JACOB LALRINDIKA BY Basta Tlau (Complete) 18+ Only

Ngaia
Site Admin
Posts: 25813
Joined: April 30th, 2016, 4:07 pm

Re: JACOB LALRINDIKA BY Basta Tlau (Complete)

Unread post by Ngaia » April 23rd, 2017, 2:42 pm

JACOB LALRINDIKA-19
Postby Basta Tlau » Wed Mar 08, 2017 9:56 pm
www.storyfb.com mizo story thar nitin dah ziah a ni e


Zan rei tawh taka kan in kan thlen chuan kan awmpui nu chauh chu ina lo awmin minlo buaipui a,ka pa awmdan te chu mangan tih hriat zetin a thiam ang angin a sawi zung zung a.ka taksa chu a rawl thum ni berin ka hria,ka ke lah chu a na hle mai bawk a.mahse mut hahdam chakna leh thlakhlelhna pakhatmah ka neilo.

Thingpui ina kan inthlak fel hnu chuan ka nu in"inah lo lo awm la,kei chu Damdawi inah ka va tlang nghal ange"a tih chuan ka lu thingin"ka rawn zui ve ang che"tiin ka zui chhuak ve nghal a.

Zoduh'an Damdawiin kawta motor-a min dinpui rual chuan Gate bula Ruati leh Mimi'in lo ding chu ka hmuh a.motor atanga ka chhuk min rawn hmuh chuan lo thlan phei nghal vatin ka bula an rawn ding a.

Mimi'in"Pa Duhawma chu a harh tawh.Laldik Pastor'in a sawmna che i hnar a mi a.Rinfel'in a sawi a"ka bana rawn chelh chunga a tih chuan"a van tawngthei tak,nakinah kan la sawi dawn nia,ka Pa ngaihven hmasa phawt ang u"tiin ka nu chu ka um hnak hnak a.

Ruat'in"Diki,Pa Duhawma hi nangma vanga Damlo a ni berin ka hria.a rilru i tihah thei lutuk a"zawi fiah taka a rawn tih chuan ka ke pen lai chu tawp chawta Ruati lam hawiin"i ti tak tak a mi?engvang ber nge niang le?ka tisap a.

A lu thing chunga min melh vang vang pahin"ka hre chiang bik lo.Rinfeli kha chuan i nute'in Phone atanga Pastor Jacob'an inneih puia a sawmna che i hnar tih a rawn sawi hnu lawkah nikhaw hre lovin a tlu tih a sawi a,engtinnge i lo hnar theih zawk a,a ni tluka tha mipa he khawvelah i tawng tawh kher lovang"a tisap a.

Ka thu hriat avang chuan chetsawn mai nachang hre lovin,ka melh ngai melhin ka ding tlawk tlawk a,ka pa damloh chhan hi keima vang a ni tak tak angem,enge ka tih tak ang.

Mimi'in"enge i ngaihtuah a,lokal rawh i pa chu i hmu duh lo a mi?"a rawn tih chuan ka lu thinga inherin"Pastor Jacob-a biak hmasak phawt ka duh?"tiin damdawi in bula bridge lam chu ka pan nghal a.

Ruat'in"Nichin khan Sawmzuala nen an inbia in ka hria"a tih chuan"keimah ngeiin biak ka duh alawm"ti hmakin ka kalsawn nghal a.

Jacob-a biak tuma a number vawithum ka dial hnu pawn min chhangtu awm lovin,a ring ral zel a.tun chiah biak ka tum tawh ang ti rilru in ka beng zawnah ka phone chu ka dah ran a.

"Enge ni ta?"aw thawp sap leh mutchhuah hmel zeta Jacob'an a rawn tih chuan"Jacob,khawngaihin min tanpui hram rawh,tunah hian keima vangin ka pa damdawi in khumah a awm mek a ni"ka ti nghal zung zung a.

A rawn tawng mai loh avang chuan phone a dah ta emaw tiin"Hello,hello Jacob"mangang ru zetin ka ti chul a.

"Engtia tanpui tur che in nge min duh a?ka sawmna che i hnar a ni tih i theihnghilh ta a mi?"aw chang faka tiin a thaw halh a,a rawn tawng dan leh a awki avang chuan ka tim deuh ur ur thei in ka hria,thaw halh paha ka kut lehlam chu humruh in a tawng lehzel tur hre ngam tawh lovin maimichhingin ka phone chu ka off ta ringawt a.

Ngatinge keimah inti mualpho tura ka lo biak tak kher le?midang zawng aia min tanpui thei tu awmchhun leh min puih a duh ka ring a ka tisual hle a ni.A rawn tawngdan hmang atang kha chuan min tanpui chu khawi lamah,ka biak ringawt pawh khan a lungawi loh hmel hle tawh a nih kha.

Beidawng tak chunga Damdawi in chhunga lutin ka pa hmel pawh hmu ngam lovin a awmna ward pawna thutna ah chuan nguai zetin ka thu hnawk a.

Ka nau Rinfeli chu lungawilo tih hriat zeta ka bula rawn thu thlain"U ka thin i tirim lutuk,Pastor Jacob-a nen nasa takin in mualpho dun tawh a,keini ngei pawh mi zingah kan awm tha ngam tawh lo a nih hi,inneih tura a sawmna che kha engvanga hnar nge i nih"min melh ngar chungin a ti a.

Kan thutna bula kan thiante leh laina hnaite an thut ve avang leh nurse Duty ho an vei kual ve reng avang chuan Rinfeli chu chhang duh lovin ka ngawihsan ta zawk a.

Rinfeli rawng tawng leh tur chu Sawmzual'an a lo biak tak avangin engmah sawi zui lovin,Sawmzuala bulah chuan min kalsan nghal a.

Kawngka bul atanga ka pa khuma chau zeta mu chunga a ban tawn tawn a,Intravenous fluid an khaisak mai bakah,khawl hmanga a bp,marphu,thawkdan leh a lungphu an endik reng ka hmuh chuan ka chawn tha chu rawn zawi hnawkin ka tluk mai loh nan kawngka biang chu nghet zetin ka chelh a.

Ruati chuan ka dara rawn kuahin"lokal rawh,thuphahah sawn thu rawh"tiin ka thutna ngaiah min thutpui a.

Ka thinzawn na ngawt ngawt mai chu tuar a har takzet a ni.Thleng'an min boralsan lai bawra mal tak awm nia ka inhriat lai ai khan tunah hian ka mal ngawih ngawih zawk in ka inhria.ka tana ding reng thin ka chhungte ho chuan min tuithlar zo vek tawh niin ka ngai.min ankhuma,min chhuah chhal tur bakin ka bulah an rawn kal duh tawh lo.

Ruat'in inlama haw tura min thlem ngar ngar chuan"ka duhlo,damdawi inah ka awm reng dawn"tiin ka thutna ngaiah chuan ka thu nghet tlat a.

Pangngai taka ka pa ka biak hma loh chu ka kalsawn hauh lovang,a tan enge tih theih ka neih tih zawh ka duh a,a kianga hlim taka awm ka duh a ni.

Thutphahah chuan ka lo chhing sek a ni ngei ang.Rinfel'in ka dara rawn sawi paha"Tho rawh,ka pa in Pastor nen hmuh che u a duh nia,engtin nge tun anga ila muthilh theih zawk le,Pastor Jacob-a pawh ka pa bulah a awm tawh ania"a rawn tih chuan inperh tho nghal vatin"Jacob-a a rawn kal a maw?i fiamthu a mi?Aizawl lamah a awm daih si a"tiin shawl ka sinlai chu ka bat tha a.

"Sum a awm chuan rang takin a duh duhna hmunah a thleng thei alawm,engmah sawi buai lovin va lut rawh,i sam te kha tuai mam ve la"a tih chuan khawngkhar bulah ka thleng phei nghal a.

Room kawngka ka hawn rual chuan ka pa khuma thu awn chunga mu leh a bul thutphaha Jacob-a a jacket ipte zen chunga muk raiha lo thu chu ka hmuh chuan ka thaw a tawp thei takngial dawnin ka hria,ka pa in chauh hmel zeta ka lam a rawn hawi chuan thawk la haka nui lui hram hramin khur ru der derin ka pa khum lam chu ka pan phei a.

Thilsual ti ang maiin an hmel ka en tha ngamlo,Jacob-a thut lohna lam ka pa khum sira dingin"Pa,enge i an?"ka ti chhuak sap a.

"Ka tha e,Diki i hmel hmu lovin ka kalsan hman tep che alawm le"chauh hmel zeta a rawn tih chuan mengphawk hra in"Pa,i ti anglo e mai,chutiang thu an sawi ngailo,min kalsan daih te chuan engtin nge ka awm ang"tiin a banah ka chulsak a.

Ka pa chu Jacob-a lam hawiin"min mamawh vak pawn ka lo hre tawh hleinem,Diki thudik tak min han hrilh teh,Jacod-a sawmna che kha engvanga hnial nge i nih?"maimichhing sawk chungin a ti a.

Inthlahrung deuh taka Jacob-a hmel ka en chuan a hmui chip hmakin minlo melh ngar ngar a,hawisawn nghal vata ka chil lem deuh khawlhin"a tan ka tling tawk lo em alawm"ka tisap a.

Ka pa leh Jacob-a thaw halh ri ka hriat chuan ka zam ru tak zet a ni.engthu nge ka Pa in a rawn sawi dawn tih ngaichang in chhut chu ka melh ngar ngar a.

Jacob'an"kan lova chhuak ange"tia a ding chuan ka pa chu bu nghatin"i ti lawmawm thin ngawt mai,nang nge nge"tiin Jacob-a kawngkhara a chhuak mek chu a enzui vang vang a.

Kawngka a inkhar rual chu ka Pa in"Diki,ka kiangah hian lo thu hnai teh"tiin ka banah chuan a rawn vuan a.

"Pa khawngaihin Jacob-a chungchang chu Sawi tawh lo hram ang,ka thinglung hi a tawt up up a ni"ka tih chuan nui deuh sukin"Diki,Jacob-a nen hian in induh tawn a ni tih ka hria lawm,kei hian Pastor Makpa a neih ka hnial hauhlo"a tih chuan a tawng chu lo pawt chatin"Pa,ani khan nasa takin min hua a ni"ka ti chuai raih a.

A lu thinga ka kut rawn hmerin"a hua che tih a sawi a mi?Diki ka thinglung hi nasa takin i hliam fo thin tih i hria em?hmeichhe luhlul tak i ni ka tih fo thin che a,thudik tak zawk chu Hmeichhe dawihzep leh mahni hmakhua pawh in hai kaw thiam lo i ni vang a ni"zawi fiah takin a ti a.

Ka pa thusawi avang chuan ka nghing deuh lawi ni berin ka hria,tuman dawihzep min la ti ngai lo.

Engmah sawi lova Ngawi renga ka pa chu chhuahsanin ka inngaihtuah zui ngut ngut a.

Kawngkhar bula Jacob-a hmel ka hmuh rual chuan ka bana nghet zeta rawn hmerin"min rawn zui rawh"ti hrawkin min kalpui dawr dawr a,a hnuhin min hnuk ni berin ka hria.ka chhungte ho chuan engmah sawi lovin min enzui hlawm a.

"Jacob,Ka pa kalsan ka duhlo ania,khawiah nge min hruai dawn?"ka tih chuan ka thusawi hrelo niawm takin min kal chakpui sauh a.Ka ke na pawh chu buaipui hman pawh ka ni lo.

Tukverh atanga ni eng ka hmuh chuan khua a lo var tawh ani tih ka hre chauh a.damdawi ina zan lam duty haw tur pawh kan kal pel nual mai,mihring kan kalpel apiang mai chuan maktih hmel takin min enzui dauh dauh a,hriattham si lovin an tawng sep sep bawk a.an tan chuan ennawm kan siam a ni ringawt.

