Muallung mihrâng -Thanṭhuama 10

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Rohlupuia Renthlei
Posts: 20
Joined: April 29th, 2021, 8:10 pm

Muallung mihrâng -Thanṭhuama 10

Unread post by Rohlupuia Renthlei » May 27th, 2021, 11:03 am

MUALLUNG MI HRÂNG- THANṬHUAMA

BUNG-10-NA

Ruatfela Pa

Ṭhuama te chu rang fahrana inṭhen phawkin, "Zanin chu in theihai buk hnuaiah khuan ka lo nghak ang che," ti sapin Dara lam pan chuan a chhuak ta a. Nui vur vurin Dâra chuan, "Chhun chhunah a kakpui te hi i lo chuang vung lo maw? Khaw maw, ka'n bel chiang teh ang che," tiin Ṭhuama chu a'n tuai vut vut a! "Teh ngawt ṭhin che hian, Pawla sai hmabak kan nih hi maw...!" tia nui var var chungin Pum lam chu an pan dun ta a.

Zan a ni a, zan thiang tak a ni. Sikni vanglai tluk zetin khua a thiang a, van dumpawl thiang kûk kârah Thla de tir seki van mai, lei bâra kawlkila a inbah liam hnu chuan, Ṭhal thlifîm thaw heuh heuh kârah van lam roreltu, Arsi eng pe ut mai hnuaiah chuan Tlangvâl lunglêng ṭhen khat te chu Zawlbuk panin an zai kal rawng rawng a! Kawtthler lun laiah te chuan naupang pawnto tur ho chu an ṭhiante auin an chiau lê lû bawk a! Naupang hlim thawm kâra Ui cho han û rawng rawng râwl nen, Muallung khawlai chu chutih hunah meuh chuan a lun map map kher mai!

Thanṭhuamah zanriah bâr zo pawh, hmanhmawh lem lo tak hian Zâwlbuk lam panin a a inchhir chhuak a. Bawhbel bawh liama, Duhthanga te ṭhut hmun a pan lai chuan, val upa Sairuma chu a rawn ṭawng chhuak làr làr a! "Zanin chu khawi nge, kan khawtlâng hian Zawlbuk kai thar buan tur kan nei lo rei ta! Kan tlangvâl te pawh in awl rei ta e. Suakvunga leh Ramtawia hmâ-a han ding zo kan nei emaw, i han infiam hlawm teh ang u, lêngi rûn kai nân a la hma em hi maw...." a han ti chuan, midang pawh chuan an lo ṭawmpui kher mai! A inbuan awm deuh te chu thlang chhuakin, Ramtawia leh Suakvunga buan tur chu an zawng dawn chu a ni nghal der mai! Buan tualah chuan Val upa Sairuma chu a ding peu al a. Inbuan tura an thlan chhuah ho , "Khai le, tunge bul han ṭan dawn che u le...." tiin a'n melh kual a. Tlângthanga chu rang fahrana han ding chhuakin, hawi deuh vah chung hian Thanṭhuama chu a rawn kawk chat mai! "Dim hlek suh," a beng bula han tih sup pahin Dâra chuan Ṭhuama chu a nawr chhuak ta a. Tlângthanga hian Ṭhuama te ṭhian ho, in leh ram lama a tluk loh te hi, zawlbuk buan tual ngeia tlawm a chakna a rei ta bawk a, a phur surh surh kher mai. An inbuan hnuhnung berah khan Ramtawia pawhin a phawi thei bik hauh lo kha a nia! Chuvangin, Ṭhuama te han bin vel a, an chunga len chu a chak et et mai a ni.

Ṭhuama chu a puan ven han suih ngheh mawlh mawlh pah chuan buan tualah chuan a rawn ding chhuak a. An han ding dun chu, an hmuhnawm kher mai. Tlangthanga chu a 'taksa a lang lian deuh zawk emaw chu,' tih tur a nih laiin, Ṭhuama lah a te zawk hmêl hauh lo. A pian in khaithli zeih zawih, dar pharh hlai hlap mai leh kawng fek rat mai chu an lo chik ngai lem loh avangin an lo hrechiang hauh lo a lo ni. A malpui invuah dik thlarh mai piah lamah, a la muk dawn chauh tih hriat tak mai hian a fuke chu a hrawl hraih mai. Thahrui a ngah tawk ang tih rin theih tur hian a taksa chu chuangbang a awm hlek lo!

