Muallung mihrâng -Thanṭhuama-8

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Rohlupuia Renthlei
Posts: 20
Joined: April 29th, 2021, 8:10 pm

Muallung mihrâng -Thanṭhuama-8

Unread post by Rohlupuia Renthlei » May 15th, 2021, 3:51 pm

MUALLUNG MI HRÂNG- THANṬHUAMA

BUNG-8-NA
Ruatfela Pa

Ṭhuama te pawh ding datin, thawm lo chhuahna lam hawi chuan an beng an chhi ṭhap mai le. Thim zinga an hmâ lawk kawng chhak hnim buk a rawn chet leh lawih rual chuan Ṭhuama chu rang zetin chu lam pan chuan a dawk chhuak puata. Darkhuma pawh Ṭhuama tlan lohna lamah per kaiin, thawm dim fê mai hian chu thing buk chet lawihna hmun chu an hnaih ta hriau hriau mai le. Ṭhuama chuan Tlangvâl pahnihin hmeichhe pakhat, man beta a kut an lo phuar mawlh mawlh mai chu a han hmu ta. Pakhat zawk chuan, "Hmeithai fa akâra daikil kâr ami lehnghal, ka duh lo e min ti vei maw? I hre dawn alawm, i Lianvela chuan ka nulâ i nih hnu chuan, a thlah ngei ang che", tih pah chuan a'n nam bu làwp mai a. A kâ an hnawh sak avangin aw a chhuah thei tawh si lo.

Chutih lai chuan Ṭhuama chu an sir aṭang chuan a rawn ding chhuak a! "Hmeichhia kha thlah ula, in bân sâng takah phar nghal rawh u," tiin a thal chuan che hlek loin a rawn tin ta. Thim hnuaiah hmu fuh mai thei hek lo le, pakhat zawk chuan nula chu in phen nân hmangin a hrawkah chuan a dawm chat mai a. Rei a dawm hman lo, a tukhum ri lawlh avang chuan a let hlawl mai. Ṭhuaman Dâra kut phe vuai a hmuh rual chuan, pakhat zawk chu a zuan thal nghal tawp bawk a. "A tu phiangsen nge maw in nih a, ka thil tum ti sukuk zâwnga chèt in han thawh ngam chu le," tih pahin Ṭhuama bawh tluk pa chuan ṭan han khawh teh hi a tum a. A bawh tlutû tha chuan hneh miau hek le, ṭawng chhuak chhunzawm tur awm lêk lo hian a âng ta chap chap mai. An kal chhante ngaihtuahin, chupa nunna lak ngawt chuan thil a ti khaw lo vek thei dawn tih a hria a. A inthlahdul ta a. Chupa pawh chu a rawn thaw ta hawk mai. Chutihlai chuan Dâra pawhin hmeichhia chu an phuarna te a lo phelh sak fel et tawh a. A chhut thluk pa pawh hnungkhirhin, hnah hring rem châng zutin, a kâ a lo hnawh tut mai bawk a! An ṭhiante awmna lamah chuan hruai thlain, engtia hma han lak tur nge ni ang? tih an han rel ho leh rih a. An tumdan thlakin, khuaa luh nghal rawih mai chu an rêl ta!

Vâl upa chuan, "Nula, enge thil awmzia min han hrilh teh, engtinnge kan koh dawn che le?" tiin nula chu a han melh a. Nulâ chuan, "Hepa, Chungliana hian min hneh lak tumin min bum chhuak a, ani zui ai chuan, thih pawh ka thlang zawk e, Hrângmani ka ni e," tiin Chungliana ten an bum chhuah dan zawng zawng chu a hrilh fai ta leng a. Val upa chu han chek tlawk tlawkin, "Nula dang an tam awm nen chuan, enga tia, nangmah duh hauh lo tu chu i han bum chhuah kher ni le?" tih pah chuan Chungliana chu a'n bêng bu làwp mai a. Dârkhuma chuan, "Ngawi teh, U Sai, kan ruahmanna ang khan an lal hnen i thlen rawih mai teh ang u," a lo tih chuan, "A ni tak e," tiin khaw chhung lam hawiin kal an siam zui nghal a.

