Unread post
by Chhantea Pautu » May 22nd, 2018, 9:12 pm
LALMUANAWMA: CLIMAX & BAD TRAGEDY!
Author: Chhantea Pautu
Chapter 4
Blue Plan!
Thinrim insum zo lo va, che buan buan duh tur hmel hi a pu a. Muanawma chuan a hmel chu a han en thin a; a awmdan chu a duh miah lo!
"I tha maw?" tiin a han zawt a. Je-a chuan hre âwm pawhin a lang lo! A darah a va khawih a, a sâwi ta hial a!
Chutia a han sâwi tâkah chuan Je-a chu a inthlahdul a, pangngai tak hian a awm leh ta a.
"I pa boral thû-ah chuan engvanga ngaih tha lo nge i nih le?" tiin Muanawma chuan a han zawt a.
Je-a chu rei fê a ngawih hnû-ah a han thaw deuh hawk a; thil sawi tur nei, 'ka sawi ang nge sawi lovang' ti-a inngaihtuah mêkte pawh a ang mah mah mai. A rawn tawng chhuak ta a. "Thawnthu sei tak a ni" a han ti ngawt a. "Kum 1966 atanga 1986, kum 20 chhung, kan ram a buai laia 'Mizo Hnam Sipaite' kha eng angin nge i ngaih ve?" a han ti leh a.
Muanawma chuan, "Ka hrethiam lo...hnam rilru pute rilru atanga teh chuan, Mizo hnam tan an chhuanawm viau mai. Tunlai-ah, kan hnam sipaite'n zalenna an sual kha, awmze nei lo tawp anga chhuah duh tawk an awm erawh a pawi ka ti thin. Mahse, 'political party' te'n 'Mizo Nationalism' tih chhuanlama pawlitik an khel bawrh bawrh mai hi chuan, khang hnam sipaite hming kha a tichhe thei dawnin ka hria. Heti ang zawnga sawi thenkhatte hian ram leh hnam hmangaihna rilru tak tak put aiin, an 'political career' hi an rilru-ah an dah lian zawk hial mai thei, ka ti deuh" a han ti deuh duah a.
"A ni khawp mai...ka pa kha, 'Mizo National Army(MNA)' zingah a tel ve a; 'Remna Rûn' chhuak ngat a ni a sin" Je-a chuan a han ti a. "Muana, tuna ka thu hrilh tur che hi ngun takin ngaithla la, ka pa hi thih dan pangngaia thi ni-a ka rin lohna chhan chu i hrethiam theiin ka ring. Mahse thian tha ber leh thian tha ber indawr dan ang hi ni se la. Ka thusawi hi khawiah mah chhuak tawh suh se aw. Tin, ka sawi zawh hnû-ah engmah min zawtfiah zui miah lo turin ka ngen bawk a che. Mihring hming ka sawi tel dawn lo va; min zawt mah la ka sawi zui tawh chuang lo vang!" a han leh a.
Muanawma chuan, "Aw le" ti chauhin a lo chhang a. A rilru chuan thil tam tak a ngaihruat phah thung.
Je-a chuan a han sawi tan ta a, "Khatia, ram a han buai a, thalai tam tak ramhnuai sipaia an luh sup sup lai khan, ka pa chu a tirtê atangin ramhnuai-ah a chhuak ve nghal a. Mi tlawmngai leh dawihzep vak lo chi a nih avangin mite ngainat pawh a hlawh ta thuai a. Ramhnuai sipai Captain pakhat kaihza vengtu-ah a tang ta thuai nghe nghe a ni. Hun a lokal a, chu Captain chuan ramhnuai sipaite inawpna dan phêna pawl rûk pakhat awma tel turin ka pa chu a sawm ve ta a. Chu pawl rûk pakhat chu Ramhnuai sipai 'Inteligent' peng pakhat niin ka pa bulah Captain chuan a sawi mai a. Chu pâwlah chuan mi pasarih chiah an awm tur a ni. Ka pa an sawm ve tâkna chhan pawh hmun pakhata vai sipai nena an inkahnaah, chu pâwla tel zinga pakhat chu an kaphlum hlauh a ni awm e. Tichuan, ka pa chu engmah hrechiang lem lovin chu pâwlah chuan a tel ve ta a. A rûkin eng thil thil emaw an ti ta fova; a bikin khatih laia ramhnuai sipaite tana hnawksak ve tak thin, mizo, mahni mizo puite vai sipai hnena hek duh tawk, 'Kawktu' an tihte chungah khan roreltu an ni a, an hlauhawm hle a. An pawl hming kha ka pa khan a sawi lang chiah lo va, ka hriat tam a duh lo a nih ka ring. Rambuai chhung zawng khan chu pâwl chu ramhnuai sawrkar inawpna phênah a kal ve zel a. Ka pa chu an thiltihnaah tel ve fo mah se, an thiltihna zawng zawngah erawh a tel ngai lo. An pâwl inawp dan chiah leh a chhungrila an kaldan pawh a hre kilkelh lem lo a ni. Mahse an pâwla telte zingah chuan mi pakhat, amah aia upa zawk ngainat deuh mai a nei a; chupa hming chu, a thih hma pawh khan a sawi ri fo thin. Ani chu amah aiin a boral hmasa ta nghe nghe a ni. A thih dan chu thih dan pangngai ni-a a rin loh thû a sawichhuah zauh ka hre bawk. Chupa chu mi rilru tha, mi dik leh huaisen, tlawmngai lutuk chi ve tho niin a sawi a; chu pâwla a luh ve dan pawh ka pa luh dan nen a inang a. An pâwl member pakhat vai sipaiin an kahhlum avanga lut ve tho a ni. Ka pa nen chuan chu pâwl member-te zingah, a tira chu pâwl dintu ni lo awmchhun an ni bawk. Ka pa a awm ve tantirh pawh chuan chupa chu an mi rinrawl leh chhuanawm ber a ni mek nghe nghe a ni.
"Tumkhat chu thil eng emaw an tihna lamah an inhnial vak mai a. Ka pa-in a ngainat em em pa chu a lung a awi ta tlat lo mai a; a hnû-ah phei chuan an zing atangin a inthiarfihlim ta nge nge a. A chhan ni bera ka pain a sawi chu- Hnam sipai thenkhatte, Bangladesh rama an awm laiin lunghlu hlu tham tak kawltu an awm a. Ka pate awmna pâwl rûk lo dintu, member hlunte chuan neih ngei dan an ngaihtuah ta a. Chutihlaia thiltihnaa an rinrawl leh hmatheh ber, ka pain a ngainat em em pa chu dawt hrilhin an tih tir a. Hetia dawt an hrilh chhan pawh, an lunghlu neih tum dan chu a thianghlim tawk chiah loh vang a ni. Chu thil tihlawhtling ngei thei tura an ngaih lah chu, mi rilru ngil leh dik a lo ni kher si a; an ruahmanna a hriak vek chuan a tihduh loh an hlau a ni" a han ti a.
A han chawl a; botle-a tui chu a han in khawlh khawlh a, a sawizawm leh a.
