I Heart u by Haylor(Remruati Bawitlung)

Moderator: Remruati (Haylor)

Ngaia
Site Admin
Posts: 25813
Joined: April 30th, 2016, 4:07 pm

Re: I Heart u by Haylor(Remruati Bawitlung)

Unread post by Ngaia » November 27th, 2016, 4:25 pm

Chapter-7
.
Basketball kan khelh chhung zawngin Kath chu a piah deuh ah chuan a alo ding ran a,ka va melh leh zeuh thin a a hah ve lo amawn le thut nachang pawh a hrelo.A hna hi a tlin takzet ani, Enrique lah chuan a va nuih leh zeuh thin a ka thin alo rim leh lek lek thin, ni e ka thikthu a chhia tih chu ka hai bik hauh lo mahse ka inthunun thei thin lo ani.
.
"vawin atan chuan duhtawk phawt ang" darkar khat pawh kan khelh hma chuan ka ti a, Ka thiante ho chuan mak tih hmel takin min en ha hlawma,
"Dj... enge awmzia?" Enrique chuan hriatthiam loh hmel tak chuan a rawn ti a.
" Vawin chu ka awm a nuam lo"
"mahse ... nuam ti ber kha ini thin si a "
" ngatinge zawhna min zawh reng ?" ka ti vin hluk a, Enrique chu a meng phawt nghal kawk a achhanchu ka thianpa hi hetiang hian ka chhang ngai lo ani.
.
Dressing room lamah chuan ka kal nghal hmak a, ka awmdan hi ka in hrethiam tawh lo tun ai hian inkhel rei ila chu Enrique hian Kath hmuhna hun a ngah sawt dawn a chu chu ka thlen tir lo hulhual ang.Kath chuan ngawi rengin min rawn zui lut ve nghal vata, bag a ka thawmhnaw dah chu ka la chhuak sawk sawk a"Dj... " ka awmdan a dik loh avang chuan a rawn ti sap a.
.
"Car ah va awm rawh" ka ti vin tuarh a, mak tih hmel takin min en nghal kawk a.
"i beng a chhet ami car ah va awm rawh" a la ding reng avang chuan ka ti leh tuarh a, Kath chu a inhum ruh a thinrim tak chungin a chhuak nghal hmak a.
"hreptak chuan" locker chu ka hnek dawt a, ka thaw halh a , ka thikthu chhiat em avangin hetiang em em hian ka thin ala rim ngai lo, hmeichhe lakah lehnghal.
.
"Dj... i awmdan hi enge awmzia" Enrique chu a rawn lut ve nghala, kei pawhin thinrim ka duh bik lo mahse ka thin a rim tlat bawk si.Chhang lo in ka kawr chu ka ha mawlh mawlh a, ka bulah chuan alo ding ve renga.
"A tha e " tih pahin Enrique pawh chuan min chhuahsan ve nghala, diktak chuan ka awmdan hi hrehawm ka ti ka inthunun thei si lo.
.
Ngawi rengin car ah ka lut a, Kath chu a hma ah alo thu ran a, a hma khan a hma a thu tura ka hrilh vang pawh ani mahna.Driver chuan in lam pan in a khalh chhuak nghala,tukverh lam chu ka en vauh vauh a Enrique leh Kath chunga ka awmdan kha ka inthiam lo leh lek lek.
"car tiding rawh" ka ti a, driver chuan car chu a ti ding nghala.Car atang chuan ka chhuk vata, Kath chuan min rawn zui ve nghala .
.
" Dj ...a him lo ania, car ah lut vat rawh"
"ka duh lo"
"luhlul lo khan rawn kal vat rawh"
"hei....ka chhe lo em?" tih pahin dawr bula magazine cover a min hman hna chu ka hmuh a,a thin ka ti rim ngang aniang a nui duh miah lo.
" buaina kan tawh hma in ...." a ti hman chauh tiin dawr chhungah ka luh san daih a, min rawn zui lut ve nghal dawn tih ka chiang "1, 2, 3" ka ti sap a.
" Dj..." kha maw min rawn zui ang ka tih reng kha, hawi let chuang lo in ka nui suk a .
.
"Ka pu kha i pangpar tur chu" tih pahin ka pangpar order chu min rawn pe a, pawisa pe in ka la nghal vata .Engmah sawi lo in ka chhuak leh nghal vang vang a car ngheng chuan ka lo nghak ran a.Min rawn hmuh chuan ngaihthat loh hmel zetin min rawn pan phei a.
Car hnung zawk kawngka chu ka hawng vata " lut rawh"
" mahse, a hnungah...."
"tih luih kher i ngai ami?"
Ngaihthat loh hmel zet chuan a lut ve mai a keipawh ka lut ve nghala, Kath ka bula a thut vang nge pawh ka hrelo ka hlim veng veng mai.
.
In kan thlen chuan ka chhuak vata ,Kath chu rawn chhuah ve a tum a mahse car kawngka chu ka vuan tlat a ka lock nghal hmaka mak tih hmel takin min rawn en leh a "kha...i ta tur" tih pahin pangpar chu car ah chuan ka thehlut a ,phawk zet hian min rawn en a hetianga min en hi ka duh lo takzet ani.
"ka tihpalh" tihpalh thu sawi hi harsa ka ti tun thleng pawh hian " ka vin avang che khan"ka ti sap a.
" him takin thlah haw ang che" Kath chu ka melh zeuh a " lungngai suh ..ka pa business chungchang chu ka chhiar em em ang chuan tha takin lehkha ka zir bawk ang " ka ti a, driver chu a tlan chhuak nghala.
.
Kath hi a thawkrim em em a, keimah vangin buaina tamtak a tawk bawka hahchawl ve se ka duh ani. Ka bulah awm reng turin ka duh mahse hah taka a awm ka duh lo ani.Ngatinge henu hi ka ngaihsak tak em em , ka kiss atanga danglam ka ni tih chu ka in hai hauh si lo.Hmeichhia ka ngaihsak lo chung hian ka fawp nual tawh a mahse an mahni ngaihsak tur khawp erawh chuan ka danglam ngai lo.
