NATHAN Ep-8 (BIRYANI) by Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN Ep-8 (BIRYANI) by Aaron Malsawmdawngzuala

Unread post by Aaron Dustin » May 11th, 2018, 9:39 pm

Chu car chhe tawh leh tawng ve takah chuan chak thei ang ber chuan Nathana nen chuan kan tlana, kan hnungah chuan Police Force rual chuan min man ngei tumin min um bawk a. Vengtin a Police awm ho chuan min um a ni ber mai, birukna tur kan nei hlawl lo, tualthattu pahnih anga an ngaih kan nih avangin min zawng mek a ni. Mangang em em in kan awm a, khawiah pawh kal ila, Police mai pawh nilovin, mipui te pawh chuan min hmuh apiangin min man tumin min um zel a, tlanchhiat bak chu tih theih kan neilo a ni e. Ramhnuai lamah chuan tum loh deuhin kan tlan lut a, Nathana chuan motor a khalh a, abanah hliam a tuar zui bawk si a, a khalh pah chuan a na ti chu a ner sawk sawk a, khawi hmunah mai pawh Police ten min hual thup tawh avang chuan kan himna tura kan rin lam chu kan pan ta tawp mai a ni. Ramhnuai kawng chhe tak maiah chuan kan tlan sawt bauh bauh mai a, thingkung te chu kan su thawi fua fua a, a tawpah chuan kham awih lutuk lo ah chuan kan tlan lian ta a, kan accident ta, kan motor chu a bingbilet thla tawp tawp ani ber mai, feet 30 vel lai kan lumthlak hnu chuan thingkung lianpui hi kan su dawt a, ka lu chu ka sawh dawt a, a thim mup a, engmah ka hre leh tawh lo. Chutia Police Officer pahnih, ASP leh DCP lai ni lehnghal chu engvangin nge kan police pui te chuan man tum a min um? Engvanga news channel a, ASP Lalrinawma leh DCP Nathana Malsawmkima te chu tlualthattu, mahni sa him nana police te laka tlan chhe mek, Police rinawmloh leh tualthah hmang ti a min sawi tak? Achhan i hre duh em? Achhan chu...BIRYANI vang a ni. Ni e, amak in ti maithei, mahse Biryani vanga kan buaina chu...hei hi a ni...

Kan SI pakhat Remruatkima chu lohtheih lohna avangin a ban a tul ta a, mahse a ban hnu reilo te ah chuan SI thar Ricky Lalmuanpuia kan nei leh ta thuai a. Mahse chu mihringpa chu ka mil thei thak lo mai, alo thawh tirh atang tawh khan a inla ngeng em em a, kan thu zawm tha duhlovin ama tawkah a inla chapo em em a, chubakah ama thu a duh em em bawk. Thu ka pek pawh hian mei nei deuh deuh hian min chhang a, kei ni aia remruatna tha zawk aneih thu te hi min hrilh ngam a, mahse kan DGP te nen hian an inchhung a, chuvang chuan ka dawh hram hram thin. Kar hnih vel lai chu alo thawk ve ta a, ka ngei rual rual in misual dawp a thiam em em a, a kutthlak a na in, a infit tha zak zak hle bawk. Kum 30-35 vel bak ala nilo ang, mahse kei ai chuan a upa tih chu ka hria, a rilru alianin a hmel chu a nelawmloh em em a, mahse DGP chu a tlawn thiam em em thung a ni. Vawikhat chu tualthah vanga kan man, court a hruai la hmabak chu jail atangin a tlan chhuak hlauh mai a, night duty constable pakhat chu a lu ah nikhawhrelovin a vaw bawk a, chu constable pawh chu damdawiin pan pui nghal a ni. Zanlaia tlanchhuak a ni a, zingah keinin kan hre chauh a, chumi case buaipui tur leh chu tualthattupa chhui zui tur chuan DGP chuan min ko khawm a. DGP chuan, "Awle hei, kan hriat angin thil pawi tak mai kan tawng a, he prisoner tlanchhuak ta hi mi hlauhawm tak mai ani a, tualthah hmang a ni. Chuvang chuan he case hi chu kan mi huaisen te pahnih DCP Nathana leh ASP Rinawma kutah ka nghat leh phawt mai anga.." a tih lai chuan chu SI thar pa Ricky a chu a rawn penchhuak a, inla respect tawk hian DGP chu salute a pe vel tete a, "Sir, he case hi ka kutah dah la, ka chhuichhuak em em ang, ka tiam a che.." a ti a, ka ngei tawk hi alo tling em em a. Nathana chuan, "Ricky, mi thar ila ni a, tun tuma case hi chu i vawikhatna tur ani a, mi hlauhawm tak ani a, kan kutah dah phawt mai rawh.." a ti a. Ricky-a chuan hmusit hmel takin Nathana chu a en a, "DCP Sir, tun tum chu min kian ve rawh, min enchhinna pawh ni ta sela, Police huaisen tak ka ni tih hi inlakah ka proof duh a ni." a ti vel a, DGP chuan, "Ricky, he case hi a awlsam vak lo ania, chubakah Nathana leh Rinawma te hian case tamtak, hautak leh hlauhawm tak tak pawh an chhuichhuak tawh a, tuntum chu an kutah ka dah leh phawt mai ang kalo ti a, i buaipui thei chiah ang maw?" tiin a zawt a. Rickya chuan confi tak hian, "Tehreng mai Sir, he tualthattu hi i hma ngeiah hian ka rawn hruai let leh ngei ang.." a ti a, Nathana nen chuan min rawn en a, "Ka senior te hi chu lo chawl ve tawh se, ka duhsak vang zawk a nia." a rawn ti deuh kher lehnghal a, ka va han beng chak tak em. DGP chuan, "A lawmawm hle mai, mahni inringtawk tak SI thar kan nei che a, tuntum chu he case hi i kutah awm se, atul angin Nathana te pawh hian an pui dawn che nia.." a ti ta a. Chumi tlaiah chuan Nathana nen chuan kan haw rual a, kan haw pah chuan Nathana nen chuan kan titi a..

"Sir, ka ngaihdan pawh a nilo.."

"Engchu maw?"

"Khapa kha, SI Rickya kha mawle.."

"Aho emai, SI vel hunlai hi chuan chapo te hi a awl a, engemaw riau hian kan inhre thin a, ngatan mah ngai suh."

"Hmm..SI ka nih ve laiin ka chapo ngailo.."

"Aww..nangte chu i fel em alawm, Vanlalthafeluchuakfamkima i nia.."

"Keichu fiamthu lovin, a limit a pel tep in ka hria, min zahlo si, min chhandan te hi ka lungawilo, a senior ka ni ve a.."

"Amak tun tun mange aw...nuthlawi ancheh deuh i ang lutuk."

"DGP a tlawn thiam si, DGP lah hian a duhsak si, bang daih se nia ka tih ni, vawiin te kha inla confi vel si, case te kha a kutah dah turin a ngen vel a, a tawngdan hrim hrim kha ka ngei tlat."

"Rinte, hmeichhe tawngkam thei emai, police officer i nih kha. A thawh that leh that lo te chu kan hria ang chu, kan tan hunawl a tam a ni mai lawm, zanin chu ka lengchhuak dun ang hmiang.."

"Nia, mahse pawisa ka neilo nia aw.."

"I nei ngai mi? Ka treat ziah che lawm, a turah ka ngai ve hrim hrim tawh.."

