PASALTHA THANSANGLUAIA 2

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Sangtea Renthlei
Posts: 13
Joined: July 25th, 2020, 12:02 pm

PASALTHA THANSANGLUAIA 2

Unread post by Sangtea Renthlei » July 25th, 2020, 12:19 pm

Hranga leh a hote pawhin thil thlen dan chu man thiam thuaiin lal mual lam chu tlak deng per atang chuan an rawn pan ve nghal bawk a, khankhawn lam pawhin an beisei hauh loh a hnung lam atang a rawn bawh let tu an awm avang chuan an che a khaihlak ve kher mai, chumi chhung hun tawite ah chuan dimdawina tel hauh lo a hnung lam atang a rawn bawhtu Dengsur val rualte hma ah chuan sawm tha zet te chu an tlu nghal mai reng a, mahse Khankawn pasaltha Dotawna chuan thil thlen mek chu hrethiam thuaiin " Hmalam leh hnunglam hawiin in sem darh thuai rawh u" tiin a naute chu a au tuarh tuarh a, chutihrual chuan ring zet a au in " Kha keimah Dotawna, ral leh sa hma ah ka tlan ngai lo ve, i han in har lak hlawih hlawih mai ang aw " tih pahin a hma a ding Dengsur tlangval fei a rawn chhun tlang zawk tum a rawn zuang phei mek fei chu a chem hnung zang lam a lo khak pial in chu tlangval thin zawnah chuan a chempui chu a sat bur nghal vawh a, a phawi zawng chuan a han tai phei zui nghal hrawk a, chu tlangval chu che zui leh tur awm loin a tlu zawi nghal der a.
Khankawn val rualte pawh han che buai deuh mahse an hotupa in ti tur a a tih ang a hnung lam leh hmalam hawi a an insiam rem hnu chuan a lu nung chhiar a tam zawk na na na chuan dinhmun siam tha hret hretin Dengsur lam chan chu a chau deuh tial tial hian a lang a.



Mitin mai in an hmazawn a mi theuh lu lak tum a an intuk chawrh chawrh a, chempui leh chempui in khak ri chawr chawr karah chuan Val upa Tlungirha chuan a sir dinglam sir a khankawn pasaltha Dotawna hming chhal lauh lauh ri chu a hre fuh ta chat a. A chempui hriam tha zet chu vilik kual zawk zawkin, a hma a khankawn tlangval a phaw hmang a lo in dang mek chu pawmchilhin a phaw kenna kut chu a chhawk nghal zawk a, na tuar te thawt ri in a zui nghal zat bawk a, mahse chu tlangval chu na tuar a te tur pawh awmzui tawh hauh lo tur in Val upa Tlungirha chuan a lu uai hnawp khawpin a nghawngah chuan a sat zui nghal chawrh a.
Dotawna ngei mai chu a hma bak chiah ah chuan a lo ding kawh lun a, a dar pharh hlai pui chuan zan mei eng thlarah chuan a ti lang bem deuh luai hian a hriat a. Tlungirha chuan "Lal le lo khua leh tui, dawihzep meikhup a tlanchhe duai duai thin, ar pa chan chan lai den chhen a mahni hming chhal ring viau lawi si, tun tun chu meikhupin i tlanchhe tawh em lawng chu maw?" Ti chang fak a. Dotawna pawh chuan a hma a ding mek chu a lo hre teh meuh mai, thingkhuangkawn lalfanu an rim lai a, Dengsur khua atang a Lalfanu rawn beisei ve tho Lalfapa thuihhruai zing ami kha ani tih a lo hre kher mai.


" kan in tawng leh ta maw? Tun tum zawng, a fawng vuantu i ni ta bik lo e, naupangchhe infiam ang ni loin chempui hmang ngei hian thu tawp i han sawi dun ang hmiang " tiin Dotawna chuan Tlungirha chu a rawn veh ve nghal chat bawk a.
Lalfanu lakah tlak tlum an hlawh loh hnu ah, zawlbukah buaina chawk chhuakin Thingkhuangkawn Lalpa in a khau atang a hnawt chhuakin meikhupin an khaw Lalfapa ho in Khankawn lam an pan ta kha ani a, chu mi thinrim rawn er let chuan an lal fapa nupui tur neih khalh tu Dengsur lal fapa chu thungrulh tumin Lal suakruma khuangchawi vanglai tak leh an inralrin loh hun chang a rawn che chhuak ta kha an ni reng a.
Val upa Tlungirha chuan " A ni tak alawm maw le, khawi nge i han i hlep ral raih ang hmiang maw " a lo ti ve hmiah mai bawk a, tumah mah chuan pen khat lek pawh a hnung tawlh an tum lo hul hual a ni tih a chiang bawk a, tuemaw zawk zawk chuan Hringlang tlang atangin he lai hmun hi ngai em em in an rawn thlir ngei dawn e.


