Muallung mihrâng -Thanṭhuama

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Rohlupuia Renthlei
Posts: 20
Joined: April 29th, 2021, 8:10 pm

Muallung mihrâng -Thanṭhuama

Unread post by Rohlupuia Renthlei » May 12th, 2021, 11:38 am

MUALLUNG MI HRÂNG- THANṬHUAMA

BUNG-6-NA

Ruatfela Pa


In chhûng mei enga Darkhuma leh Thanṭhuama bakah, inlêng dang lo ṭhu ṭhap mai a hmuh chuan a ding chawt a! Inkiltawih hmêl zet hian Hnûni la hlumna lam chu a pan rawk rawk a. Eng dang sawi ta lo chuan, "Ka haw dawn e," tih pahin a ṭhian nu nak thâwlah chuan a sik nawk nawk mai a. Dâra chuan, "Khai maw, Kimi, naktuk chu i chhûngten an phal meuh maw?" a rawn ti hluai a. Zak sen ṭâwn ṭâwn chung hian Liankimi chuan, "An phal thu chuan min thlah ngei kha maw, hei, Hnûn ṭhiani hi enge a zai rel tak....?" thâm chhal hian a rawn ti sap a. Hnûni chuan rang fê mai hian, "I theih loh hlauin i chhûngte rawn dilpui che kan tum zawk a nih ngat si le!" a lo ti zui zat a. "Harsatna dangin min tlakbuak loh tak a leh, kan kal ngei ang chu le...." Dâra'n a lo tih chuan, an pawm tlâng ni maw, an ngawi nghiai mai a. Tlangvâl dang lêng ve te mitmei ven nen, titi dangah an pakhai ta thuai a. Liankimi pawh chuan, "Chuti chu, ṭhiante in lêng chhim ang zia zângin, khawi nge ka ṭhian, ka han chho ta'ng e," tiin a ding hluai a, a nui zui kawr kawr reuh a. A lo luh hlima a zak kimki hmêl kha, a hmêl dik tak zawkin a thlak ta bawk nen, a nuih zâwnga tapchhak mei enga a ha vâr rual ṭhah mai lo lang te chu, thim chin aṭangin Ṭhuama chuan a lo tleipui ve em em ringawt mai a!

Dârkhuma chuan, "Khai, Ṭhuambawng, nulâ mahnia thimthama tei vahtir zawng, inchhuih bahpalh mah hlauhawmin, nang an tual thleng tal han chhawm chho tawh. Nula i rim ṭha ngam azeng lah ni hlei lo," tiin thimchina ṭhu, Ṭhuama nakah chuan an sik zuk roh a! "Dârbengchhenga te mai mai ṭhin hi a," tih pah chuan a tho ṭham ṭham a. Dâra lah pek chuan, "Châr bang dêng dawta ka bin hmà che hian liam thuai teh," tih pahin a'n tin uaih a! Ṭhuama pawh chuan Liankimi leh Hnûni, amah nghaka kawngkâ-a ding te chu a zui nghal a! Sum hmun aṭang chuan Hnûni chuan, "A nih lal ṭhian, zing khua lo vâr se, ka han lam mai tur che lah ni....In peih sa diamin lo awm la aw," tiin a thlah ta a. Ṭhuama leh Kimi chu thim thamah chuan Liankimi te In pan chuan an inzui chho ta a. Thla mang lai ngang a ni a, van vârah ngawt chuan kawng duh angin a lang chiang lo nen, an hmanhmawh lo viau mai. Hmanhmawh lo viau e ti lo chuan, sawi tur lah chu an van nasa mai si a. Chhungrila in haw hauh si loin, an in haw lo a ni tih lah a tu'n han pau pui tum hek suh. A tu-a mah chuan bul ṭantu nih an ngam teuh lo ni hian a lang a. Lal mual thlen chhoh hmâ, In ding khât deuh na lai an thlen chhoh chuan, kawngsir luhka hnuai aṭang hian Uite hlau hlawp hi a rawn beleuh chhuak ṭhawt mai a.

