PASALTHA THANSANGLUAIA 5

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Sangtea Renthlei
Posts: 13
Joined: July 25th, 2020, 12:02 pm

PASALTHA THANSANGLUAIA 5

Unread post by Sangtea Renthlei » July 26th, 2020, 12:26 pm

Bawnga chuan " Khawi nge, nuapang thang duang hma ah zawng tawn beh ang chut a nghetin ka han ding teh ang , kei Bawngkhaia hi ka zam hlei lawng nge " tiin amah lah chu a nui hawk hawk a. A pian hmang han en reng reng chuan thahrui han nei hmel pu mawlh hek lo le.
Luaia nen chuan inhmatawnin an han ding ren rawn a, Bawnga chuan " Kha aw , Luaite, ka han chawi kang luai luai teh ang che " tiin an puanvenah chuan an han in man chat a, Val upa Hranga'n " Khai le " a tih rual rual chuan Bawngkuaia chu ar awp chawi ang dawrh dawrh Luaia chuan a chawi kang ta lawp lawp mai a, tlangval ho nuih za chu pum dawm meuh a lo nui eu ual ual chungin an haw haw luih luih a, Val Upa Hranga meuh pawh a insum zo meuh lo a ni ang , bawp beng meuhin a nui kik vun vun a.
A thawh hnihna ah pawh Bawngkuaia chu Luaia chuan a chawi kan leh tak vu vu avangin Bawngkuaia chu nui khi var var chungin a inthiar fihlim ta a.

Zawlbuk thawm athat em avang chuan zawlbuk hnaih vel a awm naupang ho chu zawlbuk bawhbelah chuan an rawn dak lut fur a, Bawngkuaia che vel chu an lo nui iar iar hlawm a.
Val Upa Hranga chuan an khaw tlangval zing a san tha ber leh tha hrui ngah ber a a rin Awrha chu a bek bawk sup a, Awrha pawh phur fe in a rawn ding chhuak zui nghal a, Luaia pawh lo inring ve leh phan tawh in , Bawkkuaia a hneh avanga mahni inrintawkna nei deuh ran chungin Pumrua ah pawh intiat tawk tak an nih avangin Awrha chu a huphurh vak bik lem lo.
"khai le" tia val upa Hranga a rawn au that rual deuh thaw chuan Luaia chu a kang nghal vaw vaw mai a, chuti teh thut a Awrha'n a han chawikang ta mai chu mak a ti ang reng viau a, a thawhhnihna ah pawh chuan Luaia bawk chu a kang vaw vaw a, Awrha chuan Val upa Hranga'n a bek bawr angin dim ru deuh tak chung chuan Luaia chu a hnunglamah a han vawrh dawrh mai a, Luaia chu zawlbuk chhuatah chuan a tla thum dup a, a mawng a sawhna chu a khal talh talh leh nghal a. Tlangval ho chu an lo haw haw leh hluah hluah a, chutiang hlim thawm chuan Khawthar an kai hnu ah khua a fan vawikhatna ani bawk a, Lal in a thukhawchang sawi pah a zu zuk mek , lal leh upate pawh awm hmunah an lo nui var var hlawm a.



Val upa Hranga chuan " Khai le, kan rawlthar chu a tlawm ta e, i duhtawk ang u hmiang " a rawn ti a, inbuan chu an duhtawk ta a.
Tlangval ho te lengi run lawi tur a an chhuah diak hnu chuan Luaia leh Hranga leh pa tar lam thiamhnang khawih pahnih khat chauh chu zawlbuk luah lumtu an ni ta a.
Val upa Hranga chuan " Luaia lokal teh , thil ka lo hrilh teh ang che " tiin Luaia chu a bul a thu turin a han hui a, Luaia a lo thutphei hnu chuan " inbuan hi thahrui ngah leh ngah lohah innghat viau mahse rilru leh ngaihtuahna sen thiam ngai tak mai a ni a, ke chheh he tlen tlun emaw , kak hial hual emaw a din loh tur a ni. Ke sai he deuhin kan tumpui turte ke pen loh zawngin ke dah tur a ni a, chu chuan i tumpui chet lak lo nawr let turin a pui dawn che a ni. Tin tan hmun siam reng rengin i dar kha i tumpui a hniam zawk a dah tur ani chu chuan i tumpui chawi kang turin nasa takina pui che ang a, tin vawrh emaw bin dawn phei chuan hniam leh zual a i kun ang a, chumi rual chuan i tumpui chu hnung lam hawi a, mahni taksa rinchhan a chawi liam tur ani " tiin thahrui a neih ang hu a tang thiam lo Thansangluaia chu inbuan dan kalphung chu a hrilh mawlh mawlh.
Nun danphung pangngai , pa uapna hnuai a seilian lo ta fam chuan zirtur a ngah dawn khawp mai. Pa neiin pa zirtirna hnuaiah seilian chu nise a dan a dang deuh mahna le.
Bung-7