An han in man chat a. Chutia an han in man chiah chuan, Tlânga chuan a zuam ang ngawt a ni dawn hauh lo tih a hrethiam nghal a. Han phih deuh sawkin, val upa in ṭan thu a pek chu a nghak ta a. Tlangthanga rilru vertherna chu a la bo ṭhak lo tih hriain, Ṭhuama pawhin dim a tum hlek lo. Val upain "Khai le" a han tih rual chuan an ri nghal phat mai! In phawi vawk tum chuan an han ṭang phan phan a, a thiam tinreng thawh a phawi leh vawrh tuma a beih ngial pawhin, Ṭhuama chu a chet hian a che ta eih lo mai! Thangvunga pâ Thlâm châr ban ang mai chuan a ding nghet tlut mai a. Tlangthanga tharum han so vel chuan a phih phar zo tlat lo. A ngheh hian a nghet mup mai. Ṭhuama chuan Tlânga han che vel chu thiam tak hian a lo dai khalh zung zung mai si a. A thiam tin a chhuah pawhin, eng ruai a ang thei lo. "Kei ve thung," tih paha han awp deuh satin, Ṭhuama chuan a phih kang ta vawk mai, tlangval ho chuan, "A chiang e, a chiang e," tiin an haw haw ta dur dur a. Thawh hnihna ah pawh Tlangthanga chuan phawina hun a nei ta eih lo. Mak ti zet chuan Ṭhuama chu a melh ta reng ringawt mai a! A hah lutuk chu a hnarah a thaw a leng lo. Awm sep dawrh dawrhin a ka hmang chuan thawpui a la hulh hulh mai a. Ṭhuama phawi tuma beih zai reng a rêl zawm thei ta lo. Chutia Tlangthanga thawpui la, chet zai reng rêl thei lo chu Ṭhuama chuan a han chawi kang det a, kut beng ri in a zui ta! Han bin leh han vawrh a duh viau na a, Tlangthanga thahrui neih loh dan lutuk chu mak a ti hial zawk a. Thapui thawh hman lo chuan an zo chu a ni ta mai a!

Tlangval ho chu an han in buan kual nak nak a, a tawpah Darkhuma leh Ṭhuama chu an ding chang ta. Tu zawkin nge Suakvunga buan anga, Tunge Ramtawia hmâ-ah ding ang tih hre turin, Dara leh Ṭhuama chu an in dawm ta ran mai le. Khawi lo chhuah vah nikhuaah reng an in binin, an invawrh zing mai a. Buan tualah chuan tunge ding chang zawk dawn tih chu val upa leh zawlbuk kai ho chuan hriat an chak zek zek mai! Val upain, "Le" a tih rual chuan Dara chu kun hniam zawkin, Ṭhuama phawi vawk tum chuan a'n ding mar zawt dawn a, a tum ang reng a lo ni ta hauh lo mai le! Din char a, Ṭhuama phawi vâwk chu khawiah, amah zawk chu ding char thei si lo, ṭhu hniam thei chuang si lo hian Ṭhuama chuan a siam ta mauh mai. Ṭang turin a awmdan chuan a zir si lo, ṭhu thei lo, ding chhuak thei si lo chuan a kun ṭui mai a! Amah Darkhuma hlei hlei chu a makti ber a ni hial awm e. Chuti tak maia che mumal thei lova siamtu chu a ṭhianpa, a duh hun huna a vawrh mai ṭhin Thanṭhuama ngei kha a ni si! Mak a va ti teh lul em! Ṭhuama chu tlêma han inthlah dul deuhin, Dara pawh chhuat dungah a duh angin a ṭang thei ta deuh a.

Hma lama ke chhep suala han inpal deuh salhin Dâra chuan a bin ta! Thlurtu ho mak ti lutuk chu an ê dual mai! Mahse, Ṭhuama chu a chak lo miau si! Thawh hnihna ṭan tura Val upain a han tih leh chuan, Darkhuma a rawn ṭawng chhuak ta! "Val upa, kan Ṭhuamluaia hi keini buan mi a ni love, kan buan chak K'u Suaka buan tur chu amah hi a ni e," tiin a puan ven a sawi rem a, a ṭhutna lam a pan ta hmak mai! Ṭhuama chet dan vel te ngun taka lo en tu, Suakvunga pawhin Ṭhuama thahrui hman dan chu a lo chik kher mai. Ani tân pawh buan hneh rual niin a hre lo. Tichuan le, zan danga an khaw buan chak pahnih, Suakvunga leh Ramtawia te buan tur chuan, Thanṭhuama leh Darkhuma te chu an ruat fel ta! A hun an nghakhlel tlâng kher mai!