Ka hmel bawrchhawr tur zia leh hmuh tlak ka awm loh zia ka hria,Jacob-a hmel erawh a tharlamin sil loha eitlak an tih ang mai a ni si a,chumai bakah a thawmhnaw inbelte chu a ta tura duan niawm takin a inhmeh em em mai lehnghal.

Quaters pakhat kawngka bula min dinpui in a kik kauh kauh a,inchhung atanga mipa pakhatin kawngka min rawn hawnsak rual chuan"Maro,min lova chhuahsan lawk teh"tiin inchhung lamah chuan min pawt lut nghal a.

Maro tia a koh pa chuan"Jacob,ka inluah atang hian min hnawhchhuah i tum a maw?i va ti mak ve,tunge i rawn hruai hi,Wow i bialnu chhelo zet mai a ni tiraw"min rawn en chunga nui vur vurin a ti a.

"Ka tawng peih vaklo ania,min chhuahsan la,i thiante inah va awm rih teh"tia a dara chelhin kawngka lamah chuan a nawr kal dawt dawt a.

Maro'an"min nem kher lo teh,ka kawm duh lai che in i rawn inlan duh ngai lova,tun ataka ka mamawh loh lai ber kher che a rawn inlan thut le,ka lakah ba i nei tih inhria reng ang che"ti nang nangin pawnah chuan a chhuak zui a.

Engmah sawi lovin room lai takah an awmdan thlirin ner nang chungin ka ding reng ringawt a.

Jacob'an kawngka chhunglama a kalh lai chuan thuphaha thu thlain"khatia kalh kher kha a ngai mi?"tiin ka ke na lai chu ka melh a.

Ka tawng hrelo niawm taka ka hmazawn thutphaha rawn thu thla in"i thusawi ang apianga awm turin min beisei suh,nangmah avangin kohhran leh Mipui tam tak hmaah kan chhungkua nasa takin kan mualpho a,chu thil chu nangmah bawkin i ti reh leh ngei tur a ni"a rawn ti hrawk a.

Makti deuh taka Jacob-a chu en in"engthu nge maw i sawi le?keima vangin engtinnge in chhungkua in mualpho tak daih theih?
a hrim hrimin kei hian engtinnge in mualphona chu ka tih reh thei ang a?"ka ti hlar a.

"Kan inneih ang,ka sawmna che ni lovin thupek a nih chu,bakah i pa pawn a makpa ka nih chuan a dam leh thuai a inbeisei a ni,a hming chauhin kan inneih dawn tihna a nih chu,chanchinbu mite leh mi hrim hrimin min sawi zui duh tawh loh hunah leh i pa a thatchhuah hunah kan inthen leh dawn nia"pangngai zetin a ti a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 23rd, 2017, 2:43 pm

JACOB LALRINDIKA-20
Postby Basta Tlau » Fri Mar 10, 2017 11:02 pm


Ka thuhriat avang chuan rang zeta dingchhuakin"Jacob,i a ta a mi?inneihna hi thildang anga ho lam taka kalpui leh palzam mai mai tur a nilo,nupui nei tawh i nih vang a mi i ngaihlut loh.,"ka tih lai mek chuan ka dara na zeta rawn hmerin"Larindik,ngawi hmak rawh,thil thleng zawng zawng hi nangma vang vek a nih hi"thinrim tih hriat taka min en chungin a ti chhur chhur a.

Hun reilote chhung lek khan hepa mizia hi engtinnge a danglam theih zawk?mipa zaidam leh dawhthei tak ni thin kha tunah chuan he khawvela mihring nunrawng ber leh pawisak engmah neilo ang mai hi a ni tawh in ka hria.Beidawng zeta hnuailam melhin"khawngaihin,hetiang zawng chuan tilo hram rawh,kawngdang ngaihtuah ang,tunah chuan ka pa awm bo san thei pawh ka ni lo,anih loh pawn ka pa bulah kan inneih tiin dawt hrilh zawk ila"ka ti khur dar dar a.

Ka dara rawn sawi deuh nawkin"i pa bum i tum a maw?chu thil chu ka tih tir hauh lovang che,ka puihna che duhin min rawn phone a,tunah pui tur che in i kiangah ka rawn kal vang vang a,hetiang mai hian min namnul chu tum duh suh"a ti hrawk a.

A thusawi tin mai chuan ka thinlung hi a ti nghing dawt dawtin ka hria,ka dar a hmerna lai chu a mu churh churh avang leh ka ke a nat thum avang chuan min vawnna atanga talchhuah tum pahin"khawngaihin thlah rawh"ka ti tuak a.

Thaw halh paha min vawnna chu thlahin"tlaiah inhualna zungbun kan en dun ang,in inah ka rawn lam ang che,tunah chuan min chhuahsan thei tawh ang"tiin kawngka chu ka chhuah theihna turin a hawng zau nghal a.

Min thlah a tum miah lo chu ka lawm letling zawk,engmah sawi lovin hmanhmawh takin pawnah chuan ka chhuak nghal a.

Damdawi in chhunga nguai zeta lutin Jacob-a awmdan mak tak mai chu ka ngaihtuah zui neuh neuh a.ka pa awmna Ward kawt ka thlen chuan ka chhungte leh Jacob'an Quaters-a min luhpuina in a mi Maroa pe an lo ding bial laih ka hmuh chuan ka ke pen tawp chawtin makti deuh takin ka en a.

Maro'an min rawn hmuh rual chuan a kuta minlo huiin"Jacob-a a rawn kal ve nange?inah mi ala awm?"a ti nghal a.

Ka lu bu nghat paha pen chhuakin an bulah ka ding a.ka nu in"in lamah va haw rawh,i Pa chu a harh tha tawh,heta i awm ve reng hian engmah i tikaw lo"a lo ti hmak a.

Maro'an"Diki,chawlh hahdam i mamawh a nih kha,i hmel chu i bialpa tan lo chuan hmuhtlak pawh a ni hleinem"a lo tih chuan thinur ru zeta melh hrawkin"i van tawngthei tak,tunge maw i nih le?ka ti hmak a.

Rinfel'in"ka Pa enkawltu ber Doctor a nih hi,lawm nachang i hrelo lutuk"a lo ti hlar a.

Ka van mawl tak,Quaters-a ka hmuh te khan Doctor a ni tih lo hriat ve mai tur a nia,hmm Quaters a awm nazawng hi Doctor an ni bik vek hleinem.inthiamlo ru angreng tak chungin Doctor Maroa chu ka chibai hnuhnawh leh ringawt a.

Doctor Maro'an"ka lo thlah haw ang che,ward ka fang zo tawh bawk a"nui vur vur chunga a tih chuan"a ngailo,taxi ka la mai ang"tiin ka pen sawn nghal a.

JACOB(POV)

Ka rilru ngaituahna hi a chaw mawlh vek tawh in ka hria.kei hian ka hmeichhe duh tak mai chu tih luihna ang reng deuhin neih ka tum chu a ni si a.kawng dang a awm thlawt lo a ni,Diki nen mi zawng zawngin inngaizawnga nupa ang hiala awmdun thin angah min ngai a,chu thil chu Pathian rawngbawltu nih chuan mualphona nasa tak a ni.ngatinge inneih puia ka sawmlai khan a la inpeih lo thu sawia min hnial kher le?engvang nge?kei hi minlo duh ve miahlo tihna a mi?min duh tak tak ni sela chuan ka sawmna kha a pawm ngei anga,hetiang teh hrep hian ka buai nuai lo tur.

Diki khan"i a zo ta mi?"min ti a mi kha?Nia,kei hi amah avangin ka a zo vek tawh,Phawngpui tlang atanga helicopter hmanga ka fapa Hruaitea nen kan haw khan,ka fapa chuan nasa taka Diki chu ngenin a tap vak vak a,a mangang thlak duh khawp mai.ka fapa hetianga a tah hi chuan ka rilru hi a buai thei thin a ni.helicopter atanga kan chhuk hnu a motor-a kan chuang hnu chuan engtin tin emaw kan inthlem bang thei ve ta hram a.

Ka nu leh Pa te nen kan in hmuh rual chuan ka Pa in"Jacob,Pastor i nihna hi voluntary Pension dilin chawlhsan la,Paradise resort hi enkawlin i rilru seng tawh rawh,mualpho tak chung chuan Pulpit hmaa Pathian thu sawi reng hi a tha lo,miten kan nihna leh dinchmun atang kan thusawi hi an ngaithla thin a ni"muang ban charhin a ti a.

A hma khan keipawn bansan chu ka tum ngei alawm,mahse Diki te nen kan zin ho atang khan bansan ka duh ta lo a nih kha.Aizawl lama ka phei nachhan dik tak chu Pastor thenkhat te nen Prayer Mountain,Pi Hangi lunglen tlanga intuaithar lehna neih kan tum vang a ni.ka pa bulah chuan bansan ka tum loh thu leh Pathian kuta innghah tlat ka tum tih hrilhin ka room lamah ka lut tlang nghal a.

Diki te khan khawilai nge an thlen tawh ang le.ka chak lohna ber pakhat chu Diki hi a ni,ngatinge hmeichhe tam takin min ngaihven laia, Diki ngawr ngawr ka buaipui chiam mai le?ka sim vat angai a ni,hmeichhia te avangin he khawvela mipa ropui ber berte pawh an tlu chhe fo thin a ni lawm ni.Kei erawh ka tluchhe mai mai tur a nilo.

Ka muhil tan dawn chiah tih a Dik'in min rawn biak hnu chuan ka rilru siam felin hmanhmawh tak leh rilru ipik taka ka bike lachhuakin ka nu hnenah chuan"Hruaitea kha i lo enkawl tha dawn nia,chanchin chu keimah ka rawn la hrilh ang che u"tiin chak zetin Lunglei lam ka pan nghal a.

Damdawi in ka thlen chuan khua pawh avar tan deuh lek lek tawh,Sawmzual'an ahma a,ICU lamah Pa Duhawma a awm thu min rawn hrilh avangin ICU lam ka pan nghal a.Thutphaha Diki chau tih hriat zet chunga a muhil hmel ka hmuh chuan Lunglei lama ka let leh hi ka tisual lo hle a ni tih ka inhrechiang khawp mai.

Amah khawih lo tura insum chunga ka kut humruh a ka kal pel chiah chu Nu Hruai'in"enge i rawn tih dawn?"nelawm loh zetin a ti a.

A awmdan atang chuan min hua a ni tih ka hria,engvanga min haw ve ngawt nge a nih ka hrelo a,ka ngaipawimawh hek lo.

"I fanu in a kianga awm turin min rawn ngen a?Pa Duhawma chu enge a an tawh"ka tih lai mek chuan Ka thianpa Doctor Marova chu kan awmna lam panin"hey,Jacob hetah enge i tih a?Pu Duhawma i rawn kan a mi?"maktih hmel taka Nu Hruaii nen min entawn chung chuan a ti a.

Nu Hruaii chu melh pahin"Aw,enge a an tawh?ka hmu thei angem?"pangngai takin ka ti a.

Nu Hruai'in"i hmuh kher angai lo,Dik'in a ko che a nih chuan a kiangah sawn va awm reng ta che"thinrim hmel taka tiin inchhung lamah min luhsan daih a.

Diki lam ka en chuan kan thawm engmah hre lovin ala muhil a ni tih ka hriat chuan ka thaw deuh huai a.

Engmah sawi lovin Nu Hruaii luhna lamah chuan ka pen a,Maro'an ka bana rawn chelhin"a nupui in hmuh tir che a duh lo kha"a tih chuan a kut thin thlak sakin"keiman ka hmuh duh alawm,ka thian a ni a,ka mit ngeiin engtin chiah nge a awm tih hmuh ka duh a ni,nakinah i inah ka rawn mu hahdam dawn nia"tiin ka lut tlang lui a.