"A dik tak chuan, a thiltih tur ringawt kha an hrilh a, a chhan leh avang dik tak pawh an hrilh chiang lo! Lunghlu chungchang phei chu a hre ve lo hrim hrim. A tih tura an tuk chu, lunghlu kawltu dah bo a, a bawm kawl chu ka pa-in a hrawn thin, Captain kuta him taka hlan a ni. Bawm chu hawn miah loh tur a ni a, hawng hlek lova Captain hnena thlen chu a tih tur a ni. Captain chu, ka pa leh chu pa chuan an hotu lu ber a nih leh nih loh pawh an hrechiang chiah lova! Mahse, bâwmah chuan lunghlu chu a awm ngei a nih a rinawm. Ka pa leh an ruahmannaa an hmatheh ber, chu thil ti tura an ruat chu, an zinga la awm rei lo an nih avangin, a tir atanga lo awm tawh sa mi pangate chuan, a rukin lunghlu atanga hlawkna tel an tum a ni thei bawk. Mahse thil a kaltluang ta lova. Chupa chuan, engtin tin emaw ni an ruahmanna tenawm tak chu a hrechhuak ta tlat mai a. Chutah, a kutin mi pawisawi lo nunna a lo la tih chu a hre zui ta bawk. A thian te'n ama kutin rûlkûa an zen tih a han hriat chuan a thin a rim ta hle a. Amah tirtute chu a chhuahchhal let ve ta sak sak mai a ni. Namen lovin an inhnial buai a, hriam leka kut inthlak duh hial khawpin thinrim hmel hmai sa an inchhawn hial a. Ka pain khap dai hlawm lo phei sela thil chhe zawk a thleng ngei ang. Captain chuan, bawm awmna chu a han zawt a; mahse chupa chuan, bawm a hmuh loh thu a sawi ve ta tlat a. Tumahin an awih lova, a finfiahna turin bawm chu a awm miau bawk si lo. Ruahmanna tenawm taka lunghlu neih an tum pawh chu, an nei thei ta bik chuang lo a ni. Ka pa thianpa chu an zing atanga a inthiarfihlim hnu chuan vawihnih khat bak an inhmu ta lova. Chupa ai chu midang, nunrawn hmelzet leh khawngaihna pianpui lo zet hi an la lut leh ta a ni. Ka pa pawh chu an zingah chuan a awm chho ve zel a; mahse an kal dan leh an thiltih dan a hmu tam chho telh telh a, an thiltih dan a dik zat lova hriatna a nei lian telh telh a. An ruahmanna leh an hmalâknate pawh a thianghlim chiah lo a ni tih a hre chho ta zel a. Ka pa pawh chuan chhuahsan mai a duh ta telh telh a ni. A hnu fê-ah phei chuan, ramhnuai sawrkar enkawlna hnuaia an pawl chu awm ni lovin: thian thenkhat kal filawr leh pawngpawrh zual, inlulin nuam ti, ramhnuai sawrkar hming behchhan si a, an mi huatzawngte, 'Kawktu' nia puh a, an chunga hlei len ching, thian ho khat intelkhawm satliah an ni tih a hre ru ta hlauh mai a. Ka pain chu thil a hriat tak hnu chuan, inthiarfihlimna remchang a melh ta rân mai a. A tawpah chuan a inthiarfihlim san thei ta hram a ni. A thianpa nen khan inhmu lehin an inkawp deuh ta chawt a, chumi hnu kum khatah, India sawrkar leh MNF te chu a inrem zui ta a, hnam sipaite chu ramhnuai atangin an rawn chhuak ta bawk a ni. Mahse ramhnuaia pawl ruk anga awmte chu an inhlawmkhawm kal zel a, khatia, India sawrkar nena an inremna kha an duh lovin an lungawi lo hle nghe nghe a ni. Ka han kaitawi tawh mai ang'e: tun thleng hian an kalphung tidanglam hret hretin an la awm ta zel a, a tira a dintute kha an boral deuh vek tawh. Mahse midangin an keng nung chho zel a, an awm tih pawh hriat lohin an awm ta reng a ni. Ka pa thianpa khan lunghlu kha kawlin an ring tlat a, tin, ka pa pawh, an pâwl a chhuahsan hnu-a a thianpa nena an inkawp deuh chawt avangin rinhlelh a kai ve bawk; chuvang chu a ni heti ang rilru ka put!" a ti a, a ngawi ta vang vang a.
Muanawma chuan zawhfiah duh tam tak a nei a- a sawifiah lo lulai em a ni; mahse engmah zawh a tum lo.
"CIA kalphung chungchang hi engtiangin nge i ngaihtuah thin?" tiin a han zawt ta zawk a.
Je-a chuan, "Ka hrethiam lo" a lo ti satliah a.
Muanawma chuan, "Cold war laia Russian secret service, KGB te nena an inbeihnate, British Secret service-te nena an tanrual tlatna phenahte hian, 'conspiracy' tam tak a awm ka ring a sin. A hotu lu, anmahni khâitu awm mah se, CIA huanga thawk Spy tam tak hi chuan, an hotute hriat hauh lovin, mahni mimal thila hlawkna um avanga thiltih an ngah ngawt ang le. I han sawi, rambuai laia hnam sipaite zingah pawh, an hotute hriat hauh lova mahni hlawkna um leh a dik lo zawnga thahnem ngai fal bik an awm hi mak ka ti hran miah lo mai; mahse, ngaih ropui zawk tur chu, dik tak leh fel taka tite an ni tho tho. Chutihlaiin chuti ang mite chuan hnam sipaite hmel an tihem tlat si a ni. Mipui thinlungah ser a siam bawk!" a han ti a.
Je-a chuan, "A dik ngawt mai" a ti a.
"Pawlitik huanga luta MLA hial ni thei, Joe Ngurdawla lehkhabu ziah kha i chhiar ngun ve viau ti raw?" Muanawma chuan a han ti ta daih a.
"Eng lehkhabu maw?"
"Wayne Cole, American Spy chanchin kha maw le"
"Eh! Lehlin a ni lo'm ni?"
"Kei paw'n lehlin emaw ka tia lawm; mahse Mizopa ziah ngei a ni"
"A nih chu maw le...ka lo hre miah hlei nem"
An han ngawi dun ta vang vang a...
"Chuti, Ian Fleminga'n James Bond-a chanchin a ziah phênah pawh, ngaihbel tur tingin a taka thil thleng a awm i ring ve lo maw?" je-a chuan a han ti a.
"Ka hre lo...a awm pawh a awm ang" tiin Muanawma chuan a lo chhang a.
A thianpa Je-a thusawi chu ngaihtuah zuiin a muhil thei ta mang hlek lo va. A hnu chhuiin a hnuhluhna leh a hnuchhui chhan ber, thil thlengte chu a inpersan ta riau hian a han hre leh rih a, muthilh harsa a ti viau mai; mahse khawvar dawnah reilotê a lo chhing ve sek a.
A tuk nileng mai chuan a pindanah a inkhung a, Je-a thusawi bawk chu a ngaihtuahna luhtu ber a ni. "...roreltu an ni..." tih a sawi lai khan Muanawma rilru-ah chuan thumal pahnih a lo lang zawk a, 'The Judges' tih chu!
