a. Holmes chuan, “Engti tihin nge a rawn intah luh?” a ti a. Wilson chuan, “Hnathawktu tur ka duh thu ka tlangzarh a, a rawn inzuar ve alawm,” a ti a. Holmes chuan, “Amah chauh chu em ni diltu?” a ti leh a. Wilson chuan, “Ni love, dawrzawn khat laiin an dil,” a ti a.

Holmes chuan, “Engatinge i rawih?” tiin a zawt leh a. Wilson chuan, “A zei bakah a rawih man a tlawm bik a,” a ti a. Holmes chuan, “Hlawh chanve chauh pawhin a thawk duh a tiraw?” a lo tihpui a. Wilson chuan, “Ni chiah e,” tiin a chhang a. Holmes chuan, “He Vincent Spaulding-a hi eng ang mi nge?” tiin a zawt ta zel a. Wilson chuan, “Pate deuh, sa ţha deuh tak, che rang tak, hmui hmaia hmul awm lo, kum sawmthum bawr vel a ni. A chal vun a var lek lek,” a ti a. Makti awm deuh mai hian Holmes chu a ţhu ngil zawt a. “Ka lo ring vel reng a ni. A beng inverh kha i lo hmu ngai em?” tiin a zawt ta hial a. Wilson chuan, “Hmu e ka pu. A tleirawl laiin mi vakrawlai (gypsy) pakhatin a verhsak ni awmin a sawi,” a ti a.

Holmes chuan, “A lo nih tak chu le! I hnenah a la awm reng a maw?” tiin a zawt leh ta a. Wilson chuan, “Awm e ka pu, ka rawn kalsan a,” a ti a. Holmes chuan, “I awm loh hlan chuan i sumdawnna chu a lo enkawl a?” tiin a zawt ta zel a. Wilson chuan, “Ni e ka pu. Mahse a fel khawp mai. Zinglamah hi chuan thawh tur a awm vak ngai lo,” a ti a. Holmes chuan, “Mr Wilson, a tawk rih ang. Ni hnih khat hnuah chuan ka ngaihdan ka hrilh ve thei mai ang chu. Vawiin hi inrinni a ni a, thawhţanni-ah chuan thu tawp kan vai thei ngeiin ka ring,” a ti ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » April 4th, 2018, 12:10 pm

SHERLOCK HOLMES - THE RED-HEADED LEAGUE
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last)
(Rozami Pachuau)

Kan inlengpa chhuah hnu chuan Holmes chuan, “Watson, engtinnge i lo ngaih ve le?” tiin min zawt a. Kei chuan, “A awmzia ka hre lo tawp mai. Thil mak ber pawl a ni,” ka ti a. Holmes chuan, “Tihdan pangngaiah chuan a mak poh leh a fel sam ngai. Thil satliah mai mai hi a buaithlak zawk zel ţhin. Chutiang bawkin hmel vantlang lutuk hi chu hrilhfiah a harin hriatreng pawh a har bik ngai. He thil hi chu ka bawhzui ran a ţha ang,” a ti mai a. Kei chuan, “Engnge i tih ang?” tiin ka’n zawt a. Ani chuan, “Mei ka zu dawn. Vaibel beng thum chu zuk zawh a ngai ngei ngei ang. Darkar khat chhung chu min be hlek lo turin ka duh che a ni,” a ti a. A ţhutthlengah chuan a inkual a, a khûp lawk tak chu a hnar kawm vûn mai bulah a tawm chhova, a kuaite dum rîn rên chu sava hmui ni awm takin a pet lawr vah a, a maimitchhing diar diar a.

Chutianga rei tawk tak a awm hnu chuan a muhil ta ni ngeiin ka hria a, mahse thawklehkhatah a lo zuang tho phut a, a kuaite chu chhuarah a dah nghal a. Ka hnenah chuan, “Vawiin chu chawhnu lamah Sarasatean St James’s Hall-ah rimawi an tum dawn asin. Watson, kal i duh ve em? I damlo awmkhawm chu reilote tal i kalsan thei lo maw?” a ti ta mai a. Kei chuan, “Vawiin chu tihtur engmah ka nei lo. Ka hna hi a hautak lo thei khawp mai,” tiin ka chhang a. Holmes chuan, “Chuti i lukhum han khum la i kal teh ang. Khawpui han tan tlang hmasa ila, chutah chaw chhun chu kan tlalam mai mai dawn nia. An rimawi tum turah hian German rimawi a inzep nuai a, Italian emaw, French lam rawngkai chi emaw ai chuan ka ngaina mah zawk a ni. An rimawi hian mi a fan a, kei lahin fan vel ka duh bawk si. Tirawh le!” a ti ta chung mai a.

Aldersgate thlengin lei hnuai kawngah kan kal a. (London-ah chuan leihnuaiah rel an tlantirin ‘bus’ te pawh a tlan tih hria ila. Pll) Chutah kein tawi te kan kal a, Saxe Coburg Square kan thleng a. Chulaiah chuan In chhawng hnih nei hi tlar liin an lo sa a, a bul vel chu a ţawpin han en mai pawhin mihring chawktho thei leh tiphur thei lam aiin tingui thei lam chiin a khat a. An Inte pawh chu leirawhchana sak a ni ve hlawm nain a tualzawl awmchhun leh ilo vel chu a ţawp tih mai loh chu han sawidan dan vak a awm lo. Kil deuh takah chuan “JABEZ WILSON” tih hi kawngkhar pakhat lu chungah a lo intar a.

Chu kawngkhar hma lawkah chuan Sherlock Holmes chu mitmeng fiah tak nen a ding a, ngun deuh maiin a en vel a. Chutah kawtthlerah a’n vei vel a, chu In lamah bawk chuan a kir leh a. Chu In bula kawngkam chu a tiangin vawihnih vawithum vel a’n chhun dawt dawt a.
Holmes chuan Wilson-a kawngkhar chu a va kik a, pa hmai fai deuh, fel hmel fahran mai hian a rawn hawnsak a, leng lut turin a’n sawm nghal zaih a. Holmes chuan, “Ka lawm e. Heta ţanga Strand kalna kawng ka’n zawt duh mai che ania,” a ti ta lekfang a. Chupa chuan kawngka khar pahin, “Dinglamah peng pathumna, veilamah a palina,” ti chauhvin a lo chhang a.

Kan kal leh hnu chuan Holmes chuan, “Kha mihring kha, ka ngaihdan chuan London khawpuia pa fel ber palina a ni hial ang, pathumna chuh a rilruk leh rilruk loh chu ka hre hauh law. A chanchin ka hre nual tawh,” a ti niah niah a. Kei chuan, “Hre tawh awm teh e. Mr Wilson-a mi chhawr a ni a, he Sam Sen Pawl chungchang-ah hian engemawchen chu tel vena a nei tlat alawm. Amah i hmuh theih nan, i va be thlithlai vel mai mai tih ka hre mai,” ka’n ti a. Holmes chuan, “Amah ka hmu duh hlei nem,” a lo ti khauhva. Kei chuan, “Anih leh engnge i hmuh duh?” tiin ka zawt a. Ani chuan, “A kekawr khûp,” ti chauhvin min chhang a. Kei chuan, “Anih leh engnge i hmuh tak?” tiin ka zawt ta zel a.

Holmes chuan, “Ka beisei ang chiah ka hmu,” a ti mai a. Kei chuan, “Engatinge kawngkam kha i tianga i chhun?” tiin ka zawt zui leh a. Holmes chuan, “My dear doctor, tun hi thil enchian hun a ni a, ţawng tuitam hun a ni love. Hmelma ramah enthlatu angin kan awm anih hi. Tunah chuan Saxe-Coburg Square chu kan hmu ta a, a hnunglamah engnge awm tih i en ve thung teh ang,” a ti ta a. Saxe-Coburg Square hnunglam emaw ni chu a dang zar mai. Kan kalsan tak hmun ang lo tak maiin sumdawnna leh eng ilo, khawpui tihulumtu hlir maiin a lo zi nuai nuai nuai a. Mi lah an ţhahnem em em a, lirthei lah a insul zut zut bawk. A inthlauhdan han hmuh chuan mihausa bathlara kutdawh thute pawh min hriat chhuahtir rum rum mai.

Kawtthler sir khata dingin Holmes chuan, “Khawinge, i’n bih chiang teh ang aw. In indawt hi hriatreng ka duh mai a ni. London khawpui hriatchian hi ‘picnic’ ai chuan ka tuipui zawk. Sawlaia saw vaihlo zawrhna, a piahah chanchinbu zawrhna, Suburban Bank, sa ei lo mite leh in tur lamna dawr, tawlailir sakna hmun. A bak chu thler dang a ni leh tawh. Khai, Doctor, kan hna kan zo ta, rilru tizangkhai thei zawnga nun kan chen ve a dik tawh ang. Thingpui no dawmin chhang keih lerh lerh ila chutah vaiţingţang rimawiin suangtuahna khawvelah min ûm lut sela, hlim leh thlamuang taka thlarau chawlhtir duhna rilru i pu der thut thut teh ang. Chutah chuan sam sen tih ang reng velin min chimbuai tawh lovang,” a ti ta a.

Ka ţhianpa chu rimawi ngaina tak mai a ni a, amahin rimawi hmanrua a chulnel bakah a phuahte thlengin a thiam tel bawk a. Chawhnu zawng mai chu rimawi khawvelah chengin nuamti em emin a kut chu a phût hliau hliau reng a. A hmel lah chu uisathiam Holmes-a, pa thluak fim ber, misual buru pui pui tukdaitu hmel ni awm lo fahranin a dam diai mai. Chutihlai ngat chuan Holmes chu misual hnu chhuitu ni lovin hlaphuah thiam a ni zawk tlat. Nia, Holmes hi zawng, ţhutthlenga a’n ţhut kual rum mai a, engmah ti mang lova ni tam a’n awm hian a huphurhawm zual ta chauh ţhin a ni.

Mi tam tak chuan pa zawmthaw leh pa âwm nêm angah ngaiin pindan chhunga tawm churuk reng mai turah an ngai thei hial ţhin ang. Mahse ţhutthleng aţanga duhtawka thil a’n ngaihtuah a, a suangtuahna khawvel chu a taka chantir tura puanven a’n sawichhîn chiah hian a hahdamna zawng zawng ai kha thahrui a’n sawmkhawm a, a rilru tha leh a tisa tha han ţangkawp chu rapthlak khawpin a lo chak ta ţhin a ni. A hriatna zawng zawng, a thahrui zawng zawng bakah a suangtuahna zawng zawng chu a hmaa tihtur hlen chhuah tumnan a hmang ţhin tlat alawm. Chumi ni chawhnu a rimawi khawvela a’n cheng hmel ka hmuh pawh chuan a duh loh zawnga khawsa, chhui chhuah a tum mek tan chuan a Hebrai ţawnga ‘hun khirh tak’ an tihte pawh chu a hnai viau a ni tih ka hre mai.

Chulaia an intihhlimna hmun kan chhuahsan chuan Holmes chuan, “Doctor, i haw tlang nghal ang maw?” tiin min zawt a. Kei chuan, “Haw tlang ila a ţha ang,” tiin ka lo chhang a. Ani chuan, “Helaiah hian tihtur ka nei a, engemawchen chu ka buaipui a ngai ang. Coburg Square a thil inmung hi a namai lo viau a ni,” a ti a. Kei chuan, “Engti namai lovin maw?” tiin ka’n zawt a. Ani chuan, “Thil sual lian tham tak tih tumin an relbawl vel mek a ni. A hun takah kan tlak khalh hman ang tih erawh ka ring tlat. Vawiin hi Inrinni a lo ni kher kher hian a tichingpen alawm maw le. Zanin chu min puih ka ţul mai thei a ni,” a ti a. Kei chuan, “Eng hunah maw?” tiin ka zawt a. Ani chuan, “Zan dar sawm vel chu a tawk mai ang,” ti ngawtin min chhang a. Kei chuan, “Zan dar sawmah Baker Street-ah ka awm ang,” ka ti ve ta a. Holmes chuan, “A ţha nasa e. Doctor, nupui fanau neite tan chuan puakruk ken a chi viau ang, chuvangin i sipai puakruk kha i rawn paipawn mai mai dawn nia,” a ti a; mipui karah chuan a pilbo ta a.

Thil awmzia chu kan ţhenawmpa aia ka hriat bikna reng reng ka hre hauh lo mai. Sherlock Holmes-a hnung ka zui a, a ngaihthlak zah ka ngaithla a, a hmuh zah ka hmu ve bawk a, mahse a buaithlak a ni. Keiin engmah ka hmuh thiam a, ka hriatthiam ve loh laiin Holmes chuan thil thleng mek a hria a, eng thil nge lo thleng leh tur a hmu thiam tlat mai. Kensington a ka chenna hmun ka thlen pawh chuan thil awmdan ka ngaihtuah zui zel a, mahse ka hrethiam ve lo reng reng. Sam sen pakhatin lehkhabu pakhat aţangin eng ilo a ziak chhawng a, chutah Saxe Coburg Square kan va tlawh a, tihtur ngaihnobei lo zet a awm thu min hrilhin Holmes a kalbo leh ta. Eng vangin nge hriamhrei ka paipawn chhuah ang? Khawia kal tur nge ni a engnge kan tih dawn? Jabez Wilson-a mi chhawr kha pa sual buru tak zawng a ni phawt ang. Mahse a engmah chu ka hrethiam ve tak tak chuang lo.