Maro'an"Pastor i ni hi tun thleng hian ka la awih thei lo ni"a tih ri ka hriat chuan ka ner sawk a.

Pa Duhawma hmel ka hmuh rual chuan chauh tih hriat zet maia min rawn melh ve nghalin"Jacob,i lokal ve a ni maw?"a tisap a.

Nu Hruai'in"Pa a,a thusawi engmah hi ngaithla lo la,be bawk suh"tiin a pasal kutah chuan a lo chelhsak vat a.

Ngawi renga thutphaha ka thut hnu chuan Pa Duhawm'an Nu Hruaii lam hawiin"Min lova chhuahsan lawk rawh,Jacob-a hi biak lawk ka duh"aw zawi tak chungin a ti a.

Nu Hruaii chuan Rum zeta min mel hrawkin"i tihnat belh a nih chuan i chaklo khawp ang,Lalrindiki nen hian ka haw lutuk che u"tiin min chhuahsan nghal a.

Pa Duhawma chuan ka kuta rawn hmerin"Jacob,ka fanu hi hmeichhe dawizep tak leh ama tana tha tur hrelo a ni a,nawr kal tu an awm loh chuan kal dan leh pen dan pawh a thiam thin lo a ni,ka thusawi awmzia i hrethiam ang tiraw?"then sawk chungin a ti a.

"Chutiang thil chu ngaihtuah hah vak suh.Dik'in amah avanga damlo niin a sawi che a,a rilru a hah hmel khawp mai"ka tih chuan a lu thingin"zunthlum ka neih thu ka chhungte ho laka ka zep vang zawk alawm,Diki hi neih i duh anih phawt chuan keima lamah harsatna engmah a awmlo a nia,Jacob he khawvela Mipa ka hmuh tawh zingah chuan nang hi ka fapa tiam lova ka mi ngainat ber i ni"a tisap a.

Chhan ka tumlai tak chuan Rinfeli chu kawngka a rawn lutin"Pa i tha em?ka nu sawn a ngaihtuah lutuk che a"tiin ka bulah a rawn ding a.

Pa Duhawm'an"I u kha ala awm chuan rawn luhtir rawh"a tih chuan hreh hmel zetin a chhuak lehnghal a.

Pa Duhawma chu en in"engatan nge Diki chu i hmuh dawn a?"ka tih chuan"ka tanpui dawn che"a tisap a.

Pa Duhawma hi mi a leh rilru buai a ni hauhlo,engtin nge damdawi in khum atanga kei hi min tanpui a tum tih ka hrethiam hauh lo,mahse hei erawh ka hria,a makpa atan min iai lo a ni.

Kawngka a rawn inhawn rual chuan ka mit sirin ka lo melh nghal vat a,Diki ke pen tin mai chu chhinchhiahin ka rum nghut a,a ke na chu a dam chaklo hle mai,a hmel ka en chiang chuan a mit val kalh mai ka hmu nghal a,a chau a nih te chuan inah hahdam taka mut ve mai tur ania,Apa in"mahni tana tha tur pawh a hrelo"a tih kha a lo dik ngei a nih dawn hi.

Pa Duhawm'an kei leh Diki inneih tura min duh thu a sawi laia Diki hmel awmdan chuan ka thin a ti ur ru kher mai.ka insum zawh loh ka hlauh em avangin ka chhuahsan nghal vat a.

Pawna lo thu thup ho chuan min en hrek hrek hlawm a,duh leh mit kham thum chung pawn min rawn en rawh se ka pawisa hauhlo.

Diki kawngka a nguai zeta a rawn chhuak ka hmuh rual chuan a banah chelhin ka hruai hrang nghal a.hmun fal deuh hleka kan inbiak angai tih ka hria,chuti a nih loh chuan midangin min rawn hmu anga,mualpho takin min sawi zui leh ngei ang.

Ka thianpa Maroa inah hruaia kan inbiak zawh chuan chau zetin sitting room thutphahah chuan ka lua ka kut suih in ka maimichhing vang vang a.

"Lalrindik nang hian ka nundan nasa takin i tidanglam a,min hnial engang mahla,nupui atan ka nei tho tho ang che"tiin thutphah chu a hnek pawp pawp a.

Kawngka a Maroa hmel ka hmuh rual chuan makti taka min en in"hey thianpa,i bialnu nen khan in inhau a mi?tui taka in mutdun ka lo rin tehreng nen"a rawn ti nang nang a.

Thinrim zeta thochhuakin a kawr nghawngah ka tham a,"nang hi midang ang tho i ni?chiang takin ka hrilh ang che,vawikhatmah ani nen khan sex kan la hmanghauh lo a ni tih hre rawh,i bialnu te anga duh duha mutpui theih hmeichhia ni turah i ngai a mi?"ka ti hrawk a.

Ka hmaia rawn hnek pawpin"ka in a nih hi,i thinrim hrik thlak nan min hman tum suh,ka bialnu chungchang kha sawi ri leh tawh suh ang che.i mu dawn a nih chuan ka khumah va mu rawh"tiin ka kut chu a phih thla nghal a.

Ka awmdan chu a mawilo hle a ni tih ka hria,ka chauh em vang aniang ka thinchhiat em em,mihring hi kan taksa a chauh tawngkawng chuan kan ngaihtuah a tawi in,kan huat thu a chhe em em thin a ni tih ka hria,engmah sawi lovin ka pheikhawk leh kawr hlipin Marova khumah chuan ka let thla nghal a.

DIKI(POV)

Damdawi in atanga taxi hmanga ka haw chu ka taksa zawng zawng mai hi a na thum in ka hria,in ka thlen chuan bathroom-ah lutin ka insilfai a,ka underpant a thisen kai ka hmuh chuan"a van hunlo tak"ka ti hluk a.

Menstrual period hi ngatinge hmeichhia chauhin kan neih bik,mipa te hian nei ve tawh se la ka ti ngawt mai,mahse kan period hian hmeichhiate minti hmeichhia lehzual tu leh nau kan pai theih a ni tih lantirtu a ni si a,ka period dawn vang aniang,ka huat thu a chhiat em em?bathroom atanga ka chhuah hnu chuan nachhawkna mawngkua a dah chi diclofecnac suppositoris drawer-a ka dah chu la in,ka mawngah ka hnawh lut a,ti hi chuan ka taksa na leh ka luna pawh a zia deuh tawh ang ti rilru in choka lamah bawnghnute leh chhang ei turin ka phei nghal a.

Hmingmuana chu a room atanga rawn chhuakin"i lo haw na a rei tawh em?ka pa chu enge a an tawh?"tiin ka bulah a rawn thu a.

"A zia deuh tawh?reilote ka mu lawk dawn nia"tia thochhuakin ka room lamah ka let lehnghal a.Jacob-a hmel ringawt ka mit thla leh avang chuan ka in haw ru kher mai.

Engtin nge kan hmingchhiat hliah khuh nana inneih pui tura min tih theih zawk?kan inthen leh tur thu te nen lam a sawi a nih kha.kan inthen leh dawn a nih te chuan inneih lo law law ila a tha zawk mai tur,mahse ka pa khan inneih turin min duh a ni tih a sawi a,tunah chuan keimah chauh inngaihtuah lova,ka pa damlo khuma mu mek hlimna ka ngaihtuah a ngai a ni.

Kei hi tun hma kha chuan ka hun tawn ang apianga mi hlim leh a eng zawnga thil thlir ka ni thin kha a nia,tunah pawh ka inti hlim chawp thei ngei tur a ni.Jacob-a hi ka duh a ni lawm ni,kan inneih tur chu ka hnial rengna chhan tur ka hrelo,ka nih nih ka ni tawh anga ni mai,Tlai lama inhualna zungbun kan en tur thu a sawi a nih kha,ka kuttang chu en in"eng zungbun pawh bun ila pawi ka ti lo"ka tisap a.

Ka muhil lai chu kan awmpuinu in min rawn sawi harhin"Udik,Pastor Jacob'an a nghak reng tawh che a nia"a tih chuan ka khum atanga thochuakin dar zat chu ka en a,dar 5 a lo ri der tawh,ka beisei aiin ka muhil rei.ka harh deuh hawkin ka hria,mahse ka serh atang thi rawn chhuak chu a tam em a ni,a putin a put zur zur a ni ber mai.

Bathroom lama lutin ka inthlak sawk sawk a,pawnfen fual par kawr dun a ban tlawn chu ha a, pheikhawk flat dum chu bunin bag dum nen sitting room lamah ka phei a.

Jacob-a kamiz pawl dal leh kekawr dum ha a,a rem tur savun pheikhawk dum nalh zet mai induang zaih chunga thuphaha bawp khawkherh chunga a lo thu ka hmuh chuan ka sa deuh pup pupin ka hria,ka inthuam dan chu ka sit ru nghal ngawih ngawih bawk.

A bul ka thlen chuan lo dingchhuakin"i hman tawh chuan chhuak nghal ang"tiin kawngka lamah a pen nghal a.

A awmdan nelawm loh zet mai avang chuan makti takin ka din ngaia ding rengin a hnunglam chu ka thlir tlawk tlawk a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 23rd, 2017, 2:44 pm

JACOB LALRINDIKA-21

Edit
Delete post
Report this post
Warn user
Information
Quote
Share this topic on

Postby Basta Tlau » Sun Mar 12, 2017 9:44 pm
Kawngkhar zawn a thlen chuan ka zui lo tih a hriat vang nge,a mitko san ak pahin"Diki,i ke in zung a khaih mi?"min nuihzat hmel taka then suk chung chuan a rawn a.

Midang an awm leh awm loh melh kual hmasa in"Jacob,kan thil tih tur hi ka chhungte engmah ka la hrilh miah lo a nia,tun thut thuta inhualna zungbun kan lei kher angai mi?"zawi sap a ka tih chuan ka bana rawn kaiin"inhnial nan hun ka nei lo,zungbun kan en dawn,min rawn zui ringawt rawh"tiin min kaichhuak nghal a.

Ka nu leh Rinfeli te rawn haw nen kan intawh avanga min dinpui pahin"Nu Hruai zan inah Palai kan rawn tir ang"tiin min kal sawn pui lehnghal a.

Hnung lama hawi letin ka nu leh Rinfel'in ka ang phuau chunga,maktih hmel taka min enzui ka hmuh chuan Jacob'an min vawn lohna lam ka kut chu pharin"nu,nakinah engkim ka hrilh vek ang che"ka ti tawk tawk a.

Renault car sen lo inhung kawngkhar chu hawng rawk rawkin"i tawng hnem mah mah"tiin ka darah a rawn chelh a,chutia inhnaih taka kan din lai chuan kan thenawm tleirawl engtiklai pawha a kuta phone hum reng Ruata chuan"Ehe,Udik helam lo hawi lawk teh u,aw tikhan a nalh lutuk,a van fuh tehreng em,Lunglei photographer group-ah kan post teh ang"nui vur vur chungin a ti a.

Jacob'an min chelhna atanga talchhuah tumin"Ruata,khawiah mah post miah suh"vin zeta ka tih chuan Jacob'an"i chhaih kawlh mai mai,lut vat rawh"tiin min nam lut chawrh a.

"A chi loh alawm"tia Car darthlalang atanga Ruata ka en chuan a kut zungpui rawn tilangin "fuh lutuk"a rawn la ti hram a.

Motor-a kan tlanpel pah chuan"ka vel dawn chiang lutuk,naupang nghalpa" tiin ka ke na theihnghilhin ka per vak a"ouggh a na lutuk"tia ka chawn ka dawm rual chuan motor chu tidingin"i pheikhawk kha hlip vat rawh"tiin ka ke na lam chu a rawn ban nghal a.

Awi leh hetiang hian a rawn che dawn ani tih ka ring reng renglo,mangang ru zeta nemsawn tuma a lua lo khawihin"ke lawnga min awmtir i tum a mi?Jacob,awmsawn vat teh?"ka ti chul a.

