Muallung mihrâng -Thanṭhuama-5

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Rohlupuia Renthlei
Posts: 20
Joined: April 29th, 2021, 8:10 pm

Muallung mihrâng -Thanṭhuama-5

Unread post by Rohlupuia Renthlei » May 12th, 2021, 11:34 am

MUALLUNG MI HRÂNG- THANṬHUAMA

BUNG-5-NA

Ruatfela Pa


Lal fapa Dârkhuma chuan a kianga thên kung, malpui tia ṭelṭawl chu ṭan chhanin, Sakei mei chu a veh hual a. Dâra seh tuma a inher leh chiah chu an khaw buan chak, Dêngvunga chu rawn dawk zawkin, Dâra bula dingin Sakei ke hnunglam pakhat zawkah chuan a rawn man lawp mai a. Kil tin mai aṭanga an rawn hawlh tak bawk avangin, chu Sapui meuh pawh chuan hawi ngaihna leh beih mai tur reng a hre lo chuan a hawi tawn chhen mai. A mei leh ke a man tu ten an chaih hneh bawk nen, mangang hmêl zet chuan a hawi kual ruai mai a. Chutia a hawi buai lai tak chuan Chalkhuma chuan a muzuk fei ken chuan a zakdawhah a rawn thil pawk mai le. Saikei pawh rum hawkin a zal hnawk a. Thawh kan leh tuma a in hai fuat fuat lai chuan Ṭhuama chuan a chempui hman thiam ngei mai chuan a nak veilam kaw duai khawpin a rawn sat zui a. Ramhnuai lal tân meuh pawh tihngaihna a awm ta lo. Thei leh thei lo chuan vah sawn a tum ṭawk ṭawk a. A chelhtu te tha a chak bawk nen, a vak sawn thei ngang si lo chu a rum chhur chhur mai a! Chutih lai tak chuan Ṭhuama chuan Val upa leh pasalṭha te chu rawn nawr hnai sauhin, a hnuk chhat turin a han ti a. Mahse, anni pahnih chuan a hnuk chhattu nih an tum awzâwng lo mai....!

Pasalṭha Darhnuna chu an tlangvâlte chezia chuan a hneh ngei mai. Ngawi rengin Vâl upa chu a'n mitmei a, ani lah chuan khawdang a lo hawi daih mai. A silai chu lal fapa l, Dârkhuma kutah chuan hmehbel chawtin, "Khai lê, nang, a mei chaihtu, a hnu han khar rawh le...." tiin a'n nawr sawn a, a mei chu a lo chelh ve thung a. Dâra chu a'n ṭang ngial na a, tuman a hnuk chhah tum awma an lan tak si lohah chuan, an pasalṭha te leh an khaw tlangvâl ten an duhsak zia hriain, chu Sakei chaldâr tak chu a tin ta ran a. A silai chu han hmet puak durin, sakei chu vawikhat a han leng awrh a, a zal ta raih raih a. Tlangvâl ho chu an haw haw dur dur mai le.

Vâl upa chuan tlangvâl ho chu Sakei leh a sa seh zawnna tur hlang siam turin a han ti nghal zat a. Meichher kengtu ho tih loh chu an phu suau a, hlang tur thing tuai leh ram hrui te chhatin an vak darh ta sung sung a. Chutihlai chuan, tlangvâl ho sir deuh ah chuan Tlângthanga chu, a âwma Sakei hamna, thler deuh hawk leh thiin a bual deuh zuih chu a kawite chuan an lo buaipui thunga. Pasalṭha chuan va pan hnaiin, "E khai, kha enge i an Tlânga? Chêkah Sapui ha ziau tahna kan chang ṭhelh alawm le.... I huaisen kher mai...." tiin a'n fak pah luam a. A hmâ a sial luat vanga an nunna der thawn zia a ngaihtuahin, Tlânga chu a zak ru kher mai. Pasalṭha ṭawngkam an hre zui ngat mai phei chu, hawi ngaihna reng reng a hre lo. "Ka tih palh der a ni pasalṭha....min ngaidam teh u," a ti thei hram a. "Ngaihdam ngaiin i awm reng reng love, mâ'rawh chu, upate zai ngaih hun a awm ngai e," tiin an kiang vela ram hnim, pem thara hnawih chi te chu ṭham khawm zung zungin, a hliamah chuan a bel sak zung zung a. Tlânga pawhin lawm si, hrehawm ti ru tak chung chuan a lo dawh ve mai a. Chutih lai chuan hlang pawh lo peih tawhin, haw haw chungin khaw lam chu an pan ta mup mup mai a. A duh lo teh nain, lal fapa chu Ṭhuama leh Dêngvunga chuan a zakah la lawpin, Sakei chungah chuan an hlâng chho nawlh mai a.