Ka chenna hmun aţang chuan zan dar kua leh minit sawmpangaah ka chhuak a, Park (In leh dawr awm lohna hmun awl remchang lai, mipui vantlang tana zuah bik. Pll) kaltlangin Oxford Street-ah ka chhuak phei a, ka tan tlang leh hnuin Baker Street-ah ka lut ta a. Holmes-a chenna In kawngkhar bulah chuan tawlailir pahnih a lo ding a, chumi bula ka kal lai chuan chunglam aţanga inbe thawm ka hria a. In chhunga ka va luh chuan Holmes chu mi pahnih nen hian an lo titi bawrh bawrh a. Mi pahnih zinga pakhat zawk chu Peter Jones, ‘police’ a ni tih ka hria a. A pakhat zawk, hmai dung sei deuh, mitthi vui haw lam hmel pu, lukhum tle zet mai khum, kawrfual chhe lo zet inbel chu ka hriat zawng a ni ve hlek lo mai.

Holmes chuan chhuar aţanga a ramvah tiang lak thlak a, a kawrchung kilhna kilh ţhat pah chuan, “Ha! kan kim ta e. Watson, Scotland Yard lam mi Mr Jones hi chu i hria ang chu maw? Zanina kan thiltihnaa tel ve tur Mr Merryweather nen hian inhmelhriat ve teh u,” a’n ti a. Jones chuan, “Doctor, kan tla za leh dawn ta anih hi. Hei kan ţhianpa hi hetiang thilah hi chuan a ţuan a ţha fu mai. Midang hi a va chhaih thinrim te te a, an thinrim tak tak hunah hian a sualpui turin min rawn pun hlauh zel,” a ti a. Mr Merryweather chuan hmel ngui tak pu chung hian, “Kan hnu chhui hi a vanvawrh zawngin a ral mai em lo’ng chu maw,” a lo ti ve bawk a.

Jones chuan, “Mr Holmes hi ring ve tlut mai la i tisual tehchiam lovang. A tihdan hi keini tan chuan a mak deuh hlekin a suangtuahna chhawr hna deuh hlek a. Mahse a hre dik thei teh ania. Tunhmaa police lam nena thil thuhmun an lo buaipui tawhnaah pawh sawrkar mi rawihte ai chuan a la che fuh zel a ni,” a ti a. Kan hmelhriat tharlam chuan, “Mr Jones, nang berin chutia i tih chuan a ţha alawm. Mahse Inrinni zan hi chuan intihhlimna hmunah pawisa ka thâp ve ziah ţhin a, zanin zawng heti hi kan nih dawn tak hi,” a la ti ta hram a. Holmes chuan, “Zanina i thiltih tur hi zan danga i tih ţhin ai chuan a phûrawm zawkin i pawisa thâp pawh a sang zawk fe mai thei a ni. Mr Merryweather, zanina i pawisa thâp zat chu ‘pound’ singthum a ni a, Jones, nang ve chuan i mi man chak em em lu chunga kut nghata ţawngţai theihna hun i nei mai thei a ni,” a ti ta a.

Midang zawng kan ngawih reng avangin Holmes bawk chuan, “Zanina kan mi tawn tur hi tualthah ching, rukruk hrat, mi thin thâwi zawng ni lo, mi thin tiţhâwng zawnga khawsak hmang, Krismas la hmang tlem ve tak a ni a, mahse a tih tawh vekah chuan rualkhum tham khawpa khawsa ngeiawm thei a ni. London khawpuiah hian a aia man chak ka nei tehchiam lo. Kan John Clay-a hi pa nasa deuh mai a ni ve chiang khawp mai. A pu chu Lal thlah dik tak a ni a, amah pawh hian zirna hmun ţha ber ber, Eton leh Oxford tuallaite pawh a lo dai ve tawh ţhin. A kutzungţang nge chimawm ang a thluak aw.... tih chi a ni.

"Man tumin kan veh reng ţhin a, mahse amah kan han cha-chhuah theihna tur hun remchang kan la nei lo reng reng. Scotland Yard mihring tan a hnawksak thei ang berin a’n khawsa a, chawlhni a lo thleng a, a sualte a’n tlengfai te te a, kawtthler hmun ţha lai deuhvah fahrah chawmna In a’n din leh ngawt a. Pa khawsa herh ve tak zawng a ni. Zaninah chu mihring nen chuan inhmelhriattir thei che u ila ka lawm em em ang. Ka leiba pawh tlem rulh tur a nei ve asin. Mahse hei, zan dar sawm a pel ta a kan chhuah a hun ta e. Nangni pahnih hi tawlailir hmasa zawkah in chuang ang a, Watson-a nen hian kan rawn zui ang che u,” a ti a.

Tawlailira kan chuan chhung chuan Sherlock Holmes chu a rilru a zangkhai fe ni tur a ni, chawhnu lama kan rimawi ngaihthlak zul-zuiin a hm hm vel mai mai a. Chutah Farrington Street kan va chuang chhuak a. Ka hnenah chuan Holmes chuan, “Kan thleng teuh ta hle mai. He kan Merryweather-a hi an pawisa dahna-Inah a hotu ber a ni a, he thil hi a tel vena ngei tur chi a ni. Jones lah hi a hna chungchangah nausen sawngnawi ang mai ni mahse ţhat vena lai tak a nei a. Satel ang maia seh tawh thlah duh lo leh uisathiam vulh fuh ang maia hlauh nei lo a ni ve roh tlat mai. Khai le, heta hi min lo nghak alawm,” a ti mial mial a.

Zing lama kan va tlawh tawh, mipui zîk luih luihna kawtthler kha kan va thleng leh a. Kan chuanna tawlailir chu kan kal sawntir a, Mr Merryweather-a hnung zuiin kawng zim zet maiah kan kal a, kawngkhar penhleh pakhatah kal tlangin pindan inkal pawhna zim takah kan lut a, chumi tawpah chuan thir kawngkhar âwmkhauh zet mai a lo awm bawk a. Chu kawngkhar chu hawngin kan pal tlang a, kailawn bahra ngul zemah chhukin kawngkhar tâwn tlang huphurhawm deuh mai dang a lo awm leh a. Mr Merryweather-a chuan khawnvar a’n chhi a, lei rimnam vut vut kawng zim takah kan kal a, chutah kawngkhar pathumna a lo awm leh a, chumi kan han kal pelh chuan pindan pakhat, a chhunga bawm lianpui pui leh thingrem awm khupnaah kan lut ta a.

Holmes chuan khawnvar chu a’n lek kâng a, a bul vel chu thlek kual pahin Merryweather-a hnenah chuan, “I chhip aţang hi chuan pa lung tichhe zawk zawk chu i nih sâ bik hauh loh hi maw le,” a’n ti a. Merryweather chuan, “Hnuailam aţang pawhin maw le,” tih pahin a tiang chuan chhuat chu a’n chhun a, “Uai, a rikdan chu a va kawrawng teh rul em!” a ti ta a. Holmes chuan, “Thawm dim lehzual fê turin tih takmeuhvin ka ngen a che. Kan hlawhchhamna i thlen teuh teh ania. Khawngaih takin sawlaia thingrem pakhat chungah sawn lo va ţhu la, bengvar thawh lo tum ve tawh miah lo ta che?” a ti ta hial a. Merryweather chu lunghnur zetin thingrem chungah a ţhu a, chutihlai chuan Holmes chu chhuatah a ţhingţhi ve thung a. A ipte aţangin enlenna a phawrh a, khawnvar êngah chuan chhuat khi kar vel chu ngun em emin a thlêk ta a.

Reiloteah a lo zuang thova, a enlenna chu a ipteah a khung leh ta a. A lo thawh pah chuan, “Darkar khat vel chu hun kan la nei e, kan pu Wilson-a kha a muthilh hma loh chu engmah an ti thei dawn si lo. Chutah theitawpa chakin an che ang, a chhan pawh an zawh hma leh tlan chhuahna hun an nei rei tihna a ni tlat. Doctor, i lo hre ve tawh mai thei a, London khawpuia pawisa dahna-In kharkhip pakhatah kan awm anih hi. Mr Merryweather hi London khawpuia pawisa dahna-In liantham intel khawm zinga a thu ber a ni a, he kan awmna pindan hi eng vangin nge rukru huaisar deuhvin an belhbul duhna tur chhan a hrilh thei ang che,” a ti a. Merryweather chuan, “Kan French-ho rangkachak hi alawm. Ruk an tum ang tiin min hrilh thawi thuak thuak reng a ni,” a lo ti a.

Kei chuan, “French-ho rangkachak a?” tiin ka’n zawt leh hram a. Ani chuan, “Ni e. Hmanni deuh khan kan pawisa veivak tipung turin ‘pound’ singthum kan va puk thei hlauh mai a. Chu pawisa chu kan la phelh darh hman lova, tunah hian hemi hmunah hian a la awm ta reng a ni. Tunah tak hian kei phei chuan ‘pound’ sanghnih ka ţhut bet reng a ni. He thil hi mutmawh hnar mawh a nei tawk pawh kan awm nual,” a ti a. Holmes chuan, “Mutmawh hnar mawha neih tur chi a ni tih chu kan hrechiang thawkhat ta alawm le. Tunah chuan kan chetdan tur i ruahman teh ang. Ka rindan chuan darkar khat chhung ngeiin kan thil tih tur hi tih theihin a awm ang a, chutih chhung chuan kan khawvar kha engin emaw lo khuh bo ila a ţha ang,” a ti ta a.

Merryweather chuan, “Thim-thamah kan ţhu ang a?” a lo ti a. Holmes chuan, “Chutiang deuh chu a ni. Nghah rei a ţul tak thulhah tiin lehkhaden chu ka ak ve reng nain êng tihlan hi a hlauhawm dawnin ka hre tlat mai. Kan awmna tur i thlang fel ang u. Heng kan mi tawn turte hi pa namai an ni lova, an inrin loh hlana bei tur mah ni ila kan fimkhur loh chuan min tina ve thei mai ang. He bawm phenah hian ka ding ang a, nang khalaiah khan ding ang che. Enga ka chhun veleh in bawh vat tur a ni ang. Watson, silai an chelek vaih chuan khawngaihna nei hlek lovin ralpui sai dawt dawt ang che,” a ti a.

Ka puakruk kau sain bawm phenah chuan ka ding a, Holmes pawh chuan a khawnvar chu a hliah thim ve ta bawk a. Chutia khawnvar a’n hliah takah chuan a thim ta khawp mai a, aimitthlawn chu nêp te a ni. Chutia kan han nghak ta chu ka rilruah chuan engdang a awm lo, kan hmaa chhuak tur chu chhuak thuai thuai se ka ti em em ringawt mai a ni. Zawite hian Holmes chuan, “Tlan chhuahna tur kawng khat chauh an nei a. Chu chu Saxe Coburg Square a In pakhat lama an tlan lêt lehin a ni. Jones, ti tura ka hrilh ang che khan i tih ka beisei,” a’n ti a. Jones chuan, “Inspector pakhat leh Officer pahnih ka ventir e,” a lo ti a. Holmes chuan, “Chuti anih chuan a sibih thlengin kan hnawh vek a nih chu. Khai le, ngawi rengin i nghak tawh ang u le,” a ti ta a.

Chu hun han reizia em em chuh! Hetia han ziah leh hi chuan ‘darkar khat’ ti mai hian kan ziak leh rohva, ahun lai chuan zan kan ban tlang ta mai emaw tih a awl kher mai. Khua a lo var thut ang tih pawh hlauhawm hlel lovin a rei mai. Ka chet ngam loh avangin ka ke lah chu a kham em em a; ka hriatna thazam lah chu fanghmir zinga khawsaknana ţha fahran maiin a harhvang em em lehnghal. Ka ţhiante thaw ri ka hre chiang thei hle a, chu mai ni lovin Merryweather-a thaw ki sang deuh leh Jones-a thaw ki hniam deuh chenin ka beng chuan a thliar hrang vek a.

Ka ţhutna aţang chuan chhuat zawl a lang thei a, ka zu thlek a, chutihlai tak chuan ka mit chuan êng zâm reih a zuk hmu fuh ta tlat mai. Atirah chuan chu êng chu chhuatah a lo de feih feih a, chutah a kham zawngin a ţhang a, ri leh thawm dang engmah a awm hma chuan a lo kaw hiauva, kut a lo lang ta nawlh a. Chu kut chu hmeichhe kut ni awm tak, var pap mai a ni a, êng awmna bul chu a dap zet zet a. Kut lo lang chu engemawchen a inlâr a, reiloteah a pil leh ta thut mai a, pindan pawh chu a rehin a thim lehzual ta sauhvin ka hre mai. Mahse êng awmna zâwnah chuan êng chhe te a la de ve ve a.

Mahse êng awmna zawnah chuan kut bawk a lo lang leh thuai a, a ri deuh hrâwk hrâwk a, lung pakhat, hlai deuh hlep hlawp chu a rawn vawrh chhuak a, chhuat a rawn kaw phât a, chumi kuaah chuan khawnvar êng a lo lang nghal a. Chumi kuaah chuan hmai fai veng vawng, naupan hmel fahran mai a lo dâk a, a bul vel chu fimkhur takin a thlek kual a. Chutah chhuat pawp kotlang chu a kut dinglam leh veilama dawmin a rawn lawn sang tial tial a, a dar, a kâwng a lo lang a, chutah a khûp lehlam chu chhuat pawp kotlangah a nghat ta a. Reiloteah chhuat pawp kotlanga dingin a ţhianpa a kai chhuak a, amah ang maia âwmnêm hmelpu a ni a, chu pa hmai chu a dângin a sam a sen hle mai.

