My Drug is you by Remruati Bawitlung (Completed)

Moderator: Remruati (Haylor)

Ngaia
Site Admin
Posts: 25813
Joined: April 30th, 2016, 4:07 pm

My Drug is you by Remruati Bawitlung (Completed)

Unread post by Ngaia » December 2nd, 2018, 3:36 pm

TargetPreview.jpg
TargetPreview.jpg (15.27 KiB) Viewed 53427 times
    • MY DRUG IS YOU
      (A bad girl in the Pastor's family)

      Remruati Bawitlung (Haylor)

      PROLOGUE


"min fawp rawh.... " a tih rual rual chuan a awm bawr ṭham nawk nawk pahin a he sen vam ham mai chu dimna tel hauh lo leh duhthawh zet hian ka fawp nghal tawn tawn a,a hmui thlum leh tui zet chu ka fawp ning thei lo ani ber.

A purfume cherry par ang maia rimtui leh zun nghah zet chuan theihnghilh theih tawh lo tur khawpin mi zem chiai chiai a,min khawih dan engkim mai chuan chakna min pe thar zual sauh emaw tih mai tur hian ka lo rùm leh nghut ṭhin a, chu chuan amah a ti phur hle nghe nghe.

"i pian a nalh hle mai "ka lo khi suk ringawt, thim hle mahse ka taksa buai chung chung pawha uluk taka ka enkawl leh duat chu a khawih zawng ringawt pawhin a hre thei pawh ani mahna.A chet dan vel aṭang chuan a zei mai bakah a vawikhat na ani tawh lo tih a chiang reng, hma hruai nghai lovin ka kekawr zipper chu thiam zet hian a phelh nghal vata,a fawh phei hi chuan vanram hi ani ringawt.

Amah fawp reng chung chuan a panty kan zen lut chiah chu rum nghar nghar chungin ka beng bulah hian a rawn thaw lum ham ham a, inhnuai lama party bengchheng leh ri nuai nuai te chuan min dang zo tawh lo.

"hmanhmawh rawh.... "

A chakna a sosan tawh em avanga min ngenna chu tih puitlin loh chi rual ani lo.Rui dun hle mahila hrilh chawp ngai lovin kan duh leh tih tur chu kan hrechiang dun hle.

Chutia kan chakna te kan lo in phuhruk sak tawn mek lai chuan ka alarm a rawn ri ta thut mai!!
" tho tawh rawh " ka nu in a rawn tih zui zat ri ka hriat rual rual chuan ka mumang aṭangin ka harh chhuak nghal zawka,ka lu a nat mai bakah ka la penṭawng zui.
Ka mumang lek mah nise khami zan khan ka hriat theih chinah vawi li vel kan mu dun hman in ka hria.

___________________________________________


CHAPTER-1

★ROYAL BROMPTON HOSPITAL★

"Asher.... rawn sign vat rawh.... "Lily in register alo keu lawk sa ah chuan 'Asher Martin Edwards' tih zawn ah chuan ka han tick keuh a, Senior Doctor incharge rawn kal hma a ka thleng hman avang chuan ka thaw nghal huai bawk.
"ngatinge i va tlai em em ve "
"umm.... ka pa puih lawk angai a "
" Pastor fapa tih takah " min rawn fiam pahin Freddie chuan ka banah a rawn hnek nghal pawp a,ka lo nuih vur vur ringawt.

"night hi ka ning tawh takzet.... chhunah ka mu thei bawk si lo" Ron an a tih chuan kan pawmpui tlang bawk aniang kan lo bu nghat hlawm a.
" kan peih emaw peih lo emaw thla thum lai kan la nei ania " ka tih chuan an lo ner nang hlawm ringawt.
"keichu ka patient te hi enkawl buaithlak chi ang kha an nia, mut kham loh nen ka tlin lo lek lek zel "
"Rosie...keini pawh kan ni ve tho alawm mahse kan patient te hi duat an ngai ania " Lily nge nge a sawi ṭha ṭhin mange, hei vang hi lawm ka duh em em nachhan.

"kartawp ah kan la party hrep dawn lawm lungngai mah ta che u ... " Freddie leh party tih hi chu a inhmeh tawh ngawt mai, hetiang em em a mi thawveng hian Doctor a zir hi mak ka ti rum rum ṭhin .
" Lem.... kan Duty na tur ṭheuh ah kal tawh ang u le " Lily in a tih takah chuan kan kal darh sang sang hlawm a, kei leh Lily erawh medicine lamah kan duty dawn avangin kan inzui chho hnak hnak thung.

Lift kan luh rual rual chuan kan pahnih chauhin kan chuang bawka,a kut chu nghet takin ka han hum sak vang vang a, a hmel aṭangin a chau tawh hle ani tih hai rual ani lo.
" i mu ṭha lo leh tawh ani maw...."
" umm... "
"vawi engzat nge ka hrilh nawn dawn che, i taksa ti chhe khawp in lehkha zir suh ka tih che kha "
"engtin nge ka tih chuan ang... i ruala pen ka duh si chuan rim taka ka thawh angai alawm"
"in enkawl ṭha viau rawh... "
"nangpawh... mahse pakhatna i nih avang hian ka lehpel thei lo turah che ngai miah suh "

Kan han nui dun leh rih ṭhin a, chau ṭhin hle mah ila Lily bula ka awm tawh hi chuan ka chau ani tih pawh ka theihnghilh hmak zel.
"naktuk hi eng nge anih i hria em? " ka nui suk ringawt, engvangin nge kan 5years anniversary hi ka theihnghilh theih ang,ka tho hlim hlawl pawh hi min zawt thut mahse ka chhang nghal zat thei ang chu.
"i birthday a ni bawk si lova ka hrelo... "
"hey.... "
" ṭha deuh khan duty phawt rawh... "
lift kawngka a rawn in hawn rual rual chuan kan kut pawh chu kan inthlah nghal vata, inngaizawng pawh ni ila midang hmuh a tihlan phal anih loh avangin inhre ngai lo ang hmiah in kan kal hrang nghal vat bawk.

Lily nen hian MBBS (doctor) zirlai ve ve kan ni a, tunah hian internship damdawiin khat ah kan ti dun mek ani.Kei hi pastor fapa ka nih avangin ka u hian ka ngaihzawng te thleng hian a duhtui ṭhin em em a kei erawh chuan engmi pawh nise ka hmangaih anih phawt chuan neih mai pawh ka pawisa lo,ka û nen a kan danglam na pawh ani reng bawk .Vanneihthlak takin ka hmeichhe duhtak leh ngaihzawng hmasa ber ni bawk hi mi zaidam, fel leh ringtu ṭha tak kan chhungkua pawhin a a pawmpui thlap ani hlauh mai a, in tih thiamloh chang te chu awm ve bawk ṭhin mahse tunthleng hian buaina pawh awmlo in kum5 lai kan lo in kawp tawh a, kan inneih ngei pawh ka beisei.

Ward ka fan zawh chuan khua a var tawh avangin ka sana bun lai chu ka zuk melh zeuh a, zing dar6 alo ri der tawh. Ka duty hun a zawh tawh avangin ka lehkhabu chhiar lai dawhkana ka pharh hnawk nuai chu rem fel in a ṭhen chu in a chhiar atan ka rucksack ah chuan ka khung nghal mawlh mawlh a, hmanhnawh takin Lily awmna lam panin ka tlanphei nghal hlawk hlawk bawk.
Lily awmna room ka luh rual rual chuan ka ding chawt a ka khi nghal suk ringawt, chair ah rem lo zet hian tui takin alo muhil chu niin.

