My Handsome Girlfriend BY Haylor (Remruati Bawitlung) (Completed)

Moderator: Remruati (Haylor)

Ngaia
Site Admin
Posts: 25813
Joined: April 30th, 2016, 4:07 pm

Re: My Handsome Girlfriend BY Haylor (Remruati Bawitlung)

Unread post by Ngaia » October 16th, 2016, 1:41 pm

Chapter-23
.
Miller's Pov
.
Cassie chu kalsan in damdawi in lam chu ka pan nghala, diktak chuan Cassie ka hmu chiaha kalsan mai chu ka duh bik hauh lo mahse tunah hian Cheng Wen chu nikhaw hrelo in a awm a, anu in mangang taka rawn kal vat tura min hrilh laiin engtin nge ka lo lenkual mai mai theih ang.Ka rilru a buai takzet ani,ka bialnu ka hmangaih em em chu kalsan in Cheng Wen ka pan hi thutlukna siam harsa tak ani.
.
Damdawiin ka thleng chuan Nu Fang Wen-i chuan min rawn kuah thlawp a,
" Khawiah nge Cheng Wen a awm? " ka lo ti vata, min tahkhum nghal zawih zawih a, ka lo kuah let vata, han thlamuan dan mai tur pawh ka hriat loh avangin a hnungah chuan zaidam takin ka chul a.Awmdan tur pawh ka hrelo ka rilru a hah takzet ani.
.
"Tunah khan inzaina room ah an nawr lut chiah, Engtin nge ka tih tak ang?" A tap nghal hawm hawm a, a hrehawm takzet ani
" A tha leh mai ang" ka lo ti sap a, tawngkam thiamtak te chu ni ila hei ai hian ka hnem thiam mahna.
.
" Ka fanu hian a tuar nasa tawh mah mah ani, khawngaih takin ka fanu hi chhanchhuak rawh" Engthil mah tih theih ka nei lo tih ka hria mahse hetia an bula ka awm hian a thla a muang a, chu chauh pawh chu thu lawmawm tak ani.
.
Inzaina pawnah chuan Nu Wen nen chuan inzai zawh hun nghakin ka thu dun ran a, ka lu chu ka dawm vang vang a ,ka thu kun lap bawka, a chang leh ka vei sek a thaw leh hawk thin.
" Miller khawngaih takin Cheng Wen hi kalsan suh aw...ka ngen a che " Nu Wen-i chuan beidawn hmel tak hian min rawn en a.
.
" Ka kalsan dawn hleinem ,Cheng Wen chu a tha leh vat mai ang" tih pahin a kut ah chuan ka hum vang vang a.
"A kiangah i awm chuan a hlim em em a,i awm hi chuan that lam a pan zel niin ka hria chuvang chuan a kiangah hian awmla ka duh ani,khawngaih in ka fanu kiangah hian awm rawh"min ngen nghal mawlh mawlh a, chan dan tur pawh ka hre tawh lo, lehlamah Cassie a awm a, Cheng Wen hi hei aia ka ngaihsak chuan Cassie hian a thik ngei ngei dawn tih pawh ka hrechiang hle ani.
.
" Ka kalsan lo ang" ka ti chuai raih a, mahse ka ngaihtuahna erawh a kal thui hle thung.Hetah Cheng Wen in min mamawh em em a, Cassie pawh in min hriatthiam ve ngei ka ring ani.
.
Diktak chuan Cassie hi ka nunah rawn lut lo se chuan engkimah Cheng Wen kiangah ka awm ngei ang a chhan chu hun harsa tak tak leh hrehawm tinreng ka tawrh laiin Cheng Wen chu ka kiangah awm in min thlamuan thin a, ka nu vanga rilru na taka ka awm lai pawhin ani chuan min tih hlim a tum a, engtik lai pawhin ka kiangah a awm a,tunah min mamawh velah a kiangah ka awm ve thei si lo.
.
A kianga awm a hnekin a rilru ka tih nat saka,min mamawh tih hrereng chungin ka hmangaih chu ka thlang a, ka hlim rual rual in ka inthiam lo takzet ani.Tunah hian ka rilru a buai takzet ani.
.
Lehlamah Cassie chan ka phal loh leh ka nunna tluk hial a ka ngaih a awm a ,lehlamah ka thian tha tak ka mangan lai zawng zawng a min tanpui tu chu natna khirh tak tuarin a awm bawka.Tu amaw zawk zawk pawh thlang ila midang rilru chu ka tihnat sak ngei ngei dawn ani.Tu zawng nge ka thlan ang min han hrilh teh u?
.
Cheng Wen chu darkar chanve dawn lai an zai tawh a, Nu Wen-i chu a tap faih faih bawka, a bulah chuan ngawi rengin ka thu ve ran a,Cassie chungah pawh ka inthiam lo em em a mahse duhthlan tur dang ka nei bawk si lo.
.
Cassie chu ka call a mahse a la thei lo, vawithum vel ka call pawh chuan a la thei chuang lo a, a mu tawh anih ka ring a message chu ka hnutchhiah ta zawka.Ka in dawn kun lap a ka ngaih chu a tha thei tlat lo, ka awmdan chu Nu Wen-i chuan min lo en kar a.
.
" Buaina a awm ami?" a rawn ti vata.
"awm lo e" ka ti sap a,
" Anih chuan zanin chu hetah riak ve la tiraw?"
" Awle" tih pahin za lo zet chuan ka nui suk a.Ka thaw hak a, ka phone chu ka melh ngar ngar a,ka tho thut a ka kalsawn nghal a.
.
Cassie chu ka call leh ta nge nge a ala chhang thei chuang lo, Cassie chu a lungawi lo ani ngei ang, ka chungah a lungawi loh hi chuan ka awmdan phung hi a buai zo vek zel .Tun chiah ka call tawh ang tih rilru in ka call leh ta hrama , a pickup hlauh !! ka nui ngal suk a.
.
" Cassie" ka ti nghal vat a,tap in sut ri faih faih chu ka hre nghala .
" Cassie i tha em?" ka han ti leh a.