A lehkhathem dawna thu inziak tawpa 'The Judges' tih inziak leh, a thianpain, '...roreltu an ni..." tia a sawite chu a han chhuidawn ngial a; inhmeh leh inmil riau mai hian a hria a ni. Je-a khan, kha pâwl hming kha a sawi lova, kha pâwla inhnamhnawihte hming lah a sawilang si lo chu a buaithlakna lai a ni. Chu aia la buaithlak mah chu- engmah zawt zui lo tura a ngenna kha a ni! Ngaihtuahna leh chhuidawnna baka ke han pen turin kawng a ping riauin a hria a, tihngaihna a hre lo ang reng hle a ni.
Je-a'n a rinhlelh angin, Je-a pa chu, mahnia tlusual ni lo va, thah a ni reng ang em? Je-a pa ramhnuai sipaipui, a kawmngeih em em chu tung'e ni ang? Je-a khan, a pa thianpa chu ama pa ai khan a boral hmasa a; a pa chuan thih dan pangngaia thi a nih a rin loh thu a sawi zauh a hriat thu kha a sawi a- chu chu tung'e ni ta ang le?
Muanawma'n chu'ng thu vel a ngaihtuah lai tak chuan, a rilru-ah Rintei pa, Pa Rokhûma pa thih chungchang a lo lang a. Amah, Pa Rokhûma khan, a pa thih dan kha mak a tih thu a hrilh tak a nih kha! Rintei pu nunhlui hriatchian tul tihna a nei lian ta hle mai a. A lehlamah, Je-a rindan, a pa chu thìh dan pangngai ni lova, tualthi ngei a nih a rin chu a dik theihna lai a awm tlat a ni. Je-a'n a sawi anga lunghlu chungchangah Je-a pa leh a thianpa chu rinhlelh an nih si chuan, he'ng thil inphiar vel zawng zawng pawh hi, pawl pakhatin lunghlu hmuhlet tuma an ruahhmanna kal zel pawh a ni ve thei tlat a ni.
Lunghlute, rangkachakte leh mihringin rohlû-a kan ngaihte reng reng hian sûai an nei a, a tam tham emaw, man tam tham emaw a nih phei chuan, mihring hi a tikhaw lovin a ti â vek thei tlat a. Sum, tuna 'pawisa' tia kan sawi chen hian âtna hlo a chang thei a ni; chuvangin pawisa leh thil hlû-a kan ngaihte'n min thunun hma ngei hian a hmangtu mihringte hian kan thunun ngei tur a ni. Miin rosum ûma thil a tih tawh chinah chuan a kal dik tawk tawh ngai lo. Hmangaihna chungchangah thleng hian a ni; nula emaw tlangval emawin rosum ûma hmangaihna 'game' a khelh tawh phawt chuan, hmangaihna hi rosuma leitlak lek khawpa hniamah a hmu tawh mai thin a ni.
Chuti ang vel chu a pindanah ngaihtuahna neuh neuh a, tlai ni tlâk dawn ruai-ah a pindan chu a chhuahsan ve ta chauh a. Sangtei kha a la haw lova, a tukah haw tum a ni a, Muanawma hian Aizawl lama dah a tum nghe nghe a ni.
Sangtei chu chokaah a lo awm a, chawei dawhkan bula chair inhûngah chuan Muanawma chu a han thu a.
"Sangte, khawvel ram hrang hrangte hian an ram a zalen theihna tura beitu, an ram leh hnam tana miropuia chhiar tlak tak an nei theuh ang a; nangin tung'e i ngaih ropui ve?" a han ti a.
Sangtei chuan anhnah a thliar fel melh melh a. "Mahatma Gandhi" tiin Muanawma chu a han chhang a.
"Engvangin?"
"Tharum tel lo, 'Non violence' ngaisang mi a nih avang leh; chuti ang taka a ram zalenna sualchhuaktu a nih avangin"
"Hun tawng a zirin tharum hi a tul hun a awm ve bawk a sin" tiin Muanawma chuan a han kalh fiam a.
Sangtei chuan, "Mahatma Gandhi'n India ram a zalen theihna tura tharum tel lova a beih ang bawk khan, Netaji Subhas Chandra Bose khan India ram tan zalenna a sual ve bawk. Mahse, ani kha chuan, tharum a hmachhuan thung. An pahnih hian India mipuite tan chuan 'hero' an ni ve ve a; mahse khawvelin a chhinchhiah danah, miropui zawk chu Mahatma Gandhi a ni ngei ang. India ram mipuite rilru-a milian zawk pawh Mahatma Gandhi tho a ni" a han ti a.
"Chu, Netaji Subhas Chandra Bose-a hnathawh ve chu, 'Engmah lo mai a ni' i tihna em ni?" tiin Muanawma chuan a han zawt a; a nui var var a.
"Ni lo ve, India ram tan chuan 'Freedom Fighter' dik tak leh, ram leh hnam tana mi chhuanawm tak a ni. Mahse, tung'e ka ngaih ropui tih min zawh avangin, ka mi ngaihropui chu miropui a nih zia sawi nan, midang nen ka han tehkhin mai mai a nih kha" Sangtei chuan a han ti leh a.
"Ka pi, i sermon tha dum dum hle mai..."
"A lo nih tak chu..."
"Naktukah pawh Driver bulah i thu thei ang"
"Hmela...!"
"Hmeichhe ril tak, min ngaihtuahtu ka nei a; mo atan an tha duh riau an ti..."
"I tawngthei..." tiin Sangtei chuan chum tumin a han tin ar ar a.
Muanawma chu a persawn zauh a, nui hak hak pahin a pindan lam a pansan ta a. "Chawei dawnah mi rawn ko la aw, Ka pi miril" a han tizui a.
"Teuh lo mai...chaw i nghei anga a ni mai"
Muanawma, a pindana a han lut leh chu a inngaihtuah mûk kher mai.
"Naktuk chu SI Zodinsanga hmuh ka ngai a ni. Thil zawh tur tul tak ka nei tlat mai" a rilruin a han ti a.
A khumah a kut pahnih lukhamin a han muzangthal ar ar a; a maimi'chhing vang vang a!
Searching Evidence!
Muanawma chu chawei kham atangin a pindanah a inkhung leh ta char char a. Thil thlen dan ringawt ngaihtuahin a zanlai ta der a; a mut erawh a chhuak der si lo! Kawnpui ngawa tawhsual a tawhdan te a chhuilêt a, amah thah tuma beihna a ni thei ang em tih hriatthiam har a ti hle mai. Lengkira a tawlhthlak hma hreta a thil hmuh kha chiang lo ruaia hmu kha a ni a. Ni tlak dawn tawh lam, ngaw hnuai thim deuh ruih tawh kara hmu kha a nih miau avangin, a mitvai khawhmuh mai pawh a ni ve thei bawk.
A mumanga a nî fanu a hmuh tum kha a han hrechhuak a. Tawitlanga Pûk, misualte chetlatna ni anga a mumanga a hrilh kha,'Kawnpui ngawa a chunga thil lothleng tur a mangphanna a ni thei zawk ang em?' tiin a han ngaihtuah a; Kawnpui tlangdung leh Tawitlang tlangdung chu tlangdung inhne rial a ni tho si. Chutah, a chhan pawh a hriat lohin hming pakhat a rilru-ah a rawn lang a; Vanlalruata chu a ni!
