LUNGRENG NGAW BY M.Lusei Palian (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

LUNGRENG NGAW BY M.Lusei Palian (Completed)

Unread post by Ngaia » February 2nd, 2020, 8:27 pm

ij286n31.jpg
ij286n31.jpg (34.12 KiB) Viewed 16399 times


LUNGRENG NGAW....1...


M.Lusei Palian



...... ........ ..........


Pawl delh ruah a tla a, ni a rawn chhuah leh meuh hi chuan khawvel hi a thar vak mai hian a hriat a, chutih rualin a ken tel khawvawt erawh a deh dan a dang zar thung a.Sikni tak tak ni tawhin Ni hlui aliam ṭan chho mek a ni si a.


Serzawl, Lalbula khua hi in za nufa niin, tlang theng thaw nuam tak chunga a awm an ni a, tlang leh mual nuam tak chunga khaw awm niin khaw luh khan hi hmun hnihah chiah awmin ral ven buk siam nghal a ni a. Chhim chhak hawi zawng a mi hi Pawih bawh an ti a, hmar thlang lam a mi hi Mualnuam an ti leh bawk a. Chhim chhak hawi zawnga khaw luhna khan ah hian Thing lian ram an neih kum in Pawih ral an rawn lut chiam a, chu mi hming chawia phuah ta an ni awm e. Hemi kum hian Upa min Tlungirha'n khuang a chawi a. Khuangchawi hlim lai ral vengte inthlah dah lai takin Pawih ral an rawn lian thut a, Serzawl khua lah an chai hlim lai lo ni nen an lo inring lo kher mai, khaw zahve zet an rawn la phei hman tih chuan Pasalṭha Thanchhinga, Hualroa leh Selzama te hovin an han um let tak tak mai chu thih ngam lu pu te an innuai a, khawlaiah te chuan thisen leh mihring taksa bung a let rem rum mai a. Chutah tlangval hovin huaisenna nei tharin pawih ho chu an um let duai duai a. Pasalṭha ho an han insem darh ta tak tak a le, mahni buzawlah chuan an che thei phian ta mai. Ral ho chu an tawlh ta duai duai mai a, an zuam sual tih an hrechiang a, mahni sahim na zawngin an tlanchhe ta a. Zuksih mualah Pasalṭha Selzama hoten lo khalhin an hmelma ho chu an mang phiar mai a ni. Heta ṭang hi chuan an ṭhenawm khua te pawhin an deh khirh zia an hria a, khualkai pasalṭha pawh pathum lai an nei nghe nghe a . Khaw inlungrual tak a ni a, an lal Lalbula hi pasalṭha huaisen leh dehkhirh, ral rel thiamleh rorel thiam tak a ni lehzel bawk nen, an tui tlan a ṭha in an hrisel hle bawk a ni.


Pasalṭha Thanchhinga chuan zing ni lum ai pahin hreiha alo suih mawlh mawlh a,chutah Zamkunga zing leng chuan rawn hmu in,

" E khai a! Thanpuia pa, kha eng i ti chu ni maw....i va buai awm ve?" rawn kal hnaih pah chuan a ti a.

" Buai lah love, Kunga lah ni rengin, lo ṭhu rawh.... lo ṭhu rawh, eng thil nge ni ta a, min tlawh serh riau a ka hriat chu le.... " tih pahin a suih zawm leh thuai a.

"E khai...mai mai a, tlawh serh lah love, kei tehlul zawng fate chhawr rual la nei ve hek lo, pa rilṭam in thlawhhma an zauh tih zawng zawng ka nei zo va...ka riak reng mai a ni. Tunah zawng ka rawn inchhek zo ve ṭep e, ka beih rei pawh ka ring tawh lo...Kan thu dang alai chuan sa thau hunlai a ni ta, in ramvah dawn chuan ka hman ve tawh e.... Buk nghakah tal ṭangkaiin ka inring, ka telve chak riau mai ka ti..!" ṭhut hmun rem ṭhat sauh sauh pah chuan a ti a.

" A ni teh tak e, mahni ṭul ṭul hian kan ṭul a, buh pawh i ngah viau niin tlangkam aṭangin ka lo hria a, i rawn leng lut ngai ta si lo nen, ka rawn pui hman ta ngang lo che a ni!" inthiam chiah lo chuan Thanchhinga chuan a ti a.


A ni reng a, Zamkunga hian rual chiah lo mahse Thanchhinga te hian a rawlthar tirh ata an kaihruai nasa em em a, an ramchhuah te reng reng hian buk nghakah te an hruai tel ve ṭhin reng a, A ni Kunga lah inzir mi tak niin a tlawmngai thei phian a, mi huaisen tak niin lansarh a tum ngai hauh lova. A zia hi U zawkten an lawm phian ṭhin a, tin, a taima em em bawk a, aia ute zai ngai thiam tak a ni .

Chutah Zamkunga chu rawn ṭawng chhuak lehin, " Ni e, zu va in zah an ngai a, hawpkhawp chu ka thar ve mai e, taka Thinglian mual mawnga Sakhi sih te khan lung min len riau mai nia, dam ila, zuk vak leh ila ka ti ma nge" a rawn ti chhuak leh a.

" Tehreng mai, ti teh inchhung lamah i han lut teh ang, hei ṭukṭhuan bar nan pawh ala hma alawm le." A thil suih lai dah chuan Thanchhinga chuan a ti a. An ni pahnih chu an inzui lut ta a. Titi hrang hrang vawrhin zan lama Selzama te nena rel ṭha leh turin an thu chu an dah ta rih a.Ṭukṭhuan tui taka ei tura inthlahin Zamkunga chu a haw ta a.


Thinglian mual mawng lam, a nak pek deuh laiah hian Sih pakhat hi a awm a, chu sih chu Sakhi hian an duh riau mai a, ramsa dang hi lut ve zeuh zeuh mahse Sakhi hi an tam ber a, chuvang chuan Sakhi sih an ti ta a ni awm e . He sih hian makna riau hi a nei ve a, chen chilhtu hi a nei e an ti a, zan lamah chuan chan chi a ni love an ti a ni. Pasalṭha tak tak te pawh hian zan lamah hian an lo chang lui tawh ṭhin a, an zawngchhang ngai hauh lo thung. An thil hmuh leh hriat erawh an sawi zui duh hauh ṭhin lo!


Serzawl khua tan chuan an kum ṭhat kum ngang a ni a, buh pawh an thar nual mai reng a. Lal fing leh rorel thiam tak thla zar hnuaia awm an ni bawk a, khua leh tui te pawh kawng engkimah Lal leh upate thu zawmin thu khat vua in an hlim tlang ṭhin ngei mai. Mi tam zawk chuan an buh thar te pawh an thlen kim khat tawh a. Zamkunga hian kakzawn meuh a thar avangin ala in hawn kim thei lova, mahse hnai takah a rawn chhek tawh tho va, chawhma chhung pawn vawi nga vel an phur hman tawh a ni.Thanchhinga chuan a fapa rawlthar Thanpuia chu a pa Zamkunga te pui tur chuan a ti ta a. A ni hi Zawlbuk la kai chiah lo mahse a hlat vak tawh lova, pian ṭha tak hmel fel veng vawng, huaisen tak a ni. "Chhun tur a nei ṭha bawk a, pasalṭha tak ala ni ang" miin an ti ṭheuh va. Eng tin tak la awm zel dawn ni maw!


Zamkunga'n Thanpuia an hmuh chuan Thanchhinga thil tih dan chuan a ti lawm hle a. Lo hnar buai pawh a tum hran lem lo, a nupui Suaki pawh a hlim hle a, an fate an la te si a, an nupa ngawt chuan an la bei rei dawn si a.

"Kha..Thante, min rawn pui dawn a maw?"

" Nia, ka pa khan zuk pui tawh a ti a" tiin alo chhang a. A ni rawlthar, thahrui ngah a ni si, an nupa phurh zat dawn chu tham lem lo hian a phur ta vawk vawk mai reng a. Zamkunga chuan athlir voh voh mai a, i pa chu i khum dawn e a ti rilru a.

Nilenga mi pathumin an han phurh chuan phurh leh tur a tlem ta hle a, Zamkunga te nupa chu an hlim hle a ni.Ni suk chen vel a nih chuan an duhtawk ta a. Lawmthu hrilh mawlh mawlh chungin an inthlah ta a.


Zanriah eikham chuan chhawrthlapui pawh a eng no nghial a, A ni Serzawl khua leido nei lo khua chu an hlim tlang hle a, tualah naupang pawnto an ri chel chul a, tlangvalte pawh nula rim turin zawlbuk an chhuahsan ṭan a. Zawlbukah chuan putar ten an hnang hlai sa te kengin an lawi lut ve thung a, tlangval lengchhuak ve lo te thiamhnang deh an zirtir ṭhin a.Tin, Zawlbukah hian upa lamte hian Pasalṭha te chanchin te, tlawmngaihna hlutzia leh aia ute zah thiam a ṭulzia hi tlangval leh rawltharte an fah ṭhin a ni.Khaw tibuaitu Sapui leh ral a hnaih loh hi chuan nuam an ti ṭhin a ni. Thanchhinga te inah chuan Zamkunga chu a rawn lawr chho hma hle a, lenglen ar a khuan lai vel chuan Selzama pawh a rawn tei lut ve nghal a. Hetih lai hian Thanpuia pawh a pa te bulah ala tawlh ve hrat hrat a. Thla det leh hunah a ṭhian Pazawna nen zawlbuk kai an tum ve tawh nghe nghe a ni.


" Hei, ramtuk ala hun lo deuh a, Kan Zamkunga hian ramchhuah a chak riau mai a, zan li nga riakin kan chhuak dawn em ni niang.....kalna tur ka hria chu a ni hlei lova.." Thanchhinga chuan vaibel pak pah chuan an ti charh charh a.

Zamkunga chuan, " Nia, kumin chu kei pamal ta chu... in ramchhuahnaah ka zui thei mang lo che u a, mahse hei vawiin kan Thanpuia hian min rawn pui hlauh mai a, kan buh pawh kan phur zo ṭhelh ṭhelh a ni.Khuti chuan Suaki pawhin a zo ve thei tawh mai ang...! Ni e, in hman chuan tih a nih chu..." a rawn ti ve ta a.

Chutah Selzama chuan a aw a rawn thian ta kharh kharh a, " A chakawm viau teh tak e a,hmanni kan Khamlairang khualpa thusawi kha ka vawng reng mai ka ti, zuk ṭuan ve te pawh ka chak hle mai, tak tak zuk ni maw?" a rawn ti chhuak a, chutih lai chuan Thanchhinga nupui Zamani chuan tuibur zu pah chuan bel lianin zu a rawn chhawp a.

Chutah zu khawn pah chuan Thanchhinga chuan,"I khualpa chuan eng chanchin maw a han fah che a?" Zawt mitmeng chuan an ti a. Chutah Zamkunga pawh a insum thei tawh bik lo,
" Eng thil tak a han hrilh chu ni maw, chutia U Selzama a han phur viau mai chu..." a rawn ti ve ta a. Selzama chuan zu tui tling chu an lem leh khalh a, tap lama Zamani tuibur zu paha vawkchaw mei vil chu a thlir zawk a. A bulah a fapa Thanpuia chuan mei chu a lo ai ve mek a. Chutah Selzama chu a rawn ṭawngchhuak ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 2nd, 2020, 8:28 pm

LUNGRENG NGAW........2.....


( M.Lusei Palian)


......... ............ .........


Chutah Selzama chu a rawn ṭawngchhuak ta a, " Hman ni Kan upa min Laikunga'n khuang a chawi khan Khamlairang khua an laina kha kan lo khual a, chu ta an pasalṭhate chetna chu alawm maw le.....( a aw a thian kharh kharh a, a vaibel ah mei a chhuang leh te te a) An khaw ram an tlawh pawh zen zen lohna hmun ngaw chhah takah an ramchhuak a ni awm a, Lungreng ngaw an ti ta in ka hria....Sih te pawh a awm nual niin a sawi nghe nghe a, Sa chu duhthusam a ni e tiin an sawi ṭhin a. Marawh chu makna tak a nei a, huai nge ni eng thil emaw tawmkuk chu a ni phawt a,pasalṭha pahnih ngawt chin hriat lohin an bo der a. Chutah ramchhuak ho chuan khawchhunga tlangvalte han punin an zawng chhunzawm a, mahse tlangval pathum ngawt an bo chhunzawm ta a ni awm e.... Ngaw chhungah chuan puk pawh a awm nual niin a sawi a, puk pakhat chu zanah a eng pup ṭhin thu a sawi a, chu eng chu a mah Duhliana pawh khan a hmu a ni awm e. Ngaw chhung a nih avang chuan thawm hrang hrang pawh a tam phian awm e, rulpui lian tak hnu hma pawh an hmu zeuh zeuh a ni awm e...... chuta bo ta te hnu hma reng reng leh mi bo chu pakhatmah an hmu zui ta lo a ni.Tin, he lungreng ngaw ah hian Sazuk ki phir mawi tak leh Tumpang ki mawi em em mai a awm bawk a, mahse tu'n an kap thei lo, vengtu a nei niin an ngai vek a. Chutah an khaw ṭhenawm Pukpui khua chuan an lo hre ta thuai a, an pasalṭha Manga hovin an zuk luhchhuah ve ta a, hetah hian an khaw chhung Lal leh upate pawh chuan kallui lo turin thu an fah nasa hlawm a, mahse an chak nasa ngang si a. An zuk riak lut ta ngei a, mi panga lai an ni a. Mahse zan nga hnuah pawh an rawn let ta chuang lova, tlangval tlawmngai ten fimkhur takin an hnu an zuk chhui ve leh a, mahse an buk bak eng mah an hmu ta bik lo a ni. An bukah chuan sarep chu a awm nual a, mahse Manga leh a hote pawh chu chin hriat loh chuan an bo ve leh ta a ni. Mak em em bawk chu mi bo te hi an ruang hlawm tur takngial pawh hmuh tur a awm ngai lo.Lungreng ngaw chu pasalṭha te suattu kan ti ta ngawt mai ati ta a ni." a ti ta a.