.
Nui vur vur chungin inchhungah ah ka lut a inchung lamah ka chho a ,ka inbual nghala.Ka pa business chungchang leh inkaih hruai dan te chu ngun takin ka chhiara a tam si a lehpek ah chuan ka chhiar tawh lo viau ang.Kath chu ka rilru ah a rawn lang nghal vata , ka chhiar leh ngei chu angai dawn bawk si ka peih tawh lo takzet ani .Dinner ei zawh chuan ka tutor pawh a rawn thleng tawh a, darkar li zet lehkha han thutchilh chu thil nuam zawk zawk ani miah lo.
.
Ham bai bai pahin ka room lam chu ka pan hnak hnak a, zan dangah ka mentheih nen lehkha han zir meuh chuan duh ai hma in ka mut a chhuak a lawm le.
" unaupa" ka hawi let vata Jaquine chu alo ding to a ,"va mu rawh a tlai tawh "tih pahin ka room chhungah luh chu ka tuma.
"i bulah ka lo mu"
"Engmaw!!"
" ka muhil thei lo a, apa a awm bawk silo a"
" i nu bulah va mu mai rawh"
" mahse anu bulah ka mu duh hleinem"
.
Ka thaw halh a, he naupang hi kum 5 chauh niin a chungah ka sual em em a mahse zingtin leh zantin min be ziah a, ka tluk lo takzet ani." va mu rawh" tih pahin ka room ah chuan ka lut hmaka ,kawngka chu ka khar nghal hmak bawka.Khum ah ka bawk nghal thlawp a, ka chau bawk aniang ka zawi takzet ani.Mahse ka rilru a nuam thei tlat lo , ka tho thut a kawngka chu ka va hawng le da da a , Jaquine chu a din na ngaiah mangan hmel deuh chuan alo la ding ran a , he naupang hi mi engemaw tak chu a nih hi.
.
"lo lut rawh" min rawn nuih sang pahin phur takin a rawn lut nghala ." u Dj... anu chuan in unaupa neihchhun ania a thu in awih zel dawn nia a ti a" a tih chuan ka ding chawta, ni e hemi te nufa hi an chungah ka sual in ka nunrawng tih chu ka hria mahse vawikhat pawh min biak duh loh phah nan an hmang ngai lo.
.
" lo kal teh" tih pahin Jaquine hma ah chuan ka thu a "i unaupa ka ni a, ka ni reng bawk ang " min rawn kuah thlawp a," le mu ang le " tih pahin khumah ka mu a, ka bulah a rawn mu ve nghala
" u Dj... thian ni ang aw"
" awle "
" school ah chuan tumah in min kawm duh ngai lo,Audwey nen palian pui in min zui reng thin a" a tih chuan ka hriatthiam pui takzet ani.Naupang te an nih atangin bodyguard an neih angai a ka lainat takzet ani.
.
"mu tawh rawh a tlai tawh " ka ti a, ani pawh a rawn ham bai bai a,min ngheng chung chuan a muhil nghala.Ngaihtuahna a ti thui duh takzet ani, chhan awm lo in an chungah ka lo sual em em a, ka pa ka huat avangin midang ka tawrh tir zela ka insiam that angai ani, mahse ka pa erawh ka ngaidam thei ngai lo ang.
.
_______________________________________
.
College kal tur chuan ka insiam mek a, college kal apianga puithu zeta suit hak reng ngai hi ka pa min hrem dan ah chuan ka ning ber awm e.Mahse midang lakah ka danglam em avangin heihi ka tih ngei angai si.Athena nen la inbe vak loh mah ila Audwey leh Juquine te chuan min nel tawh em em a a hma ai chuan he inchhung pawh hi a nuam deuh tawh in ka hria.
.
"Dj ....zaninah Mr .Emmanuel Oxdor an dinner eipui turin min sawm a, min ti hnual lo ang che"
" ohh... i fapa chu i business tenawm tak chhungah min hnuklut ve ta ani maw"
" Basketball pawh khel lo in rawn haw tlang ang che ,Kath rawn haw pui vat ang che"
"awle, president" Kath chuan a lo ti vata, ka thaw halh a.
"ka nu hmuh ka duh "
" i nu chu a bialpa nen hlim takin an awm "
.
" Khatiang khan ka nu chungchang sawi miah suh"
"Daniel ... ka bulah i awm tawh a, i nu in a chawm lo che"
" oh... ani maw, chutiang em em chuan ani maw i rilru a lo chhiat !!, ka pa ilo ni hi ka zak takzet ani" tih pahin ka chhuak nghala, ngatinge ka pa hian min tih thinrim reng , ka pa engkim hi ka haw vek ani.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 27th, 2016, 4:25 pm

Class kan lak lai te chuan engmah pawh ka ngaihtuah thei lo, ka tum ber chu ka pa kalh zawnga awm ani.
"Dj.... " Enrique chu ka bulah a rawn thu a, Kath chu classroom pawnah ka awm tir daih ani, a chhanchu ka thinrim in a chungah ka tuan leh vak ang tih ka hlau ani.
"Dude... i ti tak tak em i awmdan hi " ka ban ah chuan na lo te in a rawn hnek a.
"Engchu maw!!"
"engtik lai atang khan nge party i lo bansan tak a, i danglam tawh takzet ani, tunah chuan i lar in i hausa tawh a hlim tur i ni asin, golf khel ila"
.
" tehreng mai, ka la danglam lo ania " nuih suk pah chuan ka ti a,Enrique hi ka thian tha tak ani a,min tih lawm leh dan pawh a hrechiang hle ani.
" Thiana i bodyguard saw a chhelo takzet" Kath chu ka va melh a .Ni e, mipa chuan chhelo an ti reng ang chu.