A nî fanu, Vanlalruata nupui ni ta, a pasalin a ngaihsak loh zet, nau chunga boral ta thlarau chu a pindanah rawn kal leh ang hial hian a han hria a, "Pu Liansiama fanu thlarau pawh khan eng chu nge maw min hrilh a tum le?" tiin a han tawngchhuak ta hial a!
Dawhkana a thil chhinchhiahna lehkhabu tereuhte chu a han ban a. Chutih pah chuan chumi bula Note-book lo awm, Hualtu an kal tuma Je-a'n Hualtungamtawna-Ui-No-Neihna panna kawnga a thlauh, a ruka a chhar, a ruka chhiara amah fiam nana hman a tum lehkhabute chu a han ban a, a chhiar ta a. Chu thil chu diary ni lovin, thil chhinchhiah nana hman note book hi a lo ni a! Hualtu atang khan a khampheiin a haw a, a thi lo chauh kha a ni deuh ber mai a. ICU-ah, a tih der chhiar telin niruk ngawt a awm, a thianpa fiam a tumna hmanrua pawh chu a lo la ngaihven hman meuh lova, nihnih liamta mai khan a bag a phawrh a, chutih pah chuan chu thil chu dawhkanah chuan dahin, en pawh a lo la en hlek lo a ni!
A tuk zinga tho hmel chu a pawrchap a, a mu mumal miah lo tih Muanawma hmelah chuan a lang thei. A mitmeng a sen ram a, Rilru hah leh tih tur tih ngei tur ti hreh em em si hmel hi a pu hialin a hriat zawk mah mah e. SI Zodinsanga a 'call' zawk a, chaw an eikham hnuin Sangtei nen Aizawl an pan ta a ni. Sangtei chu an inah a dah phawt a, rei awm khawmuang lovin SI Zodinsanga hmu turin a kal leh ta nghal a ni; hemite inkawmna boruak hi a ngaìhnawm thei riau zel.
"Pu Dinsang, evidence chu a test result record nen lam em ni a bo?"
"Aw ni e. Chu nen chuan a ni" a lo ti nghat a.
"A va mak ve!"
"Ni e, a mak a ni!"
"Eng rilru nge i put phah?"
"Ka hrethiam lo"
Muanawma chu a han ngawi vang vang a. "Tun hmain, tualthahna thil ni ngeia rinhlelh si, finfiahna mumal awm loh avanga tih zuzi tâk chu a awm tawh em?"
"I huangtau mang'e!"
Muanawma chuan a han melh zauh a, "Ni e, ka huangtau takzet a ni; hriat ka duh tlat a ni!" a han ti ve ngat a.
"Hrilh duh lo ta che ila"
"Min hrilh dawn tlat a lawm"
An han ngawidun vang vang a. Chutah, SI Zodinsanga chu a nui ta hawk hawk a; chu veleh Muanawma pawh chu a nui chhuak ve ta a. Nidang aia inpawh zawkin an titi dun zui ta nghal a.
Muanawma ziaa mak leh ngainatawm ru riau chu; a nunah hun harsa tak tawng mek mah se, ngaihtuah tur tam tak nei mah se, han nuih hawk hawk emaw, mite'n an nel theihna tura han fiamthu bawrh bawrh emaw hi a hreh lem lova; a kum en aiin a hun leh a hmun a zirin a insiamrem thiam riau zel a ni. A harsatna tawn zozai khan a chher puitling zel mai bawk a. Hemi ni-a an inkawm tum pawh hian engkim inbe lawk sa a, inhmu an ni nghe nghe a ni.
SI Zodinsanga chuan, "Chuti ang chu, ka hriattheih chinah pahnih kan nei. Pakhat chu pa upa lam a ni a, kum 2009 a thleng a ni. Pakhat chu, hmeichhia, kum 28 mi vel a ni thung. Chu chu kum 2013 a thleng kha a ni" tiin chung 'case' pahnihte chu a tlangpui Muanawma hnenah chuan a han hrilh zawr zawr a. Muanawma chuan ngunthluk zet hian a lo ngaithla a. A sawi zawh chuan, a hmeichhia zawk chungchang chu a ngaihven ta riau mai a; mahse tun tumah hi chuan Rintei thìhna nen inzawmna nei thei mah se, kan sawi lang tawh meuh dawn rih lo a ni.
SI Zodinsanga nena an inkawm hnu chuan Muangchang lovin a haw zui nghal a. Anmahni ina haw lovin Rinteite inah a kal hmasa zet a. Haw kawnga a chhuidawnna vela a ngaihtuahnaa lo lut thil eng emaw chu a bawhzui dawn a ni.
Pa Rokhumate in a thlen chuan an lo awm ngei a. Mahse Muanawma chu, inchhunga lut ta mai lo chuan an kawmthlang lam, thlanglam kawngpui atanga kawt zawn kawngpui pan chhohna, Rintei pindan tukver hnuai maia kea kalna kawng vel chu a pan hmasa ta zawk. A han thleng thla a, a ding vang vang phawt a. Ngun zetin thil eng emaw ni chu a zawng ta a. A kun kât kât a; a thil zawn chu a hmu lo mai ang tih a hlauthawng hle a. Bang hrul phei hi chu Pa Rokhumate chhungkuain an tifai fo dawn lehnghal vei nen. Heti lai hmunah hian, a ma chemte ngei, Rintein a kawl sak tak, amah Rintei nghawng an zaina hmanrua ni zui ta, a chemte nalh leh mawi zet kha an lo chhar tawh a nih nghe nghe kha; chu chu a tir lamah khan kan sawi tawh a.
Muanawma chuan a thil zawn chu a hmu mai lo!
Pu Rokhûmate kawmthlang, Rintei pindan tukverh zâwn hnuai vel bawr chu ngun zetin a thlek kual a. A duh chu hmu mai lo mah se, zawn hmuh ngei a tum urh hle. "Thil awm lo zawn tum ang mai a lawm le; mahse a awm ngei tur a ni! Chuti ni lo se, Police report-ah a lang ang a, 'evidence' pawimawh tak a ni ngei ang. Heti lai velah hian a awm lo a nih chuan Rintei pindanah emaw khan a awm ngei tur a ni bawk. Khatah khan a awm reng fo si a" a ti rilru a. Ngun zawkin ke-a kal chhohna kawng sira hnimte chu a han keu leh sawt sawt a.
Ngun lehzuala 15minutes vel, hnim kar a keu leh kât kât hnu chuan, a mitmeng chu phur tih hriat zet hian a rawn de sawr sawr a. Hnim kar atang chuan, thil herhna(Screw-driver) fawng sen, plastic tha chi, han tihfaia lang fim sen deuh ral tur, thil kilhna, arsi landan anga kak herhna tura thir an vuah, tuiek khâwn bar tawh chu a han lek chhuak a. Lungawi âwm zet hian a han thlêk a, sarângah a khung a, "Ama pindana awm thin ngei kha a ni" a han ti zawi sap a.