An mi man te chu an lal in lam chu an panpui zel a, tu khawin an lo ngaihsak lem lo nge, an hmu lem lo zawk ni, tluang takin Zawlbuk an kal pel a, lal mual lam chu an pan chho zel a. Lal In pawh a lo lang ta. Lal in lam chu chak takin an pan zel a. Zanriah bâr zo, tlangvâl ṭhenkhat pawn chhuak te chuan khual vâl leh an mi man ni awm tak, phuar chunga an zinga kal an han hmuh chuan, a ṭhen te chu hmanraw lamin an in lamah an kir a, ṭhenkhat chuan hmanrua pawh chuh lem loin an hnungah an zui zel a. Lal tual an thlen meuh chuan zuitu an nei hman nual mai. Chungte chu engahmah ngai lovin lal sumhmun chu an chuangkai a, luh an han dîl ta a. Lal te pawh an chhungkua leh an kawi te nen chauha an awmlai a ni a. Khual chhawntu ber Tlangau awm ta lo chu, lal chuan, "Lo lut tawh u, eng thil nge ni ta le....?" tiin a nupui chu "Vela nu, kawng va hawn tawh," tiin a tir zui zat a!Lalnuin Tlengrel a han nawr tawlh a, pawn lam a'n bih nak chuan, a hmêl hriat loh khual vâl, ralthuam kenga lo ding khap mai a hmuh chuan a phu deuh zawk a! Chung ho hnenah chuan, "Lo lut tawh u, khawi lam khual chu ni che u maw?" tih pah chuan in chhung lut tur chuan a ti hlawm a.

"Khawi khaw tui liak nge maw in nih a, kha lah, upa Ruaia fapa Chungliana te ṭhian dun leh kan Hrângmani ni rengin, engti zai zia nge ni ngai?" tiin khual vâl te chu a'n melh run a. "Tu an nih kan hre hauh lo mai lalpa, mahse, hmeichhia, ṭanpuitu au a, mangang aw râwl kan hriat khân, kal pel thei lova, hei, i hmuh ang hian hemi te hi kan rawn phuar bet ta ngawt chu a nih hi!" tiin, fiah fai fak chuan Val Upa Sairuma chuan a rawn chhâng a. Chu ve leh Bûnghmun lal fapa, Lianvela chu a ṭhuthmun aṭanga rawn dawk chhuak zawkin, tu dan hman rual loh hian Chungliana chu a'n bawh tlu rawk a. A hnek zui ta mawlh mawlh mai le! Rang taka lal fapa chu man betin, Ṭhuama chuan, "Ngawi teh, in sum la, mî che thei lo kut an thlak ngai love," tiin a kai sawn a. Chutia lal in chhûnga thawm a rik tak rum rumah chuan, pawn lama Bunghmun tlangvâlte chuan, "Lalpa, enge thleng, kan rawn lut dawn e," tih leh sum hmun rawn lawnkai chu an rual nghal a. Ring leng lawngin lal chuan, "Eng thil pawimah a thleng lo e, Val upa leh pasalṭha te han ko ula, ka Upa te pawh a rang lamin rawn chuangkai tehse," a tih zawm nghal zat a. Chutihlai chuan tlangaupa pawh a rawn lut hlawl mai.