Val Up Hranga bawk chuan " Vawiin khan chem hman chung chang kha min zawt a, ka chhang ta lo che a, zep nak emaw vawiin lungdawh a inchawlh lai khan inthlang lawk ah khan suktlawng tuai Suk atan ti a lak tum a ka thlek lai a ni a, mahse ka duh ang a a ngil that loh avangin ka la ta lo va, let mai tum a ka inruahman laiin in thiandun khan lungdawh in rawn chuang chhuak ta a, in thukhawchang zawng zawng kha ka lo hre khiau va, in thu han vuak thlak ang khan , kan khaw dinhmun chu hetiang hi a ni a, zankhat tawhsual tawh palh pawh a mang diak thei dinhmun kan ni tih chu a chiang reng mai a , tu khaw tan pawh zuam awm tak kan ni reng a ni. Chutihrualin khawtlang himna hi a til tam a tam ngawt hian a hril ber lo a, mi pakhat huaisenna leh theihna hian khawtlang a thlamuan thei fo ngai a nia. Kei lah hringnun let liam lam batin ka dak ve duk duk tan a ni ta mai si a, chu a chhapah ramtuileilo mai ka lo ni ta si, khua leh tui chhan tur tak ngial pawn tihtheih ka nei ta mang bar lo e, nangni rawlthar lo chhuakte hian tumruhna, huaisenna, tlawmngaihna leh tawrhchhelna kawng tinreng zir a, Dengsur khaw chhanhim tur a theihtawp in chhuah a ngai a ni " tiin Luaia chu a han zilh dap dap a..


Luaia pawh chu a lo bu nghat nghat a, Val upa Hranga chuan " Vawiin chuan keite chu i sat na zo meuh lo i ti em ni kha ?" Tiin Luaia chu a han zawt let a.
Luaia chuan " Nia mawle, theihtawp tak meuhin ka sat na a, chuti he hu in keite khan a ngai mang tlat lo, kan vannei a siamin Zathlaha kut hlei kan chhawr tangkaia kan him hram a ni ber e " a lo ti ve vat a.
"Aww a ni tak maw , Chempui hmanga thil i sah reng rengin a fawng lai takah vawn chut loh tur, tlem a a hmawr lam deuh a i vuan ang a, tin Ramsa emaw ral hmachhawn chempui kan lek reng rengin chiai leh hlauh hlawp vanga tawngpawng vai hauh loh tur a ni , kan hmachhawn mekte chet phung a zirin kan chem kha hman chhuah tur a ni a, hnaihchilh lutuk ah chuan kutthlak a na thei ngai lo, tin thil kan sah kha kan vai chhuah zawnga kan ban a mar zawk lai tak a va sah fuh tawk a an awmlai in sah tur a ni. Chuti lo a, kiu tawm ngil ngel emaw, hnaihchilh lutuk ah kut thlak a na thei ngai lo, tin in lo tlangval chho zel ang a, Fei te pawh in la hmang fo ang, fei khawh reng rengin hum ngheh churh loh tur a ni, thawl zaih mahse chet pui nuam tur si a hum tur a ni a, a khamphei zawng a fei khawh hi khawh nat a harin khawh fuh pawh a har duh khawp mai, beng kawm zawnah kut dahin mahni taksa hma lam a awn dah chung a khawh in kutthlak a na ber ngai a nia " tiin Val Upa Hranga chuan a sawi zui malh malh a.

Mangchhal ni (lo vah tan ni ) tur a khawtlang ni tur a rilru a a lo ruahman lawk anih avangin Luaia tukthuan eikham chuan tui hmuam pang pang chungin a chem a tat hauh hauh a, mangchhal ve tur midang lungtat a chem tat ri leh hraih hraih ri pawh khaw chhungah chuan hriat tur a awm ve sap sap bawk a.
A duhtawk a chem a han tah hnunchuan , ipte puiah chawfun akin lal leh upaten ram bawh tur a an ruat lam Saihum ngaw lam pan chuan thurual pui em em pawh nei lem lo in a chhuak zui ta a. Kawtchhuah lungdawh a midang lo awm ve nak nakte nen chuan Saihum ngaw lam pan chuan an liam ta diak a.