A muttui em avangin kaitho ta lo chuan puan ka sin tir ta zawka,a mutna sir ah chuan a thawh hun nghah pahin lehkhabu chhiar chung chuan ka ṭhu ran bawk.

"hey ....harh te u..." min rawn sawi nawk nawk avang chuan ka han meng siar siar a,Niki hmel ka hmuh rual rual chuan ka harh nghal kawk bawk.
"hei dar9 a ri tawh dawn ania.... tho ve tawh em em ru " Niki in a tih chuan Lily nen kan in en a, kan nui ringawt.
Ka mut a chhuah mai bakah ka lo chau ve bawk nen ka mutthilh lai pawh ka hre lo reng reng.
"Ngatinge min kaithawh vat loh" Lily chuan a han ti sap a,"in mutui em a, tuman an kaitho duh lo cheu anih kha... bakah Dr Richard (senior doctor) a rawn kal mek a nia " a tih takah chuan ka tho nghal zawt ringawt.

Dr. Richard an min rawn hmuh hma chuan kan chhuak nghal vata, kan muhil ani tih hria se chuan kan chak lo viau ang.
"ngatinge min rawn kaih thawh lova ?"
" i mutui tui em a... "
" chuan nangpawh i muhil zui ve nghal bawka "
"umm....ka nu in alo nghak reng che nia " tih pahin car kawngka chu ka hawnsak a,ka lut ve nghal vat bawk .He car hi kan hospital a hlat em avanga ka û min pek a ni a, ka uluk hle nghe nghe.
" mahse ka in phih fai ve phawt ang chu " kan chhungkua leh an chhungkua hi kan innel tawh bawka, han zah tur vak a awm tawh lo.
" a pawilo.... " tih pahin a hmuiah chuan ka han fawp zeuh a, "Happy Anniversary" ka tih chhunzawm sap bawk.
" i theihnghilh tawh emaw ka ti asin"
"teuh lo mai " nuih vur vur pahin ka tlan chhuak nghal vat bawk.

"dinner kan ei dun thei dawn si lova...lunch kan ei chhuak mai dawn mi? "
"idea tha tak anih chu " kan zirlai avang hian engthil tih mah remchang lo ṭhin hle mahse a vui ngai lova, lawm taka a pawm ṭhin avang hian a chang hi chuan ka inthiam lo ṭhin ,mahse tun ṭum erawh pui taka lawm sak ka tum bawka ka in puahchah nasa ve hle bawk.
" nizan i duty chu eng nge a an "
" umm.... dar12 ah khan wish tur che in rawn kal ka tuma mahse i buai bawk si a... ka rawn kal duh ta lo alawm"
"i duh hun hun ah i rawn kal thei alawm"
" mahse... min hmuh chuan " a hlauthawng hmel ka hmuh chuan ka khalh lohna lampang in a kut chu ka han hum vang vang a, min rawn nuih sen sen bawk.

In kan thlen chuan car chu ka dah fel nghal vata, ka nu in breakfast rawn ei tura a duh mai bakah hruai haw turin min tih avanga hruai haw ka ni a, chau hle mahse a sawisel ngai lo.
" ngatinge i va chau hmel em em ve "a hlim loh hmel riau in ka hria.
"nizan aṭang tawh khan eng nge maw hian min mawlh tlat anih chu... ka chau vang pawh ani mahna "
"ka thlah haw vat dawn che nia " tih pahin doorbell chu ka han hmet ri rang rang a,kawngka a rawn in hawn rual rual chuan ka û in min hnek thlu nghal tawp ringawt.

" tho rawh " tih pahin min pawt kang nghal lawp a inchhungah min pawt lut nghal dawr dawr bawk,ka û thinrim hmel leh mitmeng sen rûm ka hmuh chuan mak ka ti in a ngaihna ka hrelo takzet bawk.
"engthil nge maw i tih le? " chhan nei lova kut min thlak ringawt avang chuan a kawr nghawngah ka han ṭham ve nghal tawn a, a chhan pawh hre lovin ka thinrim ve em em ringawt.
"i thil tih hi i hria em? "
" eng thil maw ka tih a? "
" henu hi i rai ani lawm ni " tih pahin couch a hmeichhe pakhat lo ṭhu chu a kawk ta mai.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:36 pm

CHAPTER-2

"Engmaw!!" chunu chu mak tih hmel zet hian ka melh nghal kawk a,a hma in ka la hmu ngai bawk si lova thil thlen dan hi ka hrethiam lo takzet.
"henu hi ka hre ngailo "
" hrelo angin awm tum hauh suh"
"min hrelo amaw!! hahh...anih chuan Rubby house party ah khan kan mu dun ani tih pawh i hre tawh dawn lo anih chu" chunu chuan ngeiawm zet hian a lo ti ve bawk a, engmah ka hriat tawh loh avangin sawi mai tur pawh ka hrelo.
" hmela... " Joel an min hnek leh a tum lai tak chuan, "Joel...inbeng dai rawh " ka pa meuh a rawn ṭawng chhuah takah chuan min khawih la chak hle mahse min melh rawm rawm pah chuan min thlah ta zawk a, Joel a thinrim tawh hi chuan a chet buan buan ṭhin avangin ngawih reng hi thil chingfel dan ṭha ber ani tih kei tluk a hre chiang an awm lo chuvang chuan a tlawm zawkah ka ṭang leh nge nge ṭhin.

"rawn ṭhu rawh... " tih pahin Joel chu couch ah chuan a ṭhu tum nghal bur a, hrehawm tih hmel takin a indawm kun lap bawk.
" Lily... " ka nu in Lily hming a rawn lam takah chuan kawngka lam chu ka hawi phei nghal vata, mittui tling pam chunga hamhaih taka a lo ding khawng reng lai ka va hmuh rual rual chuan hmanhmawh takin a tlan chhuak nghal daih a, ka um zui ve nghal vat bawk.
Hetiang thil hi a thleng teh thut bawk nen a awm ve tih pawh ka lo hre leh tawh lo.

"khanu khan dawt in min puh a tum anih kha " tih pahin ka pawt ding nghal chawt a, ka kut chu a lo thing thla nghal sawk bawk.
"anih Rubby house party ah khan engmah a thleng lo ani tih i chiang chiah maw? " thil thleng engmah ka hriat chhuah zawh tawh loh avangin huai takin engmah ka sawi thei lo.
" i rui lutuk a i hrechhuak zo tawh lo ani tiraw?" a hmui peh fan fan pah chuan kal nghal daih a han tum a, ka pawt ding lui leh nghat tho.
"Min lo nghak hram hram rawh engkim ka hrechhuak leh em em ang "

"Asher... heihi i mamawh tawh lo "ka purity ring bun lai chu a rawn phelh a,he zungbun hi kan inneih hma loh chu sex hmang dun lo tura kan in tiamna leh kan la thianghlim ngei ani tih entirna zungbun kan inbun tir kha ani a,ani erawh chuan tun thlengin ala bun thung.
"khanu thusawi kha i awih amaw?"
"Freddie an min hrilh vek alawm... khami zan khan i rui hle ani tih... mahse i vawi khat in na anih mai bakah i tih chhunzawm ka rin tawh loh avangin hria angin ka awm duh lo anih kha "
" mahse kan mu dun ngei ani tih finfiahna a awm lo "
" anih chuan DNA test tir rawh" Lily lehzel pawhin min rin loh avang chuan ka insum thei lo lek lek tawh.
" a ṭha e... ka test tir khawp ang " tih sap pahin in lam panin ka let phei nghal nal nal bawk.