" Miller" Cassie aw a ni hauh ta lo, a tap nghal zawih zawih a.
" Tunge i nih? Khawiah nge Cassie?" ka han ti leh a.
" Cassie chu tunah.... tunah damdawiin ah a awm"
" Eng maw!!" ka ti nghal tuarh a.
.
"Tunah biak theih loh in a awm!"
"Chutiang chuan a awm thei lo ang" ka chiai nghal veka, ka kut te chu a khur nghal der der a
"Tunah hian a mamawh che ani" phone chu ka dah nghala, pawn lam pan chuan ka tlan nghal hlawk hlawk a.
.
" Miller" Nu Wen chuan min rawn ko a, ka ding chawt a
"Khawiah nge i kal dawn, Cheng Wen pawh an zai zo tep tawh a, lo la nghak hrih la"
"Min hrathiam rawh, ka kal angai" tih leh tlan ka rual a,Car chhungah ka lut a chak zet in ka khalh chhuak nghala.
.
Ka khalh lai te chuan ka rilru a buai vek tawh a,ka hamhaih vek ani.Cassie chu engtin nge a awm ang? Engvanga mawl em em nge maw ka nih le lo kalsan loh tawp tur kha ania .Car steering chu ka beng leh pawp thin a,tih theih dang ka nei bawk si lo.
.
Damdawiin ka thlen chuan Cassie chu ka zawng nghal ruai a,ka hlauthawng takzet ani.
" Miller" ka hawi phei vata, Ashley chuan mit sen ram hian min rawn en a.
" Khawiah nge Cassie chu a awm?" ka ti vata.
"Min rawn zui rawh" tih pahin a kal nghal a, ka zui nghal hlawk hlawk a room pakhat ah hian a lut a, ka lut tur chu ka ding chawt a.
.
"i thei tur ani" ka ti sap a, ka inhum ruh nghala ,inngaihtuah nawn tawh lo in ka lut ve nghala.Ka thil hmuh chuan min thawng chiang kher mai, ka thinlung hi pawh nawk nawk ang maiin ana ani.Cassie chu khumah chuan a lo mu bam a, muang changin ka va pan hnai a.
.
Cassie chu oxygen hmangin alo thaw tawk tawk a,a dang bal a a hmui te chu a duk vek bawka.A bulah chuan ka ding ran a, awmngaihna pawh ka hrelo ka ding khawng renga,amah chu ka melh tlawk tlawk a.A mit pawl ram te kha hmuh tur a awm tawh lo a, min hmuh changa a nui hmel mawi tak te kha hmuh tur a awm tawh hek lo.A bula ka awm reng lai pawh in min maimichhin san daih a,min tum khum renga hriatthiam har ka ti takzet ani.
.
" Cassie ani lo" tih pahin room chu ka chhuahsan nghala, inhnuaiah chuan ka tlan thla a, ka car bul ka thlen chuan ka lu chu ka dawm vang vang a.
"Nilo" tih pahin ka car chu ka pet pawp pawp a,Cassie chungah lehzel maw!! nilo, Cassie hi damdawiin a awm tur ani lo asin.
.
Ka car chu ka hnek vak vak a,ka in haw em em a ka thinrim takzet ani.
" Miller duhtawk rawh" Ka tawp chat a, ka hawiphei nghala.
" Cassie in a mamawh che asin" Ashley chuan a ti chuai raih a.
" Sawtah thih sual in Cassie chu a thaw dep dep a, nang hetah inchhir in ilo in dawm kun mai mai amaw!!"
.
"Engmah hi ka hrethiam tawh lo"ka ti chuai raih a. Awmdan tur pawh ka hre tawh lo, ka buai vek a, ka a tawh ni berin ka inhria.Car ngheng chuan ka thu hnawk a, Ashley pawh ka bulah chuan a rawn thu ve nghala.
.
"Cassie hi lung tha lo ani a, tunah hian a hun hnuhnung chu a hmang mek ani" a thaw halh a.
"i hriat hma pawh khan vawitamtak damdawiin ah a awm tawh asin, tunah hian a lung hi thlak ani loh chuan a dam chhuak tawh kher lo maithei ani" Ashley chu a mittui a tla zawih zawih a, ka melh ngai chu ka melh renga, Ashley thusawi chu ka ngaithla tawp ani.
.
" I hria em... hun rei tak chhung hmuh tur a awm loh kha,khatah pawh khan damdawiin a a awm vang ani.Nangmah vangin vawinah college a rawn kal a ,a natna chanchin hrilh tur che in" Cassie khan thil min hrilh tur thu kha a sawi a, ngaihthla duh lo in ka kalsan a, ka thiam loh vek ani,ka inchhir lutuk chu ka thu kun lap a, tih theih ka nei bawk si lo.
.
"Cassie hian a mamawh che a,a kiangah hian awm reng rawh.A hun hnuhnung ah tal hi chuan a rilru tih nat sak lo hram rawh "Ashley chu a tho a, ka hma ah tak chuan a rawn ding a.
"Khawngaih takin Cassie kiangah hian awm rawh, chu chu ka ngen a che" tih pahin damdawiin chhungah chuan min luhsan a.
.
Ka thutna ngai ah chuan ka thu reng a, Cassie chu hmu duh viau mah ila ka thei lo ani.A hmel lainatawm tak te kha hmuh harsa ka ti takzet ani.A lo tawrh nasat tur zia te ka ngaihtuah a ,keichuan a rilru ka ti na thin a khang hun zawng zawng a ka tihdan avang khan ka inchhir takzet ani.
.
Zankhua in car ah chuan ka thu char char a, rilru fim pawh ka pu thei tawh meuh lo.Ka bing mup mup a hetia Cassie a awm ta mai hi ka tuarthiam lo ani.A chang leh Cassie ani lo tiin ka inhnem a mahse Cassie hun hnuhung ah hian hetiang hian ka awm tur ani lo ,a kiangah ka awm tur ani tiin ka rilru ka siamfel ta ani.
Attachments
IMG_20170127_145950_413.JPG
IMG_20170127_145950_413.JPG (81.57 KiB) Viewed 8202 times



