Muallung mihrâng -Thanṭhuama-9

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Rohlupuia Renthlei
Posts: 20
Joined: April 29th, 2021, 8:10 pm

Muallung mihrâng -Thanṭhuama-9

Unread post by Rohlupuia Renthlei » May 27th, 2021, 11:03 am

MUALLUNG MI HRÂNG- THANṬHUAMA

BUNG-9-NA

Ruatfela Pa

Thanruma ber a chahthlak tak si ah chuan, a kawite chunga han inlek chiam chuan awmzia nei hek lo. An hrilhhai letling kher mai. Pasalṭha Zakhuma chuan Val upa Sairuma chu han melhin, "Engtinnge ni dawn le? Kan mi duh ber lah a heti ta si a, kan kirsan mai dawn em ni?" tiin a han râwn a. Val upa Sairuma pawh a bangbo ngei mai. An mi man te chu han melh kualin, "Hei le, kan mi duh ber lah a heti ta mai si a. Tin, in riah buk sualna lah Bûnghmun ram valh chin lah niin, engtin chuan kan ti dawn che u ni maw?" a han ti a. An mi man te zînga pakhat chuan, "Khawngaihin min ngaidam hram teh u khai. Hei, kan mi zui ber lah mihring a chang ta si lo! Khua pawh kan lut ngam meuh ange maw chu le..." a'n ti vang vang a. Pasalṭha Zakhuma lo inrawlhin, "Tunah hian in lû hi la phiar mah ila, tu'n min dem hauhin ka ring law....Chutihrual erawh chuan, ram ṭha zuan a thlang tla ho mêk, ṭawng khat hmanga in be tawn thei, thlahtu thuhmun, û leh nau inchemharna hian engmah hlawkna a thlen hauh si lo. Nangni lam pawh, khaw chhak hrûlah, Ṭiau rawn la kan mah suh ula, hunbi her zel hian thlang tla lo thei lo hian a la siam ngei dawn che u. Chutih huna in mamawh tawn vek tur, tuna ṭul lo leh mi pakhat vervekna avanga in mû leh Ar hi thil ṭha zawng a ni mawlh lo ve." a han ti dap dap a. An mi man te leh, Val upa Sairuma te ho chuan dik ti awm fê hian lû an bu nghat nghat a.

Chu zan chu chulai hmunah chuan tlingtlak mai zai an rel ta a. A theih ang angin ei turte an han buatsaih leh hnuhnawh a. Pasalṭha Thanruma ruang pawh, anni tân hawn mah harsâin, an buk thlanga lei nêm deuh lai chu lai khuarin an zalh ta a. Sa va in an hai mai theih loh turin lungin an vawm hnan bawk a. An ei tur siam angte ei leh bârin, buk tualah meipui an chhep hluah a. A rem dan ang ang chuan mut hmun an rem ta hlawm a. Buaina leh harsatna dang tawk lovin, a tuk varṭianah, kam ṭha a inthlah leh thu delhkilh ṭha tak neiin an mi man te pawh an chhuah zui ta bawk a. Bunghmun khaw lam panin an her liam leh ta a.

Mullung lam pawh,, pasalṭha Dârhnuna te ho remruatna anga kal zelin, kangvârah, a theih ang anga thlai chi te thlakin hun an hmang chho ve zel a. An Val upa hoa chin biha kal ta te an reh rei ta riau chuan an ngaih te lam lam a ti ṭha lo ṭan ta viau mai. Chin engmah in hre lo ta chu, uluk taka an ram bawh leh khaw chhehvel te vêngin, ralṭi ang reng tak chuan hun an hmang chho ve zel a. Nihnih khat chanchin ngaihchan a, thawm ri va engmah a awm ta lo a nih chuan, an tlangvâlte sul zui a, an chin hriat ngei tumin an in puahchah ru deuh reng bawk a. Lal leh upa te pawh, mawnga hawlh ang mai chuan an za deuh chang tawh mai. Ni tinin beng an chhi kar mai a. A ṭul thuta che chhuak thei mai turin tlangvâl, râl veng lo ho pawh Zawlbuk lamah an in ring ru ṭhâm mai.