Ala nui duh thak lo zui leh ta nghal a, tichuan kan in thleng chuan min thlah a, ani pawh chu a haw tlang ta a. Ka haw veleh chuan ka inbual fai a, chaw te ka eikham hnu chuan chhuak tur chuan ka insiam ta a. Ka insiam mawlh mawlh lai chuan ka nu chuan, “Bawiha khawnge I kal dawn?” a rawn ti a, keichuan, “Nathana nen kan lengchhuak dawn a, kan rei deuh maithei..” tiin ka chhang a. Ka nu chuan, “Lo thu lawk the…I chhuah hma in..” a tih avang chuan ka nu bulah chuan ka va thu a. Ka nu chuan zaidam tak hian, “Bawiha, he I hna hi tha viau in, Zoram mipuitevenghim tu ni mahla, vawitam tak hliam te tuarin I thih phah teuh em em thin a, fimkhur turin ka duh che a ni. Ka fapa neih chhun I ni tawh a, I unaupa pawh Police a nih laiin misual kuttuar in a boral ta kha a ni a, nang ka chan leh che anih chuan tunge min enkawl ta ang? He I hna hi chawlhsan rawh chu ka ti miahlo, mahse nasa lehzualin fimkhur la ka duh a ni..” a ti a, keichuan ka nu, ka neihchhun leh ka hmangaih em em kutah chuan ka vuan a, “Ni e ka nu, ka hria alawm. Tun tum chu ka awm awl ve thei deuh a, SI thar in kan case khawih tur chu a buaipui a, chuvang chuan zanin chu Nathana nen kan han lengchhuak ve ange kan tia,mahse kan rei deuhhlek dawna, in hi chhunglamah lo kalh mai rawh aww, ka haw hunah ka lo phone mai ang che…nihleh ka kal phawt mai ang..” tiin ka chhuahsan ta a. Ka chanchin hi inla hre velo maithei a, tunah hian ka pa hi a hna avangin Champhai lamah kum 3 lai mai a awm dawn a, Police-a ka tan ve hma, ka tleirawl lai daih tawh khan ka u Zoremtluanga chu Police Inspector a ni a, mahse tualthah case a chhuina lamah misualin an kap hlum a, ka u nen hian kum 9 laiin kan inthlau a ni. Unau pahnih chiah kan ni a, ka u a boral takah chuan ka nu leh pa leh keimah chiah kan ni ta a. Harsatna tamtak tawk chung leh rethei tak chungin ka bei tang tang a, mittui nen, thlanfim nena ka tuar hram hram hnuah ka tetlai atanga ka nih chak ber Police chu ka ni ve thei ta a ni. Ka u thattu te kha tun thleng hian chhuichhuah anla nilo a, mahse a thihna pawh kum 7 lai a liam ve ta. Ka sawi rei dawn tlat, chhunzawm leh tawh ang aw…

Pawn ka chhuak chiah chu Nathana chu alo thleng ve chiah a, Nathana chuan a car a rawn keng a, “Rinawm, bike keng duh suh, ka bulah lo chuang ve mai rawh, ka car hian kal zawk teh ang..” a tih avang chuan a car ah chuan ka lut a, chak takin kan tlan a. Kan tlan mek lai chuan Nathana chu a ngawi reng a, “Khawnge kan kal ang?” ka ti a, Nathana chuan, “Tlai chaw I ei tawh em?” a ti teh daih a. Mak ti takchuan, “Ei tawh ang chu mawle…nang?” tiin ka zawt let a. Nathana chuan, “Aih, eilo…ka ril a tam vaklo a, whisky ka nei asin, I lem duh em?” a ti a, keichuan, “Ka la puar hrih emai a..kinah dar 8 pelh velah..” tiin ka lo chhang a. Nathana chuan, “Kan SI pa chu engtak chhuichhuak ve ang maw? A confi em em mai lehnghal a..” a ti a, keichuan, “Engvak anilo ange a, ka mi rin zawng a ni lo hrim hrim..” ka lo ti vin hlur a. Nathana chuan, “Juniorte an nia, chance kan pek ve te a tul alawm. Chubakah keini aipawn a upat hmel kha, keini ai chuan a fing daih zawk maithei asin…” a ti chu ka ngaihdan a nilo kher mai. Thinrim zet hian, “Kei aia a finna tur hi ka hre lo..” ka lo ti a, Nathana chun nui pahin, “Tuin nge maw I finna hi chelh zo ang le?? Nangte chu I fing ber a, sawi angai hleinem..” a ti a, a nui huah huah a. Keichuan, “Nathan, kei ai chuan a fing a ni maithei e..mahse nang ai chuan nilove, nangte chu police officer ah chuan I fing bera I huaisen ber bawk..” ka ti a, Nathana chuan, “I puihna tello chuan engmah ka ni bik hleinem.” a ti a, kan nui dun huah huah a. Hmun pakhat fianrial deuh ah chuan ka ding a, zu chu kan indun a, kan kai dun angreng hle mai. Kan duhtawk kan inhnu chuan keipawh ka ril a tam ta hle mai, ka kaidan lah chu a nuam tawk chiah lehnghal. Han sawi lehlawk ila, Nathana nen hian zu in mi kan nilo a, kan thawhdun tirh atanga thla 5 hnuah chauh Nathana hian zu a in thin tih ka hre ve chiah. Hun awl neih chang emaw, chawlh kan hman chang te hian kan indun ve thin a, mahse buai khawpin kan in ngailo, mahse kei ai chuan a in thei deuh. Kan inzawh hnu chuan kan riltam em avang chuan eitur zawngin restaurant lam pan chuan kan kal ta a. Zan alo rei deuh tawh vang a ni maithei, dawr chu a lo inkhar deuh nual tawh a, a inhawng awmchhun kan hmuhah chuan kan lut ta a. Restaurant pawh a nilo, Tea Stall a ni mah zawk, Nathana chuan, “Eng eng nge in neih?” tiin a han zawt a, dawr nghaktupa chuan, “Rice, chow, sanpiau leh Chhangpuar a awm a, thingpui nen..” a lo ti a, Nathana chuan, “Biryani a awm lo mi?” tiin a zawt a, keichuan, “Sir, hetiangah Biryani an neih I ring amawni le?” nuih pah chuan ka ti a. Nathana chuan, “Biryani nei zawng lawk ang…ka eilohna rei tawh..” a tih tlat avang chuan kan chhuahsan leh ta a. Biryani nei tur awmang dawr chu a inkhar vek tawh, mahse Nathana chuan biryani kher a duh avang chuan dawr inhawng awmchhun apiang chu kan tlan pel zel a, riltam tawh mah nakalaia, he mihringpahi chu a duhkhirh thei nia. Kan zawn kan zawn hnu chuan restaurant pakhat hi anlo khar dawn chiah a, kan va nang hman hram. Nathana chuan dawr nghak tupa hnenah chuan, “Ka pu, lo la kharlo lawk teh, kan ril atam lutuk a, biryani in nei em?” a ti a, chupa chuan, “Ka staff te zawng zawng an haw vek tawh a, biriyani chu awm a, mahse hei haw ka lo tum chiah a, min hrethiam mai ru..” a ti a, Nathana chuan, “Aaaa..ka pu min hrethiam zawk teh, kan ril atam emai, biryani kher kan duh sia, dawr inhawng dang a awmkan ring tawh siloa, please in kan lo chawl leh lawk, khawngaihin..” a ti a, an inbiak rem hnuah chuan a phal ta hram a, tichuan biryani chu tam mangkheng kan han ei ta tak tak a nih kha.

