PASALŢHA PARTEA

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Hluhlu-i Khiangte
Posts: 93
Joined: April 7th, 2021, 10:04 am

PASALŢHA PARTEA

Unread post by Hluhlu-i Khiangte » April 8th, 2021, 6:59 pm

PASALŢHA PARTEA


Hluhlu-i Khiangte


(History leh Pasalţha te sawichhiat a pawngsual tumna a ni lo, pasalţha story hi ka ngaina fal em em a, hnuchhui a, hmangaihna thawnthu leh hlauhawm lam te, aia upa zah te bakah kan Mizo nun a bet tlat zir tur a tamin a hlu ka ti em a, a thawnthu pangngai puah ve turin ka thiamna leh ka hriatna in a tlin lo, hei vang hian thiam ang tawkin fiamthu nen tal ka ziak ve hmiah a ni e.)



Lentlang khawtlang chu an ngui nghiai mai, engdang vang a ni lo, an khaw daingul, pasalţha Buangpuia'n hmelma ngenmu dawngin, a dawng satliah lo, a lo head sak mai a ni. A chaldar, inchaltauh naah pawh hnehtu chan a lo chan fo na chal chang ţha, tuma tauh keh zawh loh pawhin ngenmu a dawl zo bik hauh lo.


Patlingin patling ka ni ti thei lovin nutling ka ni an ti a, a hmei a pa, a tar a zûrin an mittui a sûr sung sung a, li tetakte, kezungpui pil theihna hmawk a siam hial a ni Lentlang khawtual mipui mittui tlingkhawm chuan, chutah le, ruang thlak a hun ta, tlangval tlawmngai ho te'n hlàng zawn an inchuh nak nak a, an pasalţha chu an zah kher mai, chung te chuan pasalţha Buangpuia thai, Darkungi chu a hnukno kaichhuakin, a fapa nausen duhawm tak, Partea pawh chu a ngaihsak hleithei meuh lo.



A ţap hawm hawm a, duhtawka a ţap chu hmelchhe teh mahse tu nuih mah a ti za hauh lo, ni e, lungngaihna vawrtawp in a bual a, a ţahpui hawm hawm a ni si a.


Hun leh ni a liam a, kum a liam a, Partea pawh thingnawi fawm rual a ni ve tawh, a nu leh a pi leh pu te pawh vahrit leh therhlo chi hrang hrang a barh ta fo mai, an chhuan rual rualin, a pa, pasalţha Buangpuia an ngaih a ti zual ţhin kher mai. An fapa Partea hmuh loh chuan a chezia thlir pahin an mittui an hru fap fap ţhin.



"Parte, i par silo maw, hmeichhe hming ang lek nei che-in", ti a a rualpui te fiamna chu na ti ru viau ţhin mahse Partea chu a pi leh pu te'n a hming an sak danah a vui chhin ngai eih lo.



Tichuan le, Parbawnga, Partea pawh a lo seilian ve zel a(a ţhang chak ti suh u, thawnthu anih hi), ramţang rual a ni ve ta, thangkam a ching em em a, ţumkhat pawh Sakhi thang a kam a, a thang tla en tura a kal chu a Sakhi thangah chuan Vawmpui, sum 36 lai mai a lo awm chu niin, a en vat vat a, thang chu a sût a, Vawmpui chu hmuhnawm a tiin a vir that that reng mai, chan loh khanah Vawmpui hawn dawn mahse, Sakhi thang anih miau avangin a lung erawh a dam hlawl lo.


Chu Vawmpui chu mawl hi a ti em em a, hahthlak tih hmek takin, "Kei ai pawh a mawl leh â Vawmpui ka tawng ta", a ti chhuak hluai reng a ni.



Tichuan le, pasalţha te hi chuan mi naran zawh loh, patling ţhankin, a tilţial rual zet pawhin mawngkaw tha nen, hnarkaw tha nen zawng zawng sawmkhawm a an zawn ţawih ţawih tur chu a pu ta lawp mai le, Khiang kung kianga lo ding, Lasi lal fanu Thingremliani phei chuan chutiang em em a a chak mai chu a rap hial a, a men pur hial a ni.