Chu thu chu an lo ngaithla uluk hle hlawm a, a sawitu Selzaman a sawi thiam ngang mai si, an ngawi ṭhap hlawm a.Thanpuia leh a nu pawh chuan uluk leh makti fe hian an lo ngaithla nufa a. A thusawi tingaihnawm tur tawk hian chhawrthlapui pawh kawmthlang thing zar aṭang chuan a rawn eng lut raih a, dawih deuh fa tan chuan a ṭihawm lek lek hial a ni.


" A va mak tak ve maw le, han daidar ve reng reng ava chakawm ve le..!" Thanchhinga chuan a han ti a.

Zamkunga pawh chuan, " A mak hle mai tak ka ti, han luh chhuah ve hrim hrim pawh min tichak zo vek mai a...!! " an ti ve leh a.



An za chuan zu tui tling chu an dawt leh ta a, an ngaihtuahna erawh inhrilh lem lovin a thu hmun ṭham thung a.

Chutah Selzama chuan, " Kei tak pawh hian han luhchhuah hi ka chak hle mai ka ti, mahse ram pawh kan la tuk em si lova, ka dawn ruk reuh reuh han sawi ta ila.... Zamkunga hi chu ka beisei ngam chiah lova, Thanpuia pa leh tlangval ṭhenkhat te nen chapchar awllen laiin han fang ve ila te chu ka ti a, eng ni lo mah ila....mi chuti zat han bo ta chu ka lai a na riau mai ka ti!" an ti leh a.

" E khai a! Ka bang dawn bik hauh lo a nia!" Zamkunga chuan rang fe chuan a han ti a.

Thanchhinga chuan, " Ni teh tak e, la kal ve ila a ṭhat dawn chu.... taka kan Lal pitar thih kuma kan zau kha a ni maw ṭheh an tum tak a, ka pa khan a sawi tlat a ni" a han ti charh charh a. Ti ti han thlak lawk a, boruak han tih zan deuh a ni.Ani renga, hmeichhe hriat laia thil sawi vak hi pasalṭha te hian an duh vak ṭhin lo reng a, thu te hi an khuh hram hram ṭhin.

" Chuti a nih chuan Zamkunga hi kan laiah dah dan ngaihtuah ila, a hma rengin kan pui tlem mai ka ti...! Kan inpui tlang thei deuh mahna...!" Selzama chuan a han ti leh a.

Zamkunga erawh alo ngawi reng thung a, a ni pamal lutuk, an khaw pasalṭha Ramhual meuh te kara lo neia han awm chu chawimawina leh duhsakna tawpkhawk a tling hial si a . An za chuan an ngawi leh ta ṭhap a.


" E khai...! Taka Zan hnih riakin Zuksih mual vel khu kan zuk fang tak dawn em maw ni le....hman deuh a kan zuk vah kha chuan kan hlawhtling phian kha le... eng nge in ngaih dan?" Thanchhinga chuan an ti leh a. Chu thil zet chu Zamkunga rilru a ni reng a ni.


" A ni teh tak e, kan Lungreng ngaw chu nakina la kal ve ah ti ila, a ṭha tak a nge! Eng em kan ti ve lo turah ngai ta ila...." Selṭhuama chuan a rawn ti ve leh a.

Chutah tapchal a ṭhu Zamani a rawn ṭawngchhuak ve ta..." Mi in a hlauhawm e, an ti a, a kal apiang deuh tho an bova, an ruang lah hlawm tur a awm zeng pawh ni lo....kal ve ila han tih sasawi mai chu...tih loh loh zuk ni..." a tuibur zuk chu a fawp sek sek a, vawkchaw hawlh sawk sawk pah chuan a ti a.

Chutah zet chuan Thanchhinga chu rawn ṭawng chhuak vatin, " E khaih....mipa te titi naah hmeichhia an inrawlh ngai lo ve, Thantea nu, i vawkchaw a hmin chuan lo va mu tawh" a ti chang khal mai a. A ni lah taka, pa ho titi naa hmeichhe lo inrawlh hi an duh lo viau ṭhin reng a ni. Kawng leh lamah chuan Zamani rilru tur chu chung pasalṭha chuan an hrethiam em em zawk a, mahse pasalṭha chuan hlauhawm nasa tak te leh mi beidawnna a hlawhtlin hi an thil tih chak zawng a ni miau si ṭhin a ni. Chu chu pasalṭha te zia a ni kumkhua ve reng reng a.


Lungreng ngaw chu ramtuk zawh chapchar awllen a la luhchhuah ve chu ṭha an ti tlang a,tunah rih chuan zan hnih riaka ramchhuah an tum ta a, Buk nghakah Laiawrha pathlawi mawngzang sawm tel ve ni se an ti ta a. Zing fimah Selṭhuaman Laiawrha lo sawm chhin se la, a lo rem lo a nih pawhin tukṭhuan ei khamah kawtchhuah lungdawh a innghah mai ni se an ti ta a. Ni thara an zuan tur ramtuk dan tur te chu an sawi ho leh rih a, rei lutuk lo hnuah chuan an in mang ṭha tlang ta a.


An titi hre ve kartu Thanpuia chuan Lungreng ngaw chu kal ve alo chak ve zek zek mai a. Zawlbuk a kai ve ṭep tawh avang hian arukin a inzir ve nasa hle a, a patea Thanṭhuama hian Sihpui ruamah ral beih dan te, sapui beih dan te, inbuan dan thlengin a zirtir a. A ni lah hian a thiam chak em em a, a rilru a pe bawk a, thahrui a ngah hle bawk a ni. Thanṭhuama hi mahni inzo tak leh mi huaisen a ni a, a maherawh chu Sapui hliam(Sapui ah pawh a deh khirh ber leh lian ber Hlaiba an tih ) an beihnaah a chawnah Sapuiin a seh a, chuta ṭang chuan a kal bai ta a ni.Val upa niin ralrel thiam tak a ni tehtlawng a, nula te mitmei vawi tam hmu ṭhin mahse nupui neih lam a la awn thei ngang lo a ni. Amah aia huaisen leh ral bei thiam ni turin Thanpuia hi tuai hriam a tum tlat a, Sairawkherh perh aṭanga thal thlah dan muzuk fei hman dan te, kut ding leh vei hman dan thlengin ni tin deuh thaw an inzir a. Zawlbuk kai a hnaih tawh avangin inbuan bik pawh an uluk fe reng a ni. Inbuan ngat phei chu thiam a awm avang hian an zir uluk lehzual a. Tun din hmunah pawh hian Thanpuia hi beih tham fe a tling hial tawh reng a, zuam sual awl tak a ni tawh sa reng reng a ni.

Lenghnawt ar a la khuang lo deuh a, Lal in ah pawh an la ri laih laih a, khaw tlang dung tluana lam thiama an sawi Hrangmawii Lungpher khua, nuthlawi hleitling zet mai tlawn tlai ṭha em em mai si chu a rawn zin a, Upa min Laikunga Khuangchawi a rawn nang hman lo na a, Lal leh upa ten an hlimpui ngang mai.Lal inah chuan lam an thai reng mai a, he nuthlawi zet hi chu tawrh a har ngang a ni, Lalnu Saipuii pawh a pen tau sawk sawk mai an ti a.

" Lal zawng laiah Lalbula a lian ber e,
Serhmun zawl luahin a to lur e,
A hawina lam kaw duak zel e..."

Tiin zai an sa a, an hlim a ni, tlangaupa phei chu a phe kawi vat vat reng a, zu sem reng rengin a hman hlel a. Alaia lam thai chu Lal chuan an thai pui bawk a, chutah upa min ten an han chhawk a, an kham lo lam mah a ni hial zel.Tlangval tam zawk pawhin nula aiin he nuthlawi hi an thlang zawk daih nghe nghe a . A vanduai a, a pasal pawih ral do naah boralah a ṭang hlauh mai a, pasal dang ala nei ta rih lo a ni. A tan chuan a ṭha phian a, a zinnaah Lalte duhsak niin buh leh bal tam tak an hawn tir ṭhin bawk si, tlangval pali nga vel phurh pui a ngai ziah hial reng a ni! Tlangval tam zawk pawhin a lam thai chu an thlir ṭiau a, Lal ina chuan kai an ngam chiah si lo, a bih theihna lai an chuh a, an in bih chhawk a ni ber e. Zawlbukah pawh Hrangmani mawlh mai chu an sep rawtui nasa ngang a ni, putar ho pawn an vanglai chanchin dik hlel deuh deuh pawn an sep sep ve thova, an lung zawng a len tlang a ni mahna......!


Zing hma takah Thanchhinga chu a thova, a silai chu uluk fein a hrufai a, chutah a zawh hnu chuan a chempui chu hriam fahranin an tat leh te te a, a fungki te endikin a silai zen pawh a hem ṭang ngang mai! A rilruah chuan Nghalchang ringawt a awm a, Sanghal satui lai a ni tih a hre ran si a. A mang a ṭha bawk a, an ṭum a fuh ngei dawnin a hria a, a hlim sang mai a. Selzama pawn pathlawi Laiawrha chu a va sawm ve ta ngei a, a ni lah alo phur nasa mai a, ramchhuah han sawi dek dek hi chuan a inpeih sa at mai reng a ni. Tukṭhuan eikhamah Lungdawh a innghak turin an inthlah ta a.


Thanpuia chu zing hma takah a thangkam en tur leh sava veh turin a thawk chhuak a. Ramhnuai a chet hi nuam a ti hle a, hnah ro chungah pawh ri miah lovin a kal thei hial a ni. Thinglian mual a Khuangthli rah zet chu sava chi hrang hrangin an lo tlan ngei mai, Thanpuia Sairawkherh leh Thal hmang thiam em em mai chuan vahui chu a perh thla ta nghauh nghauh a. Pasarih vel a perh thlak chuan a duhtawk ta a, a zuk chhar khawm ta rih a, he khuangthli hi makna tak a nei a, mi nazawng hian an chang ngam reng reng lo. Thanpuia chuan a sava perh thlak a chhar kim tep a, a awm dan chu mak a ti deuh a, eng emaw hian a mawlh deuh a, thil eng emaw rawn tleng mai tura hriatna hi a nei a. Hetiang hian a awm tawh ṭhin reng a,pasalṭha in hriat lawkna an nei ṭhin tih chu a hria a, mahse pasalṭha niin a inhre si lo, rawlthar mai ala ni si, chutah a piah awih ṭen lam aṭang chuan ri deuh rak a hria a, hmeichhe aw nalh tak phun sep thawm niin a hria a, mahse heng ram ngaw ah chutiang tur an awm si lo,rang takin a sairawkherh chuan a tin nghal a, chutah le... a thil va hmuh chu le....mak a ti ngang mai, thawk lak nachang pawh a hre mai lo.....!




( chhunzawm tur...)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 2nd, 2020, 8:29 pm

LUNGRENG NGAW......3..


( M.Lusei Palian)


.......... ........ ...........



Thanpuia chuan thawk lak nachang pawh a hre mai lo....! A sairawkherh chu a dah hniam ta riai riai a, a mit khap lek lovin a thil hmuh chu a en ta vang vang mai!

Sazuk lian leh mam nalh tak leh ki nalh tak chungah chuan nula hmel ṭha em em mai, ṭawngkam pawha a ṭhat zia hrilhfiah phak rual loh tur hi alo ṭhu vang mai a. Mit khap miah lovin a melh ta vang vang mai,chu nula han ṭhat kim zia lah chu en tawh hnu pawha en nawn fo ṭul ang chi, a hmui te lah chu vanian rah sen tek ang mai lah ni, a awm bawr chu puan pan tak hian a khuh na a, a rawn do pawngtu duhawm tur zia chu hai rual a ni lo, A ni hmel ṭha leh ṭha tih hian a phuh chhuak zo kher awm lo ve!! Thanpuia chuan a mah ang rual mai ni hian a hre nghe nghe a. Chu tah a Vahui perh thlak la thi chiah lo chu a tal ta pharh mai a, a mit chu a la sawn vat a, Vahui chu a man ta a. Thanpuia chu an hawi chhuak leh a, Sazuk leh nula chu a hmu ta hauh lo! A mit chu a nuai nawk nawk a, chik leh zualin an melh kual a, eng thil mah a hmu ta chuang lo. Mak ava ti teh lul em! A sava perh thlak a chhar kim hnu chuan Sazuk leh nula a hmuhna hmun lam chu ava pan phei ta a. A pate an sahnu chhui dan engkim alo zirtir tawh chu a hmang ṭangkai ṭan hle a, lei lam chu inring ran leh uluk tak chuan an bih a. Mahse Sazuk hnu reng reng a hmu lo. Ava mak teh lul em! A mit vai niin a hre thei ngang lo, tin, khatiang a nula hmel ṭha kha ala hmu ngai lo, khatiang em em a ṭha kha chu a hmu ngai hauh lovang le! A ngaihna hre lo zet chuan a hawi a hawi a. A tawpah chuan ui tak leh hmuh leh chak tak chuan Khuangthli bul ata chu Thinglian mual tlak lam a pan ta a. Amah pawh nghilh dupin a inhre nghe nghe a, chhan hriat tur awm si lo hian a hlim ru em em lawi a. A thangkam chu an en a, Vahrit pahnih leh Varung pakhat a lo awk a. Tukṭhuan ei a hun hnaih tawh avangin In lam chu a pan ta a. In a thlen chuan a ipte puar lah chu a pa chuan alo thlir vung vung a, a Sava awhte leh a perh thlak te a hmuh chuan a lo kiai sak a.

" Thante, kha i va rawn hlawhtling ve, i pu te va pe ve teh...." Thanchhinga chuan an ti lar lar a.


