NATHAN Ep-7 (The Uninvited) by Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN Ep-7 (The Uninvited) by Aaron Malsawmdawngzuala

Unread post by Aaron Dustin » May 11th, 2018, 9:37 pm

Kum chanve vel lai chu buaina em em tawk lovin kan hna pawh a tluang a, a hahthlak loh mai bakah hnuchhui vak tur a awm em em hran ngailo bawk a, hun thawl pawh ka nei ve zeuh zeuh ta. Inrawk tih te, accident tih te leh thil lian tham em em lo, hna hautak lutuk ni lemlo hi chu kan buaipui ve zeuh zeuh a, mahse chu chuan min tihbuai phah em em chuang lo. Insawitheihna nilo se, Assistant Superintendent of Police (ASP) nihna ka han chelh ve thei tawh a, tin ka thianpa, ka hnathawhpui, ka senior hriat tawh zawng zawng a la fing ber mai leh Mizoram Police Officer ka hriat tawh ah chuan ala huaisen ber ang, ka unaupa ang maia ka en Nathan-a pawh hna lamah a hah thin bawk nen, tun tuma kan hna ah chutia hahthlak em em a awmloh vang hian ani pawh nuam a ti hle a, kan inhmu khat hle mai. Kum naupang te si Deputy Commissioner of Police a ni thei hi chu a fakawm ve thlawt, a ni anga naupang DCP hi chu an vang ngawt ang. Vawi duailo kan inzui tawh a, vawi tamtak min chhanhim a, a fin zia hi chu kei aia hrechiang an awm lo ang. Vawi tamtak thi tep tep khawpin a awm tawh a, kei pawh chutiang bawk chuan ka thi teuh thei khawp mai, mahse Pathian awmpuina azarah kan la him zel chu a nia. Nathana nen hian case tamtak kan buaipui ve tawh a, chhuichhuah loh ala nei mang lo. Ka hriattheih chinah chuan misual chhuichhuah loh kan neih awmchhun chu nikum maia damchhunga jail tang tura kan thawnliam tak, serial killer anga court in thiamloh a chantir nula hmeltha tak Jennifer Lalhruaitluangi kha a ni, kha nu kha chu amahin a inpe ta kha a nia, ka la khawngaih ngawt mai. Ka office ah chuan ka thu a, ka phone chu ka khawih nuap nuap a, whatsapp group a message tam lutuk ka clear mek lai chuan constable pakhat hi alo lut a, "Sir, world bank road ah ruang chhar a ni, hnimin a lo inkhuh an ti a..." a rawn ti a, kei chuan, "Engtin nge, tuin nge ruang chu hmu?" tiin ka lo zawt a, constable chuan, "A hmuna mi ten min rawn hrilh dan chuan mi kawngkal laiin an hmu an ti ringawt a.." a ti a, "Anih chuan kan va phei dawn em mi niang?" tih pah chuan ka tho a, ruang awmna lam chu pan tur chuan kan chhuak a, Nathana chu ka phone a, "Nangmahin lo va buaipui mai teh.." a tih avang chuan constable pathum leh PI pakhat nen World Bank Road lampan chuan kan inzui phei ta a.

Ruang awmna kan va thlen chuan mipui pawh an lo tam tawh ngei mai, ruang chu puanin anlo khuh a, abulah chuan thisen vel a luang nuai bawk a, kawngsir lamah a ni. Mipui ho chu ka melhkual a, "Ruang hi tunge hmu?" tiin mipui ho chu ka zawt a, putar pakhat, huan a feh chhuak tur niawm taka ipte pui lo ak chu a rawn pen chhuaka, "Ka pu, keiman ka hmu" a rawn ti a. Keichuan, "Engtin nge i hmuhdan...han sawi teh" ka ti a, ani chuan, "Ka pu,kei hian bawng ka vulh nual a, hemi kalkawng atanga hla vaklo ah hian huan ka nei ve a, bawngchaw zuk lak ka tum a, chuan kawngsir ah he nula ruang hi hnimin alo inkhuh a, atir chuan mi bawngchaw dah a maw ka tia, mahse hnim kara a kutzung tang lo lang kha ka hmu a..” a ti a. Ka sana bun lai chu ka melh zeuh a, dar 10:50 am alo ri tawh a, “Dar engzat vel khan nge I hmuh?” tiin ka zawt leh a, chupa chuan, “Dar 9 a pel vel chiah chiah ang, ka thiante ka phone nghala, chuan midang ho pawh hi ti hian an rawn pungkhawm nghal a nih hi.” a ti a. Ruang chu ka va pan hnai a, puan a an khuhna chu ka hlip a, hmeichhe tleirawl kum 18 vel chauh ala ni ang, a pian pawh analhin a hmeltha zek lehnghal a. A hmaiah chuan hliam chu a awm hran lo nanga, a mit erawh a duk deuh a, tualthattu hian a hnek emaw, a beng ni ngei tur a ni. A dulah vihna hnuhma hmun thum laiah a awm bawk a, a thawmhnaw hak atang chuan hmeichhe fel leh taima tak anih chu a rinawmloh hle bawk. Kawr ban bul pink pan tak mai a ha a, jeans kekawr chhing fahran mai, mal lang vek khawpa chhing, a mawng khuh tawk lek hi a ha bawk a, pheikhawk sang, kezungtang lang thei, nalh tak mai a bun bawk a, a pian a nalh em em lehnghal. A ipte ah chuan engmah a awmlo a, purse emaw, phone takngial pawh a awmlo, tualthattu hi rukru a nih ngei a rinawm. Constable dang ho chuan mipui ho chu an hnawt haw a, minute 10 vel a ral hnu chuan Nathana pawh alo thleng a..

“Sir, ilo kal dawn lo maw ka tia?”

“DGP in va kal ve rawh min ti a..”

“Hun rei tak chhung kan awm hahdam tawh bawka, hnuchhui lam tan a hun leh ta a ang dawn hle mai.”

“Nia, theih tawp kan chhuah leh dawnnia aw Rinte..”

