KA HMANGAIH KA PASALTHA CHAPTER 2 BY MAWITEI BAWITLUNG

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
mawitei bawihtlung
Posts: 424
Joined: November 18th, 2020, 12:53 pm

KA HMANGAIH KA PASALTHA CHAPTER 2 BY MAWITEI BAWITLUNG

Unread post by mawitei bawihtlung » May 13th, 2022, 10:27 pm

KA HMANGAIH KA PASALTHA




CHAPTER 2



Ka hmui ka tuai nawk nawk a ,Hrangkhuma chu ka melh ran,min en in min rawn pan hnai a “ Nang hi he khawvel a mi hi ini lo " a rawn tihchuan ka meng kawk“ I tawngkam leh chetzia zawng zawngah hian engkim a chiangin ka hria " tiin a khabe tuai zauhin a rawn kun hniam ruai ruai “ Min duh deuh em ni ,Lalfanu kei hnamchawm tlangval hi min duh em ni" a tihleh chuan ka chil ka lem dawk.






Chhanna chang pawh ka hrelo ,ka en reng a mitmeng pa hrak leh a vun hang silo,ngo lutuklo a sam ni e a sam pawh helam mite anglo takin kan khawvel a mite angin a tawi a ,a kir deuh bawk,a hmui panlam sen deuh chek chu hmeichhe hmui niawm a mawi nimahse a inhmeh em em tho si,ka awmsawn chu nuisuk hian a awm tha a ,a kalsawn nghal nal nal “ Ka hmeichhe duhzawng ini ve lo tlat " a la tihram zui .







Ka au zui vak pawhin a rawn hawi let lo reng reng ,ka ngei lutuk ka bula thing chu ka beng vak vak ,a sawtlo ka kut ka tina mai mai ,khawchhung lam panin ka let hnak hnak a ,Kan in ka thlen dawn lai chuan kawta pasaltha tih hriat tak hian min lo au ding a ,ka en nghal vat “ Lasi nula ianga mawi inih hi le " tiin mitmeng hur zetin min en a ,ka ngeih derlo ka hawisawn san a ,Lalin ka luh dawn chuan ka kutah a rawn kai chawt ,thin thlak ka tum chu a vuan nghet sauh a,ka tal vak “ Tang buai duh suh nang hi kan Lalpain ka neih theih tur thu che a sawi vek tawh.








Chuvang chuan tang buailo mai rawh ka nupui ila tho tho dawn " a tihchuan ka au vak ,ka pa te an rawn tlan chhuak a “ Nangkha ka fanu kha rawn kaltir nghal rawh ,ka Lalin tual ngeiah buaina i rawn siam ngam a maw " tiin ka pa chuan a rawn kawk a ,mahse min man bet tu pa chu a nui huah huah ringawt ka pa thianpa ngei chuan“ I fanu hi ka pasaltha tan hian ka duh a ni,I duh zat zat ro pawh ka pe ang che ,engzat nge i phut" a ti nghal zat a ,ka pa chuan a melh rum viau “ Ka fanu hi ka zuar emaw iti em ni,tunah i mite ho nen hian ka khua hi chhuahsan rawh u ,kan inthianthatna pawh tawp nghal rawh se .








Ka khua ah hian vawikhat mah rawn lut tawh suh u " ka pa chuan a tikhur hluk a ,a thinrim tawk hle tih a hriat “ Chuti tur em ni ,keihi min cho ngam an awm em ,I khuaah hian mal beiha min cho an awm chiahin kan chhuahsan ang,chuti a nihloh chuan kan run ngei bawk ang cheu" min man tupa bawk chuan a ti tuar tuar a ,ka pa chuan a chhang mailo a chhan pawh tunah hi chuan tlangval bakah pasaltha tih deuh thaw zawng zawng chu lo lamah an feh vek vang a ni,chupa bawk chuan ka samah a kek sawk a.







Ka rak that “ Min cho an awm meuh nange ,in zanga nufaa inchhal si chuan pasaltha tih tham pawh in nei lo a maw " tiin alamah min pawt leh dawrh,ka mittui a hnam sawk “ Min thlah tawh pa min pui rawh " chupa in a min khawih a tum Chu ka pa chu rawn kal hnaih a tum a ,mahse ka nghawngah chema min tin avang chuan a tawp leh chawt,Kan thawm a vang chuan khawchhunga awm ho pawh an rawn tlankhawm a ,an hmanrua an rawn keng bawk .