Lênglen Ar an khuang al al a, Dara te ho pawh inzui chhuak in, Thanhnûni te in lam an pan thluai thliai a. "Engtia, khatia che thei hlek lova mi han siam theih mai chu leh Ṭhuamek?" Dara chuan nui hau pah hian a han ti a. "Ka vannei mai mai a nih kha Darbengchheng, ka thiam anga i thiam.ve hunah min la bin nek dawn nia...." ti a Ṭhuaman a chhan letna chuan a Dâra ngêng a chhun tlat! Duhthanga kheuh zukin, "A khang lâng che hian!" tih pahin tual chârah chuan an keuh rawn ta mai! Nui ham hamin Thanhnuni te In chu an pan ta a.

Rei pawh an ṭhut hmain Ṭhuama chuan, "Ngawi teh u, ka pum a nuam hlek lo, ka va inthiar lawk tang e," tiin pawn lam a pan nghal ruai a. Tû han biak lumlam hman hlek loh hian a liam zui puat a! Dâra te leh inlêng dangte pawh chuan, Ṭhuama chakzia ngawt chu an sawi zui laih laih a. An khaw buan chak Suaka meuh pawhin a hneh a rin loh thu Dâra chuan a au pui lar lar mai. Khatia a chhuak ta kha, Ṭhuama chuan Liankimi te In lam a pan vang vang a. An kawmkâr bel zat zat chungin tuma hmuh loh chuan an huan chhûngah chuan a lut ta zãl zãl a! Huan lai ta a theihai, rah bawr ṭuai mai leh a buk hlim nuam zet mai lam chu a pan ta a. Liankimi chu a lo kal tak tak ngut ange maw chu le....tia a ngaihtuah rauh rauh lai chuan, a sir mai aṭang chuan dim fê a a awmna rawn pan thawm chu a hria a. Chu lam a'n hawi chiah chu, a lam pana mi pakhat rawn kal thim mak mai chu a va hmu a. A ruang âm aṭang chuan tu a nih a hai lo chiang kher mai. A bul a lo thlen rual chuan Ṭhuama chuan a lo kuah chawt a! "I lo kal duh tak tak pawh ka lo ring ngam lo asin!" an ti sa sa a. "Chutia min rin loh te chuan ka let leh anga ti nia," ṭawng rin hlau tak chuan Kimi chuan a han ti deuh hmak a! A let leh tak tak mai ang tih hlau fê hian a kutah chuan man in, a awm si chuan a pawm bei thlawp a. "I lo kal lo ang tih ka hlauh zia hi," tiin a beng bulah chuan a phun deuh sar sar a!

"Ṭhuama, hetia i mi kohna hmuna ka lo kal mai hi, awlsam min tiin, zak thei lo min ti awm mang e aw," Liankimin a tih sap sap lai chuan Ṭhuama chuan, "Chutiang rilru pû chuan min ring em ni?" a lo ti sap bawk a! An inkâra hmangaihna piang chhuak chu, thunun dan leh enkawl dan tawk an thiam lo ni maw, ngai leh inthlahlel êm êm chung chuan sawi tur ber an hre lova. Lungchim takin an in pawm vawng vawng ringawt mai a ni. Chutianga mipa leh hmeichhia, Khuanun in hip tawn tura a duante kârah chuan, khuavang ri khamsa pela chet mai chu thil harsa a ni hauh lo ang le. Nghet taka inkuah chial chungin an phun dun sep sep a. Ṭhuama pawh inthununna a tlachham telh telh a, a kut chu a hlei sawt hle mai. A mipa thlakhlelh berin chuti taka ngai leh thlahlela a chul kual ruai lai chuan, Liankimi pawhin awm ngaihna reng a hre lo. Lo dang turin chakna leh thiltihtheihna reng reng a nei lo emaw tih tur hian, Ṭhuama khawih dan ang ang chuan a awm a ni ringawt mai a! A chhungril tak aṭang chuan dan duhna lian tak a nei ngei mai, dang turin chakna reng a nei si lo!