Ngawi rengin inchhungah chuan ka lut a,keimah chauh a awm ka duh avangin ka room lam pana chhoh ka tum lai chuan ka pa in, "Asher...hetah hian rawn ṭhu teh" a tih avang chuan chunu ṭhutna ep chiah a couch ah chuan ka va ṭhu khur a, a mit ah tak chiang takin ka en ran bawk.
"hepa hi ani tih i chiang chiah a maw?" ka pa in uluk taka a zawh pawh chuan a lo bu nghat nghat zela, kei erawh in ngawi rengin a chezia leh a inchei dan vel chu ngun takin ka lo thlithlai thung.Amah han en reng reng pawh hian hmeichhe khawlo leh dawt sawi hrat hmel a pu, a thawmhnaw hak duh dan aṭang ringawt pawh hian ka mit a la hlawl lo.Leather jacket lai lang thei khawpa chhing, a kawr hak te lah chu a hnute tih lan vek atum emaw tih mai tur khawpa kawr nghawng zau leh jeans kekawr khup ṭet pheng phung hi a ha bawka chutah biker boot a bun lehnghal mahse a hmel erawh sawisel tur awmlo khawpin a ṭha thung, hetiang ang hmeichhia dukdak lo hi engti kawng zawng mahin ka mutpui thei lo hrim hrim.

"chutia Asher fa i pai takah chuan i chhungte nen pawh kan in biak rem angai dawn anih chu " ka pa hi a â ta emaw ni le, thil hrechiang miah lovin thutlukna a siam nghal ringawt le.
"ka ti tla mai ang... a pa berin a duh si loh chuan "
" nilo... tual i that tur ani lo " ka nu chuan a thusawi chu awih in alo ti nghal vata,lemchan a thiam em avang chuan za lo zet hian ka lo khi suk ringawt
"fa enkawl na tur ka nei bawk si lo...engtin nge ka tih tak ang ?"
"a rang thei ang berin chinfel kan lo tum dawn ania " ka pa lehzel pawh maw!! henu hian eng chiah nge maw a lo hrilh ni, a thlek na lam lam a an thlek dual dual ni.

"haw na tur takngial pawh pawisa ka nei tawh lo " henu hian eng nge maw a hriat le? a fa pai hmangin pawisa min dil a tum ani maw? chutiang chu ka thlen tir hauh lo ang.
"DNA test tir ka duh "ka tih chuan min ngei bawk a niang min rawn melh rum ngang mai.
" ka fa ngei ani tih finfiahna a awm loh chuan ka hmuh theih ah rawn in lan tawh suh " tih pahin ka tho hmak a, ka room ah ka chho nghal nal nal bawk.
Ka chau bawk nen khuma leh tawp pahin inchung melh chung chuan ka han inngaihtuah vang vang a, khanu kha ka hmuh tawh hnu a ang takzet mahse khawi hmunah chiah nge ka hmuh tih erawh ka hre tawh lo thung.

Thawk halh pahin Lily chu call ka han tum zet na in finfiahna ka neih phawt loh chuan a awih leh dawn chuan loh avang chuan ka phone chu khumah ka theh thal nghal tawpa,ka hmai tuai thuak thuak pahin ka tho vut a, thil hriat chhuah ka neih avangin ka room aṭang in ka tlan chhuak nghal vat bawk. Ka rin ang ngeiin chunu chu alo la awma,a ṭap der lehnghal emawni ,ka nu leh pa te lah chu mi rilru ṭha tawpkhawk leh rilru tluang lutuk an lo ni bawk nen dawt ani tih pawh hre reng mahse an thlem tho ang tih vel kha an ni a amaherawhchu saw nu sawn min bum ve hauh lo ang.

Hmanhmawh takin Freddie apartment kawngka chu ka kik nghal dawt dawt a, a muhil aniang a rawn hawn har dan ah hian mahse ka beidawn duh loh avangin a tawp a tawpah a rawn hawng ve ta nge nge a.
"eng nge maw i hriat le " meng mang lova a tih rual rual chuan inchhungah ka lut nghal vat bawk.
"i chau ve miah lo mi a? "
"Freddie... Rubby house party ah khan eng thil chiah nge thleng "
"chu thu min zawt tur ringawt chuan maw min rawn kaihthawh a "
"sawi vat mai rawh " ka thinrim em avang chuan ka vin tawh hle .

" thla hnih emaw thla thum emawni lai a liam tawh sia, Ngatinge tun a takah min rawn zawh thut a? " ka thinrim hmel a hmuh chuan aw then kharh kharh pah hian ,"kan in chawi avanga zu no nga lai i in zawh hnu khan couch a ka mutthil tir che a ,mahse i bo daih alawm "
"ngatinge chu chu a hma in min hrilh loh? "
"washroom ah i kal emaw ka ti alawm... keipawh ka lo rui ve tho bawk nen zingkar ah chiah ka harh a,nangchu khumah i lo la muhil thung "
"midang mu ve an awm em? "
" aih... " a tih chuan ka thaw nghal huai ringawt, "chuan i harh theih loh avangin ka hruai haw ta ringawt che lawm... mahse i chhungten min hmu miah lo ania "
" a ṭhat chu "
" chuan he ṭhi hi i hum tlat bawka... ka pek theihnghilh daih che lawm "tih pahin dawhkana ṭhi chu a rawn theh phei nghal vata,kan en chian nak chuan ka meng phawk nghal kawk ringawt.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:36 pm

CHAPTER-3

He ṭhi hi ka mumang a ka hmuh nen khan a inang chiah chiah mawle!! a locket hi tuikep lem anih mai bakah a fim vek avang hian a danglam bik em em a haih theih rual ani lo.
"Dude... mak tih vak tur a awm em ni, ṭhi satliah ve mai anih kha "
"khami zan khan tu emaw ka bulah an awm hrim hrim em? "
" ngatinge i party kal ve chhun chungchang pawh chu min zawh renga.... i pa in a hrechhuak em ni?"chhang lo chuan ka tho thut a,"min puih angai dawn nia " tih pahin ka tlan chhuak leh nghal nal nal bawk.
Car ah a seat hnung ngheng ar ar chung chuan ka han maimichhing vang vang a, khami zana thil thleng kha ngaihtuah chhuah tumin ka in ngaihtuah muk hle bawk.

"hreptak chuan " ka ngaihtuah chhuah zawh thlawt loh avang chuan ka thinrim in car steering chu ka han hnek leh pawp ṭhin a, khanu khan min ti luhai takzet.
A khat tawkin chu ṭhi chu ka han thlir leh vang vang ṭhin a,engvanga engmah hre tawh lo phiangsen nge maw ka nih le?
Chutia zawhna tamtak keimah ngei pawhin a ka chhan theih loh chu a chhanna zawng a ka lo inngaihtuah vung vung lai chuan thil hrechhuak niawm tak hian ka ṭhu ngil nghal zawt a, mak tih hmel taka ṭhi melh vung vung pah chuan," ka mumang kha a tak maw lo ni a " ka ti zui sap bawk, amaherawhchu a tak ngei ani tih finfiahna ka neih loh avangin hai der ka tum lui tlat tho.

Zanah ka duty angaih mai bakah chawlh hahdam ka mamawh tawh em avangin inah bawk chuan ka let leh ta nge nge a, midang in min rawn hmuh hma in room ah ka chho nghal vat bawk.
Khuma ṭhut vang vang pahin hmai hup chung chuan ka han in dawm kun lup a,ka thinrim insum tum awm ngaihna hre lo chu ka han ding leh hluai ṭhin, hetiang ang em em hian ka rilru a la hah ngai lo, a chhanchu ngaihtuah tur ka ngah em ani.Midangin min ngaihdan tur ah ka buai lo amaherawhchu Lily leh ka chhungte a bik takin ka pa ka zah mai bakah ka tih mualpho dawn em avangin chu chu ka ngaingam thlawt lo.

