Muallung mihrâng -Thanṭhuama-7

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Rohlupuia Renthlei
Posts: 20
Joined: April 29th, 2021, 8:10 pm

Muallung mihrâng -Thanṭhuama-7

Unread post by Rohlupuia Renthlei » May 15th, 2021, 3:50 pm

MUALLUNG MI HRÂNG- THANṬHUAMA

BUNG-7-NA

Ruatfela Pa

Pasalṭha Darhnuna te, Duhthanga leh Suakvungate, Val Upa Sairuma te ho chuan Silai tin kawh vah chungin Ṭhuamate in ep ran mai chu an rawn din hual ta! Chu veleh Pasalṭha Thanruma chuan, "Min tam hneh avang ngawtin kan sa hi min hneh chhuh ngawt hauh lovang. Ka sa lû nen ngei hian ka haw bawk ang," a rawn ti tun tun mai a. Pasalṭha Darhnûna ngaihdan a ni vak lo a niang, "In ralthuam te kha dah thla rawh u," a ti vin ta ṭhak mai le. Thanruma leh a naute chuan Muallung hoin an tam hneh tawh zia hriain an hmanruate chu an dah thla zal zal hlawm a. Duhthanga chuan rang zetin a khawm ta zung zung mai a. A Chempui thehthlak pahin Thanruma chuan, "Mal beiha min hmachhawn ngam in awm phawt chuan ka hmâ ah hian rawn ding rawh u, ka hneh che u a nih chuan, he sa hi kan nei ang a, min hneh a nih hlauh chuan, ka naute hi nun ula, ka lû erawh chu in la thei ang," tiin Muallung lam chu a cho zui kuk kuk a. Muallung lam hi leido nei lo, pasalṭha, khual kai an neih hriat lah ni suh, a zuamin a cho em em pawh hi a mawh love.

Pasalṭha Darhnûna thinin a tuar ta lo. "Ṭha zaia sawi rem theih loh chu, khawinge, nundan mawi zirtir hlek i ngai a nih hi, a chem kha Duha, han pe tawh, kam tam pa, lo inring rawh le...." tiin a Silai chu a sirah chuan tungin, a chempui phawrha, Thanruma lama a pen chhuah dawn chuan, tu khalh rual lohin Ṭhuama chu Pasalṭha Darhnûna hmâah chuan a rawn ding chat mai a. "Ka pa Hnún, lo kiang teh khai, hei chu ka chan pual," tih leh Pasalṭha Thanruma pan chu a rual nghal a. Chu ve leh Thanruma chuan, "Naupang, pialralah ka rawng i bâwl ngei ang le," tih pahin, Ṭhuama lamah chuan a rawn dawk zawk mai a. Dârkhûma te ho pawh an ṭe ṭhawt mai! Ṭhuama lû chu a per nawlh loh reng an ring lo! Ṭhuama pawh a chesual teuh ngei mai. Thanruma chem rawn vai dawk zawk chu hnung lama eu awrh chungin a lo bum hman hram a, a chem rawn vai let leh bum tur chuan leiah zangthalin a tlu nghal thlawp a. Thanruma chem vailet in a ṭhelh tih hria a, a tha pek na si han petek nawk chhung rei lo té ah chuan a ṭan hmun a lo siam rem nghal zat a. He mihring, depde leh chapo hmêl zet mai hi Ṭhuama hian tih hlum kher a tum hran lo. Pialleiah hian a chungnung ber lo a, ani aia thei hi an awm a ni tih hriattir a, nunkawng dik zawh tura hun ṭha leh remchâng siamsak phawt a, chuta a theih ngang loh a nih ngawt loh chuan, thah kher a tum hauh lo.