Ka pheikhawk a phelh hnu chuan thu tha leh nghalin"naupangchhia ang maiin au chul thin suh,nu tling taka i awm a hun tawh"ti hrawkin a sir lamah ka pheikhawk chu ka lak theih loh nan a dah nghal a.

Ngatinge min ankhum reng mai le?nizana ka laka thinrim te chu ka hrethiam,kei ngei pawn engmah huat zuina em em ka nei tawh lova,ani Pastor zawk zawkin min la haw reng thei a maw!a piangthar tak tak lo aniang a.

"Ka duh duh danin ka awm ang,ka pheikhawk kha min rawn pe rawh"ka tih chuan melh pawh min rawn melh chhin eih lovin a lu a thing ngat a.

Hmm ke lawnga min kalpui a zah loh te chuan keipawhin zahna chhan tur pakhatmah ka nei bik lo,ka ke anat avanga pheikhawk bun hreawm ka tih nak alaia,ke lawnga awm hi nuam ka ti fe zawk.

Hmui chip hmak chunga Motor a khalh lai hmel ka en chian chuan ka thaw halh a,a khabe hmul rawn to siar siar chuan a ti langpa lehzual hle in ka hria.

Building in lian tak hmaa min dinpui in ka pheikhawk khing chu a keng tlat a,motor atanga a chhuah rual chuan rang zetin ka chhuak ve nghalin kawngkhar bulah ka ding deuh at a.

Min melh vang vang paha phun hluk chunga pen sawnin"i kalna tur kawng fimkhur takin en hmasa thin ang che"tiin gate bula door bell chu a hmet ri nghal a.

Nu thau zet mai hian nui var var chunga gate chu min rawn hawnsak pahin"Jacob,in lo thleng ta maw,hei hi ami i nupui tur i hming ang chu,Rindik,lokal rawh u kan pa pawn hmuh che u a nghakhlel tawh khawp mai,Pinky-i Lalrammuani ka nia,i duh duh danin minko dawn nia"ngainatawm zeta tiin inchhung zau takah chuan min hruai lut nghal a.

Inchhung lam kan pan lai chuan Jacob'an ka kawnga rawn kuahin"Duat an ni hi,mizorama Goldsmit lian leh changtlung ber neitu te an nih hi,Pa Sang ka rawn tibuai viau che u em aw"tia ka kawnga min la kuah reng chungin a nui suk a.

A awmdan danglam thut mai chuan min ti hamhaih lek lek,awmdan tur pawh ka hre mai lo,bakah vawikhatmah Duat tiin min la au ngailo hrim hrim,ka bengchhe ri nge ka ngaihbel pawh ka hrelo Duat a tih lai khan a aw ki a ring deuh hlekin ka hria.

Pa sanga chuan Jacoba nena min chibai in"ka lo beisei reng thin che u lawm,min rawn pan dawn lo emaw ka tia,kan nu bulah ka lo vui lek lek asin,Thiani,zungbun tha ber ber kha rawn phawrh chhuak ta che"sofa nalh zet chunga thu thla paha tiin thutna min kawh hmuh ve nghal a.

An nupa hmel hi chanchinbu leh television lamah ka hmu fo thin tlat. Nu Pinky-i chu bawm nalh tak tak rawn pawm chhuakin"in duh ber thlang rawh u,50% in kan discount sak ang che u"tiin kan hmaa dawhkan awmah chuan a rawn chhawp chhuak teuh a.

Jacob-a hmel ka en chuan a mitko rawn san akin"Duat, han thlang teh le?"tiin ka darah a rawn kuah a.

Bawm pakhat chu hawngin"hei hi ka tawk chuan a tha ni mai"tiin diamond zungbun nalh zet,en mai pawha man to tak a ni tih hriat ngawih ngawih chu ka keng va a.

Jacob'an"keiman ka lo bun tir ang che"tia zungbun chu min laksakin ka kut tangah rawlh luh a rual a.

Pa sang'an"adang kha i en chhin duh lo a mi?"a rawn tih chuan Jacob'an"hei hi a tha,kan lo la nge,engzat man nge?"a ti a.

Nu Pinky'in"in inneih huna min Sawm ve dawn a nihte chuan singkhat in ka pe mai ang che u,Ehe Jacob ngatinge i thiannu ke chu"makti hmel taka Jacob-a nen min entawn zak zakin a ti a.

"Ka bilh palh a"zawi sapa ka tih lai chuan Jacob-a chu chhuata ka pheikhawk king laa dingchhuakin"zungbun ber kan tihfel tawh chuan tih tur kan la ngah si a,kan chhuak lehnghal mai ang,pawisa chu in account-ah ka lo transfer dawn nia"tiin zungbun ka bunna lam ka banah min pawt tho a.

Pa sang'an"in va han hmanhmawh thut thut ve,Jacob hun i neih ve leh chaw rawn ei ngei ngei ang che"a tih chuan bu nghat in ka kawngah chelhin min kalpui nghal a.

A kut lum thar tharin ka kawr chhana ka taksa a tawh chu ka chhungril atang nasa takin ka danglam a ni.ka zawi deuh nghulhin ka inhria ka kawngah min chelh lo sela chuan chhuatah ka thal thuai theih ka in ring.Pa Sanga te nupa chuan Motor thleng min rawn thlahin thu eng engemaw an sawi luam hnu chuan inthlahin kan tlansan a.

Jacob'an"zungbun kha i kut atang la chhuak tawh suh ang che"thupe aw zeta a rawn tih chuan melh rum hrawkin"i nupui tur ka nih hi khatin thu min pe reng suh,thinrim rei ropui si"tiin ka inkuangkuah than a.

Min rawn en paha nui ri huk in"mak reuh lutuk mai"a ti ngat a.

"Enge ka mak na,i mak fe zawk"amah enchunga vin deuh hlara ka tih chu motor chu a tiding chawt a,ka inrin loh em avang chuan hmalama bu dawrhin"i van han..."ka tih lai tak chuan ka lamah rawn awn phei nghalin"ka mak a maw!"a ti hrawk a.

Min rawn hnaihchhil em avanga leh chiang fahrana min en kur avang chuan zam ru zetin tukverh lama ka awn phei ruai ruai a,Ka kuta lo indang pah chunga ka aw thian khakin"Jacob,min ti hlau a nia"ka ti tuak a.

A kut lehlama ka tukkhum rawn chelhin alamah min pawt hnai hrawk a,hlauthawng taka a hmel ka en rual chuan rawn kun hnaiin duhthaw zetin min rawn fawp a.

Nemsawn tuma a awm a ka khawih lai tak chuan a rum deuh nghutin min fawh dan chu thlakin a kut chuan ka hnungah leh ka nghawnga chul riak riakin fawh let phut zetin min fawp zui nghawng nghawng a.

Jacob-a hmui hi chu ka tan chuan dawi bur pakhat ang mai hi a ni in ka hria,min fawh apiangin ka bul hnai leh ka kianga thil awmte hi ka theihnghilh ve ziah lehnghal,rum hak paha min fawhna ka chhang let hnu lawk chuan a hmui lasawna ka nghawng a thaw thaw halh halhin"Diki,i taksa peng tin mai hi chini ai pawn a thlum zawk"tiin a thaw halh halh a.

Tawng tuma ka an zuai lai chuan ka hmuia a kut sei tha tak rawn tuai in"inhnial fo thin mah ila kan in inhip tawn si anih hi tiraw"tiin driver seat lamah chuan a thu tha nghal a.

Ka kut hum ruha tukverh lam hawiin"min hruai haw tawh rawh"ka tisap a.

"Pastor Biaka kan hmuh dun zawhah damdawi in lamah i pa kan hmu leh phawt dawn nia"tiin motor chu a khalhchhuak lehnghal a.

"Pastor Biaka te inah chuan enge ka rawn kal ve kher a ngaih na?i ui ang maia zui kual tur che in min duh a mi?"ka tih chuan min rawn melh zauh pahin"i tawngkam hi chu a kha ve thin ngawt mai,Pastor Biak'an hmuh che a duh alawm,bakah ka nupui turin i zir viau chuan Pastor hna hi ka bansan in ka bansan lo thei bawk"thu tak zetin a ti a.

Phawk fe a Jacob-a en in"i ti tak tak em?"ka ti ha a.

A lu bu nghata hmalam en in"tak tak e,vawin chawhma khan keima vanga hotu liante thukhawmin min rawn bia a,nang nena inneih kan tum thu ka hrilh a,ka hmalam hun chu nangmahah a innghat hle a ni"rilru hah hmel taka thawchhuak halh chungin a ti a.

A kut va khawihsak zeuhin"mi tha tak chu nilo mah ila,Pathian rawng i bawlna kawngah hi chuan ka thei tawpin puih ve che ka duh a ni"ka tisap a.

Nui lui sak paha min rawn enin"kan thleng tep,i sam kha tuai man ve deuh la,chuan zungbun kha a pawimawh bawk nia"a tih chuan ner deuh sawkin ka bag a darthlalang chu ka phawrh a.

Min van lo tuai thur hman em em ve,ka hmui hnawih pawh a reh vek alawm,hetiang anga hmel da bul chuan tumah ka hmachhawn thei lovang,ka sam chu thuai thain,ka hmuiah lipstick ka hnawih a,compact powder ka hmaia ka tah lai chuan Jacob'an"ngatinge hmeichhe ho hi in hmai inchei chiam zel le?"a ti hluk a.

"Duh ang taka incheite chuan mahni inrintawkna kan neih phah alawm,lo ngawi mai mai rawh"ka tiin darthlalang ah ka inthlek kual a.

Motor a tih din rual chuan"tikhan i nalh tawh mah mah,chhuak ang le?tiin a thutna atang chuan inthazo tih hriat takin a chhuak a.ka pheikhawk chu min pek ka rin tawh tehreng nen seat hnunglamah a theh lut leh daih a.

Ka thutna lam kawngka min rawn hawnsakin "kan hotute thuchhuak hi Pathian thuchhuak angah kan ngai tur a ni,engpawh thleng se kan tuar thiam tur a ni"tiin kan hmaa in lam chu min pan pui a.

Kawngka a kik laite chuan ka lo zamru ve em em ringawt,Jacob-a hmel ka en chuan hmui chip hmakin a hmazawna kawngka chu a melh ngawt ngawt a.

Hmeichhe pakhat la upa vaklo tih hriat tak mai hian kawngka chu min rawn hawnin inchhunga pindan pakhatah chuan hruai lut nghal a.

Pastor Biaka hmel ka hmuh chuan dilchhut hmel takin alam kan pan lai chuan a tarmit kar atang min lo en reng a.

Jacob'an"Pu Biak,i dam tha maw?"tia a kut a phar chuan rawn chibai in"dam tha a ni mai,Jacob nangma vang hian rilru hah takin ka awm reng a ni tih i hria em?chanchinbu leh Internet lamah in chungchang eng emaw Pastor tih atana mawilo tak tak an tilang fo a,hei nichin deuh lawka in thalak niawm tak te hi en rawh u"tiin a phone hlai tha tak chu kan hmazawnah a rawn lek kang a,thalaka a lanah chuan infawh tumte pawh kan ang lek lek in ka hria.

Ruata thla min laksak kha a ni maw!Pastor Biaka chu en in"heite chu kan in atanga kan rawn chhuak tur kan thenawm naupangin minlo laksak a nih hi,Pu Biak, Jacob'an tih sual engmah a neilo"ka ti ngat a.

Pu Biaka chuan thutna min kawh hmuh paha"han thu phawt teh u"a tih chuan Jacob'an ngawi renga a kianga min pawt thu in a kekawr ipte a zen nghal a.

Pastor Biak'an"nangnin tihsual in neilo tih chu ka hria,Mahse Jacob berampu kan nih angin kan beramte entawn tlakin kan khawsa tur a ni,kan beram ven te hian kan thinlung chhungril an hmu thei lo va,chuvangin Pawn lama kan lanchhuah dan hi a pawimawh a ni"a ti dap dap a.