Chutah Thanpuia chuan tuium a tui chu khiat khalh khalhin chhuata Vahrit pakhat leh varung leh vahui pahnih te chu a ipte ah a ak leh a, ngawi rengin a pu te inlam Mual veng chu a pan ta a. Thanpuia pu hi Phirtuala niin Lal Upa a ni nghe nghe a, Lal in hnaih berah an awm nghe nghe, In lian tak a ni, a pu te inah hian a pate Thansanga te nupa leh an fate pathum, a pi leh pu leh a pate a tho Thanṭhuama val upa te kha an cheng a ni. A pu hi Pasalṭha niin Sapui leh ral lakah khaw muantu ber a ni ṭhin a, mi ṭhenkhat phei chuan Lasi a zawl e an tih huai huai a ni. Pasalṭha hming thang tak tlawmngai thei si a nih avangin a hming a thang mawi em a, a tu leh fate hmingah pawh a hming thanna lai dah reng a ni. Dar leh ṭhi te, Sial te angah avang hian a hausa hle a, mi ṭhenkhat phei chuan Lal ai hialin hausa zawkin an sawi a, mahse a fing hle a, Lal lah hian a zai a ngai hle bawk si, Lal lovah chuan Serzawl khua ah na na chuan thil tithei ber a ni hial a ni.


A pu te in a thlen chuan a pi Chalmawii chu tap ah a lo ṭhu a, a pu erawh Lal Inah bawk a awm a ring, a patea fate ho chuan alo au chul mai bawk a,

" Ka pi, hei ka rawn pe che u aw!" Tih pah chuan a pi bulah chuan Vahrit leh Sava dang chu a ipte pui aṭanga phawrhin
dawhthlengah chuan a dah a. Hei hi a tih ṭhin dan reng a ni.

" Vahrit biangtai tek lah ni....Thante..... a va lawmawm tak ve, nangma awh vek em ni? In pafa hian sa min barh ngun teh e ka ti....I pu in tui ava ti leh dawn ve le..." A pi chuan ahan ti a.A pi chu a hlim hle a,Chutah a pate Thansanga fapa Thangkima, Thanpuia aia nau deuh hlek chuan,

" Ka pi hi aw....hei a perh thlak a nih hi..."alo ti vei hluk a.


" A ni maw....ka hmu fiah ta mang lo a ni e,Thantea hi zawng a pu a chhun fuh dawn e!"a ti ve leh mai a.

He ṭawngkam tak hi Thangkima hian alo helh ve deuh ṭhin a ni. A Papuia fapa hi a pi leh pu hian an duat viau mai hian a hre ṭhin a, naupanga thukhaw changin, alo thik deuh ṭhin a ni.

Rei awm tawh lovin Thanpuia chuan an inlam a pan leh ta a, Lal luhka aṭang chuan Lal fanu Saipuii chuan Thanpuia chu alo thlir reng chu niin, a han melh zawk a, Saipuii chuan alo la en reng a, hrehawm a ti kher mai, a zak ve hle a ni... an inlam chu a pan ta vang vang a.

....... ........


Tukṭhuan ei kham la hma takah chuan Kawtchhuah Lungdawhah Selzama chu ṭhu tluang duai in Vaibel alo pak khu talh talh tawh a, Laiawrha pawh chuan a chempui chuan thing alo sat charh charh a, Zamkunga leh Thanchhinga pawh an rawn thleng ve ta.

" Chhinga, hring han hnawl la, kal i rel mai ang u hmiang" Selzama chuan a han ti a.

Chutah Thanchhinga chuan hring a hnawl a, kal an rel tan ta. Zuk sih mual lam chu an pan ta a. An kalna tur hi a hlat tham deuh avang hian an kal chak hle nghe nghe a, Laiawrha chuan kawng tluan in fiamthu thawh tur a hre nghe nghe a. Hrangmawii lam thai pui a chak zia mawlh chu a sep zing hle a, a ṭhiante ho chu a tihlim phian a. Kawng lakah Vahrit ram tla te an ṭhawng leh ṭhin bawk a. Chawhma ṭha zet an kal hnu chuan an riah buk sual tumna hmun an thleng ta a. Chutah tumah in tirh leh chuan ngai lovin riah buk sualin an phe ta vat vat hlawm a, chutia mi pali lai phe ta suau suau chu an zo har lo kher mai!

Selzama leh Thanchhinga chu chaw hmeh therhlo zawngin an vak chhuak ta a, Selzama chuan Sakhi sih lam a fang a, Thanchhinga erawh Zuk sih mawng lamah a ṭuan thung a. Selzama chu rei pawh ava thang hman lo, a silai puak ri chu an hre ta thuai a,Sakhi Sih tih takah Sakhi lian tak chu awlsam takin a va kap mai reng a. A sakhi kah chu paw bahlatin buk lam chu a pan ta a.





Thanchhinga chuan sa chi hrang hrang hnu chu a hmu nual mai a, han chhui tur em em pawh a hre hran lo, a hnu thar avang em a tin ni! Lui te pawh in luite tui fim chu a dawt ta khalh khalh a, an ṭhu thlan dai te te a. Kal zai a rel leh chuan thawm a dim in a fimkhur ngang mai. Thil dang vang a ni lo, thawm hriat a nei a ni, a inngaihtuah vang vang a, Sanghal thawm ni chiahin a hre si lo, Sazuk thawm ni pawn a hre lehchiah si lo, mak a ti deuh hlek a, a bul vel chu a bih uluk hle tawh a, a hmaah chuan tlema ruam deuh hi a awm a. Chutah chuan eng sa emaw chu a awm ngei a, a tawm ngei niin a hria a. A silai chu a kau sa reng tawh a, ruam lan chian theihna ah chuan a tawlh phei ta hriau hriau a. Chutah ruam lan chian theihna a thlen chuan eng emaw hian " Suau" a ti a, thing zar te chu a che luih a, "Suau" tihri a lo chhuak leh a, thli lum a thaw huk a, eng sa mah hmuh tur reng a awm lo. Thanchhinga chuan mak a ti hle a, a ngaihna a hre lo hle! A ṭhiante nena la fiahah a ti a. Hlawhtling dawna a inhriat loh avang chuan Buk lam pan zai a rel ta zawk a.



Zuk sih lulam a thlen chhoh chuan Thing ṭang ri rek a hria a, chutah Sakhi chu a hmu a, tlanchhiat alo tum mek a,rang tak chuan a kap ta a, hma lamah a bawk thlawp a, muang chang chuan Sakhi tlukna lam chu a pan chho a, ahmun a thlen chuan alo thi fel der tawh a, a luah tak alo kap a ni. A ṭhelh teuh hle in a inhria a, a khi sak a. A paw bahlat a, buk lam chu a pan ve ta a.


Silai ri chu Buk aṭang chuan an lo hre pha a, Selzama chuan, " Ummm, a fuh e, Silai rik dan a dik tlat" an ti a. Chutah Laiawrha chuan," Chutia, kan hmuipui pu berin a fuh i tih tlat chuan a fuh a ni mai, buk a rawn thlen hma zawng chu kan inrin siak thei e" an za chuan an nui huk a.Zamkunga pawn Sakhi chek tur a buaipui a, a phur ngang mai.A hawp chakna a rei tawh bawk atin ni! Thanchhinga Buk a thlen chu an lo nghakhlel hle a, eng sa tak rawn hawn ang maw tih chu an inrin siak laih laih a, heng aia hlimna hi pasalṭha te thinlungah a awm lo a ni. Thanchhinga chu buk thlen hma chuan a hei ha dap dap a, buk a tlen chuan Selzama Sakhi kah chu an lo chan zo ṭep alo ni.

" E khai! Zama chu ava hlawhtling hma ve le...!" Sakhi paw bahlah chungchuan an ti a.

" Khai! Sakhi tho a ni maw?" Zamkunga chuan a lo ti var a.

" Sakhi sih a ni bawk alawm le..." Laiawrha chuan a lo ti ve bawk a. Hnah sat turin a liam zui nghal a. Laiawrha nge nge, pathlawi mawng zang ngang a ni a, a che fel vel thlup ṭhin reng a ni.

" Thana pa, lo ṭhu hah dam teh...kan han che ange" Zamkunga chuan an ti leh a. A ni renga Sakhi sa han sawisak vel hi chu a thiam em bawk a ni.

" Aw ti tawh, tikhan lo ṭhu chawl mai mai teh...i thang rei nek si a, kei ka vannei a, Kan va intawng nghal mai kha a ni" Selzama chuan an ti ve leh a. An hlim tlang dar dar hle a ni.


..... ......


Chumi ni fehreh san lai vel chuan Sih pui ruamah chuan Thanṭhuama chuan,
" Le...he muzuk fei hi han belchiang la, a hman dan i hriat tawh kha... khi laia khaileng khi han thil tum teh le" a ti a.

Thanpuia chuan Muzuk fei chu a lek vat vat a, chutah Tumbu khaileng lamah chuan an khawh ta a, a patea sawi tak chu a han thil ta chat a. Thanṭhuama pawh a hlim hle a ni, Thanpuia hi tuai hriam ta in a inhria a, Thanpuia chuan fei tumbu in thil chu a han chhar ta a. A lo let leh chuan Thanṭhuama chuan,
" Aw le, vawiin chu fei leh Thal hman kan zir leh ang, tun bak hi chu kan zir tawh dawn lova, nang pawh Zawlbuk kai i hun tawh viau a, hun kan nei tawh lovang. Fei leh thal hi rammut naah a ṭangkai em em a, Silai hi ṭha viau mahse a thawm hi a ring si a, chuvangin i hman thiam em em a ngai a ni. Rawlrala chet hun te pawh ala awm anga, chung ah chuan a ṭangkai hle dawn a ni." an ti charh charh a.

Thanpuia chu alo bu nghat nghat a, a patean thalfang a rawn phawrh chhuah chu an en a, ar hmul inthiat va ṭangkai zia pawh a hma in alo hre tawh nghe nghe a ni. Thal chu an la a, an kuai bial pawp pawp a. Chutah thalfang chu la in rang fe hian an thlawh chhuah tir ta zawt zawt a, Changel kungah te chuan a thil tlang phei pawp pawp mai chu a ni.

Thanṭhuama hian pasalṭha satliah chherchhuah a tum lova, mi bik ni turin a chher a ni. Hmanraw hrang hrang hman dan a thiam tir a, eng kim tihtheih deuh thaw chu a zirtir a. Aia upate zah dan te, tlawmngaih chhuah dan kawng hrang hrangte a fah awl lo. Zawlbuk a lawi huna a awm dan turte thengin a hrilh hre vek tawh a, tunah pawh hian a patea avangin Zawlbuk ala kai lo mai mai chauh a ni. Nileng chuan thiam thil chi hrang hrang a zir tawh te chu a ennawn pui leh vek a. Tunah zawng Thanpuia hi khing pha tur mai an awm hauh lovang le.

An ni tin zirna hmun hrang hrangah chuan lang lo lam aṭang hian thlirtu hi an nei reng ṭhin a, mahse uluk fahrana lo thlir ṭhintu chu hmuh theihin a inlar ngai lova,an la hmu lo mai chauh a ni. Thanpuia hmu lo chuan tlei har a lo tiin chhunni rei alo ti em em ṭhin a, a ṭhianah a duh em em ṭhin a. Mahse a hnenah hian inlan hun ala ni lovin a hria a, mahse zingkarah khan a insum hman lova, a inlan ta nge nge kha a ni. Mahse lo thlira lo beiseitu tan chuan kha kha a ngai tlat si kha a ni. Thil a zep thei em? Ṭhian ṭha ni tlak a ni em? Tih kha fiah a ngai ve tlat si a ni. Ti kha chuan a tawnmangah pawh ava inlan thei tawh mahna...!


....... ...... .....


Buk tualah zanriah an han kil meuh chuan Laiawrha pawn a hma a hai kaw chak ngei mai! Mei engah chuan an ṭhu far a, ṭawng zai pawh an rel hlei thei lo, Sakhi tuihang leh a chek an han hawp meuh zawng, dam man hi a awm hliah hliah hian an hria a. A tui an tih thu chu an inhrilh nawn sek hlawm a. An sa te an rel fel hnua zanriah bar an ni bawk a, lenglen hun zet chu a ni tawh reng a ni. Tui taka chaw an ei lai chuan buk bulah chuan thawm an hre ta tlat mai le.....!

Pasalṭha awm khawm tih takah an chengrang pawh an dah hla lo hle hlawm a, thawm chu hai theih miah loh hian buk chu a rawn pan ve ta zel mai....

An zanriah kil lai tawp hmak in chengrang an dawm ta far a, thawm lo chhuahna lam chu an hawi ta ṭhap mai le....


( Chhunzawm tur)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 2nd, 2020, 8:29 pm

LUNGRENG NGAW.....4...



( M.Lusei Palian)


An zanriah kil lai tawp hmak in chengrang an dawm ta far a, thawm lo chhuahna lam chu an hawi ta ṭhap mai le...

Thanchhinga chu a ding hluai a, Sakhi vun leh Sakhi sa rep tul hnih chu ala a, thawm lo chhuahna lam chu a pan phei ta mai a, a ṭhiante ho chuan an lo en ṭhap a, chutah ring deuh chuan,

" E...Pasalṭha, i ril a ṭam a ni maw!? Kha hei hi lo tem ve teh... " tih pah chuan Sakhi pahnih vun leh sa rep tul hnih chu a theh phei ta a.


A thawm lo chhuah dan a chhut khan Sapui a ni tih a hre nghal a, an sa rim a hria tih pawh a hre mai reng a, Sapui, Ram lam pasalṭha meuh hi chuan hriatna a nei ṭha tih chu pasalṭha te reng reng hian a hria a ni. Tin, Sapui hian mihringte hi a seh mai mai ngai lova, ran leh mihring te rawn seh ṭhin hi chu Sakei tar emaw hliam nei emaw hi an ni tlangpui a, an theih ang tawkin mihring te chungah zahngaihna an lan tir hram hram ṭhin a ni. Chuvang tak chuan pasalṭha te pawh hian pawi rawn khawih ni lo hi chu hmu mahse an hel ve hram hram ṭhin reng a ni.