Lal leh Pasalṭhate chang an buai a ni lo, tû hriatpui ve si loh hian Liankimi leh Thanhnûni pawh an mang a ang ru hle tawh mai a. Hmêlmate chin biha kal a, kir leh mai tura an ngaihlai a, chhuan thum dâwn engmah hre lova an han awm ta mai chu an mut reng a tui thei lo. Lo kir leh tur an awm lo ang tih mawlh hlauin an beng an chhi hrâ reng mai a. An Ina chuangkai tlangvâlte titi rêngin an lung a vilh zo lo. Chanchin a chhia a ṭha hre lova hunbi chhiar liam chu harsa an ti ngang mai! Chutiang kârah chuan, Ṭhuama leh Liankimi te inkâr thu hre hauh si lo hian Tlângthanga lah chuan Liankimi chu a birh tlut tlut mai a. A ṭawngka chhuak tin mai chu Liankimi tân chuan a hneawm hluah hluah a ni ber mai. Nula tân lantir a rem si lo chuan hun hi kal muang ta riau hian a hre lehzual a!

Val upa Sairuma te ho pawh, tluang taka kal zar zarin, khan hnai leh hnuk hnai lam zawh zelin, thimhlim, bak chhe len hun velah Bunghmun an inchhir thleng ta! Khawiah mah pêng kawi lovin lal inah an chin hrilh turin an lut ta dial a. Chumi zan chu riakin, a tuk lamah an khaw lam pana inchhir chhuah zui mai an duhthute lal hnenah an thlen a. Hna ṭau a ṭeh tawh si avangin, châm tura han inchelh reng theih ni bik hek lo le, Lalruma pawhin hrethiam takin, a unaupa chu awllen remchângah tlawh ngei a tum thu a chah nghe nghe a. An lal tân chuan a Dârbu pakhat chu a hum hawtir zui bawk a ni.

(Muallung leh Bunghmun lal, thlahtu thuhmun, khaw inṭhenawm si, inhre pawh hauh lova an awm hi chhiartu ten mak in lo ti mai thei a. An khaw dinna hi inkalpawh rem tak a ni lem lova. Tin, thlang rawn tla zela, chhungkhat pawh bawh lam neia inṭhen an nih avangin, Muallung lal hmasa, Lalthanga pa ten Muallung an kai dawn pawh hian, chhim phei zawnga tlang dung inkhawh, Ṭiau chhak leh thlang indaidanna fel tak mai, in kal pawh rem lutuk lo hmuna khaw thar va sat ta an nih vang hian, an chhak lama awm khuate hre turin, khuavang ramri ṭhen fel tak a awm si avangin, luipui kana ram hauh a rem ṭeuh loh avanga in pawh ta mailo hi an ni ve bawk a ni.)

Leilung a lang ṭan det det tihah chuan, Muallung tlangvâl rual te pawh Bunghmun kawtchhuah-ah, tukhuma vaibêl pak khu liam vut vutin an her liam ta a. Chak taka tlâng leh mual te in bat liam zung zungin, chaw fak a hun meuh chuan ramri lui an hnaih kuar mai. Ram ri lui behbawma therhlo ilo vai a muan deuh tum an ni bawk a. Kangvâr lama an riah luh hman chuan an duh tawk khat viau mai. Ramri lui kanin, an ram hauh chinah chuan chaw an fak ta a. Vaibêl te zu a an chawlh vang vang hnu chuan, mahni duhna hmun lama sa pel tur chuan an vak darh ta sang sang a. Ṭhuama chuan a silai ber a ṭhianpa Duhthanga a hmantir si a. Hmun nghah pahin a kiang hnai velah chuan a thal nen chuan a tei chhuak ve ta a. Sa lam pawh a ngaihtuahnaah a lut lem lo nen, a tâwng pâwng vah vel mai mai a ni ber e. A ngaihtuahna erawh hla taka an khua, a hmangaihte lenna lamah ngawt chuan a awm a ni hawt a! A nu leh a û te mai ni loin, upa fanu, Liankimi ah chuan a ngaihtuahna a tawp chat mai. Ngaihtuah loh tuma beih ai chuan, a tâna vul tura pâr chhuahtir ngei chu a duhdan a ni miau mai. "Kumin zawng, lâwm atân sawm ngei ngei tur a ni," tia a ngaihtuah rauh rauh lai chuan, a chhak lawkah chuan Silai a puak tawi tak mai!

