THE MEMOIRS OF SHERLOCK HOLMES -II (COMPLETED)

Hnuchhuina lampang chi ho
Rozami pachuau
Posts: 305
Joined: March 17th, 2018, 7:40 pm

THE MEMOIRS OF SHERLOCK HOLMES -II (COMPLETED)

Unread post by Rozami pachuau » July 23rd, 2018, 8:22 pm

SHERLOCK HOLMES
THE MUSGRAVE RITUAL
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Ka ṭhianpa Sherlock Holmes-a chungchânga mak ka tih reh hleih theih loh chu hei hi a ni. Incheina thu-hlaah chuan pa induang nalh thei leh duh uluk ber ber zingah pawh hian a zahpuiawm hauh lo va; mahsela, pindan luahpui atan chuan mi che hnawkhnai thei leh ṭhiante tana hahthlâk thei ang bera khawsak peih ber pawl a ni hial ang.

Chutia ka han tih avang mai chuan pa chekngel leh firfiak tak ka ni e tihna a ni hauh lo. A dik a dik chuan Afghanistan indona lama ka lo tei ve hrep tawh avang leh Holmes-a nena kan lo chen dun hrep avangin pa sehhel ber ber zinga chhiar theih ka ni hial ta ve ang. Mahse, mahse, ka han ti hram teh ang, tlin loh chin hi hetiang kawngah hi chuan ka nei tlat a.

Lungalhthei chhawpna bawma meizial bung hnutchhiah nghal mai, Slipper bun lai chunga kuaitê hnutchhiah chîng tak, lehkhathawn lo thleng, chhan hman rih loh chu dah ṭha peih mang si lova chhuar langsar laia chem-te a kilh beh ching kianga han awm chuan eng mah ni lo mah ila, in chhung vawn fel thu hlaah hi chuan ka induh ve lek lek ṭhin.

Keia ngaih dan ve mai mai chuan puakruk kah te pawh hi pawn lama zir chi tak niin ka hria a; mahse, Holmes-a erawh chuan a ṭhutthleng bulah puakruk mu a inchhawp a, pindan bang lehlamah chuan V. R tih te hi puakruk mu in a va ziak ta ṭhin a. Chutianga puakruk hnu-hma vel chuan in chhung a cheimawi meuh pawhin ka hre pek ṭhin lo.

Kan pindan inluah ṭâwm chu damdawi bawlhlo eng eng emaw hian a khat nuai a. Hmun tin hmun tangah damdawi bawlhlo hnu-hma hmuh tur a awm a. A châng phei chuan a damdawi enchhinna bawlhlo chu ka saum dahna thlengah te a lo vak lut thul nen.

Chung zawng aia ka tuar theih loh chu a lehkha thehthang fimkhur lo mawlh chu a ni. A thil buaipui tawh chanchin ziahna reng reng chu tih riral a phal miah lo va, a awm awmin a awm niai nuai mai a. Kum khat chhungin vawi hnih khat hi thapui thawhin a'n rem fel a, a dahna turah a'n dah fel thlap a. Hetiang thu hi chu Holmes-a nena kan chanchin ka ziahna hmun dangahte pawh in lo hmu tawh ngei ang.

Thil harsa tak mai a'n chhui a, hlawhtling takin a zo va, amah fakna thang ri a fawn vel meuh hi chuan ani chu ṭhutthlengah a ṭhu zawi reng a, chet pawh che peih mang lovin a meng viat viat peih chauh tawh ṭhin. Ṭhutthlengah a ṭhu a, a violin chu a tum a, chaw ei a hun a, chawei dawhkan a ban ṭâwk a, a violin bawk a kuah leh a, a mu a; chuti reng reng chuan a khawsa a.

Thla khat chhung chu in thian fai hlei lovin kan han awm a, a lehkha chhia pawhin a thleng ril hle a. Chutah thla dang a ral leh a, a lehkha chhia chuan awm lohna aram a nei tawh lo va, a tawpah phei chuan a tel hian pindan kilah chuan a invawm hlawm tel tul a. Chung lehkha chu ani chauh lo chuan kan tiriral thiang miah lo. Eng thil pawh ni rawh se, a thu lo chuan lehkha reng reng tihral theih a ni lo.

Thlasik lai a ni a, zan khat chu thuk mei aiin kan ṭhu dun ran a. A lehkha tlahlang a dah ṭhat lai chuan darkar hnih chhung emaw tal chu han buai zui se kan pindan chu hnawkhnai lutuk lovin kan siam thei ang a, hmuh tlak ve deuhin a in dah fel theih ang tiin ka hrilh a. Ka thu sawi chu a dik chiah tih a hria a, ngawi rengin a pindan chhungah chuan a lut a, rei lo teah a lo chhuak leh a, rangva thingrem lian tawk fe mai hi a rawn kuah chhuak a.

Chu thingrem chu chhuatah a hung tawrh a, a bulah chuan ṭhutthleng a hung a, thingrem chhin chu a hawng ta a. Chu thingrem chu lehkha tel khawm hian hmun thuma ṭhena hmun khat zet chu a lo luah a. Holmes-a chuan a'n melh a, "Watson, hetah hian thubuai ṭhahnem tham tak mai ka chin dan chanchin ziahna a awm asin. He thingrem chhunga awm zawng zawng hi eng nge a nih hre ta vek la chuan he thingrem hi lehkha danga vawm belh tawh lovin a awm sa hi la chhuak turin min duh ngei ka ring," a ti a.

Kei chuan, "Heng hi tun hmaa i thubuai beih tawh chanchin a ni hlawm ang maw? Hetiang hna lama kut i thlakna hmasa chanchin a nih ka ring. Heng hi hmuh theih ni sela hmuh ka chak viau tawh ṭhin asin," ka ti a. Ani chuan, "Ni e, heng thil hi chu ka chanchin ziaktu leh mipui hmaa min chawimawituin min chawimawi hma huna thil lo thleng chanchin a ni," a ti a. Lehkha tel vel chu duat deuh awm mai hian a'n chul hauh hauh a.

Chutah, "Watson, heta thil awm hi ka hlawhtlinna chanchin ziahna vek a ni hauh hlei nem. Ṭhenkhat hi chu khirhkhan hlawm tak mai asin. Hei hi Tarleton-a inthahna chungchang a ni a, hei hi Vamberry-a thubuai a ni ve thung a. Vamberry-a chu zu zuar mai mai zu nia. Hei ve thung hi chu Russia hmeichhe chanchin a ni a, hei hi kebaiin an hman ṭhin inhawlh kalhna tiang, rangva nem chia siam chanchin a ni ve thung a. Hetah hian Ricolletti-a chanchin leh a nupui tawrhhlelhawm tak mai chanchin pawh a chuang kim biai asin. Hei ve chuh.. ah.. a danglam asin" tih pahin thingrem mawng chu a zuk zen ngar ngar a.

Thingrem mawng aṭang chuan thinga siam, thingrem tê tak tê hi a rawn phawrh a. Chu thingrem chhìn chu a tawlh hawng chi hi a ni nghe nghe a. Chu thingrem tê tak tê chhung aṭang chuan lehkha zawr angreng tak hi a rawn phawrh a, dar chahbi hlui tak pakhat hi a tel a; chu mai ni lovin thing suih mum pakhat hi a rawn phawrh tel a, chu a thingah chuan thil mum hi hruiin a inkhai nel nel a. Chu lo pawh thir thleng hlui tak tak pathum a la rawn phawrh tel cheu mai.

Chung thil ka'n hmuh chuan mak ti hmel ka lo pu deuh a ni ngei ang, Holmes chuan nui chungin min han melh a. Ka hnenah chuan, "Ka nau, heng thil hi eng angin nge i ngaih?" a ti a. Kei chuan, "A la khawmtu chuan a duh àwm kher mai" ka lo ti a. Ani chuan, "Teh reng mai. Hetiang thil kaihhnawih thei chanchin dangte chu han hre leh lek phei la chuan a mak i la ti lehzual ngeiin ka ring," a ti a. Kei chuan, "Heng thil hian chanchin a nei a ni maw?" ka lo ti a.

Ani chuan, "Chanchin an nei chu a ni mai ang chu," a ti a. Kei chuan, "Chu, eng nge i sawi awmzia chu ni ta?" ka ti a. Sherlock Holmes chuan thingrem chhung aṭanga thil mak tak tak a rawn phawrh chhuah chu a mal malin a la a, dawhkan tlangah chuan a dah a. Chutah a ṭhutna ngaiah chuan lungawi hmel pu tak mai hian a'n ṭhu leh te te a. "Heng thil chauh hi Musgrave Ritual min hriat chhuahtir tura eng ilo ka kawl chhun chu an ni ta," a ti a.

Chu hming chu a sawi ka hre tawh ṭhin; mahse, chanchin kimchang chu ka la hre ngai lo. A hnenah chuan, "Thil awm dan min hrilh duh chuan ka lawm ngawt ang," ka ti a. Holmes chuan, "Watson, in chhung vawn fel i tumna chuan he thilah hi chuan a ṭha lam a kawk thei dawn hlek lo a nia. Mahse, he thil hi chu i lehkhabu-ah chuan ziak ve ngei la ka duh a ni.

"A chhan chu, he thil hian he khawvel suahsualna avanga eng ilo chhui chhuahna kawngah pawimawhna a nei ngeiin ka ring a; pawimawhna a nei lo a nih palh hlauh pawhin ngaihnawm nih tal zawng khawi ramah pawh a hlawh vein ka ring tlat a ni. Ka thil tih leh ka hnathawh chhuanawm loh tak tak chanchin hi he chanchin tel lo hi chuan a famkim thei ngai dawn lo. He chanchin hi chu chanchin mak danglam tak a ni tlat a ni.

"Gloria Scott chungchang kha i la hre rengin ka ring a, khata ṭang khan tuna ka hna khawih lai ang chi hi ka thawk ṭan ta a ni tia ka hrilh che pawh kha i la hre rengin ka ring bawk. Tunah hi chuan hetiang lamah hi chuan ka hming hian hriat a lo hlawh ve ta a, sawrkar leh kar lem lo pawh an rinhlelhna thai bo thei hial tur khawpin min ràwn an ching ve ta.

"Nang nena kan inhriat hlim, 'Study in Scarlet' tih angreng ka buaipui lai pawh khan hetiang lam hna hi chu ka lo khawih fe tawh a; mahse, chutih lai chuan ka thiam a la bel teh chiam lo. Hetiang lam hna hi ka thawh tirh chuan a harsa ka ti thei ṭhinin, hlawhtlinna rah seng turin chhel takin ka nghak ve ṭhin a ni tih pawh i hre kher lo vang.

"London ka lo luh tirh chuan British museum bul, Montague street-ah ka awm a, hun awl ka ngah theih em avangin ka hnathawhna lama min pui thei tur, Science lampang hi ka zir vak mai a. Science peng hrang hrang hi ka zir nasa hle a ni. Chutih laia ka hna hmuh chhunte chu college-a ka kal laia ka ṭhiante min hmuhsak deuh vek a ni hial ta ve ang.

"A chhan chu College-a ka luh kum tawp chuan ka chanchin leh ka thil tih dan hmang vel hi kan college-ah chuan titi a tling tawh tlat a ni. Chutih lai vela ka hna hmuh zinga a pathumna chu he Musgrave Ritual chungthu hi a ni a. A mak danglam em avangin a ngaihnawm ve hranpa a, tuna ka dinhmun thleng thei tura min hlangkaitu pawimawh tak hi niin ka hre bawk a ni.

"Reginald Musgrave-a chu kan college-a kal ve tho a ni a, kei nen pawh hmelhriat satliah ang chuan kan inhre nghe nghe a. Pawl hniam zawkte chuan an ngaina lo hle nghe nghe a; mahsela, a nihna chu an hmu ṭhelh ni hian ka hre tlat a. Mi dang chuan Reginald Musgrave-a chu mi chapo tak niin an hria a; kei erawh chuan chapo anga a lanna chu amah a inrin tawk loh vang ni-ah ka ngai tlat thung a ni.

"Amah chu han en mai chuan tu mah zahpah leh pawisak nei lo thâwka thaw, mahni chauh indah sâng mi, cher ṭhei ṭhawi, hnar bang sang veh vawh, mitmeng lian deuh leh meng paw phát mai, pawisa puka min dil tum ni âwm fahrana mi tlawn deuh hârh anga lang hi a ni a. An chhungkua chu chhungkaw hlun berte zinga mi an ni a. An chhungkaw chanchin han sawi tak tak tur chuan kum zabi sawm leh parukna tih angreng hi va sawi thlen a ngai ta daih daih ṭhin a.

"Tuna an awmna, Hurlstone In pawh hi chu lai bial velah chuan In hlui ber a ni hial ang e tih palh awl a ni. An chhungkua chu Lal chi an nih avangin a chhim leh hmar zawng tein an chhungkaw inthlah chhâwng chu a chhui theih bawk ang. A hmel ka han hmuh chang apiang chuan In lian pui, tukverh tlep ṭhut mai lungchhiatthlak khawpa hlui tawh hi ka mitthlaah a lo lang tel ziah ṭhin a. Reginald Musgrave-a nen chuan kan inkawm zeuh zeuh a, kan han inkawm chang chuan ka thil chhut vel ka hna thawh dan chu a ngaihven hle tih ka hre mai.

"College ka chhuahsan hnu chuan kum li chhung zet chu ka hmu ta lo vang vang a; mahse, London-a Montague Street-a ka awm hnu chuan tuk khat chu a lo lut hlawl mai a. A hmel ka han hmuh chuan tun hma ai khan a la danglam chuang lo hle tih ka hmu nghal mai a, a incheina pawh a la uluk kher mai. Chu bakah, a ṭawngkam, mi duh lo chung thlemna ṭawngkam ni àwm tak pawh kha a la thlah chuang lo. A incheina leh a ṭawngkam mawlh mai chu mi dang aia a danglamna ber niin ka hre ṭhin.

"Ka pindana a lo luh a, dan pangngai anga kan han inchibai hnu chuan, 'Musgrave, engtin nge in awm tak zel?' tiin ka'n zawt a. Ani chuan, 'Ka pa thih thu kha i lo hre tawh maithei a. Kum hnih kal ta vel khan chawlhna ram panin min chhuahsan ta. Ka pa boral achin chu kan Hurlstone In leh ram kha ka enkawl a ṭul a. Kan awmna biala roreltu member zingah min telh ve vei nen, ka buai thei khawp mai. Tun hmaa i thil thiam ṭhin, mak kan tih theih em em ṭhin kha a takin i hmang ta niin ka lo hria a,' a ti a.

"Kei chuan, 'Nia, ka fin leh varna hi ei zawn nan ka hmang ta ringawt mai a ni,' ka lo ti a. Ani chuan, 'Chu zawng, ka tan thil ngaihthlak nuam ber a ni hial ta ve ang. Tunah tak hi chuan i fin leh varna chu kan mamawh em em a, kan Hurlstone In chhung velah thil mak tak tak kan kawl tlat a ni. Kan Police-ho lah chu kan han pun sa teh a, an hawi buang ve vel mai mai bawk si a, a tih ngaihna tak kan hre tawh lo,' a ti ta a.

"Watson, chutih laia ka hlimzia chu i hre thiam kher lo vang. Thawh tur nei lovin eng emaw chen ka awm a, chutah thawh tur ka han nei ta a nih chu. Ka rilru chhungrilah chuan mi hlawhchhamnaah chuan ka hlawhchham ve ka inring reng reng lo va, chuvangin, mahni leh mahni infiahna hun remchang ka lo nei thei dawn ta a ni. Musgrave-a hnenah chuan, 'Thil awm dan chu khawngaih takin mi han hrilh teh,' ka ti a, Musgrave-a chu ka depa ṭhutthlengah chuan a ṭhu a, meizial a'n ṭan a, hetiang hian a sawi ta a :

"Tlangval puanthuah khai mah ni ila, chhiahhlawh tam tak ka rawih a ṭul a ni tih i hre ve ngei ang. A chhan chu kan In, Hurlstone saw a hlui tawh em a, enkawl deuh fe a ngai tlat a ni. Chu lo rengah pawh khaw mawi lai hi chuan intihhlimna te pawh kan Inah ka siam ve ṭhin a. Chutih huna indaih lo lutuka awm chu a fel lo va. Chuvangin, hmeichhe pariat leh chaw chhumtu pakhat leh khualchhawn pakhat leh kawngkhar vengtu pahnih leh mipa naupang pakhat ka ruai a. Hemi bakah hian huan enkawltu leh sakawr In enkawltu an la awm hrang leh a ni.

"Kan chhiahhlawh zingah chuan kan khualchhawn, Brunton-a chu kan hnena thawk hlun ber a ni a. Brunton-a chu a tleirawl chhuah tirh chuan zirtirtu a ni a; mahse, kan hnenah a thawk ta tlat a. A nungchang ṭhat avang leh a thahrui ngah avangin kan tan chuan a hlu em em a ni. Pa pianṭo ṭha tak mai, hmelṭha si a ni a, a chal arh ringawt pawh hmuhnawm tham a ni bawk. Kum sawmhnih chhung chu kan hnenah a thawk tawh a. Chuti chung pawhin kum sawmli aia a upat chu a rinawm miah lo.

"A vanneih vang chu ni thawkhat mah se a fin avangin ṭawng chi hrang hrang a thiam a, rimawi tumna hmanrua hi a kutah a mikhual lo hle àwm e. Chutiang mi pian fuh chu engti tihin nge kan hnenah a awm reng duh pawh kan hre phak lo. Kan hnenah chuan thawh hah teh chiam ngai lovin ei a hmu ve tho a, tlai khawhnua han insawn buangbar leh a hreh ve ni-ah ka ngai rawk a. Kan Ina lo leng tawh phawt chuan Hurlstone khualchhawn duhawmzia chu an hre vek a ni.

"Mahsela, he mihring hian famkim lohna pakhat a neih chu hmeichhe chungthu-ah a ni. Hmeichhe chungchangah chauh hi chuan Siampahranga a ang ve lek lekin ka hria. Nupui a neih hi chuan a ṭha viau a; mahse, a nupui nen an inneih tak loh achin chu chepa nung khai ang maiin a phe tawn vat vat ni maiin a lang.

"Hman lawk khan kan chhiahhlawh zinga pakhat, Rachel Howells-i nen an inkawp a, an inhual diam tawh nghe nghe a; mahse, Brunton chuan kan infiamna lam enkawltu fanu, Jenet Tregellis-i a duh leh zawk avangin an inhualna chu a chhu chat leh ta a. Rachel Howells-i chu nula rilru ṭha leh fel tak a ni a. An han inṭhen ti ila, an inhualna a han chah takah chuan thlarau ang maia ro ri re hian kan daikawm vel chu a hrut ta rek rek mai a, a khawngaihthlak kher mai.

"Chu chu kan buaina thuah khatna chu ni ta phawt sela, a thuah hnihna thu hmahruai chuan kan khualchhawn Brunton chu a hna aṭangin a chawlhtir ta a ni. Thil awm dan chu hetiang deuh hi a ni. Brunton-a chu mi thluak ṭha leh pianṭo fuh tak mai a nih thu ka hrilh tawh che a. He a thluak ṭhatna, a hriat loh hriat a châkna hian a khalh kawi ni berin ka hre mai. A tana thil ṭul reng reng lo pawh hriat ve a tum zel niin ka hria a. Hmu chhuak hlauh lo phei ila, eng chen nge a kal dawn pawh ka hre lo.

"Kar hmasa, Ningani zan khan ka muhil thei hlek lo mai a, coffee tak deuh mai ka in vang kha em ni chu aw ka ti deuh a. Zing lam dar hnih thleng khan muthilh tumin ka la inhai buai nasa mai a; mahse, ka hlawhchham ṭhak a. A tawpah chuan muhil thei dawn ngang lovin ka inhria a, ka thawnthu chhiar lai pakhat chu ka chhiar zawm mai teh ang tih rilru puin ka tho a, khawnvar ka chhi nghal a. Ka lehkhabu chhiar lai chu hawlhlirh khelhna pindana ka dah daih avangin ka mutkawrin ka intuamhlawm a, la turin ka kal ta a.

"Ka lehkhabu dahna pindan thlen hma chuan kailawna chhuk thlak a, chutah pindan inkalpawhna zuk thlen thlak a, a bul lawka lehkhabu dahna pindan leh silai dahna pindan kal tlang a ngai a. Kailawna ka chhuk thlak hma chuan kailawn lam chu ka'n melh thla a, pindan inkalpawhnaah chuan eng a lo awm a. Chu eng chu lehkhabu dahna pindan inhawng kawngkhar aṭanga lo chhuak a ni tih ka hre bawk a, ka'n hmuh chuan mak ka ti kher mai. Ka mut hmain khawnvar ka tithim tih ka hre chiang si a, chu bakah, kawngkhar pawh ka khar ngei tih ka hre chiang bawk si a, chuvangin, mak ka ti viau pawh chu a àwm lo lem lo.

"Chu eng ka'n hmuh chuan ka rilruah chuan, 'rukru' tih hi a lo lang nghal a, mi dang pawhin hmu sela chutiang tho chu an rilrua an ngaihtuah hmasak tur niin ka ngai. Kan In chhunga pindan inkal pawhna bang velah chuan hmanlaia hriamhrei hlui kan târ thluah a, chung zinga indona hreipui pakhat chu ka phih thla a, ka khawnvar chu ka dinna hmunah ka hnutchhiah sauh sauh a, lehkhabu dahna pindan lam pan chuan ka kal ta a.

"Pindan chhungah chuan Brunton-a chu thuamhnaw pangngai thlap inbel hian ṭhutthleng hahdam deuhah hian a lo ṭhu a, a mal chungah chuan ram lem ni àwm tak hi a lo pharh a, inngaihtuah muk tih hriat tak hian a kut chuan a chal a dawm vang vang a. Dawhkan tlangah chuan khawnvar a chhi a, chumi eng aṭang chuan a hmel leh a incheina pawh ka hmu chiang thei viau a ni. Mak ti taka ka en reng lai chuan a tho va, pawhdawh pakhat chu a va hawng a, chumi chhung aṭang chuan lehkha pakhat hi a phawrh chhuak a, khawnvar bulah chuan a pharh a, ngun em em hian chu lehkha chu a endik ta a.

"Chutianga keimahni chhungkaw lehkha pual bik a'n ching phar vel a, inthlahrunna nei hlek lova muangmara a'n che vel chu ka tuar zo ta lo va, ka va pan hnai ta a. Brunton-a chu a lo dâk chhuak a, ka hmel a'n hmuh chuan a hlau lutuk a, a dáng sâwp sawp mai a. Rang deuhvin a zuang tho va, a lehkha ken lai, a en hmasak zawk kha a kawr áwm chhungah a thun ta nghal a. Kei chuan, 'Hetiang hian a ni maw kan lo rin ngam vena che hi min thungrulh dawn? Naktukah i hna hi i bansan nghal tur a ni ang,' ka ti a, hrehawm tih hmel zet mai hian eng mah sawi lovin min kal pel a, a kal ta mai a.

"Dawhkan chunga khawnvar eng aṭang chuan Brunton-a lehkha phawrh chhuah sa kha ka'n en a, lehkha pawimawh awzâwng a lo ni lo va, mak ka ti kher mai. Chu lehkha chu kan chhungkuain hunserh chi khat, Musgrave Ritual kan tih mai kan hman ṭuma thu inchhâng, a chhama chham chi ziahna mai mai a lo ni a. Chu thu inchhâng chu kan chhungkaw tin chuan kan chham vek a, ṭhang lo thar zelah hian chu hunserh kan hman apiang chuan kan chham ziah a ni.

"Keini chhungkaw tan chuan thil pawimawh leh lehkha pawimawh ni teh reng mah sela, mi dang tan chuan hmanna reng reng a awm lo va, hlutna a nei hek lo' a ti a. Kei chuan, 'Chumi zawng nakin lamah kan la ngaihven zui dawn nia,' ka lo ti a. Chutah Musgrave chuan, ‘Thil pawimawh nia i ngaih a thu le. Ka thu sawi lai kha han chhunzawm ila, Tichuan, pawhdawh chu Brunton-a chabi hnutchhiah chuan ka kalh a, kal leh mai hi ka’n tum a.