Chu zan khaw thiang, ṭhal thli thaw heuh heuhin an tawmna theihai hnah buk laih mai a chhem rik sang sang lai leh, zan lam nungcha te thawm pawh a reh raih lai tak chuan, Muallung nulâ hmelṭha chhuanvawr, tlangvâl te thlir nin loh leh hel lai, biahthu hlan ngei tuma an hel vat vat ngei mai chu, a mipa en nin theih loh leh ngaihsan, a thlakhlelh ngawih ngawih lakah ngei mai chuan let leh tawh lo turin a zâm ral ta riai riai mai le! Chutihlai tak chuan, an kiang hnaia lei hrik leh chiapcha tin reng, thawm nei hauh lova ngawih lo chuh tawh te chuan, "Ka hriatpui e," ti niawm takin an theih tawpin an aw râwl an lo chhuah a! Ral lehlama Kiltheirawk leh Phawngphawdawt hram inchhawn lauh lauh te chuan chung mite pahnih inkâra thil thleng chu an nemnghet a ni. Kum sul veiin, kum leh thar lo her chhuak leh ṭhin mahse, hnah hlui te ṭilin, hnah thar a lo chawrchhuak leh ṭhin anga, chu mite erawh chu zan khawthiang reh, boaruak dai riai hnuaia an sulhnu avang chuan, vulin, par an chhuang ve tawh dawn lo. An pahniha khawvel chu chu zanah chuan suih zawm a, suih taka suih hnanin a awm ta si!
Seifate zînga mipa te duhthusam ang ngeiin, Thanṭhuama zawng, pawla sai pumpelhna kawng chu a zawh dik chat chat zel emaw tih mai turin a kawng zawh chu a tluang a! A hmabak, ram lama thang chhuah pawh, tun ang zel a a kawng zawh a tluan chuan, hun rei a mamawh hauhin a rinawm lo a ni.

Buh tuh hun a liam a, an buh tuh lah chu ruahin a delh ṭhain, hmuhnawm khawpin an ṭo sing seng mai. Hnuhpui kawihin a chhunzawm chho mai bawk a. Chumi kum chuan Ṭhuama leh Liankimi te Ṭhiandun nen, Darkhuma leh Duhthanga te nen chuan an inlâwm chho ta a. An tân chuan ni a rei zo mawlh lo. An zinga lâwm nu nei lo ber lah Lal fapa, tlâng changa, khawkhat lal la ni mai tur a ni râwl nen. Hmeithai fa a nih avanga inkiltawihna leh tlângin a hmuhsit tuar hauh lovin, Ṭhuama te pawh hlim takin an lêng a ni si a. Chuti ang lal fel leh khua leh tuite thliarna nei lo rorelna hnuaiah chuan, rilru kawi deuh leh depde tawk chu lo awm ve bawk ṭhin mahse, an tân dinkhaw chhuahna hun leh hmun a awm lo tih hriain, nun kawng dik leh tluang an zawh leh thei thuai ṭhin a ni.

Hun a ral a, ni a liam zel a. Hlim takin an inzui ho dial dial lai chuan, lo pawh an zo chho dawn hnai ta reng mai! Favang awllen te chu nula tlangvâl te nghahhlelh leh nghahfak, a thei fate tân lah Se chhun Khuangchawina hun ṭha a lo ni râwl nen. Tlangvâl tam tak tân lah ther hlo ilo zawn bakah, ran ngo zawnga khaw ṭhenawm dai luhna hun remchâng tak mai a lo ni bawk a! Mi tin mai chu an hlim surh vek emaw tih mai tur hian, an hmêl hmuh a nuamin an phur tlang vek ni mai hian a hriat a! Tlângkam aṭanga an hriat danin, chumi kum chuan Liankimi pa chuan Khuang chawi a tum emawni, amah an han zawh lah chuan, a ngawi hmiah mai reuh si a!

Zanriah an bar mawlh mawlh laiin tlai khat chu, Lalkhuma chuan a fapa, Darkhuma hnenah chuan, "Hei le Taia, ka hunṭha leh vanglai tha te chuan hringnun chawhnu her min kai pui chho ṭan ta! I farnu te pawh khuandîmin an liam thuai dawn e. I Û te ho lah ro han rêl a, khaw hran din aiin, tual chhunga inben bel a, lal chi kai nih an duh tawk mai si a! Nang lo chu ka lalna tlâng luah a, ka khaw mipui te han enkawl tura hmachhuan ka nei hauh lo! I lal ṭhutthleng luahpuitu tur che zawnga, khaw chheh vel hrut te pawh a hun ta viau e. Ka khua leh tui zingah hian i lung dumtu an lo awm hlauh a nih erawh chuan, chu lah thil awlai ber tur lah niin," a han ti chuar chuar a.