A ngaihtuahna kal ding lutuk nen, a phu deuh dawrh nghe nghe a. Hmuamda pawh a liam awm love, Dâra chu Sakhi paw bahlat chung hian a lam panin a rawn kal vawk vawk mai a. Chhaih buai chakna a neih thut avangin, a lo kal ngei na tur ni a a hriat, hnim buk phenah chuan a lo biru thãn mai a. Dâra lah chu an innghahna pan chuan a rawn kal vâwk vâwk mai a. A bihrukna a pel fel chiah tih chuan Dâra hnungzângah chuan Ṭhuama chu a bei chawt mai a. Dâra lah chu, a pai deuh dawt tih loh chu a kal chu a bahlah eih lo. "Kan Ṭhuambawnga te mai mai ṭhin hi a! I biru zul zul pawh ka hmuh si che mawle," tih pahin a Sakhi chu a nghat lawk a. Ram palailêngah chuan an inchelh leh ta chat mai! In bin tuma an inelh ngang ngang lai chuan an piah ruam aṭang chuan Silai a han puak dawp mai a. Chu lam chu an hawi rual ṭhawt mai a. Rei vak lo hnuah chuan Sanghal hlado han chham vang vang ri chu an hre ta a. A aw aṭang chuan Duhthanga a ni ngat mai le. Rang fahran hian Ṭhuama chuan a iptepui leh thal lain, Sakhi chu a khai lawp a, hlado chhamna lam chu a pan ta vawk vawk a. Dâra pawh chuan hmuh hman ve loh hlau niawm hrim hian a um zui vawk vawk a.

Hlado chhamna hmun an va thlen chuan, Duhthanga chuan a Nghalchang kah chu a paw rim a nam loh nân a til a lo hlep mawlh mawlh a. "Kan Buhduha zet chu, a va ropui ve le, sa lu nen khua kan lut ngei dawn e," tiin a darah an bêng ang thawk thawk a! Sanghal thau hun ni chiah tawh lo mahse, rinai takin a la mar ṭha a. Buk hran an neih lem loh avangin chulai hmunah chuan a theih ang angin Sakhi leh Sanghal chu an chan zui a. Vâl Upa leh Chalkhuma pawh rawn thleng nghalin, sa chu an phawk zung zunga, a rem dan ang anga ak leh paw bawr chungin kangvâr lam chu an pan zui nghal vang vang a. Ni a pil ruai tihah chuan ring thar chuang kaiin, Pasalṭha Dârhnûna ten râl vênga an dah te chuan an lo hmu thuai a. Râl an ni lo tih an chian hnu chuan, an buk lam panin an kal ta nghal a. Khua han ban nân a hlat tham deuh avangin, râl vêng ho bukah chuan sa te chanin ei an rêl zung zung a. Ṭhutmuan Ar khuan hun awmah chuan zanriah an bâr ta a. Buk tualah chuan an sa pawh an rep zui nghal bawk a. An kalna chin te Val upa chuan han sawi zar zarin, râl hlauhawm an hnai hmêl lo bawk nen, thin thi diaiin mut zai an rel ta a.