A chem vai ṭumhnih a thlawn ta tih a hriat rual rualin, Thanruma chu vir let nghal thuaiin, chunglam leh hnuai lama a chem vai tawn zawk zawk chung chuan a rawn bawh phei leh nghal a. Awlsam tea a chem rawn vai lo lak leu pah chuan Ṭhuama chuan, "Kei ve thung aw...." tiin, Thanruma chem vai bum zauh pah chuan a hnaihchilh thut a. A bek nêmah chuan a lo bêng ṭhuai mai a. Thanruma pawh a vir mawp mai. A hmaiah chuan Dumdè an lêng chuai ni mai hian a hria a. In thing harh thuaiin, "Naupang, thi sawn rawh," tih pahin a rawn bawh leh buan buan mai a. Chutianga mahni inthunun zo hlek lova a rawn bawh buan buan chu lo bumin, a chem phek chuan a mal veilamah a lo hêm ri thlawrh mai a. A hêm na bawk a niang, lei chârah chuan a ṭhingṭhi rup mai a. Chu tak chu bawhzuiin, a khel dinglamah chuan a hmâ aia na mah tura a'n hêm leh zet zawng, Pasalṭha meuh pawh a rak tuar mai! Ṭhuama han che vel chu Pasalṭha Dârhnûna te chuan hmuhnawm an ti ngang mai. A nunchan zir a lo hmuh ruk zeuh tawh te chu a mitthlâah lang iar iarin, a ṭang lutuk chu a lo in sehruh ṭeuh mai a. Mahse, Ṭhuama chuan a chhaih kual vel mai mai a ni tih a hmuh chuan, a inthlah dul ta deuh a. Ngaihngam tak hian an in bei chu a thlir ta veng veng mai.

"Uai, chem pheka hem mai maia Sa chhe rak rual em i nih le? Han ṭang ta che le, inti Pasalṭha pa..." tia Ṭhuama auhna chuan Thanruma pawh a din chhuahtir zawk mai! Hah luat vang leh na tih luat vanga thaw huam huam chungin a rawn bawh phei leh buan buan a. Awlsam te a lo bum kualin, a duhna lai laiah a chem phek lam chuan a lo hêm zat zat mai si a. A taksa chu a senin a vual têt tût tawh mai. "Na lo lai a awm lo ang e" tih mai tur khawpa a taksa sen ṭel ṭul mai chuan a ṭuan a tifum zo a. A tawp nân ti niawm takin Ṭhuama chuan chutia Thanruma'n a rawn bawh leh chiah chu lo bumin, a banah lain, a darah a pu liam thut a, lei chârah chuan a theh thal ta hual mai le...! A chem humna bãn chu a tliak tih hriat reng reng hian a khai zawi ta hnuang mai a. Che leh tur a awm ta lo. Ṭhuama chuan din chilhin, a chhip samah chuan a'n ṭham dak lawp mai a, a hrawkah a chempui chuan a tin zui zat a. Thanruma pawh chuan a hneh lohzia hriain, "Ka tlâwm e Tlangval, i chem kha a bil palh hlauh ange, ka chem ngei hian ka lû chu han la tawh," tiin a chem chu a han kawk a. Ṭhuama chuan, "Pasalṭha, tihhlum kher che hi ka tum love, mâ'rawh chu, mahnî chakna leh theihna hmachhuan a, mi dangte hnuaichhiah leh rum nek chunga rahbeh tumna hi bansan ang che. Ṭhazaia in dawr ni ila, hlim takin sa pawh kan chan ho tur, mahni kut zâla tlu hauh lo hauh duh khawp leh, mi ram valh chhûnga duh thâla inlek vung thei i ni emaw i intihna hi bansan la. Kei chuan i nunna hi lak ka tum lo e, a Sa i chuh, kan lal fapa leh kan pasalṭhate kutah i nunna chu a innghat e," tih pahin, hma lamah a'n theh vak ṭawk mai a. A ban tliak nâ nen, hmai lei si chãwt chuan a bawk thlawrh mai a. A nau te hmâah chuan a bawk phek reng mai a.