Nathana chuan ruang chu a en fiah ve leh phawt a, Ruang hmu tu pa chu a ko a, “Tunge I hming?” tiin a zawt a, chupa chuan, “Ka pu, Lallianmawia ka ni e..” tiin a chhang a. Nathana chuan, “Nih leh Pu Lianmawi, ruang hi I khawih sawn em? Ka sawi awmzia chu, abul vel te hi i khawih danglam lo tiraw?” tiin a zawt leh a, Pu Lianmawia chuan, “Engmah ka khawih lo, hnim in a khuh tlat sia, hnim hi ka la sawn ringawta, Police lam ka phone a, in lo kal chhungin ka thiante ka phone a, midang anlo pungkhawm bawk a, tichuan puan hian kan khuh a, chuzawng chu a ni mai.” tiin a chhang a. Nathana chuan ruang an khuhna hnim lo darh nuai chu a va pan a, a hai kual chiam a, engemawni hi a chhar a, a ak ta daih a. Constable pakhat chuan Nathana bulah chuan, “Sir, a hming leh a chhungte pawh kan hre tawh e. Lalhmingmawii kum-20, Lalrotluanga leh Zoremsangi te fanu naupang zawk a ni a, Electric Venga awm an ni e. Achhung te tunah in lamah a ruang anlo nghak mek.” a rawn ti a, Nathana chuan, “A lawmawm e,in thawk tha e…ruang hi Hospital lamah tihfai turin phur phei ula, chuan Rinawm..nang a chhungte lo buaipui la, thu vel pawh lo va zawt fiah la, kei chu Siby Farm ah ka va kal ange.” a ti a, keichuan hrethiamlo takin, “Siby Farm ah enge I tih dawn?” ka ti a, Nathana chuan, “He nula inchei dan hi en ta che, nizan lama party naa kal a ni tih a chiang reng alawm, a kawr hak laiah hian zu rim pawh ala nam a, a haw lampang ah an lo that pawh a ni thei a..chuvang chuan nizan lamah party a awm nge awm lo ka va en anga, eng ho party nge tihte nen, ka va zawt fiah ange, constable hi pakhat minlo pe ve bawk la..” a ti a, tichuan Nathana leh constable pakhat chu Siby Farm, ruang hmuhna atanga hla vaklo a awmah chuan an inkhalh phei ta a, keipawh chu midang zawng nen chuan Hmingmawii te in lam kan pan ta a.

Hmingmawii te inah chuan kan lut a, anu chu thu zawhfaih chi anilo, a tap nasa lutuk chu a chau vek thei hial a, a khawngaihthlak awm ngei mai, mahse apa erawh chu a inti pachang hram hram a, thu zawtfiah tur chuan Hmingmawii room lam kan panchho ta a. A room chu nula room tih takah a felfai em em a, a zau tha a, mi khawsa thei tak an ni tih a hriat bawk.

“Pu Tluang, han inzawt nghal mawp mawp mai ila, tlema personal thil deuh ka zawt che anih pawhin minlo hrethiam la, in fanu rawng taka thattu hi man ngei kan duh si a, ngaihloh lamah lo la suh aw?”

“E..tehreng e, I duh duh min zawt rawh…kan fanu thattu hi man ula, aphutawk hremna pe ngei ang che u.”

“Ka pu…Hmingi hian hmelma emaw, huat deuh emaw a nei em? Anihloh pawn amah itsik tu emaw, amah haw tu deuh te a nei em?”

“Chutiang ka va hre mai love awww…a neih awm hi ka hrelo..”

“Nih leh Hmingi hian bialpa a nei em?”

“Tunah rih chuan nei lovin ka hria…hman deuh kha chuan a nei a, kan inah pawh chaw alo ei ve fo a, mahse an inthen ta anih kha.”

“An inthen chhan I hria em?”

“Bawihi sawi dan chuan min kawp a tia, chuvang chu niin ka hria, an inthenna pawh kar 2-3 vel bak ala nilo.”

“Nihleh chupa chu tunge a hming?”

“Michael Lalrammawia ania, Kanan Veng ah an awm.”

“Awle, tualthattu hian Hmingi phone a kawl daih si a, zawnchhuah thuai chu duh viau mah ila a harsa deuh dawn a, mahse lo lungngai suh u, kan theih tawp kan chhuah dawn nia…chuan khawngaihin Hmingi room hi ka enfiah thei angem le..chuan a thlalak te, album te?”

“Tehreng mai…”

Hmingi wardrobe atang chuan album pahnih hi alo la chhuak a…thlalak chu ka enkual a, chutia rinhlelh em em tur chu a awm lemlo. Album pakhat chu ka en zo phawt a, pakhat chu ka en leh a, an thianho thlalak a tam hle mai. Thlalak pakhat ah chuan an thianho chaw eikhawm ni awm tak hian inah a ni a, thutthleng seiah an thum khawm lai thlalak a ni a, a sirah chuan mipa pakhat kutin seh chunga inthlahrunhmel taka lo ding chu alo lang ve a. Thlalak dang ka en chuan chupa chu a sirah a lo lang ve zela. Mahse han rinhlelh em em chi ah ka ngaih loh avang chuan ka keu leh zel a. Mahse thlalak apiangah chuan alo lang ve zel a, a thlalak apiangah chuan a kuttin ala seh vek zui. Ngaih chu a tha chiah lo, Pu Tluanga bulah chuan, “Ka pu, hepa hi tunge I hria em?” tiin ka zawt a, Pu Tluanga chuan, “Ka hrelo, an thian zinga mi a niang.” alo ti mai a, keipawh chuan chutia rinhlelh em em chi ah ka ngai ta lova, album chu ka pe let leh a. Room vel chu ka enkuala, “Pu Tluang, nizan chuan dar engzat velah nge Hmingi chu a chhuah?” tiin ka zawta, Pu Tluanga chuan, “Nimin khan nilengin a chhuak a, an college farewell anih thu a sawi a, an senior te an thlahna ni a nih thu asawi a, zing atangin a chhuak tawh a, tlaiah alo haw a, a inthlak a, tichuan after party Siby Farm ah kan nei dawn tiin a chhuak lehnghal a.” a ti a. Keichuan, “Tu nen nge an kal? Engin nge a kal?” tiin ka zawt leh a, ani chuan, “A thiannu khan a rawn hruai a, tichuan a thiannu nen bawk khan an chhuak leh a. A thiannu Chhani khan scooty a nei a, chuan zan dar 11 vel khan a thiannu te ina a riah mai tur thu a rawn sawi a, chumi hnua kan hriat leh zawng chu thah anih thu hi a ni leh mai.” a ti a. Athiannu Chhani te in chu ka zawt a, an veng (Electric Veng) thoa awm ve anih thu te leh an in awmna lai te min hrilh hnu chuan keipawh haw ka tum ta a, “Anih chuan ka va haw phawt anga, thu kan la zawt duh maithei che a, khawiah mah inchhungkua hian lo kalbo lo ula, lo zin bo lo bawk ula, fimkhur hle ang che u aw. Kan chhuichhuak vat ang, Siby Farm lam pawh kan puten thu an zawt fiah mek ania..” ka ti a, Pu Tluanga pawh chuan, “Awle…ka lo tawngtai pui ang che u, chhuichhuak ngei ang che u.” tiin min thlah liam ta a.