Zawite hian, “A fel vek e. Thirkhen leh ip te angte kha i rawn keng em? Khai! Archie, zuangthla rawh, tlan rawh, kei chu heti hi ka ni mai, a man chu ka’n pe fel vek ang e!” a ti ta chul mai a. Sherlock Holmes chuan lo lut thar pa chu a kawrnghawngah a va ţham a, pakhat chu a zuang thla ta nghal bawk a. Jones pawh chuan a zuangthla tur chu a kawr a rawn pawhthlersak hman ta bawk a. Khawnvar êngah chuan puakruk ngul a’n de zawk a, mahse Holmes-a ramvah tiang chuan chu pa banrek chu a vaw nghal chawrh a, chhuatah chuan puakruk chu a tla ri ta bawl mai a. Holmes chuan, “John Clay, tal vak a sawt lovang i tan ţawngţai lam uar a chi tawh zawk ang,” a’n ti a.

Kan mi man chuan zam lo baksak hian, “Chuti vel chu niin a lang. Ka ţhianpa chu a tlan chhuak hman em ang chu maw, a kawrchung thlafem zawng in pawhthlak sak hman hram pek anih kha,” a ti a. Holmes chuan, “A chhuahna tur kawngkaah mi pathumin an lo nghah kha,” a lo ti a. Kan mi man chuan, “A ni maw! Thil in ngaihtuah famkim hle mai. Lawmpuina hlan che u ila a dik ang,” a ti mai a. Holmes chuan, “Kei pawhin lawmpuina ka hlan a che. Sam-Sen Pawl i’n din ngawt mai hi chu bumna ruah ţham loh, hmantlak fe zawng a ni,” a ti a. Jones chuan, “I ţhianpa chu i hmu leh thuai ang. Helai kua ka hnawhphui chhung hi chu lo dawm teh u,” a’n ti a.

Kan mi man chuan, “In kut bâl tak tak kha chuan min khawih hlek suh u. Ka thisenah hian Lal thisen a luang tel tih in hre lo mai thei. Chubakah min biak reng rengin, ‘Ka pu,’ tih emaw, ‘Khawngaih takin,’ tih emaw hi telh nachang hre ve ţhin ula ka lawm ngawt ang,” te chu a la ti ta deuh deuh a. Jones chuan ten âwm fe hian a’n melh vel a, “A ţha alawm. Anih leh ka pu, khawngaih takin kailawnah lawn chho la, i nihna zahawm tak nen chuan ‘police’ hmunpui lamah tawlailirin kan phur phei dawn che nia aw?” a’n ti-el ngat a. John Clay chuan thutak awm fe hian, “A zia deuh,” a lo ti a. Kan pathum chuan chibai min han buk a, Jones chu a zui chhuak ta a.

Mr Merryweather chuan kan chhuah pah chuan, “Mr Holmes, engtinnge keiniho hian lawmthu kan hrilh a kan leibat hi kan rulh dawn che ka hre pha ta reng reng lo mai. Pawisa Dahna-In rawk tumna ka hriat azawngah chuan tun ţuma an tumna hi a urhsunin an la thutak ber a, mahse nang chuan i lo man phain i titlawlh ta anih hi,” a ti a. Holmes chuan, “John Clay-a khan ka lei tlem azawng a ba ve nual a, chumi chu rulhtir ka duh ve hranpa reng reng a nia. He thil buaipuinan hian sum tlemte ka seng ve nual a, chu chu min rulh chuan a tawk mai ang. A bak zawng engmah ka phut lo, Sam-Sen Pawl chanchin han hriat vel mai mai pawh kha a bengvarthlak ve riau alawm,” a ti mai a.

Chumi tukah chuan kan Baker Street-a Holmes-a pindanah zu no dawmin Holmes nen chuan kan ţhudun a. Holmes chuan, “Watson, Sam-Sen Pawl tih thu-hla vel aţang khan eng ilo zakhamna dawr neitupa kha a awmna hmun ata, nikhata darkar engzat emaw chhung laksawn an duh tih a chiang mai a. An thil tihdan kha mak angreng viau mahse a aia tihdan ţha zawk hmuh chhuah chu thil harsa tak a ni ang. A ţhianpa sam rawng a hmuh aţanga Clay-a rawt chhuah mai mai a ni ngei ang.

"Chutah chawlhkar khatah ‘pound’ li hlawh theihna a’n ni kha an mi laksawn duh tan chuan a ţha tham em mai a, mahse anni, ‘pound’ sangtam ruk chhuah tuma phe vel tan chuan eng tham mah a ni lo. Hna thawktu an duh thu a’n tlangzarh a, misual pakhatin pisa lem a hawn buai vel laiin misual pakhat dangin hna dil turin a lo fuihpawrh vel a, chutah an la sawn thei ta mai a ni. Jabez Wilson-a hnena hlawh chanve chauh pawha a thawh duh aţang kha chuan duh nachhan ţha tak a nei tih a lang mai,” a ti a. Kei chuan, “Mahse engtinnge an thil tih tum kha i rin thiam theih chu le?” tiin ka’n zawt a.

Holmes chuan, “Wilson-a In chhungah khan hmeichhia chu awm se zahmawh rawngkai thil an tum ka ti ngei ang. Mahse an awm si loh avangin chu chu sawi lohva leng a ni si. Wilson-a In chhung bungruaah thil hlu engmah a awm lova, a sumdawnna lah kher chhiat tham loh khawpa tê a ni lehnghal, chuvangin chuti taka ani an buaipuina tur chhan a awm lo. Eng thil vang nge ni thei ang? A mi chhawrin thlalak a hrat thu leh leihnuai pindan thim a ngainat thu kha ka’n hre chhuak a. Leihnuaiah engemaw a awm tur a ni.

Chutah Wilson-a mi chhawr chanchin chu ka’n zawt thlithlai ta a, London khawpuia mi suaksual zingah pawh a huaisar ber leh hlauh nei lo ber a ni tih ka hre ta a. Leihnuaiah chuan eng thil emaw, thla engemaw chhung thawh daih a awm tih ka hre ta a. Eng thil nge ni thei ang? In dang pawh tura lei a hreuh ngawt loh chuan eng thil mah a ni thei lovang. Wilson-a In kan va thlen hmaa ka rilru awmdan chu chutiang chu a ni. Chutah a In kan va thlen chuan an leiverh chu In hmalamah nge hnunglamah tih hriat nan kawtkai kha ka tiangin ka’n chhun vel a, mak i ti hle nghe nghe a.

"Mahse In hmalamah chuan lei an verh lo tih ka hre ta a ni. Chutah dar ka va hmet ri a, a mi rawih khan min lo chhâwn a. John Clay-a nen khan tunhmain lo inbengberek buai dawn dawn ţhin tawh mah ila hmaichhanah chuan kan la intawng ngai lova, a hmel pawh ka en duh ta chiah lo, a kekawr khûp kha ka hmuh duh taka chu a ni zawk. A kekawr khûp balhzia leh pawrzia leh chuar nasatzia kha chu i hmu ve reng ang. Ţhingţhiin leiah hna a thawk fe tih a hriat tlat a ni.

“Mahse eng vanga lei chu lai nge an nih hriat a la ţul ta cheu. Chutah In kha helin City and Suburban Bank kha ka va hmu a, a insuihhnawk lai zawng zawng chu phelh mai thei dinhmunah ka ding tih ka inhre ta a ni. An rimawi kûtpui kan chhim zawh a i haw tak hnu khan Scotland Yard lam panin an pawisa dahna-In hotute ka va hmu a, ka hna va thawh chu i hriatthiam tawh mai ka ring,” a ti ta a. Kei chuan, “Anih engti vai-zaiin nge zaninah pawisa dahna-Ina luh ruk an tum ang tih i hriat theih?” ka la ti ta hram hram a.

Holmes chuan, “An Sam-Sen Pawl Pisa an han khar kha chuan Mr Jabez Wilson-a chu a Inah tawm sen leh reng tawh mah se pawi an ti lo tih a hriat mai a. Chumi awmzia chu, an lei verh chu an zo ta tihna a ni. Mahse an lei verh chu an hman thuai loh chuan tu pa vak rawlai emaw mai mai pawhin a lo hmuchhuak ve khiah thei bawk a, chu lovah an rangkachak dah hlawmkhawm chu an lo dahsawn thei bawk. Ni dang zawng aiin Inrinni a chet an tan a remchang zawk ang. Inrinni a an chet chuan tlanbona tur hun ni hnih zet an nei thei dawn a ni. Chuvang mai mai chuan alawm, Inrinni zana kan chet tak,” a ti leh ta mai a.

Kei chuan, “I lo chhût dik nalh kher mai. A inzawm thui hle nain a inzawmdan erawh phat rual a awm hlawm lo,” ka ti a. Ani chuan, “Awmdan pangngai ning chhe lutuk lovin min siam ve alawm le. Hei pui! ţhut cheuh cheuh ka ning leh dawn ta mai. Nundan phung pangngaia nun loh hram tumin kei hi chu ka tar ve thei mai awm e. Hetianga thil hnawk chinfel tur eng engemaw lo awm leh zeuh ţhin hian nunkhua ka ning lutuk tur hi min chhan ţhin mai pawh a ni,” a ti a. Kei chuan, “I ţangkai ve teh bawk ţhin alawm maw le,” ka ti a. Ani chuan, “Ţangkai ve hram tuma virbuai ta chiam chu ka lo ţangkai ve ţhin mahna, engtinnge an tih kha?

Rualduh zawngte’n thai an la,
Kan la tiam ve si lo mal len a tul;
Lallukhum chang lovin rawngbawl a tul rih e.

an ti em ni kha!” a ti ta a.

THE END.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » April 4th, 2018, 8:43 pm

SHERLOCK HOLMES - A CASE OF IDENTITY
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Baker Street a Holmes-a pindanah chuan Holmes nen chuan meilum kan ai a. Holmes chuan, “Ka ţhian duhtak, mihring nunphung hi zawng, mihringte suangtuahnain a chhui phak loh khawp hian a mak asin. Thil awmdan pangngai leh thil thleng pangngai mai mai pawh hi kan tan chuan hriatthiam kim sen ngam pawh a ni lova, ngam a ni lo ang bawkin hmuh kim sen ngam pawh a ni lova sin. Khalaia kan tukverhah khan hetia kan awm ang hian han thlawk chhuak dun ta thut mai ila, he khawpui ropui tak mai chungah hian mu angin duh duhin leng vel ta ila, kan duh lai laiah Inchung khuhna hi hlim thei ta bawk ila;

"Chutah Inchhunga thilmak pui pui thleng mek leh thil inkar-a-kîk tak tak mai thlentir tura mihring ze hrang ze hrâiin an thiltihte chu zu hmu thei ta ila, chu chauh ni lovin hetiang hi kan lo ţhan chhohdan leh mihring ze tikimtu mai a nihnate han chhuidawn thei ta vek mai ila chuan thawnthu phuahchawpa thil awm thei âwm lo pui pui leh mak tak tak an ziah ţhinte hi chu a awm thei a ni tih kan hrechiang lutukin a mak kan ti lo lutuk ang a, a buatsaihtute tana hek phah hlawihna turin thawnthu phuahchawp hian hralh a tlak loh phah ngei ang,” a han ti phawng mai a.

Kei chuan, “Chutiang anih ka va’n ring mai mai hlei lo em aw; kan nitin chanchinbua thubuai hlabuai chungchang te pawh hi an chinfel dan ngial-ngan an ziak ţhin a, thil awmdan pawh angial anganin an ziak ţhin. Chu mai ni lovin ‘police’ hovin thubuai hlabuai an chinfel chungchangah hian anmahni ‘police’ hovin an vawn ţhat atana thil awmdan kimchang an ziahte ngei pawh kan hmu ve ţhin a ni lo’m ni? Chuti ni sela thawnthu phuahchawpte aia mak leh tuipuiawm hi a va’n vang em em si ve. Adik chauh chuan thawnthu phuahchawpte zawng, kan nundante hi zawngin a phawk zo hlawl lo alawm,” ka ti ta tlat mai a.

Holmes chuan, “I ngaihdan ang zawnga ropui leh ngaihnawm taka thil awmdan tarlang tur chuan a uar lai tur uar a, a ziah chhuah lai tur ziah chhuah a, fing thiam deuh hleka dah chhuah a ngai ţhin alawm. ‘Police’-hovin thubuai hlabuai an chinfel dan ziahna lehkhaah reng reng chuan chutianga ti ta lo chuan roreltu te’n thu mawlmang pui pui an phuhchhuah hi an ziak kur luaia, an thil zawn an hmuh chhuah theihna hmanrua leh thil awmdan dik tak kha uar thiam riauva ziah a awm ngai hlei nem. Hei hi mipui mimir ngaihnawm tih zawng leh duhdan a ni si a, mahse sawrkar mi leh sa chuan an aia ute thu-leh-hla hi an chham chhawng ve mai mai ţhin a ni. Lo ngai reng mah rawh, thil thleng pangngai baka thil mak reng reng a awm ngai lovang,” a ti ta tlat mai a.