Liankimi phu lutuk chuan ṭe ṭhat chungin Ṭhuama chu a va zuan chawt mai a. Ṭhuama lah lo inring hman hek suh, kawngsir lehlam huanpal bawh rawk chuan an tlu dun hlawl mai a! In chhûng aṭang chuan, "A tû ui cho mai mai chu ni maw, ka'n vawm zui dawt dawn em mawni chu", han ti bal bal thawm a lo chhuak zui zat a. Liankimin a bawh thlukna hmun chu hmun rem tak ni mawlh hek lo, a nau chawbâwm kawh lah mai chu Ṭhuama darah chuan a nêk per thlawp mai a! Ṭhuama insiamrem tum, han inher tur chiah chu ani, Liankimin a bawh dan chuan zir mawlh hek lo, a rihna zawng zawnga rawn bawh ta chu, a puan ven inhlim dawrh khawp chuan an inbawh thal ta hual mai a! Lo hmutu awm ngat se zawng, thil awmzia hre hawt si lo hian, an va thang thui dâwn em! Hmai in si chen a an in dung bawh meuh chuan, an tluk dan leh tlukna hmunin awmzia reng a nei lo. Hnai set sawtah, inhaw lo tih hriat zet hian an in melh ran mai a. Chu zan, thla mang zan thim zual lai leh, Arsi te pawhin duh thâla enna an chhuah ngam loh zan ah chuan, Ṭhal thli thaw heuh heuh hnuaiah ngei mai chuan, in hmangaihte hmangaihna chu, ṭawngkâ-a sawifiah rual lohin, huatna tel lo mitmeng chuan an puang chhuak ta! Dim tea Liankimi nem kan pah chuan, hawi zak zak chungin an in bêng fai sat sat a.


Mi hmuh hlau tak, nuihza in sûm leh, inthlahlel ru tak chung si chuan Liankimi te In lam chu an pan leh ta a. Liankimite leihkapui bul thim zîngah chuan ding detin, zawi fiah sap a, "I lo chuangkai dawn lawm ni?" tih ri chu Ṭhuama bengah chuan a fiah ṭha ngei mai. "Naktuk lamah nilêngin hun kan hmang ho dawn tho bawk a, ka ṭin san rih zawk mai ang che....Ṭhulh awih loh aw...." tiin a hmâ-a beisei nei taka ding Liankimi chu a'n kuah chawt mai a. Hun rei tak chhung lo in suangtuah a, duhthusam rama tu hriatpui lohva lo cheng dun ṭhin, inhre pawh ngai hauh si lo te chuan, an inkâra thuruk thuhruk chu ṭawng lovin, chetziain an puang chhuak ta! Vana Arsi te chu hriatpuitu an ni a, ṭhal thlifîm leh an vela chiapcha tinrêng, sisiap leh leihrik te chu, chumi te inkâra hmangaihna, kuiṭiaha awm mêk nemnghettu te an ni. Thlanmual panga Kiltheirawk (Biakbairawk) hram lauh lauh leh Vabak thirchher inchhawn kurh kurh te chuan an pawmpui ve niawm takin, an aw râwl hmangin an lo chhinchhiah a! Engchen nge an daih anga, engtin nge an phun sawn anga, an chawm len dâwn tih chu hunin a la hril ang chu! Ṭhuama chu inthlahdul in, hreh tak chunga a kuahna kut chu hnukkirin, a beng bul setah chuan "Muttui, mangṭha mang ang che," tia phun sapin, Liankimi pawh kaiṭen lam panin a inher chho ta a. Kawngkhar sawna, in chhung lum a luh hnu chuan, zawiin Zawlbuk lam a pan ta a!

Zîng varṭianah Ṭhuama te chu thoin, Darkhuma leh Duhthanga nen, Chalkhuma hruaiin Tuikhur hla zawk lam panin Chem tum nen an liam ta a. Val upa Sairuma kam liam aṭanga an hriat, Khur hla behbawm vai en ngaite chu vai a, a panna kawngba ilo va vai fai tur chuan an liam ta diak a. Nilêngin an ramchhuak dawn tih hriain, Thanhnûni leh Liankimi pawh, Zo tui thiang, fîm kàk mai chawi turin, leilung lan aṭangin an phe sauh sauh mai. A ruk tak chuan an phur dun sarh sarh kher mai.