"i duh tiraw"
"Engmaw!!" ka lo ti vata .
" i melh dan leh a bula i awm dan atang hian i duh tih ka hria"
.
"cmon...Enrique, teuh lo lutuk" ka thianpa bulah hian tlawm taka lan ka duh lo ani, hmeichhe tamtak in min ngaihzawn rawn huai huai laia ka bodyguard em ngaizawng tur chuan ka la inring lo.Mahse alakah hian ka thiktu a chhe hle tih erawh ka chiang, mahse chumi avang ringawt chuan ka duh tihna ani lo .
.
" Hi ... Daniel "Christa chu ka bulah a rawn thu a, Enrique chuan a hmui a lo ti pawrh suk a,ka lu ka lo thing vata.
"Party leh ila" hman zanah Christa birthday party ah Enrique nen kan kal dun a,chupawh Enrique an min sawm luih vang in,ka ruih tawh em avang in Christa nen kan in fawp a khami zan atang khan min beisei ta tlata ,min zui renga ka kham takzet ani.
.
" mawh" tih pahin a hnute bu chhah zet chuan min rawn nek talh talh a,
"ahh... " he hmeichhe sexy zet hi a chang chuan hnar a har thin.
" nia ..weekend ah " Enrique chuan alo ti vata .Huizz ...min beisei leh reng dawn anih hi.
"anih chuan Daniel lunch ei dun ila"
"tih tur ka nei "
"eng?" headphone ka vuah hmaka, dil chhut leh lutuk, ka chhang peih tawh lo.Ka tho thut a, ka chhuak nghal hmaka.
.
"Daniel" min rawn kuah nghal vata
"tlaiah dinner ei dun ila" ka thaw halh a, hmeichhe dang pawhin min tih buai ngam loh laia min kuah ngam ringawt pawh hi a fakawm hranpa ve hrim hrim mahse a mizia hi ka ngaina lo.Kath chu ka zawng ru deuh a mahse ka hmu lo, ka bodyguard ani a engtik lai pawhin min dah hmasa ber tur anih laiin a lo kal bo daih amaw!! ka sa leh nghal ap tawh.
.
" Daniel, saw saw i bodyguard kha ani em?" Christa in a tih chuan a melh lam chu ka en vata, ka ding nghal chawt a.
"ban rawh, saw ngangmah ngaihsak lo in mipa dang nen an nuih awr awr saw" ka inhum ruh nghala.Ngawi rengin ka dinga a chhanchu engmah sawi tur ka hrelo ani.Kath in mipa dang be chunga hlim taka a nui saw hmuh hrehawm ka ti.A biak pa chu car man to takah lut in a tlan nghal a,a tlan liam thleng Kath chuan a bye bye lauh lauh lehnghal .Ka thinrim lutuk hi ka sa leh nghal vek .Kath chu kan lam pan in a rawn kal nghala, mahse ka thinrim a reh phah chuang lo , Christa chu ka pawt lawp a Kath hmuh tur ngeiin ka fawp nghal tawn tawn a, Kath in min rawn hmuh chuan a ding chawt a,mahse ka thil tih lai chu ka tih loh phah chuang lo.Engemaw ka hriat le, hetia ka awm avang hian Kath rilru a nat phah ang maw!! ka ring chiah lo a chhanchu Kath engmah ka ni hleinem.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 27th, 2016, 4:26 pm

chapter-8
.
Kathryn's pov:
.
"Hi Kathryn" ka hawi phei vata Dusten ni rengin "Dusten .... kan inhmuh lohna a rei ta hle mai" Dusten nen hian high school ah kan lut ho thin a, chem vawm dan pawh ani hnen atanga ka zir ani.
"Hetah enge i tih?"
"Umm... hna ka nei a, nang enge hetah i tih ?"
" He college ah hian ka thawk alawm Nu Nina-i enge a an ?"
"ka nu chu a dam...hey nanghi nupui i nei tawh em?"
" ka propose tum che a min hnawl hnu atang khan ka la nei leh lo" a nui suk a,
"sual suh aw" ka nui dun leh hak thin a,Dusten an min duh thu min hrilh tuma ka lo hnawl dan kha chiang takin ka la hria.
.
" kan inhmuh tak ah chuan dinner te la ei dun ila tiraw "
" tehreng mai, ka hmu leh che hi ka awih thei lo zawk.Kan inhmuh hnuhnun ber kha chuan sam buk tak kha i pu a tunah lah professor "
" mahse, ka la danglam miah lo ania"
" anih chuan hna ka nei si a, ka kal mai ang nge"
"awle, nih aw.... dinner chu theihnghilh lo la" tih pahin a car ah chuan a lut nghala, hetia thian hlui nen kan hmu leh ta hi a lunglen thlak takzet ani.
.
Dusten chu a hma a ka tih thin dan angin ka bye bye leh lauh lauh a, a lo puithu in a lo hlawhtling tawh bik hle mai.Nui var var chungin Dj veng turin hmanhmawh takin ka phei hlawk hlawk a mahse Dj ka hmuh chuan ka nui tawp chat!! Helai hmun ual au takah hian hmeichhia a fawp anih chu!! chu ai maha buaithlak zawk chu ka rilru a na tlat ,hmeichhe dang a fawh avangin ka thinrim ve ringawt anih chu ngatinge hetiang hian ka awm tak?
.
Dj chuan chu nu chu duhthawh takin a fawp tawn tawn a cameraman ho laka va veng vat tur ka nih laiin ka khawng vek bawk si Che chang lo in ka thlir tawp ani.Ka inhum ruh a ka thinlung hi chemte a vin sawk sawk ang mai in ana ani ,ka thin a rim em em a hetiang a awm hi ka duhlo takzet ani.