Tlangvâl ho, haw haw ruih ruih chunga lal tual lam pana rawn chho mup mup mai chu lal leh upa te chuan leihkapui aṭanga lo thlirin, hlang chunga a fapa an zawn tel a han hmuh ngat phei chuan, an lal, Lalkhuma chu a hlim leh zual kher mai. Sakei chu lal mual, zawl zau laiah chuan nghatin, mipui chuan an kil tuau mai a. Chutah, lal chu rawn ding chhuakin, "Khai le, khua leh tui duhawm tak te u, mak tak maiin tun ang hun, ṭhâl khaw san lai tak maiin Sakei sual kan han khual mauh mai a. Pawi nasa zawk a khawih hmâin tlangvâl rualin in han tukzal hlauh mai chu a va han lawmawm tehlul em...! Vâl upa leh Pasalṭha te lo chhuak ula, in chanchin sawi pahin, tunge 'HUAI NO' dawm dawn le? Kha lah, Dârkhuma, hlang chunga in han chuan tir tak vawk vawk ni! Han sawi fiah deuh teh u khai....Dâra Nu, ka Seki No ngei khan kan mihuaisen te dawm tur kha han chawi chhuak tawh...." tiin, a Upa ho kiangah chuan a ding fel ta at a. Val Upa Sairuma leh Pasalṭha Dârhnûna te lo pen chhuakin, a hmun thleng hmasa zawk Val upa chuan:

"Lalpa, khatia kawng thlanga a saseh a hnuh thlakna hnuah khan kan han tâwngpawng tlan thlak rawk mai a. Hei, Thanṭhuama hi in chhûng dung chen velah kan zuk fin rawih mai a. Khûmi, tlak lam mual pangper, khawhlui lui mawng lamah khuan hnuk thlain, a duhaiin kan hnaih chilh ta deuh nge ni, kan thawm a tuar ngam lo zawk ni dawn, a sa seh chu lui kamah lo dahin, a thlang maiah chuan a inhrosa hem hem mai a. Bawhzui dan tur kan han ngaihtuah lai chuan, Tlânga hian a thal a rawn thlah ta a. Duh angin a hmu chiang bik vak lo a ni mai thei e, pawi a tawk pha ta tlat lova. Silai puah rual deuh thawa rawn zuang, Hmaibiala chuan Tlânga âwm a rawn ham hman hràm a, Pasalṭha hian a lo sir tlukpui hman hlauh mai a. Kan him hram a ni. Sakei rawn inher rem leh chiah chu hei, Ṭhuama hian a feiin a lo khawh hman hlauha, a ṭuan a fum phah ta! Englai kârin nge Dârkhuma a rawn lan kan hre hman meuh lo. Sakei rawn zuang leh chiah chu sir lam aṭangin huk tuar khawpin a meiah a rawn phih teh reng a nih kha. Dêngvunga'n a bawpah rawn man ve nghalin, Chalkhuma fei leh Ṭhuama chem tuar lovin a bawksawp ta a. Dâra hian a hnuk a rawn chhat ta a ni. Lalpa, 'HUAI NO' dawm tur an awm a nih ngai chuan, i fapa leh a ṭhiante, Dêngvunga leh Tlânga te hian an phû vek mai!" tih pahin upate sir lamah chuan pasalṭha nen chuan an tawlh kiang ta a. Khaw mipui, lal mual rawn kai ho chuan ngaihnawm an tiin, ropui an ti ngang mai. Ka ho hian an lo ngaithla ṭhuap mai a!