Bunghmun lal fapa chuan, thinrim insum, aw khur hlawk hlawk chunga Chungliana chu kawkin, "I thil tih man hi i têl ngei ang le!!" tiin a lam pana chet chhuah leh mai chu a tum a. Chutihlai chuan Lal chuan, "Vela, lo inthunun la a ṭha ngai e. Thuchiang hre loin kut an thawh ngawt ngai lo," a tih takah chuan, a inthlah dul ve ta a. Hrângmani lam chu panin, a kiangah chuan ṭhut hmun a rem nghal chat a. Lal chuan, "Khai le, tlangvâl te u, khawi lal tui liak nge in nih le? Enge ka khua in rawn lawi luh chhan?" tiin zawhna a han zawt nawn leh a! Val upa chuan, "Lalpa, Muallung khua, Lalthanga tui liak kan ni e," tia, sawizawm leh tuma a kâ a an zuau lai chuan Lal chuan, "Enga ni? Muallung khua a ni? Lalthanga Sailo a ni ngat ang maw? Ani chu a dam em?" tiin mikhual tlangvâl ho chu a melh kual dan dan a. "Kha lah, Lalthanga siar zuk nia, tlangval tunge i hming? Eng aiah a ni, he lai hial in rawn chuan chhuah ni?" tiin Dârkhuma chu a han melh bing deuh a. Chutihlai chuan khawnbawl ho te, val upa leh pasalṭha te an rawn lut khap khap a. An zîngah chuan Pasalṭha, thangchhuah pa tih hriat fahran mai hi a rawn tel bawk a. A hawiher chu a zàngin, a inring tawk hmêl hliah hliah mai! Dâra chuan, "Lalthanga fapa naupang ber ka ni e, ni e, hei, kan chap rawh ni a tlan chhuak, ka Sazuk hliam chu Bunghmun pasalṭha inti, Thanruma leh a nauten kan ram chhungah lo keuhin, kan tualthu a chhe ta deuh a, kan han in piai deuh hlawm a. An chin bihin i khua kan rawn chian ang chu kan ti a. Kan tum loh tawpin heng mite vang hian kan rawn inlan ta a nih hi!" tiin, an kal chhan te sawiin, an tum aia hmâa an inlan tak thu chu a sawi lang bawk a. Lal chuan, "Uai, chu, ka unaupa fapa lah ni chein, lo hnai teh, Muallung ah i pa a ṭhu tih hria ila, eng aiah nge maw hetia in pawh lova kan awm reng ang ni. Hmar tlangdung panin an liam ta kha a ni si a!" tiin, Darkhuma chu a han tuai thuak thuak a.

Thangchhuahpa chu a rawn ding hlawlin, Thinur hmêl tak hian, "Lalpa, chutin Thanruma chuan a tlanbosan khua tih hmingchhiat tumin ke a pen ang maw? Ka lai a na mange ka ti! Thil awmdan han sawi chiang vat teh u," a lo ti rum al mai le. "Ngawi teh u, hei, zanin chu, ropui rel kan ngai e. Hei lah Chungliana ten Hrangmani an lo khawih buai râwl nen, kan Muallung vâl te thu hla lah ngaihthah rual ni suh! Ro han neihdan ka thiam lo mange ka ti! Upa te u, engtin nge thu kan kalpui dawn le?" tiin a upa te chu a han melh kual a.

Upa min, Rumliana lo ṭawng chhuakin, "Ngawi teh, lalpa, kan khualvâl te thu khan beng a luh riau mai nia! Chutia a pawi khawih lehzel kan Thanruman kan chunga leih a tum mai chu, chet lak vat a ngai zuk nia! Kan Chungliana te thu hi he laiah hian i hoin khel ta ila, kan Thangchhuah pa hoin Zawlbuk lamah, Val upa kaihhruaiin kan Thanruma te chin chu lo buan thung ta se, an thutlukna chu kan bawh mai tur lah ni! Kan chet ran a ngai a nih tak chu," tiin rawtna a han siam thuai a. Midang chuan an pawmpui tih hriat takin an lo bu tliar tliar a. "Kan upa min thu ang chuan i kal ang hmiang, Zawlbuk lam ro in rel zawh tikah, helamah lo haw leh ta ula, ka unaupa Lalthanga chin pawh ka hre chak e," tiin, an upa thu ang chuan an inṭhen ta hlawm a.