An in fawh zawh chuan Dj chu car ah a lut hmaka ka va zui ve vata.Car a ka lut ve hma chuan car chu a tlan daih a hrilh hai takin car tlan liam lai chu ka thlir tawp ani.
.
Hepa awmdan hi ka hrethiam lo a chang leh ka chungah a tha em em a, tun ah lah min tlansan leh daih si.A sual in a luhlul tih chu ka hria mahse a bodyguard ka ni a ka hna hahthlak zia hi chu hriat ve tal tur ania. Apa in engkim ka kut ah a dah vek a mahse ka hna hi ka tlin lo takzet ani. Class ala nei bawk si , khawiah nge kal leh a tum tak, taxi chu ka phar vata , kan hma daih a car tlan chu umzui turin ka ti nghala, thil thlen dan pawh hi ka hrethiam tawh nek lo e a.
.
In kan thlen chuan inchhungah ka tlan lut nghal vata "Pu Robin Dj i hmu em?"
" hmu miah lo Kath.... ala rawn haw lo, Dj chu i bula awm tur ani si a"
"ahh...min lo hrethiam lawk" tih pahin ka tlanchhuak leh nghala, Dj ka bulah a awmlo tih President in hria se chuan ka hna hi ka chan ngei ang.Mahse khawi hmunah nge a awm tak ang? , ngaihdan pawh ka nei lo ava buaithlak thin tak em.
.
A awmna tur awm anga ka rin club leh intihhlimna hmun hrang hrang ah te ka zawng kual a mahse ka hmu chuang lo,sana ka en chuan dar7 a ri va tawh a Emmanuel Oxdor an dinner kil puiah a sawm a chutah chuan a kal ngei angai bawk si ka mangang tawh takzet ani engtin nge ka tih tak ang, hepa hi chuan min ti buai ve ngawt mai.President in min rawn biak ka rin nen min rawn be bawk si lo.
.
Beidawng takin inlam pan chuan ka haw hnak hnak a ka chau in ka tah a chhuak takzet ani.Khawpui lah chu a ri dur dur lehnghal, Daniel Padilla vangin engmah pawh ka ei hman lo a ka pum lah chu a ri ruk ruk a ka ril a tam takzet ani.Message ka dawn avang in ka phone chu ka en vata Liza message hnutchhiah alo ni a "Kath... ka nu a damloh avangin ka haw lawk dawn a ka rawn let leh vat ang" ka thaw halh a, Buaina tamtak ka tawk mek ani a min hnem turin Liza ka mamawh asin .
.
Lunghlu hmuh chhuah nan thla 3 pawh ka nei tawh lo a tunah lah ruahmanna mumal pawh ka nei si lo engtin nge heng thil zawng zawng hi keimah in ka hmachhawn theih ang. Ka mittui chu a rawn tling pam a, ka chhungte ka ngaih em em laiin an mahni chawm nan pawisa thawh chhuah ka ngaih avangin an bulah pawh ka awm thei lo a chuta kara buaina thuah hnih mai pawh nilo thuahthum lo awm hian ka rilru a ti hah takzet ani, he thil avang hian zanah pawh ka mu thei lo ani.
.
Ka inngaihtuah lungpuam a kawnga tah mai chu ka hreh bawk si ka in sut leh faih faih thin a,khua pawhin min tawrhpui ve ani ngei ang tam mangkheng in ruah chu a rawn sur buan buan a, a ka insum zo tawh lo ka tap chhuak nghal hawm hawm a , ruah sur chu do han thak mah ila pawi ka ti lo,thih daih mai te hi ka duh ani .
.
President in min ban mahse ka pawisa tawh lo ka mi enkawl hi a khirh em ani , a chang chuan khawvela hna harsa ber ka thawk ni te hian ka inhre hial thin,lunghlu chu hmu lo mah ila ka chhungte ka tlan bo pui mai ang, chutia ngaituah na atthlak tak tak ka ngaihtuah lai chuan ka apartment chu ka thleng der mai, kawngka bula Dj lo ding ran ka hmuh chuan ka ding nghal chawt a, ka ring thei lo ka mit chu ka han nuai leh nawk nawk a atak ngei ani bawk si mak tak maiin ka rilru hah na zawng zawng kha lak bo vek ang mai hian a reh nghal vek ani.
.
"Dj" ka ti sap a, a rawn hawi vata .Ruah ka do avangin ka huh zawr vek tawh a, ka tahna ka mit chu a sen ram bawka,Dj chu ka kuah nghal thlawp a, ka inring hman tawh lo mahse tunah tak hian ka kianga awm tur ka mamawh takzet ani, a coat hak lai chuan min rawn khuh vata ,engmah sawi lo mahse a awmdan avang hian ka hlim a mak tak maiin keimah ah hian ka hriatthiam si loh hian tek chhawk Chhawk awm ni mai hian ka hria.
.
"tihian min kuah reng dawn ami?" ka inla hrang nghal vata, tunah khan engthil nge ka tih ka awmdan kha ka zak takzet ani.Ngawi rengin kawngka chu ka hawng vata " mangtha" tih pahin inchhungah ka lut nghal daih a.Kawngka nghengin ka thu hnawk a ka zak lutuk hi au chhuah mai ka duh.
Doorbell a rawn rik avang chuan kawngka chu ka hawng leh vata, Dj chuan chiang tak mai hian min rawn melh kalh a, a haw tawh ka ring asin .
.
" oh!!... i kawr ka lo theihnghilh daih alawm " tih pahin a coat min hak tir kha ka phelh sawk sawk ,ka pe vat a hmanhmawh zetin kawngka chu ka khar nghal thuai a Dj chu a rawn te that mai, ka hawi let vata ka ka ka hup nghal thuai a.
" nilo, nilo" Dj kut chu ka lo khar chilh chu niin.
"ka tihpalh ...engtin nge a awm?"
" a na" a ti vin hluk a, min chhan dan chu ka lungawi lo takzet.
.