Kei chuan nui chungin ka lu ka thinkhum a, “I ngaihdan phei chu ka hrethiam khawp mai. Ram bung hrang lianpui pui pathuma hetianga misual hnu chhui thiam ber leh midangte buaina chungchanga hre ber i nih avang hian thil mak ber ber leh âwm lo khân ber ber i tawng tawh ţhin a. Anih leh kan thusawi lai chu entirna famkim nen i han tifiah dawn teh ang aw..” tih pahin dawhkana chanchinbu chu ka la a. “Heta hi a thupuia an hman, ‘Pasalin nupui lakah nunrawn a chhuah’ tih a awm hi. Hemi chungchang hi hei an ziak thla dul mai a, mahse chhiar hauh lo pawhin ka hre thei thove.

"Nula dang an inrawlh a, zu vang a nihna lai pawh a awm a, an nupa inkarah innghirnghona a chhuak a, a pasalin a nupui chungah kut a thlak a, a nupui chu a pem nian nuan a, a hmeichhe laizawnnu emaw, an In luah neitunu chuan emaw a khawngaih em em a, chutiang deuh chu a ni mai. Mi nunrawng chanchin ziaktu pawhin hei aia nunrawng hi chuan engtinnge a ziah leh tawh chuan ang? Hei hi i ngaihdan a ni a, hei aia maka an ziah thiam loh chuan thil thleng pangngai hi a mak ber i ti ta mai a ni,” ka tih khum ta a.

Holmes chuan, “Tun ţuma entir nana i chanchinbu han thlan chhuah kher kher chu a fuh lo em mai a, a pawi ngawt mai,” tih pahin ka chanchinbu kenlai chu mi pawhthlaksak a, “He thil hi Dudas-a te inţhen thu-hla a ni a, hemi chungchangah hian thil eng eng emaw tifiah turin min ruai ve nghe nghe asin. Hetah hi chuan a pasal ti ila, a mipa zawk hi zu in ngai miah lo a ni phawt a, nula dangin inrawlhna an nei reng reng lo bawk a. An buaina chhan hi chu a nupuiin a pasal hi chaw a hlui apiangin a pasal hian a ha siamchawp chu a thlawn lawk a, a nupui hi a vawm ziah ringawt mai a ni.

"Hetiang thil hi chu thawnthu phuah mite pawhin ngaihtuah chhuah nachang an hriat i ring bik kherin ka ring lo. A ni love, Doctor, hei ka rimtui hi sawh khat lek chu han hnim ve la, tun ţuma i entirna rawn chawi chhuahah kher kher hi chuan ka chak zawk tih hi pawm ţha ve mai teh,” a ti a. A rimtui bur chu mi rawn hlui a. Chumi ţuma Holmes-a rimtui bur rawn lek chhuah chu a nalh kher em mai a, ani ang pa nun mawl leh pa invaivung lo deuh maiin a’n neih tur chi-ah hian ka ngai lo reng reng a. A rimtui bur ţhatzia chu ka’n sawi chhuak ta hram nghe nghe a.

Ani chuan, “A ni tak maw, chawlhkar tam kan inhmu tawh lo tih ka lo theihnghilh a ni. He bawm hi Bohemia Lalpain Irene Adler-i nena an chungchang ka chinfelsak avanga inngaihhrui nana min pek alawm maw le,” a ti a. Kei chuan, “Anih leh i zungbun ve thung kha?” tiin ka zawt ta zel a. A ni tak a, Holmes-a chuan zungbun mawi deuh mai, han en mai pawha de sêt mai hi a bun ve tlat a ni. Holmes chuan, “Hei hi chu Holland ram awptute chhungkua in min pek a ni ve thung. Mahsela an thil min tihtir kha a pui thamin a mak danglam em mai a. Nang, ka chetdan min ziah chhuahsaktu hnenah meuh pawh hian ka puang ngam rih tlat lo a ni,” a ti a.

Kei chuan, “Anih leh tunah hian ‘case’ buaipui lai i nei em?” tiin ka’n zawt a. (Case - thubuai, buaina, chungchang, thil kalhmang tihna a ni deuh ber mai. Pll) Ani chuan, “Sawm emaw, sawmpahnih emaw vel chu ka nei ang, mahse a ngaihnawm leh phûrawm lam chi ni lovin a pawimawh chi hlir an ni. Pawimawh, ngaihnawm miah lo an nih ber mai chu. A mak teh ania, thil pawimawh lutuk mang lo hi a ngaihnawm leh phurawma hlei hlei an ni duh ngawt asin. Hmuha hriatna ka tih ang chi (observation) te pawh hi hetiang thil pawimawh tham mang lovah hian a tam duh bik a, hei hian min puih ţhin avangin mi hnu chhui pawh hi nuam âwm deuhvin a lang ve thei mai zawng a ni.

“Sualna reng reng hi chu a len zawh poh leh a chhan leh vang hmuhchhuah a awl ting maiin ka hria, a chhan chu thil sual lian tham tihna tlak chinah chuan kha mi avanga midangin hlawkna an hmuhna tur thil kha hmuh ţhelh a har tham tawh ţhin a ni. Tuna ka thil buaipui laite hi zawng, Marseilles aţanga min râwnna chauh lo hi chu tuiawm loh tak tak vek an ni. Mahse tuna ka thil buaipui lai mekho aia phurawm zawk hi buaipui tur ka nei thei thuaiin ka ring, ka hriat sual loh chuan tuibur hmuamda pawh a inrial tawh ngut dawn em ni ka ti deuh, a chhan chu hei hi mi râwn tura lo kal niin ka hre tlat alawm. Anih loh chuan ka tisual hle ka ti mai,” a han ti nghal zaih a.

Chutia a sawi zawh veleh chuan Holmes chu a thova, tukverhah chuan a va dak a, London kawtthler chu a chhuk thlir ta vung vung mai a. Holmes-a koki zawnah chuan ka va dak chhuak ve a, kawng kam lehlam, kan awmna In epah chuan nu lian tawk tak mai hi a ding tih ka va hmu a. Chu nu chuan sahmul puan sei angreng tak, hlai lo deuh mai hi a nghawngah a vêt a, a lukhum parh khum tlangah chuan arhmul niawm tak hi a tar kual chhak a, arhmul niawm tak chu a sen a ni ta nghe nghein ka hria.

Chu nu chuan a lukhum ropui tak mai hnuai aţang chuan kan awmna pindan lam chu a rawn melh chho deuh reng mai a, chutih chhung chuan awm ngaihna hre lo hian a insâwn deuh hliau hliau hian ka hre bawk a, a kutkawr bun chu phelh mai tum niawm tak hian a kut lehlam chuan a kutkawr kilh behna kawrkilh chu a khawih nauh nauh a. Ngaihdan siam fel ta thut ni awm tak hian chak fe maiin kawngpui chu a tan tlang thuak a, reiloteah kan kawngkhara dar hmehrik kan dah chu a rawn chiau ta vang vang mai a.

Holmes chuan a meizial zuk lai chu thukah a vawm lut a, “A chetdan anga che kha chu ka hmu tawh ţhin alawm, khatianga a ngaihna hre lo ni awm taka an dinglai an insâwi chuan puan chhuah duh mai loh engemaw buaina an nei tihna a ni chawk ţhin. Min râwn chu a duh tehmeuh mai a, mahse midang hnena an chanchin han puan kha a ngamawm dawn em ni tih a ngaihtuah buai a nih kha. Mahse he thilah hi chuan chutiang teh bur chuan ngaihdan kan siam loh pawh a ţha zawk mial mai thei a ni. Mipain hmeichhe chunga dik hlelhna puitham an neih hi chuan hmeichhia hi an inkhâp thlu rei duh lo viau a nia, kawngkhar dar hmehrik hi an rawn pawt chiau ţhawt ţhawt mai ţhin. Mahse chuti takin kan Pi-i hi a thinrim lo em maw ni dawn ni kawngkhar hmehrik dar chu a va’n chiau nêp em. Mahse hmangaihna thil chu a tel ngeiah i han ngai phawt teh ang. Hei amah ngei a lo kal bawk a, thil awmdan chu i han sawitir ang hmiang,” a ti ta a.

Holmes-an chutia a sawi lai tak chuan kawngkhar chu an rawn kik a, chhiahhlawh naupang chuan Miss Mary Sutherland a rawn luh duh thu a rawn sawi nghal a; chutia chhiahhlawh naupangin a sawi lai mek chuan naupang hnungah chuan hmeichhia chu a rawn ding to lur mai a. Sherlock Holmes chuan puithu lo zet, mahse lawmawm tak mai si hian lo lut turin a lo sawm a. Hetiang thilah hian alawm Holmes-a mak danglamna riau pek chu. Ho tak si, mahse lawmawm tak si, tawite hian mi a titlangnel thiam tlat a ni. Kan inlengnu chuan kawngkhar chu a khar a, chibai min buk nan a lu a’n kun zawk a, ţhutthleng vawnban neiah chuan a ţhu ta a.

Chutia a’n ţhut hnu chuan Holmes chuan a’n thlêk zawk a, mahse a thlêk rei loh tehlul nen ama mimal mize danglam bikna han lantirna tur khawp chu a lo ngah der mai. Kan Inlengnu hnenah chuan, “I khaw hmuh a tawi tehreng nen chuti taka lehkha chhutna khawl han hman rimte chu a hahthlak lutuk lam niin i hre ve lo maw?” a ti a. Kan inlengnu chuan, “Atir lamah chuan hahthlak hi ka ti khawp mai ţhin a, mahse tunah chuan ka kutzungtangin a hawrawp awmna a hre tawh a, en lo pawhin ka chhu thei tawh alawm,” a han ti zet a.

Holmes-a thusawi awmzia chu chiang lehzualin a’n hrethiam a, hlau âwm tak mai leh makti âwm deuh mai hian a ţhu ngil zawt a, a hmel nelawmna zawng zawng chu a bo nghal vek bawk a. Holmes-a hnenah chuan, “Mr Holmes, min hria elo? Min hria a nih ngawt loh chuan chutiang thil chu i tan hriat theih a ni lovang,” a ti leh ta zawk a. Nui chung hian Holmes chuan, “Chu lam zawng ngaihtuah buai duh suh, thil reng reng hriat vek hi ka hna a ni tlat alawm. A..... midangin an hmuh hmaih lo hmuh fuh bik ţhin hi ka zir te pawh chu a ni mahna, chuti ni lo se eng vangin nge kei mi râwn tura i lo thawh chhuah ang ni?” a ti ta a.

Kan inlengnu chuan, “Ka pu, ka lo kal nachhan hi chu Mrs Etherege-i pasal, police-ho leh midangin bo hlawm der ngaiha an ngaih tawh khati taka awlsama i han chhui chhuah mai thu kha Mrs Etherege-in min hrilh vang a ni. Mr Holmes, min pui ve thei hram la ka ti ngawt mai. Mi hausa ka ni lova, mahse kum tina ka hmuh tur sum ka la nei ve ţêk ţêk a, chubakah khawlchhut hian sum engemaw zat chu ka hlawh chhuak ve bawk a, Mr Hosmer Angel-a chanchin ka hriat theihna a nih dawn phawt chuan ka sum hmuh ang ang chu khawhral vek mah ila pawi ka ti lo reng reng,” a ti ta a.

Holmes chuan pindan chunglam a melh a, a kutzungţang hmawr chu a han dah insi ţhap a, “Chu pawh ni se kei mi râwn tur hian eng vangin nge hmanhmawh taka i lo kal kher?” a han ti a. Chumi thu a’n hriat chuan kan inlengnu chu a phu zawk hian a hriat a. Holmes-a hnenah chuan, “A ni ngawt mai. In aţangin a tlanin ka lo tlan chhuak a ni ber mai a, he thil hi ka pa, Mr Windibank-an a lak lâpzia ka hmuh khan ka thin a ur tlat a ni. ‘Police’-ho a pun duh si lova, nang rawn pun che pawh hi a tum bawk si lova, ‘Thil pawi engmah a thleng lo,’ a ti mâwl leh ringawt mai ţhin a, ka thinrim lutukin ka thuamhnaw hak lai nen ka rawn tlan chhuahsan a, i hnen hi ka rawn pan ta mai a ni,” a ti a.

Holmes chuan, “I pa chu i pahrawn a ni maw? In hming a danglam tlat mai,” a lo ti a. Miss Sutherland chuan, “Ni chiang e, ka pahrawn a ni a; kei aia kum nga leh thla hnih chauhva a upat avangin ‘ka pa’ tia han koh pawh chu a nuihzatthlak thei rum rum mai,” a ti a. Holmes chuan, “I nu chu a la dam em aw?” tiin a’n zawt a. Kan inlengnu chuan, “Dam e, ka nu chu a la dam a, a hriselna pawh a ţha viau e. Ka pa thih hnu lawkah amah aia kum sawm leh panga zeta naupang pasala a han pawm leh mai erawh hi chu ka ngaithiam lo ngawt mai.

"Ka pa chu Tottenham Court Road-ah hian eng ilo char phuitu hna thawkin a awm ţhin a, a hnathawh lai chu a thihsan a, a thih hnu pawhin ka nu chuan kan mi chhawr, Mr Hardy-a nen chu hna chu an chhunzawm a; mahse Mr Windibank-a nena an inneih tak hnu hian Mr Windibank chuan ka pa sumdawnna chu chhunzawm a remti ta lova, ka nu chuan a hralh ta vek a ni. Mr Windibank-a chu pa khawsa thei tak zawng a ni ngei mai tak a, mahse ka pa sumdawnna an hralhna man, pound 4,700 chu a beitham lutuk tlat a ni. Ka pa chu la dam se chuan hetiang zat lek hian a thlah lo tawp ang,” a ti ta a.