Chungliana chu, a pa Khawnbâwl upa, Lianruaia chuan melh vung vungin, lal thu pawh nghak hman lo chuan, "Ka fapa chu i ni si a maw? I nawm loh hlaua kan enkawlna che chu mi chungtlak leh vau beh nân te i hmangin, mi duh lo chung hneh lak i la tum zui a. Eng aiah nge midang te chu i la tih hmingchhiat tel fan ni le? Kan lal ṭhat zâr zovin, nuamin i awm a, chin tawk i hre lo zuk nia! Hetiang mi hi ka rila rah zuk ni suh che, hawh awi, lalpa, in tih tihin ti ula, hemi hi ka thisen zuk ni suh!" a ti ta phiar phiar mai le.

"Khai khai, Chunga pa, in thunun hun a ni ngai. Chuti rum rum tur a ni ngai love, an thu leh hla te pawn kan beng han luh ve phawt ang hmiang," tiin lal chuan a lo khap thuai a. Chutah lal vek chuan, "Chunglian, enge thil awmzia, chiang takin han sawi rawh le. Thih leh dam inkâr a nih i hria ang chu maw?" tiin Chungliana chu a melh vung vung a. Chutia an lalpa'n a han koh takah chuan, Chungliana chu zak leh kimki dui mai, hrehawm tih hmêl tak mai hian lal chu a melh a, rei en ngam lovin chhuat chu a bih ta run mai a! A ṭawng chhuak tawh dawn lo emaw an tih hnuah, zah vanga aw thâm lawi rut hian, "Lalpa, min ngaidam rawh. Hrangmani hi hun engemaw chen, chapo leh hnuaichhiah tak chungin, ka pâ nihna leh rosum hmachhuanin a thinlung hneh ka lo tum ṭhin a! Mahse, Hlawhtlin tik reng ka nei lo mai niloin, Hrangmani leh Vela te an in zui tih ka hriat khân, thik namên hian ka thik ta lova. An inkâr tih chhiat ngei tumin a rukin ka bei ta a. Thankunga hi engtin tin emaw hminin, min pui turin ka sâwm ta a. Kan thil tum kan hlawhtling ṭep tihin khang ho kha an rawn lang ta a ni. Vawiinah hian thiamthu sawi tur reng ka nei lo. Ka chunga i rorelna chu engpawh nise ka pawm ang. Mahse, Thankunga hian thiam lohna engmah a nei ve lo, ani hi chu ngaidam mawlh la ka ti e," tiin thil awmdan chu a sawi ta phiar a.

Upa Ruaia chu a zah luat vangin a ṭhu kun tlawk tlawk mai a. Sawi tur dang reng a hre ta lo emaw tih turin, a kun tlawk tlawk mai. "Ngawi teh lalpa, i ṭhatna zâr zovin kan awm rei ta! Awmdan hial kan thiam ta lo! Ka rila rah chuan heti khawp hian mi mualpho ta a nih hi. Kei hi i rorelna ṭawmpui ve zel tlak ka ni ta lo! I khua-a chen erawh min phalsak la, i khawnbâwl ni tlak ka ni ta lo e," tiin a ṭhu kun lap mai. Upa Zaliana chuan, "Ngawi teh lalpa, kan khual vâlte zârah, pawi nasa zawk a thleng hman lo niin a lang a, hekna han ngaihthlak leh ngaihtuah tur lo lut lah awm theia mawi ni nghal lo chuan. Hming chhiat zawng zawng lah Hrangmani'n a khum lawi si hi! Chuvangin, kan tlangvâl te pahnih hian kan nulâ an tih hmingchhiat manah, lei chhia chawi se, pawngsual thu em han ni lo mahse, a tuartu tân zawng, pawngsual aia a nat lohna reng va awm bik suh. Thla det ṭum thum chhung Zawlbuk kai loin, khawiahmah zin chhuak lo bawk se a ṭha mai lo maw?" a rawn ti khauh mai a. "Ni e, chutiang chuan ni se ṭha kan ti tlâng em? An léi chawi hi naktip ni liam hmâ ngeiin Zathangi te hnenah dah nise, chu chu an ti thei lo a nih chuan, khuaah an awm ve a rem lovang," tiin a upa te chu a melh kual a. Hnialna awkâ chhuah an awm tak lovah chuan, "A ṭha e, tikhân, zanin aṭangin Zawlbuk in kai thei lo anga. Tun aṭanga chhiarin, Thla de ṭum li hnuah Zawlbuk in kai thei ang, Hrângmanite hnenah ngaihdam dilna leh in lei chawi pawh chu naktip ni lan chhung ngeiin in dah tur a ni ang. Tin, Upa Ruaia pawh, he tlâng ṭhuttu ka nih chhûng hi chuan, thu leh a awm a nih loh chuan, ka rorelna min ṭawmpui zel ang. I fapa te pawh an insiamṭha ngei bawk ang," tiin thu a hlawm fel ta a.(Leichhe chawi: Nula tlangval kâr emaw buaina awm, lal hnena hekna lut hi a buaia te an koh bakah, hriatpuitu/hêktu te thlengin Lal hmâah an in lan a. Thiam loh chang chuan Sepui an chawi ṭhin, khua aṭanga hnawh chhuah thlengin a huam bawk.)