" Tinge khawngka kha i lo dan, ka khar chilh reng ang che chu"
"lawmthu pawh i sawi dawn nange?'
"Engvang ngawt in maw ,chhuak rawh" tih pahin a kut ah chuan ka la lawk a,
" ana" tih pahin a chek nghal tlak a,
" ka tihpalh, kawih pawh ka tumlo" vur ka la nghal vata " hetah lo thu rawh" a ding tlat avang chuan ka han melh zeuh a ,a kut chu hnung lamah a dah tlata.Ni e, Dj hi kum20 lek hmeichhe laka inti pa rual a ni tih chu ka hria, a naupang chhia takzet ani, a ruk chuan ka nuih a za em em a mahse ka nuih chuan a thin a rim leh ngei dawn si.
.
"vur in kan deh loh chuan zai angai maithei ania" sawi thaih pah chuan couch chu ka beng thak thak a.
"engmah ani lo " a ti tak na in a hmel ah chuan a na a ti hle tih erawh ka hrethei ani.
"anih chuan i pa kan call ange"
" aih call suh" tih pahin couch ah chuan a rawn thu nghal a, a kut chu ka en sak vata.Na awm reng pawh ani, a vung deuh lak a ka inthiam lo leh lek lek zawk.
.
" vawinah khawiah nge i awm... ka zawng nasa lutuk che " zaidam tak chuan ka ti sapa .
"i pa in alo nghak reng tawh ang che, haw vawt rawh aw" min chhan loh avang chuan ka han ti leh a
"Mr Emmanuel Oxdor chu ka be tawh naktuk zana sawn turin chuan lungngai suh i hna i chan lo ang" ka hlauhthawnna zawng zawng chu a kiang hawk in ka hria,luhlul in thinchhe hle mahse misual tak chu ani lo anih hi.
.
" Le...a zo tawh e... hei i kawr a huh vek alawm va haw tawh rawh" tih pahin ka melh zeuh a min lo en reng chu niin ka hawisawn nghal a.A lam hawi turin min kuaiher nghal vata, ka mit ah tak min melh kalh bawka,a awmdan hian ka awm a ti nuam lo lek lek.
" vawin a i mipa biak kha tunge?" thutak ran chuan a ti a , tunge ka biak...Ee.. Dusten kha ni ngei ngei ang.
"ahh... Dusten kha maw"
"a hlat ah awm la ka duh ani"
"engmaw!!...." ka ti hman chauh a ka hmuiah a rawn fawp nghal vawng vawng a, ka meng phawk nghal kawk a.
.
Dj an min fawp maw!! ka mur nghal chuai mai, a reh duk nimai hian ka hria.Ka thu khawng renga, chet mai nachang pawh ka hre tawh lo, thil thlen dan hi engmah ka hrethiam lo mahse hei erawh ka hrechiang hepa hian min ti a thei takngial dawn tih hi.Mipa ka vawikhat fawhna ani na chungin fawp tawh angin ka in hre tlat,!! nilo ka mumangah ka fawp tawh ani mahna , a tui dan leh ka hmui ka tawh ruala ka awm dan ang chiah hian ka awm tawh tlat in ka in hria.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 27th, 2016, 4:26 pm

" Eng thil nge i tih hi?" ka namsawn nghal dawrh a naupang mai ala ni a hetiang hian ka awm tur ani lo.
"lalpa leh" tih pahin a nui lui hak a mahse a thin a rim hle tih erawh a chiang hle.Dj chuan min rawn fawh luih a tum leh a ,a hmai ah chuan ka beng nghal sawk a "enge i hriat ? i a tawh ami?"
" ni e,ka a tawh" a ti vin tuarh a, a khawk rum rum thei in ka hria
"ka a tawh takzet ani Kath... ka awmdan hi ka hrethiam tawh bik lo, engtik lai pawhin hmuh che ka chaka mipa dang i biak in ka thin a rim a ..hrep tak chuan "
.
A hmel atang chuan a sawi tum loh deuh a sawi ani tih chu ka hria, a rilru kap tu a rawn sawi chhuak tih pawh ka hre tel ani.Tunah khan Dj an min duh thu a sawi tihna ami?!! ka mak ti lutuk chu ka ding khawng renga, ka awmdan ang chiah khan a awm ve ani, hmuh ka chakin a bula awm ka chak renga, nilo Kath...Dj hi i engmah ani lo.Dj chuan ka hmui tak a rawn fawp leh nghal tawn tawn a mahse tun tum chu ka lo hnar tawh bik lo.
.
Kath he thil hi ni lawm ni i duh chu , Dj hi i ngaihzawn der angai tiin ka inhrilh nghal mawlh mawlh a ka maimichhing vata ka thiam ang tawkin ka lo chhang let ve vata, diktak chuan sihhnip pawh min lo ti maithei mahse heihi remchangah la in lunghlu hmuh nan ka hman ngei angai ani.Lunghlu ka hmuh hunah chuan ka ru chhuak anga tichuan heng thil zawng zawng hi a tawp vek tawh ang.
.
Dj chuan a aia nasa chuan min rawn fawp leh nghal tawn tawn a ka tang eih lo tang tur pawh ka nilo, pan hmasak ngai lo a min rawn pan hmasa hi lawm hliah hliah tur zawk ka ni.Tunah chuan pen khatin hma ka sawn leh ta mahse hun ka neih tam loh avangin chak taka kan kal erawh angai ani.
.
Ka phone a rawn rik avang chuan ka inla hrang nghal vata.
"hreptak chuan " tih pahin couch chu a chum dawt a,kan infawh laia phone a rawn rik avang khan a thin a rim ani ngei ang.Phone chu ka en vata, ka khur lehnghal der tawh Alexander ani.Dj an a hriat ka hlauh avangin ka pickup vata.
" nakinah ka rawn be leh ang che " tih pahin phone chu ka off nghal hmak a.
.
" Tunge?"