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 16th, 2016, 1:41 pm

Khua chu a var uarh tawh a mahse ka mut chu ala chhuak eih lo,vur chu a tla seng seng bawka .Hreh tak chungin damdawiin chhungah chuan ka lut chhat chhat a, Cassie awmna room bul ka thlen chuan Cassie chu hmanhmawh deuh hian an rawn nawr chhuak nghal pawp pawp a.
.
"Engthil nge thleng?" Nurse pakhat chu ka lo pawt peng vat a.
" A natna hi a rawn zual leh ani, min lo hrethiam rawh damlo hi buaipui vat angai ani" A mit nghal sawlh a, ka tawlh hnung hret a.
.
" Ka fanu hi nangmah vanga hetianga awm hi ani" Cassie nu chuan ka awmah chuan a rawn chum a min tah khum nghal hawm hawm a, ka melh ngai chu ka melh renga, engthil nge ka tih hmasak leh tur pawh ka hre lo ani .
"Heta tang hian kalbo rawh" ka hma ah chuan a thu hnawk a
.
" Nu Stacy" Ashley chu a rawn kal vata.
" Henu hi hetatang hian chhuah tir rawh" Ashley chuan min rawn melh a.Cassie nu chu room chhungah chuan a luhpui nghala.Reilo te hnuah chuan a rawn chhuak leh a.
" Khawngaih takin heta tang hian kal bo rawh"
" Ka ....ka duh lo"
"I hmu lo ami, Cassie chu nangmah hmachhawn tur pawhin a awm tawh lo, hetah indawm kun reng lo in nun thar nei turin bul tan tha zawk rawh" ka meng nghal kawk a.
.
" Cassie tello a nunthar maw" ka nui hak a " Chu thil chu ka theih i ring ami?, nilo Cassie hi ka kalsan dawn lo" ka kut chu ka hum ruh a, ka din na ngaiah chuan ka ding tlata.Ashley chuan room chhungah chuan min luhsan ta ringawt a .
.
Darkar khat dawn lai ka din hnuah chuan Cassie chu an rawn nawr lut leh a, Cassie hmel ka hmuh chuan ka rilru na lutuk hi au vak vak mai chu ka duh ani.Room chhungah chuan ka luh ve an phal loh avangin pawnah chuan ka thu renga.A chang leh ka vei kual reng a haw chu ka tum hauh lo.Zankhua in Cassie awmna room kawtah chuan ka thu renga.
.
"lo lut rawh ,Nu stacy in a hmu duh che" Chutia ka indawm kun lap lai chuan Ashley chuan min rawn ko a, ka hawi chho chu khua a lo var uarh tawh a.Hetah bian zankhua in ka luh hun an phal nghakin ka thu tawp ani.Room chhungah chuan ka lut a.
.
Cassie bulah chuan Nu Stacy chu a thu ran a, Cassie kut chu a vuan tlat bawk a, a lo in hnit faih faih a,Cassie pa leh doctor chu an inbe mawlh mawlh a.Ashley chu couch ah thu in a indawm kun lap bawka.
.
"Tunah hi chuan a muhil a, Damlo hian zual lam a pan zela ,a lung hi thlak vat anih loh chuan rei a dam tawh lo ang"Doctor thusawi chuan min thawng takzet ani.Cassie a damlo tih ka hre ve chiah a, adaih rei tawh loh tur thu ka hre leh nghala, a rang mah mah lo maw?
.
Doctor leh Cassie pa chu an inbe mawlh mawlh a,an thusawi ngaithlak chhunzawm pawh ka duhlo ani.
Cassie nu bulah chuan ka zuk thu ve tawpa.Ngawi rengin Cassie chu ka en renga,Oxygen hmangin a thaw ve tawk tawk a, hetia nikhaw hrelo a a awm ta mai hi hriatthiam a har ka ti takzet ani.
.
"in bia ang" Cassie nu chuan a rawn ti sap a,mak tih hmel takin ka en a ka lo bu nghata.
" Hetah nilo" a rawn ti leh sap a, pawn ah chuan a chhuak a.
Ka tho a ,Cassie chalah chuan ka fawp zeuh a.
" ka rawn let leh vat ang" ka ti a, Cassie nu chu ka zuichhuak nghala.
.
Room pawn a thuthleng ah chuan Cassie nu chu a lo thu kun lap a, a bulah chuan ngawi rengin ka thu ve nghala.
" Ka fanu hi engtiang chiahin nge i hmangaih" a rawn ti sapa.
" Ka thinlung zawng zawng in ka hmangaih ani"
" Anih chuan ka fanu hi kalsan rawh" a tih chuan ka ding vata.
" Ka...ka theilo ka tihpalh ani"
"Hmangaihna" a nui hak a, " Engtiang chiahin nge in lo in hmangaih ? ka fanu chungah hian engthil nge i tih?"a mittui chu a hru zeuh a, lamlam chu a hawi vata.Cassie nu hma ah chuan ka thingthi hnawk a .
.
"i fanu tello hian ka awm thei lo, khawngaih takin amah enkawl hi min phalsak rawh chu chiah chu ka dil ang che" ka ti chuai raih a, Cassie hian min mamawh ani.Amah ka enkawl hi angai ani.
.
" Tho rawh"
" enkawl min phalsak hma loh chu hetah ka awm char char ang" inring tawk tak chuan ka ti a.
"Tho rawh ka tih chu" a mittui chu a hru zeuh a.
" Tunah chuan duhthlang thei pawh ka nih loh hi," a nui lui suk a"ka fanu tan hian pawm harsa ka ti em em che a mahse ka fanu hian a mamawh che tih hi ka hai bik si lo" a in hnit faih faih a
"Ka fanu nunna hi reilo te pawh pawh sei a nih chuan chu aia duhthusam chu ka nei lo" A mittui chu a tla nghal zung zung a, ka tho a Cassie nu chu ka kuah a.
." Ka lawm e, enkawl min phalsak avangin Cassie hi ka kalsan ngai lo ang"tiin ka intiam mawlh mawlh a.
.
Tunah chuan Cassie nu pawhin enkawl min phal sak tawh a, ka theihtawh chhuah in Cassie hi ka enkawl dawn ani.
________________________________________
.
Cassie chu ala harhchhuah lo avangin nilengin ka awmpui thin a,a kiangah ka awm chawt ani ber mai.College pawh kal lo in nitin mai chuan alo harh hun ka nghak thin a,nilo, a lo harhchhuah hunah chuan a kianga awm ngei ka duh a, a chang hi chuan ka beidawng rum rum thin ani.
.
Zanah pawh damdawiin ah ka riahpui a, a taksa te chu a rimchhiat loh nan ka hrufai reng a ,a thawmhnaw te chu ka thlak sak vek thin bawka, a chang leh lehkhabu te ka chhiar saka ka theihtawp ka chhuah ani.A chang chuan ka mutsan phal lo a, a hmel chu ka en vang vang a ka mit alo va del rei tak em, khatih hun chhung zawng khan a damlo a engtin nge ka hriat miah loh theih zawk.Ka inchhir lutuk hi a chang hi chuan ka inhaw ngawih ngawih thin ani.
******.
.
Class chu sawiloh Basketball practice na ah pawh ka kal khat leh tawh em em a, coach chuan min vin vak vak thin mahse Cassie enkawl chu ka thlang zawk a, engkimah amah hi ka thlang zawk ani.
.
Basketball kan practice mawlh mawlh lai chuan ka phone chu a rawn ri ral ral a, ka kalna apiangah ka phone chu ka ak tawp ani a chhanchu Cassie chanchin awlsam taka min rawn hrilh theih nan .Ka ding chawt a, ka phone chu ka phawrh chhuak nghal a
" Miller, Practice laiin phone ken luh phal ani lo tih vawi engzat nge ka sawi dawn" Coach chu a rawn au tuarh tuarh a.
.
" Engmaw!! Cassie a harh amaw?" ka lawm lutuk chu ka mittui a rawn tling pam a.
" Ka rawn kal nghal" tih pahin kan inkhelh lai chuan ka tlan chhuak nghala.
.
" Miller...Miller" Coach in min rawn ko lawm lawm chu ka hria a mahse ka ngaihsak hman tawh lo.Pawna ka dah ka bike ah chuan ka chuang nghala, chak lutuk in ka tlan chhuak nghala .Ka tlan laklawh lai te chuan ka lawm lutuk chu ka nui leh ver ver thin a, sawifiah vak ngaihna pawh ka hrelo ka hlim ani tawp mai.
.
Ka khalh lai te chuan engmah ka ngaihtuah thei tawh lo Chutia chak taka ka khalh lai chuan red signal chu ka hmu thut a, ka tlan chak em avangin ka ding hman tawh lo ka hma a pitar kawng lo kan mek chu sut ka hlauh em avangin ka kawi nghal zawka, ka hma a car chu ka su nghal chawrh a, kawngpui ah chuan ka tleng phei a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 16th, 2016, 1:42 pm