Lalnu, Dârthangi pawh lo inrawlh thuaiin, "A ni teh e Taite, kan chak ṭhat lai ngeia i nupui fanaute han kuahkhawm pawh kan thlahlel asin maw....Ram chhuah leh hna thawh ngawr ngawr hi a tawk ṭan ta e! I pâ rorelna i chhim ṭan a hun ta viau mai. Beng sikin ngaihtuahna sen a hun e," a lo ti ve var a! A u te pahnih pawh chuan an lo tuihnih thuai bawk nen, Darkhuma pawh a in ngaihtuah ve vang vang ta mai. A ṭhiante sawm a, favang chho a khaw chhehvel chuankai rilruk chung chuan a tho thurh a. Tui ûm hunna lam panin, kam a ṭhuah rawk rawk a, kal paha pik liam puatin, ṭhut pawh ṭhu muang eih lo chuan Thanṭhuama te In lam chu a pan ta vang vang a!

Thanṭhuama te chhungin chaw an lo bâr mawlh mawlh lai chuan, engkhaw sawi lo chuan inchhung a han dai lut rawk a! Ṭhuama te chhungkua chuan an lo melh ṭhap mai! "Uai, in hmêl chhiat lai ka va nang thei em! Ka dam rei dawn a ni ngat ang," tiin a nui lut vur vur a. Chutia Dara a rawn luh chuan, thil pawimawh a awm ngei ṭhin avangin Ṭhuama pawh chu a tho thuai a, kam ṭhuah rawk rawkin an inzui chhuak nghal a! Kal pahin Dara chuan, "Ṭhian Ṭhuam, ka pa in zanin chu chhungpuinu dap turin min tur ta mauh mai. Engtinnge ni dawn?" a han ti sup a! A thu tak em avang chuan Ṭhuama pawhin uan hun a ni lo tih a hai bik lo! "Chu, enge i rilru ni reng reng le? Khawi lam nge han chuan ila i rilruk?" a lo ti thuai a. "Khawi lam han rilruk pawh ka nei law, tlangkam aṭang a ka hriat mai chauh chu a ni nâ, khaw thlang lam tlangdung, Mângthanga leh a kawi te khaw lam te khu kan hrût chhin emaw niang ka ti. A fanu te hmêl ṭhatin kan tlâng a khúm a nih si!" a han ti hluk a! "Chuti a nih ngat zawngin, favang thengthawt hunah, lal Mângthanga khua, Zawlpui leh a nau Mângvunga khua, Phulpui te pawh kan kai mai tur lah ni," a han tih chuan, buk nghat nghat pahin Darkhuma chu a lo nui var var a. Ti ti danga pakai zelin, Zawlbuk bawh bel bawh liamin, châr bang hrûlah chuan khunkhan taka ti tiin, ruahmanna an siam dun sap sap a.

Lo pawh an zo chho ṭan ta! Kumtluana in lâwm a, a sur a sa hnuaia tuk chhuaka an inzui chung pawhin, Ṭhuama leh Liankimi zawng, Khuanu'n a duhsak lutuk bik em ni tih mai turin, tlang thang hluai lo mahse, an kâra hmangaihna chu luite tui, a hná kang chat ve ngai lo leh pung tual tual zawk ang mai hian a ni tèlin a zual deuh deuh a! Mi thil chik zual leh ningkhawng hre chin tân zawng, an mitmei chu hai rual a ni mawlh love. Anni ho han inlâwm zet zawng, ramvachal rual tih takah, sa chi hrang hrang an keuh awl lova. An zârah an nulâ te pahnih pawh, nulat laia sabawp man hnem ber an ni hial awm asin! Hunawl an neih hlek tawh chuan luidung sa leh va thlengin, chhungkaw ei khawp chu an hawn ve deuh reng mai.

Chumi kum favang awllen an han thleng chho chu, Darkhuma nupui tur rim tur chuan Ṭhuama te ṭhian ho chuan tei chhuah zai an rêl ta. An zîngah chuan an khaw buan chak, Suakvunga pawh tel vein, a lo hmutu tân chuan an hmêlma atân an itawm lo ve ngawt ang le! An thlawh hmâ lam ngaihtuah ngai a awm lem lo bawk a. Buh an la tulzum lem lo nen, lo lam chu ngaihṭha takin an zin san ngam a ni. An khua aṭanga khaw thlang lam, han thlir pawha tlang leh mual cham duai mai leh hring nghulh mai lam pan in, zan riak buhfai nen, puan kawp pahnih khat paipawnin, an hmanraw hman thiam ber ber nen chuan lal, Mângthanga khaw lam ni ngeia an hriat lam pan chuan an inchhir chhuak ta vang vang mai le! An tum hmun thlengin, hlawhtlinna nen kir leh thei tak maw le....