Kawtchhuah a thleng a, Vawmpui chu a keuh dawp. Thang en turin silai ak chhuak hek lo le, hlado chham hnan ve ngei a duh si, a sir a thingţang chu a la lawk a, Vawmpui â phuang mai let bâm mai chu rapin, a thingţang chhar chu silai ang takin a lek a, aw a then kharh kharh hnu-ah.


Vawmphuai eeeè......


Ti lovin,



Savawm eeeee,
A thang pawh hre lo veeeee.
Sakhi thangah awk eeeeeee.


Tiin lungkuai em em, ţahbelh zual tan phei chuan kûk rawih rawihna tur khawpin a chham ta vang vang mai le, silai hmehper tur nei ta lo chu amah bawk chuan a tawp khar na'n dummmmm a ti a, a lung a awi hliah hliah, a nui var var mai a ni.



A thawngawk, Savawm chu a lian tham bawk a, pu chunga khawchhung a lut chu Vawmpui lawng kal emaw an lo ti hial a, mi ţhenkhat chu hlau in an tlanchhiat phah reng bawk.



An kawtkai a thleng a, a Savawm put chu a keuh leh dawt, heiham, huiham, pawh ti duh lovin a ţhu a, a vaibel la chhuakin a ţan a, zu kawh pâwtin a si hlarh hlarh, inchhung a awm a nu Darkungi chu a fapa thawmah a rawn tlanchhuak hlawk hlawk a, an kawt a Vawmpui lo let hual mai leh a fapa, a chawilen, a innghahna chu mak ti em emin a thlir a, a ka deuh hau nghe nghe, tichuan lehhh, a mak tih a reh a, a harhchhuak vat.


A fapa chu pan hlawk hlawkin a vaibel a benthlaksak pawp a, "No Smoking Zone", a'n ti no hnap mai a, Parbawnga chuan ka nu, sapţawng hman a ngai kher em ni? A'n ti sap a, Darkungi ngaihdan a nilo nasa mai, nakinah chuan sapţawng thiamlo chu mimawl, mite enhniam an la ni dawn, tun aţanga kan tu leh fate tana zahpuiawm kan nih mai loh na'n a ţul viau a ni, a'n ti leh ve sap a. Parbawnga pawh chuan a nu thu chu a chhia a ţha a zawmtur tih hria in a bu nghauh nghauh a, a vaibel, a nu benthlak chu a chhar ngam lo, nilo, a chhar ngam a, a nu a zah zawk a ni, tho kanga a nu chu melh a nuihtlawn var varin a beng a pawt zeuh a, Darkungi pawh chu a fapa in a zahna a lantir chuan a ti lawm kher mai.



Parbawnga pawh chuan a chempui, hriam ver vawr mai chu la in a Savawm awh chu a lu a tan a, a kì, kual mawi em em mai chu tih hmelhem hlau zet a zai kualin a la thla hlawl, amah ngei pawh chuan ropui a tiin chilthli tla duah duah in a thlir hial reng a, ţhenawm khawveng te chu pun ngaiah an ruat lo, hnehsawh em em a a sa chu chanin an rep dul mai, an tap ah leng hlawl hek lo le, tlang ruai siam mai an rilruk ta a, an duhdan sawi tura a pu Kapţhelha penchhuak tur chu hmakhalh vatin, keimah ngeiin lal ka bia ange tiin a chhuak vut.



Lal(lal) in a thleng a, a phurphengin lawiluh dil lovin a lut hmak, mak ti em emin lal leh khawnbawl te chuan an lo thlir ţhap a, mahse, pasalţha fapa, a thisen a pasalţha nihna inphum a ni miau a, lo melh eng ang mahse a zam hlawl lo.


A Sakhi thangkam a Vawmpui a lo inbarhluh dan te, Savawm chu mawl a tih thu te sawi nghal zuah zuahin a ţawng chawl theilo a nj ber, an lalpa ning tawh chuan, "a point ah lut rawh", a lo ti ţeng chhuai(h) mai a, khawnbawl upa te leh lalnu leh a fanu te chu phu deuh dawrh mahse Partea erawh a phu eih lo.


An lalpa berin a point a lut tura a tih takah chuan ani pawh chuan an thilphal vang em em pawh ni lo, an eisen dawn ngang loh avanga tlangruai siam mai an duh thu chu a han sawi dap dap a, khawnbawl upa te leh an lalpa Chunguka chu an lo bu nghauh nghauh.