Jacob-a chu a lu bu nghat nghatin"ka Pu khan a thurochhiahah min ziak lang lo sela chuan tunang hian ka awm miah lovang,he khawvel hausakna hi chu min tibuaitu mai an ni"a tisap a.

Pu Biak'an"tunlaiah sum leh pai tel lovin Pathian rawng pawh kan bawl hlei thei tawh hleinem,Jacob i larna hi in eiral tir mai lo la,Pathianin nasa zawka a rawng i bawl theihna tura a ruahman sak che pawh a ni mai thei"tia min rawn enin"Diki,i thianpa hian eng harsatna pawh tawk se alamah i tang tlat ang tiraw?"a rawn ti a.

Ka lu bu nghatin"aw"ka tisap a.

Pu Biak'an"Pastor te hi chu kan hmingchhe hma bik riau zel a nia,nupa in nih hma hi chuan inzui vaklo ula ka duh,bakah hmeichhia leh mipa induhtawn te hian hmun fal leh hun remchang an ngah lutuk hi chu a tha lo"tiin a nui vur vur a.

Jacob'an"Diki pa damdawi in khumah a mu mek a,min mamawh alawm"thu tak fe a a tih chuan ang phuau in ka lo en a.

Kan mamawh a maw!hepa tak hi chu aw...Pastor Biaka chuan pheikhawk ka bun lohna lam ka ke chu rawn thlekin"i ke chu i tina a ni maw?Jacob rawn puak luh law law tur che lawm"a tisap a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 23rd, 2017, 2:45 pm

JACOB LALRINDIKA-22
Postby Basta Tlau » Tue Mar 14, 2017 11:33 pm


Pastor Biaka nupui in thingpui rawn chawi lut chunga"Jacob,hei hi mi i thiannu Diki an tih chu?i va hmeltha ve,lo inchibai ila"tiin kan hma dawhkanah kan thingpui intur min chhawp sak nghal a.

Ka kut phar chhuaka ka chibai chuan"Nu Ram tiin min ko dawn nia,khawi maw in kiangah kan lo thu ve lawk teh ang"tiin ka bulah chuan nui hak hak pahin a rawn thu thla a.

Nu Rami inchei dan ka en chuan Pastor nupui ni awmlo tak a ni in ka hria,a hmai leh sam vel a chei uluk dan atang chuan nu taima tak a ni tih hai rual a ni lo.

Nu Ram'in"Pastor nupui nih hi chu e mi rel kan phur ngun thei malh malh khawp asin.Jacob,Diki hi i hmangaih a nih chuan, Pastor hna thawk lovin sumdawnna lam khawih daih zawk rawh,mi tam tak i hnuaiah hna thawk thei turin i ruai anga,chuthil chu i Pathian rawngbawlna tha tak a ni,hna neilote hna i neih tir dawn tihna a nih chu,Pathian ram zau nan tawngka aiin a thawh lamah ramtang tawh zawk rawh u"a ti tehchiam a.

Pastor Biak'an"my Dear,a mak thei e mai.khatiangin i duh anga awm tir lo tum ziah thin suh"a nupui duh hmel taka melh chungin a rawn ti a.

Jacob'an"ka nu leh pate pawn chutianga awm tur chuan min duh ve tho alawm"pangngai zeta a rawn tih chuan a hmel ka en nghal a.

A ngaihna ka hrelo tak zet a ni.Nu Rami thusawi ka ngaihtuah let chuan a dikna lai chen chu a awm ve tho,mahse keia lo sawi ve tur engmah a awm lo.

Pastor Biaka te in atanga kan chhuah dawn chuan Nu Ram'in chapal pakhat chu rawn lain"ka chapal hi bun rawh,nidangah min pe leh dawn nia,khatia kelawnga awm kha chu a zahthlaka,miin an hre thup tawh si che u a.kan lan mawina hi kan kawppuite hmingthatna ani tih hriat reng tur"tiin ka ke bulah a dah thla nghal a.

Ka duhlo tia hnar ka tum lek lek a,mahse Pastor Biak'an"Diki bun mai rawh,kan nu hian a thil neih hi midang a hawh tir khat khawp a nia"a rawn tih chuan inthlahrung ru taka lawmthu hrilh chungin ka pheikhawk bunlai hlipin ka inthawlh a.

motor-a ngawi renga kan thut dun hnu chuan Jacob'an"Pastor hna hi ka bansan dawn nge?la thawk zawm zel turin min duh?"a rawn ti a.

"Ka hrelo,nangma thu thu a lawm,thil tihna reng rengah a tha lam a nih a,chhungten min tuipuina a nih chuan a tha vek,chhungkaw inremlo tak chunga Pathian rawngbawl chu buaithlakna chen a awm thin"tiin ka rilru put dan dik tak chu ka sawichhuak a.

"i sawi dik khawp mai,kei phei chu fa buaipui ngai nei ka ni a,ka chhungte hian min tawiawm tha viau lo sela chuan thusawi tur pawn ka chhuak hlei thei hauh lovang.engpawh nisela kan hma hun chu Pathianah innghat phawt mai ang,i pa in kan pahnih hian minlo nghakhlel hle tawh ang,special room lamah an sawn tawh ni"tiin damdawi compound chungah chuan a tlan lut nghal a.

Motor atanga kan chhuk chu khua a thim tan lek lek tawh,gate lam pana kan kal lai chuan"damlo kan hun a ni tawh si lova,engtin nge kan tih dawn"ka tisap a.

"Maro'an a lo sawi fel turah ka ngai"tiin gate bulah min dinpui a,gate keeper'in"lokal rawh u,ka lo ngaichang reng che u lawm"min rawn en chunga a tih chuan Jacob'an lawmthu hrilhin min kai lut nghal a,damdawi dawr leh nepnawi dawr chunga lo awm ten min rawn enzui a ni tih ka hria.

Jacob'an"mihring te hian nihna leh dinhmun hi kan ngaipawimawh khawp mai,Maroa te ang hi ni ve ila chuan mi tumahin min sawi zui in,min thlir zui duh hauh lovang"step min panpui lai chuan a ti hluk a.

Tunah chuan mitin deuh thaw in an ngaihven hle a ni tih ka hre tawh,amah an ngaihven na lamah kei ngei pawh ka duh loh dan takin miin min ngaihven tel te hial tawh chu a ni a.hengthil zawng zawng hi kan inneih hunah a tawp ngei ka beisei a ni.

Ka ke la nat deuh avangin ka duh ang pawn ka kal chak thei lo.Jacob'an"nangmah inhremin pheikhawk tawt zet bun lo la chuan i ke kha dam hial tawh tur a nia sin,lokal teh ka lo pua ang che"tia ka ban a rawn chelh chuan te deuh thatin"ka duh lo,keimahin kal thei"ka lo ti hlar a.

Step-a min kal pel tawh ten ding meuh in min enzui hlawm a,engtinnge ka inpuak tir theih teh lul ang,zahna ata zah lehzualna tawn ka duh teuh lo.

Ka pen leh tur chiah chu ka dara rawn kuahin"harsatna nei reng chunga,midangin an thlir dan che buaipui a,i tluar tlawk tlawk a nih chuan i harsatna chu sut kian a hnekin a zual tawlh tawlh ang"tiin ka hnungah lamah min kuai a,chumipah chuan ka kaihza tawn tawnah a kut lehlampang chuan hnehsawh zetin a chelh nghal a.

Min rawn entu te tawng ri hluk ka hriat chuan talchhuah tumna chi a ni lo tih ka hria,ka zak lutuk chu Jacob-a dara ka hmai phumin ka maimichhing ta ringawt a,a perfume rim pa hrak mai chu ka hip lut vang vang a.a rimtui tak zet a ni.

Jacob'an"keimah avanga harsatna i tawh zawng zawng hi engtik hunah emaw ka rul leh ang che,meng tawh rawh,khatia i maimichhing reng chuan miin damdawi hmangin ka ti muhil che emaw an ti palh ang"chhuata min dahthlak paha a tih chuan pei deuh khat khatin ka tawlh sawn vat a.

In van sual thiam thei tak e aw,engtin nge nang hi Pastor i nih tak."ka tih lai chuan ka hmazawna kawngka chu a rawn inhawngin Hmingmuan'an"u in lo van lang har em em ve,ka pa in a lam tawh che u nia,inhnuaiah coffee ka la lawk dawn,lova lut rawh u"tiin inhnuai lamah a chhuk thla nghal a.

Jacob-a nen inchhunga inzui lutin ka pa khum bula thutna awmah chuan ka thu nghal a,ka pa ban ka khawisak lai chuan ka kuta zungbun ka bun chu lo hmu vatin"eng zungbun nge a?"a tisap a.

Jacob-a lam hawiin"kan inhualna zungbun a nih hi,Pa damtha vat vat rawh aw"ka tih chuan a bu nghut a.

Jacob'an"Pa Duhawm,Ka Pa Lawma(Thlenga pa)te in inlamah an leng dawn a,damdawi inah i awm tho na in,Diki nen hian kan hmanhmawh tawh si a,a pawi viau ngem?"a rawn tih chuan phawk fahranin Jacob-a chu ka melh kawk a.

Thlenga pa ber kher palai turin a tia maw!chutah kan hmanhmawh tiin dawt thu ala sawi zui,a ti lutuk mah mah a ni.

Ka pa in"nangni ber in hmanhmawh si te chuan a pawi hleinem.Diki i nu khan a lo thinrim khum viau ang tih ka hlauh avangin,i nutei te nupa pawh ka chah thla nia"chauh hmel taka a tih chuan a dara kuahin"Pa hahdam takin awm phawt rawh,thildang engmah ngaihtuah lovin muthilh tum zawk rawh"ka ti vat a.

"Hlim taka ka fate in awm hian ka hahdam ber alawm.Bawihi,kei chu hei Doctor ten tha takin min enkawl tawh a.in inneih hma chu naktuk atang chuan school lampang ngaihven zawk rawh aw,mahse harsatna i neih chuan ka ti lui hranpa hauh lo che nia"a ti raih a.

"Tehreng mai,zing leh tlaiah ka rawn kan ziah ang che"ka tih chuan ka Pa in"in pahnih in inkawmna hun in nei vak rih dawn lo nih chu"a lo vat a.

Jacob'an"Pathian in rem a tih te chuan hun kan la ngah alawm"a lo ti nghal a.

Hmingmuana rawn let a reilote kan thu hnu chuan ka pa mangtha in kan chhuahsan ta a.

Motor chhunga Jacob-a rawn thut luh ve rual chuan"engvanga Thlenga pa Palai a rawn kal tir kher nge i nih,bakah ka Pa dawt i la hrilh zui.ka Pa hi bum mai mai theih niin i ngai mi?"ka ti hmuk a.

Motor stearing hnehsawh zeta herh kual paha min rawn melh zauh in"engvanga thinrimna tur zawng lui phet nge i nih ka hre hauh lo.ka Pa Lawma lo tunge ka rawn tirh chuan ang,kan chhungkhat hnaite a ni miau si a,i pa hi vawikhat mah bum tumna thinglung ka la pu ngailo hrim hrim ani tih hre rawh"a ti ngat a.

A sama va kek pawpin"dawtheipa,ka pa hi i bum chiang lutuk,chuti nilo sela chuan nang nena inneih tur hian min ti hauh lovang,ka englai ber hi nge i duh chu ni a?"ka tih chuan motor chu tiding hrawkin a sam ka kehna kut chu a phih thla lawp a.chumi paha chuan a lamah min pawt phei dawrh a.

Ka hnunga nghet zeta kuahin"i va kawlh reuh ve a,hmeichhe kutthlak ching enkawl dan ka thiam loh i ring a mi?tuna i thil tih avang khan ngaihdam min dil rawh"thinrim hmel taka tiin a aia nghet lehzualin min kuah bet tlat a.