Chutiang thu mai mai chu Sherlock Holmes chuan a ngaithla ţha peih hian ka ring ngai reng reng lova, mahse ka rin loh ang tak maiin chu nu thusawi chu Holmes chuan ngun em em hian a ngaithla a a sawi chu a rilru zawng zawngin a ngaihtuah ni ngeiin ka hria. Holmes chuan, “I sum hmuh vena, i khawl chhut a i hlawh chhuah loh zawk chu i pa sumdawnna aţang chuan em ni i lakluh ve?” a han ti a.

Miss Sutherland chuan, “Teuh lo mai, ka sum hmuhna chu a hrang daih a ni. Auckland-ah pami pakhat, Ned-a ka nei a, chumi min rochun chu a ni. New Zealand stock ami a ni nghe nghe a, za zela pali leh a chanve hu ka hui a, a vai chuan pound sanghnih leh zanga a tling a, mahse a pung mai lo chu ka khawih ve thiang tlat lo a ni,” a ti a. Holmes chuan, “I thusawi chu a ngaihnawm ka ti kher mai. I sawi ang hian kum khat chhungin sum tam tham tak i hui lut tihna a ni a, chuti a nih chuan i zin khawthawng ţhinin kawngtin kawng tangah i lu i rawlh ve zel zul ang tih ka ring a; kawngka chi hrang hrang i kân ngeiin ka ring. Nangni ang nula maltlat te ngawt te hi chuan thla khatah cheng zali vel lek pawh la lut ula nuam takin in khawsa theiin ka ring tlat a ni,” a han ti a.

Miss Sutherland chuan, “Mr Holmes, chu aia tlem zawk pawh chuan ka khawsa thei lutuk alawm. Mahse an hnena ka khawsak chhung chuan an tan phurrit nih ngawt chu ka duh bik lo reng reng a, chuvangin ka pawisa pawh an hmang ve ţhin a ni. Kumtin hian thla li danah ka pawisa hmuh ve tur, ka pami Ned-an min rochun chu Mr Windibank an a va la chhuak ţhin a, pawisa chu ka nu kutah a lut leh vek a ni. Kei chuan khawl chhuta ka hlawh chhuah hi ka khawsakpui thei lutuk a, phek khat chhutah ‘pence’ hnih zel ka hlawh a, nikhatah phek sawmpanga aia tlem lo, phek sawmhnih aia tam lo ka chhu hman bawk si,” a ti a.

Holmes chuan, “I chanchin chu min hrilh chiang ta hle a; hei hi ka ţhian, Dr Watson-a a ni a, ani hi chu venthawn tur a awm lova, ka bula i sawi tur ang ang chu inthlahrung hauh lovin i sawi thei ang. Khai le Mr Hosmer Angel-a nena in inkungkaih dan chu min han hrilh tawh teh le,” a ti ta a. Chutia Holmes-an a han tih takah chuan kan inlengnu hmai chu a sen ta ţâwn ţâwn mai a, a kawrlum hak tlang chu a hmet nauh nauh a, “Kan inhmuh hmasakna ber chu meichhemna thuk buntute (gasfitter) lampui siamna hmunah a ni a. Hetianga lampui an siam hian tunhma ka pa damlai chuan luh phalna ‘ticket’ hi ka pa an rawn pe ve ziah a, mahse ka pa thih hnu chuan ka nu an rawn pe ve ta thung a. Hetiang hmuna kal ve hi Mr Windibank chuan a remti lo hle nghe nghe a ni. A dik chauh chuan vah chhuah hi a phal lo hrim hrim a ni mai e.

“Mahse hemi ţum hi chuan lâmna hmunah chuan kal ve ka tum nghet tlat a, ani dan theih mai mai tur ka nihna reng reng ka hre lo. A sawidan tak phei chuan chutianga lâmna hmuna kal te chu hmelhriat tlak loh awmkhawm an ni a, an zinga thawmhnaw hak tur chi pawh thlan thiam theih a ni lo a ti nghe nghe a ni. Mahse min dan theih tak ngang si lovah chauh sumdawnna thilah min chhuahsan a, France ramah a kal ta daih a, ka nu nen, ka pa sumdawn laia kan mi chhawr Mr Hardy-a nen kan kal ta a. Chumi ţum chuan alawm, Hosmer Angel chu ka va tawn tak ni,” a ti a.

Holmes chuan, “Chu, chutia in va kal tak si-ah chuan Mr Windibank chu France ram aţanga a lo haw leh chuan a va’n thinrim nasa awm ve?” a han ti a. Miss Sutherland chuan, “Thinrim vak love. Nui hawk hawk chungin hmeichhe hnial a sawt lohzia leh hmeichhe tumlumzia a sawi ve mai,” a han ti a. Holmes chuan, “Chuti a nih chuan meichhemna thuk buntute lâmna hmunah chuan Hosmer Angel chu i va tawng ta a nia maw, ka hrethiam e,” a lo ti a. Miss Sutherland chuan, “Ni e, chutah chuan ka va tawng ta a ni. A hnuah pawh vawihnih chu kan inhmu leh a, a lên te pawh kan lengdun a, mahse ka pa a lo haw leh tak avang chuan kan inhmu thei ta lo a ni,” a han ti a.

Holmes chuan, “In inhmu zui thei ta lova maw?” a lo ti a. Miss Sutherland chuan, “Thei nang aw. Ka pa chuan hetiang thil reng reng hi a lawm lova, hmeichhia chuan mahni inchhungkhur hi nuam an ti em em tur a ni tihte hi a thu vuakthlak dan a ni a. Mahse kei chuan ka nu hnenah mahni inchhung khur ti a koh tur ka neih ve lohzia leh inchhung khur tih tur ka la din ve lohziate ka hrilh ve tho bawk a ni,” a han ti a. Holmes chuan, “Chuti lo ni se engatinge kan Hosmer Angel-a chu? Rawn hmuh che a tum ţhin lo’m ni?” a han ti a.

Miss Sutherland chuan, “A..... ka pami chu France ramah a kal leh thuai dawn avangin a kal hlana inhmuh mai chu Hosmer chuan a felin a ring zawk a, a kal hlan chuan kan inhmu mai dawn nia tiin lehkha mi rawn thawn a. Chubakah ka pami kal hma zawng chuan lehkha kan inthawn tawn nitin mai a, zingtin mai hian Hosmer-a lehkha chu ka dawng mai a ni; ka pami pawh chuan engmah a hre lo reng reng,” a ti a. Holmes chuan, “Hetia lehkha in inthawn tawn lai vel hian Hosmer-a nen hian in inhual tawh reng reng em?” tiin a’n zawt a. Miss Sutherland chuan, “Inhual e. Kan inhmuh hmasakna lam ti mai ila, tlaia kan lendun hmasak ber ţum chuan kan inhual nghal daih alawm. Hosmer-a chu—ih – Leadenhall Street a pisa pakhatah pawisa fai khawihtu a ni a, ih–” a han tih lai tak chuan Holmes chuan, “Eng pisa-ah maw?” tiin a lo zawt vat a.

Miss Sutherland chuan, “Mr Holmes, chu tak mai chu alawm a buaithlakna lai ber mai chu, a thawhna pisa chu ka hre tlat lo mai,” a lo ti a. Holmes chuan, “Anih leh chuti khawiahnge a chên tihte tal i hre lo’m ni?” a han ti leh a. Miss Sutherland chuan, “A thawhna pisa chhungah ti mai ila, pisa-ah chuan riah theihna hmun a awm a ni awm e, chutah chuan a cheng nghal mai,” a ti leh zel a. Holmes chuan, “Chu a awmna hmun hming leh a chenna hmun hming pawh i hre miah lo a ni maw?” tiin a zawt ta zel a. Miss Sutherland chuan, “Hre lo. Leadenhall Street-ah a cheng tih chauh ka hria,” a ti leh ta a. Holmes chuan, “Chuti a nih chuan i lehkha thawn ip pawn lamah chuan engtinnge a ‘address’ i ziah?” tiin a zawt ta a.

Miss Sutherland chuan, “To, Leadenhall Street Post-Office, a neituin a lam huna pek mai tur,” ka ti mai. An pisa lama thawn a duh lohna chhan pawh a ţhiante’n nula lehkha hmu tih ang reng vela an han dem fiam tur chu a duh lova. Chuti a nih leh khawlin ka chhu zel mai ang tih lah chuan ka kutziak ngei chu hmuh a duh thu leh lehkha chhutna khawl chu kan kara palai leh min dâl theitu anga a lan dawn avanga a awm a nawm loh thute min hrilh a. Ani chuan lehkha chhutna khawla chhut ngat hian min thawn ţhin si a, thil tê tham tê pawh a ngai pawimawhin min ngai ve ngawih ngawih tih hi a hriat mai. Mr Holmes, lehkha chhutna khawl han thîkte em emte chu tirawh? Min hmangaih ve ngawtin ka hria?” a han ti a.

Holmes chuan, “Chu zawngin rilru sukthlekna lam min neihtir thei hle ta ve ang. Keia ngaih ve dan chuan thil tê tham ber ber hi thil pawimawh ber ber an ni ţhin tlat a ni. Hosmer Angel-a awmdan emaw, thiltih emaw, tê tham tê dang hriat i la nei lo maw?” a ti leh ta a. Miss Sutherland chuan, “A zakzum em em a, chhun khaw êng chiang fiah kuk mai ai chuan tlai ni nêm te hi lenvah nan a duh zawk a. Mi inkiltawih leh hawihhawm tak mai a ni. A aw pawh a dam thlap mai. A tet laiin a hrawk lamah ţhatlohna engemaw a neih avangin a aw pawh a chau hle a, chuvangin a ţawng ring ngai lo. A inchei nalh thei em em a, incheina mawl tak tak a inbel ţhin. A khawhmuh a fiah vak lova, keimah ang bawk hian; tarmit a vuah nghe nghe,” a ti ta a.

Holmes chuan, “France rama i pami, Mr Windibank-a a kal tak hnu chuan engtinnge ni ta zel?” a han ti a. Miss Sutherland chuan, “Mr Hosmer Angel chu kan Inah a lo kal a, ka pami lo kir leh hmaa inneih a rawn rawt a. Inneih ngei chu a duh chiang lutuk a, Thuthlung Thar Bua kut nghat meuhvin chhia min chhamtir a; thil engpawh lo thleng sela a chunga rinawm turin min tiamtir tlat a, ka nu pawhin chuti taka min hmangaihtuin chutianga a ti duh chu âwm a ti ve a ni. A tir aţang rengin ka nu chuan Hosmer-a chu a ngaina ve em em mai a, keiin Hosmer-a ka duhna ai mah chuan ka nu chuan Hosmer-a chu min duhpui zawk a ni.

"Ka pami awm loh hlana lo inneih chu Hosmer-a chuan a rawt ta si a, kei chuan ka pami chu râwn phawt a ţhat ka rin thu ka han sawi a, mahse Hosmer-a leh ka nu chu an ţangdun tlat a; ka nu chuan ka pami chu a hmin theih mai tur thute pawh min hrilh nghe nghe a ni. Ka nu leh Hosmer-a remruat dan chuan kan inneih fel vek hnu-ah ka pami chu a thlem dai mai dawn a ni. Ka pami mah ni se kei aia kum nga vel chauhva upa a nih avangin a phalna la tur ang ziazanga hrilh hmasa lova inneih thu han puitlin mai ka duh lo pawh chu a nuihzatthlak lek lek a;

"Mahse a ruk a rala thilti anga lan ka duh loh avangin ka pami, Mr Windibank-a te hnathawhna company pisa pakhat, Bordeaux-ah chuan lehkha ka va thawn a. Mahse lehkha chu kan inneih ni zingah a lo kir leh chiah a ni,” a ti ta a. Holmes chuan, “Chuti a nih chuan i pami hnen a thleng lo tihna a ni maw?” a han ti a. Miss Sutherland chuan, “Aw, ka lehkhain ka pami hnen a thlen hman hma lawk chuan ka pami chuan France ram chu England panin a rawn chhuahsan a ni,” a ti a. Holmes chuan, “Ha! a va’n vanduaithlak mai mai ţhin em! Anih leh in inneihna ni a tan chuan Zirtawpni in ruat a; biak-Inah inneih tur em ni?” tiin a han zawt a.

Miss Sutherland chuan, “Ni e, mahse a ruk deuh hleka tih kan tum tho a ni. Kan inneihna biak In atan chuan St.Saviour biak-In kan thlang a, King’s Cross bul lawka awm a ni nghe nghe a; kan inneih zawh chuan St. Pancras Hotel-ah tukţhuan kan kilho dawn nghe nghe a ni. Innei tura Biak-In pana kan kal dawn chuan Hosmer-a chuan tawlailir tê chi, mi pahnih lek ţhut theihna ‘hansom’ an tih ang hian min rawn lam a, mahse kei leh ka nu chu kan awm avangin Hosmer-a chu a leng ve ta lova, ka nu nen chuan ‘hansom’-ah chuan kan chuang a; ani chu tawlailir lian chi-ah a chuang ta a. Tawlailir lian chi-ah a chuang ka tih nachhan kher pawh tawlailir dang a awm lova, amah chauhvin mi pali chuan theihna chi tawlailirah a chuang ta a ni.