Chapter-24.
.
Kawng sir ah chuan ka tleng phei zela,Vanneih thlak lutuk in lei dahkhawm kawng sira an lo dah hian min lo dang hlauh a!! , bike in min delh tlat avang chuan ka tho lawk thei lo a, kawng sira hnathawk ho chu rawn tlan khawm vatin ka bike chu min rawn chawi kan sak nghal vata.
" I tha em?, Khawilai nge na?"min rawn kuah thawh pah chuan an rawn ti sap sap hlawm a, tu ber nge chhan tur pawh ka hrelo.Ka insawhna lo a, ka lawm takzet ani.
.
" Ka tha e" ka ti tak na a, ka ke chu a na kher mai,ka ban leh ke vel chu a thi hnuang a,ka kekawr khup vel chu a thler vek bawka, mipui chu an rawn pung khawm tup tup a, hmanhmawh nen chuan inmil lo tak ani.
.
" Damdawiin hnai berah hruai vat ang u" tih pahin min kuah a, ka bai auh auh a, ka ke veilam hi ka rap na ngam meuh lo ani.Bike hian vawitamtak ka lo accident tawh a, tun hi a nat lo ber tum ani ngei ang,hetia nikhaw hrelo a ka awm loh avang ringawt pawh hian ka vannei takzet ani.
.
"nilo, Cheswood hospital ah kal ka duh " ka lo ti vata, a chhanchu Cassie awmna damdawiin anih vang ani.Cassie hmuh ka chak zia hi sawi mah ila tuman min hriatthiam pui lo ang.Chutia damdawiin hnaia kal duh lo a, a hla zawka kal ka duh thu ka sawi chuan mak ti takin min en ha hlawm a.
.
" Awle, saw Ambulance pawh a rawn thleng tawh e" Pa la upa lutuk lo min kuah tu chuan a ti a,an che rang ngei mai engtik lai khan nge Ambulance an koh tih pawh ka hre reng reng hleinem.Mipui zingah chuan Ambulance lam panin min kuah phei zel a, A then in a vannei hle mai,a insawhna lo a, an tih thawm chu ka hre bawka.Ambulance ah chuan min mut lut nghal a,rang takin a tlan chhuak nghala.
.
" Cheswood hospital ah aw" ka lo ti hrama, min kuah tupa kha ka bulah chuan a rawn thu ran a, ka thisen vel chu nurse pakhat chuan min rawn hrukfai sak mawlh mawlh a, ka ke chu a nat em avangin ka ner leh sawk thin a,thisen ka hlauh hnem deuh aniang ka maimichhing vang vang a,eng damdawi nge min pek pawh ka hrelo ka muhil nghal siai siai a.
.
________________________________________
.
Ka harh chuan inchung vel chu ka melh kuala, damdawiin ah ka awm tih ka hriat chuan ka thu nghal zawt a,ka ke chu a rawn na zawka,ka en chuan an lo tuam bur a,ka bulah chuan putar min hruai tu kha alo la thu ran a.
" ka pu, hetah hian darkar engzat nge ka mutthilh ,chuan hei hi khawi hospital nge?" ka ti nghal vata.
.
"hahchawl phawt rawh" muang ban fan raih chuan a rawn ti a"darkar li bak i muhil lo,i hliam hi a nasat deuh avangin Cheswood hospital ah nilo in damdawiin hnai berah kan hruai ta mai che"
" Eng maw!!" ka meng phawk nghal kawk a.
.
" i vannei hle mai, i ruh pakhat mah tliak leh na lutuk a awm lo a,mahse i ke hi a kak thuk deuh avangin enkawl deuhhlek angaih dawn thu doctor in a sawi a, i chhungte han biak mai tur ka hre bawk si lo a, ilo harhchhuah hun ka lo nghak tawp ani" a tih chuan khum atang chuan ka chhuk nghal vat a.
.
" Ka pu ka lawm e, mahse ka kal a ngai" tih pain kawngka lam pan chuan ka bai phei auh auh a, chu putar chuan min lo dawm vata
" Khawiah nge kal i tum?"
"Ka pu, Cheswood hospital ah kal ngei ngei ka ngai, khawngaihin taxi tal min phar sak rawh" ka ti ta ringawt a, a chhanchu heti ringawt chuan ka thleng zo dawn lo a ka in hriat vang ani.
.
" Mahse doctor khan..."
"ka pu khawngaih in ,ka kal ngei ngei angai" ka lo pawtchat vata, hreh tak chung chuan min rawn pan hnaia
" Awle, mahse inenkawl tha ang che"tih pahin min rawn nuih suka,min kuah chhuak nghala, midang ho chuan min la enduh em em zui.
.
Pawn kan thlen chuan taxi chu min phar din saka ka lut vata, tukverh ah chuan ka dakchhuaka
" Ka pu ka lawm takzet ani , ka la rul leh em em ang che" tih pahin ka nuih suka.
"Cassie bulah chuan va kal rawh alo mamawh tawh ang che" chutia Cassie hming a rawn sawi avang chuan phawk zetin ka melh nghal kawk a.
.
" I mutthilh lai khan a hming i lam i lam a" nuih suk pah chuan a rawn ti a, keipawh chuan ka lo nuih leh ve nghal a, Cheswood Hospital lam pan chuan kan tlan nghal vang vang a.
.
Kan tlan laklawh lai chuan ka lo nui leh ver ver thin a,tunah chuan Cassie a harh tawh a kei aia hlim hi an awm leh tawh lo ang.A mit pawl ram te leh a pang ti lum ther ther te kha ka ngai tawh takzet ani.Min hmuh hnuhnun ber kha chuan a rilru ka tihnat saka min hau se ka chungah thinrim in min tum khum leh se ka ti takzet ani. Ka hmu chak tawh lutuk hi ka helhhawlh ani ber mai,ka indap ruk ruk a, ka phone chu ka accident lai khan ka thlauh ani ngei ang .
.
Hospital ka thleng chiah chu ka chhuak nghala, a chak thei ang berin damdawiin lam pan chuan ka bai phei auh auh a, midang chuan mak tih hmel takin min en ha hlawm a , a nuihzatthlak lek lek zawk.
.
Elevator ah ka lut a, Cassie awmna cabin lam pan chuan ka chho nghala.Cassie hmuh hlan ka nghakhlel tawh lutuk chu ka za zek zek tawh a, a chang leh ka thaw leh hak thin a,ka zam lek lek zawk ani.
.
Elevator a rawn in hawng rual rual chuan a chak thei ang berin ka kal hlawk hlawk a, Cabin bul ka thlen chuan Ashley chu room atang chuan a rawn chhuak ve chhiah bawka, ka hah bawka ka thaw hlawp hlawp a.
.
" Miller!!" mak tih hmel tak chuan min rawn en ha a
" Ngatinge i ban te hi, i ke pawh i hmai te hi a duk vek ania" a ti bah nuaih a,a ka chu hlauhthawng hmel takin a hup nghala.
.
" Ashley, ka tha e...khawiah nge Cassie?" ka ti nghal vata, room lampang chu a melh zeuh a.
" Cassie chuan a lo nghak reng tawh che asin" min rawn nuih suk pah chuan a ti a.Ka hlim lutuk hi ka nui lo thei lo.
.
"hawh...lo lut rawh " tih pah chuan min kuah lut nghala.Cabin chhung kan lut chiah chu boruak hi a inthlak danglam nghal vek in ka hria, ka hmangaih em em khuma lo mu bam ka hmuh chuan ka hlim lutuk hi tah chhuah hawm hawm mai chu ka duh ani.
.
" Miller" Nu Stacy chuan min rawn buaipui nghal vata, Cassie pa pawh alo awm bawka an vai mai chuan min lo buaipui nghala, he thil zet chu ka rin phakbak ani.
.
"Hetah lo thu rawh" Ashley chuan Cassie khum bul a chair ah chuan min thuttir a.Cassie chu alo maimichhung vang vang a, oxygen mask poh a vuah tawh lo a ,a hmel chu chiang takin ka en renga ,a cher in a dang lap bawka ka khawngaih takzet ani.
.
Midang ho chuan kan hun tawn hi min hriat thiampui ani ngei ang , pawnah chuan a chhuak sap sapa Cassie pa pawhin min be lem lo mahse ngawi renga a chhuah a avang chuan ka nuih aza lek lek zawk.Cassie a damloh avanga loh theih loh a min pawm lui hram hram an ni tih pawh ka hai hauh lo ,tu nu leh pa in nge mahni fate anpui kawp turin ti ang? Mahse kan hun tawn hian a zir lo em a, min pawm lui hram hram ani.
.
" Cat" ka ti sap a, a kut chu ka hum vang vang a, zawi muang in a rawn meng siar siar a.Thei leh thei lo hian min rawn nuih suka, ka lo nuih let var var a.
"Ka ngai tawh lutuk che asin" ka han ti leh a, sawitur ka ngah lutuk hi ka tawt up up ni ber hian ka hria.
" Keipawh" a rawn ti sapa,ka ding a ka kun hniam a a hmui ah chuan ka fawp vang vang a, a hmui lum ham ham te hi ka ngai tawh takzet ani.
.
" Ngatinge i hmai hi?" a rawn ti chuai raih a, a kut chuan ka hmai pilh nuai chu a rawn khawih a.
" Accident chhe te mawle"a kut chu la in ka fawp zeuh a " Tunah chuan ka bulah i awm char char tawh ang " nui suk pah chuan ka ti a.
.
" Cheng Wen....Cheng Wen chu enge a an a?" a tih chuan ka rilru a khawih takzet ani, henu rilru han that em em zia hi, nasa taka a damloh chung pawhin midang ala ngaihtuah tang tang ani a.
" A tha tawh e, ngaihtuah suh...."a puan chu ka sin that tira" i chau lutuk ang ,mu tawh rawh le" tih pahin a chal ah chuan ka fawp zeuh a," ka hmangaih che" ka ti a.
" Ka hmangaih che" a rawn ti sap a, a chau hle ani ngei ang engmah sawi buai lo in a muhil nghal siai siai a .

.
Cassie's pov:
.
Ka harh chuan khua alo var uarh tawh a, chutia ni eng ut ka hmuh thut avang chuan ka kutin ka mit chu ka hliah vata.Ka hawi phei a, ka piah couch ah chuan Miller chu tui takin a lo la muhil sak sak a, Nizanah khan ka chauh em avangin ka mutthilh san daih a, ka inthiam lo lek lek zawk.
.
" Bawihte, i lo harh tawh ani maw?" ka nu chu ka bulah chuan a rawn thu a, ka chalah chuan a rawn fawp vang vang a .
"umm...nu tinge Miller saw a haw loh a ,a chau lutuk ang" ka ti sap a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 16th, 2016, 1:42 pm