Station lamah chuan ka phei a, Nathana chuan min lo thlen khalh leh daih tawh chu niin. Nathana office a chuan kan titi a, Nathana chuan chanchin min zawh chuan Pu Tluanga nena kan inbiakna vel chu ka hrilh vek a, “Anih leh nang..enge I va an?” ka ti a, Nathana chuan, “Aa..engvak a nilo, Aizawl College ho farewell after party an ni e an tia, nizan lamah chuan boruak a tha viau ani awm e, intibuai pawh an awmloh thu te an sawi a, a rui hle tih chiah hriatbelh ka nei.” tiin min chhang a. Thingpui te kan han in te te phawt a, tichuan Nathana chuan, “Thingpui hi in zo ila, Hmingi thiannu Chhani te inlam chu kan va kal ve dawn em ni?” a ti a, kei chuan, “Nia, mahse inah a awm dawn mi? Hmingi te in lamah a awm zawk ang ka ring?” ka lo ti vat a, Nathana chuan, “Nia, mahse alo awm maithei asin, va kal phawt ila..” a tih avang chuan kan va kal ta a. Inchhung kan luh chuan Chhani pawh chu Hmingi vui turin alo insiam mek a, kan nihna te kan insawi hnu chuan thil awmzia chu anu leh pate pawh chuan an hrethiam a, room lam panin Chhani chu thu kan zawtfiah ve ta a, tun tum chu Nathana zawkin a zawt a.

“Chhani, enge I hmingpum?”

“Lalchhanchhuahi ka ni e..ka pu”

“Hmingi nen hian engtia rei nge in inkawm tawh?”

“Kum 9 vel chu kan inkawm tawh ang, kan naupan tet lai atang tawhin kan inkawm tawh a..”

“Anih chu…nileh Hmingi hian tunah bialpa anei em?”

“Nei lo a, mahse biak mek chu a nei a, an inngaizawng lo nangin an inhnim hnai em em a, chupa chu ka thianpa ania, Sawmtea a nia.”

“Sawmtea chu khawi vengah nge a awm?”

“Chanmari ah an awm a, keimah hian ka tihpui zawk a, Sawmtea chu mifel tak ania, ka duhpui em vangin ania ka tihpui.”

“Awle…kha chu thudangah dah ta ila, nizan khan in party na atang khan in haw ruallo ami? Hmingi kha in bulah a awmlo zawk nge….Sawmtea nen chuan an awmdun lo tihna mi? Chuan Hmingi khan apa a phone a, dar 11 vel khan in ina a riah tur thu a sawi a, enge awmzia? Sawi tawpla, zu in in tih pawh a hriat veka, mahse hlau suh I nute chu kan hrilh miah lo ang, Hmingi kha engtia thi nge?”

“Ka hrelo ka pu…nizan khan Sawmtea nen chuan an awmdun ngei a, an lamdun bawk a, dar 10:30 vel khan Hmingi kha duh aiin a in hnem deuh a, nuam ti fal deuh ho kan la awm a, a tam zawk chu an haw nual tawh a, a chhungte chu a phone a, kan inaa riah mai tur thu a hrilh ta a, tichuan ka va lam ve a, ka lam zawh hnu khan ka va let leh a, Sawmtea chauh alo thu a, khawnge Hmingi ka tih khan a rawn lam ve thu a sawi a, mahse kan zawn vak hnu pawn kan hmu miah lo a, midang tu emaw rualin a haw ve turah kan ngai a, ka phone lahin switch off a intibawk sia, tuberin nge thlah ka hrelo a, ka hriat leh awmchhun chu a thih thu chiah kha ani.”

“Anih leh Hmingi hi a bialpa hlui Michaela khan ala rawn tibuai ngai em?”

“Ateuhlo mai, khapa te kha chuan nupui a nei dawn an tia, an inthenna pawh kar 2 chiah ala nia, nupui a ru nghal te an tia, an inbiak ka hre tawhlo.”

“Nihleh..rinhlelh deuh I nei em?”

“Chutia rinhlelh chu ka nei lo, mahse hmingi hi Michaela nen an inthen atang khan tu emaw hian sms hmangin a rawn be thina, zahmawh deuh deuh te hian a rawn text thin a..”

“Chupa number chu I hre thei em?”

“Aih, Hmingi chiah khan a number a nei a, mahse aphone a bo tel bawk sia..”

“Anih chu…awle kan haw phawt ange.”