Selzama chu rawn ṭawngchhuak ve nghalin, " I kham khawp loh deuh leh min rawn dil leh la..." an lo ti a.

He Sapui hian an mahni rawn beih mai chu a tum lo tih an hria a ni, rawn tum se chuan a thawm an hriat hma khan a rawn seh hman daih tawh ang. Selzaman chu chu a hre ran a ni.

" Kei zawng lo ei ṭeuh mai teh ang" Laiawrha chuan a lo ti thung a. Chaw chu alo bar zui mawlh mawlh a. An pathum chuan Laiawrha chu a en a, ri lo chuan an nui a. Dem mai chi pawh a ni lo, A ni Laiawrha hian pasalṭha, an khawchhung mai ni lo, tlang dung tluana thang hat te a riah pui a, a thla a muang em em a ni. Sapui pahnih khat lakah an zam mai mai dawn lo tih a hrechiang em a ni. Sakhi chek te chu a hawp thlurh thlurh a..

Midangte chuan chaw chu an ei zui tawh lem lova, tui uma tui chu an in a, an vaibel la chhuakin an zu ta zawk a. Sapui thawm pawh chu a reh ta hmak a. An thil pek kha lungawi takin a kalpui ta a ni fahmiang.

" Zingah hian Zuk sih mawng lam han fan leh ka duh riau mai ka ti, Zamkunga nen hian kan zuk fang dawn em maw ni aw? Engtia ro han neih chi nge ni ang!" Thanchhinga chuan an ti charh charh a.


Chutah Selzama chuan, " Ni tuk e a, Sakhi Sih mawng lam fan ka lo tum a, tukṭhuan ei hunah buk lam pan khawm mai ila a ṭha ange " an ti ve leh a.


Zamkunga pawh chuan, " Ṭha in tihna lam lam kha a ni mai, ro hran ka nei lo ve!" A rawn ti ve ta mai reng a.

An chaw eina tihfel nghal pah chuan Laiawrha chuan, " Zing tuk pumin Sakhi chek lo hawp ila, mum haw kang ila a ni mai! " an tih ve chuan an nui zo leh ta a. Zamkunga chuan an eina tihfel pui an tum chuan Laiawrha chuan alo phal i khaw lo mai a. An han inbuan fiam leh te te a.


An sarep chu ur deuh a ngaih avang chuan an thing fawm khawm sa chu an tuah belh sauh sauh a, a rim ngawt pawh chu a tui vang vang hle a ni. Ti ti hrang hrang an vawrh a, a chang leh an nui ho leh dar dar ṭhin! Laiawha chuan nuthlawi Hrangmani an sep kual vel tak tak ale, an nui lo thei lo. An khaw nuthlawi mawngbawr ṭha leih lawih Zaliani inbual Khurchhe mawnga a lo hmuh ruk thu an sawi meuh chu a sawitu in a thiam bawk a, chil an lo lem khalh thei hial mai reng a ni.


Van var a arsi an han thlir chuan a lo pe chiai mai a, siruk pawh van laizawl a thleng ṭep a, a hma tawh lo tih hria in buk chhunga mut zai an rel ta a. An han mu ṭan chiah chu an buk mawng lam aṭanga rawn ri chho bawrh bawrh thawm an hria a. Chutah chhak lam te, an sir lam aṭang te, an piah lam aṭangte chuan an rawn ri phei ta bawrh bawrh mai! An buk thlen hma chiah chuan an tawp chat zel mai si. Tumah muhil an la awm lova, " Eng chu ni maw?" tih chu an zawhna tuma sawichhuah si loh chu a ni. Chutiang thawm teh nuai an hriat avang chuan an inbeng kang ta hlawm a, Thanchhinga chuan a aw an thian kharh kharh a, a ipte pui ak in buk pawnlam chu a pan ta mai a, an vai chuan an zui ta a. Chutah buk pawn an thlen chuan mak tak maiin an buk chu chhum dum hian alo hual vek chu niin, a ngaihna an hre lo hle mai! Huai hovin an tibuai dawn tih chu an hrethiam nghal mai a. Chutah an din khawm lai chu thli a rawn tleh ta chiam mai a, an meipui chhehte pawh a rawn tivam ti tih a, mei si a leng chum chum ta mai! Mei eng aṭanga alan dan chuan chhum dum chu an che thei a ni. Chutah tlai lama Thanchhinga aw hriat ang chiah khan " suau" a rawn ti ta a, thing buk te chu a che luai a, " suau " a rawn ti leh a, an buk vel chu a nghing lawih thei hial a ni.

Chutah tak chuan Pasalṭha te thinin a tuar ta ngang lova, Thanchhinga chuan,

" Engvanga mi mu ṭha hle hle lai min rawn tibuai nge in nih, thlawkbo rang rawh u!" Chemtum hum ran chung chuan an ti a.

Selzama pawh chuan, " Kan um darh hma che u hian thlawk bo rawh u" a rawn ti ve leh a.

Chutih lai tak chuan nel tlang leh lei ṭhil a rawn thlawk fua fua ta mai, an bul vela chhum dum kar aṭang chuan eng emaw hi a thum bul bul a. A sawi chu hriat theih a ni lo, inbe thawm a ang mah hian a hriat a. Lei ṭhil leh nel tlang chu a rawn thlawk leh fua fua a, mahse tumah han bihruk tum leh tlanchhiat tum an awm lo. An dinna ah chuan an chempui kengin an ding far a, zamna leh hlauhna an nei lo. Hetianga ram ngaw a zana lei ṭhil leh neltlang a vawmtu huai ho hian mihringte hi an vawm fuh ngai hauh lova, tih ṭhaih a tih hlau an tum ṭhin a ni. An chenna ngaw rawn tichereu tur riakah ngai in an lo tih hlauh chuan an chenna an daidar ngam lo ṭhin a ni.

Huai ho pawh chuan chuti taka an mahni rawn hlau lo ta chu mak an ti ve tho mai! An thawm leh an thil tih chuan a ti hlau ve hauh lo! A hma a mi dangte an lo tihhlauh ṭhin tehlul nen, tuna an ram rawn dai lut tu te chu an deh a khirh ṭalh mai.Huai ho pawh an inrawn ve nak nak a, chu chu thum bul bul kha a ni. Mahrawh chu an hotupa in tih ṭhaiha tih hlau tur a ti miau mai si a, an hotupa thu an zawm lo ngam si lo hi a lo ni.


Chutah Thanchhinga thin chuan a tuar ta lova, a chempui vilik chung chuan chhum dum chhah tak lam chu a pan phei ta a.

" Huai rimchhe ho, thlawk bo rang rawh u" tih pah chuan a chempui hriam tak chu a vai fua fua a.

A ṭhiante ho pawh chuan Thanchhinga tih dan chuan an rawn tizui ve nghal a, chhum dum chu a tawm tawk tawk thei hial a ni. Chutih lai chuan thing te chu a ri ta fua fua ta mai a, eng de zawr zawr hi an hmu a, pachang mangang au thawm te an hre zui a, rei lote hnuah chuan chhum dum chu a bo ta duak a, chutah chhum leivak var chuan buk leh a chheh vel chu a tuam ta zawk a.A ngaihna a hre lo hial zawk a, chutih rualin eng ho emaw chuan an rawn venghim a, huai ho chu an rawn bei ve tih chu an hre ngei a. A muanawm ta raih mai a, chu chhum leivak var chuan chhawrthla eng te chu a hliah hauh si lova.


Selzama chuan chu thil thleng chu a hrethiam kher mai, a tawnmang lama a ṭhianten an rawn veng ta tih a hria a. A thawveng huai a,

" Ti ru, i mu tawh ang u, hei min tibuai tawh kher lovang!" an ti a.

" Ni e, i mu ang u hmiang..." Thanchhinga chuan an ti ve leh a.

Buk chhung lamah chuan an lut tlang leh ta a. Chu zanah chuan tui takin a mu ta hlawm a. Khawfing chah hma deuh chuan Selzama chu a tho a, mei chu alo la ling a, a vur belh a. Thanchhinga pawh rawn tho chhuak ve nghalin,

" I va harh hma bik ve le.." a rawn ti a.

" Ka tho ve chiah a ni..." tiin Selzama chuanr alo chhang a.


Zamkunga leh Laiawrha te pawh chu an rawn tho chhuak ve ta nghal a, hetiang ni khua hian tho tlai bik nih hi an hreh tlang mai piah lamah an duh lo ṭhin a ni. Laiawrha chuan mei chu a rawn tuah ṭha leh a, zing ṭhang ṭhangah a zai al al a. Midang chuan an silai te enfiah leh te te in an fungki a zen te chu an enfel leh a. Leilung lan hma chuan an tumna ram ṭheuh ṭuan an tum a ni.

Thanchhinga leh Zamkunga chuan Zuk sih mawng lam chu thawm dim fe hian an pan ta a.Selzama pawh Sakhi sih mawng lam chu a pan ve ta a. Thanchhinga te chu lo fing hnih awm vel an kal hnu chuan mual zingzum nakpek lamah chuan an her a, sarual thawm an hre mai reng a. Chutah an han inmelh a, zawi sap hian Thanchhinga chuan,

" Nghal rual an ni in ka hria, ti teh i hual teh ang " a ti ta sa sa a.

Hual dan tur an inhrilh a,Zamkunga chuan alo tlankhalh thung dawn a ni.Chutah thawm dim tak chuan Nghal rual chetna hmun chu Thanchhinga chuan a pan ta a. A lan theihna a thlen chuan an lo tam ngei mai, changel hungah hian an lo awm a, a lian ber nia a hriat chu a silai chuan an tin vang vang a, a zakdawhah tak chuan a kap ta a, a zen a thun tling ṭha bawk a, a puak ri a ring kher mai. Chu sanghal pawh chu a lir hlawl mai a, din leh chu an tum a, mahse a tlu leh ta hlawl a, a ke hnung a leng vat vat a. Chutah sanghal dang te chu panna lam tur pawh hre lovin an tlan darh ta a. A silai chu sawh lehnghalin a zawh hnu chuan a sa kah lam chu a pan phei a, chutih lai tak chuan Zamkunga silai pawh chu a chhak hla vak lovah chuan a puak ve leh ta dur a. A ri aṭang chuan a ṭhelh hauh lo tih chu a hriat theih mai reng a, Thanchhinga chuan hlado chham an tum a, chutia a sa kah an rah lai tak chuan Nghalchang a pikhawi ni ngei tur hi a lam pan chuan a rawn ri thla ta buan buan a. Kah nuam awm tawk mau tluk khat velah chuan a ding ta chat mai. Chutah Thanchhinga chuan a kap ta hauh lo, alo thlir vung vung a, chu sanghal pawh chuan a rawn hmu ve thuai a.

" Chhuah lamah te, tlak lamah te lo va hahchawl tawh, buh leh balah zahngai la!" A ti ta daih mai a. Chutah nghalchang chu thlang lam pan chuan a ri thla leh ta buan buan a.

Thanchhinga hian a rem em e tih vang ngawt hian sa kah vak a duh ngai lo, an zawh tawk an nei tawhin a hria a ni. Pasalṭha te hian Sa hi changin kap fo mahse an phurh zawh tawk bak hi an kap ngai meuh lo. Lo la inthlah pung se, an ti a ni. Chutih lai chuan Zamkunga hlado chham vang vang chu a hre chhawm ta a, a ni pawh chuan Sanghal hlado chu an chham ve ta a. Rei vak lo hnuah chuan Zamkunga chu a rawn thleng thla ta a, Thanchhinga sa kah chu an en a, lian a ti kher mai. Chutah buk lam thlen dan tur chu an rel a, Zamkunga kah zawk chu thlen hmasak ni se an ti a, a sa kahna hmunah chuan an chho ta a. Chu Sanghal sum nga vel chu an han thlawn hlawk hlawk a, an zawh tawk chuan an phawng a, buk lam an pan dun ta a.


Selzama pawh chuan Zukchal alo kap ve reng tawh chu niin, a lu chu buk alo thlen ve chiah bawk a, an hlim tlang kher mai! Tukṭhuan an bar te te a, chawhma chhung chu an sa kah thiar leh chanin an buai a, chawhnu lamah chuan an rep fel a, an ur ta tluk tluk mai a.An sarep ur rim chuan koh a neih leh an ring ran hlawm a, mahse an sawi chhuak lem lova. Selzama zukchal kah ki chu an thlir an thlir a, mawi an ti tlang hle a ni.Selzama hi zawng mi hlawhchham naah pawh a hlawhtling thei mai zel a, ṭawng tui tam lo, huaisen fe a ni ngei si a . Sa an kap hnem si a, an rep fe loh chuan in phurh zawh loh mai an hlau a ni.A ni reng a, mi tam tak chuan an sa kah sa hi an phur zo lo hial ṭhin reng a, inlama midangte an han pun hial ṭhin reng a ni. Laiawrha chuan nuam a ti hle a, kum cham a duh hial a, inlama buh chu phur luh mai a duh hial a ni. A tuk maiah haw an tum tawh si a, ram lama tui tawk puar fan lah maia eireng mai chu a duh a ni.

Zanriah ei hma chuan rawnal an sat a, bawmrang turin hnang an hlai sap sap a, an sarep phurh haw nan an hmang dawn a ni.Tin, sa ur na tur thing ro an fawm khawm ṭeuh mai bawk a, zan lama an mamawh an rin vang a ni. Zanriah an han kil chu an eitui tlang hle a, sakhi sanghal leh Sazuk sa te chu mau bur lian pui puiin an chhum a. A tui hang te mawlh chu tui an ti a ni. An sa kawchhung te lah siam zawh mai theih pawh a ni lo, saruh lian deuh leh sa chhe deuh chu Duhlian ṭawng thiam ve lo tan an dah a, an piah lungpui bulah chuan an dah vum thur mai a, chu Sapui chuan a rawn hmuh hun chuan a hlim hle ta ve ang le....! Zan alo nih chuan an buk chu chhum leivak var chuan a rawn hual leh chuai tawh a. An thla amuang sawt a, an piah lungpui phenah chuan sa khel ri leh bup bup chu an hre leh ṭhin a, mahse an awm a nuam zawk emaw tih mai tur a ni. Sarep ur an ngah nasa mai si a, mawng an hung rei hman meuh lo hlawm a, bawmrang tah nen an buai hlawm hle chu a ni. An mu har hle hlawm a, zan hmasa ang chuan tibuaitu an nei miah lova, zan rei takah chuan an mu ve ta hram a.