"A......a... ka ...ka nu anih kha" awih lo hmel zet hian a aia chiang in min rawn en leh a.
"va inthlak rawh, i damlo ang i huh vek bawk si " ka thaw huai mai, kha phone call chungchang kha min zawt belh ang tih ka hlau ani.
" ughh .... awle, nangpawh haw tawh rawh " tih pahin room ah chuan ka luh ka tuma min rawn pawt her sawka.
" naktuk ah ka inhmu leh dawn nia" a biaksum khuar kak chuan a nui suk a vawikhat pawh rawn hawi let lo in min chhuahsan nghala.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 27th, 2016, 4:26 pm

Chapter-9
.
2 weeks later:
.
Dj chu a hma ang em em kha chuan enkawl a harsa tawh lo, kar hnih chhung chauh pawhin a danglam chak zia a hmuh theih ani.A hun takah lehkha zir in apa in ti tura a tih chu tha takin a ti zela a hma aiin President hmel pawh a eng sawt in a hlim ani tih a hriat theih ani.A hnathawk te chungah pawh a fel em em a, Dj nen la inmil lo mahse a inchhung pawh a hma aiin a nuam in ka hria.
.
Nitin han in veng chilh na na na chu Dj nen chuan langsar lo takin kan inkawp tan a, kan inkawp han ti ila mi inngaizawng in an tih ang in han infawp ve zeuh thin mah ila indate tih vel erawh kan ti ngai lo.Pangngai takin kan awm a, kei pawhin a ni telin a bula awm ka chakna a zualin ka ngai ngawih ngawi thin ani. Dj lah a induh thiam in ka bula awmdan tawk a thiam em em mai bawk si tunah chuan kan ruahmanna aiin ka kal thui hle tawh tih ka inhre der bawk si lo
.
" Kath...Dj hi i duh tiraw?" Liza chuan breakfast ei lai chuan min en vang vang a, min han zawt thut mai chu ka thil ei lai ka phuh chhuak tep ani.
" aih...teuhlo"
"i duh mai pawh ni lo in, i hmangaih tih ka hria"
" Liza duh tawk rawh, kan ruahman na a hlawhtling mai chauh ani"
" nilo... i danglam ni Kath..i danglam tawh takzet Dj nen in in kawp atang hian i hlim in i awm mai mai pawh i zai rat rat thin anih kha.Engmah hi ka hai hleinem" ka nihna chiah ani, Liza hian a sawi sual reng reng lo, khang hun reilo te chhung khan Dj hi ka lo duh mai pawh ni lo in ka lo hmangaih ani thei mai angem? nilo chutiang chu a thleng lo ang.
.
" ka hrelo, mahse Dj bula awm hi a nuam ka ti.a chang phei chuan lunghlu pawh ka lo theihnghilh daih thin"
"Ka hrethiam lutuk che Dj hi a hmeltha in a hausa tih ka hria mahse i chhungte pawh i ngaihthah a thiang lo.Tunah phei chuan thla khat leh a chanve pawh i nei tawh lo ania ,inngaihtuah chiang rawh"
" mahse Dj hi ka zawt tawp thei si lo alawm, a room a ka luh chang chuan ka zawng ve thin tho mahse apa hian a kawl tir hauh lo ang"
.
"anih chuan heti hian ti ang, an chhungkua in in atanga chhuah tir in an chhuah hlan in zawng ta ila"
" Engmaw!! a theih lo ang"
" theih maithei asin.Dinner emaw vacation te hmang chhuak ta se "
" mahse Dj hian hrechhuak ta se"
" ava mak tak,Kath a hrechhuak lo ang i ruk chhuah hunah pawh an ring tawk che a an ringhlel hauh lo ang che "
.
Ka inngaihtuah vung vung a mahse ka hlim chuang lo,Dj hi ka bum ani hria se chuan a rilru ka ti na ngei ang
" Dj an a hriat chuan a rilru ana ngawt ang" ka ti sap a ka kun lap a.
"engvang ngawtin maw!! anih Dj hi i duh em em a ani hian a duh ve che em?" ka chil ka lem khawlh a "a duh thu che a hrilh tawh che em?" a han ti leh a.Ni e, Dj hian min duh thu min la hrilh miah lo, khami zana min fawh atang khan min duh turah ka lo ngai ve ringawt a tunah chuan ka chiang ta tlat lo.
.
" kha maw... Kath nangmah zawk hi bum i lo ni reng maithei asin.Fimkhur rawh Dj hian a duh tak tak lo che " chutia Liza in a tih avang chuan ka tho thut a
" Ka tlai tawh ka kal" tih chiah ka sawi , ka chhuak nghal hmak a,mak tak maiin Liza thusawi khan min ti thinrim ani.Dj hian min duh thu min la hrilh miah lo chu chuan ka awm a ti nuam lo takzet ani .
.
Car steering chu bawh in ka maimichhing vang vang a, ka awmdan ka ngaihtuah hian Dj hi ka duh tawh takzet ani, ka awm angin Dj pawh a awm ve tho tura ka lo rin laiin ani chu ka rilru ang a pu ve si lo, ka mittui chu a rawn far fap a.Ka awmdan hi ka duhlo takzet, ngatinge mipa vangin ka mittui a tlak tak mai.Ka phone a rawn rik avang chuan ka mittui chu ka hruhul nghal mawlh mawlh a.
.
" Mr Wine ...enge nita?"
"President in a hmu duh che tunah"
" awle ka lo kal ngahl" phone chu ka dah a.
" Kath.. i hna chauh ngaihtuah rawh.Dj hi i engmah ani lo" tiin ka inhnem sap a, engine chu ti nungin Company lam chu ka pan nghala.
.
"Kathryn he thil hi sawifiah rawh"President chuan chanchinbu chu dawhkan ah a rawn theh thla thlawp a,ka la kang vata a kawm ah chuan Dj an hmeichhia a fawp lai kha a chuang vanga.