Kan ei lai mek chuan nula pakhat, vai hmel lek lek, piannalh tak leh hmel chhe lemlo tak mai hi alo lut a, “ Ka pu biryani in nei em? Ka rawn zawng phei char char a, biryani kher ka duh sia..” a rawn ti a, Nathana nen chuan kan va en a, a lo chhelo reuh em em lehnghal. Tichuan biriyani chu a ei ve ta a, keini pawh chu kan eizo fel ta a, pawisa te kan pek fel hnu chuan kan chhuak ta a. La haw mailo chuan motor bulah chuan meizial kan zu leh phawt a, kan titi dun a. Chutia kan titlai chuan chu nula pawh chu a eizo ta aniang, a rawn chhuak a, lassi a rawn in phei a. Kan zawn a rawn thlen chuan a inchhuih khut a, a lassi in lai chuan Nathana nen min rawn theh palh a, kan kawr chu a rawn theh huh vek a, amah lah chu a la thal tawp zui. Nathana chuan va kaihthawh pah chuan, “I tha em?” a va ti a, nula chu a inthlahrun hmel em em lehnghal. Inthiamloh hmel taka min rawn en pah chuan, “Awwiii kka tihpalh lutuk, avan zialo tak e awww..” a ti chiam chiam a, keichuan, “Apawi love, a ho lutuk..” ka lo ti vat a,mahse zep lo chuan ho ka ti miahlo, ka T-Shirt var ngainat ber leh hmanni lawka nei leh neiloa ka lei ve a nia. Chu nula chuan, “Aih…a nuamlo emai, hetlai atang hian kan in hi ahla vaklo a, lo intifai rawh u, keimah chiahin ka awm a,khawngaihin, ngaihdam dil nan..” a ti a, Nathana chuan, “Thiannu, a ho lutuk, engmah nihloh kha, I tihpalh ve mai nih kha..” a tih pawh chuan chu nulachuan, “Khawngaihin, keipawh hei ka hna ka bang chiah a, lo leng lut ve hrim hrim ru, anuam lo emai..” a tih tlat avang chuan kan remti ta a, alo chhelo reuh em bawk nen, han lenluh te chu chakawm ve alawm, nula rimlohna rei tawh bawk a. Tichuan Nathana motor chuan chu nula chenna in lam pan chuan kan kal ta a. An in kan thleng chu a fianrial reuh phian lehnghala, a in chu a nuamin a zau em em a, hmeichhe hausa tak chu a ni, amah chauha a awm thu a sawi lehnghal. A inchhung kan lut chiah phei chu nuam tak a ni, a zau tha a, a faiin a thianghlim em em mai a, an inchhung chu han fangkual deuh phei ila chu kawng kan bo thei hial ang. Bathroom ah chuan Nathana nen chuan kan lut a, kan intihfai hnu chuan sofa dup nuam tak maiah chuan kan thu a, kan bulah chuan a rawn thu a, “In intifai thei maw?” a rawn ti a, Nathana chuan, “Aww…alawmawm e, I fel hle mai…chuan in I nei nuam hle mai..” inti polite tak chuan a ti a. Chunu chuan, “Ka in a nilo, ka pasal in a nia, nula ka ni tawh hleinem..haha” a ti a, mak ka ti hle mai,pasal nei rual pawh ala nih loh hmel tehreng nen. Nathana chuan, “A nih chu, khawnge I pasal chu?” tiin a zawt a, chu nu chuan, “Nikum khan min boral san tawh a, thisen cancer vangin..” a ti a, Nathana chuan, “Awhaww a ni maw…a va pawi ve…nula amaw kan lo ti char char che a. Nih chuan enghna nge I thawh a, nangmah in I khawsa tihna ami? Fate in la neilo ami?” a ti a, chu nu chuan, “Aww…nikum khan kan innei ve chauh a, fahrah a nia, amahin akhawsa a, bank manager a ni a, nikum hmasa khan a bank ah chuan ka thawk ve a, kan inngaizawng a, chuan kan innei ta a ni. Mahse kan inneih hnu reiloteah a damlo reng mai a, tichuan thisen cancer a nih thu kan hre ta a, nu leh pa neilo a ni a, amahin taima takin a thawk a, tichuan a hlawhtling a, mahse hunlo takin a boral leh si a, tihian keimahin he in zau takah hian khawhar takin ka awm ta a nih hi…”a ti a, ka khawngaih angreng hle mai. Nathana chuan, “Pawi kan tihpui khawp mai che, hmeichhe fel tak I ni a, enkawltu tur che mi tha tak Pathianin a pe leh em em ang che..” a ti a. Chu nu chuan,”Ka lawm e, ti daih ila, Mary ka nia, in hming pawh ka la zawt miahlo che u a?”a ti a, Nathana chuan, “Kei hi Nathana,ka nia, ka thianpa hi Rinawma a nia, Rinbawih tiin I ko mai dawn nia..” a ti khera, ava han tullo thei tak, ala nui duh thak lo zui. Kan han titi ho deuh luam a, dar 12:50 alo ri tawh, “A tlai tawh sia, kan haw phawt ang e, nidangah kan inhmu leh dawnnia..” ka ti a, Mary chuan, “Awiii…thian ka kawm khat sia, kalo titi tui deuh a ni maw? Thei tui tal in leh hram ula, chuan in haw dawnnia..” a tih tlat avang chuan thei tui chu min siamsak a, kan in leh ta a. Kan in mek lai chuan Mary chuan, “Ka va zung lawk ange..” ati a, bathroom lam chu a pan a. Theitui chu ka inzo vat a, “Sir, ka kai mah mah in ka hria, ka va in phih harh deuh nge..” tih pah chuan ka tho a, pen thum vel chiah ka pen hman, ka lu chu a rawn hai muai muai mai a, ka khawhmuh chu a fiahlo nghal ruai ruai mai a, ka hawi let a Nathana chu ka va en a, a ni pawh thutthlengah chuan mithi ang maiin a lo let reng mai a. Han kal luih leh deuh ka tum a, mahse nasa mangkhengin ka lu chu a rawn hai leh em em mai a, ka kal thei talo, ka tlu tawp a, engmah ka hre zui lo.

Ka mit ka meng a, muangchangin ka hawi kual a, ka awmna chu a va mak ta ve…enge awmzia? Motor chhe tawh tak, a hma khu vut vut ah chuan a seat hmalamah kalo chuang a, kan awmna lai chu ka en a, ramhnuai a ni, ka lu lah chu a na em em mai lehnghal. Ka bula driver seat ah chuan Nathana chu alo la mu bawrh bawrh a, ka kai tho a, ani pawh a rawn harh chu mak a ti hle mai. Rang takin motor atang chuan kan chhuak a, Nathana car chu a hma a sawi vek a, a khu vut vut lehnghal, a bal em em a, a rang ruai lehnghal. Nathana chuan, “Ekhai a….ka car duhlai, enge awmzia..Rina, engthil nge thlenga?” a ti a, keichuan, “Engthil nge hre vak bika min rin a?” ka ti a. Nathana chu a mangang hle mai, chutiang bawkin keipawh ka mangang a ni, engtin nge helai hmunah hian kan awm? Enge nizan khan theng? Kha hmeichhe thiltih kha a ni angem? Zawnhna hlir mai chu ka rilruah chuan a awm a. Nathana chuan a khabe a dawm vang vang a, “Thil engemaw thleng chu a awm a ni..nizan khan biryani kan ei tih chu ka la hria..” a ti a, keichuan, “Biryani kher I duh a, dawr dang kan tlan pel zel a, lungawi tak khan chow satui leih te kha ei mai mai ta zawk ila tiang hian kan awmlo ang mawle..” ka lo ti vin hlur a. Nathana chuan, “Lo thinrim lo teha, ka motor a chhiat vek hi, ka thinrim ve tho a nia..” a ti a. Keichuan, “A nih leh nizan khan engthil nge thleng han ngaihtuah let ta che..pu intifingpa..” ka ti deuh kher a. Nathana chuan van lam chu hawichhovin a melh ngai chu a melh reng a, “Biriyani kan ei a, hmeichhe pakhat alo lut a, chuan biriyani a lo ei ve a..chuan thingpui min tihbuak amawni..” a ti a, keichuan, “Thingpui anilo, lassi…lassi in min theh huk vek a, a inah kan pahnih in min hruai..” ka lo ti vat a. Nathana chuan, “Aw..ni tak e, chuan kan haw dawn khan theitui min pe a, khami hnu khan engmah ka hre tawhlo…a awmzia chu khanu khan kan theitui inah khan mutthilhna damdawi a pawlh a ni..” a ti ta a. Keichuan, “Kha mihringnu thil tih vek kha a ani. Mahse engtin nge helai hmunah hian kan awm theih…chuan tikhawp hian motor a chhe nasa a,mahse hliam engmah kan nei silo, accident kan tawk ti dawn ila, engmah na kan nei bawk silo,engthil chiah nge maw thleng le?” ka ti a. Nathana chuan, “Hawh teh, kan awmna hi chhuahsan phawt ila, Station lamah te kan report dawnnia, kawnpui lam I zawng phawt teh ang..” a ti a, tichuan chulai hmun chu kan chhuahsan ta a.

