PASALTHA THANSANGLUAIA 1

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Sangtea Renthlei
Posts: 13
Joined: July 25th, 2020, 12:02 pm

PASALTHA THANSANGLUAIA 1

Unread post by Sangtea Renthlei » July 25th, 2020, 12:05 pm

PASALTHA THANSANGLUAIA
Ziaktu-Sangtea Renthlei
Bung-1
( Mite ang se su a thiam ni mah suh ila, vawikhat na reng reng chu Pasaltha thawnthu hi ka ziak ve ang tiin ka rilru ka siam fo a, pakhat "Chengrang" tih thawnthu kha ka post uk tawh a, episode 10 vel zet chu, harsatna engemaw vangin ka chhunzawm thei lo a, han chhunzawm leh buang bar ai chuan thawnthu dang ka han tintuah ta law law a, hunbi mumal neiin ka zawm theih pawh ka inring chiah lo na a, kar khatah vawihnih tal chu zawm hman ve ziah turah in ngai ang)
Dengkhawpui zo nemah,
Tah chuan tuan ka nuam,
Ngurpui lal lai suakrum run zau ah
Zaleng nau nawn fawn dim e.
Dim in aw dem in aw.
Aw tliang fawn hlarh hlarh a, khuangpu pathlawi Thangbawha'n hla a rawn lak rual chuan Dengsur lal Suakruma in zau hek hawk mawi hmawk a nula tlangval thu kual put te chu favang buh , thlifimin a chem chawk nghawlh dial dial ang maiin an in sawi dual dual a, a lai a nuthlawi leng leh Zaikungi leh val phanchang Khara te zei fahran mute lei hrut a in chhai zar zar rem tawk chiah a khuang ri tlir zaih zaih kar a seki khawn rik leh bak bak thinte chuan Vanglai chen parchhuang mek Dengsur khaw nawm na chu a belhchhah zualin , khua reiah zawng Lal Suakruma khuangchawi nawm zia leh ropui zia chu a hre phakte chuan an tu leh fate hnenah ha hipin an la sawi ve ngei ang le.
Zanlai ar an khuan thliai thliai laite chuan nula aw sin nem thlap leh tlangval aw thum fun hlurh in pawl a zai fawn hlurh hlurh chuan Dengkhawpui chu a fan kual ruih ruih reng a. Lal mual hnaih a awm,In lam a nuchang fate mutpui mek leh pa upa lam zan rei lam ngam lo a tin hma te pawh chu muhil thei a ram pawh an awm bik awm lo e.


Ral, ral...." tia tuikhur veng tawntirh a pitar zan zung pawn chhuak au mek chu dim dawina tel hauh lo in chempui rawn vai phei fua chuan a nghawng chu a rawn chhawk nghal thawt a. Inchhung lam atang chuan thawm rawn chhuak zuiin hman hmawh zetin thangtleng kam rual awm vel mipa naupang chu a rawn tlanchhuak nghal rawk a, a aw rawl tawp a au chhuah tumin "Ra..ll" a ti chuai nghal raih a, pachang thankin zet tawhin a dul a pil thawih khawp a ral lak chem a rawn sah bur vuh chu naupang tuar atan chuan a na in han au pui zel theih rual a ni lo . Tunah chuan an in , a pi nen chauh a an khawsakna tlabal rim rem, zangkhua a bungbut hun ala awm ve mahna ti a beiseina nen a hma lam eng thlir a hun an hman liamna chu tuma luah lohin a ram hlen dawn ta.
Thawm dang a awm loh avangin Pasaltha Zabawnga chuan a nuate chu a hui zauh a, veng hmawr lam a in intlar thliai hnuaiah chuan an lo ruahman sa thlap angin thingthu nung keng khu vut vut chung chuan thawm dim takin an in sem darh nghal vat a. Thawm dim tak a an awmna tur hmun theuh an thlen hnu chuan Zabawnga chuan a bul a tlangval thingthu ken chu lak sakin thingthu nung chu a vai kual pawp a, chu chu a naute chuan chet hun ani tih hria in an thingthu ken chu an awmna in theuh chungah chuan an theh kai nghal sup sup a.