"Chutih lai chuan Brunton chu a lo kir leh a, ka hmaah chuan a lo ding ta tlat mai a. Ka hnenah chuan, ‘Ka pu Musgrave, ka hmingchhiatna tur hi ka phur zo lo vang. Ka nihphung aia chapo zawka léng ṭhang ka ni a, hetianga hmingchhiatna ka tawh mai chuan ka zak lutuk hi ka thi thei ngei ang. Ka thih chuan a mawhphurtu chu nangmah ngei hi i ni ang - beidawng lutuka min siam avangin. Ka thil tih tak avanga min ngaidam thei hlawl lo a nih pawhin thla khat chhung tal hun min pe leh la, keima duh thua chhuak ni àwm takin ka chhuak nang e,’ a ti ta a.

“Kei chuan, ‘Brunton, khawngaih han hlawh thei tur pawh i ni lo. I chet dan kha chet dan azawnga lawmawm lo ber a ni tlat mai. Mahsela, kan chhungkaw zingah rei tak i lo awm ve tawh a, chuvangin, vantlang hmaa tihhmingchhhiat kher che hi ka châk miah lo. Mahsela, thla khat te zawng a rei lutuk; chuvangin, chawlhkar khat chhungin inthiar fihlim ang che, a chhan leh vang chu i duh duh i siam chawpin i inphat marna tur chu i thu thu a ni,’ ka ti a.

"Ani chuan, ‘Ka pu, chawlhkar khat chauh maw? Kar hnih tal maw le, chawlhkar hnih chauh tal,’ a ti ta ngawih ngawih a. Kei chuan, ‘Chawlhkar khat a tawk. I chungah hian zah ka ngai hle a ni tih i hre tur a ni,’ ka tihsan a. Lungngaih hmel zetin a kal kiang a; kei pawh chuan khawnvar chu ka tithim a, ka pindan lam panin ka kal ta a.

"Chutia ka tih hnu, ni hnih chhung chuan Brunton chuan ṭha em em maiin a hna chu a thawk a. A hma lawk zana thil lo thleng chu a thawi them pawhin ka sawi lang duh hauh lo va. Mahsela, a mualphona khuh tur chuan engtin nge a tih ang tih chu ka thlir ru ran a ni. Chutah a tuk thum tukah chuan a lo lang ta lo tawp mai a ni. Zinga hnathawh tur ka sem hunah chuan a lo tel ve ta lo ka tihna a nih chu.

“Chumi tuk chuan tukṭhuan ka ei khamin chaw eina pindan chu ka chhuahsan a, ka chhuah chiah chuan kan chhiahhlawh nula, Brunton-a nena inhual tawh, Rachel Howells-i ka tawk a. Ka sawi tawh angin Rachel Howells chu a dam lo va, a taksa pawh rawih rap khawpin hrehawm a tuar a. Chuvangin, chutiang chunga hna a thawh chu ka rem ti lo va, chumi ṭum chuan ka hau nghe nghe a.

"A hnenah chuan, ‘Mu hahdam rawh; i dam deuh hunah hna i la thawk leh dawn nia,’ ka ti a. Mitmeng danglam tak hian min han melh a, a thluak a buai em ni chu aw ka ti rum rum mai. Ka hnenah chuan, ‘Mr Musgrave, ka chak tawk asin,’ a ti a. Kei chuan, ‘Doctor thu thu a ni. Tunah chuan hna i thawk rih tur a ni lo. I chhuk thlak hunah Brunton kha ka hmuh duh thu i’n sawi dawn nia,’ ka ti ta a. Rachel Howells-i chuan, ‘Ka Pu, a kal tawh,’ a ti ta mai a.

"Kei chuan, ‘A kal tawh a! Khawiah nge a kal tawh?’ ka ti a. Ani chuan, ‘A kal bo tawh; tu ma’n an hmu lo. A pindanah pawh a awm miah lo. Ni e, aw, a kal tawh alawm, a kal bo tawh!' a ti a. Bang Iamah chuan a tawlh phei a, za àwm deuh hian a nui vak vak a. Mak ka tih avang leh ṭanpui a ngai a nih ka rin avangin ka hlau lek lek zawk a. Chhiahhlawh kohna dar ka’n hmet ri a, anni chuan a pindan pual lamah an zawn ta a. Chutia an zawn lai pawh chuan a inhnit a, a ṭe tuar tuar a.

"Brunton-a chanchin chu ka’n zawt chiang vel a, tu mahin an lo hmu lo tawp a. Chumi zan chuan Brunton-a chu a khumah a mu lo tih kan hria a; zan mut hun pelh tawh hnu chuan tu mahin kan hmu lo rêng rêng a ni. Mahsela, zinga an thawhin in chhung lamah kawngkhar leh tukverh zawng zawng a inkalh ve diam si, engtin nge a chhuah theih tih chu kan hre lo.

“Brunton-a pindan chhungah chuan a sana te, a thuamhnaw te, a pawisa te pawh a la awm vek; mahse, a suit dum, a hak fo ṭhin erawh chu a awm lo va. A slipper a awm lo va; a pheikhawk erawh chu a awm thung. Chuti ni sela, zanah chuan Brunton-a chu khawiah nge a awm ang a, tunah eng nge a chanchin ni ta zel ang tih chu hriat har tak a ni tawh.

"Kan In zawng zawng chu pakil thlengin kan dap chhuak dep a; mahsela, hmeithai zinga pathlawi zawn ang hlauh a ni mai. A ngaihna kan hriat tak loh avangin Police kan pun a, anni pawh chu ui fing lo pui, ui fing anga ngaih luih tlat ang deuhin an hawihai kual vel mai mai a ni. A hma zana ruah a sur avangin kawtkai velah lah chuan hnu-hma pakhat mah hmuh tur a awm miah lo leh nghal nen. Chutia mak ti êm êma kan awm lai chuan thil mak danglam tak mai a lo thleng leh ta.

“Ni hnih chhung chu Rachel Howells-i chu na takin a let reng a. A chang phei chuan nikhua a hre mumal lo va, eng emaw hun lai phei chuan chhawng khatna te pawh a ban dai ve ziau ziauin ka hre nghe nghe a. Chutiang taka a nat avang chuan zana menpui turin nurse pakhat kan ruai ta ngawt a.

"Brunton-a bo aṭanga zan thumnaah chuan Rachel Howells-i chu a dam deuhin a enkawltu nurse chuan a hria a, a’n mutsan a. Mahse, zingah chuan khum ruak a lo riahpui mai mai lek tih a hre chhuak ta a. Rachel-i pindan tukverh chu a inhawng hiau va, a hnuaiah chuan a hniak a lang bawk a. A hniak chu kan chhui a, chutah piah deuhva dil pakhat, fit riat zeta thuk ko tlangah chuan a hniak chu a tawp ta tlat mai a ni.

“Chumi kan han hmuha kan lunghnurzia chu min hriatpui kher lo vang. Eng ilo khai chhuahna thir kawm kan siam a, chu chuan dil mawng chu kan hai ta a. Mahsela, Rachel Howells-i ni thei tur anga han puh theih tur chi eng mah kan khai chhuak lo rêng rêng a. Mahsela, kan beisei loh tak maiin thil mak tak mai kan khai chhuak thung. Chu chu ipkhai, puana siam a ni.

"Chu ipkhai chu lung emaw ni, darthlalang emaw ni, tuiêk ang tler tlawr hian a lo hnawh khat a. Chu ipkhai chhungah chuan thir lam chi pawh a awm nual bawk. Nimin thleng khan theih tawp kan la chhuah a; mahse, eng mah kan ang thei lo. Rachel Howells-i emaw, Richard Brunton-a emaw chu kan la zawng hmu lo a ni. Kan Sawrkar mi fingho lah chuan van lam te an melh kual ve mai mai bawk a ni,' a ti a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 24th, 2018, 6:11 pm

SHERLOCK HOLMES
THE MUSGRAVE RITUAL
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last)
(Rozami Pachuau)

“Watson, chu thil chu ngaihnawm ka’n tihzia leh ka phurpuizia chu tunah hi chuan i hre thiam kher lo vang. Thil zawng zawng inthlun khawmna eng emaw chu hmuh chhuah tumin ngun takin ka ngaihtuah ta a ni. An khualchhawn a kal bo va, an chhiahhlawh nula a kal bo va. An chhiahhlawh nula chuan an khualchhawn chu a hmangaih a; mahse, a hnuah chuan a haw leh ta hle a.

"An chhiahhlawh nula chu Welsh mi a nih avangin a hmangaihna a nasat angin a thin pawh a thawk na ve ngei ang. A mipa zawk a kal bo hnu chuan a hmeichhia chu phur namen lovin a phur. Dilah chuan hmeichhia chuan ipkhai, a chhunga thil mak tak tak awm a paih lut. Heng thil zawng zawng inthlun khawmna chu min kawhhmuh si lo. Heng thil thlung khawmtu hi khawi laiah nge a awm tak ang? He zawhna hi han inzawt chiah ila kan bo map mai a ni.

“Musgrave-a hnenah chuan, ‘Musgrave, kha lehkha kha min han entir tawh teh. In khualchhawn-pain a hna aṭanga ban hial huama a lo en ngun kha a ni àwm phawt a,’ ka ti ta a. Ani chuan, ‘Keini chhungkaw hunserh hi zawng, thil mak tak a nia; mahse, kan hmanlai thil hlui vawnna kawngah ṭangkaina a la nei e tih mai chauh a ni. I en duh phawt chuan hei, a ang chiah kha ka keng alawm,’ a ti a. Watson, chutia a tih zawh chuan he lehkha hi min pe ta a ni. An thu inchhang chu i han chhiar teh ang :

“Tu ta nge a nih kha?”

“Kal bo tawha ta a ni.”

“Tu nge nei ta ang?”

“Lo kal tura chuan.”

“Eng thla nge?”

"Thla hmasa ber aṭanga thla rukna.”

“Ni chu khawiah nge a awm?”

"Sasaw thing chung zawnah.”

"A hlim chu khawiah nge a awm?”

“Elm thing hnuaiah.”

“Pen eng zah bithliah nge?”

“Hmar lamah pên sawm pên sawm, chhak lamah pên nga pên nga, chhim lamah pên hnih pên hnih, thlang lamah pên khat pên khat, tichuan, a hnuai chiah a ni ta mai."

“A aiah chuan eng nge kan pêk dawn?”

“Kan neih zawng zawng.”

“Eng vangin nge kan pêk ang?”

“Kan rin ngamna avangin.”

“Musgrave chuan, ‘He thu inchhang ziahna dik tak, a hmasa berah hian a ni zah leh a kum zah a chuang hlek lo va; mahse, kum zabi sawm pasarihna vel a ni ang. I tan he thil hi a ṭangkai lo vang tih ka hlau ngawt mai,’ a ti a. (Kum zabi sawm pasarihna chu 1600 leh 1700 inkar chhung zawng kha a ni. Pll). Kei chuan, ‘Ṭangkai ta lem lo mah se thil mak tak mai pakhat hrilh fiahna hi thil dang hrilh fiah nan pawh a hman nghal theih maithei a ni. Min lo ngaidam la, in chhungkaw inthlah chhawng, chhawng sawm ai pawhin in khualchhawn hi a fing zawk a ang hle mai,’ ka ti ta a.

“Musgrave chuan, ‘I thu sawi chu ka hre thiam mang hlek lo mai. Kha lehkha kha a pawimawhna àwm rêng rêng ka hre lo,’ a ti a. Kei chuan, ‘Keia tan chuan he thil hi thu inchhang satliah mai a ni lo. Van rim a nam hlek lo mai. Ka ngaih dan hi in khualchhawnpa pawh chuan min ṭawmpui ngeiin ka ring. He lehkha hi i man chhuah hma pawh khan a lo bih tawh a ni maithei a ni,’ ka ti a.

"Ani chuan, ‘Nih pawh ni fa hmiang. Kan fimkhurpui lem hlei nem,’ a ti mai a. Kei chuan, ‘I mut theih loh zana i va man chhuah kha chuan Brunton-a chuan a hriatna a thar thawh leh theih nan mai mai kha lehkha kha a lo bih a ni ngei ang. A kawr áwm chhunga a lehkha hnawh luh tâk kha eng hmun lem emaw chu a ni ngei ang maw?’ ka ti ta zel a.

"Musgrave chuan, ‘A ni ngei ang, eng emaw chu a hnawh lut ngei alawm. Mahsela, hetianga thu inchhang awmze nei lo leh keimahni chhungkaw inthlah chhawng tih dan phung mai mai hi eng atan nge a hman ang?’ a ti ta a. Kei erawh chuan, ‘Chu zawng, a hriat chhuah a harsa hauh lo vang le. Rem i tih chuan Sussex pan tur rel chhuak hmasa berah kal ve ila, a hmunhma ngeiah thil awm dan hi en fiah iIa a ṭha ang,’ ka ti ta a.

“Chumi ni chawhnu chuan Hurlstone-ah chuan kan va kal dun a. Chu In chu a hmingthan êm avangin a lem pawh i hmu tawh maithei a, a sak dan hmang pawh i hre tawh maithei a ni. A pianhmang chu L anga sak a ni a, a thlep sei zawk hi tunlai In sak ang deuha sak a ni a, a thlep tawi zawk hi chu a hlui zawk a ni a, a lairil zawk a ni ber ang chu. A In bung hrang hlui zawk lai taka kawngkhar hniam ang set sawt Iu chungah chuan 1607 tih hi a inker a; mahsela, mi thiamte chuan a kalkhang leh a lung rem vel chu chu ai chuan a upa daih zawkin an ring.

"An In hlui zawk chuan tukverh tê tak tê té a nei a, a bang pawh a chhah êm êm a, chu vang chu a ni pek ang, a in bung hrang hlui zawk chu an hmang tawh lo va, an hman ber pawhin rumrawk dah nan leh pindan thim anga hmanna tur ang chi-ah hian an hmang chauh tawh a ni. A In velah chuan hmun nuam tak tak a awm a, thing mawi tak tak a ding ṭeuh bawk a. Chu dil chu In aṭang chuan yard zahnih vel leka hla a ni ang. Chu zawng chu a In chungchangah chuan duh tawk rih ila.

“Watson, he thilah hian thil mak tak tak mai a hrang a hraiin a thleng angah ka ngai lo va, thil eng emaw tak pakhat chauh a awm a. An Musgrave Ritual, an chhungkaw thu inchhang chu ka chhiar dik thiam phawt chuan chu thil chu ka hmu chhuak vek thei dawnin ka hre tlat a ni. Chuvangin, an thu inchhangah ngawt chuan ka ngaihtuahna leh ka tha leh tui sawrbing ka tum tlat.

"Han ngaihtuah ve mah ta che, kan mihringa chuan eng vangin nge an chhungkaw thu inchhang chu chiang lutuk tak maia hriat a duh ang? A pi leh pute'n an hmuh hmaih, eng emaw a hmu a ni ngei ang. Chu thil chuan ama mimal tan hlawkna a thlen thei ngei bawk tur a ni. Chuti ni se, eng nge ni ta ang?

“Musgrave thu inchhang ka’n chhiar aṭang chuan an thil tehna chungthu ni àwm tak chuan khawi lai hmun emaw a sawi ni ngeiin ka ring a. Chumi hmun chu kan hmuh chhuah theih chuan a tihzia ngawt ang. He an chhungkaw thu inchhang rochhiah hi eng nge a nih hre lovin Musgrave chhungkua hian an chham chhawng ve mai mai a, a phèna thuruk chu zawn chhuah a ngai angah i han ngai phawt mai teh ang.

"Kan thil zawn ṭanna atan chuan thil pahnih, hmanraw pahnih kan nei sa a, chungte chu sasaw thing leh ‘elm’ thingkung a ni. Sasaw thing chungchangah kha chuan buaina tur eng mah a awm lo. Hurlstone kawtah chiah mai chuan sasaw thing dang zingah sasaw thing lian pui mai a ding to luah a. Han en mai pawhin thing hian lal an thlang ve a nih ngai chuan chu thing chu an lal atana an thlan ni àwm hliah hliah a ni a, chu thing tluka mawi leh lian ṭha chu ka hmuh àwm pawh ka la hre lo.

"Chu sasaw thing kan tlan pelh pah chuan, ‘Kha sasaw thing kha in chhungkaw thu inchhang an ziah hun lai hian a awm em?’ tiin Musgrave chu ka’n zawt a. Ani chuan, 'Kum 1066 kuma Norman-hovin England ram an rawk hnehlâk lai vel kha chuan he thing hi a ding tawh a, Hurlstone In hi kum 1607-a sak a ni a; he In hi chu he thing hi chuan, ‘Ka nau,’ a ti thei dawn tihna a nih chu. He sasaw thing hi a bul vàwng Iaiah chuan teh kualin fit sawmhnih leh pathuma lian asin,’ a lo ti a.

"Chutah, ‘Elm thing hi in nei ṭhin em?' tiin ka’n zawt leh a. Watson, he zawhna hi ka zawh duh tak zawka chu a ni nghe nghe a. Musgrave chuan, ‘Saw laiah sawn ‘elm’ thing tar tak a awm ṭhin a; mahse, kum sawm kal ta vel khan ṭêkin a deng a; kan kit ta a ni,’ tiin min chhang leh ta a. Kei chuan, ‘A awmna hmun hlui min hrilh thei ang em?’ ka ti ta zel a.

"Ani chuan, ‘Thei teh reng e,’ tiin min chhang a. Kei chuan, ‘Elm thing dang in nei lo a maw?’ tiin ka zawt a. Ani chuan, 'Tê tak tê tê chu a awm nual a; mahse, upa tawk deuh chu a dang a awm lo,’ tiin mi chhang a. Kei chuan, ‘A awmna ṭhin chu hmuh ka duh hle mai,’ ka ti ta zel a.

"In chhungah pawh lut ta chuang lo chuan ‘elm’ thing dinna hmun hlui lam pan chuan kan kal a. Chu thing chu sasaw thing leh an Inpui inkar lai vel takah a lo ding tih kan va hmu ta a. Ram thima rawng ka bawlna chu hlawhtling ṭan hle-ah ka ngai ta a ni. Chutah, ‘He thing hi a dam laiin engtia sang nge ni ang tih chu tuna han hriat rual a ni tawh lo vang a?’ ka’n ti a. Ani chuan, ‘A san zawng maw? Ka hriih ang che, fit sawmruk leh pali chiaha sang a ni,’ a ti ta nghal mai a.

"Mak ti zet hian, ‘Engtin nge i hriat theih?’ ka ti vat a. Ani chuan, 'Sikula ka kalnaa kan zirtirtu chuan chhiarkawp chi khat 'trigonometry’ min zirtir pah hian thil tih tur min tuk ṭhin a, eng ilo san zawng hi mi tehtir a ching riau mai a, chu vang chuan ka tleirawi lai deuh tawh khan kan ram chhunga thing leh eng ilo vel hi a san zawng kan teh chhuak kim vek tawh tlat a ni,’ a ti ta zel a.

"Ka vanneihna chu a kal tluan em avang chuan mi sual hnu chhuitua ṭang lovin mi sualah ṭang ta zawk ila ka hausak thuai mai te pawh ka ring ve hman rum rum asin. Musgrave-a hnenah chuan, ‘A nih leh, in khualchhawnpa khan tuna ka zawhna ang lam hawi khan zawhna a zawt ve tawh rêng rêng che em?' tiin ka zawt ta phawng mai a.

"Ani chuan mak ti àwm zet hian min han melh a, ‘E heu, i han sawia ka hre ta mai. Thla eng emaw zah kal taah khan Brunton chuan chutiang zawhna chu min zawt asin. An inhnial avangin thil awm dan hriat a duh a, chu vang chuan thing san zawng chu min zawt niin a sawi nghe nghe,’ a ti ta mai a. Watson, chu thu chu ka tan chuan chanchin ṭha zinga chhiar tel ve chi ni maiin a màwi asin. A chhan chu kawngka zim ka panin sual hauh lovin ka kal niin ka inhriat phah tlat a ni.

“Van lam ka’n thlir a, ni pawh chu hniam takah a lo uai duai duai tawh a, darkar khat hnu vel lekah chuan sasaw thing zik chungah chuan a awm mai dawn tih ka hria. Chutia sasaw thing chung zawna ni a awm chuan, Musgrave thu inchhang bung khat tal chu a rawn tifamkim dawn tih ka hre bawk. ‘Elm’ thing hlim chu ‘elm’ thing hnuaiah a awm tur a ni a; mahsela, a hnuai zawn chiah chiaha a awm chuan a dik lo vang.

"Chuvangin, ‘elm’ thing zar hmawr ber emaw, a hlim nei thei zinga a kungpui hlat thei ang bera a hlim emaw chu an thu inchhanga ‘hlim’ tih khan a kawk ang. Chuti ni lo sela chuan a kungpui kha teh khawngah an hmang ang tih a chiang. Chuti a nih chuan sasaw thing chung zawn chiaha ni a awm lai chuan elm thing hlim chu khawi laiah nge a awm tih ka hriat a ṭul ta a ni,” a ti a. Holmes-a'n chutia a’n sawi chuan kei chuan, "Holmes, ‘elm’ thingkung chu a awm tawh si loh chuan chu zawng thil harsa tak a ni ngei ang,” ka lo ti a.

Ani chuan, “A ni ngawt mai; mahse, Brunton-an a chhut chhuah theih chuan kei pawhin ka chhut chhuak ve thei ngei tur a ni tlat. Tak taka, chu zawng thil harsa vak a ni hlei nem. Musgrave-a nen chuan a lehkha chhiarna pindanah kan lut a; kan kal pah chuan hmawlh pakhat ka suih phei a. Chu ka hmawlh suihah chuan hrui sei tawk ka hling a, chu hrui chu yard khat zelah ka suih bawk thliah a. Chutah nghakuai ngul, fit ruka sei pahnih ka la leh a, ‘elm’ thingkung dinna hmun hlui lam chu kan pan leh ta a ni.

“Chutih lai chuan sasaw thing chung zawnah chiah chuan ni a lo awm tawh a. Nghakuai ngul chu ‘elm’ thing dinna hmunah chuan ka’n vit bur a, a hlim (shadow) sei zawng chu ka teh ta a, fit kua chiaha sei a ni. Chuta ṭang chuan a harsa tawh lo. Thing, fit ruk-a sangin hlim, fit kua-a sei a neih theih chuan thing, fit sawmruk leh pali-a sang chuan hlim, fit sawmkua leh paruk a nei dawn tihna a ni mai.

"Chumi zulzui chuan fit sawmkua leh paruk ka teh ngil ta nghal a, Hurlstone In bang bulah chuan ka va inteh chhuak ta a ni. Chutah chuan ka hmawlh suih sa ken chu ka kheng bur ta a. Watson, chumi ṭuma ka hmawlh khenna bula lei khuar deuh hlek ka han hmuh chuan ka lawm kher asin. Chu lei khuar chu Brunton-a chhut khuar a ni ngeiin ka ring a; a hnu ka chhui dik zel niin ka ngai a ni.

“Chutah ka iptê aṭang chuan chhim leh hmar, chhak leh thlang kawk thei ka phawrh chhuak a, ka hmawlh khen bur chu ka chhuah ṭanna anga hmangin hmar lam hawi zawngin pên sawm ka’n pên a. Chutah pên sawmah chiah chuan hmawlh ka kheng bur leh ta a. Chumi hnu chuan fimkhur takin khawchhak lamah pên nga ka pên a, chuta ṭang chuan chhim lam hawiin pên hnih ka pên leh ta a.

"Chutia ka’n pên kauh kauh hnu chuan an kawngkhar hlui tak mai pakhat chu ka thleng chilh chu a ni mai. Chumi hnu chuan khawthlang lamah pên hnih ka pên a la ṭul ta a, chuti a nih chuan pindan inkalpawhnaah chuan pên hnih ka chhuk thlak a ngai dawn tihna a ni ta; chu chu an chhungkaw thu inchhang inrochunin a sawi chiah chu a ni. Chuti ni sela, ka thil tih chuan awmzia a nei lo vang. Awmzia a neih si loh chuan thil tihsual Iian tak ka nei tihna a ni ta mai a ni.

"An chhuat chu ka’n en vel a, an lung rem chu a ngheh hmel chuah mai lehnghal a. Kum tam tak chhung chu chu lai vela an chhuat chu an ṭhiat lo tih hi han en rêng rêng pawhin a hriat mai. Chuti a nih phawt chuan Brunton-an chu lai hmunah chuan vung a chhuah lo tawp tih pawh a chiang. Thil hriat chian lehzual duhin a chhuat vel chu ka’n kuk kual a, a ri duap lai leh a ri ṭang lai a awm miah lo va, hah khi chhin eih pawh a awm hek lo.