Chu ramhnuai chu khawpui atangin ahla vak lo aniang, kan vah kual deuh hrep hnuah chuan kawnpui chu kan thleng ta mai a, mahse chulai hmun chu ka hriat ngai a ni hauhlo mai. Khawiveng nge tih pawh chu hriat mai a har hle a, kan kal kan kal hnuah chuan Nathana chuan, “Ding lawk teh…Rinawm enteh sawlai in saw, I hmuhhnu a ni a ang I ti ve tho lo maw?” a ti a, a kawhna lam chu ka hawi a, ka lu ka bu nghauh nghauh a,”Sir, ka hriathnu ngei chu a ni e…nizan lawk pawn kan lendun kha mawle..” ka ti a, chu in chu nizana kan nuthlawi rim Mary-te in ngei kha a ni. Mary in lam pan chuan kan kal ta a, mahse Mary-te in kawtah chuan police motor leh motor dang 10 vel lai mai chu a lo ding thluah mai a, pawn lamah chuan press mi te chuan mic leh camera nen notebook nen kawngkhar lam an lo en thap a, constable 10 vel chuang an lo vei kual bawk a. Nathana chuan, “Lawk, biru lawk teh ang, enge awmzia? Tinge Press mi te saw an awm a, motor a tam si, police ho an awm lehnghal..” a ti a, keipawh chuan mak ka ti angreng hle mai, motor phenah chuan kan biru a, Mary-te in lam chu kan melh dun reng a. Minute 3 hnu velah chuan kawngka atang chuan constable pa 4 chuan ruang an rawn zawn chhuak ta mai a, chu ruang chu ka hmu chiang theilo nangin mipa ruang a ni tih chu ka hria. A hnungah chuan SI Ricky-a, ka mihring huat em em leh Mary an rawn inzui chhuak a, chu veleh Press mite chuan Rickya leh Mary te chu thu zawhfiah tumin an lo bawr nghal luai luai mai a, constable ho chuan an lo dang vat a, a tawp berah kawngka atang chuan kan DGP ngei mai chu a lo chhuak bawk a. Ricky-a chuan, “Amal te te in min zawt thei ang..” inti thu vel tak chuan a ti a…

“Sir, he tualthah thubuai ah hian a mawhphurtu te chu in department ami ngei te an ni tih I chiang a maw?”

“Aw…chiang tehreng mai, he hmeichhia hi nizan mai khan mi pahnihin a inah an luhchilh a, a pasal an thah sak hnuah an pawnsual rawn a, tichuan an tlanchhe dun ta a ni.”

“Anih chu pawikhawih tute chu tute nge?”

“He tualthattu te hi kan senior ASP Lalrinawma leh DCP Nathan Malsawmkima te an ni.”

Kan thu hriat chuan min va barakhaih chiang em…ka thinrim lutuk chu, “Zawnga leh..” tih pah chuan va kal ka tum a, mahse Nathana chuan min dang tlat a. Keichuan thinrim takin, “Tinge min lo dang a, pawikhawihtu kan nilo a, tualthattu kan nilo, chuan saw hmeichhe tenawmnu sawn a pasal te chu nikuma thi daih tawh angin a sawi nilawmni, ka kal dawn..” ka ti a, mahse min dang tlat a, “Rinawm, ngaihtuah chiang rawh tualthattu angin min puh a, kan thah anilo a, saw hmeichhenu sawn dawt a sawi tih pawh ka hre ve tho. Mahse kan chan a chhe zawk, tunah min zawng mek tihna a ni a, kan tan chuan va kal a him lo, mualphona mai mai, chubakah tuman min ring dawn chuanglo..” a ti tlat a, mahse ka thinrim em avang chuan, “Nilove Sir, kan tihsual a nihloh phawt ahnu, chuan saw SI pa pawh saw zirtirna tha tak ka pe hlak dawn..” tih pah chuan ka tho a, mahse ka banah Nathana chuan min pawt a, “Kal suh ka tih chu..” a ti a, a kut ka paihthlak sak a, kal luih ka tum a, mahse na takin min pawt let a, min pawt thu a, fiak tak mai hian, “Rinawm, I kal tur a nilo ITS AN ORDER..” a ti ta mai a, thinrim tak chuan, “f**k” ka ti ringawt a, an thusawi lampang chu kan ngaihthlak chhunzawm leh ta a. Press zinga mi pakhat chuan zawhna a zawt leh a, “Sir, Mizorama Police huaisen tak tak kan neih te pahnih chu tualthattu angin I sawi a ni a, a proofna I nei em ni?” tiin azawt a, Rickya chuan, “Nei tehreng mai, Nathana leh Rinawma hi ka senior te an nih angin ka zah in ka ngaisang em em a, mahse tukin zinga ka thu hriat hian min barakhaihin ka rilru pawh a tina hle a. Kan ram tana mi hnawksak, tualthattu leh pawngsualtu an ni ta mai hi hriat a hrehawm ka ti takzet a ni. Tin, Pi Mary sum leh pai thahnem tak an ruk sak bawk a, cheng nuai 10 lai mai an ru chhuak a, tichuan an tlanbo ta a ni. Tunah hian tualthattu pakhat hmanni a jail atanga tlanchhuak chhui zui mekna ah hian a case chhui tu tur ka ni a, mahse he case nen hian ka buaipui kawp a ngai ta a nih hi..mahse Zoram mipuite u, he tualthattu kan Police zahpuiawm tak pahnih Nathan Malsawmkima leh Lalrinawma te hi ka zawng chhuak anga, ka kut ngei hian ka man dawn a ni..” a ti veldeuh pang pang a, ka va han haw tak em. Press zinga mi pakhat chuan, “Pi Mary kha zawhna kan lo zawt ve thei che angem?” a ti a, Mary chuan, “Aw thei tehreng mai..” tiin a lo chhang a, a tap deuh fep fep a, hlauh hmel deuh hian a mengkual vel a, lemchan a va han thiam tak em, khanglang chuan…

“Ka pi, nizan chuan engthil chiah nge thleng?”