Zing hma takah an tho leh hlawm a, an kalna hmun hi a hlat tham deuh avangin tukṭhuan hma taka ei a, khaw en laia khawchhung luh hman chu an tum a, an phe vat vat hlawm a, an bawmrangah chuan changel hnah an phah a, sarep chu an han rem ṭha ta hlawm a. Tukṭhuan an bar zawh chuan haw zai an rel ta a, an inphur seng lo ṭhelh ṭhelh a ni. An zan lam khual Duhlian ṭawng thiam lo kha hleh tam lo phei se chuan an zo kher lovang le! Tin, an ni ho hi mi vantlang chunglam deuh ṭhah an ni a, Laiawrha tih loh chu pasalṭha leh chak tawk tak vek an ni. An sarep phurh chu a rit an ti hlawm hle a, kal pawh an kal chak thei meuh lo chu a ni. Laiawrha ta pek chuan chawlh a rawt sek mai reng a, pawi an ti fa lua lo a ni, an chawl sek mai bawk a.


Zanriah chhum hun hma deuh chuan kawtchhuah lungdawh an thleng ta hlawl mai a, an han ṭhu hahdam te te a, hlado an han chham ta vang vang a,chutah Laiawrha chuan a chuh ve tlat avang chuan hlado chu an chham tir ve ta a.Chu hlado chham ri an hriat chuan mipa naupang ho chu lungdawh lamah rang takin an tlan nghal a, thlen hmasak tum ṭheuh an ni. Tute nge ramchhuak? Eng sa nge an kah? A ki a mawi em? tih chu an hriat tum ber a ni a. Tin, mipa naupang ho hian salu zawn loh mawlh an hlau ṭhin a, salu zawn naupang ho hi pasalṭha thil phal deuh ten sarep an sem ve diat diat ṭhin a, sarep chang ve ngei tur leh sa lu zawn ngei tumin an hmanhmawh hle ṭhin a ni. Tin, hlado pawh hi pasalṭha ze dik tak pu, thilphal deuh te hian an chham tlangpui a ni.


Lal inah chuan chi teng tura pasalṭhate kal a hun em? tih an lo rel zo chiah a, hlado chham ri an hre zui kha a ni.Serzawl Lal Lalbula chu luhkapui ah ava ding lur a,

" E khai! Kan pasalṭhate an ramchhuak a ni maw!? Tu te nge ni le..? Sazuk leh sanghal hlado te lah ni... Tlangaupa, char lama ka zubel pakhat kha a tho ṭha tawh ang, va bel chiang teh... kan pasalṭha te chu hahzu kan zuk a niang chu...!" an ti a.


Chutah Upa min Laikunga chuan, "Thanchhinga te ho an ramvak e an tih kha.." a lo ti thuai a.

Upa Tlungirha chuan, " Selzama pawh a tel ve an ti tak kha...kan Selzama hi zawng a hlawhchham awm pawh ka la hre lo ka ti" a rawn ti a.Upa Tlungirha hian Upa Phirtuala leh a fapa Thanchhinga hi a tai ran reng a, mi hi a fak hreh em em mai bawk a, a zia ve reng a ni. A tupa Rodawla a buaipui ber a ni.Rodawla hi huaisen ve tak, mi chungtlak ran mai chi, ṭawngkam duhtui lo tak a ni.

Lalbula chuan a Upa min leh a rin em em Phirtuala chu a va melh a, " Kan Thanchhinga te ho an nih dawn chu maw... sa lu va lawm ila va kal tak teh ang u!" A ti leh a. Muangchang chuan vaibel ek te khawng thla in ramchhuak ho in thlen hun awm vela thleng turin an inbuatsaih ṭan a.


Kawtchhuah lungdawha naupang ho an thlen chuan an hlim hle a, Sazuk ki chu mawi an ti hle a, Salu zawnna tur an buatsaih nghal a," haw haw " chung chuan khawchhung lam an pan ta a, Selzama chuan Thanchhinga te ina luhkhawm phawt tur tiin naupang ho chu a chah thlap a. Chul ram fang haw tlai deuh ho pawh Lungdawh an thleng ve hlawm tawh a. Khawchhung an lut a, Thanchhinga te inah chuan an lut khawm ta a.


Zamkunga chuan sa lu zawn naupang ho chu sarep lian tawk hrang hnih thum ṭheuhin an sem a, an lawm hle hlawm a. Chutah Lal leh upa ho chu an rawn lut khawm ve ta ṭak ṭak a, a hnung berah chuan Tlangaupa pawh zubel pu in a rawn lut a. An lo ding suau a,

" E khai..! Thu hah dam teh u, hei hahzu kan rawn zuk ang che u kan ti a, I hiau, chu Sazuk ki chu ava mawi tak ve, a eng kalh mai ka ti, tu kah nge ni?" An ti zui a. An ni ho pawh chuan ṭhut hmun an han rem a,

Thanchhinga chuan aw an thian te te a,
" Sazuk ki mawi tak leh sakhi pakhat hi Selzama kah a ni a, sanghal pakhat hi Zamkunga kah a ni bawk a, Chutichuan heng ( a kawh bang) hi ka kah a ni ve thung!" A ti a.

Zamani pawh chuan zubel chu a rawn dah belh a, tlangaupa leh Laiawrha chu an tufa chhunzawm a, hahzu chu an dawm tlang ta a.Tuman rui khawpin an inngam ngai lo, zahthlak hle a an hriat vang a ni. Phirtuala pawh a hlim hmel hle a, a fapa hian a rawn chhun fuh viau in a hria a.Lal chuan Sazuk ki chu mawi a ti ngang a ni, a chul achul mai a. Selzama chuan alo hmu kar a.

" Lalpa, sazuk hi ka kap nual tawh a, tun ṭuma mi hi chuan i bang han mawi se, i lo duh mial chuan ka lawm ngawt ang" Selzama chuan an ti a.

Chuta Lalbula lo hawi chhuak chiah chu a hmelah hlimna a hmuh theih mai reng a,

" Kan pasalṭha te nge nge, ka va lawm tehlul em! Zanin tlai chu a kaptu in thleng phawt se, chu chu a malsawm a, zan lamah tlangaupa in rawn pu chho se a ṭha ang e. Tin, salu lawmin zanin chu kan inah in vaiin rawn kim vek ula, vawiin lama kan rorel kha inhriat a ngai si a. Zanin chu hlim takin Salu kan lawm ang chu maw le, in zarah sa kan nghei ngai hek lo, a tihzia ngawt mai!" Lalbula chuan an ti charh charh a.


Rei tak awm lovin Lal te pawh chu an chhuak a, Lal fing chuan an dipna tih an hria a, a mawi tawk hi an zawng hram hram ṭhin. Chutah Sarep chu an han sem a, Lal sachhiah pawh an dah thlap a. Ṭhenawm hnaite an han sem ve a, Thanchhinga te chan pawh la tam tak a ni. Zamkunga pawh a faten Lungdawhah khan an lo hmuak a, a bulah an awm ve zel a, Sanghal lu chu kawkin " A pa kah a nih saw!" A khat tawkin an lo ti ve sek a. An hlim hle tih chu a hriat a ni. Zan lama Lal in a chuangkai tur an nih avangin an inṭhen ta hlawm a. Mahni in ṭheuh chu sarep phur lu lu chuan an pan ta a.


An haw darh hnu chuan Zamani chuan,

" Thana pa, Thana thang en alo la haw hauh lo a nia, zing lamah ṭhenawmte se huang a hung pui a, chawhnu lamah khan a liam ve kha a nia, hei thim hmul a ni der tawh mai si a!" ngaihtuah fe chuan a rawn ti a.


( chhunzawm tur)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 2nd, 2020, 8:31 pm

LUNGRENG NGAW......5...


( M.Lusei Palian)



" E...ngaihtuahawm a ni hauh lovang! Tlangval a ni ve tawh alawm, alo haw ve mai ang .!" Thanchhinga chuan vaibel pak talh talh pah chuan a ti a.


Lal sachhiah tur chu kho ah dah in Zamani chuan Lal in lam chu a pan ta a, a rilru tak chuan a fapa chu a ngaihtuah hle tawh a ni.


..... ....... ........





Chumi ni chawhnu la hma lam chuan Thanpuia pawh a thang en tur chuan a chhuak leh a, A sairawkherh a pu in uluk tak a a siamsak chu a keng bawk a, a patea Silai hi a keng fo ṭhin na a, mahse he mi ni tak hian Silai keng lovin Sairawkherh leh chempui chiah a keng thung a. Thingchang ngaw lam a pan ta kha a ni a, chaw chhun a bar tawh bawk a, a hmanhmawh lem lo! Tin, ramtuk ala hun chiah lo nen awllai ngang a ni a, chawhma lamah Pazawna te se huang a thawm pui kha a ni a. Rawlthar mahni tawka inzo tak a ni nen, a tha a za viau mai ṭhin a. Sihpui ruama an chet tlatna phei chu a pe veng vung hlawm reng a ni. Thingchang ngaw ah hian apa nen Sakhi thang an kam a, khan ṭha deuh laiah Beai a tlar zeuh zeuh bawk a.


Beai a kamna hmun a thlen chuan an en a, alo per thluah na a a awk lem lova, a kam ṭha pah zel bawk a, a chhuk zel a chutah a thangah chuan Vahrit pahnih a lo awk a, a ipte puiah a ak a. A hmul tla vel fimkhur taka paih fai in a kam ṭha leh a. Sakhi thang an kamna lam chu a pan leh ta a, eng ti zia nge ni sava hram pawh hriat tur a awm miah loh ni a ti rilru deuh a, mahse timna leh hlauhna a nei hauh lo. Sakhi thang en leh tur chuan a kal zel a, la hla deuh aṭang chuan an thlir a, thang chu a per ngei tih a hre ta, a rilru a hlim nghal hle a, thang ngul chu a uai tlat a ni. Chutah a va thlen dawn chuan thang bul vel chu a che hluai a, a ding chawt a, uluk tak chuan an thlek a, a thil hmuh chuan a tihlim hle mai, Sakhi alo awk a, alo la nung a ni. Muangchang lo chuan a chempui a phawrh a, a bula thing ban puam tia vel chu a fik hmawk a, hlam tling ṭep chuan a tan leh a, a va kal hnai a, chu Sakhi lian tak chu a vawhlum ta a. Thang chu a sut nghal a,An kuai let a, alo lian phian mai, a thlang lama an thang kam chu a zuk en leh a, mahse sa dang chu alo awk lem lova. Sakhi awmna lam chu a pan chho leh ta a, Pasalṭha te tih dan in Sakhi chu a paw bahlat a, in lam chu a pan ta a.Mi satliah chu ni se rit an ti ngawt ang, mahse he rawlthar hian rit a ti hauh lo, 'A pu Phirtuala a hlim leh ngawt ang chu' ... a pa te ramchhuak pawh an lo haw ṭep tawh ang tih te a ngaihtuah a, a hlim kher mai!


Thingchang hmun a chhuak chho ta a, kawng zal nuam lai a thleng phei ta a. He lai ram hi lova an neih zen zen loh a ni a, a reh hle ṭhin reng a, dawih deuh pa chu an kal ngam mang lo hial reng a ni. Chutah amaha hriatna awm chu a rawn chhuak leh ta a, eng emaw thil thleng tur a awm tih chu a hre nghal a, mahse a zam hauh lo. Hma lam chu a pan zel a, chutah thing hnah ri hluai a hria a,an hawi chhuak a,a chhak thingbuk chu a che luai luai mai a. Thanpuia chuan a Sakhi put chu dimtein a nghat a, chutiang thil ri a lo hre vat lo chu mak a inti hle zawk a ni. Thing hnah lah chu a buk hle mai si a, thehlei mai mai a ni lo tih a hre nghal a, an thlek ngial a, dum zeuh zeuh bak a hmu thei bik lo, Ni a tla tawh bawk si a, zawng em maw ni dawn aw? Zawng a nih a ring nghal a, zawng rual an ni ngei ang le, a sairawkherh chu an kuai a, rang tawk chuan an perh ta ṭhuai ṭhuai mai a, a perh ṭhelh hauh lo, a thum pung pung mai a. A perhna viau a, zawng chu ni se a perh thlak a ring a ni. Chutah le, thingbuk aṭang chuan Savawm a rawn tla thum ṭawk mai le..... Va chhar mi a ni ta hauh lo, a rawn lum deuh a, kawngah tak a awm ta ruau mai le. An inkar chu inchhung dung bak a ni hauh lo! Savawm lian tak khuai la alo perhthla alo ni. Savawm chu a meng sen rum mai a, a kawlh tawk lekin a rawn tla chu lo niin Thanpuia chu thinrim fe a melh in a rawn pan ta chhet chhet mai le. Tlan chhiat chu a tum lo bur a, a sairawkherh ala keng a, a ipte a saihlum an ṭham a, an perh zui nghal a aperhna bawk a Savawm pawh a ding dawt mai a, chu Savawm chu a huk ta dum dum mai , a perh chhunzawm zel a, mahse Savawm chu a ding rei lo, hmanhmawh fe chuan a rawn pan phei ta buan buan a . Sairawkherh hmanna chi a ni tawh lo, a sairawkherh a paih a, chempui a phawrh hman awrh a Savawm chu a hmu vuai a, vei lamah a lo zuang zawk mai a, a vawi khatna a him hram a. A rin aia rangin savawm chu a inher lehnghal a, Ni....Thanpuia chuan a ipte pui pawh chu a dah hman ta bik lo. Savawm rawn bawh phei leh chu a hnungzangah chempui chuan alo sat vak a, savawm pawn a rawn ben ṭhelh fua a,a mah pawh a insaseng hman lo ṭhelh a ni. A sat na bawk a, a kutthlak a na hrim hrim bawk nen, Savawm chu a huk leh dum mai a. A ke pahnih a ding ve lehin Thanpuia chu a pan ve leh a, Chutah Thanpuia chuan zuang chungin Savawm luah tak chuan sah vak a tum a, mahse Savawm chuan a tum a hria nge ni, a ke hmalam chuan alo indang ve a, a ke chu a uai ta hnawp mai le, he Savawm hian a zuam sual ve chiang ngawt ang. Chutah Thanpuia, rawlthar tha za tak chuan chu Savawm lian tak chu a luah a sat ta nghek mai a, a tlu ta hnawk mai, a tluk rual chuan a ke hmalam pakhat zawk chuan a awm a rawn ham ve zeuh hman tlat mai. A lo inveng hman lo chiah a ni, a thip nghal zawk a, mahse a ngaihtuah hman lo, Savawm chuan an hmui an hua tih a hria a, mahse duh thal chuan a sat thei bik tlat lo! A luah te, a rem lai laiah chuan a sat zawt zawt a, a patean kut khing hnih hman dan alo zirtir chu a ṭangkai hle a,a pa chempui hriam zawk kha keng se chuan a sat hlum thei tawh ngei ang, mahse an ramchhuahna ah a keng daih a,Chempui ṭha lo zawk a keng si. Mahse zam hauh lovin a bawhzui zel a, a rinaiin chu Savawm chu deh a khirh zek mai, mahse a inveng hlei thei lo chu a ni ber tawh a. A tawp a tawpah chuan a bawk thlawp a, chutah Thanpuia chuan thapui chhuahin a luah chuan a sat siah siah mai a. A hnu deuh chuan che tawh lovin a hria a, a chawl ta a, a hah hle a ni, a thaw ve hlawi hlawi tho mai, a ṭhu hnawk a. ....a awm Savawm tinin a rawn hamna atang chuan thisen chu a rawn chhuak ve a, a hrufai vat a, a na tih vang ni lo chuan thisen chhuak dan tumin a kut chuan a awm chu a nem vang vang a.