Ka inbual fai zawh chuan mut tumin ka han maimichhing vang vang a,mut chu sawiloh ka maimichhing apiang in kha nu hmel leh ka mumang a thil thleng kha ka ngaihtuah chhuah zel avangin ka muhil thei lo.Ka rilru lak peng tumin lehkha te ka han chhiar a, a chang leh pushup te kan ti leh rih thul, engthil pawh ti ila a sawt dawn chuang lo chuvang chuan khanu kha ka biak phawt angai ani.
Ka awm hle hle theih loh avang chuan rilru lak pen tumin keimah chauhin basketball chu ka han khel tlauh tlauh a, hah in thaw hlawp hlawp mah ila tawpsan ka tum chuang lo.

Khanu phiangsen kha ka la ngaihtuah chhuah cheu avang chuan au thler tuarh pahin ball chu ka paih nghal pawp a,chhuatah ka mu nghal thlawp bawk.
"pumpelh dan kawng zawng lovin i hmachhawn zawk tur ani dawn lawm ni? " ka pa in ka bula rawn ṭhut paha a rawn tih chuan ka lo ṭhu ve nghal vat bawk.
"ngangpawh hetianga i awm chuan khanu kha engtin nge a awm ang tih i ngaihtuah ve em? "
"ka pa... i en mai pawh khan hmeichhe dukdak lo tak ani tih i hre ve mai lo em ni"
"kei chuan hmeichhe chak tak leh tawrh chhelh tak ani ka hmuh ni"
"engmaw!! a dawi â zo tawh che anih hi... dawt in min puh a tum alawm "
"anih chuan finfiah ta che...hetia ṭhu reng lo hian " ka fiah khawp ang, dawt ani tih ka la finfiah em em ang.

__________________________________________

★ HOSPITAL★

Ward ka fan pah chuan Lily hmuh inbeisei deuh hian ka hawikual deuh renga,tun thlengin a hmel ka la hmu leh lo mahse a attendance aṭangin a rawn kal ngei ani tih erawh ka hre thung.
"hey... in anniversary chu in lawm pui bawk maw?" Kacey chuan ka bula rawn ding pahin min rawn chhaih zuk zuk a, ka mood fuh loh lai tak alo ni bawk nen ka file ken lai pek pah chuan,"lo ti zo ang che" tih hmuk pahin ka kal nghal nal nal bawk.

Doctor duty room ka luh chuan rin loh deuh in Lily alo awm hlawl mai, mahse kan inhmuh thut avang chuan mak tih hmel takin ka in en ha thung.Min hmuh rual rual chuan a lehkhabu chhiar lai chu khup in chhuah nghal daih chu a han tum a, a ban ah ka lo vuan bet nghal chawt ringawt.
"tunah chuan nilo"
"kan inbiak angai... "
"Asher....inngaihtuah na hun ka mamawh,tunah hi chuan ngaihtuahna mumal pawh ka pu thei lo " zaidam taka tih pah chuan room chu a chhuahsan nghal vata,thil engemaw tal sawi dun pui ngei ngei ka duh avangin ka umzui nghal vat bawk.

" Lily....kan inbiak angai" a kut ka man rual rual chuan mak tih hmel tak hian a ding nghal chawt a,thil hmuh a neih avangin chumi lampang chu ka han hawi chhoh nak chuan Joel leh Rachael(Joel nupui) mai bakah khanu kha kan lam pan in an rawn kal chu niin. Min rawn hmuh takah chuan an ni pawh chu an ding ve nghal chawt a, engvanga rawn kal ho nge an nih ngaihdan pawh ka nei lo.
"min lo hrethiam rawh u " tih pahin Lily chu a lo inthiar fihlim nghal vat bawk.

"henu hian eng nge hetah a rawn tih dawn? "
"DNA test tir turin kan rawn kal a...ilo awm hlauh bawka min kalpui hman angem?" Rachael chuan alo ti nghal zung zung a, Joel erawh in a lungawi lo hmel min la hmuh tun thung.
"awle... ka hrethiam e "
" in pahnih khan han in test tir rawh u..."
" mahse an pahnih chauh te chuan "Rachael chuan alo ti nghal vata
" car ah lo zuk nghak ang...kalpui an ngai lo naupang pawh an ni tawh lo"tih pahin Joel chu a kal ta daih mai, Rachael lahin a hnial ngam bawk si lova a lo bu nghat ringawt.
"Asher....i û hi chu i hriatchian kha, ihh... chuan car ah kan lo nghak ang cheu, i rawn thlah thla mai dawn nia aw... " tih pahin Rachael pawh chuan chunu nen chauh chuan min kalsan ve nghal daih anih chu!! eng nge maw an hriat ni.

" min rawn zui rawh " tih sup pahin ka kal nghal daih a, min rawn zui nge zui lo tih pawh en ka tum chuang lo. Inchung lama chhoh angaih avangin lift ah chuan ka lut nghal vata, ani pawh a rawn lut ve nghal vat bawk. Ngawi rengin kan pahnih chauh chuan in hlat deuh taka dingin kan chuang dun ran a, melh pawh kan in melh eih lo.
"hehi i ta ani em?" thil hriat chian duh ka neih avangin ṭhi chu a hma ah tak ka va khai va va a, hmanhmawh taka pawh thlak pah chuan,"Lalpa leh!! a bo emaw ka ti hman tawh asin " a tih takah chuan ka tawt nghal up up a, ka thlan tui in min leih nghal bawrh bawrh bawk.

"Engtin nge i kawl daih theih? "
" i theihnghilh a " ka duh chuan dawt ka sawi thei, mahse dawt sawi hi ka thil huat ber ani.
"thil thleng kha i hre chhuak tawh em ni? "
" aih.... tlem tlem chiah" tih hmuk pahin lift aṭang chuan ka chhuak nghal nal nal a,engvanga DNA test tir hi hreh miah lo nge maw anih le? duhlo a ṭang tlat tur ani zawk asin chubakah ka awmdan hi ka duhlo takzet a chhan chu khami zan khan kan mu dun ngeia hriatna ka nei ,mahse test result hi han chhuak phawt se kan la hria ang chu.

Kan in test tir zawh chuan a ngai te bawkin kan inzui chhuak leh hnak hnak a, hetiang anga a inchei hi chuan min zui lo hram se ka duh mahse ka thu ani si lova le.
"engtik ah nge result a chhuah ang "
" naktuk ah "
" umm... ka kal leh angai dawn ni maw? "
" keiman ka lo lam mai ang, chuan khatiang thawmhnaw kha naute tan a hlauhawm ania " eng nge maw ka sawi le,engvanga hetiang thil awihawm loh lutuk te a awih ka rin reng reng ni,mahse a inchei dan hi ka ngaimawh em ani .