Ka nu chuan Miller mutna lam chu a hawi phei zeuh a " Haw tura ka tih pawhin heta riah hi a thlang zawka" a nui suk a, mut reng chu ka nin deuh avangin ka nu chuan min thuttir a lukham chu ka ngheng ar ar bawka.
.
" Heihi ei rawh" tih pahin ka breakfast tur chu min rawn pe a.Ka lo la vata.
"morning ...Bawihte" ka pa chu a rawn lut a, ka pa hmel hmuh nuam tak mai ka hmu leh hi ka hlim takzet ani.
.
" Pa khawiah nge i kal dawn?" ka pa chu suit nen a awm at avang chuan ka zawt a .
" Bawihte, New York ah ka let leh thut angai a, hetah ngai viau che mah ila kar hnih lai chawlh ka la tawh a ka let ngei ngei angai tawh ani.Mahse ka tiam a che ka rawn let leh vat ang" ka pa chuan min rawn kuah a.
.
"pa... lo let leh vat ngei ngei ang che" ka ti sapa, ka pa hi ka hrethiam lutuk nikhat chauh pawh chawlh lak a harsat laiin keimah vangin karhnih lai chawlh ala a ,mahse ka ngai em am a kan tan hun a nei lo leh lutuk erawh hi chu ka lungawi lo lek lek thin.
.
"ka tlai tep tawh a, ka kal mai ang " tih pahin min rawn kuah a, ka nu chu a fawp zeuh a hmanhmawh takin min chhuahsan nghala.Ka pa thawmah chuan Miller pawh a rawn harh a, a rawn zi mar tiam tiam a, ka lo en renga a tho a ka lam pan chuan a rawn bai phei auh auh a.
.
" Morning" min rawn nuih sanga.
" Morning,i ke chu i fimkhur lo leh tawh ani maw?"ka lo ti vin hlaka, ka nu bulah chuan a rawn thu a.A ke intuam lak leh a kut pilh hrup te chu ka ngaihtuah em em a, mahse a chhan zawt mah ila a sawi tha leh duh dawn chuang lo a, ka zawt buai duhlo ani.
"ka fimkhur lutuk vang zawk anih hi" min rawn fiam let zeuh a.
" Vawin college i kal dawn lo ami?" mithmul ti san ak pah chuan ka melh a.
.
" Hetiang ke nen hian maw, ka ke hi chuan ibula awm turin min chawh alawm"
" Breakfast hi ei ve nghal la " ka nu chuan Miller chu bawnghnute hi a pe a, hetia ka nu in duat hmel taka a biak hian ka hlim takzet ani.
.
"Miller, vawin chu inah va hahchawlh la i chau lutuk ang" ka nu chuan alo ti vata,
"Ahh...nia, ka bike vel pawh buaipui angai ang ka rawn kalsan tawpa" a nui suk a, min rawn melh zeuh a, henu hi chu damdawi mum lian hi ani ringawt.
******
.
Miller chu college a kal loh ka phal loh avangin tlaiah ban velah a rawn kal thin a,zanah a rawn riak bawka mahse college kal turin nawr lui ziah mah ila ka hmuh loh hi chuan ka ngai em em a, rawn kal vat vat se ka ti thin ani.Basketball pawh practice turin ti thin mah ila a ke ala dam chian loh avangin ka tilui lem lo ,mahse keimah vanga class a thulh erawh ka duhlo ani.
.
A ke pawhin zia lam a pan zela, a thui an phelh tawh bawka tunah chuan pangngai takin a kal thei tawh ani.Xiao Lin leh Ashley pawh an rawn kal fo a, Min Yu pawh vawihnih lai chu a rawn kal tawh a mahse mak tak maiin Min Yu leh Miller te chu an inhaw tawh miah lo.Headmistress pawh vawikhat chu a rawn kal ani.
.
Doctor in ka hah a hlauh avangin ke a ka kal a phal lo a, zeng ang maiin wheelchair in min nawr thin a,ka ning tawh takzet ani.Ka natna hi rawn chhuak zeuh zeuh thin mahse a hma ang em em kha chuan a na tawh ngai meuh lo ani .
.
_______________________________________
.
Thla khat dawn lai damdawiin pawn pawh ka chhuah tawh loh avangin pawna chhuah harh chu ka chak takzet ani.Ka dam deuh tawh bawka ka na pawh a chhuak khat tawh bawka chhuah harh ka duh ani.Ka nu chu a rawn lut a.
.
" Nu, Vawin chu ka dam tawh bawka ka chhuak harh duh a..."ka ti ringawt a, han dil dan tur pawh ka hrelo ani.
" Engmaw! Cassie a hma pawhin vawihnih lai ka chhuah tir tawh che a mahse thalo takin i rawn haw ve ve chhuak lo la a tha zawk ang" ka nu chuan a ti hmuk a .
.
" Mahse thlakhat chuang damdawiin hi ka chhuahsan tawh lo a,ka va chhuak zawk anga, ka rawn let leh vat dawn alawm" ka ti a, Miller chu a rawn lut ve chiah bawk a.
.
"Miller, han hrilhfiah te a chhuak thei lo tih hi" ka nu chuan a ti a, Miller chuan min rawn pan vata, eitur min rawn ken chu dawnkanah chuan a dah a.
" Cat, i nu thu chu awih la...i dam hunah duhtawkin kan leng dawn a lawm "zaidam tak chuan a rawn ti a.
.
" nilo...hei ai hian ka dam leh tawh dawn lo, hetah hian ka thih thlenga awm turin min duh ami?"
"Cassie, hriatthiam tum teh" Miller chuan a rawn ti a, lehlam chu ka lo hawi hmaka. Ka nu chu pawnah a chhuak hmaka, reilo te hnuah a rawn lut leh a,
"anih chuan khawiah nge kal i duh a?" ka nu in a rawn tih chuan ka hawi let vata.
.
"kal kual vel mai mai ani mai" ka ti liam puata, ka nu hian ka hun tawp dawn ah hian ka duhthusam tih puitlin loh a hlau tih chu ka hai hauh lo,a chhuah daih pawh khan doctor ava dil ani ngei ang mahse ka chhuah lo na a rei tawh a chhuah ka chak takzet a,tuman min dang thei lo ani.
" Mahse ,i nat hlek chuan Miller hi i hrilh ang tih min tiam rawh"ka nu chuan a ti a
" ka tiam a che" tih pahin ka lo nuih sanga.
" Nu Stacy ngaihtuah suh him takin ka rawn hruai let leh ang" Miller chuan a ti a, ka nu hmel ka hmuh chuan a thla a muang tih ka hria ani.
.
Chhuak turin kan inpuah chah a, kan zawh chuan Miller chuan min nawr chhuaka, khawihmun ah pawh wheelchair a min nawr angai a ,ka inthlahrung rual rualin ka kal chakna hmun ah ka kal thei dawna ka hlim ani.
" Miller inbe lawk ang" ka nu chuan a ti a, Miller chu a lut leh nghala pawnah chuan ka lo nghak ran a, reilo te hnuah chuan a rawn chhuak ve mai a, inhnuai lam panin ka chhukthla nghala.
.
Car chhungah chuan ka lut a, Miller pawh a rawn lut ve vata,Car hnungah chuan ka Wheelchair chu kan dah ran a.
Kan tlan chhuah thleng chu ka nu in min en liam bawk a ni.
" anih chuan khawi hmunah nge kal i duh ?"Min rawn nuih suk pah chuan a ti a.
" Ihh...Temple of Heaven ah" ka tih chuan Car chu a ti ding nghal chawt a .
.
" Engmaw! a hla lutuk a awmna" a ti nghal tuarh a, ni e a hla tih chu ka hria mahse Beijing ka awm tirh khan ka thian ten kal turin min rawn a, ka thih hma ngei a hmuh chu ka chak ani .
" Mahse, ka hmu chak takzet ani" ka ti chuai raih a.
.
" Mahse ,i nu i hrilh si lo a alo ngaihtuah lutuk ang che"
" apawi lo kan haw leh vat dawn tho alawm...khawngaih in min kalpui hram rawh"ka dil mawlh mawlh avang chuan a thaw hak a
" Awle, mahse kan haw leh vat ang" ka hmui ah chuan a rawn fawp vang vang a .
"lemm....kal ang le " tih pahin a khalh chhuak a ,Temple of Heaven awmna
Tianqiao,Chongwen...lam chu kan pan ta ani.
*****
A hmun kan thlen chuan alo tlai ruih tawh a rimawi an tum ri rat rat chu ka hrethei bawka, a midang pawh an awm vak tawh lo a, Miller chu a chhuk a wheelchair chu a la chhuak vata,min rawn pawm chhuah chu a tuma.
" keimah pawhin ka thu thei reng alawm "
" mahse pawm kher che ka duh alawm" tih pahin min pawm kang lawp a, wheelchair ah chuan min thuttir a.
.
Temple sir velah chuan min nawr kuala, temple chanchin vel chu min hrilh pah reng bawka, kum zabi pangana velah kha chuan he hmun hi miten an hlauh thu te, a hmun lar lehzualna chu temple bula thing upa tawh tak tak awm te hi ani tih thu te leh tunah chuan music tum nan te, hla sak nan te an hman tawh thu te chu min hrilh zela, ka hriat loh thil tamtak ka hriat belh teuh ani.
.
" Ni saw a tla tep tawh anih saw" tih pahin ral lehlam chu kan thlir dun a, kawl chu a sen phut a a mawi takzet ani.Music tum ri nen he hmun hi a thlamuan thlak takzet ani.
.
Miller chu ka hma ah a rawn thingthi a, mak tih hmel takin ka lo en ha a,ka kut chu rawn la in a fawp zeuh a
" Cat,i kiangah ka awm reng anga ka kalsan leh tawh ngai lo ang che.Hun harsa tak kan tawn hnu ah kan awmdun leh thei hi ka lawm takzet ani.I tan chuan engthil pawh tih ka huam ka tiam a che ka chhanhim ngei ngei ang che" a tih chuan ka hnuk chu a ulh tlata, Miller beidawng hmel ka hmuh hian ka na takzet ani.
.
" Cassandra, engang mi pawh ni ila ka hmangaih che , ka hmangaih takzet che ani .Min nei duh angem?" a rawn ti sap a, a zam deuh a niang a thaw leh hak thin a .Ka mittui chu ka dang thei tawh lo a tla xung zung a ka inhnit faih faih bawk a.
.
"tehreng mai, Engtik lai pawhin ....ka hmangaih che" ka hmuiah chuan a rawn fawp vang vang a.ka mit ah chuan chiang takin min rawn en leh a, zungbun hi min rawn bun tira.Ka lo kuah vata
" Thih ka la duh lo,hma hun eng tak kan la nei a heihi thihsan daih ka duh lo ani" ka ti chuai raih a, kan hlim ve dawn chauh a thihsan daih hi ka hreh takzet ani.Miller hi kalsan ka duh lo
.
" Nilo,i thi dawn reng reng lo, i bulah ka awm hi" min rawn kuah vawng vawng a