Chhani te in kan chhuahsan a, motor lam kan pan pah chuan Nathana chuan, “Rinawm, Sawmtea chu va hmuh leh phawt ava tha ve aw..” a ti a, keichuan, “Nia..iva kal leh teh ang..” ka ti a, mahse Nathana chuan, “Nang chu lo kal ve suh..keimahin ka va kal anga, nangchu Michaela te inah va kal rawh, thulo va zawt fiah ve la..” a ti a, keipawh chuan ka hnial lemlo a, tichuan Michaela te inlam pan chuan taxi in ka kal a, Nathana erawh Chanmari lamah Sawmtea te in a pan ta a. Michaela te in ka thlen chuan eng eng emaw chu ka zawt ve nual a, mahse rinhlelhawm zingah chuan a tel lo. Mi fel tak ani a, pawi a tih thu te a sawi a, an inbiak tawh ngailoh thu te a sawi a, a proof nan tiin a phone te chu min han check tir vel thlap a, chutia kan ti ti zawh hnu chuan ka haw ta a, ka thlen meuh chuan tlai dar 5 alo pel tawh a. Ka inbual fai a, chaw te ka ei a, chaw eikhamah chuan pawnah ka chhuak a, pawn boruak chu a nuam ngei mai. Ka sikret Farstar ngei mai chu phawrhin ka tan a, kan inkawtah chuan ka tei kuala, meizial chu ka zu khu hluah hluah a, ka rinloh deuh maiin kan in kawtah chuan Nathana chu a rawn kal a, motor atang chuan a rawn chhuk a, keichuan, “Ehe Sir, enge I rawn tih dawn a?” tiin ka lo zawt a, Nathana chuan, “Ka lo leng ve nih hi…hawh lut teh ang..” tih pah chuan inchhunglamah chuan min luhsan ta daih a, hepa hi chu a mizia a thlak dawnlo nih hi. Inchhungah chuan ka lut ve a, ka nu leh pate chu a lo be mek a, keichuan roomah ka luhsan daih a. Minute 5 vel hnuah chuan a rawn lut ve a, “Thiltha deuh ka nei ania..” a rawn ti lut a, keichuan ner sak pahin, “Huh…bialnu thar I nei mi?” kalo ti a, Nathana chuan, “Neilo ve…hei hi ania..” tih pahin a kekawr ipte atang chuan zungbun hi a rawn phawrchhuaka, “Ehee….ava nalh ve..silver pure anih kha..” tihpahin zungbun chu ka laksaka, “Khawia I lei nge..i va hausa thei bik ve..” ka tih zawm nghal zat a. Nathana chuan, “Ka ta ani hleinem…mawla” tiin min chhang ta daih a, keichuan mak ti tak hian, “Enga? Tu ta nge ni a?” tiin ka zawt a, Nathana chuan, “Hmingi ta a nih hmel khawp mai.” a ti ta mai a. Mak ka ti hle mai, hrethiamlo tak chuan, “Hmingi…I sawi awmzia chu…he kan nula Hmingi hi maw?” ka ti hu a, Nathana chuan, “Aw ni e, vawiin khan tualthattu in a ruang a khuhna hnim zingah khan ka hmua…” a ti a, keichuan, “Chuan…he zungbun hian min pui thei angem?” ka ti a, Nathana chuan, “Pui thei tehreng mai…achhan chu he zungbun hi en la, hmeichhe ta a nilo, mipa ta a ni, chuan a lian em em a, engti kawng mah hian Hmingi khan a bun tawk dawn lo, a thawl dawn lutuk.” a ti a..keichuan, “I sawi awmzia chu, he zungbun hi tualthattu ta I tihna nimaw?” ka ti a, Nathana chuan nuih suk pahin, “Ni chiang e…Hmingi nen hian an inbei fe tihna a ni a, an inbeihna lamah a zungbun hi a thlauh emaw, Hmingi hian a pawtthla palh te pawh a ni thei…kei pawh hian ka thlawl deuh hlek a, nangpawn I thawl tep ang…chuvang chuan tualthattu pa hi palian lampang a ni maithei bawk a ni.” a ti a, ka hrethiam ta chiah e. Nathana chu a ding a, “Mahse, he zungbun neitu hi engtin nge kan zawnchhuah ang tih chu buaina a ni ta..” a ti a, keichuan, “Sir, an thiante zingah tiang zungbun nei hi tunge tiin kan zawt mai dawn em ni?” ka lo ti a, Nathana chuan, “ASP sir…nang nge nge..ngaihdan tha tak a ni..mahse chu aia tha chu ka ngaihtuah mek..fimkhur deuha kan chet a ngai ania..” a ti a. Keichuan, “Ti daih ila, Sawmtea chu I va hmu em?” tiin ka zawt a, Nathana chuan, “Ka va nang hman talo, Hmingi vui naah a lo kal hman a, Hmingi te ina va kal leh dawnin mipui an tam tawh awmsia, ka peih talo nih kha…naktuk lamah kan che chhuak mai dawnnia…” a ti a, darkar 1 vel lai kan titi hnuah chuan a haw ve ta a, keipawh chu a tuka kan hah deuh dawn avang chuan mut zai ka rel ve ta a.

Zing dar 9 velah chuan Station ka thlenga, Nathana chuan a office ah min ko lut nghal a, vawiina kan chetchhuah dan tur vel kan sawi dun a, minute 10 vel hnuah chuan police form halovin, civil dress nen kan chhuak ta a. Sawmtea te in lam kan pan a, an in chu kan thlen chuan motor atang chuan ka chhuk a. Sawmtea te in chu a lian kher mai, mi hausa leh khawsa thei tak an ni tih a hriat em em a, inchhung chu kan lut a, a nu leh pate an lo awm a, Police kan nih thu te kan sawi hnu chuan Sawmtea chu a nu te chuan an ko a, a room atang chuan alo chhuaka, a mit a bui vek a, a tap nasa hle tih a hriat theih a. Police Station lama min zui phei tura kan tih chuan ngawi rengin min zui ve mai a, a nu leh pate chuan an ngaihtuah hmel hle mai. Kei chuan kan rinhlelh vanga hruai kan nihloh thu te, kan man ani lo a, thil zawh duh kan neih vanga hruai kan nih thu te leh Hmingi thianpa anih avanga kan hnuchhui mek laia min pui thei tu anih takin ti a hruai mai chauh kan nih thu te ka hrilh hnu chuan an thla pawh a muang sawt a. Station lam kan pan lai pawh chuan motor hnungah a melh ngai melh reng chungin ngawi rengin a thu a, kan thleng a, thu chu kan zawt fiah ta a, Nathana bawk chuan a zawt leh a.

“Sawmte, Hmingi hi engvanga thi nge..tu thah nge I hria tiraw?”

“Hre lo…athattu chu hria ila…kei hian ka that ve ngei ang.”

“Anih leh khawnge I zungbun kha?”

“Zungbun a?”

“Hrelo der lola, I zungbun kha…Hmingi I thah laia I thlauh kha….kan lo chhar a.”

“Enga? Inspector…hei hi hre rawh, Hmingi hi ka duh a, ka hmangaih em em bawk…hmeichhe fel tak chu anilo, mahse ka hmangaih a ni, ka hmeichhe hmangaih chu engvangin nge ka thah anga?”