“Chutih Iai chuan Musgrave chu a lo phur thar ve leh tawh a, a iptê aṭang chuan an thu inchhang phêk kha a han phawrh chhuak a, 'A hnuai chiahah - ‘a hnuai chiahah’ tih hi i chhut lêt hmaih a ni,' a rawn ti ta a. Chutia a'n sawi takah chuan chu lai hmun chu han chawh phut nghal mai tur em ni chu aw ka ti deuh a; mahse, ka ngaihtuahna thluak chuan exam a ngai lo chauh a ni tih chu ka hre chhuak ve leh ta thuai a, ‘Hemi hnuaiah hian pindan thim ‘cellar’ a awm em ni?' ka han ti a.

"Ani chuan, ‘Aw, hemi In sakna tur lungphum an phum rual hian chu pindan thim pawh chu an duang ve nghal a ni hial ta ve ang. He kawngkharah hian kal ila, chu hmunah chuan a chhuk theih,' a lo ti ta a. Kailawnah chuan kan chhuk thla a, chu pindan thim tak chu kan zuk thleng thla a, ka ṭhianpa chuan pindan kila khawnvar inhung chu a’n chhi a. Chutia a’n chhit èn takah chuan chu pindan ngei chu kan buaina hrilh fiahna hmun tur chu a ni tih ka hre ta nghal a.

"Mahsela, a buaithlakna chen a la awm tho mai. Chu pindan chu a tlawhtu hmasa ber kan ni tlat lo. Chu pindan chu thingtuah dah nan an hmang a, mahsela, chhuat laia lehkha chhe tla vel chu tu emaw hian pindan kil sirah chuan a lo rem ṭha diam a. Pindan chhuat lai takah chuan chhuat ker kuak khuhna a awm a. Chu chhuat ker kuak khuhna lai takah chuan a chawi kan tiremchangtu atan thir kual a invuah a. Chu thir kualah chuan nghawnga veh chi, puan bah hi a lo awm bawk a.

"Chu puan bah chu a’n hmuh veleh chuan ka ṭhianpa chuan, ‘E heu! Hei chu Brunton-a nghawnga invêt ṭhin ngei kha a nih hi. Kan zawng-hmelchhe-hmai-sawngnawia chuan eng nge maw heng hengah te a lo tih ve chu le?’ a han ti nghal a. Kan duh duha thil kan tih mai chu a fel dawnin ka hre lo va, chuvangin, chu lai vel bialtu Police zinga pakhat tal chu awm ve se ka ti a, police ko tur chuan mi kan tir ta a.

"Chutah, chhuat ker kuak khuhna chu han chawi kan mai tumin a vawnnaa nghawngawrh insuih-ah chuan ka’n pawt vak a, bete bawk vel lek tur hi a kang det chauh a. Police chuan min ṭanpui a, kan pawt hawng thei ṭawk a ni. A khuhna ber kan pawh hawn takah chuan a chhung chu ka zu bih a, a chhung chu a lo thim phui tlat a; chutah Musgrave chuan khawnvar a rawn khai a, khuarkhurum chhungah chuan a thlak thla ta a.

"Chu lai chhuat khuar chu fit sarih vela thuk a ni a, a zau lam chu fit li vel a ni. Khuarkhurum kil khatah chuan thinga siam thingrem pakhat, darzaia ṭawn hi a lo awm a; chu thingrem chhin chu a inhawng sa va nghe nghe a; thingrem kalhna tala-ah chuan hei, tuna i hmaa ka chabi phawrh chhuah hi a lo invuah nghe nghe a ni. Chu thingrem chu a pawn lamah chuan vaivutin a bawh nasa hle a; mahsela, a ṭhen lai chu khaw hnawngin a chiah mawih a, a chhung lamah chuan pasi-te pawh a ṭo ṭhat nghe nghe.

“Chu bakah, thingrem chhungah chuan thir thleng leh pawisa nawi a awm ṭeuh a. Chung zinga ṭhenkhat chu hei, tuna i hmaa ka rawn phawrh chhuah hi a ni. Chutiang thir thleng leh pawisa nawi bak chu, chu thingrem chhungah chuan eng teh chiam a awm lo. Mahse, chutih hun lai tak chuan chu thingrem leh a chhunga thil awm chu kan ngaihsak hranpa hauh lo.

"A chhan chu chu thingrem bulah mai chuan pa pakhat hi a ṭhu thluang a, a chal chu thingrem tlangah chuan a nghat a, a thingrem sirah chuan a ban a phar duai bawk a. A Iu nghahna hmun chu a hniam em avangin a hmaiah chuan thisen a kai nasa hle a, a lu-a thisen chhuak zawng zawng chu a hmaiah a luang thla vek a ni ngei ang.

“Chuti khawpa chu pa chu a thisenin a bawh nasat avang chuan a hmel han en mai chuan tu nge a nih hriat mai theih tur a ni hauh lo nain a incheina leh a pianhmang aṭang chuan Musgrave chuan an khualchhawn ngei kha a ni tih a hre thei tho mai. Brunton-a chu a thihna a rei thawkhat tawh a ni maithei; mahsela, a taksaah chuan hliam hmuamhma kan hmu zo lo va, eng vanga thi nge tih pawh han hriat mai a harsa khawp mai.

"Chumi pindan thim tak mai aṭanga a ruang kan zawn chhuah hnu pawh chuan kan buaina chu a la tawp fel mai chuang lo va, a la khirhkhan dêuh dêuh zawk emaw tih mai tur a ni. Watson, chutih lai chuan ka lunghnur kher asin, an chhungkaw thu inchhang rochhiahin hmun a sawi dik tak chu kan hmuh chhuah phawt chuan kan buaina chu a tawpin ka ring a, mahsela, an thuruk zêp ṭeng ṭeng chu eng vanga zêp ṭêng ṭêng nge an nih ka la hre chhuak thei chuang lo a nih chu.

“Watson, kan buaina chungchangah chuan Brunton-a chanchin chu eng emaw chen kan hre fiah ta a; mahsela, a thih dan leh a ngaihzawng hlui, hmeichhe inhnamhnawih ve dan kha ka la hre thei ta chuang lo a ni. Chutiang chu a nih avangin ngun takin thil awm dan chu ka ngaihtuah zui ta veng veng a.

"Chutianga ka ngaihtuah changa ka thil tih dan chu i hriat vek tawh ka ring. Chu pa dinhmunah chuan ka rilruin ka’n indintir a, ka chet dan tur ka suangtuah ta mai ṭhin a ni. Duh leh sakhi ngalah chuan eng ilo chu lo bet ṭhahnem deuh ta mah se a pawi lo va, he thilah hi chuan mi dang rilru hawh anga ngaihtuahna sen buai vak a ngai lo, Brunton-a chu pa fingvar ve tawk tak a nih avangin.

“Tichuan, Brunton-a chuan thil pawimawh tak mai chu a pute chhungkua chuan an thukru tih a hre ta a. An thuhrukna hmun chu a chhui chhuak a; mahse, an ro thuhruk chhin nana an thil hman chu mi pakhat han chawi kan zawh tur chi rual a lo ni lo va. Engtin nge a tih tak ang? Pawn lamah ṭhian rinawm tawk tak, amah phatsan hauh lo tur pawh lo nei ta sela, chu pa chu a chhawr ngam lo vang.

"A chhan chu a ṭhianpa chu pawn aṭanga In chhunga a luh dawn chuan kawngkapui va hawnsak a ngai dawn a, chuti a nih chuan Musgrave-a emaw, chhiahhlawh dang emaw pawhin chumi a tihna lamah chuan an lo hmu palh mai thei a ni. Chuti a nih chuan amah ṭanpui tur chu, chu In chhunga awm ve ngei chu ni sela a ṭha ang. Chuti a nih lehzel chuan tu nge a sàwm tak ang le?

"Rachel Howells-i khan thawkkhat lai chuan a hmangaih rum ve rut tih a hria a. Mipa rêng rêng hian hmeichhia hi eng ang pawhin han ching phar kual mah ila, vawi khat min hmangaih tawh chuan min hmangaih duh rengin kan ring tlat ṭhin. Chutiang chu khawvel kalphung a nih avangin Brunton-a chuan Rachel-i chu engtin tin emaw a tlawn lungawi a, amah ṭanpuitu rinawm tak a nih a beisei ngei ang.

"Tichuan, zan thim hnuaiah pindan thimah an chhuk thla dun ta a, an pahniha tha chakna infawk khawm chuan lung chu a chawi kang ta a ni. Chuti chin chu ka mita hmu ve ang tluk zetin ka hre chiangin ka inhria a ni. Mahsela, chu laiah chuan thil chhut hmaih ka la nei tlat mai. Police-pa leh kei kha kan ṭang rual a, tha tawp chhuahin chhuat chhinna kha kan chawi kang thei chauh a ni si a; hmeichhe pakhat leh mipa pakhat tan chuan thil ritsak tak a ni ngei ang.

"A nih leh, engtin nge kei ni ta ila ka tih ang le? Chhuata thing bung awm nuai kha ka’n endik vel a, ka thil beisei pakhat chu ka hmu ta mai a ni. Chu chu thing bung pakhat, flt thum vela sei, a hmawr lehlam chu tlema khuar deuh hlek a ni. Chu thing bung chuan chhuat chhinna chu an kar kau ang a, mihring leng vel a nih thlengin an kar kang zel ang a. Chutah, Brunton chu a vâk lut ta ang a, a luh hnu pawh chuan pawn lam aṭang zawk chuan thing bung chuan chhuat chhinna chu a la kar ta reng ni tur a ni.

“Tichuan, Brunton-a chuan ro bawm chu a zu hawng ta a. Thingrem chhunga thil hlu ṭhenkhat chu a phawrh chhuak a, hmeichhe hnenah chuan a rawn hlan a. Chutih lai chuan hmeichhe rilru thianghlim takah chuan thlarau sual a lo lut a. A tana phuba lakna hun remchang lutuk mai leh hun ṭha chu thlarau sual chuan a rawn hmuhtir ta a ni mahna.

"Chu lai hmunah chuan ka awm ve chiah loh avangin chutih laia a rilru chu ka hmu chiah lo; mahsela, a thil karna chu a pial palh a nih chu ka ring lo lam a ni. Tichuan, hmeichhia chuan a thil kar lai chu a thlah tak mai si avangin Brunton-a chu thlan khurah a awm tihna a ni ta mai a. Chutih laia Brunton-a tana a manganthlak turzia leh a dam laia Pathian rawngbawl a lo ngaihsak ta lo kha pawi a tih turzia chu kei aiin i suangtuah thiam tawh mah zawk ang.

"Engti pawh lo ni se, ka rinna mitthla chuan pindan thim aṭanga in chung lama hmeichhe tlan chho lai chu ka hmu thei ta reng reng mai. Chutia a tlan chhoh pah chuan Brunton-a'n chhuat ker kuak chhung aṭanga thil hlu a rawn hlan chhawn pawh kha a la pawm chho ta zel a; chutih lai vek chuan thlan thim tak chhung aṭang chuan Brunton-a hlau mangang ṭanpui ngai rawl chu fiah lo takin a hriat viai viai theih a. Chhuat ker kuak chhinna a chum thawm pawh ka rinna beng chuan a hre thei asin. Chu vang chuan alawm, a tuk zanah a nuih vak vak a, mi â ang maia a khawsak zui tak a, amah enkawl tura nurse hial an rawih tak.

“Rachel Howells-i chuan a ro chan ve chu engtin nge a tih tak le? A sual rawngbawl hna thup nan a hun remchang neih hmasak berah chuan Musgrave-ate ram chhunga dilah chuan a vawm lut ta mai a, chu chu Musgrave-ate chuan an hai chhuah tawh kha. Chutiang thil vel chu chhuat ker kuak bula ka ngaihtuah chhuah vek a ni a, minute sawmhnih vel zet chu ka ngaihtuahna kal ding tak mai avang chuan che lo chang lovin ka ṭhu asin.

"Chutia ka inngaihtuah chhung chuan Musgrave chuan a khawnvar kha a la khai reng a, engtia han tihzui tur nge tih a hre bik lo. Ka ngaihtuahna kal ding lai aṭanga ka lo harh chhuah leh chuan, ‘Heng pawisa nawi tlang hi Charles I hun laia mi a ni. Kan chhungkaw thu inchhang ziah hun àwm lai vel chu kan suangtuah dik e,’ a ti nghal a.

“Nia, Watson, ka thu sawi tawh hnu kha i lo theihnghilh palh ang e. Kum 1607 vel lai khan Hurlstone In an sa a, an chhungkaw thu rochhiah chu kum 1600 leh 1700 inkara ziah a ni a. Chutih hun lai chu Charles I lal lai vel a ni a, thingrem chhunga eng ilo kan hmuh chhuah chu Charles I hun laia mi a ni bawk a, a inhmu rem kual vel vek tih i hre thei ang.

"Mugrave-a hnenah chuan, 'Charles I hun laia mi thil dang pawh hmuh tur kan la neiin ka ring, dil aṭanga in thil khai chhuah kha min han entir teh,' ka ti ta a. Tichuan, Musgrave-a a lehkha chhiarna pindan lam panin kailawnah chuan kan chho ta a ni. Musgrave-a lehkha chhiarna pindan chhung kan thlen hnua an thil khai chhuah kan han en chuan chung thil chu anni tana thil pawimawh nih theihna tur awm rêng rêng hian ka hmuhsak lo va.

"Nia, an thir khai chhuah chu a tuiêk em ni chu aw tih tur hian a dum deuh tlar a, ṭiau lung ni àwm tak tak lah chu Chhimtuipui kam ṭiau lung satliah ni àwm lek hi a ni mai. Mahsela, chung thil zinga pakhat chu ka kawr banah ka’n nawt a, ka kutphah khuar èn khalh sat sat thei khawpin a lo eng mawi ta a. An thir chhar chu zungbun angrenga siam, kual hnih inkawp chi hi a ni a; mahse, zungbun hmel pawh pu lo khawpin a sàwi chhe tawh bawk.

“Musgrave-a hnenah chuan, ‘Kumpinu rama Lal chi an lo ṭhan chhuah khan, Lalpa ber chu thi tawh mah sela an chan a la ṭha viau a. Mahse, loh theih lohna avangin Lal chi-ho tan khan Kumpinu ram hi luah ngam chi a ni ta lo va, chuvangin, an tlanchhiat dawn chuan Lal chite chuan an neih hlu ber ber chu an phum a, Kumpinu ram chu an tana a ralmuan leh hun atan an dah ṭha ta a ni,’ ka ti a. Musgrave chuan, ‘Ka pute zinga pakhat, Sir Ralph Musgrave-a chu lal hnung zuitu zingah pawh a lar pawl tak a ni asin. Charles I hnua lo lal ta, Charles II pawh khan a ral tlanna lamah pawh ka pu chu kut leh ke berah a neih nghe nghe,’ a ti ta a.

“Kei chuan, ‘A ni maw! Chuti a nih chuan kan duh chu kan hmu kim ta, thil zawng zawng chu a chhui zawn theih ta vek mai. Chuvangin, he ram chhunga thil hlui hlu ber mai kawltu i nih avangin ka lawmpuina thu ka hlan a che. Mahsela, i inhriat chhuah dan erawh chu a hahthlak deuh hlek a, thil hlui chanchin chhui mite tan phei chuan hei aia hlu tur hi a awm kher lo vang,’ ka ti ta a. Musgrave chuan mak ti zet hian, ‘A nih eng nge ka thil kawl chu?’ a ti a. Kei chuan, 'Kumpinu lal inthlah chhawngho lallukhum aia tênau chu a ni lo tawp ang,’ ti ngawtin ka chhang ta a.

"Ani chuan, ‘Lallukhum a?’ a ti ringawt a. Kei chuan, ‘Ni chiah e. Thu inchhang khan engtin nge a sawi kha? 'Tu ta nge a nih kha?' ‘Kal bo tawha ta a ni.’ Chumi awmzia chu Charles I chu an tihlum tawh tihna a ni mai. 'Engtin nge a tih leh kha? ‘Tu nge nei ta ang?’ ‘Lo kal tura chuan,' tih a nih kha. Lo kal tura chu Charles II a ni a; Charles ll lal leh tur thu kha chu kan hriat vek kha. Chuvangin, he i thil kawl hian Lal lu vun a lo chuan ve tawh ṭhin tih a chiang hle,’ ka ti ta a. Musgrave chuan, ‘A nih leh engtin nge dilah khan a lo awm mai theih?’ tiin mi zawt ta a.

"Kei chuan, ‘Chumi chhanna tur chuan thawnthu sei tak sawi a ngai ta,’ ka ti a. Thil awm dan leh a inthlun khawm dan zawng zawng chu ka hrilh ta vek a. Ka sawi zawh meuh chuan khua a lo thim a, van sangah chuan thla pawh mawi takin a lo eng bial kulh tawh a ni. Ka sawi zawh hnu chuan Musgrave chuan dil aṭanga thil hlu tak mai an khai chhuah chu ipah chuan a khung mawlh mawlh a; ka hnenah chuan, ‘A nih leh engati nge Charles II chuan lalna a rawn chan leh khan lallukhum chu a khum tak si loh?’ tiin mi zawt ta a.

"Kei chuan, ‘Chu zawng, kan thil hriat fiah theih ngai loh tur zinga mi a ni maithei a ni. Mahsela, in chhungkaw inthlah chhawng zinga mi pakhat, he thuruk vawngtu hi a thi ang a, in chhungkaw thuruk chu a thlahte hnenah a awmzia hrilh lovin a thu ringawtin a hlan chhawng ang a, a nihna tak hre lovin in chhungkaw inthlah chhawng chuan chu thil chu in kawl ta veng veng a ni ang. Tichuan, a lehkha leh a thu inchhang ringawt mai chu in inrochun kual ta ni tur a ni,’ tiin ka chhang a.

“Watson, chu chu alawm, Musgrave Ritual ka tih chu. Tunah pawh hian lallukhum chu an la kawl reng ta ve ang. I duh phawt chuan Hurlstone-ah chuan zu kal la, ka hming i sawi phawt chuan an lo entir duh ngei ang che. Kan Rachel Howells-i ve kha chu a chanchin kan hre zui ta rêng rêng lo; ka rin dan ber chuan England ram hi a chhuahsan ang a, a sualna sulhnuin a ûm phak lohna ram, tuipui ralah awmhmun a khuar a nih ka ring,” a ti ta a.

A TAWP TA.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 25th, 2018, 4:50 pm

SHERLOCK HOLMES
THE REIGATE SQUIRES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Kum 1887 kuma a hah êm avangin ka ṭhianpa, Sherlock Holmes chu rei tak chhung chu a awngrawp titih a, a ṭhat chhuah leh hma hun chu a rei viauin ka hre nghe nghe mai. Mahsela, a hahna chhan, Netherland-Sumatra Company chanchin leh Baron Maupertuis chanchin vel chu politics lam leh pawisa lam kaihhnawih thei thu a nih avangin hetia han sawi tel mai chi pawh ni meuhin ka hre lo. Mahse, chu thil pahnih chuan ka ṭhianpa chu thil pakhatah a hruai lut ve thung a, chumi avang chuan ka ṭhianpa chuan tun hmaa a la hman ngai rêng rêng loh hmanruate pawh mi sual do nan a hmuh chhuah phah ve ta.

Ka thil chhinchhiahna lehkhabu ka'n keu a, chutah chuan April ni 14-a thirhrui lehkha ka hmuh thu leh chu thirhrui chuan Hotel Dulong-ah Holmes chu dam lovin a let reng a ni tih min hrilh thu ka’n chhiar chhuak a. Thirhrui lehkha ka hmuh aṭanga darkar sawmhnih leh pali-ah chuan Holmes-a bulah chuan ka awm hman der tawh a, a natna chu a khirhkhan lem lo a ni tihte pawh ka’n en thuak thuak hnu chuan ka hmu mai a, ka hah a dam sawng sawng mai.

A taksa, thir hlum ang maia sek ṭalh mai chu a rawih rap a, ani taksa meuh han ti-rawih rap tur chuan rimtawng taka thla hnih chhung a thawh a ṭul rêng a ni. Thla hnih chhung chuan ni tinin darkar sawm panga aia tlem lo a thawk ziah a, a chang phei chuan ni nga chhungte pawh inzawm zatin hna a lo thawk ṭhin àwm e. Chuti taka a thawhrimna chuan rah duhawm tak chhuah mah sela, a taksain a tawrhna chu a hnathawh ṭhat chuan a tidam zo chuang lo va.

Europe khawmualpuia amah fakna thang ri a fawn vel lai chuan ani chu khumah a mu zawi ngawih ngawih a, a pindan chhungah lah chuan a hnathawh ṭhat avanga lawmpuina thirhrui lehkha, kephah pil dawna dai tur a awm palh ang tih mai awl a ni si. Europe khawmualpuia mi sual fing verther ber mai, khawmualpui pathuma police ṭang rual pawhina tih ngaihna an hriat loh laka a hlawhtlinna thu lawmawm lutuk tak mai pawh chuan Holmes chu a mutna khum aṭangin a kai tho zo ta lo.

Mahsela, ka thlen phei aṭanga ni thum hnu lekah chuan Holmes chu Baker Street lamah ka kirpui leh ta mai a. Chu mai ni lovin boruak danglam han hip vela, thingtlang hmun fianrial deuha han chawlh chu a châkawm em avangin ka ṭhian pakhat, Colonel Haytre-a, Afghanistan indona lama ka lo enkawl zék tawh, tuna Reigate hmuna awm min sawmna pawh chu ka hnial zo ta mang lo va.

Ani lah chuan min sawm ve chàmchi a, a mi sawmna hnuhnung berah phei chuan Surrey biala an Reigate venga kan kal duh dawn phawt chuan ka ṭhianpa, Sherlock Holmes pawh chu lawm takin an lo mikhual ang ti hialin thu mi hnutchhiah a. Hmelhriat ngai loh Ina keimah avanga mikhual chan chang tura Holmes-a han thlem chhuah chu thil awl-ai a ni hauh lo mai; mahse, pawisa puk tur ni àwm hiala ka tlawn nasat tâk avang chuan Holmes pawh chuan ka ruala Reigate-a kal chu a rem ti ve ta a.

Tichuan, Holmes-an a dam lohna khum a chhuahsan aṭanga chawlhkar khat ral hnu chuan Reigate lamah chuan kan phei ta a. Min sawmtu, Hayter-a chu sipai ṭha tak mai a ni ṭhin a, khawvel kalphung pawh a hre ve tawk hle a, rei lo têah Holmes-a nen chuan an inzawl ta viau mai nghe nghe a. Kan va thlen tlai chuan zanriah ei khamin Colonel Hayter-a silai dahna pindanah kan ṭhu khawm a, Hayter-a nena silai leh hmanraw chi hrang hrang kan en vel lai chuan ṭhutthleng ting theiah chuan Holmes chu a ṭhu thluang duai a.

Colonel Hayter-a chuan, “Kan thu dang alai chuan he puakruk pakhat hi chu pindan chung lamah ka la chho teh ang, rikrum thil a awm palh takin,” a han ti a. Kei chuan, “Rikrum thil a?” ka lo ti a. Ani chuan, “Ni e, tun hnai deuh mai khan kan ti thar deuh thut a ni. He lai vela pa khawsa thei bera kan neih, Acton-a Inah thawhṭanni kal ta mai khan tu emaw a lut a, thil tihchhiat chu nei tam lo hle mah se a titupa chu he lai velah hian a la awm reng a ni,” a ti a.

Colonel lam chu Holmes chuan a’n melh a, “Mi sualpa hnu chhui theihna tur chu thil eng mah in nei lo a maw?" a lo ti a. Colonel chuan, "Eng mah kan nei rih lo. A.... Mr Holmes, nangni ang, ram leh ram kara buaina tling tham khawp ching fel ṭhin tan zawng keini, thingtlang khawkel buaina ve hi zawng inham buai nan a tê tham lu deuh ang,” a ti a.

Chu fakna aw ri chu ngaithla duh lo ni àwm takin Holmes chuan a kut a’n phar khum tak nain a nui hmel aṭang chuan a lawm a ni tih chu a hriat theih mai. Colonel hnenah chuan, “Thil danglam deuh àwm a awm em?” tiin a’n zawt zui nghal a.

Colonel chuan, “A awm lo ni berin ka hria. A titute chuan Acton-a lehkhabu dahna pindan chu an ching let vek a; mahse, an tha hah man atan chuan an duh tawk a nêp riauvin a lang. Thil engkim mai chu an ching let vek a, pawhdawh zawng zawng an pawt dâwk a, lehkha chhutna khawl lah chu an suasam nek a. Mahse, Homer tih bu, Pope-a ziah pakhat, sathau khawnvar hunna chei mawi pahnih, lehkha delh behna mum, sailungvara siam pakhat, khaw lum leh vawt tehna sasaw thinga siam leh la hlum pakhat chauh a ni an lâk bo," a ti a.