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 16th, 2016, 1:43 pm

Chapter-25(Last)
.
Miller's pov:
.
Cassie chu damdawiin ah ka hruai let leh a, kalkawngah chuan a chau ani ngei ang a muhil sak sak a,ka va melh leh zeuh thin a ka lainat takzet ani.Thil tamtak ka ngaihtuah a a ni telin zual lam a pan zel mai bawk si , donator ka zawng reng bawka mahse ka hmu bawk si lo , doctor lah in a lung hi thlak anih vat loh chuan a daih rei tawh loh tur thu min hrilh bawk si,ka beidawng tawh takzet ani.
.
A chang chuan beidawng in indawm kun ngawih ngawih thin mah ila Cassie tan chak taka ka awm angai bawk si, Cheng Wen takngial pawh ka buaipui hman tawh lo a,a theih anga tam Cassie bulah hian awm ka tum tawp ani.Cassie ka tawng hi ka inchhir lo a mahse a rilru ka lo tihnat sak thin avang erawh kha chuan ka inngaidam thei tawh ngai lo ang
.
Damdawiin kawt kan thleng chuan Cassie chu ala mutui hle a,sana ka en chuan dar9:34 alo ri va tawh a, car ka tiding chiah a a rawn zi nghal tiam tiam a,
" kan thleng ta" min rawn nuih ver ver a.
"engmah na i nei lo tiraw?" ka ti vata, a chhanchu a lo sawi duh lo anga alo tuar tlawk tlawk ang tih ka hlau ani.
.
" Aih nei lo e...vawin kha a nuam ka ti takzet, ka lawm e" min rawn fawp vang vang a, nu Stacy pawh in min ngaihtuah ani ngei ang damdawiin kawtah chuan alo vei thauh thauh a, min hmuh chuan min rawn pan nghal vata.
" Bawihte, insawiselna te i nei em?"Car kawngka chu a rawn hawng vata.
.
" nu ka tha min ngaihtuah suh" Cassie chuan alo ti vata.
" Miller, ka lawm e" nu Stacy chuan a rawn ti sapa.
" Engmah anih loh hi, ka tih ve tur reng alawm"tih pahin Car atang chuan ka chhuk a wheelchair ka la chhuaka Cassie chu ka pawm chhuaka wheelchair ah chuan ka thuttir a ,damdawiin chhungah ka nawr phei a, Nu Stacy pawh ka bulah a rawn kal ve nghala,Cassie cabin lam pan in kan chho nghala.
.
Room chhung kan luh chuan Ashley pawh a lo awma" Cassie ,Khawiah nge i kal?" alo ti vata,Cassie chuan min rawn melh zeuh pahin," Ahh...kan leng kual mai mai" nuih suk pah chuan a ti a, chutia a chhan avang chuan ka nuih aza kher mai mahse kan kalna diktak chu hrilh ila nu Stacy in min hau ngei ang.
.
"Damtakin i rawn thleng leh chu ka lawm takzet" Ashley chuan Cassie chu a kuah a, khum lamah chuan ka nawr phei a khumah chuan ka muttir nghala.
" Dinner in ei tawh em?" nu Stacy chuan a ti a.
" Aw, ei tawh e" ka lo ti vata
" A that chu Cassie hruk faina tur tuilum leh towel ka va la ange"tih pahin room atang chuan a chhuak nghala.
.
" Nangni pahnih hi ka thlah fal dawn miah lo cheu ania" Ashley chuan min rawn melh zeuh pah chuan min rawn fiam a, ka lo nui ringawta.
" Miller, tinge basketball practice na ah i kal ngai loh a?" Ashley chuan a rawn ti ha a, ka lo mitmei zeuh a ala hrethiam lo zui.
.
"friday ah hian in inkhel tawh dawna, i team ten an mamawh che asin " Ashley chuan ala rawn ti deuh deuh a, practice naah ka kal ngai lo tih hi Cassie hriat ka duh lo ani a chhanchu practice ai chuan Cassie bula awm ka duh zawk ani .
.
" Miller" Cassie chuan a rawn ti vin hlak a,han sawi mai tur pawh ka hrelo.
" Ughh... " ka ti ringawta, Ashley chu ka ve melh zeuh a.
" Keimah vangin engthil mah hi tih thulh suh ka tih tawh kha"a thinrim deuh tih chu ka hre nghala, a chhan chu Cassie hi a inthlahrung em em a engthil pawh ka lo tih thin kha ka tih lo chuan amah vanga ti lo ah min ngaia hrehawm a ti thin ani.
.
" Nilo, nangmah vang ani reng reng lo,practice ngai ka ti vak lo a" ka ti tawp a, mahse a hnem lo kher mai.
" Vawin tuesday ani tawh a, tun thlengin practice ngai ila tilo amaw?" lehlam chu a hawi hmaka.
" Cat, hriatthiam tum teh nangmah vang ani lo...ka ke pawh ala dam chiang lo a, ka la indim deuh alawm" ka ke chu dam vek tawh mahse chhuanlam ah ka hmang ta ringawt a.
.
"i ke chu a dam daih tawh kha, keimah vanga i thil tih i thulh hian ka rilru a na thin asin" a mittui chu a rawn far fapa.
" Ka damlo tih hi min hriat nawn tir tawh suh , a hma ang khan awm leh rawh" a rawn ti sapa.
.
"tap suh le...naktuk atang chuan practice na ah ka kal tawh ang...a tha em?" zaidam tak chuan ka ti a a lu chu a lo bu nghata.
" Chuan final ah chuan i team te chak pui ngei ngei ang che"a ti chuai raih a, ka kuah nghala.Diktak chuan final ah pawh khelh ka tum lo ani mahse tunah chuan ka khelh ngei ngei angaih hmel.