kha le " tih pahin Dotawna chu hmalam panin a rawn zuang phei dawrh a, chutih rual chuan a chempui chu a rawn vai dawk nghal zawk a, in ring phen phawn a lo awm reng a ni bawk a Tlungirha chuan a nak nem zawn a Dotawna chempui rawn vai phei chu hnung lam a tawlh dawrh in a lo bum hman hram a, hnung lam a tawlh chung a tan hmun siam rem nghalin Dotawna lu sah uai hnawp tum chuan a chempui chu a sat phei ve nghal zat a, mahse Dotawna pawh khaw khat pasaltha leh khaw daingul ngat a ni bawk a, chuti mai a han tuk zal chi a ni bik tlat lo . Tlungirha sahna chu lo bumin pialral lawi zawk nih chu a tum bik hauh lo.



Chempui inkhak ri chhawr chhawr chung chuan an insat a, an in hlawi tawn thawt thawt a, tumah mah chan tha zawk an awm thei mai rih lo. Dotawna bawk chuan " Kha aw keimah Dotawna, lo inveng rawh le " tihpahin Tlungirha chu a rawn bawh zui leh ruak a, Tlungirha'n Dotawna chempui rawn vai phei bum tum a ke chheh a siam rem mek lai chuan vanduai thlak takin a hnung lam a lu in laksak ngei tum a Dengsur Tlangval leh khankawn tlangval in sat tawn sawk sawk te chu Tlungirha lamah chuan rawn in nawr pheiin Tlungirha ke chheh siam rem mek chu an rawn nawk leng dawrh mai. Chulai hun rem chang a bitumpa pe tek lai chu Dotawna chuan a rawn bawhzui thuai a, a chempui hriam hleih hlawih chuan Tlungirha naknem chu a rawn sat ri no chawk a, Tlungirha nak chu a kau nghal hawk a, thisen duk fe fe a rawn luang chhuak nghal nguah nguah bawk a, mahse Dotawna pawh a him dam bik hauh lo, khatia Dotawna'n a rawn bawh zui mek lai pe tek nawk nawk chung a Tlungirha'n a lo hmuh khan, in venna hun a nei dawn lo tih hria in Dotawna'n a nak a rawn sah thler duai rual chiah khan a chem chu theih tawp tak meuhin a lo vai chhuak ve hman tlat. Chu chuan Dotawna nghawng ah tak chuan fuhin Dotawna pawh chu a thaw ri nghal bawrh bawrh a, a awn ruai ruai a, tualcharah chuan a tlu thum dup a. Val upa Tlungirha pawh eng ruai a ang chuang lo, vai ruai a Dotawna tlu lai chu en a, zawi muangin a tlu ve ta riai riai a, pialralah pawh huai zawk nih inchuhin pasaltha ve ve khaw dai ngul ve ve chu an la in nawk , an la in nawk zui mahna le.



Khaw chhak lam atanga ni rawn chhuak tan duar duar chuan Dengsur khua a thil thleng mek leh thisen luang zeih zuih karah ruang in sai kalh nukte chu a rawn en irh iarh a, thih ngam lu pu, thisen luan ral raih thlenga mahni khua leh tui chhanna atana in hlan ngam tlangvalte ruang chu kil tin ah an tlu nelh nulh hlawm a, khankawn lam pawh dam khaw chhuak an tlem pharh mai, Dengsur khua run a suamsam tur hian mi za chuang zet Pasaltha Dotawna ho in an rawn thawk chhuak kha a ni a, mahse zing khaw var thleng a nungdam a la ding chhun te chu sawm thum lo liam an ni tawh hauh lo ang, chungte lah chu hliam pui tuar mahni fei tan chhan a in hawlh ding hram hramte leh ban, mal leh taksa peng dang dang a hliam, thi hne hnu leh thisen khawn khir uaih in a bawh lek lukte an ni hlawm a. Dengsur tlangval lam pawh ral kutah chuan a tlu hnem zaih zaih hle mai. Lal kawt zawl a la inhawr khawm mekte chu khankawn lam ai mah chuan an tlem zawk tawh tih alang reng mai. In ring leh in ring, mahni ralthuam duhzawng hum a in hmachhawn chu nise Dengsur khaw lam chan chu a tha deuh zawk dawn ni in alang na a, an inring lo lai rawn run a, rawn bei ta thut an ni bawk a, Dengsur tlangval za chuang zet mai tur ruang chu Khankawn lam ruang nen in kawkalh nukin thisen luang sen zel zul karah chuan a tlu pheng phung hlawm a.
Val upa Tlungirha leh pasaltha Dotawna ruang pawh an damlai a an in huatna leh an inchem harna hre zui miah lo in tual charah chuan a mu dun rial a.