Kei chuan, “An khawsak duh dan chu a va herh kher kher em!” ka lo ti a. Colonel Hayter chuan, “A ... an ban phâk phâk an zawng hnah ném ban ta mai a nih ber chu maw,” a lo ti a. A ṭhutthleng ting theia ṭhu duai chung chuan Holmes chu a rum nghat a, “Chu zawng, he lai biala police-te chuan an chhui zui ngei tur a nih chu. Thil awm dan han en mai pawh chuan tu hrilh ngai lovin...,” a tih lai chuan ka kut zungchal ka’n lek kawh a, “Ṭhian duh tak, he lai hmunah hian chawl hahdam tura kal i nih kha. I ngaihtuahna rilru a sawngnawi lai hi zawngin tih tur dang intuk belh teh suh, khawngaih takin,” ka lo ti ta a.

‘A mak teh ṭhin e,’ ti hmel pu chung hian Holmes chuan Colonel Hayter chu a’n melh a, a dàr a chhin ak ringawt a. Thu dang, hahthlak nêp deuh chi kan sawi zawm ta a. Mahsela, thil awm dan tur chu khuain a lo rel lawk vek a ni ngei ang, doctor ka nihna anga thurawn chhe tê ka'n pek ve chhun, ka ṭhianpain hawihhawm chhuaha zawm a lo tum mek chu a tuk zinga ka han thawh chuan bawhchhiat a ngai ta tho tho a. Chu zawng haider theih ni tawh hek lo, kan chawlh hahdamna hun ve chu kan duh dan lo puia hman a ṭul ta tho tho mai.

Tukṭhuan kan ei lai chuan Hayter-a khualchhawnpa chu hmanhmawh zetin a lo tlan lut a, phung pawh thlu hman lo chuan, “Ka pu, chanchin thar i hre tawh em? Cunningham-ate chungchang kha!” a rawn ti a. Colonel Hayter-a chuan, “Rukru an che leh ta pek a ni maw?” a lo ti a. A khualchhawnpa chuan, “Tual thahna maw le!” a lo ti a.

Colonel chuan, “Chhei le, tu nge an thah a? An pa ber nge a fapa?” a han ti a. A khualchhawnpa chuan, “A tua mah an that lo. An tawlailir khalhtu, William-a an that a ni. A thinhnunah an kap tlang a, an kah aṭang chuan thu kam khat pawh a sawi leh ta lo reng reng,” a ti a. Colonel Hayter chuan, “A kâptu chu tu nge ni?” tiin a’n zawt leh a.

Khualchhawnpa chuan, “Rukrupa chuan a kap hlum a ni; a tlan bo nghal daih a, an man hman ta lo a ni. In chhung bungraw chi hrang hrang dahna pindan tukverh a chhu chhe fel chiah tihin William-a chuan a va phâwk a, a pu bungraw venhim a tumna lamah a nun a chàn phah ta a ni,” a ti a. Colonel Hayter chuan, “Eng hun vel nge ni àwm?” tiin a zawt a. Khualchhawnpa chuan, “Nizan dar sawm pahnih vel kha a ni ang,” a ti a.

Colonel bawk chuan, “Chuti a nih zawngin a hmunhma lamah chuan kan la rawn kal ve nghal ang e,” a tihsan mai a, a tukṭhuan ei Iai chu a ei zawm a. Khualchhawnpa kal hnu chuan, “A fel lo ngawt mai. Kan pu Cunningham-a hi chu he lai velah hi chuan kan upa min a ni ve mai a, pa zahawm tak asin mawle. A chhiahhlawhpa nen chuan an inhrawn rei tawhin a chhiahhlawhpa chu a fel êm mai a, hrehawm a ti ngawt ang. Rukru-pa chu Acton-ate Ina lut kha a ni ngei ang,” a ti a.

Holmes chuan inngaihtuah mûk fe chung hian, “Thil maksak deuh deuh rutu kha maw?” tiin a lo zawt a. Colonel Hayter chuan, “Ni chiah e," a lo ti a. Holmes chuan, “Hm! He thil hi khawvela thil ho ber pawh a ni mial maithei asin; mahse, a mak zawng a mak ve a nih hi. A mak i ti ve em? Rukru intiam rual, thingtlang, hetiang hmuna che chi hi chuan an chetna hmun hi an sawn zung zung zel ṭhin a. District khatah hi chuan ni rei lo tê chhung chuan thil sual hi an ti chhunzawm duh lo viau asin.

"Nizana fimkhur thu-hla i han sawi khan ka rilru-ah chuan hetiang hmuna puithiam angreng hna thawk hi chu rukru tan chuan England ram chhunga puithiam dang an Ia awm ve ṭêk ṭêk chuan beih duh rêng rêng tur a ni lo vang tiin ngaih dan ka lo insiam a; mahsela, zir tur ka lo la ngah hle tih ka hre ta mai,” a ti a. Colonel chuan, “A titute hi chu rukru tualchher tê tê, he lai hnai vela mi hi an ni ngei ang. He lai hnai velah hi chuan Cunningham leh Acton-te chu a khawsa thei ber ber an ni tlat a ni,” a ti a.

Holmes chuan, “Khawsa thei mai ni lovin a hausa ber an ni ang maw?” a han ti a. Colonel Hayter chuan, “Ni ngei tur chu an ni; mahse, kum eng emaw ti chhung chu thubuai an nei ta tlat mai a, chu chuan a ei da ve deuh mahna le. Acton putara hian Cunningham-a te ram chanve hi neih theihna a nei ta tlat mai a, chumi avang chuan an ukilte chu mei kawhin an ṭang a ni,” a ti a. Ham bai bai chung hian Holmes chuan, "Thil sual titute hi rukru tualchher an nih ngat chuan chhui chhuah an har lo vang. Watson, ngawi rawh, tel ve ka tum rêng rêng lo a nia,” a han tih zawm a.

An khualchhawnpa chuan kawngkhar a rawn hawng a, “Inspector Forester,” tiin Colonel Hayter-a inleng tur hming chu a rawn sawi a. Chu sawrkar zêm zen mi chu pindan chhungah chuan a lo lut a, “Chibai, Colonel; ka rawn tibuai lo che u maw? Hetah hian Baker Street-a cheng ṭhin, Mr Holmes-a a awm em?” a ti a. Colonel chuan ka ṭhianpa lamah chuan a kut a'n phar a. Chibai buk pahin, “Mr Holmes, i lo tel duh kan han beisei a,” a rawn ti ta a.

Holmes chuan nui chung hian, “Watson, i ṭawngtaina a hlawhtling dawn lo a ang hle mai," mi’n tih khum zet a. Chutah, “Inspector, thil awm dan chu kan lo sawi vel mek a, chiang deuh zawkin min hrilh thei lo maw?” a ti a. A ṭhutthleng nghenchhan hnung lam ngheng chuan thatchhe àwm deuh mai hian a’n ṭhu awn a. A hmel ka’n hmuh chuan chawlh hahdamtir chu beisei chi a ni lo tih ka hre mai.

Inspector chuan, “Acton-ate chungchangah kha chuan han chhui zui theihna tur thil eng mah kan nei lo va; mahse, tun ṭumah hi chuan kan nei ta, a titu pawh a ngai a ni, a hmuh pawh an hmu nghe nghe,” a ti a. Holmes chuan, “Ah!” a lo ti ngawt a. Inspector chuan, “Ni e, ka pu, an hmu ngei alawm; mahse, William Kirwan-a a kah zawh veleh chuan sakhi thlun chhuah ang maiin a per bo ta vat a ni.

"Tual thattupa chu Mr Cunningham-a chuan an mutna pindan tukverh aṭangin a hmu a, Mr Alec Cunningham-a chuan In hnung lama inkalpawhna aṭangin a hmu bawk a ni. Chu thil lo thlen lai chu zan dar sawm pahnih rikna tur minute sawm panga vel a la awmin a ni a; chutih lai chuan Mr Cunningham chu a mu fel chiah a; Mr Alec erawh chuan mutkawr ha chungin a kuaitê a la zu a. Chutah an tawlailir khalhtu, Wiiliam-a au ri chu an hria a, William-a chu ṭanpuitu zawngin a au vel mek a ni.

“Tichuan, Mr Alec chu thil awmzia en turin a tlan thla a, In hnung lam kawngkhar chu a lo inhawng a, In chhawng aṭanga pindan hnuai a zu thlen chiah chuan pawna mi pahnih inchai lai hi a zuk hmu a. Pakhat zawk chuan silai a hmet puak a, pakhat chu a tlu nghal tawp a, chutah tual thattu chu huanah a tlan phei a, an In hungna kawldai buk chu a zuan khum a, a tlan bo ta a ni.

"A mutna pindan tukverh aṭangin Mr Cunningham-a pawh chuan kawngpuia mi tlan chu a hmu a; mahse, rei lo têah a pil bo leh ta a. William-a chu puih theih dan a awm dah lawm maw tiin Mr Alec-a chuan a va en kher a, rukrupa pawh chu ûm zui lohvin a liam bo ta a ni. Mi sualpa chu pa pangngai tiat vel, thuamhnaw rawng thim lam inbel a ni tih bâk chu eng mah kan hre lo va; mahse, uluk takin kan zawng vel reng a, mikhual emaw te a nih hlauh chuan kan hmu chhuak thuai ang,” a ti a.

Holmes chuan, “William-a chuan chu hmunah chuan eng nge a tih reng reng? A thih hmain eng emaw tal a sawi em?” a ti a. Inspector chuan, “Thu kam khat mah a sawi lo. A nu nen an awm dun a, pa rinawm leh hna thawk ṭha tak ngang a nih avangin thil en fel turin chu hmunah chuan zanah a han kal a, rukrupain tukverh a tichhe lai chu a han hmu a, an buai zui ta ni turah kan ngai mai a ni,” a ti a. Holmes chuan, “A nu hnenah chuan eng emaw tal a sawi em?” a ti a.

Inspector chuan, “A nu chu a tar tawhin a beng a ngawng tlat a, eng mah kan inzawt hlei thei lo a ni. He thil thleng avang hian a rilru a kim meuh lo lehnghal a; mahse, tun hma pawhin nu fingvar tak chu a ni lovin ka ring. Thil pawimawh tak mai pakhat a awm a, he thil hi han en ve teh,” a ti ta a. A thil chhinchhiahna lehkhabu tê ken kar aṭang chuan lehkha phek bung pakhat hi a rawn phawrh a, a mal chungah chuan a han kai pharh a.

Holmes-a hnenah chuan, “Lehkha phek, hlai deuh hlek zawk aṭanga pawh thlak ni àwm tak a ni a. Kha, khata thu inziak pawh kha an buaina tawh hun nen hian a induh viau a ni. William-a thattu chuan lehkha phek hi William-a kut aṭanga a pawt thla a nih loh vek pawhin William-a chuan a pawh thlaksak zawk a ang ngawt mai. Inhmu tura intiamna ni àwm tak a ni,” a ti a. Chu lehkha chu Holmes chuan a’n la a, hetiang hi a lo ni a :

- at quarter to twelve (sawm pahnih rikna tur minute sawm panga-ah)

*learn what* (eng nge tih hre mai)

*may* (thei)
storyfb.com.jpg
(A kut ziak hawrawp tak tak hi hetah hian a nihna angin a lan theih loh avangin a pic ka upload mai e.)
storyfb.com.jpg (10.82 KiB) Viewed 14108 times
Inspector chuan, “lnhmuh tum intiamna lehkha angah he lehkha hi lo ngai ta ila, William Kirwan-a hi a rinawm hle anga an sawi chung pawh hian rukrupa nen hian inzawmna eng emaw chu an lo nei a ni ang tih a rin theih tlat a ni. Rukrupa nen hian an inhmu ang a, tukverh pawh hi an chhut chhiat dun pawh a ni maithei a, chutah an innghirngho zui ta pawh a ni maithei,” a ti a.

Holmes chuan chu lehkha chu ngun taka en reng chung chuan, “He lehkha hi en mai aia belh chian chi a ni. Kan thil tih hi rin aia ngaihtuah ngun ngai tur a ni,” a ti a. lnngaihtuah mûk tih hriat tak hian a kutin a lu a dawm ta veng veng a. Chu London khawpuia mi sual hnu chhui thiam hmingthangina chu thil a ngaihtuah nasatzia a han hmuh chuan Inspector chu a nui var var a.

Chutah Holmes chuan, “I thil sawi hnuhnung ber kha, rukrupa leh William-a intiam rual theih thu-hla kha, thil awm thei lo chu a ni hauh lo va; mahse, he lehkha hi hetiang hian a inṭan...," a ti a, sawi zawm lovin a kut chuan a lu a dawm a, a inngaihtuah leh ta veng veng a. A lu a rawn tun leh chuan a biangah chuan ti sen a lo awm a, a mitmeng pawh chu a dam loh hma ai mahin a fiah ṭha leh ta mai a, mak ka ti kher mai!

Zuanzang àwm tak mai hian a rawn ding chhuak a, “Ka han hrilh ang che u. He thil hi han en ve mai mai ka duh ang, min tiphur hle mai. Colonel, rem i tih chuan Watson-a nen hian he hmunah hian ka kalsan ang che u a, ka ngaih dan hi a dik leh dik loh Inspector nen hian kan va en fiah ang e. Darkar chanve hnuah chuan ka lo kal leh thei mai ang,” a ti ta a.

Darkar khat leh a chanve ral hnu chuan Inspector chu amah chauhvin a lo lut a, “Mr Holmes chu tualzawlah a la vei tuak sek mai. Inah chuan kan vaia kal turin min duh a ni," a rawn ti a. Colonel chuan, “Mr Cunningham-a te Inah maw?” tiin a lo zawt a. Inspector chuan, “Ni e ka pu,” tiin a lo chhang a. Colonel chuan, “Enga tan maw?” a ti leh a.

Inspector chuan a dar a‘n tichhing ak a, “Ka pu, ka hre bik chiah lo le. In hriatah chuan han sawi ta mai ila, Mr Holmes-a chu a dam lohna aṭang khan a la ṭha chhuak chiah lo niin ka hria. A khawsak dan a mak riau a, a phur hmel êm êm bawk,” a ti a. Kei chuan, “Hlauthawng duh suh u, a âtna hian hawi zawng a nei riau ṭhin tih ka hre tlat a ni,” ka lo ti a. Inspector chuan, "Ṭhenkhat chuan a hawi zawng hian âtna a nei ti te pawhin an sawi thei ve bawk ang chu. Colonel, in inpeih chuan kal ila a ṭha ang, a phur riau si a,” a ti a.

Kan va thlen chuan Holmes-a chuan a kut khing hnih chuan a kekawr iptê a lo zen a, a lo vei tuak sek a, a Iu chu a kun tlat bawk a. Kan hnenah chuan, “Watson, thil awm dan chu a phurthlak telh telh mai, thingtlang hmuna min chawlh hahdampuina chu a thlawn lo ve. Tukin chu ka lung te pawh a léng ve rum rum mai,” a lo ti a. Colonel chuan, “He thil hi a hnu i chhui zel ang chu maw?” a lo ti a.

Holmes chuan, “Aw, chhui zel e. Inspector nen hian thil kan Io thlir dun nasa mai a ni,” a ti a. Colonel chuan, “In hlawhtling em?” a ti a. Holmes chuan, “Thil hmuhnawm tak mai kan hmu a ni. Kan kal pahin ka hrilh ang che u. A hmasa berin he mi vanduai tak mai ruang hi kan hmu a, an sawi ang ngeiin puakruka kah hlum a ni,” a ti a. Colonel chuan, “Uai, a hma khan i lo ringhlel elo?” a han ti a.

Holmes chuan, “Thil rêng rêng hi en fiah vek zel a ṭha ngai. Kan thil en fiahna chu a thlawn lo ve. Chutah Mr Cunningham-a leh a fapa kan be leh a, rukrupa tlan chhuahna zawn kawldai buk pawh min kawhhmuh a. Chu chu thil pawimawh deuh mai a ni,” a ti a. Colonel chuan, “A ni ngawt mai,” a lo ti ve mai a. Holmes chuan, “Chutah mitthi nu chu kan va hmu leh a. A tar tawhin a chak tawh lo em mai a, thil eng mah chu kan hriat belh thei ta chuang lo,” a ti leh a.

Colonel chuan, “A nih leh in thil en fiahna chuan eng nge a hrin chhuah chu le?” tiin a zawt a. Holmes chuan, “He sualna hnathawh hi thil mak danglam tak tih hriat chianna a hring chhuak a ni. Tuna kan va kalna hian thil fiah lo ṭhenkhat chu a tifiah thei maithei a ni. Inspector, mitthi kut aṭanga lehkha an hmuh chhuah, a thih hun inziakna kha thil pawimawh tawpkhawk niin kan ngai ve vein ka hria a,” a han ti leh daih a.

Inspector chuan, “Mr Holmes, hnu chhui nan a ṭangkai ang chu,” a lo ti a. Holmes chuan, “Hnu chhui nan a tangkai ngei a ni. Kha lehkha ziaktu kha chu a khum aṭanga William Kirwan-a kai chhuaktu kan ti thei ang. Mahse, khawiah nge lehkha bung lehlam chu a awm tak?” a ti a. Inspector chuan, “Hmuh mai inbeiseiin tualzawl zawng zawng hi uluk takin ka zawng tawh a ni,” a lo ti a.

Holmes chuan, “Mitthi kut aṭang khan a phiha phih thlak a ni a. Eng vangin nge tu emaw chuan chu lehkha chu lak kir leh a duh em emna chhan? A chhan chu amah a kaihhnawih ve dawn vang chiah a ni. A nih leh lehkha bung lehlam chu engtin nge a tih zui tak ang? A iptêah a hnawh lut ngeiin a rinawm a, mi ruang kutah chuan a bung lehlam a la bet ṭhen a ni tih pawh a hre kher lo vang. Lehkha phek pawh bun lehlam kha kan neih theih chuan he thiI chin felnaah hian thui takin hma kan sawn tihna a ni ngei ang," a ti ta a.

Inspector chuan, “A mi suala man mang si lova mi sual iptê aṭanga Iehkha phek phawrh chhuah chu a huphurhawm duh hle ta ve ang,” a lo ti a. Holmes chuan, “A ni ngawt mai, a dik chiah a ni, ngaihtuah ngun a ngai reng a ni. Thil dang pakhat, lang tlang sa reng a awm Ieh pek. Kha lehkha kha William-a hnenah a thawna thawn a ni a; chuti a nih Ioh chuan lehkha thawntu chuan a sawi duh chu ṭawngka pawhin a sawi mai ta ve ang. A nih leh Iehkha chu William-a hnenah chuan tu nge pe ta? Dakah an inthawn em ni chu le?” a ti leh ta zel a.

Inspector chuan, "Thil ka’n zawh velnaah chuan nimina William-a'n dak aṭanga lehkha a hmuh thu leh a lehkha hmuhna lehkhaip chu a tihriral thu ka dawng a ni,” a ti a. Holmes chuan Inspector chu a hnungzangah a’n beng thap thap a, “A ṭha lutuk! Dakpu chu nangma’n i hmu a ni maw? I bula hnathawh a nuam hle mai. Hei le, In chu kan lo thleng ta. Colonel, lo kal la, an tual thahna hmun chu ka’n kawhhmuh ang che,” a ti ta a.

In tê tak tê, fel ren rawna sak hi kan pel a, chu In chu William-a Ieh a nu chènna hmun chu a ni. Chutah sasaw thing ding tlar kara kalin Cunningham-ate In chu kan pan a. Chu In chu ṭuan leh manga sak tawh ni maia màwi a ni a, a sak zawh ni, kawngkhar lu chung lama an tar pawh chu a tharlam tawh lo kher mai. Holmes leh Inspector chuan hma an hruai a, In sir lama luhnaah chuan kan kal a, In hungna dai kawngkhar kan va thleng a, chu dai kawngkhar zulzui chuan kawldai an phun tlar a, chutah tualzawl a lo awm Ieh a, chutah In chu kan va thleng ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 25th, 2018, 10:38 pm

SHERLOCK HOLMES
THE REIGATE SQUIRES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last)
(Rozami Pachuau)

Choka kawngkharah chuan police constable (constable bel nei lo) hi a lo ding a. Holmes chuan Inspector hnenah chuan, “Officer, kawngkhar kha han hawng teh. Khai le, saw lai kailawnah sawn Mr Cunningham-a chu a ding a, tuna kan dinna hmun chiaha mi pahnih inbengberek lai hi a hmu a. A pa zawk Cunningham Putara chu saw lai tukverh vei lam zawk pahnihnaah sawn a awm a, sawta ṭang sawn mi sualpain saw lai kawldai buk, vei lama mi a kân tur saw a hmu a, a fapa pawhin a hmu bawk. Kawldai buk awm dan aṭangin an thil hmuh chhuahna lai chu an hre chiang ve ve a ni. Chutah a fapa, Alec Cunningham-a chu a tlan chhuak a, mihliam bulah chuan a va ṭhingṭhi a. A leilung hi a chan êm avangin thil dang han hmuh zui theih turin hnu-hma a hnutchhiah lo a ni,” a ti ta a.

Chutia a sawi lai chuan huan lam aṭang chuan mi pahnih hi an lo chhuk thla a, pakhat chu pa upa deuh, hmaifang ramri fel tak mai, mitmeng hah hmel tak pu hi a ni a. Pakhat chu tlangval naupang deuh, harhvang hmel tak mai, hmel hlim tak pu-a nui deuh sang reng mai, an dinhmun nena inrem lo tak maia thuamhnaw lar tak inbel hi a ni a. Holmes-a hnenah chuan, “In la bei reng a ni maw? Kan London khawpui aṭanga lo kal meuh chuan eng mah in hre sual thei lo emaw tih nâk alaiin, in che chak vak lo a ang hle mai,” a rawn ti a.

Holmes chuan hlim hmel pu tak hian, “Ah! Eng emaw chen chu min lo ngaithiam ve ṭhin ula maw le,” a ti a. Cunningham-a fapa chuan, “Hun chu in mamawh ngei ang. Han chhui zui theihna tur thil eng mah hnutchhiah an nei hlei nem,” a ti a. Inspector chuan, “Thil pakhat chauh a awm. Kan tum anga Ieh... uai! Mr Holmes, engtizia nge ni ta mai chu Ie?” a’n ti a.

Chutih Iai chuan ka ṭhianpa hmel chu a khawngaihthlak theih tawp hi a ni ringawt mai. Hrehawm tawpkhawk tuar ni àwm tak hian a mit chu a meng pual a, rùm chhuah tuma thei lo tih hriat tak hian hmaia lei tauh chawrhin tualzawlah chuan a tlu ta a. A awm dan chu a rapthlak êm avangin rang takin chokaah chuan kan pawm lut a, chokaah chuan ṭhutthlengah a ṭhu a, hah àwm takin eng emaw chen chu a thaw hlawp hlawp a.

A tawpah chuan zak hmel pu tak chung hian a ṭhutna aṭang chuan a lo tho chhuak a, “Watson-a hian sawi duh sela chuan hmanni lawkah natna ka tuar hrep a ni tih a hrilh thei ang che u. Hetianga tlu buai thut thei ka nih hi a hre reng ang,” a ti a. Cunningham-a chuan, “Ka tawlailir hian kan han khalh haw mai dawn che em ni?” a ti a. Holmes chuan, “Thil pakhat chauh hriat chian duh ka la nei a; awlsam takin kan hre fiah thei mai ang,” a ti a.

Cunningham chuan, “Chu chu eng nge ni?” a lo ti vat a. Holmes chuan, “Ka ngaih dan mai mai chuan rukrupain in chhung a luh fel hnuah chauh William-a hi a lo thleng ve ta niin ngaih theihna lai a awm a, rukrupain in chhung a luh hma hian William-a chu hetah a lo thleng chho hman lo maithei ka tihna a nih chu. Kawngkharpui lam kha chu inhawng mah sela, rukrupa chu In chhungah a lut lo niin in ngaiin ka hria a,” a ti a.