Tlangvâl chak ṭha ṭhehṭhawh, mahni tawka kei inti chin ngat mai an duh tawka an han kal chu, ram ngaw leh kham kârah, kawng mumal awmlohna hmunah pawh an duk pur pur mai! Nihnih zet kâr kawnga an thang hnu chuan, tlai lam ni tlak dawn suarah chuan Thlawhma hring nghulh mai hi an hmâ lawkah chuan a lo lang ut mai a. An han thlir ṭhin a, nawm hmêl hliah hliah hian an hria ni tur a ni. Tûman ṭawng zai chhah nachâng rèng an hre lo! An zînga kum chhir tam ber, Suakvunga chuan, "Ti teh u, saw thlawh hmâ saw i va pawh rawih mai teh ang u. Zâwlpui khaw thlawhhmâ a nih loh rèng ka ring lo e ka ti!" tih pah chuan, an piah mual pan tur chuan a chechhuak nghal zat a! Chu zau lam pan chuan an pen ta páwk páwk mai! An piah ruam, chu an thlawhhma pan mêk nen an inkâr, ruam rai lai an luh thlak chuan, an hma lawkah chuan Silai a puak tawi tak mai le! Chumi rual deuhthaw chuan patling han inhrosa thawm hian a zui zat bawk a! An han ngaithla chiang a, thawm lo chhuahna chu an hma lawk, mual pawng lehlam liam mai chu a ni a.

Thawm ngaichang chunga beng an chhit ṭhap lai chuan, "Hawk," han ti dawt thawm leh patling han ṭe ṭhawt thawm a ri zui zat a! 'Kal ang le,' tih ngai hauh lo hian Thanṭhuama chu a dawk chhuak zawk mai le! A ṭhiante pawhin umzui nghal zatin, Ṭhuama mawng phe vuai chu an hmu hman ṭawk a ni ber e. Hmalam pana chak taka lim puat chungin Ṭhuama chuan a thal fang chu a hmehbel cháwt cháwt a. A hma lam a'n thlir nàk chuan, thingtuai pakhat bela mi pakhat, pasalṭha ni ngei tur, malpui veilam thler duai mai chunga ding sai dawt dawt mai, a chem tum huma hmalam bih ran mai hi a hmu a. Chupa a hmuh rual deuh thaw chuan a thal fang pawh a vung chhuak hlarh mai....Nghalchang hliam, a kawlh tawk chauha hliam, ngho lawr varh mai, a hmâ a mihring ding phin dar vek tuma rawn lim zawk pawh chu a mit dinglam a Thal fang bur chawt avang chuan a pai deuh dawrh a, a duhna takah pawh va phin fuh thei loin, a hnâr kawnah tak mai chuan Pasalṭha ni ngei tur chuan a chem a lo thiat thawih mai a. Ngek ruai ruai chungin a lum thla bawp bawp a. Chu veleh Silai a rawn ri nghal dawt mai. Chu Sanghal chu che leh tur awm hauh loin, Dâra Silai mu chuan a hnuk a chhat ta!

"Tlangval, min rawn chhan him avangin ka lawm e," a malpui thler duai mai hup chunga ṭhut hniam ruai ruai pah chuan chu pasalṭha chuan a rawn ti sap a. Thisen chhuak nasa avang chuan a dâng vâr deuh pap mai. Ṭhuama chuan a puan zai thler sawk sawkin, a kianga hnahkiah pil chu a thel dawk sawk a. Nuai sawm nawk nawkin pasalṭha mal hliam, thler duai maiah chuan a bel sawk sawk a. Puan chuan a tuam hnan ta hmak a. Rei vak lo hnuah a thi chhuak pawh chu a reh ta mai reng a. Dâra te ho chuan Sanghal chu thlek vut vutin, "Thlawh hmâ khaaa a hla hmel lo bawk a, a pumin zan chho mai ang u hmiang" a han tih chuan an ngawi ṭhap mai. Chalkhuma ber chuan ngawi rengin a til chu a lo hlep mawlh mawlh a! An piah luite tui luanna pan chuan an hnuk phei ta zawk a.