Thanpuia leh Savawm insual lai hi lo thlir rengtu an awm a, an lo ṭang ve hle a ni, mahse an duh duh in an pawh mai thiang bik si lova. Chu rawlthar zet chu huaisen an ti in hmel ṭha an ti hle mai, an lo thlir vawng vawng a, chung alo thlirtu te chu khuavang lasi te an ni. Thanpuia huaisenna leh chakna alo enchhin alo ni reng a, chuti taka savawm sum sarih aia lian mah chempui nena a hneh mai thei chu an ngaisang hle a, ṭhian atan an iai mawlh lo a ni. Chengrang chawia buannel rawn mawi turin an it tak meuh tawh a ni, chung hunah chuan an sa duat lai te chu rawlthar tan chuan an ui hauh lovang le...


Thanpuia chu rei lo te a ṭhu chawl a, an tho leh a, chu Savawm a insual pui chu a thih leh thih loh an chian a. Thi ngeiin a hria a, chhawl a sat a, a chhawl chhin ta a. A Sakhi chu zo taka paw bahlat lehin khaw lam chu a pan leh ta a, a pen a sak ve deuh ṭalhin a hria a, an hawi chhuak a, khua chu a thim lek lek tawh alo ni. Lasi te chuan an thlir liam ṭhak a, huaisen an tiin mipa fa diktak a ni tih an hrechiang ngei mai. Hman hmawh deuh viau mahse a chau ve deuh a, a awm reng a ni thapui a hmang nasa em atin ni! Mahse kal muang a ni hauh lo, Lungdawh a thlen chuan khua chu a thim ta a.


........ ....... .......


Thanchhinga te inah chuan Zamkunga a rawn lawr hma hle a, khua a thim fel deuh chauh a ni. Anni chuan zanriah pawh an lo la kil hauh lova, tapah chuan vaibel a mei chhuan pah in a ṭhu ve ta rih a.

" Eng tizia a tun thleng thleng a zanriah la ei lo nge in nih? Salu lawm ho kha an awm rei deuh elo?" Zamkunga chuan an ti a.

Chutah Zamani chuan, " Ni lem love, hei Thantea thang en tun thleng pawn alo la haw lo, a chawhnu chhuah alawm maw le, chawhma lam khan Pazawna te se huang an hung ṭha a, nidanga alo haw hun chu a ni tawh maw le!" An ti a, a aw rik dan aṭang chuan a ngaihtuah tawh hle tih a hriat mai a.

Thanchhinga chuan, " A lo thleng ve mai ang, sava zan riakte hi achang pah a ni mai thei asin!" An lo ti a,

" E...ngaihtuah reng reng suh, a rawn khawtlai mai mai a niang" Zamkunga chuan an lo ti ve leh a. Zamkunga hian Thanpuia thahrui ngah zia te, a pate Thanṭhuaman thiam thil chi hrang hrang a zirtir tih te hi a rukin hre kar a, chuvanga ngaihtuah vak lo chu a ni.

Chutih lai tak chuan Sumhmun chu a rawn ri ta ṭhep ṭhep a, inchhunga awm te pawn mei eng aṭang chuan an lo thlir thuai a, chutah Thanpuia chuan Sakhi a rawn pu lut zui nghal a, chhuat ah chuan dim te leh hnehsawh em em chuan a nghat a, a ipte pui a zen a Vahrit pahnih a phawrh zui nghal a. A naute ho chu an lo phul hlut a, Sakhi leh vahrit chu an lo chul an lo chul nghal a.Thanchhinga hian nau mipa pakhat leh hmeichhe pakhat a nei a, u nula Thanpari a nei bawk a ni. Mahse a u nula hi a pute in lamah a tam zawk a, a pi leh pu in a duat em atin ni, tu hmuh hmasak a ni miau va. Tui um hunna lam a pan a, tui chu a khiat khalh khalh a.

Chutih lai chuan Zamani chuan, " I va rawn thleng har ve Thante, kan lo ngaihtuah hman viau che asin!" an ti a.

Chik taka lo entu Zamkunga chuan, " Thante, mei engah hian lo kal hnai teh, kha sakhi i awk a ni maw? Sa inva ngah dawn ve le..." a lo ti vat a. Thisen a kai tlatin a hria a, tin Thanpuia hi a hah hmel viau bawkin a hria a, eng emaw a tawk a nih a ring a. Thanchhinga thung chuan a fapa chu alo thlir vung vung a. Chutah Sakhi chu an let kual vel a, a fapa chuan a vawhlum tih a hre mai reng a.

Thanpuia pawh dawhthlengah a ṭhu chhova chutah a awma savawm taina kha an hmu ta a, tin thisen a rawn kai hne hnu bawk a,

" I hiau, engti zia nge ni?" Thanchhinga leh Zamkunga chuan an han ti nghal a, Zamani pawh tapchal chu a rawn thleng chawpchilh nghal chu a ni mai, chutah Thanpuia chuan,

" Savawm khuai la ka perh thla pek alawm le, va zawn angai hauh lo nia, a tla hnai ta si a,min rawn zawng zui nghal a!! " an ti a, a khi suk duh chauh va.

Zamkunga chuan, " Chhe hei le, chu Savawm nen in lo innuai a ni maw, khawii hmunah nge ni a, in in ṭha ṭhen mai em ni?" an ti leh a.


Thanchhinga chuan, " Savawm khuai la te perh ngawt chi va ni suh, an kawlh duh asin, i rawn tlanchhiat san em ni?" an ti leh a.


Chutah Thanpuia chuan thu khuh deuh tak chuan,

" Thingchang ngaw lulam, aidu zawl phei ah sawn a nia, tlanchhiat san theih pawh a ni lo, khuaiin an lo seh chau deuh nge ni, tunah chuan a mu ta tual a kawngsir mai kha a ni, a mut hma khan min tai palh alawm maw le, " an ti ve leh a. Chutah a awm veilam hliamah chuan a nu Zamani chuan Saphai thau a hnawihsak mawlh mawlh a.

A thusawi hmang aṭang chuan a sat hlum ngei tih Zamkunga chuan a hrethiam a, Thanchhinga te zanriah bar chhung lo va zawn haw chu ṭha in a hria a. A ding ta nalh a,

" Tlangval tlem hruaiin kan va chian a nge, zanriah lo bar ula, sakhi hi chu nakinah kan chan mai dawn nia." a ti a, Thanchhinga chu an mit mei a! A chhuak ta nghal a.

Zamani chuan a fapa chu a zilh zui mawlh mawlh a, Thanchhinga erawh chuan a fapa chu a tlangval ta tih a hrethiam a, a rilru a tilawm hle a, Savawm a rawn sualpui a, chutah a awm veilam chhete chauh hliam a nei tih a hriat phei chuan a kiai sak a. Chutah a fapa chu tlawmngaih a ṭulzia te, a chakna chu midangte chungtlak nana hman a ṭhat loh zia te, aia u te zahthiam a ṭulzia te thlengin a hrilh ta mawlh mawlh a. Zawlbuk kai a hun tawh zia pawh a fah tel nghe nghe a. Chutah a naute pawh chuan an u chu an thlir vung vung a. Zanriah an kil ta a, an zanriah kilna bulah chuan Sakhi leh vahrit pahnihte pawh an let ngat mai a. Pasalṭha in a ni tih hi a hriat hliah hliah mai a ni, amah erawh chu he in a pasalṭha te hian inchhuanna leh chapona an nei hauh lo, an inngaitlawmin an tlawmngai hle zawk a ni.


Zanriah eikham chuan Thanpuia chuan vahrit pakhat chu a la a, a chhuak nalh a, a nu chuan a thlir zui a, " Tu chu i pe dawn ni maw!?" A ti a.

Thanpuia erawh tuikhur kawng lamah kal zelin in pakhat sumhmun aṭang chuan,
" In awm maw ka pu" a ti a,

chutah Inchhung ah chuan a va lut ta a, chu inah chuan pitar leh putar chauh hi an khawsa a. A vahrit ken chu tapah chuan a dah a, Pitar leh Putar chuan a ngaihna hre lo takin an en ha a,

" Hei lo ei ve rawh u aw" ati a, kal leh mai a tum a.

Chutah putar chuan, " Thantea lah ni, i hiau, i awk lehpek a ni maw!! " khuh kharh kharh chuan a rawn ti a.

Pitar lo ṭawng ve lehin, " Thante, kan va lawm ṭhin em aw....Khuanun mal a sawm mawlh ang che, i zar hi kan va zo zing tak em!" an ti ve leh a.

Rei lote a ṭhu a, chutah an in mang ṭha a, a haw ve leh ta a. He mi te nupa hi a khawngaih riau ṭhin a, fa an nei si lova, nupa rekin an khawsa a ni. Thanpuia hian a lainat ṭhin hle a, sava a perh thlak tam deuh leh a awh tam changin a pe ve ṭhin a ni. An tan chuan thil lawmawm tak a ni si a.


........ ........ ..........

Zamkunga chuan tlangval an lam hnai deuh panga lai hruaiin Thingchang ngaw lulam aidu zawl chu a pan pui ta a. Pazawna u tlangval pawh a telve nghe nghe a.Meichher eng zetin pathum lai an chhi a, fimkhur thu hlaah Zamkunga chuan Silai a keng bawk a, an kal chak hle mai. Tuibur hmuam da zet an kal hnu chuan aidu zawl chu an thleng ta a, Zamkunga chuan hma a hruai a, a fimkhur phian a. Chutah Savawm lo inchhawl chhin thlap mai chu reilote ah an va hmu ta mai reng a, Mei engah chuan an han chian a, Thanpuia chuan a luruh keh rum in a sat a, tin a ke hma lam chu a sah bung sak ṭep bawk a, a hnungzanga a sahna ringawt pawh chu thihpui tham a tling ngei hial ang le. An han chian meuh chuan sum sarih ṭha lam a lo ni hial a, hetiang khawpa Savawm lian hi chempui ringawt chuan a deh a khirh fe ang le, mahse hliam nei mang lo khan Thanpuia khan a sat hlum thei chu a nia! An inbeihna hnuhma pawh a pe hen hun mai a, chutah tlangval pakhat chuan,

" Thanpuia hian chempui ngawtin he Savawm lian tak hi a sat hlum thei chu a nia le....a pa a khum mai ang ka ti, kei zawng hmelma atan ka duh hauh lo nia!" a rawn ti chhuak phawng mai a.

" A pian reng khi a fuh mai, a fuke a lian ṭha a, in lo la chik kher lo mai thei a, thingnawi fawm a awl hma khan kan khaw chawilung khi a awm thleng thlengte zu han chawi thei a, Pu Auva te uikawlh pawh khian zu han bauh ve ngam hauh lova!" tlangval pakhat chuan a lo ti ve charh charh a.

" Engtiang taka thahrui ngah ni ang maw, kei ni ila ka tlanchhe thei mai ang a, sum sarih chu a tling hial awm si a," tlangval pakhat chuan a rawn ti ve leh a.



Zamkunga chuan, " Ti teh u naute u, thingtuai han sat ula, i zawn haw mai ang u hmiang" an ti a.