"President a thleng nawn tawh lo ang"
"he thil avang hian stock nasa takin a tlak hniam phah thei asin, kha leh chen kha hmingchhiat na awm lo in company hi ka lo kalpui tawh a tunah...." a thaw leh halh thin a,a thinrim em avang chuan president chu a sen tan tawh a ka chungah hetianga a awm avang hian hrehawm ka ti takzet ani.
.
" ka tihpalh" ka ti sap a chu bak sawi tur dang ka hrelo
"tihsual a awm leh tawh tur ani lo ,Dj grade hian san lam a pan zela hma nasa takin a sawn ani, chuan hei aia tha hian i enkawl thei tih ka hria i kal thei tawh ang" a tih chuan president office atang chuan ka chhuak nghal hlawk hlawk a, diktak chuan ka thin a rim takzet ani tunah tihsual neih ka thiang loh laia hetiang buaina lo awm ve ziah hi ka ning takzet ani.
.
Dj chu lobby ah lo thu in min lo nuih var var a, hepa hi hetah enge a rawn tih dawn?.
"hey" phur hmel zet chuan a rawn ti a ka thinrim lai ani bawk nen chanchin bu chuan ka vawm pawp a ka kal nghal hmawk hmawk a.
"enge awmzia?"
"a awmzia i hre duh amaw!!"chanchin bu chu ka la lawk a "hei ...i hre tawh em?" hmeichhia nen an in fawp lai thlalak chu ka kawk sawk sawk a
"i thik ami?"
"engmaw!! ....teuh lo mai" diktak chuan president in min hauh vang ringawt a thinrim ka ni lo tih chu ka inhre chiang hle ani.
.
"anih tinge i thin a rim si ?"
"enge hetah i rawn tih?" thil dang chu ka sawipui daih a, hetia min zawh reng chuan ka thil duh loh pui pui ka sawi ang tih ka hlau ani.
"lo kal teh " tih pahin min kai chhuak nghal dawr dawr a.
"enteh...hei ka car thar anih hi " phur takin a car thar chu a enkual a.Ka lo nui suk a han lawmpui vak dan pawh ka hrelo,hepa bulah hi chuan a thinrim theih tak tak loh.
.
"tunah chuan keima khalh ngeiah i chuang thei tawh ang"
"mahse i pa in..."
"Rommel chu ngaihtuah buai duh suh, he car hi chu lenchhuah nan kan hmang mai dawn nia,zaninah dinner ei dun ang aw" he nau hi chu aw... a chang hi chuan min rualpui en hmiah hmiah zel.
" mahse lehkha i zir angai alawm"
"Tagalog pawh tlem tlem ka thiam tawh a, chuan test na ah pawh 98 na ka ni tawh,i awih loh chuan i en thei ang"
.
" 98 na maw!!" ni e a hma kha chuan 150 pawh a pha ngai lo, hmasawn na turu tak ani.Kar hnih chhunga a hmasawn na nasa tak ka hmu hi ka lawm takzet ani.
" company dan leh inkawl dan pawh ka hre vek tawh ,heng zawng zawng hi nangmah vang ani"in ti thei tak chuan a ti a
"ahh..ni bik lo e" a kut ah chuan ka chum zeuh a
"ana"
" ngatinge i kut hi, ka khar chilh na che kha ala na ami?" nilo kar hnih lai a liam tawh alo tuar char char amaw!!.
.
" Damdawiin ah kal ang"
" ka duh lo, leng zawk ang "
"Daniel Padilla ... intih pa na hun ani lo ,i kal loh chuan ka be tawh lo ang che" lehlam ka hawi hmaka, diktak chuan ka inthiam lo takzet ani.
" Anih chuan rei lo te chiah "
" chuan ka khalh ang" tih pahin ka kut chu ka dawh a, car chahbi chu min rawn pe zal zal a.Damdawiin lam pan in ka kalh nghala.
.
Doctor in X -ray tura a tih avangin kan X-Ray tira a chhe lam a nih lo hram ka beisei" Doctor a kut chu enge a an?" ka han ti vata.
"A lan dan chuan a ruh hi a khi a, engtin nge heihi a thlen chu ka hrelo mahse zai angai lo hi a vannei takzet ani"
"ana ka ti lo alawm"
"tlangval heihi intih huaisenna chi ani lo, tunah chuan i in uluk
viau angai tawh ang"
" basketball ka khel thei tho angem?"
"aih...motor khalh thlengin i ti tur ani lo,i kut hian a tuar thei ani" a tih chuan Dj chu a chhuak hmaka, kawngka chu a khar thuai bawk a.
.
" Doctor a tha leh vat angem?" ka han ti leh hrama.
" a that ngei ka beisei mahse a tih hliam atangin enkawl vat anih loh avangin hun a duh rei deuh ang , ana tih a sawi ngai miah lo ami?"
"aw... engmah a sawi ngai lo"
"a tawrhchhel takzet ani mahse a luhlul na hian ala ti na ang tih a hlauhawm"
" ka lawm e doctor" tih pahin ka chhuak ve nghala, Dj chuan car bulah min lo nghak ran a.
.
" Treatment i lak vat angaia chuvang chuan...."
" kha doctor teh hrep khan dawt a sawi anih kha" min lo pawtchat vata.
" nilo...Dj hetiang hian awm suh keimah vanga na ania, ka inthiam thei tawh ngai lo ang" ka kut lap a, a kut pahnih chuan ka hmai chu a rawn dawm vata.
" Hey... i thiam loh ani lo, treatment chu ka la ang a tha em?" zaidam tak chuan a ti sap a, ka lo bu nghata.
" anih chuan dinner min eipui tal rawh" tih pahin ka hmuiah chuan a rawn fawp zeuh a.
.
"Hey !! Kath" kan hawi phei rual thawt a
"Dusten " ka lo ti nghal var a
"mi hausa pa chu leh" Dj chuan a ti sap a ka nghawk nghal sawk a.