Pasalṭha Dârhnûna chuan, "A ṭha e, tikha chuan, mi ram valh chin dai luh dan tawk leh, he leiah hian i thei ber lo a ni tih hre tur tawkin zirtirna chu i dawngin ka hria. Tih hlum kher che hi ṭul kan ti bik lo e. Tikhan, in chem tih loh hmanraw dang hi chu kan haw pui ang a. In Silai leh hmanrua te hi chu kan lal kut aṭangin in la tlan leh mai tur lah ni....Thudik tawk lo thlen a, in rawn erlet duh a nih pawhin, keini lam chu kan in peih at e. Tun aṭanga ni sarih chhungin, in hmanruate hi kan lal hnenah in rawn khul thei ang. Ni sarih a liam hnuah erawh, engtin pawh ti ila, in sawi nawi thiang hauh lo ang," a han ti a. Val upa pawh chuan, "Tikhan, kal vang vang mai tawh u," tiin an chem pakhat chu a pe a, an hotupa chu kuahin, an liam zui ta vawn vawn a.


Darkhuma pek chuan, "Kan Ṭhuambawnga chu, englaiin nge khati kaua in beih i lo thiam mai chu le? I beih tlak fû dawn a nih kha!" tiin a lo fiam zauh a. Midang te pawh chuan chuti tak maia Ṭhuaman in sual a thiam leh, chem vilik a hnehsawh mai chu ropui an ti ngei mai. An inbei lai hmu ve lo te hnenah engtin tak sawi hlawm ang maw le.... Ṭhuama chu a hmâ zawng aiin an ngaihsanna a zual kher mai. A rilru te te in pasalṭha Dârhnûna pawh chuan, "Eng ang takin rawn puitling tak ang che maw," a lo ti niap niap a.

Valupa chuan, "khai lê, kan ṭhiante ngaih a lo ṭha lo hman lutuk ange, sa hi phawk hlawk hlawk ila, kangvâr lam panin i chechhuak dawn ang hmiang...." ti a ,a vaibêl pak liam vut vut pahin chuan Sazuk lam chu a pan nghal a. A rem dan danin an phawk hlawk hlawk a. Kangvâr lam, an ṭhianten an lo nghahna lam chu an pan ta a. Sa pawh an keuh nual mai. Chhungtin in inzat tlâng taka an chan ngei theihnân, Val upa leh Pasalṭhate remruatna hnuaiah, khaw lam an pan ta a. Bunghmun vâl te nena an buaina pawh an sawi nak nak a. A hriat phak loh lamah Ṭhuama pawhin fak a hlawhin, insual a thiam lutuk chu hahîpin an sawi laih laih mai.


Khua chu lêng len hun awm velah an han thlenga, Val Upa leh pasalṭha te chu lal inah lut nghalin, an ralthuam man te chu an keng nghal vek bawk a. Bûnghmun khua te nena buaina an tawh thu leh, Ṭhuama te inmal beih thu te chu hahipin an han sawi a. Râl lak thil te leh, thu an inthlah dan thleng chuan an sawi fai ta kelh a. Lalkhuma chuan a aw han thian khurh khurhin, "Chutin buaina te in lo tawk zuk nia le, a zia loin pawi nasa zawk thleng lova in han hmetmit thei hlauh chu a lawmawm hle mai. Chutih rual chuan, in thu inthlah dante thlirin, Bunghmun lam chetdan te han ngaichang ila, thawm an rawn nei lo a nih tak leh, an ralthuam te chu tihdan kawng kan dap ang a. Kan tlangvâlte zinga a mamawh zual te pawh kan kawltir mai tur lah ni....!" "A reng thuah, chuti taka in mal beih thiam, Thanṭhuam pawh chu engah in han hruai luh loh? Ani zet hi chu, sa leh râl laka kan khaw muantu te zingah pawh, a chungnung chho zel dawn ni te pawhin a lang e, a hmêl leh pian reng a dik mai, tu kan selin kan en hniam a ni law, rual khat zingah pawh 'ani hi chu' kan ti zel dawn niin a lang e," a han ti a. "Enge, ka upa te khan, in ngaihdan te han chhep chhuak teh u khai.... " a'n ti zui zat a! Upa Tâwna, Liankimi pa chuan, "Kei ka ngaihdan pawh i thu han keuh thluk dan ang kha a ni thlap mai ka ti Râla pa, a aia ṭha zawk han pau pui mai tur lah zu awm suh! An thawm vang ngaichang ila a ṭha rih mai ka va ti em....Thanṭhuama chu han tel ve se ṭha tur, a mimal tak pawha hmuh ka bâ asin maw!" a han ti dap dap a. Upa Hrângvunga chuan, "A ni teh e lalpa, eng rilru nge kan Bunghmun ho chuan an put dawn ngaihchan phawt chu ka rilrem zâwng tak a ni mai ka ti..." tih pahin, a Vaibêl chu an fawp kâwk a, a tukkhum lamah chuan a khu liam vut mai bawk a!