Ka hnungzang ruhte chu a tliak thei takngial dawnin ka hria.ka awmdan rem lo zet chu ka tan insiamrem ngaihna a awm thlawt lo.

Mittui tling kiau chunga Jacob-a hmel ka en chuan phun deuh hlukin min chelh behna chu a thlah a,min thlah rual chuan zawimuanga thu tha in ka thaw halh a.

A rawmawl var thianghlim zet mai chu a kekawr ipte atanga rawn phawrh chhuakin"i mittui kha hru hul rawh,ngatinge hmeichhe ho hi mittui in va han ngah bik em em ve"tia ka hmazawna a rawn lek chuan ka lo vai kiang thuai a.

"khatiang ka duh lo,i hri tha lo ka kai palh ang"ka tih chuan rang zeta ka lu a rawn chelh betin a lam hawiin min kuai her lawp a,a rawmawl hmang chuan ka mittui a hru nghal bawk a.

Thalchhuah tum engang mah ila,thahrui hmang chuan ka hneh thawt lo tih ka hria,chuvang in min tih dan ang anga maimichhinga awm tawp hi ka tan a tha ber.A tirah chuan dimlo fahranin a hruk tawk tawk a.

Reilote hnu ah dimte a rawn hru in ka mit lehlam chu a rawn lum ham ham a,ka mit chauh nilo ka taksa pum a rawn lumchhuah a ni,ka mengchhuah rual chuan Jacob-a nen hnai fahranin ka in en ran a.

Ka lungphu chu a tawp thei takngial dawn,"i thinrim hmel hian min hip tlat"rawn ti thum chhapin ka hmuiah tak chuan a fawp vang vang a.

A hmui thil tih theina hi ka tan chuan en liam a,dawh mai mai theih a ni ve lo ni,thaw halh paha min fawhna ka chhan let hnu chuan a thaw halh paha a hmui lasawnin a nui suk a.

Ka chil lem ri khawlh chunga mengchhuaka a hmel en ka tum chuan ka hnara rawn piai zeuhin"a hun leh a hmun kan hriat a ngai tlat,tunah chuan in in lamah ka thlah haw rih phawt ang che"tiin a thu ngil nghal a.

Min fawhna zunzam avang chuan ka taksa chu ala mur sung sung bakah,ka hrawk chu hnawhtu awm ang maiin a phui tlat bawk a,hepa hi chu ngaiah ka nei thei dawn lo anih hi,Jacob-a hmel ka en chuan ka thik ngawih ngawih,engtinge awlsam taka a awmdan a thlak zung zung theih theih thin le.

Kan in zawn kawngpuia min dinpui a motor kawngka ka chelh rual chuan"naktuk zingah Aizawl lamah ka phei dawn,Goa lamah pawh ka zin angai mai thei"pangngai zeta a rawn tih chuan"engmaw i sawi?"phawk hrain ka ti a.

A thawng ka hrelo a ni lo,a thu rawn sawi chu mak ka ti teh thut em a ni.

Mitmeng muk raih chunga min enpahin a koki chu car stearing a ngatin"i beng a chhet tan tawh ni ngei ang,ka zin tur thu ka sawi nih chu,chhuak tawh rawh,inleng in neih dawn kha"a ti ngut a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 23rd, 2017, 2:46 pm

JACOB LALRINDIKA-23
Postby Basta Tlau » Wed Mar 15, 2017 10:29 pm

Thinrim deuh taka Jacob-a chu melh hrawkin"Pangngai takin min hrilh tha ve mai thei lo a mi?i duh duhna hmunah zin bo daih la ni mai lawm,sual leh lutuk mai"ti hlarin motor atang chuan ka chhuk thla a,motor kawngkhar chu ka theih tawpa nain ka khar ri thuai zui nghal bawk a.

Jacob'an"Huat thu ho leh lutuk mai"phun hluk chunga a rawn tih chuan a hmel en a,hawilet duh hauh lovin kan in lamah hmanhmawh takin ka chho hmawk hmawk a.

Inchhunga ka pen luh rual chuan ka nu chu ka hmazawna thinrim tih hriat zeta meng ling hlarin"Lalrindik ka room-ah min rawn zui rawh,zahpui awm leh lutuk"tiin ka banah min pawt dawr dawr nghal a.

Sitting room thutphaha ka nutei te nupa in angaihna hriat loh hmel taka min lo en ka hmuh chuan ka bangbo tak zet a ni.

Ka nu in an room chhunga min luhpui rual chuan chhung lamah kawngka chu a kalh zui nghal a,ka samah rawn tham pawpin"nang ang fanu ka lo hring che hi ka tisual takzet a ni.Jacob-a engvanga la duh talh nge i nih a?nula pangngai i ni a,Vawikhat Pasal i neih ve na turah Pathlawi fa enkawl nei lai hi neih i duh a mi?inngaihtuah chiang rawh,a hausa in sum a ngah pawh a ni thei mahse chung ro sum tih vel ai chuan hmingthatna hi a pawimawh zawk,Jacob-a hian a hmangaih tak tak che pawh ka ringlo,hetiang khawp hian amah vangin i mualpho nia,a fapa buaipuitu tur atan bak a duh hauh lovang che,Mipa ho hi chuan an rilru put dan ang lo taka an hmel leh chetzia lanchhuahtir dan an thiam a nia"ka dara min sawi nawk nawk chung leh rilru hah hmel takin a ti a.

Tun ang reng renga ka nu thinrim leh rilru hah hmel hi ka la hmu ngailo,ka pa in Jacob-a nen inneih tura min duh viau laiin ka nu chuan a duh ve si lova,awmdan tur ber pawh ka hre lo a ni.

Khuma ka nu thu hmel chu en in"Nu,Pastor Jacob-a hi min duhpui lo a mi?ngatinge?"ka tisap a.

Ka nu chuan ka mitah tak min rawn en vang vangin"a ni hian natna,hreawmna leh zahna bak a thlen lovang che,engtin nge khawlaiah te hian in la vahchhuah ngam le?I pa lah hian Pastor Jacob-a hi a ngaina ropui mai si a.Phawngpui tlang atanga i ke a na tih hre reng chunga a hawsan daih dan atang che khan a ngaihtuah loh zia che ka hria ni"tiin khum bula tui inchawp chu a in nghal khawlh khawlh a.

Room kawngka pawn lama an rawn kik ri ka hriat rual chuan Rinfel'in"in leng kan nei nia,lochhuak tawh rawh u"a ti lang lang a.

Ka nu in"ka lova chhuak hmasa ang,intifai la bawnghnute leh chhang tal ei luih i tum dawn nia.Jacob-a nei lo la duh a ni,mahse engthilah mah ka nawr lui lovang che.i duhthlan naah a innghat ania.Nula pangngai tak tan chuan Pathlawi aia tha mipa dang an tam a nia"thaw halh paha tiin kawngkhar chu hawngin a chhuak zui nghal a.

Ka nu rilru puthmang chu ka hriatthiam pui khawp mai.ka Pa nen pawn he thil avang hian an inhnial ngei ka ring,chuti nilo sela chuan ka nu hi nileng zankhua deuh thaw in ka pa kiangah a awm ngei ang.

A tlangpui in kan nu te hi chuan fate hreawm taka min awmtir an zuam lo a,kan Pate erawh chuan kan hmalam hun tur thlirin faten engang pawn hreawmna tawk mahse an vui duh ngai lova,hreawmna kan tawh te hi min tichaktu leh hlimna min neih tirtu ala ni thei ni.

Pastor Jacob-a hi Pathlawi anih vang ngawtin ka iai hauh lo,ka hlauhthawn ber zawk chu a awmdan phung danglam thut thut thin hi a ni.

Ka room lamah luta ka intihfai hnu chuan Rinfel'in"U inlengte nangman thingpui va lumsak rawh,Pa Lawmawma te an rawn kal nia,Pastor Jacob-a hian ka pa damloh a hre ve reng si a,ngatinge zanin thut thuta Palai a rawn tirh le.U nang ni hi in lo chesual dun tawh a ni lo maw?"ka bula rawn thu thla chungin a ti hluai a.

Rinfeli chu melh deuh hrawkin"a teuhlo mai,engtin nge chutiang thu chu i sawi ngam zawk a"ka ti vin hlar a.

"In inzui nasa em alawm,bakah Zanin inkhawm naah kan Pastor aiawhin midang an rawn dah tih kohhran secretary'an a puang a,ka thinte ho in phone atang a chhan min rawn zawt nasa lutuk,chhan ngaihna pawh ka hrelo"a tisap a.

Ka sam chu khuih tha mawlh mawlh pahin"keipawn engmah ka hre bik lo,i sawia ka hre ve chiah,Sawmzuala hi a hman hunah lo len tir rawh aw,biak ka duh nia"dingchhuak paha ka tih chuan"Office lamah an buai thei lutuk,va chhuak tawh rawh,engatan nge i tih hrim hrim a?"pangngai takin a ti a.

"Ka be duh ni mai,i inti thu lutuk"tiin ka chhuak zui nghal a.

Sitting room lama ka chhuak phei chu Ka pate Ruat'an ka nu bula thutna awl min kawh hmuh pahin"Diki lo thu ve teh,hei nangmah beisei in Pu Lawmawma te thiandun an rawn leng a,engtin nge kan tih dawn?"a ti a.

Ka Patea chu melh zauhin"in tih dan ang ang kha a tha ni mai"ka tisap a.

Ka nu in"nangma duhthlan na kha lawm pawimawh ber,i duh leh duh loh sawi ta che?"aw zawi fiah takin a rawn ti a.

Ka nu kuta inthlahrung ru taka chelh saka"Nu ka duh law"ka tisap chuan ka nu chu maimichhingin a thaw halh a.

Nute'in"Diki thingpui tui takin va lum ta che"kan boruak tih zangkhai tum tih hriat zeta a rawn tih chuan choka lam panin muangchangin ka phei a.

Pa Lawm'an an kianga ka thut chhung zawng khan min en char char a ni tih ka hria,ka awm a nuam chiah lo hle lehnghal.Thlenga boral hnu atang khan an inah vawi hnih thum vel bak ka lang leh ta lo kha nia.Thlenga thlan lamah erawh Jacob-a te pafa nen kan kal fo thin.

An haw dawn a Pa Lawm'an"i hman hunah kan in lamah lo leng rawh aw,kan nu pawn a ngai thin khawp mai che nia"a tih chuan ka bu nghat a.

Ka room-a luta ka phone ka on rual chuan Ruati number ka hmetchhuak a.

"Aw enge ni ta?Pastor Jacob-a hi ngatinge a hun hma a,a aiawhtu tur an rawn dah a?"a rawn ti nghal a.

"Ka hrelo,zan inah Palai a rawn tir a,inrinni ah mimi te nen Baby home lamah naupang ho bual hman turin han chho ila"ka tih chuan rawn au chulin"awi leh thiannu ka lawmpui lutuk che,engtik hunah nge in inneih dawn?"a rawn ti chul a.

"Kan la sawi fel rihlo,midang tumah hrilh rih suh aw"ka tisap a.

"Awle awle,mimi kan hrilh ve nghal nge,e taka kar leh zirtawp atang kan kohhran thalai in sport kan neih dawn kha,Badmintion leh volley ball-ah i tel ve dawn nia,i tan chuan a tawpna tur ani dawn sia tel ve ngei ngei ang che"tiin phone chu a dahzui nghal a.

Mu tura khum ka siam lai chuan phone call ka dawn avangin ka en vat a.Jacob-a number a ni tih ka hriat chuan thaw halh chungin ka pick up a.

"I va pick up rang ve,Diki kan inbiak lohna a rei ta hle mai,kei hian ka thlahthlam mai mai che i ring a mi?"midang aw in a rawn tih chuan hlauhthawn na a khat in"tunge i nih,ngatinge Jacob-a number atanga min rawn biak?"ka ti a.