"Ka nu nen chuan Biak-In kan va thleng hmasa a, Hosmer-a chuanna tawlailir chu Biak-In bulah a rawn ding ve nghal deuh mai a, mahse a chhung aţang chuan Hosmer-a chu a rawn chhuak ta mai lo tawp a. Tawlailir khalhtu chu a chhuk a, tawlailir chhung chu a va bih a, Hosmer-a emaw, midang emaw pawh chu an lo awm tawh hauh lo! Tawlailir pu chuan a tawlailira Hosmer-a a luh ngei thu a sawi a, a hmu chiang hlein a insawi bawk a. Engti tiha chutia bo ta daih nge a nih a hre pha bik reng reng lo. Mr Holmes, chumi ni chu Zirtawpni kalta kha a ni a, chumi aţang chuan Hosmer-a chanchin chu a them pawh ka hre zui ta reng reng lo a ni,” a han ti a.

Holmes chuan, “Ka ngaihdan chuan dinhmun mualphothlak takah a dah che niin ka ngai a ni,” a lo ti bauh a. Miss Sutherland chuan, “Ni lo, chutiang zawng a ni love ka pu! Hetiang dinhmuna min han kalsan tur hi chuan Hosmer-a te ang kha chu a ngilnei lutukin a rilru a ţha lutuk. Han ngaihtuah ta che, khami ni zingah pawh khan thil ţha lo a lo thlen palh tak hlauhvin emaw, vanduaina hriat phak lohvin a tlakbuak palh emaw a nih pawhin a laka rinawm tlat turin min tiam mawlh mawlh lovem ni? Kan karah vanduainain ţhenna thu rawn sawi mahse ani chuan min la rawn zawn chhuah leh tho tho tur thu a sawi lovem ni? Inneih ni a sawi atan chuan thu mak tak ni mai a awm a ni a, mahse a lo mak lo anih hi,” a ti ta a.

Holmes chuan, “A ni ngawt mai, a mak lo teh zawng a nih dawn chu. Chu, i ngaihdan chuan Hosmer-a chungah chuan vanduaina ţha lo tak maiin ro a rel niin a lang a ni maw?” a han ti a. Miss Sutherland chuan, “Ni e ka pu. Hosmer-a khan thil hlauhawm lo thleng tur engemaw a hre lawk ru ang a, chumi avang chuan khatiang kha a sawi ta a ni ngei ang. Chutiang ni lo sela eng vangin nge khatiang kha kan inneihni-ah a sawi ang ni? A hlauh ang ngeiin vanduaina chuan a tlakbuak ta a nih hi,” a han ti a. Holmes chuan, “Eng vanduaina nge tih chu i hre lova, rindan pawh i nei bawk hek lo a ni maw?” a han ti a. Miss Sutherland chuan, “Nei hauh lo mai,” a lo ti a.

Holmes chuan, “Zawhna pakhat ka han zawt leh lawk teh ang che. He thil hi i nu chuan eng angin nge a ngaih ve?” a ti a. Kan inlengnu chuan, “A thin a rim hle a, he thil chungchang hi sawi chhuah sawi chhuah pawh a duh tawh lo,” a lo ti a. Holmes chuan, “Anih leh i pain eng angin nge a ngaih ve? I hrilh ve reng em?” a ti leh ta zel a. Miss Sutherland chuan, “Hrilh e; mahse ka pami chuan ka ngaihdan chu min ţâwmpui hlein a lang. A rindan chuan Hosmer-a chuan eng vanduaina emaw a tawk ang a, engtikah emaw chuan ka la hmu leh tho thovin a ring tlat a ni. Chuti ni lo sela Biak-In kawngkhar bula kei tehlul ka va hawihaih mai mai kha tuma’n an hlawkpui dawn lo reng reng a ni.

"Hosmer-a khan ka pawisate lo puk theih phah sela chuan a tan hlawkna te pawh a awm ve mahna, anih loh leh lo innei hman ta ila, ka sum kawlsa zawng zawng kha Hosmer-a hmingin lo ziak lut ta vek ila chuan kha thil khan awmzia a nei mahna. Mahse Hosmer-a chu mahni inenkawl ve thei tawk a ni a, keia neihsum tlemte han ît tur mi a ni si lova. Mahse kan heti zo ta a, thil awmdan hi engti kawngka nge ni ta ngai? Engahnge Hosmer-a hian lehkhate pawh mi rawn thawn loh reng reng? Heti zawngin ka tuar zo rei lovang, ka â mai ang; zanah pawh ka muhil thei lo,” a ti a. A rawmawl a phawrh a, a inhnît ta hlawp hlawp mai a.

Holmes chuan din pahin, “He thil hi nangmah avang liau liauvin ka buaipui ang a, engemaw tak chu kan hriat theih ngei pawh i han beisei phawt teh ang. Tunah chuan he thila i phurrit zawng zawng hi ka kovah nghat tawh la, nang chuan ngaihtuah ve tawh reng reng suh ang che. Mr Hosmer Angel-a chuan dam chhung atan a kalsan ta che a, nang pawhin i rilru aţangin ani chu paih chhuak ve nghal ang che,” a ti ta a. Kan inlengnu chuan, “Chuti ka hmu leh ngai dawn tawh lo a ni maw?” a han ti a. Holmes chuan, “I hmu leh tawh dawn lo a ni ang tih pawh ka hlau hlel lo,” a lo ti mai a. Miss Sutherland chuan, “Chuti a nih chuan a chungah engnge lo thleng ta le?” tiin a zawt ta a.

Holmes chuan, “Chu zawng, ka kutah dah mai rawh. A pianhmang hrilhfiahna chiang tawk tak leh a lehkhathawn i kawl ang ang chu ka mamawh ang,” a han ti a. Kan inlengnu chuan, Chronicle chanchinbu, Inrinni a chhuakah khan a zawnna thu ka chhuah a; heta hi chumi chanchinbu aţanga chumi lai thu ka hlehthlak chu a awm a, hei hi a lehkhathawn chu a ni bawk,” a han ti a. Holmes chuan, “A lawmawm e. I chenna hmun kha khawi nge ni kha?” tiin a’n zawt leh a. Miss Sutherland chuan, “No. 31 Lyon Place, Camberwell,” tiin a lo chhang a. Holmes chuan, “Hosmer Angel-a chenna hmun hming chu i hre si lova, anih leh i pami sumdawnna chu khawiahnge?” a ti leh ta a.

Miss Sutherland chuan, “Ka pami chu Fenchurch Street a Westhouse & Marbank, zu sen ţha chi zuartute hnuaia thawk hi a ni a, a zin vak pawlah hian a ţang a ni,” a ti a. Holmes chuan, “A lawmawm e. Thil awmdan chu i sawi chiang tawk hle a; i lehkhathawn hmuhte leh chanchinbua i thu chhuahte hi chu heti hian ka lo kawl ang a, nang chuan he thil hi ngaihtuah ve reng reng suh ang che. I lehkhabu duhzawng tak, i chhiar zawh tawh hnu, i dahţhat daih tawh angah i ngai dawn nia,” a ti ta a. Miss Sutherland chuan, “Mr Holmes, ka lawm khawp mai; mahse chutiang thil chu ka ti thei lovang, Hosmer-a tan hian ka la rinawm reng a, a lo kir leh hun hun atan inpeih atin ka lo awm reng ang,” a ti ta tlat a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » April 5th, 2018, 1:27 pm

SHERLOCK HOLMES - A CASE OF IDENTITY
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last chapter)
(Rozami Pachuau)

Kan inlengnu lukhum mak danglam tak mai leh hawih lo ang reng tak mai te, a hmel, khual chhawn atana ţha lo fahran maite chu ka hmu chang tawh reng reng lova; a chetdan leh a thusawi avang chuan nu rinawm tak mai leh nu zahawm tak mai a ni tih chu ka hai lo reng reng ringawt mai a ni. A lehkhathawn leh Hosmer-a chungchang thu, chanchinbua a chhuahna chu dawhkan chungah chuan a dah a, a ţul hun huna koh theih renga a awm tur thu sawi chung zelin a chhuak ta a. Kan inlengnu chhuah hnu chuan Sherlock Holmes chu ngawi rengin a ţhu a, a kutzungţang chu a insiktir kim ţhap a, a thluang duai a, In chung lam chu a melh vang vang a.

Ngawi renga engemaw chen a ţhut hnu chuan Holmes chuan chhuar aţang chuan a kuaite tar tawh tak mai, hnûm hlarh mai chu a han ban a, tlemin a hmel landan chu a han tidanglam hlek a, kuaite chu a ţan a, a pak khu ta luih luih mai a. Chutah a ţhutthlengah chuan a’n ţhu ngil a, “Kha nula kha zir tham fê a awm ka ti. Min râwn nachhan, a buaina ai mah khan amah hrim hrim kha zir tham awm zawk mahin ka hria, a buaina kha chu a tê tham angreng em mai. Watson, ka thil chhinchhiahna bu kha i keu chuan khatiang deuh kha chu hailan tur i hmu thuai maiin ka ring; entirnan, kum 1877 kuma Andover thubuai te kha. Khatiang kha chu thil thar a ni lo tawp a, mahse kan inlengnu hrim hrim aţang ringawt pawh khan thil tam tak chu chhuidawn tur a awmin ka hria,” a ti ta a.

Kei chuan, “Kan inlengnu taksaah khan ka hmuh ve theih loh thil tam tak i lo hmu leh ta a ni ngei ang,” ka han ti a. Holmes chuan, “Watson, i hmuh ve theih loh ni lovin i hmuh si i hriat si loh a ni chauh zawk. A eng lai kha nge en tur tih i hriat loh avangin thil pawimawh i hmuh hmaih ta mai a ni. Kawrban hmawr te, kutzungpui tinte leh pheikhawk hrui pawimawhziate hi ka hrilh hre zo ngang lo che a nih hi maw. Kha nu i han hmuh aţang khan engnge hriat theih i neih le? Amah kha han hrilhfiah dawn teh,” mi ti ta a.

Kei chuan, “Chuti maw, lukhum parh hlai tak, rawng dum lam lek lek, hmeichhe lukhum atana an hman a khum a, a lukhum tlang chu a tisen lehnghal. A kawrlum hak kha a rawng a dum a, chutah chuan ţhifang angreng, a dum chi hi a ţhui bet tel bawk a, a tlangah tlereuh dum chi a dah tlar bawk. A kawr hak kha chu a buang a ni nain a duk lam a pawl lek lek, a ban hmawr leh a nghawngah a senin a tuam. A kutkawr pawh a buang a ni a, a kutzungchal zâwn a pawp tawh. A pheikhawk chu.. ka lo en miah lo. Rangkachak bengbeh bial chi te tak te a beh a, nu khawsa thei tak hawiher pu a ni bawk a, a hawiher kha a hnamchawm lek lek zawk mai,” ka ti ta a.

Sherlock Holmes chuan zawitein a kut chu a han bêng thlap a, a chek tlak a, “Watson, i dek nalh hle mai. I dek nalh hle mai ka’n ti nawn leh ngat teh ang. A pawimawh lai i hmaih tih chu sawi ngai lovah lo lum ta ila, a tihdan kawnghmang chu i hre fuh viau a, rawng thu-hlaah i mit a chak ţha hle bawk a ni. A landan tlangpui leh ni awm anga kan hriatdan angah hian innghat ngai suh la, a nihna dik tak chu chiang takin thlir zawk ang che. Hmeichhia ka melh reng reng chuan an kawrbân hmawr hi ka en hmasa ber ziah a; mipa ka melh erawh chuan an kekawr khûp ka melh hmasa ve thung ţhin. I hmuh angin kan inlengnu kawrbân hmawr kha tlemin a pawr deuh hlek a, kha khan thil tam tak min hrilh a ni. A banrek chung lawk, a kutphahah khan a khawl chhut loh laia lehkha chhutna khawl a nemna hnuhma a lang bawk a.

"Hetiang hnuhma hnutchhiah hi lehkha chhutna khawlah chauh lo, puanţhuina khawlah pawh a awm ve thova, mahse puanthui mi chuan hetiang hnuhma hi an kut dinglamah an pu lova, an kut veilamah an pu zel thung a ni. Chubakah, khawl chhu mi reng reng chuan chutiang hnuhma chu an kutphah chhah lai tak, an kutzungpui leh an kutzungte inkar, banrek chung lawkah hian an pu a, puanţhui mi erawh chuan an kutzungte hnuai lawk, an kutzungpui aţanga a hla thei ang berah hian an pu ţhin a ni. Chutah a hmai kha ka’n en a, a tarmit vuahna lama a hnarkawn bul, tarmitin a delh khuarna hnuhma ka hmu a, a khawhmuh tawi thu leh khawl a chhut thu ka hrilh ta mai a, mak a ti hle a nih kha,” a han ti a. Kei chuan, “Kei pawhin mak ka ti ve tho alawm,” ka lo ti a.

Holmes chuan, “Mahse chungte chu thil hmuh awlsam lutuk mai leh lang sa a ni alawm. Chutah a pheikhawk kha ka han en leh a, pheikhawk inkhing pangngai chiah si kha a inang lo riau a; a pheikhawk lehlam chhîp kha chu siai a pe nual a, mahse a lehlam kha chu in tunlai ţawng takin a ‘hâng’-in a rawn bun chhuak tawp mai a nih kha. A pheikhawk khing lehlam chu a hmeh kilhna hnuaihnung ber leh a dawttu chauh a inkilh a, mahse a kilhna chu panga lai a awm si a; a lehlam pawh a chungnungber leh a pathumna leh a pangana chauh a kilh bawk a ni. Chuti anih chuan hmeichhia, la upa vak si lo, inchei ve thawkhat si, incheina pawh pangngai ve tak si chuan a pheikhawk rawng inang chiah lo chu a ngai pawimawh ta lova, a kilhna pawh a kilh kim ta lo tihna a ni a; a hmanhmawh hle a ni ang han tih mai chu a finthlakin a thil chik thlak lem em ni?” a ti ta mai a.