Sa chhiah pawh ka rawn keng lo mai, naktuk ah tlangruai kan siam dawn tho a, kan zavaiin kan ei dial dial a ni ang chu tiin a tawp a khar a, a chhuahsan ta a.


Khai le, tlangaupa, naktuk kan hun hman tur chu han au la, infiamna kan nei dawn tih au tel ang che, a infiamna dan tur chu kan hretlang vek, sawitam a ngailo, infiamna a awm dawn tih sawi la an hrethiam vek mai ang, keiin ka Sial khu ka thawl bawk ange, tiin Lalpa Chunguka chuan tlangaupa chu a tir nghal zat a, khawnbawl upa te'n ka Vawkpa sutnghakin ka do e, an loh tih sap sap chuan, "a ngailo, kan khamkhawp lutuk tho, ka do, ka do tih a ngailo", a lo ti khur khur a, khawnbawl upa ho pawh an ngawi ţhap.



Tlangau awrawl hria apiang chu ti dawn ila an hre vek a, an hriat tura au ni hek, engah an hriat loh ang, lawmin an zuang tawr tawr hlawm a, tukţhuan ei kham lama an infiamna hmanrua tur la tura lo intiam rual tawk lah bo lo, a rik hian an ri hulh hulh mai a ni.



A tuka an infiamna tur chu urlawkin ni an leng a, an urlawk nasa ngang mai, a ur nasa zual phei chuan Masi Putarin minlo pe mai ang tiin dawhthlak dawh tumin an thleng chu an dawh deuh far hial a, Parbawnga dawh ve ngawt tum chu a nu Darkungi chuan, intihderna thil mai mai anih thu sawiin dawh ve a phal hauh lo.



Zing khua a var a, Ar an khuang beleuh chiam hlawm, tumah chu ka mut a la chhuak em mai tiin an mu tawmkuk hauh lo, tho sang sangin nula ţhenkhatin tuium an khirh nghal a, tuikhur lam an pan sang sang, tu fa tur te pawh infiamna hmuhnawm en ve hman loh hlauin an che suau suau bawk a, hlimna in a bualkhat a, a bualna tui phei chu a tling puau nghe nghe.



Tukţhuan an ei puar pengpawng ta hlawm bawk a, lal mual ah chhuak khawm sang sangin an lalpa in thusawina hun te a nei a, an khaw nula zaithiam chhuanvawr Kapţiali chu a'n zai te te a, a rik hian an ri hulh hulh, an lo au bengchheng nen Kapţiali chuan ama aw ber a hre thei lo hial a, chu chuan an hlimna san zia chu a hril ber mai awm e.



Mipa naupang rual an han inkawibah a, hmeichhe naupang rual an in rubber zuan bawk a, vawikhat hlah chu ban hmak hmak an ni, an u, tlangval leh pasalţha rual ho in an lo au phur vei rawl nen nuam an ti tlang kher mai.


Insuknawr, inbuan, thal kah leh silai kah chenin an inel diat diat a, mahse, Parbawnga chu kan tlangruai siam chhan ber ka ni a tia ţankhawhin a tel ve duh tlat lo, an nawrlui ta bik em lo.



Inbuan an ngaisang tlang bawk a, inbuan na a chak ber mai Pasalţha Dawnţiala chu vawrin an phusa hulh hulh mai le, mahse, an khaw daingul pasalţha Dawnţiala chuan a hawi vel na-ah thil tle vat vat a hmu ta mai! Fiah turin tlangval 5 an tir chhuak ta hial a, pasalţha ngaihţhat lohna chu hnawl ngawt thu awm hek lo le.



Fiah tute an lo kir chuan Dawnţiala hlauh ang ngei ngeiin hmelma, an khaw run tum tu an lo ni ngei mai, an phu suau suau a, an zen leh an silai bakah, an chempui leh talhtum, an fei leh sairawkherh bakah an thal te, an hreipui bakah an hnam hrui chenin an tuaihnum a, an inring penpawn kher mai.



Mahse, mak tak maiin Partea chu a tawmim tlat, a chhan an zawh chuan heti hian a chhang a, "Pasalţha fapa ka nih avangin pasalţha ka ni ve kher tur tihna pawh a nilo, kei chu a taka dai ve ngam mang silo, ţawngkam a cho loh nei silo, ralkhat aţang chuan Sakei pawh a mei a chaih ngam, hmun leh hmun ah erawh dawl zawr a zawr ka ni e", tiin a pha ta tlat.