Tlangval pahnih chuan thingtuai an han sat a, chu Savawm lian tak an zawn haw ta a. Tlangval lian ṭha ṭhelh ṭhawlh vek an ni a, Zamkunga zawn ve pawh an phal lo mai reng a, a rit hle tih chu a hriat mai. Kal lam ang kha chuan an chak thei tawh lo, an ke pen chu a sak ve ṭalh a ni. An inchhawk sek a, khaw lam chu an hnaih hret hret a, kawtchhuah lungdawh an thlen chuan an han chawl vang vang a. An hahdam deuh hnu chuan Pasalṭha Thanchhinga te inlam pan chuan an sa chu a zawn ta zel a,rei vak lo hnu chuan an thlen ta a. Kawtkai ah chuan an han dah a, an thawmah chuan inchhunga awm zawng pawh an lo chhuak hlawm a. Thanpuia savawm sah hlum chu an han bel chiang a, lian an ti kher mai! Zamani phei chuan mak a ti hial zawk a, a fapa chu a chhuang ve takzet a ni. A u Thanpari chuan Pazawna aṭangin a nau Savawm sah hlum thu chu a hre ve thuai a, chutah a pute a hrilh hman chu niin a pu Phirtuala pawh a rawn thleng phei rang kher mai! Phirtuala chuan chutianga savawm lian a tupa in a sathlum chu a chhuang takzet a, a hlim hle bawk a, a rilru chuan min chhun takzet a ni a ti a. An chian vel a, lian a ti kher mai, Lal in kai a hun a, rei a awm thei si lo, hlim takin Lal in lam chu a pan ta a.


Thanchhinga leh a ṭhiante ho Lal inah Lal in salu lawm a tih avangin kal an ngai si a. Thanṭhuama leh tlangval te chuan Savawm leh Sakhi chu an lo chan dawn a ni.

....... .. ...... .........


Lal inah chuan Lal leh upate leh pasalṭha te an awm ṭhap tawh a, Selzama pawh Sazuk ki kengin a lut ve mek a, chutah kalkawnga a thu hriat Thanchhinga fapa Thanpuian Savawm a sah hlum thu bawk chu an lo titi lai mek chu a ni, a ṭhianpa fapa chu a chhuang ve hle a ni. Mawng a hun fel chuan Thanchhinga leh Zamkunga pawh an rawn lut zui ve ta nghal a, Lal inchhunga lo awm te chuan zawhna an lo zawt nual a, thu khuh deuh tak chuan an chhang zel a. Thanpuia mawlh chu an titi ber chu a ni. Tlangaupa chuan zubel a rawn chawi chhuak ta a, an in hma chuan Lal chun aw a rawn thian ta khak khak a, Lal lam chu an hawi ta ṭhap a,

" Ka upa leh Pasalṭha te u, hei zanin hian Salu lawm kan ti tak na a,upa te nen kan lo sawi tlan tawh a ni a, kan pasalṭha te hi kan rawn duh mah zawk che u a ni, Kan ram chhunga chi khur khu khaw dangin min rawn hauh lovin an lo teng ve a ni awm a. Hman ni Bukbawnga te zuk kal khan an rawn sawi tlat mai a, Tualvum khua te an ni e tih thlengin an sawi thei a...... Kei leh ka upate ngaih dan chuan an sim rawkna tur thil lo tih kan duh hle a ni, min rawn dil hmasa se chuan a tih dan dan a awm a, khaw dangin kan ram an rawn daidar ve ngawt hi ka lai a dam thei lo a ni" Lalbula chuan a ti chang fak a.


( chhunzawm tur)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 2nd, 2020, 8:33 pm

LUNGRENG NGAW......6...


(M.Lusei Palian)


........ .......... ...........





Serzawl Lal Lalbula chuan an sawi chhunzawm leh a, " Kan Bukbawnga te ho kha pathum chauh an ni a, chutah pakhat Buk nghak a ni si, a ma rawn sawi danin a ṭhianpa Dengliana nen an va hmu kha a ni a, an ni lah sal sarih lai... chu pawh chengrang chawi vek an lo ni si! Hmun thum laiah chi an lo teng mep mep mai a ni awm e, mahse an ram chhung a nih loh avangin an lo huaisar lem lova, Lal rawn hmasa an nih leh nih loh thlengin an rawn chian thlap a ni, an tih tawh chu dah ṭha ila, tun hnua an rawn tih tawh loh nan hmalak a ngai a ni" an ti dap dap a.

Lal thusawi chuan pasalṭha te beng a luh ngang mai, an ngaih dan a ni lo tih chu an mitmeng aṭang pawh chuan a chhiar theih hial awm e. Chutah upa min Laikunga chuan ban charh hian,

" Kan pasalṭha te u, kan ram chin hi humhalh tlat turin kan duh che u a, kan ram chhung ngei a, khawdang mi an duh thala an rawn daidar hi in lo thlir mai mai thei hian kan ring bik lova! Chuvang chuan Lal thu ngei hian che ta ula, kan ram kan humhalhna leh humhimna anih dawn chuan a ṭul leh leido te chu kan nei mai lah tur ni! Muang leia kan awmna pawh a rei ta alawm le!" an rawn ti ve leh a.



Upa Phirtuala chuan, " Umnn, Thil dang chu eng pawh lo nise, kan chi khur mawlh khu a nia Lal dang leh khawdangte pawh hian an it em em ni, Kan Lal hi rawn dil hmasa se a zia zia te pawh a awm a, khawdang in an duh hun huna an rawn teng ve a, thawm kan nei lo a nih ngat chuan..!" Tih pah chuan pasalṭha te chu an melh kual a, a sawi zo ta lem lova.


Selzama chu a rawn ṭawng chhuak ve ta a, " Lalpa, keini hi kan lo bengvar lo hle a, a hrehawm ka ti in zahthlak ka ti takzet a ni. Tunah pawh hian Tualvum khuaa Lal hnenah palai in va kal rawh u i tih leh kan kal mai ta lawng, kan khawram tiropuitu leh tinuamtu, tlangdang ngai miah lo leh tlangdangin an awh ngawih ngawih khu venghim turin kan inpeih reng e, 'zanin aṭangin ṭan rawh u' i tih leh kan liam mai tur lah ni, kan lo benghawng lo lutuk a, min ngaidam teh" an ti ve ta a.

Pasalṭha te aiawh a pau a ni bawk a, a sawi angin an chi khur venhim an duh a ni. Eng khua pawn rawn teng ve dawn ta se, Lal an rawn dil tur a ni a, chutah Lal in a phal chuan an teng ve thei ang a mahse chhiah an lo la ve thung tur a ni. Tualvum ho rawn chet dan chuan pasalṭha te lai a ti na takzet a, zirtirna pek hlak an duh viau a ni.


Chutah Lalbula chuan midang an melh kual a, sawi ve tur nei awm a hmuh loh avang chuan tihian a ti leh ta a,

" Ka pasalṭha te u, ka dem hauh lo che u, hriat loh na na na chuan indem ngaihna pawh a awm lo a ni.Amah erawh chu tuna chinah in zing aṭangin a thli thlai tur in dah ula, in thu chu zawlbuk thlen ni se, in kutah kan dah tawh ang. A ṭul leh ṭha intih angin in kalpui dawn nia...( a aw an thian leh te te a,) E khai....tlangaupa kan pasalṭhate hi an chhawl a hal tawh ang, a thlum tui ṭha ṭha kha han sawr sak teh...." a ti ta a.


Tlangaupa pawh a phe ta vat vat mai a,Seki chuan zu chu an sem kual dan dan a, an rorel te an zo ta bawk a,ti ti dangah an pakai ta a.


" E khai! Kan Lalpa zu nge nge, a thlum tui kher mai a!" an ti a, an in zel a.

Mahse pasalṭha te hian hetiang hunah hian a mawi tawk bakin an lem ve ngai lo, eng thil pawh an khawtlanga lo thleng thut thei a ni tih an hrechiang em a. Rilru fim takin an awm ṭhin a ni.


Val upa Thanhnuna chuan Lal ina an thurelte chu Zawlbuka riak tlangval ho hrilh turin a chhuak ta a. Kar lovah Zawlbuk chu a thleng mai reng a, chutah tlangval ṭhenkhat chu an lo mu hman a, mahse Val upa in thu an sawi chuan an harh ta vek a. Pasalṭha ten thusawi dan tur an hmawrhmuh lawk sa bawk a. An chikhur hum him tur chuan an tha leh tui an ui hauh lo mai le, Tlangvalte hlawm sariha ṭhenin an lo ngaihven ṭhin dawn a ni. Tlangdang mi an lo luh chuan an pasalṭha te hrilh nghal a, hmalak tur a ni dawn a ni.




Lal inah chuan Titi hrang hrang vawrh chhovin pasalṭha te pawh chuan an zuk ramchhuahna chanchin te an sawi ve luam a. Upa ho chuan Thanpuia, Phirtuala tupa chanchin ah an lut leh ta chat a. A sarhu lai a ni bawk a tin ni, tunah phei chuan a khaw khahin a khat tlat tawh hial mai reng a ni. Rawlthar, Zawlbuk pawh lakai lovin Savawm Sum sarih zet zawt a sathlum chu a ni si a. A lo er rutu tan chuan er tham tak a tling ngei ang le.!

Phirtuala pawh chuan a tupa chanchin chu chhuang takin a sawi chhuak ta a, Lal pawh chuan uluk takin a lo ngaithla a, chutah

" Phirtual, i tupa hian thingnawi fawm a nih lai khan keite kha a sathlum tawh bawk ti raw!?" Lal chuan an ti a.

" A nih tak kha, a ṭhian Pazawna nen an chakai khawrh kha alo rum ṭhaih a ni awm e!" tiin Phirtuala chuan a chhang ve leh a.


" Chu mihrang ka neih belh dawn tihna zuk ni a, eng tin tak la khawsa chho ang maw, mihrangin mihrang bawk a hring e!" Lal chuan an ti leh a.

Chutah Lal chuan Sazuk ki kha a hmu a, a hrechhuak phut a,Thudang an khel ata langin a lo mangnghilh hman tep a lo ni, Tlangaupa chu a bang laiah an tar tir a, a hlim hmel hle mai. A thlir vang vang reng mai a ni.


......... ......... ......


Thanṭhuama Val upa leh tlangval Zamkunga sawm khawm te chuan Savawm sa chu an chan map map a, a lo thau phian mai a, Thanchhinga te Inah chuan an zi huai huai a ni ber mai! Sakhi nena an chan zawh meuh chuan Lenghawn ar khuan pawh a hla tawh kher lovang le. An sa chu an insem tlang ta a, a chantute pawh an hlim kher mai. Chung tlangvalte chuan an lawmnu te rim hman ta hek lo, a khat tawkin an infiam sek a. Thanpari chu sachan pah chuan an fiam leh zauh ṭhin a, an nui tlang leh dar dar ṭhin.
Thanpari hi a pu Phirtuala te in lamah a tam zawk a, an tu hmuh hmasak a nih avang a ni.Thanpari te pang ber Thanzinga chuan Savawm ke leh a tin mawlh chu alo buaipui ve hle a, Savawm tin chu awrh atan a duh a ni. Chu chu a ṭhiante zingah intihtheihna tham a tling ngei dawn si a.

Savawm thau te chu lain an er bawk a, hei hi damdawi ah an hmang ṭhin a ni. A mit pawh uluk taka sawngbawl turin an dah a, rapah an rep a. Thanchhinga te sarepna rapah chuan an sa neih ho chu aleng lo a ni deuh ber a. An rep far tluk tluk mai a ni. Sa chi hrang hrang a tlar dul mai chu a ni. An bangah te chuan salu chi hrang hrang a tlar bung a, an bang en ringawt pawn a chhungah pasalṭhate an cheng a ni tih hi khual aṭanga lokal te pawn an hre thei hial mai reng a ni. Thanchhinga hianTumpang ala kap lova, kah a tum viau ṭhin tak na a, a la hlawhchham zel rih si, chuvang chuan Thangchhuahpa ala ni lo mai chauh a ni.
Pasalṭha te hian Thangchhuah an tum ber a, pialralah nuam taka faisa ringa hlim taka len an duh a, an tum ber ṭhin a ni.


Lal in aṭanga Sa lu lawm te an lo haw hma deuh chuan sachan tlangvalte pawh an ṭin ta hlawm a. Zawlbuk an lawi hma in an sa chante chu an mahni inlam an thlen phawt a ngai si a.


Chu zan chhawrthlapui eng zam raih mai chuan Serzawl chu a ngaih la tawk hian a en a. Zan lai ar pawh a khuang al al tawh a, Thanpuia chu tui tak chuan a muhil a, a tawnmang ram chu a mak a ti ngei mai!

Chu a tawnmang ah chuan a hma ni a Sazuk chunga chuang nula hmel ṭha em em mai kha, Tlang nuam tak ah Lungpui chunga ṭhu in a lo hmu a, thlifim chuan a sam te chu alo chhem leng siau siau va, a tawrh har tawk chuan Thanpuia chu a rawn melh a.Thanpuia chuan Thal leh fei hi alo keng a, chu nula lam chu a pan phei zel a, a rim a hre pha ta. Pangpar eng emaw tak, rimtui tak rim hi a nam chem chem a, a bul vel te chu eng vuk maiin a mawi hliah hliah hian a hre nghe nghe a. Nghilh dup hian a inhre hial a, han sawi tur mai a haihchham ta hle mai, chu nula chuan alo nuih san san a, chutah,

" Thanpui, Tukloh ram daiah hian ka lo nghak reng ṭhin che a, ilo ṭuan ni tur ka lo thlir reng ṭhin che a sin!" a rawn ti ta mai a.

Thanpuia chuan a hming a rawn hre mai leh a lo be mai chu mak tiin a ka ho mai a, han chhan ve an tum chu le....a ṭawngchhuak thei ta hauh lo mai le...a hrawk chu hnawhtu a awm tlat mai a, a aw an thian a....


Chutih lai tak chuan Thanpuia chu a nu chuan a rawn sawi ta nawk nawk a,

" Thana....Thante, i harh em! Zeng thil nge ni ta, I va thaw ri nasa ve, i tawnmangah eng thil nge i hmuh a, i ṭha em!? "A rawn ti ta a. A nu hian Savawm in a hamna avanga mu ṭha thei lo riakah a ngai a, a ngaihtuah hle nghe nghe kha a ni.

A harh hlawl mai, a va ui em aw...Khua ala var lova, khuan hmasa chauh ala ni si a.