" maw!! tak tak maw " a awih tak tak mawle!!
" chuan i hnar beh te hi... a ṭha lo" a awih em avang chuan lehlam hawi daih pahin a rukin ka khi suk ringawt.
" ok... ka hrethiam e " a laklawh ah lift kawngka chu a rawn in hawng a, Lily leh Kacey te pahnih rawn lut ka hmuh chuan ka mood a danglam lehnghal vek.
"hey.... nangni pahnih hi innei tawh mai rawh u " Kacey in a rawn tih chuan ka in melh ralh ringawt.Chutia ngawi renga kan din ṭhap lai chuan Kacey chuan chunu kawh pah chuan , "i hnar a thi e law?" a tih rual rual chuan ka en nghal vata,a hnar thi chu ngawi rengin alo hup chu niin.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:37 pm

CHAPTER-4

Hmanhmawh takin ka ipte a rawmawl chu phawrh chhuak in a hnar chu ka va hup nghal vata, Lily pawhin a rawmawl phawrh chhuak in rawn hruk chu alo tum ve chiah bawk a mahse ka chet hmasak zawk avang chuan min rawn melh ralh pah chuan rang takin a la let lehnghal vat bawk.
"kha hrufai rawh... "rawmawl thlah pah chuan ka han inla hrang nghal vata,Lily erawh ka hma ah dingin hma lam a melh ngar a ,a rawn hawi let leh tawh lo hrim hrim.
Chutia ngawi renga kan din ṭhap lai chuan Kacey in ,"Asher dinner i ei tawh em? " a rawn tih thut avang chuan chhang mai lo chuan Lily chu ka han en te te phawt a, "aih... " ti a ka chhan pawhin hria ang phawhin a awm duh chuang lo.

Dar10 lai a ri tawh a,nidang chu nise dar8 a ka ei loh pawhin min nawr lui ngawng ngawng ṭhin kha ani a, tunah erawh min hria ang pawhin a awm duh tawh lo.
"Lily pawhin a la ei hleinem...kan ei ho thei ang chu tiraw....? " tu a mah in chhan pawh kan tum lo, keimah chauhin ka tuar emaw ka ti a mahse ani pawh in a tuar hle anih dawn hi.A khat tawkin Lily chu ka melh leh zeuh ṭhin a, a fal a biak ka duh takzet mahse Kacey leh henu hi an awm ve tlat avangin engthil mah sawi a rem lo.

Lift inhawng lehna hmasa berah Lily leh Kacey chu an chhuak nghal daih a, kei erawh garage thleng ka thlah angaih avangin kan la chuang dun zel thung.
"i bialnu kha a thinrim hle anih dawn kha" a thusawi hre lo ang mai chuan kekawr ipte zen chungin hmalam chu ka melh ngar a, ani pawh chu a ngawi ve leh mai bawka.
Garage ah ka û car awmna lam pana kan inzui phei lai chuan bullet bike pakhat hi kan hma ah tak a rawn ding thut avang chuan chunu chu ka pawt hnung nghal dawrh a.
" min thlah rawh ka thi dawn lo..." lawm thusawi a hnekin min vin deuh hluk pah hian ka kut chu a thing thla nghal pawp ringawt,a awmdan avang chuan mak ka ti hle nghe nghe.

Chunu chu bike ah chuan a chuang nghal thak a,ngawi rengin ka en reng ringawt, dan pawh ka tum eih lo a chhanchu midang in an rawn hruai bo daih hian a thawven thlak zawk.
"mangṭha le" min rawn siai sak pah hian a rawn ti sap a, chak takin an tlan chhuak nghal vawn vawn bawk.
A awm tho e khatianga kawsak pawh kha mahse hetiang ang hmeichhia hi ka vawikhat tawnna anih avangin a awmdan apiang mai chu ka tan chuan thil thar vek ani a, a mak em em zel mai.

_____________________________________________

Ka duty zo in ka thlen meuh chuan zing 6:30 a lo ri der tawh a, rin ang ngeiin ka nu pawh alo buai leh vat vat tawh hle.Ka hmuh hreh em avangin a ruk thei ang berin ka room ah chhoh tum mah ila min hmu hman tho.
"Asher... i in tihfai hma in thil rawn ei phawt rawh "
" awle.... " tih pahin chair ah chuan ka ṭhu hnak a, ka ham zui bai bai bawk.
"ummm..... khawiah nge ka pa?"
"inhnung lampang hnim cut turin a kal ta anih kha... " tih pahin coffee a rawn chhawp nghal vata, ka bul lawka chair ah chuan a ṭhu ve nghal thak bawk.
"tun chawlhni chu i hman tawh ang tiraw....Gerrard a zin bawk si a piano tum tur an awm lova" ka ngawi reng ringawt, thil sual liantham tak ti si in engmah thleng lo ang maia lemchan chu ka theih ka in ring lo.

"ka han mu hahchawl ange "tih sap pahin ka bag chu ka khai lawk a, inchung lamah ka chho nghal nal nal bawk.Ka nu hmel ka hmuh khan a mut ṭhat loh mai bakah a rilru a hah ani tih hai rual ani lo, engmah sawi lo mahse zawhna tamtak upbeh tlat aneih mai bakah heng zawng zawng hi keimah vanga thleng vek anih avangin ka in thiam thei thlawt lo.
Ka room ka luh rual rual chuan ka bag chu khumah ka paih let nghal tawpa, ka hmai tuai thuak thuak pahin ka han thaw chhuak leh hak ṭhin a,Lily tal in min be ṭha duh se chu hetiang em em hian ka rilru a hah lo tur.

Ka room kawngka rawn in kik ri karh karh ka hriat rual chuan ka harh nghal zawka,lehkhabu ka chhiar laiin ka lo muhil chu niin ka lehkhabu chhiar lai pawh ka lo la bawm ṭai alawm.Ka chau tawngkhawng ve tawh pawh ani mahna dar2 thleng tui takin ka muhil thei nia, min rawn kaitho lo phei se chuan tui takin ka la muhil ngei ang.
Mit nuai nawk nawk pahin kawngka chu ka va hawng nghal vata, Joel hmel ka hmuh rual rual chuan ka harh nghal kawk mai.
"kha..." tih pahin file hi ka awmah a rawn nam bet nghal chawt a, "DNA test result anih kha " tih zui sap pahin a kal lehnghal nal nal bawk.

Ka room kawnga ka khar chiah tih chuan file chu dawhkan ah ka theh thla nghal tawp a, ka hawn hreh em avangin chair a ṭhu chung chuan ka en reng ringawt.
Ka chhungten result hi a hre vek tawh ngei ang mahse Joel awmdan aṭang kha chuan rin dan pawh ka nei lo, hlim hmel a pu lova thinrim hmel lah a pu bawk hek lo. A chang leh guitar ka han perhsan leh rih ṭhin a, a chang leh ka fa nise chu Joel hi khatiang khan a awm hauh lo ang tiin ka inhnem thul, pehhel dan kawng zawng char char mah ila thil dang ka tihsan tak tak theih loh mai bakah en ka hreh rual rual in ka chakna chu a tam zawk avangin a tawp a tawp ah chuan ka hawng ta nge nge a.

Result ka hmuh rual rual chuan ka tih tur chu ka hrechiang hle, 99% in alo in mil thlap avang chuan pha thei ka ni tawh lo, chiang takin Pathian dan ka bawhchhia a ka duh emaw duh lo emaw engmi pawh nise mipa takin nupui ah ka nei ngei tur ani.Tlanchhe lova hmachhawn zawk hi ka nu leh pa te min zirtir dan anih avangin ka thil tih sual chu ka hmachhawn anga hremna pawh ka hmu ngei tur ani.

Ka rilru hah lutuk tawt bawk si chu tih zia awm tumin ka tih ṭhin dan ang bawkin basketball chu keimah chauhin ka khel leh nghat nghat tawh a, hah pawh ni ila chawlh ka tum lo.
Chutia keimah chauha score tuma ka lo beih ngat ngat lai chuan ball chu Joel an min rawn laksak nghal sawk a, va chuhpui ka tum lai takin basket chhungah a vawm lut nghal zeuh bawk.
"chawl tawh rawh... " tih pahin ball chu ka lamah a rawn vawm phei pawp a, ka lo man nghal chat bawk.