Ral chu an rawn lut ta ngei a, an theih ang tawk leh phak tawkin lo inhmakhua ve teh mahse an tam hnehin, khual kai pasalţha ţhiau pathum(3) ngawt mai Pasalţha Rumvungvunga, Pasalţha Chawngzika bakah lasi te khawpuiah pawh an lalnu, Chawngtinleri ngeiin ruai a buatsaih sak ngat tawh Pasalţha Thinhnunliana chuan an ho miau a, an tlangval te lah an ţhahnemin lal Khawngkhawbaia khua, Khawvel khua an ni miau a, engemaw zat lo tuk zal ve mahse an hneh zo ta tlat lo.



Lentlang khaw mipa tam zawk chu an ruang a let rem rum a, a la dam te tan lah ât so a nawr let ngam ni tawh hek lo le, a hma lawka hlimna avanga nui a kûk rawih rawih te kha an ţap chuah chuah a, khaw mawng lam aţanga an meichher siam hmanga dep kaiin an in te lah chu a kang hluah hluah mai bawk nen lung a zing ngei mai.


Chu khaw inlungrual tak mai chu ţahna khuaah a chang zo ta chu a ni hawt mai a, an innghahna pasalţha leh tlangval lah a ţhen lu bung, a ţhen kut bungin an let rum si nen, a la dam ve chhun te lah an kut hnungkhirh in ramhrui in nghet takin an ţawn vek bawk si, nunau mangang lutuk chu an ip chawih chawih a, an fa te ţap chuah chuah chu ral ho in an bengchheng an tih avanga an thah sak mai an hlau nen hlauhna avanga thaw hlawp hlawp chungin bang turin an ti ve chùl hlawm bawk a.




Chutia an buai nuai nuai lai chuan ral ho in tlangval buk sa tura an hruai ve mai pakhat chuan Lentlang khaw daingul ni ţhin, an khaw tana ral lu tamtak lo la a, sapui leh ral hmaa a hmangaih Lentlang humhim ţhin tu, Pasalţha Buangpuia fapa Partea, laktlak loh zeta lo biru tawm chawih chawih chu dimna tel map lovin a rawn phih chhuak ta nawk nawk mai, infiamna atan a hmang emaw tih mai turin a chaih kual a, Parbawnga awrawl ring lutuk chu a au chùl a, a ţap ruah ruah bawk nen ral ho chu thawk nuam ti lutukin an lo nui ang huah huah a.



Lentlang khaw lal leh nunau te chuan an haw kher mai, lainatna pawh an nei lo, dawizep taka a biruk avangin an khaw daingul ni ţhin pasalţha Buangpuia fapa mah ni se tenna mitmeng nen an thlir ţhup a, nu pakhat insum zo lo phei chuan "chaih hlum ţhak rawh", tiin a rawn au chhuak hial mai le.



Parbawnga na tuar leh hah beidawng lutuk tawh chu a thi der ta ngawt a, a chaih hlum ta-ah ngaiin a lu pawh la ta lem lo chuan Lentlang khua chu nunau leh an lal chenin ral ho chuan an khaw lam panin an kai ta duah duah mai, Parbawnga chu lo thi lo ta pawh ni se a dawizep danah a umzui ngamin an ring lo, rawn um ve pawh ni ta tehreng se anni tan chuan hlauhawm a ni pha lo hrim hrim tih hriain an lung a muang ngei mai, an tlangval hruaiin Partea a chaih phar lai chu mitthla a hmu let a nui leh huah huahin an sal man te chu an ţum leh chawrh zel a.



An sal man te pawh chuan thuawih mai loh chu tihtheih an nei lo tih hriain ngui nghiaiin an tih ang ang chuan an awm ve mai bawk a.


Mahse, ral te chuan an ring sual ta tlat mai, Parbawnga chu a inkhap a inkhap ngei e, mahse, na tuarin a vial a, an ran tlemte ral ho in an kahhlum, an ei duh si loh te chu a hmanraw hmuh ang anga puahin ei turin a siam a, a chau deuh bawk nen a kawchhung chekhnawk zual phei chu a paih ta tawp, chau zetin a ei a, sa mah nise a eitui bik tlat lo, chauh chhiat lutuk tur dalah chauh a ei lui ţawk ţawk a, engemaw thawm riva a awm hlek lahin a hawi tang hrâ zel bawk a.