“Kan pa hian a rawn haw tlai tur thu a rawn sawi a, kawngka kalh tha a, min mutsan mai turin min rawn phone a. Tichuan zan dar 12 vel khan door bell ri ka hria a, ka pasal anih ringin phur takin ka chhuk a, mahse tlangval pahnih hi anlo lut a, policean nih thu leh ka pasal in tual a that tiin min rawn man an tum ta mai a, amak ka tiin ka hlau hle mai a, min hruai chhuah luih an tum a, ka duh tlat siloh avang chuan nasa takin kut min thlak dun ta a, tichuan an pahnih chuan min phuarbet a, bedroom lamah min chhoh pui a, an duhtawkin min pawngsual dun ta a. Chumi hnuah an mahni chu Inspector Nathana leh Inspector Rinawma te ngei an ni tih chu an inbiak lai ka ngaihthlak ve reng avang chuan ka hre ta a. Chutih lai chuan kan pa chu alo haw ta a, min rawn au a, chuveleh ka au ta vak vak a, Nathana chuan, ‘Rinawm lo veng rawh, an pa khu chu ka zu dahtha nghal ange..’ tih pah chuan a pistol pai lai chu a phawrh chhuak a, inhnuai lamah chuan a chhuk a, Rinawma pawh chuan, ‘I au leh vaih chuan nangpawh I pasalang khuan kan that ve ang che..’ tih pahin ka kekawrte chu la in ka ka ah chuan a hnawh a. Ka pasal an thah fel hnu chuan kei chu ka lu ah na takin min vua a, engmah ka hre tawh lo. Mahse zing ka harh leh chu kan pa pawisa dahthatna kan wardrobe safe chhunga pawisa nuai 10 lai mai chu a lo bo a, chu zaeng chu ka hriat a ni e.”

A sawi zawh chuan a tap der vel vak vak a, ka thinrim ngei mai. Nathana chuan, “Rinawm, fimkhur taka kan chet a ngai dawn a ni. Helai hmun hi chu a himlo, kan chhuahsan angai a, kan biruk hrih angai..” a ti a, keichuan, “Sir, engtin nge kan tih tak ang?” ka ti a, Nathana chuan, “Rinawm, Police Officer huaisen tak kan ni tih hi hre reng rawh, thudik hi ala langchhuak em em ang, kan beilet ang, mahse kan fimkhur angai a ni..” a ti a, tichuan a biru thei ang berin chulaihmun chu kan chhuahsan ta a. Hmun tinah chuan kan chanchin chu a thang ta a, kan lar chak hle mai, kan lar dan lah chu a lawmawm lemloh khawp lehnghal a. Tichuan chu mi nileng chu a biru thei ang berin hun kan hmang ta a, police ho chuan hmun tin maiah min chang thup tawh vang chuan khawia han kal nge, khawilam nge pan tur ber pawh chu kan hrelo, kutdawh kan ni chu a ni der mai. Kan phone ve ve a bo bawk a, kan wallet lah a bo bawk, tihngaihna a vang em em a, ka ngaihtuah ber zawk chu ka nu a ni, ka chanchin diklo taka min puhna hi a hriat ve hunah chuan engtin tak min ngai ang maw? Ka mangang hle mai a, nizan kanlo chhuak kher kher pawh chu, ava han tullo tak, Biryani kher kan lo eiduh kha, kha biryani khan buaina min thlen a ni ka tilo thei lo. Chhun dar 12 vel a ri tawh ang, ka ril a tam hle mai a, Nathana motor chhungah chuan chawhma chhung zawng chu kan biru chu a ni der mai. Kan awmdan tur vel kan ngaihtuah dun lai chuan, “He lamah hian en ula, nangni helamah,abak zawngin min rawn zui rawh u..” tih ri hi kan hria a, chu aw chu ka hriathnu a ni tlat, SI Rickya aw ngei kha a ni. Rang takin motor atang chuan kan chhuak nghal a,kan awmna lai ramhnuaiah chuan Police Force hovin uisathiamte nen minlo zawng mek a nih chu. Tichuan hmun him lam panin misual ang maiin kan tlanchhe dun ta a, policezinga pakhat chuan minlohmufuh hlauh mai, ring mangkhengin, “Helama hi ka hmu e..” a ti ta a, min rawn um nghal a, kan tlanchhe ta a. Hnunglam deuh atang chuan Rickya chuan, “Kap rawh, its my order…encounter shoot…do it now..” tiin a rawn au lauh lauh lehnghal a, chuveleh silai a puak ta vak vak mai, min rawn kap ta tihna nih chu. Ahma aia chak chuan kan tlan chhia a, min kap fuh teuh thei em em mai lehnghal. Ka tlan lai chuan hnunglam ka hawi zeuh zeuh a,a tlem ber ah police ho chu 40 ai chuan an tlem hauh lovang, min rawn umphak te tihah chuan Nathana chu a thal tawp mai a, “Hrep tak chuan, ana lutuk..” a ti a, ka va kalhnai a, a kutah anlokap fuh chu niin..”Sir, I tha maw?” ka va ti a, rang tak chuan a rawn tho a, “An la chak lo viau ang, tlan ang..” tih pah chuan akut a dawm a, thisena luang zawih zawih a, kan tlan leh ta a. Kan tlanchhiatna lamah chuan kawpui kan chhuak hlawl mai, motor pakhat, maruti 800 hlui ve tawh tak lo tlan lai chu ka lo phar tawp a, a ding a, driver chu a rawn chhuak a, “Enge awmzia?” a rawn ti a, keichuan, “Police kan ni a, I motor hi kan hman angai ani..” ka ti tawp a. Chupa chuan, “Ehee..nangni hi, Police Inspector pahnih tualthattu te kha in ni a nimaw?” a ti a,Nathana chuan, “Tihpalh aw thianpa…nakinah min hmuh leh hunah min hnek ve mai dawnnia” a tih rual rual chuan a kut na lo lampang chuan a hnek siah a, a thal chiang khawp mai. Rang takin motorah chuan kan lut a, kan tlan ta a. Kan hnungah chuan police motor thahnem tak chuan siren ri lauh lauh chungin min um a, kan panna ber pawh kan hre tawh lo. Kan accident teuh thei em em a, kawngsira bike lo awm te chu kan su tlu nuai nuai mai a, atawpah chuan kan brake chu a chiang talo, ramhnuai lam ah bawk chuan kan tlanlut leh a..bawlhhlawh paihna niawm tak kham sang ve tak, mahse awih vak nisi lo, leivung leh bawlhhlawh tam em emna karah chuan kan lumthla ta a, thui tak kan lum hnu chuan a ri bur a, ka khawhmuh chu a thim nghal vek a…chu chu BIRYANI vanga kan buaina chu a ni.