Tukṭhuan bar kham, daihnai a nuho thing dahsa la tur te chuan Ṭhuama leh an lal fapa, iptepui puar luaha kawtchhuah lungdawha lo ṭhu leh, an sir lungphuna Silai intung zan mai an hmuh chuan an fiam nak nak a, hlawhtling tura duhsakna kam ṭha nen an liam zo ta! Hmanhmawh phelêngin Thanhnûni leh Liankimi pawh, ema chawfun phur chunga, puan lukhum phe hlawp hlawpin kawtchhuah an rawn inchhir thleng a. Hnûni chuan, "Chhe hei leh, kan va tlai ta si em....Rei min ti tawh awm mang e," ti a phûl hlutin an kiangah chuan ṭhuthmun an rem nghal zat a. A hnudalah Chalkhuma pawh Iptepui phe hlap hlapin, uih zawn ang vutin an rawn thleng hlawl mai a. Rei ṭhu muang lovin, Sezawn lui pan chuan an liam ta thliai thliai a. Titi bawrh bawrh chungin lui chuban thleng thla a. Thui fê zawh thlain, Ṭhuama thliar kang thlang lamah kalin, li ṭha, sangha tam deuhna melhin Chalkhuma chu an hmâ kawihnih velah chuan a liam thla a. A duh ang a hmu ni maw, kûk raih chungin Vaibêl a lo fawp kák kák a! Ṭhuama te thlengthlain li vel an han bih chu, naupang tlawh ngai loh lui tih takah, Sangha chi hrang hrang an lo leu ziai ziai mai a. An nulâ te phur lutuk pawh an phî chùng mai!

A thliara thliar tur chuan a rem chiah lo nen, Chalkhuma leh Ṭhuama chu luikamah perkaiin, an piah kham chhengchhe laia ru lei chu chhatin, leia mi an han chhuak nual bawk a. Lui an thlen leh chuan Dara leh an nulâ te chuan Vuak sum te lo buatsaihin, an lo inpeih hman viau mai. An Ru lei lak te chu têl ṭha mawlh mawlhin, tuia chiah huhin vuak theihin an peih ta. Thil huphurhawm leh harsa a nih hmêl lo bawk a, Vaibêl te chhuangkaiin, thawk lak pahin an han fawp vang vang a. Bengkhat an zuk zawh chuan, ru lei chu an talhtum siam hmang chuan an han vaw sawm ṭan ta a. A chip khat ta tihah tuiah chuan a ruala chiahin, sawm nûlha an vuak tawh chu a lo filh leh ṭhuau mai ṭhin a! Vawihnih thum an chiah hnu chuan, Sangha te deuh ho pawh an rui ṭan ta, tui pawnlâng lam panin an rawn thle deuh bâr bâr a. An nulâ te pahnih pawh an ṭe chél chùl tawh mai. An Ru lei vuak lam reng an hre chang tawh lo. "Saw le, hei pawh, kha pawh, awi, khu pawh khu pawh...." tiin an kiang hnai ami te chu an man ṭhelh thuak thuak mai a. An che vel chu lawmin Dâra meuh pawh kawng dawmin a ding peu al mai a. Vawihnih thumte an chiah leh hnu chuan an duh tawk ta. Sangha lian deuhte pawh an rui ṭan a, tui tlemna leh lui pâwnlâng lam panin an inperh ta fur fur mai. An theih dan dana sangha te chu man khawmin, an hmeichhiate chu an ri lêlû mai a.