A thil duh a zawn hmuh hnu chuan, Pu Rokhûmate ina lenglut turin hmel pangngai tak pu-in a chho a. Kawngka a han kik a, Lawmsangi'n a rawn hawng a, a lo phul hlut a. Muanawma chuan a hnar a han piai sak leh zauh a. Lawmsangi chu a ner nâng nâng a.
"I pa a awm em?"
"Awm" Lawmsangi chuan a ti hmak a.
Pu Rokhûmate nupa chu thutkhawmna pindanah an lo awm a. Muanawma chuan, phung pawh thlu mawihnai hran lem lovin biak lawk a duh thu Pu Rokhûma hnenah chuan a han sawi a. Ani chuan Muanawma hmel leh mitmeng a han en a; a pawimawh ang tih a ring thiam nghal a ni ngei ang, engmah pawh zawt lovin a lehkha chhiarna pindan lama kal turin a han ti a. An inzui lut ta a ni.
Muanawma chu Pu Rokhûma lehkha chhiarna pindana a luh dawn chuan a han ding leh rih a. Pi Remi hnenah chuan, "Nu Rem, hmana in Screw-driver fawng sen kha min lo hawh tir teh aw!"
"E! A bona a rei tawh a lawm..." tiin Pi Remi chuan a lo chhang thuai a.
Muanawma chuan, "Han hawh lawk ka duh a sin le" a han ti a.
Pi Remi hian inchhûng a vawngfelin, an bungrua a hrechiang thin hle a. Muanawma chuan a thusawi chu a rintlak ang tih a hria. Nu fel tak a ni reng a ni.
Pi Remi chuan, "Âw...a dang a awm tawh tho a sin" a han ti leh vat a.
"Awle...nakkinah" tiin Muanawma chuan a luhsan ta daih a.
Pu Rokhûma lehkha chhiarna pindanah chuan rei fê an inkâwm a. Muanawma chuan Pu Rokhûma pa, MNA-a a tan lai chungchang a han sawichhuak hmasa ber a; chu chu a dik reng em tih a han zawt zui nghal a. Pu Rokhûma chuan mak tiâwm deuh hmel hian Muanawma chu a han en a. Chu chu engtia hria nge a nih a han zawt let veleh chhawng a. Muanawma chuan a thil hriat leh hmuh a chhuidawnna atanga a rilru-a ngaihruatna lo awm, a dik leh dik loh hriatchian duha zawt mai a nih thû-in a lo chhang a.
"A dik a lawm...mahse rambuai laia a chanchin hi ka pa khan tih lansarh a duh lo hle niin ka hria; a inthup hram hram thin a sin! Chuti a nih avang chuan kei pawh hian ka sawichhuak ngai lova, ka nupui leh ka fate pawhin a sawi ngai hek lo. Engtin nge i hriat a, i sawichhuah theih zawk le...?" tiin Pu Rokhûma chuan Muanawma chu a han en vang vang a.
Muanawma chuan Pu Rokhûma'n a endan chu pawisa duh lovin, "A nih leh, a damlaia amah chauhina a hriat tur chi thil eng emaw a hnutchhiah che em?" tiin a han zawt a.
Pu Rokhuma chuan, "Chulam kan sawi hma chuan- engvanga ka pa chanchin chu ngaihven nge i nih? Mami thihna nen a inzawm em ni?" a han ti leh a.
Muanawma chu a han ngawi vang vang a, a thil hriat leh hmuhte atanga a thinlungin a rindan chu sawi mai a tha-in a hre ta zawk a. "Ka rindan mai phei chu a ni a..." a han ti tete a. "Misualin an bitum kha Rintei a ni lo! Nangmah hi a ni an bitum che! A tir chuan i pa kha a ni zawk nghe nghe; Rintei kha chu tum lawk loha thah a ni!" a han tihzawm a.
Pu Rokhûma makti chuan Muanawma chu chiang zetin a han en a, "Keimah hi maw!?" a han ti hû a!
"Aw. Nangmah hi!"
"Engtia ring nge i nih?"
"1995 kuma i pa boral dan, mak i tih thû i sawi kha ka la hre reng a sin"
"Tichuan...?"
"Ka thil hmuh leh hriatte nen ka chhuidawn zawm chho ta a, a dik ngei ang"
Pu Rokhûma chu a ngawi ta vang vang a. A inthlahdul a, muang dam dap hian, "Nangin i rin tlat si chuan...Muana, ka fapa ang maiin ka en thin che a; ka ringtawk a che" a han ti a.
"Chuvang chu a ni, i pa khan mimal thil deuh tak hnutchhiah che a neih leh neih loh ka zawh che" Muanawma chuan a han ti leh a.
"Ka pa thil min hnutchhiah hi ka lo ngaihven lutuk ngai lova, a pindanah thingrem pakhat chu a awm a. Ka hawng tawh nghe nghe a, lehkhabu leh file eng emaw chu a awm awm e. Thil khawih danglam zung zung mi ka ni lem lova, a ngai angin a la awm ngei ang. Duh bik deuh i nei em? I sawi mai thei em?" Pu Rokhûma chuan a han ti a.
"Keimah ngeiin chu thingrem chu hai ka duh! Rem min tihsak rawh" tiin Muanawma chu a mitmeng leh chetzia Pu Rokhûma lakah a ngengawl hle mai.
Muanawma chu, Pu Rokhûma chuan a mitah tak a han en a, "Aw le" a ti ta a!
Pu Liannghawrate nupa pindan ni thinah chuan an inzui lut ta a. Chu pindan chu, luah hnûm a ni tawh lo tih a hriat theih mai; mahse a balin a hnawk hran lem lo. Bungrua eng eng emaw an dah nual a; bungruate chu fel tak leh awmze nei taka rem an ni thung. Chhungpuinu zia a lang thei! Pu Rokhûma chuan pindan kilkhat chu a pan ding nghal a, chuta thingrem pakhat, tala lian vak lova kalh chu a han kawk a.
"Hei hi a nih hi..." a han ti ringawt a.
Tala chu a chahbi ken chuan a han hawlh rak rak a, thingrem chu a han hawng ta a. A chhûngah chuan lehkhabu leh 'file' eng emaw zat a awm a, lehkhapuan tla-hlanga thuziak chilh khawmte, kut ngeia ziak thuziakte chu a chunglângah mai chuan a hmuh theih nghal nghe nghe a.
Pu Rokhûma chu Muanawma lam hawiin a han inher a, "Ka pa khan, he'ng lehkhabu leh lehkha ziakte hi a roh hle a. Heti ang lam hi ngaihven tehchiam lo mah ila, ka pain a ngaihhlutna kha ka zah sak a, tun thleng hian ka la vawng tha a ni" a han ti a.
Muanawma chuan, "Ka pa Khûm, tunhmâ, i pa damlai emaw, a boral hnu emaw hian, in in-a rawn luhruk tum an awm tawh em?" tiin a han zawt a.
Pu Rokhûma chuan, "Ka hriat theih chinah chuan chuti ang chu a la awm lo tawp mai!"