Zan lai pelh hret , thli thawt dan inthlak a, khawchhak lam hawi , Dengsur khaw tui tlan khurpui lui kawr hawp a thli lo thaw chuan in chung di ro rawp tawh kar a meiling tang te chu a rawn chhem vam nghal ham ham a, rei lote ah mei ling chu mei alh a changin Dengsur khaw chhuah chhawng kawtthler chungah chuan mei khu a chho nghal ngut ngut a.
Mang ang au thawm leh rak nuai nuai chuan rawn zui nghal in, "In a kang ee...." Tia veng hmawr a tang a au chu in la chhawng zelin lal in a chawngchen zai sa a hlim zai vawr mek te pawh chuan an beisei loh tak a chhiatna lo thleng mek an hriat rual chuan an tlan chhuak nghal sup sup a, Tuikhur veng lam pan chuan Tlangval ho chu an tlan ding nghal puat puat a, tlangval thenkhat, zupui tui tling lo dut hnem deuhte erawh khawilai lung pawng ilo fahran chhuihin thim zingah chuan an pe tek nawk nawk a, se ek nal a lo tawlh thlu thum awk tawk tawk lah bo lo .
Tlangval tlan hmasa fal ten veng hmawr an thlen mek lai chuan silai a ri thawr a, a hmasa lam a tlan tlangval pahnih chu duhloh paih ang thlawpin an tlu nghal hnawk a. Silai dang rawn ri leh pawh chuan Dengsur tlangval pahnihte nunna chu a rawn ti tawp chiang hle ani tih hriat takin vai vut zingah chuan lu hek huamin an tlu khur char char a.


"Mei eng lam panin tlan tawh suh u, ral an ni e " tia Val upa Tlungirha a rawn au lauh lauh hnu chuan hma lam pan a tlangval tlan mekte pawh chu hmun thim, ralin an hmuh mai theih lohna lai tur nia an hriat lam chu panin an tlan darh ta huk a.
Bung-2
Chutia tlangval ho an sahimna ngaihtuah a hmun him lam a an insaseng mek lai chuan Dengsur khaw tlak deng , Pu Phuna ek peng an tih lam atang chuan silai a ri dur a, "Ral..ral..ral.. ral an hnai e" tia nunau mang ang rawl au nuaih nuaih chuan a rawn chhunzawm ve nghal bawk a. Ral ho chuan an khaw chhuah ka, khan remchang chinah chuan an hual bet hneh hle tawh tih alang reng mai. Dengsur khua in zathum khua tia an lo chhal ve meuh ah chuan chhuah chhawng thler hmawr lama thilthleng chuan kai harh pha lo mahse kiltin kil tang atanga silai ri dur dup thawm leh nutling patling na tuar te leh rawng rawng thinte karah chuan tu tan mah mut mu han tuah zui zelna chi a ni ta lo.
Lal in a chawngchen a zai vawr mek tlangval, ral thawm avanga tlanchhuakte chuan tuman ralthuam chuh hman hek lo le, mei eng a lang hmasa apiang chu ral ho chuan an rawn sai tlu nghauh nghauh mai bawk si . Dengsur khaw tlangvalte chan chu a chhia in , chet lak dan pawh thiam a har hle a, ral lam lah chu hmuh theih a rawn in lan mai si lo in, kiltin atangin silai a ri leh dur dur a, an silai puak chuan a tum a thelh lo hle tih hriat takin silai rik rual chuan na tuar te rawng rawng thawmin a zui nghal zat zel bawk a.
Val upa Tlungirha chuan " Tlangvalte u, mahni in lamah tlan haw vek ula, in hriam hrei nen lal mual lamah rawn tlankhawm rawh u , nu nau in hmuh theih apiang rawn hruai khawm ula, lal mualah.. lal mual lam ah" tiin a au tuarh tuarh a.
Val upa Tlungirha sawi ang chuan Tlangvalte chu a thim lam zel bawhin mahni in lam pan chuan mei kawhin an tlan nghal zuai zuai a, chawngchen zupui lo birh ngun fal tlangval thenkhatte lah a thim lam bel chung zel a tlan an ni bawk nen, mi thawm mawl su a lo in tauh thal der tawh lah bo lo.