Kei chuan ngaihnawm hi ka lo ti tawh khawp mai a, “Thildang engnge la awm?” tiin ka lo zawt sauh sauh a. Holmes chuan, “Ka han hmuh vuai khan an In a rawn chhuahsan hma, a inchei fel vek tawh hnuin lehkha a ziak tih ka hre leh thei mai a ni. A kutkawr dinglam zungchal a ţet tih kha chu i lo hmuin i lo hre ve ngei a, mahse a kutkawr khinghnihah khan lehkhatui sendal chi a kai tih chu i hmu leh tawh lo a ni. Chuti a nih chuan hmanhmawh takin lehkha a ziak ang a, a lehkhatui burah chuan a kawlawm a zuk chiah thuk lutuk a ni ang tihna a ni leh thei mai awm e. Chu mai a la ni lo, a lehkha ziah hun chu tukin ngei a ni tih a lanna leh pakhat chu nizan lama a ziah chu ni sela chuan a kutzungchalah khan khati takin lehkhatui kha a kai fiah tawh lovang. Heng thil hi chu a nuihzatthlakin a tê tham em em a ni. Khawinge, Watson, thil tak tak lam i han buaipui tawh teh ang. Khawngaih takin Mr Hosmer Angel-a an hrilhfiahna chanchinbu, a bo tih an tarlanna chu min han chhiarsak thei lo maw?” a ti ta a.

Lehkhathem chu hmuh theih turin ka’n leklang a; ka chhiar ta a. “Pa pakhat, Hosmer Angel chu ni sawmpali tuk khan a bo. Fit nga leh inches sarih vela sang; pa satha deuh, ngo lam deuh, sam dum, chalsam kawlh lek lek, bianghmul chher chhawr, bianghmul dum hlap, hmuihmul dum buk tak nei a ni a; tarmit sen lam lek lek a vuah a, a tawng a phelh deuh hlek bawk. Hmuh hnuhnun ber tum chuan kawrfual dum, a hmalama maimaw puan vuah leh kawrchung hnuai a ha, sana ahna hrui a hmang bawk, a kekawr chu a rawng a buang a, buikelek puan lam lek lek a ni a, a pheikhawk sirah chuan pawhfan a invuah a, a pheikhawk chungah chuan ngal kawr buang a bun bawk. Leadenhall Street a pisa pakhatah hna a chelh niin hriat a ni. A hmutu...” ti a ka chhiar lai mek chuan Holmes chuan, “A tawk e,” a lo ti a.

Chutah, “Heng lehkhate pawh hi a mak danglam lo hle mai. Mr Hosmer Angel-a nihna leh a chanchin han chhuichhuah theihna âwm pawh a awm meuh lova, mahse helaia hi Balzac-a thusawi pakhat a rawn sawichhawng zauh a nih hi. Thildang pakhat, mak ang reng tak mai a la awm a, chu erawhchu mak i tih ve ngei ka ring,” a han ti a. Kei chuan, “Lehkha chhutna khawla chhut an ni tlat,” tiin a thusawi lai chu ka lo chhunzawm a. Holmes chuan, “Chu mai zawng a la ni lo deuh, a hming ‘sign’ chen hian lehkha chhutna khawla chhut a ni tlat hi a ni. Han en ta che, hei a hnuai lama hi, te fel ren rawnin ‘Hosmer Angel’ tih a inchhut kalh hi, a ni zah pawh a inziak nghal a.

"Mahse a awmna hmun hi, Leadenhall Street ti mai bak chuan a sawi thawi duh reng reng lova, Leadenhall Street tih ngawt mai lah chuan a huam zau hle mai si a ni. A hming ‘sign’ chena lehkha chhutna khawla a chhut hian chhuidawn dan tur min kawhhmuh thei hle mai—ti ila, thil zawng zawng a hrilhfiah a ni ber zawk e,” a ti ta a. Kei chuan, “Eng thil zawng zawng maw a hrilhfiah?” tiin ka lo zawt thuai a. Holmes chuan, “Ka ţhian duh tak, he thil pawimawhzia hi i hmu pha ve lo te hi a lo ni palh hlauh pek ang e?” a ti ringawt a. Kei chuan, “A thutiam hlen nana a hming hi ama kutziak ngeia a ‘sign’ duh lo tih thu mai lo hi hrilhfiahna dang te a la awm a nih ngai chuan ka hrethiam phak lo a ang hle mai,” ka ti ta a.

Holmes chuan, “Chu zawngin a pawimawhna a phawk zo ta hauh lo mai. Engpawh ni se, lehkha pahnih ka han ziak ang a, chu chuan thil zawng zawng hi a chingfel duak mai ang. Ka lehkha pakhat chu London khawpui chhunga sumdawnna hmun pakhatah ka thawn ang a, pakhat leh chu kan nula-i pami, Mr Windibank-a hnenah khan ka thawn ang a, naktuk dar ruk, tlai dar rukah hetah hian min hmuh theih dawn leh dawn loh ka va zawt ang e. A mipa lama chhungte pawh hi dawr tel nghal vek ila a ţha zawk mai thei a ni. Tunah zawng, Doctor, ka lehkhathawn chhanna kha a lo thlen hma loh chuan kan thil buaipui lai hi chu kan chawlhsan thei rih tawh ang,” a ti ta a.

Ka ţhianpa chu kum tam ka lo zui tawh avang leh a fin remhriatzia ka lo hriat tawh avangin chhan ţha tawk nei lo chuan chutiangin a ti mai mai lovang tih ka hria a. Ka hriat ve phak loh tawp, he thil mak tak mai hi an rawih chhan ang ngeiin hrethiam ta niin ka ngai ve mai a ni. Sherlock Holmes-a hi vawikhat chiah a hlawhchham tawhin ka hria, Bohemia Lalpa leh Irene Adler-i’n thlalak an inchuh chungchangah khan thlalak kha a la kir leh thei ta lova, a remruatna a tlawlh a; mahse ‘The Sign of Four’ tih te leh ‘A Study in Scarlet’ tihte a chinfel dan ka’n ngaihtuah chuan, a hlawhchhamna hi chu hlawhchhamna âwm tak zel hi ni maiin ka hria.

Chumi ţuma Sherlock Holmes-a ka kalsan lai chuan ka rilru te te chuan a tuk leh lama ka hmuh leh hnuah chuan heng thil mak zawng zawng timaktu, a hnuk chu a lo vuah tawh ang a, Miss Sutherland-i pasal tur bo tak daih nachhan pawh chu a lo hre chhuak tawh ngei ang tih ka suangtuah nauh nauh a. A tuk nileng mai chuan keima hna lamah ka buai a, damlo khum bulah ka vir nileng zak mai a, ka hna ka han tihfel meuh chuan tlai dar ruk a lo ri ţêp tawh a. Hmanhmawh takin tawlailir ka man a, Baker Street lamah chuan ka tlan phei ta vang vang a. Holmes-an kan thil buaipui lai a chinfel laia a kiang hnaia lo awm ve loh chu ka hlau kher mai.

Baker Street a Holmes-a awmna hmun ka va thlen chuan ani chu ţhutthlengah hian a lo ţhu-mu titih a, a bul vela dawhkan chungah chuan damdawi chi hrang hrang dahna bur hi a lo tung ţhut mai a. Chu mai ni lovin damdawi chawhpawlhna hmanrua pawh ka hmu ţeuh mai. Ka va luh chuan chung thil han khawih vel te chu nuam a tihzia min lo hrilh mawlh mawlh a. Kei chuan, “Chu i hmuchhuak thei ta maw?” tiin ka’n zawt a. Ani chuan, “Aw. Hmuchhuak ta e, Bisulphate of baryta alawm maw lo ni le,” tiin mi chhang a. Kei chuan, “Ni lo, i damdawi lam ka zawt lo che, kan thil buaipui lai kha maw le,” ka han ti a.

Holmes chuan, “Kha thil kha maw! Ka damdawi chawhpawlh chanchin emaw min zawh ka lo ti mai asin. Kan thil buaipui te kha chu buaipui tur reng reng a awm hlei nem, ka hrilh tawh che ang khan a ţhen lai kha chu a mak ve lek lek e tih mai a nia. A buaithlakna lai ber zawk erawh chu thilsual titu hremna tur dan hi sawrkarin a siam loh avangin thilsual titu hi hrem hleih theih a ni dawn tlat lo hi a ni,” a han ti a. Kei chuan, “Chuti a nih chuan tunge thilsual titu chu ni a, eng vangin nge Miss Sutherland chu an tlansan?” tiin ka zawt ta a. Chu zawhna chu ka chhakchhuak fel hman chiah a, min chhân tumin Holmes chuan a kâ a âng hman tawh tihin hah awm taka ke pen ri hi kan hria a, kan awmna pindan kawngkhar chu an rawn kik ta nghal a.

Holmes chuan, “Kan nulai-i pami, Mr James Windibank-a a nih chu. Dar rukah a lo kal ang tiin lehkhain min rawn hrilh a. Lo lut rawh!” a han ti nghal a. Kawngkhar chu a rawn inhawng a, Inchhungah chuan pa sa ţha deuh, pa vantlang zet tur, kum sawmthum mi âwm vel, inmêt fai vang mai, ngo lam lek lek, mitmeng fiah leh thîp angreng tak mai hi a lo lut ta a. Min han melh tawn zak zak a, a lukhum kenlai chu chhuarah chuan a dah a, a bul hnaia ţhutthlengah chuan a ţhu ta a. Holmes chuan, “Mr James Windibank, chibai le. He lehkha khawla chhut hi i rawn thawn niin ka ring. Dar rukah min hmuh i tum thu min hrilh a,” a han ti a.

Kan inlengpa chuan, “Ni e ka pu. Ka rawn tlai deuh hlek a nih awm hi, mahse ka thu thua awm hlei thei ka ni meuh lova. A tihngaihna tak a awm lo a ni. Thil hote avangin Miss Sutherland chuan a rawn tibuai che a, a pawi ka ti angreng khawp mai. Hetiang thil hi vantlang hriata tarlan ka duh loh tehlul nen, mahse ‘police’ in ni lo hlauhva a zia tak a awm. Ani lah hi a tih tawh chu ti tlut mai, awm hle hle thei hauh lo mi a ni lehzel si nen. Kan chhungkaw thila kan buaina, hetia vantlang hriata a han puak chhuak ta hi ka tan chuan a nuam vak lo a ni. Chubakah pawisa khawhralna atan chuan a ţul nep deuh bawkin ka hria, Hosmer Angel-a chu i hmu thei awm chuang si lova tirawh?” a han ti a.

Aw dam dap hian Holmes chuan, “Ngawi teh, i ngaihdan ang lo tak mai chuan ngaihdan ka nei a, Mr Hosmer Angel hi ka hmuh chhuah ngei ngei ka lo inring nghet ve bur mai asin,” a lo ti ta khauh mai a. Windibank chu a phu zawk a, a kutkawr kenlai pawh chu a thlauh ta tawp mai a. Holmes-a hnenah chuan, “A ngaihthlak a va’n nuam ve le,” a han ti a. Holmes chuan, “Lehkha chhutna khawl hian makna riau a nei ve a, a neitu chanchin zah ngawt hi chanchin a nei ve zel awm nghe nghe asin. Lehkha chhutna khawl reng reng hi chu a thar a diai a nih loh chuan a hnuhma inang hi zuk awm ngai hauh lova.

"A hawrawp mal mal hi han en thliah thliah ila, ţhenkhat chu a tlabal deuh bik a, ţhenkhat chu a pangkhing lehlam chauh te hi a tlabal bik a ni. Mr Windibank, he i lehkha pawh hi han en mah la, hawrawp mal, ‘e’ chunglam hi tlemin a phuai deuh hlek tih i hmu mai ang a, hetiang deuh hlek hian hei ‘r’ hnuailam hi a nihdan tur ang a ni chiah lo tih i hmu ang. Khatianga han chhinchhiah theih mai tur emaw, han hmuhchhuah mai tur emaw kha hawrawp sawm leh pali laiah a awm a, mahse tuna ka han kawh chhuah tak te kha a langsar zual deuhte chu an ni,” a han ti a.

Kan inleng pa chuan a mitmeng fiah kel kawl chuan Holmes chu a melh kar mai a, “Kan pisa lama kan lehkha thawnte chu he khawl vek hian kan chhu a, chuvangin he khawl hi a rim em mai a, a lo phuai ta deuh pawh chu a mawh love,” a ti ve ta a. Holmes chuan, “Khai le, Mr Windibank, ka thil zir pakhat, mak leh ngaihnawm ve angreng deuh mai ka’n kawhhmuh ang che. Engtik niah emaw chuan lehkha chhutna khawl leh suahsualna inkungkaih theihdan hi ka la ziak ve mai mai ang a, a buin ka la chhuah dawn emaw ni tihte hi ka ngaihtuah ve thin a sin. Hetiang hi ka thil ngaihven ve zawng te chu a ni mai mai a, a patling thawmhnaw lo teh a nia.

"Mi bo, Hosmer Angel-a hnen atanga lehkha thawn lo kal pali lai mai ka kawl a, hengte hi chung lehkhate chu an ni, a vai hian khawla chhut vek a nih nghe nghe hi. Heng lehkha pali-ah hian ‘e’ chunglam zawng zawng hi a phuai vek bakah ‘r’ hnuailam hi hmuh tur a lawi a awm lo deuh vek a; mahse chung mai mai zawng a ho tham em mai a, ka enlenna hmanga khang lehkhate kha ngun taka i en chuan thil dikhlel dang dang pawh hmun sawmpali laiah i hmu ang,” a ti ta zel a.