Tlângthanga chuan chutia a hming Val upain a han lam chhuak ve ta mai chu mak a tiin, amah vanga nunna an hloh teuhzia a ngaihtuah chuan, pasalṭha leh val upa thu a lo ngai chang lo kha a inchhir hnuhnawh kher mai. Chu mai a ni lo, zan tira Thanṭhuama Savawm hliam chungchânga a ṭawng duh dante kha a ngaihtuah chhuak uar uar a. Mahse, chutia a hming meuh HUAI NO dawm tura Vâl upain a han lam tel chu, lal luhka tlâng sâng lawn chu a chak et et mai. 'Mi huaisen' tia sawi ni mai tura inngaiin, an khaw mipui hmâ ngeia chu NO dawm chu a chak et et ta mai.

Lal chu rawn pen chhuak lehin, "E khai, kan tlangvâl te, in chhuanawmin in huaisenna zârah lungmuangin kan awm theih phah leh dâwn ta. Nunna hloh hauh lova Sapui in han tlawm ṭhin hian min ti lawm takzet a ni. Val upa in a lam ho te kha lo chhuak ta ula, a mimala han dawm tur chuang ka hre hauh lo mai ka ti....! Kan Vâl Upa leh Pasalṭha te khan hmâ han hruai teh se...." tih pah chuan a'n hawi kual ruai a. Tlângthanga chu a âwm bawr, sakei hamna avanga an tuam deuh lûk chung chuan a ṭhiante chuan an rawn kai chhuak a. Lal fapa chu a'n hawi ngial a, a ṭhiante hmêl hmuh tur awm ta hauh lo mai chu a hrilhhai letling kher mai. Mi hmuh loh tur ang ber chuan in chhung lam panin a put ru zãl zãl a. Pasalṭha leh Val upa te chu rawn pen chhuakin, an tlangvâlte chu an han melh ngial a. Tuallaia tlangvâl rual te chuan an kiang vel te chu han mitmei thuaiin, hmuh tur reng an lo awm tawh si lo. Han in lam kual leh buangbar ai chuan, Sakei lû aihna lamah hlanna hun a awm tho alawm tiin an lamtir duh ta lova. Hmuh tur awm ta lo chu, Tlângthanga hrilhhai hlauin, lal kuta nopui chu an han lem zeuh a. Ngaihngam takin Tlângthanga pawh chuan a han lem ve ta a.

Chutah lal bawk chu rawn pen chhuakin, "Khai lê, khua leh tui duhawm tak te u, zanin atân chuan ṭin zai rêl ila, Sakei lû hi naktukah kan ai ngei ang. Tûmah ram chhuak awm loin, kim takin Sakei lû kan ai nge tur a ni ang. Ka se pa tuai zak râng kha, naktuk zîngah Tlangau pa hoin lo thlung se..." a tih zawh chuan, Upa Kaibuaia chuan, "Vawkin kan lalpa chu ka lo do ve ang e," a rawn tih chuan, mipui te pawh mahni in lam panin an ṭin ta sung sung a.

Khatia Sakei an zawn thleng, val upain thu a han sawi dawn lai khân, Ṭhuama leh Chalkhuma chu an In lam panin an kir dun a, a tuk zinga a savawm hliam hnu chhui dan tur an lo sep zui nasa mai hi a lo ni a. Chutih lai chuan Tlangau ri hriain, a tuka sakei aih a nih tur thu leh, tumah ram chhuak lova lal muala chhuah khawm tur a nih thu an han hre zet chu, Ṭhuama lawm a kim thei der lo mai. A Savawm hliam hnu chu chhui ngei a duh a, Tlângthanga ṭawngkam kha a pai dai mai thei hlek lo. A tuk leh lama chhui zui ngei tum chuan a rilru a la siam ta sauh sauh mai. Lal thu chu hnial rual a ni si lo! Tih theih vak an neih tak si lohah chuan, zawiin Zawlbuk lamah mu turin an kal ta a!