An mansa an han chhungkhawm chu, a vum ve hnawk mai. An nulate chuan tam hi an han ti khawp a. Chutia an chawlh lai chuan Dârkhuma chuan, "Ṭhuambawng, nang, Hnûni nge i hruai dawn, Kimi le, lui mawng lam aṭangin a theih ang angin in rawn hrût chho dawn em ni?" tiin an nulâ te hmuh loh lamah chuan a han siai zuk a! Dâra hian Ṭhuama te mitmei hi hai mawlh hek lo le, hun remchâng siamsak lova hawpui a tum hauh lo. An mansa pawh insem tham fê a nih tawh nen! Hnûni lah mi ã ni nghal lo chuan, "Awi kei zawng, lui dung han zawh leh pawh ka zuam lo e, Kim ṭhian, nangin zuk zui teh ta, helai vela kan man bang hi kan lo vai ange," tiin thiam tak maiin a ṭhiante chu hun remchâng a siamsak then a. Chutihlai chuan, an chhak tlângpangah chuan Sakhi a rawn huk ṭhat ṭhat a. Dara chuan Silai chuhin, "Ka han pel chhin ange, Chala, Hnûni lo awmpui ta che," tiin, chung, a ṭhiante, inhaw hauh lo te chu hun remchâng siamsak tumin, Sakhi kah chak vang ni hauh lo chuan a liam zui a.

Anni ho chu inmelh ralhin, Ṭhuama leh Kimi chu lui mawng lam pan chuan an inzui ta hnak hnak a. Rinaiin an lo hneh thui daih mai a, lui kawi thum an liam hnu chuan duh tawkin, hmanhmawh hauh lo chuan Sangha lo lâng ho chu an man nghauh nghauh a. Iptepui âng hawk an man hnu chuan, lungpher remchâng fahran mai, lui kuang kilah hian chawlin, an sangha man sa te chu an en a, an hlim kher mai. Kimi hlim leh nuam ti, han che vel chu patek nãlah tawlh palhin a ṭe deuh ṭhat a. Rang fê hian ṭhuama chuan a bânah lo lain, lungpher kil lamah chuan a'n pawt phei lawp a. Hlau thlabâr fê hian ṭhuama chu a rawn bawh rawk mai a. Lungpher sirah chuan inkuah rialin an ṭhu dun hlawl mai a. Hlauhna kârah ṭumhnih chu an tum loh leh beisei lawk ang ni hauhin an inkuah ta rial mai! Ṭhuama chuan nghet taka lo kuahin, "Kimi, thlaphang hauh suh, i kianga ka awm chhûng chuan, i nat ka phal ngai lovang," a ti thawp sat a!


Zah avanga aw khur deuh dar dar leh, ṭhuama âng chhunga him leh ngaihngam taka awm nuam ti tak si chuan, "Awi, zak thei lo min tiin, min ngainep hian ka ring mange," tia inlak hran tuma han che deuh hratin, a ruk tak chuan Ṭhuama chuan a thlah mai ang tih a hlau kher mai! Nghet taka a âwma kuah beh salh pahin, "Ka ngaihnep turin i awm reng reng lo a nia! He hun hi engtikah nge a lo thlen ang?" tiin ka thlir reng zawk asin. "Kan nihna leh dinhmun inthlau lutuk hian, in rûn kai tur meuh hi chuan huaisenna min pe thei ṭhin lo a ni, chuti ni suhse, zan tin in khartung sawn a, in run kai ka duh asin!" a'n tih zawm zat a. "Hmangaihna hian dinhmun a thlir dawn em ni? Kei zawng, i hriat loh hian i zun hi ka va phur rei si em!" a ti sep sep a! Til reh loh na nàna chu, Ṭhuama chuan a kuah nghet sauh mai a. A tasak lo danglam zel chu a thunun vat a nih loh chuan, chulai ram palailêng, lui tui luang ri her her leh suar in chhawk ri nghawlh nghawlh kârah chuan, pawla sai pumpelhna kawng zawh thei mai dawnin a inhria a. Chu meuh zawng, mipaten pialral kawtchhuaha an ropuina tizualtua an ngaih miau avangin, chu kawng zawh chu a hreh dâwn hauh si lo! In thlahrung ru tak chung hian, Kimi nauchaw bâwm, a âwm bawr cheimawi nâna khuavangte siam luih ang maia kawh lah mai chu a'n ṭham chat mai a. "Ngawi teh Ṭhuama, heti zâwng chuan a fel lo ang e, kal zai i rêl dawn ang hmiang...." tiin, Ṭhuama kuahna aṭanga tal chhuah tum chuang si lo hian a'n ti a! Kuah ngheh sauh pahin Ṭhuama chuan, "Hmangaihte kârah in sum leh rem lo a awm dâwn em ni?" tiin a duhthawh sawt hle mai a.