" Ka ṭha e, ka harh e, a....eng lem mah hmu love" an ti a. A nu pawh chuan a kalsan zui leh mai a.


A bul velah te chuan kha nula rim kha alo nam chem chem a. A tawnmang ram lam chu a ngaihtuah chhunzawm ta neuh neuh zawk a, han chhin leh chu a tum sa teh a, mahse a harh tawlh tawlh zawk chu a ni. 'Eng tin nge kha nula khan a hming a hriat theih mai zawk chu le aw... khuavang lasi an tih hi a ni chiang ang' tihte chu a ngaihtuah neuh neuh a. A awm Savawm hliamna chu an khawih a, alo hil duak tih chu a hre thei a.Muhil tawh lem lovin a let a let a, khawvar a la hla deuh si!


........... ............ .......

Chu zan chhawrthlapui eng zam raih mai hnuaiah chuan Lal fanu Saipuii chu luhkapui sangah a ding a, thla eng hnuaiah chuan a hawi vang vang a. Zan rei a nih tawh avangin thawm hriat tur avang hle a, a rilru chuan thla hlei nga zan chu lo thleng lo mai se a duh tak meuh a ni. Thla a hlei nga hian a chunga thil thleng mak tak hi a hre ṭhin si lova, a tukah erawh alo sil urh mai ṭhin chu a ni si a.

Puitu a ngai em em a, mahse a chunga thil lo thleng hi an chhungkua bakin he a thuruk hi an hre si lo! An mangang takzet tawh a, a tihreh dan an hre hauh si lo hi a ruka an buaina chu a ni. Bawlpu te lahin eng mah an ti thei si lo! An tuar ngawt ngawt mai chu a ni. An khaw tiral ṭi tu chu a ni ta ngawt mai chu a ni. A ni nula, nula hmel ṭha tak chunga thil thlengah chuan a rapthlak em a ni. Tlang hriat loh chuan thuruk an nei chu a ni a, eng tikah nge an mualpho pui dawn tih chu an chhungkaw rilru a riak reng a ni.


Saipuii chu a tirilah ṭham er er tu a han awm a, chu zan chhawrthla eng raih mai te chu a tan lungngaihna thlentu a ni si! Rei pawh luhka sangah awm duh tawh lovin inchhungah a lut a, khumah mu in pawnpui chuan a inkhuh ta a.


......... .......... .........


Pawltlak thla a zo lek lek tawh a, an khaw ram ṭheh chu an en ṭan ta mai reng a. Zamkunga pawh ramhual te kara an awm ve tur chu a hlim hle a ni.Lal pitar thih kuma an ram bawh kha, an bak la awm rampui chu an bawh tur chu a ni. Tlangvalte chuan an chikhur chu an en awl lova, mahse khawdang tlangdang chu an la rawn lut em lova. He an chikhur avang hian kum tin khawdang aṭanga Serzawl rawn pem lut hi an awm kum tin mai reng a, Serzawl tan hian han phalrai chi ni miau hek lo. Pa ho leh kum upa lam deuh chuan an ram ṭheh tur chu an titi ber a ni a, Lal pitar thih kum hian an hlo a awl em a, chutiang a nih leh chu an ring fur mai a ni.

Tum anga an awm chuan Pazawna leh Thanpuia chuan hemi zan hian Zawlbuk an kai ve dawn chu a ni a, a ruk tak chuan an huphurh hle nghe nghe a, Thanpuia ai hian Pazawna hian a huphurh zual zawk hial a. Chumi ni chuan Pazawna te chulramah chuan Thanpuia te ṭhiandun chu thlai rah awm ang ang dapin an kal a, thlam bul zawlah chuan buhpawl dahkhawmin inbuan an tum a.Thaza zek zawk an ni ve ve bawk a, an phur dun ngang mai! An puan ven chu an han siam ṭha te te a, an in man ta chat mai le, an intia viau mai a, tha tawp chuan Pazawna chuan phawi an tum a, mahse Thanpuia ala che eih lo,a nghing hauh lo. Mak a ti hle a, an ṭang viau a, chutah pawh chuan a phawi thei ta hauh lo mai le...Chutah Thanpuia chuan,

" Kei ve aw...." han tih pah chuan a phawi ta mai a, a awlsam phian si a. A thapui pawh ala chhuah hauh lo,a lo inzir hrep tawh a, chuvanga awlsam te a phawi thei chu a ni. Pazawna chuan,

" E khai ṭhiana, min lo zirtir ve zawk teh, zanin hian min buan hlawm ngei dawn si a, Rodawla phei chuan bin hrep che a tum a ni awm e" an ti a.

" E khai, kan U Rodawla te chu kan hneh ngut nang le, nangin in bitum anga" Thanpuia chuan an ti ve leh a.


" Ṭhianpa, i bin hrep dawn nia, zawlbuk bang deng rawp pawn a pawi lo, ka tuk sam zial a a pawh ṭhin reng hi ka hua a nia" Pazawna chuan an ti ve leh a. Rodawla hi upa min tupa a ni a, mi pawi hawl zawng hlira khawsa ṭawngkam duhtui lo tak a ni a, tlangvalte kham ruk em em a ni. A ṭhiante buan chauh tawh lam hi a lo bin ṭhin a, a insawi thei lar lar fo reng a ni.

Inbuan dan chu an han inzir tir dun leh a, Thanpuia chuan inkhual buan dan te, sir tluk dan te, 'zui' dan thleng chuan an zirtir a. Pazawna hian Thingnawi fawm a nih lai khan a tia pui hneh loh a nei ngai si lo. Thanpuia hi alo la hrechiang hauh lo a ni.A ni tan chuan han buan mi hi a ni lo hrim hrim reng a ni. Rei fe an zir dun hnu chuan an thaw a sa a, an chawl hahdam ta a.


Inbuan hi alo chhuah tirh chuan kuta inpawm a inphawi kan mai a ni ṭhin a, hun te alo kal zela, kawnga puan nghet taka vena puan rinchhana inbuan chu a remchang zawk tih pi pute chuan an lo hre chho ta a.Tichuan kawnga puan ven rinchhan in an lo inbuan chho ta a ni.

Pazawna leh Thanpuia pawh chuan thlai rah awm ang ang an han khawm zova, chawhnu tlang her chuan in lam pan zai an rel ta a. Kawtchhuah lungdawh an thlen chuan Behliang mun hun vel a ni tawh a, kawng tluan chuan an ti ti a, zan lam an huphurh zia chu an sawi dun malh malh a.In lam chu an pan ta hnak hnak a.



Zanriah hmehah Zamani chuan sakhi leh sanghal rep a chhum a, thlengpui ah chuan an dah khu vung vung mai a, Sanghal tuang chhah lianpui pui te chu a khu rum rum a, a rimte lah chu a tui em em mai a. Chutah sa tui hang chu an al thak bawk a, an chhungkaw chaw lak chu a ṭha ham ham ngei mai. Zanriah an kil lai chuan Thanpuia chu Pazawna chuan a rawn sawm ta mai reng a, chutah Pasalṭha Thanchhinga chuan heti hian a fapa leh Pazawna chu an zilh a,

" Hei Zawlbuk in kai ve dawn ta a, tunah chuan tlangval tak tak in lo ni ve ta, Val upa te thu ngaichang ula,an thu hmu lo chuan tlangval an che chhuak mai ngai lo a nia... tin, Zualko kal thu ah te, lamkal intirh thuah te tlawmngai ber nih an tum ngai e, hei zanin hian Zawlbuk kai thar te an buan ngei dawn che u a, chungah chuan thinrim ngai a ni love..Zingah ṭhiante thawhhma a thawh tum tur a ni ngai e, Zing tho tlaite hi an sawi ru sep zel a nia, in chet dan leh ṭawngkam fimkhur ula, ngaih huat tur chiin ṭawng an cheh ngai lo tih te hi hrereng ang che u..!" an ti a.

Chung Zawlbuk kai tur rawlthar pahnih te chuan uluk takin an lo ngaithla kar a. Tunah chuan rual el reng reng a khawsak an ngai dawn ta a, engkimah tlawmngaih chhuah leh fimkhur a ngai takzet tawh dawn a ni.

Lenglen hun hma hret chuan an pawnpui te an dara dah chung chuan Zawlbuk lam chu an pan dun ta a. An huphurh dun ngang mai a, muangchangin an kal emaw an tih lai chuan Zawlbuk an thleng ta reng mai! Chutah Zawlbuk bawhbel bula dingin Zawlbuka lawiluh an han dil ta a, an aw te chu alawi rut tawh mai a. Chutah Val upa Thanhnuna chuan,

" E khai! Zawlbuk kai thar tur kan nei a nih chu....lo lawilut rawh u...khai" an ti a.

Zawlbuk chhunga tlangval ho chu an lo ngawi ṭhuap a, chutah bawhbel bawh liamin Pazawna leh Thanhnuna chu an lawi lut ve ta, tlangval te chuan an lo melh ṭhap a, val upa chuan ṭhutna an kawh hmuh a, chutih lai chuan tlangval ṭhenkhatin mei an lo vur belh bawk a. Val upa Thanhnuna chuan Zawlbuk kai thar te chu mei engah an enchiang a.

" E khai! Vawmsata te ṭhian dun lah lo zuk ni reng a!" an ti a.

Thanpuia hi Savawm a sahhlum avang khan Vawmsata tiin an sawi mai ṭhin reng a ni. Zawlbuk kil thim chu an ṭhian dun chuan an bel a. Rei vak lo an ṭhut hnu chuan le, zawlbuk tlangval te danin inbuan hun alo thleng ta mai reng a. Chutah val upa chu lo dingchhuakin,

" Hei naute u, zawlbuk kai thar kan nei a, zawlbuk kai thar reng reng chu kan lo buan pui ṭhin kha a ni a,hei hi inlungrualna a ni gih kha hrereng ula, hei kan zawlbuk kai thar te pawh khan in lo hre tawh thovanga.... han infiam pui tur kan awm em le?"an ti ta a.

Tlangval pakhat rawn ding chhuakin,

" Khawi nge, kan zawlbuk kai tharte chu ilo fiam ang hmiang" tih pah chuan a puan ven an siamrem a.Chutah Pazawna chu ava kai chhuak ta a. Chutih lai tak chuan Rodawla leh a ṭhiante pawh an rawn lawi lut ve chiah bawk a.

Mei chu an han tuah alh eng ṭha sauh sauh a, tlangval pakhat leh Pazawna chu an inpawm ta a, Pazawna chuan a kut veilamin a tumpuipa kawng hnung lam puan vehah chuan nghet takin ava vuan a, a kut dinglamin kawng hma lam dul zawn ah chuan nghet takin a vuan bawk a. Val upa chuan, " Khai le..." an ti a, chutah tlangval zawlbuk a mite chuan " aw....aw...aw..." an lo ti a. An ṭang dun hle mai, chutah Pazawna chuan chiang zet mai hian a phawi ta a. Tlangval ho an haw haw ta dur dur mai. Inbuan hi tum ṭhum, vawi thum, thawh thum an inbuan ṭhin a, a phawi nawn thei zawk zawk chu chakzawk an ni ṭhin a ni. A thawhhnihna an han ṭan leh a, Pazawna chu a kang ve ta zawk mai...Pa ho leh putar lam pawh an lo lawi lut zel a, an thawm a ṭha chho viau zel a. Val upa Thanṭhuama pawh a rawn lawi lut ve ta. A thawh thumna an han ṭan leh ta a, chutah Pazawna chuan a tumpuipa chu awlsam zet hian a phawi leh ta a.

Tlangval dang an rawn ding chhuak lehnghal zel a, Pazawna chu an rawn pawm ve chat zel a, pathum lai chu a hneh ve ta a. Zawlbuk thawm a ṭha kher mai! Chutah Neihthanga a rawn ding chhuak ve ta a. Pazawna nen chuan an han inchai leh ta a, thahrui an ngah dun bawk a, zawlbuk chhuat pawh a tawm tawn tawn thei hial mai a. Thawh khatnaah chuan Pazawna chuan a phawi ta! Thawm ava na teh lul em! Neihthanga hi Aimawia lovah chuan an khaw buan chak a ni. Chutia zawlbuk kai tharin a phawi mai chu mak tiin an ka ho mai a. Thawhhnihna an ṭan leh a, Pazawna thahrui lo seng hnem tawh chu a chau ve ṭan deuh a, a kang ve leh ta. A thawh thumnaah pawh chuan Neihthanga chuan chiang zetin a phawi leh ta a.Neihthanga chu a chak ta, chutah zawi sap hian Pazawna beng bulah chuan, " I chak hle mai! Tha thar ni la chuan ka hneh hauh lovang che" an ti a. Pazawna chu a kiai sak a, a ṭhut hmun lam chu a pan ve ta a. Tunah chuan Thanpuia hun a ni ve ta..

Pazawna chuan, " Ṭhiana, nang han buan ve tawh rawh le" an ti ve a.

Thanpuia chu a rawn pen chhuak ve ta a, an lo chian ngai lem lova, rinai takin Thanpuia chu a lo lian a, a dar pharh hlai hlap leh a kawng fek rat te, a fuke hrawl hraih mai lo chiktu upa deuhte chuan rin dan an nei thiam ta mai reng a. 'He rawlthar zet zawng thapui a chhuah duh chuan a chai tham fe dawn e' an lo ti sap a.

Neihthanga chuan Thanpuia en chung chuan, " E khai, ka dim dawn hauh lo che a nia aw...!" nui sang chung chuan an ti a.

Thanpuia chuan, " Unau inbuan in aw, " an ti let ve a.


Chutih lai tak chuan Rodawla chuan a ṭhiante chu alo bekbawr sar sar a, Thanpuia chu buan chauh tir a, zawlbuk bang deng dawt khawpa bin a tum a ni....


( chhunzawm tur)


(Ka famkim tawk lova, tihsual lai alo awm a nih chuan min hrilh hre hram teh u, tin lo comment ve hrim hrim teh u, a ṭha intih thu emaw ṭha lo intih thu pawh.)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)