“ Tumah rawn hnai suh u in Lalfanu hi a thi nghal ang " a tituar a ,ka mit chhingin chhanchhuak tu ka nghak tawp tawh “ Khalaia pasaltha chuan a mal a cho pawh a neilo a nimaw ,hmeichhia chauh maw a cho a ,mipa kan awmlaia ,hmeichhia chuta karah chaklo zawk tih hriat reng reng maw a cho a ,pasaltha nilo in Nusaltha tih awm tawk a ni" rawn titu avang chuan ka meng chhuak vat ,Hrangkhuma chu mipui kar atangin chem hum chungin a rawn pen chhuak a .








A mit chu ka hriat thiam dan ber Chuan thihna sar a zam an tih ang thin hi a niin ka hria,ka bula a awm a a mitmeng kha chu nep te a ni,a thip ram in a meng thim khap bawk,kan lam a rawn pan a min man bet tu pa chu a thinrim hmel hle min chelhna chu thlahin Hrangkhuma lam Chu a pan “ I thi ngei ang nau ang ,kei pasaltha Thangvunga ral lusawm khai tawh hi min hneh a thu in le " tiin a pan chhat chhat a ,Hrangkhuma chu ka lo hlauhthawn pui hle ,ka khur deuh der der Thangvunga hi an Lalpa pawhin a chhuan danah pasaltha tawk tak a nitih a hriat bawk si .







Hrangkhuma hi chu pem thar chauh an niin tumahin a hneh an ring biklo aniang ,khawngaih hmel takin an en a ,mahse taksa ah chuan Hrangkhuma a chungnung zawk larh thung,an inveh tan a ,Thangvunga chuan panin a luzawnah a sat pawp a ,ka lo rakthat ,hlauthawng zetin ka meng chhuak a ,mahse Thangvunga zawk Chu a lo kun ngul “ Pasaltha chu i thawm a va reh ta ve ,a hmaa au pung pung si i nu in a hlap ta che em ni le " Hrangkhuma chuan a tisak ,midang pawh chuan mak tiin an en thap,keipawh chuti tho .









Ka en reng ringawt,an inbei tha leh a ,mipui leh ka pa te ngaihtuah rual lohin Thangvunga lu chu a per nawlh a ,ka chhing sawk mai ,thawm reh thuap chu kut beng leh au riin a khat a ,Lalpa Ngura pawh a pasaltha thihna a bang chuan a meng kawk kawk ringawt “ Ka pasaltha Hrangkhuma,vawiinah hian i khua leh tui bakah i Lalpa zahawmna hi i chhanhim ani,chawimawina no hi rawn dawm ta che " a tihchuan Hrangkhuma chuan a lo hnial vat a .








Mahse ka pa chuan a tihluih tlat avangin tim dai hian zu chu a in a ,mipui lam chu an au leh dur dur ,ka pa chuan Lal Ngura lam chu panin “ Kan inthianna chu a tawp ta,mahse thian kan lo nih tawhna avang erawhin ka nun ang che ,tunah la la hian ka khua leh tui hi chhuahsan rawh u,phakar chhuah a chet lak in tum a nihchuan inkhua thlengin kan inluhchhuah dawn tih hre reng la ,rawn kir leh tawh suh u,tunah min chhuahsan nghal rawh u" a ti tuar a ,an ni pawh hmanhmawh zetin khawpawn lam panin an kal a .









Hrangkhuma chu mipui lam chuan manin an vawrh kang lawp lawp a ,keipawhin chhuang zetin ka lo en,ka duh zual sawt ,hmeichhe ho lah chuan an mitmeng de sawr sawrin an en a,ka thik takzet mahse Lalfanu ka nihna angin tihlan a rem lo thung,ka nu leh pa lam chu panin ka kuah vang vang a “ Naktuk nilengin ka pasaltha hmingin rallu kan ai ang,ka sepui ka thawh e " tiin a au a ,mipui lam chuan kut an beng leh dur dur ,khawnbawl te pawh chuan vawk leh sial nen an rawn do let ve a ,a khawpui chuan Kan rihulh hulh tawh








Lo sul haw ho pawhin thil awmdan hria in an rawn kal khawm ve a ,Hrangkhuma hming Chu a richuah chuah hi a ni ringawt ,a tuk lamah chuan ruai an buatsaih mup mup a ,keipawh helam thuama an rauh ber leh ngaihsan mizo thuam dik takin ka inthuam a ,min en duh hlawm viau,Hrangkhuma lah hmeichhe ho in zu an tulh reng ,an lam zawnga a nui te chuan ka thin an tithip vek in ka hria,chutah khawnbawl fanu hmeltha ti a thang ve hat Parkimi nen chuan an lam dun a,ka bula mite leh ka pa ngei pawhina inhmeh an tihthu an sawi chuan min tina.