Thaw ham ham chungin Kimi chuan, "Ngawi teh Ṭhuam a, kan inkârah hmangaihna a kuhmum ṭan chauh a, ni leh thla em pawh a vei hma a, i duh ang kan puitlin mai chuan, hmeichhe buan chak lo leh sih hnip lutukah min ngaiin, min hnuchhawnin ka chanin maian chan pawh a tluk dâwn em ni?" a lo ti khauh mai a. Ṭhuama pawh ngawi vung vungin, dik a ti bawk si, Kimi dinhmun a han ngaihtuah a, a sawi tur dik tak a sawi a ni tih hriain, a taksa ṭang mar ṭeuh tawh pawh a thunun chho thuai a. Duh leh thlahlel hmêl takin Kimi chu a kuah vawng vawng a. Chutihlai chuan, an chhak tlângah chuan Silai a puak tawi tak mai. Ṭhuama te pawh ding hlawlin, luidung chu an zawh chho leh ta a. Liankimi chuan Ṭhuama chu a va melh ṭhin a, a lakah lungawi lo leh lawm loa hriatna a nei deuh tlat mai a. Hrehawm a tiin, Ṭhuama chuan a kalsanin, châng dang a kan mai ang tih a hlau rilru ngang mai. Mahse, a lakah chuan tlawmin, inpe ngawt se, a dinhmun tur a ngaihtuah ngam bawk si lo. Rilru phir zet chuan sangha chu a man chho zauh zauh a. An chhak kawi an han dak chhuak chu, Hnûni chu a sam chul mam mawlh mawlh chungin a lo ṭhu diai a! A bul lî ah chuan Chala pawh pawi tawk lo ang maiin Sangha a lo man malh malh a.

An Sangha man te chhungkhawm a, Vaibel an zuk hlat hlat lai chuan Sakhi pa Tuai paw bahlat chungin Darkhuma a rawn lang hlawl a. Chiau lê lú chungin an nulâ te chuan Dara chu an lo kuah chung chung a. Ṭhuama chuan, "Pasalṭha nge nge, tluk loh rim i nam mange, i zârah Sakhi chek kan hâwp ngei dawn e," tih pahin Sakhi chu a lo tuai let hauh hauh a. Chala chuan Raw dâwngah Sangha tharlâm sar mai chu chhum turin a lo thun mawlh mawlh a. Chawchhun hmeh atân a ti a ni. Mei te nuna, Sangha an chhuan so bawrh bawrh lai chuan, "Sakhi hi chu chan darh lovin, a pum ngatin hawn teh ang aw Dârbengchheng...." Ṭhuama'n a'n ti chiah chu, Dara chu tho hluaiin, an inman ta chat mai le! Chu Sezawn luikam, lungduhte kimna hmun, lungrualna lui ruamah ngei mai chuan, Darkhuma leh Thanṭhuama chu an inelh ta ngian ngian mai le! An hmeichhiate hrilhhai chu an ṭe chel chul mai a! Chalkhuma lah chuan engdang sawi set lo chuan, chumi te in elh ngat ngat lai chu an thlang li ah chuan a'n len thla lawp mai a! Lo inring hek lo le, ri bawrh khawp chuan chu li ah chuan an thal ta huang mai! An infiam a ni tih an hriat hnu chuan, nui hawm hawm chungin an nula te pawh chuan an che vel chu an thlir a. An Sangha chhum te a hmin fel chuan, chu luikam hmun dai leh hriatreng hlawh tawh tur hmunah chuan, Sangha man thar hlim, a hâng tawk leka Chakawk nena chhumpawlh leh Buhchangrum ngei mai chu lai pâwng lang awt khawp leh thin khuar mar pawng khawp chuan an han bâr teh reng a. A manhla viau ngei ang le.