Ka hmai ah chuan tui a rawn baw huk mai a, ka harh chiang hle mai, ka awmna lai chu ka en a, motor chhung ah a ni a, driver seat ah chuan Nathana chuan tui bottle kengin min lo en reng a, kan motor chuanna hma chu a khu vut vut a, thingkung lian tak kan su a ni tih chu ka hrethiam nghal a. Kan taksa chu a pilh nuai a, ka taksa chu a na them thum mai lehnghal. Nathana chuan, “I harh thei maw..i thi amaw ka ti hman alawm..” a ti a, Nathana banah chuan rawmawl a intawn a, thisen a luang ngaui mai a, “Sir, I ban chu enge a an?” ka ti a, Nathana chuan, “Hei hi chu a na lutuk lo, mahse ka sil vek, kan lumna kham thui zia khi, engtin nge kan la dam zawk…amak hle mai..” a ti nuah nuah a. Kan lumna kham chu ka han en chho a, a lo sang hle tak tak a, kan la dam chu a mak ngei mai. Car atang chuan kan chhuaka, ka sana ka en a, tlai dar 5:30 pm a pel deuh hret tawh a, khua a thim thet thet tawh. Light kan nei bawksi lo, kan awmna hmun kan hre bawk silo, engtia tih tur nge ni ang tiin kan inngaihtuah nasa dun hle a, kan ril lah chu a tam dun em em lehnghal a. Khaw thim tak tak hma a kawngpui lam zawn vat chu tha a kan hriat avangin kan han kal dawn a, ruah ala sur zui, a sur hnem em avang chuan motor lam pan bawk chuan kan tlan let leh a, motor chhungah chuan kan lut leh a. Motor chhung chu ka han dap chiang deuh a, seat hnung lamah chuan chhangthawp la in pack thlap hi tlawn hnih lai a lo awm hlauh mai. Kan ril atam tawh em avang chuan eating competition a chhangthawp in eisiak ang mai chuan kan ei dun tawn tawn a, tui bottle lian pahnih lai alo awm a, thingpuiah kan hmang a ni ber mai. Nathana chuan, “Biryani vangin buaina namenlo kan tawk tawh a, he chhangthawp hi chuan beiseina min siamsak ve ngei tawh rawh se..” a ti a,ka nuih aza zawk ea. Ruah chu a sur ban meuh chuan zan dar 7 a ri tawh, Nathana chuan, “Enge maw ka rah hi le, vawiin pawh khan a brake ka rahna a dal tlat a..” tih pah chuan a zu kun hniam a, a zu chhar a, “Rinawm, ka thil chhar hi en teh, a van tha dawn em..” tih pah chuan Torch Light lianchi, man to hmel tak hi a rawn lek chhuak a. Keichuan, “Khai aww…Sir tikha chuan kalkawng pawh kan hre thei tawh ang, hmanhmawh takin kal nghal teh ang..”ka ti a, mahse Nathana chuan, “Nilove Rina, tunah chuan kawngpui chu ala hlauhawm lutuk, zanrei lamah mi reh laiin kal zawk ang…he car chhungah hian mamawh dang pawh kan la hmu maithei asin, hawhteh a savawm bawm saw I va en teh ang..” a ti a, car atang chuan kan chhuak a, car hnung chu kan va hawng a, kha driver kha kan tan Pathian rawn tirh nimaiah ka ngai, thawmhnaw tamtak alo phur a, a zin haw lampang a ni ngei ang. Tichuan kan thawmhnaw te chu kan thlak a, lukhum ka khum a, shawl ka nghawngah ka vet a, Nathana pawh chu inthlak in danglam thei ang ber chuan kan inchei danglam a, tihchuan zan dar 12 rik hma hret chuan kan kal ta a. Eng tin tin emaw kan kal kual hnu chuan kawngpui lam chu kan thleng ve ta hlawl mai, kan hmui ve ve chu rawmawlin kan tuam a, tichuan kan in lam pan chuan kal kan tum ta phawt a, achhan chu ka nu ka ngaihtuah em vang a ni.

Kan awmna lai chu Mary te veng kha a ni a, kalkawng kha kan la hrechiang bawk a, kan kal lai pawh chuan Mary te in chu kan la hmu thei reng a, ka rilruin, “Tenawmnu, I va han chak dawnlo tak em..” ka ti nuah nuah a. Tichuan ke-in thui fe kan kal hnu chuan motor pakhat hi a rawn tlan a, kan zawnah chuan a rawn ding a, kan SI bang ta Remruatkima ngei kha alo ni a. Motor tukverh atang chuan arawn dak chhuak a, “Lo lut ru, Sir…tualthattu in ni lo tih ka hria lawm ka zawng char char che u asin..”a rawn ti a, mak kan ti dun hle mai, Nathana chuan, “Engtin nge kan rin theih ang che?” a ti a, Kima chuan, “Sir, in duh chuan kha, ka pistol hi la ula, police tirh ka nilo, ka bumlo bawk che u, a titu chu ka hria a lawm, mahse a tihchhan erawh ka hrelo, khawngaihin pistol hi la rawh, chuan lo chuang ru..” a ti a, kan chuang ta a, pistol pawh chu ka la nghal a. Nathana chuan a la ring thei chiah lo tih a hmel atang chuan a hriat theih a…

“Engtin nge kan thah a nilo tih I hriat theih a?”

“Sir, nangni pahnih hi hun rei tak ka lo thawhpui tawh che u a, engtikawng mahin nangni police rinawm leh huaisen, Zoram mipuite venghimtu te hian tual in that dawnlo tih ka hria alawm.”

“Chuvang chauh chu maw? Kan thah pawh alo ni maithei asin..engtin nge kan rin tawp theih ang che?”

“Sir, ka hrethiam che alawm, min ring mai lo ang tih chu..mahse vawiin tlai khan in tih anih loh zia keimah ngeiin ka proof a ni.”

“Engtin?”

“In chanchin hi ka lo hria a, a mak ka ti em em a, ka ring thei hlawl lo a ni. Tlaiah khan Station ah ka va kal a, DGP ka va hmu a, thil awmzia te ka zawt a, DGP chu SI thar, ka dinhmun luahtu Rickya khan a fuihpawrh hneh ngang aniang, phatsantu tiin a sawi che u a, tichuan keipawh chu haw ka tum a, SI thar Rickya khan inla fel tak hian ‘Ka lo thlah ang che aw’ a tih avang chuan a motor lam pan chuan ka zui ta a, a wallet a thlauh a, a hrelova a kal tlang a, wallet chu ka chhar sak a, auh ka tum lai tak chuan wallet chu ka hawng palh a, Rickya wallet nilovin I wallet zawk alo ni a, I hming leh I Police ID leh I credit card te hlir alo awm a. Tualthattu te ni tak tak ta ula, tualthahna hmunah khan I theihnghilh ti dawn ila, I wallet i hnutchhiah thu hriat a ni silo a, chuvang chuan ama ruahmanna vek ani tih ka hre ta a ni. Tichuan wallet chu ka khup a, a rawn hawileta, ‘I wallet I thauh a..’ a tih rual rual chuan rang em em in a rawn la nghal a, a ak nghal a, tichuan motora min thlah lai pawh chuan a hmel kha hlauhthawn hmel em em in a awm reng a, tichuan a thiltih ani tih ka chiang ta a ni.”

“Chuti te chu…DGP tinge I hrilh loh?”

“DGP hian a duhsak mai pawh nilovin Rickya hi a ngaisang hial zawk mawle, a ringsual phal hlawl lo a ni. DGP bulah hian sawi pawh ni ila Rickya hian a insawifiah thiam dawn lutuk. Tichuan Rickya hian vawiin tlai a an man hmanlo che u tiin a sawi a, tichuan khamah in tlan liam tih a sawi bawk a, a hmun vel a sawi bawka, tichuan zan chaw eikham atang khan kazawng nghal char char che u alawm.”

“A lawmawm e, Kima…min pui thei ang tiraw?”