" Kan inhmuh leh tak si ah chuan zanin ah Dinner ei dun ila a tha ang" Dj chu ka melh hrek hrek a a lungawi lo tih a chiang reng mai.
"ahh... zanin chu ka hman ...."
"ka nu pawhin a hmu chak tawh ngawt ang che ,dar 7 ah ka rawn lam ang che" tih pahin car ah a lut a,a tlanchhuak nghal daih a engmah pawh ka sawi. hman lo .

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 27th, 2016, 4:27 pm

" khapa hnaiah khan awm suh ka tih che kha "
"ka awm loh kha min rawn be ringawt alawm"
"anih chuan a bulah va kal rawh" a car ke chu a tlawh pawp a, ka phu nghal zawk, avan thinchhe tak ani pawh car ah lut in chak zetin a tlanchhuak ve nghal ,a kut kha ana asin.
"ka kal daih anga a ni mai lawm" ka ti sap a,Dusten bulah pawh kal ka tum bik lo mahse Dj awmdan hi chu a ti mah mah ani ,Ruah lah chuan sur a tum lehnghal .
.
Dj chuan chak zeta rawn kalh let leh in ka zawn ah tak chuan a rawn ding chawt kawngka a rawn in hawng nghal bawk a,lut lo in ka ding renga Dj chuan vawikhat pawh min rawn melh lo, hma lam chu a melh ngar ngar a, a thin a rim hi chuan a hlauhawm takzet ani.
" rawn lut rawh" min rawn en miah lo chuan a ti sap a,mahse ka tan chuan ring tak ani ,ngawi rengin ka lut zal zal a, lut lo in luhlul chhuah tlat ila chu engthil emaw atthlak tak tih a tum leh ngei ang chu chu thlentir ka duh lo ani.
.
Ngawi rengin hma lam chu ka melh ran a, seat belt chu ka vuan taih bawka a khalh chak si a ka hlau takzet ani.Kawng kawi ah chuan chak zetin a kual pawp leh pawp thin a,
" Daniel" ka au tuarh a, mahse hria ang pawn a awm lo,ka thin a rim tun tawh Dj chu ka va melh leh zeuh thin a hma lam chu a melh ngar ngar mai bawk si,a kut a na bawk si a kan chetsual loh nan tawngtai mai loh chu tih theih ka nei lo.
.
Chutia a khalh chak telh telh tak avang chuan ka inhum ruh vata
" Car hi ti ding rawh" ka au tuarh a awmzia a awm lo kher mai.
"i tih din loh chuan ka zuang thla ang" ka han ti leh a engmah a sawi lo mahse a awmdan atang chuan tih din a tum lo hle.Engpawh thleng rawh se ka pawisa lo ,seat belt chu ka phelh rawk rawk a zuan chhuah chu ka tum ta mai!!.Car chu a ti ding nghal chawt a, hma lam ah kan bu nghal lawp a.
.
" Chhuak rawh" phawk zetin ka melh kawk a, a awki a rawn san ngam amaw!!
" Engmaw!!"
"chhuak rawh ka tih chu" a ti tuarh a ruah lah chu a sur buan buan mai tawh bawk si"Khapa bulah khan tunah va thlawk nghal rawh" a tangkam avang chuan ka sa nghal zak.Kawngka ka hawng sawk sawk a, ka chhuk vata kawngka chu ka khar chawrh bawk a.Chak zetin a tlan nghala
.
Hma lam pan chuan ka kal nghal hmawk hnawk a, ka thin a rim bawk nen ka mittui chu a tling pam tawh a.Hetiang hian tumah in min la vin ngai lo, vin ka ni hi ka rilru ana takzet ani.Ruah chuan min nan zawr vek tawh a, a vawk si a ka hnar chu a tai hlar tawh a,an tawm hul na mai a awm bawk si lo, a ramhnuai ruih bawk si hetia min tlansan daih chuan in ka thleng zo kher angem?, hma lam pan chuan beidawng miah lo in ka kal char char a ka awmna pawh hi ka hrelo.
.
Thui vak lo ka kal hnu chuan car headlight eng chu ka hmuh hlauh!! hmanhmawh lutuk in ka pan vata mahse Dj ani.Dj ani tih ka hriat takah chuan car chu ka kal pelh hmaka, ring zetin horn a rawn hmet ri tuarh ka phu zawk a, hepa hian enge maw a hriat le? Ka kal ngai chuan ka kal lui hmawk hmawk a, hawilet ka tum bau lo.
.
Vawileh khatah Dj chuan min rawn kuai her pawp a" min thlah rawh" ka ti nghal chul a, ka tah te pawh a chhuak takzet
" Kath...duh tawk rawh "
"Ngatinge hetiang hian i awm min thlah rawh" ka ti tuarh tuarh a, ka insum thei tawh lo ka mittui chu a rawn luang zung zung a .Tal chhuah tumin ka tang ve tlat bawka
" A chhan chu ...Ka hmangaih che ani"a khawk rum rum ni ber hian ka hria ka ding khawng nghal zawt a,
tunah khan Dj an min hmangaih thu a sawi, ka hlim zia hi rinhlelh pawh ka phal lo.
.
" Kath ...ka hmangaih che, ka la naupang avanga sawi mai mai ka ni lo .Ka nun hi i thlak danglam vek ani " ka khuah nghal thlawp a .
"khatiang khan ka vin tawh lo ang che, ka tihpalh " ka hmui ah chuan a rawn fawp nghal tawn tawn a, he khawvel ah hian kei aia hlim hi an awm thei tawh lo ang .Lawm avangin ka tap lo thei lo ani ,ka hmangaih lutuk che ka ti mawlh mawlh a mahse ka sawi chhuak thei tlat lo Dj hi ka bum a mahse hei erawh ka chiang ka hmangaih takzet ani.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)