"Hnuhma danglam deuh pawh maw...? Ka tih awmzia chu, he pindanah hian...?"
"Aw, awm miah lo!"
"A mak zawk hle mai!"
"Mahse..." tiin Pu Rokhûma chu a han maimi'chhing vang vang a.
Muanawma chuan, "Mahse...engtin maw?" a lo tivat a.
"Ka pa boral hnu khan, ka hriat ngai mi pawh la ni lo nula pakhat, kan khawhar min hnema rawn leng rei fal riau chu a awm tak" a han ti a. "Ka pa pindan hi hmun pawimawh, thil pawimawh dahna niin i ring tihna em ni?" tiin zawhna a han zawt leh rih a.
Muanawma chuan, "Chu chiah chu..." tih chauhin a lo chhang a.
"Chuti a nih zawngin he pindan nena inkaihhnawih, thil thleng hotê chanchin chu i hre duh ngei ang chu maw?"
"Hre duh tehreng mai" Muanawma chuan a lo ti mai a. A bula khum ruakah chuan thuthmun remin a han inkuangkuah nghal at a, a tawng ngaichângin Pu Rokhuma chu a melh ta ran a.
"Chu nula chuan, tlangval pakhat, mi ang mang lo, tawng pawh tawngfiah mumal thei lo hi a rawn hruai ve deuh ziah a. Chu tlangval chu ven hautak zet mai a ni. Inchhung hmun hrang hrang hi a fangkual zung zung a, han hauh vak hleihtheih a ni thin si lova, a buaithlak thin khawp mai! A rawn hruaitu chuan a unaupa a nih thu a sawi a; kha hmeichhia kha nula mak pawl tak a ni âwm e a. Amah chu, mihlim an tih ang lampang chi hi a nih hmel a. Amah nen chuan thutkhawmna pindanah Pathian thu sawiin kan titi fova, titi lah chu a ngah zêk a, a phûl hlut thin. Chutia kan inkawm lai chuan a unaupa chuan inchhûng hmuntin hmuntang chu a lo fang kual a; vanneihthlak takin eng pawi mah a khawih kan hre ngai lo thung. Tumkhat chu, tlai dar thum velah ka haw a, chu nula chu kan in-ah lo awm a. I nu Remi nen hian thutkhawmna pindanah an lo titi tui ngang mai a. An bulah chuan tlangvala kha a awm lo tih ka hre thei nghal a. "A teihawi leh pek a ni maw" ti rilru chungin ka nui suk a. Ka pa pindanah thil pawimawh lak lawk ka ngaih avangin, ka han lut a. Ka pa pindan kawngkhar chu a lo kau deuh a. Kan kalh ziah thin a, i nu Remi a lût anga, a kalh leh theihngilh a nih ringin, engmah ngaihtuah zui lem lo chuan ka han lut a. Tlangvala chu a lo awm reng mai. Ka pa thingrem kalhna tala hi a lo khawih ri ruk ruk a, ka han lut chu a phu zuk a, a rak ta ruai ruai mai a. Mak ka ti ang reng viau a; a unaunu chu a rawn tlan vat a, i nu Remi pawhin a rawn zui ve nghal bawk. A unaunu chuan thuphâ a chawi ta mawlh mawlh mai a. A hmel chu a khawngaihthlala ta riau a, a zia kha a mak reuh hle a ni! Mahse, kan ina rawn chuankai chu an thulh chuang hlei lova. Chumi hnu chuan, kha tlangval, mi ang pha zân lo kha ka pa pindan vela a tawi hrut hrut lai, vawithum vel ka nang leh nghe bawk. Khang lai khan han rinhlelh nachang ka hre hran lova; mahse i han sawi hmangin thil awm thei nithei chu, ngaihruat thiamin ka inhria" Pu Rokhûma chuan a han ti a.
Muanawma chu hnual deuh sawt hmel hian a han lang a; engmah phei chu a sawi lo. Pu Rokhûma bawk chu a han tawng leh a.
"Muana, hei ka pa thingrem chu ka hawng tawh a, han envel ta che; mahse heta mi, eng thil pawh i lâk dawn chuan, min hriattir a ni ang chu" a han ti leh a.
Muanawma chuan, "Engpawh nise, midangin min la hawn khalh lo turah ngai ang!" a han ti ve thung a.
Pu Rokhûma chuan a chhuahsan a, a chhuah hnu pawh chuan thingrem chhûnga lehkhabu chu en mai lovin Muanawma chuan thingrem chu a han chhin leh tete a! A kalhna tala kua vel chu uluk zetin a han en a, a thaw hak a, a lawm loh hmel hle mai! Thingrem chu a han hawng leh a, a chhûnga lehkhabu, lehkha leh 'file' te chu a han thliar tan ta a. Eng'e a zawn tih, a hriat bik loh avangin a lâk hmasak apiang chu en liam mai lovin a en ngun viau zel a. A duh tak chu hmuh a duh tih, a uluk dan atang chuan a chiang viau mai bawk.
Chhuatlaiah chuan a thu sawp nuaih a, lehkhabu leh lehkha chu thliar pahin a bih thuak thuak zel a. 'File' pakhat chu a han phelh a, a chhûnga lehkha, kutziaka dah chu a mal malin a han thliar zung zung a- "Pu Liannghawra chu a chengvawng awm hle mai" tiin a han phun sap a. Chutah, lehkha pakhat, kutziak mawi lem lo taka ziah, a thupuia,"MIDANG CHUNGA RORELTU NIA INNGAITE CHUNGCHANGA THUDIK CHU!" tia dah chuan Muanawma mit a la ta hle a.
"A thupui vuah duh dan kher kher chu a mak hle mai!" a han ti leh sap a. Tukverh êng lam a pan a, a insiamrem sauh sauh a, muangchangin a chhiar tan ta a.
Chu kutziak lehkha chu chilhkhawm a ni; a thubul chu- "Rorelna fawng vuantu tur nia inngaite dik lohna chu ka hrechhuak ta. Kei, Liannghawra hian an dik lohna ka hailana ka sawisel tãk avangin an zing ata ka kal hrang ta ani!" ti hian a intan a.
Muanawma chuan a chhhiar zel a; chutia a chhiarlai chuan thutkhawmna pindan lam atangin Pi Remtluangi chuan a rawn au tuar tuar a. A thil chhiarlai ata a hawichhuak phawk hra a. Pi Remi aw chu mangang awrawl a ni tlat mai!
A awmna pindan kawngka chu a rawn inhawng rirawk a, Lawmsangi chu thlaphan hmel em em hian a rawn lût a, a thaw huam huam a, reilotê chu tawngchhuak lawk thei lovin a kha a chih a. A lo tlanluh phat atang khan, Muanawma chuan thil eng emaw a thleng a nih a ring thiam nghal a. Lawmsangi tawngchhuah theih hmâ-in hmanhmawh leh fimkhur tak si hian thingremah chuan lehkhabu, lehkha ziak leh 'files' chu a rem tha zung zung a, Tala chuan a han kalh leh ta chiah a. A thil chhiar lai erawh kha chu a ak tha nghal daih thung!