Hahchawlh pahin kan pahnih chauhin court ah chuan kan ṭhu dun ran a,ni tla tur sen khui chu kan thlir vang vang bawk.
"chawlhni ah hian biakin ah puan angai dawn a..." a rawn ṭawng chhuak ta nge nge a, Joel hi chu thinchhe viau mahse ka mamawh laiin min kalsan ngai lo thung.
"ka pa chu a zak viau ang le... a fapa thil tih sual ngei a puan angai dawn si a "
"inlan i hreh chuan kal loh pawh a pawi miah lo ania "
" hahh.... ngatinge mite hian Pastor fapa kan nih avang hian fel viau turah min ngaih tlat le...mihring pangngai ve mai,midang te ang tho a thil awh leh tih chak nei ve tho kan ni a chu chu ngatinge an hriatthiam theih miah loh "



"anih tihian nun chen lo i in ti em ni? mi tamtak neih phak lo nun i nei asin, engtik lai pawha ṭawngṭai sak ṭhintu che nu leh pa i nei a, i harsatna engpawh i thlen ngamna leh engtik lai pawha ngaihthla ṭhin tu che Pathian i nei bawk a vannei i in ti zawk lo em ni? mi danglam Pathian thlan i ni tawh a chu chu i nun a i lanchhuah tir hi miten an phut mai chauh che ni"
"a fair lo alawm....ka pian a hnu lamah party na ah vawikhat chiah ka la kal a, ka vawikhat zu in na ani bawk engvangin nge hetiang hi ka chungah a thlen bik "

" a fair lo i ti maw? min han en ta che ka thil nih chak ber chu poker player ropui tak nih asin, party te leh nuam nawl te chu ka chak lutuk mahse kan pa leh ka rin na avangin ka thil tih chak ber pawh ka kalsan angai ani. Ni e,Pathian pawh hi a fair lo tih chang ka ṭhin ngei mai, nupui ka nei a kum4 hnu ah pawh fa min pek loh laiin nang ve thung chu i duh vang pawh ni hauh lovin kum24 lekah fa a pe che a nang chauh hi harsatna tawk ini hleinem"

"i thinrim takzet tiraw? "
"ka hriat tirh te kha chuan pawh sawm vek mai che kha ka duh, nangchu keimah ang lo takin thuawih, ze zawi leh zaidam tak i ni a khatiang thil a thlen hnu pawh khan hetiang thil i tih hi ka ring pha lo, mahse kan thu ani si lo alawm le... Pathian in nangnah hnangin thil tih duh a nei pawh ani mahna "
Joel nen hian kum 10 laiin kan inthlau a, ka nu in fa a neih theih an rin tawh loh hnu a piang ka nih avangin ka hmingah Asher (Hlimna) tih an phuah phah reng bawk.
Joel hi che buan buan chi leh ri leh hlut ṭhin mi a ni a, kei erawh sawi hat khawpa thuawih leh zaidam ka nih thung avangin kan in mil phian bawk.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:37 pm

CHAPTER-5

Damdawiin ah ka kal leh a hun tawh mai bakah engmah ka la ei lo bawk nen hmanhmawh takin ka nu eitur min siamsak chu ding chung chuan ka ei nghal mawlh mawlh a,ka pa choka ah a rawn lut ve chiah bawk nen ka hmu thut chu ka thil ei a tawp chiang kher mai.Ka theih chen chen ka pa pehhel ka tum avangin ka pa lakah ka biru a nih deuh ber mai chu,chumai bakah min hau a hnek in engmah hrelo ang maiin a awm bawk si a chu chuan min ti inthlahrung in min ti zak takzet bawk.Hetianga ka pa a awm avang hian a fapa sualna hi a haider sak ani lova,keimah ngei ina thutlukna siama ka sualna te chu pawm tura min duh avangin min la nghak mai chauh ani.

"i hak anga sin.... hmanhnawh lutuk suh" pa vin hlek hluk, ṭawng tam anih loh mai bakah fate thupe zut zut chi anih loh avang hian ti tura min tih tawh chu zawm ngei kan tum tlat ṭhin.
" awle... " tih pahin tui chu ka han in nghal khawlh khawlh a.
" naktuk ah a theih hram chuan rawn haw hma i tum dawn nia....kan pahnih in a chhungte hmu turin kan va kal aniang chu " a tih takah chuan ka thil ei lai ka hak lo chauh, hrilh hai hle mahila ka pa thusawi hi kan tih makmawh anih avangin ka lo bu nghat bawk.

Ka rilru hahnate leh hlauhthawnna te chuan kian lam aiin tam lam a pan cho zela,ka thil ei te leh ka thil tih engmah ka tui theih loh mai bakah ka awm mai mai te hi ka lo inngaihtuah leh vung vung zel.Naktuk lawkah khanu chhungte kha kan hmuh tawh dawn avangin Lily hmuh leh a hnena insawi fiah ka tum buai tawh lo, a chhungte pawn a hre tawh ngei ang an rilru ka ti na in zahna tamtak ka thlen avangin an ni hmuh leh chu ka thil huphurh ber leh hreh ber te zinga mi ani.

Chutia ka lo inngaihtuah vung vung lai chuan ka hnunga zanga rawn ben deuh pawp pahin Freddie chuan," Dude....khawvel tawp tur hreh lutuk ang maia ilo in ngaihtuah vung vung mai le?" thawveng lutuk tak hian a rawn ti a,a mawngah ka lo tlawh nghal zawt bawk.
"c'mon.... inti thawveng teh, tunlai hi i diklo tlat" a tih chuan ka lo khi suk ringawt, ka rilru hahna te ka tilang lo na in ka hmel aṭangin a hria pawh ani mahna.
"hmeichhia i mutpui hian an rai ngai miah lo mi?" serious deuh taka ka zawh avang chuan mak a tih hmel takzet.

" aih... damdawiin ka ei tir ṭhin alawm" ni dawn tak engtin nge an rai tehreng ang.Chubakah vawikhat sex hman hian rai na chance a sang viau lo amaherawhchu keini kha chu zan khat chauh pawh nise ka hriat chinah pawh vawi li lai kan tlingtla hman in ka hria.
"fimkhur viau rawh... " ka han ti leh ringawt a,duh vang pawh nilo a pa ka nih dawn avangin ka tawrh ang hi midang in tuar lo se ka duh .
"nanghi.... " ka kut rawn en a tum avangin ka kekawr ipte ka lo zen nghal vata, engang pawhin thukru mah ila purity ring ka bun tawh lo ani tih chu a hmu hman ta tho a.

"naktuk ah ka lehkhabu i hawh kha rawn keng ang che exam atan ka in buatsaih duh.... " thil dang ka sawi pawhin thil ṭha deuh hria niawm tak hian min rawn nuih hau ringawt.
"hey.... hahaha.... nanghi tunge? " min lawmpui zawk emaw tih mai tur hian ka dara rawn beng thak thak pah hian , " Lily chu ani lo phawt a..." a rawn la ti zui, ni e.. ka ṭhian ṭha ber ani a hetiang thil liantham lutuk hi chu zep rengin awmzia a neih loh mai bakah min puih theih ka rin tlat avangin hrilh mai hi ṭha in ka hria mahse ka sawi mai dawn a a hming pawh ka lo la hre reng reng hleinem.