'Khuan hmasa an khuang vel ang e' tih awmah chuan Thanṭhuama chu a harh hlawl mai a. A mut hmunah chuan a ṭhu chhuak hlawl mai! A sir chiaha mû Darkhuma chu a han en a, a lo mutui nasa mai si a, a hnâr kûk kúk mai nen. Tihharh hlau tak chuan a tho chhuak ṭhem ṭhem a, an meipui chheh, lo thi deuh ṭhuap tawh chu chhawm nungin, a mutui lai tiharh tu, a mumang chu a ngaihtuah ta vang vang mai! Kham bakbahai, chhengchhe zet maiah hian Liankimi hi a lo tâng a, zuk khai chhuah tumin ram hrui a han theh thla a, a hrui theh thlak chu a lo ban ṭhin a, a ban pha mai si lo, tlak thlak leh hlau lutuk han ṭe tuar chuan a tiharh zawk kha a ni a. A han ngaihtuah vang vang a, a rilru chu a hmanhmawh ta et et mai. Khua inchhir thlen thuai a, Liankimi hmuh hlan mawlh chu a nghakhlel mai a. Liankimi hmuh fal dan ngawt ngaihtuah chung chuan an chawhmeh ṭhingte chu a chhuang lum zung zung a, chaw chhum a siam pah bawk a. Chutihlai chuan Duhthanga chu rawn tho chhuakin, "Ê khai, pasalṭha, i va tho hmâ ther ther ve...." a rawn tih chuan a ngaihtuahna bing tak aṭang chuan a harh zawk nghe nghe a. A lo nuih put put ringawt a! Rei vak lo hnuah an ṭhiante pawh rawn tho chhuakin, Dâra ber kher chuan, "Kan Ṭhuambawnga lunglêng mu thei lo chu, a va che zîng ther ther ve le....Vawiin lam te chu mahni zau lamte kan tlawh phawt ang chu mawle...." mei nei zet chuan Ṭhuama nuih suk chung hian a rawn ti a. Ṭhuama lah diau bik hek suh, "Keipui rilṭâmin min rum khum emaw tih mai tur khawpa bula mû ten min han rum khum chher chher mai chuan, mutthilh ngaihna awm hek lo," a'n ti deuh kher a! Dârkhuma chuan Ṭhuama chu a pan leh ta ngut ngut mai! Anni ho inkawm khawm hi, engemaw hleka han inbin leh in elh phat mai hi an chîng pek a! Ṭhuama chu val upa phenah chuan a lo biru zak zak a!

Tukṭhuan te bârin, leilung a lang det det tih velah chuan khaw lam panin an inchhir chhuak ta vawk vawk a. Tlangvâl chak rual ṭhe ṭhaw an ni bawk a. Feh kawng fai ṭha zawh an ni bawk nen, an liam zung zung mai a. Kawtchhuah an chuankai meuh chuan feh tur chhuak hmasa te nen an in tawk hman hial a ni. Mahni In lam pan hmasa loin, lal In lamah an thangna chin te thlen turin an lut nghal a. Râl vêng tlangvâl te erawh an hawsan ta kha a ni a. Pasalṭha Dârhnuna te pawh lalin a kohtir bawk a. Upate nen an kim hnu chuan, an thang nachin chu Val upa chuan kim takin a han sawi dap dap a. Bûnghmun lalin a pek, a dâr bu te a han hmuh chuan, lal chu a khi deuh sâng mai!

Lal chuan, "In hnu bih dan te kan han hria a, in hmalak dan a chhuanawm hle mai. Kan kâra hem thlak tumtu ber chutia a liam tak si ah chuan, ngaih a nuam huai mai. Bûnghmun khua zawng, a hming chauh hria kan ni nen, ka unaupa ṭhut khua a ni ang tih rin ngaihna reng ka hre law, thlang tlain an liam zui zel turah riak ka lo ngai asin! Lunghlui a lèng vawng vawng hlê mai. Awllen remchâng hmasa lam chuh ila, han chuan chhuah ngei a ngai a nih chu a!" a ti zui vang vang mai.