Chumi zan ber khera Sapui rawn inlâr chu, Upa Tâwnvela ngaihtuahna pawh a tibuai zo ta. Thanṭhuama te hnena lawmthu sawi ngei a duh si a, Ṭhuama te In lam pan rilruk chunga Lal In a chhuahsan hma tehlul nen, boruak dangin a dêng leh ta si a. Hun remchâng dang a awm ngei ang chu maw....ti rilru nauh nauh chungin lal mual lam a pan leh ta kha a nia.... A fanu, keh thei dawma a dawm ve, nunna chân mai thei dinhmuna ding chhanchhuah a ni tih a han hriat khan, chhungril tak aṭangin a hlim veng veng mai a. A fanu chu chân tura a indah ngawt pawhin, a ipik lutuk thlan fîmin a bual zaih zaih mai a ni si a. Thanṭhuama chunga lawmthu kam khat mah chhak chhuak lova awm chu a tum bik hlek lo.
(Sakei leh Sa dang hrim hrim an aih dan hi chu tarlang kher lo mai ila.)

Sakei an aih tukah chuan, Ṭhuama leh Dârkhuma (Dârkhuma pawh hi lal fapa tiin, ṭul bikah chauh lam tawh teh ang. Ṭhian kâra "lal fapa" in tih bik reng zawng, a fel lo e) pawh, Chalkhuma hruaiin, zîng takah pasalṭha Dârhnuna hoin, Satlak mual lam pan chuan an liam ta diak a. Ṭhuaman Savawm a kahna hmun chu thleng thuaiin, a lum thlakna lam chu an pan thuai a. Kârah nî a tlak hman avangin, a lum tawpna hmuna thikhar lo khawn uaih tawh bak chu thisen hmuh tur a vâng hle mai a. Pasalṭha Dârhnûna chuan Savawm hnu chu chhuiin, a kal kikawi dan aṭang chuan a hliam chu a na ve khat ni chuan a rin theih a. Hmun ṭhenkhatah chuan thisen lo far leh zauh zauh hmuh tur a awm leh ṭhin bawk a. Lo fing thum aia thui mah an chhui hnu chuan, a thisen far hmuh tur a awm mumal ta hauh lo mai. Uluk leh fimkhur tak chuan hnuhmâ chu an han zawng a, an thlang lawka Thingse kung tar lam tawh, awn deuh dû chu a lo inthliak deuh nuaih mai a. An han belh chian chuan, thi duk tlêm lo khawn iaih chu an hmu ta a. Chutah chuan zan a riak ni ngei tur a ni. Chuta ṭang chuan a hnu pawh tlemin chhui a nuamin a thar lâm ta deuh nen, Satlak mual mawng, kawrte kam lam chu a pan tih an hre thei ta a. Nî pawhin Lentlâng pang a hlat fû tawh hnu chuan, an hnu chhui chuan Luite chu zawhin, dum pakhatah chuan a inchiah ni ngei tur a ni. Chutah chuan chawlin, Vaibel pak hlat hlat pah chuan ba chhum an ken te chu an han keih mawlh mawlh bawk a.

Rinaia an man har tak deuh avangin Ṭhuama pawh chu a inthlahrung ta deuh a niang, an ngawih ṭhap lai chuan, "Ti teh u, ka pa Hnun, i ṭin san ang u khai. Kan sa hi a hliam a na viau lo a nih hmêl e," a rawn tichhuak hlawl mai a. Pasalṭha Dârhnûna pawh chuan, "A thi buak dan han en kha chuan, thui a kal ka rin loh nen, a sa huat a fuh lem lo nge maw ni dawn le...Fing hnih thum han chhui leh phawt ila, ro hran pawh kan rél mai ta lawng, ti teh u, i han bei leh phawt ila..." tih pah chuan a tho ta nghal a.