" a hming ka hrelo... "
" Enga? " Freddie ang mi lerh lutuk takngial pawhin mak min ti nia mawle.
"A hming i hrelo amaw!! heti khawp hian hmeichhia ka kawp hnem tawh a an hming te chu ka hre thlap asin.... hahaha"
"dar8 a ri tawh kal tawh rawh... "
"anih Lily in a hria em? "a tih chuan ka lo bu nghat a, zawhna tamtak a nei tih hre mah ila thil sawi chhuak vak mi ka nih loh avangin heti chin hi hria se a tawk viau.
"ka hrethiam e.... hei vang hi alo nih dawn hi, nizanah pawh rooftop ah Lily alo ṭah keuh keuh ni" a ti chiah chu Lily ngaihtuahna in ka khat nghal, engkim hi keima thiamloh vek ani mahse ka tawrh belh tir thei tawh lo .

Freddie an a sawi takah chuan Lily a awm leh ringin inchungzawl ah chuan ka chho ta nge nge a, kal lo turin han in hrilh ve mawlh mawlh mah ila a ṭap ani tih ka hriat hrim hrim hi chuan ka buai vek ti ila ka sawi sual lovang.
Thawk halh pahin Lily nen a kan mut a chhuah apianga kan ṭhut na ṭhin lam chu ka pan phei zel a, ka zam in hmu tur chuan ka la inring lo takzet.
Ka rin ang ngeiin Lily chu kil khatah midang hriat hlau tak si hian a lo ṭap kerh kerh a, ka hmuh rual rual chuan ka in dang hman tawh lo nghet taka kuah pahin a chal ah ka fawp nghal vawng vawng ringawt.

" Asher... " mittui tla phang leh inhnit faih faih pah hian a rawn hawi chho a, engmah sawi lo mah ila ka rilru chuan ngaihdam ka dil nghal mawlh mawlh ringawt.
"a hrehawm emai "a aia nghetin min rawn kuah sauh sauh a,thlamuang takin a ṭap chhuak nghal hawm hawm bawk.
Duhtawka a ṭah hnu chuan khawpui phe uarh thlir reng chung chuan kan ṭhu dun ran a,ka darah a bei hle hle bawk mahse DNA result vel engmah ka la hrilh loh avangin ka rilru a nuam thei miah lo thung.
"kan DNA a lo inmil a" chhunzawm dan tur pawh ka hre tawh lo .
" ka hria lawm... i û in a rawn lam hma khan ka lo han check a " keipawh ti khawp hian min nghawng ania, ani phei chu ngaihtuah pawh ka duh lo .

"in innei ang tiraw...?" Kristian ve tho ani a, ka tih tur chu hrilh ngai lovin a hre chiang hle.
" ka hrelo.... ka pa nen naktuk ah kan kal ang "
"umm.... "a han inhnit faih a," Pathian remruat dan hi a mak tiraw?" a tih chuan ka lo bu nghat ringawt. Diktak chuan thlem a, hnem ka duh lutuk mahse fa nei mai tawh tur ka nih avangin hmeichhe dang ka hnaih a thiang tawh lo.
"duat viau ang che aw..."za lo zetin nuih suk paha a rawn tih chuan ," ka hmangai che... " tih sap pahin a tawp nan ka fawp nghal vawng vawng bawk.

____________________________________________

Karleh aṭang chuan chhun ah kan duty tawh dawn avang leh hmun hran ṭheuh ah kan duty tawh dawn avangin a inkawmngaih zualpui ho chu haw lo in lunch eiturin ka chhuak tlang nghala,mut kham lo ṭhah kan ni bawka ka pheng hlawm ngei mai.
" chaw pangngai taka ka ei lohna pawh ka hre tawh lo "Kacey chuan indawm kun ngaih pah hian a han ti sap a, a ril a ṭam tawh hi chuan nuih pawh a nui thei taah ngai lo.
"Asher.... eng nge i ei dawn? " Lily chuan a tih ṭhin dan ang bawkin a rawn ti lehnghal zar tawh a, ṭhian anga inen chhunzawm zel kan intiam tawh avangin ka lungngaihna te chu hrethawh lo ang maiin a hma ang chiah khan kan awm leh tawh.

"ka lo kal pui ang che.... " Lily thawh rual rual chuan ka tho ve nghal vata.
"damdawiin a ni tawh lo bawka, in duhtawk in han ti lang teh u "Rosie in a rawn tih chuan za lo zetin kan innnuih a, eitur order turin kan kal nghal bawk.
"hey... chhelote"
Chutia order tura kan phei chu, kan piah lawka mipa dukdak lo ho chuan Lily chu rawn chhaih in, a nui leh ham ham ṭhin a mahse Lily in a ruka insum hram hram tura min tih avang chuan hrelo ang maiin ka la awm mai mai.
"zanin ah ka rawn call ang che... i hman chuan " pakhatin faifuk paha a rawn tih leh kher takah chuan ka insum hman lo chuan chupa kawr nghawngah chuan ka ṭham nghal tawn a,a ṭhiante ho pawh chu an rawn pawr nghal hle.
" Asher... kal ang "Lily in a rawn ti nghal vat bawk.


" ṭhu vek rawh u....,Rick ngaihdam dil rawh"mipa pakhat aw thum zet mai, Joel ang rual vel mahse hmuihmul zuah deuh chhap ,a hmel en reng reng pawha insual hrat tih hriat tak an boss tih hriat takin a rawn tih takah chuan an ṭhu nghal ṭhap hlawm a, chupa bula hmeichhe ṭhu chuan ka mit a la nghal zar bawk.
"ka tihpalh ani" a rawn tih takah chuan ka thlah nghal sawk a,an rilru tak takin ngaihdam min dil lo mahse buaina ka duh loh avangin Lily chu ngawi rengin ka kai a, ka kalpui nghal nal nal bawk.
"Asher.... khanu kha tiraw? " Lily in a rawn tih chuan, "aw... " tih sup pahin ka ṭhu nghal vat bawk.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:37 pm

CHAPTER-6

Lily ka thlah zawh chuan phur lo zetin inchhungah ka lut hnak hnak a ka nu in min hmuh rual rual chuan ka bag ah lai chu min lo laksak nghal vat bawk.
"i ril a ṭam em? "
" aih... ka ei tawh "
"i pa pawh a rawn haw ṭep tawh ang.... biakin chungchang vel kha buaina a awm leh a... "
"umm.... ka hrethiam e " diktak a sawi chuan ka phur hlawl lo, khanu kha ka neih ngei ngei a ngai kher emawni le?
"lo han in ti fai la..." a tih chuan ka bu nghat a, room ah ka chho nghal hna hna bawk.

Ka pa a rawn la haw lo bawk nen khumah mu chunga guitar ka lo perh mai mai lai chuan ka nu chu ka thawmhnaw ro rawn dah fel tur chuan a rawn lut a.
" i pa in inhnuai ah a nghak tawh che nia aw..."
"umm.... " tih pahin ka perh chhunzawm lehnghal zat tho, a chhungte va hmuh vel hi thih hreh in ka hreh.
" nu.... ka neih ngei ngei a ngai kher em ni? " guitar dah pahin ka ṭhu chhuak ta nge nge a,chutia ka beidawng leh rilru hah hmel a hmuh chuan ka kut rawn hum vang vang pah hian.