“Ka pui em em ang che u, pistol pawh kha kawl nghal ula, chuan pawisa hi chu tunah chuan cheng 700 chiah ka kawl a, I mamawh belh chuan min rawn phone ula, hemi phone hi la rawh u…”

Phone changkanglo ve tak, fiamthu a thlanlung phone an tih ang deuh hi a rawn phawrh a, pawisa pawh chu min pe bawk a, “Sir, a ruk thei ang bera ka puh che u angai dawn a, thudik chu kan haichhuak thuai ang, ka number a awm bawk a, chuan zanin chu kan inhnuaiah in riak phawt anga, chuan chaw pawh ka rawn pe mai ang che u, lungngai suh u, ka awm alawm..” a ti a. Keichuan, “Kima, ka nu ka hmu duh, kan inah kal phawt ang..” ka lo ti a, Kima chuan, “I pa pawhin I chanchin alo hria a, naktuk ah I nu awmpui turin a rawn haw dawn..” a ti a, Nathana chuan, “Rina te inah chuan kal phawt ang u..” a ti a, kan in lam chu kan pan ta a. Kan in kan thlen meuh chuan zing dar 2 a ri tep tawh a, kawngka chu ka kik kauh kauh a, ka nu chuan a rawn hawng a. Min hmuh rual rual chuan a tap a, min kuah a,”Awii, ka fapa, I thi amaw ka lo ti asin..” tiin a tap vak vak a, keichuan, “Ka nu, min ring tiraw? Nu..ka thah a nilo, tual ka thatlo ania nu..” ka ti lawm lawm a. Ka nu chuan, “Mama, ka hria alawm, I tih anilo, ka ring che lawm, ka fapa, ka van lawm tak em..” tih pah chuan ka biangah min fawp a, a tap zawih zawih a. Inchhungah chuan kan lut a, thil awmzia te leh thil thlendan te chu ka nu chu kan hrilh a, Nathana chuan, “Ka nu (Nathana hian ka nu hi KA NU tiin a ko ve ringawt zel, a mawl a nia.) police lam ho hian an rawn be ve hrim hrim che em?” a ti a, ka nu chuan, “In SI thar Ricky-a an ti amawni kha, khapa kha vawiin ah alo kal a, Police Station ah min hruai a, tichuan min dawp a, engmah ka hriatloh thu ka sawi hnu chuan ‘I fapa hi ka man anga, tichuan engtikah mah in inhmu leh tawhlo ang’ tiin min vau a, chuan min haw tir a..” a ti a, ka thinrim ngei mai, “Zawngsena chu ka chhuah hauh lo ang mawle..” ka ti khur khur a. Tichuan ka nu bulah chuan min biak pawh theihna tur number chu kan pe a, fimkhur taka lo awm turin ka chah lawm lawm bawk a, tichuan kal kan tum ta a, ka chhuah hma chuan ka nu chu vawikhat ka kuah leh a, “Nu, ka pa bulah chuan engmah lo sawi suh aw…mahse ka pa chuan ka thah anilo tih chu a hre ang tiraw?” ka ti a, ka nu chuan, “A ring phal biklo ang che, kal tawh ru..” a ti a, kan chhuahsan ta a. Kima te inhnuaiah chuan kan riak a, zing chaw te pawh a rukin min rawn pe a, tichuan a hmaa kan lo plan lawk tawh angin hmuihmul lem ka vuah a, tichuan sam lem ka vuah a, lukhum parh ka khum a, sunglass ka vuah a, leather jacket buang ka ha bawk a, darthlalangah chuan ka in en a, keimah leh keimah pawh ka inhai tep hial a, Nathana chuan nui huah huah chungin, “Suddenmuanga I ang lutuk..” ala rawn ti zui,Kima pawh a nuihza a insum nasa khawp mai. Nathana erawh chu vai ang tawkin a inchei a, a hmai chu a hnawih dum deuh a, a lang hang kher mai. A lu ah gamchha a hreng a, a hmaiah khuavang lem liantawk a siam a, hmuihmuh leh khabe hmu sei tawk lem hi a vuah a, kurta baltawk fual zet mai hia ha a, kekawr thawl tawk a ha bawka, a kawngah buara hruiin ala hreng zui. A inchei zo chu ka nuih aza kher mai..”Thhirchhia kan neilo..” tiin ka chhaih a, a duhlo kher mai. Tichuan Nathana nen chuan Suddenmuanga leh vai thirchhe zawng kan ni ta.

Kan chhuak ta a, pawisa pawh Kiman min pek belh avang chuan 2000 lai chu kan nei ve a, 1000 veve in kan insem a, tichuan Mary te in lam chu kan pan ta a. Taxi chuan Mary te veng lam chu kan pan a, minute 20 vel hnuah chuan kan thleng ta a. Nathana chuan buara a keng a, kawngka chu a kik kauh kauh a, Mary chuan alo hawng a, “Enge I duh a?” a rawn ti a, keichu kawngka phenah ka lo biru a, Nathana chuan, “Ka pi, nangmahni tiirsia nei em?” a ti a, vai ava han ang chiang tak, ka lo nui tut tut a. Mary chuan, “Neilo neilo..kal teh alo ti hrep a..” chuveleh ka va lut a, Nathana bengah chuan ka va pawt a, “Kumara chu, hetah nimaw ilo awm a? Zawn hmuh I va har ve…khawnge ka pawisa I bat te kha..engtik nge min pek dawn?” tiin ka va vin vak vaka, Mary chuan a hrethiamlo hle mai, “Ka pu, enge awmzia?” a lo ti a, keichuan, “He vaipa hi,kan truck driver hlui a nia, kan pawisa cheng 5000 a ba a, min rul theilo, ka zawng nasa lutuk, kum 1 lai a ba tawh..” ka ti a, Mary chuan, “A nih chu, hruai chhuak vat teh..” a ti a, Nathana chu ka pawt chhuak a, tichuan Mary chuan kawngka chu a khar a. Minute 4 velhnuah chuan ka va kik leh a, Mary chuan, “Enge ni leh ta a?” alo ti vin hlura, keichuan, “Tui ka lo in lawk the ang..” ka ti a, lut tur chuan min sawm a, ka lut a, tui chu ka in ta a. Ka in zawh hnu chuan Nathana alo lut a, Mary chuan vin zet hian, “Enge nang vaipa kha ilo luh ve leh a?” a ti vin tuar a, Nathana chuan muangchangin a gamchha lakthlakpah chuan, “Vaipa nilovin, Deputy Commissioner of Police Nathan Malsawmkima ka ni e..” a ti a, ahmuihmul lem te chu a pawt thla a. Mary hlau lutuk chu a thaw dep dep a, hnunglam atang chuan pistol in Mary lo hawilet leh chiah chu ka tin a, “Mary, engvangin nge khatia min tih mualphona chhan?” ka ti a, Mary chuan, “Tu..tu nge I nih?” min ti a, keichuan ka hmuihmul lem leh ka sam lem chu phelh pahin, “Assistant Superententdent of Police.. Lalrinawma ka ni e..” kati a, a hlau lutuk chu a khur zawih zawiha, Nathana chuan, “Mary, sawi rawh, engvangin nge khatia I tih, sawi vat rawh..” a ti vin tuar a, Mary chuan, “Ka sawi ang…ka pasal hi a hausak em vang chauh a nei ka ni a, kan kum erawh a in upat hleih em em a, sex lamah ka khamkhawp min pe theilo. Ka bialpa chu Ricky-a hi a ni. Rickya nen inthurualin nangmahni chu hmanrua ah hmangin ka pasal hi kan that dun a, in thah angin kan lantir a, tichuan ka pasal chiah hian safe chahbi a kawl a, nuai 10 lai a awm tih ka hre ve reng a, mahse chahbi chu min kawltir ve duh lo. Khami zan khan Rickya chuan ka pasal hnathawk haw chu a lo chang a, a that a, tichuan a safe chahbi chu alo keng a, tichuan nangni hi ka zui ru che u a, tichuan kha restaurant ah khan in chawl ta a, tichuan lassi pawh kha ka tihbuak lui che u a nih kha. Tichuan theitui in turah khan damdawi ka pawlh a, in chatthla ta a, chu veleh Rickya chu ka phone a, alo kal a, in thah angin kan lantir ta a, min chhuichhuah loh nan tiin in wallet leh phone kan la bawk a ni..” a ti a, Nathana chuan, “A tha e…abak chu Police Stationah I sawi dawn nia..” a ti a, Kima chu a phone a, thil awmzia a hrilh hnu chuan phone chu a dah a, Mary chu kan chhuah pui ta a. Chu veleh kan hmaah chuan car hi a rawn ding a, hmeichhe lian lampang, ft 5’10 vel laia sang hi a rawn chhuk a, Nathana chu a rawh chhuih thal tawp a, kei pawh chu min rawn hnek a, ka thla ve tawp a. Ka ding chhuak a, “Tunge I nih a?” ka tih rualrual chuan min tlawh leh pawp a, ka tlu leh nghal. Nathana chu a rawn dingchhuak a, Mary chu chunu lam pan chuan a tlan a, chunu phenah chuan a biru a, Nathana chuan, “Enteh nula, tunge I nih ka hreloa, mahse I buailohna turah I buai palh hlauh ange..” a ti a,chunu chuan, “Kan hria ang chu..” a ti a, keichuan, “Tihnat che kan duhlo ania, hmeichhia I nih kha..” ka ti a, chunu chuan, “Ka buai phah lovang..” a ti a, min rawn hnek leh siah mai a, a kutthlak a na takzet, Nathana chuan va hnek a tum a, alo bum a, a pumah a khupin a do siah a, a hmaiah a hnek leh pawpa, tichuan carah chuan Mary nen chuan an tlan ta daih a. Rang takin taxi kan hmuh hmasak ber chu kan phar ding a, kan um ta a.