.
Nu stacy pawh a rawn lut chiah a, Ashley chu inthiam loh hmel takin kan piah ah chuan a lo ding reng a .
" Nu Stacy keiman ka lo hrufai ang" ka ti a towel chu tuilumah chuan ka chiah a, ka hru nghal mawlh mawlh a.
" i kawr hi phelh rawh" ka tih chuan Cassie hmai chu a rawn sen nghal tawn tawn a.
.
" zak suh , a hma pawn ka hmuh vek tawh kha" tih pahin ka nui suk a, a hma pawhin Cassie hi a duh anga a chet that thei loh avangin ka bual thin ani.Hetia a laih a, a hmai a sen tawn tawn hian a duhawm thlawt.A taksa te chu a hma angin tuai nalh tawh lo mahse ka duhna a tlem phah eih lo.A hma aiin ka duat a, a hma aiin ka duh a hei ngei hi alo ni ka lo hriatthiam ngai reng reng loh hmangaihna chu.
.
Basketball chu zing leh tlaiah a chang leh nilengin ngawrh takin kan practice thin a, Cassie tan kan Champion ngei ngei angai ani.A chang phei chuan ka chau ve hle thin a mahse Cassie ka hmuh hi chuan ka dam sawng sawng zel.Ka in ah chuan a chang zeuh zeuhin ka haw thin a, ka awm tam na ber chu damdawiin leh basketball court ani.
.
Kan practice zawh rual rual in damdawiin ah ka kal tlang nghal thin a, Cassie mut hnuah inah ka haw ve thin chauh ani.Ka hmuh loh hlek chuan ka ngai em em a, amah hmuh ka chak ngawih ngawih zel ani.
.
________________________________________
.
Friday(December 14):
.
Dressing room ah chuan kan team ho chuan ka awmkhawm laih laih a,
" in chak ngei ngei angai, Rocket team te an chak lo ngai lo" Coach chu a au lauh lauha,keini lah kan lo au dur dur bawka. Vawin chu ka phur lo takzet ani Cassie a rawn kal thei dawn si lo a, mahse a tan kan chak ngei ngei tur ani.
.
" Miller lo kal teh" Coach chuan min ko fal a,ka kal nghal vata.
" Cassie chu enge a an?" Coach chuan a rawn ti a.
" Engmaw!!?" mak ti hmel tak chuan ka en ha a.
"kan hre vek tawh alawm, Cassie chu a that vat ka beisei" ka nui suk a, coach chuan ka hnung ah a rawn beng thak thak a.
" ka lawm e " ka ti sapa.
" Chuan in inkhelh lai ah chiah i rilru pe ang che" kut beng pahin kan team mate te bulah chuan a phei a.
.
" Cassandra Alvom tan kan chak ngei ngei tur ani" coach chu a au lauh lauh a, min rawn nuih suk a.Ka team mate te chu an lo au dur dur a.Hetia ka team mate te leh coach ten Casdie nen a kan chanchin an lo hria hi mak ka ti takzet ani.
.
" Cassie tan" tih pahin ka kut chu ka dawh a, ka team mate te chuan ka kut chungah chuan an kut chu an rawn dah diat diat a ,a ching berah coach chuan a rawn dah veleh a.
" Cassie tan" kan ti rual thapa, kan kut chu chung lamah kan phar cho thap bawka, Coach hi chuan min hrechiang ve ngawt mai, ka phur vak lo tih a hria a min tih phur nan heng thil te hi a ti ani.
.
"Inring tawh ru le..." coach chuan a kut a rawn beng a, kan in tlar thap a, captain ka nih avangin ahmasa ber ah chuan ka ding vanga ,kan chhuah hma deuh chuan kawngka bula Cassie rawn nui ver ver chu ka va hmu thut a, ka phu chiang kher mai!!! ka mit chu ka han nuai nawk nawk a,a tak ngei ani bawk si ka va tlan phei vata.
.
" Cassie, ngatinge i lo kal?"hetiang mipui zi mur mur karah hi chuan ka ngaihtuah takzet ani.Wheelchair a a thut avang chuan a hma ah ka thingthi a, ka kut chu a rawn la a.
" Happy birthday" tih pahin bracelet hi min rawn bun tir mawlh mawlh a. ohh! ka birthday pawh ka lo theihnghilh daih alawm.
.
" i birthday pawh kan lawmdun thei si lo a" a ti sap a.
" mahse a lehpek ah chuan kan lawm dun ngei ngei tawh dawn nia" a mittui chu a rawn far fap a " ka la dam tak hlauh chuan" a rawn nui suk a, a dang bem a vawin hian Cassie hi nidang aiin a chau riau in ka hria.
.
" Chutiang sawi suh, kan tar hun thleng kan dam dun dawn alawm, mahse helai hmun hi i tan a tha lo, lo va haw la kan inkhelh zawh veleh ka rawn haw vat ang ummm... "ka kut pahnih chuan a hmai chu ka dawm a.
.
" mahse, he inkhelh hi i tan a pawimawh si a, en ve ngei ka duh ani...min ngaihtuah suh ka tha em em ang"
" Miller,luh a hun tawh e" Coach chuan min rawn au a.
"kal rawh,va chak ngei ngei ang che" a rawn ti sapa,min nam pah deuh bawk a. A hmui ah chuan duhtawh takin ka fawp nghal tawn tawn a.
" Ka kal aw.." ka ti leh hrama, ka tlan phei nghala ka hawi phei leh hrama .A kut chu a rawn vai lauh lauh a.
Attachments
IMG_20170127_145941_097.JPG
IMG_20170127_145941_097.JPG (76.4 KiB) Viewed 8201 times