"Chutih rual chuan lalpa, chin bih zui pawh kan ngai viau awm mange ka ti....Kan ram bawh lam lah, Bûnghmun lam aṭangin a hla teh lua si lova, kan in rin ruk deuh pawh a ṭha awm asin...." upa min, Lianphunga chuan a lo ti hlak a! Lal chu rawn ṭawng chhuak leh in, "Ni e, an chinte ngaichangin, kan ram lamah hnuhma tharte an rawn nei em? tih te kan pasalṭha ten lo bih se. Val upa te leh pasalṭhate kutah kan himna tur lam chu i nghat phawt mai teh ang," tiin thu a hlawm ta a. "Ti teh u, mual lam chu i pan teh ang u hmiang, mei chhuah lova kan in rawh fel thei leh, sa chuti zat han keuh chu, i va thlir teh ang u," tiin a tho chhuak hluai a. Pawn lam pan chuan a kal ta luah luah mai.

Lal mualah chuan pathlawi rual leh tlangval zam ṭha tak tak te chuan sa chu meichher eng hnuaiah an chan darh zung zung a, lal leh upate an rawn lan meuh chuan, an chan zo chu a ni ruai mai. Lal chuan han thlir vung vungin, "Chhe hei, vawiin zet chu kan sa biak mal kan va dawng nasa teh reng ve maw....! In lu si a kan chan turin han chhep ta ula, tlâng sa ah zawng, sa chhiah leh kaptu chan an sawi ngai law, chhungkaw mil zel khan han sem zung zung tawh u khai. In hah dawn vei nen chuan, Zawlbuk lamah râl rel a la ṭul nen, tikhân han sem ta ula, mahni in lum lam han thlen zung zung tawh u", tiin a upa te nen chuan an inzui lut leh ta diah diah a. Lal fanu pang ber Thannguri chuan, an tlangvâlte sa chan che vel chu ngun takin an sumhmun aṭang chuan a lo thlir ve reng a, a u Darkhuma ṭhianpa, Thanṭhuama che vel chuan a mit a la zar mai. Hmuhnawm ti takin a thlir reng a, ani lah chu, uluk fahrana thlirtu a nei tih reng hre lo chuan, a sa chan ringawt chu a ngaihsak ni hian a lang a. Chutia a thlir vang vang lai chuan, muala sa buaipui ho pawh an ṭin ta sang sang a.

Nula ina han chuankaina hun ni mawlh tawh hek lo le, tlangval ho pawh Zawlbukah an kim ṭhap mai. Bunghmun khaw ho chin ngaihven dan turte rêlin, a ṭul chuan an khaw thlenga han bih zui chu an thu vuakthluk dan a ni ta! A tukah chuan Val upa Sairuma hoin, Dara te, Thanṭhuama leh Chalkhuma nen, Duhthanga te ho chu chin biha chhuak tur leh, a ṭul anga chet la tur chuan an ruat ta a. Pasalṭha Darhnûna te, Suaka leh Tlângthanga te hoin, kangvar lama hna thawk te chu lo thlithlai tura thu dahin, mutbute kai pharhin, mut zai an rêl ta a.