"Ngawi teh u, hun kan la ngah tho bawk a, kan sa pawh hi i chan fel law law teh ang u, hetia ah haw ngawt zawng, a peihawm lo zawk e," Dara'n a tih chuan, ihê loin Ṭhuama leh Chala chuan an ṭhetdarh nghal zung zung a. An nulâ ten lo pui in, Darkhuma erawh in ti kaptu fahran hian ṭhuthmunah a ṭawng lùr lur a.Rei rial lovin an chan zo thuai a. Chumi hnu chuan an sangha chu hmun nga ah chhepin, changel hnah tharlâm chuan an fun ṭheuh a. Chhungrual In thum zet tlai aiin pakhat chan chu a ṭha mah awm asin. "Sakhi sa hi le" tia Chala ṭawng chu Dara chuan, "Kha chu lal sa....In chan ve tur a awm lo" a lo ti nghut a! Lehlam hawiin a nui hmun hmun a. Naurual zanriah chhum hun zetah chuan khawlam panin an in zui haw ta thliai thliai a.

Ni hluiah chap rawh hman ngei an duh avangin, Lal leh Upa te lo ruatsa ang chuan, vau thla chawhnu her, Ṭau thla ruahtui in thlai chi a keu hman tura chap rawh tur chuan an inpuahchah zui ta a. ("Ni hlui" han tih hian, an vah chap pho ro, ruahin a nan hman loha hal hi a ni a. Tin, ruahin lo delh ta pawh ni se, karhnih khat khawṭha hnuaia an han pho a, vah chap a ro ṭhat hman tho chuan, "Ni hlui a chap rawh" an ti tho ṭhin a ni.) Lo hal hmain nihnih inbuatsaihna hun an nei a. Ṭhenkhat chuan lo hal paha sa channa turte an dap a, ṭhenkhat erawhin Thlâm chak an lak sa te dah ṭhain, in peih atin an inpuah chah hman ṭhin a ni. Tin, mipa, ram ṭang chin tawh phawt chu tumah bang lovin, ram vêngin an chhuak ṭhap ṭhin a ni. Khua aṭanga an bawh ram hi a hlat tham deuh avangin, kangmei chhuah palh thulhah pawh a hlauhawm nep deuh a, lamhnai neih kum te ang em em chuan mei ven a hautak lo zawk a ni.

Lo hal ni a lo thlenga, Ṭhuama te ṭhian ho pawh, zau khat awm an nih avangin, inthurualin an chhuak ho ṭhâm ṭhâm a. Kawtchhuahah a pachhuaka in nghakkhawmin, a huhoin Zau lam an pan ta a. Dâra pawh, Ṭhuama te lo halpuia, a remna laia sa chang turin a tel ve a. An lo hal an ṭul ve loh avangin a ṭhiante pui tur chuan an zingah a tel ve a ni. Chawhma chanve zet a ni ta, ni a ṭang ṭha ta maw tihah chuan, mei lu khaiin mei nunin, an hal ṭan ta a. Rei lote hnuah chuan a mawng lam aṭangin an han dep kai leh a, maupui hmun ram chang chu a puahin a puak pawp pawp mai a ni. Dara pawh a chan hmunah chuan inring takin a ṭhu a, chappui kang leh maupui hmun kang, meialh inhlap puak ṭhuai ṭhuai kârah chuan a khât tawkin silai a puak tawi tak tak mai bawk a! Dâra sa channa tlangah chuan Ṭhuama leh Chalkhuma te pawh in rem thlain, meipui inhlap ri ṭhuai ṭhuai kara meikhu zâm chùn mai karah chuan an hma lam chu an thlir ṭhap mai a. Chutia an ṭhut far lai chuan, Dara Silai chu a puak ta dur mai le. Chu ve leh Ṭhuama chhakah chuan Zuk chal a rawn dawk zui puat mai. Thal han thlahna turin, a inher rem hman ngang si lova, rang tak tlanin, Dara chan hmun pan chuan Chala nen a chho zui nghal thuai a. Dara pawh Zukchal tlanna lamah chuan a rawn dawk thla puat mai a. Ṭhuama te a han hmuh chuan dingin, zuk chal a kah thu chu a sawi nghal a. A hnu chu zuiin, a tlanna hnuah chuan thi a lo baw zeih zuih mai a. Hnu chhui har a nih loh avangin chak takin an zui char char a.