Maupui hmun chawn tiat tiat Mautak leh malpui tiat dawn dawn Rawnal leh Rawthing inpawlh nak mai ah chuan mangchhalin bul a han tan a, Val upa Hranga thusawi chu hre ranin a chem sah dan leh a kut thlak dan chu ngaihtuah ranin maupui hmun chu a han suam tan ta a. Val upa Hranga thusawi chu a dik zet mai tih a hre thiam thuai mai a, nidang a a kutthlak ai fe in tun tum a chem han sah chu a na zawk fe a ni tih amah ngei chuan a hre thei tlat. Phur fe in Mautak lian pep pawp chhawnpuar tiat dawn dawn chu a chhawk zum fer fur mai a, a phur lutuk leh tha za chuan fimkhurna hlohin a bul lawk a Mautak kul pup mai a ler lam a mau dang a sah tluk tawhin a del kul pup chu ngaihtuah chiang mang lo hian a han chhawk hmawk mai a, chu mau chu rawn in perh thut in a khabe kualah tak chuan a rawn dawm chho a, a vah tawh sa a mau tlu khawm nulh chungah chuan a thal thla hal hal a. A khabe dam vat vat chung chuan a lo tho chhuak thuai a, tlemah tlemah khabe bal huamin a thal lo chauh chu a ni e.


Vah bak mau hlim hnuaiah chuan a han thu chawl vang vang a, mau pum khatin chuti tak a a han thal chiang mai chu a awmdan ngaihtuah letin amah leh amah chu a in nuih suk suk a , pasaltha ni tura thil pawimawhte zing a mi fimkhurna chu , chu rawlthar rilru ah chuan tuh thar a awmin, fimkhur tak chung si leh mahni inveng ran chungin lo chu a vat chhunzawm leh a, mau bul tin chu a tan inzirna a ni zel mai a, chutiang hrim hrim a a inzir zel a nih zawngin an kum khat lo neih tawk a zau a vah meuh chuan a thil zirah chuan nasa takin hma a sawn ang tih mau ding thim khup atang chuan a hriat viau a ni.


Ni pawh khawthlang lamah a her ruai ruai a, khua a tlai lam in , lo sul haw a hun tan der tawh a, ral leh lam zau a midang feh ve te pawh an ruk kuk lauh lauh hlawm a. Thansangluaia pawhin a lo vah lai chu duhtawkin vahbak hlimah chuan a han thu thlan dai phawt a, chutiang ang zel a a vat thei a nih chuan mi rualin a vat zo thei mai dawn a ni tih te ngaihtuahin rilru helh kam nei lem lo in, in lam pan chuan a haw ve ta a. Kal pahte chuan a chempui chu humin mau lo ding rem changte chu a sat ri leh zawt zawt thin a, chutiang a a kutthlak lo danglam ta riau chuan a rawlthar tha za chu ko chhuakin nileng a lo vat hat a ni tih pawh hriat lohin mau remchang a piang chu a sat chhawk leh hmawk hmawk thin a, chutiang zel a in lam pan a a kal lai chuan Val upa Hranga thusawi chu hrechhuakin mau a sah chhawk hmawk chu chung lamah hlam chen zetin a han chhawk leh hmawk a, thlang lam kawr ruam hnawm a changel Patling thankin tiat zet ding hang zun mai chu khawh tumin a han tin vang vang a, thaw hawk khawp a tan la in a han khawh thla fur mai a, val Upa Hranga'n a hrilh ang thlapin a kut chu a lek avangin khawh pawh a khawh na viau mai , mau chu a dawk chhuak tla vuai a, mahse a tum chu tangphel dawn a thelhin changel hung zingah chuan a tlang thla fur ringawt a, vawi sawm chuang zet a khawh hnu pawh chuan changel chu a hlat deuh avang pawh a ni mahna a khawh fuh thei reng reng lo a, khuate a tlai lam zel avang chuan in lam panin a haw ve leh ta a.