Pasalṭha Darhnûna chuan, "Chutiang te kan boruak a nih takah chuan, lalpa, thin thîin hun bi kan chhiar thei tawh chèk ang a. Buh tuh a hun chho mai dâwn nen, thlawhhma kawng lam pawh muangin kan zawh thei dâwn zuk nia le...! Kan tlangvâl te zârah, muangleia ṭhûin, kan hmabaka tih tur awm te kan hlen thei dawn zuk nia! Thu lawmawm a ni teh kelh e ka ti," a han ti dap dap a. Fak hluah chuang si lo hian, a nau te ho chu a chawimawi thiam hle mai.

Lalkhuma chuan, "A ni teh tak e, pasalṭha, in zârah muang leiin kan awm zel mai chu a ni e. Nangni ang ka khua leh tuia in lo seilian zet hi chu ka tân chawimawina a va ni tehlul em! Dam reng teh u!" a han ti hluai a. Pasalṭha chuan rang fahran hian, "Khaih khaih lalpa, min fak ar ek zo ang e. Nang ang lal belh nuam, mi lian leh mi tê ber thlenga thin thi diai leh ngam sarha kan lawi theihna khua ang hi khawi dangah awm hian ka ring lo. I rorelna hnuaiah zet zawng, tute mai pawh hi kan lian lurh mai a nih hi!" a han ti ve zat a.

Chumi nî chuan lo lam hna thawka chhuak an tlêm kher mai. A chhuak chhun te pawh Thlâm chàk la khawm leh thlai chi thlak zo lo, thlak chhunzawm te an ni ber a. Liankimi te pawh, a nu leh a unaute chu thlawhhma kawng zawh pâwlah an tel thung a. Ani erawh zawng, in nghaka, ei rêl turin an liamsan ta kha a nia. Thanṭhuama te pawh, an hah rim tawng deuh nen, chumi ni chuan eng tih zai rel loin, an val upa ho chuan silai mu tur thir te lakhawmin, thir dêng pa hnenah kalin, ti ti suah suah chungin Silai mu tur an buaipui a ni. Ṭhuama chuan a rilru luahtu ber hmu tura a chhun a chhuna an In han chuankai mai chu a duh rum rum hial mai. A ṭhiante kiangah pawh chuan, an bia a nih ngawt loh chuan a ngaihtuahna kawmin, a thlir ngai a lo thlir leh vung vung ṭhin a. A mumang bawk chuan a ngaihtuahna a luh leh ṭhin. Chutianga Ṭhuama awm chu Darkhuma chuan hai hek lo, "Ti teh, Dârlungleng, kan in i han chuangkai lawk teh ang. Ka thir dah ṭhat ka keng kim hauh lo," tih pah chuan Ṭhuama nakah a han kheuh hlawk mai a! Ṭhuama pawh a kang awk mai! In tuai deuh nawk nawk chung chuan an in zui chhuak ta a.

An kal liam chauh a, Val upa chuan, "Hemi te pahnih hi tu tak chak zawk ang maw!? Khawi lo han chhuak hlek ila, hun remchâng an hmuh hi chuan an in man leh chawt mai ṭhin a! Zanin lam chu, in nuaitir dan dap ila, hmuhnawm an tling ngat mai dawn si a!" a ti zui vang vang a! Thir chhut mum mawlh mawlh pah hian Thir dêng, Hratliana pawh chuan, "Ani teh tak e, hemi te pahnih hi han inelh ngat mahse, mit pawng zawrh zawrha en tham an ni ngei ang, an fuke a hrawl dunin, an taksa a phiar dun nen, thlir tham tak an ni ngei ang le, pian rèng an thiam dun mai," a han ti vei ngial a! Duhthanga chuan, "Ngawi teh ka pa Hrat, han inbei teh tak se, a hnehtu zawk chu kei hian ka bin ngat ang!" a lo tih chuan an nui ham ham a.