Khawchhungah pawh chuan awm nuam a ti lo, a hlau chung chungin a tei ruk ruk a, a pa lung an phunna hmun kawtchhuah lungdawh lama a kal a duhna te chuan a hlauhna leh dawizepna aiin a delh rit ta hial a, a pa thlarau in a chenchilh ni mai te'n a hre hial a, muangchangin zam ru tak, zam ngam si lo chung chuan a kal ta a, a pa thlan a hmuh chuan a mittui a tla leh zung zung.



A thlan hma fai hliau mai, hnim tlemte tak tak a lo ţo ve deuh lâk tawhna ah chuan a ţhingţhi rawp a, mahni inngainep leh a pa hming ti chhe tu a nih zia inhria in a hnu-ah phei chuan awrawl chhuah meuhin a au chhuak ţhawt ţhawt a hmuhsitawm khawpa dawizep ni ţhin mah se a lainat duh tu tan chuan a lainatawm kher mai.




A hmuh theih si lohva a kiang lawka lo awm reng lasi nula hmelţha zet leh a hringtupa rauthla pawh chu an mittui a far ve fap fap hial a, ţawng si lova a lu chunga an kut an nghah na chuan Partea ah chuan hna a thawk tih hriat takin a mur sung sung a, a hmuh theih loh, chenchilh tlat tu a pa rauthla leh lasi thiltihtheihna hmang chuan tih chakin a awm hial a.



A insit rual rualin a dawizep chung chunga a mi ngaihsan a pa leh a lasi ţhian-in an la pui duh chu a hlim kher mai bawk.



Tichuan le, ral ho nunrawn danah an ral man te laka an chetdan tur a râwng dawn tih man thiam ve in hmanhmawh takin a inbuatsaih a, a thinlungah hmanhmawh tura tur tu a awm ve bawk nen a chempui chu a hmanraw neih chhun a niin a pa karhla ţhian, Pasalţha ropui tak Thangluaia leh a fapa Pasalţha Sangluaia hmanraw hman ţhin chu hre chhuakin mau bul chang a sat a, a hmawr tawn tawn a suih zum ve in a han leklam vel a, a pa in a puih miau avangin amah a theihna awm, inphumru nen chuan rei lo-ah chuan a hmang thiam in a tum pawh a hlah khat ta pharh a, duh ang thâla thiamnal turin a hun neihin zir hek lo le, a hman thiam ve sawih sawih hnu chuan sairawkherh suih lehin mau bul chang bawk chu thal ang deuhin a suih zum a, a ak ve âm a, an in kang hluah hluah kar-ah chuan zanriak buhfai tur a hai kual fe hnu-ah zan 5 tla vel tur chu a hmu hlawl a, ral ho-in an ran an kah hlum tak, a theih ang ang a a puah ve kha a ţhen a rep bawk nen a pai bawk a, a inphur bawr ve âm mai.


Tichuan, run an tawh aţanga zan 2 leh ni 2 a liam hnu-ah chuan tlai dai-ah an khua, Lentlang runtu ral huphurhawm tak leh in pawh za sarih lai awmna khua, lal Khawngkhawbaia rorelna, ni leh thla bak ka chung ah an leng lo ve ti ţhin, mahse, a khawnbawl te chuan 'chhum leh arsi te pawh an leng reng e' an tih ve tlat ţhin, an lal an hlauh avang chauha an sawi rik duh loh, Khawvel khua te chu an thaw nuam kher mai, an pasalţha khualkai pathum Rumvungvunga, Chawngzika leh Thinhnunliana pawh an chawimawi thiam kher mai.



Khua an lut tur lah chu an thaw nuam bawk a, bawhhla pawh chham duh lovin A ho, kan chau, kan chak bawk a, kan lut tawp ang tih pahin 'ral lu kan hawn seng lo e....a lu nungin kan kai bung bung e....' tiin pasalţha Rumvungvunga chuan a chham hmuk a, an lut ta kha a ni a, dan ni lo mah se an lal leh khaw mipui te bakah khawnbawl te chuan an hnial ngam lo, lawm tak leh chhuang takin an lo lawm lut a, an lalpa in hahzu a zuk te chu rui hnâp khawpa an in hnu-ah a tuka tlang ruai an buatsaih tur thu an puan hnu-ah ri hulh hulhin an intir haw ta kha a ni a.