“Anih leh tu thah nge? Sawi mai rawh…tu emaw nen in inthurual tiraw?”

“Engmah ka hrelo, zungbun pawh ka neilo, zungbun pawh ka bun ngailo..”

“Hei hi i zungbun ngei chu a nilo mi?”

Nathana chuan zungbun chu a lek kang a, Sawmtea chuan zungbun a hmuh chuan Nathana chu alaksak a, uluk tak hian a en a. Nathana chuan, “I hmuh hnu a ang I ti deuh nimaw?” a tia, Sawmtea chuan, “Ni e..ka hmuh hnu a ni..he zungbun hi nizan hmasa kan party khan tu emawin a bun alawm..ka chiang ani Sir..ka hmu zuai alawm..analh em avangin ka en deuh reng alawm,a buntu pawh ka hmu..mahse ka kai em avangin tu bun ber nge chu ka hre tawh lo..” a ti ta a, Nathana chuan min rawn hrilh ru a, “Ka tih reng kha, Sawmtea chu a nilo ang ka tih kha…I ringhlel talh a..” a ti a, keichuan, “Nia..” ka lo ti ringawt a. Nathana sawi hi adik reng bawka, Sawmtea ka rinhlelh em avangin Nathana bulah hian dawp turin ka ti a, ka tisual chu anih hmel. Nathana chuan, “Sawmte..kan rinhlelh vang che a khatia ti che kan nilo ania, a tul vang zawk ania, min hrethiam la…zungbun neitu chu a hmel hmu ta la I la hre thei angem?” tiin a zawt a. Sawmtea chuan, “Hre lo ang..zungbun hi tu emaw chuan abun tih chiah ka hria, a bun tu hmel pawh ka hmu ngei a, mahse tunge anih pawh ka hre leh tawhlo, mipa ania..chuzawng chu ka hria, a bun tupa pawh chu hmu leh pawh ni ila, ka hre tawh kher lo ang..” a ti a, Nathana chuan, “Kan hnuchhui lai I ti awlsam sawt e..kan lawm lutuk ania aw…thil pakhat min tihsak thei angem?” a ti a, Sawmtea chuan, “Tehreng mai Sir…” a ti a, Nathana chuan, “Hmingi thih zana Siby Farm-a party ho zinga mipa i hriat zawng zawng te hming ziak thla la, an phone number nen..i phone contact ah I save hlawm ngei ang tiraw…in college mite an ni bawk a..” a ti a, Sawmtea chuan, “An vai chuan ka save lo a, mahse a kal ho mipa tamzawk te kha chu an number ka nei vek ang..” a ti a, tichuan paper ah chuan an hming leh an number a ziakthla ta vek a. A ziakzo a, kan haw tir ta a, Nathana chuan SI pakhat leh constable 4 vel ho chu Sawmtea hming ziah ho te zawngchhuak tur leh thu zawtfiah turin a tir ta a. Keini pahnih chu Nathana office ah kan awm a, “Sir, kan kal ve ngei chu angai dawn lawm ni? Tinge SI kutah khan i dah daih a?” ka ti a, Nathana chuan ka mitah tak min en a, ”Chu aia pawimawh chu tihtur kan nei..” a ti a, ka hrethiamlo hle mai, “Engthil maw?” kati hu a, Nathana chuan, “Rinawm, SI ho khan an chhui anga an hlawhtlin leh hlawhchham chu thuhran nise…chutih lai chuan kei ni chu Hmingi te college ah kan kal ang.” a ti ta daih a…”Enge kan tih dawn?” tiin ka zawt leh a, Nathana chuan, “An zirtirtute chuan tutu nge after party ah khan kal chu an hre ve dawnlawm ni...chubakah party naa kal zirtirtu pakhat tal chu an awm ve ngei ang, chulam chu kan buaipui thung ang…..” a tia, keipawh chuan ka lu ka bu nghauh nghauh a, tichuan Aizawl College lampang pan chuan kan kal ta a.

College kan thlen chuan Nathana chu zirlai hmeichhiate chuan an en duh hlawm hle mai, an insik neuh neuh hlawm a, keipawh tlem azawng chuan min en ve tho chuan ka hria...hehe. Principal room ah chuan kan lut a, an Principal chuan, “Ka pui thei che u angem?” polite tak chuan a lo ti a, kei chuan ka wallet a ka Police ID hmuh pah chuan, “Ka pu, police kan ni a, niminpiah zana in zirlai Hmingi thihna chunchanga hnuchhui tute kan ni a, min puih theih chuan kan lawm khawp ang” ka ti a. Principal chuan, “Eee..anih chu, lo thu ru..” a ti a. Kan thutfel hnu chuan Nathana chuan, “Ka pu, Hmingi chungchang hi min hrilh thei em?” a ti a, Principal chuan, “Thei lutuk e, Hmingi hi lehkhathiam thei tak chu nilo mahse, zirlai ah chuan ngaihtuahawm a niloa, thil a thiam chak em em a, subject barred pawh aneilo a, mahse a attandance erawh a tha lemlo. Hetia a boral thu kan hre thut hi chu kei pawh min barakhaih khawp mai, a pawi ka ti tak tak ani, vawiin pawh hian an class ho chuan an in lamah an va ral leh a..” a ti a. Nathana chuan, “Anih leh ka pu, a thihzan a party naa kal ho kha I hre mial em?” tiin a zawt leh a, Principal chuan, “Ka hre miah lo, farewell programe chauh ka awm a, tiang after party tih vel hi chu zirlai te kutah kan dah a, an thu thu hian an rel mai thin a, zirtirtute kan inrawlh tawh ngai lo. Chubakah zirtirtute hi chu kan kal mang ngailo, kal chu an awm maithei..” a ti a, Nathana chuan, “Tute nge zirtirtute zingah kal I hre mial em…biak kan va duh ve aw…” a ti leh a, Principal chuan, “Ka va hre mailo ve, ee..taka Pol.Science lecturer Miss Siami chu a kal ve kha maw…a kal tur thu leh a chak tawh thu kha zing atang khan a sawi chiam kha mawle..” a ti a, Nathana chuan, “Kan lo be lawk thei angem?” ati leh a…Principal chuan Miss Siami chu a room ah a phone a, Siami lo thlen chuan Nathana chuan thu a zawt ve leh a…

“Miss…Party naah khan I student te kal ho kha I hrechiang hlawm em?”