Zuk chal hnu chuan Bûnghmun nena an in rina kawr pui lam chu a pan zel a. An in rina aṭanga an ram lam, an hmâ lawk fingthum awm vel ah chuan Silai a puak ta dawt mai. Chu ve leh a hma aia chakin, an hma hruai Chala pelh puat pah chuan Ṭhuama chu a liam ta zung zung mai le. A ṭhiante pahnih chuan an um zui nghal chawn chawn a. Silai rikna an thlen dawn hnaih chuan, an hmâ lawk kawrte kam aṭang chuan Sazuk hlado ngei mai chham ri an hre ta tlat mai le. Thawm dim zawkin, chak tak si chuan hlado chhamna hmun chu an pan nghal zat a. An sahliam hnu lah chuan hai rual lohin chulai hmun ngei chu a kawk zawn miau mai si a! Hlim nui ham ham thawm an hriat chuan, va pawh nghal rawihin, Ṭhuama chuan, "Uai, khawi lam pasalṭha nge in nih le, kan ram chhungah, kan sahliam umlai lo ṭhutchilhin, hlado hial in chham hnan tak mai le?" tiin, Zukchal huala lo ṭhu, Khual vâl pali te chu a'n melh kual dan dan a. An zînga phan chang ber, pasalṭha ni ngei tur chuan, "Tlangval, in ram chhung a nih tu'n kan hai hauh law.... Mahse hei, kan ram chhuak kawng boin he Sazuk hi kan hmu fuh a, veh hnaiin kan ngên mu tuar lovin a hnuk a thlah ngei chu a nih hi. Hliam hnuhmâ reng a put si loh...."

Dâra chuan, "Ngawi teh pasalṭha, kan sahliam hnu chhui lai hi hetah ngei hian a tawp a ni si a, engtin nge maw hei hi a ram tla lai in keuh a nih theih chu le?" tiin chu Sazuk chu a'n kuai let thawk a. A zak dawh hnuai chiaha a zuang lai a kahna ngei chu kawkin, "Hei hi ka ngen mu denna ngei a ni e. A thuhrimin, in silai vawihnih ri kan hria a, a chalah kahna hnu a awm ngei mai a, a nak ami hi ka kahna a ni bawk si a. I hlado chham nen, engtin nge maw a ram tlâ ka keuh e, i tih theih mai chu le?" tiin chu pasalṭha chu a han thlek deuh hâ a. Chu pa chuan, "Chhe hei leh naua, i sa hliam chuhpuiah min puh elo maw?" a lo ti let thuai a.

Dara lah ngawi duh hauh loin, chu Sazuk nghawngah chuan rapin, "Hei hi ka sa ngei a ni. A lû ka la dâwn a, a ngam fa chuan min lo dang rawh u," tiin a chempui chu phawrhin, Sazuk nghawng tan tum chuan a tin uaih mai a. A kut a vai thlak hma chiah chuan, "I chem i thlauh lo a nih chuan, lu bur keh hawkin ngen mu ka barh ang che," tih ri avang chuan Dara pawh chu a'n chawl dat a. Ṭhuama pawhin a silaia chu pa chu tin ve nghalin, "I chengrâng i hmehper rualin i lu bur keh lai i ṭhiante hian an hmu ngei ang," a lo ti thum dat mai a. Silai hmawr che eih lo chuan a lo tin vang mai a. Pasalṭha ni awm tak chuan, "A til tlêm zawk in nih hi, ka sa lû min chuhpuitute ka dim ngai lo," tih pahin a chem pui a phawrh a, Dara



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)