An thu keuh dan leh kalhmang vel aṭang chuan, chutiang boruak chu an tawn ngai loh lam tak niin a lang a. Lalin a khawnbâwl te a rin tawk zia leh, an lal rorelna hnuaiah chuan mi chhe daikil kâr ami pawh an him zia a lang reng mai. Chuti taka hmingchhiatna chu khum mahse, an lal leh upate thu ro lum chuan Chungliana te pawh, insiamṭhatna hun an neih zia an hriatin, an chhungril pawh a hlim ve ta viau mai a. Chungliana erawh zawng, a pâ rilru nâ chuan engtin tak chhungkaw ro neihpui ang mawle....

Chungliana te ṭhiandun chu an phuarna te phelhin, zah luat vanga kimki tlat chung chuan lal in an chhuahsan ta a. Hrangmani pawh a chhungte chuan an hruai haw bawk a. Lal fapa chuan an in thlengin a thlah zui nghe nghe a!

Zâwlbuk lam pawh an thu a rum tlâng kher mai le! Chutia, kawhmawh bawl a chin luat avanga an khua aṭanga hnawh chhuah tawh, Thanruma khawsak zui dan chuan an thin a vilh na ngaih ngaih bawk a. An hmuh hmâ zawng umzui a, dahṭha hmiah turin thu an titlu ta rup mai. An thu vuakthluk dan te lal leh upate hnena thlen turin Thangchhuahpa leh Vâl upa hoin, Muallung tlangvalte nen chuan lal in an pan ta a. Tuman nula rim zai an rêl thei lova, Zawlbuk lam thu leh, Lal in lam thuchhuak chu an ngaichang ṭhup a ni ber e. Lal in lama Zawlbuk thuchhuak an thlen fel hnu chuan, a tuk zing aṭanga Thanruma te sulhnu chhui zui a, an hmuh hmâ loh zawng umzui tur chuan thu an bilh fel ta a. Chumi hnu chuan titi phung lêng te sawiin, Bunghmun lal, Lalruma chuan a bulah Dârkhuma chu ṭhut tirin, a pa, Lalthanga chanchinte chu zawt zui pah zelin, chhungkhat hnai tak an nihzia thu te, an inṭhen darh tak dante chu heti hian a sawi zui a!