Chutihlai chuan chu pasalṭha pawh chu lo harhin, "Khai aw, tlangval, ka lo tlu elo maw?" zah hmêl tak hian a rawn ti a. Din chhuah mai a han tum ngawt a, a duh angin a ding thei ta hauh lo mai! "In dim rawh khai pasalṭha, khu, i sa pawh ka ṭhianten an puah mêk e, khawi nge, kawng mi han hrilh la, thlawhhma lam i pan teh ang," tiin, a ṭhiante chu an sul rawn zui mai turin a ti zui zat a. Chu pasalṭha chuan kal theia a inrin miau avangin tiang a sah sak a, khua a thim ruai tawh tihah chuan thlawhhma lam pan chuan an inchhawm chho ta a! A beisei leh tum ang a ni ta hauh lo mai le. A ke chu a penpui thei ta hauh lo mai. Ṭhen sak sak chung chuan hma lam pana pen chhuah a han tum ngial a, harsa a ti ngar ngar ngei mai. Thlan fîm te chuan a bual ta zaih zaih hial mai a, a lu chu haiin, a mit deuh sulh hian a hria a. Tluk mai hlauin a hmui a pet fan fan ta mai.

Pen hnih khat a han pen a, Pasalṭha chu a ṭhu ta hnak mai. A mal hliam aṭang chuan thi a rawn hnâm leh ta ṭiam ṭiam a. Ṭhuama chuan, "Hawh teh pasalṭha, tlawma lak chi a ni love," tiin, zo tak hian a han paw dawrh mai a. A hliam ṭangna lo tur ang ber chuan a puankawp chu suihzawmin, rem tak hian a han pua a, thlawhhma lam pan chuan a kalpui ta vawk vawk a! Thui an kal hma chuan lo lam aṭanga lo mawng lam panna kawng chu an pawh hlawl mai a. Kal pawh a nuamin, chak takin Thlawhhma lam chu a panpui ta zar zar a. Hmuamda velah chuan thlawhhma pawh an pawh hlawl mai. Kawng awm riak ruak chu zawh zelin, Thlâm lian ṭha hem hawm tak mai hi an hmâah chuan a lo ding vung mai a. Chu Thlâmah chuan awm an awm ngei a ni tih hriat tak hian mei a lo alh tang tang a. Hmanhmawh lehzualin Ṭhuama chu a pen páwk páwk mai!

Thlâm kaiṭen a han rah rik dawp chuan Thlâm chhûng aṭang chuan, "Chu le ka Pa," tih pahin nula ni ngei tur hian Thlâm kawngkhar chu a rawn nam hawng rawk a! A thil hmuh avang chuan a ding ta chawt mai! "Enge thil awmzia?" tia a zawhna pawh chu chhâng ta lo chuan Thlâm chhûngah chuan a luhpui vut a. A nu leh nuṭa te pahnih niawm tak chu lo ding nghal hluaiin, "engti zia nge ni?" an ti rual ṭhawt mai a. Ṭhuama chuan a mi puak chu dimtea nghat riai riaiin, chu pasalṭha pawh chu a inthing nawk a, a harh deuh hawk mai. "Ê khai, fa te u, kan va mualpho nasa ve maw...!" tiin a thil tawn chu a han sawi sap sap a! Nu ber chuan, "Tlangvàl, tunge i nih a, Khawi lam khual nge i nih le? I chungah kan va lawm teh lul em....!" a han ti tawl mai a!

Ṭhuama chuan an khua chhuahsan a, Zawlpui lama lal fapa tâna ranngo zawng tura chhuak an nih dan te chu sawiin, "Hei lah khawi khaw thlawh hmâ nge ni le?" a han tih zawm zat a!

"In kal tumna khua, Zawlpui khaw thlawh hmâ ngei a ni e. Khawnge i ṭhiante pawh chu an nih le....?" a han tih chuan Ṭhuama chu a ding hluai a. Thlam tap kianga meichher tur an dah chu banin, "Hei, in pâ nghal chang kah hi an chan mêk a, an rawn thleng ṭep ang, ka zu ngaihven ta'ng e," tih leh meichher chhî a chhuah a rual nghal a. Tlangvâl pahnih pawh chuan an ipte banin, "Min lo nghak tawh, kan rawn kal ve lohin maw..." ti chung chuan an zui ta hlawk hlawk a! A nuṭa te an liam hnu chuan, a pâ hliam tuamna chu phelhin, tuilum chuan a sil fai sak a. Tuam loh chuan an dah ta rih a. Rei lo te hnuah a nuṭa te leh khual vâl te pawh, sa phur bawr ṭuaiin an rawn thleng ta! Chu Sanghal lû an han hmu zet chu, ropui an ti ngei mai! A ngho lawr chin ngawt pawh khâp a tling ṭhelh mai! Thlam kaiṭen, zau hem hawm tak maiah chuan an sa chu dahin, Ṭhuama chuan Silai chu a'n ban a, zen sawh mawlh mawlhin, pasalṭha chu hlado chhama han au rual awm hek lo le, tihian Sanghal hlado chu a'n chham ta a!