"i hria em i pa hi engineer ani a company lian tak tak in sawm ṭhin mahse hnawl in he hna hlawh pawh awm manglo, engtik lai pawha mite ṭanpui inpeih reng ngai leh mite hmuhsit leh endawng hna a chelh nachhan hi i hria em? a chhanchu amah chauh a inngaihtuah theih loh vang ani " ka pa hian engineer anih thu hi vawikhat pawh ala sawi chhuah loh avangin mak ka ti takzet, keichu ni ila Pastor hna hi ka chelh hauh lo ang.
" mahse khatiang ang hmeichhia kha chu ka damchhungin ka chenpui thei lo ang "

"hmeichhe ṭha tak anih kha.... ani pawh a rilru a hah ve viau ang le nang ang bawkin " ni dawn tak, keimah chauh ka lo inngaihtuah a ani pawhin hun harsa tak a ve paltlang ngei ang, a hmel han en reng reng pawh khan kei aiin a upa lo ani tih a hriat reng ,kum naupang tea nau pai chu thil awlsam lo tak ani a chuvang chuan ka pui ngei tur ani mahse nupui han nei em tur chuan ka la inpeih lo.
" le....i pheikhawk bun la rawn chhuk thla rawh aw... " tih pahin min chhuahsan nghal bawk.

Kawng tluanin ka pa nen kan inbe lo hrim hrim, ani pawh a phur vak bik lo ani tih a hriat reng. Ni e, mahni fapa duat lai nupui atan hmeichhe dukdak lo va dil hi tupa mah an phur bik kher lo ang amaherawhchu Pa anih angin a tih tur a ti mai ani.
An in kan thlen chuan kawtah hian pa lian tak cowboy lukhum khum hian thing hi alo ek kurh kurh a, va biak buai pawh a huphurh awm takzet.
"thing liantak anih kha le? " ka pa in a tih takah chuan muang chang hian hreipui put pah hian a rawn dak chhuak a a zial zuk lai pak khuk tup pah hian ,"Coco in ah a awm lo " tih thum dut pahin a tih chhunzawm lehnghal mawlh mawlh bawk.

"Pastor Samuel ka nia.... kan inbe lawk thei angem? " ka pa chuan hawih hawm tak hian a han ti leh a, hria ang pawhin a awmlo a tih lai a tih chhunzawm char char tho.
"anih chuan sawi ta che " min rawn chhang dawn lo emaw kan tih hnuah chuan a rawn ti leh a,"buaina a tawk leh tawh em ni? " a rawn tih chhunzawm zat avang chuan henu hian buaina tamtak a tawk tawh ani tih a hriat nghal mai.
"inchhungah kan sawi ho dawn mi niang? "
"rawn lut rawh.... " tih pahin an in râm tawh zet lam chu a pan phei a, keini pawhin kan zui nghal vat bawk.

Inchhung kan lut chiah chu zu rim hi a nam nghal huam a, bungrua te lah chu a hlui in enkawl loh tih hriat zet hian a paw deuh thur bawk. Hetiang anga in enkawl mang loh leh hnawk nuai han hmuh hi chuan chhungkaw nu ber a awmlo ani tih a rin theih nghal mai.
"buaina ka duh miah lo ania.... pawisa in duh anih chuan amah in biak zawk mai a ṭha ang "ṭhut pawh kan ṭhut hma chuan alo ti nghal zung zung a, ka pa hi awm lo se chuan ka chhuah na a rei tawh ang.
"ṭhu chungin kan sawi phawt dawn mi niang " ka pa in a tih takah chuan buk nghut pah hian a ṭhu ve mai bawka, kan inhmachhawn run takah chuan a zam awm duh kher mai.

"umm.... i fanu hian ka fapa fa hi a pai hlauh mai a... chuvang chuan fa te tih fahrah ai chuan innei mai se a ṭha in kan hria a chuvang chuan i fanu hi kan rawn dil che ni... "
"Coco a rai a!! haha..... ti tla turin hrilh ula a tan chuan a awlsam zawk ang " awlsam te hian alo ti then mai.A pa ngei pawhin hetianga a tih tawh chuan hetiang anga a awm pawh hi a demawm hran love.
"i fanu hi mo atan kan duh ani....a theih hram chuan inneih na pawh hi... "
"Enteh Pastor...kei nilo in Coco hi in zawh mai a ṭha in ka hria... keichuan puih theih na cheu ka nei lo anih loh pawhin a awlsam zawngin pawisa pe mai ula in mualpho lo ani mai alawm " a rawn la ti ang deuh deuh a, hetiang mihring mahni fate pawh enga tan maha ngai lo hi ka la hmu ngai lo.

" eng nge hetah in rawn tih?" kawngka lam kan hawi phei nak chuan Coco alo ding reng chu niin.
"hei... i rai thu an rawn sawi a,keichuan ka kut ka sil e..." kan bula tih pah chuan a tho nulh a, a chhuah pahin a fanu chu a hrilh ru zeuh bawk mahse a sawi erawh kan hre ve lo thung.
" ni e....fa i pai takah chuan a rang lamin innei thei ula kan duh ani " Ka pa chuan zaidam tak hian alo ti diam a, kei erawh ṭawng ka tum hauh lo.
" pasal neih a!!....hahh, ka pai tlang in ring reng reng emaw ni le? pawisa min pe ula a tawk mai" a tih takah chuan ka sa nghal zak mai, mahse ka pa in insum tura min rawn mitmei zeuh avang chuan ka la insum hram hram ani.

"mahse Pawisa tam tham tak min pek loh chuan in thil tih hi ka au chhuah pui ang chuan miten Pastor, a fapa pawh engkawl ṭha thei lo hi an ring tawh hauh lo ang le" henu hian a fa pai hmangin min blackmail a tum amaw? chutiang chu ka thlen tir hauh lo ang.
Chutia ka pa takngial pawh a zah zawh tak loh avang chuan ka insum a ṭul tawh bikin ka hrelo. Chunu ban ah chuan ka kai lawk a, room pakhat ah ka luh pui nghal dawr dawr bawk.

"i thil sawi lai kha i hria em? " tih pahin a kut chu ka paihthla nghal sawk a,khatiang thil a sawi hnu pawha zam miah lo a min rawn la en hra ngam avang chuan he nu mi mai mai leh palzam mai mai chi ani lo tih ka hre nghal.
"anih chuan in pafa hian ka hmuh theih ah rawn in lan tawh suh u"
" Engmaw!! hahh.... nangmah hi ni lawm ni rawn kal a engkim rawn tibuai tu chu, hetiang ti leh tur si engvangin nge i rawn kal " ka tih takah chuan min en kar pahin a ngawi reng ringawt,mahse zam mai chu a tum bik hauh lo ani tih a chiang reng.

"enteh.... " A hminga han koh mai chu ka han tuma mahse Coco maw!! eng hming nge ni ngai.
"pawisa min pek chuan a fel ani mai lawm ... hmingchhiat in duh loh avangin heti lai thleng thleng in rawn kal ani lawm ni"
"awle ....a ṭha e ka hrethiam e mahse i fa that tur khawp chuan i nunrawng ka ring lo "
"ka duh duh ka ti thei"
"awle ...mahse i fa i thah hma in vawikhat chiah in ngaihtuah leh dawn nia" ngeiawm zeta tih pahin ka chhuak nghal hmak a,min ngei bawk a niang min rawn melh rum ngang mai.

Diktaka sawi chuan ani neih hi ka duh bik lo, mahse ka fa lo piang tur leh Pathian ka zah em avangin ka thil tih sual siam ṭha turin neih ka hnial lo mai zawk ani. Mahse hetiang anih takah chuan ka thaw nghal huai mai, min neih duh miau loh chuan ka pa pawhin min ti lui dawn lo tih ka hria mahse ka fa erawh engtik lai mahin a thlahthlam lo anga min thlahthlam tir bawk hek lo ang. Tunah chuan zalen takin ka awm thei tawh mahse ka thil tih sual ti zual tur erawh in ka fa hi ka tih tlak tir hauh lo ang, engtik ah mah.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)