"I pâ pa, (i pû a nih chu) Ngurthanga leh min hringtu ka pa, Ngurliana te hi thlahkhat niin, kan pû, Ngurlianpuia thlah kalzel te an ni a. Runlui an han kan hnu khan, i pû te lam hian hmar lam hawi zawnga ram bawha, thlang tla zui tur leh, keini lam hi chhim lam hawia in zâr thla tura in ṭhenin, unau mah nise, chan ram leh bawh tur lam insemin an kal hrang ta a. Keini hi hei, in mi hriat leh rawn hmuh ang hian, Muallung aṭang pawh chuan kan inkulhna hi chu a la Chhim chhak zawmah a nih hi! Engtia hei chen in pawh lova kan han awm theih mai chu ni le? Hei lah tunah Unau kan in chemhar theihna turin kan Thanruma hian kua a lo hreuh ngei zawng a nih ngat hi! Kan hriat loh hriat ruk a nei ngei zawng a ni! Lah tunah zawng, inpawh tlâng takin kan in pui tawn thei dawn a nih reng tak hi! Zawlbuk kai rual aia hrâm kan nih khan, I Pu in Lungdai a ṭhut lai daih tawh kha kan inhmuh tawp lah niin! Lalthanga hmu tur leh ram chuan paha Muallung rawn chuan kai a ṭul zuk nia!" tiin, tuna Lalthanga, muallung hmun a rawn ṭhut ngawt dan te chu an sawi kai ta zel a!

Hmanlai chanchin lamah an pakai zel a, lal leh upa te chu in sawi lunglêng chho zelin, an zupui inchhawp eng kûk mai chu an birh deuh sek mai a. A hmâ lawkah thubuai hla buai an chai hrep a ni tih hriat hauh loh chuan an phul hlut a. A tuk zing lama hnu bih zui an ṭul avangin Zawlbuk lam an pan ho leh ta diak a. An let leh lama khua rawn lut leh ngei turin lalpa, Lalruma chuan Darkhuma te chu a chah lawm lawm a. Kir leh ngei tura chhângin an liamsan ta a.


Zing khua a lo vâr a, Bunghmun pasalṭha rual chu an Thangchhuahpa, pasalṭha Zakhuman hoin, Muallung vâl te nen chuan Thanruma leh a kawi te hnu, an kalsan tawh chu chhui let in, an penna hmun niawma lang chu an han chhui chiang ta a. Bunghmun pana an sul hnutchhiah chuan kawng ruh a pawh chhoh mai avangin, Muallung lam tân chuan Bûnghmun lam han rinhlelh loh ngaihna reng a awm lo tih a lang chiang viau mai. Ngun taka hnute biha an buai vat vat lai chuan, kawt chhuah aṭanga chhim lam, fing thum vel zet turah chuan hnuhma an hmu ta. Chu hnu chu Thanṭhuama chuan a theih ang anga chhui letin, hnu an hlohna bawr vel chu a tinzawn chat mai a. Hnu hi nasa taka thupin, Thanruma te pawh an fimkhur hle a ni tih a hriat theih awm e.

An hnu hmuh chu zuiin, rin ai takin chu khaw ro lutukah chuan chhui a har phian mai. Lo, fing thum dawn an chhui hnu chuan, zan lama an riahna ni ngei tur, thing hmun, thing zung thlar leh lung phek remchâng tak tak lo awm chu pawh hlawlin, an sulhnute an han chian a, zan hmasa lam chu hetah hian an riak ngei tih a chiang hle mai. Thangchhuah pa, Zakhuma chuan an hnu hawi zawng chu han bih vang vangin, inchhung dung vel tur chu a'n vak thuak thuak a. Chutah chuan hnu chhui ti awlsam tur tak thil a hmu ta hlauh mai. An mi um mêkte hian enge maw, zãwn an nei tih an hnu aṭang chuan a rin zawn theih tlat. Tlêma lei nêm deuh laiah chuan, mi pahnih hnu chu a khuar na bik riau mai a. Tlema hmun ro deuh laiah pawh chuan an kalna chin a hriat hle tlat a ni.