Uluk leh fimkhur tak chuan an han chhui leh ta a, a sulhnu aṭang chuan umzui zel chi niin an hre ta lova. Hmâwng mual tlâng dung lamah kaiin, khaw lam pan chuan an inher chho ta a. Thanṭhuama chu a zak rilru hle mai a. Ngawi ngal hian a kal chhat chhat mai a. Sawi tur reng a hre lo. A ṭhian te leh pasalṭha chu a hmaizah ngawih ngawih mai a. A bîng deuh chûk chûk ni mai hian a hria a. A ngaihtuah kir leh ṭhin a, engvanga nulâ te kalsana, a hlimchhawna lo um ta mai lo kha nge a nih tih a ngaihtuah vang vang a. Lehlamah chuan, a mihringpuite, hlauhlawpa an awm laia han tlansan vut kha ni thei ngangin a hre si lo. Chu erawh inthiam chawpna atân tlingin a hre bawk si lo! A ṭhiante titi reng a lo hre chang lo. Pasalṭha chuan a ngaihtuahna hria ni awm hrim hian:

"E khai, Ṭhuama, hrehawm ti reng reng suh. Duh thâla thal thlahna hun i nei hauh lo tih kan hria e. Sa hliam ai chuan mihring nunna a pawimawh zawk tih hriat reng tur a ni ngai. Kan dam anga, a ngho vâr ṭha ṭha, a lian ṭha leh thau ṭha ṭha kan la thal hial hual ang chu le...." tiin a rawn hnem a. Chutia a rilru hria niawm hrim a pasalṭhain a rawn sawi takah chuan Ṭhuama pawh chuan veng deuh huaiin a inhria a. Feh reh san velah in thlengin, mahni in lam panin an inṭhen darh ta sang sang a.

Lo an hal anga, hna ṭau a ṭet chho leh mai dawn si a. Ṭhuama pawh chuan a chak dah khawm ho chu in thlen thuaia, lo hal hma a an in te chu a theih ang anga thuam ṭhat a duh vangin, chaw a bâr sawk sawk a. Ram lam panin a liam zui leh nghal a. A kal pah chuan a ngaihtuahna kil khat luah reng maitu, Liankimi ruangâm bawk chu a lo lang leh ṭhin a. Thlasik vawi sawmhnih em pawh la hmang loin, hmeichhia, a thinlung han tinêm a, a suangtuahna han hruai pêngtu la tawng lo kha, Liankimi mangang hmêl leh taksa ruangâm chuan a hruai pêng ṭan der chu a ni ber mai a. 'Zah fakah lû em chhum suh' tih changchawiin, zan lam chu Liankimi te ina chuankai ngawt a ngaihtuah a.Vawi engemaw zat a thiar hnu chuan, a thing dahsa pawh a thiar zo chu a ni der mai. Thingkhawn sir remchâng laia a chak lak te a lo rem ṭhat mawlh mawlh lai chuan, Liankimi te ṭhiandun thing phur haw chu an vêng thlerah chuan an rawn chho hnak hnak a. Ṭhuama te In bul an thlen chuan ding meuhin an han chawl a. Thanhnûni pek chuan, "Ṭhuama, naktuk chu Sezawn lui ah chuan min hruai tawh la mawle...." a rawn ti chhuak hluai a. "Nia, hun kan nei tlem tawh si, lo hal a ni tawh mai dawn...." tiin Liankimi chuan a lo tuihnih bawk a. Ṭhuama'n a chhan hma chuan Hnuni bawk chuan, "Zaninah kan in lamah rawn chuangkai la, Kim ṭhiani lo chhuk bawk se, ro i rêl tlâng ang u..." tiin a inher vut a, kal a siam zui ta daih a. Ṭhuama pawh a hrilhhai ang reng hle mai. Ni lêng maia a suangtuahna luahtu ngei mai a'n hmu thut leh, chhan letna hun pawh nei lêk lova an han kal leh vut mai chuan a ti hamhaih zo vek mai! A hna thawh lai a zawh fel hnu chuan, khua a la tlai chhe lo bawk nen, dai hnaia ther hlo ilo dap turin a Silai thar ngei mai nen chuan a in ak chhuak zui vawk vawk a. Leisen mual chuan hnuai lama Vaube pâr chuai tawh lam chu panin, a ngaihtuahna vak vel chu paih bo tumin a in thing nawk nawk a!