"Tlângan ê, au ral ral e,
Thangbiahnemi au si na hlah maw e,
Phaian maw, sawmfâng heltu lunglian,
Vâlan ê....mâng nghin khua tin than nân
Ha ṭha ê, ngho vâr a lum liau ve...."

a han ti vang vang a. Silai chu a han hmet puak dawp mai a! An lo hnaivai, chu hlado hre phak ho te chu an rawn kuk rawih rawih hlawm a. Sanghal sa chan tur chuan an pasalṭha te thlâm lam chu an rawn pan thliai thliai a! Thlâm chhunga an pa ber, hliampui tuara let der mai chuan, chu hlado a han hriat chuan, an khual vâl te rilru ṭhatzia chu a rinzawn thei ruak mai! A sa hliam lah a pualah an dah hmak mai a ni si.

Zanriah chaw turte chhum belhin nulâ chu a buai kher mai. Chutihlaiin, Sanghal sa chu a hrang tawk te tein an lo chan darh vek a. Thlâm danga riak hoin mikhual hmêl an han hmuh chuan an phawk deuh hrâ hlawm mai. A theih dan danin chu nghal chang sa chu an chan darh ta sap sap a. Rin ai takin a thau hrep lehnghal a. Ṭhuama erawh a hlado chham zawh rualin, vauah chuan Duhthanga nen an liam zui zat a. Hliam enkawlna atâna ram hmul damdawi an hriat ang angte chu an vai khawm a. An lo kir leh meuh chuan, Sanghal sa pawh an lo chhep fel thlap tawh mai!

Thlâm chhûngah lutin, hnim an lakkhawm ang angte chu chawhpawlha, nuai sawmin, pasalṭha hliamah chuan an bel mawlh mawlh a, fel takin an tuamsak leh thlap a. A malpui tha a pir chah avangin hun engemaw chen chu a bawksawp ngei ang. Pasalṭha pawh an damdawi belte chuan a hliam chu a tidai huai huai a, a rawn ṭawng peih ta viau mai! An mikhualte chunga lawmthu sawi tum chuan a han ang ziau a. Lawmthu sawi hman lêk lo chuan Thanṭhuama chuan, "Ka pu, hei, keini hi Muallung khua, Lalthanga khua lehtui te kan ni a. Hei hi kan lal fapa, Dârkhuma a ni e. Ani hnung zui hian Zawlpui khua leh Phulpui khuate tlawh tura rawn phek chhuak kan ni e," tiin an chanchinte a lo sawi khalh zung zung a. Darkhuma chu mei engah chuan an en zui vang vang hlawm a. Sa chan tura lo kal ho lam chu melhin, "Khual ṭha kan ni e, in lal ten rem an tih chuan han cham khawmuan kan duh hle mai a. Rem an lo ti em ang chu maw...Tin, hei, kan pasalṭha hi amah maia khua han thleng chi ziazâng a awm lo a, khaw mi ten in remruat anga kalpui nise, Bâwlpuin a hliam hi enkawl thuai se a duhawm hle mai." a han tih zawm zat a!

Tualchhung mi lo kal zînga hmel fel ren rawn, val upa ni ngei tur chuan, "Tum loh deuha khual vâl te kan han hmu thut mai che u chu, kan râl khel lo chauh a ni e. Hei lah, kan pasalṭha, kan khaw dai ngul zingah pawh kan kulhpui ber in rawn chhanhim lah niin, in chungah lawmthu sawi ngaihna reng kan hre lo. Kan lawm hle mai. Zanriah te han in bâr fel ta ula, hliam tuar ram han riahpui zawng a ni ngai love. In inpeih tikah khua kan pan dawn nia...." tiin, an ṭhian ṭhenkhatte chu midang pun turin a tir chhuak a. An fanu chuan Ṭhuama chu a nû phen aṭang chuan a lo thlir leh vang vang ṭhin a. A mit a la ngang mai.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)