Pasalṭha Thanruma leh a naute pawh, khati tak maia sawisak a nih hnu khan, an theih anga chakin an khaw lam an pan vang vang a. Ramri lui an thlen chuan, Thanruma rilru nâ, tlâwm chiang lutuk bawk si chuan ngaihtuahna ṭha lo tak a nei ta tlat mai. Bunghmun hi hmingchhe takin a lo chhuahsan tawh a. (A chhuahsan chhan lam hi chu thlur zui lo mai ang.) Bunghmun khua leh Muallung khuate inkârah chuan hèm thlaka, in huatna chawhchhuahsak chu a rilruk ta a ni. A naute chu Bunghmun lamah chuan kualpuiin, daiah khua hel kualin, an hnu chu a theih ang ang chuan an thup ta a. Hei vang hi a ni, Ṭhuama te lam pawhin, Bunghmun khua an luh chawt nachhan kha ni. Tichuan, Bunghmun dai thlang maiah riakin, chumi hmunah chuan an hotupa, pasalṭha Thanruma chu a kal chau nen, a taksa hmun hrang hranga Ṭhuama chem phek hnuhmâ nen, a han mu zâl chu a khua chu sik namênin a sik ta lova. Vai ruaiin a rak deuh chul a. A naute chuan an theih ang anga ram hmul damdawi te siamin, an buaipui zan khua mai a.

A tuk khawvâr chu buai takin an nghak thleng hram a. Tukṭhuan bâwla an buai lai tak chuan, Pasalṭha Thanruma awmdan chu inthlak thutin, a pang sa huam huam chu a dai hret hret a, chutih rualin, amah enkawl ber tu, Mângkunga chuan an hotupa pang dai hret hret leh khawng tial tial chu hrethiam thuaiin, mihring an inchan dawn lo niin a hre ta a. Chu veleh a ṭhiante chu pun nghalin, a zawnna tur, puankawp an neih ang angte chu an ṭawn khawm a, an hotupa chu a chak thei ang bera kalpui turin an insiam ta a. Pakhatin an bungrua leh ei turte akin, pahnih chuan harsa tih hmêl fê hian an zawn ta a. En laia Ṭiau ral kai hman ngei tum rilru in, an theih anga chak chuan an liam zui ta a. Han inchhawk tur chuang awm ta lo chu, an tum leh beisei ang rengin an kal chak thei ta lo!

A hnuhma hmuh te chu sawiin, Thangchhuah diar khim vang maiin, thluak fim hmêl zet leh ṭuan ṭha hmêl fahran mai, Pasalṭha Zakhuma chuan an mi umte hnuhmâ a hmuh aṭanga a rindan chu a han sawi a. Ṭhuamate, Dâra te ho pawh lo bu nghat nghatin, an ei tur pai ang te ei mawlh mawlh chung chuan hnu chu an dâwm zui leh ta a. Hnu chhui harsa awm ta lo chu, tlâng leh mualte chu inbat liam zung zungin, lo sul haw hun awmah chuan Ṭiau lui pawh an hnaih ta kher mai. Ram tuk khat lo liam a awm tawh lo ang e tih tur hian, a tlâng leh mual inkhawh dan aṭang chuan a rin zawn theih mai a. Chutia thawm pawh dim lutuk lova an kal mawp mawp lai chuan, an hmahruaitu ber Thanṭhuama chu a ding ta chat mai le...! A ṭhiante chu thawm dim tura han huiin, an hmalam tlangdung chu a melh ta vang vang mai a. Pasalṭha Zakhuma chuan han pan hnaiin, Ṭhuama thlurna lam chu a han thlek vang vang a, tlang dung chanve vel, an awmna ep lam, kawrte lian lutuk lo hnâr lamah chuan meikhu an hmu ta! Ṭhuama chuan chu Thangchhuah pa chu zah thiam takin, "Engtin nge ni ang le?" tiin a han rawn a. Val upa Thanruma te ho pawh lo hnaiin, an hma lam chu an thlir ta vang vang mai. Pasalṭha Zakhuma chuan, "Kan um ani tih rin ngaihna leh hriat ngaihna an tân a awm hauh lo ang. Chuvangin, sawtia muanga an awm lai saw va bih hnaiin, an chetdan azira thal thlah nghal tura in peih a ṭha awm asin! Khawnge, hei, in tlangvâl Ṭhuama nen hian kan va bih hmasa tãng e, Saw lai kawnah sawn min lo ngaichang dawn nia!" tiin thawm dim tak chuan hma lam panin a pen chhuak nghal a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)