Thanhnûni te ṭhiandun liam ta pawh khan eng thu dang an sawi thei lo. Thanṭhuama mize zawi leh ṭawng mawh zet mai phena duhawm rukna riau chuan a bikin, Liankimi chu a zèm hneh kher mai. Thanhnûni bulah pawh hian sen ṭân ṭân chung hian a sawi leh zeuh ṭhin! Chutianga a ruka a lo vei, a ṭhiannu bula zak chung chunga a sawi chu, ani, hmeichhe tâna han hriattir ngam zia a ni si lo. A mipain a hriatthiam theih tura mitmei han len tur pawhin, an in tak ngial pawh a rawn chuang kai ngai lo a ni si a! A ruk tak chuan a rilru a hah takzet a ni.

Thanṭhuama Sakhi chang pawh a nasa lo ngei mai. Chu Vaube pâr chuai lam tawh chu Sakhi chuan a la tlawh fo tih a hnuhmâ aṭangin a hre thei na a, Sakhi lam ai chuan, a ngaihtuahna hruai pêng mêktu, Liankimi ngawt chu a suangtuah leh vung vung ṭhin! Sakhi lam reng ngaihtuah hauh lova a siangtuahna a zui vang vang lai chuan, a sa chãn mêkna lamah chuan thingṭang tliak ri rak hi a hre ta a. A'n hawi thlak nak chuan le, Sakhi pachàl zâng hang, ki zum varh mai hian Vaube pâr tla chu beng tun hrâ hrâ chung hian a lo chhar zat zat mai a! A suangtuahna ram aṭanga harhchhuak thutin, a silai chu Sakhi lamah chuan a her ta riai riai a. Pasalṭhate'n 'Silai ngat hi chuan, Sakhi te, Saza leh Sazuk te hi chu, an nghâwng hi han tum chat ila, vanneih a awl bik ngai e,' an tih chu hrechhuak zawkin, Sakhi nghâwng kah fuh ngei tum chuan a tin ta vang vang mai le.

Vawilehkhatah a silai chu a puak dur mai a, chu Sakhî pawh chu a zuang zawk mai. Vawikhat thui fê a'n zuang a, a ṭum fel, zuan leh a'n tum chiah chu, ring thlep hnawkin a thlang maia Tlângham hung dêng dawt chuan a lum thla ta thlawrh mai a. Silai zen te sawha, a mu a thun fel leh hnu chuan a sa kah lam chu a pan a, kah nawn a ngai lo tih a hriat chuan, silai mu chu phawrhin, Sakhi chu a pu nawlh a. Khawlam a pan ta vang vang a. Kawtchhuahah chuan, a silai thar hmanga a Sa lak hmasak ber Sakhi chal chu nghatin, Sakhi hlado heti hian a'n chham vang vang a!

'Khisa ê, sen zir ziar law,
Tlângtin dungzui rãwl fak lai a'n
Vala'n ê, lungphang lo te'n
Chengrâng buan ang ka pawmtir e....'

tiin, silai mu awm lo chu a'n kap dur a. Khawlam a pan zui ta a. (Sakhi hlado hian mipa naupang leh tlâng a ko lo ni maw!!) In a han thlenga, a nu leh a farnute pawh an lawm thiam ngei mai. Thal hmangin sa chi hrang hrang chu lo tukzal ve tawh mahse, a Silai thar ngei mai hmanga sa a rawn hawn chu a lawmpui awm bawk a ni! Sa an chan zawh chuan, Dârkhuma biak pah a duh vangin, amah ngeiin Lal sa chhiah chu pe turin a kal ta a. Chutia Ṭhuama, Sa chhiah keng chunga luh dila sumhmuna ding aw râwl a hriat chuan, a pâ thu pawh nghak hman lo chuan Darkhuma chu a dawk chhuak zawk a! Nui hui chungin Ṭhuama chu a rawn nawr lut nawk nawk mai a!