Lehlam atanga rawn nui uar uarin"kei hi min hrelo a maw?Henry-a,nang hi ka ta i nih hma loh chuan ka awm mai mai hauh lovang.Jacob-a chu ngaituah suh,Sawmzuala nen ka nau ten an infiam mek.in inbulah khan Nissan car hring a awm a,khatah khan lo chuang rawh,i rawn kal lo anih chuan engthil chiah nge ka tih dawn ka hre bik hauh lo,i chhungte leh i thianten an hre tur a nilo"aw hlauhawm taka a rawn tih chuan ka khur dar dar a.

Phone chu dahin ka room atang ka tlanchhuak nghal a,ring taka"Nu,Pa,Rinfel lochhuak teh u"ka tih chuan hlauhthawn hmel taka min en chungin ka bulah an rawn ding khawm laih a.

Pate Ruat'an"Diki engthil nge thleng?ngatinge khatia i au chiam a?"ka dara vuan chunga a tih chuan"Henry'an,Jacob-a phone number atang min rawn bia a,Sawmzuala hming pawh alam,an bula kal turin min ti ani"ka ti ruai a.

Rinfel'in"Darkar chanve liamta khan usawmzual'an,Pastor Jacob-a nen inhmuh an tum thu min hrilh alawm"a rawn tih chuan ka lu thinga tukverha dakin"car-ah khuan chuang a,midang tumah hrilh loh turin min ti a,ka hlauthawng em a ni,ka kal vat a ngai nia"ka tisap a.

Ka nu in"tun ang zan reiah i hriat loh bulah kal i tum a maw?a tul lo lutuk"a rawn tih chuan"Nu,zan hun hi lawm misual te an chet thin,ka kal dawn tho tho,Henry-a hi misual leh tenawm tak a ni,a duh ang chu ka thlen tir bik dawn lo hrim hrim"thinrim taka tiin kawngka lam ka pan nghal a.

Pate Ruat'an ka bana rawn chelhin"in hnungah a rukin ka rawn zui ang che,hlauthawng suh"a tih chuan ka bu nghat a.

Ka nu in"Lalrindiki hi chuan minti mangang tak zet a ni,Ruata keipawh i rual chuan ka lokal ve ang"a ti a.

Motor bul ka thlen chuan mipa pathum vel hi motor bula lo ding ka hmu nghal a,an kianga khur ru deuh dar dar chunga ka thlen chuan mipa pakhat hian thinrim hmel taka ka bana lo man bet nghalin"i va rei em em ve,khawi maw i phone kha lo teh"tiin ka kuta phone chu a pawt thla thuai a,chumi rual chuan car hnungah min nam lut chawrh a.

Zu rim chu an nam hauhlo,mahse an awmdan atang chuan ruih an nei a ni tih ka hria.ka sir tawn tawnah mipa pahnih an rawn thut car chu chak zetin a tlanchhuak nghal a.

Ka veilama mi chuan hnai zeta min rawn enin"unaupa in a lo atchilh viau che pawh hi a mak hran love,luhlul chhuah hauh suh ang,nangma vang hian sum kan seng hnem tawk tawh"tiin ka hmai bulah a rawn thaw huam huam a.

Motor khalh tupa in"khatin lo beisei ve vak suh,nangte chuan i duh duh a,thinphar tur Burma nula i kawl kha,Henry bu tuta thin i tirim nge"a rawn tih chuan riat nawk nawkin a thu tha nghal a.

Ka chesawn ngam lo,ka kut thlan dap mai chu humruhin ka maimichhing a,ka rilru in"Lalpa khawngaih takin min tanpui hram rawh,Jacob-a chungah thil tha lo thlen tir lul suh"ka ti mawlh mawlh a.

Motor a din deuh hrawk rual chuan mengchhuakin ka hawikual a,kan dinna lai chu a thim chhah mup avangin khawi hmunah nge kan awm tih engmah ka hre thei lo.

Ka dinglama miin"Nula thuawih tak khan lo chhuak rawh le"a rawn tih chuan hreh ru zetin ka penchhuak a.

Ka hma deuh fe a,eng te tak te lo awmna lam chu ka sir tawn tawnah leh ka hnunglama min veng chungin min pan pui a.

Ka tawngtai zawh atang khan mak tak maiin ka hlauh rukna a kiang duakin ka hria.

Ka hnunga miin"nangnu hi i rui ve te ni lo maw,engtin nge Pastor nen khan in inngaihzawn theih zawk a?"a rawn tih chuan engtinmah chhang lovin ka ner sawk a.

Eng awmna bula kan thlen chuan in lian tawk tak la sak zawh loh a ni tih ka hre nghal a.Inchhung lama kan pen luh rual chuan Jacob-a leh sawmzuala chair-a an mit tuam chunga an kut hnunglama an suih saka thu leh a hmui thi deuh hnuang ka hmuh chuan ka ke pen laitawp chawtin"Jacob"ka ti tuak a.

Jacob-a chu rawn thu ngil deuh zawtin"Diki,engvanga rawn kal..."a tih lai tak chuan a bula vaipa lian zet ding chuan a thutna chair chawpa chhuata tlawh thal thuai in"chup karo"ti chhur chhurin zu bottle a ken lai chu a in pawp a.

Jacob-a chu a rum chhin eih lo.a tluk dan atang chuan a na hle dawn a ni tih ka hria,ka thinrim lutuk chu pawisak ka nei tawh lo.Mizo kristian inti ve si te hian vaiho nen tangkawpin Jacob-a leh Sawmzuala an lo sawisa a maw!

Te that chunga an lam pana ka tlanphei tur chu ka hmazawnah tak Henry-a chu lo dingin"Bawihte i rawn thleng ta maw?zanin chu nidang zawng ai ka hmu tha zual sauh che"tiin a kut a rawn phar a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 23rd, 2017, 2:47 pm

JACOB LALRINDIKA-24
Postby Basta Tlau » Thu Mar 16, 2017 8:53 pm

Malsawmzual'an"Henry i kut hmawr khan Diki kha tawk hlek suh ang che"ring zeta a rawn tih chuan vaipa dang pakhatin a hmaiah a lo hnek chawrh a.

Henry'an mitmeng sen rum leh pawisak neilo tih hriat zet chunga min rawn kuah chuan a banah ka theih tawpa na in ka lo seh sak vak a.

Ka sam na zeta min phih dak awrh a,chumi rual chuan mipa pakhatin ka kut chu hnunglamah min phuar behsak nghal bawk a.Henry-a chu a ban ka senna lai tuai paha ka hmui bul chetah a rawn thaw huam huamin"i kawlh reuh hle mai,mahse ka ngaidam ang che,a chhan chu zanin atang hian keima ta chauh i ni tawh dawn ni"tiin a darah chuan min pu lawp a.

Jacob'an"Henry,ani kha thlah rawh,chutilo chu i tan a pawi zawk ang"thupe aw zeta a rawn tih chuan ka ke leng vak vak lai chu tawpin Jacob-a te lam chu ka hawi nghal a.

Henry-a pawh chu ding in "nang pa khan min rawn vau a maw"tia chhuata min nghat thla chawrhin Jacob-a te awmna lamah chuan a phei nghal a,a kekawr hnung ipte atang pistol a phawrh chhuak ka hmuh chuan a hmet per hreh dawn lo tih a mitmeng leh awmdan atang chuan ka hria.

Ka theih tawpa chakin Jacob-a te awmna lamah chuan ka tlanphei vak a,ka banbul veilam thip zawk ka hriat ka hriat rual chuan ka nu aw in"Diki"a rawn ti vak ri ka hre nghal a.

Ka ban na ka tih em avang chuan ka taksa pum pui chu a zawi deuh nghulh a,ka beng ri hriat te pawh chu a ri chur chur ni maiin ka hria,ka mit chu vai ruaiin ka lu a hai mup mup bawk a.

Jacob'an"Diki min kalsan thei lovang"a tih ri chu ka thil hriat hnuhnung ber a ni.

*
*
*
JACOB(POV)

Silai hmet puak ri leh Diki na tuar rum ri ka hriat chuan ka thinlung hi Diki ka chan ang tih hlauhthawn nain a khat nghal.

Ka thutna chair chawp nena thinrim taka dingchhuakin chair chuan ka bula mi pakhat chu ka hem thlu pawp a.chet leh ka tum chiah chu mipa pakhatin"Jacob,keimah i Pa Ruata,Police hruai in kan rawn kal"a tih chuan"ka mit tuamna hi lo phelh vat vat rawh"ka ti hrawk a.

Chhuata Diki ban thi nuai chunga a Nu in a lo kuah ka hmuh chuan rang taka a bula thu thla in"Diki min kalsan thei lovang"tiin ka au vak a.

Henry'an"hlim tak chuan in awm thei bik lovang,jail-ah tang mah ila,ka pa in min bail chhuak lehnghal dawn tih hre rawh"a rawn tih chuan reh chawn chawn ka duh tak zet a ni.

Police pa in"i va zak love,Pate hmachhawpa nung mai mai ho hian kan ram inti bawlhhlawh"tiin a nawr kal zawt zawt a.

Ka kamiz kawr ban pawtthler kawkin Diki ban Henry'an a kah hliamna lai chu thi a chhuak nasa lutuk tur vengin a tuam phui sak a.

Sawmzual'an"Damdawi in lamah a rang lamin kalpui ang u,ka thianpa ortho doctor Civil mi kan phone lawk nge,serkawn Hospital a hnai zawk a,pan mai ang u"a tih chuan Diki chu dim takin ka pawmkang a.

Diki nuin"nangma vang vek a nih hi,min kalsan a nih vaih chuan ka ngaidam hauh lovang che"a rawn tih chuan ka rum nghut a.

Diki hian min kalsan a nih vaih chuan keipawh ka damchhungin ka inngaidam tawh hauh lovang.

Damdawi in lam pana Motor chhunga kan chuan chhung zawng chuan Diki hmel dang lap mai chu en ngawih ngawihin ka rum leh kawk thin a.Ka chawmawlh vek ni berin ka hria.

Henry-a leh a thianten Min man tirh lai pawh khan ka rilruin Pathian hnenah Diki chungah engmah thlentir lo turin ka tawngtai mawlh mawlh a,mahse hei tunah ka tawngtai min chhanna chu Dik'in hliam tuarin nikhaw hre lovin a awm mek a nih hi,Lalpa remruat dan hi ka van hrethiam lo teh lul em.

Rinfel'in,Sawmzuala bulah"enge zan zana inhmuh intum kher a,ka pa Damdawi ina a awm mek laiin ka u pawh alo heti ve leh si a"lungawilo hmel taka a tih chuan Sawmzuala chu ka lam rawn hawi zauhin"Min ankhum reng lo teh,ka chauh zia chu a,Henrya ten kut min thlak laia Jacob'an engtinmah ti let ve lo tur leh rilru tawngtaina nei reng tura min ti kha ka inchhir deuh rum rum alawm,an ni rui mai mai keia tan hneh loh nachan tur a awmlo hrim hrim"a ti nang nang a.

Mihring ruih nei ho hi mi pangngai tak leh he khawvel harh fima hmachhawn ngam lo te a ni tlangpui a,chung mite chu khin let ka duh ngailo hrim hrim.Diki hi an tina dawn ani tih lo hre lawk ila chuan a tirh te atang khan ka sual let tur a nia.

Damdawi Theater chunga Diki bana Silai mu tang an phawrhchhuah chhung zawng chuan theater kawtah ka vei kual sek a.midangin thu hahdam tur leh intifai tura min tih pawh chu ngaihsak lovin ka rum nghut zel a.