Cunningham-a chuan, “Chu zawng, thil chiang sa a ni mai alawm. Ka fapa Alec-a chu a la mu hman lo va, In chhungah mi dang chu vei vel ta sela chuan a hre êm êm ang,” a ti a. Holmes chuan, “I fapa chu khawiah nge a ṭhut?” a lo ti a. Cunningham-a chuan a chhan hma chuan Alec-a chuan, “Ka incheina pindanah kuaitê ka zu a ni,” a lo ti a. Holmes chuan, “Chu pindan chu khawi tukverh zawnah hian nge a awm?” a ti ta zel a.

Alec-a chuan, “Ka pa mutna pindan dawttu chiaha tukverh vei lama a tawp ber zawnah,” a ti a. Holmes-a chuan, “Chuti, in khawnvar chu in la tihlum lo ve ve a ni maw?” a ti leh ta a. Alec-a chuan, “Tihlum lo tawp mai,” tiin a chhang a. Holmes chuan, “He lai hi alawm mak ka tih riau chu. Chhungkhata mi pahnih an men lai renga mi In han rawk tum ngam chu rukru, tun hma pawha ruk lo ru tawh ṭhin tan chuan a mak deuh hlek a ni,” a ti a.

Alec chuan, “Pa thluak ném tak zawng a ni hauh lo vang le,” a lo ti a. Chutah Holmes-a lam chu a hawi a, “He thil hi thil danglam bik ni lo sela chuan i puihna hi kan phut kher lo vang; mahse, William-a lo thlen hmaa in chhunga lo lut hman ni àwma i ngai kha chu thil mak tak niin ka hria. Khatiang kha thil awm dan chu ni sela chuan kan in chhung bungrua hi a lo khawih chingpen hman ngei ang chu,” a ti ta a.

Holmes chuan, “A bungrua azir a ni mai. Kan bitum pa hi mi danglam tak mai, mahni duh ang ngata che ṭhin a niin a lang a. Entir nan, Acton-a In aṭanga a thil lak te kha - la hlum, lehkha delh behna leh thil mak dang dang a nih kha!” a ti a. Cunningham Putara zawk chuan, “Mr Holmes, i thu hnuaia awm vek kan ni e, i duh duhin ching kual la, Inspector nena in duh dan ang ang chuan kan ti zel ang,” a lo ti a.

Holmes chuan, “A hmasa berin lawmman phalrai phawt mai teh u; mahse, sawrkar thu chhuak anga tih ve a ngaih dawn avangin thil chu a muangchang deuh ngei ang a. Hei a ziah dan tur ka ruahman sa vek a, hetah hian i hming ziak mai la a ṭhain ka ring. Keia ngaih ve dan chuan pound sawmnga chu a tawk viau a, chu chu sawrkar lamin lo en fel sela,” a ti ta a.

Cunningham Putara chuan Holmes-an pencil leh lehkhapuan a pek chu a la a, “Pound zanga pawh ka phal zân mai,” a han ti a. Chutah, lehkha chu a’n en a, “Hei hi a dik chiah lo a nih hi,” a ti a. Holmes chuan, “Ka hmanhmawh deuh atin a ni,” a lo ti a. Cunningham-a chuan, “Hei i ziah dan hi, ‘Thawhlehni, zing dar khat rikna tur minute sawm panga a la awm tih velah khan...,' i ti a; zan dar sawm pahnih rikna tur minute sawm panga a la awm tih zawk tur a ni,” a ti a.

Chutiang thila tihsual neih chu Holmes-a'n a hrehawm a tih turzia ka ngaihtuah chuan hrehawm ka lo ti ve hle a. A dik chiah chuan hetiang thilah hi chuan Holmes chu pa duh uluk ber leh thii tisual khat ber niin ka hria a, chuvangin, a dam Iohna aṭang khan a la ṭha chhuak fel zat lo a nih pawh ka ring ve rum rum mai. Amah pawh chu a buai tih a hriat hle a, a mithmul a’n chuar a, Inspector pawh chu a ngaihna hre lovin a hawi he haw a, chutah Alec Cunningham-a chu ring zetin a rawn nui chhuak a.

Alec-a pa chuan Holmes-a thil ziah dik loh chu a ziak ṭha a, lehkha chu Holmes-a hnenah a pe let leh a, “Chhuttir vat ang che. I ngaih dan kha ṭha ka tih zawng tak a ni,” a ti nghal a. Holmes chuan chu lehkha chu fimkhur takin a iptêa a thil chhinchhiahna lehkhabu tê karah chuan a zep a. Chutah, “Tunah chuan inpui lamah kal ila, kan rukrupa hian thil eng mah a la lo tak zet em ni tih chu kan mit ngeiin i han en fiah teh ang,” a ti leh ta a.

Inpuia kan luh hma chuan Holmes chuan kawngkharpui, inhawng sa ber kha ngun takin a’n en a. Han en mai pawh chuan chu kawngkhar chu thirkhenin emaw, chemtê khauh takin emaw an kar vak a, a kalhtu chu an kar tawm tih hi a hriat reng mai a. Holmes chuan, “Tukverhah hian mihring luh theih lohna tura thir kham in kham ngai na nge?” a ti a. Cunningham chuan, “A ṭulna àwm kan hre lo a ni,” a ti a. “Ui in vulh em?” a ti leh a. Cunningham chuan, “Vulh e; mahse, In sir lehlam daihah kan thlung a ni,” a ti a.

Holmes chuan, “In chhiahhlawhte chu eng tikah nge an mut ṭhin?” tiin a zawt ta zel a. “Dar sawm velah,” tiin a chhang a. Holmes chuan, “William-a pawh chu chutiang hun velah bawk chuan a mu ṭhin ang maw?” a ti a. Cunningham-a chuan, “Aw,” tiin a chhang a. Holmes chuan, “Hemi zan kher khera a la mu lo hi chu a mak hle mai. Mr Cunningham, in In hi min en vêltir phal chuan ka lawm êm êm ang,” a ti ta a.

Choka aṭang chuan kalna tura an siam, lung inphahah kan kal phei a, chutah choka bathlar kan pèl hlawt tih chuan thinga siam, kailawn hi kan va thleng a, an lnpui chuanhnuai ber chu kan thleng a ni der mai. Chuta ṭang chuan kailawn mawihnai deuh zawk pawh a hmuh leh theih nghal a, chu kailawn chu pindan pawn ber leh zau ber aṭanga chung lama chhohna kailawn a lo ni tawh a.

Chu kailawn kan han lawn chhuah chuan lem ziakna pindan kan han thleng a, mutna pindan ṭhahnem tham tak a lo awm a, chung zingah chuan Cunningham-a mutna pindan leh a fapa mutna pindan pawh a tel a. Holmes chu muang têin a kal chhet chhet a, an In sak dan chu ngun deuh maiin a thlêk pah zel a. A hmel ka’n en chuan eng emaw tak chu hriat a nei tih hi ka hria a; mahse, a hriatna chu khawi lamah nge a innghah tih rêng rêng ka chhuipui ve pha lo mai.

Chutia Holmes-a chevel chu Cunningham-a chuan a tuar zo ta lo a ni chék ang chu ṭawng bung lek lek hian, “Ka pu duh tak, hetia tih vak hi chu a ṭul miah lo mai. Kha, kailawn lo chhuahna chiaha pindan kha ka mutna pindan a ni a, a piah leh chiaha mi khu ka fapa mutna pindan a ni a. Rukrupa chu kan hriat lohvin he lai hmunah hian a lo thleng chho lo tawp ang tih chu in fin êm avangin in hre ve ngei turah ka ngai a ni,” a rawn ti ta fak mai a. Nuih ṭha lova nui tih hriat rêng rêng hian a fapa tlangval, Alec-a pawh chuan, “A bul aṭangin ṭan leh la, hnu dang chhui tur zawng leh la a ṭhat ka ring,” a lo ti ve bawk a.

Holmes chuan, “Chu pawh ni sela, ka inkhualtelemna hi min lo chawk buai rih lo turin ka la ngen duh cheu che u a ni. Entir nan, tunah mai pawh hian he laia mutna pindan zawna tukverh hian In hma lam hi eng chen nge a huam chin, tukverh aṭang hian In hma lam hi eng thleng nge lang thei tih ka la hre duh a ni. Hei hi i fapa mutna pindan chu a ni ngei ang a," tih pahin mutna pindan kawngkhar chu a hawng nghal a.

"Tichuan, kha laia incheina pindanah khan William-a au ri a hriat lai chuan a ṭhu a ni àwm phawt a. Kha tukverh aṭang khan khawi lam nge a hmuh theih chu le?” a han ti a. Pindanah chuan a vei tlang a, pindan dang chu a va melh kual thuak thuak a. Cunningham-a chuan, “I duh tâwk i ngah tawh ang chu maw?” tiin nuihzat âwka deuh hlek hian a lo chhawnchhaih a. Holmes chuan, “Ka lawm e; ka duh ang chu ka hmu kim ta,” a han ti a.

Cunningham-a chuan, “Chuti a nih chuan ka pindan lamah kan kal em ni ang? A ṭul ve ngei àwm si a,” a ti a. Holmes chuan, “A buaithlak lutuk loh chuan nia maw le,” a lo ti mai a. Cunningham-a chuan a dar a sawi chhing nawk a, a pindan lam pan chuan hma a hruai ta a. A pindan chu a mawlin a danglam vak lo hle a. Tukverh lam kan pan lai chuan Holmes chu a muangchang lui a, kan pahnih chuan kan hnuhnung ta bik nghe nghe a.

Pindan chhunga khum bulah chuan dawhkan tesep, bial chei chawi hi an hung a, chumi chungah chuan serthlum zai sa hi thlengah an dah a, tuisik an chhawp bawk a. Chumi kan kal pelh lai tak mai chuan Holmes chu ka hmaah a kal deuh hlek a, ka rin loh tak maiin chu dawhkan tesep chu a tithlu lui ta a, a chunga thil dah zawng zawng chu a baw fai vek a. Serthlum zai sa chu pindan kil lamah a lir darh sung sung a, an darthlalang no dah pawh chu chhar khawm huphurhawm khawpin a keh sawm nasa ta mai a.

Hmel danglam miah lo hian Holmes chuan, “Watson, i tih a nih pek kha, i chêt sual avangin chhuatphah pawh i timawihnai lo zo vek tawh alawm,” a han ti a. Rilru buai tak chungin thil bua vêl chu chhar turin ka’n kun a, mi dang pawh chuan an rawn chhar ve nghal bawk a. Ka ṭhianpa chuan chhan nei lovin eng mah a ti Io vang tih ka ring tlat a. Chutia kan chhar buai lai chuan Inspector chuan, “Uai! khawiah nge a kal tâk chu le?" a’n ti a. A ni tak a, Holmes-a chu a lo awm tawh hlek Io mai a.

Cunningham-a fapa, Alec Cunningham-a chuan, “Hetah hian lo nghak lawk rawh u khai. Kan ṭhianpa kha a rilru a kim zan lo ni tlatin ka hria; ka pa, lo kal rawh, i va enzui teh ang,” a ti a. An pafa chuan pindan aṭang chuan an tlan chhuak a, kei nen, Inspector nen, Colonel nen chuan kan awm ta ṭhap a, a ngaihna tak pawh kan hre bik Io.

Inspector chuan, “Kan nau Alec-a thu sawi kha ka awih zawng tak a ni tlat mai. A dam loh avang khan eng emaw chu a la awm a ni àwm mang e ka ti deuh a; mahse, ka ngaih dan chuan...,” a ti hman chauh a, “Min ṭanpui ru! Tual thah! Min ṭanpui ru!” tia au ri kan hre ta mai a. Pindan aṭang chuan rilru buai mup mup chungin ka tlan chhuak vat a. Au aw pawh chu a ri ṭha hlei thei tawh Io va, a ri bawrh bawrh chauh tawh a.

Pindan inkalpawhna ka va thlen chuan au ri chu kan Iuhna hmasa zawk pindan chhung aṭanga lo chhuak a ni tih ka hria a. Pindan chhungah chuan ka tlan lut vat a, incheina pindan chhungah ka tlang phei nghal a. Incheina pindan chhungah chuan Sherlock Holmes chu chhuatah a lo mu a, a hrawkah chuan Cunningham-a fapa chuan a kut khing hnihin a rêk a, Cunningham-a chuan Holmes-a kut lehlam chu a lo herh ngawt ngawt a.

Rei lo têah kan pathum chuan chu mite pafa chu kan han pawt kiang a, hmai dang tak chung hian Holmes chu a lo ding chhuak a, a pai ṭak ṭak nghe nghe a, a chau hlein ka hre mai. Thaw hlawp hlawp chung hian Holmes chuan, “Inspector, heng mite hi man rawh!” a ti ta mai a. Inspector chuan, “Eng vangin?” a lo ti a. Holmes chuan, “An tawlailir khalhtu, William Kirwan-a an thah avangin!" tiin a lo chhang a.

Inspector chuan mak ti zet mai hian a’n en kual vel ringawt a, Holmes-a hnenah chuan, “Ngawi teh Mr Holmes, i thu sawi hi i ti tak tak hauh...," a tih lai chuan Holmes chuan bung zet hian, “Ho mai mai, an hmél kha en la ti nia,” a lo ti vin ta tuk mai a. Chu mite pafa hmela suahsualna lang chhuak aia chiang chu ka la hmuh àwm pawh ka hre lo.

Cunningham-a hmelah chuan mak tihna te, hahna te, nguina te hi a awm vek hian ka hria a. A fapa hmel hlim set sawr, hawi dâk ar mai leh mitmeng chung lap pawh chu a bo vek a, a hmel chu a chhe thar thut a, a ngeiawm lamah a kal tlat mai. Eng mah sawi lovin Inspector chuan kawngkhar lam a pan a, a hamrik chu a’n ham a, a ṭhuihhruai pahnih chu an lo Iang nghal vat a.

Inspector chuan, “Mr Cunningham, tih theih dang ka nei lo a ni. Thil tihsual palh eng emaw a awm a ni ngei ang. Mahse, han en ve la; uai, i ti dawn elo? Dah vat rawh!” a ti a. Chutia tih pah chuan a kut chu a vai nghal thuak a, Cunningham-a fapain puakruk a phawrh chhuah sa chu chhuatah chuan a tla ri bawl a.

Holmes chuan, “Kha kha vawng ṭha rawh. Nakinah thubuai sawi hunah a la ṭangkai ang. Mahse, hei tak hi a nia kan duh zawk chu,” tih pahin lehkha phek pakhat hi a rawn lek chhuak a. Inspector chuan, “Lehkha pawh bun lehlam kha elo?” a lo ti vat a. Holmes chuan, “Ni chiah e,” tiin a chhang a. Inspector chuan, “Khawiah nge a lo awm?” tiin a’n zawt a.

Holmes chuan, “A awm tih ka rinna hmunah ngei a lo awm a ni. Thil awm dan chu ka’n hrilh fiah nghal vek ang che u. Colonel, Watson-a nen hi chuan lo va haw leh ta rih ula, darkar khat chhungin lo kal hman ngei ka rawn tum ang. Kan Lung In tangho hi Inspector nen hian kan han be zawk tang e; mahse, chhun chaw chu ka rawn fâkpui hman tho vang che u,” a ti a.

A tih ang tak tak chuan darkar khat hnu vel lekah chuan Colonel pindanah chuan kan ṭhu khawm a. Holmes chuan pa upa deuh, pa tê lam lek lek, Mr Acton chu a rawn hruai a. Mr Acton-a In hi an rawk hmasak ber kha a ni.

Holmes chuan, “He thil ka hrilh fiah vêl lai hian Mr Acton hi awm ve se ka duh a ni. Thil awm dan han hriat fiah hi a tan a chakawm dawn riau tih a lang reng si a. Colonel, hei, chawlh kan rawn hmang a, kan rawn tibuai lek che a ang zâwk ngawt mai, kei pawh hi chawlh hmang tura rawn thawk chhuakah ve lem si chuan ka hahdam vak bik lo ve,” a han ti a.

Colonel chuan hlim hmel pu tak mai hian, “A lehlamah chuan i hna thawh dan thlirpui theihna hun che ka nei hi ka tan chuan thil vanneihthlak tawpkhawk a ni ve asin. Ka lo rindan che aiin i chet dan hi a ropui daih mai; a tlang i kawmna tur phei kha chu ka hre thiam pha lo reng reng a ni. Khatianga ti thei tura thil danglam bik i hmuh àwm rêng rêng pawh ka lo hre lo,” a ti a.

Holmes chuan, “Ka han hrilh fiah ang a, thil ho tê a niin i hre palh mai ang tih pawh ka hlau hlel lo; mahse, ka hna thawh dan kalhmang reng reng chu Watson-a emaw, mi dang tu emaw pawhin an hriat duh phawt chuan ka puangzar hreh ngai rêng rêng lo. Mahse, nichina an incheina pindana kan han inbengberekna velah khan ka hah riau mai a, i zufang hi mahniin ka lo inthlit ve mai ang chu? Tun hnai deuh mai khan tha leh zung lamah fiahna ka tâwk nasa deuh hlek a, ka chàu lek lek mai,” a han ti a.

Colonel chuan, “Lungphu ṭhat loh vanga tlûk thut chu i ching tawh lo hram ang chu tih ka lo beisei ru ve ngawt mai a ni,” a lo ti a. Za deuh mai hian Sherlock Holmes chu a’n nui hawk hawk a. Chutah, “Kan buaina kha a chinchhuakin ka han hrilh ang che u, thil awm dan pawh kha a sakal deuhin sawi ila a ṭha ang. Chutah ngaih dan min neihtirtu thil hrang hrang chu kan sawi uar deuh bik ti ila, kan tar lang chiang deuh bik ang a. Hriat fiah mang loh lai in neih phawt chuan in duh hun hunah min lo zawtin min lo pawh chahsak dawn nia.

“Chhui chhuahna hna-ah reng reng hi chuan thil lo thleng palh ve mai mai leh loh theih lohva thil lo thleng thliar thlam hi a pawimawh êm êm ringawt a. Chumi kan thliar thiam loh chuan kan tha leh zung chu a hlawma kal lovin a kal darh tihna tluk a ni ngei ang. He thilah hi chuan kan thil duh zawng zawng hriat fiahna chu mitthi kuta lehkha thema thil inziak aṭang khan kan hre tur niin ka ring nghal tlat a. Hetah hian kan thil duh chu a hriat fiah theih ngeiin ka ring nghal a nih chu. Chumi lam thu kan sawi hma chuan thil pakhat hre turin ka duh che u a.

"Alec Cunningham-a thu sawi kha lo dikin, William Kirwan-a thattu khan William-a a thah veleh khan tlanchhiat ngawt kha chu hnaah neih ta sela chuan William-a kut aṭanga lehkha pawt thlatu kha chu a ni thei lo tawp tih a lang chiang nghal a ni. Mahse, lehkha pawt thlatu chu rukrupa chu a nih loh phawt chuan Alec Cunningham-a zawk chu a ni ngei ngei tur a ni tlat mai. A chhan chu Alec-a pa, Cunningham-a kha a lo chhuk thlen ve meuh chuan miruang bulah chuan chhiahhlawh an pung hut hut hman tawh tlat a ni.

“Chu thil chu thil lang chiang sa lutuk a ni a; mahse, Inspector kha chuan a hmuh hmaih tlat mai, a chhan pawh he lai vela pa neinung deuhte hi chu thil sual ti ve thei lo anga ngaih dan a neih sa vang chauh a ni. Ngaih dan nei lâwk lo tawpin thil ka ti a, thil awm danin a kawhna lam lamah ka ke ka pên ta mai ṭhin a, chuvangin, ka thil hriat hmasak ber aṭang pawh chuan Mr Alec Cunningham-a hian eng thil nge a lo tih ve chiah tih hi ka ngaihven ru ta a ni.

“Chutah Inspector-in lehkha them min pek, miruang kut aṭanga an lâk kha ngun em emin ka han en a. Chu Iehkha chu lehkha mak danglam tak mai a ni tih ka hmu chhuak a. Hei hi a lehkha chu a nia, han en ve teh reng u. Thil eng emaw tal chu a hrilh ve lo che u maw?“ a‘n ti a. Colonel chuan, “A mumal lo kher mai," a han ti a.

Holmes chuan, “Pu duh tak, he lehkha hi mi pahnih kut chhuak, hawrawp mal tina inziah chhawk zel kut hnu a ni chiang lutuk tlat a ni. Lehkha hi han en ula, ‘at' tihah leh ‘to’ tihah hian ‘t’ hi a ziaktu hian a ziak hraw hle a; mahse, ‘quarter’ tih leh ‘twelve’ tihah erawh hi chuan ‘t’ hi a ziak ningnel leh hle si a ni tih in hre thiam ngei ang. Chumi han hmuh tawh hnu chuan ‘learn’ tih leh ‘maybe’ tih hi chu a ziak hraw zawk kut hnu a ni a, ‘what’ hi chu a kut ziak ningnel zawk kut hnu a ni tih hriat a harsa tawh lo,” a'n ti a.
www.storyfb.com.jpeg
www.storyfb.com.jpeg (10.82 KiB) Viewed 14117 times
Colonel chuan, “A ni tak maw! Chhun khaw eng ang maia lang chiang alawm maw le! Engati nge khatianga an han ziah kher kher chu aw?" a lo ti a. Holmes chuan, “An rilru chhungrilah Jerusalem thar ngaihna awm hlawl hek lo maw le. A tu zawk zawk emaw hian an thil tih reng rengah chuan thiam loh thuhmun an chan theih nan an kal thuk zawng inang chiah turin an duh tihna a ni mai. Khai le, chu mite pahnih zingah chuan ‘at’ tih leh ‘to' tih ziaktu hi chu a thusa zawk a ni tih a lang leh ta a ni,” a han ti a. Colonel chuan, “Chu chu engtin nge i hriat theih?” a’n ti a.

Holmes chuan, “An kut ziak kha han en ila kan chhût chhuak leh thei mai ang. Kan rin thu-hla mai mai ni lovin chhan ṭha tawk tak neiin chu thil chu kan sawi thei a ni tih pawh a hriat ang chu. Lehkha ziak kha ngun takin han en u la, a kut ziak phawkphawhraw zawk khan a ziak zo hmasa vek phawt a, chutah pakhat zawk ziahna tur chu a ti-awl ta zel a; mahse, a ṭhen laiah chuan a zuah awl chu a lo tâwk zo ṭhin lo va. Kha, ‘quarter’ tih kha en ula, ‘at’ leh ‘to’ inkara leng thei tur angin a pawt chhe kual ta tih in hmu ang. A ziak hmasa zawk zawk chu a thusa zawk tihna an ni mai a, he an thil tih ruahmantu pawh hi a ni mai,” a ti a.

Mr Acton chu, “A nalh Iutuk," tiin a lo ṭe chhuak a. Holmes chuan, “An chet dan hi mak danglam tak mai a ni a. An chet dan pakhat, pawimawh tak mai i han thiir leh teh ang. Mihring kut ziak aṭang hian an kum zah hi mi thiamte chuan dik deuh chiah chiahin an sawi thei tih hi in la hre kher lo maithei a. Dan pangngai ang chuan ka han tihna chhan kher pawh dam lohna avang te leh taksa chak lohna hrim hrim avang tein thil danglam thei a awm tlat a ni.

"Chutiang thilah chuan naupang tê tak tê pawh tar anga ngaih theih turin an kut ziak aṭang ringawt chuan a chhut chhuah theih tlat a ni. He an lehkha ziak aṭang hian hei, pakhat chu hraw deuh hlek a ni a, pakhat chu sin lek lek, chhiar theih tak, ‘t’ thai kawkalhna chaurau lam lek lek a ni a, a kut ziak aṭang hian a kut ziak ningnel zawk ai hian a hraw zawk hi a upa thawkhat hle ang tih a hriat theih a ni,” a ti ta a.

Mr Acton chuan, “A nalh lutuk!” a lo ti leh a. Holmes chuan, “Thil dang, hei aia mit var ngai zawk leh chhut ril ngai zawk pakhat a la awm. He mite kut hnu hian inanna lai a nei tlat a, thisen lamah inzawmna an nei niin a lang tlat a ni. Hei, Greek-hovin ‘e’ an ziah dan ang deuha ‘e’ ziah a awm hi, hetah hian a inanna chu in hmu thei ang a; mahse, kha lo pawh kha thil dang tam tak ka hmu bawk a ni.

"Kut ziak aṭang hian chhungkhat hi chu a chhui chhuah theih mai àwm a nia, kei phei chuan thil theih a nih ngei ka ring a ni. Ka han sawi tak bâkah khan he lehkha ziakah ngawt hian thil hmuh chhuah tur, chi dang dang, chi sawmhnih leh pathum a la awm a, chutiang thil chu a awm thei a ni tih in hriat ve nan thil tlem tê ka’n hrilh mai che u a ni. Heng avang hian Cunningham-ate pafa chuan he lehkha hi an ziak a niin ka ring nghet ta tlat a ni.