Darkhuma te chhuak ta pawh chuan lal in an pan vang vang a, lal in thlen hma deuh a Upa Tâwna te In lo reh ṭhiap mai chu Dâra chuan a thlek dâk dâk a. Kawngkâ chu thingfakin an do lem lo bawk a. Ṭhuama pawh be râwn tawh chuang lo chuan Liankimi te kaiṭenah chuan a'n per kai thurh a. Sum hmun a kai nghal chu a ni der mai. Ṭhuama pawh chuan loh theih lohin a zui chho ta a. Sum hmun a thlen meuh chuan, "In awm ém, lo lawi luh a rem em lê," tiin Dâra chu Tlengrel nawr tawlh mai in ringin a lo ding fel ut tawh a. "Awm é, lo lut tawh u," tih ri a hriat chuan, Ṭhuama chu a lungphû a inrawn tlut tlut nghal mai. Liankimi chuan kawngkhar rawn nawr tawlin, "Aw hawi, lah kan lal fapa te ni rengin, law haw rawh u, a rem lai laiah in mawng lo hûng tawh u." tiin ṭhutna a lo pe sawk sawk a. Dâra chuan, "I chhungte an ram kal zo em ni le, in va reh teh diak ve?" tiin ṭhut hmun a han rem a. "Nia, hei, in nghakah min dah a nih hi maw, ka nu hoin thlai thlak pahin kangvâr lam an zuk bih a. Ka pa te in awm ve lah rin tlak ni nghal lo chuan...." tiin a lo chhâng var a! Dâra chuan, Upa Tâwna chu a lo haw mai dawn lo tih a hria a, a chhungte nise, ni tlak hmà chuan an rawn thleng dawn lo tih a chiang bawk nen, a lû tuai vut vutin, "Ṭhuamlungleng, awh, Ṭhuamkhawhar, ah...ngawi teh, silai mu tur thir ka han lam lawk tang e, lo inkawm teh u," tiin a tho vut a! Liankimi hmuh loh lamah chuan Ṭhuama chu lei a han chhuah khum ngawt a!

A han ṭawng duh dan chu Ṭhuama run tawk a tling meuh mai. Han tih vak ngaihna hre lo ta chu, a kut tum a han lek khum uaih a! Dâra chhuah hnu chuan Liankimi kiangah chuan a insawn thuai a. Thup leh zah ṭit ṭet hun a ni lo tih hriain, "Kimi," han tih sap pahin a ṭhut hnaih sauh a! "Kimi, hun inher dan teh thut thut hian min va tibuai si em! I hmêl hmu lova ni vui liam harsat zia hi, engtia han sawifiah dan lah ka thiam lo, ka va ngai si che em!" a han ti tawl mai a. Liankimi pawh a inthunun hman bik lo, "Ṭhuama, ni tam la liam lo mahse, i hmêl tawn loh kâr ni hi a va rei si em!" tiin Ṭhuama awmah chuan a han bei thlawp mai a. Thu in hmun a chang zo ta lo, lungchim taka lo kuah vawng vawngin, a taksa pêng tin mai chu a ṭan hian a ṭang ṭeuh ni mai hian a hria a. Ni, hemi te awmdan hi, dema, han sel ngawt theih pawh an ni love. Furpui vawi sawmhnih em pawh la tuar lo, khawkhat nulâ tlangvâl chhuanvawr ni chunga tu zun mahin a phuar loh te, hunbi herin an inkâra hmangaihna tarlanna hun a herchhuahpui miau a ni. An inkâra hmangaihna chawr no mêk hi, an tân chuan thil thar azawnga duhawm ber mai, an hriatrengna bâwm luah khat tlat tawh tur a ni si a!

Thu dang reng sawi lova, ṭhenhran theih rual loh ni awm hrima an in kuah vawng vawng lai chuan, Darkhuma chu tualah chuan a rawn khuh kharh a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)