Muanawma chuan, "Lawmte, eng'e ni ta a!? I va hlauhthawn hmel ve!?" a han ti a.
"Ka...ka...ka...pa-in engmah a hre lo...a...a...a...a...biak theih loh!"
Muanawma chuan a darah a han vuan a, pindan atang chuan hmanhmawh takin a chhuahpui ta nghal a, rangtakin pindan chu a khar a, a ding dat a- "He pindan kalhna chahbi hi i pa ipteah a awm ang, zuk la la, rawn chho lehnghal la, tha takin kalh ang che" a han ti a.
Lawmsangi chu hmanhmawh taka tlanin chahbi chu a va la a. A lo lêt leh hnû-ah chauh Muanawma chu a kal a.
Pi Remi chuan an mut pindan lamah thawm ri dawp a hria a. A va luh chuan a pasal chu chhuatah a lo tlusawp reng mai a ni. A han ko a, a chhang ta hauh lova, biak a hre lo nge a hriat loh! Muanawma a va luh ve lai pawh chuan Pu Rokhûma chu chhuatah a lo la mu reng a, a lo then ngawt ngawt mai a.
Muanawma chuan rang takin khumah a hlang chho a, a taksa hmun hrang hrang a han dap ngial pawhin pawnlamah na lai âwmang a hmu hauh lo; mahse na em em tuar tih hriat tak mai hian a then ngawt ngawt mai si! Hriatthiam a har ta tlat mai! Damdawi lam leh natna lampanga thiamna nei a ni lova, engtia han tih tur nge a hre lo!
Mahse, thaa a hriat dan anga a chet mai a ngai dawn a ni. A nau Siama a 'call' nghal vat a, a rang thei ang bera motor nena thleng phei vat turin a han hrilh a. An inbiak zawh chuan Pu Rokhûma hmel chu a han en a; ngaihthatthlak loh khawpin hmuh a hrehawm! A mar chu a han enfiah a, a mumal lo riau mai! Chutah, Lawmsangi hnenah chuan puan nem leh tuivawt la turin a han ti a, ani chuan a rawn la vat a. Pi Remi hnenah chuan Pu Rokhûma chal vel chu dep turin a han ti a. A pang chu a sa vur a, a sen tul hian a hriat tlat a ni!
Muanawma chuan mut pindan banga sana intar chu a han en a; a nghaktu tan chuan a rei sam viau thin reng a ni. Rei vak lo an indeh hnu chuan Siama chu a rawn thleng ta a, hmanhmawh zetin Aizawl lam an pan ta nghal a ni. A hmanhmawhthlak a, a ngaihthatthlak hek lo. Muanawma chuan a khalh chak viau reng a ni; a fimkhurna thinlung erawh a thlahdul hauh love.
Aizawl Civil Hospital an han thleng a, an lo 'admit' nghal a, Doctor-in a dinhmun a han enfiah vat a, chumi hnû-ah ICU-ah an dah lut ta hial nghe nghe a ni. Thil tul zualpui an han buaipui zawh chuan, Muanawma chuan Pi Remtluangi chu a han kai hrang a, thil eng emaw hi a hrilh mawlh mawlh a. Muanawma'n eng emaw a sawi lai chuan a lo bu nghoh nghoh a. Hrethiam tih hriat zet hian a han en a. Muanawma chuan a rang lama haw-a Pu Rokhûmate ina riah a tum a ni; chhan tha tak avanga riah chu tum a ni tlat.
Muangchang khawtlai lovin a haw ta nghal a, fimkhur leh chak tak siin a tlan par par a. Hmanhmawh chhan a nei tlat a ni. Lehkha ziak chhiar tura tukverh êng lam a pan khan, tukverh pawn lam chu a han melh zawk a. Pu Rokhumate kawmthlang kawngpui sirah, Bike bula mipakhat ding, ama awmna pindan lam rawn en vang vang kha a hmu tlat a ni. Chuvang a ni a, khati ang thil hmanhmawhthlakah pawh kha pindan kalh kha a ngaihpawimawh em em ni. Heti ang dinhmunah hi chuan thleng thei lova ngaih hi a thleng thei tlat zel. Khawvela lawng lar, TITANIC pawh kha chhe thei lo tura ngaih a ni; a zinkawng vawikhat zawhna zawh tluan lovin a chhe tlat si!
An veng a thlen chuan Pu Rokhûmate in a panding nghal a. Inchhûnga lut mai lovin thawm a awm leh awm loh a han ngaichang hmasa phawt a. Thawm danglam a hre hauh lo mai!
Dar 10:30pm chiah a ni a.
Thawm hre lo mah se, Muanawma chu a la lût duh ta chuang lo. Muangchang leh fimkhur em emin Pu Rokhûmate in chu a han hêl chhuak leh phawt a, chumi hnû-ah kawngka kalhna chu uluk takin a han enfiah leh a; a rin ang hehû chuan thil danglam a thleng lo niin a lang. Je-a in lam panin a kal leh ta nghal a! Hetia, a thianpa in a pan leh kherna chhan hi, engmah hrilh lova riahbo san thaa a hriat loh mai bakah, chhan tha tak dang a awm a ni. Zanrei lam a ni tawh na-a, Je-a chu a la meng ngeiin a ring tlat a; a mengrei fo châwk tlat a ni!
A thlen phei chuan dar 10:47 vel a ni tawh. Inchhûng chu a lo thim thuap a, mak tak maiin kawngkharpui chu a lo inhawng huau thung si! Muanawma chu inchhûngah a han pen lut a, thawm riva reng reng hriat tur a awm lo! Ring vak lo, fiah tak siin a thianpa chu a han au a; tumahin an chhang lo! An pahniha an mutna thin, Je-a pindan chu a han pan a; chutihlai chuan a tirila tham er ertu eng emaw a awm a ni ngei ang; Muanawma chu chhûngrilah a tim ru er er a, a hmulthi a ding sang sang hial a ni! Amah pawhin mak a ti viau mai! Karen tiêng turin a han lêt leh tete a.
Muanawma hi mi dawihzep tak a ni lem lova; amaherawh chu, Rintei boral lai bawr leh, a lusûn hlimchhawn lai khan, 'Anxiety' leh 'Depression' khan a tlakbuak nasa a, a chiai hmâ-in, ho tetea phut zuk zuk a ching hle; mahse enkawlna tha tak a dawng a, tunhnu hian ngai a lo awh leh tawh a. Zanina a awmdan erawh mak a inti rilru hle mai. A chhan lah a hre hauh si lova! Karen chu a han tiêng a, Je-a nena an mutna pindan chu a han pan leh a; tumah an awm lo! Karen tiêng pah zelin inchhûng pindan chu a han enkual zel a; tumah an awm chuang lo! Khaw'nge a thianpa chu a awm tak ang!? A han ngaihtuah a- thlanmual lamah a kal a nih a ring ta ber a. "Ani hi, eng'e a tih ang?" tih zawhna chu a thinlungah a lo lang zawk a.