“Chutah lehkha chungchanga duh tawk ka ngah chuan Eden huan hnu-hma an hnutchhiahna hmun lam chu ka pan a, thil hmuh tur awm zawng zawng chu ka hmu ta vek a ni. Mitthi taksa pem aṭangin chu mitthi chu yard li aia hnai lo aṭanga kah hlum a ni tih ka hre chiang êm êm a. A chhan pawh a thuamhnawah chuan silai zen phuhna hnu-hma pakhat mah a awm loh vang a ni.

"Chuti a nih chuan, mi pahnih chu an inpawm chilh a, chutah pakhatin a kap ta ni àwm anga Alec Cunningham-a'n a sawi kha chu dawt a ni tih a chiang a. Chu bakah, Alec Cunningham-a leh a pa khan mi sualpa tlan chhuahna hmun kha an sawi dan a inthuhmun chiah a. An In aṭanga hla deuh hlekah khan lei nem lai deuh a awm a, chutah chuan hnu-hma pakhat mah a awm si lo va, chuvangin, chu mite pafa chu dawt sawi turin chaw funin an rawn thawk chhuak lo mai chauh a ni tih ka hre leh ta a.

"An In bul vela thil thlengah chuan mi dang tu mah, pawn lam mi an inrawlh lo tih ka hre ta a ni. Chuti ni se, eng nge chu mite pafa chuan thil sual an tihna chhan ni ta ang tih chu kan ngaihtuah leh tur a ni ta. Mr Acton-a In an rawk chungchang aṭang khan ka’n ngaihtuah a, Colonel min hrilh dan khan thubuai an nei deuh niin a sawi a. Chuti a nih chuan Mr Acton, i lehkhabu dahna pindanah khan lehkha pawimawh lak chhuah tumin an lo kal ta a ni,” a han ti a.

Mr Acton chuan, “Ni chiah; chu lo chu thil dang a awm thei lo reng reng. An ram chanve hi dan dik takin ka neihsak thei chiang lutuk tlat a. Lehkha pakhat, ka lehkha kawl lai chu an lak bo vaih chuan chu an ram ka neihsak theihna chu an la bo dawn tihna a ni. Mahse, chu lehkha chu khatih lai khan ka lo kawl hauh lo, ka ukilte’n an kawl daih a ni,” a ti a.

Holmes chuan, “Ka tih reng kha! Tichuan, lehkha chu an hmuh theih tak loh avangin an hmuh theih ang ang chu an paipawn chhuak ta mai a. Chu zawng a chiang; mahse, thil chiang lo ṭhenkhat kan la hmabâk fo mai. Mitthi kut atanga lehkha an pawh thlak bung lehlam kha hmuh chhuah a la ngai tlat a.

"Kha lehkha kha Alec Cunningham-a pawh thlak a ni ang tih chu ka hre chiang a, a mutkawr iptêah a ak ngeiin ka ring bawk. A mutkawr iptêa a dah mai loh chuan dahna tur dang nei chai hek lo. A buaithlak ber zawk erawh chu, a mutkawr iptêah chuan a la awm ang em tih a ni ta. Mahse, chu chu hriat chhuah dan kawng khat chiah a awm a, chumi tihlawhtling tur chuan an lnah kan lut ta reng a nih kha.

"Choka aṭang khan Cunningham-ate nen khan kan awmho ta zel a, chutih laia thil pawimawh ber chu lehkha bung kha khawi hmunah emaw a la awm a ni tih sawi lan miah loh kha a ni. An benga chu thil chu a rik nawn leh vaih chuan a rang thei ang berin an tichhe nghal dawn tlat. Kha lehkha pawimawhzia kha sawi chhuah a tum lai takin Inspector kha ka lo tibuai a. vanneihthlak tawpkhawk maiin ka tlu buai a, in thu sawi kha ka kaiher danglam ta a nih kha,” a ti ta a.

Nui chung hian Colonel chuan, “Khai aw! Kan lainatna zawng zawng che kha a thlawn ta vek a, i thil tih kha i tider mai mai a lo ni maw?” a han ti a. Holmes chuan a chhan hmain, “A deh nalh thu-hla ngawt han thlir chuan a ti ṭha khawp mai,” ka lo ti a. A dik chiah chuan khatih laia Holmes-a tlu buai ta kha a chhun a zana a hnungzuitu, kei ngei pawh chuan a tider a ni tih reng reng ka hre lo.

Holmes chuan, “Khatiang thil khan ṭangkai chang a nei ve fo va, ka hmang ve fo ṭhin asin. Chutah, ka lo harh chhuah leh tak hnu khan engtin tin emaw ka ti nek nek a, Pu Cunningham-a kha thumal pakhat, ‘sawmpahnih’ tih ka ziahtir thei leh ta zel a. Tichuan, lehkhapuana ‘sawmpahnih’ tih inziak sa nen khan ka khaikhin thei ta a ni,” a han ti a. Kei chuan, “Ka lo va han chhaw tak em!” ka lo ti ringawt a.

Holmes chuan, “Watson, ka dam loh vanga ka rilru buai zo ta anga ngaia dar sawm pahnih leh dar khat chungchangah khan thil hre sual palh ta angah mi ngai a, khatia i rilru natna ka‘n thlen kha pawi ka ti khawp mai. Chutah, in chung lamah kan chho va, kawngkhar hnung lama mutkawr inkhai kha ka’n hmu a, chutah an rilru lâk pen a, chu mutkawr iptê chu ka lo endik theih nan dawhkan tesep kha ka ching let ta a.

"Ka tum ang leh ka beisei ang ngeiin a iptê pakhat zawkah chuan lehkha bung Iehlam chu a lo awm ngei a; mahse, ka la fel chauh tih chuan min rawn nangching a, rawn inrawlh vat lo phei ula chuan min tihlum ngeiin ka ring. Min rawn puih avang leh in chet ran êm avangin ka lawm tak zet a ni. Tunah pawh hian ka han ngaihtuah let leh ngawt pawhin a naupang zawkin ka hrawka a rehna leh a pain lehkha them pawh thlak tuma ka kut a ṭhuaina kha ka la tuar chhunzawm zelin ka hre mai.

"Thil zawng zawng kha ka hre veka an rin tlat avangin beidawnnain an khat a, a kaw tawpah an ṭang tak meuh a ni. A hnu lamah khan Cunningham-a kha ka bia a, pa kawm nuam pui mai a lo ni vei roh va; mahse, a fapa erawh chu luhlul zirna sikul aṭanga seilian a ni hialin ka ring, puakruk phei chu ban phak sela chuan ama lu um leh mi lu um pawh sawi lovin a remchang apiang kha a kap darh duh ngei ang.

“An vanneihna chuan thla zarin a thlawh bosan ta tih a’n hriat chuan Cunningham-a chuan beiseina a nei ta vak lo va, thil awm dan chu a sawi fiah ta vek a. Mr Acton-a In an va beih zan khan an chhiahhlawh, William-a chuan a pute pafa chu a lo zui ru ve reng mai a; an chet dan chu a hriat ve tak vek si avangin sawi puanah vauin a thu hnuaiah a dah ta a.

"Mahse, Alec Cunningham-a chu chuti zawnga dawr atan chuan pa hlauhawm tak mai a lo ni tlat mai a. A mi hlauh êm êm chu rukru hming hmehbela dah bo dan kawng ṭha deuh mai a ngaihtuah chhuak ta a. Tichuan, William-a chu an bum chhuak a, an kap hlum a, lehkha phei kha chu pawt thla kim sela chuan an thianghlimna chu an vawng reng thei mahna le,” a han ti a.

Kei chuan, “A nih leh lehkha them chu?” ka lo ti a. Kan hmuh theih tur chuan Sherlock Holmes chuan lehkha chu a’n dah inzawm a :

If you will only come round *at quater to twelve* to the east gate you will *learn what* will very much surprise you and *may* be of the greatest service to you and also to Annie morrison. But say nothing to anyone upon the matter
www.storyfb.com (2).jpg
www.storyfb.com (2).jpg (15.06 KiB) Viewed 14114 times
Kan hnenah chuan, “Ka rin dan tawk vel chiah a ni reng a ni. Mahse, Alec Cunningham-a te, William Kirwan-a te leh Annie Morrison te chu engtin nge an inkungkaih a, eng aṭanga inhnuk hnawk pha chin nge an nih phei chu kan hre hauh lo va. An thil tih dan han thlir hian an thang kam chu a fuh hle a, a tawktarh pawh an dah thiam hle tih chu a hriat a ni.

"Kha, han en ula, ‘p' an ziah dan leh ‘g’ mawng lam an ziah dan inan danah khan chhungkhat an nihna chu a chhui chhuah theih mai tih in hmu ang. A pa zawk hian ‘i’ chung lamah hian chhunhan a chhun ve lo tih pawh in hre thei ang chu. Watson, thingtlang hmun fianrial kan han pan kher kher chu kan tifuh hle alawm, naktuka Baker Street lam kan pan leh hunah chuan ka thahrui pawh a fei leh tawh ang; eh, a chak leh tawh ang, ka ti zawk ang e,” a ti ta a.

A TAWP TA.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 26th, 2018, 11:20 am

SHERLOCK HOLMES
THE GREEK INTERPRETER
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Sherlock Holmes-a nena hun rei tak kan inzui chhung hian a tun hma chanchin a sawi emaw, a chhungte chanchin a sawi emaw hi ka la hre ngai meuh lo va. Thluak ṭhat lama mi dang aia a chungchuanna hi khawngaihna thinlung neih loh nan a hmang ni hian ka hre deuh tlat a, amah hrim hrim pawh hi a hranga ding tur, mi dang ang ve lo anga ngaih a awl hlein ka hria. A chhan pawh mi pangngai tih àwm loh tak tak ti a, thu han sawi ve liam liam hun pawha ngawih tlat a chin vang a ni.

Hmeichhia a ngainat loh dan te, ṭhian neih belh a chak loh dan te, lungngaihna leh lawmnain a bawh buai ve ngai lohzia te leh a chhungte chanchin a sawi khàt êm êm dan aṭangte hian pa danglam zawng a ni. Ka han sawi tak anga mi danglam tak mai a nih avang hian, amah hi fahrah a nih ka lo ring hman hial a; mahse, ni khat chu a unaupa chanchin a rawn phuh chhuak ve ta tlat mai a, mak pawh ka ti kher mai.

Nipui lai a ni a, thingpui kan in kham hlim hlawt a ni a, khua pawh a tlai tawh hle. Kan titi chu awmze nei lem lovin intihhlimna hmun aṭanga ni leh thla chungchang thlengin a lawn chho va. Chutah mihring inthlah chhawn dan leh kan pi leh pute’n zia leh rang min rochun theih dan te kan sawi ta zel a. Chutah mimal inzirna avanga thiamna hi nge a buk rit zawk ang pi leh pute’n min rochun, kan pian leh murna aṭanga kan thil thiam kawl sa hi tih te kan sawi ta zel a.

Holmes-a hnenah chuan, “I chungchangah hi chuan, i thu sawi ka’n ngaihthlak aṭang ringawt chuan thil i hmuh thiamna leh i chhut chhuah thiamna hi chu nangma inzirna vang a niin ka hre tlat a ni,” ka’n ti a. Ani chuan inngaihtuah mûk fe chung hian, “Eng emaw chenah chuan a ni ang chu. Kan pi leh pute pawh hi thingtlang mi hlun an ni a, an zawlpui tawk rau rauvah chuan an khaw hawi a zau ve deuh hlek a.

"A enga pawh chu lo ni sela, heti zawnga ka thluak a kal tak viauna hi chu ka pi aṭanga ka rochun, ka thisena bet tlat a ni. Ka pi chu French lem ziak thiam, Vernet-i laizawn kha a ni a. Hetianga kawng zawng neia themthiamna hi chu thisena a luan chuan mak tak takin a inher danglam thei a ni,” a han ti a. Kei chuan, “Engtin nge i pi leh pute’n i thisenah an rochun che tih i hriat theih chu le?” ka’n ti leh a.

Ani chuan, “A chhan chu ka unaupa, Mycroft chuan hetiang lamah hian kei aia thil tih theihna nasa zawk a nei tlat a ni,” a ti ta mai a. Chu zawng ka tan chuan chanchin ruah ṭham loh a ni ta. Chutiang thiamna neitu chu engati nge England ram chhunga mipuite leh police lam pawh hian an la hriat ngai loh le? Ka awih theih chiah loh avangin ka ṭhianpa chu a inphah hnuai thiam avang mai maiin a unaupa aia nep zawk angin a insawi a ni ang tiin ṭawngkam ka'n rawlh a.

Chu ka ṭawngkam a'n hriat chuan Holmes-a chu a nuih a za hle mai a. Ka hnenah chuan, “My dear Watson, dikna leh tlawnngaihna hi chin pawlh ka rem ti ve hlei nem. Mihring thinlung sukthlek dan zir mite tan chuan, thil reng reng hi a nih ang anga en tur a ni a, mahni insawi len a ṭha lo ang bawkin mahni insawi nau tum ṭalh hi chu a ṭha lo ve a ni. Chuvangin, keiin, ‘Mycroft chuan kei aiin thluak a nei ṭha zawk e,' ka tih chuan thu dik tumtlang tak ka sawi angah i ngai tur a ni ang,” a ti ta tlut mai a.

Kei chuan, “I aia naupang em ni chu le?” ka‘n ti leh a. Ani chuan, “Kei aiin kum sarihin a upa zawk,” tiin min lo chhang a. Chutah, “Engati nge mi hian an va hre lar lo em!” ka ti leh ta zel a. Holmes chuan, “A ṭuanna mualah chuan an hre lar alawm,” tiin min lo chhang a. Kei chuan, “A nih leh khawiah nge a awm a?” tiin ka zawt a. Holmes chuan, “Diogenes Club-ah te pawh ti ta ila a pawi lo vang," a ti a.

Chu hmun chu ka la hriat ngai loh avanga mak ti hmel ka lo pu deuh a ni ang chu Holmes chuan, “Diogenes Club chu London khawpuia intihhlimna hmun mak danglam ber a ni hial ang a, Mycroft pawh chu mi mak danglam berte zingah a tel ve hial ang. Chu hmunah chuan tlai dar li leh minute sawmli panga aṭanga zan dar sarih leh minute sawmli thleng a awm ziah ṭhin. Hei, tunah hian dar ruk a ni a, i hreh lem loh chuan chu thil mak tak tak mai pahnih chu ka’n hmelhriattir ve ang che chu?” a ti ta a.

Minute nga hnu lekah chuan Regent Circus lam panin kawtthlerah chuan kan phei ta a. Holmes chuan, “Mycroft-a chuan a thil tih theihna chu eng ilo chhui chhuah nana a hmang lo chu a mak i ti hle a ni maithei a, a chhan chu a theih loh vang a ni mai,” a ti ta a. Kei chuan, “Mahse, i sawi dan khan...," ka'n ti dek dek a, Holmes chuan, “Eng ilo hmuh theih leh chhuidawn thiamah chuan kei aiin a chungnung zawk tih thu ka sawi a nih kha.

"Mahse, hetiang hna hi ṭhutthleng aṭanga a bul ṭana, tho chhuak hlek lova men chhuah theih chu ni sela chuan ka unaupa chu he khawvelah hian hetiang lama a ber kai tur hi a ni chiang hle; mahsela, tumna leh thahrui a nei tlat lo. A thil hmuh chhuah endik tur pawhin tlema han pen kawi hlek pawh a peih lo va, a thil hmuh chhuah han finfiah a, ama tih dikzia han thai lan ai chuan finfiah loh a, dik lo zawk anga awm pawh a hnial tlat lo asin.

"Vawi tam tak chu a hnenah hian thil harsa tak tak nia ka hriat ka va thlen tawh ṭhin a, dik tak takin mi lo hrilh fiahsak ṭhin a; mahse, roreltu hmaa han din chhuahpui tur thil han en thlithlai hmasak chu a thei ṭhak lo,” a ti a. Kei chuan, “Chuti, hetiang lam hna hi chu a ei zawnna a ni lo tawp tihna a ni maw?” ka ti a. Holmes chuan, “Ni teuh nang. Keia tana ei zawnna tling tham hi ani tan chuan thil ngainat ve zawng chi khat ang chauh a ni a.

"Chhiarkawp lam hi a hneh riau mai a, sawrkar department ṭhenkhata an pawisa vawnna lehkhabute pawh a endik ve zauh zauh ṭhin. A chenna hmun chu Pall Mall-ah a ni a, tuk tin hian White-hall a va kal hual a, tlai lamah a rawn haw leh ziah ṭhin a ni. Kum tam chhung chu chutiang chuan a ti ta a, insawizawina chi dang pawh hi a khawih ngai lo rêng rêng. A pindan ep chiahah Diogenes Club chu a awm a, chutah chuan hmuh turin a awm leh ringawt a ni mai,” a ti a.

Kei chuan, “Chu hming chu ka hriat ngai àwm pawh ka la hre lo,” ka lo ti a. Holmes chuan, “I la hre ngai kher lo vang. London khawpui chhungah hian zah avang emaw rualpawl chak loh hrim hrimna vang emaw-a mi dang kawp ngai mang lo an tam mai a; mahse, ṭhutna nuamsa deuh leh hun bi neia lehkhabu leh chanchinbu chhuak chi te chu chung mite chuan an hnar phal chuang si lo va. Chu mite tan chuan Diogenes Club hi an din ta a.

"Tichuan, tunah chuan Diogenes Club-ah chuan pa titipui harsa ber ber mai te, pa nelawm loh ber ber maite an fuan khawm ta a ni. Chu club member-te reng reng chuan mi dang an ngaihsak phal a ni miah lo va. Mikhual Pindan tia an vuah chhungah chauh lo chuan mi dang nena inbiak pawh an phal lo rêng rêng. Miin vawi thum chauh pawh dan a bawhchhiat chuan a member nihna an paihsak thei a ni. Ka unaupa chu he Club din chhuaktute zinga mi hi a ni a, he hmun hi kei pawhin nuam ka ti khawp mai,” a ti ta a.

Chutih lai chuan Pall Mall kan lo thleng tawh a, St. James kawtthler tawp lam aṭang chuan kan chhuk thla a. Carlton Club aṭanga hla lo têa kawngkhar pakhat zawnah chuan Sherlock Holmes chu a’n ding a, ṭawng miah lo tura min hrilh hnu chuan pindan zau lam pan chuan a lut a, ka zui ve ta zel a. Ka’n hawi vel a, darthlalang chhanah chuan pindan zau tak mai leh nuam tak mai ka va hmu a.

Chumi chhungah chuan mi ṭhahnem tham tak hi an lo awm a, an vai mai chuan lehkha an chhiar vek a, mahni thil tih lai ngawt mai chu an lo buaipui a. Holmes chuan pindan tê tak tê pakhat hi min kawhhmuh a, chumi chhungah chuan min hnutchhiah a, amah chu a kal bo leh a. Rei lo tê-ah chuan mi pakhat nen hian an lo kir leh a, chu pa chu Holmes-a unaupa ni ngei tur a ni.

Mycroft Holmes chu Sherlock Holmes ai chuan a lian zawkin a thau zawk daih a. A taksa chu a hrawl hle a, a hmaifang erawh chu a lian hle nain a unaupa hmela khermeina emaw ni, duh khirhna emaw ni chu hmuh tur a awm ve tho mai. A ngaihtuahna zawng zawng a hman rim laia Sherlock Holmes-a hmela lo lang ṭhin, mitmeng de deuh rial chu Mycroft Holmes-a hmelah pawh chuan hmuh tur a awm ve tho a.

A kutphah lianpui chu a rawn phar chhuak a, “Ka pu, ka’n hmu che chu ka lawm hle mai. Sherlock-a chanchin ziaktua i ṭan tak achin chu hmun tin hmun tangah Sherlock-a chanchin hi ka hre ta mai. Kan thu dang alai chuan Sherlock, chawlhkar hmasa lam khan Manor House chungchangah khan min rawn biak ka ring a. I chin fel phak bak a nih ka lo ring ve ringawt a,” a han ti a. (Manor House chanchin hi The Valley of Fear-ah tar lan a ni - Pll). Ka ṭhianpa chuan nui chung hian, “Ni hran lo ve, ka ching fel tawh e,” a han ti a.

Mycroft chuan, “Adams-a a ni pek ang maw?” a han ti a. Holmes chuan, “Ni e, Adams-a a ni ngei mai,” a ti a. Mycroft Holmes chuan, “A tir aṭang khan a ni ang tih ka hre sa reng a ni,” a han ti a. An pahnih chuan tukverh bulah chuan an ṭhu dun a. Mycroft Holmes chuan, “Mihring chanchin zir duh tan chuan he hmun hi chu hmun ṭha lutuk a ni maw le. Mi chi hrang chi hrai an tam êm asin, saw laia lo kal pahnihte pawh saw han en mah teh,” a han ti a.

Holmes chuan, “Sipai bang a nih saw, ka hre mai," a'n ti a. Mycroft chuan, “Tun hnai lawka bang a ni nghe nghe,” a lo tih zawm a. Holmes chuan, “India ramah a sipai ṭan lai chuan a tei vel ṭhin a nih saw, a lang reng alawm,” a han ti ve leh nghal zat a. Mycroft chuan, “Officer ni ve si; officer puitling tak tak ni si lo,” a ti leh a. Holmes chuan, “Royal Artillery-a (Laipuipu pawl) mi ang ka ti ngawt mai,” a lo ti leh a. A unaupa chuan, “A parawl (?) a nih saw,” a ti ta zel a.

Holmes chuan, “Mahse, a fa a awmpui tlat,” a lo ti a. Mycroft chuan, “A fa tih ngawt; a ‘fate' tih tur a ni zawk ang, a fate a awmpui,” a ti a. Chutih lai chuan, “Khaih, khaih khaih, in ti lutuk e,” ka lo ti ta a. Sherlock Holmes chuan, “Khatiang hawiher pu, khatiang hmel pu leh nasa taka niin a em tih hriat rêng rênga vun sen deuh cher chawr kha chu sipai, mahni duh thu thu-a tal lo, India ram aṭanga lo kirna la rei lo tih hriat a harsa lo,” a han ti a.

Mycroft Holmes chuan, “A sipai pheikhawk a la bun danah khan a banna a la rei lo tih chu a hriat a,” a lo ti leh a. Holmes chuan, “Sipai, sakawr chung chuang mite kal dan angin a kal lo va, a mithmul bul vel vun inngo hleih dan aṭang sawn a lukhum a khum lei ber bawr hle ṭhin tih a hriat a. A taksa chak ang hu aiin a pheikhai a zang lo tlat a. Chuvangin, laipui pu pawlah a awm tih a hriat a ni,” a han ti leh a.

Chutah Mycroft Holmes chuan, “A hmel han ngui em em danah khan tu emaw, a ngaih em em a chán a ni ang tih a hriat a, ei relna thil tur eng ilo a han khai bawr danah khan a nupui a chán a ni mai àwm mang e tiin a ngaihtuah theih zel bawk a ni. A thil lei kha i hmu em? Naupangho lawm zawng a lei kha. Thinrik pakhat a lei a, chuvangin, a fate zinga pakhat chu a la naupang hle tih a hriat a ni. Milem bu a zakzeh tat kha i lo hmu ang a, chu chuan naupang dang pawh an lawm zawng siamsak an ngai ve tho a ni tih a hril hle a ni,” a ti leh ta zel a.

Chutia a han sawi takah chuan Holmes-an, ‘Ka unaupa chuan kei aiin thluak a nei ṭha zawk a, a mit pawh a fing zawk,’ a tih chu a dik a ni tih ka hre ve thiam ta mai a. Holmes chuan mi rawn melh zauh a, a nui var var a. Chutih lai chuan Mycroft chuan satel kawra siam bawm pakhat aṭang chuan thil hnim chi hi a phawrh a, a’n hnim a, a kawrchunga a thil hnim nawi tla chu rawmawl sen, maimaw puan lian tak hian a vaw fai a.

Chutah Holmes-a hnenah chuan, “Thu dang alai chuan Sherlock, i tha phur zawng tak mai tur thil ka hria asin. Thil mak danglam tak mai a ni ringawt, ka hnenah an rawn la a; mahse, kei lah chuan a chanve thleng chauh ka bawhzui peih a. Mahse, ngaihtuahna ṭha tak chu a kai chhu ve ṭeuh mai. Thil awm dan i hriat duh chuan,” a han ti a. Chutia a tih lai la la chuan Holmes chuan “My dear Mycroft, ka hre chak ngawt ang le,” a lo ti vat a.