“Awww..hrechiang han tih ah, kan college hi student kan nei tam ve angreng a, an vai chuan ka hre vek biklo.”

“Anih chuan party naah chuan sawm veloh pawh an duh duh danin an rawn awm ve thei a, college zirlai nilo pawh college zirlai angin duh duh an lo lut ve thei tihna nimaw..tumah an inhrehrang tawh awm siloa..a ni em?”

“Nilo…farewell hma khan party naa kal ve duh chu college ID nei velo chu tumah kal theihloh..kan college mi a ni tih kan hriatchian pawh college ID a neih loh chuan luh phalloh tiin kan puang lawk vek alawm…chuan college ID ah hian thlalak leh college logo a chuang a, duty turte pawh Siby lam security te an nia, pawnlam mi chu an lo lut theilo tawp ang.”

“Awle…kan lawm e..kan kal phawt ange.”

Kan haw ta a, motor chhungah chuan kan chuang a, keiman ka khalh a, Nathana chu motor tukverh ah chuan a dakchhuak a, a inngaihtuah nasat hmel hle mai. Ka va nghawk zeuh a, “Kan va zawt tlem leh lawi si vea..tinge?” tiin ka zawt a, Nathana chuan, “Hriat belh vak tur a awm hran lo…an college mi lo chu luh phal anihloh thu a sawia, a awmzia chu tualthattu kha an college mi a nih a rinawm a…” a tih lai chuan, “Mahse pawn lamah tualthahna kha a thlenga, Siby Farm atanga km 1 vel laia hla ah khan ruang kha hmuh a ni sia, pawnlam mi thah ani ve theih tho a..” ka lo ti vat a. Nathana chuan, “Hmingi kha arui hle a, chuvang chuan khalai chen chen kha amahin a kal theilo tawp ang. Chuvang chuan kha zungbun nei tu khan Hmingi rui lutuk chu chance ah la in party na hmun atang khan a hruai chhuak a, tichuan khalai hmun ah khan a va that ta pawh ani thei..” a ti nuah nuah a. Keichuan, “Sir..Chhani khan Hmingi hian tibuaitu a nei a tih kha…chu a tibuaitupa chu tualthattu chu a ni thei mai angem?” tiin ka zawt a, Nathana chuan, “Ani thei tho mai..tualthattu hi tupawh chu nise..Hmingi nen hian buaina an nei ani ngei ang..” a ti a. Reilote ah chuan Station kan thleng a, Nathana office ah chuan kan lut a, Nathana chu a thu a, zungbun chu a ipte atang chuan phawrhin a en vang vang a, zawite hian, “Ka lak atang hian he tualthattu hi a tlanbo hauh lovang..ka man ngei dawn..” a ti a, ahmel chu a nelawm lemloh khawp mai. Kan awm zel dan tur vel kan sawidun a, Nathana chuan, “Lawk aw…ka sikret a zo nih hi, havildar sikret lei turin ka va tir lawk ange..” a ti a, keichuan, “Khawi..ka va lei ang, keipawh lei ka ngai alawm..” ka ti a, pawisa min pe a, ka chhuak ta a. Kawng ka cross dawn lai tak chuan taxi pakhat hi chak tawkin a rawn tlan a, min su tep a, a ding chawt a, driver chuan, “Ka pu..ka tihpalh lutuk..” ati nghal chiam chiam a, engmah sawilo chuan ka kalsan a, taxi hnungah chuan mipa pakhat kuttin seh nuap nuap hi a chuang bawk a, min hmu chu a phu deuh zuk lehnghal a, lehlam a hawi nghala, ka nuih aza angreng hle mai, ka khi suk a, ka kalsan a, dawrah chuan sikret ka lei a, taxi pawh chu a tlan tlang nghal a. Sikret ka lei zo chu engemaw hriatchhuah zawk hi ka nei a, kha pa, taxi passenger, kuttin seh nuap nuap pa kha, ka hmuhhnu a ang ka ti riau mai, ka ngaihtuah chiang a, ka hre ta…Hmingi album a thlalak apianga a sir a lo lang ve ziah pa ngei kha a ni. Min hmuh khan a phu zuk a, min hlauh hmel em em lehnghal. Ka va hawi let leh a, mahse a lo tlan liam hman tawh si, ka ngaih a tha lo em em mai a, mahse a tlan liam tawh miau si avang chuan tihngaihna vak a awm tawh chuang silo a, Nathana office ah chuan ka lut leh ta a.

Zan dar 8:30 a ri tawh a, ka room ah chuan computer khawihin hla ka ngaithla a, ka phone alo ri a, Nathana a lo ni a, ka phone chu ka pick up a, “Hello, Rinte..lo leng phei teh, ka lo phei peihlo..thil pawimawh deuh sawidun tur kan nei tlat mai..” a rawn ti a, keichuan, “Phone atang hian sawi mai la mawle..” ka lo ti vin hlur a, ka chhuak peihlo takzet. Nathana chuan, “Lo kal vat rawh aw..” tih pah chuan phone chu adah ta daih a, peihlo tak chuan ka insiam a, Nathana te inlam pan chuan ka bike thar, Gixer pawl, ka hlawh leh ka pawisa khawl leh ka pa pawisa tlem nena ka lei chuan chak takin ka tlan a, reiloteah chuan Nathana te in chu ka thleng ta a. An inchhung ka lut chiah chu Nathana nu chuan, “Awi Rinawm..iva vang em em ve,I dam thin maw?” min lo ti chiam a, “Aw..dam e, in ngaihawm hle mai..” ka ti ve luam a, Nathana chuan a room atang chuan min rawn au a, tichuan a roomah chuan lutin kan titi ta a.

“Zan zan ah…enge ni a?”

“Tualthattu hi ka hre tawh tlatin ka hria a ni..”

“Animaw…tunge?”

“Amah tak chu ka hrelo, mahse naktukah a chiang ang..”

“Engtin nge a chian anga?”

“Ka thusawi hi ngun deuhin lo ngaithla rawh aw…naktukah Michaela te inah va kal la, Hmingi bialpa hlui te inah khan..thu zawhfiah tur I neih thu sawi la, Hmingi te inah lo hruai ang che. Chuan constable pathum vel hruai tel bawk ang che aw..abak chu ka kutah dah rawh.”