Pâwnah chhuakin kawngka a khar tha a, thlanmual lam panin a kal ve ta nghal a. A hmanhmawh fê mai. Thlanmual a thlen phei hma deuh chuan phun bul bul thawm a hre ta tlat a. A ding dat a, khawilam nge tih hriat tumin a beng a han chhi a; thlanmual sir veilam niin a hria a, thlanmual bul lawka hmun fai lai pawh kha a ni thei bawk. Thawmdim leh fimkhur takin thawm awmna lam chu a pan ta hriau hriau a, saron pangpar buk phen atang hian mi pahnih ruangam hi, chiang lo ruaiin a va hmu thei ta a; an awma a rinna hnuhnung zawk kha a dik a ni tih a hre thei nghal bawk.
Chu'ng mi pahnihte awmna chu a fai zau deuh avangin chiangtaka an tawng hre thei tur erawh chuan a hnaih thei lo. Pawi a ti hle a; tun ang zanrei tawha thlanmuala mi pahnih, rui lo hai lova inbe ru sur sur chuan, thil tha tih tur an phiar lo tawp ang tih chu chiangin a hre nasa mai si a! Chumite pahnih ruangam chu ngun taka a han enin, a tu-a-mah chu Je-a an ni lo tih a hria. Chumite chetla chu a thlir ta reng a, an tawng a hrechiang mumal thei lo chu a run ngang mai! Thliin a rawn beng fuh châng erawh chuan an tawng chu chhum bung zet zetin a hre thei a.
"...zin turin..."
"Hotupa.............mipakhat...."
"......a vil deuh tlat mai...."
"......a hlawhtling khat...........damdawi inah...."
An tawng chu a hre chhumbung deuh mah mah chu a ni e. Darkar chanve vel zet an tawng bul bul hnu chuan khawchhûng panin chumite pahnih chu an kal ta a. An kal hnu chuan Muanawma chu chechâng lovin minute 15 vel a han awm leh phawt a, a awmhmun atang chuan a chechhuak ve ta chauh a. An dinna hmun chu a han pan a, sikret zuk bung a awm ram a, pakhat chu a han chhar zauh a, a ding vang vang a, Je-a chu a pa thlanah a awm lo tih a chian hnu chuan khawchhûng lam panin a kal ve leh ta a ni.
Je-a chu a lo awm tawh a, a mut pindanah sikret zuin a lo si vang vang a, a lo mu zangthal ar ar a.
"Khawng'e i kal a; i lo awm lo va. A thim vek a, kawngka i khar bawk si lo?"
"Ka teihawi mai mai maw le; chu min zawng elo?"
"Zawng e maw le..."
"Thlanmual lamah a ni ang maw?"
"Ni chiang e...engati nge?"
"Eng dang love; ka pa thlana ka kal apiangin min zui i tum ziah a lawm" tiin Je-a chu a nui suk suk a.
Muanawma chu a nui ve mai a. "Zanin chu ka rawn riak dawn lo..." a han ti a.
"Ngati maw?"
"Kan ina riah lawk a tul" tiin Muanawma chuan dawt a han sawi a.
Je-a chu a han ngawi ta vang vang a, "Thianpa, rawn riak duh tawh lo mai rawh..." a han ti a.
"Engvangin maw?" Muanawma chuan a han ti ve thung a.
Rei fê a ngawih hnû-ah Je-a chuan, "Muana, ka zin dawn...eng emaw chen chu ka zinbo dawn..." a ti a. A mitmeng chu lungngai awm deuh hian a lang a. Khawhar hmel zet hian a lang tlat!
Muanawma chu a han ang zuau a; mahse a ngaihtuahnaa awm chu sawichhuak lovin a ngawihpui ta zawk a. "A tha a lawm, engmah ka zawt lo vang che!" a han ti thung a.
"Muana, engkim i hre vek tih ka hria..."
Muanawma chuan mak tih hmel deuh tak hian a thianpa chu a han en a, "Eng'e i sawi awmzia!?" a han ti a.
"Nang hi chuan, kawng engkimah min hrethiam em em zel tih ka hria a ni" tiin Je-a chuan a lo chhang a. "Min ngaìhtuah avangin ka lawm e..." a han tihzawm leh a.
Muanawma chuan, "A ho lutuk..." a lo ti satliah a. "Khawiah nge i zin ang, flight-in em ni?" tiin a zawt zui a.
"Phâiah...aw, flight-in..."
Muanawma chuan a thianpa hmel chu a han en a, a mitmeng chu sen deuh ram hian a hria a. Thinur hmel ni tlatin a lang!
"Je-a, i tha maw!?"
A lo hawichhuak a, Muanawma chu a rawn en vang vang a. "Ka tha e. Heta i riah dawn loh chuan va mu tawh rawh, haw tawh rawh; mahniaa awm lawk ka duh khawp mai" a han ti a.
Muanawma chuan a thianpa chu a han en leh vang vang a; be leh tawh lovin, ngawi rengin, muangchangin a chhuahsan ta a. A thinlung delhtu a ngaihtuahna rit tak nen chuan a pen chhat chhat a, Pu Rokhûmate in lam a pan ta a ni. A thlen chuan, Pi Remtluangi'n a pêk, chahbi a phawrh a, tala chu herh hawngin inchhûngah a lut a. Karen a tihên vek hnû-ah, Pu Liannghawra pindan ni thin lam chu a panding leh ta nghal a. A lût a, thingrem kha a hawng a, hmanhmawh lo takin, lehkhabu, 'files' leh, kutziaka dah lehkha ziakte chu thliarin a en tan leh ta malh malh a.
A zavaia enchhuah nan hun a duh rei viau mai a. Thingrem chhûnga thil awmte phawrha, a mal mala a en vek hnu chuan, a thil duh pahnih chiah a hmu a. A pahnih chuan Pu Liannghawra'n kutziaka a dah ve ve an ni. Pakhat chu, a hmaa a iptea a ah that tâk kha a ni a. Pakhat leh chu, Baladesh ramchhung, Mizoram nena an inrina hnaih lam, Changpui Tlangdung, ngaw chhah zet hnuaia thil thleng eng emaw chanchin ziahna a ni a.
Muanawma chuan a han chhiarchhuak dap a, a chhiarchhuah zawhah, a hmaa a ah that tawh, Pu Rokhûma a damloh tâk thut avanga a chhiar zawh hman loh chu a han chhiarchhuak leh dap a. Chu'ng kutziak lehkha pahnihte chu a thlek tawn ta chhen a. Uluk lehzualin a han chhiarchhuak nawn leh ve ve a. Chutah, pakhat zawk chu, thingrema lehkhabu leh 'files' a dahluh hnu, Pu Liannghawra kutziak lehkha dangte a dahluh leh hnu chuan, pawnlang tak, hmuh mai awlsam tak turah chuan a han dah lui ngat a! A hmaa a lo ah that tawh sa zawk erawh kha chu uluk zetin a thlep tha a, a ipteah chuan a ak leh ta hmak thung a ni. Thingrem chu a han kalh tha leh thlap a, a dingchhuak a, a han zi mar tiah tiah a; khua chu a lo var tan tawh a.
* * * * * * *
"THLALER CHU DILAH A CHANTIR ṬHIN A, RAMRO CHU TUIHNAAH TE A CHANTIR BAWK ṬHIN" - Sam 107:35