Mahse ka hmelah tihlan a remlo,kan khaw tlangval ve tho,pasaltha ti hiala an koh Kapmawia nen chuan Kan lam ve a ,mahse phurna ka nei lo,ka hmelah erawh engmah ka tilang lo thung,lam ka lo zir sa nen ka virkual a,mipa lam chuan kut an beng dur dur ,Kapmawia lah lam thiam tak alo ni nen,Kan lam leh Hrangkhuma te lam chu min en tawn niber hian ka hria ,ka hah tawh avang chuan ka kalsawn a,Lal in hnung lamah chuan ka kal nghal daih.







Ipik zetin ka thaw chhuak hawk a ,ka awm chu ka dawm vang vang ,mihring hian kan vawikhat hmuhna atanga duh nghal mai kan nei thin,mahse kan mi duh nghal mai te thinlunga hmun insiam ve tir chuan kan beih fe a ngai thung si,inrem tur tak awm theihlohna khawvel,in mil miahlote awmdunna khawvel nisi chu “ Hetiang tur hian em ni keihi kha kham atanga ka lo tlak,ka Patea khan min that hman zawk sela ,mahse ka nu leh pa ka tawn leh avang hian ka lawm zawk tho si,lam tual lamah pawh kal duh tawh lo in inchhungah ka lut a .







He khua a ka harh chhuah tirha mak taka lo awm ka thawmhnaw bawm chu haiin,kawrfual fal lei vaw deuh hnalh,a hmalam tlema chhing chu ka inbel a ,ka make up tel ve tlem te powder leh lipstick chu inhnawihin ka sam chu ka thlah bawk,pawnlam pan chuan ka chhuak leh hnalh hnalh a ,ka kawrfual hmawr chuan lei hrut dalh dalh bawk,luhka ka thlen chuan ka pa leh khawnbawl bakah ka nu ngei pawh an meng kawk kawk mai.








An mit an nuai nawk nawk hlawm a ,chutah mipui lam thawm pawh a reh duk,ka lamah mit zawng zawng fu in an phun mur mur “ A hmelthat zia khi ,awi Lasi te pawhin an tluk bikin ka ringlo" ti a tawng tawk lah bo lo,hmeichhe ho pawhin ka incheidan nalh ti chuan min en dauh dauh hlawm a,“ Nu pa ka kalsawn lawk dawn a nia ,Chuan ka lo hawn hunah engkim ka hrilh tawh ang cheu" tiin ka kalsawn ,min dan an tum biklo ka kalna tur chu an lo tikaw sap sap,Hrangkhuma ka en chu hriatthiam har zetin min lo melh.







A hmelah engmah a lang ve hauhlo,kawtchhuah lam panin ka kalzel a ,keihian lasi te hmuh ngei ka duh,enge hetiang khawvela ka awm chhan hi,engkim hi a taka thleng tura ka rin ngailoh te vek an ni ,ka kal chhunzawm zel a ,rawm ngaw ka thlen thuk takah chuan “ Min hre thei anihchuan Lasi in awm a nihbawk chuan ka hmu duh che u" tiin ka au chhuak a ,a reh tlawk tlawk mahse reilo te ah ka khawhmuh a rawn fiahlo nghal riai riai a ,engmah ka hre zuilo ka hmaa kawr var sar ha chu ka hmu phe ruai a ni








Ka harh chhuah leh chuan lung bang ka hmu hmasa ber,ka thu chhuak ka bulah chuan hmeichhe hmeltha zet alo awm“ Ilo harh tawh a nimaw ,Lalnu in I harh veleh hruai tur che in min ti a " a tihchuan ka auh lasi ngei anih ka ring ta,lu bu nghatin ka zui a ,enge thleng ang tih erawh ngaihtuah ka duhlo




( Min hrethiam ru aw ,tunlai chu Kolasib lamah ka unau te lo neih ka pui ,buh tuh nen thlawh nen ka chauin zanlamah lah nau awm in ka buai lutuka ,ka type thei thlawtlo



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)