Mr windibank chu a ţhuthmun aţang chuan a inperh tho at a, a lukhum ban pah chuan, “Mr Holmes, chutiang thu vuvûk mai mai ka ngaithla hman love. I man theih leh man la, i man fel hnuah mi la rawn hriattir ve dawn nia,” a ti ta mai a. Holmes chuan kawngkhar lam a pan a, kawngkhar chu a va kalh hmiah a, chumi pah chuan, “Tehreng mai, ka hriattir ve ngei dawn che a ni, ka man tawh tih thu hi,” a ti ta a.
Sazu dan beh ang mai hian Windibank chu a hawi hra hra a, a dâng nghal sâwp sâwp a, “Eng maw? Khawiah maw?” a han ti a.

Thlem daih tum ni awm tak hian Holmes chuan, “A sawt lovang, a sawt miah lovang. Mr Windibank, chhuahna kawng a kaw tawh lo reng reng. A hriat chhuah a awlsam lutukin a te tham lutuk, khatiang thil hote mai kha chingfel thei awm lo tur anga mi han sawi avang khan min fak ţha duh lo hle a ni. Ni e, chu chiah chu ka sawi tum a ni — a dik teh asin! Ţhu la, i han sawi tlang vek law law teh ang,” a ti a. Kan inlengpa chu a ţhuthmunah chuan a sawp thla hnawk a, a hmai chu thlanfim hian a bawh nghal ţawk ţawk mai a, “Hrem theih ka ni chuang lo,” a ti ta ngawt a.

Holmes chuan, “Chutiang chu a ni ang tih ka hlau reng a ni. Mahse Windibank, nangni leh keini inkarah chuan dan leh hrai avanga thiam inchantir kan tum dawn em ni? A suahsual tenawm rimchhiat bawlhhlawhthlak lutuk deuh em mai tih thu chauh hi kan ngaihtuah tur ni maiin ka hria asin. Engpawh ni se, thil awmdan chu ka’n sawi ang a, ka hriat sual lai a awm chuan thil awmdan dik tak zawk chu min lo hrilh zel dawn nia,” a han ti a. Kan inleng chu a ţhuthmunah chuan sahuai ang mai hian a ţhu kawm tlat a, a nuam tihzawng a ni chiah lovang tih chu ka hre mai.

Holmes chuan thuk hungna tlang chu a tlawh chhan a, a kekawr ipte a zen sauh sauh a, a ţhu awn diai a, keini min bia ni chiah si lo hian a ţawng chhuak ta mawlh mawlh a. “Mi pakhat hian hmeichhe pakhat, a aia upa zawk fe hi a neihsum ţawmpui a duh avang ngawtin a nei a; a nupui fa chhawm nula pawh chu pawisa thawk chhuak thei khawpa a lo puitlin ve tawh avangin chu nula pawisa thawh chhuah sa pawh chu an rinsak ta zel a. Nula pawisa thawh chhuah chu a tam tham ve em avangin an chhungkaw tan chuan ţhatpui tham tak mai a ni a, ani chu awm lo sela chuan an kaw hawk ngei ang.

“Nula chu nula fel tak mai leh chhungte thuawih thei tak mai a ni a, chuti chung si chuan nula intodelh leh nula ngainatawm tak mai, mi biangbiak thiam leh rinawm si, ngainat zawngte lawm thiam tak mai a ni a; chuvangin a nulat hun chhung chu a rei tawh kher lovang. Nimahsela nula chuan pasal a neih vaih chuan a nu leh a pahrawn tan chuan sum hnâr a chat tihna tluk a ni ve tlat a, thlatina a hnen aţanga an sum hmuh chu a tawp dawn tihna a ni tlat a ni. Chutiang chu a nih avangin a pahrawn chuan a dan dân kawng a zawng ta a.

"An fanu nulain mipa, ama rualpui tawk a kawm chu a phallo tlat a, Inah a khung bet ta tlat mai bawk a ni. Nimahsela chutiang chu a ni kumkhua thei dawn lo tawp tih chu a hre chhuak ve leh ta a. A rinlâwk ang ngeiin an fanu chuan ama duhthu ngeia lâmpui ruai ţhehna hmuna kal a tum thu chu a sawi chhuak ta mai reng a. Chutah zawng a pahrawn chuan thil pakhat a ngaihtuah chhuak ta a, chu a thil ngaihtuah chhuah chu a finthlak khawp mai a; mahse thlarau lam châwmnan ai chuan pumpui châwmnan a finthlak zawk tih mai a ni.

"A nupui nen chuan an ţangdun a; a incheidanglam ta a; a mitmeng fiah kêk kâwk chu tarmit a vuah hnan a, a sakhmel fai veng vawngah chuan bianghmul te, khabe hmul te leh hmuihmul te a vuah a, a aw chiang ţha kek kawk pawh chu a tihniam lui tlat a, a aw pawh a thâwp sat mai. Nula khaw hmuh chu a tawi deuh avangin Mr Hosmer Angel-a angin nula chuan a hmu ta mai reng a; tichuan a pahrawn chuan a fanu ngaihzawng tur âwm ang chu a hnawtbo ti ila, a lehkhalh vek a ni,” a ti a.

Kan inlêngpa chuan, “Atirah chuan kan fiamthu mai mai maw le, hetiangin a la nâ ang tih hi rin ngaihna reng reng kan hre lo,” a lo ti a. Holmes chuan, “Dâwt pawh va ni nek suh. Engpawh ni se, nula rilru chu hmangaihna chuan a luah ta tlat a, a pami chu France ramah a awm ni a a hriat avangin a ngaihzawngpain a bum duh pawh chu a ring therte lova ni. Hmangaihna luipuia inbual ve ni a a inhriat avang chuan nuam pawh a ti hle a, amah hringtu, a nu ngei pawhin a ngaihzawngpa chu a duhpui avangin a ngaihzawngpa chu a hmangaih lehzual a. Chutah Mr Angel-a chu an Inah a rawn leng ţan ta a. A rawn len nachhan hi, an lemchan chu a tak ang a nih dawn phawt chuan theih chen chen bawhzui a ţul vang chauh a ni.

“Tichuan an inhmu ta zauh zauh a, a tawpah phei chuan a hmeichhe tana midang han hnar leh remchang lo tawp turin inhualna hial an lo siam ta a; mahse inbumna thil ringawt chuan kumkhuaa inthlêm theih a ni dawn lo a ni. France rama zin tih ang reng kha chu dâwt mu êk mai mai a ni a; a hmeichhiain midang a belhbul tiremchang lotu atana phuahchawp thil mai mai a ni. Chutiang a nihzia chu Thuthlung Thar Bua kut nghat meuhva chhia inchhamtir te khan a hrilhfiah chiang ang chu, chu chu a la tawk zo lo in ti a nih leh thil hlauhawm lo thleng tur âwm ang hriatna riau awm ni a thusawi thawite kha in duh leh ngaihtuah ve tawh ula.

“Tichuan Hosmer Angel-a chuan Miss Sutherland chu hmangaihna der hrui chuan vêt hnih vêt thum vêt ngain a phuar ta tlat a; Miss Sutherland chuan engpawh lo thleng se Hosmer Angel chu kum sawm chhung chu a lo nghak ang a, midang thusawi chu a bengkhawn duh reng reng lovang. Chutah Hosmer Angel-a chuan Miss Sutherland chu Biak-In kawngkhar-ah a hruai thleng a, a puhbosan leh ta si a; a puhbo dan pawh hi inbumna hlui tak mai, tawlailir kawngkhar lehlama lawn luh a, lehlama chhuahtlang leh chi mai mai hi a ni. Mr Windibank, tuna kan thil buaipui, hmangaihna hrualhrui chu chutiang vela kual kawi chu a niin ka hria,” a ti ta a.

Holmes-an thu a sawi chhung khan kan inlengpa chuan mahni inrin tawkna thinlung, a tihbo tawh chu khawilai aţangin emaw a lo dap hmu a ni ta ve ang, nui sâwng chungin a thova, ding chungin, “Mr Holmes, chutiang chu a lo ni mai thei a, a ni lo mai thei bawk. Chuti taka fing i nih chuan tunah hian dân kalha che chu kei hi ni lovin nang zawk hi i ni tihte i inhre ngei ang. Ka thiltih tâkte kha rorelna hmuna khin theih loh thil vek a ni a; mahse nang chuan kha tunah i chênna pindan kawngkhar i kalh tlat a, chuvangin mi duh lo chung hrengbet, mi duh lo chung nawr lui i ni tlat mai,” a leh tih ta hlauh mai a.

Holmes chuan, “Rorelna hmunah chuan sawi buai theihna ka nei hauh lo mai,” tih pahin kawngkhar chu a theh hawng ţhuai a, “Mahse nang aia hrem phu hi he lei chungah hian ke pahnihin an kal lo reng reng ang. Kan nula-i chuan unau-nuţa emaw, ţhiante emaw a neih vaih chuan chumite chuan i dara vuak hi an ba chiang hle mai,” a ti hman chauh a. Kan inlengpa, hmel ngeiawm lutuk tak mai, nuih ţha lo tih hriat reng renga nui ţhaw chu a va hmu a, “E heu! A heti dawn maw! Hetiang thil hi min ruaitute chungah ba ve kher lo mah ila helaia hruihrual hi a remchang ţha kher em mai, mahni kutzal...” tih pahin hruihrual awmna lampan chuan pên hnih lai hi a’n pên phei a, mahse a lak thlak hman hma chuan kan pindan kawngkhar chu a intheh khar ţhuai a.

Tukverh lamah kan tlan vat a, kawtthlera Mr Windibank-a lîm thla puat puat chu kan hmu hman ţawk a ni. Nui hawk hawk chungin Holmes chu ţhutthlengah chuan a ţhu hnawk a, “Kan misual tenawmpa chuh! A sual em mai, Setana chibai a buk theihnana thilsual lian tham, thihna tling khawp a tih hma chuan khati khan thilsual chi dang eng eng emaw tiin a hmanhlel ngei ang. Engemaw zawnga han ngaih chuan he kan buaina hi a phurpuiawm ve riau alawm,” a han ti a. Kei chuan, “I thil chhui chhuah dan kha ka la hrethiam ve mang hlek lo mai ka ti,” ka lo ti a.

Holmes chuan, “Thil awmdan kha han thlir vang vangin Mr Hosmer Angel hian eng hlawkna emaw chu a neih phah ngei dawn niin a hriat theih sa a, a chhan chu a chetdan kha a mak tlat a ni. Chuti anih chuan a hlawkpui thei ber tur chu han zawng leh ila, Miss Sutherland-i pami kha a ni leh a. Chutah kha mite pahnih kha an awm lai a inrual ngai lo reng reng a, vawi khatah an pahnihin Miss Sutherland-i hmuh theih turin an awm ngai lo reng reng ka tihna a nih chu. Chu chuan ngaihdan min siam leh thei a. Chutah a bianghmul leh hmui-hmai buk vel lutuk te, a awm danglam te, a tarmit vuah te khan ngaihdan min neihtir lo thei lo bawk a ni.

“Nimahsela ka rinhlelhna chu hriatchiannaa a lo chan takna tak erawh chu lehkhathawn leh hming ‘sign’ khawla chhut kha a ni. In-pafa an nih avangin a kutziak tlemte pawh nula khan a hmuh vaih chuan a hrechhuak ngei dawn tih a hrechiang em em a, chu lo pawh thildang engemaw neuh neuh chu a la awm, mahse a kawh a thuhmun vek tho a ni,” a ti ta a. Kei chuan, “Engtinnge anih leh i hriatfiah tak dan chu?” tiin ka zawt leh ta a. Holmes chuan, “Ka mi duh chu ka chhui chhuah tak chinah chuan a hnathawhna lamah lehkha ka thawn a, chanchinbua Miss Sutherland-i thuchhuaha a mi duh pa incheina zawng zawng leh san zawng te kha ka hrilh nghal vek a. Chutiang mi chu an rawih leh rawih loh ka va zawt a.

“Tin, lehkhachhutna khawl hnuhma kha a danglam bik tih ka hriat tawh avangin James Windibank chu ka awmna hmuna lo kal turin lehkhain ka va sawm a, ka beisei ang ngeiin a chhanna chu khawlin a rawn chhu a, a khawl ha pawh a inang chiah a ni. A chhanna lo thlen rual chuan Westhouse & Marbank, Fenchurch Street ami chuan lehkha min rawn thawn a, nichina ka sawi tawh, ka mi duh, James Windibank-a pianhmang pu chiah chu an pisaa a thawh thu min rawn hrilh a ni,” a ti ta a.

Kei chuan, “Anih leh Miss Sutherland-i hi engtinnge ni ve dawn?” tiin ka’n zawt a. Holmes chuan, “Thil awmdan hi zawng, hrilh mah ila a awih dawn chuang miah lo. Persian ho khan engtinnge an tih kha? ‘Sakei no lak chu a hlauhawm a, chutiang deuh bawk chuan hmeichhe suangtuahna duhthusam thaibo saktu tan pawh thil hlauhawm a awm ve tho a ni,’ an ti a ni lo’m ni kha? Kan hranghlui-ho Hafiz te leh Horace te hian thil an hre sual duh lo teh a nia,” a ti ta a.

THE END.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)