Mycroft chuan a lehkhabu-ah chuan eng emaw hi a’n ziak zawk a, chutah chhiahhlawh kohna dar a’n hmet ri a, a thil ziak chu chhiahhlawh hnenah chuan a pe ta a. Chutah, “Lo kal ve turin Mr Melas-a ka sawm a nih kha. Mr Melas-a chu ka pindan chunga in chhawng pindan luahtu a ni a, kan inhmelhriat ve viau nghe nghe a, chu vang chuan a buaina pawh min hrilh ve ta a ni.

"Mr Melas-a chu Greek mi a ni a, ṭawng chi hrang hrang thiam em em mai a ni a. Mi ṭawng lehlinsak hian ei a zawng a, chu bakah, khawchhak lam aṭanga mi hausa deuh an lo tlak thlak a, Northumberland Avenue Hotel vela an tluk luh ṭumte hian a kaihruaitu-ah a lo ṭang a, pawisa a hlawh chhuak ṭhin bawk a ni. A chanchin chu amah ngeiin i hnena a sawi turin ka khek nang e," a ti ta a.

Rei lo têah chuan pa thau tak leh tawi deuh leng lawng, hmai bial deuh kerh kawrh, sam dum hlap mai hi a lo lut a. Chu pa hmel han en chuan chhim lam chhuak a ni tih chu a hriat hle a; mahse, a ṭawng chu sap pachal awphawi ṭalh mai a ni lawi si a. Sherlock Holmes nen chuan an han inchibai a, a chanchin chu mi sual hnu chhuitu hmingthang takin a hre chak hle a ni tih a’n hriat phei chuan a hmel a hlimin a mitmeng pawh a hlim sawt mai.

Chu pa chuan, “Police-ho khan thil pakhat mah min tihsak ka ring lo, ka ring ther tê lo. An thil hriat ngai loh a nih vang ringawtin thil awm theiah an ruat lo va; mahse, ka mihring hmuh, puan bana (plaster) hmai bel luai mai kha eng nge a chanchin ta zel tih ka hriat loh chuan ka awm a nuam thei ngai dawn lo rêng rêng,” a han ti a. Sherlock Holmes chuan, “Ngun takin ka lo ngaithla e,” a lo ti bauh a.

Mr Melas chuan, “Tun hi Nilaini tlai a ni a, chuti a nih chuan, Thawhṭan zan kha a nih chu, ni hnih kal ta kha. Chumi zan chuan alawm thil mak deuh mai a lo thlen ni. Ka ṭhenawmpain a hrilh tawh maithei che u a, ṭawng lettu ka ni a, ṭawng tinreng hi ka letling ṭhin a nih loh vek pawhin ka letling deuhthaw tal a ni ang. Greek mi ka ni a, Greek hming ka pu bawk a, Greek ṭawng letling tur hian min hmang deuh ber nghe nghe a. Kum tam tak chhung chu London khawpuia Greek ṭawng lettu ber ka lo ni ve ta a, Hotel velah chuan ka hming pawh hi a lar hle nghe nghe a ni.

“Ram dang mi emaw, khualzin emaw, ṭawng thiam loh vanga harsatna neite hian hun bi nei lo leka min rawih tak pawh a tam mai a. Chhun leh zan sawi lovin, hun leh hun lo pawh sawi lovin, hna thawk hian ka chhuak hlawk hlawk reng a. Chuvangin, thawhṭan zana, pa inchei fel zet mai, Mr Latimer-a'n mi rawn koh a, ka pindana a lo kal pawh chuan mak ka ti eih lo.

"Ka pindanah a lo kal a, kawngka bula tawlailirin min nghah reng thu a rawn sawi a. A sawi dan chuan Greek mi, a ṭhian pakhat a lo kal a; mahse, Greek ṭawng a lo thiam mai si lo va, ṭawng lettu a mamawh tlat a ni tih thu a sawi a. A awmna In a hlat thu leh a hmanhmawh thu min hrilh a; tawlailira kan lut tur pawh chu a nawrin min nawr lut a.

“Tawlailir ka han ti rawk na’ng a, mihring inphurh kualnaa an hman chi, ‘cab’ an tih mai, man neia hawh theih leh chuan hawh theih ang chi hi ni pawhin ka hre leh ta lo va; chu tawlailir chu mimalin an hman chi, tawlailir lian leh ṭha tak mai, ‘carriage’ an tih ang chi hi ni zawk mah mahin ka hria a. Chu tawlailir chu London khawpuia mimal tawlailir, ‘carriage’ tlan ṭhin ai chuan a inpingdang tam zawk a, a chhung pawh an chei nuam hle mai.

"Mr Latimer-a chu ka ṭhutna ep chiahah chuan a ṭhu a, Charing Cross tlan tlang a, Shaftesbury Avenue kan tlan pelh hnu a, Oxford Street-a kan chhuah hnu chuan Kensington-a kal tur si; kan kal kual deuh mang e tih thu ka’n sawi zauh a. Chuta ka thu sawi avanga ka ṭhianpa chet dan chu mak ka ti kher mai! A iptê aṭang chuan tiang tawi tê mai, a hmawra suan dah, vuak nat hmel deuh mai hi a rawn phawrh chhuak a, a rih zawng hriat bel tum ni àwm tak mai chuan a vai lauh lauh a.

"Ngawi rengin chu tiang chu a sirah a dah a, chutah tukverh chu a’n hawng nghal a; mahse, tukverhah chuan lehkha an lo bel phui vek mai a, pawn lam chu a hmuh theih chuang rêng reng loh. Ka hnenah chuan, ‘Mr Melas, i khaw hawi a zim dawn tlat mai a, a pawi ka ti ngawt mai. Englo a nia, kan kalna hmun hi hre lo la ka duh a ni, nakina a kir lehna kawng i hriat chuan a buaithlak dawn tlat a ni,’ a ti ta a.

“Chutiang thil ka’n hriat chuan mak ka ti êm êm a ni tih chu in suangtuah thiam ngei ang. A tiang tel lo pawh chuan Mr Latimer-a chu ka huphurh sa reng reng a. A dar pharh duhawmzia ka’n hmuh mai pawh chuan ani nena inbengberek buai chu ka duh lo ringawt a ni. A hnenah chuan, ‘Mr Latimer, i thil tih dan hi a mawi lo ngawt mai. Hetianga tih hi danin a phal Io tawp tih hre rawh,’ ka han ti a.

"Ka hnenah chuan, ‘Dan phuah chawp ka’n hmang lawk a nia, chu dan chu min zawmpui turin ka thlang chhuak chauh mai che a ni. A eng pawh lo ni se, thil pakhat hrilh lâwk duh che ka nei. Mr Melas, zaninah hian ka lawm lohna tur zawnga chet tuma mi dang pun buai theihna lam chi, aw rawl i chhuah emaw chuan thil pawi tak a ni tih i hre ngei ang. I awmna hi tu ma hriat lova thup tlat turin ka ngen che a, ka in chhungah emaw, he tawlailir chhungah emaw hian ka thu hnuaia kun i ni tih inhre ngawih ngawih turin ka duh che a ni,' a ti ta a.

“A aw-ka chu a vin lo kher mai; mahse, a hlauhawm tlat! Ngawi rengin kan ṭhu a, a eng vang khêr khêr chuan kei teh lul chu min han ru chhuak dawn chu ni maw tiin ka ngaihtuah neuh neuh a. A eng vang pawh chu ni sela, ṭan lo khawh vena lam chi rêng rêng chuan sawngsawhlawtna a nei dawn chuangin ka hre lo va, ngawi renga thil lo thleng tur nghah tlawk tlawk mai chu ka tih theih awm chhun a ni tih ka hre chiang êm êm a ni. Darkar hnih chhung vel zet tur chu khawi lam nge kan pan tih pawh hre lo chuan tawlailirah chuan ka chuang ve ta a.

"A chang chuan kan tawlailir chuan lungṭhil a chil leh ar ar ṭhin a, chuvangin, kan kalna chu a mam vak lo a ni ang tih ka ring a. A chang leh kan tawlailir chu dam deuh mai hian a tlan zar zar a, chuvangin, alkatra phah kawngah kan kal a nih ka ring a, a bak chu kawng chin ka hre miah lo a ni ber mai. Tawlailir tukverha an lehkha zar bakah puanzar rawng dumpawl an zar bawk avangin pawn lam aṭang chuan eng a lo lut thei miah lo va, eng mah a hmuh theih bawk hek loh.

"Pall Mall kan chhuahsan khan dar sarih leh minute sawm panga a ni a, dar kaw rikna tura minute sawm a la awm chuan kan chuanna tawlailir chu a ding ta a. Chutah tawlailir kawngkhar chu ka chuanpuipa chuan a’n hawng a, ka piah maiah chuan In hniam ang set sawt, a kawngkhar reh kuak pawh a chung lam kual pap chi hi ka va hmu a. Chu kawngkharah chuan khawnvar a lo eng chhuak a.

"Tawlailir aṭang chuan rang takin min chhuktir a, In chhungah chuan rang deuhvin ka lut ta a. Ka luh dawn ruai chuan ka ding lam leh vei lamah chuan tualzawl leh thing ding chu awmin ka hre ruai a, mimal In nge ni anga sawrkar In tih pawh ka hre ngam chiah lo. In chhungah chuan khawnvar pakhat, rawng mawia chei hi a lo awm a, chu khawnvar chu an herh èn loh em avangin pindan bang velah chuan milem a intar tih leh a chhung chu a zau hle tih bak chu hriat mumal pawh ka nei meuh lo.

"Chu pindan eng lo zet mai hnuaiah chuan kawngkhar min rawn hawnsaktu kha ka’n en a, pa tê tak tê, chanchin ṭha feh chhuahpui ngai lo tih hriat tak mai, pa valai vel chauh tur, dàr kum hliu hleu hi a lo ni a. Kan lam hawia a rawn inher chuan tarmit a vuah tih ka hmu ta nghal nghe nghe a. Chu pa chuan, “Harold, he pa hi Mr Melas-a em ni?” a han ti a. Min hruaitu chuan, ‘Ni e,’ tiin a lo chhang a.

"Chu pa chuan, 'I ti ṭha e! I ti ṭha e! Mr Melas, rilru thianghlim lo eng mah kan pu lo a nia; mahse, i tel lo chuan sera mu kan thur tlat lo a nih hi. I sual tukhum pawn i chhuah loh phawt chuan i inchhir lo vang a; mahse, bumna ang lam chi i thawh vaih chuan Pathian hnena i ṭawngṭai nghal mawlh mawlh mai a dik ang!’ a han ti a. Chu pa chu a ṭawng zawngin a nui deuh hak hak hian a hriat a, chu bakah, a aw-ka chhuak chu a kat deuh nak nak a; mahse, a pakhat zawk ai chuan ka rap mah zawk a.

"A hnenah chuan, ‘Eng atan nge min tih chu le?’ ka’n ti a. Ani chuan, ‘Greek-pa pakhat hnena zawhna min zawhsak tur leh a chhanna min hriatsak turin kan duh mai che a ni. Mahse, sawi tura kan tih bak che i sawi chuan...,' tih pahin a nui deuh hak hak a, ‘Piang lo law law la i tifuh zawk ang,’ tiin a’n chhunzawm leh a. Chutia a tih pah chuan pindan pakhat hi a’n hawng a, chu pindan chu an chei hneh hlein ka hria a.

“Pindan chhunga kan va luh chuan khawnvar pakhat chauh a lo inchhi a, chu pawh chu a chanve chauh hian a alh teng teng a. Chhuata han kal zawng chuan kan ke chu chhuatphah chungah chuan a pil lek lek ṭhin a, an chei hneh thawkhat bawk tih chu a hriat hle a ni. Chu pindan chu a zau hle a, an ṭhutthleng ṭhutphah puante chu buikelek puan ngat a ni hlawm a, an chhuarte pawh chu sai nghova siam ni maiin ka hria a.

"Kil khatah chuan Japanese ralthuam, indona kawr, thira siam ni àwm tak hi a awm nghe nghe a. An khawnvar dahna hnuai lawkah chuan ṭhutthleng a awm a, pa tê tak tê chuan chu ṭhutthlengah chuan ṭhu turin min ti a. Chutah, a tlangval zawk chuan min chhuahsan a; mahse, kawngkhar dang aṭangin a lo lut leh thut a, a lo luh pah chuan mi pakhat, thuamhnaw thawl hek huk inbel hi a rawn hruai lut a, chu pa chu zawi muangin kan lam panin a lo kal chhat chhat a.

“Khawnvar éngin a chhun phak chin a lo thlen chuan ka’n hmu chiang thei deuh a, a hmel ka hmuh chuan ka hlau ta deuh roh tlat a. A hmel chu a dángin a cher hle a; a mitmeng erawh chu hmuhnawm khawpa fel leh fin hmel a ni a, a mitmeng aṭang chuan tharum aiin tumruhna a nei nasa zawk ang tih a hriat theih mai. Mahse, thil dang zawng aiin a hmaia puan ban (plaster) an bel chu mak ka ti zawk a. A saikalh zawng te hian an bel chek chuk mai a, a ka zawnah chuan puan ban hlai tawk tak an bel bawk a.

“Pa tê tak tê chuan, ‘Harold, lunglehkha kha i rawn keng em?” a han ti a. Chutih lai chuan chu pa hmel mak tak mai pu chu ṭhutthlengah a ṭhu mek a; a ṭhu ka’n ti rawk na’ng a, a tlusawp a ni zawk mah àwm e. Chutah, ‘A kut kha a chet thei em? Mm, chuti a nih chuan pencil kha pe rawh le. Mr Melas, zawhna i zawt ang a, a chhanna chu lunglehkhaah hian a ziak dawn a ni. A hmasa berin lehkhaah chuan a hming a ziak dawn em tih han zawt teh,’ tiin pa tê tak tê chuan thu min han pe kual a.

"Chu zawhna ka’n zawh chuan chu pa chu a thinrim tih hriat reng reng hian a meng sen ram mai a, lunglehkhaah chuan Greek ṭawng hian, ‘Eng tikah mah ka ziak dawn lo,' tiin a’n ziak a. “Pa tê tak têin zawt tura min tih angin, ‘Eng ang dinhmun pawh lo thleng se, i hming chu lehkhaah chuan i ziak lo vang maw?’ tiin ka’n zawt leh a. Chu pa chuan lunglehkhaah chuan, ‘Hmeichhia chuan Greek puithiam, ka mi hriat mi hmaah ka hmuh lai ngeia pasal a neih ngei a ngai ang,’ tiin a’n ziak a.

"Chutah min tuk angin, ‘I chan tur chu i hria ang chu maw?’ tiin ka zawt leh ta a. Chu pa chuan, ‘Ka chungah chuan thil eng pawh thleng se, pawi ka ti ther tê Io,’ tiin a chhanna a ziak chhuak leh ta a. Chutiang chuan kan inbe chho a, keiin ṭawngkain ka bia a; ani’n ziakin min chhang zel a. A khat tawk hian lehkhaah chuan hming a ziah dawn leh dawn loh zawt turin min tir sek a; mahse, a chhanna chu a pangngai reng a ni.

“Chutah thil pakhat ka ngaihtuah chhuak ta a, chu ka thil ngaihtuah chhuah avang chuan ka hna hrehawm tak pawh chu a nuam ve sawtin ka hre mai. Thu ka zawh apiang chuan keima thuin eng eng emaw ka belh ru ve ta ziah a, a tir lamah chuan thu ho tê tê ka belh ru a; ka bula mi pahnih, thlarau thi thei kawltute chuan ka thil tih chu an man pha em tih ka en chhin ru pah zel bawk a. Ka thil tih chu an hre thiam ve pha miah lo tih ka hriat chuan a hlauhawm tih hre reng chungin ka thil tih lai chu awmze nei zawkin ka chhunzawm ta zel a. Kan inbiakna chu hetiang hian a kaI ta a ni :

“ 'Luhlul i chhuah hian awmzia a nei miah lo a nia. Tu nge i nih?’

“ 'A pawi chai hlei nem. London-ah hi chuan mikhual ka ni.’

" ‘I awm dan tur chu i khawsak danin a rel dawn a nia. Hetah hian eng chen nge i awm tawh?’

“ 'A nih leh a ni mai ang chu. Chawlhkar thum.’

“ ‘He bungrua hi chu i nei thei dawn hauh lo a ni. Eng nge i natna?’

“ ‘Mi sual kutah chuan a awm bik tur a ni lo. Chaw min ngheitir a ni.’

“ ‘I hming i ziah phawt chuan zalen takin i awm ang. He In hi eng In nge ni?’

“ ‘Ka hming zawng ka ziak miah lo vang. Ka hre lo.”

" 'I awm dan hian hmeichhe tan chuan ṭangkaina a nei hlek lo a nia. Tu nge i hming?’

“ ‘Chuti a nih chuan hmeichhia chuan ka beng hriatah sawi ang hmiang. Kratides.’

“ ‘I hming i ziah chuan hmeichhia chu i hmu leh ang. Khawi lam mi nge i nih?’

“ ‘Chuti a nih leh ka hmu malek anga a ni mai. Athens.’

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 27th, 2018, 10:43 am

SHERLOCK HOLMES
THE GREEK INTERPRETER
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last)
(Rozami Pachuau)

“Mr Holmes, kan inbiakna chu minute nga dang chu chhunzawm ta zel ila chuan kan mihringate mithmuh lai ngei chuan thuruk inthup zawng zawng chu an hriat miah lohvin ka hai chhuak vek thei tur hi a ni a. Zawhna dang zawh leh ka tum lai tak chuan pindan chhungah chuan hmeichhe pakhat a lo lut a.

"Ka hmu chiang vak lo nain chu hmeichhia chu sang tak, nu che dam thlep thlawp, sam bu dum pu, thuamhnaw thawl deuh hek hawk inbel a ni tih ka hre hman a. Chu hmeichhia chuan sapṭawng pai deuh tak hian, ‘Harold, mahnia awm ka ning em mai. Khi lam khi chu a khawharthlak riau a ni, thil dang eng teh chiam... Karei, Paul-a a ni reng mai!’ a han ti a. A thu sawi tawp lam chu Greek ṭawngin a chhunzawm a.

"Chutih lai la la chuan damlo, hmai bel khah luk chuan a hmai belna puan ban, a hmui zawna mi chu a’n tuai thla tawp a, ‘Sophy! Sophy!’ ti chungin hmeichhe lam chu a pan a, hmeichhia nen chuan an inkuah ta vawng vawng a; mahse, an inkuah rei hman lo kher mai! Min hruai luitu tlangval khan hmeichhhia chu a dawm bet a, pindan aṭangin a nawr chhuak a; pa tê, hmelchhe zawk pawh chuan an damlo khawi chauh chu hneh takin kawngkhar dangah a hnuk chhuak ve ta bawk a.

“Rei lo tê chhung chu pindan chhungah chuan keimah chauhvin ka’n awm zawk a. Rang takin ka ding chhuak vat a, chu In chu eng In nge ni chiah tih en ila a ṭha ang tih rilru pu ran chunga ding chhuak ka ni a; mahse, ka vanneihna a kal tluang a ni ang, pen khat pawh ka pen hma chuan a upa zawk leh hmelchhe zawk kha kawngkhara a ding ka’n hmu a, chu pa chuan ngun tak mai hian mi lo melh kiau mai a.

"Ka hnenah chuan, ‘Mr Melas, a tawk e. Hei le, mimal thil tak meuh meuhvah ka’n inrawlhtir ve ta chein kan awm dan eng emaw chen chu i hmuh ve pawh kan phal ta hial a. Kan ṭhian, Greek ṭawng thiam pakhat chu khawchhak Iamah han thang bo kher kher lo sela chuan kan tibuai hauh lo tur che hi a ni a; mahse, a thang bo tlat si a, a ai awhtu tur kan zawng a, i thiamna chungchang hian kan beng a lo thleng ta a ni,’ a han ti a.

"Eng mah sawi lovin ka lu ka bu mai a. Chu pa chuan, ‘Hei, Sovereign nga hi ka pe ang che a, a tlem tham lutuk i tih loh hram ka beisei bawk,’ a han ti a. Chutah nui deuh hak hak chung chuan ka áwmah a kutin mi’n kuk kauh kauh a, ‘Mahse, he thil hi mihring beng hriatah; mihring pakhat beng hriatah pawh ka ti a nih chu, i sawi vaih chuan i thlarau chungah Pathianin zah ngai rawh se!’ a ti ta a.

"Chu pa hmelin min tihthlabar nasatzia chu a sawi pawh ka sawi chhuak thiam lo. Ka ngei tlat a, ka hlau tlat bawk a ni ber mai. A ṭawng zawng chuan a lu chu hma lamah a bu deuh tlat tlat a. A mitmengah chuan nunrawnna a bet nghet hle bawkin a lang tlat a ni. Chutah ka hnenah chuan, ‘He thil chungchang hi i sawi chhuah vaih chuan kan hre ngei ngei ang. Thil hriat theih dan hi chu kan nei hran ve ngat a nia. Khai Ie, tawlailirin a nghak reng tawh che a nia, ka ṭhianpa khan a hruai haw leh dawn che a ni,’ a han ti a.

"Pindan zau aṭang chuan hmanhmawh takin min chhuahtir a, tawlailirah chuan ka lut vat a, ka luh hmain In leh a bul vela thing ding ilo vel chu ka hmu leh hman vuai chauh a. Mr Latimer-a chuan hnai ang set sawtah min zui zel a, tawlailirah pawh chuan ka ep chiahah a ṭhu a, thu dang sawi hlek lo chuan kan tlan leh ta ngawt ngawt mai a. A tawpah chuan kan chuanna tawlailir chu a ding ve ta hram a.

“Min hruaitu chuan, ‘Mr Melas, hetah hian chhuk rawh le. I chenna hmun aṭanga hla taka kan nghah che avangin a pawi ka ti hle mai; mahse, tih ngaihna dang a awm tlat lo a ni. He tawlailir hi zui ruk i tum vaih chuan i taksa tan thil hrehawm i insiam mai mai tihna chauh a ni ang,’ a han ti a. Chutia a tih pah chuan tawlailir kawngkhar chu a hawng a, ka zuang chhuak hman awrh tih chuan tawlailir khalhtu chuan tawlailir chu a vaw tlan Ieh nghal daih a.

"Ka han hawi vel a, ka bul velah chuan hnim hring a tam hle a, thingbuk a awm zeuh zeuh bawk a. Ka piah, hla deuh takah chuan eng a lo chhuak chiah chiah a, chumi ep-ah chuan rel khalhtute’n an hmuh theih tura eng sen dah ka hmu ta a. Ka chuanna tawlailir lah a tlan bo leh daih tawh si a, khawiah tak chuan awm ni ang i maw tia ka inngaihtuah lai chuan ka lam pan chuan mi pakhat a lo kal a. A lo hnaih deuh chuan chu pa chu rel bungraw thiara inhlawhfa ṭhin a ni tih ka hre ta a.

"Chu pa hnenah chuan, ‘Hei, eng hmun nge ni chu le?’ tiin ka’n zawt a. Ani chuan, ‘Wandsworth Common a nih hi,’ tiin mi lo chhang a. Kei chuan, ‘London khawpuia luh nan rel man tur ka hmu thei ang em le?’ tiin ka lo zawt leh a. Chu pa chuan, ‘Heta ṭanga mel khat emaw vela hla, Clapham Junction panin kein kal la, Victoria pan tur rel chhuak hnuhnung ber i la man hman tawk chiah vel ang,’ a ti a.

"Mr Holmes, chutiang chu thil awm dan chu a ni a. In chhungah khan tu nge ka va biak a, eng mi nge ka va dawr tih ka hre hauh lo; mahse, thil dik lo tak eng emaw chu a awm a ni tih ka hre tlat a, kha mi khawngaihthlak tak kha theih ang anga ṭanpui ka duh tlat bawk a ni. Chumi tuk zingah chuan thil awm dan chu Mr Mycroft Holmes-a hnenah ka hrilh vek a, chutah police-ho hnenah ka hrilh leh ta bawk a ni,” a ti ta a.