Chutianga lo vat leh val upa Hranga sawi ang a in zir pah reng chung chuan nitin lo vatin a liam ve tlauh tlauh a, tunah chuan lo pawh a vat zau tawhin nihnih khatte a han bun leh chuan lo chu a duhtawk vat thei mai turin a in ngai tawh a.
Rilru hahdam tak a chhun chaw a fak mek lai chuan mangang au ri that that ri chuan a beng a rawn luh zawr mai, aw ri lo chhuahna chu an ral leh lam a lo vat ve mekte nen a an inrina kawr ruam luite kam a ni tih a hriat chuan chempui chuh in chu lam hawi chuan a tlan nghal thuai a, mau ding thelh thuau karah chuan a put liam zung zung a.
" Mi mangang au rawl hria , pui ngam lotu chu pawnfen feng tlak a nu, mipa fa ve lem , mi mangang tanpui ngam lo khawpa dawihzep tur a ni ngai lo " tia a pu Kungliana zilhna chu hre rengin mi mangang tanpui ngam lo tur khawp a duap nih chu a tum lo hrim hrim. Au ri lo chhuahna chu a hlat lem loh avangin reilote ah kawr ruam chu a thleng thla thuai a.



A hma lam a thil thleng mek a hmuh chuan Luaia chu a ding chawt a, ral leh lam a a rite pafa lovat a feh, chhun chaw fak tur a an inbuatsaih lai a, a fapa luite tuichawi chuan luite a Chakai lo khawrh mek vawmpui lungmawl a zuk tawng fuh chu niin , luite kam hmun zawl a Rammubaltawn tuai chawnpuar tiat vel el awl ah chuan savawm man phak loh deuhah hian a lo lawn a, a thing lawnna ber kher chu thing nem chi tak mai alo nih bawk si avangin savawmin a han bawh zawng chuan a kul leh dual dual thin a, savawm chuan man phak lo deuh mahse beidawn san lah chu a tum bik der lo a, thingtuai chu savawm em han lawnna atan chuan a tet deuh bawk si avangin lei atang a ding ur ur chung a lo bawh kul kual pup pup a. Rawlthar zawlbuk kai rual em la ni lo mahse a rilru pakhauhna chuan savawm laka in pek mai tum bik hauh lo in au lauh lauh chung savawm ban phak loh tur zel chuan a lo in siam rem ve zel bawk a.


Luaia chuan han bawhzui mai dan tur hre lo in a bul a mau chu a han chhawk zawk a, hlam chen vel a a chunglam chhawk leh zawkin savawm chu khawh mai a han tum a, mahse a thawm chhuah chuan savawm beng chu a rin ai hma in a thleng tlat, mau a sat fel awrh tihah chuan savawm chuan Luaia lam chu a rawn bawh chho ta mai a
Thansangluaia lah a duh angin lo la insiamrem hman hek lo, savawmin a rawn hnaih chilh hman tak em avang chuan khawh hman ta bik lo in Kawrte kam hmun zawl lamah chuan a tlanchhuk ta ngawt a. Savawm chuan a rawn bawh zui nghal zat mai bawk a, tlemah tlem ah luite kam tlem a lo ruam deuh ah chuan tum thla hman lo ngat se chuan vawmpui lungmawl tin hriam kawm van chuan a hai thler duaih ngei ang le. Mahse khatia a tlan thla kha luite kam ruam hlekah a tum thlak lai takin savawm chuan rawn nang ching thelhin Luaia pil thla thawih chu man thelhin a savawm chuan a tlan pel thla thuak a, a thlang lawkah chuan a tep phuan buah buah chungin thinrim awrawl chhuah chungin Thansangluaia chu a rawn bawh chho leh ta nghal a, Luaia tan pawh in saseng na hman a awm tawh lo, a mau chhawk zum leh lam chu luite ko rin chhanin savawm lam hawi chuan a lek kawh vah a, savawm thinrimin in hrosa chhur chhur chung a a rawn bawh rual chiah chuan a mah chu a kun nghal zawk bawk a. Kawrte ko rinchhan a savawm lam hawi a a lek kawh a mau chhawk zum hriam var mai chu , amah man ngei tum savawm rawn bawh phei chuan rawn bawhin a taksa rihna nen a rawn bawh phei a ni bawk a, mau chuan a awm ruh hnuai ah thilin a ham hawng huau khawpin a lo thil tlang zawk a. Luaia pawh savawmin a mau a rawn bawh rual chuan savawm hnuai atanga rang tak a put chhuak nghalin savawmin mau a taksa a thil tlang zawk tu a buai pui lai chuan a chem pui chuan Savawm lu ah chuan a sat zui sawk sawk a, reilote ah savawm chu a zal ta thuai a, Thansangluaia chu savawm thi kai nuai chung chuan a chem pui a thisen la far kauh kauh chung chuan a ding kawh lah a. Savawm erawh che zui tur awm lo in a thihsual chalchang chu a thaw phu uih uih ringawt tawh a .



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: No registered users and 8 guests