An sal te chu in lian tak an sak ah chuan kawi khawm vekin an ngaihnep na lantirin mipa pawhin ral veng lovin hmeichhe pahnih, hmeithai Liangkhaii fa an nih avanga hmuhsit te unau, tleirawl te mai, Luangkhaii leh Khanchhukkhaii chu hnam hrui hun tirin an ven tir a, tlawm a rum vawng vawng bak sal tan chuan tih theih leh beisei tur reng a awm lo.


Engtikahnge an nunna laksak an nih ang a, eng hunah nge mualpho taka sual luih an nih ang? Tu tehlul chuan nge an lak aţangin chhanchhuak ang beiseina a eng zawnga an thlir theih awmchhun chu hrehawm lutuk tuar lova an thah an beisei vang chauh a ni, chu lah chu thah pangngai a thah tur nise kai buai lovin an samkhai zawk na'n an khua ah khan an that thei tih an thlir ve thiam si a, mahse, ei leh in chu kalkawngah pe ţha mahse khua an lawiluh hnu-ah chuan tuisik pawh an dawng tlat lo.


Naupang awm ve te, an nu emaw an pa te la dam chuan an rilţam thu an sawi ve a, an ţap ring ngam si lo, hmangaihtu chûn leh zua tan a va na ngawih ngawih tehlul em, khuanu an au vanwg vawng a, nu leh pa in an thihsan tawh te phei chu pangchanna tur an nei si lo, lai an ti na a, inhnem thei reng an awm bik lo.


A ruk tak meuh meuh a hapui sehruh ve nghek bak tih theih an nei lo.




Chutih lai karah chuan Khawvel khaw daiah chuan pasalţha ralhrat Sangluaia, lal ropui Thangluaia fapa leh a pasalţha chhuanvawr Denga te, lal ropui Sangvunga fapa Pasalţha Sangliana leh, pasalţha Pazawna chuam, pasalţha Ralngama bakah Partea, chu an ţhu khar mai a, an nàu lutuk chu Ralngamaa phei chu a rum nghut nghut a, an khap hram hram a ngai hial a, Parbawnga pawh a thla a muang kher mai. A kiangah ralhrât rual an awm a, tam ni lo mahse mi pakhat lek pawhin mi za(100) rual an hen a ring hial a ni.




Tichuan le, enthlatu leh vengtu awm ang an hmuh miah loh avang chuan thawmdim takin an kal lut ta ţhem ţhem a, an sal man ho an lo dahna hmun a hmeichhe pahnih chauh lo awm an hmuh chuan mak an ti kher mai, Luangkhaii leh Khanchhukkhaii pawhin pasalţha hrawmhrâw tak te chu an han hmu ve vat a, au tum mahse an che rang hman lo, hnai fe-a an ka hup tu an han hmuh chuan an mengphawk zawrh zawrh a, pasalţha ho erawh an bu nghut nghut, buaina engmah an lak aţanga nei lovin an in la chhuak dam dam a, lawmna avang pawh ni mah se ţap ri ngam si lovin anmahni chhanchhuaktu, pasalţha ho chu thuawih takin an zui a, khaw dai an thleng ta.


Parbawnga bawkin at so lehin 'ka thei e, kan thei e, ka pa rauthla min puihna zarah leh pasalţha ralhrât ho zarah ka unau te chu kan la chhuak e', tiin a au leh ta liah liah mai e.



An phu suau a, khatiang khawpa awrawl ringah chuan thawm a rawn ri nghal chuah chuah reng a, huat hmel taka en hlawmin zamna erawh anmahni hruai tute hmelah chuan a lang eih lo.



Pasalţha Parte-a tih thawnthu ziak tu Hluhlu-i pawh Partea ţawngkam chuan a deng dawt a, ngaihsan tum a a beih ve nasat nen, mawl hi a ti em em a, Pc Hrasa aka thlahranga nupui Daduhi ai pawh a mawla tih vang leh, chu pasalţha chuan a beisei a phak loh em avangin Pasalţha Partea thawnthu chu a ti tawp ta ngawt a.



(Tawp daih)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)