A tuk zing varṭianah, riah chawfai leh an ralthuam famkim nen, kawtchhuahah chuan Dara te ho chu in nghak khawmin, Bunghmun ho rawn chet theihna tur thlithlai tur chuan an chhuak ta vang vang a. Ṭhuama chuan a Silai chu Duhthanga hum tirin, ani chuan Thal leh thal fang ṭhahnem tak paiin, a feite hmanthiam zet chu a pai chhuak bawk a. Silai nena chet zawng, khawr deuh riau dawnin a inhria a. A hmanraw duhthusam ho kengin, hma a hruai ta nghal a. Chak takin an ring thar lam chu an pan a. Chuta ṭang chuan Bunghmun khaw lam pawh a hnuk a hnai berin an ring a ni. A hma ni maia Bunghmun pasalṭha, Thanruma leh a naute an thlir liamna hmun chu pan vang vangin, chuta ṭang chuan an sul chu zuiin an kal nghal ta char char a. Bunghmun ho hnu chu, hliam tuar kalpui ngang an nih avangin, chhuizui a har lem lo hle a. Ramri lui thleng chuan an kal ta a. Bunghmun ho kaina aṭang chuan Lui kam kai khan remchang dang te bih chiang turin, lui dung zuiin, chhak leh thlang lam pan chuan an inṭhen ta a. Ṭhuama leh Duhthanga inzuiin, chhak lam luikam an hrut chho a, midang zawng chuan thlanglam an zawh thung a. Tlai ni tlak dawn suar ah chuan an inṭhenna hmun pan chuan an kir leh ta hlawm a. Hnuhma thar leh sul han bih zui tur engmah an hmuh lem loh avangin, zanriah chu luikam hmun remchângah bâwlin, an kal zel dan tur a sawi ho laih laih a. Eng han tih theih awm ta lo chu, a tuk leilung lan ruala Bunghmun khaw lam pan chu an titlu ta a. Buk hranpa pawh khawr hran lovin, lungpui leh thing zung thlâr remchang deuhte belin mut zai an rel ta a.

A tuk zinga Val upa te an han harh meuh chuan, Ṭhuama chuan ei a lo peih diam tawh mai a. Tukṭhuan bâr lovin, an fun sawk sawk a, Bunghmun lam pan chuan an liam zui ta vawk vawk a. Ram palailêng leh kawng mumal awm lohna hmunah chuan rinai takin an kal sawt phian mai. Bunghmun lam sul an zui pawh, bih uluk ngai hauh loin an hmu zung zung thei a. Anni ho pawhin, an pasalṭha berin hliam a tuar nen, duh anga che sawt thei an ni hauh bik lo. Nitla vanvuaia an kal hnu chuan, ralkhata Ar han khuang al al chu hriain, khua a hlat hmêl tawh lo bawk nen, thawk lak pahin chawlh an rel a. An ei tur pai ang ang te chu hmawm mawlh mawlhin, a theih dan danin an inhnawh puar a. Chutia an ngawih ṭhap lai chuan, lal fapa Darkhuma chuan, "Ngawi teh u, ṭhiante u, zaninah Bunghmun khua lutin, an lal in lam te bih chiang ila, an thu hla te hriat i han tum teh ang u hmiang...." tiin rawtna a han siam khauh a. Ṭha dawn riaua hriain, hmanhmawh hauh lo chuan Bunghmun khaw lam chu an pan ta a. Zanriah an kil reh lai, pawn chhuak an awm mumal loh lai taka khawchhung luh tum chuan kal an siam ta a.

Kawtchhuah an han chuang chhuak hlawl mai a, mei zuk te siamin an han ṭhu thlan dai leh te te a, tumah venthawn tur awmin a lang lo bawk nen, an luhna tur khaw thleng awm angte sawi pahin vaibel an fawp hlat hlat hlawm a. Hmanhmawh hauh lova kawtchhuah lungdawh aṭanga khawchhung lam pana an inher lai chuan, an hmâ lawk kawng kawi, pholêng leh hnim chhe te tein an bawh chîk chêk, vawkpui thal leh ṭawkpui kung ṭawi liai luai dinna hmun aṭang chuan hmeichhe han ṭe ṭhat thawm an hre phut mai a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)