A tlan chak ngei mai, a ding thut a, motor atang chuan Mary chu a rawn let thla tawp a, motor atang chuan kan chhuk ve nghal a, Mary lam chu kan va pan a, a lo thi der tawh a. Taxi driver chu a hlau ngei mai, a tlan ta daih a. Keini pawh chuan miin min hmuh tam hmain Mary ruang chu kan kalsan ta ringawt a. Thui fee kea kan kalhnu chuan taxi dang kan phar leh a, Kima te in lam pan chuan kan kal leh ta a, kan samlem te leh kan hmuihmul lem te chu kan vuah leh a. HDFC Bank kan thleng chiah chu Mary lo chhan tu nu kha Bank hnuai Garage lama a chhuk lai chu ka hmu a, rang takin, “Ding lawk teh..” ka tia, Nathana chu ka kawh hmuh a, kan chhuk a, Garage lam chu kan pan ve ta a. Motor phenah chuan biru kualin chu nu lam chu kan pan a, phone hian mi alo be mek a..”Mary kha ka that ta mai, Nathana te kha an la dam, chuan engkim a hrilh vek, chuvang chuan nakinah kan buai loh nan tiin a ka ka hupsak ta nih kha. Nangmah vang vek ani, I sum ngaina lutuk leh Police rank sang zawka I kaisan duh luatah I bialnu nunna in a tawrh phah ta a nih hi, I duh leh thinrim rawh, ka lo pui kher kher che a ni. Ahma pawn that nghal law law ang, I tia, mahse ramhnuaiah nungdamin I hnutchhiah dun a, an motor I tihchhiat sak ringawt a, nangman inla hero tawka DGP hmaa I mark tih that I duh vangin, mahse I man hman leh silo..” a lo ti phiar phiar mai a, ka insum zolo chu ka va chhuak a, “Zawngi leh..” tih pahin ka va hnek a, athal tawp mai. Mahse rang em em hian a rawn tho chhuak leh a, ka hmaiah tak chuan a rawn tlawh a, ka thal tawp a. Nathana chuan a rawn rek bet nghal a, mahse a ban hliam ah tak chuan a seh sak a, Nathana na ti lutuk chuan a thlah chiang kher mai, thisen a luang ngiai ngiai a. Nathana chuan thinrim tak hian a hmuihmul lem leh gamchha hren lai lakthlak pah chuan, “Ahma pawh hmeichhia I nih avangin ka khawih tha duh lo che a, a tawk ta e….Sakeibaknei chu I kaitho ta..” tih pahin chu nu lam chu a pan phei a, chunu chuan a hmai ah a lo hnek a, mahse Nathana chu na ti awm ang pawn a awm lo, Nathana hmaiah chuan vawi nga vel a hnek leh siah siah a, Nathana chuan na tih hmel pawh ala pu chuang lo, “Hmeichhe kutthlak te lek lek..” tih pah chuan chunu chu na em em in thisen per chhawk khawp hian a hnek a, a thal chiang ngei mai. Muang changin arawn tho a, mahse silai a puak dur a, chunu hnute inkar atang chuan thisen alo luang a, a tlu tawp a, a thi der mai. Chunu hnunglam atang chuan Ricky-a'n alo kap hi alo ni a, Nathana chu silai a tin pah chuan, “Ka ex a nih hi, Taekwondo Blackbelt ngat mawle..Mary leh kei leh ani hi kan inthurual a, Mary hian ka nau emaw a ti tlat a..haha, ka bialnu a thah vangin ka that ve nih kha, chuan nangni pahnih hi in thi ve nghal bawk ang. Chuan…naktuk chanchinbu-a inziak tur chu maw, Hmeichhe pakhat chu Nathana leh Rinawma chuan rawk tumin an beih chiam hnuah an kaphlum a, mahse SI Rickya chuan nang hmanin an inbeih chiam hnuah loh theihlohvin a kap hlum dun ta a ni. Rickya chu..Sub-Inspector atangin, Inspector ah akai sang ta..haha” a ti ham ham a, Rickya bawk chuan, “AWle in mangtha a hun e…thusawi duh in nei em, thuchah hnuhnung te??.” a ti vel a, Nathana chuan nuih pahin, “Aw nei e..” a ti a, Rickya chuan, “Sawi ta che..” a ti a, Nathana chuan thawk a la te te a, nui vur vur chung chuan, “Ka thusawi duh hnuhnung chu hei hi ani, Sub-Inspector Ricky..khawngaihin i hnunglam kha hawi mawlh teh.” a ti a, a hnuglam ahawi chu DGP chuan pistolin alo tin reng a, “Drop your gun..” a ti a. Constable te chuan Rickya chu an rawn man nghal a, DGP bulah chuan Kima a lo kala, DGP chuan, “Ka tihpalh ani, ka lo ring sual che u a, Kima hian engkim min hrilh vek alawm…tichuan a rang thei ang berin kan lo kal a ni..” a ti a, keichuan, “Mahse Sir, engtin nge hetah kan awm tih I hriat?” ka ti a, Nathana chuan, “He hmeichhe insual thiam zet, Ricky-a'n a thah tak nu in i mawnga a pet lai che khan Kima hi ka phone a, kan awmna hmun ka hrilh vek a lawm..” a ti a, alo che rang thin bik teh e. DGP chuan, “Anih chuan kan Police huaisen te pahnih hi vawiin chhun chu chhun chaw ka khilai ang che u, I eiho ang u aw..” a ti a, Nathana chuan, “Enge kan ei ang?” a lo ti a. DGP chuan, “Ka treat vek ang che u, Hyderabad Chef siam ngei, original..Chicken Biryani kan ei ang..” a ti a…Nathana nen chuan kan in melh a…”BIRYANI AAAA?????”

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)