Pasaltha Hranga pawh amah delh bet rengtu khankawn tlangval ruang chu harsa ti fe a nawr sawnin a ban veilam ruh tliak uai zawi hnuang chuan a chet a ti khawr hle tih a hriat theih a, a dinglam chuan a bul a fei tla reng chu chharin a a hliam tawrh leh taksa chauh lutuk tawh avanga pai khat khat chung fei rin chhan chuan a rawn in hawlh ding pai khat khat a, a sir lam a val upa Tlungirha ruang let bam a hmuh chuan " Khai aw! Thiante ruang a leh reng laiin kei hian dam ka lo hauh bik ang maw!! Khawi nge pachang leh pachang chu a tawp thleng law law in le " tiin in hmalam panin kal a han tum a, mahse a chawn puar a chempui sahna hnu hma saipir chen zet leh thuk tak aa kak pawrh tuar avang chuan pen khat han pen leh pawh atan thil har ani tawh ani tih hriat takin a fei vuan reng chung chuan a thing thi rap rap a, fei chuan in do khalh hram hram lo se chuan ding chhuak leh thei hmel pawh a pu tawh lo.
Khankawn ho pawh tumahin bawh zui tang nge an rawn ti bik hauh lo. Zing nichhuak sarah chuan thih ngam lu pu valrualte chu in melh tawn khai khai chung tum lam mah mah chuan chet han thawh tur a chakna an nei tawh lo ani mahna.


Khankawn lam chu tu thupek leh kaihhruaina mah nilovin zawi zawiin dai lam pan chuan an tawlh ta a.
Khankawn lam an tawlh liam fel ta maw tihah chuan chhim chhawng mual a nu nau leh lal leh a upate hruaitu tlangval zing a mi mi pathum chu chinchang ngaihtuahin an rawn lang zui ve nghal a.
Dengsur lal mual a ruang tlu khawm nulh mai leh thisen hmun tin a luang sen zek zuk mai an han hmuh chuan an chek tlawk tlawk mai a, chutiang reng reng a inrunna rapthlak leh zankhat thilthu a thihna thleng chu an la hmu ngai hauh lo a, an thiam awm viau mai.
Pasaltha Hranga chuan lal tana khua leh tui tha leh rinawm a ni tih tilang zet hian " E khai! Chhera nu nau leh kan lalpa te an him maw ?" Tiin anmahni rawn ngaihven tute zing a mi tlangval pakhat chu a lo be thuai a, a aw khur deuh dar dar chuan a hliam tawrh mek nat dan leh a taksa chauh tawh zia chu tilang mahse a mitmeng erawh a fim kak thung a.


Chhera chuan " aw, kan him e..k'u Hrang, hei engtiangin nge hma kan lak dawn le? " Tiin a ngaihna hriat loh hmel zetin Hranga chu a zawt let a.
Hranga chuan " Lal leh upate bakah mipa dang la awm zawng zawng khua ah hian rawn hruai chhuak rawh u. Nunau erawh lo la chhuak ve suh se. Hetiang thil hmuh nuam lem lo tak hi an rawn hmuh zawngin an khawsak a nawm loh phah ange. Tin mipa naupang lian deuh tawh ho pawh rawn hruai tel teh u, hei in hmuh ang hian tih tur tam tak kan nei e " a ti a, Hranga sawi ang chuan Chhera chu Lal leh upate ko tur chuan a liam zui nghal a, tlangval pahnih te erawh chuan an khaw tan a beitute , hliam pui tuar a lo la ding hram hramte chu buaipuiin hmun remchang lai ah chuan an theih ang angin an hliamte chu an buaipui sak nawk nawk bawk a.
Lal leh upate khaw chhung rawn chuang chhuak hmel chu a dur khap hlawmna, lal suakruma , pa sehhel leh pa rilru tum tlang zet pawh patling tan a mittui han tih tlak em chu hrehin a mit a khap sek sek ringawt a.