Mak ve ang reng deuh mai chu, ram lama inzuia, inkawmngeih leh in nêl tak ni si hi, khawchhûngah hian anni pahnih hi an inzui tam lo hle mai a. Ṭhuama inkiltawih deuh vang hi a ni ber awm e. Chutia a fapain Ṭhuama a rawn nawr lut nawk nawk mai chu lalpa chuan nui vur vur chung hian, "Khaih khaih, Dârkhum, ṭhiante khati taka han nawr tur em ni ngai? Kha, Ṭhuama, eng sa nge ni ngai?" tiin a zawt zui zat a.

"Lalpa, hei, i mi duhsakna Chengrâng ngei mai khan Sakhi min puak hawtir hlauh mai a, i chungah hian lawmthu sawi dan tur reng ka hre lo mai ka ti...." tiin a lo chhâng thuai a. Lal pawh chu a lawm ve hle hian a hriat a. "Ê khai, lawmthu lam reng ka phut nem, hetia ka khuain daingul rin tlak kan neih belh tur ngawt pawh hi lawmna tham a ni hrim mai. Lawmthu lam vei loin, ṭangkai takin hman tum hlauh teh khai...." a lo ti nêm duai a. Zanriah kil lo a la nih avangin haw leh mai tumin kawngkhar lam a pan a, Sumhmunah chuan Darkhuma chu han bekbawr sar sarin, "Naktuk enge i zai rel le? Luite kal i hman law'm ni?" a'n tih chuan, "eng tih zai ka rêl hran law, hman lohna dang a awm lawng chu, khawi luite nge han hrut i tih a?" a lo ti let var a. "Thanhnûni leh Liankimi te'n luite dung hrutpui an beisei mauh mai a! I hman chuan kan zuk kalpui emaw niang ka ti...." a tih chuan, Dâra pawh chuan buk nghat pahin, "Zâwlbuk han kai ila, kan sawi fel dawn nia..." tiin an in ṭhen ta a.

Dârkhuma leh Thanṭhuama chu, lênglen rualin, Thanhnûni te In lam an pan ta a. Luhte dila, kawngkhar an han nawr hawn chuan, "Ê khai, kan lal fapa te meuh, eng thli chhiain nge rawn chhêm lut che u ni le, keini in te in rawn chuankai teh hlawl, ti rawh u, meilum hi han hnaih tawh u...." a ṭhut hmun siam rema, a la kaih tur buaipui pah chuan Hnûni chuan a lo be sawt sawt a. Lal fapa a lo tel ve avang chuan inlêng dangte pawhin ṭhutna an lo kian deuh sap sap a. Chu chu duh loin, Darkhuma chuan, "A pawttu pawhna a nâ ni maw, hei, zan tin kan rawn dak lo ang tih pawh kan sawi theih loh hi...." tiin, Khum ai thlang a Papui ngheng chuan ṭhut hmun a rem zat a. An lal fapa hi vantlâng zingah ngat phei chuan, lal fapa a nih avanga chungnunna leh zah bik nih hlawha awm duh lo, michhe ber aṭanga a lian ber thleng pawhin an kawm phak leh an nel tura awm thiam tak mai a ni roh a! Titi phunglêng sawia an phul hlut lai chuan Hnûni pa, Râlchhuma chuan, "Kha, Ṭhuama, kan boruak tawnin zir ta lo chu, lawmthu han inhrilhna hun eih pawh awm lova hun kan han hman mai chu ni. I zârah 'kan fanu' ti a lam tur kan la nei a nih hi maw! Kan va lawm teh kelh em!!," a rawn ti hlawl mai a! Ṭhuama chuan zak sen âm âm hian, "Khai, ka pa Ral, lawmthu sawina chi ni nghal lo chuan, ka luite hrût haw nen kan in nang hlauh a, kan him tlang hlauh a ni e..." tiin a lo chhâng thuai a.

Chutihlai chuan Sumhmun aṭangin Liankimi aw ngei mai chuan, "Awi, lal ṭhian...." rawn ti bawrh bawrhin kawngkhar a rawn sawn a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)