A thu sawi zawh hnu pawh chuan ngawi rengin eng emaw chen chu kan la ṭhu ṭhap a. Chutah Sherlock Holmes chuan a unaupa chu a’n melh a, “Eng emaw talin chet i thawh tawh em?” a han ti a. Mycroft chuan dawhkan tesep chunga Daily News chanchinbu let reng chu a’n la a. Chutah,

“ 'Greek pa pakhat, Athens aṭanga lo kal, sapṭawng thiam miah lo, Paul Kratides-a awmna hmun sawi theitu chu lawmman pek an ni ang. Greek hmeichhe pakhat, a hming bul lama Sophy tih awm awmna hria pawh chutiang zah bawk lawmman chu pek an ni ang. X 2473.' Chu zawng chu ni tin chanchinbu lama thu chuang chu a ni; a chhanna awm ka la hre lo,” a han ti a. (X 2473 hi chu mi bo awmna hriate’n an hrilh letna tur telephone number ni àwm tak a ni. Pll.)

Sherlock Holmes chuan, “Greek Legation lamah chanchin i va zawt tawh em?” tiin a unaupa chu a’n zawt a. Mycroft Holmes chuan, “Ka zawt vek tawh; eng mah an hre bik lo,” a lo ti a. Holmes chuan, “Athens police hotupa hnenah pawh thirhrui i thawn tawh ang maw?” tiin a zawt ta zel a.

A zawhna chhang chiah lo chuan Mycroft Holmes chuan ka lam hawiin, “Sherlock-a hi chuan kan chhungkaw thahrui zawng zawng a pumbilh vek alawm maw Ie. He thil hi chu i kutah awm vek mai rawh se, a ṭha zawnga thil i chan chhuak thei ta te a nih chuan min hriattir ve dawn nia,” a ti mai a.

A ṭhutna aṭanga thawh pah chuan ka ṭhianpa chuan, “Teh meuh mai. Mr Melas-a pawh ka hriattir ang. Taka na, Mr Melas, nang chu ni ila ka inveng ngun hle ang, chanchinbu-a thu chhuah avang khan i phatsan ta tih chu hnial rual a awm si lo va,” a ti ta a.

In lam pana kan haw kawngah chuan thirhrui pisa-ah Holmes chu a’n ding muang a, thirhrui eng emaw zat a thawn chhuak a. Chutah, “Watson, zanin tlaia kan hun chu kan khawral lo ve. Thubuai maksak ber ber ka hnena lo lut hi Mycroft-a kal tlanga lo Iut a ni asin. Nichina kan thu ngaihthlak tak pawh kha a hrilh fiahna pakhat chauh awm thei tur chi niin a lang a; mahse, thil mak danglam tak a inphum tel tlat a ni,” a han ti a.

Kei chuan, “Chu, chin fel theih i inbeisei a ni maw?” tiin ka zawt a. Ani chuan, “Khati zah kan hriat tawh hnu pawha a bak kan la hai chhuak thei lo a nih chuan thil mak tak a ni ngei ang. Kan thu ngaihthlak tak chungchangah khan a chin felna tur thila ngaih dan eng emaw chu nang pawhin i nei tawh ngei ang chu,” a ti ta a. Kei chuan, “Nei ve ang riai ruai e,” tiin ka lo chhang a.

Ani chuan, “A nih leh eng nge i ngaih dan le?” tiin mi’n zawt a. Kei chuan, “Greek nula pakhat chu English tlangval pakhat, Harold Latimer-a'n a ru bo a ang hle a ni,” ka han ti a. Holmes chuan, “Ru bo a? Khawi aṭangin maw?” a ti a. Kei chuan, “Athens aṭang te pawhin a ni mahna le,” ka lo ti mai a. Sherlock Holmes chuan a Iu a’n thing a, “He tlangval hian Greek ṭawng a thiam miah lo va; nula erawh chuan sapṭawng a thiam hle thung a.

"Chumi awmzia chu, nula chu England ramah eng emaw chen a awm tawh a; mahse, tlangval chu Greek ram, Greece-ah a la awm ngai lo tawp tihna a ni,” a ti a. Kei chuan, “Chuti a nih chuan kan ngaih dan kan sawn hlek ang a, nula chu England tlawh turin a lo kal zawk a, Harold-a chuan tlan bo puiah a lo thlem thlu ta angah kan ngai mai ang chu,” ka han ti leh a. Holmes chuan, "Chu zawng a àwm ang ve ta deuh,” a lo ti bauh a.

Kei chuan, “Tichuan, nula unaupa chu Greece aṭangin a lo tlan thla a, nula unaupa a nih a rinawm tlat avangin an inhnuh hnawkna thilah chuan a rawn tel ve a. Harold-a leh a ṭhianpa, Harold-a aia upa kutah chuan a inbarh a, an thu hnuaiah a rawn intuklut ta mai a ni. Anni chuan an lo hup bet nghal hmiah a, nula unaupa kuta nula ro chan tur chungchanga thu neihna awm chu hre ranin nula ro chan tur chhawmtir dan ngaihtuahin lehkha ziah luihtir an tum ta a ni.

"Nimahsela, chu lehkha chu nula unaupa chuan a ziak duh ta tlat lo va. An inbiakna atan chuan tun hma lamin mi pakhat an hmang a; mahse, a remchan zui tak loh avangin Mr Melas-a an hmang leh ta a ni. Nula hnenah chuan England-a a unaupa a rawn thlen thlak ve thu hi an hrilh hauh lo va; mahse, engtin emaw a hre chhuak ve hlauh zawk pawh a ni,” ka ti a.

Holmes chuan, “Watson, i ti ṭha kher mai. Thu dik i hlat hauh lo vang. Tunah chuan kan lehkha dennaah hian a huai huai kan hum vek tawh a, tharum an thawh duh thut hi kan tan a hlauhawm ber tawh chauh a ni. Hun kan neih phawt chuan kan man chhuak ngei ang,” a ti a.

Kei chuan, “Mahse, engtin nge In awmna kha kan zawn chhuah tak ang?” ka lo ti a. Holmes chuan, “Kan ngaihruat dan hi a dik a, hmeichhe hming emaw ni chu, Sophy Kratides a nih hlauh chuan a zawn chhuah a harsa lo vang. A chhan chu a unaupa chu London khawpuiah hi chuan chawlhni zing chhung inkhawmnaa ramhuai ṭhu ve ang maia mikhual a ni tlat a.

"Nula leh Harold-a inhmelhriat hun chhung hian eng emaw chen chu a awh ngei bawk ang, a unaupa, Greece rama awm pawhin a lo hre pha daih a ni. Chutia nula unaupain Greece ram aṭanga a hriat a, a lo kal hun chhung chuan nula leh Harold-a chu an cheng dun a nih phawt chuan Mycroft-a thu chhuah chhanna kha kan hmu ngei ngei ang,” a ti ta a.

Chutiang thu a sawi chhung chuan Baker Street-a kan chènna hmun chu kan lo thleng tawh a. Holmes chu a kal hmasa a, kan pindan luah kawngkhar a han hawn a, pindan chhung a han bih chuan a phu chiang ve kher mai. Kei pawhin a thil hmuh chu ka va hmuhpui ve thuai a, ka phu nasa ve hle a ni. Kan ṭhutthleng pakhatah chuan Holmes-a unaupa, Mycroft chu mei zu chungin a lo ṭhu der der mai a.

Mycroft chuan, “Sherlock, lo lut rawh u, Pute u. Hetiang khawpa ka taimak ve peih hi in ring miah lo vang maw Sherlock? He thil hian min tiphur ve riau alawm,” a lo ti bawrh bawrh a. Holmes chuan, “Engtin nge i lo thlen phei?” a han ti a. Mycroft chuan, “Tawlailirin ka tlan pel che u alawm,” a lo ti mai a. Holmes chuan, "Thil thleng thar a awm deuh elo?” a’n ti a. Mycroft chuan, “Chanchinbu-a ka thu chhuah kha a chhanna a lo thleng pek alawm maw le,” a ti a.

Holmes chuan, “Ah!” a’n ti ringawt a. Mycroft chuan, “Nia, in chhuah hnu lawk khan a lo thleng a ni,” a ti ta zel a. Holmes chuan, “Eng nge a sawi?” tiin a zawt a. Mycroft Holmes chuan, lehkha phek pakhat hi a rawn phawrh chhuak a, “Heta hi le. Lehkhapuan ṭha mi, a puan dak mam ṭha ber chi-ah kawlawm chi khat, J-pen an tihin, mi pakhat, upa teh chiam lo, naupang tawh vak lo, taksa pianphunga mi chak vak lovin a ziah a ni a. A lehkhaah chuan :

‘Ka pu,

Vawiina chanchinbu-a i thu chhuah kha ka lo hmu a, i hmeichhe sawi kha ka hre chiang khawp mai tih rawn hrilh che ka duh a ni. Min rawn tlawh kual hman chuan chu hmeichhe chanchin lungngaihthlak tak chu ka lo hrilh ang che. Tunah chuan Beckenham-a, The Myrtles an tihah a cheng mek.

I rin tlak,
J.DAVENPORT‘

tih a ni. Sherlock, chu pa hnenah chuan kalin thil awm dan chu kan va zawt chiang nghal dawn em ni? He pa hi chuan lehkha hi chu Lower Brixton aṭanga a rawn ziah a nia," a ti a.

Holmes chuan, “My dear Mycroft, nula chanchin lungngaihthlak tak va hriat ai chuan a unaupa nunna chu kan ngai pawimawh hmasa tur a ni. Inspector Gregson-a lam turin Scotland Yard-ah va tlan nghal ila, chutah tawi muang miah lovin Beckenham lamah chuan tlan tlang ila a ṭhat ka ring. Tunah hian tu emaw chu thi turin a chung thu an relsak tawh ngei ang a, chuvangin, mit khap kar tin hi a uiawm hliah hliah tawh a ni,” a ti a.

Kei chuan, “Kal pahin Mr Melas-a kha hruai ve nghal ila a ṭha ang, ṭawng lettu kan mamawh maithei a ni,” ka lo ti a. Sherlock Holmes chuan, “A ni tak! Tawlailir ngaihtuah turin naupang kha tir nghal rawh, i tlan chhuak nghal thuai ang u,” a han ti a. Chutia tih pah chuan dawhkan pawhdawh aṭang chuan puakruk a phawrh chhuak a, a iptê-ah a ak zauh a. Chutia a ti lai chu ka en reng tih a’n hmuh chuan, “Kan bitum turte hi mi sual rual hlauhawm tak an ni tlat a ni,” a han ti zui a.

Mr Melas-a chenna, Pall Mall kan va thlen chuan khua a thim chhilh chhelh tawh a. Kan thlen hma lawk chuan pa pakhatin a rawn lam a, an chhuak ta tih thu min lo hrilh a. Mycroft Holmes chuan, “An kalna chin min hrilh thei em?” tiin a’n zawt a. Kawngkhar min rawn hawnsaktu nu chuan, “Ka pu, an kalna lam ka hre hauh lo mai. Pa pakhat nen khan tawlailirah an chuang a, an tlan liam ta tih chauh ka hria," a lo ti a.

Mycroft chuan, “A rawn lamtu chuan a hming a sawi em?” a han ti leh a. Chu nu chuan, “Sawi lo, ka pu,” tiin a lo chhang a. Mycroft chuan, “Pa sang deuh, hmelṭha tak, ngo vak lo a ni em?” a ti ta zel a. Chu nu chuan, “Ni lo tawp mai ka pu. Pa tê tak tê, tarmit vuah, hmai cher deuh, ṭawng zawnga nui hawk hawk mai leh nelawm tak mai a ni,” a ti a. Sherlock Holmes chuan, “Lo tlan rawh u! Thil awm dan hi a ṭha lo ta tak zet a ni,” a han ti a.

Chutih lai chuan Scotland Yard lam panin kan tlan mek a. Chutah, “Hengho hian Mr Melas-a an kawl leh ta a, ani kha a rorum vak bik lo tlat mai lehnghal a, chu chu hman zan pawh khan an hre tawh ngei ang. Chu pa tê tak tê hmel ringawt pawh chu a tan chuan khurhna tham a tling pek ngei ang. Hengho hian an ṭawng lehlinsaktu atan an duh ngei ang a; mahse, chanchinbu-a mi bo chanchin a lo Ian tak avang khan a rinawm ziktluak ta lo tih an hre ve ngei ang a, chumi avang chuan an hrem duh pawh a ni ve ang,” a ti a.

Kan tum dan chuan tawlailira kal lovin relah chuang zawk ila, Beckenham chu kan thleng thuai ang tih kan lo ring a; mahse, Scotland Yard-ah chuan kan tum ang rawkin thil a lo tih theih loh tawp mai a. Dan anga mi in chhunga luh theihna tur leh thil ṭul dang neuh neuh kan han tih fel meuh chuan a lo tlai rawih tawh mai a.

Zan dar sawm rik dawn ṭepah London Bridge kan thleng a, Beckenham rel chawlhhmuna kan han zuan thlak theih meuh chuan zan dar sawm leh a chanve lai a lo ni tawh a. Chutah tawlailirin mel chanve lai kan han inkhalh leh a, chutah The Myrtles, In lianpui mai, thim khup mai chu kan va thleng a. Kan thlen veleh chuan tawlailir chu kalsanin In pannaa kawngah chuan kan pali chuan kan chho ta ṭham ṭham a.

Inspector chuan, “Tukverh zawng zawng a thim ṭhiap mai, in chhung chu a ruak vek a ni hial ang tih palh awl a ni,” a han ti a. Holmes chuan, “Kan sava bu hup tur chu a ruak a ang hle mai, an thlawk chhuak hman a nih dawn hi,” a ti ta mai a. “Engati maw?” tiin kan lo zawt vat a. Holmes chuan, “Tawlailir pakhat, thil rit tak phurin he kawng hi nichin lawk khan he In kalsan zawng hian a zawh a ni,” a ti ta a.

Nui chung hian Inspector chuan, “Dai kawngkhar bula an khawnvar chhit èn aṭang hian tawlailir hnu-hma chu ka hmu thei a; mahse, khawi aṭang hian nge chu tawlailir chuan thil rit tak a phur tih i hriat theih tih chu ka hre pha ta hauh lo mai,” a lo ti a. Holmes chuan, “In lam pana tawlailir kalna hnu-hma pawh hi i hmu ang a; mahse, a chhuak lam hnu hi chu a fiah bik tlat a, chuvangin, a chhuak lam hi chuan thil rit tak a phur tih kan hre chiang thei ta a ni,” a han ti a.

Inspector chuan, “Chu zawng, keia thluak ngawt zawngin a lo chhui pha pek lo. An kawngkhar hi an kalh nghet viau maithei a; mahse, kan chhut nat tawk phawt chuan tu pa benga rawngah emaw chuan a lut ve mial mahna le,” a ti a. Kawngkhar chu a’n kik chiam a, dar pawh rik pawh a ri ngial a; mahse, eng mah a ang thei chuang lo va.

Chutih lai chuan Holmes chu a kal bo zawk a, a lo kir leh vat a, “Tukverh ka hawng thei ta e,” a rawn ti a. Inspector chuan, “Dan keng kawhtute kalh zawng ni lo, a thawhpui zawnga i khawsa hlauh mai hi chu a lawmawm mang e Mr Holmes,” a ti a. Chutia a tih lai chuan Holmes chuan zei deuh maiin tukverh kalhna chu a hawng a, “Sawmna hmu lo pawhin lut chawt mai ang aw,” a han ti zui a.

Pindan zau tak chhungah chuan kan inzui lut thliah thliah a. Mr Melas-a'n a sawi, pindan zau tak mai kha kan va thleng a, Japanese indo kawr ni àwm tak te, pindan puanzar te, khawnvar te chu kan va hmu a. Dawhkan chungah chuan no pahnih a inhung a, zu ûm ruak a awm bawk a. Chaw eina hnu a awm bawk a. Holmes chuan, “Chu eng nge ni?” a'n ti thut mai a. Kan ding ṭhap a, kan han ngaithla a, kan lu chung lam aṭang chuan zawi têa rum ri hi a lo chhuak a.

Holmes chuan kawngkhar a hawng thut a, a tlan chhuak a, pindan dangah kan va inzui lut a, kan lu chung lamah chuan thawm chu a lo ri leh ta a. Chutah Holmes chu kailawnah a tlan chho va, Inspector nen chuan a hnung chiahah kan zui chho nghal a. Mycroft Holmes-a chu a len deuh avangin a tlan hlei thei lo va, a hnuhnung berah chuan a lo kal ve ṭuai ṭuai a.

Kailawna kan han chuan chhuah chuan kawngkhar pathum a lo awm a, kawngkhar laita chu thawm lo chhuahna chu a nih avangin Holmes chuan a’n hawng vat a. A chhungah a zuang lut nghal a; mahse, hrawk dawm vawng vawng chungin rang deuhin a lo chhuak leh nghal vat a. Holmes chuan, “Meihawl a ni! Ngawi rih lawk rawh u, a reh mai ang,” a han ti a.

Pindan chhung chu kan va bih a, pindan chhungah chuan dar thleng kum takah hian meialh dumpawl phet phawt hi a lo alh hlat hlat a. A khu chu pindan chhungah chuan a zam val pap pap a; pindan kil lam bang bula mihring taksa pahnih chu a hmuh theih riai ruai bawk a. Kawngkharah chuan mei khu chu a lo chhuak a, kan hip luh tâk avangin kan khuh bawrh bawrh a.

Holmes chu kailawn lo chhuah chhohna hmawr lamah chuan boruak thiang hip turin a tlan phei a, boruak a va hip zawh chuan pindan chhungah chuan a zuang lut leh vat a; tukverh chu a va hawng a, chutah dar thleng kum tak mai pawh chu huanah chuan a theh chhuak ta daih a. Pindan atanga lo chhuah pah chuan, “Rei lo têah kan lut leh thei mai ang. Khawiah nge khawnvar hi? Pindan chhungah saw chuan nawhalh pawh kan nawt alh thei ngûtin ka ring lo. Kawngkhar aṭang hian khawnvar khan min lo èn u la, kan phih chhuak thei mai ang. Khai le!” a han ti a.

Pindan chhungah chuan kan zuang lut zawk a, kailawn lo chhuah chhohna lamah chuan kan hnuk phei nghal vat a. An pahnih chuan an hmai chu a vung kawh luah a, an heh zawng zawng a duk vek tawh bawk a; an mit lah chu an meng pawng hlat tawh mai bawk a. An hmel chu a danglam em avangin kan Greek mi, ṭawng lettu pawh chu a hmuihmul dum tak mai leh a taksa chawm ṭha tak mai chu nichin lawk khan Diogenes Club-ah khan lo hmu ta lo ila chuan kan hai hial ta ve ang.

A kut leh ke chu nghet takin an ṭawn tlat a, a mit lehlam bulah chuan na tawk taka kut thlakna hnu-hma kan hmu bawk a. A ṭhianpa pawh chu amah ang bawkin an phuar hlawm ve a, a hmaiah chuan puan ban an bel kawkalh nuai bawk a. Chhuata zalh pangngai deuha kan zalh chuan a rum pawh a rum tawh lo va, ka‘n en mai pawhin kan ṭanpuina chu a tan chuan a tlai lutuk ta tih ka hre mai.

Darkar khat pawh tling lo kan insawngbawl hnu chuan Mr Melas chu a lo meng chhuak a, keimah avangin a thihna hlimkawr zawh lai mek aṭangin a lo kir leh a ni tih te ka’n hriat chuan ka lawm hle a ni. Mr Melas-a chuan thu mak danglam eng mah sawi tur a hre lo, a thu sawi pawh kan thil chhut chhuah sa nem nghehna ang lekfang a ni.

A inlengpa chuan a in chhung a dài rual rualin a kawr ban aṭangin puakruk a phawrh chhuak a, kap duh nghal mai dawna a rin tlat avangin Mr Melas-a chu a ṭum hnihna atan a inruk botir ta a ni. Chu pa a’n hlauh êm êmzia chu a nuihzatthlak zawk hialin ka hre mai. Kan bula a awm hnu pawh chuan a hlauhzia chu sawi ngaihna a hre lo va, pa tê tak tê, nui hek hek reng mai chu a chanchin pawh zu sawi ṭha hlei thei lo va!

Tichuan, Beckenham-ah an hruai a, ṭawng lettu-ah an hmang leh ta a. A hmasa ai chuan chumi ṭum chuan a rapthlak zawk mah awm e. Pa tê tak tê leh a ṭhianpa chuan an lung In tang khawi chu an duh anga thil a tih loh chuan chawp leh chilha tihhlum nghalah an vau a; mahse, ani lah a lo luhlul ve kher mai si a; eng mah an ân phah ta chuang lo va. Tichuan, a tanna pindanah an hruai let leh a.

Chanchinbu-a thil awm dan lang chhuak hial khawpa Melas-a'n rinawm lohna a chhuah avangin Melas-a pawh chu theih tawpin an vau tê tê a, tiang rit tawk takin an chhu thlu tawp a. Chumi bak chu Melas-a chuan pindan chhung aṭanga an hnuh chhuah a, ka enkawlna avanga a lo harh leh tak bak chu eng mah a hre ta lo a ni. Chu zawng chu Greek mi, ṭawng letlingtu chunga thil lo thleng chu a ni mai àwm e. A hrilh fiahna tur ṭhenkhat chu tun thlengin hriat a la ni lo.

Chanchinbu-a Melas-a thu chhuah emaw ni, Mycroft Holmes-a thu chhuah emaw ni rawn chhangtu chu kan bia a. Chu hmeichhe vanduai tak mai chu Greek chhungkaw khawsa thei tak aṭanga lo chhuak a nih thu leh England-ah chuan ṭhian ṭhenkhat tlawh zawk tura lo kal a nih thu min hrilh a. Chutia England-a a cham lai chuan tlangval pakhat, Harold Latimer-a chu a hmelhriat a, chu pa chuan a taksa leh thlarau chunga thu nei thei ṭhelh khawpin a hneh a, a tawpah phei chuan a ru bo ta hial a.

A hmeichhe lam ṭhiante chuan chu thil chu mak an tih vang leh àwm lo an tih avangin hmeichhe unaupa, Athens a awm chu thirhruiin thil awm dan an hrilh a, an duh tawk ta mai a. Tichuan, nula unaupa chu Athens aṭangin England-ah a lo kal a, Latimer-a leh a ṭhianpa kutah chuan a rawn inbarh lut ta ngawt mai a. Latimer-a ṭhianpa hming chu Wilson Kemp a ni nghe nghe àwm e.

Nula unaupa chuan sapṭawng a thiam tlat loh avangin a tan chet ngaihna a awm miah lo tih an hria a, mi sual buru lutuk, Wilson Kemp-a leh a ṭhianpa Latimer-a chuan lung In tang cheiin an chei zui ta mai a. A farnu ro chan tur leh ama ro chan tur pawh chu Latimer-a hminga dah turin hming ziahtir an tum ta a ni. Tichuan, in khata nula leh a unaupate nena chengho vek an nih avangin inhmuh palh thut pawh a awm thei e tih thu-hlaah nula unaupa hmaiah chuan puan ban an bel ta chiam a, nula chuan hmu thut pawh ni sela a hre mai dawn lo a ni.

Nula unaupa an kar chhung chuan in khatah chuan an chengho vek a; mahse, Mr Melas-a va kal hmasak khan nula chuan a unaupa an hren thu chu a hre ta a. Chanchinbu-a thu a lo chhuah leh tak zel bawk avang khan an inthup tumna chu a lo thlawn a ni tih hriain Holmes-a hova kan va ṭhawn fuh hman hmain an lo tlan chhuak hman ta a ni. Mahse, an kal hmain an sawmna leh an thu pek zawm duh lotu, nula unaupa leh anmahni phatsantu leh hêktu, Mr Melas-a chungah chuan phuba an la ve ngeiah an inngai tho niin a lang.

Chumi aṭanga thla eng emaw zah ral hnu chuan Budapest aṭangin chanchinbu-a thu ziak cheh thlak hian engtin tin emaw kan awmna a lo thleng nawlh mai a. Chu chanchinbu-ah chuan sap-pa pahnih leh nula pakhat an zin dun a, mipa pahnih chu vih hlum an nih thu a chuang a.

Hungarian police-ho ngaih dan chuan mipa pahnih chu an inhmu thiam ta lo va, thihna thlen hial khawpin an invit ta a ni ang tih a ni a; mahse, Holmes-a chuan ngaih dan dang a nei tlat pekin ka ring. Tun thleng pawh hian Greek nula kha zawng hmu thei ngat ila chuan amah leh a unaupa phuba chu lak lohvin a awm kumhlun lo tih a sawi duh ngeiin Holmes chuan a ring tlat a ni.

A TAWP TA.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)