Kiltin kil tangah ruang a let pheng phung a, ral leh khawtual ruang nen, nunau tlanchhe hman ve lo ruang leh pitar putar insaseng ve hman lo in kang kar a kang hlum tih hriat tak a lo kang ut rim riamte chu chu khua hmangaihtu leh a chhiat a that lai pawh a theih tawp a lo tuam hlawm tu tan chuan a na vawng vawng ngei ang le.
Upa thenkhat lung no chhuak hma deuh te chu an lo hui pap pap bawk a, sechhun khuangchawi, kut ni vangthla leh chawngchen a hlim tak a an lo tual an lo chaina thinah chuan thihna nunrawngin thla a zar a, tahna leh lungngaihna, thihna leh thisenin a luah khat zo ta.
Lal leh upate hnung a mipa naupang leikang tawh deuh, zawlbuk kai rual em la ni si lote zing a pakhat chu " Ka pa....." Tiin a au chhuak thawt a, an hma a lal leh upate chu rawn tlanpel zuiin lal mual zawl tawp ko pang ngheng a a pa ruang a thihna a rei tawh avanga khawng uaih tawh chu a pan ding nghal a, a pang ruang bul ah chuan a ding chawt a, a mittui a tla nghal zung zung a.



Lal Suakruma ten lal mual zaw an rawn thlen thlak lai chuan tumah tawng zai rel lo in an rawn kal ngawi nghiai a. Ruang in sai kalh nek nuk te chu hmuhnawm ni mawlh hek lo le, tu tan mah tawngzai han chhah chak awm lah ani hek lo.
Lal Suakruma chu rawn tawng chhuakin a aw khur deuh dat atang chuan rilru natna vawr tawp leh thin tawt tih hriat zet hian " Ka fapa, ka van chhuang che em!! Lal fapa tih tur rengin i khua leh tui tan i nun i hlan ta maw " a ti chuai raih a. A fapa, Lal in leikapui ban ngheng a thi tawh tih hriat tak a lo thu ing euh deuh ngal chu a thlir vawng vawng a. In her zui leh in a upa te lam chu a hawi a " khai le, ka upate u, khawi lam hawiin nge thu kan han thlah dawn hriatthiam har viau mahse kan hawi tur lam lam kan chian vat a ngai si a, pasaltha Hranga nen kan hawi lam tur i han thlir ho teh ang u khai " tiin a lal in ding to lurh ah chuan a lut zui nghal a, upa hote pawh chuan nidang a puan ven hmawr phe hlap hlap khawp a phur leh mawng zang a an pan thin lal in ah chuan phei khai zang lo zetin an lut ta thliai thliai a.


Pasaltha Hranga pawh pasaltha hming pu zo zetin a ban ruh tliak uai zawi hnuang chu mau phel hmang a them dawhin a puan ven hmawr a zai thlak chuan a tuam khawng a, a chawn hliam pawh puan a tuamin a fei rinchhan a kal bu saih saih chungin Lal in lam chu a pan a, a khawsik tan avang a a lu hai muai muai leh a pang sa var tawh ai chuan an khaw hmakhua tur chu dah pawimawh hmasak angai ani tih hriain a taksa na tawrh mek chu hre lo ang hmiahin a vaibel pehkawh mek chu a fawp ri hrawk hrawk a.
Lal mual kila mipa naupang a pa ruang bul a lo la tap chawt leh lo t(r)ap mek chu en in " Luaia, mipa fa, chuti tak a lungchhe van kai a tah tur a ni ngai lo e. Inti pachang ta che " tiin lal in lamah chuan a luh san ta a.
Thansangluaia hi fapa mal niin , naupang dangte ang bawk a danglamna leh mi bik nihna nei bik hauh lo a lo sei lian a ni a, nu leh pa, pi leh pu atang a mi huaisen thlah leh mi bik thlah pawh a ni hek lo. Tunah chuan a nu leh a nau bawk vak ve thei tawk tawk tawh nen chauh hringnun an hmachhawn angai dawn ta ani.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)