“I thil tih tum chu min hrilh ve phawt la..”

“Ka thil tihtum hi ala risky em avangin ka la hrilh thei rihlo che ani..”

“Anih leh I thu ang zelin le.”

Inah chuan ka haw a, ka inngaihtuah nasa em em a, engthil tak nge Nathana hian tih a tum reng reng le..ava buaithlak thin tak. Atuk ah chuan Nathana sawi ang ngei chuan Michaela te inah chuan ka kal a, Michaela chu thu awmzia ka va hrilh chuan ani pawh chuan thuawih takin min rawn zui ve mai a. Hmingi te in lam chu kan pan ta a, kan thlen chuan Hmingi te inah chuan Nathana leh constable 5 vel anlo awm a, Hmingi nu leh pa, Chhani leh Sawmtea an lo awm a. Nathana’n min hmuh rual rual chuan a ding a, “Leeee…an lo thleng ta e..” a ti a, midang ho pawh chu an ding thap hlawm a. Hmingi pa chuan, “Inspector…enge min kohkhawm vek nachhan hi ni a?” tiin a zawt a, Nathana chuan chiang fak hian, “Hmingi thattu hi kan zingah hian a awm ve a ni..” a ti ta mai a. Kan hawi kual hru hru hlawm a, Hmingi nu chuan tah aw tuau hian, “Tunge ka pu,tu misual in nge ka fanu chu that a?” a ti a. Nathana chuan, “Lawk aw ka pi…” a ti a, Michaela lam chu ahawi a, “Michael, tinge Hmingi nen khan in inthen?” a ti a, Michaela chuan, “Englo ania ka pu…Hmingi thiante zingah hian min ngei tu an awm a ni maithei a, hmeichhe dang ka kawp angin min puh a, ka thiante pawn an sawi vek tiin inthenah min vau reng a, a tawpah ka ning ta a, ka then ta a. Ka rilru ana em em a, zu te ka in a, zan khat chu party naah ka kal a, tum loh deuhin ka thiannu Partei chu ka chetsual pui ta a, saruak veka kan mudun lai thlalak hi ka phone ah alo awm a, mahse engtia ka neih nge, tu minlo laksak nge pawh ka hre lo..thlalak chu ka hmuh hma in ka pa in ka phone a hman lawk hlanin a hmu a, a thinrim em em a, chuvang chuan mualpho ai chuan tiin loh theih lohvin Partei nen chuan kan inneih angai ta a..diktak chuan tun thleng hian Hmingi hi ka la hmangaih em em a, a thih thu ka hriat phei kha chuan hrehawm ka ti takzet a ni..” a ti a, amittui atla hial a. Nathana chuan, “Thla laksaktu che chu I hre duh em? Ti mualpho tu che leh Hmingi bula nula dang kawp anga sawi thin tu che chu I hre duh em?” a ti a, Michaela lunggai hmel chu thinrimna in a rawn inthlak nghal a,”Duh e…ka pu tunge?” a ti nghal tun tun a, Nathana chuan a phone a phawrh a, number a chhu nuap nuap a, a call ta a, “Hello, lo hruai lut ru le..” a ti a, second 10 vel hnu ah chuan constable pahnih hian mipa pakhat hi an rawn hruai luta, handcuff an buntir a. Chupa chu ka hmu tawh a ni, Hmingi album a lo lang ve ziah, kuttin seh thin ngei kha a ni. Michaela’n chupa a hmuh chuan, “Peter..nang maw?” a ti a, Sawmtea pawh chuan, “Ka pu..hepa hi alawm zungbun nei tu khaaa..party naa zungbun buntu kha amah ngei hi a ni. Ka hmu a, ka hrechhuak chiah.” a lo ti ve bawk a, keipawh chuan, “Keipawn ka hria..” ka lo ti ve a. Nathana chuan, “I hre ve maw?” alo ti a, keichuan, “Aw..hria e..Hmingi album ah khan a thlalak hi ka hmu a,chuan hmanni khan taxi ah ka hmu bawk..” ka ti a. Nathana chuan, “Tualthattu chu vawi hnih lai ilo hmu tawh a, ilo hre miahlo anih chu…hepa hi tualthattu ngei chu a ni…Michael, hepa hi tunge anih han sawi teh le..” a ti a, Michaela chuan, “Petera anih hi, kan awmpuipa a nia, engtin nge tualthattu anih theih ang?” a ti a, Nathana chuan, “Anih leh Hmingi thih zan khan Petera hi khawnge a awm?” a ti a, Michaela chuan, “Kan khua ami ka thianpa alo zin a, ka va tlawh ve ange a tih avangin ka scooty pawh ka hmantir a nih kha…a chhuak daih alawm..” a ti a, Nathana chuan, “Dawt a sawi anih chu, sms hmangin tunge anih insawi duh lovin Hmingi chu a text thin a, I chanchin diklo tak takin a sawi a, tichuan Hmingi nen chuan in in then ta a, I phone hmangin Partei nen in chesual lai chu thla alaksak che u a, Hmingi nena in inngaihzawn leh a hlauh avangin chumi thlalak chu Hmingi thawn a tum a, mahse I pa in alo hmuh hman avangin Partei nen in inneih angai ta a..” a ti a, keichuan, “Tinge Michaela phone a hman kher a, aphone hmang pawn a ti thei tho sia?” ka lo ti a, Nathana chuan, “A chhan chu Petera phone ah hian camera a awm lo a ni...burma siam Karbon a nih vang a ni..” a ti a. Michaela chuan, “Peter…tinge, tinge hetia I tih? I pawi ka sawi em ni? Kan awmpui ang pawn ka en ngailo che, ka nu leh paten an hauh che pawn ka tan ziah che a, ti hian maw min rulhlet dawn? Ka unaupa ang chiahin ka en che asin, tinge..a chhan min hrilh rawh..” a ti a, alungawilo hle ani tih a hmel atang chuan a hriat theih a.