Ka ni(Thlenga nu)Rinpui'in shawl min rawn sin tira,tui bottle intur min pe pahin"Bawiha,mi an tam si,hetiang hian awm suh,i nu leh pate pawh naktuk zingah helicopter hmangin an rawn phei dawn.lokal rawh inah awm hahdam lawk rawh"tia ka bana a chelh chuan a kut thin thlak sakin"Diki a tha tih ka hriat hma loh chuan khawiah mah ka kalsawn dawn lo hrim hrim"ka ti hmuk a.

Damdawi in leh a chhehvelah chuan zanlai ani tih pawh hriat loh vin mihring an pungkhawm nasa em em a,Police ho chuan damdawi in chhunga mi nawlpui rawn lut tur lo dang lui lo sela chuan Damdawi ina damlo awmho hi tun ai an phili nasa zual dawn a ni tih ka hria.

Henry-a leh a thiante chetdan hian mitin mai chu a thawng ka ti dawn nge?Henry-a paMinister hlui hausa ve tak a nih vang zawk nge,kei leh Diki inkar thil hriat an duh vang zawk pawh ka hre ber lo.

Nurse nu pakhatin"ka pu,Cabin lamah kan dah dawn ania,ward pangngaia awm chi a nilo"a rawn tih chuan ka bu nghat a.

Theater atanga Diki an rawn nawr chhuah rual a, Doctor pa in"a vanneih khawp mai,a ruh engmah a khawih pawi lovin ka hria,kan chiu mu a,darkar ruk vel chu a muhil hrim hrim ang"a rawn tih chuan ka thaw deuh halh a.

Diki khum bula a hmel dang bel mai thlira ka thut laia rawn riak nawk nawkin ka hming a rawn lam a,a harh emaw tia a kut chelha"Diki i tha em?"ka ti chuan a nu in"a tawngvai nih kha,zahthlak thei tak tak ni"a rawn ti hluk a.

Maimichhinga thaw halhin Diki chalhah chuan a chulsak a.a khum bulah chuan darkar 5 vel zet chu ka thu tawh,ka nu leh pate pawh Ka fapa Hruaitea hruai in an rawn thleng tawh a,ka nu in ka kawr thlakna tur a rawn ken chu lain damdawi in toiletah intifai in ka inthlak nghal a.

Keimah vangin Diki hi thi chhawngin a awm a,khawiah mah kalsan ka tum hauh lo.Doctor,nurse,ka chhungte leh thiante bakah Diki chhungte ngei pawn inlama haw turin min ti nasa,tunah chuan kalsan ka tum lohzia hria in ka mamawh ang thil chu ka chhungten min rawn ken sak ta zawk a ni.

Toilet atanga ka chhuak chu Nu Hruai'in"aw bawihte i bula hi ka awm,na i nei em?"a tih ri ka hriat chuan a bulah hmanhmawh takin ka thleng phei ve nghal a.

Dik'in chauh hmel zeta min rawn en pahin"nu ka zung duh"a rawn tisap a.

Nu Hruai'in"nurse duty ho kha va ko vat rawh,keini chuan kan ti khawlo palh ang"a tih chuan hmanhmawh takin ka tlanchhuak nghal a.

Kawngkhar bula Police uniform ha in"khawnge i kal dawn?"a rawn tih chuan"nurse ka ko dawn tiin nurse pakhat kan lam pana rawn kal chu thil awmzia hrilhin Diki awmna room-ah ka luh tir a.

Police pa bawk chuan"mamawh in neih chuan min hriattir tawh dawn nia,i pa in nangmahni veng tur che in min ruai a"a tih chuan bu ngatin inchhunga luh tumin kawngkhar ka hawng a.

Nu Hruai'in"lo lut rih mah ta che,hmeichhe zun laiin mipa an awm ve reng ngailo"vin hlara a rawn tih chuan rang zeta kawngka kharin pawn kawngkhar bulah chuan ka ding ran a.

Police pa chu lo nui kur kur in"va che hit lo ve"a lo ti a.

Then suk chunga amah chu enin"Henry-a leh a thiante kha tunah khawi hmunah nge an awm?"ka ti a.

"Thana lamah an la awm,mipui in an sawisak hrep loh nan police in an ven a ngai zawk ni"a tih chuan bu nghatin"nakinah ka rawn let leh ang"tiin Thana lam pan tumin damdawi in chu ka chhuahsan a.

DIKI(POV)

Damdawi inah chuan ni thum zen zawn ka awm tawh,ka ban na tih mai loh chu na dang engmah ka neih loh avangin khuma awm chawt ziah mai chu ka hne tawh tak zet a ni.

Ka pa pawh damdawi in atanga chhuak tawh in vawi hnih min rawn kan tawh,Rinfeli leh Sawmzual'an sawrkar chawlh anih vangin min rawn awmpui a.ka inbual zo ka sam Rinfel'in min khuihsak a,khum bul dawhkanah chuan Sawmzuala chu laptop enin a thu ve bawk a.

Rinfel'in"U,Pastor Jacob-a hi ka rin ang a ni lo reng reng,Pastor dangte chu nise hetiang hian an awm miah lovang.midang in an sawi dan tur pawh ngaihsak miah lovin,a hun awlah a rawn awmpui chawt zel che nia.ka nu lah hian engemaw hlekah a vin leh vak zel.ka khawngaih deuh tlat in inneih hun pawh ka pa in thla leh ni 17 ah a ruat a"a ti sep sep a.

Sawmzual'an"inneih vat vat rawh u,keini pawh kan hmanhmawh tawh nia"nui chunga a rawn tih chuan Rinfel'in a lei chhuah khum zauhin" fiamthu lo thawh reng suh,nangmahni vang nih hi ka u hetianga a awm"a lo ti hlar a.

Sawmzuala chu a beng pawta ngaihdam rawn dilin"ka tihpalh mahse,Henry-a leh a thianten jail bang an zut phah tho lawm.Bakah hmangaih ber tuar aia tuar sak chu a dan adang deuh lawm.Jacob-a hmalak nain Henry-a pa pawh an man tawh ni,Minister anih laia a eirukna zawng zawng kha an lip se vek a.Pathian in hetiang thil tih tir aduh vang niang Pastor a nihna atanga a ban,Pastor la ni sela chuan heng thil zawng zawng hi atan tih a rem dawn si lova"thu tak fe in a rawn ti a.

Jacob-a hi ama tawkah a hah hle a ni tih ka hria,nimin atang khan ala rawn inlan leh miah lo.Nurse leh Doctor duty ka awmna room-a rawn lut apiang mai chuan Jacob-a nen kan chungchang min zawt ve ziah hlawm lehnghal,chhan vak ngaihna ka hriat loh avangin ka nui liam mai mai zel a.

Sawmzuala chu en in"Hruaitea hi tunah tu bulah nge a awm ang le?"ka tisap a.

"Thlenga nu ten an awmpui in ka hria,Jacob'an a tihbuai che a hlau a,a rawn hruai tha ngamlo niang,e taka Jacob'an a ngaihsak zia che hi i hria em?"a rawn tih chuan ka melh ha a.

Rinfel'in"a ngaihsak ve loh bawk ten,an inneih dawn lawm"a lo tih chuan Sawmzual'an"chutiang a nilo,Henry-a leh a thianten min rawn man thut laia mipa pakhat hnek ka tum khan ka kuta lo man betin,engtinmah ti let suh,an rui in ka hria,i rilru khan Diki chungah engmah an thlen tir loh nan tawngtai zawk rawh,a tia lawm duh chu ni ila ka khawih let ve thei reng alawm,Jacob-a ka zah vang khan engmah ka tilo mai mai lawm"a rawn ti ngat a.

Jacob-a chu miin amah zawk an tihbuai lai pawn ama tantawngtai lovin ka tan a tawngtai zawk a maw!Sawmzuala thil sawi chuan ka thinlung a ti nghing deuh lawih in ka hria.

Physiotherapist Doctor hmeichhia chu rawn lutin"i va changkang sawt ve.i ban chu engtiangin nge i tih chet theih dan lo en leh ila"nuisang chunga tiin ka ban na lam chu zawi muanga min phar tir in a tikual a.chutiang chuan nikhatah vawi thum reilote in min tih tir ziah thin a ni.

Doctor in min chhuahsan hnu chuan khuma thu in Sawmzual'an God not dead tih flim a en chu Rinfeli nen ka ve a.

Mutchhuakin ka taksa a rawn zem avang chuan ham bai baia lukhama ka lu nghatin ka maimichhing a.

Ka hmai za mer mer avang chuan ka meng kawk a,Jacob-a ka sira mu chunga hnai zeta min lo en a,ka biang a chul a ni tih ka hriat chuan thaw deuh kawkin khum atang chuan thawhchhuah tumin"min ti hlau alawm"ka tisap a.

"Ka nupui tur hmeltha tak mai hian min hlau a maw!a va buaithlak dawn ve"nui suk chunga tiin ka kawngah a rawn vuan a.

Ka taksa za chuai chuai mai leh ami uapna nasa tak avang chuan awm ngaihna ka hre lo,engtia rei nge ka kianga a lo mut ve le?

Ka chala rawn fawp zeuhin"hahdam rawh,maimichhing la han thaw kawk teh le"zawi sapa a rawn tih chuan a sawi dan ang chuan ka ti a.

Ka la hahdam thei chuang lo,ka mengchhuah chuan amah zawk chu rum nghutin a maimichhing a.

A hmelpa tak mai chu ka en reng a,Pathian hian engtin nge Jacob-a ang hi a siam theih zawk le,a chal arh lam lek lek te,a hnar ngul sang vak mai te,a hmui sexy tak mai te chu hmeichhe tam tak tan buaipui tham a ni reng a ni,a hmel mai bakah a taksa lian leh thahrui ngah tih hriat ngawih ngawih te chu mipa tam takin an awt ru hle ang tih ka hria,ka pasal tur chu a ni ngei si a.hmeichhe vanneih nge vanduai ka ni dawn tih ka hre lo.

Maimichhing reng chunga ka kawnga rawn hmer nghet salhin"i comment dawn em?"thawp sapa a tih chuan lai ru zetin"i meng dere a ni maw?engthil nge comment ngai?"tiin ka thlesawn nghal a.

"Ka hmel i zir chiang kha,i duh ang a ni em?hmeichhe thenkhat chuan phone atang an dream boy ka nih thu min rawn thawn fo asin"pangngai takin a rawn ti a.

Ka rilru na nghal ringawt mai chu ka duh lo tak zet a ni.kei hian thikna thinglung tunah hian ka nei a maw!"hmeichhe tan chuan i tha em alawm,Jacob awmsawn tawh teh,mi in min rawn hmu palh ang"tia ka ke hmanga ka tlawh chuan a mal lian leh sek tha zet mai chuan min rawn kherh bet nghalin"nangpawh mipa tam takin an atchilh che a nih hi,chung zingah chuan Henry-a nen min chhiar tel thei ang"ti deuh hrawkin ka hmuiah a rawn fawp vang vang a.

Maimichhinga rum halh paha fawp letin ka ban na lo lam chuan a hnungah ka kuah a,duhthaw zet leh riltam hmel taka kan infawh nghawng nghawng lai chuan ka kawrhak chhana ka hnute khawh lah mai chu rawn tham nawkin a hmui chu a lasawn a,chumi rual chuan khum atanga min hlat turin a thochhuak zui bawk a.

Mitmeng de sar sar chunga a ngaihna hrelo taka Jacob-a ka en chuan chhuata ding chunga a sam tuai puatin"hetiang ngawt chuan ka awm reng thei lovang,damtha vat vat teh"ti hlukin toilet chhungah chuan a lut a,kawngka a khar rual chuan tui herh haw ri ka hre zui nghal zat bawk a.

Khuma mu reng chung chuan ka puan sin chu ka nghawng lama pawt chho in ka thaw halh halh a.Jacob-a kha a pangngai lo tih ka hriat tluk zetin kei pawh hi ka pangngai bik lo a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)