Tlangvalte anmahnu ralthuam neih ang ang nen a Lal mual zawl a an rawn tlan khawm khup khup lai chuan , nu nau mangang thahnem fe chu Lal mualah an lo inhawr khawm lut lut tawh a. Tap rawih rawih leh mangang au rawlte chu a ri teng tung a.
Veng hmawr lam a in kang mek lah chu thli in a pui tha em kher bawk a, parkhu chhuangin a alh ding hlurh hlurh tawh a .
Tlangval lo tlan thleng mek zing atang chuan tlangval sawm zet chu ko hrangin Val upa Tlungirha chuan " Rang takin nu nau leh , kan lal chhungkua leh upate hi chhim lam daiah liam pui nghal rawh u. Ral ho hian reilote ah min rawn luh chhilh tawh dawn e. Hman hmawh ang che u " a ti nghal zung zung a. Tlangvalte chuan khaw mipui nunau te chu chu lal leh upate ho nen Dengsur khaw chhim chhawng , awih bak bahai zet lam pan chuan an liam pui nghal a. He lai hmun pan tur a Val upa Tlungirha'n a tirh chhan pawh , he lai kham chheng chhe zet, khan rem chang pawh awm mumal lohna hmun atang hian ral lam chu an rawn kaiin a ring lo a, tlanchhiatna leh himna hmun tha ber tur nia a hriat a nih avang a tir liam a ni a. A ring dik viau pawn a rinawm e.


Lal leh upate, hmeichhia nunau an liampui hnu chuan tlangval lal in lam pan a lo la tlan mek leh mahni hriamhrei neih ang ang lek a , thinrim hmaisen tal chung a lo awm mekte hnenah chuan Val upa Tlungirha chuan " Khai le.. naute u, Dengsur tlangval kan zam ngai lo ve, thisen far ral raih thlengin i tang ang aw, kei Tlungirha , Dotawna fapa hi pen khat pawh ka hnung tawlh a nih chuan , ka tawlh lai min hmu apiangin ka lam hawiin in hriam rawn lek ang che u " a ti fiak thak a. Tlungirha , a tlawmngaih leh a huaisen em avanga tuma thlan leh tuma ruat ni hauh lo a, a khaw tlangvalten a phu em avang zawk a val upa atan a an pawm ngheh tlat in chutiang a thu a rawn chhak chhuah tak ah chuan tlangval ho pawh chuan huaisenna thar nen ral lo luhna tur lam nia an hriat chu an hawi kual ruai hlawm a.
Khaw kang mek pawh chuan zual lam pan zelin khaw chanve zet chu mei vapah a chang der tawh a, thinrimin , ha chang thial rap rap mahse tun dinhmunah chuan tih theih a awm rih miau loh avangin Val upa Tlungirha chuan " Pasaltha Hranga ho in tlangval sawm thum velin lal in tlak deng lamah sawn tan hmun lo siam ula, kei leh Zaluta'n chhuah chhawng lam kan hrut thung ang, a dang zawngin Lal in hi kan veng ang " tih pah chuan chhuah chhawng mual, khaw kang in a chhun en sen lam pan chuan silai keng chungin a tlan nghal puat puat a.