Petera chuan muangchangin Nathana lam chu a hawi a, “I fing hle mai…ni e, Michael, I bialnu kha kei hian ka hmangaih ani, ka hmangaih takzet. Ka hmangaih em avangin ka that ta a nih kha, achhan chu ka chang thei dawn silo a. Ka neih theih loh chuan tuman an nei bik tur a nilo, Michael, ka hmangaih ve tho asin..” ati a. Sawmtea chuan, “Zawnga..” tih pahin a rawn tlan phei a, Petera hmaiah chuan chiang em em hian a hnek ta siah mai a, constable ho chuan Sawmtea chu anlo dang vat a. Hmingi nu leh pa te erawh chu an thu a, an tap dun zawih zawih a. Nathana chuan, “Sawi zel rawh…chuti khawpa hmangaih si tinge I thah a?” a ti a, Petera chuan, “Michaela hian kan inah a rawn hruai luh khan, a hmeltha ka ti a, ka duh em em a..mahse min hmuhsit hmelin min be tha duh ngailo a, ka rilru ana em em a. Tichuan ka rilruah sual tih duhna lian tak alo lut a, tichuan vawikhat chu Michaela inbual hlan hian a phone atang chuan Hmingi number chu ka la ta a. Tichuan ka phone ah chuan simcard thar ka vuah a, tichuan Michaela chungchang hi diklo tak tak in an inthen theih nan tiin ka sawi thin a. Atawpah chuan an inthen ngei mai a, mahse a let leh mai ang tih ka hlauh avangin Michaela hi a rilru na hnem nan tiin party naa kalpuiah ka sawm a, tichuan Partei nen an rui lutuk chu Michaela roomah an chesual ta a, chumi chu remchangah la in thla ka laksak ta a. Chumi chu Hmingi thawn ka tum a, mahse Michaela pa in minlo hmuh khalh a, mahse ka lawm zawk, achhan chu Partei nen loh theihlohna avangin an mualpho lohnan an inneih angaih phah ta si a.” ati a, kei chuan thinrim tak hian, “Kha kha chu duhtawkla, Hmingi I thah dan kha sawi rawh..” ka lo ti vin hlur a. Petera chuan thawk an la te te phawt a, tichuan a sawi leh ta a, “Ni e…khami ni khan college farewell an neih tur thu kha ka lo hre ve a, tichuan an party na hmun tur nen lam ka hre ve vek a, tichuan party naah chuan va kal ve in Hmingi chu ka zawngkual a, ka hmu fuh ta a,mahse ka va pan mai lo a, abulah Sawmtea a awm tlat avangin. A tawpah chuan pawnah a rawn chhuak a, aluak ta bawrh bawrh a, a rui em em a, chu chu remchangah la in ka kuah phei a, scooty chuan ka hawpui ta a..” a tih lai chuan ka lo pawtchat a, “An college lecturer khan college ID neilo chu luh an phal lo a ti si a, engtin nge I luh theih a?” ka lo ti vat a, Petera chuan, “Ni e..kha party naah khan sawm ka ni velo a, pawnlam mi ka ni a, mahse security bulah khan an college zirtirtu angin ka insawi a, a tir chuan an awihlo a, mahse ka confi em avang leh in duh chuan ka student te hi zawt rawh u, te ka tihkual vel takah chuan min luhtir ta a ni. Hmingi ka haw pui khan kawngsirah ka din pui a, a ni pawh a harh deuh tawh a, tunge ka ni tih min hmuh chuan, “I va zaklo ve, tenawm pa…I phurh phak ka nilo, nang mi awmpui mai mai..” tiin tawngkam chhe tak takin min an khum vak vak a,ka thinrim insum zo lo chuan ka hnek ta pawp mai a, ka neih loh che chuan tuman an nei bik lo ang che tiin scooty hnuai chu ka hawng a, chemte alo awm a, enge a chhan pawh ka hrelo, vawithum lai chu ka vit ta siah siah mai a…ka thah zawh hnu chuan keimah zawk chu ka hlauthawng em em a, ka tihngaihna hrelo chuan hnimin a ruang chu ka khuh ta a, min chhuichhuah loh nan tiin a phone leh a purse chu ka laksak ta a ni.” a ti a. Nathana chuan, “I ropui hle mai, mahse I fimkhur tawklo a ni. Nimin tlai khan inah haw tlang lovin Hmingi te in lamah ka kala, Hmingi album te chu ka en ve a, chutah chuan thlalak tina ilo lang hi ka hmu a, a awmzia chu Michaela hian a duat hle che a, an chaw eikhawmnaah te, an picnic naah te pawh a hruai ve zel thin che tihna a ni. Mahse ka ringhlel nghal lo che a, tichuan ka haw pahin Michaela te inah hian ka kal leh a, inchhung ka luh hma chuan bawlhhlawh bawm kawngka bula in dah ah khan ka kuhva eina sarang ruak ka peih pah khan keychain ka hmu a, ka la chhuaka, keychain ah chuan Aizawl College logo a lo awm a, tichuan ka ak a, inchhung chu ka lut a, kan titi laia room atanga ilo chhuah khan kha thlalak a mi ngei kha I ni tih ka hre leh ta a. Thingpui min rawn pek lai khan Michaela hian, “Khawnge I zungbun ka pek che kha?” tiin a zawt che a, nangchuan I tihbo thu I sawi a,Michaela chuan zaidam takin, “Silver lai a nia,I van ti uihawm ve..”tiin a hau che a, tah tak chuan kha zungbun kan chhar nei tupa ngei kha I ni tih ka hre leh ta a, Hmingi I hnek pah khan I thlauh a ni ngei ang. Tichuan Michaela bawk chuan, “I phone thar, I thianpa lo hawn che chu athat hmel sia, I vannei mange awww..” a ti leh a, chutah tak chuan Hmingi phone ngei a ni tih ka hre leh ta a, Michaela hian en chian sak che sela chu Hmingi phone a ni tih a hre ngei ang. Hmingi thih ni a Rinawma a lo kal khan ilo chhuak bo a, nilose chu tah khan kan man daih tawh ang che. Kha party ah khan sawm I ni velo a, mahse sawmloh ni chung si khan I lut lui a, tual I that bawk a, mahse Jail tang tur chuan keini Police ho hian kan sawm reng che a nia, kan sawmna min tih hlawhtlinsak turin minlo zui rawh le, YOU ARE NOW INVITED..” a ti a, Petera chu kan man ta a.

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)