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 16th, 2016, 1:43 pm

Inkhelh chu kan tan nghal dera, Cassie chu VIP seat ah ka nu leh Ashley te nen chuan an thu ho chu ka hmu a, min rawn nuih ver ver a, khi hmeichhia khi ka hmangaih thlawt ani.Mipui thawm pawh a ring leh hle tawh a,an tangin game pawh a tang hle.Inkhelh laklawh lai pawhin Cassie chu ka han melh leh zeuh thin a ,min lo nuih leh ver ver thin a ,ka phur phah sawt ani.
.
3rd Quarter a zawh meuh chuan kan inhneh tawk hle a, tlemin hma kan hruai chauh ani, ka rilru ka pek tak tak hi chuan min hneh thei tak tak lo ani.
"in ti tha hle mai. Miller, kan chak ngei ngei angai,hei ai hian ila khel tha thei tih ka hria ania " Coach chuan a ti tawn tawn a , Cheerleaders ho chu an lam zak zak bawk a, chumi karah chuan Cassie chu ka va melh leh zeuh thin a, ka hmuh loh hi chuan ka awm thei thlawt lo ani.
.
4th Quarters pawh kan tan vata, lehlam team te chu an foul tan viau, an thinchhia in khelh pui an hahthlak takzet ani.Hah tawh nen ,tan nen coach pawh a rawn au chul tawh a, mipui pawh an lo au dur dur a, tan a na tawh hle ani.
.
Hun a tawp tep tawh a, kan la inhneh tawk hle ani.Kan tang tawh hlawm bawka, engdang mah ka ngaihtuah thei tawh lo,hun a tawp dawn tak tawk tawh a ka throw tur chu team lehlam ami pakhat chuan min rawn nghawk sawka, ka ball ken lai chu ka thlauh nghal hnawk a.Free throw ka hmu hlauh , ka score ngei ngei angai, tuna ka score anih chuan kan chak dawn ani .
.
Ball chu ka keng ran a, basket chu ka melh vang vang a, "ka score ngei angai" tiin ka in hrilh sap a, Cassie lam chu ka hawi leh a, ka kut chu ka fawp zeuh a Cassie chu ka han kawk va va a,a mittui chu a tla sawk a,mipui chu an lo au dur dur a.Vanneih thlak lutuk in ball chu basket ah a lut hlauh!! , hun a zo a kan chak bawk ani.Mipui chu an au ri nghal hum hum a, court chhungah chuan an rawn tlan lut a, Cassie chu ka han melh a, ka mengphawk nghal kawk a.
.
Cassie chu a thaw hlawp hlawp a, min rawn en reng a ,a mittui chu a tla nghal zawih zawih bawk a. A awm chu a dawm taih bawka , Ashley leh ka nu chuan an lo buaipui mek bawka .Ka mit nghal sawlh a, chak mah ila ka hlim chuang lo Cassie chu pawnah an chhuah pui nghala, keipawh chu pawna chhuah tumin mipui karah chuan ka inhnawh phei nghal tawn tawn a, ka chiai ni ber hian ka hria ka khur nghal veka ka hlauthawng takzet ani.
.
Pawnah chuan ka chhuak thei hram a, Cassie chu ambulance ah an lo nawr lut ve chiah bawk a" Bawihte, Cassie saw..." ka nu chuan a ti chuai raih a, a mittui chu a tla zung zung a," nu a tha leh mai ang" tih pahin Ambulance chhungah chuan ka lut ve nghala, lehlamah Ashley chuan Cassie kut chu a lo dawm tai a.Doctor chuan a buaipui nghal vat vat a, damdawiin lam pan chuan kan tlan nghal a.
.
Cassie chu a thaw kawk kawk a, ka hlauthawng lutuk chu Cassie kut ka vuan a, a hmel chu ka en tlawk tlawk tawp ani.Ka hamhaih veka awmdan tur pawh ka thiam lo .A sam ah chuan ka chul leh ringawt thin a awmzia a awm lo kher mai.
.
Damdawiin kan thleng chuan a chak thei ang berin an tlan luh pui nghal dawr dawr a, Ashley nen chuan kan zui chho ve nghala.Nu Stacy pawh a rawn lang nghal vata, ani pawh a hlauthawng ani ngei ang a mittui chu a tling pam a mahse a tap chhuak thei lo ani.
.
" Ka pi helai thleng hi a kal theih" Nurse pakhat chuan Nu Stacy chu alo dang vata , Cassie chu room pakhat ah hian an nawr lut nghala , chet nachang pawh ka hre tawh lo ka ding khawng tawp tawh ani.Nu Stacy chuan min rawn kuah thlawp a, a tap chhuak nghal hawm hawm a, kuah let nachang pawh ka hretawh lo ka a vek tawh ni mai hian ka inhria.
.
Doctor chu hmanhmawh deuh hian a rawn chhuak hlawk hlawk a.
" Doctor Cassie chu enge a an?"Ashley chuan a lo ti vata.
"Damlo hi a chau em em a, a lung hi thlak anih vat loh chuan kan chhan hman tawh kher lo ang, mahse kan theih tawp chu kan chhuah ania" tih pahin Doctor chu a kal leh nghal hlawk hlawk a .Awmdan tur pawh ka hre tawh lo, ka mit chu ka khap fak fak a engmah sawi tur pawh ka hre lo ka inhum ruh tawp ani.
.
Hmanhmawh deuh in inhnuai lamah chuan ka tlan chhuk nghala" Miller...Miller" Ashley chuan min rawn umzui nghal a ,ka tlan chak em avang chuan a aw chauh ka hre hman tawh ani.
.
Car chhungah ka lut a, chak zetin ka inkhalh chhuak nghala.Biakin zawn ka thleng chuan ka ding chawt a.Biakin lam chu en vang vang a,car atang chuan ka chhuak nghal vata.Biak in chhungah chuan ka lut a, tumah an lo awm lo a muang changin ka kal lut chhat chhat a.Tlar hma lampang thutna ah chuan ka thu ve tawpa.
.
"Khawngaih takin Cassie hi min chhahchhuah sak rawh" ka ti ta ringawt a,ka beidawng tawh takzet ani.
"Ka rawn pan ngai lo che a, keimah hi min tawrh tir rawh mahse Cassie hi chu chhanchhuak rawh" ka mittui chu a rawn far fap a, " ka beidawng tawh takzet ani, khawngaih in min pui rawh" ka ti sap a, Cassie in bracelet min pek chu chhuatah a rawn tla thla nghal hmawk a.
.
" Cassie" tih pahin ka chhar nghal vata
" Nilo nilo" ka ding nghal zawt a, biakin pawn lam pan chuan ka tlan chhuak leh nghala.Car chhungah chuan ka lut vata , chak zetin damdawiin lam chu ka pan nghala.Ka tlan laklawh lai te chuan ka chiai vek tawh a, ka hlauthawng lutuk hi ka hamhaih vek tawh ani.
.
Chutia ka tlan laklawh lai tak chuan ka tlan chak bawka , thildang ka lo ngaihtuah bawk nen car dang rawn tlan chu ka su tepa, ka kawi hman hlauh, mahse ka hma ah truck a rawn tlan ve chiah bawk si a ka kawi hman tawh lo truck chu ka su chawrh a ka car chu a letling zawngin a let phei pawp pawp a, dim lo zet in ka chuang ve ani tih pawh min ngaihtuah tawh lo in min sawh phei nghal pawp pawp a, car chu a ding chawt a,pawnah min vawrh chhuak nghal lawpa.
.
Ka che thei tawh lo Cassie chu ka mitthla ah a rawng lang nghal zung zung a,a bracelet min pek chu ka la hum tai a ka mittui chu a rawn far fap a, a biakin dar chu a rawn ri bal bal bawk a, dar 12 a ri tihna chiah ani, ka maimichhing riai riai a engmah ka hrezui ta lo ani.
_________________________________________
.
Cassie's pov:
.
Miller chu khamah a lo tla tep a, a tlak ka hlauh em avangin pawh chauh ka lo tum a, mahse ka pawt chho thei tlat lo, ka mittui chu a tla zung zung a.
" Cassie, min kalsan mai rawh" Miller chuan a rawn ti lawm lawm a, mahse ka thlah phal tlat lo, ka la vuan tang tang a.
" Cassie, kal rawh" a rawn ti leh thin a,ka mittui chu a tlak nasat em avangin Miller hmel pawh ka hmu tha thei lo ani.
.
" Cassie , ka hmangaih che" Miller chuan a rawn ti sapa,ka vawnna chu thlah riai riai in kham sang tak ah chuan min tlak thlak san vawn vawn a,
.
" Miller" ka te thawt a, ka thu nghal zawt a,ka thlan te chu a tla bawrh bawrh a.
" Bawihte" ka nu chuan a rawn ti nghal vata, ka pa, Ashley ,Xiao Lin leh midang chu an kim veka .Ka hawi kual nghal ruai a, ka mumang ani tih chu ka hriat chuan ka thaw nghal huai a.
.
" Nu khawnge Miller" ka ti nghal vata.
" Bawihte, mu phawt rawh ani chu ngaihtuah suh "tih pahin min muttir leh a ,doctor chuan min rawn jection vata, ka muhil nghal siar siar a.
" Miller...Miller" ka ti sap a, ka muhil zui nghala.
.
*******
.
Ka harh leh chuan ka awmdan a dik tlat lo, ka zang in ka thawveng em em a, ka lu na bur te leh ka thin zawn na veng veng thin te kha a awm tawh lo a, ka damtawh ani thei mai angem? Mahse ka hriat zawng chu Miller te final khelh laiin na takin ka awm chu a rawn na a, ka thaw tha thei lo a, ka buai nghal vek anih kha.Ka hriat theih awmchhun chu Miller in mangang taka min en lai kha ani.Miller ...Miller hi khawnge a awm?.
.
" Nu khawiah nge Miller?" ka ti chhuak nghal hlawl a, ka nu chu ka bulah a rawn kal nghal vata." Bawihte" tih pahin a mittui chu a tla nghal zawih zawih a.
" Nu Miller awmna min hrilh vat rawh?" ka ti tuarh a, ka nu chuan doctor chu ava melh zeuh a.
" Engmah a pawi tawh lo, a tha tawh e" doctor chuan a rawn ti sapa.
.
Ka nu chu a rawn hawi let leh a , a kut chu la kangin ka awm chu a rawn dawm vang vang a" hetah hian a awm" a ti chuai raih a, ka nu chu a tap chhuak nghal hawm hawm a .
Attachments
IMG_20170127_150739_882.JPG
IMG_20170127_150739_882.JPG (43.81 KiB) Viewed 8200 times

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)