Pasaltha Hranga leh tlangval sawmthum chuang zette pawh chu thuang hniha lokal ral lo nawr let turin tlak deng mual lam pan chuan an tlan liam ve nghal a.
Ral lam thawm ngai chang a tuibur hmuam da vel zet in ring tak a Dengsur tlangvalte an in kau phan phan hnu chuan " Kha le, Khankawn val kan rawn kal e, a ngam fa chu ka kawngah lo ding teh u " tia au lauh lauh ri chu vengthlang lam atang in kang puak ri leh uarh uarh thin kar atang chuan a rawn chhuak a, chumi chhawn zat chuan haw haw hulh hulh ri rawn chhuakin reilote ah lal mual lam pan chuan ral ho chuan rawn tlan lim puat puat hlawm a.
Tlungirha chuan thil thlen dan chu a hrethiam nghal thuai a, ral ho chu hmun khatah an inbawk khawm leh tawh ani tih hrethiamin a naute chu tumah che sawn hauh lo turin a hrilh zui nghal zat a. Ral lam in lal in an pan nguah nguah lai chuan ral kutah an khaw tlangval sawm hnih tha zet an tluk tawh avang chuan a lu nung tam zawngah chuan an zat dawn lo tih hre mahse zamna chhete mah a nei lo, a thinlunga thinrimna in thuah thip chuan a duap kai zawng rilru hawi tir mawlh hek lo le.


Pasaltha Hranga leh tlangval sawmthum chuang zette pawh chu thuang hniha lokal ral lo nawr let turin tlak deng mual lam pan chuan an tlan liam ve nghal a.
Ral lam thawm ngai chang a tuibur hmuam da vel zet in ring tak a Dengsur tlangvalte an in kau phan phan hnu chuan " Kha le, Khankawn val kan rawn kal e, a ngam fa chu ka kawngah lo ding teh u " tia au lauh lauh ri chu vengthlang lam atang in kang puak ri leh uarh uarh thin kar atang chuan a rawn chhuak a, chumi chhawn zat chuan haw haw hulh hulh ri rawn chhuakin reilote ah lal mual lam pan chuan ral ho chuan rawn tlan lim puat puat hlawm a.
Tlungirha chuan thil thlen dan chu a hrethiam nghal thuai a, ral ho chu hmun khatah an inbawk khawm leh tawh ani tih hrethiamin a naute chu tumah che sawn hauh lo turin a hrilh zui nghal zat a. Ral lam in lal in an pan nguah nguah lai chuan ral kutah an khaw tlangval sawm hnih tha zet an tluk tawh avang chuan a lu nung tam zawngah chuan an zat dawn lo tih hre mahse zamna chhete mah a nei lo, a thinlunga thinrimna in thuah thip chuan a duap kai zawng rilru hawi tir mawlh hek lo le.


Khankawn khaw hming a hriat hnu lek phei kha chuan chutiang a an chunga an rawn chet mai chhan awm ang chu lo chhui dawn thiamin, kumin vahsan awllen lai a Lal fapa nupui tur an rim, Thingkhuangkawn Lal fanu hmeltha Chawngthanseii an rim tum a, khankawn lal fapa te nen a an in bakkaih dante ngaihtuah chhuakin, khami tum a, a a lang zawk chanchang Khankawn lal fapa thinrim in hrosa kual vel avang a an buaina chu angaihtuah kir zung zung a, kha buaina kal zel khan an beisei hauh lohin tun hun hi a hruai thleng ta a ni tih a ngaihtuah mek lai chuan Ral hmatawng a rawn tlante chuan Lal mual chu an rawn tlan thleng der tawh a. Chempui in khak ri chhawr chhawr karah chuan silai puak ri dur leh na tuar te leh that that thawmte chu a inkahpuk chaw nghal zut a. Mahni hming chhal meuh a hmelma tuk zal tum a tisa ri no chawk chawk insatin, an phaw ken leh phaw kente chu a in tauh ri bur bur bawk a.
Ral lamten lal mual an chuang chhuak zo thawkhat ta maw tih ah chuan Val upa Tlungirha chuan "Khai le, naute u, Thih leh ruam khatah, dam leh tlangkhatah kan ti ani lawm ni, mipa leh mipa chu i han insat thler diai duai mai ang aw " tiin ral lam lal mual chuang kai mekte hnung lam atang a bawh tur chuan hma hruaiin a tlan chhuak zui nghal a..



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)